ၶိုၼ်းထူပ်းႁၼ်ၵၼ်/တွၼ်ႈ 18 ၶႅတ်ႉလႃးပဵၼ်ၽႂ်
ဝၢႆးသေ မိုၼ်ႇႁွမ်ဢမ်ႇမီးယဝ်ႉ တႃႇတေသိုပ်ႇယူႇႁိူၼ်းမိုၼ်ႇႁွမ်ၶဝ်ၼၼ်ႉ ၶႅတ်ႉလႃးၵေႃႈ ဢမ်ႇသိူဝ်းၸႂ်။ ၵွပ်ႈၼႆ မၼ်းတႅပ်းတတ်းၸႂ်မၼ်းႁင်းၵူၺ်းသေ ႁႅၼ်းၶူဝ်းမၼ်း ဢၼ်မၼ်းပႃးမႃးၼၼ်ႉ သႂ်ႇထူင်မၼ်းဝႆႉၵူႈပိူင်ပိူင်ယူႇ။
ၵၢင်ၶိုၼ်း သၢႆလိူၼ်ဢွၼ်ႇလႅင်း ဝွႆးၵေဝွႆးၵေဝႆႉသေ ၶႅတ်ႉလႃးတိဝ်ႈဢဝ်ထူင်မၼ်း လၵ်ႉဢွၵ်ႇႁိူၼ်းမႃး ၽွင်းပိူၼ်ႈၼွၼ်းယဵၼ်တင်းႁိူၼ်း ။ မၼ်းၼၢင်းမႄးဢိုတ်းၶိုၼ်း ၽၵ်းတူ လီလီသေ ဢွၵ်ႇမႃးၸူး ၽၵ်းတူႁူဝ်ႉဝၢင်းယူႇ။ ၵွပ်ႈပိူဝ်ႈ လႆႈဝႃႈ ပဵၼ်တီႈသဝ်းထင်မၼ်းၼၢင်းမႃး ၵေႃႈႁိုင်ယဝ်ႉလႄႈ မၼ်းၶိုၼ်းဝၢႆႇတူၺ်း ႁိူၼ်းမိုၼ်ႇႁွမ်ၶဝ် ဝႆႉၸႂ်ပဵၼ်ၵမ်းလိုၼ်းသုတ်းၼႆယူႇ။ ၼမ်ႉတႃသႂ်ဢွၼ်ႇမၼ်းၼၢင်း လႆတူၵ်းမႃး ယွၼ်ႉပိူဝ်ႈသင်ၼႆ မၼ်းဢမ်ႇႁူႉ။ မၼ်းၼၢင်းတိုတ်ႉၸႂ်သေ ဝၢႆႇၼႃႈ ဢၢင်းတေဢွၵ်ႇၽၵ်းတူဝၢင်းယူႇ။
“ ၶႅတ်ႉလႃး ”
ယၢင်ႈတိၼ်ၶႅတ်ႉလႃး ဢၼ်ဢၢင်ႈသိုပ်ႇယၢင်ႈၵႂႃႇၽၢႆႇၼႃႈၼၼ်ႉ ၶိုၼ်းၵိုင်ႉၵၢင်ႉ ယိုတ်းၵိုတ်းၵႂႃႇၵမ်းလဵဝ်...မၼ်းဝၢႆႇတူၺ်း သဵင်ႁွင်ႉၸိုဝ်ႈမၼ်း မေႃးမႃးၼိူဝ်ႁိူၼ်း တီႈဢွမ်ႇၵတ်းဢွမ်ႇယဵၼ် ၼၼ်ႉယူႇ။ ၶမ်ႈၼၼ်ႉ ဢူႈမိုၼ်ႇႁွမ်ၶဝ် မေႃယႃလူင်ၵေႃႈ ၼွၼ်ႈဢမ်ႇလပ်းလႆႈလႄႈ ၸင်ႇမႃး ၼင်ႈယူႇတီႈဢွမ်ႇၵတ်းဢွမ်ႇယဵၼ် တီႈၼိူဝ်ႁိူၼ်းၶဝ်ၼၼ်ႉသေ ၸင်ႇႁၼ်ၶႅတ်ႉလႃး လႄႈၸင်ႇႁွင်ႉယဝ်ႉ။
“ ၶႅတ်ႉလႃး ...ၵိုတ်ႈလူး ”
ၶႅတ်ႉလႃးၵေႃႈ ၵိုတ်းဝႆႉယူႇ။ လုင်းသႂ်သွင်ႇ လူင်းၶူဝ်လႆမႃးၽႂ်းၽႂ်း ပႃႈႁွမ်ၵေႃႈ တိုၼ်ႇသေ ၸင်ႇလုၵ်ႉမႃးၸွမ်း တီႈၼွၵ်ႈ ပႃႈႁွမ်တႆႈၽႆး တီႈၼွၵ်ႈလႅင်းၵႂႃႇသဵင်ႈ၊ ၶဝ်ၽႅဝ်မႃး ႁိမ်းၶႅတ်ႉလႃးသေ
“ ၶႅတ်ႉလႃး ယိင်ႈတေၵႂႃႇလႂ်ၼႆႉ?”
“ ၶႅတ်ႉလႃး ဢမ်ႇၶႂ်ႈယူႇတီႈၼႆႈယဝ်ႉလႄႈ ၶႂ်ႈဢွၵ်ႇၽၢတ်ႇယၢၼ်တီႈၼႆႈဢေႃႈ ”
“ ၶႅတ်ႉလႃး တေၵႂႃႇလႂ် ၵၢင်ၶမ်ႈၵၢင်ၶိုၼ်းလူင်ၸိူင်ႉၼႆ ၼၢင်းယိင်းၵေႃႉလဵဝ် ဢွၵ်ႇၵႂႃႇၸိူင်ႉၼႆ ဢမ်ႇတူၵ်းထုၵ်ႇၵူၺ်း၊ မႃး...ႁဝ်းၶဝ်ႈမိူဝ်ႈၼႂ်းႁိူၼ်း မိူဝ်ႈၽုၵ်ႈယိင်ႈၶႂ်ႈၵႂႃႇလႂ်ၼႆၵေႃႈ ၸင်ႇၵွႆႈလၢတ်ႈလႄႈ ”
ပႃႈႁွမ်ၵေႃႈ ၵႂႃႇယိပ်းမိုဝ်း ၶႅတ်ႉလႃးသေ
“ ၶႅတ်ႉလႃး ယႃႇပၢႆႈပႅတ်ႈႁဝ်းလႄႈ ပၢႆသလိူဝ်မိုၼ်ႇႁွမ်ၵႂႃႇပႅတ်ႈႁဝ်းတႄႉသေ ယိင်ႈသမ်ႉ တေပၢႆႈပႅတ်ႈႁဝ်းထႅင်ႈႁႃႉ?...ယႃႇၵႂႃႇလႂ်ယဝ်ႉၼႃႈ မႃးႁဝ်းမိူဝ်းၼႂ်းႁိူၼ်း ”
ပႃႈႁွမ် ၸၼ်ၶႅတ်ႉလႃးၵေႃႈ ၶႅတ်ႉလႃး ဢမ်ႇၶႂ်ႈၶဝ်ႈမိူဝ်း။ ၽွင်းၼၼ်ႉ ၶူဝ်းၶႅတ်ႉ လႃး ဢၼ်သႂ်ႇဝႆႉ ၼႂ်းထူင်မၼ်းၼၼ်ႉ ဝူင်တူၵ်းၵႂႃႇၼိူဝ်လိၼ်လႄႈ မၼ်းၼႅတ်ႈၶိုၼ်းၵဵပ်းဢဝ်ယူႇ။ မေႃယႃလူင် လႆႈႁၼ်ၼင်ႇၼၼ်သေ ၸင်ႇထၢမ်...
“ ၶႅတ်ႉလႃး ၼၼ်ႉပဵၼ်သင်?”
“ ပဵၼ်ဢႅပ်ႇၼင် ၶႃႈဢေႃႈ ”
“ ပၼ်ၶူးမေႃယႃ ယွၼ်းတူၺ်းၽွင်းလူး ”
ၶႅတ်ႉလႃး ဝႆႁူဝ်သေ
“ ႁိူဝ်ႉဢိုဝ်း...ယိင်းဢမ်ႇလၵ်ႉဢဝ်ၶူဝ်းၼႂ်းႁိူၼ်းသေဢၼ်ၶႃႈ ၼႂ်းထူင်ၼႆႉၵေႃႈ ပဵၼ်ၶူဝ်းယိင်း ဢၼ်ယိင်းလႆႈမႃးၼၼ်ႉၵူၺ်းဢေႃႈ ”
“ ႁဝ်းဢမ်ႇဝႃႈ ၶႅတ်ႉလႃးဢဝ်ၶူဝ်းၼႂ်းႁိူၼ်းၼင်ႇၵဝ်ႇ...ၶႂ်းယွၼ်းတူၺ်း ဢႅပ်ႇၼင်ႇၼၼ်ႉၵူၺ်း ”
ၶႅတ်ႉလႃးၵေႃႈ ဢဝ်မႃးပၼ်လႄႈ လုင်းသႂ်သွင်ႇ ၸင်ႇႁပ်ႉဢဝ်သေ ယၵ်ႉတူၺ်း တႃပေႃးဢမ်ႇၽႅပ်ႉယဝ်ႉ။ မိုဝ်းမၼ်းသၼ်ႇသၼ်ႇသၢႆသၢႆ ၽုၺ်ႇတူၺ်းဢႅပ်ႇၼင်ၼၼ်ႉ ၸင်ႇၸၼ်ဢွၵ်ႇမႃး သၢႆၶေႃႈငိုၼ်း ဢၼ်ပႃး ၶႅပ်းလၢဝ်ၶႅပ်းၼိုင်ႈ၊ သမ်ႉလႆႈႁၼ်ၶႅပ်းႁၢင်ႈဢၼ်ၼိုင်ႈ...
“ ၶႅတ်ႉလႃး ၸိူဝ်းၼႆႉ မႂ်းလႆႈမႃးတီႈလႂ်? လၢတ်ႈလူး ”
“ ပဵၼ်ၶူဝ်းမႄႈၶႃႈ ပၼ်ၶႃႈဝႆႉဢေႃႈ ”
လုင်းသႂ်သွင်ႇ ဢၢမ်းၵႂႃႇတႄႉတႄႉသေ သူပ်းမၼ်း သမ်ႉပေႃးဢမ်ႇၸၢင်ႈတုပ်ႇယဝ်ႉ။ မၼ်းလွမ်တူၺ်း ၶႅပ်းႁၢင်ႈၼၼ်ႉလီလီသေ
“ ၼႆႉပဵၼ်ႁၢင်ႈ မႄႈမႂ်းႁႃႉ ၶႅတ်ႉလႃး?”
“ ၸႂ်ႈဢေႃႈ ”
“ သၢႆၶေႃး ငိုၼ်းၼႆႉလူး?”
“ ပဵၼ်ၶူဝ်းမႄႈၶႃႈ ဝႆႉပၼ်ၶႃႈ ၸဵမ်မိူဝ်ႈမၼ်းပႆႇတၢႆဢေႃႈ ”
“ မႄႈမႂ်းတၢႆႁိုင်ယဝ်ႉႁႃႉ?”
“ သၢဝ်းပီပၢႆယဝ်ႉၶႃႈ ”
လုင်းသႂ်သွင်ႇ ပွင်ႇၸႂ်ငွၵ်းႁူဝ်မၼ်းသေ လွမ်တူၺ်း ၶႅတ်ႉလႃး ၸဵမ်ႁူဝ်တေႃႇ တိၼ်ယူႇ။ လုင်းသႂ်သွင်ႇ ၸင်ႇယိပ်း သၢႆၶေႃးငိုၼ်းၼၼ်ႉသေ
“ ၶႅတ်ႉလႃး ၸွင်ႇမႂ်းႁူႉပိုၼ်းသၢႆၶေႃး ဢွၼ်ႇၼႆႉႁိုဝ်?”
“ ဢမ်ႇႁူႉၶႃႈ ”
“ ပေႃးမႂ်းၶႂ်ႈႁူႉၼႆ မေႃယႃလူင် တေၶႆႈၼႄမႂ်းဢိူဝ်ႈ ”
မၢၵ်ႇတႃၶႅတ်ႉလႃး မိုၼ်းၵႂၢင်ႈလိူမ်ႈမႃးဢဵင်ဢဵင်သေ
“ ၶႂ်ႈႁူႉၶႃႈဢေႃႈ ၶူးမေႃယႃလူင် ”
“ မႃးလႄႈႁဝ်းမိူဝ်းၶိုၼ်းၼႂ်းႁိူၼ်း မိူဝ်းၶႆႈၼႂ်းႁိူၼ်ႈၵႂႃႈ...တီႈၼွၵ်ႈၼႆႉ ၵတ်းဢိူဝ်ႈ၊ ပေႃးၶႅတ်ႉလႃႈ ႁူႉပိုၼ်းသၢႆၶေႃးၼႆႉယဝ်ႉၸိုင် ၶႅတ်ႉလႃးၶႂ်ႈၵႂႃႇလႂ် ၼႆၵေႃႈ ၸင်ႇတႅပ်းတတ်းဢဝ်လႃႈ ”
ၶဝ်ၶိုၼ်းဢွၼ်ၵၼ် ၶဝ်ႈမႃးၼင်ႈ ၼႂ်းလုၵ်းၶႅၵ်ႇသေ လုင်းသႂ်သွင်ႇမႃးႁိုဝ်ႈၼမ်ႉၼဵင်ႈၶူမ် သူတ်ႉဝၢၼ်ၸႂ်ဝၢၼ်ၶေႃးမၼ်းယူႇ။
“ ၶႅတ်ႉလႃး...ၵပ်းၵၢႆႇလူၺ်ႈ သၢႆၶေႃးၼႆႉ မိူဝ်ႈပူၼ်ႉမႃးသၢဝ်းပီပၢႆပၢႆၼၼ်ႉ ၶိုၼ်းလိူၼ် လပ်းၶိုၼ်ႈၼိုင်ႈ၊ တီႈမိူင်းယၢႆ ၵူၼ်းသီႇၵေႃႉ မႃးပူၵ်းမေႃယႃဢွၼ်ႇၵေႃႉၼိုင်ႈ၊ ႁႂ်ႈၵႂႃႇယႃပၼ်ၵူၼ်းပဵၼ်ၶဝ် ဢၼ်ပဵၼ်ၵိၼ်းၼႃႇၼၼ်ႉၼႆယဝ်ႉ။ မေႃယႃဢွၼ်ႇၵေႃႉၼၼ်ႉ ထၢင်ႇဝႃႈ ဢမ်ႇၵႆၼႆသေ ၼႅတ်ႈဢဝ် ထူင်ယႃႈယႃမၼ်း ၵႂႃႇၸွမ်းၶဝ် မိူဝ်ႈၶဝ်ၽႅဝ်ၵႂႃႇတီႈသၢပ်ႇဝဵင်း ၶဝ်ဢဝ်မေႃယႃၶီႇမႃႉ ဢဝ်ၵွင်ႈငႃမၼ်း ပူၵ်ႉတႃမၼ်းသေ ဢွၼ်ၵႂႃႇၼႂ်းထိူၼ်ႇတင်းၶိုၼ်း၊ ၵႂႃႇၽႅဝ်လႂ်ၵေႃႈ မေႃယႃဢွၼ်ႇၼၼ်ႉ ဢမ်ႇႁူႉ ၸမ်ၼႃႈမိူင်းတေလႅင်း ၸင်ႇၽႅဝ်ၵႂႃႇတီႈၶဝ်ဝႆႉ ၵူၼ်းပဵၼ်ၶဝ်ၼၼ်ႉသေ ႁႂ်ႈမေႃယႃဢွၼ်ႇယႃပၼ်ယဝ်ႉ။ မေႃယႃဢွၼ်ႇၵေႃႈ ဢမ်ႇၸၢင်ႈႁဵတ်းႁိဝ်သေ ၸင်ႇတေၶတ်းၸႂ် ယူတ်းယႃပၼ် ႁူဝ်ၼႃႈၸုမ်းၶဝ် ၼၼ်ႉယဝ်ႉ။ ဢမ်ႇႁိုင်ဢမ်ႇၼၢၼ်း ႁူဝ်ၼႃႈၶဝ်ၵေႃႈ ယူႇလီမႃးၶိုၼ်းသေ တင်းမေႃယႃဢွၼ်ႇမိုတ်ႈၵၼ် ၵႂႃႇတႄႉတႄႉ။ ၶဝ်ႁွင်ႉႁႂ်ႈမေႃယႃဢွၼ်ႇ ယူႇၸွမ်းၶဝ်သေတႃႉ မေႃယႃဢွၼ်ႇ ဢမ်ႇၽွမ်ႉ၊ ၶဝ်ၵူဝ်မေႃယႃဢွၼ်ႇ ပၢႆႈလႄႈ ၶဝ်ပႂ်ႉတူၺ်းမၼ်းဝႆႉတႃႇသေႇ၊ ၵွပ်ႈၼႆ မေႃယႃဢွၼ်ႇဢမ်ႇၸၢင်ႈ ႁႃလၢႆးပၢႆႈလႆႈလႄႈ မၼ်းၸင်ႇယူႇသဝ်းလူၺ်းၶဝ်၊ ၵူၼ်းၶဝ်ၵေႃႉလႂ်ဢမ်ႇယူႇလီၵေႃႈ မၼ်းဝႆႉၸႂ်လီသေ ယူတ်ႈယႃပၼ်၊ ၶဝ်ၵေႃႈ ႁၵ်ႉမၼ်းမိုတ်ႈမၼ်းတႄႉတႄႉ။ ထိုင်မႃး ၶၢဝ်းၽူၼ်တူၵ်း ဝၼ်းၼိုင်ႈ ၵၢင်ၶမ်ႈ မေႃယႃဢွၼ်ႇၼၼ်ႉဝႃႈ“ ၵူဝ်ၼၢဝ် ၵိၼ်ယႃႈယႃႁႄႉ ၼၢဝ်ၵူႈၵေႃႉတႃႉ ” ၼႆသေ ဢဝ်ယႃႈၼွၼ်းလပ်း ပၼ်ၶဝ်ၵိၼ် ၽွင်းၶဝ်ၼွၼ်းလပ်းၼၼ်ႉ ၵၢင်ၶိုၼ်း မေႃယႃဢွၼ်ႇ ၸင်ႇလၵ်ႉပၢႆႈတၢင်းၶိုၼ်း၊ ၵႂႃႇၽႅဝ်လႂ်ၵေႃႈ မၼ်းဢမ်ႇႁူႉ တၢင်းၽႅဝ်မၼ်း။ ၽူၼ်ၵေႃႈတူၵ်း ႁႃႇယႂ်ႇႁႃႇလူင်တင်းၶိုၼ်း။ ထိုင်ၼႃႈမိူင်းၸမ်လႅင်း မေႃယႃဢွၼ်ႇၼၼ်ႉ ၽႅဝ်မႃးၼႂ်းႁူၺ်ႈဢၼ်ၼိုင်ႈ ၸင်ႇပႆၶိုၼ်ႈၸွမ်းႁွင်ႈၼမ်ႉသေ မႃးႁၼ် သူၼ်တႃႈပိူၼ်ႈ၊ သမ်ႉမီး ဝႆႉထဵင်ဢွၼ်ႇဢၼ်ၼိုင်ႈလႄႈ မၼ်းၸင်ႇ ၵႂႃႇလိုဝ်ႈၼႂ်းထဵင်ၼၼ်ႉယဝ်ႉ ”
လုင်းသႂ်သွင်ႇ သုတ်ႉၼမ်ႉၼဵင်ႈၶူမ် ဢိုၼ်လူင်းၶေႃးသေ
“ တီႈၼႂ်းထဵင်ၼၼ်ႉ မီးဝႆႉၶဵၼ်းႁူဝ်ၵဝ်ႇၽိုၼ်ၼိုင်ႈလႄႈ ၽႃႈမႆၶီႈမူၼ်ႈၽိုၼ်ၼိုင်ႈ၊ မၼ်းၸင်ႇထွတ်ႇပႅတ်ႈ ၶူဝ်းယမ်းမၼ်း၊ ဢဝ်ၶဵၼ်းႁူဝ်ၼၼ်ႉ ဝဵၼ်းဢႅဝ်မၼ်း ဢဝ်ၽႃမႆၼၼ်ႉ ၵူမ်ႁူဝ်မၼ်းသေ ၼွၼ်းၶူတ်ႈဝႆႉယူႇ။ တိုၼ်ႇမႃး ၵွပ်ႈပိူဝ်ႈ သွင်ၵေႃႉၼၢႆးလၢၼ် မႃးတူၵ်းၸႂ်မၼ်း ၼိူဝ်ထဵင်၊ မၼ်းၸင်ႇဝႃႈ မၼ်းဢမ်ႇၸႂ်ႈၵူၼ်းႁၢႆႉ မၼ်းပဵၼ်ၵူၼ်းလီသေ လၵ်ႉပၢႆႈမႃးၼႆယူႇ။ မၼ်းယွၼ်း မိူဝ်းၸွမ်း တီႈဝၢၼ်ႈၶဝ်သေတႃႉ ၶႃၼၢႆးလၢၼ်ဝႃႈ တီႈဝၢၼ်ႈၶဝ်ၼၼ်ႉ မီးၽေးၶဵၼ်တႃႇမၼ်းၼႆသေ ၸင်ႇႁႂ်ႈပႅပ်ႉဝႆႉ တီႈထဵင်ၶဝ် ထႅင်ႈဝၼ်းၼိုင်ႈမႃး မေႃယႃဢွၼ်ႇ သမ်ႉၸပ်းလူမ်းၼၢဝ်လႄႈ ၶႃၼၢႆးလၢၼ် မႃးလုမ်းလႃး ယူတ်းယႃပၼ်ယူႇ ”
“ ယွၼ်ႉပိူဝ်ႈသၢႆငၢႆ ပိူၼ်ႈၸွမ်းသွၵ်ႈႁႃမေႃယႃလႄႈ မၼ်းပႆႇၸၢင်ႈဢွၵ်ႇၵႂႃႇလႂ်။ ႁဵတ်းၼၼ် လၢၼ်ယိင်းမႄႈထဝ်ႈ ၵႆႉမႃးသူင်ႇၶဝ်ႈသူင်ႇၽၵ်းပၼ် ၵူႈဝၼ်းသေ မေႃယႃဢွၼ်ႇလႄႈ လၢၼ်ယိင်းမႄႈထဝ်ႈႁၵ်ႉၵၼ်ၵႂႃႇဢိူဝ်ႈ။ ”
“ မေႃယႃဢွၼ်ႇၼၼ်ႉ ပူတ်းဢဝ်သၢႆၶေႃးငိုၼ်းမၼ်း ဢၼ်မီးၶႅပ်းလၢဝ်ၼၼ်ႉ ၾၢၵ်ႇတွၼ်ႈပၼ် လၢၼ်ယိင်းမႄႈထဝ်ႈဝႆႉ ၶႃၵေႃႈလႆႈႁၵ်ႉၵၼ် လိူဝ်လူၼ်ႉပူၼ်ႉၵႂႃႇ ထိုင်မႃး ၵၢင်ၼႂ် ၼႂ်ၼိုင်ႈ သိုၵ်းမၢၼ်ႈ ၸုမ်းၼိုင်ႈ မႃးဝႅတ်ႉထဵင်သေဝႃႈ မေႃယႃဢွၼ်ႇ ပဵၼ်ၽူႈၸွပ်ႇၶၢဝ်ႇၼႆလႄႈ ၸင်ႇတီႉၺွပ်းမၼ်း၊ မၼ်းလၢတ်ႈဝႃႈ မၼ်းပဵၼ်မေႃယႃၼႆသေတႃႉ ၶဝ်ဢမ်ႇယုမ်ႇမၼ်ႈ၊ ၶဝ်ဢဝ်မၼ်း ၵႂႃႇၽႅဝ်လႃႈသဵဝ်ႈ ႁိူင်လိူၼ်ပၢႆ တွင်ႈထၢမ်တူၺ်းယဝ်ႉ ႁူႉဝႃႈမၼ်း ဢမ်ႇမီးတၢင်းၽိတ်းၼႆလႄႈ ၸင်ႇပွႆႇ မၼ်းၶိုၼ်းယဝ်ႉ ။”
“ ဝၢႆးသေဢွၵ်ႇမႃႈ မေႃယႃဢွၼ်ႇ ၶိုၼ်းမႃးၸွပ်ႇႁႃၶၢဝ်ႇသေ လႆႈႁူႉဝႃႈ ဝၢၼ်ႈၶဝ် ၶၢႆႉပၢႆႈမူတ်းယဝ်ႉ ၼႆလႄႈ ၸင်ႇဢမ်ႇၸၢင်ႈၵႂႃႇ ၸွပ်ႇထႅင်ႈတီႈလႂ်သေ ၶိုၼ်ႈမႃးၶိုၼ်းလႃႈသဵဝ်ႈ။ ပေႃႈမႄႈ မေႃယႃဢွၼ်ႇၼၼ်ႉ ၸင်ႇတေႇၼႃႈႁိူၼ်းပၼ်မေႃယႃဢွၼ်ႇယဝ်ႉ ”
ၶႅတ်ႉလႃး ႁႅၼ်ႁူဝ်တူၺ်ႈမေႃယႃလူင်သေ
“ ပေႃးၼႆ...”
“ မေႃယႃဢွၼ်ႇၼၼ်ႉ ယၢမ်းလဵဝ်ပဵၼ်မႃး မေႃယႃလူင်ဢၼ်ၸုၵ်းယူႇႁိမ်း လုၵ်ႈယိင်းမၼ်း ၶႅတ်ႉလႃးၼၼ်ႉယဝ်ႉ ”
ၶႅတ်ႉလႃးလွမ်တူၺ်းမေႃယႃလူင် တႃပေႃးဢမ်ႇၽႅပ်ႉသေ လၢတ်ႈဢွၵ်ႇမႃး ၵႂၢမ်းၶေႃႈၼိုင်ႈႁႅင်းႁႅင်း ဢၼ်မၼ်း ဢမ်ႇယၢမ်ႈႁွင်ႉလၢတ်ႈပိူၼ်ႈသေပွၵ်ႈၼၼ်ႉ။
“ ပေႃႈ ...”
“ လုၵ်ႈယိင်း...ၶႅတ်ႉလႃး ”
ၶႅတ်ႉလႃး လႅၼ်ႈမႃးၵွတ်ႇပေႃႈမၼ်းဝႆႉႁႅင်းႁႅင်းသေ ႁႆႈၸိူင်ႉၼင်ႇလုၵ်ႈဢွၼ်ႇ ၼၼ်ႉယူႇ။
“ ပေႃႈ...လုၵ်ႈယိင်ႈၶႂ်ႈႁူႉ ၶႂ်ႈႁၼ်ပေႃႈလုၵ်ႈယိင်းတင်းႁိုင်ၶႃႈယဝ်ႉ ...ပေႃႈဢိူၺ် ...”
“ လုၵ်ႈယိင်း...ပေႃႈၵေႃႈ မွင်းၶႂ်ႈႁၼ်လုၵ်ႈပေႃႈတႄႉတႄႉယူႇဢိူဝ်ႈ...ထူင်ၼင် ၼႆႉတႄႉ မႄႈသူ ၼၢင်းဢိင်ႇ တေၵဵပ်းလႆႈတီႈထဵင်သေ သိမ်ႈပႅင်းဝႆႇၵႂႃႈ။
“ ၽဝလုၵ်ႈယိင်းၼႆႉ ၵွပ်ႈဝႃႈ ပဵၼ်လုၵ်ႈ ၽၢၼ်ပေႃႈမႄႈလႄႈ ယူႇၸွမ်းပိူၼ်ႈၵေႃႈ ပိူၼ်ႈလူလၢႆ ၵႂႃႇၵၢႆတင်းလႂ်ၵေႃႈ ၼႃႈလဵၵ်ႉဝႆႉယူႇတႃႇသေႇၶႃႈဢေႃႈ။
ၶႅတ်ႉလႃး ၶိုၼ်းၶႆႈၼႄ ၽဝတုၵ်ႉၶမၼ်းၼၼ်ႉၸေးၸေးယူႇ။
“ ၵမ်းၼႆႉ လုၵ်ႈယိင်ႈတေဢမ်ႇလႆႈၵႂႃႇတီႈလႂ်ယဝ်ႉၼႃႈ တေလႆႈယူႇၸွမ်းပေႃႈ တေႃႇၸူဝ်ႈသုတ်းပၢၼ်ဢိူဝ်ႈၼႃႈ ”
လုင်းသႂ်သွင်ႇ လုပ်ႈႁူဝ်လုၵ်ႈယိင်းမၼ်းသေ
“ လုၵ်ႈယိင်ႈ ၶႅတ်ႉလႃး...ဢိူဝ်ႈ မိူဝ်ႈလုၵ်ႈယိင်းၵေႃႉလဵၵ်ႉၼၼ်ႉ ၽွင်းသူမိုၼ်ႇႁွမ်ၶဝ် လဵၼ်ႈၵေႃႉၵၼ်ၼၼ်ႉ ပေႃႈယၢမ်ႈလၵ်ႉထၢမ်ၸိုဝ်ႈမႄႈလုၵ်ႈယိင်းယူႇ။ လုၵ်ႈယိင်ႈသမ်ႉဝႃႈ မႄႈ လုၵ်ႈယိင်းၶဝ် ၸိုဝ်ႈ မႄႈမွၼ်းၼႆလူး ...ဢေႃႈ...ႁၼ်ယူႇလႄႈ ဢမ်ႇထိူၵ်ႈႁူႉၵၼ်ဢိူဝ်ႈ ”
မႄႈမိုၼ်ႇႁွမ်ၶဝ်ၵေႃႈ ၶေႃးၶူမ်ၸွမ်းလႄႈ ၸဵတ်ႉၼမ်ႉတႃမၼ်းသေ မႃးယိပ်း လုပ်ႈႁူဝ်မႃႇၶႅတ်ႉလႃးယူႇ။
“ လုၵ်ႈယိင်း ယႃႇပေႁႆႈယဝ်ႈ တဵတ်ႇလႄႈ ”
ၶႅတ်ႉလႃး ဝၢႆႇတူၺ်းပႃႈႁွမ်မႄႈမိုၼ်ႇႁွမ်ၶဝ်သေ ၶိုၼ်းထၢမ်ပေႃႈမၼ်း
ပေႃႈ...မိူဝ်ႈလုၵ်ႈယိင်ႈလဵၵ်ႉ လႆႈယူႇၸွမ်းမႄႈၵဵပ်းမႃးၼၼ်ႉ မႄႈၵဵပ်း ဢမ်ႇႁၵ်ႉ လုၵ်ႈယိင်းသေဢိတ်းၶႃႈ သိုတ်ႉ ...သိုတ်ႉ ...”
မႄႈမိုၼ်ႇႁွမ်ၶဝ် လၢမ်းႁူႉလႆႈ ၶေႃႈၵႂၢမ်းၶႅတ်ႉလႃး ၶႂ်ႈဝႃႈပွင်ႇသင်ၼႆယူႇလႄႈ မၼ်းၸင်ႇၵႂႃႇၵွတ်ႇၶႅတ်ႉလႃးသေ
“ လုၵ်ႈယိင်း...ၶႅတ်ႉလႃး...မႄႈတႄႉ တိုၼ်းႁၵ်ႉၶႅတ်ႉလႃး မိူၼ်ၼင်ႇလုၵ်ႈ ယိင်ႈမႄႈယဝ်ႈ ”
ၶႅတ်ႉလႃး ၶိုၼ်းၵွတ်ႇမႄႈမိုၼ်ႇႁွမ်ၶဝ်သေ
“ မႄႈ...ပေႃးၼႆ မိုၼ်ႇႁွမ်ၼၼ်ႉ ပဵၼ်!...ပဵၼ်ၼွင်ႉယိင်းၶႃႈဢိူဝ်ႈၼေႃ?”
“ ၸႂ်ႈဢိူဝ်ႈ လုၵ်ႈယိင်း ၶိူဝ်ပဵၼ်ပီႈၼွင်ႉ ႁူမ်ႈပေႃႈဢမ်ႇႁူမ်ႈမႄႈၵၼ်ဢိူဝ်ႈ ”
ၶႅတ်ႉလႃး ၵႂႃႇဝူၼ်ႉႁၼ် ၼွင်ႉယိင်းမၼ်း မိုၼ်ႇႁွမ် ဢၼ်ၽၢတ်ႇၶဝ်ၵႂႃႇၼၼ်ႉသေ ၶႅၼ်းပဵၼ် ဢၼ်ၶေႃးၶူမ်မႃးယူႇတႄႉ တႄႉ
“ မိုၼ်ႇႁွမ်ဢိူၺ်...လွင်ႈဝႃႈ ႁႃးပဵၼ် ပီႈၼွင်ႉႁူမ်ႈပေႃႈၵၼ်ၼႆႉ မႂ်းၼွင်ႉ ဢမ်ႇလႆႈႁူႉၵႂႃႇၼေႃ...ဢေႃ... သင်ဝႃႈမိုၼ်ႇႁွမ်လႆႈႁူႉၸၵ်း ႁႃးပဵၼ်ပီႈၼွင်ႉၵၼ်ၼႆၸိုင် မၼ်းတေ ၸူမ်းတၢၼ်ႇႁိုဝ် ၵူၺ်းၵႃႈ ၼွင်ႉယိင်းဢူၺ်...ၼွင်ႉယိင်းပီႈဢမ်ႇလႆႈႁူႉၵႂႃႇ ”
ၶဝ်သၢမ်ၵေႃႉ ပေႃႈမႄႈလုၵ်ႈ ဢွၼ်ၵၼ်ႁႆႈယူု။ ငိၼ်းသဵင်ႁႆႈၶဝ် လႄႈ ၸၢႆးၵွႆ လုၵ်ႉဢွၵ်ႇၽႃႈမႃႈၸူးၶဝ်
“ မႄႈႁဝ်းၶဝ် ပဵၼ်သင်ၶႃႈ?”
ပႃႈႁွမ်ၸင်ႇၸၼ်မိုဝ်းလုၵ်ႈၸၢႆးဢွၼ်ႇမၼ်းသေ
“ လုၵ်ႈၸၢႆး...ၶႅတ်ႉလႃႈၼႆႉ ပဵၼ်ပီႈၼၢင်းမႂ်းၼင်ႇၵဝ်ႇဢိူဝ်ႈ ၶိူဝ်ႁူမ်ႈပေႃႈ ဢမ်ႇႁူမ်ႈမႄႈၵၼ်ဢိူဝ်ႈ လုၵ်ႈၸၢႆး ...”
“ ၼွင်ႉၸၢႆး...”
“ ပီႈၼၢင်း...”
ၶႅတ်ႉလႃး ၶိုၼ်းၵွတ်ႇၶေႃး ၼွင်ႉၸၢႆးမၼ်းဝႆႉယူႇ။
လုင်းသႂ်သွင်ႇၸင်ႇဝႃႈ
“ ဢိူဝ်ႈ လုၵ်ႈယိင်း ၶိုၼ်းၵႂႃႇၼွၼ်းသေၵွၼ်ႇလႄႈ ‘’
ၶဝ်ၶိုၼ်းမိူဝ်းၼွၼ်း ႁင်းၽႂ်ႁင်းမၼ်းယူႇသေတႃႉ ၶႅတ်ႉလႃးတႄႉ ဝူၼ်းတူၺ်းၽဝမၼ်းသေ ၼွၼ်းဢမ်ႇလပ်းတင်းၶိုၼ်း။