ၶိုၼ်းထူပ်းႁၼ်ၵၼ်/တွၼ်ႈ 21 ပၼ်ႁႅင်းတႆး

ဝၼ်းၼိုင်ႈပူၼ်ႉၵႂႃႇ ဝၼ်းၼိုင်ႈၽႃႇတႅၼ်း ႁႅၼ်းပူၼ်ႉလိူၼ်မႃးသေ သမ်ႉပေႃး ၶွႆႈထိုင်မႃး ၶၢဝ်းၶႅတ်ႉလႃးမွၵ်ႇယဝ်ႉ ။

ဝူင်းလိူၼ် လႄႈ ၶႅတ်ႉလႃႈ ၽႅဝ်မႃးတီႈပိူၼ်ႈၶၢႆမွၵ်ႇ။ ၶႅတ်ႉလႃး ၶႂ်ႈသိုဝ်ႉ မွၵ်ႇၶႅတ်ႉလႃးၼႆသေ မႃးႁႃမွၵ်ႇၶႅတ်ႉလႃးယူႇ။ ၸဝ်ႈၶၢႆမွၵ်ႇၶဝ် ႁပ်ႉတွၼ်ႈ ႁႂ်ႈသိုဝ်ႉမွၵ်ႇၶဝ်ၼႆသေတႃႉ ၶႅတ်ႉလႃးပူၼ်ႉၵႂႃႇ ၵေႃႉၼိုင်ႈယဝ်ႉၵေႃႉၼိုင်ႈယူႇ ဝူင်းလိူၼ်ၸင်ႇဝႃႈ

“ ၶႅတ်ႉလႃး...ၶဝ်ၸိူဝ်းၼႆႉ ၶၢႆမွၵ်ႇၶႅတ်ႉလႃးယူႇလူး ႁဵတ်းသင်သမ်ႉဢမ်ႇသိုဝ်ႉလႃႇ?”

ၶႅတ်ႉလႃး ဝၢႆႇတူၺ်း ဝူင်းလိူၼ်ၵမ်းၼိုင်ႈသေ သိုပ်ႇပႆၵႂႃႇယူႇ၊ ၵွပ်ႈပိူဝ်ႈ ငိၼ်းသဵင်တၵ်ႉ ၶႅတ်ႉလႃးၼင်ႇၼၼ်လႄႈ ၼၢင်းယိင်းၶၢႆမွၵ်ႇဢွၼ်ႇၵေႃႉၼိုင်ႈ ၸင်ႇတၵ်ႉၵႂၢမ်းတႆးဝႃႈ

“ မႄႈလဵင်ႉသထေး ၶႂ်ႈလႆႈမွၵ်ႇၶႅတ်ႉလႃးၼႆၶႃႈႁႃႉ...မွၵ်ႇၶႅတ်ႉလႃးၶႃႈႁဝ်းၼႆႉ တိုၵ်ႉၵဵပ်းမႃး ၼႂ်ၼႆၵူၺ်း၊ တူၺ်းၶႃႈလႄႈ တိုၵ်ႉၶၢဝ်သႂ်လီယူႇၶႃႈဢိူဝ်ႈ ”

ၶႅတ်ႉလႃး ယိပ်းဢဝ်သွႆႉမွၵ်ႇၶႅတ်ႉလႃးၼၼ်ႉသေ ယၵ်ႉတူၺ်း ပဵၼ်ဢၼ်ၸိုၼ်ႈသႂ်လီယူႇလႄႈ မၼ်ႈၸင်ႇသဵတ်ႈၵႃႈမၼ်းသေ သိုဝ်ႉဢဝ်မူတ်းမူတ်းယဝ်ႈ။

“ ၸူမ်းၶႃႈယဝ်ႉ မႄႈလဵင်ႉသထေး မွၵ်ႇတၢင်ႇမဵဝ်းဢမ်ႇဢဝ်ၶႃႈႁႃႉ ”

“ ပႆဢဝ်ၵွၼ်ႇ ”

“ တၢင်ႇပွၵ်ႈမႃး မႃးသိုဝ်ႉတီႈၶႃႈႁဝ်းထႅင်ႈၶႃႈၼႃႈ ”

ၶႅတ်ႉလႃး ယုမ်ႉငွၵ်းႁူဝ်ၼႄၵမ်ႈၼိုင်ႈ ၶႃသွင်ၵေႃႉ ဝူင်းလိူၼ် ၶိုၼ်းမႃးၶီႇရူတ်ႉသေ ဝူင်းလိူၼ်တၢင်ႇၶႅတ်ႉလႃး ၵႂႃႇၸူးတီႈၶုမ်ပႃႇႁဵဝ်ႈ မိုၼ်ႇႁွမ်ယဝ်ႈ ။ဝူင်ႈလိူၼ်ၸင်ႇထၢမ်

“ ၶႅတ်ႉလႃး...မိူဝ်ႈသိုဝ်ႉမွၵ်ႇၼၼ်ႉ ႁဵတ်းသင်ပႄႉလိူၵ်ႈ ၸဝ်ႈၶၢႆမၼ်းလႃႇ?”

“ ဝူင်ႈလိူၼ်...မိုၼ်ႇႁွမ်သင်ႇဝႆႉဝႃႈ ‘ပၼ်ႁႅင်ႈတႆး ’ၼႆဢမ်ႇၸႂ်ႈႁိုဝ်၊ ၵွပ်ႈၼႆ မွၵ်ႇဢၼ် တေသိုဝ်ႉၵႂႃႇပၼ် မိုၼ်ႇႁွမ်ၼၼ်ႉၵေႃႈ ၶႅၼ်းလူဝ်ႇလႆႈပဵၼ်မွၵ်ႇဢၼ် ပၼ်ႁႅင်းတႆးၼၼ်ႉယဝ်ႉ ”

ၽႅဝ်မႃးတီႈပႃႇႁဵဝ်ႈယဝ်ႉလႄႈ ၶႅတ်ႉလႃး ဢဝ်သွႆႉမွၵ်ႇၶႅတ်ႉလႃႈသၢမ်သွႆႉ ဝၢင်းဝႆႉ တီႈၼိူဝ်ၶုမ်ဢုတ်ႇ မိုၼ်ႇႁွမ်သေ သမ်ႉယႃႉဢဝ် လူင်ႇမွၵ်ႇၶႅတ်ႉလႃး ၸၢတ်ႇပိုၼ်ပၼ် ၼိူဝ်ၶုမ်မိုၼ်ႇႁွမ်ၼၼ်ႉၸွတ်ႇၸွတ်ႇယူႇယဝ်ႉ။

ဝူင်းလိူၼ်သမ်ႉ ဢဝ်ၸေႃးမႃး ၶုတ်းလုၵ်းတီႈႁူဝ် တီႈတိၼ်ၶုမ်မိုၼ်ႇႁွမ်သေ ဢဝ်တူၼ်ႈမွၵ်ႇၶႅတ်ႉလႃး ၽုၵ်ႇဝႆႉပၼ်သွင်တူၼ်ႈယဝ်ႉ။ ၶႅတ်ႉလႃးၸင်ႇထၢမ်

“ ဝူင်းလိူၼ်...ယိူင်းဢၢၼ်းၸိူင်ႉႁိုဝ်သေၽုၵ်ႇ?”

“ ဢေႃး...ၸွမ်းၼင်ႇ မိုၼ်ႇႁွမ် တူၵ်းယွၼ်းဝႃႈ ပေႃးထိုင်ၶၢဝ်းမွၵ်ႇၶႅတ်ႉလႃးမွၵ်ႇ ႁႂ်ႈဢဝ်မွၵ်ႇၶႅတ်ႉလႃး မႃးဝႆႉပၼ် တီႈၶုမ်မၼ်းၼႆလႄႈ ၸင်ႇၽုၵ်ႇဝႆႉပၼ်မၼ်း သွင်တူၼ်ႈဢိူဝ်ႈ။ ပေႃးမၼ်းတူၼ်ႈယႂ်ႇသေ မွၵ်ႇမႃးၼႆ မၼ်းတေႁူင်ႈတူၵ်းပၼ် မိုၼ်ႇႁွမ်ၶမ်ႈၶမ်ႈၼႂ်ၼႂ်ဢိူဝ်ႈ ”

ၶႅတ်ႉလႃး ၸင်ႇၶိုၼ်းလွမ်တူၺ်ႈ ၶုမ်ဢုတ်ႇမိုၼ်ႇႁွမ်သေ

“ ၼွင်ႉယိင်း မိုၼ်ႇႁွမ် ထိုင်ၶၢဝ်းၶႅတ်ႉလႃးမွၵ်ႇယဝ်ႉလႄႈ ႁႃးဝူင်းလိူၼ် ဢဝ်မွၵ်ႇၶႅတ်ႉလႃး မႃးဝႆႉပၼ်မႂ်း ၸွမ်းၼင်ႇမႂ်းတုၵ်ႈယွၼ်းဝႆႉ မိူဝ်ႈပႆႇတၢႆၼၼ်ႉယဝ်ႈ။ မိူဝ်းၼႃႈမႃး သင်ဝႃႈ တူၼ်ႈမွၵ်ႇ ဢၼ်ဝူင်းလိူၼ်ၽုၵ်ႇဝႆႉၼၼ်ႉ မွၵ်ႇမႃးၼႆ မွၵ်ႇၶႅတ်ႉလႃးဢွၼ်ႇၸိူဝ်းၼၼ်ႉ တေသိုပ်ႇႁူင်ႈတူၵ်းပၼ် ၼိူဝ်ၶုမ်မႂ်း ၵူႈပီယူႇ။ ၼွင်ႉယိင်းမိုၼ်ႇႁွမ် ၵႂႃႇမီးတီႈလႂ်ၵေႃႈ ႁႂ်ႈသိူဝ်းၸႂ်သေၵမ်ႈၼႆ ႁႃးဝူင်းလိူၼ် ယွၼ်ႈသူးပၼ်ယူႇ ”

ၶႅတ်ႉလႃႈ ၸုၵ်ႈငဝ်မိုင်တူၺ်း ၶုမ်ပႃႇႁဵဝ်ႈမိုၼ်ႇႁွမ် တင်းႁိုင်သေ ၼမ်ႉတႃမၼ်းၼၢင်း လႆတူၵ်းမႃးယူႇ။ ဝူင်းလိူၼ် ယိပ်းၸုင်ဢဝ်ၶႅၼ်ၶႅတ်ႉလႃးသေ

“ ၶႅတ်ႉလႃး ၵႂႃႇႁဝ်းမိူဝ်း ”

ၶႃသွင်ၵေႃႉ ၽၢတ်ႇယၢၼ်ၶုမ်ပႃႇႁဵဝ်ႈသေ မႃးၶိုၼ်ႈၶီႇရူတ်ႉၶႃ ဢွၵ်ႇမိူဝ်းၶိုၼ်းယဝ်ႉ။ လူမ်းဢွၼ်ႇထွင်ႈပဝ်ႇ ၶွၼ်းၶဝ်ႇမွၵ်ႇၶႅတ်ႉလႃး ၼိူဝ်ၶုမ်ဢုတ်ႇမိုၼ်ႇႁွမ်ၼၼ်ႉ ပိဝ်လူင်းပိဝ်လူင်း ပဵၼ်လူင်ႇပဵၼ်လူင်ႇယူႇ။ ဢၢႆႁွမ်မွၵ်ႇၶႅတ်ႉလႃးၼၼ်ႉ

မိူဝ်ႈမီးၼိူဝ်တူၼ်ႈၵေႃႈႁွမ်

မိူဝ်ႈႁူင်ႈတူၵ်ႈၵေႃႈႁွမ်

မိူဝ်ႈႁဵဝ်ႇႁႅင်ႈၵႂႃႇၵေႃႈတိုၵ်ႉႁွမ်ယူႇသေတႃႉ

မိုၼ်ႇႁွမ်ၵေႃႉၼိုင်ႈတႄႉ

ၸွင်ႇတေႁၼ်တၢင်းႁၢင်ႈလီ မွၵ်ႇၶႅတ်ႉလႃးႁိုဝ်?

ၸွင်ႇတေလႆႈသႅဝ် ႁွမ်မွၵ်ႇၶႅတ်ႉလႃးႁိုဝ်?...

သုတ်းယဝ်ႉ။

သင်ဝႃႈ ၽူႈလူလိၵ်ႈႁဝ်းၶဝ် လူၸိူင်းၼႆႉယဝ်ႉသေ တႅပ်ႈတတ်းၸႂ် “မၢႆၼိုင်ႈ ပၼ်ႁႅင်းတႆး ” ၼႆယူႇၸိုင် ၵိုင်ႇတၢင်း ၽူႈတႅမ်ႈလိၵ်ႈ ႁဵတ်းဢွၵ်ႇၸိူင်းႁူဝ်ၼႆႉယူႇ။

ၼပ်ႉယမ်သေ

ႁႅင်းသိူဝ်ၶႅင် တၢင်ႉယၢၼ်း

1.7.1999 - 10:00 ၵၢင်ၶမ်ႈ