ၶိုၼ်းထူပ်းႁၼ်ၵၼ်/တွၼ်ႈ 17 ပၢင်ၶႅၵ်ႇ
ပၢင်ပွႆးၵူပ်ႉၵူႈ ၸၢႆးဝူင်းလိူၼ်လႄႈ ၼၢင်းမိုၼ်ႇႁွမ်။ လွမ်တူၺ်း လုၵ်ႈၶူၺ်ႇမႂ်ႇလႄႈ လုၵ်ႈပႂ်ႉမႂ်ႇ ပဵၼ်ဢၼ်ႁၢင်ႈလီ တင်းသွင်ၵေႃႉသေ ၽႂ်ႁၼ်ၵေႃႈ သမ်ႉပေႃးဝႃႈ လႅပ်ႈၵၼ်ဝႃႈလႅပ်ႈၵၼ် သမ်ႉပေႃး တၢၼ်ႇသႅင်လႄႈၶမ်း။ ၾႆးၵွင်ႈထႆႇ ၾႆးဝီႇတီႇယူဝ်ႇ ထွင်ႇႁိူဝ်ႈသႂ်ႇၶႃ တႃပေႃးၶႂ်ႈၽိူဝ်ႈ။ ၶႃသွင်ၵေႃႉ ယၢင်ႈၸွမ်းၵၼ်သေ မႃးၸူမ်းတၵ်ႉၶႅၵ်ႇ ယုမ်ႉယုမ်ႉယၢႆႈယၢႆႈ ယဵၼ်ႇယဵၼ်ႇငႄႈငႄႈယူႇ။
ဢၼ်ၸၼ်ၸႂ် ၸိူဝ်းမႃးၶဝ်ႈပွႆးပၢင်ၶႅၵ်ႇထႅင်ႈၵေႃႉၼိုင်ႈတႄႉ ပဵၼ်ၵႅမ်လုၵ်ႈပႂ်ႉမႂ်ႇ ဢၼ်ၸိုဝ်ႈဝႃႈ ၶႅတ်ႉလႃးၼႆၼၼ်ႉယဝ်ႉ။ ၵမ်ႈၽွင်ႈ ဢမ်ႇယၢမ်ႈႁၼ်မၼ်းလႄႈ ဢွၼ်ၵၼ်ထၢမ်ဝႃႈ မၼ်းပဵၼ်ၽႂ် ၼႆပေႃးယႂ်းယၵ်ႉယၵ်ႉ။ ၵမ်ႈၽွင်ႈလၵ်ႉတူၺ်း တၢင်းႁၢင်ႈလီမၼ်း ပေႃးမီးလၢႆၽဝ်ႇယဝ်ႉၵေႃႈ တေႃႈပႆႇဢိမ်ႇလႆႈ။ မၼ်းၼၢင်းၵေႃႈ တေႃႈမိူၼ်ၼင်ႇၵေႃႉငဝ်းလုၵ်ႈပႂ်ႉမႂ်ႇသေ ၵႂႃႇၸွမ်းလုၵ်ႈပႂ်ႉမႂ်ႇယူႇ။
မၼ်းၼၢင်း ၶတ်းၸႂ်ဝႆႉၼႃႈယုမ်ႉယူႇသေတႃႉ လွင်ႈဢၼ်တုမ်ႉဝႆႉ ၼႂ်းၸႂ်မၼ်း ဢၼ်ႁႅင်းယႂ်ႇသေပိူၼ်ႈ မီးဝႆႉၼႆ ၽႂ်တေႁူႉၸွမ်း။ မၢင်ၵမ်းမၢင်ၵမ်း သၢႆတႃၶႃသွင်ၵေႃႉ ဝူင်းလိူၼ် လၢတ်ႈတေႃႇၵၼ် ဢၼ်ပိူၼ်ႈဢမ်ႇၸွမ်းႁူႉၼၼ်ႉယူႇ။
ၼႃႈဝူင်းလိူၼ် ၶတ်းၸႂ်ယုမ်ႉတေႃႇၶႅၵ်ႇယူႇသေတႃႉ သင်ဝႃႈ ၵေႃႉမေႃသတိတူၺ်း တီႈတႃမၼ်းၼၼ်ႉၼႆၸိုင် တေၸၢင်ႈလၢမ်းႁၼ်ထိုင် လွင်ႈၼႂ်းၸႂ်မၼ်း ဢမ်ႇသိူဝ်းမူၼ်ႈတဵမ်ထူၼ်ႈဝႆႉယူႇ။
ပေႃႈမႄႈၶဝ်တင်းသွင်ၽၢႆႇၵေႃႈ တူၺ်ႈလုၵ်ႈၶဝ်သေ ႁၢၼ်ႉၸႂ်ၸူမ်းႁပ်ႉၶႅၵ်ႇ ၸုပ်ႈၼိုင်ႈ ယဝ်ႉၸုပ်ႈၼိုင်ႈယူႇ။ ၶႅတ်ႉလႃးၸင်ႇလွမ်လွမ်ထၢမ်မိုၼ်ႇႁွမ်
“ မိုၼ်ႇႁွမ် ႁိူဝ်ႉယဝ်ႉယူဝ်ႉ ၵိၼ်ၼမ်ႉဢိတ်းၼိုင်ႈၼေႃႈ?”
မိုၼ်ႇႁွမ် ယုမ်ႉႁၢင်ႈလီ ႁပ်ႉဢဝ်ၵွၵ်းၼမ်ႉၵတ်းသေ
“ ဢမ်ႇပဵၼ်သင် ၶွပ်ႈၸႂ်ယဝ်ႈၶႅတ်ႉလႃး ”
ယူႇဢမ်ႇႁိုင်ဢမ်ႇၼၢၼ်း ၶႅတ်ႉလႃးၶိုၼ်းထၢမ်
“ မိုၼ်ႇႁွမ်...ႁဝ်ႈၵႂႃႇလိုဝ်ႈ တီႈၼႂ်းလုၵ်းၼၼ်ႉၵမ်းၼိုင်ႈႁိုဝ်ႉ?”
“ ဢမ်ႇလိုဝ်ႈယဝ်ႈ ၶႅတ်ႉလႃး ၵူဝ်ၶႅၵ်ႇမႃးထၢမ်ႁႃႁဝ်းဢိူဝ်ႈ ” ဝၼ်းၼၼ်ႉဝူင်းလိူၼ်လႄႈ မိုၼ်ႇႁွမ်ၵုမ်ႇလႆႈပႂ်ႉတူင်ႉတၵ်ႉ ႁပ်ႉတွၼ်ႈပိူၼ်ႈ ၵုမ်ႇလႆႈသူင်ႇသင်ႇပႂ်ႉလႃပိူၼ်ႈ ၸိူဝ်းမႃးၸိူဝ်းမိူဝ်းၼၼ်ႉယူႇ တင်းဝၼ်းယဝ်ႉ ။ ဝၢႆးဝၼ်း သၢမ်မွင်းပၢႆ ၽွင်းပၢင်ၶႅၵ်ႇ ယဵၼ်ၵႂႃႇၼၼ်ႉ ၵွပ်ႈပိူဝ်ႈ ပၢင်ၶႅၵ်ႇယဝ်ႉၵႂႃႇသေ ပူင်ၸႂ်လူမ်ၸႂ်ၵႂႃႇယဝ်ႉႁိုဝ်ၵေႃႈဢမ်ႇႁူႉ၊ မိုၼ်ႇႁွမ်ၸင်ႇ ထူၺ်ႈၸႂ်လူင်ယူႇ။
ဝူင်းလိူၼ်လႄႈ မိုၼ်ႇႁွမ် ၸင်ႇမႃးၶိုၼ်ႈရူတ်ႉသေ ၸႂ်ႉႁေႃႈမိူဝ်း တီႈႁိူၼ်းမႂ်ႇ ဢၼ်ဢူႈဝူင်းလိူၼ်ၶဝ် သိုဝ်ႉတွၼ်ႈပၼ်ပၢင်ၶႅၵ်ႇ လုၵ်ႈၸၢႆးမၼ်း ဢၼ်ဢိူမ်ႈၸပ်းႁိူၼ်း မိုၼ်ႇႁွမ်ၶဝ်ၼၼ်ႉယူႇ။ ၼိူဝ်ရူတ်ႉၼၼ်ႉ မိုၼ်ႇႁွမ် ဢဝ်ႁူဝ်မၼ်း ဢိင်ၼႂ်းဢူၵ်းဝူင်းလိူၼ်သေ
“ ဝူင်းလိူၼ် ၵဝ်ၼွၼ်းၾၼ်တႄႉ ဢမ်ႇၸႂ်ႈၼေႃႈ?”
ဝူင်းလိူၼ် ဢဝ်မိုဝ်ႈပၢၵ်ႈၶူၼ်ႁူဝ် တီႈၼႃႈၽၢၵ်ႇမိုၼ်ႇႁွမ်သေ ၼူမ်ပၼ်ၼႃႈၽၢၵ်ႇ မိုၼ်ႇႁွမ်လွႆးလွႆး
“ မိုၼ်ႇႁွမ် ၼႆႉဢမ်ႇၸႂ်ႈၾၼ် ပဵၼ်ဢၼ်တႄႉဢိူဝ်ႈ ‘’
“ ၵဝ်သိူဝ်းၸႂ်တႄႉဢိူဝ်ႈ ဝူင်းလိူၼ် မႂ်းလူးဢမ်ႇသိူဝ်းၸႂ်ႁႃႉ?”
“ သိူဝ်းၸႂ်ပေႃးဢမ်ႇမေႃလၢတ်ႈယဝ်ႈ မိုၼ်ႇႁွမ် ”
“ ဢလူဝ်...သိူဝ်းၸႂ်ၼႃႇၽႅဝ် သမ်ႉပေႃးဢမ်ႇႁူႉႁိူဝ်ႉႁူႉမွႆႈသင်ယဝ်ႈ “
“ ႁဝ်းမိူဝ်းလိုဝ်ႈႁိူဝ်ႉ တီႈႁိူၼ်းမႂ်ႇႁဝ်းလီလီၼေႃႈ?”
မိုၼ်ႇႁွမ် ငွၵ်ႈႁူဝ်ၼႄဝူင်းလိူၼ် လပ်းတႃဝႆႉယူႇၼႂ်းၵႄႈဢူၵ်းဝူင်ႈလိူၼ်သေ ထွမ်သဵင်ႁူဝ်ၸႂ်တွတ်ႇယူႇပိုၵ်ႉပိုၵ်ႉ။
ရူတ်ႉၶဝ် ၽႅဝ်မႃးတီႈၼႃႈၽၵ်းတူ ႁိူၼ်းမႂ်ႇၶဝ်သေ ၵိုတ်းၵႂႃႇယဝ်ႈ။ ရူတ်ႉဢၼ် ၶႅတ်ႉလႃးလႄႈ ဢူႈမႄႈၶဝ် ၶီႇမႃးၼၼ်ႉၵေႃႈ ၽႅဝ်မႃးၸွမ်းၶဝ်ၵမ်းလဵဝ်ယူႇ။ ဝူင်းလိူၼ်လႄႈမိုၼ်ႇႁွမ် ၽုၺ်ႇၽၵ်းတူရူတ်ႉသေ လူင်ႈမႃး မိုၼ်ႇႁွမ်လွမ်တူၺ်းၽၢႆႇၼႃႈႁိူၼ်ႈမႂ်ႇ တီႈၶဝ်တေၵႂႃႇၼၼ်ႉ ပိူၼ်ႈဢွၼ်ၵၼ်မေႃးပၼ်းသေ ဢဝ်သၢႆၶေႃးၶမ်း ႁေႉတၢင်းလုၵ်ႈၶူၺ်မႂ်ႇလႄႈ လုၵ်ႈပႂ်ႉမႂ်ႇ သမ်ႉပေႃးပၼ်းဝႆႉ ယူႇၸွင်ႇၸွင်ႇ။
“ ႁေး...လုၵ်ႈၶူၺ်မႂ်ႇမႃးယဝ်ႈ ဢဝ်သၢႆၶေႃးသူႁေႉဝႆႉလႄႈ ပေႃးႁဝ်းဢမ်ႇၽွမ်ႉၼႆ ယႃႇပေၽုၺ်ႇပၼ် ”
“ ႁဵတ်းၽႂ်းလႄႈ လူင်းရူတ်ႉမႃးယဝ်ႈ ”
မိုၼ်ႇႁွမ်ၵေႃႈ ယၢမ်ႈၵျေႃႇသိူဝ်းသေ ယၢမ်ႈဢဝ်သၢႆၶေႃႈႁေႉတၢင်းပိူၼ်ႈမႃးယူႇ၊ ၵမ်းၼႆႉတႄႉ ပဵၼ်မၼ်း လႆႈၶၢမ်ႇႁႄႉယဝ်ႈ ၼႆသေၸူမ်းယူႇ။ လွမ်တူၺ်းႁိူၼ်းမႂ်ႇဢွၼ်ႇၶႃသွင်ၵေႃႉၵေႃႈ ၶႅမ်ႉလႅပ်ႈသေ ပႂ်ႉႁပ်ႉၵူၼ်း ဢၼ်တေမႃးယူႇဝႆႉယူႇ။ ဝူင်းလိူၼ်မႃးယိပ်းမိုဝ်း မိုၼ်ႇႁွမ်သေ
“ မိုၼ်ႇႁွမ် ၵႂႃႇႁဝ်းၵႂႃႇ” ၽွင်းမိုၼ်ႇႁွမ် ယုၵ်ႉတိၼ်ၶတ်းၸႂ်ယၢင်ႈၸွမ်းဝူင်းလိူၼ်ၼၼ်ႉ မိူၼ်ၼင်ႇသေ ဢၼ်ဢၼ် မႃးၸူၵ်ႉသႂ်ႇ ၼႂ်းႁူဝ်ၸႂ်မၼ်းသေ ၵႅၼ်းၵပ်ႉလူင်ဝႆႉတႄႉတႄႉ၊ မၼ်းၼၢင်း ၼႅတ်ႈဢဝ်မိုဝ်းမၼ်း သွင်ၶွၼ် တဵၵ်းႁူဝ်ဢူၵ်းမၼ်းဝႆႉ ႁႅင်းႁႅင်းယူႇ။ မၼ်းဢမ်ႇသင်ႉတူဝ်မၼ်းလႆႈယဝ်ႉလႄႈ ၽွင်ႈဢိူင်ႇဢၢင် ၵူမ်ႈၵႂႃႇၼၼ်ႉ ဝူင်းလိူၼ်ၸင်ႇၼႅတ်ႈ ပၢင်ႉဢဝ်မၼ်းၽႂ်းၽႂ်း။
“ မိုၼ်ႇႁွမ်...မိုၼ်ႇႁွမ် ပဵၼ်သင်?”
မိုၼ်ႇႁွမ် ထူၺ်ႈၸႂ်ဢၢပ်ႈႁိူဝ်ႉၼႃႇသေ ဝႆႁူဝ်မၼ်းၼႄယူႇ။ ၼႃႈတႃၸူမ်းသိူဝ်း မၼ်းမိူဝ်ႈၵႆႈၼၼ်ႉ ၵိုင်ႉၵၢင်ႉယဵၼ်းပဵၼ် ၼႃႈတႃၶီၼႅင်ၵႂႃႇၵမ်းလဵဝ်။ ပေႃႈမိုၼ်ႇႁွမ်ၶဝ်ၵေႃႈ ၼႅတ်ႈဢႅၼ် မႃးတူၺ်း လုၵ်ႈယိင်းမၼ်းၽႂ်းၽႂ်းသေ
“ ဝူင်းလိူၼ် ႁွပ်ႇမိုုၼ်ႇႁွမ် မိူဝ်းတီႈႁိူၼ်းလူင်ၽႂ်းၽႂ်းလႄႈ ၶႅတ်ႉလႃးၵႂႃႇၽုၺ်ႇၽၵ်း တူႁိူၼ်းလႄႈ ”
ၶႅတ်ႉလႃးၵေႃႈ ၼႅတ်ႈၵႂႃႇၽုၺ်ႇၽၵ်းတူယူႇ၊ ၶႅပ်းတိၼ် သူၼ်ႈသုင်မၼ်းၼၢင်းၼၼ်ႉ တေယၢင်ႈၽႂ်း ဢမ်ႇလႆႈလႄႈ မၼ်ႈၼၢင်းထွတ်ႇပႅတ်ႈသေ သမ်းတိၼ်လၢႆ ၼႅတ်ႈဢႅၼ်ႇၵႂႃႇၽုၺ်ႇၽၵ်းတူႁိူၼ်းၶဝ်ၽႂ်းၽႂ်းယူႇ။ ၸိူဝ်းဢၼ်ဢဝ်သၢႆၶေႃးၶမ်း ႁႄႉဝႆႉၼၼ်ႉၵေႃႈ ႁူႉဝႃႈလုၵ်ႈပႂ်ႉမႂ်ႇ သၢႆငၢႆဢမ်ႇလီၼႆလႄႈ ၼႅတ်ႈပူတ်းသိမ်းသၢႆၶေႃးၶဝ်သေ ၸွမ်းမိူဝ်းၼႂ်းႁိူၼ်းလူင်ၶဝ်ယဝ်ႈ။
ဝူင်းလိူၼ်ႁွပ်ႇဢုမ်ႈမိုၼ်ႇႁွမ် ၶဝ်မိူဝ်းဝႆႉ ၼိူဝ်ၵူႇၼွၼ်း မိုၼ်ႇႁွမ်သေ
“ မိုၼ်ႇႁွမ် ဝႆႉၸႂ်လီလီၼႃႈ၊ ယႃႇမႆႈၸႂ် မိုၼ်ႇႁွမ် တေဢမ်ႇလႆႈပဵၼ်သင်ၵူၺ်း ”
ပေႃႈမိုၼ်ႇႁွမ်ၶဝ် မႃးၵမ်းတူၺ်း ၶေႃႈမိုဝ်းလုၵ်ႈယိင်းမၼ်းသေ ႁႂ်ႈၶႅတ်ႉလႃး ၵႂႃႇဢဝ်တိူၵ်ႈယႃႈယႃမၼ်း တီႈႁွင်ႈယႃယူႇ။
ၶႅတ်ႉလႃးၵေႃႈ ၸႂ်မႆႈၼႃႇယဝ်ႉလႄႈ ၼုင်ႈတင်းသိူဝ်ႈၶူဝ်း ၵႅမ်လုၵ်ႈပႂ်ႉမႂ်ႇသေ ဢႅၼ်ႇၵႂႃႇဢႅၼ်ႇၶိုၼ်းယူႇ။ ပေႃႈမိုၼ်ႇႁွမ်ၼႅတ်ႈသမ်းၶဵမ်ၽႂ်းၽႂ်းသေ
“ လုၵ်ႈယိင်း ၵိၼ်ယႃႈယႃသေလႄႈ ”
မိုၼ်ႇႁွမ် ဝႆႁူဝ်ၼႄၶဝ်ယူႇ။ မၼ်းၼၢင်းၸိုၼ်ႇႁႅင်းမၼ်းသေ
“ ဝူင်းလိူၼ်...ဝူင်းလိူၼ် ၵဝ်တေလႆႈၽၢတ်ႇမႂ်းယဝ်ႈ ”
“ မိုၼ်ႇႁွမ် ယႃႇပေလၢတ်ႈၸိူင်ႉၼၼ် ”
“ ၸႂ်ၵဝ်သၼ်ႇၼႃႇဢိူဝ်ႈ၊ တွတ်ႇၵေႃႈတွတ်ႇ ႁႅင်းၼႃႇ ”
ၶႅတ်ႉလႃးၵေႃႈ မႃးမိပ်ႇမိုဝ်းမိုၼ်ႇႁွမ်သေ
“ မိုၼ်ႇႁွမ် ၵိၼ်ယႃႈယႃသေၼေႃႈ ”
မိုၼ်ႇႁွမ် လွမ်တူၺ်း ၶႅတ်ႉလႃးသေ ငွၵ်ႈႁူဝ်ၼႄလႄႈ ဝူင်းလိူၼ်ၸင်ႇပၢင်ႉမၼ်း ငွၵ်းႁူဝ်ဢိတ်းၼိုင်ႈသေ ၶႅတ်ႉလႃးၸင်ႇဢဝ်ယႃ ဢဝ်ၼမ်ႉသႂ်ႇပၼ် ၼႂ်းသူပ်းမိုၼ်ႇႁွမ်ယဝ်ႈ။ လႆႈႁၼ် မိုၼ်ႇႁွမ် ၶတ်းၸႂ် ဢိုၼ်ယႃႈယႃယၢပ်ႇယၢပ်ႇယဵၼ်းယဵၼ်းယူႇ။ မၼ်းၼၢင်းဢဝ်ႁႅင်း ထူၺ်ႈၸႂ်ႁၢမ်ႉၽႂ်းသေလၢတ်ႈ
“ ၶႅတ်ႉလႃး ဝူင်းလိူၼ် မိူဝ်ႈႁဝ်းလဵၵ်ႉ ၵမ်းလိုၼ်း ၵဝ်ဢမ်ႇၵဵပ်းမွၵ်ႇသေ လူႇၸွမ်းသူ ၵွပ်ႈၼႆ ၵုသူဝ်ႇၵဝ် ဢမ်ႇလီ ပေႃးၵဝ်တၢႆၵႂႃႇၼႆ ”
ၶႅတ်ႉလႃးၸင်ႇႁႆႈသေလၢတ်ႈ
“ မိုၼ်ႇႁွမ် ယႃႇပေလၢတ်ႈၸိူင်ႉၼၼ် မိုၼ်ႇႁွမ်တေၶိုၼ်းယူႇလီယူႇ ”
မိုၼ်ႇႁွမ်ဝႆႁူဝ်ၼႄသေ
“ ၵဝ်ႁူႉတူဝ်ၵဝ်ယူႇ ၵဝ်တေဢမ်ႇယူႇၸွမ်းသူယဝ်ႈ ၶႅတ်ႉလႃး ပေႃႈၵဝ်တၢႆၼႆ ၼုင်ႈပၼ်ၵဝ် ၶူဝ်းလုၵ်ႈပႂ်ႉမႂ်ႇၼႆႉၵူၺ်ႈၼႃႈ ”
“ မိုၼ်ႇႁွမ် ယႃႇပေလၢတ်ႈၼမ်ယဝ်ႈ ၵူဝ်ႁိူဝ်ႉဢိူဝ်ႈ”
“ ၶႅတ်ႉလႃး ၵဝ်ၶႂ်ႈလၢတ်ႈသင်ၵေႃႈ ယႃႇပေႁၢမ်ႈၵဝ်လႃႈ ဝၢႆးၼႆႉၵဝ်တေ ဢမ်ႇၸၢင်ႈလၢတ်ႈယဝ်ႈ”
မိုၼ်ႇႁွမ် ဝႃႈၼၼ်သေ ၼႂ်းဢူၵ်းမၼ်း ၵႅၼ်းမႃးႁႅင်းႁႅင်း ထႅင်ႈၵမ်းၼိုင်ႈလႄႈ ၼႃႈတႃမၼ်း ၵၼ်ႈဝႆႉ သမ်ႉပေႃးလႅင်ၵမ်ႇၵႂႃႇယူႇ။ မၼ်းၼၢင်းဢဝ်ႁႅင်းသေ သိုပ်ႇလၢတ်ႈၶေႃႈလႂ်ၶေႃႈၼၼ်ႉယူႇ။
“ ပေႃး ထိုင် ၶၢဝ်း မွၵ်ႇ ၶႅတ်ႉ လႃး မွၵ်ႇ ၼႆ ဢဝ် မွၵ်ႇ ၶႅတ်ႉ လႃး မႃး ဝႆႉ ပၼ် တီႈ ၶုမ် ၵဝ် ၽွင်ႈ ၼႃႈ ”
ၶႅတ်ႉလႃးတႄႉ ဢီးလူမိုၼ်ႇႁွမ်သေ ႁႆႈထိုင်ၸႂ်ထိုင်ၶေႃးယူႇယဝ်ႉ။
“ မိုၼ်ႇ...ႁွမ် ”
တႃမိုၼ်ႇႁွမ်ၵေႃႈ လၢႆးမႃႈတိၵ်းတိၵ်း ၊ ထူၺ်းၸႂ်ၵေႃႈ ယၢပ်ႇမႃးတိၵ်ႈတိၵ်း၊ ႁိူဝ်ႉမႃး တိၵ်းတိၵ်း ၼႂ်းဢူၵ်းမၼ်းႁူတ်ႉမႃးထႅင်ႈႁႅင်းႁႅင်း ၵမ်းၼိုင်ႈ မိုၼ်ႇႁွမ်ၵၼ်ႈၸႂ်သေ ယိပ်းၸၼ်ဝႆႉ မိုဝ်းၶႅတ်ႉလႃး ၶွၼ်ၼိုင်ႈ မိုဝ်းဝူင်းလိူၼ် ၶွၼ်ၼိုင်ႈ ဢဝ်မႃးႁွမ်းၸပ်းၵၼ်ဝႆႉ တီႈၼိူဝ်ဢူၵ်းမၼ်းသေ ၶတ်းၸႂ် လၢတ်ႈၵႂၢမ်းယူႇ။ သူပ်းမၼ်းၼၢင်း တူင်ႉယူႇသေတႃႉ ဢမ်ႇဢွၵ်ႇပဵၼ်ၶေႃႈၵႂၢမ်းသင်မႃး၊ မၼ်းလွမ်တူၺ်း ၼႃႈဝူင်းလိူၼ်လႄႈၶႅတ်ႉလႃးသေ လပ်းတႃလိုမ်းမိူင်းၵႂႃႇယဝ်ႈ။
“ မိုၼ်ႇႁွမ် ”
“ မိုၼ်ႇႁွမ် ”
“ လုၵ်ႈယိင်း ”
ၽႂ်ႁွင်ႉမၼ်းဝႃႈႁိုဝ်ၵေႃႈ မိုၼ်ႇႁွမ်ဢမ်ႇႁူႉဢမ်ႇငိၼ်းလႆႈယဝ်ႈ၊ ၶႅတ်ႉလႃး ဢဝ်ၼႃႈမၼ်း ငူပ်ႉၼိူဝ်ဢူၵ်း မိုၼ်ႇႁွမ်သေႁႆႈယူႇ။
“ မိုၼ်ႇႁွမ်...မိူဝ်းႁႃးၵႂႃႇ ဢဝ်သိူဝ်ႈၶူဝ်းလုၵ်ႈပႂ်ႉမႂ်ႇၼၼ်ႉ မိုၼ်ႇႁွမ်ဝႃႈ ပေႃးလႆႈၼုင်ႈၶူဝ်းလုၵ်ႈပႂ်ႉမႂ်ႇ ၵႃႈၶၼ်ယႂ်ႇၸိူင်ႉၼႆ တႄႉ တၢႆၵေႃႈသိူဝ်းၸႂ်ယဝ်ႈ ၼႆသေ မိုၼ်ႇႁွမ်သမ်ႉတၢႆပႅတ်ႈႁဝ်း တႄႉလႃႇ ...ႁိူဝ်ႈ...ႁိူဝ်ႈ...မိုၼ်ႇႁွမ် ”
ဝူင်းလိူၼ် ယိူၼ်ႉၵၼ်ႈၸႂ်ၼူမ်ပၼ်ၼႃႈၽၢၵ်ႇမိုၼ်ႇႁွမ်လွႆးလွႆးသေ
“ မိုၼ်ႇႁွမ် တေၸဵမ်မိူဝ်ႈလဵၵ်ႉ ႁႃးယႂ်ႇမႃးၸွမ်းၵၼ်သေ ထိုင်တီႈ တေလႆႈယူႇႁူမ်ႈၵၼ်ၼၼ်ႉ မိုၼ်ႇႁွမ် သမ်ႉပၢႆႈၽၢတ်ႇႁဝ်းၵႂႃႇတႄႉယဝ်ႉလႃႇ။ ၼင်ႇႁိုဝ်မႂ်းတေသိူဝ်းၸႂ်ၼၼ်ႉ ၵဝ်ၸွမ်းၸႂ်ပၼ်မႃးယူႇ ၵူႈပိူင်သေတႃႉ မႂ်း...မႂ်းၵၢမ်ႇႁၢႆႉတႄႉဢိူဝ်ႈ မိုၼ်ႇႁွမ် ”
ဢူႈမႄႈပီႈၼွင်ႉ မိုၼ်ႇႁွမ်ၶဝ် ဢွၼ်ၵၼ်မႃးႁွင်ႉႁွင်ႉႁႆႈႁႆႈ သမ်ႉပေႃးပၼ်းလူင်ၵႂႃႇယူႇ၊ ၽႂ်ႁႆႈတၢၼ်ႇႁိုဝ်ၽႂ်ႁွင်ႉတၢၼ်ႇႁိုဝ်သေတႃႉ မိုၼ်ႇႁွမ်တႄႉ ဢမ်ႇငိၼ်းယဝ်ႈ။
ၸွမ်းၼင်ႇၵၢင်ၸႂ်မိုၼ်ႇႁွမ်မီးၼၼ်ႉ ၶဝ်ၵေႃႈ ၼုင်ႈၶူဝ်းလုၵ်ႈပႂ်ႉမႂ်ႇပၼ်မၼ်းသေ ၵႂႃႇၽင်လုမ်းလႃးပၼ်လီလီယဝ်ႈ။ ဝၢႆးသေ ႁႅၼ်းသွမ်းပၼ်မၼ်းယဝ်ႉ ၼႃႈၵၢၼ်သႅင် ဝူင်းလိူၼ်မီးမႃး လႄႈ ဝူင်းလိူၼ်ၵေႃႈ ၼႅင်ၸႂ်သေ ဢွၵ်ႇတၢင်းၵႂႃႇယူႇ။