ၶိုၼ်းထူပ်းႁၼ်ၵၼ်/တွၼ်ႈ 5 ၶႅတ်ႉလႃးႁူင်ႈတူၵ်းလိၼ်
ဝၼ်းၼႆႉ ၶႅတ်ႉလႃးလုၵ်ႉမႃးပိတ်းမွၵ်ႇၶဝ်ႈတႅၵ်ႇ ၼႂ်းသူၼ်ၶဝ် ၸဝ်ႉၸဝ်ႉၸဵဝ်းၸဵဝ်းသေ မႃးသွႆႉ ႁဵတ်းၶိူဝ်း ပုၼ်ႈတႃႇၵႂႃႇၶၢႆ ၼႂ်းၵၢတ်ႇယူႇ။ ၽွင်းမိူဝ်ႈမၼ်းသွႆႉၸမ်ယဝ်ႉၼၼ်ႉ သမ်ႉလိူၵ်ႈလိူၵ်ႈ ဢဝ်ၶဵမ် ၸူၵ်ႉမိုဝ်းမၼ်း ဢွၵ်ႇလိူတ်ႈယူႇယဝ်ႉ။ မၼ်းၼၢင်းၸုပ်ႇပႅတ်ႈလိူတ်ႈ တီႈမိုဝ်းမၼ်းသေ မိပ်ႇဝႆႉၵမ်းၼိုင်ႈ ပေႃးလိူတ်ႈမၼ်းထၢတ်ႇ ၸင်ႇၵွႆႈပွႆႇယဝ်ႉ။
ၶၢဝ်းၵၢတ်ႇတိုၵ်ႉၵိုၼ်း ပွတ်းၼႂ်ၼၼ်ႉ မၼ်းၼၢင်းယိပ်းဢဝ်သွႆႉမွၵ်ႇမၼ်းသေ ဢၢၼ်းတေၵႂႃႇၶၢႆၼႂ်းၵၢတ်ႇ။ ၽိူဝ်ႇမၼ်းဢၢင်ႈၶၢမ်ႈတၢင်းလူင်သေ ၵႂႃႇၸူးၵၢတ်ႇၼၼ်ႉ လႅင်လမ်းၼိုင်ႈၽႃႇမင် ပၼ်မၼ်းသေ မၼ်းၼၢင်းပိၼ်ႈလူမ်ႉၵႂႃႇ ႁူဝ်ၶဝ်ႇႁူဝ်ၶႅၼ်မၼ်းၼၢင်း သမ်ႉပေႃးလွၵ်ႈ။ မွၵ်ႇမၼ်းၼၢင်းၼၼ်ႉၵေႃႈ ဝူင်ၶဝ်ႈၵႂႃႇ ၶမ်ဝႆႉၼႂ်းၵႄႈ မၢၵ်ႇလႅင်သေ လူႉလႅဝ်ပႅတ်ႈသဵင်ႈယဝ်ႉ။
ၸဝ်ႈလႅင် ပေႃႈႁိူၼ်းၶၢဝ်ႉၵေႃႉၼိုင်ႈ ၸင်ႇမႃးဢဝ်မၼ်းလုၵ်ႉသေ
“ လၢၼ်ယိင်းၶၢမ်ႈတၢင်း ဢမ်ႇတူၺ်းတၢင်းလႄႇမေႃႉ ၸဵပ်းၼမ်ဝႆႉႁႃႉ? ”
ၶႅတ်ႉလႃးယိပ်းငွၵ်းသွၵ်ႇမၼ်းသေ ၼႃႈမီႇဝႆႉယူႇ။ မၼ်းၼၢင်း လွမ်တူၺ်းမွၵ်ႇမၼ်းသေ
“ႁူဝ်ႇ...မွၵ်ႇယိင်းတႃႇၶၢႆၼၼ်ႉ လူႉလႅဝ်သဵင်ႈယဝ်ႉ ”
မၼ်းၼၢင်းၵႂႃႇၸၼ်ဢဝ်သွႆႉမွၵ်ႇမၼ်း ၼႂ်းၵႄႈမၢၵ်ႇလႅင်ၼၼ်ႉယူႇ။ ၸဝ်ႈလႅင်ၼၼ်ႉ ဢီးလူမၼ်းၼၢင်းၵႂႃႇသေ
“ လၢၼ်ယိင်း...မွၵ်ႇၼၼ်ႉ ယႃႇပေသေလၢႆယူႇယဝ်ႉ လုင်းတေတႅၼ်းပၼ်လႆ မႅၼ်ႈၵႃႈႁိူဝ် မွၵ်ႇလၢၼ်ယိင်းႁဝ်း ”
ၸွမ်းၼင်ႇၶႅတ်ႉလႃးလၢတ်ႈၼၼ်ႉ ၸဝ်ႈလႅင်ၵေႃႈ သၢႆႈတႅၼ်းပၼ်သေ ဢမ်ႇၵႃး ၵွႆပၼ်ပႃး ငိုၼ်းတႃႇသိုဝ်ႉယႃသႂ်ႇၸဵပ်းမၼ်းၼၢင်းၵွၼ်ႇယဝ်ႉ။
“ ႁိူဝ်ႈ...ၼႆႉၵႃႈမွၵ်ႇမႂ်း...ၼႆႉသမ်ႉ ႁဵတ်းၵႃႈယႃႈယႃမႂ်းၼႃႈ ”
ၶႅတ်ႉလႃးၵေႃႈ ႁပ်ႉဢဝ်ငိုၼ်းၼၼ်ႉသေ လွမ်တူၺ်းၸွမ်းႁိမ်းႁွမ်း ပိူၼ်ႈဢွၼ်ၵၼ် တူၺ်းမၼ်း တႃပေးလမ်ၵႂႃႇသဵင်ႈမၼ်းၼၢင်းလီဢၢႆလႄႈ ၸင်ႇၼႅတ်ႈၶွၵ်းယွၵ်း ၶွၵ်းယွၵ်းပႆၽၢတ်ႇ ၵူၼ်းၼမ်မႃးမိူဝ်းယဝ်ႉ။ ၽႅဝ်မႃးတီႈႁိူၼ်း မႃးၶႆႈၼႄမႄႈၵဵပ်းၶဝ် မႄႈၵဵပ်းၶဝ်ၵွႆပွင်ႉမၼ်ႈၵွၼ်ႇ
“ မႂ်းပေႃးဢမ်ႇမေႃတူၺ်းသၢႆႉတူၺ်းၶႂႃၼႃႇဢိူဝ်ႈ...ပဵၼ်တၢၼ်ႇၼႆႉ ယင်းဢေႇၵွၼ်ႇ ဢိူဝ်ႈ ၵႂႃႇထုပ်ႉဢဝ်မႂ်ယႃႈမိူင်းႁၢမ်းၵၢၼ်ႈၵမ်ႇၼၼ်ႉ ဢုမ်ႇတီႈမၼ်းလိူတ်ႈၼၼ်ႉသေလႄႈ ၵူဝ်မၼ်း ယဵၼ်းဢိူဝ်ႈ ”
ၶႅတ်ႉလႃႈၵေႃႈ ၵႂႃႇႁဵတ်းၸွမ်းၼင်ႇ မႄႈၵဵပ်းၶဝ် သင်ႇမၼ်ႈၼၼ်ႉယဝ်ႉ။ ဝၼ်းၼၼ်ႉ တင်းဝၼ်း တႃမၼ်းၼၢင်း ၽၢႆႇတႂ်ႈၵေႃႈၵမ်းၵမ်းတူင်ႉ ၸႂ်မၼ်းၵေႃႈ တေႃႈဢမ်ႇသိူဝ်း။
ထိုင်မႃးၵၢင်ၶမ်ႈ ၽွင်းပိူၼ်ႈၼွၼ်းၼၼ်ႉ ဢၢဝ်ထုၼ်းၶဝ် ၸင်ႇၽႅဝ်ႁိူၼ်းမႃးသေ မႃးႁွင်ႉယူႇၵၢဝ်ႉၵၢဝ်ႉ။
“ၶႅတ်ႉလႃး မႂ်းဢမ်ႇမေႃလုၵ်ႉၵႂႃႇၽုၺ်ႇၽၵ်းတူပၼ် ဢၢဝ်သူႁႃႉ တၢင်းဢၢႆႈၼႆႉၵေႃႈ မႃးလိုၵ်းယူႇတႃႇသေႇ”
ၶႅတ်ႉလႃး ၸိုၼ်ႇလုၵ်ႉသေ ၵႂႃႇၽုၺ်ႇၽၵ်းတူပၼ် ဢၢဝ်ထုၼ်းၶဝ်ယူႇ။ ၼႂ်းမိုဝ်းမၼ်းၵေႃႈ ယိပ်းတိဝ်ႈတၢင်းၵိၼ်တၢင်းယႅမ်ႉမႃးသေ
“ မိူဝ်ႈၼႆႉ ႁဝ်းတေႃႇၽၢႆႉမျၢတ်ႈမႃးဢိူဝ်ႈၼႆႉ သႆႉၵျေႃႇၼႃႇ ပီႈၼၢင်းႁဝ်းၶဝ် ၼွၼ်းယဝ်ႉႁႃႉ ၶႃသိုဝ်ႉၶဝ်ႈသွႆးၶူဝ်ႈ မႃးဢိူဝ်ႈၼႆႉ မႃးၵိၼ်လႄႈ ”
“ ၵိၼ်လႃႈ...ၵိၼ်လႃႈ ႁဝ်းၵိၼ်ၶဝ်ႈၶမ်ႈယဝ်ႉယဝ်ႈ၊ ဝႆႉဝႆႉတႃႇၼႂ်ၽုၵ်ႈလႄႈ ”
“ ႁိူဝ်ႈၶႅတ်ႉလႃး ဢဝ်ၵႂႃႇဝႆႉၼႂ်းသွင်ႇၽႆးသေလႄႈ ”
ၶႅတ်ႉလႃး ဢဝ်ၵႂႃႇဝႆႉၼႂ်းသွင်ႈၽႆးသေ ၽွင်းမၼ်းၸမ်ဢွၵ်ႇသွင်ႇၽႆးမႃးၼၼ်ႉ ဢၢဝ်ထုၼ်းၶဝ် မႃးၸမ်မၼ်းသေ လၢတ်ႈလွႆးလွႆး
“ ႁိူဝ်ႈ...ၼႆႉပဵၼ်ၼမ်ႉဝၢၼ်တႃႇမႂ်းဢိူဝ်ႈ ၵိၼ်လႄႈ ၵိၼ်လႄႈ ”
“ ၶႅတ်ႉလႃး ဢမ်ႇၶႂ်ႈၵိၼ် ”
“ ၵိၼ်လႄႈ ပဵၼ်ၼမ်ႉၵူၺ်းၼင် ”
ၶႅတ်ႉလႃးၵေႃႈ ႁပ်ႉဢဝ်သေ ၸုပ်ႇၵၼ်ၼမ်ႉဝၢၼ် ဢၢဝ်ထုၼ်းၶဝ် ပၼ်မၼ်းၼၼ်ႉယူႉ။ ဢၢဝ်ထုၼ်းၶဝ်ၵႂႃႇဢွၵ်ႇၼွၵ်ႈသေ ၶိုၼ်ႈၶဝ်ႈမႃး ႁိူဝ်းၵိၼ်ၼမ်ႉၼဵင်ႈၶူမ်ဝၢၼ်ႇၼိုင်ႈယဝ်ႉဝၢၼ်ႇ ၼိုင်ႈယူႇ။ မႄႈၵဵပ်းထၢမ်ဝႃႈ
“ဢၢႆႈထုၼ်း မႂ်းပႆႇၼွၼ်ႈႁႃႉၼႆႉ? ”
“ တေၼွၼ်းၼင်ႇၵဝ်ႇယဝ်ႉ တိုၵ်ႉၵိၼ်ၼမ်ႉၼဵင်ႈၶူမ်ဢိူဝ်ႈ ”
ဢၢႆႈထုၼ်း ၵိၼ်ၼမ်ႉၼဵင်ႈၶူမ်ယဝ်ႉသေ သွတ်ႉသႅတ်ႉမႃးၼွၼ်းတီႈၼွၼ်းမၼ်း ႁိမ်းၸွၵ်ႉၵၢင်ႁိူၼ်းၼၼ်ႉယဝ်ႉ၊ ၼွၼ်းသေတႃႉၵေႃႈ မၼ်ႈဢမ်ႇလပ်း သဵင်ပီႈၶူၺ်ပီႈၼၢင်းၶဝ် ၼွၼ်းလပ်းယူႇၽေႃးၽေႃးၵေႃႈ မၼ်းလႆႈငိၼ်းယူႇ။ ၶၢဝ်းပိူၼ်ႈၼွၼ်းယဵၼ် ၽႂ်ဢမ်ႇဢၢပ်ႈတိုၼ်ႇၼၼ်ႉ ဢၢႆႈထုၼ်း လွမ်လႅမ်မူၼ်ႉဢွၵ်ႇၽႃႈမၼ်ႈသေ ပႆၵႂႃႇၸူး တီႈလုၵ်းၼွၼ်း ၶႅတ်ႉလႃး ဢၼ်မီးႁိမ်းသွင်ႇၽႆး ၼၼ်ႉယူႇ။ ၵႂႃႇဢီးတူၺ်း ၽၵ်းတူၶႅတ်ႉလႃးသမ်ႉဢမ်ႇၶတ်းသေႃး သမ်ႉၽုၺ်ႉဝႆႉလႄႈ ဢၢႆႈထုၼ်း ၶဝ်ႈၵႂႃႇလႆႈငၢႆႈငၢႆႈသေ ႁၼ်ၶႅတ်ႉလႃး ၼွၼ်းမူပ်ႇဝႆႉ ၼိူဝ်မွၼ်ႁူဝ် မၼ်းတဵတ်ႇတဵတ်ႇယဵၼ်ယဵၼ်ယူႇ။
ဢၢႆႈထုၼ်း ၵႂႃႇၸၼ်ဢဝ်ႁူဝ်မႃႇၶႅတ်ႉလႃးသေ ၼွၼ်းတၢၵ်ႇႁၢႆၵေႃႈ ၶႅတ်ႉလႃးဢမ်ႇတိုၼ်ႇ။ ၵွပ်ႈဝႃႈ ၼႂ်းၼမ်ႉဝၢၼ်ၼၼ်ႉ ဢၢႆႈထုၼ်ႈတိုၼ်းလၵ်ႉသႂ်ႇ ယႃႈၼွၼ်းလပ်းမႃးၼႆ လိူဝ်သေ ဢၢႆႈထုၼ်းၵေႃႉလဵဝ် ၽႂ်တေႁူႉ။ ၶမ်ႈၼၼ်ႉ ၽူၼ်ၵေႃႈ ထွၵ်ႇတူၵ်းယူႇတင်းၶိုၼ်း၊ ၶႅတ်ႉလႃးဢွၼ်ႇ တႄႉလႆႈပဵၼ် မွၵ်ႇၸမ်ႉတႂ်ႈၽႃႇတိၼ်ၽႃႇမိုဝ်း ဢၢႆႈထုၼ်းၵႂႃႇယဝ်ႉ။
ၵၢင်ၼႂ် ၼႃႈမိူင်းၸမ်လႅင်း ၶႅတ်ႉလႃးတိုၼ်ႇမႃး ပဵၼ်ဢၼ်ၸဵပ်းတူဝ်ၸဵပ်းၶိင်းၵႂႃႇ တင်းတူဝ်၊ မၼ်းလုပ်ႈၵမ်းတူၺ်း တူဝ်မၼ်ႈသိူဝ်ႈၶူဝ်းဢၼ်ၸပ်းတူဝ်မၼ်ႈၵေႃႈ ၽူတ်ႇယူတ်ႇၽၢတ်ႇ ယၢတ်ႇဝႆႉလႄႈ ၼမ်ႉတႃမၼ်းၼၢင်း ဢိူမ်ႈႁူၺ်ႇသေ လႆလူင်းၸွမ်းၵႅမ်ႈမၼ်းယူႇ။ မၼ်းၼၢင်း ဢဝ်ၼႃႈ ဢဝ်သူပ်းမၼ်း ငူပ်ႉမွၼ်ႁူဝ်သေ ႁႆႈယွၼ်ႉပိူဝ်ႈ မွၵ်ႇၶႅတ်ႉလႃး လႆႈၶၢမ်ႇပိူၼ်ႈယဵပ်ႇၼူတ်ႈၼၼ်ႉယဝ်ႈ၊
“ ၶႅတ်ႉလႃး မႂ်းပႆႇလုၵ်ႉႁႃႉၼႆႉ လုၵ်ႉသႂ်ႇၽိုၼ်းသႂ်ႇၽႆးလႄႈ ”
ငိၼ်းသဵင်မႄႈၵဵပ်းၶဝ် ႁွင်ႉပူၵ်းၼင်ႇၼၼ် ၶႅတ်ႉလႃး ၸင်ႇၸဵတ်ႉၼမ်ႉတႃမၼ်ႈသေ
“ မႄႈၵဵပ်းၶႃႈ ”
“ ဢီႈသင် ”
“ ယိင်းၸဵပ်းတူဝ် ၸဵပ်းၶိင်းၵႂႃႇမူတ်းဢေႃႈ...မိူဝ်ႈၶမ်ႈဝႃး... ”
ၶႅတ်ႉလႃး လၢတ်ႈၵႂၢမ်းပႆႇတၼ်းသုတ်း မႄႈၵဵပ်းၶဝ်ၵႅဝ်လၢတ်ႈ
“ ဢိူဝ်ႈ...ၵွပ်ႈမႂ်းငိူဝ်ႈငႃႉသေ ပၼ်လႅင်ၽႃႇမႂ်းၼၼ်ႉဢိူဝ်ႈၼၼ်ႉ မိူဝ်ႈၶမ်ႈဝႃးၽူၼ်မႃး လႄႈႁွႆးတၢမ်ႇမၼ်ႈၶိုၼ်းၵႂႃႈ ”
“ ဢမ်ႇ...ဢမ်ႇၸႂ်ႈၶႃႈ မႄႈၵဵပ်း ”
“ ပေႃးလႃႈ မႂ်းဢမ်ႇလူဝ်ႇလၢတ်ႈၼမ်သင်ယဝ်ႉ ၵဝ်ႁူႉဢၵေးမႂ်းယူႇ၊ ပေႃးမႂ်းပဵၼ်ပႅၵ်ႉၼိုင်ႈ မႂ်းမႄႇပျႃးၼိုင်ႈဢမ်ႇၸႂ်ႈႁႃႉ လုၵ်ႉလႄႈ...လုၵ်ႉၵႂႃႇသုၵ်ႈၼႃႈသီတႃမႂ်းၽႂ်းၽႂ်းလႄႈ ”
ၶႅတ်ႉလႃး ၵူဝ်မႄႈၵဵပ်းၶဝ်လႄႈ ၸင်ႇၸဵတ်ႉၼမ်ႉတႃမၼ်းသေ ပႆယၢပ်ႇပႆယဵၼ်း ဢွၵ်ႇလုၵ်းမၼ်းမႃးလႄႈ။ ဢၢဝ်ထုၼ်းတႄႉ ၼွၼ်းၼႂ်းၽႃႈသေ ႁူဝ်ၸႂ်သၼ်ႇပႂ်ႉထွမ်ႇ ဢၼ်ၶႅတ်ႉလႃး တေလၢတ်ႈၼၼ်ႉယူႇ။ မႄႈၵဵပ်းၶဝ် လႆႈႁၼ်ၶႅတ်ႉလႃး ပႆဢွၵ်ႇမႃးၼင်ႇၼၼ်
“ဢိူဝ်ႈ...ၶွင်ႇၼင်ႇ လႅင်ၽႃႇၺႃးဢိတ်းၼိုင်ႈၵူၺ်း၊ ဢမ်ႇပႄႉပဵၼ်တၢၼ်ႇၼၼ်ႉယူဝ်ႉ...ၵႂႃႇၽႂ်းၽႂ်း ၵမ်းၵဝ်တေဢဝ်ၵၼ်းယူးႁမ်းသႂ်ႇယူႇ ”
ၶႅတ်ႉလႃး ဢမ်ႇၸၢင်ႈႁဵတ်ႈႁိူဝ်လႄႈ ၵႂႃႇႁႆႈၼႂ်းထၢင်ယူႇၵူၺ်းမၼ်ႈယဝ်ႉ၊ လွင်ႈပၢၼ်သၢဝ်ဢွၼ်ႇမၼ်း လႆႈလုသုမ်းၵႂႃႇၼၼ်ႉ လွင်ႈတေၵႂႃႇမွၵ်ႇလၢတ်ႈပိူၼ်ႈၼၼ်ႉၵေႃႈ သမ်ႉပဵၼ်လီဢၢႆဝႆႉ ၵွပ်ႈၼႆ ၶႅတ်ႉလႃးတေလႆႈသိုပ်ႇႁဵတ်းႁိုဝ် ၵႄႈလိတ်ႈၵႂႃႇၼႆမၼ်းဝူၼ်ႉၵႂင်ယူႇ။
ဝၼ်းၼၼ်ႉ မၼ်းႁဵတ်းၵၢၼ်ၵေႃႈ မၼ်းဢမ်ႇပႃးၸႂ်၊ ၶဝ်ႈၵေႃႈ မၼ်းၼၢင်းဢမ်ႇၵိၼ်။ ဢၼ်လႆႈပဵၼ်ပူၼ်ႉမႃးၼႆႉ ပဵၼ်ဢၢဝ်ထုၼ်းၶဝ်ၼႆ ၶႅတ်ႉလႃး တႅပ်းတတ်းႁူထိုင် ၵွပ်ႈမၼ်း ၵိၼ်ၼမ်ႉဝၢၼ် ဢၼ်ဢၢဝ်ထုၼ်း မႃးပၼ်မၼ်းၼၼ်ႉသေ မၼ်းၼၢင်းတၼ်းႁူႉဝႃႈ ႁူဝ်မၼ်းမဝ်းၼႃႇၼႆသေ တေႃႉတႄႉၽႅဝ်လႆႈၼိူဝ်ၵူႇမၼ်းၵူၺ်း။
မၼ်းၼၢင်းဝူၼ်ႉၵႂႃႇဝူၼ်ႉၶိုၼ်း မၢင်ၵမ်းၵေႃႈ မၼ်းၸႂ်လဵၵ်ႉ မၢင်ၵမ်းၵေႃႈ မၼ်းၸႂ်လမ်၊ မၢင်ၵမ်းၵေႃႈ မၼ်းၸႂ်ႁၢႆႉ၊ မၢင်ၵမ်းၵေႃႈၶႂ်ႈတၢႆ ၊ မၢင်ၵမ်းၵေႃႈလီဢၢႆ။ မၢင်ၵမ်းၵေႃႈ သေလၢႆၽဝ မၼ်းယူႇ။ မႄႈၵဵပ်းၵေႃႈ ဢမ်ႇတွၼ်ႉပၼ်ၼႃႈလီမၼ်းသေပွၵ်ႈ။ ယၢမ်ႈလဵဝ် ၼွင်ႉၸၢႆးမၼ်းသမ်ႉမႃး လူလၢႆပႄႉၵိၼ်မၼ်းၼၢင်းၼင်ႇၼႆ ဢမ်ႇတွၼ်ႉၸဵပ်းၸႂ်ၵေႃႈ ၶႅတ်ႉလႃးမေႃၸဵပ်းၸႂ်မႃးယဝ်ႈ။ လိူဝ်သေ ဝူၼ်ႉဝူၼ်ႉသေ ၼမ်ႉတႃလႆလူၼ်ႉ မၼ်းၼၢင်းဢမ်ႇၸၢင်ႈႁဵတ်ႈႁိူဝ်။ ၶမ်ႈၼၼ်ႉ မၼ်းၼၢင်းၶဝ်ႈၽႃႈသေ ဢၢင်ႈၼွၼ်းၸဵမ်ၸဝ်ႉၼႆယူႇ။ ၽွင်းမိူဝ်ႈၽႂ်ပႆႇၼွၼ်းၼၼ်ႉ ဢၢဝ်ထုၼ်းၽႅဝ်မႃးႁိူၼ်းၸဝ်ႉသေၵူႈၶမ်ႈ “ပီၼၢင်း...မိူဝ်ႈၼႆႉ ဢမ်ႇပေႃးမျၢတ်ႈၼမ်သေတႃႉပွၵ်ႈမႃးၸဝ်ႉၸဝ်ႉယဝ်ႉၼႆႉ၊ ႁိူဝ်ႈ ...ၶႃႈသိုဝ်ႉၶဝ်ႈမုၼ်းလႄႈ ၼမ်ႉၼဵင်ႈဝၢၼ်မႃးဢိူဝ်ႈ ”
ပီၼၢင်းၶဝ်ၵေႃႈ ႁပ်ႉဢဝ်သေ ဢၢဝ်ထုၼ်းၸင်ႇဢဝ်ၼမ်ႉၼဵင်ႈဝၢၼ်ထူင်ၼိုင်ႈ ယိုၼ်ႈပၼ်ၶႅတ်ႉလႃးယဝ်ႉ။
“ ႁိူဝ်ႈ...ၼႆႉတႃႇၶႅတ်ႉလႃးဢိူဝ်ႈ ”
ၶႅတ်ႉလႃး ဝူၼ်ႉႁဵတ်းႁိူဝ်ၵေႃႈ ဢၢဝ်ထုၼ်း တေသႂ်ႇယႃႈၼွၼ်းလပ်းပၼ်မၼ်းထႅင်ႈၼႆ မၼ်းလၢမ်းႁူယူႇ၊ မၼ်းတိုၵ်ႉဝူၼ်ႉဝႃႈ တေလီဢဝ်ဢမ်ႇလီဢဝ်ၼႆယူႇ။ မႄႈၵဵပ်းၶဝ်ၸင်ႇဝႃႈ
“ ၸိုင်မႂ်းဢမ်ႇၵႂႃႇဢဝ်လႃႇ ”
ၶႅတ်ႉလႃးၵေႃႈ ၵူဝ်မႄႈၵဵပ်းၶဝ်ထႃႉမၼ်းလႄႈ ၸင်ႇၵႂႃႇဢဝ်ယဝ်ႉ။
“ ႁိူဝ်ႈ...ၶဝ်ႈမုၼ်း ဢဝ်ၵႂႃႇၵိၼ် ၼႂ်းသွင်ႇၽႆးၵူၺ်းမႂ်းလႄႈ ”
ၶႅတ်ႉလႃးၵေႃႈ ႁပ်ႉဢဝ်သေ ၶဝ်ႈၵႂႃႇၼႂ်းသွင်ႇၽႆးယဝ်ႉ။ မၼ်ႈၼၢင်းတွင်ႉမႆႈယူႇသေတႃႉ ၼမ်ႉၼဵင်ႈလႄႈ ၶဝ်ႈမုၼ်းၼၼ်ႉ မၼ်းၼၢင်းဢဝ် ဝႆႉပႅတ်ႈၼႂ်းသွင်ႇၽႆးၼၼ်ႉယူႇ။
မၼ်းၼၢင်း ၶဝ်ႈမိူဝ်းၼႂ်းလုၵ်းၼွၼ်းမၼ်း ႁပ်းၽၵ်းတူလီလီသေၼွၼ်းယူႇ။ မၼ်းၼၢင်းၼွၼ်းတၢၼ်ႇႁိူဝ်ၵေႃႈ မၼ်းၼၢင်းဢမ်ႇၵိုင်ႉၵၢင်ႉလပ်းလႆႈ၊ ၽိုၼ်ႉၵႂႃႇၽိုၼ်ႉၶိုၼ်ႈသေ မၼ်းၼၢင်း လပ်းၵႂႃႇမိူဝ်ႈလႂ် မၼ်းၼၢင်းဢမ်ႇတၼ်းႁူႉ။
ဢၢႆႈထုၼ်းၵေႃႉၼိုင်ႈတႄႉ ႁဵတ်ႈပႅတ်ႉၼွၼ်းၸဝ်ႉၸဝ်ႉယူႇ။ ထိုင်ၶၢဝ်းတဵင်ႈၶိုၼ်း မၼ်းၸင်ႇလုၵ်ႉသေ ၵႂႃႇၸူးတီႈၶႅတ်ႉလႃးထႅင်ႈယူႇ။ ပႃၸွၵ်းဢဝ်မႅဝ်းယၢမ်ႈတႄႉဢမ်ႇၸႂ်ႈသေတႃႉ မႅဝ်းယၢမ်ႈၵိၼ်ပႃၸွၵ်းၼႆ ဢၢႆႈထုၼ်းၵႂႃႇဢီးတူၺ်း ၽၵ်းတူလုၵ်းၶႅတ်ႉလႃး ႁပ်းဝႆႉဢမ်ႇၸၢင်ႈၽုၺ်ႇ ႁိူၼ်းၶဝ် ပဵၼ်ႁိူၼ်းၽႃသၢၼ်လၢႆးၵူၺ်းလႄႈ ၽႃဢၼ်တွပ်ႉဝႆႉၽၵ်းတူ ၶႅတ်ႉလႃးၼၼ်ႉဢမ်ႇပေႃးလီယဝ်ႉ၊ ၵွပ်ႈၼႆ ဢၢႆႈထုၼ်းၸင်ႇငၢင်ႉၽႃသေ ဢဝ်မိုဝ်းမၼ်း ၼၢဝ်ႉၽုၺ်ႇသေႈတၢင်းၼႂ်း ဢၼ်ၶႅတ်ႉလႃး ၶတ်းဝႆႉၼၼ်ႉ လႆႈလီလီငၢမ်းငၢမ်းယဝ်ႉ။
မၼ်းထၢင်ႇ ၶႅတ်ႉလႃးၺႃးယႃႈၼွၼ်းလပ်း ၸိူင်ႉၼင်ႇၶမ်ႈဝႃးၼၼ်ႉၼႆလႄႈ မၼ်ႈၸင်ႇၵၢၼ်းၶိုၼ်ႈၵႂႃႇ ၼိူဝ်ၵူႇၶႅတ်ႉလႃး၊ ၶႅတ်ႉလႃးၼွၼ်းတၢၵ်ႇႁၢႆဝႆႉလႄႈ မၼ်ႈၵူမ်ႈၼူမ်ၵႅမ်ႈ ၶႅတ်ႉလႃးၵမ်းၼိုင်ႈလွႆးလွႆး။
ၶႅတ်ႉလႃး တိုၼ်ႇမႃး ၵွပ်ႈပိူဝ်ႈ ဢၼ်ၼၵ်းၼၵ်းတဵင်သႂ်ႇတူဝ်မၼ်းလႄႈ မၼ်းၼၢင်းတူၵ်းၸႂ်ၵႂႃႇသေ တၼ်းဝႃႈ “ ဢႂ်...”ၼႆဢွၵ်ႇသဵင်ဢိတ်းၼိုင်ႈၵူၺ်း ဢၢႆႈထုၼ်းဢဝ်မိုဝ်း တူမ်းသူပ်းမၼ်ႈဝႆႉ
“ယႃႇပေႁွင်ႉ... ”
ႁူဝ်ၸႂ်ၶႅတ်ႉလႃးတွတ်ႇပိုၵ်ႉပိုၵ်ႉသေ မၼ်းၼၢင်း သမ်ႉပေႃးၵႂင်ပေႃးသၼ်ႇၵႂႃႇ တင်းတူဝ်ယူႇယဝ်ႉ၊ မၼ်းၼၢင်း ဢဝ်မိုဝ်းမၼ်း ဢီးပႅတ်ႈဢၢႆႈထုၼ်းၵေႃႈ ဢမ်ႇပႄႉလႆႈ၊ မၼ်ႈၼၢင်းတဵၼ်ႈ ဢၢႆႈထုၼ်းတဵၵ်း။ ႁႅင်းၼၢင်းယိင်း ဢမ်ႇတဝ်ႉလႆႈ ႁႅင်းၵူၼ်းၸၢႆး ၶႅတ်ႉလႃးၼႅတ်ႈၼၢဝ်ႉပႅတ်ႈ မိုဝ်းဢၼ် တူမ်းသူပ်းမၼ်းၼၼ်ႉသေ
“ ဢၢဝ်ထုၼ်း...ယႃႇပေႁဵတ်း...တွင်းပၢၼ်ႇဢေႃႈ ”
ဢၢႆႈထုၼ်းမိပ်ႇၶေႃးၶႅတ်ႉလႃးသေ
“ ယႃႇပေမေႃးၼႆ ၵဝ်ဝႃႈ၊ ၵမ်းၵဝ်တေငႅၼ်းၶေႃးမႂ်းတၢႆယူႇ ”
ၶႅတ်ႉလႃးတေႁွင်ႉၼႆၵေႃႈ သမ်ႉၵူဝ်လႆႈတၢင်ႈဢၢႆ ဢမ်ႇႁွင်ႉၼႆၵေႃႈ သမ်ႉတေလႆႈသုမ်ႈလၢႆထႅင်ႈလႄႈ မၼ်းၼၢင်းၸင်ႇဢမ်ႇတၵ်ႈသဵင်သေ ယူႇတဵတ်ႇယဵၼ်ဝႆႉ ၵမ်းၼိုင်ႈယူႇ။ ဢၢႆႈထုၼ်း ၵွတ်ႇၵွတ်ႇၼူမ်ၼူမ် မၼ်း၊ မၼ်းဢမ်ႇၸၢင်ႈႁဵတ်းႁိူဝ်ယဝ်ႉလႄႈ ၶႅတ်ႉလႃး ၸႂ်ပိူင်ႈၵႂႃႇယဝ်ႉႁိူဝ်ဢမ်ႇႁူႉ၊ ၶႅတ်ႉလႃး ၶိုၼ်းၵွတ်ႇ ဢၢႆႈထုၼ်ႈသေ ၼူမ်ၵႅမ်ႈဢၢႆႈထုၼ်ႈၵမ်းၼိုင်ႈယဝ်ႉ။ ဢၢႆႈထုၼ်းၸူမ်းၸႂ်ၵႂႃႇတႄႉတႄႉသေ ႁႂ်ႈၶႅတ်ႉလႃး ၼူမ်ၵႅမ်ႈမၼ်ႈထႅင်ႈ ၽၢႆႇၼိုင်ႈယူႇ။ ၶႅတ်ႉလႃးၵေႃႈၼူမ်သေ ၸႂ်ႉႁႂ်ႈဢၢႆႈထုၼ်း လွၼ်ႈ သိူဝ်ႈႁွင်းၶႆးမၼ်းၼၼ်ႉယူႇ။
“ ဢၢဝ်ထုၼ်ႈ လွၼ်ႈသိူဝ်ႈလႄႈ ”
ဢၢႆႈထုၼ်းၵေႃႈ ၵိင်ႈတူဝ်မၼ်း လူင်းၼိူဝ်တူဝ်ၶႅတ်ႉလႃးသေ လွၼ်ႈသိူဝ်ႈႁွင်းၶႆး မၼ်းယူႇ။ ၽွင်းမိူဝ်ႈမၼ်း တိုၵ်ႉၸၼ်သိူဝ်ႈမၼ်း ပူတ်းဢွၵ်ႇတၢင်းႁူဝ် ၽွင်ႈသိူဝ်ႈတိုၵ်ႉသုမ်ႇၼႃႈမၼ်း ဝႆႉယူႇၼၼ်ႉ
“ ဢႃႉ... ”
ဢၼ်လႅမ်ၽၢႆၽၢႆဢၼ်ၼိုင်ႈ တမ်ၶဝ်ႈတီႈၼဵင်တွင်ႉဢၢႆႈထုၼ်းသေ ၵႅၼ်းတႄႉ ၵႅင်းဝႃႈလႄႈ ဢၢႆႈထုၼ်းႁွင်ႉလင်ၸွတ်ႇႁိူၼ်ႈ ၵႂႃႇသဵင်ႈယဝ်ႉႉ၊ ၼၼ်ႉပဵၼ် ၶႅတ်ႉလႃးၸၼ်ဢဝ်မိတ်ႈ တႂ်ႈမွၼ်ႁူဝ်မၼ်းသေ ယဝ်ႈသႂ်ႇတီႈၵၢင်လိၼ်ႉတွင်ႉဢၢႆႈထုၼ်း မိတ်ႈၶမ်ပုမ်ဢၢႆႈထုၼ်းသေ ဢၢႆႈထုၼ်း တဵၼ်ႈဝူင်တူၵ်းၵူႇၵႂႃႇ သမ်ႉတူၵ်းဢူပ်ႇပူပ်ႇ တဵင်သႂ်ႇမိတ်ႈလႄႈ မိတ်ႈၼၼ်ႉတမ်ပၼ်မၼ်ႈပွင်ႇၽႅဝ်ၵွင်း လင်မၼ်းယဝ်ႉ။
“ ဢႃႉ...”
ပေႃႈၵဵပ်းမႄႈၵဵပ်းၶဝ် ငိၼ်းသဵင်ႁွင်ႉ သဵင်လိပ်းသဵင်ၶဵဝ်လႄႈ ၸင်ႇၼႅတ်ႈလုၵ်ႉဢွၵ်ႇ ၽႃႈမႃး လီႉၵီႉလၼ်းၵၼ်း
“ ၽႂ်ပဵၼ်သင်ၼႆ...ဢၢႆႈထုၼ်း လုၵ်ႉလူႈ ”
ၵႂႃႇပၢၵ်ႈတူၺ်း သုတ်းဢၢႆးထုၼ်း ဢမ်ႇႁၼ်ဢၢႆႈထုၼ်း ၸင်ႇငိၼ်းသဵင်ႁွင်ႉ ၶႅတ်ႉလႃးလႄႈ သဵင်ႁႆႈၶႅတ်ႉလႃး
“ မႄႈမွၼ်းႁႃႈ...မႄႈမွၼ်း ဢိုဝ်း...ဢိုဝ်း...သိုတ်ႉသိုတ်ႉ ”
ၶႃပူႇဢွၵ်ႇ ၶဝ်ႈမႃးၼႂ်းလုၵ်းၶႅတ်ႉလႃးသေ မႄႈၵဵပ်းၸင်ႇထၢမ်
“ ၶႅတ်ႉလႃး...ပဵၼ်သင်?”
ၶႅတ်ႉလႃးႁႆႈသေ ၸိၼႄဢၢႆႈထုၼ်း တီႈတႂ်ႈၼၼ်ႉယူႇ။ ဢူႈၵဵပ်းၶဝ် ဢဝ်ၽႆးသၢႆ ထွင်ႇတူၺ်း လႆႈႁၼ်ဢၢႆႈထုၼ်း ၼွၼ်းမူပ်ႇသႂ်ႇၼိူဝ်ဢိူင်ႇလိူတ်ႈယူႇ။ ဢူႈၵဵပ်းၶဝ် တူၵ်းၸႂ်ၵႂႃႇသေ
“ ပဵၼ်ဢၢႆႈထုၼ်း ဢမ်ႇၸႂ်ႈႁႃႉၼႆႉ?”
မႄႈၵဵပ်းၶဝ် ၼႅတ်ႈၵႂႃႇႁွပ်ႇၼွင်ႉၸၢႆးဢွၼ်ႇမၼ်းၽႂ်းၽႂ်းသေ
“ ဢၢႆႈထုၼ်း...ဢၢႆႈထုၼ်း မႂ်းပဵၼ်သင်?”
ဢၢႆႈထုၼ်း ဢမ်ႇၸၢင်ႈလၢတ်ႈၵႂၢမ်းလႆႈလီလီ ၸိၶႅတ်ႉလႃးသေ
“ မၼ်း...မၼ်း...”
ဢၢႆႈထုၼ်ႈ သၢႆၸႂ်ၶၢတ်ႇၵႂႃႇ ၼႂ်းမိုဝ်းပီႈၼၢင်းမၼ်းယဝ်ႉ။ မႄႈၵဵပ်းၶဝ်လွမ်တူၺ်း ၶႅတ်ႉလႃး တၢၼ်ႇတေၵိၼ်လိပ်းပႅတ်ႈသေ
“ ဢီႇယွၵ်း...မႂ်းတႅင်းၼွင်ႉၸၢႆးၵဝ်တၢႆ ဢမ်ႇၸႂ်ႈႁႃႉၼႆႉ ႁိုဝ်ႉ ၵဝ်ၵေႃႈတေဢဝ်မႂ်းတၢႆၵွၼ်ႇ ဢမ်ႇၵိုင်ႇတၢင်းၵဝ်ၵဵပ်းလဵင်ႉမႂ်း ”
မႄႈၵဵပ်းတၼ်းမႃးၽတ်ႉပၼ်ၵႅမ်ႈ ၶႅတ်ႉလႃးႁႅင်းႁႅင်းၵမ်းၼိုင်ႈ ဢူႈၵဵပ်ႈၶဝ် ၼႅတ်ႈၸၼ်မၼ်းဝႆႉလႄႈ
“မႂ်းဢဝ်ၼွင်ႉၸၢႆးၵဝ်တၢႆႁဵတ်းသင် ဢီႇယွၵ်း...ဢီႇယွၵ်း ”
ၶႅတ်ႉလႃးၵေႃႈ ၸႂ်လမ်ၼႃႇယဝ်ႉလႄႈ
“ ၼွင်ႉၸၢႆးယွၵ်းမႄႈၵဵပ်း မႃးၵၼ်ႉယိပ်းၼႃႇ ယိင်းၵေႃႈလီၸင်းမၼ်ႈသေ တွပ်ႇတႅၼ်းမၼ်းဢိူဝ်ႈ ”
ၵွပ်ႈသဵင်ႁွင်ႉႁႅင်းလူင်မႄႈၵဵပ်းလႄႈ ၵူၼ်ႈႁိမ်းႁွမ်း သမ်ႉပေႃးတိုၼ်ႇသေ ႁေႈႁူထွမ်ႇယူႇယဝ်ႉ။ မႄႈၵဵပ်းႁႆႈယူႇငုၺ်ငုၺ် တေမႃးႁႅမ်ၶႅတ်ႉလႃးၵေႃႈ ၽူဝ်မၼ်းသမ်ႉၸၼ်ဝႆႉလႄႈ မၼ်းၸႂ် လမ်တေႃးသဢွၵ်ႇယဝ်ႉ ဢွၵ်ႇထႅင်ႈယူႇ။
“ ဢေးမႃ...ဢေးယွၵ်း...ဢေးၵႅၵ်း ဢမ်ႇၵိုင်ႇတၢင်းၵဝ်ၵဵပ်းလဵင်ႉမႂ်း။ မႃးဢဝ်ၼွင်ႉၵဝ်တၢႆၼႆႉ ဢိုၺ်း...ဢိုၺ်း...ၼွင်ႉၸၢႆးႁႃႈ ”
ၵူၼ်းႁိမ်းႁိူၼ်းၶဝ် ၵမ်ႈၽွင်ႈၽႅဝ်မႃးလႄႈ ဢွၼ်ၵၼ်မႃးထၢမ် လွင်ႈတၢင်းမၼ်းၵူႈပိူင်ပိူင် ၸင်ႇၵႂႃႇႁွင်ႉ ႁၢၼ်ၶဝ်မႃးႁိူၼ်းမႃးတွင်ႈထၢမ်ၵူႈပိူင်ပိူင် ၶမ်ႈၼၼ်ႉ ၶဝ်ဢဝ်ၶႅတ်ႉလႃး ၵႂႃႇသႂ်ႇၶွၵ်ႈဝႆႉယဝ်ႉ။ ၶႅတ်ႉလႃး ၵူဝ်လႆႈတူၵ်းၶွၵ်ႈလႄႈ မၼ်းၼၢင်း ႁႆႈႁႆႈတွင်းပၢၼ်ႇတၢၼ်ႇလႂ်ၵေႃႈ ဢမ်ႇလႆႈ ၵူၼ်းလူင်ၵေႃႉၼိုင်ႈၸင်ႇဝႃႈ
“ လၢၼ်ယိင်း...ယႃႇပေၶီၸႂ် ၼႆႉပဵၼ်မၢႆမီႈဢုပတေႇဢိူဝ်ႈ ၽႂ်ၽိတ်းၽႂ်ထုၵ်ႇၼႆ ဝၢႆးၼႆႉတေႁူႉယူႇ။ ပေႃးလၢၼ်ယိင်းယူႇတီႈၼွၵ်ႈၼႆႉၼႆ ၸၢင်ႈမီးၽေးၶဵၼ်ဢိူဝ်ႈ ၸွမ်းႁၢၼ်ၶဝ်ၵႂႃႇၼၼ်ႉ လီသေပိူၼ်ႈယဝ်ႉ ”
ၶႅတ်ႉလႃး ဢမ်ႇၸၢင်ႈႁဵတ်းႁိူဝ်လႄႈ ႁႆႈသေ ၵႂႃႇၸွမ်းႁၢၼ်ၶဝ်ယူႇယဝ်ႉ။ ၶမ်ႈၼၼ်ႉ ၽႅဝ်ၵႂႃႇၼႂ်းၶွၵ်ႈ တေႃႇထိုင်မိူင်းပေႃးလႅင်း မၼ်းၼၢင်းဢမ်ႇၼွၼ်းလပ်းသေဢိတ်း၊ ၵွပ်ႈပိူဝ်ႈ ယုင်းၸိတ်းႁိူတ်ႈတိတ်းလႄႈ မၼ်းၼၢင်း ဢမ်ႇၸၢင်းႁဵတ်းႁိူဝ်ၼွၼ်း။ ယွၼ်ႉပဵၼ်ၼၢင်းယိင်းၵူၺ်းလႄႈ ၸႂ်လဵၵ်ႉၼႃႇသေ ၶမ်ႈၼၼ်ႉတႄႉ မၼ်းၼၢင်းပဵၼ် သထေးၼမ်ႉတႃယူႇယဝ်ႉ။ ပုၼ်ႈတႃႇမၼ်းၼၢင်း တႄႉ “ ဢမ်ႇမီးသင် လိူဝ်သေႁႆႈ ”
ထိုင်ၵၢင်ၼႂ် မိူင်းလႅင်းမႃးၵေႃႈ တေႃႈဢမ်ႇမီးၽႂ်မႃးသူင်ႇတၢင်းၵိၼ်တၢင်းယႅမ်ႉ ပၼ်ၶႅတ်ႉလႃး။ မိူဝ်ႈဝႃးၵေႃႈ မၼ်းဢမ်ႇၵိၼ်သင်လႄႈ တွင်ႉမႆႈသႆႈလိူတ်ႇယူႇၵူၺ်းမၼ်း။ ၶၢဝ်ႇငၢဝ်း မၼ်းၼၢင်းၵေႃႈ ၵဝ်ၵဝ်မႂ်းမႂ်း သမ်ႉၼႄၵၼ် ၵမ်ႈၽွင်ႈၵေႃႈဢီးလူ၊ ၵမ်ႈၽွင်ႈဢွၼ်ၵၼ်မႃးတူၺ်းမၼ်း တူၵ်းၶွၵ်ႈ မၼ်းၼၢင်းလီဢၢႆလႄႈ သမ်ႉပေႃးလႆႈၵူမ်ႈၼႃႈဝႆႉ ၸိူင်ႉၼင်ႇလိင်းလူမ်းသိူင်ႇၼႃႈၼၼ်ႉယဝ်ႉ။ မေးၶုၼ်ႁၢၼ်ၵေႃႉၼိုင်ႈ ၸႂ်ႉႁႂ်ႈႁၢၼ်ပႂ်ႉၶွၵ်ႈ ဢဝ်ၼမ်ႉၼဵင်ႈဝၢၼ်လႄႈ ၶဝ်ႈမုၼ်းၵူပ်ႉ (ဢီႇၵျႃႇ ၵူၺ်ႉ)သွင်ဢၼ် မႃးပၼ်ၼမ်းလႄႈ မၼ်းၼၢင်းတွင်ႉမႆႈၼႃႇ ၵိၼ်တၼ်းသဵင်ႈၵႂႃႇမိူဝ်ႈလႂ်ယင်းဢမ်ႇ တၼ်းႁူႉ။ ပီႈၼွင်ႉဢၢႆႈထုၼ်းၶဝ်ၵမ်ႈၽွင်ႈ မႃးလႃႇမႃးဝႃႈတီႈမၼ်း ၵူႈသမ်ႇၵူႈပိူင် ႁူပေႃးၶႂ်ႈဢွၵ်ႇၶူၼ်။ ၵူၺ်းၵႃႈ ၶႅတ်ႉလႃးတႅပ်းတတ်းၸႂ်မၼ်းဝႃႈ ဢၼ်မၼ်းႁဵတ်းၼႆႉ မၼ်းၼၢင်းဢမ်ႇလူၼ်ႉလိူဝ်ၼႆယူႇ။
ထိုင်မႃး ၵၢင်ဝၼ်း ႁၢၼ်ၶဝ်ဢဝ်တင်းပပ်ႉလိၵ်ႈပပ်ႉလၢႆးၵူႈပိူင်ပိူင် မႃးတွင်ႈထၢမ် မၼ်းၼၢင်းလႄႈ မၼ်းၼၢင်းၵေႃႈ မွၵ်ႇလၢတ်ႈၵႂႃႇသိုဝ်ႈသိုဝ်ႈ ၸွမ်းၼင်ႇဢၼ်ပဵၼ် ပူၼ်ႉမႃးၼၼ်ႉယဝ်ႉ။ ၸွမ်းၼင်ႇ ဢၼ်ပဵၼ်ပၼ်ႁႃ ၽႅဝ်မႃးၼႂ်းႁၢၼ်ၶဝ်ၼၼ်ႉ ႁူႉၵႃႈတေလႆႈဢဝ် လွၵ်းလၢႆးၵၢၼ်လုမ်းသေ ၵႄႈလိတ်ႈယူႇယဝ်ႉ။ ပၼ်ႁႃဢၼ်ၶႅတ်ႉလႃးထူပ်းၺႃးၼႆႉ သမ်ႉတေၶိုၼ်းလႆႈတေႃႇသူႈ မႄႈၵဵပ်းမၼ်းလႄႈ မၼ်းၼၢင်း ဢမ်ႇၸၢင်ႈၵႂႃႇၸႂ်ယႂ်ၽႂ်၊ ပီႈၼွင်ႉၼႆၵေႃႈ မၼ်းဢမ်ႇမီး။
ၽွင်းမၼ်းယူႇၼႂ်းၶွၵ်ႈၼၼ်ႉ ၵမ်ႈၽွင်ႈဢီးလူမၼ်းသေ ဢဝ်တၢင်းၵိၼ်တၢင်းယႅမ်ႉမႃးပၼ်၊ ၵမ်ႈၽွင်ႈတႄႉ ၵွပ်ႈသင်သေၶႂ်ႈႁၼ်မၼ်းၵေႃႈဢမ်ႇႁူႉ ဢွၼ်ၵၼ်မႃးတူၺ်း...တၢင်းၵိၼ် တင်းယႅမ်ႉ ဢၼ်ပိူၼ်ႈမႃးပၼ်ၸိူဝ်းၼၼ်ႉ မၼ်းၼၢင်း ဢမ်ႇမီးၸႂ်ၶႂ်ႈၵိၼ်သင်၊ တွင်ႉမႆႈၼႃႇသေ ၵိၼ်ၵေႃႈ တေႃႈဢမ်ႇႁူႉတၢင်းဝၢၼ်။
မိူဝ်ႈဢၼ်မၼ်းၼၢင်း လႆႈႁၼ်ပီႈၼၢင်းမူၼ်း မႃးထူပ်ႈမၼ်းၼၼ်ႉ မၼ်းပဵၼ် ဢၼ်မီးၸႂ်ဢုၼ်ႇမႃးတႄႉတႄႉ၊ ၶႅတ်ႉလႃးၵေႃႈ ႁႆႈသေ ၶႆႈၼႄပီႈၼၢင်းမူၼ်း သဵင်ႈသဵင်ႈယူႇ။ ပီႈၼၢင်းမူၼ်းၵေႃႈ ဢီးလူၶႅတ်ႉလႃးၵႂႃႇတႄႉတႄႉသေ
“ ၶႅတ်ႉလႃး ယႃႇပေႁႆႈ...ၼင်ႇႁိူဝ်မႂ်းတေဢမ်ႇမီးတၢင်းၽိတ်းၼၼ်ႉ ၵဝ်တေၵႄႈလိတ်ႈပၼ်လႆ ”
ၶႅတ်ႉလႃး ၸူမ်းသိူဝ်းၸႂ်ယႂ်ႇသေ သမ်ႉပေႃးႁွမ်းမိုဝ်းဝႆႈ ၽူႈတၢင်ႇၼႃႈ ပီႈၼၢင်းမူၼ်း ၼၼ်ႉယူႇယဝ်ႉ။
တႃႇတေတတ်းသိၼ် (တႅပ်းတတ်းတြႃး )ပၼ်ၶႅတ်ႉလႃးၼၼ်ႉ ၶႅတ်ႉလႃးလႆႈ လုၵ်ႉၼႂ်းၶွၵ်ႈ ၵႂႃႇတီႈ လုမ်းတတ်းသိၼ်သီႇပွၵ်ႈ။ ၶႅတ်ႉလႃးတႄႉ ဢမ်ႇလၢတ်ႈသင်။ ၽူႈတၢင်ၼႃႈ သွင်ပႃႈသွင်ၽၢႆႇတႄႉ ထဵင်ၵၼ်ၽၢႆႇၼႃႈၽူႈတတ်းသိၼ် ပႅင်ႈၼင်ႇ ၶဝ်ၵမ်လႆႈငမ်ႈလႆႈၼၼ်ႉယူႇ။
ပီႈၼၢင်းမူၼ်းၵေႃႈ ယူႇၽၢႆႇၶႅတ်ႉလႃးသေ ၵႅတ်ႇၶႄပၼ်ၶႅတ်ႉလႃးတႄႉတႄႉဝႃႈဝႃႈ မၼ်ႈမၼ်ႈ ၵိုမ်းၵိုမ်းယူႇ။ ၽူႈတၢင်ၼႃႈ ၽၢႆႇဢၢႆႈထုၼ်းတႄႉထဵင်ဝႃႈ ဢၢႆႈထုၼ်းဢမ်ႇတၼ်းလႆႈပူၼ်ႉပႅၼ်၊ ၶႅတ်ႉလႃး တိုၼ်းတင်ႈၸႂ် ႁၢင်ႈလွၵ်းလၢႆးမၼ်ႈသေ ဢဝ်တၢႆ ဢၢႆႈထုၼ်းၼႆၵူႈသမ်ႇၵူႈပိူင်ယူႇ။
ၽူႈတၢင်ၼႃႈ ပီႈၼၢင်းမူၼ်းၵေႃႈ ၶိုၼ်းၵႄႈလိတ်ႈဝႃႈ လွင်ႈဢၢႆႈထုၼ်း မီးတၢင်းၽိတ်း၊ ဢဝ်ယႃႈၼွၼ်းလပ်း သႂ်ႇၼႂ်းၼမ်ႉဝၢၼ်သေ လဵင်ႉၶႅတ်ႉလႃး၊ လူလၢႆပူၼ်ႉပႅၼ်ၶႅတ်ႉလႃး ၶမ်ႈဢွၼ်တၢင်းၼၼ်ႉ တင်းၶိုၼ်းလႄႈသင်၊ ၶမ်ႈသွင်ၼႆႉၵေႃႈ သိုဝ်ႉၼမ်ႉၼဵင်ႈဝၢၼ်သေ သႂ်ႇမႃး ယႃႈၼွၼ်းလပ်းၼႆ မၼ်းၼၢင်းၵႂႃႇပၼ်တီႈႁူင်းယႃ ၵူတ်ႇတူၺ်း လွင်ႈဝႃႈ ပႃးယႃႈၼွၼ်းလပ်ႈတႄႉ ၼၼ်ႉလႄႈသင်၊ လွင်ႈဢၼ် ဢၢႆႈထုၼ်းယႃႉၽႃသေ ပူၼ်ႉၶဝ်ႈၼႂ်းလုၵ်းၼွၼ်း ၶႅတ်ႉလႃးၼၼ်ႉလႄႈသင်၊ ဢၼ်ဢၢႆႈထုၼ်း လႆႈတၢႆၼၼ်ႉ ၵွပ်ႈမၼ်းတဵၵ်းဢထမ်ႇမ ႁဵတ်းတီႈၶႅတ်ႉလႃးထႅင်ႈလႄႈ ၶႅတ်ႉလႃး ၶႄတူဝ်မၼ်းသေ ၸင်ႇဢဝ်မိတ်ႈပၵ်းတွင်ႉဢၢႆႈထုၼ်း၊ လွင်ႈပၵ်းၼၼ်ႉၵေႃႈ ဢမ်ႇယိူင်းဢၢၼ်း ႁႂ်ႈဢၢႆႈထုၼ်းတၢႆ မိတ်ႈဢၼ်ၶႅတ်ႉလႃး တႅင်းသႂ်ႇၼၼ်ႉ ပဵၼ်ႁႅင်းၼၢင်းယိင်းဢွၼ်ႇၵူၺ်းလႄႈ ဢမ်ႇထိုင်တီႈတၢႆလႆႈသေတႃႉ ၵွပ်ႈမၼ်းလူမ်ႉတဵင်မိတ်ႈလႄႈ မိတ်ႈၸင်ႇ တႅင်းပွင်ႇၽႅဝ်ၽၢႆႇလင်မၼ်း ၸိူဝ်းၼၼ်ႉလႄႈသင်၊ ပီႈၼၢင်းမူၼ်း တၢင်ႇလၢတ်ႈၵႂႃႇၸွတ်ႇၸွတ်ႇၸေးၸေးယူႇ။
ၽူႈတၢင်ၼႃႈ ၽၢႆႇဢၢႆႈထုၼ်းၶဝ် ၶိုၼ်းတၢင်ႇလၢတ်ႈဝႃႈ ဢၢႆႈထုၼ်း ဢမ်ႇတၼ်း ပူၼ်ႉပႅၼ်ထိုင်တီႈ ၼႆယူႇတိၵ်းလႄႈ ၵမ်းလိုၼ်းသုတ်း ပီႈၼၢင်းမူၼ်းၸင်ႇလၢတ်ႈဝႃႈ မၼ်ႈမၼ်ႈၵိုမ်းၵိုမ်း လွင်ႈဢၢႆႈထုၼ်းပူၼ်ႉပႅၼ်လႄႈ ယၢမ်းလဵဝ်ၵႂႃႇၵူတ်ႇတူၺ်း ၽၢႆႈၼွႆႉၶႅတ်ႉလႃးၼႆ လႆႈႁူႉဝႃႈ ၶႅတ်ႉလႃး ၸပ်းသၼ်ႇထေႇဝႆႉၼႆယူႇယဝ်ႉ။
ဝၼ်ႈတတ်းသိၼ်ၵမ်းလိုၼ်းၼၼ်ႉ ၽူႈတတ်းသိၼ်လူင် ၸင်ႇတတ်းသိၼ်ဝႃႈ ၶႅတ်ႉလႃး ဢမ်ႇမီးတင်းၽိတ်းၼႆသေ ပွႆႇပၼ်ႁႂ်ႈလွတ်ႈယူႇယဝ်ႉ။ ဢၢႆႈထုၼ်းတႄႉ တၢႆယဝ်ႉသေ တႃႉၽူႈတတ်းသိၼ် ယင်းတိုၵ်ႉ ပၼ်တၢမ်ႇထွင်ႇ ၸိုဝ်ႈသဵင်ၶႂၢၼ်ငဝ်းမၼ်း ဢၼ်လူလၢႆၼၢင်းယိင်း ဢႃႇယုပႆႇတဵမ်ၼၼ်ႉလူးၵွၼ်ႇ။
ၶႅတ်ႉလႃး ဢမ်ႇမီးတၢင်းၽိတ်း ပဵၼ်ၼူၵ်ႉလွတ်ႈၸိူၵ်ႈ ဢၼ်မတ်ႉတိတ်းယဝ်ႉလႄႈ မၼ်းၼၢင်းၸူမ်းသိူဝ်း ၼမ်ႉတႃပေႃးယွႆႉသေ မႃးၵွတ်ႇဝႆႉ ပီႈၼၢင်းမူၼ်းႁႅင်းႁႅင်း၊ ႁႆႈပေႃးဢမ်ႇၶႂ်ႈၸၢင်ႇတဵတ်ႇလႆႈယဝ်ႉ။ မႄႈၵဵပ်းၶဝ်တႄႉ ၵိုဝ်တႃယၵ်ႉတူၺ်းမၼ်ႈ လပ်းတႃဝၢႆႇၼႃႈတေႃႇမၼ်းသေ ဢွၵ်ႇၵႂႃႇယဝ်ႉ။
“ မႄႈမွၼ်း ”
ၶႅတ်ႉလႃး ၸွမ်းႁွင်ႉၵေႃႈ မၼ်းတေႃႈဢမ်ႇဝၢႆႇတူၺ်း ပီႈၼၢင်ႈမူၼ်းၸင်ႇဝႃႈ
“ ၶႅတ်ႉလႃး...တဵတ်ႇလႄႈ ယႃႇပေႁႆႈယဝ်ႉ၊ ႁဝ်းပေႃးလွတ်ႈတၢင်းၽိတ်းယဝ်ႉလူး၊ ၸွင်ႇၶႅတ်ႉလႃး တေမိူဝ်းယူႇၸွမ်းမႄႈၵဵပ်းႁိူဝ်?”
ၶႅတ်ႉလႃး ႁႆႈသေ ဝႆႁူဝ်ၼႄယူႇ။
“ ပေႃးၼႆ ၶႅတ်ႉလႃး တေၵႂႃႇယူႇတီႈလႂ်လႃႇ ?”
ၶႅတ်ႉလႃး ဢမ်ႇၸၢင်ႈလၢတ်ႈသင် ဝႆႁူဝ်သေ ႁႆႈယူႇသိုတ်ႉသိုတ်ႉ
“ ပေႃးၶႅတ်ႉလႃး ဢမ်ႇၸၢင်ႈၵႂႃႇယူႇလႂ်ၼႆၵေႃႈ မိူဝ်းယူႇၸွမ်းပီႈမူၼ်းၼေႃႈ?”
ၶႅတ်ႉလႃး ၽႅပ်ႉတႃ လွမ်တူၺ်ႈၼႃႈပီႈၼၢင်ႈမူၼ်ႈသေ ၼမ်ႉတႃဢွၼ်ႇမၼ်းသွင်ငႃး လႆႈလူင်းမႃး ၸွမ်းၵႅမ်ႈမၼ်းထႅင်ႈယဝ်ႉ။ ပီႈၼၢင်းမူၼ်း ဢဝ်ၽႃႈၸဵတ်ႉ ၸဵတ်ႉပၼ်သေ
“ ၵႂႃႇႁဝ်းမိူဝ်း ”
ၶႅတ်ႉလႃး ၶႃၽႅဝ်မိူဝ်းႁိူၼ်း ဢၼ်ပီႈၼၢင်းမူၼ်း ၶၢတ်ႈယူႇဝႆႉၼၼ်ႉသေ ၶႅတ်ႉလႃးၸင်ႇဝႃႈ
“ ယိင်းတေလႆႈႁဵတ်ႈႁိူဝ် တွပ်ႇၵုင်ႇၵျေးၸူး ပီႈၼၢင်းမူၼ်းၵေႃႈ ဢမ်ႇႁူႉၶႃႈယဝ်ႈ”
“ ဢမ်ႇလူဝ်ႇၵူၺ်း...ထုၵ်ႇလီၸွႆႈထႅမ်လႄႈ ပီႈမူၼ်းၸွႆႈထႅမ်ၵူၺ်း ”
“ ၸူမ်းပေႃးဢမ်ႇမီးတီႈဝႃႈယဝ်ႈ ပီႈၼၢင်ႈမူၼ်း ႁႂ်ႈၶႃႈလႆႈၵၼ်ႇတေႃး ပီႈၼၢင်:မူၼ်းသေၵမ်းၶႃး ”
ၶႅတ်ႉလႃး ႁွမ်းမိုဝ်းၶုပ်ႉဝႆႉ ပီႈမူၼ်းယူႇလႄႈ ပီႈမူၼ်းလုပ်ႈႁူဝ်လုပ်ႈၵွင်ႈလင်မၼ်းသေ
“ လႆႈယဝ်ႈ...ၶႅတ်ႉလႃး...တၢင်ႇပွၵ်ႈမႃး ယႃႇပေဝႃႈထႅင်ႈၼႃႈ ပေႃးပဵၼ်ဢမု တေၸၢင်ႈပီႈမူၼ်းၼႆၼၼ်ႉ ”
“ ဢေႃႈ...ဢမ်ႇႁတ်းဝႃႈ သေပွၵ်ႈၶႃႈယဝ်ႉ ”
ၶႃသွင်ၵေႃႉ လွမ်တူၺ်းၵၼ်တင်းႁိုင်သေ ၶႅတ်ႉလႃးၸင်ႇဝႃႈ
“ ပီႈၼၢင်းမူၼ်း ယိင်း ဢမ်ႇၶႂ်ႈယူႇတၢင်ႉယၢၼ်းၼႆႉယဝ်ႉ၊ ယိင်းလီဢၢႆပိူၼ်ႈၼႃႇ၊ တီႈလဵဝ်သမ်ႉဝႃႈ ယိင်းၸပ်းတွင်ႉဝႆႉၼႆ ယိင်းဢမ်ႇၶႂ်ႈလႆႈလုၵ်ႈဢၢႆႈမိူၵ်ႈၼၼ်ႉ ’
“ မၼ်ႈပဵၼ်မႃးယဝ်ႉ တေၸၢင်ႈႁဵတ်းႁိုဝ်လႃႇ ၶႅတ်ႉလႃး ”
“ ယႃႉပႅတ်ႈဢိူဝ်ႈ ”
“ ဢလူဝ်...ပိူၼ်ႈဢမ်ႇလီဝႃႈၼၼ်၊ ပေႃးယႃႉလုၵ်ႈၼႂ်းတွင်ႉၼႆ မီးတၢင်ႈၽိတ်းဢိူဝ်ႈ၊ ယႃႇပေယႃႉ လုၵ်ႈဢွၼ်ႇ ဢမ်ႇမီးတၢင်းၽိတ်းသင်လူင် ၶႅတ်ႉလႃး ”
“ ဢမ်ႇမီးတၢင်းၽိတ်းသေတႃႉ ပေႃးလုၵ်ႈဢွၼ်ႇၼႆႉ ယႂ်ႇမႃး သမ်ႉတေလႆႈၵႂႃႇႁွင်ႉ ၽႂ်ဝႃႈ ‘ ပေႃႈ’ ၼႆၶႃႈလႃႇ၊ မိူၼ်ၸိူင်ႉယိင်းၼႆႉ ပေႃႈၵေႃႈ ဢမ်ႇမီး မႄႈၵေႃႈ ဢမ်ႇမီးလႆႈၼႃႈလဵၵ်ႉၵႃႈ ႁိုဝ် ”
“ ၶႅတ်ႉလႃးဢိူၺ်ႉ...ၼၼ်ႉတႄႉ တေလႆႈဝႃႈ ၵၢမ်ႇၽႂ်ၵၢမ်ႇမၼ်းဢိူဝ်ႈ...ပီႈမူၼ်းၶႂ်ႈဝႃႈတႄႉယႃႇပေယႃႉ။ ထႅင်ႈသွင်ဝူင်ႈ ပီႈမူၼ်းၵေႃႈ တေၶၢႆႉၵႂႃႇၵူတ်ႉၶၢႆယဝ်ႉလူး၊ ၶႅတ်ႉလႃးၵေႃႈ ၵႂႃႇၸွမ်းသေ ႁဝ်းၵႂႃႇယူႇ တီႈၼၼ်ႈ ၽႂ်ၵေႃႈ ဢမ်ႇႁူႉၸၵ်းၶႅတ်ႉလႃး၊ ၶႅတ်ႉလႃး ၶတ်းၸႂ်ႁႂ်ႈယူႇလီၵိၼ်ဝၢၼ် ၵူၺ်းလႃႈ၊ လုၵ်ႈဢွၼ်ႇၼႆႉ ပေႃးၵိူတ်ႇမႃး သင်ဝႃႈ ၶႅတ်ႉလႃး ဢမ်ႇၶႂ်ႈလႆႈၼႆ ပီႈမူၼ်းတေၵဵပ်းလဵင်ႉလႆ ၼေႃႈ...ထွမ်ႇၵႂၢမ်းပီႈမူၼ်းၼႃႈ ”
ပွၵ်ႈၼႆႉတႄႉ ၶႅတ်ႉလႃး ၶီႁိုဝ်သိူဝ်းႁိုဝ် လေႃးလႄးၵၼ်ႁိုဝ်ၵေႃႈ ဢမ်ႇႁူႉယဝ်ႉ၊ ၼမ်ႉတႃဢွၼ်ႇမၼ်းၼၢင်း ဢိူမ်ႈတဵမ်ႁူၺ်ႇမႃးထႅင်းယူႇယဝ်ႉ။