ၶႅၵ်ႇ/တွၼ်ႈသိပ်းသၢမ်
ၸၢႆးၼွင်ႉ ႁႅၼ်းဢဝ်ၶူဝ်းမၼ်းသေ ဢွၵ်ႇမႃးၸူး တီႈလုၵ်းၶႅၵ်ႇယူႇ တီႈၼႂ်းလုၵ်းၶႅၵ်ႇၼၼ်ႉတႄႉ လႆႈႁၼ် လုင်းၸၢႆးမိူင်း ပႃႈၼၢင်းၶွင်ႇ ၶႃပူႇဢွၵ်ႇ ၼင်ႈဝႆႉယူႇလႄႈ မၼ်းၸၢႆး ၸင်ႇၵႂႃႇႁွမ်းမိုဝ်းၶုပ်ႉဝႆႈသေ တူင်ႉတၵ်ႉလၢတ်ႈဝႃႈ -
“ ဢူႈလုင်းလႄႈမႄႈပႃႈ ၶႃႈႁဝ်းၸၢႆးၼွင်ႉ တေၵႂႃႇၵွၼ်ႇဢေႃႈ ”
“ ဢိူဝ်ႈ ... ဢိူဝ်ႈ ... လီယဝ်ႉ ... ၵႂႃႇႁဵတ်းၵၢၼ်တီႈပိူၼ်ႈ ဢၼ်ဝႃႈၼၼ်ႉ လူဝ်ႇမေႃယိူၼ်ႉၵၼ်ႈ ၵူႈသမ်ႇၵူႈပိူင်ဢိူဝ်ႈ ၼႃႈ ... ၸၢႆးၼွင်ႉ ... ”
“ ဢေႃႈ ... ”
“ လူဝ်ႇသင်ၼႆၵေႃႈ ... လၢတ်ႈမႄႈပႃႈၶဝ်ၼႃႈ ... ယႃႇပေၵဵင်ၸႂ်သင် ၼႃႈ ... ”
“ ဢေႃႈ ... ၸူမ်းၶႃႈယဝ်ႉ ... ၶႃႈတေၵႂႃႇၵွၼ်ႇၶႃႈ ၼႃႈ ... ”
ၸၢႆးၼွင်ႉ လွမ်တူၺ်းၼႂ်းၶၢၼ်းၶႅၵ်ႇၼၼ်ႉ လႆႈႁၼ်ၶႅပ်းႁၢင်ႈဢွၼ်ႇ လႅင်းလႄႈၽူၺ်းသေ မၼ်းၸင်ႇလၢတ်ႈၼႂ်းၸႂ်မၼ်း -
“ ဢေႃး ... လႅင်းလႄႈၽူၺ်း ... ပီႈၸၢႆးၼွင်ႉတေၵႂႃႇၵွၼ်ႇ... ဝၢႆးၼႆႉ ႁဝ်းၸင်ႇၵွႆႈထူပ်းၵၼ်ထႅင်ႈ ... ”
ၸၢႆးၼွင်ႉပႆမႃးၸူးၸၢႆးသႅင် ဢၼ်တေဢဝ်ၵႃး ၵႂႃႇသူင်ႇမၼ်းၼၼ်ႉယူႇယဝ်ႉ၊ မၼ်းၶဝ်ႈၼင်ႈ ၼႂ်းၵႃးသေ ၸၢႆးသႅင်ၵေႃႈ ႁေႃႈၵႃးဢွၵ်ႇဝၢင်းႁိူၼ်းၵႂႃႇယဝ်ႉ။ တူဝ်ၸၢႆးၼွင်ႉ ၽၢတ်ႇဢွၵ်ႇၵႂႃႇသေတႃႉ ၸႂ်မၼ်းၸၢႆးတႄႉ ၵိုတ်းဝႆႉယူႇယဝ်ႉ။
တၢင်းသဵၼ်ႈလႂ် ပဵၼ်တီႈလႂ် ပွင်ႇတီႈလႂ်ၼႆၵေႃႈ ၸၢႆးသႅင် ၸွမ်းၼႄပၼ် ၸၢႆးၼွင်ႉမူတ်းယဝ်ႉလႄႈ ၸၢႆးၼွင်ႉၵေႃႈ ႁူႉႁၼ်သဵၼ်ႈတႃႈသၢႆတၢင်း တၢၼ်ႇတၢၼ်ႇယဝ်ႉ၊ ငိၼ်းသဵင်ၸၢႆးၼွင်ႉထူၺ်ႈၸႂ်လူင် ၵမ်းၼိုင်ႈလႄႈ ၸၢႆးသႅင်ၸင်ႇထၢမ် -
“ ပဵၼ်ႁိုဝ် ... ? ၸၢႆးၼွင်ႉ ၼၵ်းၸႂ်ႁႃႉ ... ? ”
“ ဢမ်ႇဝႃႈၼင်ႇၵဝ်ႇ ... ”
“ ပေႃး ႁဵတ်းၵႂႃႇႁဵတ်းမႃးၼႆ ၵၢၼ်တေသွၼ်ၵူၼ်းၵႂႃႇယူႇ ယႃႇပေၼၵ်းၸႂ် ... လူဝ်ႇၸိူင်ႉႁိုဝ်ၼႆၵေႃႈ သိုပ်ႇၽူၼ်းမႃးၼႃႈ ... ”
“ ၶႃႈတေလႆႈႁဵတ်းႁိုဝ် တွပ်ႇၵႄးၸူး ပီႈၸၢႆးသႅင်ၶဝ်ၵေႃႈ ဢမ်ႇႁူႉယဝ်ႈ ၼႆႉ ... ”
“ ဢမ်ႇလူဝ်ႇ ၵူၺ်း ... ၸၢႆးၼွင်ႉ ... သွၼ်ႇႁႂ်ႈၸၢႆးၼွင်ႉပဵၼ်ၵၢၼ်သေ သၢင်ႇထုၵ်ႇၼၼ်ႉ ပိူင်လူင်မၼ်းယဝ်ႉ ... ”
“ ဢေႃႈ ... ပီႈၸၢႆးသႅင် ... ပေႃးဝႃႈ လႅင်းထၢမ်ႁႃၶႃႈ ၼႆၸိုင် တူၺ်းတူၺ်းသေ လၢတ်ႈပၼ်မၼ်းၽွင်ႈၶႃႈၼႃႈ ”
ၸၢႆးသႅင် ထူၺ်ႈၸႂ်လူင်ၵမ်းၼိုင်ႈသေ -
“ တေလၢတ်ႈပၼ်ယူႇ ... ၸၢႆးၼွင်ႉ ... ”