ၶႅၵ်ႇ/တွၼ်ႈသိပ်းသွင်
မိူဝ်ႈၼႆႉ ပဵၼ်ဝၼ်းၵိူတ်ႇလႅင်းလႄႈ ၶဝ်တေဢွၼ်ၵၼ် ၵႂႃႇဝႆႈၽြႃးၼႂ်းဝဵင်းၼႆလႄႈ ၸၢႆးၼွင်ႉလႆႈ ႁၼ်ၽူၺ်းၶဝ် ၼုင်ႈသိူဝ်ႈၶူဝ်းမႂ်ႇ တူၺ်းသမ်ႉပေႃးဢမ်ႇၶႂ်ႈဢိမ်ႇလႆႈ။ ၶဝ်ပေႃႈမႄႈလုၵ်ႈ တေဢၢၼ်းၵႂႃႇဝႆႈ ၵွင်းမူးလူင်သူၺ်ႇတၵူင်ႇ ၼႆလႄႈ ၶဝ်ႁွင်ႉပႃး ၸၢႆးၼွင်ႉၵႂႃႇၸွမ်းၶဝ်ယဝ်ႉ ၊ လႆႈႁၼ်ပိူၼ်ႈပေႃႈမႄႈလုၵ်ႈ တဵမ်တဵမ်ထူၼ်ႈထူၼ်ႈ မူၼ်ႈမူၼ်ႈသိူဝ်းသိူဝ်းၼင်ႇၼၼ် ၸၢႆးၼွင်ႉ ပဵၼ်ဢၼ်ၶွႆပိူၼ်ႈတႄႉတႄႉ ၊ လုင်းၸၢႆးမိူင်း ႁေႃႈၵႃးမႃးၽၢႆႇတူၵ်း ၵွင်းမူးလူင်သေ ၶဝ်ဢွၼ်ၵၼ် ပႆမႃးၶီႇၶူဝ်လႆလိူၼ်ႈ ၶိုၼ်ႈမႃးၼိူဝ် ဝၢင်းၵွင်းမူးယဝ်ႉ ၶဝ်ဢွၼ်ၵၼ်သိုဝ်ႉမွၵ်ႇသေ ပႆလဵပ်ႈဝၢင်းၵွင်းမူးယူႇ လုင်းၸၢႆးမိူင်းၸင်ႇဝႃႈ-
“ ပႆလဵပ်ႈ ၽၢႆႇၶႂႃလႄႈ ... ”
ၶဝ်ၶိုၼ်ႈမႃး ၽၢႆႇတူၵ်း လုင်းၸၢႆးမိူင်း ဢွၼ်ၶဝ်ပၼ်ႇလဵပ်ႈမႃး ၽၢႆႇႁွင်ႇဢွၼ်တၢင်းလႄႈ ၽူၺ်းၸင်ႇထၢမ်ၸၢႆးသႅင် -
“ ပီႈၸၢႆးသႅင် ... ပေႃႈႁဝ်းသမ်ႉဝႃႈ ပႆလဵပ်ႈၽၢႆႇၶႂႃႇၼႆသေ ပေႃးဢဝ်ၽူၺ်းၶဝ်ဝႃႈ ပဵၼ် ၽၢႆႇသၢႆႉဢမ်ႇၸႂ်ႈႁႃႉ ... ၼႆႉ ... ”
“ ၸႂ်ႈဢိူဝ်ႈ ... ၼေႃ ... ပေႃႈႁဝ်းလၢတ်ႈၽိတ်းယူဝ်ႉ ... ”
လုင်းၸၢႆးမိူင်း လႆႈငိၼ်းၵႂၢမ်းလုၵ်ႈၸၢႆးလုၵ်ႈယိင်းမၼ်း ၼင်ႇၼၼ်သေ မၼ်းၸင်ႇဝႃႈ -
“ ဢၼ်ပေႃႈဝႃႈ လဵပ်ႈၽၢႆႇၶႂႃလႄႈ ၼႆၼၼ်ႉ ဢမ်ႇၽိတ်းၵူၺ်း တီႈၼႆႈ ... ဢၼ်ဝႃႈၽၢႆႇၶႂႃ ၼႆၼၼ်ႉ ... ပိူၼ်ႈဢမ်ႇလႆႈဢဝ် ၽၢႆႇၶႂႃႁဝ်းဝႃႈၵူၺ်း ... တွင်းဝႆႉလႃႈ ... ”
“ တေလႆႈဢဝ်ၽၢႆႇၶႂႃၽႂ်လႃႇ ... ပေႃႈ ... ? ”
“ တေလႆႈဢဝ်ၽၢႆႇၶႂႃၽြႃးဝႃႈဢိူဝ်ႈ ... လွင်ႈဢၼ်ဝႆႈလဵပ်ႈပၼ်ႇၽၢႆႇၶႂႃမိုဝ်းၽြႃး ဢၼ်ဝႃႈၼၼ်ႉ ပဵၼ်ၽိင်ႈငႄႈ လၢႆးၼပ်ႉယမ် မိူဝ်ႈပၢၼ်ၽြႃးတိုၵ်ႉမီးၼၼ်ႉယဝ်ႉ ... ၵွပ်ႈၼႆလႄႈ ... ၸင်ႇဢွၼ်ၵၼ် လဵပ်ႈပၼ်ႇ ၽၢႆႇၶႂႃၽြႃး ၼႆယဝ်ႉ ... ”
ၶဝ်ဢွၼ်ၵၼ် လဵပ်ႈၵွင်းမူးလူင်သေ မႃးလူႇမွၵ်ႇၶဝ်တမ်ႈတီႈၽြႃး ဢွၼ်ၵၼ်ဝႆႈသႃယွၼ်းသူးယူႇ ၊ ၸၢႆးၼွင်ႉတႄႉ ယွၼ်းသူးၼၵ်းၼၵ်းၸူမ်ၸူမ် ႁႂ်ႈလႆႈမီးဢူႈမႄႈပီႈၼွင်ႉႁူမ်ႈၵၼ် ၸိူင်ႉၼင်ႇပိူၼ်ႈသေၵမ်း ၼႆယူႇ။ ဝၢႆးသေ ၶဝ်ဝႆႈၽြႃးယဝ်ႉ လႅင်း ၸင်ႇမႃးၸူးႁိမ်း ၸၢႆးၼွင်ႉသေ -
“ ပီႈၸၢႆးၼွင်ႉ ... လႅင်းၶႂ်ႈၵႂႃႇလူႇၼမ်ႉ တီႈၽြႃး ... ”
“ ၵႂႃႇလႄႈ ... လႅင်း ... ”
ၸၢႆးၼွင်ႉ လႄႈ လႅင်း ၵႂႃႇလူႇၼမ်ႉၽြႃး တီႈၸဵင်ႇဝၼ်းပုတ်ႉၼၼ်ႉသေ ဢွၼ်ၵၼ်ၶုပ်ႉဝႆႈယွၼ်းသူးယူႇ၊ ဢူႈမႄႈလႅင်းၶဝ်ၵေႃႈ ၽႅဝ်မႃး ႁိမ်းၶႃသွင်ၵေႃႉၼၼ်ႉသေ မႃးၸုၵ်းပႂ်ႉဝႆႉယူႇ၊ ၸၢႆးၼွင်ႉ ၸင်ႇထၢမ်လႅင်း
“ လႅင်း ... လႅင်း ... ဢမ်ႇသူးတွင်းႁႃႉ ... ”
“ တေလႆႈႁဵတ်းႁိုဝ်သူးတွင်း ... ပီႈၸၢႆးၼွင်ႉ ... ”
“ ဢေႃ ... သူးတွင်းဝႃႈ ... ႁႂ်ႈယူႇလီၵိၼ်ဝၢၼ် ႁႂ်ႈမေႃလိၵ်ႈၼမ်ၼမ် ၼႆဢိူဝ်ႈ ... ”
လႅင်းၵေႃႈ ၶိုၼ်းသူးတွင်းၸိူင်ႉၼင်ႇ ၸၢႆးၼွင်ႉသွၼ်ပၼ်မၼ်းၼၼ်ႉယဝ်ႉ ၶဝ်ၶိုၼ်းသိုပ်ႇပႆပၼ်ႇမႃး တၢင်းတူၵ်းၼႆႉသေ ၸၢႆးသႅင်လႄႈၽူၺ်း သပ်းလႅင်းလၢတ်ႈၼႄ ၸၢႆးၼွင်ႉ လွင်ႈၵွင်းမူးလူင်ၼႆႉၵူႈပိူင်ပိူင်ယူႇ ၊ ပႃႈၼၢင်းၶွင်ႇ ၸင်ႇဝႃႈ -
“ ဢေႃး ... လႅင်း ... တေထႆႇဝႆႉၶႅပ်းႁၢင်းၼႆ ဢမ်ႇၸိုဝ်ႈႁိုဝ် တေၶႂ်ႈထႆႇ တီႈလႂ်ၵေႃႈထႆႇပၼ်သေလႄႈ ... ၸၢႆးသႅင် ... ”
ၸၢႆးသႅင်ၵေႃႈ ဢဝ်ၵွင်ႈထႆႇ ထႆႇပၼ်လႅင်း ၵေႃႉလဵဝ်ယဝ်ႉ ၊ လိူဝ်သေၼၼ်ႉ ၶဝ်ပေႃႈမႄႈလုၵ်ႈ ၶႂ်ႈထႆႇၸွမ်းၵၼ် ၼႆလႄႈ ၸၢႆးၼွင်ႉ ၶိုၼ်းဢဝ်ၵွင်ႈထႆႇသေ ထႆႇပၼ်ၶဝ်ယူႇ ၊ ဝၢႆးၼၼ်ႉ လႅင်းၸင်ႇဝႃႈ-
“ မႄႈ ... မႄႈ ... လႅင်းၶႂ်ႈထႆႇၵိုၵ်းၸွမ်း ပီႈၸၢႆးၼွင်ႉ ... ”
ၶဝ်ဢွၼ်ၵၼ် လွမ်တူၺ်းၸၢႆးၼွင်ႉသေ ပႃႈၼၢင်းၶွင်ႇၸင်ႇဝႃႈ-
“ ၸၢႆးၼွင်ႉ ... ၵႂႃႇထႆႇၸွမ်းလႅင်းသေလႄႈ ... ”
ၸၢႆးၼွင်ႉၵေႃႈ ၸင်ႇမႃးၸူးလႅင်းသေ -
“ လႅင်း ... တေၶႂ်ႈႁဵတ်းႁိုဝ် ထႆႇ ... ”
“ ပီႈၸၢႆးၼွင်ႉ ႁွပ်ႇလႅင်းလႄႈ ... ”
ၸၢႆးသႅင် ၵေႃႉထႆႇပၼ်ယဝ်ႉသေ လႅင်းၶိုၼ်းၶႂ်ႈထႆႇၸွမ်းဢူႈမႄႈမၼ်း ပီႈဢၢႆႈပီႈၼၢင်းမၼ်းယဝ်ႉ။ ၶဝ်ၶိုၼ်းသိုပ်ႇၵႂႃႇတူၺ်း ႁွင်ႈၼႄပိုၼ်းၸဝ်ႈပုတ်ႉထယူႇ၊ ၽွင်းမိူဝ်ႈ ၶဝ်ပႆလူင်းၸွမ်းၶူဝ်လႆ မိူဝ်ႈလႅင်း ယိပ်းမိုဝ်းၸၢႆးၼွင်ႉလႄႈၽူၺ်း ၵေႃႉၽၢႆႇၽၢႆႇၼၼ်ႉ ၸၢႆးသႅင် လၵ်ႉထႆႇပၼ်ၶႅပ်းႁၢင်ႈၶဝ်သၢမ်ၵေႃႉ ၶႅပ်းၼိုင်းယဝ်ႉ ၊ ၶဝ်သၢမ်ၵေႃႉတႄႉ ဢမ်ႇႁူႉတူဝ်။
ဝၼ်းၼၼ်ႉ ၶဝ်ၶဝ်ႈဢႅဝ်ႇ ၼႂ်းသူၼ်လူင်ၵူၼ်းမိူင်းသေ သိုပ်ႇ ပူၼ်ႉၵႂႃႇဢႅဝ်ႇၼႂ်းသူၼ်သတ်းယူႇ ၶဝ်သိုဝ်ႉၵူၺ်ႈသိုဝ်ႉမၵ်ႇဝၼ်းဝၢႆႇသေ ၵႂႃႇဢွႆႇလိင်းလႄႈ လိင်း ၸိူဝ်းဢၼ်ယူႇၼႂ်းၶွၵ်ႈလဵၵ်းၸိူဝ်းၼၼ်ႉ ဢွၼ်ၵၼ်မႃးပႂ်ႉ ယွၼ်းဢဝ်တၢင်းၵိၼ်တီႈၶဝ်ယူႇ လႅင်းၵေႃႉၼိုင်ႈတႄႉ ပဵၼ်ဢၼ်ၸူမ်းဢွႆႇၶဝ်တႄႉတႄႉ၊ ၶဝ်သိုပ်ႇဝႄႉတူၺ်း တီႈၼိုင်ႈယဝ်ႉတီႈၼိုင်ႈသေ ၽႅဝ်မႃးတီႈၸၢင်ႉလူင်ၼၼ်ႉ ၶဝ်သိုဝ်ႉဢွႆႈသေ ဢွႆႇပၼ်ၸၢင်ႉယဝ်ႉ လႅင်းၸင်ႇဝႃႈ -
“ ပီႈၸၢႆးၼွင်ႉ ... ဢၼ်မူးသိူဝ်း ဢဝ်ၵွင်ႈယိုဝ်းတၢႆပႅတ်ႈၼၼ်ႉ ပဵၼ်ၸၢင်ႉလူင်မဵဝ်းၼႆႉႁႃႉ ... ? ”
လႅင်းၶိုၼ်းထၢမ် လွင်ႈၸၢင်ႉ ဢၼ်ၸၢႆးၼွင်ႉၶႆႈၼႄမၼ်း ၼိူဝ်ရူတ်ႉရဵၼ်းၼၼ်ႉယူႇ၊ ၽူၺ်း ဢမ်ႇႁူႉလွင်ႈဢၼ်မၼ်းထၢမ်ၼၼ်ႉလႄႈ ၽူၺ်းၸင်ႇဝႃႈ -
“ လႅင်း... မူးသိူဝ်းသင် ယိုဝ်းၸၢင်ႉ ... ”
“ မူးသိူဝ်း ဢၼ်ပီႈၸၢႆးၼွင်ႉၶႆႈၼႄလႅင်းၼၼ်ႉဢေႃႈ ... ”
ၸၢႆးၼွင်ႉၵေႃႈ ၸင်ႇတွပ်ႇဝႃႈ -
“ ၸႂ်ႈဢိူဝ်ႈလႅင်း ... ပဵၼ်ၸၢင်ႉလူင်မဵဝ်းၼႆႉယဝ်ႉ ”
“ ပီႈၸၢႆးၼွင်ႉ ၸၢင်ႉလူင်ၼႆႉပႄႉသၢင်ႈသီႈဢိူဝ်ႈၼေႃ ... ? ”
ၸၢႆးၼွင်ႉ ယုမ်ႉသေ ငွၵ်းႁူဝ်ၼႄၵမ်းၼိုင်ႈယဝ်ႉသေ -
“ ပီႈၸၢႆးၼွင်ႉ လႅင်း ၶႂ်ႈၵႂႃႇတူၺ်းသၢင်ႈသီႈ ... ”
ၶဝ်ၶိုၼ်းဢွၼ်ၵၼ် ၵႂႃႇတူၺ်းသၢင်ႈသီႈ၊ သိူဝ် ၊ မႃႉလၢႆး ၊ မႃႉၶေႃးယၢဝ်း ၸိူဝ်းၼၼ်ႉၸွတ်ႇၸေးသေ ပွၵ်ႈမႃးမိူဝ်းယဝ်ႉ။
ၸၢႆးၼွင်ႉ ၽႅဝ်မႃး တႃႈၵုင်ႈသေတႃႉ မၼ်းဢမ်ႇသိူဝ်းၸႂ် ၊ ယွၼ်ႉပိူဝ်ႈ မၼ်းၶုၵ်ႉၸႂ်လႆႈ ဢူႈမႄႈမၼ်းႁိုဝ် ? ၼၢႆးမၼ်းႁိုဝ် ? ယွၼ်ႉပိူဝ်ႈ မၼ်းပႆႇႁၼ်ပီႈဢၢႆႈမၼ်းႁိုဝ် ? ၵေႃႈ ဢမ်ႇႁူႉ ။
ၼႂ်းတူဝ်ၼႂ်းၸႂ်မၼ်း ပဵၼ်ဢၼ်ဢမ်ႇပေႃးၸိုၼ်ႈၸၢင်ႇပၢင်ႇသႂ်၊ ၸၢႆးသႅင်ၶဝ် ႁွင်ႉမၼ်းၵိၼ်ၶဝ်ႈၵေႃႈ မၼ်းဢမ်ႇတွင်ႉမႆႈလႄႈ မၼ်းဢမ်ႇၵႂႃႇၵိၼ်။ ဝၢႆးသေ ၸၢႆးသႅင်ၶဝ် ၵိၼ်ၶဝ်ႈယဝ်ႉ ၸၢႆးသႅင်ၶဝ်ပီႈၼွင်ႉ ဢွၼ်ၵၼ်မႃးတူၺ်းၸၢႆးၼွင်ႉ ၼႂ်းလုၵ်းၼွၼ်းၶႅၵ်ႇၶဝ်ယူႇ ၊ လႆႈႁၼ်ၸၢႆးၼွင်ႉ ဢၢပ်ႈဢူၼ်ႈတူဝ်ဢူၼ်ႈၸႂ်သေ ၼွၼ်းဝႆႉၼိူဝ်ၵူႇၼွၼ်းမၼ်းယူႇ ။ ၽူၺ်းၸင်ႇထၢမ်ဝႃႈ -
“ ၸၢႆးၼွင်ႉ ... ပဵၼ်သင် ... ? ”
ၸၢႆးၼွင်ႉ ဢဝ်ႁႅင်းမိုၼ်းတႃတူၺ်းၼႃႈၽူၺ်းသေ -
“ ႁူဝ်ၵေႃႈၶႆႈ ... ၸႂ်ၵေႃႈၸႃႉ ...ဢိူဝ်ႈ ... ၽူၺ်း ... ”
ၸၢႆးသႅင် ယိပ်းတူၺ်း ၼႃႈၽၢၵ်ႇၸၢႆးၼွင်ႉ ပဵၼ်ဢၼ်လိူတ်ႇမႆႈတႄႉတႄႉ။
“ ဢလူဝ်ႉ ... ၼႃႈၽၢၵ်ႇၸၢႆးၼွင်ႉ လိူတ်ႇဝႃႈလိူတ်ႇယဝ်ႉ ... ၸၢႆးၼွင်ႉမီးလူမ်းၼၢဝ်ဢိူဝ်ႈၼႆႉ ... ”
“ ၽူၺ်းၶဝ်တေလႆႈႁဵတ်းႁိုဝ် ပီႈၸၢႆးသႅင် ... ”
“ သိုပ်ႇၽူၼ်းႁွင်ႉၶူးမေႃယႃ မႃးတူၺ်းတီႈႁိူၼ်းၼႆႉ တေလီယူဝ်ႉ... ... ”
“ လီဢိူဝ်ႈ ... ပေႃးၼႆ ပီႈၸၢႆးသႅင်ၵႂႃႇသိုပ်ႇၽူၼ်းလႄႈ ၽူၺ်းတေၵႂႃႇဢဝ်ၼမ်ႉမႆႈမႃးလႆ ... လႅင်း ... ပႂ်ႉတူၺ်းပီႈၸၢႆးၼွင်ႉၼႃႈ ...”
လႅင်းငွၵ်းႁူဝ်မၼ်း ၼႄၽူၺ်းသေ မႃးလွမ်တူၺ်းၸၢႆးၼွင်ႉယူႇ။
“ ပီႈၸၢႆးၼွင်ႉ ... ပီႈၸၢႆးၼွင်ႉ ... ”
လႅင်း ယိပ်းၶေႃႈမိုဝ်းၸၢႆးၼွင်ႉသေ ႁွင်ႉၸၢႆးၼွင်ႉယူႇ ၊ ၸၢႆးၼွင်ႉ တေႃႉတႄႉငိၼ်းသဵင်ႁွင်ႉၸိုဝ်ႈမၼ်းၵူၺ်းလႄႈ မၼ်းဢဝ်ႁႅင်းသေ မိုၼ်းတႃတူၺ်း ၼႃႈလႅင်းယူႇ။ ယွၼ်ႉပိူဝ်ႈ လူမ်းၼၢဝ်မၼ်း ၶိုၼ်ႈႁႅင်းၼႃႇယဝ်ႉလႄႈ ၼႂ်းတႃမၼ်းဢမ်ႇႁၼ် ၸႅင်ႈသင်လီလီ။
လႅင်းလႆႈႁၼ်ၸၢႆးၼွင်ႉၼွၼ်းသေ ၶင်းယူႇဢိုဝ်းဢိုဝ်းသေ လၢတ်ႈဝႃႈ - “ မႄႈ ... ... မႄႈ ... ... ” ၼႆယူႇ -
လႅင်းၸင်ႇလႅၼ်ႈၵႂႃႇၸူး ပီႈၸၢႆးသႅင်သေ လၢတ်ႈဝႃႈ -
“ ပီႈၸၢႆးသႅင် ... ၵႂႃႇတူၺ်းပီႈၸၢႆးၼွင်ႉလူး ... မၼ်းႁွင်ႉဝႃႈ မႄႈ ... မႄႈ ... ၼႆတိၵ်းတိၵ်းဢေႃႈ ”
ၸၢႆးသႅင်သိုပ်ႇၽူၼ်းၵေႃႈပႆႇလႆႈလႄႈ မၼ်းၸင်ႇဝႃႈ -
“ လႅင်း ... ၵႂႃႇလၢတ်ႈပီႈၽူၺ်းလႄႈ ပီႈၸၢႆးသႅင် တိုၵ်ႉႁွင်ႉၽူၼ်းပႆႇလႆႈ ၼေႈ ... ”
လႅင်းၵေႃႈ ၸင်ႇၼႅတ်ႈၵႂႃႇၸူးၽူၺ်း ၼႂ်းသွင်ႇၽႆးသေ -
“ ပီႈၽူၺ်း ... ပီႈၸၢႆးသႅင်ဝႃႈ ႁႂ်ႈၵႂႃႇတူၺ်း ပီႈၸၢႆးၼွင်ႉၼႆဝႃႇ ပီႈၸၢႆးၼွင်ႉ ၼွၼ်းသေႁွင်ႉဝႃႈ ... မႄႈ ... မႄႈ ... ၼႆယူႇဢေႃႈ...”
“ တႄႉႁႃႉ ... ပီႈၸၢႆးသႅင်လူး ... တိုၵ်ႉႁဵတ်းသင်ယူႇလႃႇ”
“ တိုၵ်ႉသိုပ်ႇၽူၼ်းပႆႇလႆႈ ၼႆဢေႃႈ ... ”
“ ပေႃးၼႆ... လႅင်း ပႂ်ႉတူၺ်းၼမ်ႉမႆႈၼႆႉၼႃႈ ... ပေႃးၽူတ်ႉမႃးၼႆ မႃးႁွင်ႉ ပီႈၽူၺ်းလႄႈ ... ၼႃႈ ... ”
ၽူၺ်းမႆႈၸႂ်သေ ၼႅတ်ႈမႃးတူၺ်း ၸၢႆးၼွင်ႉၽႂ်းၽႂ်းယဝ်ႉ ။ လူမ်းၼၢဝ်ၸၢႆးၼွင်ႉ ၶိုၼ်ႈႁႅင်းၼႃႇလႄႈ မၼ်းၸၢႆးႁူႉတူဝ်ပဵၼ်ၵမ်း ဢမ်ႇႁူႉပဵၼ်ၵမ်းသေ တဵၼ်ႈတဵၼ်ႈမႃႈမႃႈ ၼိူဝ်ၵူႇမၼ်းၼၼ်ႉယူႇ။ မၼ်းၸၢႆး ၶၢင်းမေႃးႁွင်ႉႁႃမႄႈမၼ်းသေ တဵၼ်ႈၵႂႃႇတဵၼ်ႈၶိုၼ်းယူႇ။
ၽူၺ်း ၵူဝ်ၸၢႆးၼွင်ႉတူၵ်းၵူႇလႄႈ မၼ်းၼႅတ်ႈမႃး ပၢမ်ႉၸၢႆးၼွင်ႉဝႆႉယဝ်ႉ။ မၼ်းၸင်ႇယိပ်းမိုဝ်းၸၢႆးၼွင်ႉသေ ႁွင်ႉဝႃႈ -
“ ၸၢႆးၼွင်ႉ ... ၸၢႆးၼွင်ႉ ... ”
ငိၼ်းသဵင်ႁွင်ႉၸိုဝ်ႈမၼ်းလႄႈ မၼ်းၼႅတ်ႈၽုတ်ႇၽၢတ်ႇလုၵ်ႉသေ ႁွင်ႉဝႃႈ - “ မႄႈ ... မႄႈ... ” ၼႆယူႇ။
“ ၸၢႆးၼွင်ႉယႃႇပေလုၵ်ႉ ၶိုၼ်းၼွၼ်းလိုဝ်ႈႁိူဝ်ႉသေၵွၼ်ႇလႄႈ”
ၽူၺ်းဝႃႈၼင်ႇၼၼ်သေ ၶိုၼ်းပၢမ်ႉၸၢႆးၼွင်ႉ ၼွၼ်းၶိုၼ်းယူႇ၊ ၸၢႆးၼွင်ႉႁွင်ႉဝႃႈ -
“ မႄႈ ... မႄႈ ... မႄႈမႃးႁႃလုၵ်ႈၸၢႆးႁႃႉ ... ယႃႇပေပၢႆႈပႅတ်ႈလုၵ်ႈၸၢႆးၼႃႈ မႄႈ ... မႄႈ ... ”
မၼ်းၸၢႆးဝႃႈၼင်ႇၼႆသေ ၵွတ်ႇဝႆႉမႄႈမၼ်းႁႅင်းႁႅင်း ၵူဝ်မႄႈမၼ်း ပၢႆႈပႅတ်ႈမၼ်းၼႆယဝ်ႉ။
ၵူၺ်းၵႃႈ ဢၼ်မၼ်းၸၢႆးၵွတ်ႇဝႆႉၼၼ်ႉ ဢမ်ႇၸႂ်ႈမႄႈမၼ်းၸၢႆးၼႆ မၼ်းၸၢႆးဢမ်ႇႁူႉ ၽူၺ်းၵေႃႉၼိုင်ႈ ပဵၼ်ဢၼ်ၵႂင်ၵႂႃႇတႄႉတႄႉသေ မၼ်းၼၢင်း တေလႆႈႁဵတ်းႁိုဝ်ၵေႃႈ မၼ်းၼၢင်းဢမ်ႇႁူႉ။
ဢူဝ် ... ၸၢႆးၼွင်ႉ ... ၸၢႆးၼွင်ႉ ... ” မၼ်းၼၢင်းႁွင်ႉၼင်ႇၼႆသေ ၽိုတ်ႉတူဝ်မၼ်း ဢွၵ်ႇၵႄႈဢူၵ်းၸၢႆးၼွင်ႉယူႇ၊ ၸၢႆးၼွင်ႉ ၵႂင်ၵႂင်ၵႃးၵႃးသေ လၢတ်ႈဝႃႈ -
“ ဢိုဝ်း ... မႄႈမႄႈ ... မႄႈ ... မႄႈ ... ” ၼႆသေ မိုဝ်းမၼ်း ဢၼ်ၵွတ်ႇဝႆႉၽူၺ်းၼၼ်ႉၵေႃႈ ဢူၼ်ႈၵႂႃႇလွႆးလွႆးသေ မၼ်းၸၢႆး ၼွၼ်းလပ်းမွႆႈၵႂႃႇယဝ်ႉ။ ၽူၺ်း ၼႅတ်ႈပၢၵ်ႈမိုဝ်းၸၢႆးၼွင်ႉသေ ၶိုၼ်းယိပ်းဢဝ်မိုဝ်းၸၢႆးၼွင်ႉ ဝၢင်းဝႆႉလီလီယူႇ။ ၽူၺ်းၶိုၼ်းၸၼ်ဢဝ်ၽႃႈမႆ ႁူမ်ႇပၼ်ၸၢႆးၼွင်ႉ လီလီသေ မၼ်းၼၢင်းၵမ်းတူၺ်း ၼႃႈၽၢၵ်ႇၸၢႆးၼွင်ႉ ပဵၼ်ဢၼ်လိူတ်ႇမႆႈဝႆႉတႄႉတႄႉ။
“ ဢူဝ် ... ၸၢႆးၼွင်ႉ ၼိူဝ်ႉလိူတ်ႇဝႃႈလိူတ်ႇယဝ်ႉ ၼႆႉ ... ”
ၸၢႆးၼွင်ႉတႄႉ ၼွၼ်းလပ်းဝႆႉယူႇ၊ ၽူၺ်းၵေႃႉၼိုင်ႈတႄႉ လွမ်တူၺ်း ၼႃႈၸၢႆးၼွင်ႉသေ လွမ်ဝူၼ်ႉထူၺ်ႈၸႂ်လူင်ႁႅင်းႁႅင်း ၵမ်းၼိုင်ႈယဝ်ႉ။ ၸူဝ်ႈပၢၼ်မၼ်းၼၢင်း ႁႂ်ႈထူပ်းၺႃးၸိူင်ႉၼင်ႇမိူဝ်ႈၵႆႈၼၼ်ႉ ပႆႇတွၼ်ႉပဵၼ်သေပွၵ်ႈလႄႈ ႁူဝ်ၸႂ်မၼ်းၼၢင်း ၶိုၼ်းပဵၼ်ဢၼ်တွတ်ႇ လင်ႁႅင်းမႃးတႄႉတႄႉသေ မၼ်းဝူၼ်ႉတႂ်ႈဝူၼ်ႉၼိူဝ်ယူႇ။
“ ဢူဝ် ... ၵဝ်ၵုမ်ဝူၼ်ႉသင်ယူႇၼႆႉ ... ၵတ်ႉၵႃႈ ပီႈၸၢႆးသႅင် ဢမ်ႇမႃးႁၼ်လႃႈ ... ”
ၽွင်းၼၼ်ႉ ငိၼ်းသဵင် လႅင်း ႁွင်ႉဝႃႈ -
“ ပီႈၽူၺ်း ... ၼမ်ႉၽူတ်ႉယဝ်ႉ ”
ၸၢႆးသႅင် ၵေႃႈၽႅဝ်မႃးသေ ထၢမ်ဝႃႈ -
“ ၽူၺ်း ... ၸၢႆးၼွင်ႉ ပဵၼ်ႁိုဝ် ... ? ”
“ လူမ်းၼၢဝ်မၼ်း ၶိုၼ်ႈႁႅင်းၼႃႇလႄႈ ... မၼ်းၵႂင်ၵႂင်ၵႃးၵႃး ႁွင်ႉႁႃမႄႈမၼ်းသေ ၶိုၼ်းၼွၼ်းလပ်းၵႂႃႇယဝ်ႉ ပီႈၸၢႆးသႅင် ... ဢေႃႈ ... ပီႈၸၢႆးသႅင် ၶူးမေႃယႃတေမႃးယူႇႁႃႉ ... ? ”
“ ဢိူဝ်ႈ ... တေမႃးယူႇၼႆယဝ်ႉ ... ”
ၽူၺ်းၵေႃႈၵႂႃႇဢဝ်ၼမ်ႉမႆႈ သႂ်ႇတဝ်ႈထၢတ်ႈမႃးသေ ၶဝ်ပီႈၼွင်ႉသၢမ်ၵေႃႉ မႃးပႂ်ႉတူၺ်းၸၢႆးၼွင်ႉယူႇ။ ဢမ်ႇပေႃးႁိုင်သင် ၶူးမေႃယႃလူင် လုင်းၸၢႆးၽေႇ ဢဝ်ၵႃးမၼ်းသေ ၽႅဝ်မႃးယဝ်ႉလႄႈ ၸၢႆးသႅင်ၵႂႃႇႁပ်ႉဢဝ် တိူၵ်ႈယႃႈယႃသေ ဢွၼ်မႃးၸူးၸၢႆးၼွင်ႉယဝ်ႉ။
ၶူးမေႃယႃလူင်ၵေႃႈ ၸၢမ်းတူၺ်းၵမ်းတူၺ်းၶေႃႈမိုဝ်း ၸၢႆးၼွင်ႉသေ ၸၢႆးၼွင်ႉၵေႃႈ ၶိုၼ်းတိုၼ်ႇမႃးယဝ်ႉလႄႈ ၶူးမေႃယႃလူင် ၸင်ႇဢဝ်ဢၼ်တႅၵ်ႈၼၢဝ် သႂ်ႇပၼ်တႂ်ႈလိၼ်ႉၸၢႆးၼွင်ႉယဝ်ႉ ။
လႆႈႁူႉဝႃႈ လူမ်းၼၢဝ်ၸၢႆးၼွင်ႉမီးဝႆႉ ပၢၵ်ႇပႆသီႇလႄႈ လုင်းၸၢႆးၽေႇ ၸင်ႇသမ်းပၼ်ၶဵမ်မၢၵ်ႈၼိုင်ႈသေ ပၼ်ဝႆႉယႃႈယႃၵိၼ် တႃႇသီႇဝၼ်းယဝ်ႉ။ ၽွင်းမိူဝ်ႈ ၶူးမေႃယႃလူင် မိူဝ်းၵႂႃႇၼၼ်ႉ ၸၢႆးသႅင် ၸွမ်းမႃးသူင်ႇထိုင် တီႈၵႃးယူႇ။ လုင်းၸၢႆးၽေႇၸင်ႇထၢမ်ဝႃႈ -
“ ၸၢႆးသႅင် ... ...ၸၢႆးဢွၼ်ႇၵေႃႉၼႆႉ ပဵၼ်ၽႂ် ... ? ”
“ ပဵၼ်ၸၢႆးၼွင်ႉ ၼႆဢေႃႈ ... ”
“ ပဵၼ်ၸၢဝ်းပီႈၸၢဝ်းၼွင်ႉ ၸၢႆးသႅင်ၶဝ်ယူႇႁႃႉ ... ? ”
“ ဢမ်ႇၸႂ်ႈၶႃႈဢူႈလုင်း ... မိူဝ်ႈပေႃႈႁဝ်းၶဝ် လုၵ်ႉဝဵင်းလိူဝ်ႇ ၶိုၼ်းမႃးၼၼ်ႉ ၺႃးမၼ်းၼိူဝ်ရူတ်ႉရဵၼ်းသေ ႁွင်ႉမၼ်းၸွမ်းမႃးတီႈႁိူၼ်းဢေႃႈ ... ”
“ ဢိူဝ်ႈ ... ဢိူဝ်ႈ ... မိူဝ်ႈၼႆႉတႄႉ ပၼ်ၵိၼ်ၶဝ်ႈလႅဝ်ၵူၺ်းၵွၼ်ႇၼႃႈ ... ယႃႈယႃပၼ်ဝႆႉၼၼ်ႉၵေႃႈ ယႃႇပေလိုမ်းပၼ်ၵိၼ်ၼႃႈ ...”
“ ဢေႃႈ ... ဢေႃႈ ... ”
ဝၢႆးသေ ၶူးမေႃယႃလူင် လုင်းၸၢႆးၽေႇမိူဝ်းၵႂႃႇ ၸၢႆးသႅင်ၶိုၼ်းၽႅဝ်မႃး တီႈၸၢႆးၼွင်ႉသေ -
“ ၸၢႆးၼွင်ႉ ... ယူႇသႃႇမႃးယူႇၼႄႇ ... ”
ၸၢႆးၼွင်ႉ တိုၵ်ႉၶၢၼ်ႉလၢတ်ႈၵႂၢမ်းလႄႈ မၼ်းငွၵ်းႁူဝ်ၼႄ ၵမ်းၼိုင်ႈယဝ်ႉ။ ၼင်တႃမၼ်းၵေႃႈ ၼၵ်းမႃးလွႆးလွႆးယဝ်ႉလႄႈ မၼ်းၶိုၼ်းၼွၼ်းလပ်းၵႂႃႇ ၵွပ်ႈပိူဝ်ႈ ယႃႈယႃလုင်းၸၢႆးၽေႇ တိုၵ်းဝႆႉၼၼ်ႉယဝ်ႉ။
ဝၢႆးသေၸၢႆးၼွင်ႉ ၼွၼ်းလပ်းၵႂႃႇ ဢမ်ႇႁိုင်ဢမ်ႇၼၢၼ်း လုင်းၸၢႆးမိူင်းလႄႈ ပႃႈၼၢင်းၶွင်ႇၵေႃႈ ၵႂႃႇဢႅဝ် တီႈပႃႇၵိူဝ်သေ ၶိုၼ်းၽႅဝ်မႃးယဝ်ႉ၊ ၸၢႆးသႅင်ၵေႃႈ ၶိုၼ်းလၢတ်ႈၼႄလွင်ႈၸၢႆးၼွင်ႉၼၢဝ်၊ လွင်ႈၶဝ်သိုပ်ႇၽူၼ်း ႁွင်ႉၶူးမေႃယႃ လုင်းၸၢႆးၽေႇ မႃးယူတ်းယႃသမ်းပၼ်ၶဵမ်ၼၼ်ႉယူႇ။
------- + --------- + -------- + ---------
ၸၢႆးၼွင်ႉ ၼွၼ်းလပ်းၵႂႃႇႁိုဝ်တၢၼ်ႇလႂ်ၼႆၵေႃႈ မၼ်းၸၢႆးဢမ်ႇလၢမ်းလႆႈ၊ ၽိူဝ်ႇမၼ်းတိုၼ်ႇသေ မိုၼ်းတႃမႃးၼႆ လႆႁၼ်လႅင်း ၼင်ႈပႂ်ႉဝႆႉ ၼိူဝ်တင်ႇ ႁိမ်းတိၼ်ႇၵူႇမၼ်းၼၼ်ႉယူႇ ။ မၼ်းထွမ်ႇတူၺ်း ၼႂ်းတူဝ်ၼႂ်းၸႂ်မၼ်း မဝ်မႃး ယူႇသႃႇမႃးတႄႉတႄႉလႄႈ မၼ်းၸင်ႇႁွင်ႉဝႃႈ -
“ လႅင်း ... လႅင်း မႃးပႂ်ႉပီႈၸၢႆးၼွင်ႉ ႁႃႉ ... ? ”
လႅင်း လႆႈငိၼ်းသဵင်ၸၢႆးၼွင်ႉလႄႈ မၼ်းၸင်ႇမႃးႁိမ်းၸၢႆးၼွင်ႉသေ -
“ ပီႈၸၢႆးၼွင်ႉ ယူႇလီယဝ်ႉႁႃႉ ... ”
ၸၢႆးၼွင်ႉ လုပ်ႈၵမ်းႁူဝ်လႅင်းသေ လၢတ်ႈဝႃႈ -
“ယူႇလီမႃးယဝ်ႉ ... လႅင်း ... ”
ယူႇၵမ်းၼိုင်ႈလႆႈႁၼ် ၽူၺ်း ဢဝ်ၶဝ်ႈႁုင်လႅဝ်မႃးပၼ် ၸၢႆးၼွင်ႉယူႇ -
“ ၸၢႆးၼွင်ႉ ... ပဵၼ်ႁိုဝ်မႃး ...? ”
“ မဝ်မႃးယူႇ ... ၽူၺ်း ... ”
“ မေႃယႃဝႃႈ မိူဝ်ႈၼႆႉ ႁႂ်ႈၸၢႆးၼွင်ႉ ၵိၼ်ၶဝ်ႈႁုင်လႅဝ်ၵူၺ်း ၼႆဝႃႇ ပေႃးၵိၼ်ၶဝ်ႈႁုင်လႅဝ်ယဝ်ႉ ၵိၼ်ယႃႈယႃၸိူဝ်းၼႆႉ ႁေၼႃႉ ... ”
ၸၢႆးၼွင်ႉၵေႃႈ လုၵ်ႉမႃးၼင်ႈသေ ႁပ်ႉဢဝ်ဝၢၼ်ႇၶဝ်ႈႁုင်လႅဝ်ယူႇ
“ တႃႉလီ ၵဵင်ၸႂ် ၽူၺ်းၶဝ်လႃႈ ...”
“ ဢမ်ႇလူဝ်ႇၵဵင်ၸႂ်သင် ... ၸၢႆးၼွင်ႉ သွၼ်ႇႁႂ်ႈၸၢႆးၼွင်ႉ ၸဵဝ်းၶႅၼ်း ၸဵဝ်းမီးႁႅင်းၵူၺ်းယဝ်ႉ ... ”
“ ၶွပ်ႈၸႂ်ယဝ်ႈ ၽူၺ်း ... ”
ၽွင်းမိူဝ်ႈ ၸၢႆးၼွင်ႉ ၵိၼ်ၶဝ်ႈႁုင်လႅဝ်ယူႇၼၼ်ႉ ၽူၺ်းၸင်ႇထၢမ် -
“ လူဝ်ႇသင်ထႅင်ႈ ၸၢႆးၼွင်ႉ ... ၵိူဝ်မၼ်းၸွင်ႇထုၵ်ႇႁိုဝ် ...”
“ ၽူၺ်း ... လူဝ်ႇၵိူဝ်မၼ်း ထႅင်ႈဢိတ်းၼိုင်ႈ ဢိူဝ်ႈ ... ”
“ ၵိူဝ်ၸၢင်ႁႃႉ ... ပေႃးၼႆ လႅင်း ၵႂႃႇဢဝ်ၵိူဝ်မႃးပၼ် ၸၢႆးၼွင်ႉ ဢိတ်းၼိုင်ႈလူး ... ”
လႅင်းၵေႃႈ ၸင်ႇၵႂႃႇဢဝ်ၵိူဝ် မႃးပၼ်ၸၢႆးၼွင်ႉယဝ်ႉ -
“ ၽူၺ်း ... ပိူၼ်ႈဝႃႈ ... ၵူၼ်းမီးမၵ်ႉၵိူဝ်ၸၢင် ၵူၼ်းၽၢၼ်မၵ်ႉၵိူဝ်ၸဵမ်း ၼႆၼႃႇ ... ၸၢႆးၼွင်ႉၶဝ်တႄႉမၵ်ႉၵိူဝ်ၸဵမ်းယဝ်ႉ ... ”
ယွၼ်ႉပိူဝ်ႈ ၸၢႆးၼွင်ႉၶႂ်ႈဝႃႈ ၽူၺ်းၶဝ်ပဵၼ်ၵူၼ်းမီး ၊ မၼ်းသမ်ႉ ပဵၼ်ၵူၼ်းၽၢၼ်လႄႈ ၽူၺ်းၸင်ႇၶိုၼ်းဝႃႈ - “ မၵ်ႉၸၢင်မၵ်ႉၸဵမ်းဢၼ်ဝႃႈၼၼ်ႉ ပဵၼ်တီႈလိၼ်ႉယူဝ်ႉၸၢႆးၼွင်ႉ ... ”
ပေႃးဝႃႈ လႅင်းဢဝ်ၵွၵ်းၵိူဝ်မႃးၼႆၵေႃး ၸၢႆးၼွင်ႉ မႄးသႂ်ႇထႅင်ႈၵိူဝ်သေ သိုပ်ႇၵိၼ်ႁႂ်ႈသဵင်ႈမူတ်း ဝၢၼ်ႇၼိုင်ႈယဝ်ႉ -
“ သႂ်ႇထႅင်ႈႁိုဝ်ႉ ... ? ၸၢႆးၼွင်ႉ ... ”
“ ပေႃးယဝ်ႈ ... ၽူၺ်း ... ”
“ ပေႃးၼႆၵေႃႈ ၵိၼ်ယႃႈယႃၼႆႉသေလႄႈ ... လူဝ်ႇၵိၼ်ၼိုင်ႈဝၼ်း သၢမ်ပွၵ်ႈၼႆယဝ်ႉ ... ၸၢႆးၼွင်ႉ ၶၢၼ်ႉၵိၼ်ယႃႈယႃယူဝ်ႉ ...ၶႄး”
“ သင်ပဵၼ်လႆႈတႄႉ ... ဢမ်ႇၶႂ်ႈၵိၼ်ၵူၺ်း ၽူၺ်း ... ”
“ ဢူဝ်... ... ပေႃးဢမ်ႇၵိၼ်ႁိုဝ်တေပဵၼ် ယေႃႈ ... ယေႃႈ ၼေႈ ... ၼမ်ႉဢုၼ်ႇ ၵိၼ်လႄႈ ... ”
ၸၢႆးၼွင်ႉၵေႃႈ ယိူၼ်ႉၸႂ်ၵိၼ်ယႃႈယႃၼၼ်ႉယူႇ - ၽွင်းမိူဝ်ႈ မၼ်းဢမ်ႇယူႇလီ သွင်သၢမ်ဝၼ်းၼၼ်ႉ ၽူၺ်းၶဝ်ပေႃႈမႄႈလုၵ်ႈ ဢွၼ်ၵၼ်လုမ်းလႃးပၼ်မၼ်း တႄႉတႄႉဝႃႈဝႃႈယူႇ။ မၼ်းၸၢႆး ၶိုၼ်းပဵၼ် ဢၼ်ယူႇလီမႃးယဝ်ႉသေတႃႉ ၽွင်းမိူဝ်ႈ ၽူၺ်းၶဝ်ပီႈၼွင်ႉသၢမ်ၵေႃႉ ၵႂႃႇၶိုၼ်ႈႁူင်းႁဵၼ်းၼၼ်ႉ မၼ်းၸၢႆးပဵၼ်ဢၼ်ၶၢၼ်ႉတႄႉတႄႉ။
မိူဝ်ႈၼႆႉ ပဵၼ်ဝၼ်းဢိုတ်းႁဵၼ်းလႄႈ ၸၢႆးၼွင်ႉလႄႈလႅင်း မႃးဢဵၼ်ႈၵေႃႉၵၼ် တီႈၼႂ်းသူၼ်ၶဝ် မူၼ်ႈမူၼ်ႈသိူဝ်းသိူဝ်းယူႇ။ ၸၢႆးသႅင် ၽႅဝ်မႃးၼႂ်းသူၼ်သေ မႃးတူၺ်းႁၼ် လႅင်းလႄႈၸၢႆးၼွင်ႉ တေႃႇမီလမ်းၵၼ် မူၼ်ႈမူၼ်ႈသိူဝ်းသိူဝ်း ၼင်ႇၼၼ် မၼ်းၵေႃႈ သမ်ႉပေႃးသိူဝ်းၸႂ်ၵႂႃႇၸွမ်းယဝ်ႉ။ ၽွင်းမိူဝ်ႈ ၶႃလိုဝ်ႈႁိူဝ်ႉသေ မႃးၼင်ႈလိုဝ်ႈ တီႈတင်ႇၼႂ်းသူၼ်ၼၼ်ႉၼႆ ၸၢႆးသႅင် ၸင်ႇမႃးၸူး ၶႃသွင်ၵေႃႉသေ -
“ လႅင်း ... ၸွင်ႇၵျေႃႇႁိုဝ် ... ? ”
လႅင်းငွၵ်းႁူဝ်ၼႄ ၸၢႆးသႅင်သေ -
“ ၵျေႃႇ ဢေႃႈ ... ”
ၸၢႆးၼွင်ႉ ၸင်ႉယုမ်ႉတေႃႇၸၢႆးသႅင်သေ -
“ ဢေႃႈ ... ပီႈၸၢႆးသႅင် မႃးၼင်ႈၶႃႈလႄႈ ... ”
ၸၢႆးသႅင်ၵေႃႈ မႃးၶဝ်ႈၼင်ႈႁိမ်းၸၢႆးၼွင်ႉသေ -
“ ၸၢႆးၼွင်ႉ ... ပေႃးၸၢႆးၼွင်ႉ ၶႂ်ႈလႆႈၵၢၼ်ၼႆ ပီႈၸၢႆးသႅင် ၵႂႃႇထၢမ်ဝႆႉယဝ်ႉ ”
ၼႃႈၸၢႆးၼွင်ႉ ၵိုင်ႉၵၢင်ႉၸူမ်းသိူဝ်းၵႂႃႇသေ -
“ တႄႉႁႃႉ ... ? ပီႈၸၢႆးသႅင် ပဵၼ်ၵၢၼ်သင် ၶႃႈ ... ? ”
“ ပဵၼ်ၵၢၼ်ႁေႃႈၵႃး တႅၵ်ႇၸီႇ ၼႆယဝ်ႉ ... ၸွင်ႇၸၢႆးၼွင်ႉ တေပဵၼ်လႆႈႁိုဝ် ... ? ”
“ ဢေႃႈ ... ပဵၼ်လႆႈယူႇ ၵူၺ်းၵႃႈ ... သဵၼ်ႈတၢင်းၼႂ်းတႃႈၵုင်ႈၼႆႉ ၶႃႈဢမ်ႇပႆႇလႅၼ်ႇၵူၺ်း ... ”
“ ၼၼ်ႉတႄႉ ... ယႃႇပေမႆႈၸႂ် တၢင်းသဵၼ်ႈလႂ် ပဵၼ်တီႈလႂ် ... ၽႅဝ်တီႈလႂ်ၼႆ ပီႈၸၢႆးသႅင် တေၼႄပၼ်လႆ ... ”
“ ႁႃႉ ... ၸူမ်းဝႃႈၸူမ်းယဝ်ႉ ... ”
“ ဢိူဝ်ႈ ... တႃႇတေယူႇတေၵိၼ်ၼၼ်ႉၵေႃႈ ပေႃးယူႇၸွမ်းၶဝ်ၼႆ ၵႃႈႁူဝ်လိူၼ် တေပဵၼ်မဵဝ်းၼိုင်ႈ ... ပေႃးဢမ်ႇယူႇၸွမ်းၶဝ်ၼႆ ၵႃႈႁူဝ်လိူၼ် တေပဵၼ်မဵဝ်းၼိုင်ႈ ၼႆယဝ်ႉ ... ”
“ လႆႈယူႇၶႃႈၼႃႇ ... ၶႃႈတေၵႂႃႇယူႇၸွမ်းၶဝ်ဢေႃႈ ... သွၼ်ႇႁႂ်ႈလႆႈႁဵတ်းၵၢၼ်ၵူၺ်းၶႃႈလႃႈ ... ”
“လီယဝ်ႉ ... ပေႃးၼႆ မိူဝ်ႈၼိုင်ႈမႃးၼႆ ၸၢႆးၼွင်ႉ လူဝ်ႇလႆႈၵႂႃႇတီႈၶဝ်ယဝ်ႉ ...”
ၽွင်းၼၼ်ႉ လႅင်းၸင်ႇထၢမ်ဝႃႈ -
“ ပီႈၸၢႆးသႅင် ... ပီႈၸၢႆးၼွင်ႉ ...တေၵႂႃႇလႂ် ... ? ”
“ ၵႂႃႇႁႃႁေႃႈၵႃးၼႆဢိူဝ်ႈ ... လႅင်း ... ”
“ ပီႈၸၢႆးၼွင်ႉ တေဢမ်ႇယူႇၸွမ်း လႅင်းၶဝ်ယဝ်ႉႁႃႉ ... ? ”
ၸၢႆးၼွင်ႉ ၸင်ႇလုပ်ႈႁူဝ်လႅင်းသေ -
“ ဢေႃ ... လႅင်း ... ပီႈၸၢႆးၼွင်ႉ ဢမ်ႇယူႇတီႈၼႆႈၵေႃႈ ပီႈၸၢႆးၼွင်ႉ တေၵႆႉၵႆႉ မႃးလဵၼ်ႈၵေႃႉလႅင်းယူႇၵူၺ်း ... ”
လႅင်း ဢမ်ႇၶႂ်ႈၽၢတ်ႇၸၢႆးၼွင်ႉလႄႈ မၼ်းၸင်ႇႁႆႈသေ -
“ ဢိုဝ်း ... ဢိုဝ်း ... ပီႈၸၢႆးၼွင်ႉဢမ်ႇလႆႈၵႂႃႇ ဢိုဝ်း ... ဢိုဝ်း ... ”
“ လႅင်း ... ပီႈၸၢႆးၼွင်ႉ တေဢမ်ႇၵႂႃႇႁိုင်ၵူၺ်း ... ပီႈၸၢႆးၼွင်ႉ တေဢဝ်ၵႃးမႃးႁွင်ႉလႅင်းဢႅဝ်ႇဢိူဝ်ႈၼႃႈ ...ယႃႇပေႁႆႈတဵတ်ႇလႄႈ”
“ ဢိုဝ်း ... ဢိုဝ်း ... ပေႃးပီႈၸၢႆးၼွင်ႉၵႂႃႇၼႆ ၽႂ်ၵေႃႈဢမ်ႇမႃးဢဵၼ်ႈၵေႃႉလႅင်း ... ”
“ လႅင်း ... ပေႃးဝၼ်းဢိုတ်းႁဵၼ်းၼႆ ပီႈၸၢႆးၼွင်ႉ တေမႃးဢဵၼ်ႈၵေႃႉလႅင်းယူႇၼႃႈ ... ”
ၽွင်းၼၼ်ႉ ၽူၺ်းၽႅဝ်မႃးသေ မႃးႁၼ်လႅင်းႁႆႈဝႆႉယူႇလႄႈ -
“ ဢူဝ် ... လႅင်း ႁႆႈႁဵတ်းသင် ... ? ”
လႅင်းတႄႉႁႆႈယူႇသေ မၼ်းဢမ်ႇၸၢင်ႈလၢတ်ႈသင်၊ ၸၢႆးသႅင် ၸင်ႇဝႃႈ -
“ ဢေႃ ၸၢႆးၼွင်ႉတေလႆႈၵၢၼ်သေ တေၵႂႃႇႁေႃႈၵႃးၼႆလႄႈ လႅင်းဢမ်ႇၶႂ်ႈၽၢတ်ႇၸၢႆးၼွင်ႉ ၼႆဝႃႇ ... ”
လႆႈငိၼ်းၼင်ၼၼ် ၼႂ်းၸႂ်ၽူၺ်းၵေႃႈ ၵိုင်ႉၵၢင်ႉဢမ်ႇလီၵႂႃႇၵမ်းလဵဝ်ယူႇ၊ ၵူၺ်းၵႃႈ မၼ်းၼၢင်း ဢမ်ႇမီးႁႅင်း တႃႇတေႁၢမ်ႈသီးၸၢႆးၼွင်ႉ၊ ၶဝ်ၶိုၼ်းဢွၼ်ၵၼ် ၶျေႃးဝွၼ်းလႅင်းၵူႈပိူင်ပိူင်ယူႇယဝ်ႉ ။