ၶိုၼ်းထူပ်းႁၼ်ၵၼ်/တွၼ်ႈ 15 သၢမ်ႁူဝ်ၸႂ်တၢင်းႁၵ်ႉ
ၶႅတ်ႉလႃး လႄႈဝူင်းလိူၼ် မႃးထူပ်းၵၼ်တီႈ ၼိူဝ်လွႆၵွင်းမူးယွၼ်းသူးတဵမ်ထူၼ်ႈ။
“ ၶႅတ်ႉလႃး မီးလွင်ႈၸိူင်ႉႁိုဝ်သေ သမ်ႉပေႃးလႆႈၶဵၼ်းထူပ်းၵၼ်ၼင်ႇၼႆ ”
“ ပေႃးဢမ်ႇမီးလွင်ႈ ဢမ်ႇထူပ်းလႆႈ ပေႃႈလဵင်ႉၵႃႉသႅင်ၼႆႁႃႉ? တေႃႈဝႃႈ ”
“ ဢမ်ႇၸႂ်ႈၸိူင်ႉၼၼ်ၼင်ႇၵဝ်ႇ ၶႂ်ႈလၢတ်ႈသင်ၵေႃႈ လၢတ်ႈလႄႈ”
ၶႅတ်ႉလႃးၼင်ႈၼိူဝ်တင်ႇဢုတ်ႇ ႁိမ်းၶူဝ်လႆၶိုၼ်ႈလူင်းၼၼ်ႉသေ
“ ၶႂ်းလၢတ်ႈမႂ်ႈလွင်ႈမိုၼ်ႇႁွမ်ဢိူဝ်ႈ ဝူင်းလိူၼ် ”
“ မိုၼ်ႇႁွမ် ပဵၼ်သင်?”
“ ပိူၼ်ႈတေ ၶႂ်ႈမႃးယွၼ်းမိုၼ်ႇႁွမ်ဝႃႇ ”
ဝူင်းလိူၼ်တူၵ်းၸႂ်ၵႂႃႇသေ
“ ၽႂ်တေမႃးယွၼ်း ပဵၼ်ၽႂ်ၶႅတ်ႉလႃး ?”
“ ပဵၼ်ဢၢႆႈဢေးၼႆဢိူဝ်ႈ မိုၼ်ႇႁွမ်ၵေႃႈ ဢမ်ႇၶႂ်ႈလႆႈမၼ်းလႄႈ မိူဝ်ႈၶမ်ႈဝႃး မိုၼ်ႇႁွမ်ဝႃႈ ‘ၽိူဝ်ႇလႆႈယူႇၸွမ်းၵေႃႉႁဝ်းဢမ်ႇႁၵ်ႉၼၼ်ႉ တႃႉတၢႆလႃႈ ’ၼႆၵွၼ်ႇဢိူဝ်ႈ။ ၵွပ်ႈၼႆ ၵဝ်မႃးမွၵ်ႇမႂ်းႁူႉဢိူဝ်ႈ ”
ဝူင်းလိူၼ် မိူၼ်ႇယူႇသေ ဢမ်ႇၸၢင်ႈတၵ်းသဵင်သင် ၶႅတ်ႉလႃးၸင်ႇဝႃႈ
“ ၵၢင်ၸႂ်ၵဝ်တႄႉ ၶႂ်ႈႁၼ်မိုၼ်ႇႁွမ် သိူဝ်းၸႂ်ၵူၺ်းဢိူဝ်ႈ ဝူင်းလိူၼ် မႂ်းသမ်ႉဢမ်ႇၶႂ်ႈႁၼ် မိုၼ်ႇႁွမ်သိူဝ်းၸႂ်ႁႃႉ?”
“ ၶႂ်ႈႁၼ်ဢိူဝ်ႈ ”
“ ပေႃးၶႂ်ႈႁၼ်ၼႆ မႂ်းတေႁဵတ်းႁိုဝ်လႃႇ ? ဝူင်းလိူၼ်”
“ ပေႃးဢမ်ႇႁၵ်ႉၵေႃႈ ၸၢင်ႈလူဝ်ႇဢဝ်ႁဵတ်းသင် ”
“ မိုၼ်ႇႁွမ်ၵေႃႈ ဢမ်ႇၶႂ်ႈဢဝ် ဢၼ်မၼ်းဢမ်ႇႁၵ်ႉၼၼ်ႉၼင်ႇၵဝ်ႇ မၼ်းၵေႃႈ တေႃႈၶႂ်ႈယူႇလူၺ်ႈ ၵေႃႉဢၼ်မၼ်းႁၵ်ႉၼၼ်ႉၵူၺ်းဢိူဝ်ႈ၊ ၵေႃႉမၼ်းႁၵ်ႉၼၼ်ႉ ပဵၼ်ၽႂ်ၼႆ ၸွင်ႇမႂ်းႁူႉႁိုဝ်ဝူင်းလိူၼ်?”
“ မၼ်းဢမ်ႇလၢတ်ႈၵဝ်လူး ႁိုဝ်တေၵႂႃႇႁူႉ မၼ်းယင်းဝႃႈတီႈၵဝ် ယႃႇပေဝႆႉၸူႉၼႆၵွၼ်ႇဢိူဝ်ႈ ”
“ ပေႃးမႂ်းၶႂ်ႈႁူႉၵေႃႈ ဢၼ်မၼ်းႁၵ်ႉၼၼ်ႉၼႆ ၵဝ်တေလၢတ်ႈၼႄမႂ်းဢိူဝ်ႈ ”
“ လၢတ်ႈလႄႈ ”
“ ၸဵမ်မိူဝ်ႈၵဝ် တႄႇမႃးၽႅဝ်ႁိူၼ်းၶဝ် ၼႂ်းလုၵ်းၼွၼ်းမိုၼ်ႇႁွမ်ၼၼ်ႉ ၵဝ်ႁၼ်မၼ်း ဢဝ်ပူဝ်ႇၸတႃႇ ဢၼ်မီးႁၢင်ႈလိူၼ်မူၼ်း တိင်ဝႆႉတင်းၼမ်ဢိူဝ်ႈ၊ ၼၼ်ႉမၼ်းပွင်ႇဝႃႈ လိူၼ်မူၼ်းၼၼ်ႉ မီးၸမ်မၼ်းတႃႇသေႇၼႆယဝ်ႉ ဝူင်းလိူၼ် ၵဝ်တေလၢတ်ႈမႂ်းသိုဝ်ႈသိုဝ်ႈ မိုၼ်ႇႁွမ်ႁၵ်ႉမႂ်းဢိူဝ်ႈ ”
ဝူင်းလိူၼ် လႆႈငိၼ်းၼင်ႇၼၼ် မၼ်းဢၢမ်းၵႂႃႇသေ
“ ၶႅတ်ႉလႃး မၼ်းႁၵ်ႉၵဝ်ၼႆၼၼ်ႉ ပဵၼ်လူၺ်ႈၸႂ်မၼ်းလူင် ယႃႇပေႁၵ်ႉၵဝ်ၼႆ ၵဝ်ၵႂႃႇ ႁၢမ်ႈၸႂ်မၼ်းဢမ်ႇလႆႈၵူၺ်း ”
“ ဝူင်းလိူၼ် ၵၢင်ၸႂ်မႂ်း မီးၼင်ႇႁိုဝ်ၼိူဝ်မိုၼ်ႇႁွမ်လႃႇ?”
“ ၶႅတ်ႉလႃး ၵဝ်ဢေးလူမိုၼ်ႇႁွမ်ယူႇဢိူဝ်ႈ ”
“ ဢိူဝ်ႈ...ပေႃးဢီးလူၼႆၵေႃႈ တဵမ်ထူၼ်ႈယဝ်ႉလူး ”
“ ဢမ်ႇၸႂ်ႈၸိူင်ႉၼၼ် ၶႅတ်ႉလႃး ၵဝ်ႁၵ်ႉမိုၼ်ႇႁွမ် ဢၼ်ဝႃႈၼၼ်ႉ ၵဝ်ႁၵ်ႉမၼ်း မိူၼ်ၼင်ႇ တႆးၵေႃႉၵဝ် မိူဝ်ႈလဵၵ်ႉ မိူၼ်ၼင်ႇၼွင်ႉယိင်းဢွၵ်ႇဢွၵ်ႇၵဝ်ၵူၺ်းဢိူဝ်ႈ၊ ၶႅတ်ႉလႃး... ၼႆႉပဵၼ်ၵၢင်ၸႂ်ၵဝ် ဢၼ်ၽိူၵ်ႇၸိုၼ်ႈၶၢဝ်သႂ် ၼိူဝ်မိုၼ်ႇႁွမ်ၼၼ်ႉယဝ်ႈ ”
“ ၵွပ်ႈသင် မႂ်းသမ်ႉဢမ်ႇႁၵ်ႉမိုၼ်ႇႁွမ် ၸိူင်ႉၼင်ႇမၼ်းႁၵ်ႉမႂ်းၼၼ်ႉလႃႇ ?”
“ ၵဝ်ၵေႃႈ ဢမ်ႇႁူႉၸႂ်ၵဝ်၊ ၵဝ်ၵေႃႈ ဢၢမ်းၸႂ်ၵဝ်ယူႇဢိူဝ်ႈ တႆးၵေႃႉၵဝ်တင်းၼမ် ဢွၼ်ၵၼ်တိုၵ်းသူၼ်း ႁႂ်ႈၵဝ်ယွၼ်းတၢင်းႁၵ်ႉမိုၼ်ႇႁွမ်ၼႆသေတႃႉ ၵဝ်ၵူၺ်းႁၵ်ႉမၼ်းလႆႈ မိူၼ်ၼင်ႇ ၵေႃႉမိူဝ်ႈဢွၼ်ႇ မိူၼ်ၼင်ႇၼွင်ႉယိင်းဢွၵ်ႇဢွၵ်ႇၵူၺ်း ”
“ ဝူင်းလိူၼ် လွင်ႈဢၼ်မႂ်းဢမ်ႇႁၵ်ႉလႆႈမိုၼ်ႇႁွမ်ၼၼ်ႉ ၸူဝ်ႈမႂ်းၵႂႃႇၵႃႉ မိူင်းတႂ်ႈမိူင်းၼိူဝ်ၼႆႉ မႂ်းႁၼ်ဝႆႉ ၵေႃႉထုၵ်ႇၸႂ်မႂ်းယဝ်ႉႁႃႉတေႃႈဝႃႈ?”
“ ၶႅတ်ႉလႃး ၵဝ်ဢမ်ႇလႅၼ်မႂ်း ၵဝ်ႁၼ်ဝႆႉ ၵေႃႉထုၵ်ႇၸႂ်ၵဝ်ယဝ်ႈ”
ၶႅတ်ႉလႃး ထူၺ်ႈၸႂ်လူင်သေ ငဝ်မိုင်ၵႂႃႇယူႇ။ ဝူင်းလိူၼ်ၶိုၼ်းလၢတ်ႈ
“ ၵဝ်တေလၢတ်ႈၼႄမႂ်း”
“ ဢမ်ႇလူဝ်ႇလၢတ်ႈယဝ်ႈ ဝူင်းလိူၼ် ပေႃးမႂ်းဢမ်ႇဢီးလူမိုၼ်ႇႁွမ်ၼႆ ၵဝ်ၵူဝ်မိုၼ်ႇႁွမ် ပဵၼ်တႂ်ႈပဵၼ်ၼိူဝ်ၵႂႃႇၵူၺ်းယဝ်ႉ ”
“ ၵဝ်ဢီးလူ မိုၼ်ႇႁွမ်ယူႇၼႆ ၵဝ်ဝႃႈယူႇလူး၊ လိူဝ်သေၼၼ်ႉ ၸဵမ်မိူဝ်ႈၵဝ်လႆႈႁူႉငိၼ်း ၽဝမႂ်းၼၼ်ႉၵေႃႈ ၵဝ်ဢီးလူပႃးမႂ်းတႄႉတႄႉဢိူဝ်ႈ ၶႅတ်ႉလႃး၊ လွင်ႈဢၼ်ႁႃး ၶိုၼ်းထူပ်းႁၼ်ၵၼ်ၸိူဝ်းၼၼ်ႉ ၵဝ်ဝူၼ်ႉမိူဝ်ႈလႂ်ၵေႃႈ တိုၵ်ႉမႂ်ႇသႂ်ႇဝႆႉ ၼႂ်းၸႂ်ၵဝ်ယူႇတႃႇသေႇသေ ၵႆႉၵႆႉၶိုၼ်းဝူၼ်ႉၶွပ်ႈတႃႇသေႇယဝ်ႈ ၊ ဝၼ်းဢၼ်ၵဝ်ဢမ်ႇဝူၼ်ႉ လွင်ႈလႆႈထူပ်းမႂ်းၼၼ်ႉ ဢမ်ႇမီးသေဝၼ်းၵူၺ်းၶႅတ်ႉလႃး၊ ၵွပ်ႈသင် ၵဝ်ၵႆႉၵႆႉ ၶုၵ်းၸႂ်လႆႈမႂ်းၼႆ ၵဝ်ႁူႉၸႂ်ၵဝ်လီလီယူႇ လွင်ႈဝႃႈၵဝ်ႁၵ်ႉမႂ်းၼႆ...”
ၶႅတ်ႉလႃး ၵူမ်ႈတူၺ်းတီႈတႂ်ႈသေ ထူၺ်ႈၸႂ်လူင်ယူႇ၊ ဝူင်းလိူၼ်မႃးယိပ်းဝႆႉ မိုဝ်းမၼ်း ၶွၼ်ၼိုင်ႈလႄႈ မၼ်းပၢၵ်ႈပႅတ်ႈသေ
“ ဝူင်းလိူၼ် ၽဝႃႉၵဝ်ၼႆႉ ၵဝ်ဢမ်ႇယုမ်ႇၵူၼ်းၸၢႆးၵေႃႉလႂ်ၵူၺ်း ၵူၼ်းမေႃလၢတ်ႈ ၸိူင်ႉမႂ်းၼႆႉ ၵဝ်ၶႅၼ်းဢမ်ႇယုမ်ႇယဝ်ႈ။ ၽဝႁၢင်ႈၸႃႉၵဝ်လႄႈ ၽဝၸိုၼ်ႈသႂ်မႂ်းၼၼ်ႉၵေႃႈ မၼ်းဢမ်ႇၵိုင်ႇၵၼ် ဝူင်းလိူၼ် ”
“ ၶႅတ်ႉလႃႈ ၵဝ်ႁၵ်ႉမႂ်းၼႆႉ မၼ်းဢမ်ႇၸႂ်ႈဝႃႈ ႁၵ်ႉၼိူဝ်ႉလိူတ်ႈ၊ မၼ်းပဵၼ် ႁၵ်ႉၼႂ်းဢူၵ်းၼႂ်းၸႂ်ၵဝ် တႄႉတႄႉဢိူဝ်ႈယုမ်ႇလႄႈ ”
“ ၵဝ်ဝႃႈယဝ်ႉယဝ်ႈလူး ၵဝ်ဢမ်ႇယုမ်ႇၵူၼ်းၸၢႆးၵေႃႉလႂ်ၼႆ ဝူင်းလိူၼ် ”
“ ယုမ်ႇၵဝ်လႄႈ ၶႅတ်ႉလႃး ၵဝ်ႁၵ်ႉမႂ်းတႄႉတႄႉသေ တေဢၢၼ်းၵူပ်ႉၵူးယူႇလူၺ်ႈ ၸွမ်းမႂ်း တေႃႇၸူဝ်ႈၼႆ ၵဝ်ယိူင်းဢၢၼ်း တႅပ်းတတ်းၸႂ်ၵဝ်ဝႆႉၵွၼ်ႇယဝ်ႈ။ ဢၢင်ႈလၢတ်ႈမႂ်း ၸဵမ်မိူဝ်ႈတႄႇၶိုၼ်း ႁၼ်ၵၼ်ၼၼ်ႉၼႆသေတႃႉ၊ သမ်ႉၵူဝ်မႂ်းထၢင်ႇဝႃႈ ၵဝ်ပဵၼ်ၵူၼ်းပိတ်းယွတ်ႈသုၼ်ႇၼႆလႄႈ ၵဝ်ၸင်ႇ ဢမ်ႇပဵၼ်လၢတ်ႈ၊ မိူဝ်ႈၼႆႉ ဢၼ်ၵဝ်လၢတ်ႈၼႆႉၵေႃႈ ပဵၼ်ၵႂၢမ်းဢၼ်ဢွၵ်ႇမႃး မိူဝ်ႈလဵဝ်ဢမ်ႇၸႂ်ႈ ပဵၼ်ၵႂၢမ်းဢၼ်မူၵ်းဝႆႉၼႂ်းၸႂ်ၵဝ် တင်းႁိုင်ၼၼ်ႉယဝ်ႉ ”
“ ၵဝ်ယုမ်ႇယၢပ်ႈယူႇ ဝူင်းလိူၼ် ”
“ ၶႅတ်ႉလႃး လွင်ႈၵဝ်ႁၵ်ႉမႂ်းတႄႉတႄႉၼၼ်ႉ သင်ၼႄလၵ်းထၢၼ်သၢၵ်ႈသေႇလႆႈၼႆ ၵဝ်ၶႂ်ႈၼႄယူႇ ”
“ မႂ်းတေၼႄလႆႈယူႇႁႃႉ?”
“ ၼႄလႆႈယူႇ ”
“ တေႁတ်းၼႄတႄႉတႄႉႁႃႉ လွင်ႈမႂ်းႁၵ်ႉၵဝ်ၼၼ်ႉ ဝူင်းလိူၼ် ပေႃးမႂ်းၼႄလႆႈၵဝ် ၸင်ႇတေၸၢင်ႈယုမ်ႇတၢင်းႁၵ်ႉမႂ်းယဝ်ႈ ”
“ ႁတ်းၼႄတႄႉတႄႉဢိူဝ်ႈ ”
“ လီယဝ်ႈ ပေႃးၼႆၵေႃႈ သၢဝ်တႆးဢၼ်မၢဝ်ႇတႆး ဢမ်ႇဢဝ်ၼၼ်ႉ ပိူၼ်ႈတေဢဝ်ဢိူဝ်ႈ ပေႃးမႂ်းႁၵ်ႉၵဝ်တႄႉတႄႉၼႆ လၵ်းထၢၼ်သၢၵ်ႈသေႇမၼ်း မႂ်းတေလႆႈဢဝ်မိုၼ်ႇႁွမ်ၼႄၵဝ်ဢိူဝ်ႈၼႃႈ ၵဝ်တေၵႂႃႇၵွၼ်ႇ ဝူင်းလိူၼ် ”
“ ဢီႈသင်ၵေႃ?”
“ ႁဵတ်းလုၵ်ႈၶူၺ် မေႃယႃလူင်သေ ၼႄၵဝ်လႃႈ ”
ၶႅတ်ႉလႃး ဝႃႈၼၼ်သေ ၶီႇရူတ်ႉၶိူင်ႈမၼ်း လူင်းလွႆၵႂႃႇယဝ်ႈ၊ ဝူင်းလိူၼ် ႁွင်ႉမၼ်းၵိုတ်းၵေႃႈ မၼ်းၼၢင်းဢမ်ႇၵိုတ်း ။
ၼမ်ႉတႃၶႅတ်ႉလႃး လႆႈလူင်းၸွမ်ႈၵႅမ်ႈမၼ်းၼၢင်း တင်းသွင်ၽၢၵ်ႇ၊ ပဵၼ်ၼမ်ႉတႃၸူမ်းႁိုဝ် ပဵၼ်ၼမ်ႉတႃၶီႁိုဝ် ပဵၼ်တင်းသွင်ပိူင်ႁိုဝ်ၼႆ လိူဝ်သေမၼ်းၵေႃႉလဵဝ် ၽႂ်ဢမ်ႇၸွမ်းႁူႉ။ ဝူင်းလိူၼ် ၵွတ်ႇႁူဝ်မၼ်းသေ ၼင်ႈထိုဝ်ႉသႂ်ႇၼိူဝ်တင်ႇဢုတ်ႇၼၼ်ႉ ဢမ်ႇတူင်ႉဢမ်ႇၼိုင်ယူႇ။ ထိုင်ၵၢင်ၶမ်ႈမႃး
တွတ်း...တွတ်း ...တွတ်း...
“ ႁလူဝ်...လၢတ်ႈၶႃႈလႄႈ ”
“ မိုၼ်ႇႁွမ် ဝူင်းလိူၼ်သိုပ်ႇၽူၼ်းဢိူဝ်ႈ ”
“ လၢတ်ႈလႄႈ ဝူင်းလိူၼ် ”
ဝူင်းလိူၼ် တေလႆႈတႄႇလၢတ်ႈဢၼ်လႂ် တေလႆႈလၢတ်ႈၸိူင်ႉႁိုဝ်ၵေႃႈ ဢမ်ႇႁူႉလႄႈ မၼ်းမိုင်ဝႆႉယူႇ။ မိုၼ်ႇႁွမ် ဢမ်ႇငိၼ်းဝူင်ႈလိူၼ်လၢတ်ႈသင်လႄႈ မၼ်းၸင်ႇထၢမ်
“ ဝူင်ႈလိူၼ် မႂ်းၶႂ်ႈလၢတ်ႈသင်?”
“ ဢေႃႈ ...ၶႅတ်ႉလႃး မႃးလၢတ်ႈၵဝ်ဝႃႈ ဢၢႆႈဢေးၶႂ်ႈမႃး ထၢမ်ယွၼ်းမႂ်းၼႆၸွင်ႇၸႂ်ႈ ?”
“ ၸႂ်ႈဢိူဝ်ႈ ၵဝ်တေလႆႈႁဵတ်းႁိုဝ်ၵေႃႈ ဢမ်ႇႁူႉယဝ်ႈ ဝူင်းလိူၼ် တႃႉၶႂ်ႈတၢႆလႃႈ ”
“ ဢူဝ်း...ယႃႇပေဝႃႈၼၼ်သေၵမ်း ႁဵတ်းၼႆလႄႈ ”
“ ႁဵတ်းႁိုဝ်?”
“ မႂ်းထဵင်ပႅတ်ႈဢၢႆႈဢေးသေ လၢတ်ႈဝႃႈ ဢမ်ႇဢဝ်လႆႈၼႆလႄႈ ”
“ ပေႃးၶဝ်ၸႂ်ႉဢဝ်တိၵ်းတိၵ်းလူး တေလႆႈဝႃႈႁိုဝ်လႃႇ?”
“ မိုၼ်ႇႁွမ် ၸွင်ႇမႂ်းတေႁတ်းလၢတ်ႈ ၸိူင်ႉၼင်ႇၵဝ်သွၼ်ပၼ်မႂ်းၼႆႉႁိုုဝ်? မႂ်းဝႆႉၸႂ်ၵႅၼ်ႇၵႅၼ်ႇၼႃႈ ”
“ဝူင်းလိူၼ် ပေႃးမႂ်းၸႂ်ႉၼႆ ၵဝ်တေႁတ်းလၢတ်ႈယူႇ၊ တေလႆႈဝႃႈႁိုဝ် လၢတ်ႈလႄႈ ”
“ မိုၼ်ႇႁွမ် ႁႃးသွင်ၵေႃႉၼႆႉ ပဵၼ်ၵေႃႉမိူဝ်ႈဢွၼ်ႇၵၼ်မႃး တေႃႇပေႃးယႂ်ႇယဝ်ႈ၊ ၵွပ်ႈၼႆ လွင်ႈၸႂ်တိတ်းၼိူဝ်ၵၼ်ၼၼ်ႉၵေႃႈ ႁႃးမီဝႆႉၼင်ႇၵၼ်လူး၊ ၵွပ်ႈၼႆ မႂ်းဝႆႉၸႂ်ႁတ်းႁတ်းသေလၢတ်ႈဝႃႈ ႁႃးဝူင်းလိူၼ် တေဢဝ်ၵၼ်ဢိူဝ်ႈ ၼႆလႃႈ ”
မိုၼ်ႇႁွမ် ဢမ်ႇၶႂ်ႈယုမ်ႇႁူမၼ်ႈသေ
“ ဢီႈသင်ၵေႃ? ဝူင်းလိူၼ် ”
“ ႁႃးဝူင်းလိူၼ် တေဢဝ်ၵၼ်ဢိူဝ်ႈၼႆ မႂ်းဢမ်ႇႁတ်းလၢတ်ႈႁႃႉ?”
မိုၼ်ႇႁွမ်ယိပ်းၽူၼ်းသေ မိုင်ၵႂႃႇယူႇတင်းႁိုင် ဝူင်းလိူၼ်ၸင်ႇထၢမ်
“ မိုၼ်ႇႁွမ်...မိုၼ်ႇႁွမ်”
“ ဝူင်းလိူၼ် ”
“ မိုၼ်ႇႁွမ် တူၵ်းၸႂ်ၵႂႃယဝ်ႈႁႃႉ ဝႆႉၸႂ်လီလီ ၵဝ်ဝႃႈတႄႉဢိူဝ်ႈ ”
“ ဝူင်းလိူၼ် မႂ်းလၢတ်ႈ ”
“ တႄႉဢိူဝ်ႈ ဢမ်ႇၸႂ်ႈၵႂၢမ်းယွၵ်ႇလဵၼ်ႈၵူၺ်း ၸွင်ႇမႂ်းတေ ႁတ်းလၢတ်ႈႁိုဝ်?”
“ ႁတ်း...ႁတ်းဢိူဝ်ႈ”
“ လၢတ်ႈၸိူင်ႉၼင်ႇၵဝ်သွၼ်မႂ်းၼႆႉလႃႈ ဢမ်ႇႁိုင်ဢမ်ႇၼၢၼ်း ၵဝ်တေ မွၵ်ႇလၢတ်ႈပေႃႈမႄႈႁဝ်းသေ မႃးပွင်ႇၶၢဝ်ႇလႆ မိူဝ်ႈၽုၵ်ႈၼႆႉ ၵဝ်တေဢွၵ်ႇတၢင်း တေႁိုင်မွၵ်ႈလိူၼ်ၼိုင်ႈ ယွမ်းယွမ်းၵႂႃႈ ၊ ပေႃးၵဝ်ပွၵ်ႈမႃး ထုၵ်ႇႁဵတ်းႁိုဝ်ထႅင်ႈၼႆ ၸင်ႇၵွႆႈဢုပ်ႇၵုမ်ၵၼ်ဢဝ်ယဝ်ႈ။ မိုၼ်ႇႁွမ် ၾၢင်ႉသတိဝႆႉပၢႆးယူႇလီၼႃႈ ”
“ ဢိူဝ်ႈ...ဝူင်းလိူၼ် ၵဝ်ၶႂ်ႈထူပ်ႈမႂ်းဢိူဝ်ႈ ”
“ ၸင်ႇၵွႆႈထူပ်းယဝ်ႉၼႃႇ မိူဝ်ႈၼႆႉၶမ်ႈယဝ်ႉလူး၊ ဝၢႆးၼႆႉတေလႆႈထူပ်ႈၵၼ် တႃႇသေႇယူႇလူႈ ၊ ဝႆႉသတိပၢႆးယူႇလီၸဝ်ႈၵဝ်ႇၼႃႈ ဝႆႉၸႂ်သိူဝ်းသိူဝ်းၼႃႈ ယႃႇပေသိူဝ်းပူၼ်ႉၽႅဝ်ၼႃႈ ၵူဝ်လိုမ်းတူဝ်”
“ ဢမ်ႇလိုမ်ႈ ပေႃးၼႆ ဝူင်းလိူၼ် ယႃပေၼၢၼ်းမႃးၼႃႈ မိုၼ်ႇႁွမ်တေမွင်းပႂ်ႉဝႆႉယူႇ ”
ဝူင်းလိူၼ်ထူၺ်ႈၸႂ်လူင် ‘သူး ’ၼႆသေ ဝၢင်းၽူၼ်းၵႂႃႇယူႇ။ မိုၼ်ႇႁွမ်ၵေႃႈ ထူၺ်ႈၸႂ်လူင်သေ ၶဝ်ႈမႃးၼွၼ်းလိုဝ်ႈၸႂ် ၼႂ်းလုၵ်ႈၼွၼ်းမၼ်းယူႇ။ ဝၢႆးသေ ၶႅတ်ႉလႃး ႁပ်းႁွင်ႈယႃယဝ်ႉၸင်ႇၶဝ်ႈမႃး ၼႂ်းလုၵ်းၼွၼ်း
“ မိုၼ်ႇႁွမ် ပႆႇလပ်းႁႃႉ?”
“ ဢမ်ႇလပ်း ”
ၶႅတ်ႉလႃးၵေႃႈ မႃးၶဝ်ႈၽႃႈၼွၼ်းသေ ဝူၼ်ႉယူႇၵူၺ်းမၼ်း၊ မိုၼ်ႇႁွမ်ၵေႃႈ ဝူၼ်ႉယူႇၵူၺ်းမၼ်းတင်းႁိုင် ၽႂ်ၵေႃႈဢမ်ႇဢုပ်ႇၽႂ်။ ယူႇၵမ်းၼိုင်ႈ မိုၼ်ႇႁွမ်ၸင်ႇဝၢႆႇၼႃႈ မႃးၸူး ၶႅတ်ႉလႃးသေ
“ ၶႅတ်ႉလႃး လွင်ႈဢၢႆႈဢေးၼၼ်ႉ ၶႅတ်ႉလႃးၵႂႃႇလၢတ်ႈဝူင်းလိူၼ်ၼႆ?”
“ ၸႂ်ႈဢိူဝ်ႈ ”
“ ၵႂႃႇႁဵတ်းႁိုဝ်လၢတ်ႈ?”
“ ၸၢင်ႈၵႂႃႇႁဵတ်းႁိုဝ်လၢတ်ႈ လၢတ်ႈဝႃႈပိူၼ်ႈတေမႃးဢဝ် မိုၼ်ႇႁွမ်ယဝ်ႈ၊ သၢဝ်တႆးၼႆႉ ပေႃးမၢဝ်ႇတႆႈ ဢမ်ႇဢဝ်ၵေႃႈ ပိူၼ်ႈတေဢဝ်ယဝ်ႈ ၼႆၵူၺ်းဢိူဝ်ႈ။ ဝူင်းလိူၼ် သိုပ်ႇၽူၼ်ႈမႃးတီႈမိုၼ်ႇႁွမ် ႁႃႉ?‘’
“ ၸႂ်ႈဢိူဝ်ႈ ”
“ မၼ်းဝႃႈႁိုဝ်?”
“ မၼ်းၸႂ်ႉမိုၼ်ႇႁွမ် ထဵင်ဢၢႆႈဢေးသေ ႁႂ်ႈမိုၼ်ႇႁွမ်လၢတ်ႈဝႃႈ ‘ ႁႃးဝူင်းလိူၼ် တေဢဝ်ၵၼ်ဢိူဝ်ႈ’ ၼႆ တီႈပေႃႈမႄႈႁဝ်းၼႆဝႃႇ မၼ်းထၢမ်ဝႃႈ ၸွင်ႇမိုၼ်ႇႁွမ် တေႁဝ်းလၢတ်ႈၼႆလႄႈ မိုၼ်ႇႁွမ်ၵေႃႈဝႃႈ ႁတ်းဢိူဝ်ႈၼႆယဝ်ႉ ”
ၶႅတ်ႉလႃႈ ထိုင်ၸႂ်ယူႇသေတႃႉ ႁဵတ်းပႅတ်ႉၸူမ်ႈသိူဝ်းသေ
“ လီဢိူဝ်ႈၼၼ်ႉ မိုၼ်ႇႁွမ်လႄႈဝူင်းလိူၼ်ၼႆႉ ပေႃးဢဝ်တႃ ၶႅတ်ႉလႃးတူၺ်း လႅပ်ႈၵၼ်သေပိူၼ်ႈယဝ်ႈ။”
“ ၶႅတ်ႉလႃး ၸူမ်းသိူဝ်းၶွပ်ႈၸႂ် လွင်ႈမႂ်းမေႃပွင်ႇၶၢဝ်ႇပၼ်မၼ်းၼၼ်ႉယူႇ။ ”
“ ဢမ်ႇၶွပ်ႈၸႂ်ၵေႃႈ ဢမ်ႇပဵၼ်သင်သႄႈ မိုၼ်ႇႁွမ် ႁဝ်းပဵၼ်တႆးၵေႃႉႁၵ်ႉၵၼ်ၸဵမ်လဵၵ်ႉ ပေႃးဢမ်ႇၸွႆႈထႅမ်ၵၼ်ၼႆ ႁိုဝ်တေၵႂႃႇတူၵ်းထုၵ်ႇလႃႇ ”
မိုၼ်ႇႁွမ်ၸူမ်းသိူဝ်းသေ ၵွတ်ႇၶႅတ်ႉလႃးဝႆႉယူႇ။ ၶႅတ်ႉလႃးၵေႃႈ ၶိုၼ်းၵွတ်ႇမိုၼ်ႇႁွမ်ဝႆႉသေ
“ ႁႂ်ႈမိုၼ်ႇႁွမ်ၶဝ် ႁၵ်ႉၵၼ်ၵႂႃႇတေႃႇၸူဝ်ႈသေၵမ်းၼႆ ၶႅတ်ႉလႃးယွၼ်ႈသူးပၼ်ယူႇ ”
ၼမ်ႉတႃ ၶႅတ်ႉလႃးလၵ်ႉလွမ်ယွႆႉဝႆႉယူႇၼႆတႄႉ မိုၼ်ႇႁွမ်ဢမ်ႇႁူႉထိုင်။