ၶႅၵ်ႇ/တွၼ်ႈသိပ်းၵဝ်ႈ
ၸၢႆးၼွင်ႉ ၶၢႆႉမႃးယူႇၸွမ်းၸၢႆးၸၢႆးၶဝ်သေ ၶႃသွင်ၵေႃႉလုင်းသၢင်ႇတုၺ်ႉ မႃးဢုပ်ႇၵၼ်ယူႇ ၊ ၸၢႆးၼွင်ႉၸင်ႇဝႃႈ -
“ လုင်းသၢင်ႇတုၺ်ႉ ... လူဝ်ႇလႆႈႁဵတ်းသင် လူဝ်ႇလႆႈၸွႆႈသင်ၼႆၵေႃႈ လၢတ်ႈၼႄၶႃႈၼႃႈ ... ၶႃႈတေႁဵတ်းပၼ်ယူႇဢေႃႈ ... ”
“ ဢိူဝ်ႈ ... ဢိူဝ်ႈ ... လုင်းတေလၢတ်ႈၼႄလႆ ... ၸၢႆးၼွင်ႉ ၽႅဝ်မႃးတီႈၼႆႈ လုင်းတႄႉၸူမ်းဝႃႈၸူမ်းယဝ်ႈ ... လုင်းၵေႃႈ ထဝ်ႈမႃးၵူႈမိူဝ်ႈၵူႈဝၼ်းလႄႈ ဢမ်ႇလၼ်းၵၼ်းမိူၼ်မိူဝ်ႈၼုမ်ႇ ဢမ်ႇမီးႁႅင်းႁဵတ်း မိူၼ်မိူဝ်ႈၼုမ်ႇယဝ်ႉ ႁေး ... ၵၢၼ်ၸၢႆးၼွင်ႉတႄႉ ၵၢင်ၼႂ်ပတ်းဝၢင်းၽဵဝ်ႈဝၢင်းသေ ႁူတ်းသူၼ်မွၵ်ႇ လုမ်းလႃးသူၼ်မွၵ်ႇလႄႈ ...ၸွင်ႇၸၢႆးၼွင်ႉမေႃၽုၵ်ႇသွမ်ႈ မေႃလုမ်းလႃးတူၼ်ႈမွၵ်ႇၸိူဝ်းၼႆႉႁိုဝ် ... ? ”
“ မေႃယူႇဢေႃႈ ... ”
“ ပေႃးမေႃၼႆ ၶႅမ်ႉၽႅဝ်ဢိူဝ်ႈ ... ပေႃႈလဵင်ႉလူင်ႁဝ်းၼႆႉ မၼ်းလႆႈၸႂ်တူၼ်ႈမွၵ်ႇသူၼ်မွၵ်ႇတႄႉတႄႉယဝ်ႈ ... ၼႂ်းသူၼ်ၼႂ်းႁိူၵ်ႈ ထုၵ်ႇလီၽဵဝ်ႈတီႈလႂ် ထုၵ်ႇလီပတ်းတီႈလႂ်ၼႆၵေႃႈ ... တူၺ်းတူၺ်းသေ ၶပ်ႉၶိုင်ႁဵတ်းသၢင်ႈၵႂႃႇ ႁႂ်ႈၶႅမ်ႉလႅပ်ႈတူၺ်းႁၢင်ႈလီၼၼ်ႉ ယဝ်ႉၼႃႇ ... ”
“ ဢေႃႈ ... ဢေႃႈ ... ”
“ ဢေႃး ... ၸၢႆးၼွင်ႉ ... တီႈႁိူၼ်းၼႆႉ မႄႈလဵင်ႉႁဝ်းႁၢမ်ႉၸႂ်ပွတ်းဢိတ်းဢိတ်းသေ ၵႆႉမေႃပွင်ႉလႃႇပိူၼ်ႈဢိူဝ်ႈမႂ်း ... ၵူၺ်းၵႃႈ ၸၢႆးၼွင်ႉယႃႇပေပေႃးဢဝ်သႂ်ႉၸႂ်ၼႃႈ ... ႁဝ်းပဵၼ်ၵူၼ်းယူႇႁူမ်ႈပိူၼ်ႈၼႆ ႁဝ်းလူဝ်ႇလႆႈ မေႃယိူၼ်ႉၵၼ်ႈယဝ်ႈ ... ဢမ်ႇၸႂ်ႈႁႃႉ... ”
“ ၶႃႈ ... တေယိူၼ်ႉၵၼ်ႈယူႇဢေႃႈ ... လုင်း ... ”
“ ပေႃး ... မႄႈလဵင်ႉလၢတ်ႈ ၸၢႆးၼွင်ႉတွင်းဝႆႉၶႅမ်ႉၶႅမ်ႉသေ ၶတ်းၸႂ်ႁဵတ်း ႁႂ်ႈမႅၼ်ႈၸႂ်မၼ်းၼႃႈ ... လုၵ်ႈၸၢႆးၶဝ်ၸၢႆးၸၢႆးၼႆႉတႄႉ ၶဝ်ဢဝ်ၶၢပ်ႈမႃး ၸဵမ်မိူဝ်ႈလဵၵ်ႉလႄႈ မၼ်းႁၢမ်ႉၶႃႇၵႄႇဝႆႉ တၢၼ်ႇတၢၼ်ႇယဝ်ႈ ၵွပ်ႈၼႆ ၸၢႆးၼွင်ႉၶဝ် ပဵၼ်ၵူၼ်းၼုမ်ႇၼင်ႇၵၼ်လႄႈ လူဝ်ႇလႆႈမေႃဝႆႉၸႂ် ယိုၼ်းယၢဝ်း ယိူၼ်ႉၵၼ်ႈတေႃႇၵၼ်ႁႅင်းႁႅင်းယဝ်ႈ ... ၼႃႈ ... ”
“ ဢေႃႈ ... တမ်းၸႂ်ၶႃႈ ... လႃႈ ...”
ႁဵတ်းၼၼ်သေၸၢႆးၼွင်ႉၶတ်းၸႂ်ႁဵတ်းၵၢၼ် လုမ်းလႃးသူၼ်မွၵ်ႇၵူႈပိူင်ပိူင်ယူႇ၊ ၽိူဝ်မႆႉႁႅင်ႈ ၸိူဝ်းၼႂ်းဝၢင်းႁိူၼ်း ၸိူဝ်းၼၼ်ႉၵေႃႈ မၼ်းၸၢႆးမႄးၵဵပ်းမႄးပတ်းၵွင်ၵၼ်သေ မၼ်းၸၢႆးၸုတ်ႇၽႆးပႅတ်ႈယူႇ ၊ ၸၢႆးၼွင်ႉ ၼင်ႈပႂ်ႉၵွင်ၽႆးသေ လွမ်တူၺ်းၽႆး ဢၼ်မႆႈမႂ်မႆႉႁႅင်ႈၼၼ်ႉယူႇ ၊ ၵႂၼ်းၽႆးမၼ်းၼၼ်ႉ ပိဝ်ၶိုၼ်ႈၵႂႃႇၸွမ်းလူမ်းသေ ၵႂႃႇမိုတ်းသႂ်ႇ တီႈၽၵ်းတူႁူးလႅင်း ၸၢႆးၸၢႆး ဢၼ်တိုၵ်ႉတႅမ်ႈလိၵ်ႈယူႇ ၼၼ်ႉယဝ်ႈ ။
ယွၼ်ႉပိူဝ်ႈ ၵႂၼ်းၽႆးၶဝ်ႈတႃမၼ်းလႄႈ ၸၢႆးၸၢႆးတႃၽဵတ်းၼႃႇသေ ႁွင်ႉပၢဝ်ႇ ထၢမ်လုင်းသၢင်ႇတုၺ်ႉ ယူႇ -
“ လုင်းသၢင်ႇတုၺ်ႉ ... လုင်းသၢင်ႇတုၺ်ႉ ... ၽႂ်ၸုတ်ႇၽႆး ၼႂ်းသူၼ်ၼႆႉ ... ၽႆးၵႂၼ်းၼႃႇဢိူဝ်ႈ ... ”
လုင်းသၢင်ႇတုၺ်ႉ ၸင်ႇၼႅတ်ႈဢႅၼ်ႇမႃးၸူးၸၢႆးၸၢႆးသေ -
“ ဢေႃႈ ... ပဵၼ်ၸၢႆးၼွင်ႉၸုတ်ႇဢိူဝ်ႈ ... ၸၢႆး ... ”
“ တွၵ်ႉ ! ... ”
ၸၢႆးၸၢႆးၶတ်းပၢၵ်ႇၵမ်းၼိုင်ႈ မၼ်းဢိုတ်းၽၵ်းတူႁူးလႅင်မၼ်းသေ ဢွၵ်ႇၵႂႃႇၸူးၸၢႆးၼွင်ႉ ၼႂ်းသူၼ်ၵမ်းလဵဝ်ယဝ်ႈ ၊ မၼ်းၽႅဝ်ၵႂႃႇႁိမ်း ၸၢႆးၼွင်ႉသေ တဝ်ႉဢႅင်ႈလၢတ်ႈဝႃႈ -
“ ႁေႉ ... ဢၢႆႈၼွင်ႉ ... ႁဵတ်းသင် မႂ်းၸုတ်ႇၽႆးၵႂၼ်းပေႃးပဵၼ်တၢၼ်ႇၼႆႉ ... ”
ၸၢႆးၼွင်ႉၵေႃႈ ဝၢႆႇတူဝ်တူၺ်း ႁၼ်ၸၢႆးၸၢႆးသေ -
“ ဢေႃႈ ... ပီႈၸၢႆး ...ၽႆးပႆႇၸပ်းလီလႄႈ မၼ်းၵႂၼ်းဢေႃႈ”
ၸၢႆးၼွင်ႉဝႃႈၼၼ်သေ ၶိုၼ်းသိုပ်ႇပဝ်ႇၽႆးႁႂ်ႈလုၵ်ႇယူႇ ၊ ၸၢႆးၸၢႆး တေၶိုၼ်းသိုပ်ႇဝႃႈႁိုဝ်ၵေႃႈ မၼ်းႁႃၵႂၢမ်းဢမ်ႇလႆႈလႄႈ မၼ်းလွမ်ၸႂ်လမ်ယူႇ၊ ၸၢႆးၼွင်ႉပဝ်ႇၽႆးသေ ၽႆးမၼ်းလုၵ်ႉလီယဝ်ႉလႄႈ မၼ်းၸင်ႇဝႃႈ -
“ ၼေႈ ... ပီႈၸၢႆး ... ၽႆးလုၵ်ႉၶႃႈယဝ်ႈ ... ၵမ်းၼႆႉတႄႉ ဢမ်ႇၵႂၼ်းၶႃႈယဝ်ႈ ... ”
“ ဢိူဝ်ႈ ... တၢင်ႇပွတ်ႈမႃး ယႃႇပေၸုတ်ႇထႅင်ႈ ...”
“ ဢႃ ... ပီႈၸၢႆး ... ပေႃးဢမ်ႇၸုတ်ႇပႅတ်ႈၼႆ တေၵႂႃႇပႅတ်ႈတီႈလႂ်ၶႃႈလႃႇ ... ? ”
“ ပေႃးၵႃးတၢင်ႇယုၵ်းယၢၵ်းမႃး ၼႆ ဢဝ်ၵႂႃႇသႂ်ႇၼႂ်းၵႃးဢိူဝ်ႈ ”
“ ပေႃးၸုတ်ႇၽႆးၼႆ ... လီဢေႃႈ ပီႈၸၢႆး ... ၽဝ်ႇတဝ်ႈမၼ်းၸိူဝ်းၼႆႉၵေႃႈ ၶိုၼ်းဢဝ်ႁဵတ်းၽုၼ်ႇဢေႃႈ ...ယွၼ်ႉပိူဝ်ႈ ဢၢႆၽႆးၵႂၼ်းၽႆးသေ မူင်ႈမႅင်း ဢၼ်ယႃႉတူၼ်ႈမႆႉၸိူဝ်းၼၼ်ႉၵေႃႈ ပၢႆႈဢေႃႈ ... ”
ၸၢႆးၼွင်ႉတႄႉ ၼွမ်းတူဝ်ၼွမ်းၵႂၢမ်းလၢတ်ႈလီလီယူႇလႄႈ ၸၢႆးၸၢႆး ဢမ်ႇၸၢင်ႈႁဵတ်းႁိုဝ် တွပ်ႇၵႂၢမ်းမၼ်းလႄႈ မၼ်းၶၢမ်ႇယၢပ်ႇဝႆႉႁင်းၵူၺ်းမၼ်းယူႇ၊ မၼ်းၸင်ႇၶိုၼ်းဝႃႈ -
“ ႁေႉ ... ဢၢႆႈၼွင်ႉ ... ၶူးလၢႆးဢၼ်မႂ်းဝႃႈၼႆႉ ပဵၼ်ၶူးလၢႆးဝၢၼ်ႈၼွၵ်ႈၵူၺ်းဢိူဝ်ႈ ... မၼ်းဢမ်ႇၶိုတ်းၵၢပ်ႈယဝ်ႉ ... ၵၢပ်ႈပၢၼ်တေႃႈလဵဝ် ပိူၼ်ႈၸႂ်ႉတိုဝ်း ယႃႈသိတ်းမူင်ႈမႅင်းဢိူဝ်ႈ ... ပိူၼ်ႈၸႂ်ႉၽုၼ်ႇထၢတ်ႈဢိူဝ်ႈ မႂ်းၶႂ်ႈႁူႉၵေႃႈ ... ”
“ ပီႈၸၢႆး ... ၽုၼ်ထၢတ်ႈ ယႃသိတ်းမႅင်းၸိူဝ်းၼၼ်ႉလီယူႇ... ၵူၺ်းၵႃႈ မၢင်မဵဝ်းၼႆႉ မၼ်းဢမ်ႇမႅၼ်ႈ ၼမ်ႉလိၼ်ႁိၼ်ၽႃ မိူင်းႁဝ်းလႄႈ ဢမ်ႇပေႃးတူၵ်းထုၵ်ႇၼင်ႇၵဝ်ႇ သႄႈ ... ”
“ ႁေႉ ... ဢၢႆႈၼွင်ႉ ... ယႃႇပေၵႂၢမ်းၼမ်ယူႇယဝ်ႈ ... တၢင်ႇပွၵ်ႈမႃး ယႃႇပေၸုတ်ႇထႅင်ႈ ႁူႉႁိုဝ်ႉ ... ”
ၽွင်းၼၼ်ႉ လုင်းၸၢႆးတုၺ်ႉ ၽႅဝ်မႃးသေ မႃးလၢတ်ႈဝႃႈ -
“ ၸၢႆးၸၢႆး ... ပဵၼ်လုင်းၸႂ်ႉၸုတ်ႇဢိူဝ်ႈ ... တၢင်ႇပွၵ်ႈမႃးၼႆ လုင်းတေႁႂ်ႈၶၢႆႉၵႂႃႇၸုတ်ႇ တၢင်းပုၼ်ႉလႆ ... ”
ၸၢႆးၸၢႆး ထူၺ်ႈၸႂ်လူင်ၵမ်းၼိုင်ႈသေ ၶဝ်ႈမိူဝ်းၵႂႃႇၼႂ်းႁိူၼ်းယဝ်ႈ၊ လုင်းသၢင်ႇတုၺ်ႉ ၸင်ႇလွမ်တူၺ်း ၼႃႈၸၢႆးၼွင်ႉသေ -
“ ၸၢႆးၼွင်ႉ ... တၢင်ႇပွၵ်ႈမႃးၼႆ ယႃႇပေၸုတ်ႇတၢင်းႁူဝ်လူမ်းၼႆႉ ၼႃႈ ... ၶၢႆႉၵႂႃႇၸုတ်ႇ တၢင်းပုၼ်ႉၼႃႈ ... ”
“ ဢေႃႈ ... ဢေႃႈ ... ”
“ မိူဝ်ႈၼႆႉ ... ပေႃးၸၢႆးၼွင်ႉ ၵိၼ်ၶဝ်ႈယဝ်ႉၼႆ ယႃႇပေလိုမ်းဢွႆႇ ၶဝ်ႈမႃသွင်တူဝ်ၼၼ်ႉၼႃႉ ”
“ ဢေႃႈ ... မႃဢွၼ်ႇသွင်တူဝ်ၼၼ်ႉ ၶႃႈတေတၢင်ႇပၼ်ၸိုဝ်ႈၶဝ်ဢေႃႈ ... လုင်းသၢင်ႇတုၺ်ႉ ... ”
“ တေတၢင်ႇဝႃႈႁိုဝ် ၸၢႆးၼွင်ႉ ... ”
“ မႃတူဝ်ယုၺ်းၼၼ်ႉ ၶႃႈတေႁွင်ႉဝႃႈ ... ဢၢႆႈယုၺ်းၼႆဢေႃႈ မႃလမ်ဢွၼ်ႇႁူဝ်တႃမဵတ်ႉၶၢဝ်ၼၼ်ႉ တႃမၼ်းမိူၼ်မီးသီႇလုၵ်ႈလႄႈ ၶႃႈတေႁွင်ႉဝႃႈ ဢၢႆႈသီႇတႃ ၼႆဢေႃႈ ... ဢမ်ႇလီၼႄႇ လုင်း ... ”
“ ႁႃး ... ႁႃး ... ႁႃး ... လႅပ်ႈယူႇၵူၺ်း ... ”
မႃဢွၼ်ႇသွင်တူဝ်ၼၼ်ႉ ၸၢႆးၼွင်ႉ လႆႈဢွႆႇလဵင်ႉၶဝ်ႈၶဝ်ၵူႈဝၼ်းလႄႈ ၶႃမိုတ်ႈ ၸၢႆးၼွင်ႉတႄႉတႄႉ၊ ယွၼ်ႉပိူဝ်ႈ ၸၢႆးၼွင်ႉၵႆႉႁွင်ႉၸိုဝ်ႈၶႃ ဢၢႆႈယုၺ်း ဢၢႆႈသီႇတႃ ၼႆလႄႈ ၶႃသမ်ႉပေႃးတွင်းၸိုဝ်ႈၶႃႈသေ ပေႃးငိၼ်း သဵင်ၸၢႆးၼွင်ႉ ႁွင်ႉၶႃၼႆ ၶႃမီးတီႈလႂ်ၵေႃႈ ဢႅၼ်ႇမႃးၸူး ၸၢႆးၼွင်ႉၵမ်းလဵဝ်ယဝ်ႉ ။