ၶိုၼ်းထူပ်းႁၼ်ၵၼ်/တွၼ်ႈ 14 မိုၼ်ႇႁွမ်ၼွၼ်းဢမ်ႇလပ်း
ၶႅတ်ႉလႃ; မႃးယူႇလူၺ်ႈမိုၼ်ႇႁွမ်ၶဝ် ၸမ်သွင်ပီယဝ်ႈၽွင်းၶႅတ်ႉလႃး မႃးယူႇၸွမ်းမိုၼ်ႇႁွမ်ၼၼ်ႉ မိုၼ်ႇႁွမ်ၵေႃႈ သိူဝ်းၸႂ်လႄႈ တၢင်းပဵၼ်လူမ်းႁူဝ်ၸႂ်ၶိုၼ်ႈမၼ်းၼၼ်ႉၵေႃႈ သမ်ႉပေႃး ၶႂ်ႈၸိုၼ်ႈၶႅၼ်းၵႂႃႇယဝ်ႈ။ ၶဝ်တင်းႁိူၼ်း လႆႈႁၼ်လုၵ်ႈယိင်ႈၶဝ်ယူႇလီမႃးတႄႉတႄႉလႄႈ ၸူမ်းသိူဝ်းၸႂ်ဝႆႉယူႇ။
ၶိုၼ်းၼိုင်ႈ မိုၼ်ႇႁွမ်ထူၺ်းၸႂ်လူင် ၽိုဝ်ႉၽိုဝ်ႉသေ မၼ်းၼၢင်းၼွၼ်းဢမ်ႇလပ်း။ ၶႅတ်ႉလႃႈ တိုၼ်ႇမႃးတိုၼ်ႇၼိုင်ႈသေ
“ မိုၼ်ႇႁွမ် ၼွၼ်းဢမ်ႇလပ်းႁႃႉ ၸွင်ႇၵိၼ်ယႃႈယႃယဝ်ႉႁိုဝ်ႉၶမ်ႈၼႆႉ?”
“ ၵိၼ်ယဝ်ႉယဝ်ႈ ”
“ ၵုမ်ႇဝူၼ်ႉသင်လႄႈ ၼွၼ်းဢမ်ႇလပ်းလႃႇ ယႃႇပေဝူၼ်ႉလႃႈ ”
“ ဢမ်ႇဝူၼ်ႉၵေႃႈ သမ်ႉတူၼ်ႉဢွၵ်ႇၼႂ်းၸႂ်တိၵ်းတိၵ်းလူး ၶႅတ်ႉလႃး ”
“ လွင်ႈသင် လၢတ်ႈၼႄၶႅတ်ႉလႃး ဢမ်ႇလႆႈႁႃႉ ?”
“ ၶႅတ်ႉလႃႈ မိူဝ်ႈၵၢင်ဝၼ်းၼၼ်ႉ မႄႈႁဝ်းမႃးလၢတ်ႈဝႃႈ ဢၢႆႈဢေး ၶႂ်ႈလႆႈၵဝ်သေ တုၵ်းႁႂ်ႈမႄႈၶဝ် မႃးပွင်ႇၶၢဝ်ႇ တီႈမႄႈႁဝ်းၼႆဝႃႇ တေထၢမ်တူၺ်းၵၢင်ၸႂ်ၵဝ်ၵွၼ်ႇ ၼႆသေ မႃးထၢမ်ၵဝ်ဢိူဝ်ႈ’
“ မိုၼ်ႇႁွမ်သမ်ႉတွပ်ႇဝႃႈႁိုဝ်လႃႇ?”
“ ၵဝ်ဝႃႈ ၵဝ်ဢမ်ႇၶႂ်ႈလႆႈၼႆသေ မႄႈႁဝ်းသမ်ႉဝႃႈ မႂ်းမီးၵေႃႉမၵ်းမၢႆဝႆႉယဝ်ႉႁႃႉ ၼႆၵဝ် ဢမ်ႇတွပ်ႇသေ ပၢႆႈယၢၼ်မႄႈႁဝ်းပႅတ်ႈဢိူဝ်ႈ ”
“ပေႃးၼႆ ၵွပ်ႈသင် မိုၼ်ႇႁွမ်ဢမ်ႇၶႂ်ႈလႆႈ ဢၢႆႈဢေးၼၼ်ႉလႃႇ? ၶဝ်ၵေႃႈမၢၵ်ႈမီးယူႇလူး”
“ ၶႅတ်ႉလႃး မၢႆၼိုင်ႈ ၵဝ်ဢမ်ႇႁၵ်ႉမၼ်း မၢႆသွင်ၵဝ်ဢမ်ႇလႆႈၸႂ် တၢင်းယၢမ်ႈမၼ်ႈ၊ မၢႆသၢမ် မၼ်းဢမ်ႇၸႂ်ႈၶိူဝ်းႁဝ်း ”
“ မိုၼ်ႇႁွမ် ပိူၼ်ႈဝႃႈ တင်းႁၵ်ႉဢမ်ႇမီးတႃ လွမ်ႁႃၵမ်ႉမၼ်းၶႂ်ႈလႆႈၼႆလူး ”
“ ၸႂ်ႈယူႇလႆ ပေႃးၵဝ်ဢဝ်မၼ်းၼႆ မၢဝ်ႇတႆးသမ်ႉတေၼႄးဝႃႈ ၵႂႃႇဢဝ်ပိူၼ်ႈၼႆ ဢိူဝ်ႈၶႅတ်ႉလႃး”
“ မိုၼ်ႇႁွမ် ႁဝ်းတေထၢမ်သူ သၢဝ်တႆးၵႂႃႇဢဝ်ၵူၼ်းတၢင်ႇၶိူဝ်းလႄႈ မၢဝ်ႇတႆးၵႂႃႇဢဝ် ၵူၼ်းတၢင်ႇၶိူဝ်းၼၼ်ႉ ဢၼ်လႂ်လီသေလၢႆသေဢၼ်လႂ်?”
“ လီသေလၢႆ တင်ႈသွင်ဢၼ်ဢိူဝ်ႈ ၶႅတ်ႉလႃး ”
“ ၸႂ်ႈယူႇ ဢၼ်လႂ်လီသေလၢႆသေဢၼ်လႂ်ၼႆၵႂႃႈ ”
“ မိုၼ်ႇႁွမ် ဢမ်ႇမေႃဝႃႈ ၶႅတ်ႉလႃး သပ်းလႅင်းၼႄလူး ”
“ ၸိူင်ႉၼင်ႇမိုၼ်ႇႁွမ်ဝႃႈ လီသေလၢႆတင်းသွင်ဢၼ်ၼႆၸႂ်ႈယူႇ။ ၸွမ်းၼင်ႇ ဢၼ်ၶႅတ်ႉလႃး ႁူႉႁၼ်ထိုင်ၼၼ်ႉတႄႉ ယၢမ်းလဵဝ်ၼႂ်းလုမ်ႈၾႃႉၼႆႉ ၼၢင်းယိင်း ၼမ်သေၵူၼ်းၸၢႆး တႄႉတႄႉလူး၊ ၼၢင်းယိင်းတႆးၵေႃႈ ၼမ်သေၵူၼ်းၸၢႆးတႆးယူႇ၊ ပၢႆသလိူဝ်ၵူၼ်းၸၢႆးတႆး ဢမ်ႇပေႃးၼမ် ၵမ်ႈၽွင်ႈ သမ်ႉၵႂႃႇႁဵတ်းသိုၵ်း ၵမ်ႈၽွင်ႈ သမ်ႉၵႂႃႇယူႇၵျွင်းမုၼ်ၸဝ်ႈ၊ ၵမ်ႈၽွင်ႈ သမ်ႉပဵၼ်ၶီႈလဝ်ႈၶီႈယႃႈလႄႈ ၶႅတ်ႉလႃးတႄႉ သေလၢႆမၢဝ်ႇတႆးၵႂႃႇဢဝ်ပိူၼ်ႈၼၼ်ႉဢိူဝ်ႈ ”
“ ၵွပ်ႈသင် ၶႅတ်ႉလႃးသမ်ႉဝႃႈၼၼ် ?”
“ မိုၼ်ႇႁွမ် ၸွမ်းၼင်ႇ ဢၼ်ၶႅတ်ႉလႃးႁၼ်မႃးၼၼ်ႉ ၼၢင်ႈယိင်းတႆးႁဝ်း မၢင်ၵေႃႉ ၵႂႃႇဢဝ်ၵူၼ်းတၢင်ႇၶိူဝ်းသေ လုၵ်ႈလၢင်းၶဝ်ပဵၼ်ပိူၼ်ႈၵႂႃႇသေတႃႉ မၢင်ၵေႃႉၼႆႉ ၵွပ်ႈပိူဝ်ႈမႄႈ လႆႈယူႇၸမ်လုၵ်ႈတႃႇသေႇလႄႈ ဢၼ်လုၵ်ႈၶဝ် မေႃၵႂၢမ်းတႆးသေ ပဵၼ်တႆးၼၼ်ႉ မီးတင်းၼမ်ဢိူဝ်ႈ။ ၵူၼ်းၸၢႆးတႆး ဢၼ်ၵႂႃႇဢဝ်ၶိူဝ်းပိူၼ်ႈၼၼ်ႉ မၢင်ၸိူဝ်းလုၵ်ႈၶဝ်မေႃၵႂၢမ်းတႆးယူႇသေတႃႉ ဢၼ်ၶႅတ် လႃး ႁၼ်မႃးတင်ႈၼမ် ၵွပ်ႈပိူဝ်ႈပေႃႈၼႆႉ ဢမ်ႇယူႇၸမ်လုၵ်ႈတၢၼ်ႇမႄႈလႄႈ လုၵ်ႈၶဝ်ဢမ်ႇမေႃၵႂၢမ်းတႆး မီးတင်းၼမ်လူး၊ ၼၼ်ႉတေဝႃႈ ၶဝ်ဢဝ်ပိူၼ်ႈႁႃႉ ပိူၼ်ႈဢဝ်ၶဝ်”
“ဢိူဝ်ႈ ၸိူင်ႉၼင်ႇ ၶႅတ်ႉလႃးႁၼ်ထိုင်ၼၼ်ႉၵေႃႈ ၸႂ်ႈယူႇလႆ ၵူၺ်ႈၵႃႈ သင်ပဵၼ်မၢဝ်ႇတႆး သၢဝ်တႆး ဢဝ်ၵၼ်ၼႆတႄႉ လီသေပိူၼ်ႈဢိူဝ်ႈၼေႃႈ ”
“ လီဢိူဝ်ႈ ၵူၺ်းၵႃႈ တႆႈၵေႃႉႁဝ်းသွင်ၵေႃႉ ၶႃပဵၼ်တႆးၼင်ႇၵၼ်ဢဝ်ၵၼ် ၽိူဝ်ႇမီးလုၵ်ႈမႃး ၶႃသမ်ႉ ပဵၼ်ၵူၼ်းႁဵတ်းၵၢၼ်လုမ်း။ ၵၢင်ၼႂ်ၵႂႃႇလုမ်း တၢမ်းၶမ်ႈၸင်ႇပွၵ်ႈမႃး လုၵ်ႈၶဝ် သမ်ႉဝႆႉပၼ်ၵူၼ်းယူႇႁူမ်ႈၶဝ်ထိင်း၊ ၵူၼ်းယူႇႁူမ်ႈၶဝ် သမ်ႉဢမ်ႇမေႃၵႂၢမ်းတႆးလႄႈ လုၵ်ႈၶဝ်ၼၼ်ႉ ဢမ်ႇမေႃၵႂၢမ်းတႆး။ ပေႃးပဵၼ်ၸိူင်ႉၼၼ်ၵေႃႈ ပႆႇတူၵ်းထုၵ်ႇၼင်ႇၵဝ်ႇယူဝ်ႉ မိုၼ်ႇႁွမ်။ ဢိူဝ်ႈ ဢဝ်ၶိူဝ်ႈပိူၼ်ႈ ၼၼ်ႉ ဝႆႉၼႆသေၵွၼ်ႇလႄႈ မိုၼ်ႇႁွမ်သမ်ႉႁၼ်ဝႆႉၽႂ်လႃႇ ပုၼ်ႈတႃႇတေယူႇႁူမ်ႈၶၢင်းသွင် ”
မိုၼ်ႇႁွမ် ထူၺ်ႈၸႂ်လူင်ၵမ်ႈၼိုင်ႈသေ
“ ႁၼ်ၵေႃႈ ဢမ်ႇဝႃႈ ဢမ်ႇႁၼ်ၵေႃႈဢမ်ႇဝႃႈ၊ မဵဝ်းၼႆႉ လၢတ်ႈယၢပ်ႇဝႆႉဢိူဝ်ႈ ”
“ လၢတ်ႈၶႅတ်ႉလႃးလႄႈ ထုၵ်ႇလီၸွႆႈထႅမ် ၸိူင်ႉႁိဝ်ၵေႃႈ ယူဝ်ၸၢင်ႈၸွႆႈဢိူဝ်ႈ ”
“ ယၢပ်ႇဢိူဝ်ႈၶႅတ်ႉလႃး မဵဝ်ႈႁဝ်းၼၢင်းယိင်း ဢၼ်ဝႃႈၼႆႉ ‘ ၶုၼ်ဢမ်ႇပၼ်တၢင်း ၼၢင်းဢမ်ႇၸၢင်ႈတႆႇ ’ၼႆၼႃႇ၊ ႁဝ်းႁၵ်ႉပိူၼ်ႈတၢၼ်ႇႁိုဝ်ၵေႃႈလၢႆး ႁႂ်ႈႁဝ်းၵႂႃႇလၢတ်ႈၵူၼ်းၸၢႆးဢွၼ်တၢင်းၼၼ်ႉ ႁဝ်းဢမ်ႇပဵၼ်လႆႈလူး ”
“ ပေႃးၼႆ မိုၼ်ႇႁွမ်မီးဝႆႉၵေႃႉမၢႆၼႂ်းသၢႆၸႂ်ယဝ်ႉဢိူဝ်ႈၼေႃႈ ပဵၼ်ၽႂ်? လၢတ်ႈလႄႈ ”
မိုၼ်ႇႁွမ် ဢမ်ႇတၵ်ႈသဵင် ၶႅတ်ႉလႃး ၸင်ႇသုတ်ႉမႃးႁိမ်းၸမ်သေ
“ လၢတ်ႈလႄႈ မိုၼ်ႇႁွမ်ႁၵ်ႉၽႂ်?”
“ ဢူဝ်...ဢမ်ႇၶႂ်ႈလၢတ်ႈလီဢၢႆ ”
“ လီဢၢႆႁဵတ်းသင် ႁႃးသွင်ၵေႃႉ ၸွင်ႇပဵၼ်ပိူၼ်ႈၵေႃႈဢမ်ႇၸႂ်ႈ ”
မိုၼ်ႇႁွမ်ဢမ်ႇသိုပ်ႇလၢတ်ႈသင်သေ ယဵၼ်ဝႆႉယူႉ။
“ မိုၼ်ႇႁွမ် ၶႅတ်ႉလႃးတူၺ်း ၼႂ်းလုၵ်းမိုၼ်ႇႁွမ် ၶႅပ်းႁၢင်ႈ ၸိူဝ်းဢၼ်တိင်ဝႆႉၼႆႉ မီးဝူင်းလိူၼ်မူၼ်း ၵူႈႁၢင်ႈယဝ်ႉ ၊ ၵွပ်ႈၼႆ မိုၼ်ႇႁွမ် ၸႂ်တိတ်ႈဝူင်းလိူၼ်သေ ႁၵ်ႉဝူင်းလိူၼ်ဝႆႉ ဢမ်ႇၸႂ်ႈ ႁႃႉ?”
“ ဢူဝ်...လၢတ်ႈသင်ၵေႃႈ ဢမ်ႇႁူႉ ”
“ ႁူႉယူႇၵႂႃႈ...ၶိၵ်ႈၶိၵ်း ဢမ်ႇလၢတ်ႈၵေႃႈ တႆးႁူႉယူႇ ဢမ်ႇလၢတ်ႈၵေႃႈၶႅတ်ႉလႃးႁူႉယူႇ ၵူၺ်း ”
“ ယႃႇပေလၢတ်ႈယဝ်ႈ ၶႅတ်ႉလႃႈ ”
“ ပေႃးလၢတ်ႈၼမ် ၶမ်ၸႂ်ၼႆႁႃႉ မိုၼ်ႇႁွမ် ”
“ ၼွၼ်းလႄႈ မိုၼ်ႇႁွမ်ၶႂ်ႈလပ်းၼႃႇယဝ်ႉ ”
“ ႁႂ်ႈမိုၼ်ႇႁွမ် ၾၼ်ႁၼ်လိူၼ်မူၼ်း ဢၼ်ဝူင်းယႂ်ႇယႂ်ႇၼၼ်ႉသေၵမ်း ”
မိုၼ်ႇႁွမ်ယၵ်းလိမ်ႇပၼ် ၶႅတ်ႉလႃးႁႅင်းႁႅင်းၵမ်ႈၼိုင်ႈယူႇ။