ၶႅၵ်ႇ/တွၼ်ႈသိပ်းသီႇ

လႅင်းၵေႃႉၼိုင်ႈ လူင်းႁူင်းႁဵၼ်းသေ ၶိုၼ်းၽႅဝ်မႃး တီႈႁိူၼ်းၶဝ်ယဝ်ႉ၊ ၵႃႈၵွၼ်ႇတွၼ်းဢွၼ်တႄႉ ပေႃးမၼ်းဝႆႉထူင်မၼ်းယဝ်ႉၼႆ မၼ်းဢႅၼ်ႈၵႂႃႇၸူး ၸၢႆးၼွင်ႉ ၵႂႃႇႁႃဢဵၼ်ႈၵေႃႉၸၢႆးၼွင်ႉယူႇယဝ်ႉ။ မိူဝ်ႈၼႆႉ မၼ်းဝႆႉထူင်မၼ်းယဝ်ႉသေ လွမ်ႁႃၸၢႆးၼွင်ႉ တီႈၼိုင်ႈယဝ်ႉတီႈၼိုင်ႈသေတႃႉ ဢမ်ႇႁၼ်၊ မၼ်းၸင်ႇၵႂႃႇတူၺ်း တီႈလုၵ်းၼွၼ်းၸၢႆးၼွင်ႉသေ တွႆႇၽၵ်းတူႁွင်ႉဝႃႈ -

“ ပီႈၸၢႆးၼွင်ႉ ... ပီႈၸၢႆးၼွင်ႉ ... ”

ဢမ်ႇငိၼ်းသဵင်ၸၢႆးၼွင်ႉ တွပ်ႇၶိုၼ်းသင်လႄႈ မၼ်းၸင်ႇၽုၺ်ႇၽၵ်းတူ ၶဝ်ႈၵႂႃႇတူၺ်းဢဝ်ယဝ်ႉ၊ လႆႈႁၼ်ၽႃႈၼွၼ်းၸၢႆးၼွင်ႉ တူပ်ႉဝႆႉ သိမ်းဝႆႉလီလီလႄႈ လႅင်းထၢင်ႇဝႃႈ ၸၢႆးၼွင်ႉပၢႆႈတဵတ်ႇမၼ်းၼႆ မၼ်းလွမ်တူၺ်း တႂ်ႈၵူႇၼွၼ်းသေတႃႉ ဢမ်ႇႁၼ်ၸၢႆးၼွင်ႉ၊ ထူင်ၶူဝ်းၸၢႆးၼွင်ႉၵေႃႈ ဢမ်ႇႁၼ်ယဝ်ႉလႄႈ လႅင်းၸင်ႇမႃးၸူးမႄႈၶဝ် ၼႂ်းသွင်ႇၽႆးသေ -

“ မႄႈ ... မႄႈ ... ပီႈၸၢႆးၼွင်ႉ ၵႂႃႇလႂ် ... ? ပီႈၸၢႆးၼွင်ႉလူး... ? ”

ပႃႈၼၢင်းၶွင်ႇ လိူၵ်ႈၽၵ်းသေ လွမ်တူၺ်းၼႃႈလႅင်းယူႇ၊ လႆႈႁၼ် ၼမ်ႉတႃလႅင်း ဢိူမ်ႈႁူၺ်ႇဝႆႉလႄႈ မၼ်းၸင်ႇႁွပ်ႇဢဝ်လႅင်း ၶဝ်ႈမႃးၼႂ်းတၵ်းမၼ်းသေ -

“ လႅင်း ... ပီႈၸၢႆးၼွင်ႉ ၵႂႃႇၸွမ်းပီႈၸၢႆးသႅင်ဢိူဝ်ႈ ... ”

“ ပီႈၸၢႆးသႅင် သမ်ႉၵႂႃႇလႂ်ၶႃႈ ... မႄႈ ... မႄႈ... ”

“ ၵႂႃႇၼႂ်းဝဵင်းဢိူဝ်ႈ ... ၵမ်ႉတေၶိုၼ်းမႃးယဝ်ႉ ... ”

“ ၸွင်ႇပီႈၸၢႆးၼွင်ႉ တေၶိုၼ်းမႃးၸွမ်း ႁိုဝ် ... မႄႈ ... မႄႈ”

ပႃႈၼၢင်းၶွင်ႇ တေလႆႈတွပ်ႇဝႃႈႁိုဝ်ၼႆၵေႃႈ ဢမ်ႇႁူႉယဝ်ႉ၊ ၽွင်းမိူဝ်ႈမၼ်း တိုၵ်ႉငဝ်မိုင်ယူႇၼၼ်ႉ ငိၼ်းသဵင်ၵႃးၸၢႆးသႅင် ၶဝ်ႈမႃးလႄႈ လႅင်းၸင်ႇၼႅတ်ႈဢႅၼ်ႇဢွၵ်ႇ မႃးတူၺ်းၽႂ်းၽႂ်းယဝ်ႉ ၊ ၸၢႆးသႅင်ၵႂႃႇသူင်ႇ ၸၢႆးၼွင်ႉယဝ်ႉ ၶိုၼ်းမႃးဝႄႉႁပ်ႉၽူၺ်း တီႈၸၼ်ႉၸွမ်သေ ပွၵ်ႈမႃးမိူဝ်းယဝ်ႉ ။

လႅင်း မႃးၸုၵ်းပႂ်ႉလွမ်တူၺ်းသေတႃႉ ဢမ်ႇလႆႈႁၼ်ၸၢႆးၼွင်ႉလႄႈ လႅင်းၸင်ႇဢႅၼ်ႇမႃးၸူးၽူၺ်းသေ ထၢမ်ဝႃႈ -

“ ပီႈ ၽူၺ်း ... ပီႈၸၢႆးၼွင်ႉ ဢမ်ႇမႃးၸွမ်းၶႃႈႁႃႉ ... ? ”

ၽူၺ်းၵေႃႈ ဢမ်ႇၸၢင်ႈတွပ်ႇသင်လႄႈ မၼ်းၸင်ႇလွမ်တူၺ်း ၼႃႈၸၢႆးသႅင်ယူႇယဝ်ႉ၊ လႅင်း ၵေႃႈ ၶိုၼ်းတူၺ်း ပီႈၸၢႆးသႅင်သေထၢမ်ဝႃႈ-

“ ပီႈၸၢႆးသႅင် ... ပီႈၸၢႆးၼွင်ႉ ဢမ်ႇၶိုၼ်းမႃးၸွမ်းၶႃႈႁႃႉ ? ”

“ လႅင်း ... ပီႈၸၢႆးၼွင်ႉလၢတ်ႈဝႃႈ မၼ်းတေၵႆႉၵႆႉမႃးဢႅဝ် လႅင်းယူႇၼႆယဝ်ႉ ” လႆႈငိၼ်းသဵင် ၸၢႆးသႅင် လၢတ်ႈၼင်ႇၼၼ် လႅင်းႁူႉဝႃႈ ၸၢႆးၼွင်ႉဢမ်ႇမႃးၸွမ်းၶဝ်ယဝ်ႉ ၼႆလႄႈ မၼ်းၸင်ႇသီႈတွၼ်ႉႁႆႈသေ

“ သျိႃတ်ႉ ... ... ပီႈၸၢႆးၼွင်ႉ တေမႃးဢႅဝ်လႅင်းၶဝ် ... မိူဝ်ႈလႂ်ၶႃႈလႃႇ ... ပီႈၸၢႆးသႅင် ... သျိႃတ်ႉ ... ... ”

“ ပေႃးမၼ်းတၼ်းၼႆ မၼ်းတေမႃးဢိူဝ်ႈ ... လႅင်း ...”

ၽွင်းၼၼ်ႉ ၽူၺ်းၵေႃႈ ၸင်ႇမႃးႁွပ်ႇဢဝ်လႅင်းသေ -

“ လႅင်း ... မႃးလႄႈ ... ႁဝ်းမိူဝ်းၼႂ်းႁိူၼ်း ယႃႇပေႁႆႈယဝ်ႉ ... ပီႈၸၢႆးၼွင်ႉ တေမႃးဢႅဝ်ႇယူႇၵူၺ်း ... ”

ၽူၺ်း ပၼ်ႁႅင်းလၢတ်ႈထိုင်လႅင်းၼင်ႇၼၼ်သေတႃႉ ၼႂ်းၸႂ်မၼ်းၼၢင်းၵေႃႈ ပဵၼ်ႁိုဝ်ဝႆႉၵေႃႈ မၼ်းၼၢင်း ဢမ်ႇၸၢင်ႈလၢတ်ႈ၊ ၼင်ႇႁိုဝ် လႅင်းတေၸႂ်လီၼၼ်ႉ ၶဝ်ဢွၼ်ၵၼ်ၶျေႃးဝွၼ်းမၼ်း ၵူႈသမ်ႇၵူႈပိူင်သေတႃႉ လႅင်းတႄႉ ၸႂ်တိတ်းၸပ်းၸၢႆးၼွင်ႉယူႇ ။