ၶိုၼ်းထူပ်းႁၼ်ၵၼ်/တွၼ်ႈ 9 လွင်ႈလွမ်လွမ်မိုၼ်ႇႁွမ်
ဝၢႆးသေ ဝူင်းလိူၼ်ၶဝ် ပွၵ်ႈမိူဝ်းၵႂႃႇ မိုၼ်ႇႁွမ်ၶုၵ်းၸႂ်လႆႈဝူင်းလိူၼ်ၵူႈဝၼ်းယူႇ။ ၼႂ်းလုၵ်း တီႈၼွၼ်းမၼ်းၼၼ်ႉၵေႃႈ မၼ်းၵႂႃႇသိုဝ်ႉႁၢင်ႈၸေႈ ဢၼ်မီးလိူၼ်မူၼ်းၼၼ်ႉ တၢင်းၼမ်သေ မႃးပႃႉၸွမ်းလုၵ်းၼွၼ်းမၼ်းဝႆႉ သမ်ႉပေႃးတဵမ်လူင်ၵႂႃႇယူႇ။ ၼႂ်းၸႂ်မၼ်း မၢႆဝႆႉတႄႉ လိူၼ်မူၼ်းၼၼ်ႉ ပဵၼ်ဝူင်းလိူၼ်ၼႆယူႇယဝ်ႉ။
ၼႂ်းတႃမၼ်းၵေႃႈ မီးဝူင်းလိူၼ်
ၼႂ်းၸႂ်မၼ်းၵေႃႈ မီးဝူင်းလိူၼ်
ၼႂ်းၽၼ်မၼ်းၵေႃႈ မီးဝူင်းလိူၼ်
ႁၢင်ႈဢၼ်ပႃႉၸပ်းလုၵ်းၼွၼ်းမၼ်းၵေႃႈ မီးဝူင်းလိူၼ်
ၽႃႈၸဵတ်ႉမၼ်းၵေႃႈ ပဵၼ်ၽႃႈ ၸဵတ်ႉဢၼ်မီးႁၢင်ႈလိူၼ်မူၼ်း၊ ၶူဝ်းယိပ်းၶူဝ်းတိုဝ်းမၼ်း ၵမ်ႉၼမ်ၼမ် ပဵၼ်ႁၢင်ႈလိူၼ်မူၼ်း ဢၼ်တၢင်တူဝ်ဝူင်းလိူၼ်ၼၼ်ႉသဵင်ႈသဵင်ႈ။
ပေႃးထိုင်ၶမ်ႈလိူၼ်မူၼ်းၼႆ မိုၼ်ႇႁွမ် ၵႆႉၵႆႉဢွၵ်ႇလွမ်တူၺ်း လိူၼ်မူၼ်းတၢင်းႁိုင် ၵူႈလိူၼ်မူၼ်းယဝ်ႉ။ ဝၼ်းဢၼ်လိၵ်ႈဝူင်းလိူၼ်ၽႅဝ်မႃး ဝၼ်းလႂ်သေဢမ်ႇဝႃႈ မၼ်းၼၢင်ႈၸူမ်းသိူဝ်း ၸႂ်တႄႉတႄႉ။
ႁဵတ်းၼၼ်သေ ပူၼ်ႉဝၼ်းပူၼ်ႉလိူၼ် ပူၼ်ႉပီၵႂႃႇတိၵ်းတိၵ်း ၶႃသွင်ၵေႃႉ ၵႆႉတႅမ်ႈလိၵ်ႈ ၵပ်းသိုပ်ႇၵၼ်ယူႇ။ ဝူင်းလိူၼ် တႄႉ ဢွၵ်ႇၵႃႉၶၢႆႁႃငိုၼ်း ၸွႆႈၼႃႈႁိူၼ်း၊ မၢင်ပွၵ်ႈၵေႃႈ ၵႂႃႇတႃႈၶီႈလဵၵ်း မၢင်ပွၵ်ႈၵေႃႈ ၶဝ်ႈၼႂ်းမိူင်းထႆး၊ မၢင်ပွၵ်ႈၵေႃႈ လူင်းသူင်ႇၶူဝ်းတႃႈၵုင်ႈ ၸွမ်းၼင်ႇၼႃႈၵၢၼ် ဢၼ်မၼ်း ႁဵတ်း တီႈပေႃႈလဵင်ႉထႆးၼၼ်ႉယဝ်ႉ။ သင်ဝႃႈ ၸမ်ထိုင်ၶၢဝ်းတွပ်ႇလိၵ်ႈၼႆ မၼ်းၸင်ႇဢဝ်ၶႂၢင်ႉသေ မႃးတူၼ်ႈတီး။ ပီၼႆႉ မၼ်းပဵၼ်ပီသီႇယဝ်ႉလႄႈ တေလႆႈဝႃႈ ပဵၼ်ပီလိုၼ်းသုတ်းယူႇယဝ်ႉ။
မၼ်းၶီႇႁိူဝ်းမိၼ်မႃးလူင်းႁၢႆးဝူဝ်း။ ၶိုၼ်းၶီႇရူတ်ႉသေ ၽႅဝ်မႃးတူၼ်ႈတီး။ ရူတ်ႉမႃးသူင်ႇမၼ်းၼၼ်ႉ ႁေႃႈၽႅဝ်မႃး တီႈႁိူၼ်းမိုၼ်ႇႁွမ်ၶဝ်ယူႇယဝ်ႉ။
တိတ်း...တိတ်း...
ငိၼ်းသဵင် ႁွၼ်းရူတ်ႉလႄႈ မိုၼ်ႇႁွမ်တိုၵ်ႉႁူတ်းသူၼ်မွၵ်ႇသေ ဝၢႆတူၺ်ႈ လႆႈႁၼ်ဝူင်းလိူၼ် တိဝ်ႈထူင်သေ လူင်းရူတ်ႉမႃး မိုၼ်ႇႁွမ် ၵိုင်ႉၵၢင်းၸူမ်းၵႂႃႇတႄႉတႄႉ။
“ ဢႃး...ဝူင်းလိူၼ်ႁဵတ်းသင်တေမႃးမိူဝ်ႈၼႆႉၼႆ သမ်ႉပေႃး ဢမ်ႇပွင်ႇၶၢဝ်ႇသေဢိတ်းလႃႇ?”
မိုၼ်ႇႁွမ် ၵႂႃႇၸွႆႈဢဝ်ထူင်ၶူဝ်းဝူင်းလိူၼ်သေ ၶႃသွင်ၵေႃႉ ၶဝ်ႈမႃးၼႂ်းႁိူၼ်းယူႇ။ မိုၼ်ႇႁွမ် ႁႅင်ႉၵိုင်ႉၵၢင်ႉၸူမ်းၼႃႇလႄႈ ၽွင်းတိဝ်ႈထူင်ၶူဝ်းၽႅဝ်မႃး ၼႂ်းႁိူၼ်းၼၼ်ႉ ႁူဝ်မၼ်းမဝ်းတႃမၼ်းလၢႆးသေ
“ ဢႃး...ဝူင်းလိူၼ်...ဢဝ်မိုၼ်ႇႁွမ်လႄႈ ”
မိုၼ်ႇႁွမ် ဢၢင်ႈလူမ်ႉလႄႈ ဝူင်းလိူၼ် ၸင်ႇၼႅတ်ႈပၢမ်ႉဢဝ်မၼ်းၽႂ်းၽႂ်းယူႇ။
“ မိုၼ်ႇႁွမ်...ပဵၼ်သင် ”
ပေႃႈမႄႈၶဝ်ၵေႃႈ ၼႅတ်ႈမႃးၸူးမိုၼ်ႇႁွမ်ၽႂ်းၽႂ်း။ ၶဝ်ဢဝ်မၼ်း ၵႂႃႇၼွၼ်းဝႆႉ ၼိူဝ်ၵူႇသေ မေႃယႃလူင်သႂ်သွင်ႇ ဢဝ်ၶဵမ်မႃးသမ်းပၼ် မိုၼ်ႇႁွမ်မၢၵ်ႈၼိုင်ႈယူႇယဝ်ႉ။ ဝူင်းလိူၼ်ၸင်ႇထၢမ်
“ မိုၼ်ႇႁွမ် ပဵၼ်သင်ၶႃႈ? ဢူႈလုင်း ”
“ မၼ်းတေၵိုင်ႉၵၢင်ႉၸူမ်းသေ ပဵၼ်ၵႂႃႇဢိူဝ်ႈ မၼ်းၵႆႉယၢမ်ႈပဵၼ်ယူႇ ဢမ်ႇလူဝ်ႇ မႆႈၸႂ်သင် ၵမ်ႉမၼ်းတေလီၶိုၼ်းယူႇ”
ၶဝ်ဢွၼ်ၵၼ် မႃးၼင်ႈ ၼႂ်းလုၵ်းၶႅၵ်ႇသေ ၵိၼ်ၼမ်ႉၼဵင်ႈၶူမ်ယူႇ။ မႄႈမိုၼ်ႇႁွမ် ၶဝ်ၸင်ႇဝႃႈ
“ဢိူဝ်ႈ...မၼ်းတေႁၼ်ဝူင်းလိူၼ် တေၵိုင်ႉၵၢင်ႉၸူမ်းသေ ပဵၼ်ၵႂႃႇဢိူဝ်ႈ...ပေႃး မၼ်းတူၵ်းၸႂ်ႁႅင်းၵေႃႈ ၵႆႉပဵၼ်ၼႆဢိူဝ်ႈ ဝူင်းလိူၼ်ၶႂ်ႈႁူႉ”
“ ဢေႃႈ...ၶႃႈဢမ်ႇႁူႉၶႃႈလူင် ၶႃႈၵေႃႈဝႃႈ ၶႂ်ႈႁႂ်ႈမိုၼ်ႇႁွမ်ၵိုင်ႉၵၢင်ႉၸူမ်းၼႆလႄႈ ၸင်ႇဢမ်ႇပွင်ႇၶၢဝ်ႇသေ လုၵ်ႉၵဵင်းတုင်မႃးၶႃႈဢေႃႈ၊ သင်ႁူႉၼၼ်တႄႉ ၶႃႈပွင်ႇၶၢဝ်ႇယူႇၶႃႈ ”
ဢူႈမိုၼ်ႇႁွမ်ၶဝ်ၵေႃႈ ၸင်ႇလၢတ်ႈၼႄဝူင်းလိူၼ် လွင်ႈဝႃႈ မိုၼ်ႇႁွမ် မီးဝႆႉတၢင်း ပဵၼ် ႁူဝ်ၸႂ်ၶိုၼ်ႈ ၵွပ်ႈၼႆ ၶဝ်ၸွမ်းၸႂ်မၼ်းမႃး ၸဵမ်လဵၵ်ႉ၊ ဢမ်ႇႁတ်းပၼ် မၼ်းၸႂ်လမ် ၸဵမ်လဵၵ်ႉ ၼႆသေ သိုပ်ႇမွၵ်ႇပၼ်သတိဝူင်းလိူၼ် ႁႂ်ႈယူႇသဝ်း ထုၵ်ႇမႅၼ်ႈၸႂ်မၼ်းၼႆယူႇယဝ်ႉ။
“ ဢေႃႈၶႃႈ... ပေႃးၶႃႈလႆႈႁူဝႆႉၸိူင်ႉၼႆ ၶႃႈတေဝႆႉၸႂ်မိူၼ်ၼင်ႇၼွင်ႉယိင်းၶႃႈသေယူႇၶႃႈ ပိူင်လူင်မၼ်းတႄႉ ၶႂ်ႈႁႂ်ႈမၼ်း ယႃႇပေတူၵ်းၸႂ် ၶႂ်ႈႁႂ်ႈမၼ်းသိူဝ်းၸႂ်ၵူၺ်းၼင်ႇၵဝ်ႇၶႃႈ ”
“ ၸူမ်းယဝ်ႈ...ဝူင်းလိူၼ် ၵႂႃႇဢၢပ်ႇၼမ်ႉသေၵွၼ်ႇလႄႈ ”
“ ဢေႃႈၶႃႈ...”
ဝူင်းလိူၼ် ၵႂႃႇဢၢပ်ႇၼမ်ႉလၢႆႈၶူဝ်းယဝ်ႉသေ ယူႇၵမ်းၼိုင်ႈ မၼ်းၸင်ႇၵႂႃႇတူၺ်း မိုၼ်ႁွမ်။ ႁၼ်မိုၼ်ႇႁွမ် ၼွၼ်းလပ်းဝႆႉယူႇလႄႈ မၼ်းၵႂႃႇၼင်ႈၼိူဝ်တင်ႇႁိမ်းၵူႇၼၼ်ႉသေ ပႂ်ႉဝႆႉယူႇ။ ဢမ်ႇတၼ်းႁိုင် မိုၼ်ႇႁွမ်တိုၼ်ႇမႃးယဝ်ႉလႄႈ
“ မိုၼ်ႇႁွမ်...တိုၼ်ႇယဝ်ႉႁႃႉ?”
မိုၼ်ႇႁွမ် ငွၵ်းႁိူဝ်ၼႄသေ ဝၢႆႇၼႃႈလွမ်တူၺ်းဝူင်းလိူၼ်ယူႇ။ ဝူင်းလိူၼ် ယိပ်းဢဝ်ၵွၵ်းၼမ်ႉမၢၵ်ႇၽႃႈသေ
“ မိုၼ်ႇႁွမ်...ၵိၼ်ၼမ်ႉမၢၵ်ႇၽႃႈၼႆႉႁေၼေႃႈ?”
မိုၼ်ႇႁွမ် လုၵ်ႉမႃးၼင်ႈလွႆးလွႆး ဝူင်းလိူၼ်ယိပ်းၵွၵ်းၼမ်ႉမၢၵ်ႈၽႃႈသေ ဢဝ်ၸႃႈပၼ် ႁိမ်းသူပ်းမိုၼ်ႇႁွမ်ယူႇ၊ မိုၼ်ႇႁွမ်ၵေႃႈ ဢိုၵ်ႉၵိၼ်တေႃႇပေႃးသဵင်ႈသေ
“ ၸူမ်းယဝ်ႈ ဝူင်းလိူၼ် ”
“ မိုၼ်ႇႁွမ်...ဝႆႉၸႂ်လီလီၼႃႈ၊ ၵဝ်ၵေႃႈ ၶႂ်ႈႁႂ်ႈမႂ်းၸူမ်းသေ ၸင်ႇဢမ်ႇပွင်ႇၶၢဝ်ႇလႄႈ မႃးဢိူဝ်ႈ...သင်ႁူႉၼၼ် ”
“ ဢမ်ႇၸႂ်ႈတၢင်းၽိတ်းဝူင်းလိူၼ် မၼ်းပဵၼ်ၵွပ်ႈၸႂ် မိုၼ်ႇႁွမ် ဢမ်ႇမီးႁႅင်းႁပ်ႉ တၢင်းၸူမ်းသိူဝ်း ဢၼ်ဝူင်းလိူၼ်မႃးပၼ်ဢိူဝ်ႈ ”
“ ၸွင်ႇမိုၼ်ႇႁွမ် တွပ်ႇလႆႈပွႆးထၢမ်လိၵ်ႈႁိုဝ်?”
“ လႆႈယူႇ ဝူင်းလိူၼ်ၶဝ် တေတွပ်ႇမိူဝ်ႈလႂ်?”
“ လိူၼ်တေမႃးၼႆႉဢိူဝ်ႈ ၸမ်မႃးတိၵ်းတိၵ်းၼင်ႇၵဝ်ႇယဝ်ႈ ”
“ တွပ်ႇႁႂ်ႈလႆႈလီလီၼႃႈ ဝူင်းလိူၼ် ”
“ မိူဝ်ႈပႆႇတွပ်ႇၼႆႉတႄႉ ဢၼ်ဢမ်ႇႁူႉဢမ်ႇမေႃၼၼ်ႉ ႁႂ်ႈလႆႈယွၼ်းထၢမ် သၢဝ်ၶူးႁဝ်းၸွင်ႇတေလႆႈၶႃႈ?”
မိုၼ်ႇႁွမ် ယုမ်ႉသေ
“ လႆႈယူႇ...ၵူၺ်းၵႃႈ ပီၼႆႉ ၵႃႈၶၼ်မၼ်း ဢမ်ႇမိူၼ်ပီၵၢႆၼႃႈ ”
ၶႃသွင်ၵေႃႉ ယုမ်ႉႁၢၼ်ႉၸႂ်ၼင်ႇၵၼ်ယူႇ။ ၽွင်းမႃးယူႇတီႈမိုၼ်ႇႁွမ်ၶဝ်ၼၼ်ႉ ဝူင်းလိူၼ်ၵေႃႈ ၶတ်းၸႂ်ၸွမ်းၸႂ်ပၼ် ႁႂ်ႈမိုၼ်ႇႁွမ် ၵျေႃႇၸႂ်မႃးယူႇ။ မိုၼ်ႇႁွမ်ၶႂ်ႈၵႂႃႇလႂ်ၼႆၵေႃႈ ဝူင်းလိူၼ် ၸွမ်းသူင်ႇပၼ် မိုၼ်ႇႁွမ်ၶႂ်ႈၵိၼ်သင်ၼႆၵေႃႈ ဝူင်းလိူၼ်ၵႂႃႇလဵင်ႉပၼ်ယူႇ။
ၽွင်းဝူင်းလိူၼ် တူၺ်းလိၵ်ႈၼၼ်ႉတႄႉ မိုၼ်ႇႁွမ်ႁဵတ်းၶူးသွၼ်သေ ပႂ်ႉမၼ်းၵူးၶမ်ႈယဝ်ႉ။
“ သၢဝ်ၶူး...ၶႂ်ႈၼွၼ်းၵေႃႈ ၵႂႃႇၼွၼ်းၶႃႈလႄႈ လုၵ်ႈႁဵၼ်းၵေႃႉၼႆႉ တေသိုပ်ႇတူၺ်းလိၵ်ႈထႅင်ႈၵွၼ်ႇ တမ်းၸႂ်ၶႃႈလႃႈ ”
“ ဢမ်ႇလႆႈ...ၵူဝ်မၼ်ႈဢမ်ႇတူၺ်းလိၵ်ႈသေ ၵူဝ်လိၵ်ႈတူၺ်းမၼ်းဢိူဝ်ႈ ၶိၵ်းၶိၵ်း ”
ႁဵတ်းၼၼ်သေ တေႃႇဝူင်းလိူၼ် ပေႃးတွပ်ႇလိၵ်ႈယဝ်ႉၵႂႃႇယဝ်ႉ ။ ဝၼ်းယဝ်ႉပွႆးထၢမ်လိၵ်ႈၼၼ်ႉ မိုၼ်ႇႁွမ် ၸႂ်ႉႁႂ်ႈဝူင်းလိူၼ် ႁွင်ႉၵႂၢမ်းပၼ်ပုၵ်ႈၼိုင်ႈ ၼႆလႄႈ ဝူင်းလိူၼ်ၵေႃႈ ၸင်ႇႁွင်ႉ ၼႄၵႂၢမ်းဢၼ်ၸိုဝ်ႈဝႃႈ “ ၸွမ်းၸႂ်ၼွင်ႉယူႇၵူႈယၢမ်း ”ၼႆၼၼ်ႉယဝ်ႉ။
“သင်ၸိူဝ်ႉဝႃႈ ၼွင်ႉဢွၼ်ႇၶႂ်ႈငိၼ်းသဵင်ၵႂၢမ်ႈဝၢၼ် ပီၸၢႆးတေလဵတ်းတိင်ႇ ႁွင်ႉၵႂၢမ်းပၼ် ႁႂ်ႈၼၢင်းၼွင်ႉ သိူဝ်းၵျေႃႇ မူၼ်ႈသိူဝ်းၸႂ်ယုမ်ႉၶူဝ် ပီႈၸွမ်းၸႂ် ၼွင်ႉယူႇၵူႈယၢမ်းယဝ်ႉ။
သင်ၸိူဝ်ႉဝႃႈၼွင်ႉဢွၼ်ႇ ၶႂ်ႈမီးၸႂ်ပၵ်းမွၵ်ႇ ပီႈၸၢႆးတေပိတ်းဢဝ်သေပၵ်းပၼ် ႁႂ်ႈၼၢင်းၼွင်ႉႁၢင်ႈလီ မူၼ်ႈသိူဝ်းၸႂ်ယုမ်ႉၶူဝ် ပီႈၸွမ်းၸႂ်ၼွင်ႉ ယူႇၵူႈယၢမ်းယဝ်ႉ။
တႃႇဝႃႈတေသၢၼ်ၶတ်းၼၼ်ႉ ၸၢႆးဢမ်ႇမေႃ
တႃႇဝႃႈတေၸင်းၸင်းလိုမ်း ၶႅၼ်းၵႆယဝ်ႉ
ၼွင်ႉဢွၼ်ႇဢိူၺ်ႉ ၸၢႆးပီႈမႂ်းႁၵ်ႉသူၼႆႉ မၼ်းလိူဝ်ၸႂ်......
သင်ၸိူဝ်ႉဝႃႈၼွင်ႉဢွၼ်ႇ ၸႂ်လဵၵ်ႉသေၶေႃႈၶူမ် ပီႈၸၢႆးတေလၢတ်ႈပၼ် ၶေႃႈႁႅင်းၸႂ် ႁႂ်ႈၼၢင်းၼွင်ႉၸႂ်ဢုၼ်ႇ မူၼ်ႈသိူဝ်းၸႂ် ယုမ်ႉၶူဝ် ပီႈၸွမ်းၸႂ်ၼွင်ႉယူႇၵူႈယၢမ်းယဝ်ႉ
သင်ၸိူဝ်ႉဝႃႈၼွင်ႉဢွၼ်ႇ ပဵၼ်ၼမ်ႉတႃတူၵ်းယွတ်ႇ ပီႈၸၢႆးတေဢဝ်ၽႅၼ်ႇသေ ၸဵတ်ႉပၼ် ႁႂ်ႈၼၢင်းၼွင်ႉၸဵဝ်းတဵတ်ႇမူၼ်ႈသိူဝ်းၸႂ်ယုမ်ႉၶူဝ် ပီႈၸွမ်းၸႂ်ၼွင်ႉယူႇၵူႈယၢမ်းယဝ်ႉ။
မိုၼ်ႇႁွမ် ထွမ်ၵႂၢမ်းၼၼ်ႉသေ ႁၢၼ်ႉၸႂ်ၸွမ်းယူႇ။ ထႅင်ႈဝၼ်းၼိုင်ႈ မိုၼ်ႇႁွမ် ၶႂ်ႈၵႂႃႇတူၺ်းငဝ်းၼႆလႄႈ ဝူင်းလိူၼ်ၸွမ်းသူင်ႇမၼ်းသေ ၶႃၼင်ႈႁိမ်းၵၼ်တူၺ်းငဝ်းယူႇ။ မိုၼ်ႇႁွမ် ဢဝ်ႁူဝ်မၼ်း မႃးဢိင်ႁူဝ်မႃႇဝူင်းလိူၼ်သေ
“ ပေႃးဝူင်းလိူၼ် မိူဝ်းၼႆ မိုၼ်ႇႁွမ် တေမွင်ၸႂ်ဢမ်ႇႁၢင်ႉယဝ်ႉ ”
ဝူင်းလိူၼ်ၵေႃႈ ထူၺ်ႈၸႂ်လူင်ၵမ်းၼိုင်ႈသေ ႁူႉထိုင် လွင်ႈဝႃႈ မိုၼ်ႇႁွမ်လွမ်ႁၵ်ႉမၼ်းဝႆႉၼႆယူႇ။ မၼ်းတေလႆႈသိုပ်ႇႁဵတ်းႁိုဝ်? ၵၢင်ၸႂ်မၼ်းတႄႉ မၼ်းႁၵ်ႉမိုၼ်ႇႁွမ်မိူၼ်ၼင်ႇၼွင်ႉယိင်း မိူၼ်ၼင်ႇတႆးၵေႃႉ မိူဝ်ႈလဵၵ်ႉၵူၺ်းၼႆ မၼ်းႁူႉၸႂ်မၼ်းလီလီယူႇ။
“ မိုၼ်ႇႁွမ်... ၵဝ်မိူဝ်းၼႆၵေႃႈ ၵဝ်ဢမ်ႇသိူဝ်းၼင်ႇၵဝ်ႇ ”
ဝူင်းလိူၼ်လွမ်တူၺ်း ၼႃႈမိုၼ်ႇႁွမ် ၼႂ်းလပ်းသိင်ႇ လႆႈႁၼ် ၼမ်ႉတႃမိုၼ်ႇႁွမ်လႆဝႆႉလႄႈ မၼ်းၸင်ႇ ဢဝ်ၽႃႈၸဵတ်ႉမၼ်း ၸဵတ်ႉပၼ် တင်းသွင်ၽၢႆႇယဝ်ႉ၊ မိုၼ်ႇႁွမ်ယိပ်းဢဝ်မိုဝ်းဝူင်းလိူၼ်သေ မိပ်ႇဝႆႉၵႅၼ်ႇၵႅၼ်ႇ
“ ဝူင်းလိူၼ်...မႂ်းပႆႇမီးၸူႉၼေႃ? ”
“ ၵဝ်ပၼ်ၵႂၢမ်းမၼ်းမႂ်းဝႆႉယူႇယဝ်ႉလူး ”
“ ဝူင်းလိူၼ်...ၵဝ်ၵူဝ်လႆႈၽၢတ်ႇမႂ်းၵျ ”
“ ဢေႃႈ...မိုၼ်ႇႁွမ်...ၵဝ်တေလၢတ်ႈမႂ်းထႅင်ႈလွင်ႈၼိုင်ႈ ယႃႇပေၵိုင်ႉၵၢင်ႉၸူမ်းသေ လိုမ်းတူဝ် ၼႂ်းႁူင်းငဝ်းၼႆႉၼႃႈ ဝႆႉသတိၽွင်ႈၼႃႈ ”
“ လၢတ်ႈလႄႈ...မိုၼ်ႇႁွမ် ဢမ်ႇပဵၼ်သင် ”
“ ယၢမ်းလဵဝ် မႄႈၶူးတၢင်ႇလိၵ်ႈဝႆႉ တေယွၼ်းၶၢႆႉၵၢၼ်မႃး တီႈတူၼ်ႈတီႈၼႆႉၼႆဝႃႇ ...ၵူၺ်ႈၵႃႈ တေလႆႈဢမ်ႇလႆႈၵေႃႈဢမ်ႇႁူႉ ”
“တႄႉႁႃႉ...ႁႂ်ႈလႆႈသေၵမ်းၼႆ မိုၼ်ႇႁွမ် တေယွၼ်းသူးပၼ် ၵူႈၶမ်ႈလႆ...လႆႈငိၼ်းၼင်ႇၼႆ မိုၼ်ႇႁွမ် ပေႃးၸူမ်းဝႆႉထႃႈယဝ်ႉ ”
ဝူင်းလိူၼ်ၵူဝ်မိုၼ်ႇႁွမ် ၸူမ်းပူၼ်ႉသေ လိုမ်းတူဝ်လႄႈမၼ်းဢဝ်မိုဝ်းမၼ်းၶွၼ်သၢႆႉ လုပ်ႈႁူဝ်မိုၼ်ႇႁွမ် ဢၼ်ၼင်ႈၽၢႆႇသၢႆႉမၼ်းၼၼ်ႉယူႇသေ
“ မိုၼ်ႇႁွမ် ၸႂ်လီယူႇၼေႃ?”
လႆႈႁၼ်ဝူင်းလိူၼ် လုမ်းလႃးမၼ်းၼင်ႇၼႆ မိုၼ်ႇႁွမ်ႁၢၼ်ႉၸႂ်သေ ဢဝ်ႁူဝ်မၼ်း ဢိင်ဝႆႉ ႁူဝ်မႃႇဝူင်းလိူၼ်ယူႇ။
“ မိုၼ်ႇႁွမ် ဢမ်ႇပဵၼ်သင်ၵူၺ်း ဝူင်းလိူၼ်...လႆႈႁၼ်ဝူင်းလိူၼ် မႆႈၸႂ်တၢင် မိုၼ်ႇႁွမ်ၸိူင်ႉၼႆ မိုၼ်ႇႁွမ် ၶွပ်ႈၸႂ်ၼိူဝ်ဝူင်ႈလိူၼ်တႄႉတႄႉ”
“ ဢမ်ႇၶွပ်ႈၸႂ်ၵေႃႈ လႆႈယူႇမိုၼ်ႇႁွမ် ႁႃးသွင်ၵေႃႉၼႆႉ ၸွင်ႇၸႂ်ႈပိူၼ်ႈၵေႃႈဢမ်ႇၸႂ်ႈ”
ဝူင်းလိူၼ် လုပ်ႈႁူဝ်မိုၼ်ႇႁွမ်ၼင်ႇၼၼ်သေ တေယိုတ်းမိုဝ်းမၼ်းၼႆၵေႃႈ မိုၼ်ႇႁွမ်သမ်ႉဢိင်ႁူဝ်မႃႇ မၼ်းဝႆႉလႄႈ ၵမ်းလိုၼ်းမၼ်းၵေႃႈ ဢဝ်မိုဝ်းမၼ်းပၢႆႉတၢင်ႇဝႆႉ ၼိူဝ်ႁူဝ်မႃႇ မိုၼ်ႇႁွမ်ဝႆႉယူႇ။
“ မိုၼ်ႇႁွမ်...လွင်ႈတေသုၵ်ႉၸႂ်သင်လႂ်ၸိူဝ်းၼၼ်ႉ ယႃႇပေဝူၼ်ႉၼႃႈ...ပေႃး ႁဝ်းဝႆႉၸႂ်သိူဝ်းၼႆ ထၢတ်ႈၸႂ်ႁဝ်းၵေႃႈ ၸင်ႇမီးႁႅင်းႈဢိူဝ်ႈ ”
“ ဝူင်းလိူၼ် ...ၼႂ်းၵူၼ်းၸၢႆး ဢၼ်ၵဝ်ႁူႉၸၵ်းၼၼ်ႉ ႁႂ်ႈၵဝ်ပေႃး ယူႇၸမ်ၸႂ်ၵၼ် ၸိူင်ႉၼင်ႇမႂ်းၼႆႉ ဢမ်ႇမီးၽႂ်ၼႆၸွင်ႇမႂ်းယုမ်ႇ?”
“ မိုၼ်ႇႁွမ်...ႁဝ်းပဵၼ်တႆးၵေႃႉၵၼ်မႃး ၸဵမ်လဵၵ်ႉလႄႈ ၵဝ်ႁူႉၸႂ်မႂ်းယူႇ၊ ၵဝ်ပွင်ႇ ၸႂ်ၼိူဝ်မႂ်းယူတႃႇသေႇယဝ်ႉ ”
“ ၵဝ်ၵေႃႈ ပွင်ႇၸႂ်ဝႃႈ မီးမႂ်းၵူၺ်း တေပွင်ႇၸႂ်လႆႈၼိူဝ်ၵဝ်...ၼႆယူႇ ဝူင်းလိူၼ် ”
ၸၢႆးမၢဝ်ႇၵေႃႉၼိုင်ႈလႄႈယိင်းသၢဝ်ၵေႃႉၼိုင်ႈ ယူႇၸွမ်းၵၼ် ၼင်ႇၼႆ ၵေႃႉဢၼ် ႁူဝ်ၸႂ်ဢမ်ႇတွတ်ႇ ႁိုဝ်တေမီးၽႂ် ဝူင်းလိူၼ်ၵေႃႈ ၵမ်းၵမ်းထူၺ်ႈၸႂ်လူင်သေ ႁူဝ်ၸႂ်တွတ်ႇယူႇ။ မၼ်း ဝူၼ်ႉဝႃႈ
“ ဢေႃ...မိုၼ်ႇႁွမ် ...တူၼ်ႈၸႂ်ၵဝ် ၶၢဝ်သႂ်ဝႆႉၼိူဝ်မႂ်းၸိူင်ႉႁိုဝ်ၼႆ မႂ်းဢမ်ႇႁူႉထိုင် ၼေႃ၊ ပေႃးမႂ်းသမ်ႉ ၸႂ်တိတ်းၵဝ်ႁႅင်းယဝ်ႉႁႅင်းထႅင်ႈၼႆ ၵဝ်တေလႆႈႁဵတ်းႁိုဝ်...ၽဝမႂ်းၵေႃႈ ၵဝ်ဢီးလူ တႄႉတႄႉ”
မိုၼ်ႇႁွမ်ၵေႃႈ ဝူၼ်ႉယူႇႁင်းၵူၺ်းမၼ်း၊ ဝၼ်းၼၼ်ႉ ငဝ်းၼႄသင်ၵႂႃႇၼႆၵေႃႈ ၶႃသွင်ၵေႃႉ တေႃႈဢမ်ႇႁူႉၸိူင်းမၼ်း။