ၶႅၵ်ႇ/တွၼ်ႈသိပ်းဢဵတ်း
ၸၢႆးသႅင် ဢွၼ်ၸၢႆးၼွင်ႉသေ မႃးပႆလဵၼ်ႈ ၼႂ်းသူၼ်ၼႂ်းဝၢင်းႁိူၼ်းၶဝ်ယူႇ -
“ ၸၢႆးၼွင်ႉ ... တေၶႂ်ႈၵႂႃႇဢႅဝ်ႇတီႈလႂ် ... ? မိူဝ်ႈၼႆႉ ... ”
ၸၢႆးၼွင်ႉ ထူၺ်ႈၸႂ်လူင်ၵမ်းၼိုင်ႈသေ -
“ တေလႂ်ၵႂႃႇဢႅဝ်တီႈလႂ်ၵေႃႈ ဢမ်ႇႁူႉလူင် ... ၶွင်ဢမ်ႇယၢမ်ႈၽႅဝ်တႃႈၵုင်ႈ သေပွၵ်ႈလူး ... ”
ၶႃသွင်ၵေႃႉ မႃးၼင်ႈတင်ႇ တီႈၼိုင်ႈသေ ၸၢႆးၼွင်ႉလႆႈႁၼ် မိုဝ်းၼိဝ်ႉၸီႉၽၢႆႇသၢႆႉ ၸၢႆးသႅင် မီးဝႆႉ ဢၢတ်းႁွႆးၽႃႉမၢတ်ႇတိူဝ်ႉဝႆႉလႄႈ မၼ်းၸင်ႇထၢမ် -
“ မိုဝ်းပီႈၸၢႆးသႅင် ပဵၼ်သင်ဝႆႉၼႆႉ ... ? ”
“ ဢေႃ ... မိူဝ်ႈႁဝ်းၵေႃႉလဵၵ်ႉၼၼ်ႉ ႁႃးပီႈၼွင်ႉဢဵၼ်ႈၽႃႉလႄႈ ပဵၼ်ႁွႆးၽႃႉတိူဝ်ႉဢိူဝ်ႈ ... ”
ၸၢႆးၼွင်ႉ ဝူၼ်ႉၸွမ်းမိူၼ်လွင်ႈမၼ်း မိူဝ်ႈလဵၵ်ႉလႄႈ မၼ်းပဵၼ်ဢၼ်ၸူမ်းၵႂႃႇတႄႉတႄႉသေ ဢၢင်ႈထၢမ်ထႅင်ႈ မဵဝ်းၼိုင်ႈယူႇ ၊ ၽွင်းၼၼ်ႉ ၽူၺ်းၽႅဝ်မႃးႁိမ်းၶႃသွင်ၵေႃႉသေ -
“ ဢေႃး ... ... ပီႈၸၢႆးသႅင်လႄႈၸၢႆးၼွင်ႉ မႃးမီးတီႈၼႆႈႁႃႉ ဢုပ်ႇၵၼ်လွင်ႈသင်ၵူၺ်းၵူၺ်း ... ? ”
ၸၢႆးသႅင် ၸင်ႇဝႃႈ -
“ ဢေႃး ... ၸၢႆးၼွင်ႉထၢမ် လွင်ႈၽႃႉတိူဝ်ႉမိုဝ်းပီႈၸၢႆးသႅင် မိူဝ်ႈလဵၵ်ႉၼၼ်ႉလႄႈ တိုၵ်ႉၶိုၼ်းၶႆႈၼႄမၼ်း ဢိူဝ်ႈ ... ”
“ ဢေႃ ... မိူဝ်ႈၽူၺ်းလႄႈ တင်းပီႈၸၢႆးသႅင် ပွၵ်ႇၵိၼ်ဢွႆႈၼၼ်ႉႁႃႉ ... ? ၸွင်ႇၸႂ်ႈ ... ? ”
“ ၸႂ်ႈဢိူဝ်ႈ ... ၽူၺ်း ... ”
လႆႈငိၼ်းၽူၺ်းလႄႈၸၢႆးသႅင် ဢုပ်ႇၵၼ်ၼင်ႇၼၼ် လွင်ႈဝႃႈ ၸၢႆးသႅင် ဢမ်ႇၸႂ်ႈပီႈဢၢႆႈမၼ်းၼႆ ၸၢႆးၼွင်ႉႁူႉထိုင်သေ ထၢတ်ႈၸႂ်ၶႂ်ႈတူၵ်းၵႂႃႇယဝ်ႉ ၊ ၽူၺ်းၸင်ႇလွမ်တူၺ်း တီႈဢုမ်မွၵ်ႇၼၢင်းသီသေ လၢတ်ႈဝႃႈ-
“ ၸၢႆးၼွင်ႉ ... ဢုမ်မွၵ်ႇၼႆႉ ၸွင်ႇၸၢႆးၼွင်ႉ တိုၵ်ႉတွင်းႁိုဝ် ပဵၼ်ဢၼ်ၽူၺ်းသိုဝ်ႉမႃး တီႈၸၢႆးၼွင်ႉၼၼ်ႉဢိူဝ်ႈ ၼႆႉ ... ”
ၸၢႆးၼွင်ႉၵေႃႈ လွမ်တူၺ်းၵႂႃႇ တီႈၽူၺ်းၸီႉၼႄၼၼ်ႉသေ လႆႈႁၼ်မွၵ်ႇၼၢင်းသီ ၵီႈၶွင်ႇႁၢင်ႈလီဝႆႉယူႇ ။
“ ၽူၺ်း ... ၵိင်ႇဢၼ်တႅင်ႉ ဢၼ်ၵႄႇမၼ်းၼၼ်ႉ လႆႈတႅပ်းပႅတ်ႈဢိူဝ်ႈ ... တေဢမ်ႇလႆႈသေလၢႆၼႃ ... ”
“ တႅပ်းပႅတ်ႈႁဵတ်းသင် ... ? ၽူၺ်းၶဝ်ဢမ်ႇၸႂ်ႈၸဝ်ႈသူၼ်လႄႈ ႁိုဝ်တေႁူႉ ... ပေႃးၼႆ ၸၢႆးၼွင်ႉ ၵႅတ်းပၼ်လႄႈၼႃႈ ... ၽူၺ်းတေၵႂႃႇဢဝ် ၵိမ်းၵႅတ်းမွၵ်ႇမႃး ... ”
ၽူၺ်း ၶဝ်ႈမိူဝ်းၵႂႃႇ ၼႂ်းႁိူၼ်းသေ မိူဝ်းဢဝ်ၵိမ်းၵႅတ်းမွၵ်ႇယူႇ ၸၢႆးသႅင် ၸင်ႇထၢမ်ဝႃႈ -
“ ၸၢႆးၼွင်ႉ ... ယၢမ်ႈၽုၵ်ႇသူၼ်မွၵ်ႇမႃး ... ယူႇႁႃႉ ... ? ၼႆႉ ... ”
“ ယၢမ်ႈဢိူဝ်ႈ ... ပီႈၸၢႆးသႅင် ... ”
“ ဢိုဝ်ႈ ... ပေႃးမေႃၽုၵ်ႇသူၼ်ၼႆတႄႉ ၵျႃႉၽႅဝ်ဢိူဝ်ႈ ၼေႃ ၸၢႆးၼွင်ႉ ... ? ”
“ ဢေႃႈ ... ပိူၼ်ႈဝႃႈ ပေႃးၶႂ်ႈၵျေႃႇၼိုင်ႈမူင်း ႁႂ်ႈၵိၼ်လဝ်ႈ ... ပေႃးၶႂ်ႈၵျေႃႇသၢမ်ဝၼ်း ႁႂ်ႈဢဝ်မေး ... ပေႃးၶႂ်ႈၵျေႃႇပႅတ်ႇဝၼ်း ႁႂ်ႈထိူဝ်ၵိၼ်မူၸဝ်ႈၵဝ်ႇ ... ပေႃးၶႂ်ႈၵျေႃႇတေႃႇၸူဝ်ႈ ႁႂ်ႈၽုၵ်ႇတူၼ်ႈမႆႉမၢၵ်ႇမွၵ်ႇ... ၼႆယဝ်ႉ ... ...”
ၸၢႆးသႅင် ပႆႇယၢမ်ႈငိၼ်းၵႂၢမ်းၶေႃႈၼႆႉလႄႈ မၼ်းလႆႈၸႂ်ၵႂႃႇတႄႉတႄႉသေ -
“ ၸၢႆးၼွင်ႉ ... ဝႃႈႁိုဝ်ၵေႃ ... ? ၵႂၢမ်းသီႇၶေႃႈ ၼၼ်ႉ ဝႃႈႁိုဝ်ၵေႃ ... ? ပေႃးၶႂ်ႈၵျေႃႇၼိုင်ႈမူင်း ... ”
“ ႁႂ်ႈၵိၼ်လဝ်ႈ ... ”
“ ပေႃးၶႂ်ႈၵျေႃႇသၢမ်ဝၼ်း ... ? ”
“ ႁႂ်ႈဢဝ်မေး ... ”
“ ပေႃး ၶႂ်ႈၵျေႃႇပႅတ်ႇဝၼ်း ... ”
“ ႁႂ်ႈႁႅမ်ၵိၼ်မူၸဝ်ႈၵဝ်ႇ ... ”
“ ပေႃး ၶႂ်ႈၵျေႃႇတေႃႇၸူဝ်ႈ ... ? ”
“ ႁႂ်ႈၽုၵ်ႇတူၼ်ႈမႆႉမၢၵ်ႇမွၵ်ႇ ... ”
“ ၵႂၢမ်းၸိူဝ်းၼႆႉ ၸၢႆးၼွင်ႉငိၼ်းမႃး တီႈလႂ် ... ? ”
“ ဢေႃႈ ... ပဵၼ်ၵႂၢမ်းၵူၼ်းထဝ်ႈၶဝ် လၢတ်ႈဝႆႉလႄႈ လႆႈတွင်းဝႆႉဢေႃႈ ... ”
ၽွင်းၼၼ်ႉ ၽူၺ်းဢဝ်ၵိမ်းၵႅတ်းမွၵ်ႇသေ ၶိုၼ်းၽႅဝ်မႃးယဝ်ႉ -
“ ၸၢႆးၼွင်ႉ ... ယေႃႈ ထုၵ်ႇလီႁဵတ်းႁိုဝ်ၵေႃႈ ႁဵတ်းလႄႈ ...”
ၸၢႆးၼွင်ႉ ႁပ်ႉဢဝ်ၵိမ်းၵႅတ်းမွၵ်ႇၼၼ်ႉသေ ၵႅတ်းပႅတ်ႈၵၢၼ်ႈၵိင်ႇတႅင်ႉ ၵၢၼ်ႈၵႄႇမၼ်းယူႇယဝ်ႉ ၸၢႆးၼွင်ႉၸင်ႇထၢမ် -
“ တီႈတႃႈၵုင်ႈၼႆႉ ... ၸွင်ႇပိူၼ်ႈလူဝ်ႇ ၵူၼ်းလုမ်းလႃးသူၼ်မွၵ်ႇႁိုဝ်ၵေႃႈ ဢမ်ႇႁူႉၼေႃ ... ? ”
“ ၸၢႆးၼွင်ႉ ... တေၶႂ်ႈႁဵတ်းသင် ... ? ”
“ ဢေႃႈ ... သင်ဝႃႈ ပိူၼ်ႈလူဝ်ႇၼႆ ၶႂ်ႈၵိၼ်ၸၢင်ႈႁူဝ်လိူၼ်သေ ႁဵတ်းၵူၼ်းလုမ်းလႃးသူၼ်ၼႆၵႂႃႈ ... ”
ၸၢႆးသႅင်ၸင်ႇထၢမ်ဝႃႈ -
“ ၸၢႆးၼွင်ႉ ... ဝႃႈတႄႉႁႃႉၼႆႉ ... ? ”
“ ဝႃႈတႄႉတႄႉ ဢေႃႈ ... ပီႈၸၢႆးသႅင် ... ”
“ ၸၢႆးၼွင်ႉ ... ၽူၺ်းၶဝ် တေၸွႆႈထၢမ်ႁႃပၼ် လႆ ... ”
“ ၸူမ်းယဝ်ႉ ... ၽူၺ်း ... ၶႅၼ်းတေႃႈ ၸဵဝ်းႁႃပၼ်ႁႂ်ႈလႆႈ ၽႂ်းၽႂ်းဢိတ်းၼိုင်ႈ ... ၼႃႈ ... ”
“ ပေႃးလႆႈ မိူဝ်ႈၽုၵ်ႈၼႆ... ၸၢႆးၼွင်ႉတေၵႂႃႇၵမ်းလဵဝ်ႁႃႉ ...”
“ လႆႈမိူဝ်ႈၽုၵ်ႈၵေႃႈ ၵႂႃႇမိူဝ်ႈၽုၵ်ႈ ဢိူဝ်ႈ ... ၽူၺ်း ... ”
“ ၽူၺ်းတူၺ်းၸၢႆးၼွင်ႉ ဢၢပ်ႈငဝ်ဢိူဝ်း ၼႆႉ ... ဢမ်ႇမိူၼ် မိူဝ်ႈႁဝ်းႁၼ်ၵၼ်တီႈမေႇမဵဝ်ႉၼၼ်ႉ ၵူၺ်း ... ”
“ ၽူၺ်းထၢင်ႇလႄႈဝႃႈၵႂႃႈ ... ”
“ ၸၢႆးၼွင်ႉ မီးလွင်ႈတိူဝ်ႉၸႂ် သေမဵဝ်းမဵဝ်းယူဝ်ႉ ... ယႃႇပေၵဵင်ၸႂ်သင်ၼႃႈ ... ”
ၸၢႆးသႅင်ၵေႃႈ ၶိုၼ်းလၢတ်ႈဝႃႈ -
“ တႄႉဢိူဝ်ႈ ... ၸၢႆးၼွင်ႉ ... ယႃႇပေၵဵင်ၸႂ် ( ဢႃးၼႃႇ )သင်ၼႃႈ ... ”
“ ၵွပ်ႈပိူဝ်ႈ ပီႈၸၢႆးသႅင်လႄႈၽူၺ်းၶဝ် လၢတ်ႈၼင်ႇၼႆလႄႈ ၸူမ်းတႄႉတႄႉ ယဝ်ႉ ... ”
“ ဢေႃႈ ... ၸၢႆးၼွင်ႉ ၼၢႆး ၸၢႆးၼွင်ႉၶဝ် တီႈမေႇမဵဝ်ႉၼၼ်ႉလူး ... ? ”
ၸၢႆးၼွင်ႉ ထူၺ်ႈၸႂ်လူင် ၵမ်းၼိုင်ႈသေ -
“ ၼၢႆးႁဝ်း ... သဵင်ႈၵႂႃႇယဝ်ႉ ... ၽူၺ်း ... ”
“ ဢူဝ် ... ... ”
“ ၵွပ်ႈပိူဝ်ႈ ၼၢႆးႁဝ်းသဵင်ႈၵႂႃႇပႅတ်ႈလႄႈ ဢမ်ႇမီးပီႈၼွင်ႉ ဢမ်ႇမီး တီႈပိုင်ႈဢိင်ယဝ်ႉလႄႈ ... ၸႂ်ပိဝ်သေ ၸင်ႇလၢမ်းလိမ်းမႃးဢႅဝ်ႇ တႃႈၵုင်ႈၼႆႉယဝ်ႉ ... ၽူၺ်း ... ”
“ ယႃႇပေၸႂ်လဵၵ်ႉသင်ၼႃႈ ၸၢႆးၼွင်ႉ ... လႆႈငိၼ်းၶၢဝ်ႇငၢဝ်း ၼၢႆးၸၢႆးၼွင်ႉၶဝ်ၼင်ႇၼႆ ၽူၺ်းၶဝ်ၵေႃႈ ၸႂ်ဢမ်ႇလီတႄႉတႄႉယဝ်ႉ ”
ၸၢႆးသႅင်ၵေႃႈ ၸင်ႇပၼ်ႁႅင်းဝႃႈ -
“ ၸၢႆးၼွင်ႉ ... လူဝ်ႇသင် ... ၼႆၵေႃႈ လၢတ်ႈႁဝ်းၼႃႈ ... ႁဝ်းတေၸွႆႈထႅမ်ပၼ်လႆ ... ယႃႇပေမီးတၢင်းၵဵင်ၸႂ်သင်ၼႃႈ ...”
“ ၸူမ်းၶွပ်ႈၸႂ်ယဝ်ႉ ပီႈၸၢႆးသႅင် ... ၶႃႈတေဢမ်ႇလိုမ်းၵႄးၸူး ပီႈၸၢႆးသႅင်ၶဝ် သေပွၵ်ႈၶႃႈၵူၺ်း ... ”
“ ပီႈၸၢႆးၼွင်ႉ ... ပီႈၸၢႆးၼွင်ႉ ... ”
ငိၼ်းသဵင်ႁွင်ႉ လႅင်း ႁွင်ႉႁႃၸၢႆးၼွင်ႉလႄႈ ၶဝ်သၢမ်ၵေႃႉ ဢွၼ်ၵၼ်ဝၢႆႇႁႃတူၺ်းလႅင်းယူႇ ၊ လႆႈႁၼ်လႅင်း ယိပ်းမၢၵ်ႇဢူမ်သေ ဢႅၼ်ႇမႃးၸူး ၸၢႆးၼွင်ႉယူႇ ၊ ၸၢႆးၼွင်ႉၵေႃႈ ၸင်ႇႁပ်ႉၸၼ်ဢဝ်မိုဝ်းလႅင်းသေ -
“ လႅင်း ... ဢီႈသင် ... ? ”
“ လႅင်း လႆႈမၢၵ်ႇဢူမ်မႃးပၼ် ပီႈၸၢႆးၼွင်ႉဢေႃႈ ... ”
“ လႅင်းၵိၼ်လႄႈ ... ပီႈၸၢႆးၼွင်ႉ ... ဢမ်ႇၵိၼ်ယဝ်ႈ ... ”
“ ဢိုဝ်... ပီႈၸၢႆးၼွင်ႉ ၵိၼ်လုၵ်ႈၼိုင်ႈလႄႈ ... လႅင်းၵေႃႈ တေၵိၼ်လုၵ်ႈၼိုင်ႈ ... ”
ၸၢႆးသႅင် ၸင်ႇဝႃႈ -
“ လႅင်းဢမ်ႇပၼ် ပီႈၸၢႆးသႅင်ၽွင်ႈႁႃႉ ... ... ? ”
“ ဢမ်ႇပၼ် ... ၵႂႃႇယွၼ်းဢဝ်တီႈမႄႈမႄႈ လႄႈ ... ”
“ လႅင်း ... ဢမ်ႇပၼ်ပီႈၽူၺ်းၽွင်ႈႁႃႉ ... ? ”
“ ၵႂႃႇယွၼ်းဢဝ်တီႈမႄႈမႄႈ လေႃႇ ... လႅင်းဢမ်ႇမီးယဝ်ႉ ”
ၽူၺ်းၸင်ႇလွမ်တူၺ်း ၸၢႆးၼွင်ႉသေ လၢတ်ႈ-
“ ၸၢႆးၼွင်ႉ ... လႅင်းတႄႉ မိုတ်ႈၸၢႆးၼွင်ႉၼႃႇယဝ်ႉလူင် ၼႆႉ မၼ်းဢမ်ႇသူႈပၼ်ႁဝ်းသေပွၵ်ႈၵူၺ်း ... ”
လႅင်း ၸင်ႇဝႃႈ -
“ ၵိၼ်လႄႈ ... ပီႈၸၢႆးၼွင်ႉ ... ”
ၼင်ႇႁိုဝ် လႅင်း ၸႂ်တေလီၼၼ်ႉ ၸၢႆးၼွင်ႉၵေႃႈ ၸင်ႇလိတ်ႈၸေႈ မၢၵ်ႇဢူမ်ၼၼ်ႉသေ ဢူမ်ဝႆႉယူႇ ၊ လႅင်းလႆႈႁၼ်ၼင်ႇၼၼ် မၼ်းပဵၼ်ဢၼ်ၸူမ်းသိူဝ်းၵႂႃႇတႄႉတႄႉ -
“ ပီႈၸၢႆးၼွင်ႉ...ႁဝ်းတေႃႇမီပၢႆႈတဵတ်ႇၵၼ် ၼႂ်းသူၼ်ၼႆႉၼေႃ”
ၸၢႆးသႅင် ၸင်ႇဝႃႈ -
“ ၽႂ်တေႁဵတ်း မီ ဢွၼ်တၢင်း ...? ”
“ လႅင်း တေႁဵတ်းဢေႃႈ ... ပီႈၸၢႆးသႅင်ၶဝ် ၵႂႃႇမႅပ်းလႄႈ ”
ၶဝ်သၢမ်ၵေႃႉ ဢွၼ်ၵၼ်ၵႂႃႇပၢႆႈမႅပ်း ၵေႃႉတီႈတီႈယူႇယဝ်ႉ ၊ လႅင်းၵေႃႈ မႃးႁႃၶဝ် ႁႂ်ႈႁၼ်သေ ႁၼ်ၽူၺ်းဢွၼ်တၢင်းလႄႈ ၽူၺ်းၶိုၼ်းလႆႈႁဵတ်းမီယဝ်ႉ ၊ ၽွင်းၼၼ်ႉ လႅင်းၶိုၼ်းဢွၼ်ဢဝ် ၸၢႆးၼွင်ႉသေ ၵႂႃႇပၢႆႈမႅပ်း တီႈၶႅမ်ႉၶႅမ်ႉၼၼ်ႉယဝ်ႉ။ ၽူၺ်း ဢမ်ႇၵိုင်ႉၵၢင်ႉႁၼ်ၶႃသွင်ၵေႃႉလႄႈ လႅင်း ပဵၼ်ဢၼ်ၵျေႃႇတႄႉတႄႉ ၊ ဝၼ်းၼၼ်ႉ ၶဝ်လဵၼ်ႈၼႂ်းသူၼ်ၶဝ် တင်းဝၼ်းယူႇ ။