ၶိုၼ်းထူပ်းႁၼ်ၵၼ်/တွၼ်ႈ 8 ဝူင်းလိူၼ်လႄႈမိုၼ်ႇႁွမ်
ၽွင်းမိူဝ်ႈ ပႃႈမႂ်ႇ မႃးၶိုၼ်ႈႁူင်းယႃၼၼ်ႉ ပေႃႈမႄႈမိုၼ်ႇႁွမ်ၶဝ် ၵႆႉၵႆႉၵႂႃႇသူႇၵႂႃႇၸႂ်း သေဢမ်ႇၵႃး လူဝ်ႇယႃႈယႃသင်ၵေႃႈ ၶူးမေႃယႃလူင်သႂ်သွင်ႇ ဢဝ်မႃးပၼ်သဵင်ႈသဵင်ႈယူႇယဝ်ႉ။
ဢၼ်ၽႅဝ်တီႈႁူင်းယႃၵူႈဝၼ်းၼၼ်ႉတႄႉ ပဵၼ်မိုၼ်ႇႁွမ်ယဝ်ႉ၊ မၼ်းမႃးႁူင်းယႃ မိူဝ်ႈလႂ်သေဢမ်ႇဝႃႈ တိုၼ်းသိုဝ်ႉတၢင်းၵိၼ်တၢင်းယႅမ်ႉမႃးတႃႇသေႇ။
ယၢမ်းလဵဝ် ပႃႈမႂ်ႇၵေႃႈ လူမ်းၼၢဝ်တူၵ်းၵႂႃႇယဝ်ႉသေ ၵိၼ်လႆႈယႅမ်ႉလႆႈမႃးယဝ်ႉလႄႈ မိုၼ်ႇႁွမ် ၸင်ႇပွၵ်ႇမၢၵ်ႇၵႅမ်ႈၶွင်ႇ မႃးၸူးမႄႈၶူးမၼ်းယူႇ။ ဝူင်းလိူၼ်တႄႉ တူၺ်းလိၵ်ႈၶၢဝ်ႇယူႇ။
“ မႄႈၶူး...ၵိၼ်တူၺ်းၶႃႈလူး မၢၵ်ႇၵႅမ်ႈၶွင်ႇၼႆႉ ထုၵ်ႇၵူၼ်းၼၢဝ်လုၵ်ႉဢေႃႈ ”
မိုၼ်ႇႁွမ် ဢဝ်ၸေႃႉငႅမ်ႈပၵ်းသႂ်ႇ သိၵ်ႈတွမ်မၢၵ်ႇၵႅမ်ႈၶွင်ႇသေ သွမ်ပၼ်မႄႈၶူး ယုမ်ႉယုမ်ႉယၢႆႈယၢႆႈယူႇ။
“ ၸွင်ႇထုၵ်ႇသူပ်းႁိုဝ် မႄႈၶူး ”
မႄႈၶူး ယုမ်ႉႁၢၼ်ႉၸႂ်သေ ငွၵ်းႁူဝ်ၼႄယူႇ၊ ဝူင်းလိူၼ်ၸင်ႇဝႃႈ
“ ပေႃးဢမ်ႇပေႃးတွမ်ယႂ်ႇတႄႉ ထုၵ်ႇသူပ်းတိၵ်းတိၵ်းၵႂႃႈ ”
မိုၼ်ႇႁွမ် လိူၵ်ႇတႃၸင်းပၼ်ဝူင်းလိူၼ်သေ
“ ဝူင်းလိူၼ်ၼႆႉၼေႃ ၵူဝ်ဢမ်ႇလႆႈၵႅဝ်ၸွမ်း ၵႂၢမ်းပိူၼ်ႈ ၵူၺ်းယဝ်ႉ တူၺ်းလိၵ်ႈ ၶၢဝ်ႇမႂ်းၼၼ်ႉယူႇၵူၺ်းလႄႈ ”
မႄႈၶူးလႄႈ ဝူင်းလိူၼ် ယုမ်ႉၸုတ်းၵုတ်းဝႆႉယူႇ မႄႈၶူးၸင်ႇဝႃႈ
“ မိုၼ်ႇႁွမ် ၵုမ်ႇသိုဝ်ႉမႃး မဵဝ်းၼိုင်ႈယဝ်ႉမဵဝ်းၼိုင်ႈယူႇ ၵူႈဝၼ်းၸိူင်ႉၼႆ မႄႈၶူး ပေႃးၵဵင်ၸႂ်ယဝ်ႉၼႆႉ ”
“ လူဝ်ႇၵဵင်ၸႂ်ႁဵတ်းသင်ၶႃႈ... မိုၼ်ႇႁွမ်လႆႈလူႁၼ်လုမ်းလႃး မႄႈၶူးၼင်ႇၼႆ မိုၼ်ႇႁွမ်ၸူမ်းတႄႉတႄႉဢေႃႈ”
“ ၵုသူဝ်ႇယႂ်ႇယဝ်ႉ မိုၼ်ႇႁွမ် ၵွပ်ႈမိုၼ်ႇႁွမ် မႃးလုမ်းလႃးလႄႈ မႄႈၶူးၸင်ႇၸဵဝ်းၶႅၼ်းဢိူဝ်ႈၼႆႉ ”
“ ဢမ်ႇပႄႉပဵၼ်တၢၼ်ႇၼၼ်ႉၼင်ႇၵဝ်ႇၶႃႈယူဝ်ႉ မႄႈၶူး၊ မေႃယႃၶဝ် ဝူင်းလိူၼ်ၶဝ် ယင်းလုမ်းလႃးၼမ်သေ မိုၼ်ႇႁွမ်ၵွၼ်ႇၶႃႈလႃႈ ”
ဝူင်းလိူၼ်တူၺ်းလိၵ်ႈၶၢဝ်ႇသေ
“ မိုၼ်ႇႁွမ် ႁႂ်ႈၵဝ်လႆႈတူၺ်းလိၵ်ႈၶၢဝ်ႇလီလီၵွၼ်ႇလႄႈ ယႃႇတူၵ်ႇပႃးၵဝ်ၵွၼ်ႇ ”
မိုၼ်ႇႁွမ် ဢဝ်မိုဝ်းမၼ်း ယၵ်းလိမ်ႇပၼ် ၶႅၼ်ဝူင်းလိူၼ်ႁႅင်းႁႅင်းယူႇယဝ်ႉ။
“ ဢႃး...ဢလူဝ်...တၢၼ်ႇပိူၼ်ႈဢမ်ႇမေႃၸဵပ်းႁိုဝ်ၵေႃႈ ဢမ်ႇႁူႉ ယၵ်းတႄႉလူင် ၼႆႉ ”
ၵူဝ်မိုၼ်ႇႁွမ် ၸႂ်လမ်တႄႉလႄႈ ဝူင်းလိူၼ်ၸင်ႇၶိုၼ်းဝွၼ်းဝႃႈ
“ မိုၼ်ႇႁွမ် ၼမ်ႉၸႂ်မႂ်းတိုၵ်ႉမိူၼ်မိူဝ်ႈလဵၵ်ႉယူႇၼေႃ?”
“ မႂ်းၵေႃႈ မိူၼ်ယဝ်ႉ ”
“ မိူၼ်ၸိူင်ႉႁိူဝ်?”
“ ၵူဝ်ဢမ်ႇလႆႈတွပ်ႇၵႂၢမ်းပိူၼ်ႈၼၼ်ႉၼႃႇ ”
“ ၼႆႉတႄႉ ၵဝ်တေပႃးတေႃႇတၢႆယူႇယူဝ်ႉ ”
“ မႄႈၶူး ၵိၼ်ထႅင်ႈၵွၼ်ႇၶႃႈၼေႃႈ?”
“ မႄႈၶူး ဢိမ်ႇယဝ်ႉ ”
မိုၼ်ႇႁွမ်ဝၢႆႇတူၺ်း ဝူင်းလိူၼ်သေ
“ ဝူင်းလိူၼ် မႂ်းၵိၼ်မူတ်းမူတ်းႁေၼႃႈ ”
“ ႁိုဝ်တေၵႂႃႇၸိုဝ်ႈလၢႆႈမၼ်း မိူဝ်ႈႁႃးလဵၵ်ႉ ႁႃးတိုၼ်းမႅင်ႇၶိုင်ႈၵၼ်ၵိၼ် ၵူႈဢၼ် ဢမ်ႇၸိုဝ်ႈႁႃႉ ၼႆႉၵေႃႈ ႁႃးၵိၼ်ၵေႃႉသၢမ်တွမ် ၸွင်ႇၽွမ်ႉႁိူဝ်?”
မိုၼ်ႇႁွမ် ယုမ်ႉႁၢင်ႈလီသေ ငွၵ်းႁူဝ်ၼႄယူႇယဝ်ႉ၊ မႄႈၶူးမႃးၶိုၼ်ႈႁူင်းယႃ လႆႈသိပ်းသွင်ဝၼ်းသေ ၶိုၼ်းလႆႈလူင်းႁူင်းယႃယဝ်ႉ၊ ပေႃႈမႄႈမိုၼ်ႇႁွမ်ၶဝ် မႃးႁပ်ႉမိူဝ်းလိုဝ်ႈ တီႈႁိူၼ်းၶဝ်သေ ႁႂ်ႈႁွမ်ႁႅင်းတွမ်ၸႂ် တီႈႁိူၼ်းၶဝ် ပွၵ်ႉၵုင်းႁေႃၼၼ်ႉယဝ်ႉ၊ ၽွင်းမိူဝ်ႈဝူင်းလိူၼ် ၽႅဝ်မႃးတူၼ်ႈတီးၼႆႉ မိုၼ်ႇႁွမ်ၵေႃႉၼိုင်ႈ ပဵၼ်ဢၼ်သိူဝ်းၸႂ်တႄႉတႄႉ၊ ၼႃႈတႃမၼ်းၵေႃႈ ၸိုုၼ်ႈပၢင်ႇသႂ် သမ်ႉပေႃးမိူၼ် ၼင်ႇမွၵ်ႇၵီႈမႂ်ႇဝႆႉယူႇ။
တီႈႁိူၼ်းၶဝ်ၼၼ်ႉ မိုၼ်ႇႁွမ်ပဵၼ်ၵႄႇၶဝ်မူတ်းသေ မိုၼ်ႇႁွမ်ၶႂ်ႈႁဵတ်းသင်ၼႆ ၶဝ်လႆႈၸွမ်းၸႂ်မၼ်းမႃး တႃႇသေႇ ၽႂ်ၵေႃႈဢမ်ႇၶတ်းၶႂၢင်မၼ်း၊ ၽွင်းဝူင်းလိူၼ်ၶဝ် မႃးလိုဝ်ႈႁိူၼ်းၶဝ်ၼၼ်ႉ ပေႃႈမႄႈၶဝ်ၵေႃႈ ဢုပ်ႇၶိူဝ်းမိူဝ်ႈၶဝ်လဵၵ်ႉၼၼ်ႉၼႄၵၼ် ဢၼ်ၼိုင်ႈယဝ်ႉဢၼ်ၼိုင်ႈ၊ သမ်ႉပေႃး ပဵၼ်ႁူဝ်ပဵၼ်ႁူဝ်ဝႆႉ မိုၼ်ႇႁွမ်လႄႈဝူင်းလိူၼ်ၵေႃႈ ဢုပ်ႇၵၼ် ၶိူဝ်းမိူဝ်ႈၶဝ်လဵၵ်ႉၼၼ်ႉယူႇ ၵူႈဝၼ်းၼင်ႇၵဝ်ႇ၊
“ ပေႃႈ...လုၵ်ႈယိင်ႈတေဢွၼ်ဝူင်းလိူၼ် ၵႂႃႇလေႇၶႃႈၼႃႈမိူဝ်ႈၼႆႉ ”
ပေႃႈၶဝ် ငွၵ်းႁူဝ်ၼေသေ
“ ဝူင်းလိူၼ်...မီးမႂ်းၵူၺ်းယဝ်ႉ မေႃႁဵတ်းၵေႃႉ မေႃၸွမ်းၸႂ်မိုၼ်ႇႁွမ်ၼႆႉ ”
“ ဢေႃႈ...ၶႃႈယၢမ်ႈႁူႉလွင်ႈမၼ်းမႃး ၸဵမ်လဵၵ်ႉၶႃႈဢေႃႈ ”
“ လီယဝ်ႉ...ၵႂႃႇလႄႈ ၶႂ်ႈၵႂႃႇၵေႃႈ ”
ဝၢႆးသေ ၶႃသွင်ၵေႃႉဢွၵ်ႇၵႂႃႇ ပေႃႈမႄႈၶဝ်သိုပ်ႇဢုပ်ႇၵၼ်ၵူႈလွင်ႈလွင်ႈယူႇ။
ဝူင်းလိူၼ် ဢဝ်ရူတ်ႉၶိူင်ႈ တၢင်ႇမိုၼ်ႇႁွမ်သေ ဢႅဝ်တီႈၼိုင်ႈယဝ်ႉတီႈၼိုင်ႈ ၸွမ်းၼင်ႇမိုၼ်ႇႁွမ် ၶႂ်ႈၵႂႃႇၼၼ်ႉယူႇ။ ရူတ်ႉၶိူင်ႈလႅၼ်ႈၶိုၼ်ႈမႃႈ ၼိူဝ်လွႆႈၵွင်းမူး ယွၼ်းသူးတဵမ်ထူၼ်ႈၼၼ်ႉသေ ၶႃသွင်ၵေႃႉ ၶဝ်ႈၵႂႃႈဝႆႈၽြႃးႁူမ်ႈၵၼ်ယူႇ။ ဝၢႆးသေဝႆႈၽြႃးယဝ်ႉ ၶႃဢွၵ်ႇမႃးမုင်ႈတူၺ်း တၢင်းႁၢင်ႈလီ ဝဵင်းတူၼ်ႈတီး ဝူင်းလိူၼ်ၸင်ႇထၢမ်
“ မိုၼ်ႇႁွမ်ယွၼ်းသူး သင်မိူဝ်ႈၵႆႈၼၼ်ႉ?”
“ ဝူင်းလိူၼ် ယွၼ်းသူးသင် လၢတ်ႈဢွၼ်တၢင်းလႄႈ ”
ဝူင်းလိူၼ် ႁႅၼ်ၶိုၼ်ႈၵၢင်ႁၢဝ်သေ ဝႃႈ
“ ဢိုဝ်ႈ...ယွၼ်းသူးဝႃႈ ႁႂ်ႈႁဝ်းသၢမ်ၵေႃႉ ၶိုၼ်းၸဵဝ်းထူပ်းၵၼ်သေၵမ်းၼႆဢိူဝ်ႈ ”
“ တႄႉႁႃႉ မိုၼ်ႇႁွမ်ၵေႃႈ ယွၼ်းသူးၼင်ႇၼၼ်ဢိူဝ်ႈ ”
“ ပေႃးၶႅတ်ႉလႃးၵေႃႉၼိုင်ႈၵေႃႈ ယွၼ်းသူးၼင်ႇၼႆသေတႄႉ ႁဝ်းသၢမ်ၵေႃႉ တေ ၸဵဝ်းၶိုၼ်းထူပ်းႁၼ်ၵၼ်ယူႇ ”
“ ဢိုဝ်ႈ...ၸွင်ႇႁႃးတေတွင်းၶႅတ်ႉလႃး၊ ၸွင်ႇၶႅတ်ႉလႃး တေတွင်းႁႃးႁိူဝ်ၵေႃႈ ဢမ်ႇႁူ ၼေႃ?”
“ ပေႃးမၼ်းႁၼ် မၢႆလမ်တီႈမိုဝ်းၵဝ်ၼႆႉတႄႉ မၼ်းတေတွင်းၵဝ်ယူႇၵႂႃႈ ယူဝ်ၶေး ၶႅတ်ႉလႃး ပေႃးတေႇၼႃႈႁေႃတေႃႁိူၼ်းယဝ်ႉႁိူဝ်ၵေႃႈဢမ်ႇႁူႉလူင် မၼ်းဢမ်ႇသိုပ်ႇၶိုၼ်ႈႁူင်းႁဵၼ်း ၸိူင်ႉႁႃးလူး ”
“ တႄႉဢိူဝ်ႈၼေႃ...ၼၼ်ႉတႄႉ ၶႂ်ႈပဵၼ်သင်ပဵၼ် ဢၼ်ႁဝ်းပဵၼ်တႆးၵေႃႉၵၼ်မိူဝ်ႈလဵၵ်ႉၼၼ်ႉတႄႉ တိုၵ်ႉတေပဵၼ်တႆးၵေႃႉမိူဝ်ႈလဵၵ်ႉယူႇၵူၺ်း။ မိုၼ်ႇႁွမ် ၸင်ႇလွမ်တူၺ်း ဝူင်းလိူၼ် သေထၢမ်
“ ဝူင်းလိူၼ်...မႂ်းၶုၵ်းၸႂ်လႆႈ ၸူႉမႂ်းယူဝ်ႉငဝ်ဝႆႉလႃႇ?”
“ ဢႃ...ၸၢင်ႈၵႂႃႇၶုၵ်းၸႂ်လႆႈ ၸုၸူဝ်းၵေႃႉလႂ် ”
“ ၽႂ်တေႁူႉလႃႇ ၵူၼ်းၸၢႆးသူၼႆႉ ၵႆႉဝႆႉၸူႉ လၢႆဝၢၼ်ႈလၢႆမိူင်း လၢႆၵေႃႉလူး ”
“ မိုၼ်ႇႁွမ် ၵဝ်တေလၢတ်ႈမႂ်းသိုဝ်ႈသိုဝ်ႈ မႂ်းၶႂ်ႈယုမ်ႇၵေႃႈယုမ်ႇ ဢမ်ႇယုမ်ႇၵေႃႈယဝ်ႉ ၸုဢၼ်ဝႃႈၼၼ်ႉ တႃႇတေႁဵတ်းယႃႈသုတ်ႇၼႆၵေႃႈ ၵဝ်ဢမ်ႇမီးၵူၺ်း ”
“ သူပ်းၵူၼ်းၸၢႆးၼႆႉ လၢတ်ႈပဵၼ်ၵူႈမဵဝ်းယဝ်ႉ ”
“ ၵဝ်ဝႃႈယူႇလူး...ၶႂ်ႈယုမ်ႇၵေႃႈယုမ်ႇ ဢမ်ႇယုမ်ႇၵေႃႈယဝ်ႉ ၼႆၼႃႇ ပေႃးၼႆမႂ်းလူး?”
“ ဝူင်းလိူၼ် မၢဝ်ႇၵမ်ႉၼမ်ၼမ် ၵႆႉပၼ်လိၵ်ႈ ၵႆႉၸွမ်းၵဝ်ဢိူဝ်ႈ၊ ၵူၺ်းၵႃႈ ၵဝ်ပႆႇၶဝ်ႈၸႂ်ၼိူဝ်ၶဝ် မိူဝ်းၼႃႈမႃးၵေႃႈ တေဢမ်ႇၶဝ်ႈၸႂ်ၼိူဝ်ၶဝ် ၸိူဝ်းၼၼ်ႉလႆႈယဝ်ႉယူဝ်ႉ ”
ၶႃသွင်ၵေႃႉ ၼင်ႈယဵၼ်ဝႆႉ ၼင်ႇၵၼ်တၢင်းႁိုင်သေ မိုၼ်ႇႁွမ်ၸင်ႇဝႃႈ
“ ဝူင်းလိူၼ် ပေႃးမႂ်းဢမ်ႇဝႆႉၸူႉၼႆ ၵဝ်ၵေႃႈတေဢမ်ႇဝႆႉ ”
“ ပေႃးၵဝ်ဝႆႉၼႆ မႂ်းၵေႃႈ တေဝႆႉၼႆႁႃႉ?”
မိုၼ်ႇႁွမ် ဢမ်ႇတၵ်းသဵင်သင် မၼ်းဢမ်ႇၽႅပ်ႉတႃသေ လွမ်တူၺ်းၵႂႃႇ တီႈၵႆတၢင်းႁိုင်ယူႇ။ ယူႇၵမ်းၼိုင်ႈ မိုၼ်ႇႁွမ်ၸင်ႇဝႃႈ
“ ဝူင်းလိူၼ် ၸွင်ႇမႂ်းတေပၼ် ၵႂၢမ်းမၼ်ႈတီႈၵဝ်လႆႈႁိုဝ် လွင်ႈတေဢမ်ႇလႆႈဝႆႉၸူႉၼၼ်ႉ”
“ မိုၼ်ႇႁွမ် မႂ်းၶႂ်ႈဝႃႈပွင်ႇသင် ၵဝ်ဢမ်ႇႁူႉပွင်ႇ ”
“မႂ်းပွင်ႇဢမ်ႇပွင်ႇၼၼ်ႉတႄႉ ၵဝ်ဢမ်ႇၶႂ်ႈႁူႉ ၵဝ်ၶႂ်ႈႁူႉၸွင်ႇမႂ်းတေပၼ် ၵႂၢမ်းမၼ်း ဢၼ်ၼႆႉလႆႈၼႆၵူၺ်း ”
ၵူဝ်မိုၼ်ႇႁွမ် ၸႂ်ဢမ်ႇလီလႄႈ ဝူင်းလိူၼ်ၵေႃႈ ၸင်ႇဝႃႈ
“ မိုၼ်ႇႁွမ် ၵဝ်ပၼ်လႆႈယူႇ”
“ တႄႉၼေႃ ?”
“ တႄႉဢိူဝ်ႈ ”
“ သမ်ႉထႅင်ႈ ပေႃးမႃးတွပ်ႇပွႆးထၢမ်လိၵ်ႈၼႆ တေလႆႈမႃးလိုဝ်ႈ တီႈႁိူၼ်းႁဝ်းၼႃႈ”
“ ဢႃး...ၵဵင်ၸႂ်ဢိူဝ်ႈ ”
“ ၵဵင်ၸႂ်သင် ႁဝ်းပဵၼ်ၵူၼ်းတၢင်းလဵဝ်ၵၼ်သေ ဢမ်ႇၶႂ်းႁပ်ႉတၢင်းၸွႆႈထႅမ်ၵၼ်ႁႃႉ တေႃႈဝႃႈ?”
“ ဢမ်ႇဝႃႈၼင်ႇၵဝ်ႇ ”
“ ပေႃးဢမ်ႇဝႃႈၵေႃႈ တေလႆႈမႃးဢိူဝ်ႈၼႃ ပေႃးဢမ်ႇမႃးတႄႉ မိုၼ်ႇႁွမ် တေၸႂ်လမ်ယူႇၵူၺ်း ”
“ ဢလူဝ်ႉ...ယႃႇပေၸႂ်လမ်ၶႃႈ ဢဝ်ထုၼ်တႃးဝႆႉလႃႈ”
မိုၼ်ႇႁွမ် ႁၢၼ်ႉၸႂ်သေ ၶႂ်ႈၶူဝ်ဝႆႉယူႇ၊ လႆႈႁၼ်ၼၢင်းယိင်းသၢမ်ၵေႃႉ ၶိုၼ်ႈမႃး ၸွမ်းၶူဝ်လႆဢုတ်ႇၼၼ်ႉလႄႈ မိုၼ်ႇႁွမ် ၸင်ႇၵႂႃႇၸုၵ်းတီႈႁူဝ်ၶူဝ်လႆၼၼ်ႉသေ
“ ႁေ...ၶမ်းထူၺ်း ”
“ ဢေႃး...မိုၼ်ႇႁွမ် မႃးႁဵတ်းသင်?”
“ မႃးသူင်ႇတႆးၵေႃႉႁဝ်းဢိူဝ်ႈ သူလႃႇ?”
“ ႁဝ်းၵေႃႈမႃးသူင်ႇၵေႃႉႁဝ်း ၼင်ႇၵဝ်ႇဢိူဝ်ႈ ၵေႃႉသူမီးလႂ်?”
မိုၼ်ႇႁွမ် ပိူၼ်းၵၢင်းသေ ဢဝ်တႃပၵ်းၵႂႃႇတၢင်ႈဝူင်ႈလိူၼ်ၼၼ်ႉယူႇ။ ၶမ်းထူၺ်း တူၺ်း ၵႂႃႇ ပဵၼ်ၵူၼ်းၸၢႆး ဢၼ်မၼ်းယၢမ်ႈႁၼ် တီႈႁူင်းယႃၼၼ်ႉလႄႈ မၼ်းၸင်ႇထၢမ်လွႆးလွႆး။
“မိုၼ်ႇႁွမ်...ဢၼ်မီးမိုဝ်းမၢႆၼၼ်ႉဢမ်ႇၸႂ်ႈႁႃႉ?”
“ ၸႂ်ႈဢိူဝ်ႈ”
“ ႁဵတ်းႁိုဝ် ပဵၼ်ႁိုဝ်သမ်ႉပေႃးတၼ်း ၶီႇရူတ်ႉၶိူင်ႈသွၼ်ႉၵၼ်သေ ပဵၼ်ၵူပ်ႉပဵၼ်ၵူႈ မႃးၽႅဝ်ထိုင်ၸၼ်ႉၼႆႉလႃႇ?”
“ ဝၢႆးၼႆႉ ႁဝ်းၸွင်ႇၵွႆႈသပ်းလႅင်းၼႄသူ ၵႂႃႇသူင်ႇၵေႃႉသူၵွၼ်ႇလႃႈ ”
ၶမ်းထူၺ်းၵေႃႈ ၵႂႃႇၸွမ်းသူင်ႇၵေႃႉမၼ်းယူႇ။ မိုၼ်ႇႁွမ် ၶိုၼ်းမႃးတီႈဝူင်းလိူၼ်သေ
“ ဝူင်းလိူၼ် ၵႂႃႇႁဝ်းမိူဝ်း ”
“ တေမိူဝ်းယဝ်ႉႁႃႉ ၶႂ်ႈမိူဝ်းၵေႃႈမိူဝ်းလႄႈ ”
ၶႃသွင်ၵေႃႉ မႃးၶီႇရူတ်ႉၶိူင်ႈသေ လူင်းလွႆမိူဝ်းၵႂႃႇ
“ မိုၼ်ႇႁွမ်...မိူဝ်ႈၵႆႈၼၼ်ႉ ပဵၼ်တႆးၵေႃႉမႂ်းႁႃႉ?”
“ ၸႂ်ႈဢိူဝ်ႈ...ဢၼ်ႁူဝ်ၶဝ်ႇလွၵ်ႈႁႅင်းၼၼ်ႉၼႃႇ ”
“ ၵေႃႉၼၼ်ႉႁႃႉ...ႁဵတ်းသင် သမ်ႉဢမ်ႇသိုပ်ႇမိုတ်ႈပၼ်ၵဝ်လႃႇ ”
မိုၼ်ႇႁွမ် ဢဝ်တႃမိုဝ်းထုပ်ႉပၼ် ၵွင်းလင်ဝူင်းလိူၼ်သေ
“ ၵူၺ်းၵူဝ် ဢမ်ႇလႆႈႁူႉၸၵ်းၼၢင်းယိင်းၼမ်ၼမ် ၵူၺ်းဢိူဝ်ႈၼေႃႈ... ၵွပ်ႈပိူဝ်ႈ ဢမ်ႇၶႂ်ႈ ႁႂ်ႈမႂ်းမိုတ်ႈမၼ်းလႄႈ ၵဝ်ၸင်ႇမႃးမိူဝ်းၵမ်းလဵဝ်ၼၼ်ႉယဝ်ႈ ၶႂ်ႈႁူႉၵေႃႈ ”
“ မိုၼ်ႇႁွမ်...ၸႂ်လုၵ်ႈဢွၼ်ႇမႂ်းပႆႇႁၢႆလူင်ၼေႃ... ယူၼႂ်းၶႂၢင်ႇၵူၼ်းၼႆႉ မိုတ်ႈၵူၼ်း ၼမ်ၵႃႈႁိုဝ် လီၵႃႈၼၼ်ႉဢိူဝ်ႈ ”
“ ၸိူဝ်းၼႆႉ မိုၼ်ႇႁွမ် ဢမ်ႇႁူႉပွင်ႇ မိုၼ်ႇႁွမ်ၵူၺ်းႁူ ဢမ်ႇၶႂ်ႈႁႂ်ႈမႂ်း မိုတ်ႈမၼ်းၼၼ်ႉၵူၺ်း ”
“ လီယဝ်ႈ ...လီယဝ်ႈ...တေၶႂ်ႈၵႂႃႇလႂ်ထႅင်ႈ ပူင်ၶေႃႈပူင်ၼၵ်းၼၵ်းလႄႈ ”
“ ၵႂႃႇမိူဝ်းႁိူၼ်းသိုဝ်ႈသိုဝ်ႈ ”
“ ပေႃးၵႂႃႇသိုဝ်ႈသိုဝ်ႈ လူဝ်ႇၽႃႇႁူဝ်ႉပိူၼ်ႈၵူၺ်းဢိူဝ်ႈ ယွၼ်းငွၵ်းၽၢႆႇသၢႆႉၽၢႆႇၶႂႃ ဢိတ်းဢိတ်းဢွတ်းဢွတ်း ဢမ်ႇလႆႈၶႃႈႁႃႉ?”
မိုၼ်ႇႁွမ် ႁၢၼ်ႉၸႂ်သေ ဢဝ်တႃမိုဝ်းမၼ်း ထုပ်ႉၵွင်းလင်ဝူင်းလိူၼ်ယူႇ။