ၶိုၼ်းထူပ်းႁၼ်ၵၼ်/တွၼ်ႈ 1 လုၵ်ႈဢွၼ်ႇသၢမ်ၵေႃႉ
တီႈဝဵင်းတိုတ်ႉၸၼ် ဢမ်ႇၶဵင်ႈ
ဢမ်ႇၼၼ် ဝဵင်းတၢင်ႉယၢၼ်း
ၼၢင်းယိင်းဢွၼ်ႇၵေႃႉၼိုင်ႈ ၸိုဝ်ႈမၼ်းၼၢင်းႁွင်ႉဝႃႈ ၶႅတ်ႉလႃး၊ ၸဵမ်မိူဝ်ႈမၼ်းပဵၼ်လုၵ်ႈ ဢွၼ်ႇၼၼ်ႉ မၼ်းၼၢင်းႁၵ်ႉမွၵ်ႇၶႅတ်ႉလႃးၼႃႇၼႃႇ။ ပေႃးထိုင်ၶၢဝ်းမွၵ်ႇၶႅတ်ႉလႃးမွၵ်ႇၼႆ မၼ်းၼၢင်း ၵႂႃႇမီးတီႈတႂ်ႈတူၼ်ႈမွၵ်ႇၶႅတ်ႉလႃး တင်းဝၼ်းသေၵဵပ်းမွၵ်ႇၶႅတ်ႉလႃး သွႆႉပဵၼ်ၶိူဝ်းပဵၼ်ၶိူဝ်းယူႇ။
ဝၼ်းၼိုင်ႈ ၽွင်းမၼ်းတိုၵ်ႉၵႂႃႇၵဵပ်းမွၵ်ႇၶႅတ်ႉလႃး တီႈၼႂ်းဝၢင်းဝတ်ႉၽြႃးလူင်ၼၼ်ႉ လႆႈႁၼ် ၵူၼ်းၸုမ်းၼိုင်ႈ မႃးၵၼ်ႇတေႃးၽြႃးလူင်ၼင်ႇၼၼ် ၶႅတ်ႉလႃး လွမ်တူၺ်းၶဝ် ဢၼ်ၶဝ်ႈမိူဝ်းၼႂ်းဝတ်ႉၼၼ်ႉသေ သိုပ်ႇၵဵပ်းမွၵ်ႇမၼ်းယူႇ။ ၼႂ်းၵွၵ်းမွၵ်ႇမၼ်းၼၼ်ႉ မွၵ်ႇၶႅတ်ႉလႃး သမ်ႉပေႃးမီးၶိုင်ႈၵွၵ်းၼိုင်ႈယဝ်ႉ။မၼ်းၼၢင်း သိုပ်ႇၵူမ်ႈၵဵပ်းမွၵ်ႇႁိူင်ၵႂႃႇတၢၼ်ႇႁိူဝ်ၵေႃႈ ဢမ်ႇႁူႉ လႆႈႁၼ် တိၼ်သီႇၶွၼ် မႃးၸုၵ်းဝႆႉ ၽၢႆႇၼႃႈမၼ်းလႄႈ မၼ်းၸင်ႇႁႅၼ်တူၺ်း၊ လႆႈႁၼ် ၵူၼ်းၸၢႆးဢွၼ်ႇၵေႃႉၼိုင်ႈလႄႈ ၵူၼ်းယိင်းဢွၼ်ႇ ၵေႃႉၼိုင်ႈ ၸုၵ်းသေ လွမ်တူၺ်းမၼ်းဝႆႉယူႇ။ ၶဝ်သၢမ်ၵေႃႉ လွမ်တူၺ်းၵၼ်ယူႉတင်းႁိူင် ၵူၼ်းၸၢႆး ဢွၼ်ႇၼၼ်ႉၸင်ႇထၢမ်
“မွၵ်ႇၸိူဝ်းၼႆႉ ႁဝ်းၵဵပ်းၸွင်ႇလႆႈ”
ၶႅတ်ႉလႃးၸင်ႇတွပ်ႇ
“လႆႈ...လႆႈယူႇ ၶိူဝ်သွင်ၵေႃႉၶႂ်ႈလႆႈမွၵ်ႇၶႅတ်ႉလႃးႁႃႉ”
ၸၢႆးဢွၼ်ႇၼၼ်ႉ ၸင်ႇၸီႉၼၢင်းယိင်းဢွၼ်ႇ ဢၼ်မႃးၸွမ်းမၼ်းၼၼ်ႉသေ
“ မိုၼ်ႇႁွမ် ၶႂ်ႈလႆႈၼႆဝႃႇ”
“ဢေႃး ၸိုဝ်ႈသူႁၢင်ႈလီၵျႃႉၼေႃ မိုၼ်ႇႁွမ်ၼႆႁႃႉ”
“ၸႂ်ႈဢိူဝ်ႈ... ၸိုဝ်ႈသူလႃႇ”
“ၶႅတ်ႉလႃး ၼႆဝႃႇ မႂ်းသမ်ႉၸိုဝ်ႈသင်လႃႇ”
ၶႅတ်ႉလႃးဝၢႆႇတူၺ်းသေ ထၢမ်ၸိုဝ်ႈၸၢႆးဢွၼ်ႇၼၼ်ႉလႄႈ ၸၢႆးၼၼ်ႉၸင်ႇတွပ်ႇဝႃႈ-
“ဝူင်းလိူၼ်”
“ၸိုဝ်ႈၸိူင်ႉၶိူဝ်သွင်ၵေႃႉၼႆႉ ၶႅတ်ႉလႃးဢမ်ႇတွၼ်ႉယၢမ်ႈငိၼ်းသေပွၵ်ႈ ‘မိုၼ်ႇႁွမ်’ ‘ဝူင်းလိူၼ်’ၼႆဝႃႇ ႁိႁိ”
ၶဝ်သၢမ်ၵေႃႉ ယုမ်ႉတေႃႇၵၼ်သေ ၶႅတ်ႉလႃး ၸင်ႇဢဝ်မွၵ်ႇမၼ်းသွႆႉၼိုင်ႈ ယိုၼ်ႈပၼ် မိုၼ်ႇႁွမ်ယဝ်ႉ။
“မိုၼ်ႇႁွမ် ယေႃႈ ၸိုင်ဝႃႈ သူၶႂ်ႈလႆႈမွၵ်ႇၶႅတ်ႉလႃး”
မိုၼ်ႇႁွမ်ၵေႃႈ ႁပ်ႉဢဝ်ၼူမ်တူၺ်းသေ ၶိုၼ်းဢဝ်ပၢႆႉသႂ်ႇၼိူဝ်ႁူဝ်မၼ်းယူႇ။ ဝူင်းလိူၼ်ၸင်ႇဝႃႈ “မိုၼ်ႇႁွမ် ၸိုင်မႂ်းဢမ်ႇဝႃႈ ‘ၸူမ်းယဝ်ႉ’ၼႆလႃႇ”
ၼႃႈမိုၼ်ႇႁွမ်တူႇၵႂႃႇၵမ်ႈၼိုင်ႈ ၶိုၼ်းမႄးယုမ်ႉတေႃႇၶႅတ်ႉလႃးသေ လၢတ်ႈဝႃႈ
“ၸူမ်းယဝ်ႉၶႅတ်ႉလႃး”
“လႆႈယူႇၵူၺ်း”
မိုၼ်ႇႁွမ်ၶူမ်တႃယၵ်ႉတူၺ်ႈဝူင်းလိူၼ်သေ ၽွင်းမိူဝ်ႈဝူင်းလိူၼ်ယၵ်ႉတူၺ်းမၼ်းၼၼ်ႉ
“ႁိူဝ်ႉ ၵူဝ်ဢမ်ႇလႆႈႁဵတ်းသြႃႇပိူၼ်ႈၼႃႇ”
ဝူင်ႈလိူၼ် ယၢမ်ႈႁူႉၸႂ်မိုၼ်ႇႁွမ် ၵႆႉၸၢင်ႈၸႂ်ၶွတ်း ၵႆႉယၢမ်ႈၸႂ်ပွတ်းလႄႈ မၼ်းၸင်ႇဝႃႈ
“မိုၼ်ႇႁွမ်ၼႆႉ ၸိူင်ႉၼႆၵေႃႈ ၸႂ်ၶွတ်းဝႃႇ”
“ၶွတ်းဢိူဝ်ႈ...”
ၶႅတ်ႉလႃး ငဝ်မိုင်သေ လွမ်တူၺ်းၶႃသွင်ၵေႃႉယူႇ။ ဝူင်ႈလိူၼ်ၸင်ႇဝႃႈ
“ၵဝ်ၶႂ်ႈႁဵတ်းသြႃႇမႂ်းဢမ်ႇၸိုဝ်ႈၵူၺ်း”
“ၸႂ်ႈၼႅၼ်ႇယဝ်ႉ”
ဝူင်းလိူၼ်ၸႂ်လမ်သေ ဢၢင်ႈၵႂႃႇမင်မိုၼ်ႇႁွမ်ယူူႇ။ ၶႅတ်ႉလႃး ၸင်ႇၼႅတ်ႈၸၼ်မိုဝ်း ဝူင်းလိူၼ်ဝႆႉသေ “ဝူင်းလိူၼ်...ယႃႇပေႁဵတ်း”
မိုၼ်ႇႁွမ်တႄႉ ၸႂ်လမ်သေ ၵၼ်ႈႁႆႈယူႇသိုတ်ႉသိုတ်ႉ၊ ၶႅတ်ႉလႃး ၸင်ႇၶိုၼ်းၵႂႃႇၶျေႃးမိုၼ်ႇႁွမ်
“တဵတ်ႇလႄႈ မိုၼ်ႇႁွမ် ယႃႇပေႁႆႈ...မႃးလႄႈ ႁဝ်းၵဵပ်းမွၵ်ႇၶႅတ်ႉလႃး ႁူင်ႈတူၵ်းၼမ်ၼႃႇယဝ်ႉ ၼေႈ...“
မိုၼ်ႇႁွမ် လွမ်တူၺ်းမွၵ်ႇၶႅတ်ႉလႃး ႁူင်ႈတူၵ်းဝႆႉၼိူဝ်လိၼ် သမ်ႉပေႃးလၢႆးလူင်ၵႂႃႇလႄႈ မၼ်းၸင်ႇၵႂႃႇၵဵပ်းမွၵ်ႇ ၸွမ်းၶႅတ်ႉလႃးယဝ်ႉ။
“ၶႅတ်ႉလႃး သူမႃးၵဵပ်းမွၵ်ႇၼႆႉ ၵူႈဝၼ်းႁႃႉ”
“မႃးဢိူဝ်ႈ... ႁဝ်းသွႆႉသေ ဢဝ်ၵႂႃႇၶၢႆဢိူဝ်ႈ”
“ဢဝ်ၵႂႃႇၶၢႆ ၼႆႁႃႉ”
“ၸႂ်ႈဢိူဝ်ႈ ပေႃးႁဝ်းၶၢႆၼႆ ႁဝ်းလႆႈငိုၼ်းၸၢႆႇဢိူဝ်ႈ”
“ဢူႈမႄႈသူ ဢမ်ႇပၼ်ငိုၼ်းၸၢႆႇသူႁႃႉ”
“မၢင်ပွၵ်ႈၵေႃႈပၼ်ယူႇ”
“ပေႃးၼႆ မိူဝ်ႈၽုၵ်ႈၵေႃႈ မိုၼ်ႇႁွမ် တေမႃးၵဵပ်းမွၵ်ႇၸွမ်းသူၼႃႈ”
“လီဢိူဝ်ႈ... မႃးလႄႈ ႁိူၼ်းသူမီးလႂ်’‘
“ႁိူၼ်းႁဝ်း မီးၼႂ်းဝၢင်းႁူင်းယႃဢိူဝ်ႈ”
“တင်းဝူင်းလိူၼ်ၶဝ် ယူႇတီႈလဵဝ်ၵၼ်ႁႃႉ”
ဝူင်းလိူၼ်ဝႆႁူဝ်သေ လၢတ်းဝႃႈ
“ဢမ်ႇယူႇ ႁိူၼ်းႁဝ်းမီးၼႂ်းႁူင်းႁဵၼ်းဢိူဝ်ႈ“
မိုၼ်ႇႁွမ်ၸင်ထၢမ်
“ႁိူၼ်းသူမီးလႂ်လႃႇ ၶႅတ်ႉလႃး?”
“မီးႁိမ်းၼႆႉၵူၺ်း တၢင်ႇပွၵ်ႈမႃး မႃးဢႅဝ်ႇႁဝ်းလေႃႇ”
“ဢိူဝ်ႈ...ႁဝ်းတေမႃးလႆ”
ၶဝ်သၢမ်ၵေႃႉ သိုပ်ႇၵဵပ်းမွၵ်ႇလူင်ၼိုင်ႈယဝ်ႉလူင်ႇၼိုင်ႈယူႇ။ ယူႇၵမ်းၼိုင်ႈ ၵူၼ်းလူင်ၶဝ်ဢွၵ်ႇၵျွင်းမႃး သေမႃးႁွင်ႉမိူဝ်းလႄႈ မိုၼ်ႇႁွမ်တင်းဝူင်းလိူၼ် ပွၵ်ႈမိူဝ်းၵႂႃႇယဝ်ႉ။ ၶႅတ်ႉလႃးၵေႃႉလဵဝ် သိုပ်ႇၵဵပ်းမွၵ်ႇယူႇၵူၺ်းမၼ်း။ ဢၼ်မၼ်းၵဵပ်းလႆႈမႃးၸိူဝ်းၼၼ်ႉ မၼ်းၼၢင်းသွႆႉသေ ဢဝ်ၵႂႃႇၶၢႆၼႂ်းၵၢတ်ႇ ႁဵတ်းၼၼ်ယူ ငိုၼ်းဢၼ်မၼ်းၶၢႆလႆႈမႃးၼၼ်ႉၵေႃႈ လႆႈမႃးပၼ်ၶိုၼ်း တီႈမႄႈၶဝ်ၼၼ်ႉသဵင်ႈသဵင်ႈယဝ်ႉ။
ၶႅတ်ႉလႃးတႄႉလႆႈႁူႉဝႃႈ ၽွင်းမိူဝ်ႈမၼ်းၵိူတ်ႇမႃးၼၼ်ႉ မႄႈမၼ်းတၢႆၵႂႃႇပႅတ်ႈမၼ်းသေ မႄႈၵဵပ်းၵေႃႉၼႆႉ ၵဵပ်းလဵင်ႉမၼ်းဝႆႉၼႆယဝ်ႉ။ ၵူၺ်းၵႃႈ ပေႃႈမၼ်းၼၢင်းပဵၼ်ၽႂ်ၼႆတႄႉ မၼ်းၼၢင်း ဢမ်ႇႁူႉ။
ဝၼ်းၼိုင်ႈ ၽွင်းၶဝ်သၢမ်ၵေႃႉ မႃးၵဵပ်းမွၵ်ႇၶႅတ်ႉလႃးယူႇၼၼ်ႉ မိုၼ်ႇႁွမ်ၸင်ႇဝႃႈ
“ဝူင်းလိူၼ်... မႂ်းဢမ်ႇမႃးၵဵပ်းမွၵ်ႇၸွႆႈႁဝ်းလႃႇ...ပေႃးပိူၼ်ႈမႃးၼမ်ၼႆ ႁဝ်းတေဢမ်ႇလႆႈသင်ယဝ်ႈ”
ဝူင်းလိူၼ်ဢမ်ႇပႃးၸႂ်သေတႃႉ လႆႈမႃးၵဵပ်းမွၵ်ႇၸွႆႈၶဝ်ယူႇ။ မၢင်ပွၵ်ႈ မၼ်းၵဵပ်းသေ ပၼ်မိုၼ်ႇႁွမ် မၢင်ပွၵ်ႈၵေႃႈ ပၼ်ၶႅတ်ႉလႃး ႁဵတ်းၼၼ်ယူႇ။
ဝူင်းလိူၼ် ဢဝ်မွၵ်ႇပၼ်ၶႅတ်ႉလႃးမိူဝ်ႈလႂ်သေဢမ်ႇဝႃႈ မိုၼ်ႇႁွမ် ၵေႉတႃ လွမ်တူၺ်းၸွမ်းယူႇတႃႇသေႇ။ ၽွင်းဝူင်းလိူၼ် ၶိုၼ်းၵဵပ်းမွၵ်ႇသေ မႃးပၼ်မိုၼ်ႇႁွမ်ၼၼ်ႉ
“မိုၼ်ႇႁွမ်...ယေႃႈ...ဢဝ်လႄႈ”
မိုၼ်ႇႁွမ်ၶႂ်ႈၸႃႉသေ
“ဢမ်ႇဢဝ်”
“ပဵၼ်သင်ယဝ်ႉလႃႇ?မိုၼ်ႇႁွမ်”
“ဢမ်ႇပဵၼ်သင်...ဢမ်ႇလူဝ်ႇမႃးပၼ်ၵဝ် ၵႂႃႇပၼ်ၶႅတ်ႉလႃးတိၵ်းတိၵ်းလႃႈ”
“ပၼ်တင်းသွင်ၵေႃႉဢိူဝ်ႈ”
“ၸႂ်ႈယဝ်ႈ ပေႃးပၼ်ၶႅတ်ႉလႃး သမ်ႉပၼ်ၼမ်ဝႃႈၼမ် ပေႃးပၼ်ၵဝ်သမ်ႉ ပၼ်ဢိတ်းဢွၼ်ႇၼိုင်ႈၵူၺ်း...ၵဝ်ဢမ်ႇၶႂ်ႈလႆႈ ဢမ်ႇလူဝ်ႇမႃးပၼ်ၵဝ်”
မိုၼ်ႇႁွမ် ၼႃႈသူမ်ႈသေ ၸႃႉယူႇၼင်ႇၼၼ် ဝူင်းလိူၼ်ၸင်ႇဝႃႈ
“မိုၼ်ႇႁွမ်...ၶႅတ်ႉလႃးလူဝ်ႇၵႂႃႇၶၢႆလႄႈ ၵဝ်ပၼ်မၼ်းၼမ်ဢိူဝ်ႈ... မႂ်းတမ်ႉဢမ်ႇလူဝ်ႇၵႂႃႇၶၢႆ ဢမ်ႇၸိုဝ်ႈႁိူဝ်...လႆႈတၢၼ်ႇၼႆႉၵေႃႈ ပေႃးယဝ်ႉလေႃႇ”
မိုၼ်ႇႁွမ်ဢဝ်မွၵ်ႇဢၼ်မီးၼႂ်းမိုဝ်းမၼ်းၼၼ်ႉ ထိုမ်ႈပႅတ်ႈမူတ်းမူတ်းသေႁႆႈယူႇယဝ်ႈ။
“ၵႂႃႇလႄႈ ယႃႇမႃးႁဵတ်းၵေႃႉၵဝ်”
ဝူင်းလိူၼ် ထူၺ်ႈၸႂ်လူင်ၵမ်းၼိုင်ႈသေ
“ပေႃးဢမ်ႇႁဵတ်းၵေႃႉမႂ်း ၵဝ်တေၵႂႃႇႁဵတ်းၵေႃႉၽႂ်လႃႇ?”
“ၽႂ်ႁူႉမႂ်းလႃႇ ၵႂႃႇႁဵတ်းၵေႃႉၶႅတ်ႉလႃးၼၼ်ႉယိုင်”
ၽွင်းၼၼ်ႉ ၶႅတ်ႉလႃး ၽႅဝ်မႃးႁိမ်းၶႃသွင်ၵေႃႉသေ
“မိုၼ်ႇႁွမ်”
“ဢမ်ႇလူဝ်ႇမႃးႁွင်ႉၵဝ်”
ၶႅတ်ႉလႃးၸင်ႇ လွမ်တူၺ်းဝူင်းလိူၼ်သေ
“ဝူင်းလိူၼ် မႂ်းဝႃႈသင်တီႈမိုၼ်ႇႁွမ်”
“ၵဝ်ၸၢင်ႈၵႂႃႇဝႃႈသင် မၼ်းဝႃႈ ၵဝ်ပၼ်မၼ်းမွၵ်ႇဢေႇၼႃႇ၊ သမ်ႉပၼ်မႂ်းၼမ်ၼႆဝႃႇ ၵွပ်ႈၼၼ် မၼ်းၶႂ်ႈၸႃႉဢိူဝ်ႈၼၼ်ႉ”
“ဝႃႈၼၼ်ႁႃႉ”
ၶႅတ်ႉလႃးၶိုၼ်းၵႂႃႇၸူးမိုၼ်ႇႁွမ်သေ
“မိုၼ်ႇႁွမ် ယေႃး...မွၵ်ႇၸိူဝ်းၼႆႉ ၶႅတ်ႉလႃးဢမ်ႇဢဝ်ယဝ်ႉ မိုၼ်ႇႁွမ်ဢဝ်မူတ်းမူတ်းသေလႄႈ”
မိုၼ်ႇႁွမ်ၶႂ်ႈၸႃႉသေ ႁိူတ်းသႂ်ႇ
“ဢမ်ႇဢဝ်...”
“ဢဝ်လႄႈ ယႃႇပေၸႃႉတေႃႇႁဝ်းလေႃႇ ယေႃႈ...”
“ၵဝ်ဢမ်ႇဢဝ်ၼႆၵေႃႈ”
“ဢဝ်လႄႈ မိုၼ်ႇႁွမ်ယႃႇပေၶႂ်ႈၸႃႉယူႇ”
မိုၼ်ႇႁွမ်ၼႆႉ မၼ်းၼၢင်းပဵၼ်ၵူၼ်းတေႃးသယႂ်ႇ ၸႂ်လမ်ငၢႆႈၵေႃႉၼိုင်ႈ မၼ်းၸႂ်လမ်ၼႃႇသေ ၸင်ႇၸၵ်ႉဢဝ် ၵွၵ်းမွၵ်ႇၶႅတ်ႉလႃးၼၼ်ႉ ထွၵ်ႇငူပ်ႉပႅတ်ႈသေ ဢဝ်တိၼ်မၼ်း ယဵပ်ႇၼူတ်ႈမွၵ်ႇၶႅတ်ႉလႃးၼၼ်ႉ ႁႂ်ႈလႅဝ်မူတ်းယူႇ။
“ႁိူဝ်ႈ...ၶႂ်ႈႁႂ်ႈၵဝ်ဢဝ်ၵေႃႈ...ၶႂ်ႈႁႂ်ႈၵဝ်ဢဝ်ၵေႃႈ”
လႆႈႁၼ်မိုၼ်ႇႁွမ် ယဵပ်ၼူတ်ႈပႅတ်ႈ မွၵ်ႇၶႅတ်ႉလႃးၼင်ႇၼၼ် ၼႂ်းၸႂ်ၶႅတ်ႉလႃးတႄႉ မိူၼ်ပိူၼ်ႈ ယဵပ်ႇႁူဝ်ၸႂ်မၼ်းၼၢင်းယူႇယဝ်ႈ။ ဝူင်းလိူၼ် ၸင်ႇမႃးၸမ်မိုၼ်ႇႁွမ်သေ
“မိုၼ်ႇႁွမ် ယႃႇပေႁဵတ်း”
“ႁဵတ်းဢိူဝ်ႈ...ႁဵတ်းဢိူဝ်ႈ... ယႃႇမႃးၸၼ်ၵဝ်”
ၶႅတ်ႉလႃးလွမ်တူၺ်း မွၵ်ႇဢၼ်မိုၼ်ႇႁွမ်ယဵပ်ႇလႅဝ်ၼၼ်ႉသေ မၼ်းၼၢင်းသေလၢႆၼႃႇလႄႈ ၸင်ႇၵႂႃႇယိပ်းဢဝ် မွၵ်ႇလႅဝ်ၸိူဝ်းၼၼ်ႉသေ လွမ်တူၺ်းတႃပေႃးဢမ်ႇၽႅပ်ႉယူႇ။ မိုဝ်းဢွၼ်ႇမၼ်းၼၢင်း ဢၼ်ၵွပ်ႇဢဝ်မွၵ်ႇၼၼ်ႉ သၼ်ႇသၼ်ႇသၢႆသၢႆသေ ၼမ်ႉတႃဢွၼ်မၼ်းၼၢင်း လွမ်လွမ်တူၵ်းသႂ်ႇ ၶႅတ်ႉလႃးႁွမ်ယူႇ။ ဝူင်းလိူၼ် ၸင်ႇၶိုၼ်းမႃးၸူးၶႅတ်ႉလႃးသေ
“ၶႅတ်ႉလႃး...ယႃႇပေႁႆႈ ၵဝ်တေၶိုၼ်းၵဵပ်းပၼ်မႂ်းၼမ်ၼမ်ၼႃႈ”
ၶႅတ်ႉလႃး ၸဵတ်ႉပႅတ်ႈၼမ်ႉတႃမၼ်းသေ သိုပ်ႇၵၼ်ႈႁႆႈယူူႇသိုတ်ႉသိုတ်ႉ။ ၽွင်းမိုၼ်ႇႁွမ် တိုပ်ႈတိၼ်သေ ပႆဢွၵ်ႇၵႂႃႇၼၼ်ႉ ဝူင်းလိူၼ်ၸင်ႇဝႃႈ
“မိုုၼ်ႇႁွမ်...မႂ်းတေၵႂႃႇလႂ်?”
“ၵႂႃႇမိူဝ်းဢိူဝ်ႈ”
ဝူင်းလိူၼ်ဢႅၼ်ႇၵႂႃႇၸွမ်းလင်မိုၼ်ႇႁွမ်သေ
“မိုၼ်ႇႁွမ် ၵမ်ႉလႄႈ”
“ဢမ်ႇလူဝ်ႇမႃးၸွမ်းၵဝ်”
မိုၼ်ႇႁွမ်ဝႃႈၼၼ်သေ သိုပ်ႇမိူဝ်းၵႂႃႇ။ ဝူင်းလိူၼ် ဝၢႆႇတူၺ်းမႃး လႆႈႁၼ်ၶႅတ်ႉလႃး တိုၵ်ႉလိူၵ်ႈဢဝ်တူၺ်း မွၵ်ႇဢၼ်လီမၼ်းယူႇလႄႈ မၼ်းၸင်ႇမႃးႁိမ်းၶႅတ်ႉလႃးသေ
“ၶႅတ်ႉလႃး ယႃႇပေၸႂ်လမ်တေႃႇမိုၼ်ႇႁွမ်ၼႃႈ မၼ်းတိုၼ်းၵႆႉၸၢင်ႈၸႃႉ ႁဵတ်းၼႆတႃႇသေယဝ်ႉ’
ဝူင်းလိူၼ် ၶိုၼ်းမႃးၸွႆႈၵဵပ်းပၼ် မွၵ်ႇၶႅတ်ႉလႃးယူႇ။ ၶႅတ်ႉလႃးၸင်ႇဝႃႈ
“ဝူင်းလိူၼ် မႂ်းၵႂႃႇမိူဝ်းၶျေႃးမိုၼ်ႇႁွမ်လႃႈ ၵဝ်တေသိုပ်ႇၵဵပ်းမွၵ်ႇၵူၺ်းၵဝ်ၵေႃႈ လႆႈယူႇ မိူဝ်းလႄႈ ...“
“ပေႃးၼႆ ၵဝ်တေမိူဝ်းၵွၼ်ႇၼႃႈ”
ဝူင်းလိူၼ် လုၵ်ႉလႅၼ်ႈလမ်းမိူဝ်းၸွမ်းလင်မိုၼ်ႇႁွမ်ယူႇ။
ၶႅတ်ႉလႃးၵေႃႉလဵဝ်သိုပ်ႇၵဵပ်းမွၵ်ႇသေ သွႆႉဢဝ်ၵႂႃႇၶၢႆၵေႃႈ ဢမ်ႇလႆႈၼမ်။ ၽိူဝ်ႇမၼ်းၽႅဝ်ႁိူၼ်း ဢဝ်ငိုၼ်းၵႃႈမွၵ်ႇ ပၼ်မႄႈၵဵပ်းၶဝ်ငိုၼ်းႁႅင်ႉဢေႇၼႃႇလႄႈ မႄႈၵဵပ်းၶဝ်ထၢင်ႇဝႃႈ မၼ်းၵႂႃႇၸၢႆႇၵိၼ်ပႅတ်ႈ ၼႆသေ ပွင်ႉမၼ်းယူႇ။
“ၶႅတ်ႉလႃး...ၵႃႈၶၢႆမွၵ်ႇမႂ်းပႄႉလႆႈဢေႇလႃႇ”
ၶႅတ်ႉလႃးၵူဝ်ႁႄသေတွပ်ႇ
“မိူဝ်ႈၼႆႉ ၵူၼ်းမႃးၵဵပ်းမွၵ်ႇ ၼမ်လႄႈ ၸင်ႇလႆႈဢေႇဢေႃႈ”
“မႂ်းယႃႇပေလႅၼ်ၵဝ်ၼႃႈ”
“ဢမ်ႇလႅၼ်ၶႃႈ”
မႄႈၵဵပ်းၶဝ် ၶိုၼ်ႈသဵင်ႁႅင်းသေ
“ၵႂႃႇၵဵပ်းမွၵ်ႇတင်းဝၼ်း လႆႈမႃးတၢၼ်ႇၼႆႉၵူၺ်းၼႆႉ မႂ်းၵႂႃႇသိုဝ်ႉၵိၼ်သင်လၢတ်ႈလူး...”
“ၶႅတ်ႉလႃးဢမ်ႇသိုဝ်ႉၵိၼ်သင်ၶႃႈ”
“ဢႃႈသူပ်းမႂ်းလူး”
မႄႈၵဵပ်းၶဝ် ၼူမ်တူၺ်းသူပ်းမၼ်း ဢမ်ႇလႆႈငိၼ်းသႅဝ်သင်လႄႈ
“ ၵႂႃႇႁႃဢၢပ်ႇၼမ်ႉမႂ်းလႄႈ ”
ၶႅတ်ႉလႃး ၸင်ႇၽၢတ်ႇမႄႈၵဵပ်းသေ ၵႂႃႇႁႃဢၢပ်ႇၼမ်ႉမၼ်းယူႇ။
ထႅင်ႈဝၼ်းၼိုင်ႈ ၽွင်းၶႅတ်ႉလႃး မႃးၵဵပ်းမွၵ်ႇၸဵမ်ၸဝ်ႉၼၼ်ႉ မိူဝ်ႈၼႆႉ ၽႂ်ၵေႃႈဢမ်ႇမႃးၵဵပ်းမွၵ်ႇ လႄႈမၼ်းလႆႈမွၵ်ႇၼမ်တႄႉတႄႉ။
“ ၶႅတ်ႉလႃး ”
ငိၼ်းသဵင်ႁွင်ႉၸိုဝ်ႈမၼ်းလႄႈ ၶႅတ်ႉလႃးဝၢႆႇတူၺ်းလႆႈႁၼ် ဝူင်းလိူၼ်ဢႅၼ်ႇမႃးၸူးမၼ်းယူႇ။
“ဝူင်းလိူၼ် မိုၼ်ႇႁွမ်လူး?”
“ မၼ်းဢမ်ႇမႃး ”
“ ႁဵတ်းသင် မၼ်းဢမ်ႇမႃးလႃႇ?”
“ မၼ်းဢမ်ႇပေႃးယူႇလီဝႃႇ ”
“ မၼ်းပဵၼ်သင်?”
ဝူင်းလိူၼ် ထူၺ်ႈၸႂ်လူင်ၵမ်းၼိုင်ႈသေ
“ဢိုဝ်ႈ...ပေႃးမၼ်းၸႂ်လမ် မိူဝ်ႈလႂ်သေဢမ်ႇဝႃႈ မၼ်းၵႆႉပဵၼ် ဢမ်ႇယူႇလီဢိူဝ်ႈ...ဢူႈၶဝ်လၢတ်ႈၵဝ်ဝႃႈ ‘ပေႃးႁဵတ်းၵေႃႉမိုၼ်ႇႁွမ် ယႃႇပေႁႂ်ႈမိုၼ်ႇႁွမ်ၸႂ်လမ်’ၼႆဝႃႇ”
“ ၵွပ်ႈသင်ၼေႃ ”
“ ဢမ်ႇႁူႉလႄႇ... ၵွပ်ႈၼႆ ၵဝ်ၵုမ်ႇလႆႈဝွၼ်းမိုၼ်ႇႁွမ်ႇတႃႇသေႇယဝ်ႉၼႆႉ ”
ၶႅတ်ႉလႃးၸင်ႇထူၺ်ႈၸႂ်လူင် ၵမ်းၼိုင်ႈသေ
“ဢိုဝ်ႈ... မိုၼ်ႇႁွမ်ၵေႃႈ ၸႂ်လမ်ငၢႆႈတႄႉဢိူဝ်ႈ ”
ၶႃသွင်ၵေႃႉ သိုပ်ႇၵဵပ်းမွၵ်ႇၶႅတ်ႉလႃး ဢၼ်ႁူင်ႈတူၵ်း မႃးၸိူဝ်းၼၼ်ႉယူႇ၊ ဝူင်းလိူၼ်ၵေႃႈ ၸွႆႈၵဵပ်းမွၵ်ႇပၼ် ၶႅတ်ႉလႃးလႄႈၶႅတ်ႉလႃးလႆႈမွၵ်ႇၼမ်တႄႉတႄႉ။
“ဝူင်းလိူၼ်...မိူဝ်ႈၼႆႉတႄႉ ၵဝ်တေဢမ်ႇလႆႈၺႃးၵႂၢမ်းပွင်ႉမႄႈမွၼ်းႁဝ်းယဝ်ႉ ”
“မိူဝ်ႈဝႃႈ မႂ်းၺႃးၵႂၢမ်းပွင်ႉထႃႉႁႃႉ ”
“ ၸႂ်ႈဢိူဝ်ႈ... ၵွပ်ႈပိူဝ်ႈၵဝ်ၶၢႆလႆႈငိုၼ်းၵႃႈမွၵ်ႇ ဢေႇၼႃႇၼႆဝႃႇ ”
“ ဢိုဝ်ႈ...မႄႈမွၼ်းသူႁၢႆႉၵျႃႉလႃႇ ”
“ တေၸၢင်ႈႁဵတ်းႁိူဝ်လႃႇ ”
ၶႅတ်ႉလႃးလႄႈဝူင်းလိူၼ် ၼင်ႈတႂ်ႈတူၼ်ႈၶႅတ်ႉလႃးသေ သွႆႉမွၵ်ႇၶႅတ်ႉလႃးယူႇ။ ၶႅတ်ႉလႃးၸင်ႇထၢမ်
“ ဝူင်းလိူၼ် သူလုၵ်ႉတီႈလႂ် ၶၢႆႉမႃးတၢင်ႉယၢၼ်းၼႆႉ?”
“ ႁဝ်းလုၵ်ႉလႃႈသဵဝ်ႈ ၶၢႆႉမႃးဢိူဝ်ႈ မႄႈႁဝ်းပဵၼ်မေႃသွၼ်သေ တေမႃးႁဵတ်းမေႃသွၼ် တီႈၼႆႈၼႆဝႃႇ”
“မိုၼ်ႇႁွမ်ၶဝ်ၵေႃႈ လုၵ်ႉလႃႈသဵဝ်ႈၶၢႆႉမႃးႁႃႉ?”
“ ၸႂ်ႈဢိူဝ်ႈ... ဢူႈၶဝ်ပဵၼ်ၶူးမေႃယႃလူင်လႄႈ တူၵ်းၵၢၼ်တီႈႁူင်းယႃ တၢင်ႉယၢၼ်း ၼႆသေ လုၵ်ႉလႃႈသဵဝ်ႈ ၶၢႆႉမႃးၼင်ႇၵဝ်ႇဢိူဝ်ႈ၊ ႁႃႈသွင်ၵေႃႉၵေႃႈ မႃးၸွမ်းပေႃႈမႄႈႁဝ်းသေ တေမႃးၶိုၼ်ႈႁူင်းႁဵၼ်း တီႈတၢင်ႉယၢၼ်းၼႆႉဢိူဝ်ႈ ”
“ တႄႉႁႃႉ... မႄႈမွၼ်းႁဝ်းၵေႃႈ တေဢဝ်ၵဝ်ယူႇႁဵၼ်းဝႃႇပီၼႆႉ ”
“ ပေႃးၼႆ ႁဝ်းတေလႆႈၶိုၼ်ႈႁဵၼ်းၸွမ်းၵၼ်ဢိူဝ်ႈၼႆႉ ”