ၶေႃႈသပ်းလႅင်း ဝိပတ်ႉသၼႃႇ/ၺၢၼ်ႇႁၼ်ပဵၼ်လူႉ

"ဢုတယပ်ပယၺၢၼ်ႇ" ၺၢၼ်ႇႁၼ်ပဵၼ်လူႉဢၼ်ဝႃႈၼၼ်ႉ ပိူၼ်ႈႁွင်ႉဢၼ်ၼႆယဝ်ႉ။ "ရုပ်ႈထၢတ်ႈၼၢမ်ႇထၢတ်ႈပရမၢတ်ႈၼႆႉသေ ဢၼ်တေၵႄႇၶိုၼ်ႈၵႄႇၶိုၼ်ႈမႃးလႄႈ ဝိပတ်ႉသၼႃႇၺၢၼ်ႇတြႃးၼႆႉယဝ်ႉ ၸမ်ႉ" ဝိပတ်ႉသၼႃႇၺၢၼ်ႇ ဢၼ်ဝႃႈၼၼ်ႉ ပေႃးႁဝ်းၽႄႈတိူၼ်းပၼ် မၼ်းၸိုင် ၵွႆႈယူႇၵွႆႈၵႄႇမႃးတိၵ်း“။ ၵွႆႈယူႇၵွႆႈၵႄႇၶႅၼ်ႉမႃးတိၵ်း“။ မၼ်းတေ ႁႅင်းယႂ်ႇမႃးတိၵ်း“ယူႇ။ ႁဝ်းႁၼ်ပဵၼ်လူႉဢၼ်ဝႃႈၼၼ်ႉ မိူဝ်ႈပႆႇႁၼ်တႄႉ ႁဝ်းတေလႆႈၽိုၵ်းသေ ယိူၼ်ႉဢဝ် ၵၼ်ႈဢဝ် ၸိုၼ်ႇဢဝ် တိင်ႈဢဝ် တိုဝ်ဢဝ် ၼူၵ်ႇဢဝ် လႆႈႁဵတ်းၼၼ်ယူႇ။

ပိူင်လူင်မၼ်း ႁဝ်းတေလႆႈၶတ်းၸႂ် ႁႂ်ႈပေႃးယိူၼ်ႉလႆႈတုၵ်ႉၶ ဝေႇတၼႃႇၼၼ်ႉယဝ်ႉ။ ယူႇၼႂ်းတုၵ်ႉၶ ဝေႇတၼႃႇသေ ၶတ်းၸႂ်ႁႃတူၺ်း ၼႂ်းၸဵပ်းၼႂ်းၶိုၼ်ႈၼၼ်ႉတႃႉ။ လွင်ႈဝႃႈ မီးသၽေႃး ငၢၼ်ႈယိုၵ်ႉ“ယၢၵ်ႉ“ သၢၼ်ႈၽိၼ်း“ၽွၼ်း“ ၼဵတ်းထိတ်း“ထွတ်း“ မၼ်းမီးၼႆ တေလႆႈၶႆႈထိုင်တိုၼ်းမၼ်းယဝ်ႉ။ ၶႆႈၸွမ်းတိုၼ်းၶဝ်ၼႆ ၶႆႈၸွမ်းပိုၼ်းမၼ်းဢိူဝ်ႈ၊ ယႃႇပေမႃး တူၺ်းဢဝ် တိူမ်ႈၼွၵ်ႈ ပိူၵ်ႇၼွၵ်ႈမၼ်းၼႆႉၵူၺ်း ၼႂ်းမၼ်းၸိူဝ်းၼၼ်ႉလႂ်၊ ႁိမ်းမၼ်းၸိူဝ်းၼၼ်ႉလႂ် ပေႃးတူၺ်းၵႂႃႇၸိုင် မၼ်းမီးသၽေႃးပဵၼ်လူႉ မႃးၶွၼ်ႈၵၼ်ဝႆႉ မိူၼ်ၸိူင်ႉၼင်ႇ ၵွၼ်ႈၵိူဝ်မႃးၶွၼ်ႈၵၼ်သေ ပဵၼ်ၵွၼ်ႈလူင် ၼၼ်ႉယဝ်ႉ။

ႁဝ်းလူဝ်ႇၶိုၼ်းဢဝ်ၺၢၼ်ႇပၵ်းတူၺ်း ႁႂ်ႈမၼ်းၶိုၼ်းယၢႆႈသေ သၢၼ်ႈၵႂႃႇ မိူၼ်ၸိူင်ႉၶိုၼ်းပဵၼ် ၽွင်ၵိူဝ်ၵႂႃႇၼၼ်ႉယဝ်ႉ။ တေလႆႈပၼ် ၶၢဝ်းယၢမ်းဢွၼ်ႇႁဝ်းသေၶတ်းၸႂ်ၵႂႃႇယူႇယေႃးၵီႇႁဝ်းၶဝ်။ ဝိပတ်ႉသၼႃႇ ၺၢၼ်ႇၼႆႉ ပဵၼ်ၺၢၼ်ႇႁၼ်ပဵၼ်လူႉ။ ပဵၼ်လူႉၼၼ်ႉသမ်ႉပဵၼ်မဵဝ်းလႂလႃႇ? ၸဵပ်းမႃးယဝ်ႉသေယူႇႁိုင်ႁိုင် မွၵ်ႈသိပ်းမိတ်ႉသၢဝ်းမိတ်ႉယဝ်ႉ ၸင်ႇၵွႆႈႁၢႆၵႂႃႇ။ မိူဝ်ႈမၼ်းၸဵပ်းၼၼ်ႉ "ပဵၼ်" ဢိူဝ်ႈ၊ မိူဝ်ႈမၼ်းႁၢႆၼၼ်ႉ "လူႉ" ၵႂႃႇဢိူဝ်ႈ… မဵဝ်းၼႆႉဢမ်ႇၸႂ်ႈ။ မဵဝ်းၼႆႉပိူၼ်ႈဝႃႈ ပဵၼ်လူႉႁၢင်ႇဝႃႇ။ ပွင်ႇဝႃႈပဵၼ်လူႉၶဵဝ်ႈမၢင်ႈ မၼ်းႁၢင်ႇၵၼ်ၼႃႇ။ ၸဵပ်းပေႃးတေလႆႈၶႂၢႆး ၼႃႇရီႇ ၼိုင်ႈၼႃႇရီႇယဝ်ႉ ၸွင်ႇၵွႆႈႁၢႆၼႆ ပဵၼ်ႁိုင်ႁိုင်သေ ၸွင်ႇၵွႆႈလူႉၵႂႃႇ၊ ဢၼ်ၼႆႉမၼ်းႁႅင်ႉႁၢင်ႇၼႃႆၽႅဝ်။ ပေႃးၶႅဝ်ႈႁၢင်ႇၼႆႉ ႁဝ်းယႅမ်ႇၵိၼ်ၶဝ်ၵေႃႈ မၼ်းဢမ်ႇဢွၼ်ႇလႆႈ။ လူဝ်ႇႁႂ်ႈမၼ်းထီႇ“။ မၼ်းၸဵပ်းယူႇ။ ၼႂ်းၸဵပ်ၼၼ်ႉ ၸိမ်ၺၢၼ်ႇတႅတ်ႈၼႅတ်ႈ ဢဝ်ၺၢၼ်ႇႁဝ်း ၸိမ်သေ တူၺ်းၶဝ်ႈ လိုၵ်ႉ“။ ပႂ်ႉတူၺ်းၼႂ်းၸဵပ်းၼၼ်ႉ ယူႇယူႇတမ်မႃး၊ ယူႇယူႇသေ ၵႅၼ်းၸိတ်ၵႅၼ်းၸွတ်းမႃး ၼၼ်ႉယဝ်ႉပဵၼ်ငိူၼ်ႈပဵၼ်လူႉမၼ်း။

ပေႃးမၼ်း တမ်မႃး သေႇမႃး တႅင်းမႃး ယွၼ်ႈမႃး ၵႅၼ်ႇမႃး ႁုတ်ႉႁႅင်းမႃးၸိုင် မၼ်းပဵၼ်သင်? မၼ်းၸမ်တေသုတ်းယဝ်ႉ။ မၼ်းၸမ် တေၵွႆႁႆၢလႅဝ်ၽႅဝ်ႉယဝ်ႉ။ မၼ်းၼႄမႃးငိူၼ်ႈမၼ်းဢိူဝ်ႈၼၼ်ႉ။ မိူၼ်ၸိူင်ႉ ၼင်ႇႁဝ်းတင်ႈမေႃႈၶဝ်ႈၼၼ်ႉယဝ်ႉ။ ပေႃးႁဝ်းတင်ႈႁိုင်မႃးၵေႃႈ ယူႇ“ ၵမ်မႃးပုၼ်းပူၵ်ႇ ၽုတ်းဢွၵ်ႇမႃး ပလွပ်ႉပလႅပ်ႉ၊ ဢၼ်ၼၼ်ႉ မၼ်းပွင်ႇဝႃႈသင်? ပွင်ႇဝႃႈ ၵမ်ႉမႃးမၼ်းတေၽူတ်ႉမူတ်း“ယဝ်ႉၼႆယူႇ။ မၼ်းမီး တီႈပွင်ႇၸိူင်ႉၼၼ်ယဝ်ႉ။ ဢၼ်ႁဝ်းၼင်ႈသေ ၵၼ်ႈယၵ်ႉဝေႇတၼႃႇႁိုင်မႃးၼၼ်ႉ ယူႇၵမ်ႉမႃး ငၢၼ်ႈယိုၵ်ႉလူင်မႃး၊ ယူႇၵမ်ႉမႃး တမ်တႅင်းလူင်မႃး၊ သမ်ႉပေႃးတႅင်းၵႂႃႇတင်းတူဝ်တင်းၶိင်းယဝ်ႉ။ သၽေႃးၸိူဝ်းၼၼ်ႉ မၼ်းပဵၼ်လၵ်ႉၶၼႃႇတေလူႉယဝ်ႉ။

ႁဝ်းလူဝ်ႇယိူၼ်ႉတူၺ်းထႅင်ႈ ယေႃးၵီႇၶဝ်။ ယိူၼ်ႉတူၺ်းပေႃးမၼ်း ၶိုၼ်ႈႁႅင်း တဵၵ်ႈႁႅင်းမႃးၼႃႇၼႆၵေႃႈ ဢဝ်ၸႂ်ႁဝ်းမႃးဝႆႉတီႈလူမ်းၶဝ်ႈ လူမ်းဢွၵ်ႇၼၼ်ႉသေ ယႃႁႅင်းၸႂ်ႁဝ်းၼိုင်ႈၵမ်း၊ ႁွမ်ႁႅင်းၸႂ်ႁဝ်းယဝ်ႉ ၶိုၼ်းၵႂႃႇယၵ်ႉတူၺ်းၶိုၼ်း။ လႆႈႁဵတ်းၼၼ်ယဝ်ႉ။ ႁႂ်ႈမၼ်းပေႃးႁၼ်ၵႂႃႇ ပဵၼ်လူႉၼၼ်ႉ ယိူၼ်ႉၵေႃႈယိူၼ်ႉ ယၵ်ႉၵေႃႈယၵ်ႉ တေလႆႈဝႆႉၸႂ်ၸိူင်ႉၼၼ်ယၵ်ႉ။ၺၢၼ်ႇဢၼ်ႁၼ်ပဵၼ်လူႉၼၼ်ႉ ႁွင်ႉဝႃႈ ဝိပတ်ႉသၼႃႇၺၢၼ်ႇယဝ်ႉ။