ၶိုၼ်းထူပ်းႁၼ်ၵၼ်/တွၼ်ႈ 3 သၢဝ်သိၵ်ႉႁိၵ်ႉၶႅတ်ႉလႃး
ဝၢႆးသေ ဝူင်းလိူၼ်လႄႈ မိုၼ်ႇႁွမ် ၶၢႆႉၽၢတ်ႇတၢင်ႉယၢၼ်းယဝ်ႉ ၶႅတ်ႉလႃးတႄႉ လႆႈဢွၵ်ႇ ႁဵၼ်းသေ ထိင်းလုၵ်ႈမႄႈမွၼ်းၶဝ်ယဝ်ႉ။ ၸွမ်းၼင်ႇပၢၼ်ၽဝႃႉလုၵ်ႈဢွၼ်ႇ ၶႂ်ႈလဵၼ်ႈၸွမ်းပိူၼ်ႈသေတႃႉ ၶႅတ်ႉလႃး ဢမ်ႇလႆႈလဵၼ်ႈထၢင်ႇႁၢင်ႈ။ ၵႂႃႇလႂ်ၵေႃႈ လႆႈၸေးလုၵ်ႈၸၢႆးမႄႈမွၼ်းၶဝ်ၼၼ်ႉၵႂႃႇ။ ထိုင်ၶိင်ႇ ၵိၼ်ၶဝ်ႈၵေႃႈ သမ်ႉလႆႈၸဵဝ်းပွၵ်ႈမႃးႁိူၼ်း။ ၵိၼ်ယဝ်ႉယႅမ်ႉယဝ်ႉ လႆႈလၢင်ႉလၢင်ႉပတ်းပတ်းၽဵဝ်ႈၽဵဝ်ႈ၊ ၵၢၼ်မၼ်းသမ်ႉပေႃးမူၼ်းဝိၼ်ႈဝိၼ်ႈဝႆႉ။ တၢင်းၶႅတ်ႉလႃးဢွၼ်ႇလႄႈ ၵၢၼ်မၼ်းၼၼ်ႉ ဢမ်ႇငမ်ႇၵၼ်။
မၼ်းၼၢင်းယႂ်ႇမႃႈၵႃႈသုင်မႃး ပီၼိုင်ႈယဝ်ႉပီၼိုင်ႈ ၵၢၼ်မိုဝ်ႉၵၢၼ်တူမ်ႈႁူင် ၵၢၼ်သၵ်ႉၶူဝ်း လွႆးၶူဝ်းၸိူဝ်းၼၼ်ႉ ပဵၼ်ၶႅတ်ႉလႃးလႆႈႁဵတ်းမူတ်းမူတ်း။ ၵွပ်ႈပိူဝ်ႈ မၼ်းပဵၼ် လုၵ်ႈၵဵပ်းၼႆလႄႈ ၽႂ်ၵေႃႈ ဢမ်ႇပေႃးႁၵ်ႉမၼ်း။ မႄႈၵဵပ်းၶဝ်တႄႉ တိုၼ်းဢမ်ႇပၼ်ၼႃႈလီတေႃႇမၼ်းၼၢင်းသေပွၵ်ႈ။ ပွၵ်ႈၼိုင်ႈ ၶႅတ်ႉလႃး ၶႂ်ႈႁူႉၸၵ်းပေႃႈမၼ်ႈလႄႈ။
“ မႄႈမွၼ်း ပေႃႈၶႅတ်ႉလႃးၶဝ်ၵေႃႈ တၢႆယဝ်ႉၶႃႈႁႃႉ?”
“ ၵဝ်ဢမ်ႇတွၼ်ႉယၢမ်ႈႁၼ်ၼႃႈပေႃႈသူသေပွၵ်ႈ မိူဝ်ႈမႄႈသူ လုၵ်ႉမိူင်းယႆမႃးၽႅဝ် တၢင်ႉယၢၼ်းၼႆႉ မၼ်းပေႃးပႃးတွင်ႉ လႆႈမွၵ်ႈသွင်လိူၼ်ၼႆဝႃႇ ၵဝ်ထၢမ်မၼ်းယူႇ ပေႃႈလုၵ်ႈဢွၼ်ႇပဵၼ် ၽႂ်ၼႆၵေႃႈ မၼ်းဢမ်ႇလၢတ်ႈလူး၊ သင်မၼ်းလၢတ်ႈတႄႉၵေႃႈ ၵဝ်ၸၢင်ႈလၢတ်ႈၼႄမႂ်းဢိူဝ်ႈ မႄႈဢိင်ႇသူ ၵိူတ်ႇမႂ်းသေ လႆႈၸဵတ်းဝၼ်း မၼ်းတၢႆၵႂႃႇဢိူဝ်ႈ ”
“ မႄႈမွၼ်ႈ ၶႅပ်းႁၢင်ႈလႂ် သင်လႂ်ၵေႃႈ ဢမ်ႇမီးဝႆႉၶႃႈႁႃႉ? ”
“ ၵူၺ်းမီး ၶႅပ်ႈႁၢင်ႈမႄႈသူၵူၺ်းဢိူဝ်ႈ... သမ်ႉထႅင်ႈ မိူဝ်ႈမၼ်းၸမ်တၢႆၼၼ်ႉ မၼ်းပၼ်ဝႆႉ တႃႇမႂ်းဢႅပ်ႇၼင်ဢွၼ်ႇဢၼ်ၼိုင်ႈလႄႈ သၢႆၶေႃးငိုၼ်းဢွၼ်ႇ သဵၼ်ႈၼိုင်ႈၵူၺ်း၊ မၼ်ႈဝႃႈ ပေႃးမႂ်းယႂ်ႇမႃး မေႃႁူႉမႃး ၸင်ႇၵွႆႈပၼ်တိုဝ်းႁွႆႈၼႆဝႃႇ မိူဝ်ႈလဵဝ် မႂ်းၵေႃႈပဵၼ်သၢဝ်ဢွၼ်ႇယဝ်ႉလႄႈ ၵဝ်တေပၼ်မႂ်းလႆ”
မႄႈၵဵပ်းၶဝ် ၶဝ်ႈၵႂႃႇၼႂ်းလုၵ်းယဝ်ႉသေ ယိပ်းဢဝ် ဢႅပ်ႇၼင်ဢွၼ်ႇ မႃးပၼ်ၶႅတ်ႉလႃး၊ ၶႅတ်ႉလႃးၽုၺ်ႇတူၺ်း လႆႈႁၼ်သၢႆၶေႃးငိုၼ်းဢွၼ်ႇ သဵၼ်ႈၼိုင်ႈ မီးၶႅပ်းငိုၼ်းလၢဝ်ဢွၼ်ႇ လုၵ်ႈၼိုင်ႈ ႁွႆႈၸပ်းဝႆႉ။ သမ်ႉႁၼ် ၶႅပ်းႁၢင်ႈ မိူဝ်ႈမႄႈၶဝ် တိုၵ်ႉပဵၼ်သၢဝ်သေ ထႆႇဝႆႉ။
ၶႅတ်ႉလႃးလွမ်တူၺ်း ၶႅပ်းႁၢင်ႈမႄႈမၼ်းသေ မၼ်းၼၢင်းပဵၼ်ဢၼ်ၶေႃးၶူမ် ဢမ်ႇလူမ်ၸႂ် လႄႈၼမ်ႉတႃဢွၼ်ႇမၼ်းၼၢင်း ဢိူမ်ႈတဵမ်ႁူၺ်ႇသေ လႆတူၵ်းမႃးယူႇ။ မႄႈၵႅပ်းၶဝ်ၽၢတ်ႇမၼ်းၵႂႃႇ မိူဝ်ႈလႂ် မၼ်းဢမ်ႇတၼ်းႁူႉ။ မၼ်းလွမ်တူၺ်ႈ သၢႆၶေႃးငိုၼ်းဢွၼ်ႇၼၼ်ႉသေ ငမ်ဝႆႉၵႅၼ်ႇၵႅၼ်ႇယူႇ။ ၽွင်းမၼ်း ၶိုၼ်းလွမ်တူၺ်း ၶႅပ်းႁၢင်းမႄႈမၼ်းၶိုၼ်းယူႇၼၼ်ႉ ၵူၼ်းၵေႃႉၼိုင်ႈ ၸၵ်ႉတိုတ်ႉဢဝ် ၶႅပ်းႁၢင်ႈ ၼႂ်းမိုဝ်းမၼ်းၵႂႃႇ၊ မၼ်းၼၢင်းတူၵ်းၸႂ်လွမ်တူၺ်ႈသေ
“ ဢၢဝ်ထုၼ်း... ၼၼ်ႉပဵၼ်ၶႅပ်းႁၢင်ႈမႄႈၶႅတ်ႉလႃးဢေႃႈ...ဢဝ်မႃးလႄႈ ”
ဢၢႆႈထုၼ်းၼႆႉ ပဵၼ်ၼွင်ႉၸၢႆးမႄႈၵဵပ်း ၶႅတ်ႉလႃးၶဝ်သေ ဢမ်ႇမေႃႁဵတ်းၵၢၼ်သင်တႄႉတႄႉ၊ ၵႆႉလႄႇသၢင်လၢဝ်ႉ သၢင်လိဝ်ႉ မၢင်ပွၵ်ႈၵေႃႈ မဝ်းလဝ်ႈသေ မႃႈမိူဝ်းလိုၵ်း၊ မၢင်ပွၵ်ႈ ၵႂႃႇၼွၼ်းတီႈလႂ်ၵေႃႈ ဢမ်ႇႁူႉ၊ ပွၵ်ႈၼႆႉၵေႃႈ မဝ်းလဝ်ႈသေ မႃးၸၵ်ႉဢဝ်တူၺ်း ၶႅပ်းႁၢင်ႈၼႂ်းမိုဝ်းၶႅတ်ႉလႃးယူႇ။
“ ၵဝ်တူၺ်းၵူၺ်း... ၵဝ်ဢမ်ႇဢဝ်သႄႈ ပဵၼ်မႄႈသူၼႆႁႃႉ?”
“ ၸႂ်ႈဢေႃႈ ”
“ ႁိူဝ် မႄႈသူၼႆႉ မိူဝ်ႈမၼ်းပဵၼ်သၢဝ် ၶႂ်ႈႁၢင်ႈလီဝႆႉၼႃႇၼႆႉ ႁႄး ႁႄး...ပျႃတ်ႉ ”
လႆႈႁၼ် ဢၢဝ်ထုၼ်းၶဝ် ၸုပ်ႇၼူမ်ၶႅပ်းႁၢင်ႈမႄႈမၼ်းၼင်ႇၼၼ် ၶႅတ်ႉလႃးၸင်ႇၵႂႃႇၸၵ်ႉဢဝ် ၽႂ်းၽႂ်းယူႇ။
“ ဢဝ်မႃးလႄႈ ဢၢဝ်ထုၼ်း ”
ၶႅတ်ႉလႃး ၸၵ်ႉလႆႈၶႅပ်းႁၢင်ႈၵႂႃႇယဝ်ႉလႄႈ ဢၢဝ်ထုၼ်းၶဝ်ၼၼ်ႉမဝ်းလဝ်ႈသေ
“ ဢေႃ...ၵဝ်ၼူမ်ၶႅပ်းႁၢင်ႈမႄႈသူၼႆႉ မႂ်းဢမ်ႇလႆႈၸႂ်ဢိူဝ်ႈၼေႃႈ ”
“ ဢမ်ႇလႆႈၸႂ် ”
“ ပေႃးၼူမ်မႄႈမၼ်း ဢမ်ႇလႆႈၵေႃႈ လူဝ်ႇၼူမ်လုၵ်ႈမၼ်းၵူၺ်းဢိူဝ်ႈ ႁီး...ႁီး...”
ဢၢဝ်ထုၼ်း ဢၢင်ႈမႃးၺွပ်ႈၶႅတ်ႉလႃး ၶႅတ်ႉလႃး ၼႅတ်ႈဢႅၼ်ႇၵႂႃႇၸူးမႄႈၵဵပ်းမၼ်းသေ
“ မႄႈမွၼ်း ဢၢဝ်ထုၼ်းမဝ်းလဝ်ႈသေ-”
“ ဢၢႆႈထုၼ်း...မႂ်းမဝ်းလဝ်ႈမႃးထႅင်ႈယဝ်ႉႁႃႉၼႆႉ၊ ၵဝ်ဝႃႈယူႇဢမ်ႇၸိုဝ်ႈႁိူဝ်...ပေႃးမဝ်းလဝ်ႈ ယႃႇပေၶဝ်ႈမႃး ၼႂ်းဝၢင်းႁိူၼ်းၵဝ်ၼႆႉ”
“ ၵဝ်ဢမ်ႇမဝ်းလူင် တေႃႉတႄႉၸိင်ႉၵူၺ်း ”
“ ၵႂႃႇလႄႈ ၵႂႃႇတီႈၼွၼ်းမႂ်းလႄႈ ”
ဢၢႆႈထုၼ်ႈ ဝႆၸိူင်ႉဝႆၸၢင်ႉသေမေႃးလူင်ၵႂႃႇတီႈၼွၼ်းမၼ်ႈယူႇ။
“ ဢမ်ႇလႆႈၼူမ်ၶႅပ်းႁၢင်ႈမႄႈမၼ်းၵေႃႈ လူဝ်ႇၼူမ်လုၵ်ႈမၼ်ႈ လူဝ်ႇၼူမ်လုၵ်ႈမၼ်း...”
မႄႈၵဵပ်းၶဝ် ထူၺ်ႈၸႂ်လူင်ႁႅင်းႁႅင်း ၵမ်းၼိုင်ႈသေ လွမ်တူၺ်းၶႅတ်ႉလႃး ၸိၵ်းႁူဝ်တေႃႇပၢႆတိၼ် ယူႇ။ မၼ်းဝူၼ်ႉၼႂ်းၸႂ်မၼ်း ‘ ဢေႃး...လုၵ်ႈၵဵပ်းၵဝ် ပေႃးပဵၼ်သၢဝ်သိၵ်ႉႁိၵ်ႉဢွၼ်ႇယဝ်ႉလူင်ၼႆႉ’...”
“ ၶႅတ်ႉလႃး ”
“ ဢေႃႈၶႃႈ ”
“ ၵႂႃႇႁူင်ၶဝ်ႈၶမ်ႈႁဝ်းသေလႄႈ ပေႃးယဝ်ႉ တဵၵ်းၼမ်ႉဢၢပ်ႇဝႆႉသေၼႃႈ...ပေႃႈသူတေမႃး ဢၢပ်ႇဢိူဝ်ႈ ”
“ ဢေႃႈၶႃႈ ”
ၶႅတ်ႉလႃးၵူမ်ႈတူဝ်ၵူမ်ႈႁူဝ်ဢွၼ်ႇမၼ်းသေ ၶဝ်ႈၵႂႃႇၼႂ်းသွင်ႇၾႆးယဝ်ႉ။