ၶႅၵ်ႇ/တွၼ်ႈသိပ်း
ၸၢႆးၼွင်ႉ တႅတ်းတတ်းၸႂ်မၼ်း ဢဵၼ်းဢၢၼ်းၵႂႃႇႁႃပီႈဢၢႆႈမၼ်း တီႈတႃႈၵုင်ႈလႄႈ ယၢမ်းလဵဝ် မၼ်းၸၢႆး မႃးၶီႇရူတ်ႉရဵၼ်းသေ ၼင်ႈႁိမ်းႁူးလႅင်း ငဝ်တူၺ်းပိူၼ်ႈယူႇ ။
ၽွင်းရူတ်ႉရဵၼ်းၸမ်ဢွၵ်ႇၼၼ်ႉ ၵူၼ်းသၢမ်ၵေႃႉ ပေႃႈမႄႈလုၵ်ႈ တိဝ်ႈထူင်ၶူဝ်း ၽႅဝ်မႃး ႁိမ်းတီႈၼင်ႈမၼ်းၼၼ်ႉသေ မႄႈပႃႈၵေႃႉၼၼ်ႉ ၸင်ႇဝႃႈတီႈၸၢႆးၼွင်ႉ ဢၼ်တိုၵ်ႉ လွမ်မိူၼ်ႇမုင်ႈတူၺ်း ၵူၼ်းတီႈၼွၵ်ႈၼၼ်ႉယူႇ -
“ ၸၢႆး ... ထူင်ၶူဝ်းၼိူဝ်ၼႆႉ ပဵၼ်ထူင်ၸၢႆးႁႃႉ ? ”
“ ၸႂ်ဢေႃႈ ... ”
“ ဢဝ်သုတ်ႉပၼ် တၢင်းၼႃႈဢိတ်းၼိုင်ႈ ၸွင်ႇတေလႆႈႁိုဝ် ”
“ လႆႈဢေႃႈ ... ”
ၸၢႆးၼွင်ႉၵေႃႈ ဢဝ်ထူင်မၼ်း သုတ်ႉပၼ်သေ ႁပ်ႉဢဝ်ထူင်မႄႈပႃႈ ၼၼ်ႉယဝ်ႉ -
“ မႄႈပႃႈ ... ဢဝ်မႃးၶႃႈလႄႈ ... ၸၢႆးတေတၢင်ႇပၼ် ... ”
မႄႈပႃႈၼၼ်ႉ ယုမ်ႉႁၢၼ်ႉၸႂ်သေ ဢဝ်ထူင်ၶူဝ်းၶဝ်ပၼ်ၸၢႆးၼွင်ႉယူႇ ၸၢႆးၼွင်ႉၵေႃႈ ဢဝ်ၶပ်ႉပၼ်ဝႆႉလီလီယဝ်ႉ -
“ မူတ်းယဝ်ႉၶႃႈႁႃႉ ... ? မႄႈပႃႈ ... ”
“ မူတ်းယဝ်ႉ ... ၸၢႆး ... ၶွပ်ႈၸႂ်ယဝ်ႉ ... ”
“ လႆႈယူႇၶႃႈ ”
ၸၢႆးၼွင်ႉ ၶိုၼ်းၼင်ႈ တီႈၼင်ႈမၼ်း ႁိမ်းႁူးလႅင်းၼၼ်ႉသေ ဝၢႆႇတူၺ်းၶဝ်သၢမ်ၵေႃႉ ပေႃႈမႄႈလုၵ်ႈ ဢၼ်တိုၵ်ႉသိမ်းၶူဝ်းၶဝ်ၵမ်ႈၽွင်ႈၼၼ်ႉယူႇ ၼၢင်းယိင်းဢွၼ်ႇ ဢၼ်တိုၵ်ႉမီးမွၵ်ႈၸဵတ်းၶူပ်ႇၼၼ်ႉတႄႉ တေပဵၼ်လုၵ်ႈယိင်းဢွၼ်ႇၶဝ်ၼႆ ၸၢႆးၼွင်ႉလၢမ်းလႆႈၼင်ႇၼၼ်ယဝ်ႉ၊ မႄႈပႃႈၵေႃႉၼၼ်ႉ ၸင်ႇဝႃႈ လုၵ်ႈယိင်းဢွၼ်ႇမၼ်း -
“ လႅင်း ... လႅင်းတေၵိၼ်ၼမ်ႉႁႃႉ ... ?”
“ ဢေႃႈ ... ”
လႅင်း ႁပ်ႉဢဝ်တဝ်ႈၼမ်ႉႁိုဝ်ႈသႂ်ႇ ၼႂ်းၵွၵ်းသေ တူၼ်ဢိုၵ်ႉၵိၼ်ယူႇ ဝၢႆးသေမၼ်းၵိၼ်ယဝ်ႉ မႄႈၶဝ် ၸင်ႇႁပ်ႉဢဝ်တဝ်ႈၼမ်ႉသေ -
“ လႅင်း တေၼင်ႈႁိမ်းပေႃႈပေႃႈႁႃႉ ... တေၼင်ႈတီႈလႂ် ... ၼင်ႈႁိမ်းၼႆႉႁႃႉ ... ... ”
မႄႈပႃႈၼၼ်ႉ ၸီႉပၼ်တီႈၼင်ႈႁိမ်းၸၢႆးၼွင်ႉလႄႈ လႅင်းဝၢႆႇတူၺ်း ၸၢႆးၼွင်ႉဝႆႉယူႇ ၸၢႆးၼွင်ႉၸင်ႇဝႃႈ -
“ လႅင်း ... မႃးၼင်ႈႁိမ်းၼႆႉလႄႈ ... ”
လႅင်း ဝၢႆႇတူၺ်းမႄႈၶဝ်သေ -
“ မႄႈ ... လႅင်းၶႂ်ႈၼင်ႈႁိမ်းႁူးလႅင်း ... ”
“ ၼင်ႈႁဵတ်းသင် ... မႄႈ ဝႃႈ ...”
လႅင်းႁဵတ်းၸႃႉတေႃႇမႄႈၶဝ်သေ ဢၢင်ႈႁႆႈယဝ်ႉ -
“ ၼင်ႈႁိမ်း ပေႃႈပေႃႈၼေႃႈ ... လႅင်း ... ”
လႅင်းလႆႈၵူဝ်ပေႃႈၶဝ်လႄႈ မၼ်းဢမ်ႇႁတ်းတၵ်းသဵင်သင် ၸၢႆးၼွင်ႉၸင်ႇဝႃႈ -
“ လႅင်း ... မႃးၼင်ႈ တီႈၼင်ႈပီႈၸၢႆးၼႆႉလႄႈ ... ”
မႄႈပႃႈၼၼ်ႉ ယုမ်ႉၵိုၵ်းတၢင်းၵဵင်ၸႂ်တေႃႇ ၸၢႆးၼွင်ႉသေ -
“ ဢမ်ႇၼင်ႈယဝ်ႉၸၢႆး ... ”
လႅင်းတႄႉ ၸုၵ်းသေၼႃႈတူႇဝႆႉယူႇ ၸၢႆးၼွင်ႉၸင်ႇဝႃႈ -
“ လႅင်း ... မႃးလႄႈ ... မႃးၼင်ႈတီႈႁိမ်းႁူးလႅင်းၼႆႉလႄႈ ”
လႅင်း ပႆႇႁတ်းၵႂႃႇလႄႈ လွမ်တူၺ်းမႄႈၶဝ်ဝႆႉယူႇ မႄႈၶဝ်ၸင်ႉဝႃႈ -
“ ၵႂႃႇလႄႈ ... လႅင်း ... ၵႂႃႇၼင်ႈႁိမ်းႁူးလႅင်းၼၼ်ႉလႄႈ ”
လႆႈငိၼ်းၼင်ႇၼၼ် လႅင်း ၸင်ႇၵႂႃႇၼင်ႈႁိမ်းႁူးလႅင်းၼၼ်ႉသေ လွမ်တူၺ်းတီႈၼွၵ်ႈယူႇ ၊ ၸၢႆးၼွင်ႉ ၶၢႆႉၶိုၼ်းမႃးၼင်ႈ တင်ႇၽၢႆႇၼႂ်းၼႆႉယူႇ ၊ မႄႈပႃႈၼၼ်ႉၸင်ႇထၢမ် -
“ ၸၢႆး ... တေၵႂႃႇတႃႈၵုင်ႈ ၼင်ႇၵဝ်ႇႁႃႉ ...? ”
“ ၸႂ်ႈဢေႃႈ... မႄႈပႃႈၶဝ်လူး ... ”
“ ဢိူဝ်ႈ ... ဢၢင်ႈမိူဝ်းၶိုၼ်းတႃႈၵုင်ႈၼႆယဝ်ႉ ... ”
“ မႄႈပႃႈၶဝ် ယူႇတႃႈၵုင်ႈၶႃႈႁႃႉ ... ? ”
“ ၸႂ်ႈဢိူဝ်ႈ ... ”
ယွၼ်ႉပိူဝ်ႈ ၶဝ်ပဵၼ်ၵူၼ်းယူႇတႃႈၵုင်ႈလႄႈ ၸၢႆးၼွင်ႉၶဝ်ႈၸႂ်ၵႂႃႇ ပုၼ်ႈတႃႇတေၸွပ်ႇႁႃ ပီႈဢၢႆႈမၼ်းၼၼ်ႉတႄႉတႄႉ ။
“ ပဵၼ်ၵူၼ်းၸႃႇတိတႃႈၵုင်ႈၼင်ႇၵဝ်ႇၶႃႈႁႃႉ ... ? ”
“ ပဵၼ်ၸႃႇတိမိူင်းတႆးသေ ၶၢႆႉၵႂႃႇယူႇတီႈတႃႈၵုင်ႈယဝ်ႉ ... ”
“ ပဵၼ်ၸႃႇတိ တင်းလႂ်ပုၼ်ႉၶႃႈ ... ? ”
“ ဢိုဝ်ႈ ... မႄႈပႃႈတႄႉ ပဵၼ်ၸႃႇတိလွႆလႅမ်ဢိူဝ်ႈ ... ဢူႈလုင်းသူတႄႉ ပဵၼ်ၸႃႇတိၵဵင်းတုင်ဢိူဝ်ႈ ... ”
ၸၢႆးၼွင်ႉၵေႃႈ ယုမ်ႉၶူဝ်တေႃႇဢူႈလုင်း ဢၼ်ယုမ်ႉတေႃႇမၼ်းၼၼ်ႉသေ သိုပ်ႇထၢမ်ဝႃႈ -
“ ဢေႃႈ ... ဢူႈလုင်းပဵၼ်ၸႃႇတိၵဵင်းတုင် ၶႃႈႁႃႉ ... ? ”
“ ၸႂ်ႈဢိူဝ်ႈ ... ၸၢႆး ... ယၢမ်ႈၽႅဝ်ၵဵင်းတုင်ယူႇႁႃႉ ... ? ”
“ ၸၢႆး ပႆႇယၢမ်ႈၽႅဝ်တီႈလႂ်ၶႃႈ ... ဝဵင်းလိူဝ်ႇၼႆႉၵေႃႈ တေႃႈတိုၵ်ႉယၢမ်ႈၽႅဝ်ပွၵ်ႈၼႆႉၵူၺ်ႈ ... ဢေႃႈ ... ”
“ ၸၢႆးသမ်ႉယူႇတီႈလႂ် ... ? ”
“ ယူႇ မေႇမဵဝ်ႉဢေႃႈ ... ”
မႄႈပႃႈၼၼ်ႉ ၸင်ႇထၢမ်ဝႃႈ -
“ ပေႃးၼႆ ... တႃႈၵုင်ႈၵေႃႈ ၸၢႆးပႆႇယၢမ်ႈၽႅဝ်သေပွၵ်ႈယူဝ်ႉ ”
“ ပႆႇယၢမ်ႈၽႅဝ်လႄႈ ဢၢင်ႈၵႂႃႇဢႅဝ်ႇတူၺ်း ၼႆဢေႃႈ ... ”
ၽွင်းၼၼ်ႉ ရူတ်ႉရဵၼ်းဢွၵ်ႇယၢၼ် တႃႈရူတ်ႉရဵၼ်းဝဵင်းလိူဝ်ႇမႃးယဝ်ႉ
ပေႃႇ ... ပူး ... ပေႃႇ ... ပူး ... ပေႃႇ ... ပူး ... ... ...
ၸၢႆးၼွင်ႉၵေႃႈ ပႆႇယၢမ်ႈႁၼ်သၢႆတၢင်းရူတ်ႉရဵၼ်းလႄႈ မၼ်းယူႇႁူးႁိမ်းလႅင်းသေ လွမ်တူၺ်းတီႈၼွၵ်ႈယူႇ ၊ လႆႈႁၼ် ၵူၼ်းၸွမ်းတၢင်းၵမ်ႈၽွင်ႈၵၵ်းၵႆ ဝႆမိုဝ်းတေႃႇၼင်ႇၼၼ်လႄႈ လႅင်းၵေႃႉၼိုင်ႈၵေႃႈ ၵၵ်းၵႆဝႆမိုဝ်းတေႃႇပိူဝ်ႈယူႇ ။
ရူတ်ႉရဵၼ်း ဢွၵ်ႇပူၼ်ႉတီႈတႃႈရူတ်ႉရဵၼ်းသေ သိုပ်ႇတႆႇၸွမ်းတၢင်းမၼ်းမႃးယူႇ ၊ ယွၼ်ႉပိူဝ်ႈ တိုၵ်ႉၸဝ်ႉလႄႈ ႁိူၼ်းၵမ်ႈၽွင်ႈ တိုၵ်ႉပႆႇၽုၺ်ႇၽၵ်းတူ၊ ၵူၼ်းၵႂႃႇၵၢတ်ႇၵမ်ႈၽွင်ႈ ၸဝ်ႈသၢမ်လေႃႉၵမ်ႈၽွင်ႈတႄႉ လႆႈႁၼ်ၵိုတ်းပႂ်ႉရူတ်ႉရဵၼ်း ၶၢမ်ႈတၢင်းၵႃးယူႇ ၊ ၸၢႆးၼွင်ႉ ၸင်ႇထၢမ် -
“ လႅင်းၸွင်ႇၵျေႃႇႁိုဝ် ... ? ”
လႅင်းငွၵ်းႁူဝ်မၼ်းသေလႄႈ -
“ ၵျေႃႇ ဢေႃႈ ... ”
“ လႅင်း ... လူမ်းပဝ်ႇၼႃႇၽႅဝ် လႅင်းၵတ်းယူဝ်ႉ ... ”
“ လႅင်းဢမ်ႇၵတ်း ... လႅင်းၼုင်ႈသိူဝ်ႈသွၼ်ႉယူႇ ... ”
ရူတ်ႉရဵၼ်းၶဝ် သိုပ်ႇၶၢဝ်းတၢင်းမႃးယူႇတိၵ်းတိၵ်း လႅင်းလႄႈၸၢႆးၼွင်ႉၵေႃႈ မိုတ်ႈၵၼ်ၵႂႃႇၼိူဝ်ရူတ်ႉရဵၼ်းယဝ်ႉ မႄႈလႅင်းၶဝ်ၸင်ႇဝႃႈ -
“ ဢိူဝ်ႈ ... ပွၵ်ႈၼႆႉတႄႉ မႄႈပႃႈၶဝ် ဢမ်ႇလႆႈသုၵ်ႉသၢၵ်ႉၸွမ်းလႅင်းယဝ်ႉ သင်ဝႃႈ ... ဢမ်ႇၺႃးၸၢႆးၼႆ မႄႈပႃႈၶဝ် ၵုမ်ႇလႆႈထိင်းမၼ်း ပေႃးႁိူဝ်ႉယဝ်ႉၼႆႉ ... ၸိုဝ်ႈၸၢႆးဝႃႈႁိုဝ် ... ? ”
“ ၸၢႆးၼွင်ႉ ၼႆဢေႃႈ ... ”
“ ဢေႃး ... ၸၢႆးၼွင်ႉၼႆႁႃႉ ... ၸိုဝ်ႈမႄႈပႃႈတႄႉဝႃႈ ပႃႈၼၢင်းၶွင်ႇၼႆဢိူဝ်ႈ ... ၸိုဝ်ႈဢူႈလုင်းသူတႄႉ ၶူးမေႃယႃလူင်ၸၢႆးမိူင်း ၼႆယဝ်ႉတွင်းဝႆႉၼႃႈ ... ”
“ ဢေႃႈ ... ဢေႃႈ ... ”
ၸၢႆးၼွင်ႉ ၶဝ်ႈၸႂ်ၵႂႃႇၼိူဝ်လုင်းၸၢႆးမိူင်း လွင်ႈဝႃႈ ပဵၼ်ၶူးမေႃယႃလူင် ၼႆၼၼ်ႉယူႇ ၊ ယူဝ်ၶႄး တေပဵၼ် မေႃယႃ ၵေႃႉဢၼ်ဢဝ်ၸၢႆးၸၢႆးမိူဝ်းၵဵပ်းလဵင်ႉၼၼ်ႉႁိုဝ် ... ...
“ ပေႃးၽႅဝ်တႃႈၵုင်ႈ မႃးဢႅဝ်မႄႈပႃႈၶဝ်ၽွင်ႈၼႃႈ ... ”
ယွၼ်ႉပိူဝ်ႈ ပႆႇယၢမ်ႈၽႅဝ်သေပွၵ်ႈလႄႈ တေလႆႈႁဵတ်းႁိုဝ် ၵႂႃႇႁႃဢႅဝ်ႇတီႈလႂ်ၼႆ ၸၢႆးၼွင်ႉ ဢမ်ႇႁူႉသေတႃႉ -
“ ဢေႃႈ ... ဢေႃႈ ... တေမႃးဢႅဝ်ယူႇၶႃႈ ... ”
ၼင်ႇႁိုဝ် တေႁူႉလွင်ႈၸၢႆးၸၢႆးၼၼ်ႉလႄႈ ၸၢႆးၼွင်ႉၸင်ႇထၢမ်
“ မႄႈပႃႈၶဝ် မီးၵူၼ်းႁိူၼ်းလၢႆၵေႃႉ ၶႃႈ ... ... ? ”
“ ႁဝ်းမႄႈလုၵ်ႈ မီးႁႃႈၵေႃႉဢိူဝ်ႈ ... ”
ၼင်ႇႁိုဝ် တေႁူႉပဵၼ်ၽႂ် ၼႆၼၼ်ႉ ၸၢႆးၼွင်ႉၸင်ႇထၢမ်ဝႃႈ -
“ လုၵ်ႈမႄႈပႃႈ သွင်ၵေႃႉၼၼ်ႉၶႃႈလူး...ဢမ်ႇမႃးၸွမ်းၶႃႈႁႃႉ”
“ ဢိူဝ်ႈ ... ၶႃပီႈၼွင်ႉ ပႂ်ႉႁိူၼ်းဢိူဝ်ႈ ... ”
ၸၢႆးၼွင်ႉ တေလႆႈသိုပ်ႇႁဵတ်းႁိုဝ်ထၢမ်ထႅင်ႈၼႆ မၼ်းတိုၵ်ႉဝူၼ်ႉယူႇ မႄႈပႃႈၶွင်ႇ ၸင်ႇသိုပ်ႇလၢတ်ႈ -
“ ပီႈဢၢႆႈလူင်ၶဝ်လႄႈ ပီႈၼၢင်းၶဝ် လူဝ်ၶိုၼ်ႈႁဵၼ်းလႄႈ ၶဝ်ဢမ်ႇ ပဵၼ်ၸွမ်းမႃး ... ...”
ၸၢႆးၼွင်ႉ တေလႆႈသိုပ်ႇၵႂၢမ်းၸိူင်ႉၼင်ႇႁိုဝ်ၵေႃႈ မၼ်းဢမ်ႇမေႃဝူၼ်ႉယဝ်ႉ မၼ်းၵုမ်ႇဝူၼ်ႉဝႃႈ -
“ ဢိုဝ်း ... ... ပီႈဢၢႆႈလူင်ၶဝ် ဢၼ်ဝႃႈၼၼ်ႉ ယူဝ်ၶႄး တေပဵၼ် လုၵ်ႈၸၢႆးလူင်ၶဝ်တႄႉတႄႉႁိုဝ် ... ...ဢမ်ႇၼၼ် ... ပဵၼ်လုၵ်ႈၵဵပ်းၶဝ်ႁိုဝ် ၼၢႆးႁဝ်းလၢတ်ႈဝႃႈတႄႉ ... ၶဝ်ဢမ်ႇမီးလုၵ်ႈ ... ၼႆ ... ၼႆႉသမ်ႉဝႃႈ ... မီးလုၵ်ႈသၢမ်ၵေႃႉ ... ၶႄး ... ဢမ်ႇၸႂ်ႈမေႃယႃလူင် ၵေႃႉဢၼ်ၵဵပ်းလဵင်ႉၸၢႆးၸၢႆးယူဝ်ႉ ... ... ”
ပႃႈၼၢင်းၶွင်ႇ လွမ်တူၺ်းၸၢႆးၼွင်ႉဢၼ်ငဝ်ၵႂႃႇ ပဵၼ်ၵမ်းပဵၼ်ၵမ်းၼၼ်ႉသေ -
“ ၸၢႆးၼွင်ႉ... ဝူၼ်ႉသင် ဢေး ... ႁၢင်ႈၼႃႈၸၢႆးၼွင်ႉငဝ်ၵႂႃႇ ပဵၼ်ၵမ်းပဵၼ်ၵမ်း ဝႆႉ ... ”
“ ဢေႃႈ ... ဢမ်ႉဝူၼ်ႉသင် ၶႃႈ ... ”
ၽွင်းၼၼ်ႉ လႅင်းၸင်ႇဝႃႈ -
“ မႄႈ ... မႄႈ ... လႅင်းၶႂ်ႈၵိၼ်မၢၵ်ႇဢူမ် ... ”
“ ဢူဝ် ... လုၵ်ႈယိင်း ... ၵိၼ်ဢၼ်ဝၢၼ်ၼႃႇၽႅဝ် တေပဵၼ် ၶဵဝ်ႈမႅင်းၼႃႈ ... ”
လႅင်း ႁဵတ်းၸႃႉသေ ယွၼ်းယူႇတိၵ်းတိၵ်းယဝ်ႉ -
“ မႄႈ ... မႄႈ ... လႅင်းၶႂ်ႈၵိၼ် ... ”
ပႃႈၼၢင်းၶွင်ႇ လွမ်ႁႃတူၺ်း ထူင်မၢၵ်ႇဢူမ်သေတႃႉ မၢၵ်ႇဢူမ်မူတ်းယဝ်ႉလႄႈ မၼ်းၸင်ႇဝႃႈ -
“ လႅင်း ... လုၵ်ႈယိင်းၵိၼ်မူတ်းယဝ်ႉၼႃႇ ... ၵမ်ႉ ... ပေႃးပိူၼ်ႈမႃးၶၢႆထႅင်ႈ မႄႈၸင်ႇသိုဝ်ႉပၼ်ၼႃႈ ... ”
လႅင်း ဢမ်ႇလႆႈၵိၼ်မၢၵ်ႇဢူမ်လႄႈ မၼ်းၶႂ်ႈၸႃႉသေ ၼႃႈတူႇဝႆႉယဝ်ႉ ၸၢႆးၼွင်ႉ ၸင်ႇဢဝ်မၢၵ်ႇဢူမ် ၼႂ်းထွင်းမၼ်း ဢွၵ်ႇမႃးသေ -
“ လႅင်း ... ယေႃႈ ... ၼေႈ ၵိၼ်လႄႈ မၢၵ်ႇဢူမ် ... ”
လႅင်း ၵိုင်ႉၵၢင်ႉ ဢမ်ႇႁတ်းဢဝ်လႄႈ မၼ်းလွမ်တူၺ်းမႄႈၶဝ်ယူႇ ၸၢႆးၼွင်ႉဢဝ်မၢၵ်ႇဢူမ် ယိုၼ်ႈသႂ်ႇပၼ် ၼႂ်းမိုဝ်းမၼ်းသေ -
“ ၵိၼ်လႄႈ ... လႅင်း ... ဝၢၼ်ဢိူဝ်ႈ ... ”
မႄႈလႅင်း ၶဝ်ၵေႃႈဝႃႈ -
“ ဢဝ်လႄႈ ... ဢဝ်လႄႈ ... ပီႈၸၢႆးၼွင်ႉ ပၼ်လႅင်းဝႃႈ ”
လႅင်းၵေႃႈ ႁပ်ႉဢဝ်သေ မႄႈၶဝ်ၸႂ်ႉမၼ်းလၢတ်ႈ -
“ ၸူမ်းၶႃႈယဝ်ႉ ၼႆလႄႈ လႅင်း ... ”
“ ၸူမ်းၶႃႈ ... ”
“ လႅင်း ... ၸွင်ႇယူႇၵျွင်းႁိုဝ် ... ? ”
“ ယူႇဢေႃႈ ... ”
“ ယူႇၸၼ်ႉလႂ် ... ? ”
“ ၸၼ်ႉသွင်ယဝ်ႉၶႃႈ ... ”
“ မေႃသွၼ် ၸွင်ႇမေႃၵႆႉထႃႉလႅင်းၶဝ်ႁိုဝ် ... ? ”
“ ဢမ်ႇထႃႉ ... မေႃသွၼ်မေႃၶႆႈဢပုမ်ႇၼႄ ဢေႃႈ ... ”
“ ၶႆႈဢပုမ်ႇ သင် ... ? ”
“ ဢပုမ်ႇ ၼူၵ်ႉယၢင်းႁၢမ်တဝ်ႇ ... ”
“ လႅင်း ... ၸွင်ႇတွင်းႁိုဝ် ... ? ”
“ တွင်းဢေႃႈ ... ဢိုဝ်ႈ ... ၶႆႈၼႄႈလႅင်းဢပုမ်ႇလေႃႇ ... ”
“ လႅင်းၶႂ်ႈထွမ်ႇႁႃႉ ”
“ ဢေႃႈ ... ၸွင်ႇပီႈၸၢႆးၼွင်ႉ မေႃၶႆႈ ... ? ”
“ မေႃ ဢိူဝ်ႈ ... ”
လႅင်း ၸူမ်းသိူဝ်းသေ ပႂ်ႉထွမ်ႇဢပုမ်ႇ ဢၼ်ၸၢႆးၼွင်ႉတေၶႆႈၼႄၼၼ်ႉယူႇ ၊ မၼ်းၼၢင်းတူပ်းမိုဝ်းသေ -
“ ႁီး ... ၶႆႈၼႄလႅင်း တီႈလဵဝ်လႄႈ ... ”
မႄႈပႃႈၶွင်ႉ ယုမ်ႉတေႃႇၸၢႆးၼွင်ႉသေ လၢတ်ႈဝႃႈ -
“ ဢိုဝ်ႈ ... လႅင်းတႄႉ တေဢမ်ႇပၼ်ၸၢႆးၼွင်ႉယူႇလၢႆယဝ်ႈ”
“ လႆႈယူႇၶႃႈ ... မႄႈပႃႈ ... ႁဵတ်းၵေႃႉလုၵ်ႈဢွၼ်ႇၼႆႉ လီၵျေႃႇမဵဝ်းၼိုင်ႈဢေႃႈ ... ”
လႅင်း ၸၼ်ၶႅၼ်ၸၢႆးၼွင်ႉသေ -
“ ပီႈၸၢႆးၼွင်ႉ ၶႆႈၼႄလႅင်းဢပုမ်ႇ ”
ၸၢႆးၼွင်ႉ ၸင်ႇယုမ်ႉတေႃႇ လႅင်း သေ -
“ တီႈႁိူၼ်းလႅင်းၶဝ် ၸွင်ႇမီးမႅဝ်း ႁိုဝ် ... ”
“ မီးဢေႃႈ ... ”
“ ပေႃးမီးၼႆ ပီႈၸၢႆးၼွင်ႉ တေၶႆႈၼႄ ဢပုမ်ႇမႅဝ်း ဢွၼ်ႇၼႃႈ မိူဝ်ႈၵွၼ်ႇၵွၼ်ႇ မႅဝ်းၼႆႉ ၶဝ်ဢမ်ႇယူႇၸွမ်းၵူၼ်း ၼႆဝႃႈ ... ”
“ ဢေႃး ... ... ၶဝ်ယူႇတီႈလႂ်လႃႇ ... ”
“ ယူႇၼႂ်းထိူၼ်ႇၽႃႉသၢမ်ႁဵင် ၼႆယဝ်ႉ ... ”
“ ၽႂ်သမ်ႉလဵင်ႉတင်းၵိၼ်မၼ်းလႃႇ ပီႈၸၢႆးၼွင်ႉ ... ”
“ မႅဝ်းဢွၼ်ႇတူဝ်ၼၼ်ႉ ၵႂႃႇဢဵၼ်ႈၵေႃႉ မႃလိၼ်သေ ယူႇၸွမ်း မႃလိၼ်ယဝ်ႉ ... ပေႃးဝႃႈ ... မႃလိၼ်ၵႂႃႇႁႃၺွပ်းလႆႈ ပၢင်တၢႆးၼႆ မႅဝ်းဢွၼ်ပႂ်ႉၵိၼ်ၼိူဝ်ႉၸပ်းလုပ်ႇ ဢၼ်မႃလိၼ် ၵိၼ်ဢမ်ႇသဵင်ႈၼၼ်ႉယဝ်ႉ ”
“ မႅဝ်းဢွၼ်ႇၵေႃႈ ဢၢမ်းတၢင်းၵတ်ႉမႃလိၼ် ဢၼ်ပႄႉလႆႈ ပၢင်တၢႆးၼၼ်ႉယူႇ ... ထိုင်မႃးဝၼ်းၼိုင်ႈ ၽွင်းမိူဝ်ႈ မႃလိၼ် ၵႂႃႇႁႃတၢင်းၵိၼ်ၼၼ်ႉ မၼ်းၵႂႃႇၺႃး သၢင်ႇသီႈတူဝ်ၼိုင်ႈ ၼႆယဝ်ႉ ... ”
“ မၼ်းၸွင်ႇပႄႉ သၢင်ႇသီႈ ႁိုဝ် ... ပီႈၸၢႆးၼွင်ႉ ... ”
“ ဢမ်ႇပေႉၼႃး ... သၢင်ႇသီႈ ဝႅၼ်ၶူပ်းပၼ်မၼ်းသေ ဢဝ်မႃလိၼ် တၢႆပႅတ်ႈယဝ်ႉ ... ”
“ ပေႃးၼႆ ... မႅဝ်းဢွၼ်ႇ တေၵႂႃႇယူႇၸွမ်းၽႂ်လႃႇ ... ”
“ မႅဝ်းဢွၼ်ႇၵေႃႈ ဝူၼ်ႉဝႃႈ ... ဢလူဝ်ႉ ... ၵဝ်ယူဝ်ဝႃႈ မႃလိၼ်ၼႆႉ ၶႅၼ်ႇသေပိူၼ်ႈ ... ၼႆၼႃး ... သၢင်ႇသီႈ ၶႅၼ်ႇသေမၼ်းဢိူဝ်ႈၼႆႉ ... ပေႃးၼႆ ၵဝ်တေၵႂႃႇယွၼ်းယူႇၸွမ်း သၢင်ႇသီႈၵွၼ်ႇ ၼႆသေ ... ၵႂႃႇယွၼ်းယူႇၸွမ်း သၢင်ႇသီႈ ၼႆယဝ်ႉ ... ”
“ သၢင်ႇသီႈၵေႃႈ ႁႃၶူပ်းၵိၼ်တိုင်ၵႂၢင်ၺီးၽၢၼ်း ၼႂ်းထိူၼ်ႇသေ ဢၼ်မၼ်းၵိၼ် ဢမ်ႇသဵင်ႈၼၼ်ႉလႄႈသင် ၼိူဝ်ႉၸပ်းလုပ်ႇၸိူဝ်းၼၼ်ႉလႄႈသင် မၼ်းပၼ်မႅဝ်းဢွၼ်ႇ ၵိၼ်ၼင်ႇၼၼ် ၼႆဢိူဝ်ႈ ... ”
“ ႁဵတ်းၼၼ်သေ ... ထိုင်မႃး ထႅင်ႈပွၵ်ႈၼိုင်ႈ ၸၢင်ႉတူဝ်ၼိုင်ႈ ၽႅဝ်မႃးတီႈထိူၼ်ႇ ဢၼ်သၢင်ႇသီႈယူႇဝႆႉၼၼ်ႉလႄႈ ၶႃသွင်တူဝ်မႃးၺႃးၵၼ်ယဝ်ႉ ... သၢင်ႇသီႈၵေႃႈ ဝႅၼ်ႇသႂ်ႇၼိူဝ်ႁူဝ်ၸၢင်ႉသေ ဢၢင်ႈၶူပ်ႉၶေႃးၸၢင်ႉ ... ၸၢင်ႉသမ်ႉ ဢဝ်ငူင်းမၼ်း ၵွတ်ႇဢဝ်တူဝ်သၢင်ႇသီႈသေ ၽတ်ႉသႂ်ႇၼိူဝ်လိၼ်ႁႅင်းႁႅင်း ၼႆယဝ်ႉ ... ”
“ သၢင်ႇသီႈလူင် တၢႆၵႂႃႇႁႃႉ ... ပီႈၸၢႆးၼွင်ႉ ... ”
“ ပႆႇတၢႆလီၼႃး ... ၸၢင်ႉၶိုၼ်းဢဝ်တိၼ်မၼ်း ယဵပ်ႇၵွၵ်းႁူဝ်သၢင်ႇသီႈ ၽႅပ်ႉသေ သၢင်ႇသီႈၵေႃႈတၢႆပႅတ်ႈ ႁေယဝ်ႉဢိူဝ်ႈ ... ”
“ မႅဝ်းဢွၼ်ႇၼၼ်ႉၼႃႇ ... ႁိုဝ် ... ”
“ မႅဝ်းဢွၼ်ႇၼၼ်ႉ ပႅပ်ႉဝႆႉၼႂ်းယုမ်းသေ လွမ်တူၺ်းၸၢင်ႉၼၼ်ႉယူႇဢိူဝ်ႈ ... မၼ်းဝူၼ်ႉဝႃႈ ၸၢင်ႉၼႆႉ တူဝ်ယႂ်ႇသေပိူၼ်ႈ ႁႅင်းသေပိူၼ်ႈ ၶႅၼ်ႇသေပိူၼ်ႈ ၼႆသေ ... မၼ်းဢၢင်ႈၵႂႃႇၸူးၸၢင်ႉၼႆယဝ်ႉ ... ၽွင်းၼၼ်ႉ မူးသိူဝ်းၸုမ်းၼိုင်ႈ ဢဝ်ၵွင်ႈၶဝ်ယိုဝ်းပၼ်ၸၢင်ႉလူင်ၼၼ်ႉပိၼ်ႈလူမ်ႉ တၢႆၵႂႃႇပႅတ်ႈၼႆယဝ်ႉ။ ...”
“ မႅဝ်းဢွၼ်ႇၼၼ်ႉ လွမ်တူၺ်းမူးသိူဝ်းၶဝ် ယႃႉဢဝ်ၼိူဝ်ႉၸၢင်ႉယူႇၼင်ၼၼ်သေ မၼ်းၸင်ႇႁွင်ႉ - ငႅဝ်း ... ၼႆသေ ၵႂႃႇၸူးမူးသိူဝ်းၶဝ်ယဝ်ႉ မူးသိူဝ်းလူင်ၵေႃႈ ၸင်ႇႁွပ်ႇဢဝ်မႅဝ်းဢွၼ်ႇၼၼ်ႉသေ ႁွင်ႉမိူဝ်း တီႈဝၢၼ်ႈၶဝ် ထိုင်မိူဝ်းႁိူၼ်းၶဝ် ... ၼႆယဝ်ႉ ... ”
“ ပေႃးဝႃႈ ၽႅဝ်မိူဝ်းၼႂ်းဝၢၼ်ႈ ၽႅဝ်မိူဝ်းတီႈႁိူၼ်းၼႆ ... မၼ်းလႆႈႁၼ် ၼၢႆးမူးသိူဝ်း မႃးႁပ်ႉဢဝ် ၵွင်ႈပူႇမူးသိူဝ်းလႄႈ မၼ်းၸင်ႇဝူၼ်ႉဝႃႈ... ဢိုဝ်း ... ၵဝ်ယူဝ်ဝႃႈ ... ပူႇမူးသိူဝ်းၵတ်ႉၶႅၼ်ႇၼႆၼႃး ... ၺႃးတႄႉ ၼၢႆးမူးသိူဝ်း ၶႅၼ်ႇသေမၼ်းဢိူဝ်ႈၼႆႉ ... တူၺ်းလေႃႇ ၵွင်ႈမၼ်းၵေႃႈ ၼၢႆးမူးသိူဝ်းယွၼ်းဢဝ် ... ၼိူဝ်ႉ ဢၼ်မၼ်းလႆႈမႃးၵေႃႈ ၼၢႆးမူးသိူဝ်းယွၼ်းဢဝ်ယဝ်ႉ ... ၼၢႆးမူးသိူဝ်းၼႆႉ ၶႅၼ်ႇသေၶဝ်ဢိူဝ်ႈ ... ၼႆသေ မႅဝ်းဢွၼ်ႇၸင်ႇႁွင်ႉ ငႅဝ်း ... ... ၼႆႁေ ၵႂႃႇၸူးၼၢႆးမူးသိူဝ်း ... ၼႆ ယဝ်ႉ ... ... ”
“ ၼၢႆးမူၼ်းသိူဝ်းၵေႃႈ ႁွပ်ႇဢဝ်မႅဝ်းသေ ၶဝ်ႈၵႂႃႇၼႂ်းသွင်ႇၽႆးလႄႈ ဢဝ်မႅဝ်းၵႂႃႇႁဵတ်းၵေႃႉမၼ်း ၼႂ်းသွင်ၽႆး ... လဵင်ႉၶဝ်ၼမ်ႉတင်းၵိၼ်မၼ်း ၼႂ်းသွင်ႇၽႆးယဝ်ႉ ... ၵူၺ်းၵႃႈ ... ၼူသမ်ႉၵႆႉမႃးယႃႉ ၼႂ်းသွင်ႇၽႆးၼႃႇၽႅဝ် ... ၼၢႆးမူးသိူဝ်း ... ဢမ်ႇၸၢင်ႈႁဵတ်းႁိုဝ်တီႈၼူလႄႈ ၸင်ႇၸႂ်ႉႁႂ်ႈမႅဝ်းဢွၼ်ႇၼၼ်ႉ ပႂ်ႉၺွပ်းၼူၼႆ ယဝ်ႉ ... တႄႇဢဝ်မိူဝ်ႈၼၼ်ႉမႃးသေ ... မႅဝ်းၵေႃႈ မႃးယူႇၸွမ်း ၵူၼ်းသေ ပႂ်ႉလွမ်ၺွပ်းၼူၼႆယဝ်ႉ ... ”
“ မႅဝ်းၵေႃႈ ၸင်ႇဝူၼ်ႉဝႃႈ ၵဝ်ယူဝ်ဝႃႈ ၼၢႆးမူးသိူဝ်းၶႅၼ်ႇၼႆၼႃး မၼ်းဢမ်ႇပႄႉလႆႈၼူလႄႈ ၸႂ်ႉၵဝ်ပႂ်ႉၺွပ်းၼူယဝ်ႉ ... ပေႃးၼႆ ... ၵဝ်ၼႆႉၶႅၼ်ႇသေ ၼၢႆးမူးသိူဝ်းၵွၼ်ႇဢိူဝ်ႈၼႆႉ ... ၼႆသေ ထၢင်ႇယႂ်ႇတူဝ်မၼ်းယူႇယဝ်ႉ ... ”
“ ၽႂ်ၵေႃႈ ဢမ်ႇၶႅၼ်ႇသေမႅဝ်းယဝ်ႉႁႃႉ ... ပီႈၸၢႆးၼွင်ႉ ... ဢၼ်ၶႅၼ်သေမႅဝ်းၼၼ်ႉ ဢမ်ႇမီးယဝ်ႉ ႁႃႉ ... ... ”
“ မီးဢိူဝ်ႈ ... မႅဝ်းဢွၼ်ႇၼၼ်ႉ မၼ်းပေႉၼူၵူၺ်းၼႃႇ ... ပေႃးဝႃႈ မၼ်းၺွပ်းၵိၼ်ၼူယဝ်ႉသေ ဢၢင်ႈၼွၼ်းလီလီၼႆ ... လုၵ်ႈၸၢႆးလုၵ်ႈယိင်းဢွၼ်ႇ လုၵ်ႈဢွၼ်ႇၼၢႆးမူးသိူဝ်းၼၼ်ႉ မႃးၺွပ်းမႅဝ်းဢွၼ်ႇသေ ဢမ်ႇပၼ်မၼ်းၼွၼ်းလီလီယဝ်ႉ ... ၵမ်ႈၽွင်ႈၵေႃႈ ၸၼ်ႁၢင်မၼ်း ... ၵမ်ႈၽွင်ႈၵေႃႈ ၸၼ်ၼူတ်ႇမၼ်း ... ၵမ်ႈၽွင်ႈၵေႃႈ ပၢပ်းႁူဝ်မၼ်းလဵၼ်ႈလႄႈ ... မၼ်းဢမ်ႇပေႉလႆႈ လုၵ်ႈဢွၼ် ၼႆယဝ်ႉ ... ”
“ ပေႃးၼႆ ... လုၵ်ႈဢွၼ်ႇၼႆႉ...ၶႅၼ်ႇသေပိူၼ်ႈဢိူဝ်ႈ ၼေႃ”
ၸၢႆးၼွင်ႉ ငွၵ်းႁူဝ်ၼႄသေ -
“ ၸႂ်ႈဢိူဝ်ႈ ... လုၵ်ႈဢွၼ်ႇၸိူင်ႉၼင်ႇ လႅင်းၶဝ်ၼႆႉ ... ၶႅၼ်ႇသေပိူၼ်ႈ ဢိူဝ်ႈ ... လႅင်း ၸွင်ႇၵႆႉၸၼ်ႁၢင်မႅဝ်းႁိုဝ် ... ”
လႅင်း ယုမ်ႉသေ ငွၵ်းႁူဝ်ၼႄယဝ်ႉ -
“ မႅဝ်း တီႈႁိူၼ်းလႅင်းၶဝ်ၼၼ်ႉလူး မႅဝ်း တမ်ႉဢမ်ႇပေႉလႅင်းဢမ်ႇၸႂ်ႈႁႃႉ ... ...”
“ ပေႃးလႅင်းလမ်းမၼ်းၼႆ မၼ်းၵူဝ်သေ ဢႅၼ်ႇပၢႆႈဢေႃႈ ... ”
မႄႈပႃႈၶွင်ႇလႄႈ မေႃယႃလူင်လုင်းၸၢႆးမိူင်း ၶဝ်ႈၸႂ်ၼႂ်းဢပုမ်ႇ ဢၼ်ၸၢႆးၼွင်ႉ လၢတ်ႈၼၼ်ႉဝႆႉယူႇ ပႃႈၶွင်ႇၸင်ႇလၢတ်ႈဝႃႈ -
“ ဢိုဝ်ႈ ... ၸၢႆးၼွင်ႉ မေႃႁဵတ်းၵေႃႉလုၵ်ႈဢွၼ်ႇဝႆႉလူင်ၼႆႉ ... ၸၢႆးၼွင်ႉ မီးၼွင်ႉယိင်းၼွင်ႉၸၢႆး ၼမ်ယူႇႁႃႉ ... ”
ၸၢႆးၼွင်ႉဢၢင်ႈဝႃႈ မီးပီႈၼွင်ႉသွင်ၵေႃႉၼႆသေတႃႉ မၼ်းဢမ်ႇၶႂ်ႈလၢတ်ႈ လွင်ႈဝႃႈ မၼ်းမႃးႁႃပီႈဢၢႆႈမၼ်းၼၼ်ႉလႄႈ မၼ်းၸင်ႇတွပ်ႇဝႃႈ
“ ၶႃႈဢမ်ႇမီးပီႈၼွင်ႉသေၵေႃႉ ၶႃႈ ... ”
“ ပေႃးၼၼ် ... ၸၢႆးၼွင်ႉ ... ပဵၼ်လုၵ်ႈၸၢႆးၵေႃႉလဵဝ်ၵူၺ်းႁႃႉ ... ပေႃႈမႄႈၸၢႆးၼွင်ႉၶဝ် လူး ... ... ”
ငိၼ်းဝႃႈ ပိူၼ်ႈထၢမ် လွင်ႈဢူႈမႄႈမၼ်းၼင်ႇၼႆလႄႈ ၸၢႆးၼွင်ႉ ပဵၼ်ဢၼ်ၸႂ်ဢမ်ႇလီ ၵႂႃႇတႄႉတႄႉ -
“ ပေႃႈမႄႈ ၶႃႈ ... လူႉႁၢႆတၢႆၵႂႃႇ ၸဵမ်မိူဝ်ႈၶႃႈတိုၵ်ႉလဵၵ်ႉလႄႈ ... ၶႃႈဢမ်ႇမီးပေႃႈမႄႈ ၸဵမ်လႂ်ဢေႃႈ ... ပေႃႈမႄႈၶႃႈပဵၼ်ႁိုဝ်ဝႆႉ ... ၼႆၵေႃႈ ၶႃႈဢမ်ႇမေႃလၢတ်ႈၶႃႈ ...ၶႃႈယႂ်ႇမႃးၸွမ်းၼၢႆးႁဝ်းႈၵူၺ်းဢေႃႈ... ”
ပႃႈၼၢင်းၶွင်ႇၵေႃႈ ပဵၼ်ဢၼ်ၸႂ်ဢမ်ႇလီၵႂႃႇသေ -
“ ဢူဝ် ... မႄႈပႃႈဢမ်ႇႁူႉသေလႄႈ လႆႈထၢမ်မႅၼ်ႈၵႂႃႇၼင်ႇၼၼ် ၸၢႆးၼွင်ႉယႃႇပေဝႆႉၸႂ်သင်ၼႃႈ ... ”
“ ဢမ်ႇပဵၼ်သင်ၶႃႈ မႄႈပႃႈ ... ”
“ ပေႃးၼႆ ... ၼၢႆးၸၢႆးၼွင်ႉၶဝ် လူး ... ”
“ ၼၢႆးႁဝ်းၵေႃႈ သဵင်ႈၵႂႃႇၼင်ႇၵဝ်ႇယဝ်ႉဢေႃႈ ... ဝၢႆးသေ ၼၢႆးႁဝ်းသဵင်ႈၵႂႃႇယဝ်ႉ ၶႃႈၵေႃႈ ... ဢမ်ႇမီးပီႈၼွင်ႉယဝ်ႉလႄႈ ၸင်ႇဢွၵ်ႇလႄႇမိူင်းသေ ဢၢင်ႈတေၵႂႃႇႁႃႁဵတ်းၵၢၼ် တီႈတႃႈၵုင်ႈၼႆဢေႃႈ ... ”
“ ဢိူဝ်ႈ ... ၽဝၸၢႆးၼွင်ႉၵေႃႈ ပဵၼ်ဝႆႉမဵဝ်းၼိုင်ႈဢိူဝ်ႈၼေႃ ၸၢႆးၼွင်ႉဢၢင်ႈၶႂ်ႈၵႂႃႇႁဵတ်းၵၢၼ်သင် ... ”
“ တေၵႂႃႇႁဵတ်းၵၢၼ်သင်ၼႆၵေႃႈ ... ပႆႇၸၢင်ႈဝႃႈၼင်ႇၵဝ်ႇၶႃႈ ဢဝ်ၵမ်ႉမၼ်းသင်ႇတေႃႇ ဢေႃႈ ... ”
“ ဢိူဝ်ႈ ... ၽဝၵူၼ်းဢၼ်ဝႃႈၼၼ်ႉ ႁူႉၵႃႈ တေလႆႈႁဵတ်းႁဵတ်းႁႃႁႃယူႇ တေႃႇၸူဝ်ႈယဝ်ႉ ... ဢမ်ႇတပ်ႉလူဝ်ႇၸႂ်လဵၵ်ႉသင် ... ”
“ ဢေႃႈ ... ၸူမ်းၶႃႈယဝ်ႉ ... ”
ၽွင်းၼၼ်ႉ လႅင်း ၶႂ်ႈဢွၵ်ႇၼွၵ်ႈဢွၼ်ႇလႄႈ မၼ်းၸင်ႇဝႃႈ -
“ မႄႈ ... လႅင်း ၶႂ်ႈ သီႉသီႉ ... ”
ၸၢႆးၼွင်ႉ ၸင်ႇဝႃႈ -
“ ၵႂႃႇလႄႈလႅင်း ... ပီႈၸၢႆးၼွင်ႉ တေၵႂႃႇၸွမ်းသူင်ႇလႅင်းဢိူဝ်ႈ”
မႄႈလႅင်းၶဝ် ၵဵင်ၸႂ်ၸၢႆးၼွင်ႉသေ -
“ မႄႈပႃႈ တေၵႂႃႇသူင်ႇလႆ ... ”
“ လႆႈယူႇၶႃႈ ... မႄႈပႃႈ ... ၶႃႈၵေႃႈ ဢၢင်ႈၵႂႃႇဢွၵ်ႇၼွၵ်ႈ ၼင်ႇၵဝ်ႇဢေႃႈ ... ၶႃႈတေသူင်ႇၶႃႈလႆ ... ”
“ ဢိူဝ်ႈ ... ဢိူဝ်ႈ ... လီယဝ်ႉ ... ပေႃးၼၼ်ၵေႃႈ ... လႅင်း ၵႂႃႇၸွမ်းပီႈၸၢႆးၼွင်ႉလႄႈ ... ”
ၸၢႆးၼွင်ႉ ၸုင်မိုဝ်း လႅင်းသေ ပႆၵႂႃႇၸူးတီႈထၢင်ယူႇ -
“ လႅင်း ... ပႆလီလီၼႃႉ ... ”
ၽွင်းမိူဝ်ႈၶိုၼ်းတေပွၵ်ႈမႃးၸူး တီႈၼင်ႈၶႃၼၼ်ႉ လႅင်းၸင်ႇဝႃႈ
“ ပီႈၸၢႆးၼွင်ႉ ... ႁွပ်ႇလႅင်း ”
ၸၢႆးၼွင်ႉၵေႃႈ ႁွပ်ႇဢုမ်ႈဢဝ်လႅင်းသေ ၶိုၼ်းမႃးၸူး တီႈၼင်ႈၶဝ်ယူႇယဝ်ႉ ၊ ရူတ်ႉရဵၼ်းၵေႃႈ သိုပ်ႇၶၢဝ်းတၢင်းမႃး တႃႈၼိုင်ႈယဝ်ႉတႃႈၼိုင်ႈ၊ တူၼ်ႈၶဝ်ႈၶဵဝ်ၶဵဝ်ဢွၼ်ႇၶဝ် ၼႂ်းၼႃး ႁိမ်းၸွမ်းတၢင်းရူတ်ႉရဵၼ်းၸိူဝ်းၼၼ်ႉ ၵိူင်းဝႆတူဝ်ၵႃႈၸိူင်း ၸွမ်းလူမ်းပဝ်ႇသေ တူင်ႉတၵ်ႉသူင်ႇသင်ႇမွၼ်းမွၼ်းတေႃႇ ၸၢႆးၼွင်ႉယူႇ ၊ ၼူၵ်ႉယၢင်းဢွၼ်ႇၶဝ်ၵေႃႈ ၵီႈပိၵ်ႇသေလႄႈမိၼ် ဢႅဝ်ႇႁႃၵိၼ် တၢင်းၵိၼ်ၶဝ်ယူႇ ၊ ထိုင်မႃးၶၢဝ်းၵိၼ်ၶဝ်ႈဝၼ်းယဝ်ႉလႄႈ ပႃႈၼၢင်းၶွင်ႇ ၸင်ႇဢဝ်ၵႅင်ႉၶဝ်ႈၶဝ် ပေႃႈမႄႈလုၵ်ႈ တီႈၼႂ်းသႃႉၼၼ်ႉသေ မႃးထူၵ်းဢွၵ်ႇယူႇ ၊ မၼ်းၸင်ႇထၢမ်ၶိင်းလူင်မၼ်း -
“ သူ ... ႁဝ်းၵိၼ်ၶဝ်ႈဝၼ်းၼေႃႈ ... ”
“ ဢိူဝ်ႈ ... ၵိၼ်လႄႈ ... ”
ပႃႈၼၢင်းၶွင်ႇ ၸင်ႇဝၢႆႇထၢမ်တူၺ်းၸၢႆးၼွင်ႉ -
“ ၸၢႆးၼွင်ႉ တွင်ႉမႆႈၶဝ်ႈယဝ်ႉယူဝ်ႉ ... ”
“ ဢေႃႈ တွင်ႉမႆႈတၢၼ်ႇတၢၼ်ႇယဝ်ႉၶႃႈ ... ”
ပႃႈၼၢင်းၶွင်ႇ ဢဝ်ၵႅင်ႉၶဝ်ႈယိုၼ်ႈပၼ်ၸၢႆးၼွင်ႉသေ -
“ ၸၢႆးၼွင်ႉ ... လႄႈ လႅင်း ၵိၼ်ၸွမ်းၵၼ်ၼႃႉ ... ”
ၸၢႆးၼွင်ႉ ၵဵင်ၸႂ်ဢႃးၼႃႇၵႂႃႇတႄႉတႄႉသေ -
“ ဢူဝ် ... မႄႈပႃႈ ... မႄႈပႃႈၶဝ်ၵိၼ်ၶႃႈလႃႈ ...ၶႃႈတေသိုဝ်ႉၵိၼ်ဢဝ်ဢေႃႈ ... ”
“ မႄႈပႃႈၶဝ် ပႃးမႃးၶဝ်ႈၼမ်ယူႇၵူၺ်း ...ယႃႇပေသိုဝ်ႉၵိၼ်ယဝ်ႈ ယႃႇပေၵဵင်ၸႂ်သင် ၸၢႆးၼွင်ႉႁဵတ်းၵေႃႉလႅင်းသေ ၵိၼ်ၸွမ်းၵၼ်လႄႈ ”
ပႃႈၼၢင်းၶွင်ႇ ၽႄၽၵ်းပၼ်သေ -
“ ႁိုဝ်ႈ ...ၼႆႉပဵၼ်ၽၵ်းဢိူဝ်ႈ ... ဝၢၼ်သေဢမ်ႇဝၢၼ်သေၵေႃႈ ၵိၼ်တူၺ်းလႄႈ ... ”
လႅင်းၵေႃႈ ၸင်ႇဝႃႈ -
“ ပီႈၸၢႆးၼွင်ႉ ႁေ လႅင်းၵိၼ်ၸွမ်းၵၼ်ၼေႃႈ ... ”
“ သႂ်ႇၵိၼ်လႄႈ ၸၢႆးၼွင်ႉ ... ယႃႇပေၵဵင်ၸႂ်သင်ၼႃႈ ... ”
“ ပီႈၸၢႆးၼွင်ႉ ဢမ်ႇၶႂ်ႈၵိၼ်ၸွမ်းလႅင်းယူဝ်ႉ ... ”
ၵူဝ်လႅင်း ၸႂ်ဢမ်ႇလီလႄႈ ၸၢႆးၼွင်ႉၸင်ႇဝႃႈ -
“ ၶႂ်ႈၵိၼ်ဢိူဝ်ႈ ... လႅင်း ... လႅင်းၵေႃႈ တေလႆႈၵိၼ်ၼမ်ၼမ်ဢိူဝ်ႈ ၼႃ ...ၸႂ်ႈႁိုဝ်ႉ ... ”
လႅင်းငွၵ်းႁူဝ်ဢွၼ်ႇမၼ်း ၼႄသေ ၶဝ်ၵိၼ်ၶဝ်ႈၶဝ်ယူႇယဝ်ႉ -
“ ၸၢႆးၼွင်ႉ ... သႂ်ႇၽၵ်းထႅင်ႈလႄႈ ... သႂ်ႇပၼ်လႅင်းၽွင်ႈလႄႈ ... ”
လႆႈႁၼ်ပႃႈၼၢင်းၶွင်ႇ ၵွၼ်ႉၽၵ်းသႂ်ႇပၼ်မၼ်းလႄႈ ၸၢႆးၼွင်ႉ တုင်းဢဝ်သေ ၶိုၼ်းၽႄပၼ်လႅင်းၽွင်ႈယဝ်ႉ ၽွင်းၼၼ်ႉ မၼ်းၸၢႆးဝူၼ်ႉ လႆႈလွင်ႈၼိုင်ႈယဝ်ႉ ။
“ ဢေႃး ... သင်ဝႃႈ ... ၵဝ်မီးပေႃႈမႄႈ ၸိူင်ႉၼင်ႇပိူၼ်ႈၼႆၵေႃႈ ပေႃႈမႄႈၵဝ် တေသႂ်ႇၽၵ်းပၼ်ၵဝ် မိူၼ်ၼႆယူႇဢိူဝ်ႈ ... သင်ဝႃႈ ၵဝ်မီးၼွင်ႉယိင်းဢွၼ်ႇ ၸိူင်ႉၼင်ႇလႅင်းၼႆႉ ၼႆၸိုင် ... ၵဝ်တေလႆႈ ၵွၼ်ႉၽၵ်း သႂ်ႇပၼ်ၼွင်ႉယိင်းဢွၼ်ႇၵဝ် ဢိူဝ်ႈ ... ၼေႃ ... ... ”
မၼ်းၸၢႆးတိူဝ်ႉၸႂ်ငဝ်မိုင်ၵႂႃႇၵမ်းၼိုင်ႈသေ လိုမ်းၵိၼ်ၶဝ်ႈမၼ်း ယူႇယဝ်ႉ၊ မၼ်းၸၢႆး ငဝ်မိုင်ႁိုင်ၵႂႃႇတၢၼ်ႇႁိုဝ်ၵေႃႈ မၼ်းၸၢႆးဢမ်ႇတၼ်းႁူႉ၊
“ ပီႈၸၢႆးၼွင်ႉ ... ၵိၼ်ၶဝ်ႈပီႈၸၢႆးၼွင်ႉလႄႈ ... ပီႈၸၢႆးၼွင်ႉ ၵုမ်ႇဝူၼ်ႉသင် ယူႇ ... ”
ၸၢႆးၼွင်ႉ ၶိုၼ်းယုပ်းလႆႈတူဝ်မၼ်းသေ -
“ ဢေႃႈ ... လႅင်း ... ပီႈၸၢႆးၼွင်ႉ ဢမ်ႇဝူၼ်ႉသင် ... ”
“ ၵိၼ်ၼမ်ၼမ်ၼႃႈ ... ပီႈၸၢႆးၼွင်ႉ ... ”
ၸၢႆးၼွင်ႉၵေႃႈ သိုပ်ႇၵိၼ်ၶဝ်ႈမၼ်းယူႇ ၊ ယွၼ်ႉပိူဝ်ႈ ၸႂ်ၶုၵ်းၸႂ်လႆႈ ပေႃႈမႄႈမၼ်းၼၼ်ႉလႄႈ မၼ်းၸၢႆးဢိုၼ်ၶဝ်ႈယၢပ်ႇဝႆႉယူႇယဝ်ႈ ဝၢႆးသေ ၵိၼ်ၶဝ်ႈယဝ်ႉ လႅင်းၸင်ႇထၢမ်ဝႃႈ -
“ ပီႈၸၢႆးၼွင်ႉ ... ပေႃးၽႅဝ်တႃႈၵုင်ႈၼႆ ၵႆႉၵႆႉမႃးဢႅဝ်ႇမႃးလဵၼ်ႈၵေႃႉ လႅင်းၼႃႈ ... ”
ၸၢႆးၼွင်ႉ ငွၵ်းႁူဝ်ၼႄလႅင်း ၵမ်းၼိုင်ႈသေ -
“ မႃးၵႂႃႈ လႅင်း ... ”
“ ပီႈၸၢႆးၼွင်ႉ တေၵႂႃႇၼွၼ်းတီႈလႂ် ... တီႈတေၼွၼ်းၼၼ်ႉ ၸွင်ႇၸမ်တင်းႁိူၼ်းလႅင်းၶဝ်ႁိုဝ် ... ”
ၸၢႆးၼွင်ႉတေၵႂႃႇၼွၼ်းတီႈလႂ်ၵေႃႈ မၼ်းဢမ်ႇႁူႉလီလီ
“ ဢိုဝ်ႈ ... တေၵႂႃႇၼွၼ်းတီႈလႂ်ၵေႃႈ ပႆႇၸၢင်ႈဝႃႈၼင်ႇၵဝ်ႇ ”
“ ပီႈၸၢႆးၼွင်ႉ ... မႃးဢႅဝ်ႇလႅင်းတႄႉတႄႉၼႃႈ ... ”
“ တေမႃးယူႇ ... လႅင်း တေလဵင်ႉသင် ပီႈၸၢႆးၼွင်ႉ ... ”
“ လႅင်းမီးဝႆႉၶဝ်ႈမုၼ်း ဢေႃႈ ... ၸွင်ႇပီႈၸၢႆးၼွင်ႉတေၵိၼ်ႁိုဝ် ... ”
“ ပေႃးလႅင်းလဵင်ႉ ၼႆတႄႉ ... ၵိၼ်ၵႂႃႈ ... ”
ၸၢႆးၼွင်ႉလႄႈ လႅင်းမိုတ်ႈၵၼ်ၵႂႃႇတႄႉတႄႉဝႃႈဝႃႈသေ လဵၼ်ႈၵေႃႉၵၼ် တေႃႇပေႃးသုတ်းတၢင်းယဝ်ႉ ၊ ရူတ်ႉရဵၼ်းလူင်သိုပ်ႇၶၢဝ်းတၢင်းမႃးတိၵ်းတိၵ်း ယၢမ်းလဵဝ် ၵၢင်ဝၼ်းတူၵ်းသေ လပ်းသိင်ႇသွမ်ႉႁွမ်ႉယဝ်ႉ ။
ရူတ်ႉရဵၼ်းလူင် ၽႅဝ်မႃးတႃႈၵုင်ႈသေ မႃးၵိုတ်း တီႈတႃႈရူတ်ႉရဵၼ်းယူႇ ၵူၼ်းၼိူဝ်ရူတ်ႉရဵၼ်း ဢွၼ်ၵၼ်တေႃႉၶူဝ်းၽႂ်မၼ်းသေ လူင်းရူတ်ႉရဵၼ်းယူႇယဝ်ႉ။ ၶူဝ်းပႃႈၼၢင်းၶွင်ႇၶဝ် ပႃးမႃးၼၼ်ႉ ႁမ်ႉၼၵ်းဝႆႉလႄႈ ပႃႈၼၢင်းၶွင်ႇၸင်ႇဝႃႈ -
“ ဢေႃႈ ... ၸၢႆးၼွင်ႉ ၸွႆႈထႅမ်မႄႈပႃႈၶဝ် ဢဝ်တိူၵ်ႈၼင်ၼႆႉ လူင်းပၼ်ၽွင်ႈလူး ၼႃႈ ... ”
“ ဢေႃႈ ... ဢေႃႈ ... လႆႈယူႇၶႃႈ ... ”
“ ဢိူဝ်ႈ ... လုၵ်ႈၸၢႆးမႄႈပႃႈဝႃႈတႄႉ ... မၼ်းတေမႃးပႂ်ႉႁပ်ႉ ၼႆယဝ်ႉ ...”
လုၵ်ႈၸၢႆးပႃႈၼၢင်းၶွင်ႇၼၼ်ႉ ၸွင်ႇတေပဵၼ် ၸၢႆးၸၢႆးႁိုဝ်ၼႆ ၸၢႆးၼွင်ႉ ၶဝ်ႈၸႂ်ၵႂႃႇၵမ်းလဵဝ်သေ ပႂ်ႉတူၺ်းဝႆႉယူႇ ၊ လုင်းၸၢႆးမိူင်း ၸင်ႇဝႃႈ -
“ ၸၢႆးၼွင်ႉ ... တိဝ်ႈမႃးတၢင်းၼႆႉလႄႈ ... ”
ပႃႈၼၢင်းၶွင်ႇၵေႃႈ ၸုင်ဢဝ်မိုဝ်းလႅင်းသေ ပႆဢွၵ်ႇမႃးၸွမ်းတၢမ်းလင် လုင်းၸၢႆးမိူင်းယဝ်ႉ ပႃႈၼၢင်းၶွင်ႇ ဝၢႆႇၶိုၼ်းတူၺ်း ၽၢႆႇၸၢႆးၼွင်ႉသေ
“ ၸၢႆးၼွင်ႉ ၼၵ်းယူဝ်ႉ ... ၸွင်ႇပႄႉႁိုဝ် ... ? ”
“ လႆႈယူႇၶႃႈ ... ပႄႉယူႇ ... ”
လုင်းၸၢႆးမိူင်း လႄႇဝၢႆႇမုင်ႈႁႅၼ်ႁႃတူၺ်း လုၵ်ႈၸၢႆးမၼ်း ဢၼ်တေမႃးပႂ်ႉႁပ်ႉၶဝ်ၼၼ်ႉယူႇ ၊ လႆႈႁၼ် လုၵ်ႈၸၢႆးလူင်မၼ်း ၸၢႆးသႅင်မႃးႁပ်ႉၶူဝ်းၶဝ်လႄႈ - “ ပေႃႈ ... ပေႃႈ ... ၶူဝ်းပေႃႈႁဝ်းၶဝ်လူး ... ? ”
လုင်းၸၢႆးမိူင်း ၸင်ႇဝၢႆႇတူၺ်းၸၢႆးၼွင်ႉသေ -
“ ၼေႈ ... ၸွႆႈဢဝ်တီႈၸၢႆးၼွင်ႉၼႆႉလႄႈ ... ”
ၸၢႆးသႅင်ၵေႃႈ မႃးပုတ်ႈဢဝ် တီႈၼႂ်းမိုဝ်းၸၢႆးၼွင်ႉယဝ်ႉ ၊ လုင်းၸၢႆးမိူင်းၸင်ႇဝႃႈ -
“ ၸၢႆးၼွင်ႉ ... ၼေႈ ... ၼႆႉပဵၼ်လုၵ်ႈၸၢႆးလုင်းဢိူဝ်ႈ ... ၸၢႆးသႅင်ၼႆဝႃႈ ... လုၵ်ႈၸၢႆး ၼႆႉပဵၼ် ၸၢႆးၼွင်ႉၼႆဢိူဝ်ႈ ... ႁဝ်းၶီႇရူတ်ႉရဵၼ်းသေ မႃးၸွမ်းၵၼ်ဢိူဝ်ႈ ... ”
“ ဢေႃႈ ... ၸူမ်းယဝ်ႉ ၸၢႆးၼွင်ႉ ... ”
“ ငိၼ်းလီယဝ်ႉ ... ၸၢႆးသႅင် ... ”
ၸၢႆးၼွင်ႉလွမ်တူၺ်း တီႈၼိဝ်ႉၸီႉ ၸၢႆးသႅင်ၽၢႆႇၶႂႃ လႆႈႁၼ်ပဵၼ် ႁွႆးဢၢတ်းၽႃႉတိူဝ်ႉဝႆႉလႄႈ ယူဝ်ၶႄး တေပဵၼ်ပီႈဢၢႆႈမၼ်းၸၢႆးၸၢႆးႁိုဝ်ၼႆ မၼ်း ဝူၼ်ႉၵႂင်ယူႇ ပႃႈၼၢင်းၶွင်ႇ ၸင်ႇဝႃႈ -
“ လုၵ်ႈၸၢႆး... ၵႃးဝႆႉတီႈလႂ် ... ဢွၼ်ႁဝ်းၵႂႃႇၸူး တီႈၵႃးလႄႈ ႁဝ်းၵုမ်ႇဢုပ်ႇၵၼ် ဢိုတ်းတၢင်းပိူၼ်ႈၵႂႃႇပႆယူႇယဝ်ႉဢိူဝ်ႈ ၼႆႉ ... ”
“ ထူင်ၶူဝ်းမႄႈႁဝ်း ၼၵ်းၶႃႈယူဝ်ႉ ... ဢဝ်မႃးလႄႈ ... ”
ၸၢႆးသႅင်တိဝ်ႈပႃးဢဝ် ထူင်ၶူဝ်းမႄႈၶဝ်သေ ဢၢင်ႈၵႂႃႇၸူး တီႈၵႃးၶဝ်ယူႇ ၊ လႆႈႁၼ် ၸၢႆးသႅင် ဢၢပ်ႈၼၵ်းၼႃႇလႄႈ ၸၢႆးၼွင်ႉၸင်ႇဝႃႈ -
“ ၸၢႆးသႅင် ... ၼၵ်းၼႃႇယဝ်ႉယူဝ်ႉ ... ပၼ်မႃးတီႈၶႃႈလႄႈ ၶႃႈတေၸွႆႈဢဝ်ၽွင်ႈ ... ”
“ လႆႈယူႇ ... လႆႈယဝ်ႈ ၸၢႆးၼွင်ႉ ... ”
“ ထူင်လူင်ၼၼ်ႉ ၼၵ်းတႄႉတႄႉဢေႃႈ ... ဢဝ်မႃးပၼ်ၶႃႈလႄႈ ... ၶႃႈတေတေႃႉ ၵႂႃႇပၼ်လႆ ... ”
ၸၢႆးၼွင်ႉ ဝႃႈၼၼ်သေ ၶိုၼ်းၸၼ်ဢဝ် ထူင်လူင်ဢၼ်မၼ်းပႃးမႃး မိူဝ်ႈၵႆႈၼၼ်ႉယူႇယဝ်ႉ ၊ ၶဝ်မႃးၽႅဝ် တီႈၵႃးၶဝ်သေ ဢွၼ်ၵၼ်ၶိုၼ်ႈၵႃးယူႇ ၸၢႆးၼွင်ႉၸင်ႇဝႃႈ -
“ ဢေႃႈ ... ၶႃႈတေၵႂႃႇၵွၼ်ၶႃႈ ... ဢူႈလုင်းမႄႈပႃႈၶဝ် ၵႂႃႇလွႆးလွႆးၼႃႈ ... ၸၢႆးသႅင် လႅင်း မွၼ်းမွၼ်း ... ”
ပႃႈၼၢင်းၶွင်ႇၸင်ႇထၢမ် -
“ ၸၢႆးၼွင်ႉ ... တေၵႂႃႇလႂ် ... ? ”
ၸၢႆးၼွင်ႉ တေလႆႈၵႂႃႇလႂ်ၵေႃႈ မၼ်းဢမ်ႇႁူႉၼင်ႇၵဝ်ႇလႄႈ မၼ်းယၢႆးႁူဝ်မၼ်းယူႇၶုတ်ႉၶုတ်ႉ ၊ ၸၢႆးသႅင် ၸင်ႇဝႃႈ -
“ ၸၢႆးၼွင်ႉ ၶိုၼ်ႈၵႃးလႄႈ ၸၢႆးၼွင်ႉ တေၵႂႃႇလႂ်ၵေႃႈ တေၸွမ်းသူင်ႇပၼ်လႆ... ”
“ လႆႈ ... လႆႈယဝ်ႉ ... ၸၢႆးသႅင်ၸူမ်းယဝ်ႉ ... ”
လုင်းၸၢႆးမိူင်း ၸင်ႇထၢမ်ဝႃႈ -
“ ၸၢႆးၼွင်ႉ ... ပႆႇယၢမ်ႈႁွတ်ႈတႃႈၵုင်ႈသေပွၵ်ႈ ဢမ်ႇၸႂ်ႈႁႃႉ”
“ ၸႂ်ႈဢေႃႈ ... ပႆႇယၢမ်ႈႁွတ်ႈၶႃႈ ဢူႈလုင်း ... ”
“ ပေႃးၼႆ ... ၸၢႆးၼွင်ႉတေၵႂႃႇလႂ် ? ”
“ တေၵႂႃႇလႂ်ၵေႃႈ ဢမ်ႇႁူႉၶႃႈ ... ”
“ တေၵႂႃႇသဝ်း တီႈလႂ် ... ? ”
“ ဢမ်ႇပႆႇႁူႉၶႃႈ ... ”
“ တီႈတႃႈၵုင်ႈၼႆႉ ၸၢႆးၼွင်ႉမီးၵူၼ်းႁူႉၸၵ်းယူႇႁႃႉ ... ? ”
ၸၢႆးၼွင်ႉ ဝႆႁူဝ်ၼႄသေ -
“ ဢမ်ႇမီး ၶႃႈ ... ”
လုင်းၸၢႆးမိူင်း ထူၺ်ႈၸႂ်လူင် ၵမ်းၼိုင်ႈသေ -
“ ဢိုဝ်ႈ ... တႃႈၵုင်ႈ ဢၼ်ဝႃႈၼၼ်ႉ မၼ်းဢမ်ႇမိူၼ်မိူင်းတႆးႁဝ်းၵူၺ်း ... ဝဵင်းၵေႃႈၵႂၢင်ႈ ၵူၼ်းၵေႃႈၼမ် ၵူၼ်းၵေႃႈမီးလၢႆမဵဝ်းဢိူဝ်ႈ ၸၢႆး ဢမ်ႇယုမ်ႇၵၼ်လႆႈၵူၺ်း ... ပဵၼ်ႁိုဝ်ၵေႃႈ ... ၸွမ်းမိူဝ်းတီႈႁိူၼ်း လုင်းၶဝ်ၵွၼ်ႇလႄႈ ... ”
ပႃႈၼၢင်းၶွင်ႇၵေႃႈဝႃႈ -
“ ၸႂ်ႈတႄႉဢိူဝ်ႈ ၸၢႆးၼွင်ႉ ... မိူဝ်းၸွမ်းမႄႈပႃႈၶဝ်လႄႈ ...”
“ ပီႈၸၢႆးၼွင်ႉ ... ၶိုၼ်ႈၵႃးၶႃႈလႄႈ ... ”
လႅင်းၵေႃႈဝႃႈမႃးၼင်ႇၼၼ်သေ ၽုၺ်ႇၽၵ်းတူၵႃးပၼ် ၸၢႆးၼွင်ႉယဝ်ႉ ၸၢႆးသႅင်ၸင်ႇဝႃႈ -
“ ၶိုၼ်ႈၵႃးလႄႈ ... ၸၢႆးၼွင်ႉ ... မိူဝ်းလိုဝ်ႈတီႈႁိူၼ်းႁဝ်းသေ ထုၵ်ႇလီႁဵတ်းသင် ထုၵ်ႇၵႂႃႇလႂ်ထႅင်ႈၵေႃႈ ၸင်ႇၵွႆႈဝူၼ်ႉဢဝ်လီလီလႄႈ ”
ၸၢႆးၼွင်ႉၵေႃႈဝႃႈ - “ ၸူမ်းၶႃႈယဝ်ႉ ... ” ၼႆသေ ၶိုၼ်ႈၶီႇၵႃးယဝ်ႉ ၊ ၸၢႆးသႅင်ၵေႃႈ ႁေႃႈၵႃးမႃးတီႈႁိူၼ်းၶဝ်ယူႇ ။ ၸၢႆးသႅင်ႁေႃႈၵႃး ၵႂႃႇတၢင်းလႂ်ၼႆၵေႃႈ ၸၢႆးၼွင်ႉတႄႉဢမ်ႇႁူႉ ၊ တူၺ်းႁၼ်ဢၼ်လႂ်ၵေႃႈ ပဵၼ်ဢၼ်မႂ်ႇ ပဵၼ်ဢၼ်လၢၵ်ႇလၢႆး ၵူႈပိူင်ပိူင်ယူႇယဝ်ႉ ။
ဢၼ်လၢၵ်ႇလၢႆးသေပိူၼ်ႈတႄႉ ၽွင်းမိူဝ်ႈ ၸၢႆးသႅင်ႁေႃႈၵႃးသေ ၶဝ်ႈမႃး ၼႂ်းဝၢင်းႁိူၼ်းၶဝ်ၼၼ်ႉယဝ်ႉ ။
ၽွင်းမိူဝ်ႈ ၵႃးမႃးၵိုတ်း တီႈၼႃႈႁိူၼ်းၼၼ်ႉၼႆ ၸၢႆးၼွင်ႉတိုၵ်ႉလွမ်တူၺ်း ၸွမ်းဝၢင်းႁိူၼ်း ၸၢႆးသႅင်ၶဝ်ယူႇ၊ လႅင်း ၸင်ႇလႆႈႁၼ်ပီႈၼၢင်းမၼ်း လုၵ်ႉၼႂ်းႁိူၼ်းသေ ဢွၵ်ႇမႃးႁပ်ႉၶဝ်လႄႈ လႅင်းၸင်ႇႁွင်ႉဝႃႈ -
“ ႁေး ... ပီႈၽူၺ်း ... ” ၼႆယဝ်ႉ ။
လႆႈငိၼ်းၼင်ႇၼၼ်လႄႈ ၸၢႆးၼွင်ႉ ၸင်ႇၼႅတ်ႈဝၢႆႇတူၺ်းၵမ်းလဵဝ်သေ လႆႈႁၼ်ပဵၼ်ၽူၺ်း ဢၼ်ၶဝ်ယၢမ်ႈထူပ်းၵၼ် တီႈမေႇမဵဝ်ႉၼၼ်ႉလႄႈ မၼ်းၸၢႆး ဢၢမ်းၵႂႃႇတႄႉတႄႉ။ ၽူၺ်းၵေႃႈ လွမ်တူၺ်းၼႂ်းၵႃး ပႃးမႃးၶႅၵ်ႇၵေႃႉၼိုင်ႈလႄႈ ၽိူဝ်ႇမၼ်းတူၺ်းလီလီ သမ်ႉပဵၼ်ၵူၼ်း ဢၼ်မၼ်းယၢမ်ႈႁူႉၸၵ်းမႃးပွၵ်ႈၼိုင်ႈလႄႈ မၼ်းၼၢင်းၵေႃႈ ပဵၼ်ဢၼ်ဢၢမ်းလူင်ဢၢမ်းလၢင်ၵႂႃႇသေ -
“ ဢေႃး ... ပဵၼ် ... ပဵၼ် ၸဝ်ႈလေႃႉမႃႉ ဢမ်ႇၸႂ်ႈၶႃႈႁႃႉ ”
ၸၢႆးၼွင်ႉၵေႃႈ ၸူမ်းၼႃႇသေ တေလႆႈလၢတ်ႈသင်ၵေႃႈ မၼ်းဢမ်ႇႁူႉ ၶဝ်ဢွၼ်ၵၼ် လူင်းၵႃးမႃးသေ လႅင်း ၸင်ႇဝႃႈ -
“ ဢမ်ႇၸႂ်ႈၸဝ်ႈလေႃႉမႃႉ ၵူၺ်း ... ပီႈၽူၺ်း ... ပဵၼ်ပီႈၸၢႆးၼွင်ႉၼႆဢေႃႈ ... ”
“ ၸႂ်ႈဢိူဝ်ႈ ... ၽူၺ်း ... ”
ပႃႈၼၢင်းၶွင်ႇ ၸင်ႇထၢမ်ဝႃႈ -
“ လုၵ်ႈယိင်းလႄႈၸၢႆးၼွင်ႉ တၼ်းႁူႉၸၵ်းၵၼ်မိူဝ်ႈလႂ်ၼႆႉ? ”
ၸၢႆးၼွင်ႉ ၸင်ႇတွပ်ႇဝႃႈ -
“ မိူဝ်ႈ ... ၽူၺ်းၶဝ် မႃးဢႅဝ်ႇမေႇမဵဝ်ႉၼၼ်ႉ ၶဝ်မႃးယိမ်လေႃႉမႃႉၶႃႈသေ ၶႃႈလႆႈၵႂႃႇသူင်ႇၶဝ် တီႈၼမ်ႉတူၵ်းတၢတ်ႇလႄႈ ႁူႉၸၵ်းၶဝ် မိူဝ်ႈၼၼ်ႉမႃးဢေႃႈ ... ”
“ ၸႂ်ႈဢေႃႈ ... ... မႄႈ ... ၵွပ်ႈၼႆလႄႈ ၽူၺ်းၸင်ႇႁွင်ႉဝႃႈ ၸဝ်ႈလေႃႉမႃႉ ၼႆဢေႃႈ ... ”
ၶဝ်ၸင်ႇဢွၼ်ၵၼ် တေႃႉၶူဝ်းသေ ၶဝ်ႈမိူင်းဝႆႉ ၼႂ်းႁိူၼ်းၶဝ်ယူႇ ။ ၸၢႆးသႅင်ၸင်ႇဝႃႈ -
“ ၸၢႆးၼွင်ႉ ... ယႃႇပေၵဵင်ၸႂ်သင်ၼႃႈ ... လိုဝ်ႈႁိူဝ်ႉလိုဝ်ႈၸႂ်သေၵွၼ်ႇလႄႈ ဝၢႆးၼႆႉ ၸင်ႇၵႂႃႇၸွမ်းသူင်ႇ ၸၢႆးၼွင်ႉဢႅဝ်ႇၼႂ်းဝဵင်းၼႃႈ”
“ ၸူမ်းယဝ်ႉ ... ပီႈၸၢႆးသႅင် ... ”
“ လႅင်းၵေႃႈ ... တေၵႂႃႇၸွမ်းၼႃႈ ... ပီႈၸၢႆးသႅင် ... ”
“ လုၵ်ႈဢွၼ်ႇၼႆႉ သုၵ်ႉသၢၵ်ႉၵူၺ်းဢိူဝ်ႈ ... ဢမ်ႇၵႂႃႇယဝ်ႉ ”
“ ဢိုဝ်း ... လႅင်း ၶႂ်ႈၵႂႃႇၸွမ်း ပီႈၸၢႆးၼွင်ႉဢိူဝ်ႈ ... ပီႈၸၢႆးၼွင်ႉ လႅင်း တေၵႂႃႇၸွမ်းသူင်ႇပီႈၸၢႆးၼွင်ႉ ၼႃႈ ... ... ”
“ ဢိူဝ်ႈ ... ၵႂႃႇဢိူဝ်ႈ ... လႅင်း ... ”
လႅင်းတူပ်းမိုဝ်းသေ ၸူမ်းသိူဝ်းၵႂႃႇတႄႉတႄႉ ၊ ၽူၺ်းၸင်ႇထၢမ်ဝႃႈ - “ လႅင်း တေၵႂႃႇၸွမ်းသူင်ႇပီႈၸၢႆးၼွင်ႉ တီႈလႂ်လၢႆလၢႆ ... ? ”
“ ၵူႈတီႈဢိူဝ်ႈ ... ပီႈၽူၺ်း ... ၵႂႃႇတူၺ်းသူၼ်သတ်း ၵႂႃႇဝႆႈၵွင်းမူးလူင် သူၺ်ႇတၵူင်ႇ ၵႂႃႇဝႆႈၽြႃးၵူႈတီႈတီႈဢိူဝ်ႈ ... ”
ၶဝ်ဢုပ်ႇၵၼ်မဵဝ်းၼိုင်ႈယဝ်ႉမဵဝ်းၼိုင်ႈသေ သုတ်းဝၼ်းၵႂႃႇယဝ်ႉ။