ၶိုၼ်းထူပ်းႁၼ်ၵၼ်/တွၼ်ႈ 7 ဝူင်းလိူၼ်လႄႈမိုၼ်ႇႁွမ်ထူပ်းၵၼ်
ၸၢႆးမၢဝ်ႇၵေႃႉၼိုင်ႈ ဢွၼ်မႄႈပႃႈၵေႃႉၼိုင်ႈမႃးၶိုၼ်ႈႁူင်းယႃ ၸဝ်ႈၸၢမ်ႇထုၼ်း တူၼ်ႈတီး။ ၽွင်းတိုၵ်ႉမႃးပၼ်မၢႆ ၵူၼ်းပဵၼ်မႂ်ႇၼၼ်ႉ သွင်ၶႃမႄႈလုၵ်ႈ ပႂ်ႉဝႆႉဢၼ်မေႃယႃဢွၼ်ႇၶဝ် တိုၵ်ႉတႅမ်ႈမၢႆ ၸိုဝ်ႈသဵင်ၵူၼ်းပဵၼ်ၼၼ်ႉယူႇ။ မႄႈပႃႈၼၼ်ႉ ဢမ်ႇမီးႁႅင်းလႄႈ ၼင်ႈဢိင်တင်ႇသေ ဢဝ်ႁူဝ်မၼ်း ဢိင်ၶႅၼ်လုၵ်ႈၸၢႆးမၼ်းယူႇ။ လုၵ်ႈၸၢႆးမၼ်းႁိုဝ်ႈၼမ်ႉၵတ်းသႂ်ႇၼႂ်းၵွၵ်းသေ ဢဝ်ပၼ် မႄႈၶဝ်။
“ မႄႈ...ၵိၼ်ၼမ်ႉဢိတ်းၼိုင်ႈၶႃႈၼေႃႈ ”
မႄႈၶဝ် ငွၵ်းႁူဝ်ၼႄသေ လုၵ်ႈၸၢႆးမၼ်း တိုၵ်းပၼ်ၼမ်ႉမႄႈၶဝ်ယူႇ။ ယူႇၵမ်း ၼိုင်ႈ မေႃယႃၶဝ်ႁွင်ႉလႄႈ လုၵ်ႈၸၢႆးမၼ်း ဢွၼ်မႄႈမၼ်း ၶဝ်ႈၵႂႃႇၵူတ်ႇတူၺ်းတၢင်းပဵၼ် တီႈႁွင်ႈၵူတ်ႇတူဝ်ၼၼ်ႉယူႇ။ မေႃယႃ ထၢမ်ထၢမ်ၵူတ်ႇၵူတ်ႇသေၸင်ႇဝႃႈ
“ မႄႈပႃႈ...ၶိုၼ်ႈႁူင်းယႃတီႈၼႆသေ ၶၢမ်ယူတ်းယႃၶႃႈၼႃႈ တေၶႅၼ်းယူႇ ”
“ ၸူမ်းယဝ်...မေႃယႃ ”
မေႃယႃ လၢတ်ႈပၼ်ႁွင်ႈၼွၼ်းၵူၼ်းပဵၼ်ယဝ်ႉသေ ၸႂ်ႉႁႂ်ႈဢဝ်လေႃႉ မႃးတၢင်ႇမႄႈပႃႈၼၼ်ႉယဝ်ႈ။ ၽွင်းၼၼ်ႉ တီႈၼွၵ်ႈငိၼ်းသဵင် ဢၼ်ၼိုင်ႈလႄႈ ၸၢႆးမၢဝ်ႇၼၼ်ႉ ဝၢႆႇတူၺ်းၵႂႃႇ လႆႈႁၼ် ၼၢင်းယိင်းသွင်ၵေႃႉ ၸုင်ၵၼ်ၶႃႁၢၼ်ႈ ၼေႃႉၼႄႉ ၼေႃႉၼႄးသေမႃး
“ မေႃယႃ ႁူတ်ႉၶိူင်ႈပလၢတ်ႈသေ ပိၼ်ႈလႄႈတႆးၵေႃႉၶႃႈ ၶႃမၼ်းလွၵ်ႈၵႂႃႇဢေႃႈ ယွၼ်ႈယႃတႃးၽွင်ႈၶႃႈ ”
မေႃယႃၼၢင်းယိင်ႈၵေႃႉၼိုင်ႈ ဢဝ်ယႃတႃးၸဵပ်းတႃးပၼ်လႄႈ ၼၢင်းယိင်းၶႃလွၵ်ႈၼၼ်ႉ သႅပ်ႇသေ ၼႃႈမၼ်းမီႇဝႆႉယူႇ။
“ သျီ...ဢယႃး...သႅပ်ႇ ”
ဝၢႆးသေ တႃးပၼ်ၵေႃႉဢၼ်လွၵ်ႈၼၼ်ႉယဝ်ႉ ၼၢင်းယိင်းထႅင်ႈၵေႃႉၼိုင်ႈၸင်ႇဝႃႈ
“ ၶႃႈၵေႃႈလွၵ်ႈဢိတ်းၼိုင်ႈဢေႃး ” ၼႆသေ ဝူတ်ႈၶဝ်ႇမၼ်းသေ ႁႂ်ႈမေႃယႃ ၼၢင်းယိင်ႈၼၼ်ႉ တႃးယႃပၼ်မၼ်းယဝ်ႉ။ မၼ်းဢမ်ႇပေႃးၸဵပ်းၼမ်လႄႈ ဢမ်ႇပေႃးသႅပ်ႇႁႅင်း ၽိူဝ်ႇၸၢႆးမၢဝ်ႇၼၼ်ႉ လွမ်ၵႄႉတႃတူၺ်း တီႈႁူဝ်ၶဝ်ႇၼၢင်းယိင်းၼၼ်ႉၼႆ လႆႈႁၼ်မီးမၢႆဝႆႉလႄႈ မၼ်းၸင်ႇတၵ်ႉဝႃႈ
“ မိုၼ်ႇႁွမ်း...”
ၼၢင်ႈယိင်းၼၼ်ႉၵေႃႈ ဝၢႆႇတူၺ်းသေ ဢၢမ်းတူၺ်းၼႃႈ ၵေႃႉဢၼ်ႁွင်ႉၸိုဝ်ႈမၼ်း ၼၼ်ႉယူႇ။ ၸၢႆးမၢဝ်ႇၶိုၼ်းထၢမ်
“ၸွင်ႇ...ၸွင်ႇၸႂ်ႈမိုၼ်ႇႁွမ် ႁိုဝ် ”
ၼၢင်းယိင်းႁၢင်ႈလီဢွၼ်ႇၼၼ်ႉ လွမ်တူၺ်းၸၢႆးမၢဝ်ႇသေတႃႉ မၼ်ႈဢမ်ႇယၢမ်ႈႁူႉၸၵ်းလႄႈ မၼ်းၸင်ႇ ဝႆႁူဝ်မၼ်ႈသေတွပ်ႇဝႃႈ
“ ဢမ်ႇၸႂ်...တူူၺ်းၽိတ်းၵူၼ်းယူဝ်ႉ ”
ၸၢႆးမၢဝ်ႇၼႃႈမႆႈၵႂႃႇသေ
“ ဢေႃႈ...ၶႃႈယူဝ်ဝႃႈ ပဵၼ်မိုၼ်ႇႁွမ်ၼႆၼႃး...ယႃႇဝႆႉၸႂ်သင်၊ ၵႂႃႇၵွၼ်ၼႃႈ ”
ၸၢႆးမၢဝ်ႇယုၵ်ႉမိုဝ်းၼႄသေ ၸွမ်းလင်လေႃႉမႄႈၶဝ် ဢၼ်ၵူၼ်းပႂ်ႉႁူင်းယႃ ထွင်းၵႂႃႇၼၼ်ႉယူႇ။ ၼၢင်းယိင်းသွင်ၵေႃႉၼၼ်ႉ ဢွၵ်ႇမႃး ၶီႇရူတ်ႉၶိူင်ႈၶႃသေ ၵေႃႉဢၼ်ၶႃၸဵပ်းႁႅင်း ၼၼ်ႉၸင်ႇဝႃႈ
“ မိုၼ်ႇႁွမ်...ႁဵတ်းသင် မႂ်ႈသမ်ႉဝႃႈ မႂ်းဢမ်ႇၸႂ်ႈမိုၼ်ႇႁွမ်ၼႆလႃႇ ”
“ ဢႃ...ပဵတ်းတူဝ်ၼၼ်ႉ ၶႂ်ႈႁၢင်ႈလွၵ်းလၢႆးတေႃႇႁဝ်းဢိူဝ်ႈၼၼ်ႉ၊ ၶဝ်ႁႃငိူၼ်ႈႁႃႁွႆး ႁႃတၢင်းမၼ်း တႃႇတေႁူႉၸၵ်းၼၢင်းယိင်းၵႂႃႈ ”
“ ဢမ်ႇၸႂ်ယူဝ်ႉ...မၼ်းဢမ်ႇဢၢပ်ႈယူႇတူၼ်ႈတီးၼႆႉၵူၺ်း ”
“ ယူႇလႂ်ၵေႃႈယဝ်ႉၼႃႇ ၵူၼ်းၸၢႆးႁႃလွၵ်းလၢႆးၸိူင်ႉၼႆ ႁဝ်းၺႃးမႃးၼမ်ၼႃႇယဝ်ႉ မင်ၵေႃႉ ၵႂႃႇၽၢႆႇၼႃႈႁဝ်းသေ ႁဵတ်းၵႅင်ႈဢဝ်ၵမ်တႅမ်ႈႁိုဝ်ႉ၊ ဢမ်ႇၼၼ် ၽႃႈၸဵတ်ႉၶဝ်ႁိုဝ်ႉ ႁဵတ်းၵႅင်ႈတင်ႈၸႂ် ဢဝ်တူၵ်း ႁႂ်ႈႁဝ်းႁၼ်သေ ၶႂ်ႈႁႂ်ႈႁဝ်းၸွမ်းၵဵပ်းပၼ်ၶဝ်ၵေႃႈ မီးယဝ်ႉ၊ ၼၼ်ႉပဵၼ်လၢႆးၶဝ် ႁၢင်ႈႁႅဝ်ႉ တေႃႇႁဝ်းၵူၺ်း မႂ်းၶႂ်ႈႁူႉၵေႃႈ ၶမ်းထူၺ်းဢူၺ်ႉ ”
“ ဢိုဝ်ႈ...ၶႂ်ႈၸႂ်ႈၵေႃႈ တေၸႂ်ႈယူႇၵႂႃႈ ယူဝ်မၼ်းယၢမ်ႈငိၼ်းၸိုဝ်ႈမိုၼ်ႇႁွမ် သေတီႈတီႈသေ မႃးႁွင်ႉၵေႃႈ ၸၢင်ႈပဵၼ်ဢိူဝ်ႈၼေႃႈ ”
ၶႃသွင်ၵေႃႉ ၶီႇရူတ်ႉၶိူင်ႈ မႃးသေ မိုၼ်ႇႁွမ်မႃးသူင်ႇၶမ်းထူၺ်း တီႈႁိူၼ်းၶဝ် ပွၵ်ႉပႃႇမႆႉသေ တူင်ႉတၵ်ႉ ဢၢင်ႈတေမိူဝ်းပွၵ်ႇၵုင်းႁေႃ
“ မိူဝ်းၵွၼ်ႇ ၶမ်းထူၺ်း မွၼ်းမွၼ်း ”
“ မိူဝ်းလီလီ မိူဝ်းလွႆးလွႆး ၵူဝ်လႆႈႁွႆးမႂ်ႇထႅင်ႈ မွၼ်းမွၼ်း ”
ၶမ်းထူၺ်ႈ ၵၵ်ႈၵႆမိုဝ်းသေ ၶိုၼ်းၼႅတ်ႈလၢတ်ႈ
“ မိုၼ်ႇႁွမ် ၵမ်ႉလူး ”
“ ဢီႈသင် ၶမ်းထူၺ်း ”
“ တီႈႁူင်းယႃ မိူဝ်ႈပဵတ်းတူဝ်ၼၼ်ႉ ယုၵ်ႉမိုဝ်းၼႄႁဝ်းၼၼ်ႉ ၵဝ်တၼ်းႁၼ် တီႈလင်မိုဝ်းမၼ်း ၽၢႆႇၶႂႃ မီးမၢႆလမ် မွၵ်ႈမဵတ်ႉမၢၵ်ႇၵႅင်းလူင်ၼၼ်ႉဢိူဝ်ႈမႂ်း မိူဝ်းလႃႈ...မိူဝ်းလႃႈ မွၼ်းမွၼ်း ”
“ တူၺ်းၸေးၵျလႃႇ မိူဝ်းယဝ်ႈ မွၼ်း...”
မိုၼ်ႇႁွမ် ၶီႇရူတ်ႉၶိူင်ႈမၼ်း ဢွၵ်ႇမႃးသေ ၶိုၼ်းဝူၼ်ႉၵႂၢမ်း ဢၼ်ၶမ်းထူၺ်းဝႃႈ တီႈလင်မိုဝ်းမၼ်း ၽၢႆႇၶႂႃမီးမၢႆလမ်မွၵ်ႈမဵတ်ႉမၢၵ်ႇၵႅင်းလူင်ၼႆသေ မၼ်းၶိုၼ်းၵႂႃႇၶုၵ်းၸႂ်လႆႈ တႆးၵေႃႉမၼ်းမိူဝ်ႈလဵၵ်ႉ ဝူင်းလိူၼ် မီးမၢႆၸိူင်ႉၼၼ်လႄႈ “ ၶေးတေပဵၼ်ဝူင်းလိူၼ်ယဝ်ႉ ”ၼႆသေ ရူတ်ႉၶိူင်ႈ မၼ်းသမ်ႉပေႃးၽႅဝ်မႃး ၼႂ်းဝၢင်းႁိူၼ်းၶဝ်ယဝ်ႉ။ ၼႅတ်ႈၶိုၼ်းဝၢႆႁူဝ်ရူတ်ႉၶိူင်ႈမၼ်း ၵႂႃႇၸူးႁူင်းယႃ ၸဝ်ႈၸၢမ်ႇထုၼ်းယူႇ၊ မၼ်းမႃးထၢမ်မေႃယႃၶဝ်သေ ၸင်ႇၸွမ်းၵႂႃႇႁႃတူၺ်း တီႈႁွင်ႈဝႆႉၵူၼ်းၼၢဝ်ၼၼ်ႉ ၵူႇၼိုင်ႈယဝ်ႉၵူႇၼိုင်ႈယူႇ။ ၵူၺ်းၵႃႈ ၼႂ်းၵူၼ်းဢၼ်မႃးပႂ်ႉၵူၼ်းပဵၼ်ၼၼ်ႉ ဢမ်ႇႁၼ် ၸၢႆးမၢဝ်ႇသေၵေႃႉ တူၺ်းၵႂႃႇတူၺ်းၶိုၼ်း လႆႈႁၼ်မႄႈပႃႈၵေႃႉၼိုင်ႈ ၵေႃႉလဵဝ်ၼွၼ်းလပ်းတႃဝႆႉယူႉၽွမ်ၽွမ်။
မိုၼ်ႇႁွမ်လွမ်တူၺ်း မႄႈပႃႈၼၼ်ႉလီလီ လႆႈႁၼ်မႄႈပႃႈၼၼ်ႉ ယွမ်သေ ဢမ်ႇမီးႁႅင်းလိူတ်ႈဝႆႉ၊ မၼ်းၼၢင်းဝူၼ်ႉသေ တူၺ်းလီလီၼႆ မၼ်းၼၢင်းပွင်ႇၸႂ်ႁၼ်ထိုင်မႃးဝႃႈ ပဵၼ်မႄႈ ဝူၼ်းလိူၼ်ၶဝ် ဢၼ်ပဵၼ်မေႃသွၼ်လူင်ၶဝ်မႃး မိူဝ်ႈလဵၵ်ႉၼၼ်ႉလႄႈ မၼ်းၸင်ႇၼင်ႈပႂ်ႉဝႆႉ တီႈတင်ႇ ႁိမ်းၵူႇၼၼ်ႉသေ လွမ်တူၺ်း ၼႃႈမႄႈၶူးၼၼ်ႉယူႇတင်းႁိုင်၊ ၸႂ်မၼ်ႈၵႂႃႇၸႂ်ထိုင် ၽွင်းမိူဝ်ႈၶဝ် ၶိုၼ်ႈႁဵၼ်းၸွမ်းၵၼ် တင်းဝူင်းလိူၼ်၊ ၶႅတ်ႉလႃးတီႈတၢင်ႉယၢၼ်းၼၼ်ႉယူႇ။
ယူႇၵမ်းၼိုင်ႈ မႄႈပႃႈၼၼ်ႉ တိုၼ်ႇမႃးလႄႈ မိုၼ်ႇႁွမ် ၸင်ႇႁွမ်းမိုဝ်းတၵ်ႉသဵင်ဢူၼ်ႈသဵင်ဢွၼ်ႇ
“ မႂ်ႇသုင်ၶႃႈ...မႄႈၶူး ”
မႄႈၶူး ဝၢႆႇၼႃႈလွမ်တူၺ်းၼၢင်းယိင်းဢွၼ်ႇ ဢၼ်ႁွင်ႉမၼ်းၼၼ်ႉသေ လၢတ်ႈသဵင်လွႆးလွႆး
“ မႂ်ႇသုင် ယိင်းပဵၼ်ၽႂ်? ”
မိုၼ်ႇႁွမ် ၸင်ႇယိပ်းဢဝ်မိုဝ်းမႄႈၶူးသေ
“ ယိင်းပဵၼ်မိုၼ်ႇႁွမ် လုၵ်ႈမေႃယႃလူင်သႂ်သွင်ႇဢေႃႈ ၸွင်ႇတွင်းယိင်းၶႃႈႁိူဝ်?”
မႄႈၶူး လွမ်တူၺ်းမိုၼ်ႇႁွမ် တႃပေႃးဢမ်ႇၽႅပ်ႉသေ
“ ဢေႃႈ...မိုၼ်ႇႁွမ်ႁႃႉ တွင်းယဝ်ႉၵမ်းၼႆႉ သင်မိုၼ်ႇႁွမ် ဢမ်ႇလၢတ်ႈတႄႉ တေတွင်း ယၢပ်ႇယူႇ ဢူႈမႄႈသူၶဝ် ယူႇလီယူႇႁႃႉ? ”
“ ဢေႃႈ ...ယူႇလီယူူႇၶႃႈ ”
“ မိုၼ်ႇႁွမ်ႁဵတ်းႁိုဝ်ႁူႉ မႄႈၶူးမႃးၶိုၼ်ႈႁူင်းယႃလႃႇၼႆႉ”
မိုၼ်ႇႁွမ်ၵေႃႈ ၸင်ႇၶႆႈလၢတ်ႈၼႄ ၵူႈလွင်ႈလွင်ႈသေ
“ ဝူင်းလိူၼ် ၵႂႃႇလႂ်ၶႃႈလႃႇ?” “မၼ်းၵႂႃႇႁႃသိုဝ်ႉယႃႈယႃဝႃႇ ဢိူဝ်ႈ...ၵၢပ်ႈပၢၼ်တီလဵဝ်ၼႆႉ လူဝ်ႇလႆႈဢဝ်ယႃႈယႃၸဝ်ႈၵဝ်ႇသေ ၶိုၼ်ႈႁူင်းယႃဢိူဝ်ႈၼေႃႈ မိူဝ်ႈမႄႈၶူး ၶဝ်လဵၵ်ႉၼၼ်ႉ ပေႃးၶိုၼ်ႈႁူင်းယႃၼႆ ဢမ်ႇတၢပ်ႈလူဝ်ႇ လႆႈသိုဝ်ႉယႃႈယႃသင်ၵူၺ်း ”
“ ၼၢၼ်းတၢႆ ပဵၼ်လၢႆၸၢတ်ႈၶႃႈၼေႃႈမႄႈၶူး”
“ ၸႂ်ႈယဝ်ႈ...ၼႄႈဝူင်းလိူၼ်မႃးယဝ်ႉၼႄႈ ”
“ မႄႈၶူး ယႃႇပေၽုမ်ႈလၢတ်ႈသင်ၶႃႈၼႃႈ ”
မိုၼ်ႇႁွမ် လုၵ်ႉၸုၵ်းသေ လွမ်တူၺ်းဝူင်းလိူၼ် တႃပေႃးဢမ်ႇၽႅပ်ႉ၊ ဝူင်”လိူၼ်ၵေႃႈ ၶိုၼ်းလႆႈႁၼ် ယိင်းသၢဝ်ဢွၼ်ႇမိူဝ်ႈၵႆႈၼၼ်ႉလႄႈ ဢၢမ်းသေ လွမ်တူၺ်း ၸုၵ်းမိုင်ဝႆႉႁိမ်းတိၼ်ၵူႇၼၼ်ႉယူႇ။ ဝူင်းလိူၼ်ၵႆႉယၢမ်ႈၸုၵ်း ဢဝ်မိုဝ်းပႄႈလင်လႄႈ မၼ်းၸင်ႇဢဝ်မိုဝ်း ပႄႈဝႆႉၽၢႆႇလင်ယူႇ။ မၼ်းတိဝ်ႈမႃး ယႃႈယႃ တႃႇၵိၼ်တႃႇသမ်းထူင်ၼိုင်ႈ သႂ်ႇမႃးၼႂ်းထူင်ၶွပ်ႉၶႅပ်ႉ၊ သမ်ႉပပ်ႉဢွၼ်ႇဢၼ် ၼိုင်ႈ။
မိုၼ်ႇႁွမ် ၶႂ်ႈႁၼ်မၢႆလမ် တီႈမိုဝ်းဝူင်းလိူၼ်လႄႈ မၼ်းပၼ်လဵပ်ႈမႃး ၽၢႆႇလင်ဝူင်းလိူၼ်။ ဝူင်းလိူၼ်သမ်ႉ ၸွမ်းဝၢႆႇတူၺ်းမၼ်းလႄႈ မိုၼ်ႇႁွမ် ဢမ်ႇၸၢင်ႈႁၼ်မိုဝ်းဝူင်းလိူၼ်၊ မိုၼ်ႇႁွမ်ၶိုၼ်း လဵပ်ႈတူၺ်း ၽၢႆႇလင်ဝူင်းလိူၼ်၊ ဝူင်းလိူၼ်ၶိုၼ်းၸွမ်းဝၢႆႇတူၺ်းမိုၼ်ႇႁွမ်ႁဵတ်းၼၼ်ယူႇ။ မိုၼ်ႇႁွမ် ၸင်ဝႃႈ
“ ၼႄမိုဝ်းလူး ”
“ ၼႄႁဵတ်းသင် ပေႃးၶႂ်ႈႁၼ်မိုဝ်းၼႆ တူၺ်းမိုဝ်းၸဝ်ႈၵဝ်ႇၼၼ်ႉ ၵေႃႈလႆႈယဝ်ႉၼႃႇ ”
“ ဢမ်ႇၸႂ်ႈ...ၶႂ်ႈႁၼ်မိုဝ်းမႂ်းဢိူဝ်ႈမီးသင်?”
“ ၸၢင်ႈၵႂႃႇမီးသင် မီးဢီႈယႃလႄႈ ပပ်ႉဝွၵ်းၼႂ်းသူၼ်မွၵ်ႇႁၵ်ႉၵူၺ်းဢိူဝ်ႈ ”
“ ၶႂ်ႈႁၼ်သွင်ဢၼ်ၼၼ်ႉ ဢမ်ႇၸႂ်ႈ ၼၼ်ႉဢဝ်ဝႆႉၼိူဝ်ၵူႇၵွၼ်ႇလႄႈ ၶႂ်ႈႁၼ်မိုဝ်း မႂ်းၸၢႆးဢိူဝ်ႈ
ဝူင်းလိူၼ် ဢဝ်မိုဝ်းမၼ်းၽၢႆႇသၢႆႉ ၵွင်ႉဢဝ်ထူင် ဢဝ်ပပ်ႉသေ ဝႆႉၼိူဝ်ၵူႇယူႇ။ သမ်ႉၶိုၼ်းပိၼ်ႈၼႄၽႃႇမိုဝ်းမၼ်းသွင်ၽႃႇ
“ ႁိူဝ်ႇ...ၶႂ်ႈတူၺ်း မိုဝ်းၵဝ်ၵေႃႈ...ယူဝ်ၶႄးပဵၼ် သြႃႇပေႇတၢင်ႇၵႃႇလႃးယူဝ်ႉ?”
“ ဢမ်ႇၸႂ်ႈ...ၶႂ်ႈတူၺ်းလင်မိုဝ်းမႂ်းဢိူဝ်ႈ ”
ဝူင်းလိူၼ် ဢဝ်မိုဝ်းမၼ်းၽၢႆႇသၢႆႉ တူမ်းလင်မိုဝ်းမၼ်းၽၢႆႇၶႂႃသေ ၼႄယူႇ။ မိုၼ်ႇႁွမ်ၵိုင်ႉၵၢင်ႉ ၸၼ်ပၢၵ်ႈပႅတ်ႈ မိုဝ်းဢၼ်တူမ်းဝႆႉၼၼ်ႉသေ လႆႈႁၼ်မၢႆလမ် တီႈမိုဝ်းဝူင်းလိူၼ်လႄႈမၼ်းၸင်ႇႁွင်ႉဝႃႈ
“ ဝူင်းလိူၼ် ...ၵဝ်ပဵၼ်မိုၼ်ႇႁွမ်ဢိူဝ်ႈ ”
“ ဢႃး...မိုၼ်ႇႁွမ်တႄႉတႄႉႁႃႉ ”
ၶႃသွင်ၵေႃႉ ၸူမ်းသိူဝ်းၵၼ်သေ ယိပ်းမိုဝ်းၵၼ်ဝႆႉယူႇ
“ ၸႂ်ႈဢိူဝ်ႈ ”
“ ပေႃးၼႆ ပဵၼ်မိုၼ်ႇႁွမ် ႁူဝ်ၶဝ်ႇၼၼ်ႉဢိူဝ်ႈၼေႃႈ?”
“ ၸႂ်ဢိူဝ်ႈ...မိူဝ်ႈလဵဝ်ႁူဝ်ၶဝ်ႇလွၵ်ႈဝႆႉဢိူဝ်ႈ ၶိၵ်းၶိၵ်း ”
မိူဝ်ႈတႄႁူႉၸၵ်းၵၼ်ၼၼ်ႉ ၶႃၶိုၼ်းထၢင်ႇဝႃႈ ၶႃပဵၼ်လုၵ်းဢွၼ်ႇ မိူဝ်ႈလဵၵ်ႉၼၼ်ႉၼႆယူႇ။ မိူဝ်ႈလဵၵ်ႉတႄႉ ယၢမ်ႈၵွတ်ႇၶေႃး ၸုင်မိုဝ်းလဵၼ်ႈၵေႃႉၵၼ်တႃႇသေႇသေတႃႉ ယၢမ်းလဵဝ် ၶႃၶိုၼ်းၶုၵ်းၸႂ်လႆႈဝႃႈ ၶႃဢမ်ႇၸႂ်ႈ လုၵ်ႈဢွၼ်ႇမိူဝ်ႈၼၼ်ႉယဝ်ႉၼႆလႄႈ ၶႃႈၼႅတ်ႈပွႆႇၽႃႈမိုဝ်းၵၼ်ၶိုၼ်းယဝ်ႉ။
“ မိုၼ်ႇႁွမ်...ၵဝ်ၸူမ်းဝႃႈၸူမ်းယဝ်ႉၼႆႉ လႆႈမႃးႁၼ်မႂ်း ”
“ မိုၼ်ႇႁွမ် ၶႅၼ်းၸူမ်းဢိူဝ်ႈ ”
သွင်ၶႃ ဢုပ်ႇၵၼ်ပၼ်းယူႇၸွင်ႇၸွင်ႇၼင်ႇၼၼ် မႄႈၶူးၸင်ႇဝႃႈ
“ ၶိူဝ်ယႃႇလၢတ်ႈႁႅင်း တီႈၼႆႈပဵၼ်ႁူင်းယႃဢိူဝ်ႈ ၵႂႃႇလၢတ်ႈတီႈၼွၵ်ႈၼၼ်ႉလႄႈ မႄႈၶူးတေၼွၼ်းလိုဝ်ႈႁိူဝ်ႉလိုဝ်ႈၸႂ်ၵွၼ်ႇ ”
ဝူင်းလိူၼ်လႄႈမိုၼ်ႇႁွမ် ဢွၵ်ႇမႃးတီႈၼွၵ်ႈသေ ၵႂႃႇၸုၵ်းဢုပ်ႇၵၼ် တီႈၽၵ်းတူႁူးလႅင်းဢၼ်ၼိုင်ႈယူႇ။
“ ဝူင်းလိူၼ် ၽႅဝ်မႃးတူၼ်ႈတီးမိူဝ်ႈလႂ်?”
“ တိုၵ်ႉၽႅဝ်မိူဝ်ႈၼႆႉၵူၺ်း ၶီႇႁိူဝ်းမိၼ် ၵဵင်းတုင်သေ မႃးလူင်းႁၢႆးဝူဝ်း မႃးႁူင်းယႃၵမ်းလဵဝ်ၼၼ်ႉၼႃႇ ”
“မိူဝ်ႈလဵဝ် ၵႂႃႇယူႇၵဵင်းတုင်ႁႃႉ? ”
“ ၸႂ်ႈဢိူဝ်ႈ...မႄႈႁဝ်းလႆႈၶၢႆႉၵႂႃႇႁဵတ်း ၽူႈၵွၼ်းႁူဝ်ႁဵၼ်းတီႈၼၼ်ႈ လႆႈသၢမ်ပီယဝ်ႉလူး ”
“ လုၵ်ႉလွႆလႅမ်သေၵႂႃႇႁႃႉ?”
“ ၸႂ်ႈဢိူဝ်ႈ...မိုၼ်ႇႁွမ်ၼႃႇ ၽႅဝ်တူၼ်ႈတီးသေ ဢမ်ႇသိုပ်ႇၵႂႃႇလႂ်ထႅင်ႈႁႃႉ?”
မိုၼ်ႇႁွမ် ဝႆႁူဝ်ၼႄသေ
“ ဢမ်ႇၵႂႃႇလႂ်... ပေႃႈႁဝ်းဢွၵ်ႇၵၢၼ်ယဝ်ႉ သိုဝ်ႉႁိူၼ်းဝႆႉ တီႈတူၼ်ႈတီးၼႆႉသေ ၽုၺ်ႇႁွင်ႈယႃဝႆႉဢိူဝ်ႈ မႃးဢႅဝ်ႇႁဝ်းၼႃႈ ”
“ပေႃးဢမ်ႇမႃးႁပ်ႉၼႆ တေႁဵတ်းႁိုဝ်မေႃမိူဝ်း ”
ၶႃသွင်ၵေႃႉ ၵမ်းၵမ်းလွမ်တူၺ်းၼႃႈၵၼ်ယူႇ တိၵ်းတိၵ်းသေ ဝူင်းလိူၼ်ၸင်ႇဝႃႈ
“ မိုၼ်ႇႁွမ်...မိူဝ်ႈလဵဝ် မႂ်းၽႅဝ်ၸၼ်ႉၸွမ်ဝႆႉယဝ်ႉႁႃႉ?”
“ ပီၼႆႉ တွပ်ႇဝႆႉပီသွင်ယဝ်ႉ ဢဝ်ဝႆႉ ၿၢႆးႁၢင်ႈဢိူဝ်ႈ၊ မႂ်းၼႃႇဢမ်ႇၶိုၼ်းႁဵၼ်း ယဝ်ႉႁႃႉ?”
“ ၵဝ်လူဝ်ႇလႆႈၸွႆႈႁႃလဵင်ႉ တႃႇၼႃႈႁိူၼ်းႁဝ်းလႄႈ ၵဝ်ဢမ်ႇၶိုၼ်ႈၸၼ်ႉၸွမ်...ၵူၺ်းၵႃႈ ...ၵဝ်ဢဝ်ဝႆႉ Dicstant ယူႇတီႈၵႆသေ ၶိုၼ်ႈဢဝ်ၵူၺ်း ပေႃးၸမ်တွပ်ႇလိၵ်ႈၼႆ ႁဝ်းလႆႈမႃးယူႇတူၼ်ႈတီးၼႆ မွၵ်ႈၼိုင်ႈလိူၼ်ဢိူဝ်ႈ၊ တွပ်ႇဝႆႉ ပီသွင်ယဝ်ႉ”
“ ဢဝ်ဝႆႉ ပၢႆးသင်လႃႇ?”
“ ဢဝ်ပၢႆးႁၢင်ႈၼင်ႇၵဝ်ႇဢိူဝ်ႈ ”
“ ၸႂ်ႈတႄႉႁႃႉ?”
“ ၸႂ်ဢိူဝ်ႈ ”
“ ပေႃးၼႆ ပီတေမႃး ပေႃးတေမႃးတွပ်ႇလိၵ်ႈၼႆ တေလႆႈမႃးလိုဝ်ႈ တီႈႁိူၼ်းႁဝ်းသေ တွပ်ႇဢိူဝ်ႈၼႃ ”
“ ဢမ်ႇပဵၼ်ယူဝ်ႉ?...ၵဵင်ၸႂ်ဢိူဝ်ႈ ”
“ ၸၢင်ႈလူဝ်ႇၵဵင်ၸႂ်သင် ပေႃးၶၢဝ်းဝူင်းလိူၼ်ၶဝ် တွပ်ႇလိၵ်ႈၼၼ်ႉ ႁဝ်းပေႃးယဝ်ႉယဝ်ႈ လႄႈ ဢၼ်ဝူင်းလိူၼ် ဢမ်ႇႁူၼၼ်ႉ မိုၼ်ႇႁွမ် ၸၢင်ႈလၢတ်ႈသပ်းလႅင်းပၼ်ဢိူဝ်ႈ ”
“ဢေႃႈ...မႂ်းၶႂ်ႈႁဵတ်းမေႃသွၼ် ၼိူဝ်ၵဝ်ဢိူဝ်ႈၼေႃႈ?”
“ ဢမ်ႇဝႃႈၼင်ႇၵဝ်ႇၼႃး ၸွႆႈထႅမ်ၵၼ်ဢိူဝ်ႈ”
“ ၸူမ်းဝႆႉထႃႈယဝ်ႉ သၢဝ်ၶူးမိုၼ်ႇႁွမ်ဢိူၺ်ႉ ”
ၵွပ်ႈဝူင်းလိူၼ်ႁွင်ႉမၼ်းဝႃႈ ‘သၢဝ်ၶူးမိုၼ်ႇႁွမ်’ၼႆလႄႈ မိုၼ်ႇႁွမ်ႁၢၼ်ႉၸႂ်သေ ၶူဝ်ယူႇၶိၵ်းၶိၵ်းယဝ်ႉ၊ ဝူင်းလိူၼ် လႆႈႁၼ်တၢင်းၶူဝ်မိုၼ်ႇႁွမ် ၼင်ႇၼၼ်သေ မၼ်းၸင်ႇဝႃႈ
“ မိုၼ်ႇႁွမ်...မႂ်းပေႃးပဵၼ် လုၵ်ႈႁဵၼ်းၸၼ်ႉၸွမ်ယူႇယဝ်ႉသေတႃႉ ၼႂ်းတႃၵဝ်တႄႉ တိုၵ်ႉႁၼ်မႂ်း မိူၼ်လုၵ်ႈဢွၼ်ႇ မိူဝ်ႈႁဝ်းလဵၵ်ႉၼၼ်ႉ ဢိူဝ်ႈမႂ်း ”
“ ဝူင်းလိူၼ်...ၵဝ်တူၺ်းမႂ်းၵေႃႈ ၼႂ်းၸႂ်တိုၵ်ႉႁၼ်မႂ်း မိူဝ်ႈႁဝ်းတိုၵ်ႉဢွၼ်ႇၼၼ်ႉ ၼင်ႇၵဝ်ႇဢိူဝ်ႈ၊ ဢေႃႈ...ၸွင်ႇမႂ်းႁၼ် ၶႅတ်ႉလႃးႁိုဝ်?”
ဝူင်းလိူၼ် ဝႆႁူဝ်ၼႄသေ
“ ဢမ်ႇႁၼ်...မိုၼ်ႇႁွမ်ႁၼ်မၼ်းယူႇႁႃႉ”
“ ဢမ်ႇႁၼ်...မၼ်းတေမီးတီႈလႂ်ၵေႃႈ ဢမ်ႇႁူႉယဝ်ႉၼေႃ?”
“ ဢမ်ႇႁူၼႃး...ၶေးတေမီးတီႈတၢင်ႉယၢၼ်းယူႇႁိုဝ် ဢမ်ႇၸၢင်ႈဝႃႈလႆ...ယူဝ်ၶေးၶၢႆႉၵႂႃႇ သေတီႈတီႈႁိုဝ်”
မိုၼ်ႇႁွမ် ထူၺ်ႈၸႂ်လူင်ၵမ်းၼိုင်ႈသေ လၢတ်ႈဝႃႈ
“ ဢိုဝ်း...ဝၢႆးသေႁဝ်းၽၢတ်ႇ တၢင်ႉယၢၼ်းမႃးယဝ်ႉ တေႃႇထိုင်မိူဝ်ႈလဵဝ် ၵဝ်ယင်းၵႆႉၵႆႉ ၶုၵ်းၸႂ်လႆႈ ဢၼ်ႁဝ်းသၢမ်ၵေႃႉ လႆႈႁဵတ်းၵေႃႉၵၼ်မႃး ၸိူဝ်းၼၼ်ႉၵျ မႂ်းၶႂ်ႈႁူႉ ဝူင်းလိူၼ် ”
“ ၵဝ်ၵေႃႈ တေႃႈပဵၼ်ၼၼ်ၼင်ႇၵဝ်ႇဢိူဝ်ႈ ဢိုဝ်း...ၶႅတ်ႉလႃး ၸွင်ႇတေၶုၵ်း ၸႂ်လႆႈႁႃး ၸိူင်ႉၼင်ႇႁႃး ၶုၵ်းၸႂ်လႆႈမၼ်းၼၼ်ႉႁိုဝ်ၵေႃႈ ဢမ်ႇႁူႉၼေႃ?”
“ မၼ်းၵေႃႈ တေႃႈတေၶုၵ်းၸႂ်လႆႈယူႇၵႂႃႈ...တႃႉၶႂ်ႈႁၼ်မၼ်းလႃႈ၊ ဝူင်းလိူၼ် ပေႃးမႂ်း ႁၼ်မၼ်းၼႆ မွၵ်ႇလၢတ်ႈပၼ် လွင်ႈၵဝ်မီးတီႈၼႆႈၼႆၼၼ်ႉၽွင်ႈၼႃႈ... သင်ပဵၼ်လႆႈ ၶႂ်ႈႁႂ်ႈမႂ်း ဢွၼ်မၼ်းမႃးၸူးၵဝ်ၵွၼ်ႇဢိူဝ်ႈ ”
“ ဢိူဝ်ႈ...သွၼ်ႇႁႂ်ႈႁၼ်မၼ်းလႃႈ တႃႇၵဝ်တေဢမ်ႇလၢတ်ႈ လွင်ႈမႂ်းၼၼ်ႉၵေႃႈ ဢမ်ႇမီး ပေႃးပဵၼ်လႆႈတႄႉ တေႁွင်ႉမႃးၵႂႃႈ ”
“ ဝူင်းလိူၼ်...မၢင်ပွၵ်ႈၵဝ်ယူႇတီႈႁိူၼ်းသေ ၵုမ်ႇၼင်ႈဝူၼ်ႉလွင်ႈႁဝ်း လႆႈမူၼ်ႈသိူဝ်း မႃးမိူဝ်ႈလဵၵ်ႉၼၼ်ႉယူႇ တင်းႁိုင်ဢိူဝ်ႈ၊ပေႃႈမႄႈႁဝ်းၶဝ်ယင်းဝႃႈ ၵဝ်ပႄႉငဝ်ႁဵတ်းသင်ၼႆဝႃႇ၊ မၢင်ပွၵ်ႈ ဝူၼ်ႉၸိူင်ႉၼၼ်သေ ၵႆႉယၢမ်ႈမဝ်းလႄႈ ပွၵ်ႈၼိုင်ႈၵဝ်ပေႃး လိုမ်းတူဝ်ၵဝ်ၵွၼ်ႇဢိူဝ်ႈ ”
“ ႁႃ...ယႃႇပေႁႅင်ႉဝူၼ်ႉၼမ်ၼႃႇၽႅဝ်လေႃႇ မိုၼ်ႇႁွမ် ပေႃးဝၼ်းမၼ်းထိုင်မႃး ႁဝ်း တေၸၢင်းထူပ်းၵၼ်ယူႇၵႂႃႈ ”
“ ဢိူဝ်း...မိုၼ်ႇႁွမ် မုင်ႈမွင်း ဝၼ်းတေၶိုၼ်းထူပ်းၵၼ်ၼၼ်ႉၵျ ”
ၶႃသွင်ၵေႃႉ ၵိုတ်းမိုင်ဝူၼ်ႉလွင်ႈၶဝ် မိူဝ်ႈလဵၵ်ႉၼၼ်ႉယူႇတၢင်းႁိူင်သေ ဝူင်းလိူၼ် ၸင်ႇဝႃႈ
“ မိုၼ်ႇႁွမ်...မိူဝ်ႈၼႆႉႁႃးသွင်ၵေႃႉ ၶိုၼ်းထူပ်းႁၼ်ၵၼ်ယဝ်ႉလူး မိူဝ်းၼႃႈမႃး တင်း ၶႅတ်ႉလႃးသေ တေၶိုၼ်းထူပ်းၵၼ်ယူႇၵႂႃႈ ”
“ ႁႂ်ႈၶိုၼ်းၸဵဝ်းထူပ်းၵၼ်သေၵမ်းလႃႈ ”
“ ပေႃးမႂ်းႁၼ်မၼ်းၵေႃႈ မႂ်းတေလႆႈလၢတ်ႈၵဝ် ပေႃးၵဝ်ႁၼ်မၼ်းၵေႃႈ ၵဝ်တေမႃးလၢတ်ႈမႂ်းလႆ ႁႃးမႃးဢုပ်ႇၵၼ် တီႈၼွၵ်ႈၵေႃႈ ႁိုင်ၵႂႃႇတၢၼ်ႇတၢၼ်ႇယဝ်ႉ ယူဝ်ၶေးမႄႈႁဝ်း တိုၼ်ႇယဝ်ႉယူဝ်ႉ ၵႂႃႇႁႃးၵႂႃႇတူၺ်း ”
ၽိူဝ်ႇၶႃၶဝ်ႈမိူဝ်းတူၺ်း လႆႈႁၼ် ပႃႈမႂ်ႇတိုၵ်ႉၼွၼ်းတိုၼ်ႇမႃးလႄႈ
“ မႄႈ...ၼွၼ်းလပ်းယူႇၶႃႈႁႃႉ?”
“ ဢိုဝ်ႈ...ၼွၼ်းၵႂႃႇသွပ်ႉသႅပ်ႉၼိုင်းဢိူဝ်ႈ ႁိုဝ်ႈၼမ်ႉၼဵင်ႈပၼ်မႄႈၵွၵ်းၼိုင်ႈလူး ”
ဝူင်းလိူၼ်တိုၵ်ႉဢၢင်ႈၵႂႃႇႁိုဝ်ႈၼမ်ႉယူႇ မိုၼ်ႇႁွမ်တၼ်းဢွၼ်တၢင်းမၼ်းလႄႈ မိုၼ်ႇႁွမ်ႁိုဝ်ႈသေ ဢဝ်ၵႂႃႇပၼ်ပႃႈမႂ်ႇယဝ်ႉ
“ ယူဝ်ဝႃႈ မိုၼ်ႇႁွမ် မိူဝ်းယဝ်ႉၼႆၼႃး ”
“ ပႆႇမိူဝ်းၶႃႈ မႄႈၶူး တၢင်းဝူင်းလိူၼ်သေ ၵုမ်ႇၸူမ်းဢုပ်ႇၵၼ် ၶိူဝ်းမိူဝ်ႈႁဝ်းလဵၵ်ႉၼၼ်ႉ ပေႃးဢမ်ႇၶႂ်ႈယဝ်ႉလႆႈဢေႃႈ ”
ပႃႈမႂ်ႇဢိုၵ်ႉၵိၼ်ၼမ်ႉသေ ႁၢၼ်ႉၸႂ်လွမ်တူၺ်း ၶႃသွင်ၵေႃႉယူႇ၊ မိုၼ်ႇႁွမ်သိုပ်ႇဢုပ်ႇၶဝ် တၢၼ်ႇတၢၼ်ႇသေ ၸင်ႇယွၼ်းမိူဝ်းယဝ်ႉ၊
“ မႄႈၶူး...မိုၼ်ႇႁွမ်တေမိူဝ်းၵွၼ်ႇၶႃႈ ”
“ ဢိူဝ်ႈ...မိူဝ်းလွႆးလွႆး ”
“ မိုၼ်ႇႁွမ် တေမိူဝ်းမွၵ်ႇလၢတ်ႈၼႄ ပေႃႈပေႃႈမႄႈမႄႈ လွင်ႈမႄႈၶူးယူႇၶႃႈ ”
မိုၼ်ႇႁွမ် ယုမ်ႉႁၢင်ႈလီ ဝၢႆႇၸူးဝူင်းလိူၼ်သေ
“ ဝူင်းလိူၼ် တေမိူဝ်းၵွၼ်ႇ ”
ဝူင်းလိူၼ် ငွၵ်းႁူဝ် ယုမ်ႉၼႄမိုၼ်ႇႁွမ်ယူႇ မၼ်းၸွမ်းမႃးသူင်ႇမိုၼ်ႇႁွမ် တေႃႇထိုင် တီႈမိုၼ်ႇႁွမ် ဝႆႉရူတ်ႉၶိူင်ႈၼၼ်ႉယူႇ၊ ၽွင်းမိုၼ်ႇႁွမ် ၶီႇရူတ်ႉၶိူင်ႈဢွၵ်ႇမိူဝ်း
“ ဝူင်းလိူၼ်...မွၼ်း...မွၼ်း ၸွင်ႇၵွႆႈထူပ်းၵၼ် ”
“ မွၼ်း...မွၼ်း... မိူဝ်းလီလီ ၵူဝ်ၶဝ်ႇလွၵ်ႈထႅင်ႈ ”
မိုၼ်ႇႁွမ် ယုမ်ႉဝၢႆႈလႅင်ႈ ယုၵ်ႉမိုဝ်းၼႄသေ ဢွၵ်ႇမိူဝ်းၵႂႃႇယဝ်ႉ၊ ရူတ်ႉၶိူင်ႈမၼ်းၼၢင်း ၽႅဝ်မိူဝ်း ၼႂ်းဝၢင်းႁိူၼ်းၶဝ်သေ လႆႈႁၼ်ပေႃႈမႄႈ ၶူးမေႃယႃသႂ်သွင်ႇ မႄႈမၼ်းပႃႈႁွမ် ဢွၵ်ႇမႃးပႂ်ႉတူၺ်းမၼ်း တီႈၽၵ်းတူၶဝ်ႈႁိူၼ်းလႄႈ မိုၼ်ႇႁွမ် လူင်းရူတ်ႉၶိူင်ႈပူတ်းမၢၵ်ႇႁူဝ်ရူတ်ႉၶိူင်ႈမၼ်း ၼႅတ်ႈလႅၼ်ႈ မႃးၵွတ်ႇၶေႃး ပေႃႈမႄႈမၼ်းတင်းသွင်ၵေႃႉသေ လၢတ်ႈဝႃႈ
“ ပေႃႈ...မႄႈ...မိူဝ်ႈၼႆႉ ရူတ်ႉၶိူင်ႈလုၵ်ႈယိင်း ပိၼ်ႈသေ ႁူဝ်ၶဝ်ႇလုၵ်ႈယိင်း လွၵ်ႈၵႂႃႇ ဢိတ်းၼိုင်ႈလႄႈ လုၵ်ႈယိင်းၵျေႃႇဝႃႈၵျေႃႇ ၸူမ်းဝႃႈၸူမ်းယဝ်ႉ ”
မၼ်းၼၢင်း မႃးၼင်ႈထိုဝ်ႉသႂ်ႇ ၼိူဝ်တင်ႇ၊ ဝူတ်ႈႁူဝ်ၶဝ်ႇၸဵပ်းမၼ်းသေ
“ ပေႃႈ...သႂ်ႇယႃႈယႃပၼ်လုၵ်ႈယိင်းၽွင်ႈ ”
မႄႈမိုၼ်ႇႁွမ်ၶဝ် ပႃးႁွမ်မႆႈၸႂ်ၵႂႃႇသေ ၵႂႃႇသွပ်ႉသႅပ်ႉႁိမ်းႁူပေႃႈမိုၼ်ႇႁွမ်လွႆးလွႆး
“ သူ...လုၵ်ႈယိင်းႁႃး ပဵၼ်သင်လႃႇၼႆႉ? မိူဝ်ႈၵႆႈၵေႃႈ ၶဝ်ႈၽႅဝ်ႁိူၼ်းသေ ၶိုၼ်းဢွၵ်ႇၵႂႃႇၵမ်းလဵဝ် ၵမ်းၼႆႉသမ်ႉဝႃႈ ၸိူင်ႉၼႆလႃႇ ၸႂ်မၼ်းပိူင်ႈယဝ်ႉယူဝ်ႉ”
ဢူႈၶဝ်ႁႄႉမိုဝ်းၼႄသေ ၵႂႃႇဢဝ်ဢီႈယႃယူႇ၊ မႄႈၶဝ် မႃးၼင်ႈႁိမ်းလုၵ်ႈယိင်ႈမၼ်းသေ ၵမ်ႈတူၺ်း ၼႃႈၽၢၵ်ႇလုၵ်ႈယိင်းမၼ်း ၼိူဝ်ႉဢမ်ႇလိူတ်ႇဢမ်ႇမႆႈသင်၊
“ လုၵ်ႈယိင်း ဢမ်ႇပဵၼ်သင်ၼေႃ?”
“ ၸၢင်ႈၵႂႃႇ ပဵၼ်သင်မႄႈ ”
“ ၸႂ်လီယူႇၼေႃ?”
“ ၸႂ်လီလႄႈ ၸင်ႇၵျေႃႇသိူဝ်းၼႃႇမႄႈ”
ဢူႈၶဝ် ဢဝ်ယႃတႃးပၼ် ၶဝ်ႇလုၵ်ႈယိင်းမၼ်းသေ ထၢမ်
“ ၵွပ်ႈသင် ၼႃႈတႃလုၵ်ႈယိင်း ပႄႉသိူဝ်းလႃႇ မိူဝ်ႈၼႆႉ လၢတ်ႈလူး ”
“ ၵွပ်ႈႁူဝ်ၶဝ်ႇ လုၵ်ႈယိင်ႈလွၵ်ႈသေ ၽွင်းၵႂႃႇသႂ်ႇယႃ တီႈႁူင်းယႃၼၼ်ႉ တႆးၵေႃႉ လုၵ်ႈယိင်းမိူဝ်ႈလဵၵ်ႉ ဝူင်းလိူၼ် တွင်းမၢႆတီႈႁူဝ်ၶဝ်ႇ လုၵ်ႈယိင်ႈလႄႈ မႃးတၵ်ႉလုၵ်ႈယိင်းဢေႃႈ ”
မၼ်းသိုပ်ႇၶႆႈၼႄ လွင်ႈၶႃၶိုၼ်းထူပ်းၵၼ်ၼၼ်ႉယဝ်ႉသေ
“ ၵွပ်ႈၼႆ လုၵ်ႈယိင်း ၸူမ်ႈသိူဝ်းၼႃႇၶႃႈ မိူဝ်ႈၼႆႉ...ဢေႃႈ မႄႈၶူး ဢမ်ႇယူႇလီသေ မႃးမီးဝႆႉတီႈႁူင်းယႃ ၸဝ်ႈၸၢမ်ႇထုၼ်ႈၼၼ်ႉ ပေႃႈလႄႈမႄႈ တေၵႂႃႇတူၺ်းမိူဝ်ႈလႂ်?”
“ ၸႂ်ႁႃႉ...ဢိူဝ်ႈမိူဝ်ႈၽုၵ်ႈၵႂႃႈ ”
မႄႈမိုၼ်ႇႁွမ်ၶဝ် ဢမ်ႇတွၼ်ႉႁၼ်မိုၼ်ႇႁွမ် ၸူမ်းသိူဝ်းၸိူင်ႉၼႆသေပွၵ်ႈလႄႈ ၶႃသွင်ၵေႃႉၵေႃႈ သမ်ႉပေႃးၸူမ်းၸွမ်းယဝ်ႉ ၸၢႆးၵွႆ ၼွင်ႉၸၢႆးမိုၼ်ႇႁွမ် ပႃးထူင်သေ လႅၼ်ႈၶဝ်ႈႁိူၼ်းမႃး ၸူးမႄႈၶဝ် “ မႄႈ...မႄႈ ၸၢႆးပွၵ်ႈၵျူႇသိၼ်ႇမႃးယဝ်ႉၶႃႈ ”
“ ၵႂႃႇဝႆႉထူင်ၸၢႆးသေၵွၼ်ႇလႄႈ ၵႂႃႇႁွႆႈဝႆႉ တီႈဝႆႉမၼ်းၼႃ ”
“ ဢေႃႈၶႃႈ...မိူဝ်ႈၽုၵ်ႈၸၼ်ႉပႅတ်ႇ ၸၢႆးၶဝ် တေဢမ်ႇမီးၵျူႇသိၼ်ႇၼႆဝႃႇ ”
ၸၢႆးၵွႆ ၵႂႃႇႁွႆႈဝႆႉထူင်မၼ်းယဝ်ႉသေ
“ ႁူဝ်ၶဝ်ႇပီႈမိုၼ်ႇ ပဵၼ်သင်ၶႃႈၼၼ်ႉ ”
“ ပီႈလူမ်ႉသေ လွၵ်ႈၵႂႃႇဢိူဝ်ႈ ”
“ မိူဝ်ႈပီႈမိုၼ်ႇလူမ်ႉၼၼ်ႉ ဢမ်ႇႁၼ်ၼူလႅၼ်ႈၵႂႃႇႁႃႉ ”
မိူဝ်ႈလဵၵ်ႉၼၼ်ႉ ပေႃးလုၵ်ႈဢွၼ်ႇလူမ်ႉၼႆ ၵူၼ်းလူင်ၵႆႉဝႃႈ ‘ၼႄႈၼႄႈ တူၺ်းလူး ၼူလႅၼ်ႈၵႂႃႇတၢင်းပုၼ်ႉၼႄႈ’ ၼႆသေ ပႅတ်ႉလႅၼ်လုၵ်ႈဢွၼ်ႇ ယႃႇပေႁႂ်ႈႁႆႈလႄႈ ၸၢႆးၵွႆၸင်ႇထၢမ် ၼင်ႇၼၼ်ယဝ်ႉ
ၶဝ်ပေႃႈမႄႈလုၵ်ႈ ဢွၼ်ၵၼ်ယုမ်ႉၶူဝ်ယူႇ။