ၶႅၵ်ႇ/တွၼ်ႈသိပ်းပႅတ်ႇ
ဝၼ်းသဝ်
ၸၢႆးသႅင်လႆႈႁၼ် ၸၢႆးၼွင်ႉ ၶဝ်ႈမႃးၼႂ်းႁိူၼ်းၶဝ်လႄႈ မၼ်းၸင်ႇႁပ်ႉတၵ်ႉဝႃႈ -
“ ဢေႃး ... ၸၢႆးၼွင်ႉ ၶဝ်ႈမႃးၼင်ႈလႄႈ ... ”
ၽွင်းၼၼ်ႉ လႅင်းလႄႈၽူၺ်း ၸင်ႇၽႅဝ်မႃး ႁိမ်းၸၢႆးၼွင်ႉသေ ၸၢႆးၼွင်ႉ ၸင်ႇႁွင်ႉဝႃႈ -
“ လႅင်း ... မႃးၸူးပီႈၸၢႆးၼွင်ႉလူး ... ”
ၸၢႆးၼွင်ႉ ၸင်ႇႁွပ်ႇဢဝ်လႅင်း ၼင်ႈၼႂ်းတၵ်းမၼ်းသေ -
“ မိူဝ်ႈၼႆႉ ... လႅင်းၶဝ် ဢမ်ႇၶိုၼ်ႈႁဵၼ်းႁႃႉ ... ? ”
“ မိူဝ်ႈၼႆႉ ဢိုတ်းႁဵၼ်းဢေႃႈ ... မိူဝ်ႈၽုၵ်ႈၵေႃႈ ဢိုတ်းဢေႃႈ”
“ ပေႃးဢိုတ်းႁဵၼ်းၼႆ ၸွင်ႇၵျေႃႇႁိုဝ် ... ? လႅင်း ... ”
လႅင်း ငွၵ်းႁူဝ်ၼႄၵမ်းၼိုင်ႈသေ ၶိုၼ်းႁႅၼ်တူၺ်း ၼႃႈၸၢႆးၼွင်ႉ လႆႈႁၼ် ၶွပ်ႇတႃၽၢႆႇၶႂႃၸၢႆးၼွင်ႉ ၵမ်ႇဝႆႉလႄႈ လႅင်းၸင်ႇထၢမ် -
“ ပီႈၸၢႆးၼွင်ႉ ... တႃပီႈၸၢႆးၼွင်ႉ ပဵၼ်သင် ... ? ”
ၸၢႆးသႅင်ၵေႃႈ ၸင်ႇထၢမ်ဝႃႈ -
“ ၸႂ်ႈတႄႉဢိူဝ်ႈ ... ပီႈၸၢႆးသႅင်ၵေႃႈ တိုၵ်ႉဢၢင်ႈထၢမ်ၼင်ႇၵဝ်ႇဢိူဝ်ႈ ... ၼႆႉ ... ”
ပေႃးတေတွပ်ႇသိုဝ်ႈသိုဝ်ႈၼႆ ဢမ်ႇသၢင်ႇထုၵ်ႇလႄႈ ၸၢႆးၼွင်ႉ ၸင်ႇတွပ်ႇဝႃႈ -
“ ဢေႃ ... ပလၢတ်ႈလူမ်ႉ တီႈဢၢပ်ႇၼမ်ႉသေ တိူဝ်ႉၺႃးၵႂႃႇ ဢိတ်းၼိုင်ႈ ၵူၺ်း ... ”
“ ႁိုင်ယဝ်ႉႁႃႉ ... ၸၢႆးၼွင်ႉ လႆႈလၢႆဝၼ်းယဝ်ႉ ... ”
“ လႆႈ ႁႃႈႁူၵ်းဝၼ်း ၼင်ႇၵဝ်ႇယဝ်ႉ ... ”
“ ၸၢႆးၼွင်ႉ ဢမ်ႇၵႂႃႇၼႄ ႁွင်ႈယႃႁႃႉ ... ? ”
ပေႃးၵႂႃႇၼႄႁွင်ႈယႃၼႆ တေသဵင်ႈငိုၼ်းလႄႈ ၸၢႆးၼွင်ႉဢမ်ႇပဵၼ်ၵႂႃႇၼႄ၊ ၵူၺ်းၵႃႈ ၼင်ႇႁိုဝ် ၵႂၢမ်းတေႁၢင်ႈလီၼၼ်ႉ မၼ်းၸင်ႇဝႃႈ -
“ ၵႂႃႇၼႄယူႇ ... ”
“ တီႈလဵဝ် ... ပဵၼ်ႁိုဝ်မႃး... ”
“ ဢမ်ႇပဵၼ်သင် ... လီမႃးၼင်ႇၵဝ်ႇယဝ်ႉ ... ”
ၽူၺ်းၸင်ႇထၢမ် -
“ ယႃႈယႃၵိၼ်လူး ... ၸွင်ႇမေႃယႃပၼ်ႁိုဝ် ... ? ”
“ ပၼ်ယူႇ ... ”
“ ပီႈၸၢႆးသႅင် မႃးလၢတ်ႈၼႄလႄႈ ...လွင်ႈၸၢႆးၼွင်ႉ ဢမ်ႇႁေႃႈၵႃးယဝ်ႉၼႆ ၽူၺ်းလႆႈႁူႉသေ ၸႂ်ဢမ်ႇလီၼင်ႇၵဝ်ႇ ... ”
“ ၼႆႉတႄႉ ဢမ်ႇၸၢင်ႈဝႃႈၼင်ႇၵဝ်ႇ ... ပဵၼ်လူၺ်ႈၵၢမ်ႇၸၢႆးၼွင်ႉၵႂႃႈ ... ၽူၺ်း ... ”
ၸၢႆးသႅင် ၸင်ႇထၢမ်ဝႃႈ -
“ ၸၢႆးၼွင်ႉ ...ၵၢၼ်တႃႇတေၽုၵ်ႇမွၵ်ႇ ႁူတ်းသူၼ်ၼၼ်ႉ ၸွင်ႇၸၢႆးၼွင်ႉ တေႁဵတ်းလႆႈႁိုဝ် ... ? ”
“ လႆႈဢေႃႈ ... ပီႈၸၢႆးသႅင် ... ”
“ မိူဝ်ႈသိုၼ်းၼၼ်ႉ ... ငိၼ်းပေႃႈႁဝ်း မႃးလၢတ်ႈဝႃႈ ၶူးမေႃယႃလူင်လုင်းၸၢႆးၽေႇၶဝ် ၶႂ်ႈလႆႈၵူၼ်းႁဵတ်းၵၢၼ် တႃႇၼႂ်းဝၢင်းႁိူၼ်းၶဝ် ၼႆယဝ်ႉ လုင်းသၢင်ႇတုၺ်ႉ ဢၼ်ယူႇၸွမ်းၶဝ်ၼၼ်ႉၵေႃႈ ထဝ်ႈမႃးယဝ်ႉလႄႈ မၼ်းဢမ်ႇပေႃးပႄႉၵၢၼ်သူၼ်မွၵ်ႇ ၼႂ်းဝၢင်းၶဝ် ၼႆယဝ်ႈ ... ၵွပ်ႈၼႆ ပေႃးဝႃႈ ၸၢႆးၼွင်ႉ တေပဵၼ်လႆႈယူႇၼႆ ၶမ်ႈၸူင်ႈ ပီႈၸၢႆးသႅင်လႄႈ ပေႃႈႁဝ်း တေၵႂႃႇလၢတ်ႈပၼ်လႆ ... ”
ၸၢႆးၼွင်ႉဝူၼ်ႉဝႃႈ မၼ်းတေလႆႈၸမ် ပီႈဢၢႆႈမၼ်းၸၢႆးၸၢႆးယဝ်ႉလႄႈ မၼ်းတေဢၢၼ်းယူႇၸွမ်းၶဝ်သေ တေၶတ်းၸႂ် မွၵ်ႇလၢတ်ႈ ႁႂ်ႈၸၢႆးၸၢႆးႁူႉထိုင် လွင်ႈဝႃႈ မၼ်းပဵၼ် ၼွင်ႉဢွၵ်ႇဢွၵ်ႇၸၢႆးၸၢႆးၼၼ်ႉယူႇ ၼႆသေ မၼ်းလွမ်ၸူမ်းသိူဝ်းဝႆႉယူႇ၊ လႆႈႁၼ်ၸၢႆးၼွင်ႉငဝ်မိုင်ၵႂႃႇ လူၺ်ႈပၢႆးဝူၼ်ႉမၼ်းၼၼ်ႉသေ ၸၢႆးသႅင် ၸင်ႇထၢမ်ဝႃႈ -
“ ပဵၼ်ႁိုဝ် ... ? ၸၢႆးၼွင်ႉ ... ၸၢႆးၼွင်ႉပဵၼ်သင် ... ? သမ်ႉငဝ်မိုင်ယူႇလႃႇ ... ”
“ ဢေႃး ... ဢမ်ႇပဵၼ်သင်ၶႃႈ ... ၶႃႈဝူၼ်ႉဝႃႈ တေလႆႈႁဵတ်းႁိုဝ် တွပ်ႇၵႄးၸူးပီႈၸၢႆးသႅင်ၶဝ်ၵေႃႈ ဢမ်ႇႁူႉယဝ်ႈ ...ၼႆဢေႃႈ ... ”
“ ဢမ်ႇလူဝ်ႇၵူၺ်း ... သွၼ်ႇႁႂ်ႈၸၢႆးၼွင်ႉသၢင်ႇထုၵ်ႇၼၼ်ႉၵူၺ်း ... ”
“ ၸူမ်းၶႃႈယဝ်ႈ ... ပီႈၸၢႆးသႅင် ... ”
လႅင်း ၸင်ႇၶိုၼ်းဝႃႈ -
“ ပီႈၸၢႆးၼွင်ႉ ... ၵႆႉမႃးဢႅဝ်ႇလႅင်းၶဝ်ၽွင်ႈ ၼႃႈ ... ”
“ တေမႃးယူႇလႅင်း ... လႅင်းၵေႃႈ မႃးဢႅဝ်ႇပီႈၸၢႆးၼွင်ႉၼႃး ”
လႅင်းငွၵ်းႁူဝ်ၼႄ ၸၢႆးၼွင်ႉယူႇ၊ ၶဝ်သိုပ်ႇဢုပ်ႇၵၼ်သေ ထိုင်မႃး တၢမ်းၶမ်ႈ ၸၢႆးသႅင်လႄႈပေႃႈၶဝ် ၸွမ်းမႃးသူင်ႇၸၢႆးၼွင်ႉ ထိုင်တီႈႁိူၼ်း လုင်းၸၢႆးၽေႇ ၶဝ်ယဝ်ႈ ။
တီႈၼႂ်းလုၵ်းၶႅၵ်ႇၼၼ်ႉ လႆႈႁၼ်လုင်းၸၢႆးၽေႇ ပႃႈၼၢင်းမွၼ်းၶဝ်ပႂ်ႉႁပ်ႉၶဝ် ဝႆႉယူႇ -
“ မႂ်ႇသုင် ... လုင်းၸၢႆးမိူင်းၶဝ် ...”
“ မႂ်ႇသုင် ... ”
“ ဢမ်ႇႁၼ်ၵၼ် ႁိုင်ၼႃႇယဝ်ႉၼေႃ ... ”
ၸၢႆးၼွင်ႉတႄႉ လွမ်တူၺ်း ၼႂ်းၶၢၼ်းၶႅၵ်ႇလႄႈ ၶႅပ်းႁၢင်ႈၶဝ်ပေႃႈမႄႈလုၵ်ႈၼၼ်ႉယူႇ၊ လုင်းၸၢႆးၽေႇ လုင်းၸၢႆးမိူင်းၶဝ် ဢုပ်ႇၵၼ်သင်ၵေႃႈမၼ်းတေႃႈ ဢမ်ႇၶဝ်ႈၸႂ်၊ မၼ်းလွမ်ႁႃတူၺ်း ပီႈဢၢႆႈမၼ်းၸၢႆးၸၢႆးသေတႃႉ ဢမ်ႇႁၼ်၊ လုင်းၸၢႆးမိူင်းၸင်ႇဝႃႈ -
“ ၼေႈ ... လုင်းၸၢႆးၽေႇ ၼႆႉပဵၼ်ၸၢႆးၼွင်ႉၼႆယဝ်ႉ ...ၸိုင်ဝႃႈ ၶႂ်ႈလႆႈၵူၼ်းယူႇႁူမ်ႈ တႃႇလုမ်းလႃးသူၼ်ၼႆလႄႈ ၸင်ႇဢွၼ်မႃးၼႄယဝ်ႈ ... ၸၢႆးၼွင်ႉၼႆႉ ယူႇမေႇမဵဝ်ႉမႃးသေ ယၢမ်ႈႁဵတ်းၵၢၼ်သူၼ်မႃးလီလီဢိူဝ်ႈ ... ”
လုၵ်ႈၸၢႆးၽေႇၶႃပူႇဢွၵ်ႇ ၸင်ႇလွမ်တူၺ်း ၸၢႆးၼွင်ႉလီလီသေ -
“ ၸၢႆးၼွင်ႉ ၼႆႁႃႉ ... ? ”
“ ၸႂ်ႈၶႃႈဢေႃႈ ... ”
“ ၸၢႆးၼွင်ႉ ၸွင်ႇတေပဵၼ်လႆႈႁိုဝ် ... ? ပေႃးယူႇၸွမ်းလုင်းၶဝ်ၼႆ တေလႆႈမေႃလုမ်းလႃးပႃး ၼႂ်းႁိူၼ်းၼွၵ်ႈႁိူၼ်း ၸိူဝ်းၼႆႉဢိူဝ်ႈ ”
“ ပဵၼ်လႆႈယူႇၶႃႈ ... ”
“ ဢိူဝ်ႈ ... လီယဝ်ႈ ... ဢူႈမႄႈပီႈၼွင်ႉၸၢႆးၼွင်ႉၶဝ်လူး? ”
“ တီႈလဵဝ် ... ၶႃႈဢမ်ႇမီးပီႈၼွင်ႉယဝ်ႉၶႃႈ ... ဢူႈမႄႈၵေႃႈ လူႉႁၢႆတၢႆၵႂႃႇ ၸဵမ်မိူဝ်ႈၶႃႈလဵၵ်ႉယဝ်ႉ ... ဢေႃႈ ... ”
“ ဢိုဝ်ႈ ... ဝႃႈၼၼ်ႁႃႉ ... ဢိူဝ်ႈ ... ပေႃးၼႆ မိူဝ်ႈၽုၵ်ႈ ဢဝ်ၶူဝ်းၸၢႆးၼွင်ႉၶၢႆႉမႃးလႄႈ ... တီႈယူႇတီႈၼွၼ်းတႄႉ ယူႇၸွမ်းလုင်းသၢင်ႇတုၺ်ႉ ၼႂ်းသိုင်ႇၵႃးၵေႃႈ လႆႈယူႇလူး... ”
“ ဢေႃႈ ... ၸူမ်းဝႃႈၸူမ်းၶႃႈယဝ်ႈ ... ”
“ ငိုၼ်းႁူဝ်လိူၼ်တႄႉ ၼမ်ဢေႇဢမ်ႇဝႃႈ လုင်းၶဝ်တေတူၺ်းတူၺ်းသေ ၶပ်ႉၶိုင်ပၼ်ၵႂႃႈ ... လွင်ႈၵိၼ်လွင်ႈၼုင်ႈၵေႃႈ လုင်းၶဝ် တေတူၺ်းထိုင်ပၼ်လႆ ... ၼႃႈ ... ”
“ ဢေႃႈ ... ႁဵတ်းႁိုဝ်ၵေႃႈ လီယူႇၶႃႈ ... ”
လုင်းၸၢႆးမိူင်းၵေႃႈ ၸင်ႇဝႃႈ -
“ ၸၢႆးၼွင်ႉ ... ပေႃးဝႃႈ ၸၢႆးမႃးယူႇတီႈၼႆႈၼႆ လုင်းၸၢႆးၽေႇ ပႃႈၼၢင်းမွၼ်းၶဝ် ဝႃႈၸိူင်ႉႁိုဝ်ၼႆၵေႃႈ ထွမ်ႇဢဝ်ၵႂၢမ်းသေ ႁဵတ်းၸွမ်းဢိူဝ်ႈၼႃႈ ... ၵၢၼ်သင်ဢမ်ႇဝႃႈၼႃ ... ... ”
“ ဢေႃႈ ... တမ်းၸႂ်ၶႃႈလႃႈ ... ”
“ လီယဝ်ႈ ပေႃးၼႆ မိူဝ်ႈၽုၵ်ႈမႃး ၸင်ႇႁႂ်ႈၸၢႆးသႅင်မႃးသူင်ႇၼႃႈ ”
လုင်းၸၢႆးမိူင်း မီးတၢင်းၵႂႃႇထႅင်ႈတီႈၼိုင်ႈလႄႈ -
“ ဢေႃႈ ... လုင်းၸၢႆးၽေႇ လႄႈပႃႈၼၢင်းမွၼ်းၶဝ် ႁဝ်းမီးတၢင်းၵႂႃႇထႅင်ႈ တီႈၼိုင်ႈလႄႈ တေၵႂႃႇမိူဝ်ႈၵွၼ်ႇၼႃႈ ... ”
“ ဢေႃႈ ... ဢေႃႈ ... လီယဝ်ႈ...ၵႆႉမႃးသူႇမႃးၸႂ်းၽွင်ႈၼႃႈ”
“ ဢိူဝ်ႈ ... ဢိူဝ်ႈ ... ”
ၸၢႆးသႅင် ႁေႃႈၵႃးဢွၵ်ႇႁိူၼ်းၶဝ်မႃးသေ ၵႂႃႇသိုပ်ႇသူင်ႇ လုင်းၸၢႆးမိူင်း တီႈႁိူၼ်းတႆးၵေႃႉမၼ်းယဝ်ႉ ။
“ ၸၢႆးၼွင်ႉ ... ႁိူၼ်းဢၼ်ၸၢႆးၼွင်ႉ တေၵႂႃႇယူႇၼႆႉ ၶဝ်မီးပေႃႈ မႄႈလုၵ်ႈသၢမ်ၵေႃႉသေ ၵူၼ်းႁေႃႈၵႃးၶဝ် လုင်းသၢင်ႇတုၺ်ႉလႄႈ ၵူၼ်းတူမ်ႈၶဝ်ႈႁုင်ၽၵ်းၶဝ် ပႃႈယွတ်ႈ ၼႆ မီးႁႃႈၵေႃႉယဝ်ႈ ...ပေႃးဝႃႈ ၸၢႆးၼွင်ႉ ၵႂႃႇယူႇၸွမ်းၶဝ်ၼႆတႄႉ တေမီးႁူၵ်းၵေႃႉ ဢိူဝ်ႈ ... ”
ၸၢႆးၼွင်ႉတႄႉယဵၼ်သေ ပႂ်ႉထွမ်ႇငိၼ်း ဢၼ်ၸၢႆးသႅင်လၢတ်ႈၼႄၼၼ်ႉယူႇ -
“ လုၵ်ႈၸၢႆးၶဝ်ၸၢႆးၸၢႆးၼၼ်ႉ ... ၵွပ်ႈပိူဝ်ႈ ပဵၼ်လုၵ်ႈၸၢႆးၵေႃႉလဵဝ်လႄႈ မႄႈၶဝ် ဢဝ်ၶၢပ်ႈၸွမ်းၸႂ်မၼ်း ၸဵမ်မိူဝ်ႈလဵၵ်ႉလဵၵ်ႉ တေႃႇမိူဝ်ႈလဵဝ်ယဝ်ႈ ... ၵွပ်ႈၼႆ မၼ်းႁမ်ႉထၢင်ႇယႂ်ႇတူဝ်မၼ်းသေ ၵႆႉမေႃထၢင်ႇ လဵၵ်ႉပိူဝ်ႈဢိူဝ်ႈ ... ပေႃးၸၢႆးၼွင်ႉ ၵႂႃႇယူႇၸွမ်းၶဝ်ၼႆ လူဝ်ႇလႆႈမေႃယူႇၵႂႃႇ ႁႂ်ႈမၼ်းမႅၼ်ႈၸႂ်ၶဝ် ၼၼ်ႉယူႇၼႃ ... ”
ၸွမ်းၼင်ႇ ၶေႃႈၵႂၢမ်းဢၼ်ၸၢႆးသႅင်လၢတ်ႈၼၼ်ႉ ၸၢႆးၼွင်ႉ ၸွင်ႇတေပဵၼ် ၵူၼ်းမႅၼ်ႈၸႂ်ၸၢႆးၸၢႆးလႆႈႁိုဝ်ၼႆ ၸၢႆးၼွင်ႉဝူၼ်ႉၶမ်ၸႂ်ယူႇ၊ မၼ်းတႅပ်းတတ်းၸႂ်မၼ်းဝႃႈ ပဵၼ်ႁိုဝ်ပဵၼ် တေဢၢၼ်းၶတ်းၸႂ် ယူႇၵႂႃႇၼႆယူႇယဝ်ႈ။
+ + + + + + +
ဝၢႆးသေ ၸၢႆးၼွင်ႉၶဝ်ဢွၵ်ႇၵႂႃႇ ဢမ်ႇပေႃးႁိုင် ၸၢႆးၸၢႆးႁေႃႈၵႃးသေ ၽႅဝ်မႃးၼႂ်းဝၢင်းႁိူၼ်းၶဝ်ယဝ်ႈ ၊ ၽၵ်းတူဝၢင်းႁိူၼ်းဢိုတ်းဝႆႉလႄႈ မၼ်းၸင်ႇၼဵၵ်းႁွၼ်းၵႃးမၼ်းသေ ၸႂ်ႉႁႂ်ႈလုင်းသၢင်ႇတုၺ်ႉ မႃးၽုၺ်ႇၽၵ်းတူ ပၼ်မၼ်းယူႇ -
တိတ်း တိတ်း ... ... တိတ်း ... တိတ်း ... ...
လုင်းသၢင်ႇတုၺ်ႉၵေႃႈ လီႉၵီႉလၼ်းၵၼ်းသေ ၸင်ႇၼႅတ်ႈမႃး ၽုၺ်ႇၽၵ်းတူပၼ် ၸၢႆးၸၢႆးၽႂ်းၽႂ်းယဝ်ႈ ၸၢႆးၸၢႆးႁေႃႈၵႃးမၼ်း ၶဝ်ႈမႃးလွႆးလွႆးသေ ပွင်ႉဝႃႈ -
“ ႁိုဝ်ႉ ... လုင်းသၢင်ႇတုၺ်ႉ ၵုမ်ႇႁဵတ်းသင်ၼႆႉ ... ၼၢၼ်းမႃးၽုၺ်ႇၽၵ်းတူၵျႃႉလႃႇ ... ”
လုင်းသၢင်ႇတုၺ်ႉ ၸင်ႇသၼ်ႇသၼ်ႇသၢႆသၢႆသေ ၶိုၼ်းတွပ်ႇဝႃႈ-
“ ဢေႃႈ ... ၸၢႆး ၸၢႆး ... လုင်းၵုမ်ႇမၢင်ႉၽဵဝ်ႈတီႈၼွၼ်းဢိူဝ်ႈ... ငိၼ်းဝႃႈ ပေႃႈလဵင်ႉလူင် တေႁွင်ႉၵူၼ်းယူႇႁူမ်ႈ ထႅင်ႈၵေႃႉၼိုင်ႈသေ တေမႃးႁဵတ်းၵေႃႉလုင်း တီႈသိုင်ႇၵႃးၼႆယဝ်ႈ ... ”
“ တေႁွင်ႉၵူၼ်းယူႇႁူမ်ႈၼႆႁႃႉ ? ပဵၼ်ၽႂ် ... ? ”
“ လုင်းၵေႃႈ ဢမ်ႇပႆႇႁူႉၸၵ်း ... ပဵၼ်ၵူၼ်းၸၢႆးဢွၼ်ႇၵေႃႉၼိုင်ႈယဝ်ႈ ”
ၸၢႆးၸၢႆးၵေႃႈ ႁေႃႈၵႃးၶဝ်ႈမႃးဝႆႉၵႃးသေ မိူဝ်ႈၸူးၼႂ်းႁိူၼ်းယဝ်ႈ၊ မၼ်းမႃးႁၼ်မႄႈၶဝ်ၵေႃႉလဵဝ်လႄႈ မၼ်းၸင်ႇထၢမ်ဝႃႈ -
“ မႃႇမီႇ ... ၸိုင်ဝႃႈ မႃႇမီႇၶဝ် တေႁွင်ႉၵူၼ်းယူႇႁူမ်ႈထႅင်ႈၼႆႉ”
“ ဢိုဝ်ႈ ... ဝႃႈၼၼ်ယဝ်ႉ ... တႅတ်ႇတီႇသူ ၶႂ်ႈလႆႈသေ တေႁွင်ႉမႃး မိူဝ်ႈၽုၵ်ႈ ၼႆဝႃႇ ... ”
“ ပဵၼ်ၽႂ်ၶႃႈ ... မႃႇမီႇ ... ”
“ မႃႇမီႇၵေႃႈ ဢမ်ႇႁူႉၸၵ်းၼင်ႇၵဝ်ႇ ... ဢၢၼ်ႇၵႄႇသူ လုင်းၸၢႆးမိူင်းဢွၼ်မႃးဢိူဝ်ႈ ... ၸိုဝ်းမၼ်းတႄႉ ႁွင်ႉဝႃႈ ၸၢႆးၼွင်ႉၼႆယဝ်ႉ ...”
“ တေႁွင်ႉႁဵတ်းသင်ၶႃႈ မႃႇမီႇ ... သုတ်းတီႈလုင်းသၢင်ႇတုၺ်ႉၵေႃႈ မီးယူႇလူး ... ”
“ ဢိုဝ်ႈ ... မႃႇမီႇတႄႉ ဢမ်ႇၸၢင်ႈဝႃႈ ... တႅတ်ႇတီႇသူ ၶႂ်ႈလႆႈလႄႈ ၸင်ႇၵႂႃႇထၢမ် ဢၢၼ်ႇၵႄႇလုင်းၸၢႆးမိူင်းၶဝ်ၵႂႃႈ ... ၵွပ်ႈၼႆ ၶဝ်ၸင်ႇမႃးသူင်ႇဢိူဝ်ႈ ... လုၵ်ႈၸၢႆး ... ၵႂႃႇၵိၼ်ၶဝ်ႈႁေၵွၼ်ႇလႄႈ ... မႃႇမီႇၶဝ်တႄႉ ၵိၼ်ယဝ်ႉယဝ်ႈ ... ”
ၸၢႆးၸၢႆး ၵိၼ်ၶဝ်ႈသေ ဝူၼ်ႉတူၺ်း လွင်ႈၵူၼ်းယူႇႁူမ်ႈၶဝ်ၼၼ်ႉယူႇ၊ ႁဵတ်းႁိုဝ်ၵေႃႈ ၸၢႆးၼွင်ႉဢၼ်ဝႃႈၼၼ်ႉ တေပဵၼ်ၵေႃႉဢၼ်ၸွမ်းၸၢႆးသႅင် ၵေႃႉဢၼ်ၽႃႇၺႃးဢုမ်မွၵ်ႇမၼ်းလႅဝ် ၵေႃႉဢၼ်မၼ်းထုပ်ႉႁႅမ်ၼၼ်ႉ ၼႆယူႇ။
“ ဢေႃး ... ၸိုဝ်ႈမႂ်းဝႃႈ ၸၢႆးၼွင်ႉ ၼႆႁႃႉ ... ? ”
“ ၵွပ်ႈပိူဝ်ႈ ... မႂ်းဢဝ်ဢုမ်မွၵ်ႇၵဝ်လႅဝ်လႄႈ ... ႁႃးတေၶိုၼ်းၺႃးၵၼ်ယူႇၵႂႃႈ ... ”
ၸၢႆးၸၢႆး ၵိၼ်ၶဝ်ႈဢိတ်းၼိုင်ႈသေ ပေႃးပႅတ်ႈယဝ်ႈ။