ၶေႃႈသပ်းလႅင်း ဝိပတ်ႉသၼႃႇ/ဝႆႉဢတိတ်ႉထၢၼ်ႇ

ပေႃးဝႃႈ ႁဝ်းယွၼ်းပူတ်းယွၼ်းၶႂၢင်းယဝ်ႉၼႆ တေလႆႈမီး ဢတိတ်ႉ ထၢၼ်ႇ။ ယေႃးၵီႇဢၼ်ဝႃႈၼႆႉ တေလႆႈမီး ဢတိတ်ႉထၢၼ်ႇတြႃးယူႇ။ ႁဝ်း တေၼင်ႈၵၢၼ်တြႃး ၶၢဝ်းတၢင်းသိပ်းဝၼ်းၼႆၵေႃႈ သိပ်းဝၼ်း။ ၶဝ်ႈၵၢၼ် ၼိုင်ႈလိူၼ်ၼႆၵေႃႈ ၼိုင်ႈလိူၼ်။ သၢမ်လိူၼ်ၼႆၵေႃႈ သၢမ်လိူၼ်။ ၶိင်ႇလႂ်ၶိင်ႇ ၼၼ်ႉ ၶၢဝ်းလႂ်ၶၢဝ်းၼၼ်ႉ တေၼင်ႈယၵ်ႉတြႃး ၼိုင်ႈၸူဝ်ႈမွင်းၼႆၵေႃႈ ၼိုင်ႈၸူဝ်ႈမွင်း။ သွင်ၸူဝ်ႈမွင်းၼႆၵေႃႈ သွင်ၸူဝ်ႈမွင်း။ တေလႆႈမီး ဢ တိတ်ႉထၢၼ်ႇယဝ်ႉ။ ပေႃးဢမ်ႇမီး ဢတိတ်ႉထၢၼ်ႇၼႆႉ မၼ်းမိူၼ်ႁိုဝ်ဝႆႉ လႃႇၼႆ မၼ်းမိူၼ်သူၼ်ဢၼ်ဢမ်ႇမီးႁူဝ်ႉ ဢၼ်ဢမ်ႇမီးတႃႇသၢင်ႉ ႁေႉဝႆႉၼၼ်ႉယဝ်ႉ။

သူၼ်ဢမ်ႇမီးႁူဝ်ႉ တႃႇသၢင်ႉလူင်ႁႄႉဝႆႉၼၼ်ႉ ဢၼ်မီးၽၵ်းတူႁေႉဝႆႉၼၼ်ႉ ဝူဝ်းၵႂၢႆးဝႃႇ တူဝ်သတ်းဝႃႇ ၶဝ်ႈတဝ်သေ သူၼ်ႁဝ်းၸိူဝ်းၼႆႉ ၸၢင်းလူႉလႅဝ်ယဝ်ႉ။ ဢၼ်ႁဝ်းမႃးႁဵတ်းၵၢၼ်တြႃးၵေႃႈ မိူၼ်ၼၼ်ယူႇ။ ပေႃးဝႃႈ ႁဝ်းဢမ်ႇမီးဢတိတ်ႉထၢၼ်ႇၼႆ ၸႂ်သတ်း ၸႂ်ၵိလေႇသႃႇႁဝ်းၼၼ်ႉ မၼ်းၸၢင်ႈမႃးယႃႉၵဝ်းတြႃးႁဝ်း ဢမ်ႇႁၢင်ႉ။ သင်ၸိူဝ်ႉႁဝ်းဝႃႈ “ၵဝ်ၵျေုႇတၢၼ်ႇလႂ် ၵဝ်တေၼင်ႈတၢၼ်ႇၼၼ်ႉၵူၺ်း။ ပေႃးၵဝ်ဢမ်ႇပျေုႇတႄႉ ၵဝ်တေဢမ်ႇသိုပ်ႉႁဵတ်းယဝ်ႉ“ ၼႆတႄႉ ႁဝ်းမႃးႁဵတ်းၵၢၼ်တြႃးၵေႃႈ မၼ်းဢမ်ႇၶၢမ်ႇလႆႈႁိုင် ႁဝ်းတေပူတ်းတြႃးႁဝ်းပႅတ်ႈသေ ႁဝ်းတေယူႇၵႂႃႇၸွမ်း ၸႂ်ၵိလေႇသႃႇႁဝ်း ဢၼ်ၵွႆႈယူႇၵွႆႈလွင်ႈတင်းတႂ်ႈယူႇတိၵ်းၼၼ်ႉယဝ်ႉ။ ယွၼ်ႉပိူဝ်ႈၼၼ်လႄႈ တေလႆႈမီးဢတိတ်ႉထၢၼ်ႇ။

“တင်ႈတႄႇဢဝ် ၶၢဝ်းယၢမ်းၼႆႉၵႂႃႇ တေႃႇႁွတ်ႈမိူဝ်းထိုင် တၢင်းႁိုင် ယၢမ်းၽွင်း (ၼိုင်ႈ) မူင်းတဵမ်တဵမ်ၼႆႉ ၵဝ်ၶႃႈတေတမ်းဝႆႉ ဢတိတ်ႉထၢၼ်ႇ ပတိၼ်ႇၺိၼ်ႇ ၵႂၢမ်းၼၵ်းမၵ်းမၼ်ႈယိူၼ်ႉၵၼ်ႈၶၼ်ႇထီႇ ပႃႇရမီႇၶိုၼ်ႈငၵ်ႉ...“ ၼႆလႄႈ ႁဝ်းတေလႆႈတမ်းဝၢင်းဝႆႉ ဢတိတ်ႉထၢၼ်ႇ ၶၢဝ်းယၢမ်းဢၼ် ႁဝ်းတေၼင်ႈယၵ်ႉၵၢၼ်တြႃးၼၼ်ႉယူႇ။ ဢတိတ်ႉထၢၼ်ႇဢၼ်ဝႃႈၼၼ်ႉ ပဵၼ်ၵႂၢမ်းၼၵ်းမၵ်းမၼ်ႈသေ တေလႆႈဝႆႉၼၵ်း“ၸူမ်“ သေ တေလႆႈၶတ်းၸႂ် ယႃႇပၼ်ဢတိတ်ႉထၢၼ်ႇလူႉ။ ပေႃးဝၢင်းမၼ်ႈ ဢတိတ်ႉထၢၼ်ႇယဝ်ႉၼႆ “ၵႂၢမ်းၼၵ်းမၵ်းမၼ်ႈ ယိူၼ်ႉၵၼ်ႈၶၼ်ႇတီႇ ပႃႇရမီႇၶိုၼ်ႈငၵ်ႉ“ ဝႃႇတေလႆႈမီး လွင်ႈယိူၼ်ႉၵၼ်ႈၶၼ်ႇတီႇယဝ်ႉ။ ပေႃးယိုၼ်ႉၵၼ်ႈၶၼ်ႇထီႇၵွၼ်ႇ ၸင်ႇတေပဵၼ်မႃး ပႃႇရမီႇၶိုၼ်ႈငၵ်ႉၼႆလႄႈ ပႃႇရမီႇႁဝ်း ၸင်ႇတေၶိုၼ်ႈသင်ႉ ၶိုၼ်ႈသုင်မႃးယူႇ။

ပေႃးႁဝ်းယိူၼ်ၵၼ်ႈၶၼ်ႇထီႇ ၸွမ်းလူၺ်ႈတြႃးမေႃသႂ်ႇတႂ်၊ ဝႆႉၸႂ် မၢၼ်ႇမႅၼ်ႈသေ ယိူၼ်ႉတေႃႉတြႃး ဢၼ်ပဵၼ်မႃးၼႂ်းတူဝ်ႁဝ်း၊ ပႂ်ႉၶိင်ႇပႂ့် ၶၢဝ်းမၼ်းသေ ယၵ်ႉတူၺ်းၼႆ “ယိူၼ်ႉၵၼ်ႈၶၼ်ႇထီႇ ပႃႇရမီႇၶိုၼ်ႈငၵ်ႉ“ ပႃႇရမီႇၼႆႉ တေၶိုၼ်ႈမႃးယူႇ။ မိူဝ်ႈႁဝ်းယၵ်ႉၼၼ်ႉသမ်ႉ တေႁဵတ်းႁိုဝ် လႃႇ “ယၵ်ႉယူႇ ႁိုင်ႁိုင်ၼႆႉၸိုင်“ တေလႆႈယၵ်ႉႁိုင်ႁိုင်-

ပေႃးမၼ်းၶိုၼ်ႈမႃးၸဵပ်းမႃး မူၺ်ႈမႃးၸိုင် ၵႂၢမ်းဢတိတ်ႉထၢၼ်ႇ ႁဝ်းမီႈဝႆႉ “ပိၵ်ႉသမ်ႉၼိူဝ်ႉၶႂ်ႈယၢတ်ႇ“ ဢဵၼ်ၶႂ်ႈၶၢတ်ႇ“ ၼင်ၶႂ်ႈႁႅင်ႈ“ လုပ်ႇၶႂ်ႈႁၵ်း“ တၵ်းသင်ႉတူဝ်မၼ်ႈ ပၼ်ႈသဝ်းၸႂ်ၼိမ်“ၼႆယူႇ။ မၢင်ဢွၵ်ႈ တုၵ်ႉၶ ဝေႇတၼႃႇၼႂ်းတူဝ်ႁဝ်းပဵၼ်မႃး ၼိူဝ်ႉတေယၢတ်ႇ ဢဵၼ်တေၶၢတ်ႇ ၼင်တေႁႅင်ႈၼႆ ပဵၼ်မႃးတႄႉယူႇ။ ၵူၺ်းၵႃႈ ပဵၼ်ႁိုဝ်ၵေႃႈယဝ်ႉ “တၵ်းသင်ႉတူဝ်မၼ်ႈ“ တူဝ်ႁဝ်းၵႃႈ တေလႆႈမၼ်ႈဢိူဝ်ႈယေႃးၵီႇႁဝ်းၶဝ်။ “ပၼ်ႈသဝ်းၸႂ်ၼိမ်“ ၸႂ်ႁဝ်းၵေႃႈတေလႆႈၼိမ်။ တူဝ်ၼိမ်ၸႂ်ၼိမ်လႆၢၵူၺ်း ဢမ်ႇပႆႇယဝ်ႉ။ “ၸိမ်ၺၢၼ်ႇတႅတ်ႈၼႅတ်ႈ“ တေလႆႈဢဝ်ၺၢၼ်ႇဢွၼ်ႇႁဝ်းသေ ၸိမ်တူၺ်းလီ“ငၢမ်း“ယဝ်ႉ။

“ပၢၵ်ႈပႅတ်ႈၸႂ်ၶၢၼ်ႉ“ဝႃႇ။ ၵူၼ်းတေႁဵတ်းၵၢၼ်တြႃးၼႆႉ ပေႃးၶၢၼ်ႉမၼ်းဢမ်ႇလႆႈ။ ၸႂ်ၶၢၼ်ႉႁဝ်းၼၼ်ႉ တေလႆႈပၢၵ်ႈပႅတ်ႈ။ မၢင်ၵမ်းမၢင်ၵမ်း ႁဝ်းႁဵတ်းၵၢၼ်တြႃးၼႆႉ ၸႂ်ၶၢၼ်ႉၼႆႉ ၸၢင်ႈပေႃႇပဵၼ်မႃးယဝ်ႉ။ ၵွပ်းၼၼ်ၸင်ႇဝႃႈ “ပၢၵ်ႈပႅတ်ႈၸႂ်ၶၢၼ်ႉ ၽၢၼ်ႉပႅတ်ႈၸႂ်ငဝ်“ ႁဝ်းႁဵတ်း ၵၢၼ်တြႃးၼႆႉၸႂ်ၵိလေႇသႃႇၼႆႉၶဝ်ႈမႃး ၸႂ်ထီႉၼမိတ်ႉတ ဢဝ်ႁဝ်းငဝ် လပ်းၼွၼ်း၊ ၵမ်းၵွၵ်းႁူဝ်ႁဝ်း ငုၵ်းၵႂႃႇၵူမ်ႈၵႂႃႇၽၢႆႇၼႃႈ။ ဢၼ်ၼၼ်ႉႁဝ်း တေလႆႈႁဵတ်းၵေႃႉမၼ်း ဢမ်ႇၸႂ်ႈ။ တေလႆႈၽၢၼ်ႉပႅတ်ႈယဝ်ႉ။ ပေႃးဝႃႈ တႃၼွၼ်းႁဝ်း ၵုမ်ႈမႃးဢဝ်ၵွၵ်းႁူဝ်ႁဝ်း ငုၵ်းၵႂႃႇငုၵ်းၶိုၼ်း၊ ႁဝ်းသမ်ႉတေ လႆႈႁဵတ်းႁိုဝ်လႃႇ တေလႆႈမေးဝႆႉၸႂ်ႁဝ်းလႅတ်း။ မႄးဝႆႉတူဝ်ႁဝ်းၶိုၼ်းသိုဝ်ႈ တေလႆႈႁဵတ်းၼၼ်ယဝ်ႉ ယေႃးၵီႉၶဝ်။ မႄးဝႆႉၸႂ်ႁဝ်းလႅတ်း “ဝႆႉတူဝ်ႁဝ်း သိုဝ်ႈသေ“ သတိႁဝ်းယႂ်ႇ။ ႁဝ်းတေလႆးၶတ်းၸႂ် တေလႆႈမီးသတိယဝ်ႉ။

ၵွပ်ႈပိူဝ်ႈၸိူင်ႉၼၼ်လႄႈ “ပၼ်ႈသဝ်းၸႂ်ၼိမ် ၸိမ်ၺၢၼ်ႇတႅတ်ႈၼႅတ်ႈ ပၢၵ်ႈပႅတ်ႈၸႂ်ၶၢၼ်ႉ ၽၢၼ်ႉပႅၼ်ႈၸႂ်ငဝ် သူၼ်းဢဝ်ၸေႇတၼႃႇ“ ၼႆ ႁဝ်းၶိုၼ်းပွင်ႇၸႂ်ဢဝ် ၸေႇတၼႃႇသေ သူၼ်းပၼ်မၼ်းလႃႈ။ “ဢေႃး… ႁဝ်းႁဵတ်းၵၢၼ်လီဢိူဝ်ႈၼႆႉ ၶၢၼ်ႉၼႆၵေႃႈဢမ်ႇပဵၼ်၊ ငဝ်လပ်းငဝ်ၼွၼ်းယူႇ ၵေႃႈဢမ်ႇၸၢင်ႈလႆႈတြႃး ၸူဝ်ႈႁဝ်းတိုၵ်ႉမီးမိူင်းၵူၼ်း တိုၵ်ႉယူႇလီပီးသၢၼ်းၼႆႉ လူဝ်ႇၶတ်းၸႂ်ဢိူဝ်ႈ“ ၼႆ သူၼ်းပၼ်ၸႂ်ၸဝ်ႈၵဝ်ႇတႃႉ။

“ၶွၼ်ႈႁႅင်းသတ်ႉထႃႇ“ တေလႆႈမီးသတ်ႉထႃႇ ယုမ်ႇယမ်ၼိူဝ် ဝိပတ်ႉသၼႃႇ ၵမ်ႇမထၢၼ်းတြႃး ယုမ်ႇယမ်ၵၢမ်ႇ၊ ၽွၼ်းလီၽွၼ်းႁၢႆႉ ၵၢမ်ႇ။ ယုမ်ႇယမ် မၢၵ်ႈတြႃးၽူဝ်ႇတြႃးယဝ်ႉ။ “ၶွၼ်ႈႁႅင်းသတ်ႉထႃႇ သတိ“ ၼႆလႄႈ သတိတြႃးၵေႃႈ တေလႆႈမီးဝႆႉတဵမ်ထူၼ်ႈ။ သတိတြႃးၼႆႉ ဢမ်ႇတွၼ်ႉလူၼ်ႉလိူဝ်လႆႈသေပွၵ်ႈ။ တၵ်းတေလႆႈမီးဝႆႉ ၵူႈၶိင်ႇၵူႈၶၢဝ်း။ “ဝီႇရိယ သမႃႇထီႉ ပၺ်ႇၺႃႇ“ၼႆလႄႈ ဝီႇရိယ တၢင်းၵႆႉတၢင်းၶတ်းၸႂ်၊ သမႃႇထီႉ ဢိၵ်ႇလူၺ်ႈ ၸႂ်ၼိမ်ၵေႃႈတေလႆႈမီး၊ ပၺ်ႇၺႃႇ ၺၢၼ်ႇႁူႉႁၼ် သၽေႃးပဵၼ်လူႉၼႆၵေႃႈ တေလႆႈမီး၊ ဢၼ်ၼႆႉႁွင်ႉဝႃႈသင်ၼႆ ႁွင်ႉဝႃႈပူဝ်ႇႁႃႈပႃးယဝ်ႉ။