ၶိုၼ်းထူပ်းႁၼ်ၵၼ်/တွၼ်ႈ 6 ၶႅတ်ႉလႃးတင်ႈတူဝ်

ၸွမ်းလူၺ်ႈ ၼႃႈၵၢၼ် ပီႈၼၢင်းမူၼ်းသေ ၶႅတ်ႉလႃးၵေႃႈ ၶၢႆႉမႃးယူႇၸွမ်းပီႈၼၢင်းမူၼ်း တီႈၵူတ်ႉၶၢႆ။ ယူႇၸွမ်းၵၼ်ႁိုင်မႃးယဝ်ႉလႄႈ ၶႃသွင်ၵေႃႉ ႁၵ်ႉၵၼ် မိူၼ်ၼင်ႇပီႈဢွၵ်ႇၼွင်ႉပဵၼ်ၵၼ်ယူႇ။ ပေႃးပီႈၼၢင်းမူၼ်း ၵႂႃႇၵၢၼ်ၼႆ ၶႅတ်ႉလႃးႁဵတ်းၵေႃႉ ႁုင်ႁုင်တူမ်ႈတူမ်ႈဝႆႉထႃႈတႃႇသေႇ။ ပီႈၼၢင်းမူၼ်းၵေႃႈ လႆႈၵိၼ်ၶဝ်ႈဢုၼ်ႇၽၵ်းဝၢၼ် ယွၼ်ႉလူၺ်ႉ ၶႅတ်ႉလႃးၵူႈဝၼ်းၵူႈလိူၼ်ယဝ်ႉ။

ဝၼ်းၼိုင်ႈ။ ႁၼ်ၶႅတ်ႉလႃး ယွင်ႈၼၵ်းလႄႈ ပီႈၼၢင်းမူၼ်းၸင်ႇတၵ်ႉ

“ ၶႅတ်ႉလႃး ...ယႃႇပေယွင်ႈၼၵ်း မႄႈပုမ်လူင်ၼႆႉ ဢမ်ႇလႆႈယွင်ႈၼၵ်းၵူၺ်း ”

“ ပီႈမူၼ်း ယၢမ်ႈပုမ်လူင်မႃးႁႃႉ?ၶိၵ်း ၶိၵ်း ”

“ ဢေးၼႆႉၼေႃ ၵမ်ႉၵဝ်တေတၢၵ်းႁူဝ်မႂ်းယူႇ။ ၵဝ်တႃႉမႆႈၸႂ်တၢင်မႂ်းဢိူဝ်ႈၼႆႉ ဝႆႉလႄႈ ပီႈတေႁဵတ်းလႆ ”

ၶႅတ်ႉလႃးၵေႃႈ ယူႇပူၼ်ႉလိူၼ်ပူၼ်ႉဝၼ်း မွင်းဝၼ်းတေႁၼ်ၼႃႈလုၵ်ႈမၼ်းယူႇ။ ‘ဢၼ်တေဢမ်ႇဝႄႈလွတ်ႈလႆႈၼၼ်ႉ ႁူႉၵႃႈတေလႆႈတေႃႇသူႈယူႇ ’ ၼႆ ၶႅတ်ႉလႃးပွင်ႇၸႂ်ယူႇ။ ၽွင်းၼၼ်ႉ ဢႃႇယုမၼ်းၼၢင်း တိုၵ်ႉတေမီးမွၵ်ႈ သိပ်းႁႃႈသိပ်းႁူၵ်းၵူၺ်း။

ထိုင်တီႈ သၼ်ႇထေႇတဵမ်သေ ၵႂႃႇၵိူတ်ႇလုၵ်ႈ တီႈႁူင်းယႃ၊ ၵၢမ်ႇမၼ်းဢမ်ႇလီႁိုဝ်၊ ၵၢမ်ႇလုၵ်ႈဢွၼ်ႇ ဢမ်ႇလီႁိုဝ်ၼႆၵေႃႈ ဢမ်ႇၸၢင်ႈဝႃႈ ၵိူတ်ႇမႃးပဵၼ်ၼၢင်းယိင်းဢွၼ်ႇ တၼ်းမႃးယူႇမိူင်းၵူၼ်း လႆႈသွင်ဝၼ်းၵူၺ်း လုၵ်ႈယိင်ႈမၼ်းသဵင်ႈၵႂႃႇယဝ်ႉ။

တေဝႃႈ ဢမ်ႇႁၵ်ႉၼႆၵေႃႈ လိူတ်ႈၸဝ်ႈၵဝ်ႇပႃးယူႇၶိုင်ႈၼိုင်ႈလႄႈ ၽဝၶႅတ်ႉလႃး လႆႈပဵၼ်မႄႈလုၵ်ႈဢွၼ်ႇသွင်ဝၼ်းၵူၺ်းသေတႃႇ ၼမ်ႉတႃမႄႈႁၵ်ႉလုၵ်ႈၼၼ်ႉ ယင်းယွႆႉယွတ်ႇလူင်း တင်းၼမ်ယူႇ။

ဝၢႆးသေၼၼ်ႉ ၶႅတ်ႉလႃး သိုပ်ႇယူႇၸွမ်း ပီႈၼၢင်းမူၼ်းသေ ၼင်ႇႁိူဝ်တေပဵၼ် ငိုၼ်းတေလႆႈငိုၼ်းၼၼ်ႉ ၶႅတ်ႉလႃး ၽုၺ်ႇသႅင်ႇၶၢႆတၢင်းၵိၼ်ယွႆႈတိပ်းတိပ်းတွပ်းတွပ်း တီႈႁိူၼ်းၶဝ်ယဝ်ႈ။

မၢင်ပွၵ်ႈမၢင်လႂ် ပီႈမူၼ်း ၵႂႃႇၸွမ်းၼႃႈၵၢၼ်မၼ်း ႁိုင်ပဵၼ်ဝူင်ႈသေ ၸင်ႇပွၵ်ႈမႃးၵေႃႈမီး။ ၶႅတ်ႉလႃး ပဵၼ်မႄႈလုၵ်ႈဢွၼ်ႇၵေႃႉၼိုင်ႈသေတႃႉ ယၢမ်းလဵဝ်ၵွႆႈယူႇၵွႆႈႁၢင်ႈလီတိူဝ်းမႃးတိၵ်းတိၵ်း ယင်းၶႂ်ႈ ႁၢင်ႈလီသေ သၢဝ်ၵွၼ်ႇယဝ်ႉ။

သႅင်ႇတၢင်းၶၢႆမၼ်ႈၼၼ်ႉ တေလႆႈဝႃႈ ၶၢႆလီ ၵွပ်ႈတၢင်းႁၢင်ႈလီမၼ်းႁိူဝ်ဢမ်ႇႁူႉယဝ်ႉ။ ၶူဝ်းၶၢႆၼႂ်းသႅင်ႇမၼ်းၵေႃႈ ၸေးမဵဝ်းမၼ်းမႃး ဢၼ်ၵႃႈၶၼ်ယႂ်ႇမႃး မီးၼမ်မႃးတႄႉတႄႉ။ ထိုင်တီႈယူႇၸွမ်း ပီႈမူၼ်း လႆႈမႃးသွင်ပီ ပီႈၼၢင်းမူၼ်း သမ်ႉတႄႇၼႃႈႁိူၼ်းသေ ၵႂႃႇယူႇၸွမ်းၽူဝ်မၼ်း တီႈလႃႈသဵဝ်ႈလႄႈ ၶႃသွင်ၵေႃႉ ၶႅတ်ႉလႃး ၶိုၼ်းလႆႈၽၢတ်ႇၵၼ်ယဝ်ႉ။

ၸွမ်းလူၺ်ႈ တၢင်းၵႃႉတၢင်းၶၢႆသေ ၶႅတ်ႉလႃးၵေႃႈ မီးၵေႃႉၵႃႉၶၢႆၸွမ်းၵၼ်မႃးလႄႈ ၸင်ႇၵႂႃႇၵႃႉၶၢႆၶူဝ်းမိူင်းၶႄႇ။ လုၵ်ႉမူႇၸႄႈဢဝ်မႃးလႃႈသဵဝ်ႈ၊ ဝဵင်းလိူဝ်ႇၸိူဝ်းၼႆႉယဝ်ႉ။ မိူဝ်ႈၶႃသွင်ၵေႃႉ ပီႈမူၼ်း တေၽၢတ်ႇၵၼ်ၼၼ်ႉ ပီႈမူၼ်းသင်ႇမၼ်းဝႆႉဝႃႈ“ ယႃႇပေၵႃႉၶၢႆ ၶူဝ်းဢၼ်ၽိတ်းပိူင်မီႈ ” ၼႆလႄႈ ၶႅတ်ႉလႃးၵေႃႈ ဢမ်ႇၵႃႉၶၢႆၶူဝ်းၽိတ်းပိူင်မီႈသင်။

ၵူၺ်ႈၵႃႈ ၵူၼ်းၵေႃႉဢၼ်ဝႃႈၼၼ်ႉ မီးႁဵင်သမ်ႉၶႂ်ႈမီးမိုၼ်ႇ၊ မီးမိုၼ်ႇသမ်ႉၶႂ်ႈမီးသႅၼ်၊ မီးသႅၼ် သမ်ႉၶႂ်ႈမီးလၢၼ်ႉလႄႈ ၽဝ ၶႅတ်ႉလႃးၵေႃႈ ၵႃႉၶၢႆမႃးလွင်ႈၼိုင်ႈယဝ်ႉလွင်ႈၼိုင်ႈသေ မၼ်းသမ်ႉပေႃးလေႇႁႃၵႃႉၶၢႆ သႅင်မိူင်းၵုတ်ႈယူႇယဝ်ႉ။

ယွၼ်ႉပိူဝ်ႈ တၢင်းႁၢင်ႈလီမၼ်းၼၢင်းလႄႈ မၢဝ်ႇလႄႈသင် ပေႃႈလဵင်ႉလူင်လႄႈသင် ဢွၼ်ၵၼ်ၶႂ်ႈယဝ်ႉၶႂ်ႈယွၵ်ႇ ၶႂ်ႈယွၼ်းၼူမ်မွၵ်ႇၶႅတ်ႉလႃးသေတႃႉ ၶႅတ်ႉလႃး လႆႈၸၢၼ်ႈမႃး လွင်ႈဢၢဝ်ထုၼ်း လူလၢႆမၼ်းၼၼ်ႉယဝ်ႉလႄႈ မၼ်းဢမ်ႇယုမ်ႇၵူၼ်းၸၢႆးၵေႃႉလႂ်။

ၸွမ်းလူၺ်ႈ တၢင်းၵႃႉသႅင်မၼ်းသေ မၢင်ပွၵ်ႈၽႅဝ် မိူင်းၵုတ်ႈ၊ ဝဵင်းလိူဝ်ႇ တူၼ်ႈတီး ၸိူဝ်းၼၼ်ႉၵွၼ်ႇယဝ်ႉ။ ၽဝ ၶႅတ်ႉလႃး ယၢမ်းလဵဝ်ၼႆႉတႄႉ မၼ်းဢမ်ႇၶဝ်ႈၸႂ်သင် ဢၼ်မၼ်းၶဝ်ႈ ၸႂ်ၼၼ်ႉတႄႉ “ ဢမ်ႇမီးသင် လိူဝ်သေငိုၼ်း ” မၢင်ပွၵ်ႈၵေႃႈ လႆႈၼမ်ႉတွၼ်းၼမ်၊ မၢင်ပွၵ်ႈၵေႃႈဢေႇ မၢင်ပွၵ်ႈၵေႃႈသုမ်း၊ မၢင်ပွၵ်ႈၵေႃႈ ပိူၼ်ႈလႅၼ်ၵႂႃႇလုမ်းလုမ်းလႄႈ ၵၢၼ်သွၼ်ၵူၼ်းသေ ၶႅတ်ႉလႃး မေႃႁူႉ မေႃဢဝ်မႃးၵူၺ်းမၼ်းယူႇယဝ်ႉ။

မၼ်းၼၢင်း ၶိုၼ်းဝူၼ်ႉတူၺ်း ၽဝမၼ်းၼၢင်းငဝ်ႈတေႃႇပၢႆ လႆႈၽၢၼ်ႇမႃးၵူႈပိူင်၊ ဢၼ်ပိူၼ်ႈဝႃႈ “ၼၢၼ်းတၢႆ ပဵၼ်လၢႆၸၢတ်ႈ ”ဢၼ်ဝႃႈၼၼ်ႉ ပဵၼ်ဢၼ်ၸိုဝ်ႈၸႂ်ႈတႄႉ ၼႆၵေႃႈ ၶႅတ်ႉလႃး ႁူႉထိုင်ပွင်ႇၸႂ်မႃးယဝ်ႉ။ မၼ်းၼၢင်းၵႂႃႇတႃႈၵႂႃႇတၢင်ႈ မိူဝ်ႈလႂ်သေဢမ်ႇဝႃႈ မၼ်းၶုၵ်းၸႂ်လႆႈ တႆးၵေႃႉမၼ်းမိူဝ်ႈလဵၵ်ႉ ဝူင်းလိူၼ်လႄႈမိုၼ်ႇႁွမ်ၼၼ်ႉယူႇ။

ၸိူင်ႉၼင်ႇ ၶဝ်ယွၼ်းသူး ပေႃးယႂ်ႇမႃးႁႂ်ႈလႆႈၶိုၼ်းထူပ်းႁၼ်ၵၼ်ၼႆၼၼ်ႉ ၸွင်ႇတေ ပဵၼ်မႃးႁိူဝ်၊ ဝူင်းလိူၼ်လႄႈ မိုၼ်ႇႁွမ်လူး ၵႂႃႇမီးလႂ်။ ၶဝ်တေပဵၼ်ႁိူဝ်ဝႆႉ၊ ပေႃးၶိုၼ်းထူပ်းႁၼ်ၵၼ် ၸွင်ႇတေတွင်းၵၼ်ႁိဝ်။