ၶိုၼ်းထူပ်းႁၼ်ၵၼ်/တွၼ်ႈ 2 ပၢၼ်လုၵ်ႈႁဵၼ်းၸၼ်ႉငဝ်ႈ
တႅင်း...တႅင်း...တႅင်း... တႅင်း... တႅင်း... တႅင်း...တႅင်း
သဵင်တွႆႇၶိုၼ်ႈႁူင်းႁဵၼ်း လင်ၸွတ်ႇၵႂႃႇလႄႈ လုၵ်ႈႁဵၼ်းၶဝ် ဢွၼ်ၵၼ် ၽုင်ၶဝ်ႈၼႂ်းႁွင်ႈႁဵၼ်း ၽႂ်ၽႂ်မၼ်းမၼ်း။ ဝူင်းလိူၼ် မိုၼ်ႇႁွမ်လႄႈ ၶႅတ်ႉလႃးၶဝ်ၵေႃႈ ပဵၼ်လုၵ်ႈႁဵၼ်းမႂ်ႇသေ လႆႈၶိုၼ်ႈႁွင်ႈႁဵၼ်းလဵဝ်ၵၼ်။ ၶႅတ်ႉလႃးလႄႈ မိုၼ်ႇႁွမ် လႆႈၼင်ႈၸွမ်းၵၼ် ဝူင်းလိူၼ်တႄႉ လႆႈၵႂႃႇၼင်ႈၸွမ်း ၵူၼ်းၸၢႆးၶဝ်။ မိုၼ်ႇႁွမ်လႄႈဝူင်းလိူၼ်တႄႉ ပေႃႈမႄႈၶဝ် ပွင်ပဵၼ်လႆႈလႄႈ ၸဵမ်ပပ်ႉ၊ ထူင်၊ ၵမ်တႅမ်ႈ၊ ၵမ်ၸိုၼ်း ၸိူဝ်းၼၼ်ႉ ပဵၼ်ဢၼ်လီ ဢၼ်ၶႅမ်ႉၵူၺ်းၵူၺ်းသေတႃႉ ၶႅတ်ႉလႃးတႄႉ ၶူဝ်းမၼ်းဢမ်ႇၶႅမ်ႉမိူၼ်ပိူၼ်ႈ။
ထိုင်ၶၢဝ်းပိူၼ်ႈ ပၼ်လိုဝ်ႈၼိုင်ႈၵႅပ်ႉၼၼ်ႉ လုၵ်ႈႁဵၼ်းၶဝ် ၵဝ်ၵဝ်မႂ်းမႂ်း ၵႂႃႇသိုဝ်ႉၵိၼ် တၢင်းၵိၼ် ယူႇယႂ်းယႂ်းၵေႃႈ ၶႅတ်ႉလႃးတႄႉ လွမ်တူၺ်းပိူၼ်ႈယူႇၵူၺ်း၊ ႁၼ်ပိူၼ်ႈၵိၼ်တၢင်းၵိၼ်ယူႇသေတႃႉ လိူဝ်သေလွမ်တူၺ်းလွမ်ၶွႆပိူၼ်ႈ မၼ်းဢမ်ႇၸၢင်ႈႁဵတ်းႁိူဝ်။
“ ၶႅတ်ႉလႃး ”
ငိၼ်းသဵင်ႁွင်ႉၸိုဝ်ႈမၼ်းလႄႈ မၼ်းဝၢႆႇတူၺ်း လႆႈႁၼ်ဝူင်းလိူၼ် ယိပ်းၶဝ်ႈၵၢပ်ႇတူမ်ႈသေ မႃးၸူးမၼ်းယူႇ။
“ ႁိူဝ်ႈ... ၶႅတ်ႉလႃး ၵိၼ်ၶဝ်ႈၵၢပ်ႈတူမ်ႈလႄႈ ”
ၶႅတ်ႉလႃး ဢမ်ႇၵိုင်ႉၵၢင်ႉ ႁတ်းဢဝ်ၵမ်းလဵဝ်သေ လွမ်တူၺ်းဝႆႉယူႇ။
“ ဢဝ်လႄႈ ၶႅတ်ႉလႃး ၵဝ်သိုဝ်ႉႉမႃးသၢမ်ႁူင်း တႃႇမႂ်းႁူင်းၼိုင်ႈ တႃႇမိုၼ်ႇႁွမ်ႁူင်းၼိုင်ႈႁေဢိူဝ်ႈ”
ၶႅတ်ႉလႃးၸင်ႇႁပ်ႉဢဝ်ႁူင်းၼိုင်ႈသေ
“ ၸူမ်းယဝ်ႉ ဝူင်းလိူၼ် ”
ၽွင်းၼၼ်ႉ မိုၼ်ႇႁွမ်ၵေႃႈ သိုဝ်ႉမႃးၶဝ်ႈမုၼ်းၶူဝ်ႈသေ ၽႅဝ်မႃးႁိမ်းၶႃၼၼ်ႉယဝ်ႉ ။ ဝူင်းလိူၼ် ၸင်ႇႁပ်ႉဝႃႈ
“မိုၼ်ႇႁွမ် ႁိူဝ်ႈ...ၶဝ်ၵၢပ်ႇတႃႇမႂ်းဢိူဝ်ႈ ”
မိုၼ်ႇႁွမ်ႁပ်ႉဢဝ်သေ
“ဝူင်းလိူၼ် မႂ်းၵိၼ်တူၺ်း ၶဝ်မုၼ်းၶူဝ်ႈၼႆႉလူး ဝၢၼ်ၵျႃႉ ”
ဝူင်းလိူၼ်ၵေႃႈ ဢဝ်ၵိၼ်တူၺ်းသေ
“ဢိူဝ်ႈ...ဝၢၼ်တႄႉဢိူဝ်ႈ ”
“ၶႅတ်ႉလႃး ယေႃႈၵိၼ်ၶဝ်မုၼ်းၶူဝ်ႈ ”
“ ၸူမ်းယဝ်ႉမိုၼ်ႇႁွမ် ”
ႁဵတ်းၼၼ်သေ ၶဝ်သၢမ်ၵေႃႉ ၶိုၼ်ႈႁဵၼ်းမႃးၸွမ်းၵၼ်ဝၼ်းၼိုင်ႈယဝ်ႉဝၼ်းၼိုင်ႈ လိူၼ်ၼိုင်ႈယဝ်ႉလိူၼ်ၼိုင်ႈ၊ ပီၼိုင်ႈယဝ်ႉပီၼိုင်ႈ သမ်ႉပေႃးမီးၵႂႃႇႁႃႈပီယဝ်ႉ။
ဝၼ်းဢၼ်မၢႆဢွင်ႇ ၸၼ်ႉသီႇဢွၵ်ႇၼၼ်ႉ ဝူင်းလိူၼ်လႄႈ မိုၼ်ႇႁွမ်ၶီႇလႅင်သေ ၽႅဝ်မႃး တီႈၶႅတ်ႉလႃး
“ၶႅတ်ႉလႃး ”
“ ဢေႃး...ဝူင်းလိူၼ်လႄႈ မိုၼ်ႇႁွမ် ပႂ်ႉၵမ်းၼိုင်ႈၼႃႈ ႁဝ်းတိုၵ်ႉတဵၵ်းၼမ်ႉပႆႇယဝ်ႉလီ ”
ၶႃသွင်ၵေႃႉ မႃးႁိမ်းၼမ်ႉမေႃႇ တီႈၶႅတ်ႉလႃးတိုၵ်ႉတဵၵ်းၼၼ်ႉသေ မိုၼ်ႇႁွမ်ၸင်ဝႃႈ
“ၶႅတ်ႉလႃး ႁဝ်းပူၼ်ႉၸၼ်ႉသီႇတင်းသၢမ်ၵေႃႉဢိူဝ်ႈ ”
ၼႃႈတႃ ၶႅတ်ႉလႃးဢမ်ႇပေႃးၸူမ်းသိူဝ်းသေ တွပ်ႇ
“ တႄႉႁႃႉ...”
“ တႄႉဢိူဝ်ႈ...မိူဝ်ႈၼႆႉ ဝူင်းလိူၼ်တေၵႂႃႇလဵင်ႉႁဝ်း ၶဝ်ႈသွႆးၶူဝ်ႈဝႃႇ၊ မိူဝ်ႈၽုၵ်ႈသမ်ႉ မိုၼ်ႇႁွမ် တေလဵင်ႉဢိူဝ်ႈ ”
“ ပေႃးၼႆ မိူဝ်ႈႁိုဝ်းၵၢင်ၼႂ် ၶႅတ်ႉလႃးသမ်ႉတေလဵင်ႉၶိူဝ်သွင်ၵေႃႉ ၶဝ်ႈၼဵဝ်လႄႈ ထူဝ်ႇၽူး ဢုၼ်ႇၵႂႃႈ...ၶႅတ်ႉလႃးႁွမ်ငိုၼ်းဝႆႉယူႇ ”
ဝူင်းလိူၼ်ၸင်ႇၶိုၼ်းဝႃႈ
“ ၵူၺ်းၵႃႈ ပီၼႆႉ ႁႃးသွင်ၵေႃႉမိုၼ်ႇႁွမ် တေလႆႈၶၢႆႉၵႂႃႇၶိုၼ်ႈႁဵၼ်း တၢင်ႇတီႈယဝ်ႈ ၶႅတ်ႉလႃး ”
“ တေၶၢႆႉၵႂႃႇတီႈလႂ်? ”
“ မိုၼ်ႇႁွမ်တႄႉ တေလႆႈၶၢႆႉၵႂႃႇၸွမ်းပေႃႈၶဝ် တူၼ်ႈတီးဝႃႇ၊ ၵဝ်တႄႉ တေလႆႈၶၢႆႉၵႂႃႇၸွမ်းမႄႈ ႁဝ်းလွႆလႅမ်ဢိူဝ်ႈ ”
ၶႅတ်ႉလႃး ထူၺ်းၸႂ်လူင်ၵမ်းၼိုင်ႈသေ
“ ဢိုဝ်ႈ...ၶိူဝ်သွင်ၵေႃႉတႄႉ ၶၢႆႉၵႂႃႇတီႈလႂ်ၵေႃႈယဝ်ႉ တေလႆႈသိုပ်ႇၶိုၼ်ႈႁဵၼ်းယူႇသေတႃႉ ၵဝ် တႄႉဢမ်ႇၶၢႆႉၵႂႃႇလႂ်သေ သမ်ႉတေ ဢမ်ႇလႆႈယူႇႁဵၼ်းယဝ်ႉၵူၺ်း ”
ဝူင်းလိူၼ်လႄႈ မိုၼ်ႇႁွမ်တူၵ်းၸႂ်ၵႂႃႇသေ ဝူင်းလိူၼ်ၸင်ႇထၢမ်
“ ၵွပ်ႈသင် ဢမ်ႇလႆႈယူႇႁဵၼ်းယဝ်ႉလႃႇ? ”
“ မႄႈမွၼ်းႁဝ်းဝႃႈ ဢမ်ႇမီးၵႃႈႁဵၼ်းၵေႃႈပိူင်ၼိုင်ႈ၊ ၵဝ်သမ်ႉ လူဝ်ႇလႆႈ ထိင်းလုၵ်ႈဢွၼ်ႇမႄႈ မွၼ်းႁဝ်းၶဝ် ပိူင်ၼိုင်ႈ၊ သမ်ႉလူဝ်ႇလႆႈ ၸွႆႈၵၢၼ်တီႈႁိူၼ်းပိူင်ၼိုင်ႈ၊ သမ်ႉထႅင်ႈ မႄႈမွၼ်းႁဝ်းဝႃႈ ၼၢင်းယိင်းၼႆႉ မေႃလိၵ်ႈမႃးၵေႃႈ လူဝ်ႇတႅမ်ႈလိၵ်ႈၶဵဝ်ၵူၺ်းဢိူဝ်ႈၼႆဝႃႇ။ ၵွပ်ႈၼႆ ၵဝ်တႄႉ တေလႆႈဢွၵ်ႇ ႁဵၼ်းယဝ်ႉ၊ ၵၢမ်ႇႁဝ်းဢမ်ႇလီၸိူင်ႉသူလူး ”
ဝူင်းလိူၼ်လႄႈမိုၼ်ႇႁွမ် ၸႂ်ဢမ်ႇလီၸွမ်းၶႅတ်ႉလႃးၵႂႃႇသေ မိုၼ်ႇႁွမ်ၸင်ႇဝႃႈ
“ ၶႅတ်ႉလႃး...ႁဝ်းၵႂႃႇၽႅဝ်တီႈလႂ်သေၵေႃႈ ႁဝ်းတေၶုၵ်းၸႂ်လႆႈသူယူႇၵူၺ်း ”
ဝူင်းလိူၼ်ၵေႃႈၸင်ႇဝႃႈ
“ ပေႃးႁဝ်းၵေႃႉယႂ်ႇမႃး ဝၢႆးၼႆႉ ႁဝ်းတေမႃးဢႅဝ်ႇ တၢင်ႉယၢၼ်းယူႇၵႂႃႈ ”
“ ပေႃးၶိူဝ်သွင်ၵေႃႉ ၵေႃႉယႂ်ႇသေ ပဵၼ်ၵူၼ်းတႄႉၵူၼ်းဝႃႈမႃးၼႆ ထၢင်ႇတႄႉတေဢမ်ႇၶုၵ်းၸႂ်လႆႈ ၶႅတ်ႉလႃးၵူၼ်းၽၢၼ်ၸိူင်ႉၼႆသႄႈ ”
ဝူင်းလိူၼ်ၸင်ႇဝႃႈ
“ ဢမ်ႇဝႃႈလႆႈၼႃႈ...ဝၢႆးၼႆႉယူဝ်ၶႅတ်ႉလႃး ယဵၼ်းပဵၼ်ၼၢႆးသထေးလူင်သေ ဢမ်ႇၶုၵ်းၸႂ်လႆႈ ႁဝ်းတႄႉ ”
“ ဢူး...ဢမ်ႇပဵၼ်လႆႈ ”
မိုၼ်ႇႁွမ်ၵေႃႈ ၸင်ႇၵမ်ႉထႅမ်ၵႂၢမ်းဝူင်းလိူၼ်
“ ဢမ်ႇဝႃႈလႆႈၵူၺ်းဢိူဝ်ႈၼႃ... ပေႃးပဵၼ်ၼၢႆးသထေးလူင်သေ လိုမ်းမိုၼ်ႇႁွမ်တႄႉ မိုၼ်ႇႁွမ် တေဢဝ်ၽႃႇၶႅပ်းတိၼ် ၽတ်ႉၵႅမ်ႈၼၢႆးသထေးၶႃႇၵႄႇယူႇၵူၺ်းၼႃႈ ”
ၶႅတ်ႉလႃးၶူဝ်ယူႇၶိၵ်းၶိၵ်း တူဝ်ဢွၼ်ႇမၼ်း ပေႃးတူင်ႉၼိုင်ၵႂႃႇတင်းတူဝ်၊ ဝူင်းလိူၼ်ၸင်ႇဝႃႈ
“ ၶႅတ်ႉလႃး ၶမ်ႈၸူင်ႈႁႃးသွင်ၵေႃႉ တေမႃးႁွင်ႉမႂ်းဢိူဝ်ႈ ပႂ်ႉဝႆႉၼႃႈ ”
“ တေလႆႈလဵင်ႉတေႃႇပေႃးဢိမ်ႇၼႃ ”
“ၵိၼ်လႆႈတၢၼ်ႇႁိုူဝ်ၵေႃႈ ၵိၼ်လႄႈ ႁဝ်းတေလဵင်ႉယူႇ ”
“ ၶႅတ်ႉလႃး... မိုၼ်ႁွမ်ၶဝ်တေမိူဝ်းၵွၼ်ႇၼႃႈ ”
“ဢိူဝ်ႈ...မိူဝ်းလွႆးလွႆး ”
“မွၼ်းမွၼ်း ”
“ မွၼ်း ”
ထိုင်မႃးတၢမ်းၶမ်ႈ ဝူင်းလိူၼ်လႄႈ မိုၼ်ႇႁွမ် ဢဝ်လႅင်သေ မႃးႁွင်ႉၶႅတ်ႉလႃး ၵႂႃႇၵိၼ်ၶဝ်ႈသွႆႈၶူဝ်ႈ တီႈၵၢတ်ႇၵဝ်ႇယူႇ။ ၶႅတ်ႉလႃး ၶီႇသွၼ်ႉၵူၼ်ႈလႅင်ဝူင်းလိူၼ်၊ မိုၼ်ႇႁွမ်သမ်ႉ ယဵပ်ႇလႂ်င်မၼ်းၶေႃၶေႃသေ ၶဝ်ဢုပ်ႇၵၼ်မႃးၸွမ်းတၢင်း မူၼ်ႈမူၼ်ႈသိူဝ်းသိူဝ်း ၶဝ်ၶဝ်ႈမႃး ၼႂ်းသႅင်ႇၶဝ်ႈသွႆးသေ သင်ႇၵိၼ်ၶဝ်ႈသွႆႈၶူဝ်ႈယူႇ။
ဝူင်းလိူၼ်ၸင်ႇဝႃႈ
“ ၵိၼ်လႄႈ ၵိၼ်ဢိမ်ႇဢိမ်ႇၼႃႈ ယႃႇပေၵဵင်ၸႂ် ”
မိုၼ်ႇႁွမ်ၸင်ႇဝႃႈ
“ ၶႅတ်ႉလႃး ယႃႇပေၽူမ်ႈၵိၼ်ၵွၼ်ႇ ႁဝ်းယွၼ်းသူးပၼ် ၸဝ်ႈတႃႇၼႃႉၵွၼ်ႇ ႁႂ်ႈၸဝ်ႈတႃႇၼႃႉ ႁဝ်းၵျႃႉသေဢွၼ် တွၼ်းသေၵဝ်ႇ ၶိုၼ်ႈယႂ်ႇမႂ်ႇသုင်သေၵမ်း ”
ၶႅတ်ႉလႃႈၵေႃႈၸင်ႇဝႃႈ
“ ႁႂ်ႈဝူင်းလိူၼ် ဝူင်းယႂ်ႇယႂ်ႇသေ ထွင်ႇတၢင်းၵတ်းယဵၼ်ပၼ် ၶူင်းၵၢင်သေၵမ်း ”
ၶဝ်ၸူမ်းၶူဝ်သေ ဝူင်းလိူၼ်ၸင်ႇဝႃႈ
“ ၸူမ်းယဝ်ႉ ႁႂ်ႈပဵၼ်ၼင်ႇသူပ်းၼင်ႇၵႂၢမ်းၶိူဝ်သွင်ၵေႃႉသေၵမ်း ၵိၼ်လႄႈၵိၼ်လႄႈ ၶဝ်ႈသွႆးၶူဝ်ႈ ႁဝ်းတေၵတ်းမူတ်းယဝ်ႉ၊ မိုၼ်ႇႁွမ် ၸွင်ႇတေသႂ်ႇမၢၵ်ႇၽိတ်ႉ ”
“ ဢမ်ႇသႂ်ႇယဝ်ႉ သႂ်ႇပၼ်ၶႅတ်ႉလႃးလႄႈ ”
ဝူင်းလိူၼ်ၸေႃႉ ဢဝ်မၢၵ်ႇၽိတ်ႉသႂ်ႇပၼ်ၼႂ်းဝၢၼ်ႇ ၶႅတ်ႉလႃးယူႇ။
“ လႆႈယဝ်ႉ ဝူင်းလိူၼ် ယႃႇပေသႂ်ႇၼမ် ”
“ ဢမ်ႇပေႃးမၵ်ႉၽဵတ်းႁႃႉ? ”
“ တၢၼ်ႇတၢၼ်ႇမၼ်း ပေႃးယဝ်ႉၵႂႃႈ ”
လႆႈႁၼ်ဝူင်းလိူၼ်ၸေႃႉဢဝ်မၢၵ်ႇၽိတ်ႉ ၶိုၼ်းသႂ်ႇၼႂ်းဝၢၼ်ႇၶဝ်သွႆးမၼ်း ၼမ်ၼႃႇလႄႈ မိုၼ်ႇႁွမ်ၸင်ႇဝႃႈ
“ ဢလူဝ်ႉ ...ဝူင်းလိူၼ် ဢမ်ႇၽဵတ်းႁႃႉ မႂ်းပေႉသႂ်ႇမၼ်လႃႇ ”
“ ၸၢတ်ႈၵွၼ်ႇ ႁဝ်းယၢမ်ႈပဵၼ်မူင်ႈမၢၵ်ႇၽိတ်ႉႁိူဝ်ၵေႃႈ ဢမ်ႇႁူႉယဝ်ႉ၊ ပေႃးမၵ်ႉၼႆ ႁိုဝ်တေၵႂႃႇ ၽဵတ်း ”
မိုၼ်ႇႁွမ်ၸင်ႇဝႃႈ
“ႁဝ်းတႄႉၵူဝ် … “
“ ၵူဝ်သင် လၢတ်ႈလူး ”
“ ၵူဝ်ၶဝ်ႈၵေႃႈလိူတ်ႇ ဢွၵ်ႇၵေႃႈလိူတ်ႇဝႃႇ ၶိၵ်းၶိၵ်း ”
“ ဢေးယွၵ်ႈၼႆႉ ၶၢဝ်းပိူၼ်ႈၵိၼ် လေႇႁႃမႃးလၢတ်ႈၸိူင်ႉၼႆ ”
ၶဝ်သၢမ်ၵေႃႉ မူၼ်ႈသိူဝ်းၵိၼ်ၶဝ်ႈသွႆးၶူဝ်ႈ ဢိမ်ႇဢိမ်တဵမ်တဵမ်ယူႇ။ ၶႅတ်ႉလႃး သတိတူၺ်းၵႂႃႇ လႆႈႁၼ်တီႈလင်မိုဝ်းဝူင်းလိူၼ် ၽၢႆႇၶႂႃႇၼၼ်ႉ မီးဝႆႉ မၢႆလမ်မွၵ်ႈမဵတ်ႉမၢၵ်ႇၵႅင်းၼၼ်ႉလႄႈ ၶႅတ်ႉလႃး ၸင်ႇတၵ်ႉ
“ ဝူင်းလိူၼ် တီႈမိုဝ်းမႂ်းၼႆႉ ပဵင်သင်? လမ်ႁေ ”
“ ဢေႃ...ပဵၼ်မၢႆၵဝ်ၵိူတ်ႇပႃးမႃးဢိူဝ်ႈ ”
“ ယူဝ်ဝႃႈ မေႃႈမီႈၼုၵ်းၼႆ ဢမ်ႇၸႂ်ႈႁႃႉ?”
“ ဢမ်ႇၸႂ်ႈ...ပဵၼ်မၢႆလမ် ပိူၼ်ႈမၢႆဝႆႉ ၸၢတ်ႈၵွၼ်ႇယူဝ်ႇ ”
မိုၼ်ႇႁွမ်ၸင်ႇဝႃႈ
“ၸၢတ်ႈၵွၼ်ႇ မၼ်းယၢမ်ႈလၵ်ႉလႄႈ ပိူၼ်ႈမၢႆဝႆႉၵႂႃႈ ”
ၶဝ်ဢွၼ်ၵၼ်ႁုၼ်ႉၶူဝ်သိူဝ်းၼူဝ်ယူႇ၊ ဝူင်းလိူၼ်ၸင်ႇဝႃႈ
“ ပေႃးၼႆ မိုၼ်ႇႁွမ် မႂ်းသမ်ႉမီးမၢႆတီႈ ႁူဝ်ၶဝ်ႇမႂ်းဢမ်ႇၸႂ်ႈႁႃႉ ၼၼ်ႉပဵၼ်...”
“ ပဵၼ်သင်လၢတ်ႈလူး?”
“ ၸၢတ်ႈၵွၼ်ႇ ဢမ်ႇလႆႈလိၵ်ႈသေ ၵႆႉၵႆႉလႆႈလွၵ်ႈႁူဝ်ၶဝ်ႇ ၽၢႆႇၼႃႈလုၵ်ႈႁဵၼ်းၶဝ်ဢိူဝ်ႈၼၼ်ႉ”
“ ႁိႁီး...ၸႂ်ႈၵေႃႈဢမ်ႇၸႂ်ႈသင်သေလႄႈ ၶႅတ်ႈလႃးဢမ်ႇမီးမၢႆတီႈလႂ်ႈႁႃႉ ”
ၶႅတ်ႉလႃးဝူတ်ႈၶႅၼ်မၼ်း ၽၢႆႇသၢႆႉ မီးၶီႈမႅင်းမူၼ်းၵူမ်တုမ်ႇၼိုင်ႈ
“ ၼႆႉၼႃႇ မိူဝ်ႈႁဝ်းၵေႃႉလဵၵ်ႉၼၼ်ႉ မႅင်းမူၼ်းမႃးၶီႈသႂ်ႇဝႆႉ ယူဝ်ႉ မီးၶီႈမႅင်းမူၼ်းတုမ်ႇၼိုင်ႈ ဢိူဝ်ႈၶိၵ်း...”
ဝူင်ႈလိူၼ်လွမ်တူၺ်းသေၸင်ႇဝႃႈ
“တုမ်ႇယႂ်ႇၸိူင်ႉၼႆ တေပဵၼ်ၶီႈမႅင်ႈမူၼ်းၶႅဝ်ဢိူဝ်ႈၼႆႉ ”
ၶဝ်သၢမ်ၵေႃႉ ဢွၼ်ၵၼ်ၶူဝ်ၵျေႃႇယူႇၵူၺ်းၶဝ် ႁဵတ်းၼၼ်ယူႇ။ ဝၼ်းဢၼ်မိုၼ်ႇႁွမ်ၵႂႃႇလဵင်ႉ ၶဝ်ႈသဵၼ်ႈၼၼ်ႉၵေႃႈမိုၼ်ႇႁွမ်ဝႃႈ
“ ၵိၼ်လႄႈၼႃႈ ယႃႇပေၵဵင်ၸႂ် ၶႂ်ႈပႃးၵႂႃႇႁိူၼ်းၵေႃႈလႆႈယူႇ ႁိႁိ”
ဝူင်းလိူၼ်ၸင်ႇထၢမ်
“ မိုၼ်ႇႁွမ် ၵွပ်ႈသင်လဵင်ႉႁဝ်းၶဝ်ႈသဵၼ်ႈလႃႇ ”
“ ၶႂ်ႈႁႂ်ႈႁဝ်းပဵၼ်သဵၼ်ႈလဵဝ်ၵၼ်ဢိူဝ်ႈ...ဢၼ်မႂ်းလဵင်ႉႁဝ်းၶဝ်ႈသွႆးၼၼ်ႉလႃႇ ”
“ ၼၼ်ႉႁႃႉ ၶဝ်ႈသွႆး ၶွႆႈသဝ်းၼႆၼႃႇ ႁႂ်ႈႁဝ်ႈလႆႈၶိုၼ်ႈၶွႆႈၵၼ်ဢိူဝ်ႈ ပေႃးၼႆႉ ဢၼ်ၶႅတ်ႉလႃး တေလဵင်ႉႁဝ်း ၶဝ်ႈၼဵဝ်ထူဝ်ႇၽူးဢုၼ်ႇၼၼ်ႉလူး တေဢဝ်တီႈပွင်ႇၸိူင်ႉႁိူဝ် ”
“ ၶဝ်ႈၼဵဝ် ဢၼ်ဝႃႈၼၼ်ႉ ႁႂ်ႈႁဝ်းပၼ်ႈၼဵဝ် ပဵၼ်ဢၼ်လဵဝ်ၵၼ်ၼႆႉဢိူဝ်ႈ... ထူဝ်ႇၽူးၼၼ်ႉတႄႉ ၶႅတ်ႉလႃးဢမ်ႇႁူႉ ”
“ မိုၼ်ႇႁွမ်ႁူႉဢိူဝ်ႈ ”
“ လၢတ်ႈလူး ”
“ ပေႃးၽူးၼႆ ဢမ်ႇၸူမ်ၼၼ်ႉၼႃႇ... ယႃႇပေႁႂ်ႈၸူမ်ၼမ်ႉၼႆယူဝ်ႉ ”
ၶဝ်သၢမ်ၵေႃႉ သိူဝ်းၼူဝ်ယုမ်ႉၶူဝ်ယူႇၶိၵ်းၶိၵ်း။
ၼႂ်ဢၼ်ၶႅတ်ႉလႃး ၵႂႃႇလဵင်ႉၶဝ် ၶဝ်ႈၼဵဝ်ထူဝ်ႇၽူးဢုၼ်ႇၼၼ်ႉၼႆ
“ ၵိၼ်လႄႈ...ယႃႇၵဵင်ၸႂ်ၼႃႈ...ႁဝ်းဢမ်ႇမီးငိုၼ်းၸိူင်ႉပိူၼ်ႈသေတႃႉ ၸေႇတၼႃႇႁဝ်း တဵမ်ထူၼ်ႈယူႇ ”
မိုၼ်ႇႁွမ်ၸင်ႇဝႃႈ
“ ၶႅတ်ႉလႃးၶႂ်ႈဝႃႈ ဢၼ်ႁဝ်းမီးငိုၼ်းၼၼ်ႉ ၸေႇတၼႃႇႁဝ်း ဢမ်ႇတဵမ်ထူၼ်ႈၼႆႁႃႉ ”
“ ၶႅတ်ႉလႃး ဢမ်ႇဝႃႈၸိူင်ႉၼၼ် ပိူၼ်ႈတဵမ်ထူၼ်ႈတင်ႈသွင်ပိူင် ႁဝ်းတဵမ်ထူၼ်ႈပိူင်လဵဝ်ၵူၺ်းၼႆ ဢိူဝ်ႈ...ၵိၼ်လႄႈၵိၼ်လႄႈ...ႁိူဝ်ႈ... ၵူၼ်းမၵ်ႉမၢၵ်ႇၽိတ်ႉ သႂ်ႇလႄႈ...မိုၼ်ႇႁွမ်မၵ်ႉသူမ်ႈဢမ်ႇၸႂ်ႈႁႃႉ ႁိူဝ်ႈ...မၢၵ်ႇၽႃႈ၊ ထူဝ်ႇၽူးၶူဝ်ႈၵေႃႈ ၶွပ်ႈလီၵျႃႉၼႆႉ ၵိၼ်လႄႈမိုၼ်ႇႁွမ် ဝူင်းလိူၼ်”
ဝူင်ႈလိူၼ်ပၼ်ႈၶဝ်ႈၼဵဝ် ဢဝ်ၵွၼ်ႈၶဝ်ႈၼဵဝ်မၼ်း လုၺ်ႉသႂ်ႇထူဝ်ႇၽူးဢုၼ်ႇသေ ၵိၼ်ၵမ်း ၽုတ်းၵမ်ႈမႅၼ်းယူႇ။
မိုၼ်ႇႁွမ်ၸင်ႇတၵ်ႉဝႃႈ
“ဝူင်းလိူၼ် ၵမ်းၶဝ်ႈၼဵဝ်မႂ်းၵေႃႈ ပေႃးၶႂ်ႈယႂ်ႇသေသူပ်းမႂ်းယဝ်ႉ ဢမ်ႇပၼ်ႈသေၵိၼ်ၵေႃႈ လႆႈယူႇလူး ”
“ ႁိူဝ်ႉ ထုင်းၸၢမ်ႇတႆႈႁဝ်းၼႆႉ ၶဝ်ႈၼဵဝ်ၼႆႉ လူဝ်ႇလႆႈပၼ်ႈသေၵိၼ်ၼႆဝႃႇ ”
“ ပေႃးဢမ်ႇပၼ်ႈသေၵိၼ် ၸၢင်ႈပဵၼ်သင်?”
“ ၵဝ်ယၢမ်ႈငိၼ်းပူႇႁဝ်း ဢုပ်ႇၼႄၵဝ်တႄႉ ပေႃးပၼ်ႈသေၵိၼ်ၼႆၸိုင် ထၢတ်ႈမိုဝ်းႁဝ်းတိူဝ်ႉ ၶဝ်ႈၼဵဝ်လႄႈ ၶဝ်ႈၼဵဝ်ၸဵဝ်းၵႂႃႇယၢႆႈၼႂ်းတွင်ႉႁဝ်းဝႃႇ သမ်ႉထႅင်ႈ တႆးႁဝ်းပဵၼ်ၵူၼ်းလဵၼ်ႈလၢႆးလႄႈ ပေႃးၵိၼ်ၶဝ်ႈၼဵဝ်ၼႆ လွင်ႈပၼ်ႈႁႂ်ႈဢွၼ်ႇဢွၼ်ႇသေ ၵိၼ်ၼၼ်ႉ ပဵၼ်လွင်ႈၽိုၵ်းႁႂ်ႈမိုဝ်းၶႅင်ႁႅင်းၼႆဝႃႇ ၶႂ်ႈႁူႉ ၵေႃႈ ”
“ ႁူႉၶႃႈယဝ်ႉ...ႁူႉၶႃႈယဝ်ႉ ပေႃးၼႆ မိုၼ်ႇႁွမ်ၵေႃႈ တေပၼ်ႈၵိၼ်တူၺ်းၵွၼ်ႇ ”
ၶဝ်သၢမ်ၵေႃႉ ဢွၼ်ၵၼ်ပၼ်ႈၵိၼ်ၶဝ်ႈၼဵဝ် ၵပ်းထူဝ်ႇၽူးဢုၼ်ႇဝၢၼ်ဝၢၼ်မၼ်းမၼ်းယူႇ။ ဝၢႆးၼၼ်ႉ ၶဝ်သၢမ်ၵေႃႉ မႃးတီႈတႂ်ႈတူၼ်ႈမွၵ်ႇၶႅတ်ႉလႃး ၼႂ်းဝၢင်းၽြႃးလူင်သေ ဢုပ်ၵၼ်ယူႇ။ မိုၼ်ႇႁွမ်ၸၢင်ႇ လၢတ်ႈဝႃႈ
“ ၶႅတ်ႉလႃး ...ပေႃးႁဝ်းၵေႃႉယႂ်ႇမႃး ၸွင်ႇႁဝ်းတေၶိုၼ်းထူပ်းၵၼ်ႁိူဝ်ဢမ်ႇႁူႉယဝ်ႉၼေႃ ”
“ ဢမ်ႇၸၢင်ႈဝႃႈၼႃး ၶႂ်ႈထူပ်းၵေႃႈ တေၸၢင်ႈထူပ်းယူႇယူဝ်ႉ ”
“ ၼင်ႇႁိူဝ် ႁဝ်းသၢမ်ၵေႃႉ တေထူပ်းႁၼ်ၵၼ်ထႅင်ႈၼၼ်ႉ ႁဝ်းတေလႆႈႁဵတ်းႁိူဝ် ”
ဝူင်းလိူၼ်ၸင်ႇဝူၼ်ႉလႆႈသေ မွၵ်ႇလၢတ်ႈဝႃႈ
“ ၵႂႃႇႁဝ်းၶဝ်ႈမိူဝ်းၼႂ်းဝတ်ႉၽြႃးသေ မိူဝ်းယွၼ်ႈသူးဝႃႈ ‘ႁႂ်ႈႁဝ်းၶိုၼ်းလႆႈထူပ်းၵၼ်သေၵမ်း ’ၼႆ ဢမ်ႇလီႁႃႉ?”
“ လီဢိူဝ်ႈ...လီဢိူဝ်ႈ ”
ၶႅတ်ႉလႃႈၸင်ႇဝႃႈ
“ႁဝ်းၵဵပ်းမွၵ်ႇၶႅတ်ႉလႃးသေ ၵႂႃႇလူႇၶႅၼ်း တေလီယူဝ်ႉ?”
“ လီဢိူဝ်ႈ...မႃးႁဝ်းၵႂႃႇၵဵပ်ႈမိုၼ်ႇႁွမ် ”
“ ဢႃ...ၶႃၵဝ်ၵူၼ်ႉၼႃႇယဝ်ႉ ၶိူဝ်သွင်ၵေႃႉၵဵပ်းလႃႈ”
ၶႅတ်ႉလႃးလႄႈ ဝူင်းလိူၼ် ၵဵပ်းမွၵ်ႇၶႅတ်ႉလႃးသေ မႃးပၼ်မိုၼ်ႇႁွမ်ဝႆႉ ၶႃၶိုၼ်းၼ်းၵႂႃႇၵဵပ်းထႅင်ႈတၢၼ်ႇတၢၼ်ႇသေ ၶဝ်သၢမ်ၵေႃႉ ၸင်ဢဝ်မိူဝ်းလူႇၽြႃးလူင်ရၶႅင်ႇ ယွၼ်ႈသူးႁူမ်ႈၵၼ်ယူႇ။
“ ပေႃးၵေႃႉယႂ်ႇမႃး ႁႂ်ႈႁဝ်းသၢမ်ၵေႃႉ ၶိုၼ်းထူပ်းႁၼ်ၵၼ် သေၵမ်းၶႃႈ ”