ၶိုၼ်းထူပ်းႁၼ်ၵၼ်/တွၼ်ႈ 13 လူမ်းသႃႊ
ၵွပ်ႈပိူဝ်ႈမိုၼ်ႇႁွမ် တုၵ်းယွၼ်းထိုင်တီႈပေႃႈမႄႈမၼ်း ပေႃႈမႄႈၶဝ် ၵူၺ်းၵူဝ်လုၵ်ႈယိင်းၶဝ် ၸႂ်ဢမ်ႇသိူဝ်းၼႆလႄႈ ၸင်ႇၸွမ်းၵၢင်ၸႂ်လုၵ်ႈယိင်းၶဝ်သေ ႁပ်ႉဢဝ်ၶႅတ်ႉလႃး ယူႇသဝ်းၸွမ်းၶဝ်ယဝ်ႈ။ ၵၢင်ၸႂ်ၶႅတ်ႉလႃး ဢမ်ႇပေႃးၶႂ်ႈယူႇသေတႃႉ ဝူင်းလိူၼ်ၵေႃႈသမ်ႉဝႃႈ “ ႁႂ်ႈမိုၼ်ႇႁွမ်ၸႂ်လီၼၼ်ႉ ယူႇပၼ်လႄႈ ”ၼႆၵေႃႈပိူင်ၼိုင်ႈ။ ၶၢဝ်းတၢင်းမၼ်း ဢၼ်တေၸုၼ်ႉသေ ၵႂႃႇတၢင်းၼႃႈႁင်းၵူၺ်းမၼ်း ထႅင်ႈၼၼ်ႉၵေႃႈ မၼ်းၼၢင်းသဵင်ႈၸႂ်ယဝ်ႉလႄႈပိူင်ၼိုင်ႈ ၸင်ႇယူႇၸွမ်း မိုၼ်ႇႁွမ်ၶဝ်ယဝ်ႈ။
တေၸဵမ်မိူဝ်ႈဝႃႈ ပေႃႈမႄႈ မိုၼ်ႇႁွမ်ၶဝ်ႁပ်ႉမၼ်းၼၼ်ႉ ၶႅတ်ႉလႃးၵေႃႈ ၸွႆႈထႅမ်ၵၢၼ်ၼႃႈႁိူၼ်းၶဝ် ၵူႈပိူင်ပိူင်ယဝ်ႉ ။ လွင်ႈတူမ်ႈလွင်ႈႁုင်ၵေႃႈ ၶႅတ်ႉလႃးပွင်ပဵၼ်လႆႈလီလီ။ လွင်ႈၸွႆးထႅမ်ပႂ်ႉပၼ် ႁွင်ႈယႃၵေႃႈ မၼ်းၼၢင်းၶတ်းၸႂ်သေ ႁူႉလွင်ႈယႃႈယႃမႃးၵွၼ်ႇယဝ်ႉ။
မိူဝ်ႈၶႅတ်ႉလႃး ပႆႇမႃးယူႇၸွမ်းၶဝ်ၼၼ်ႉ မိုၼ်ႇႁွမ်ဢမ်ႇတွၼ်ႉ ၶဝ်ႈၸွႆႈၵၢၼ်ၼႂ်းသွင်ႇၽႆး။ ၵူၺ်းၵႃႈ တီႈလဵဝ်တႄႉ မၼ်းၼၢင်းၵေႃႈ မႃးႁဵတ်းၵေႃႉၶႅတ်ႉလႃးသေ မေႃလိူၵ်ႈၽၵ်းမေႃႁုင်ၽၵ်းမႃး ယွၼ်ႉပိူဝ်ႈ ၶႅတ်ႉလႃးသွၼ်ပၼ်မၼ်းၼၼ်ႉယဝ်ႈ။
“ မိုၼ်ႇႁွမ် မိူဝ်ႈၼႆႉ ၶႅတ်ႉလႃးတေသွၼ်ၵႅင်ၽၵ်းၵၢတ်ႇၼႃႈ ”
“ ၸွင်ႇယၢမ်ႈႁိုဝ်?”
“ ဢမ်ႇယၢမ်ႈ ”
ၶႅတ်ႉလႃးတင်းႁဵတ်းတင်းလၢတ်ႈၼႄမိုၼ်ႇႁွမ်ယူႇ
“ ၽၵ်းတႆးႁဝ်းၼႆႉ ဢမ်ႇပႃးၼမ်ႉမၼ်းၼမ်ၵေႃႈ ဝၢၼ်ဢိူဝ်ႈ ၶႂ်ႈႁူႉၵေႃႈ ၽၵ်းၵၢတ်ႇၵႅင် ၼႆႉ ႁဝ်းလႆႈတင်ႈၼမ်ႉသေ ပေႃးၽူတ်ႉ ဢဝ်ၽွင်ထူဝ်ႇၼဝ်ႈၸိူဝ်းၼႆႉ သႂ်ႇဢိူဝ်ႈ။ ၽၵ်းၵႅင်တႆးၼႆႉ ဢမ်ႇလႆႈသႂ်ႇၼမ်ႉမၼ်းၼမ် ”
“ ပႆႇသႂ်ႇၽၵ်းၵၢတ်ႇမၼ်းႁႃႉ ?”
“ ပႆႇသႂ်ႇ ၸမ်တေၵိၼ်မႃး ၸင်ႇၵွႆႈသႂ်ႇၽၵ်းၵၢတ်ႇ ပေႃးသႂ်ႇယဝ်ႉ ႁူမ်ႇၽႃဝႆႉၵမ်းၼိုင်ႈ ပေႃးယဝ်ႉ ပေႃးၽၵ်းၵၢတ်ႇၶႂ်ႈႁၢမ်ႇ ၸင်ႇသႂ်ႇၶိင်သႂ်ႇမၢၵ်ႇၶိူဝ်သူမ်ႈမၼ်းသေ ႁူမ်ႇၽႃမၼ်းဝႆႉ ၵမ်းဢွၼ်ႇၼိုင်ႈသေၵေႃႈ ပဵၼ်မႃးၽၵ်းၵၢတ်ႇၵႅင်ယဝ်ႈ ၸွင်ႇယၢပ်ႇႁိူဝ် ”
“ ဢမ်ႇယၢပ်ႇ မိုၼ်ႇႁွမ်မေႃယဝ်ႉ တၢင်ႇပွၵ်ႈမိုၼ်ႇႁွမ်တေၵေႃႉၵႅင်ၼႃႈ ”
“ ၸၢမ်းတူၺ်းဢိူဝ်ႈ...ၵူၺ်းၵႃႈ ယႃႇပေၵႅင်ၽၵ်းၵၢတ်ႇၸိူင်ႉၼင်ႇ ၼၢႆးၵေႃႉၼိုင်ႈၼႃႈ ”
“ ၸိူင်ႉႁိုဝ်?လၢတ်ႈၼႄလူး ”
“ ဢေႃႈ ၼၢႆးၵေႃႉၼိုင်ႈ ၶႅၵ်ႇမႃးသိုဝ်ႉဝူဝ်းၶဝ်သေ သမ်ႉႁဵတ်းၽၵ်းၵၢတ်ႇၵႅင်လဵင်ႉၶႅၵ်ႇ ဝႃႇ။ ၸဝ်ႈၶႅၵ်ႇ ဢွၼ်ၵၼ် ၸူမ်းၵိၼ်ၽၵ်းၵၢတ်ႇၵႅင်မၼ်း သမ်ႉပေႃးသဵင်ႈၼႆဢိူဝ်ႈ”
“ မၼ်းၵႅင်ဝၢၼ်ၼႃႇယူဝ်ႉၼေႃ သမ်ႉပဵၼ်ႁိုဝ်ၵႂႃႇလႃႇ?”
“ ၼႂ်းၶႅၵ်ႇၸိူဝ်းၼၼ်ႉ ၶႅၵ်ႇၵေႃႉၼိုင်ႈတႄႉ ဢမ်ႇၵိၼ်သေဢိတ်းဝႃႇ ”
“ ၵွပ်ႈသင်မၼ်းသမ်ႉဢမ်ႇၵိၼ်လႃႇ?”
“ မိူဝ်ႈပိူၼ်ႈလူင်းၵႂႃႇတူၺ်းဝူဝ်း တႂ်ႈလၢင်ႈၼၼ်ႉ မၼ်းဝႃႈတွင်ႉမၼ်းၸဵပ်းၼႆသေ မၼ်းၼွၼ်းဝႆႉ ၼိူဝ်ႁိူၼ်းၶဝ်။ သမ်ႉတၼ်းႁၼ် ၼၢႆးမႄႈႁိူၼ်းသႂ်ႇၶိင်ၽၵ်းၵၢတ်ႇ ၵမ်းလိုၼ်းၼၼ်ႉ လႄႈမၼ်းၸင်ႇဢမ်ႇၵိၼ်ၼႆဝႃႇ ”
“ သႂ်ႇၶိင်ၵူၺ်းဝႃႈဢမ်ႇၵိၼ်ၼႆ မၼ်းဢမ်ႇမၵ်ႉၶိင်ႁႃႉ?”
“ ပႂ်ႉထွမ်ႇၵွၼ်ႇလႄႈ ၽိူဝ်ႇၶဝ်သိူဝ်ႉဝူဝ်းမိူဝ်း ၸွမ်းတၢင်းတႆးၵေႃႉ မၼ်ႈဢုပ်ႇၵၼ် ၶိူဝ်းၽၵ်းၵၢတ်ႇၵႅင်ဝၢၼ်ဝႃႈဝၢၼ်ၼၼ်ႉသေ ၸင်ႇထၢမ်မၼ်း ၵွပ်ႈသင်မၼ်းဢမ်ႇၵိၼ်ၼႆယဝ်ႉ”
“ ၵွပ်ႈသင်လႃႇ?”
“ မၼ်းလၢတ်ႈဝႃႈ မိူဝ်ႈမႄႈၸဝ်ႈႁိူၼ်း သႂ်ႇၶိင်ၽၵ်းၵၢတ်ႇၼၼ်ႉ တေတမ်သေသႂ်ႇၵေႃႈ ၶူၵ်ႉပႆႇတၼ်း၊ ႁႃၽႃႉၵေႃႈ ဢမ်ႇႁၼ်လႄႈ မၼ်းတၼ်းႁၼ် မႄႈၸဝ်ႈႁိူၼ်းႁၵ်းၶိင် ပႅတ်ႈသႂ်ႇၼႂ်း သူပ်းမၼ်း ၶူပ်းၵဵဝ်ႈ ၶူပ်းၵဵဝ်ႈ ႁႂ်ႈၶိင်လႅဝ်သေ ၶိုၼ်းသႂ်ႇၼႂ်းမေႃႈၽၵ်းၵၢတ်ႇၼႆယဝ်ႉ ။ ၵွပ်ႈၼႆ မၼ်းၸင်ႇ ဢမ်ႇၵိၼ်ၼႆဝႃႇ ၸိူဝ်းၶဝ်ၵိၼ်ၽၵ်းၵၢတ်ႇၼၼ်ႉ ၶိုၼ်းဢွၼ်ၵၼ်ၸူၵ်းၵူင်ၶေႃးၶဝ်သေ ႁၢၵ်ႈယူႇဢူဝ်ႉဢူဝ်ႉဢႂႃႉဢႂႃႉ ၼႆဝႃႇ မိုၼ်ႇႁွမ် ယႃႇပေၵႅင်ႁဵတ်းၼၼ်ၼႃႈ ”
ၶႃသွင်ၵေႃႉ ၶူဝ်ယူႇၶိၵ်းၶိၵ်းမူၼ်ႈမူၼ်ႈ သိူဝ်းသိူဝ်းယူႇ
“ မိုၼ်ႇႁွမ် ပေႃးၵႅင်ၽၵ်းၵၢတ်ႇၼႆ သမ်ႉလူဝ်ႇလႆႈႁဵတ်းပႃး ၼမ်ႉၽိတ်ႉၶိင်သေဢိူဝ်ႈ မၼ်းၸင်ႇလႅပ်ႈၵၼ် ”
ၶႅတ်ႉလႃး ၶိုၼ်းသွၼ်မိုၼ်ႇႁွမ် တမ်ၼမ်ႉၽိတ်ႉၶိင်ယူႇယဝ်ႈ။ ၶႅတ်ႉလႃး ႁဵတ်းၵေႃႉလၢတ်ႈ မိုၼ်ႇႁွမ် ႁဵတ်းၵေႃႉ တမ်ယူႉ
“တမ်ၶိင်ဢွၼ်တၢင်း ပေႃးဢွၼ်ႇယဝ်ႉ ၸင်ႇသႂ်ႇၵိူဝ်မၢၵ်ႇၽိတ်ႉ ထူဝ်ႇၼဝ်ႈႁဵတ်း ၼႆဢိူဝ်ႈ ”
“ ငၢႆႈယူႇလူး ”
မိုၼ်ႇႁွမ် ၸူမ်းတမ်ၶိင်ယူႇတူၵ်ႉတူၵ်ႉ တမ်ၵႂႃႇတမ်မႃး ၼမ်ႉၶိင်ၸရိတ်းဢွၵ်ႇၶူၵ်ႉ ဝူင်ၶဝ်ႈတႃမၼ်းၶွၼ်သၢႆႉ။
“ ဢလႃး... သႅပ်ႇဢိူဝ်ႈၶႅတ်ႉလႃႈ ၶဝ်ႈတႃမိုၼ်ႇႁွမ်ယဝ်ႈ ”
ၶႅတ်ႉလႃး ၵွၼ်ႉၼမ်ႉၵတ်းမႃးသေ တွင်ႈပၼ် ႁူဝ်မႄႈတိၼ်ၶွၼ်ၶႂႃမိုၼ်ႇႁွမ်ယူႇ။ ၶိုၼ်းႁႂ်ႈမိုၼ်ႇႁွမ် သုၵ်ႈတႃမၼ်းယူႇယဝ်ႈ ။ ၶႅတ်ႉလႃး ၶႂ်ႈၶူဝ်မိုၼ်ႇႁွမ်ယူႇသေၸင်ႇဝႃႈ
“ ပဵၼ်ႁိုဝ် မိုၼ်ႇႁွမ် ငၢႆႈယူႇၼႆသေ သမ်ႉပဵၼ်ၼႆၵႂႃႇလႃႇ ၵၢၼ်သွၼ်ၵူၼ်းဢိူဝ်ႈၼႆႉ တွင်းဝႆႉၼႃႈ?”
“ ႁဵတ်းသင် သမ်ႉဢဝ်ၼမ်ႉမႃးတွင်ႈတိၼ် မိုၼ်ႇႁွမ်လႃႇ?”
“ ဢမ်ႇႁူႉလႄႈ ပိူၼ်ႈသွၼ်ႁဝ်း ႁဝ်းသွၼ်ပိူၼ်ႈ ပေႃးၶဝ်ႈတႃၽၢႆႇၶႂႃ တွင်ႈၽၢႆႇသၢႆႉ ပေႃးၶဝ်ႈၽၢႆႇသၢႆႉ တွင်ႈၽၢႆႇၶႂႃၼႆၼႃႇ။ သိုပ်ႇတမ်ထႅင်ႈလႄႈ မိုၼ်ႇႁွမ် ”
“ ဢႃႈ...ႁဝ်းဢမ်ႇၶႂ်ႈတမ်ယဝ်ႉ ”
“ တမ်လႄႈ ၶိင်မၼ်း ပေႃးဢွၼ်ႇယဝ်ႉလူး လူဝ်ႇသႂ်ႇၵိူဝ်မၢၵ်ႇၽိတ်ႉထူဝ်ႇၼဝ်ႈ ၵူၺ်းၼႃႇ ၵမ်ႉတေပဵၼ်မႄႈႁၢင်ႉယူႇယဝ်ႉ ”
“ဢမ်ႇၵပ်းၵၢႆႇၵၼ်သင် ”
“ ၵပ်းၵၢႆႇလေႃႇ ၶွင်တမ်ၼမ်ႉၽိတ်ႉ ဢမ်ႇတၼ်းယဝ်ႉသေ ဝႆႉႁၢင်ႉပႅတ်ႈၼၼ်ႉ ပိူၼ်ႈႁွင်ႉ မႄႈႁၢင်ႉၼမ်ႉၽိတ်ႉၼႆႁေယဝ်ႉဢိူဝ်ႈ ”
မိုၼ်ႇႁွမ် ၶိုၼ်းၵႂႃႇယိပ်းသၢၵ်ႇသေ တမ်တေႃႇပေႃးယဝ်ႉယူႇယဝ်ႈ။ ပေႃႈမႄႈမိုၼ်ႇႁွမ်ၶဝ် လႆႈႁၼ် မိုၼ်ႇႁွမ် ၶဝ်ႈၸႂ်ၵၢၼ်ၼႂ်းႁိူၼ်းမႃး ၼင်ႇၼၼ်သေဢမ်ႇၵႃး ပၢႆးယူႇလီမၼ်းၵေႃႈ ၶႅမ်ႉလႅပ်ႈမႃးလႄႈ ၶဝ်ၵေႃႈ ၸူမ်းၸွမ်းမႃးတႄႉတႄႉ။
ဝူင်းလိူၼ်တႄႉ ၸွမ်းလူၺ်ႈၼႃႈၵၢၼ်ပေႃႈၶဝ်သေ မၼ်းၶဝ်ႈၸႂ်လူၺ်ႈ ၼႂ်းလွၵ်းၵၢၼ် တႃႇတေလႆႈငိုၼ်းၼၼ်ႉမႃးတႄႉတႄႉယူႇ။ ပေႃးမၼ်းဢွၵ်ႇတၢင်းသေ ၽႅဝ်ၶိုၼ်းတူၼ်ႈတီးၼႆတႄႉ မၼ်းၵႂႃႇဢႅဝ် မိုၼ်ႇႁွမ်လႄႈၶႅတ်ႉလႃးယူႇ။ ၶႃသွင်ၵေႃႉၵေႃႈ မႃးဢႅဝ်ႇမၼ်း ႁဵတ်းၼၼ် ပူၼ်ႉဝၼ်း ပူၼ်ႉလိူၼ်ပူၼ်ႉပီၵႂႃႇယူႇ။
ပွၵ်ႈၼိုင်ႈ ဝူင်းလိူၼ်ၵႂႃႇၶၢဝ်းတၢင်း ပွၵ်ႈမႃးသေ ဢမ်ႇယူႇလီလႄႈ ၶႅတ်ႉလႃးၶႃ မိုၼ်ႇႁွမ် ၵႂႃႇၸူးမၼ်းယူႇ။ မိုၼ်ႇႁွမ်ၸင်ႇထၢမ်
“ ဝူင်းလိူၼ် ပဵၼ်ႁိုဝ်မႃး ”
ဝူင်းလိူၼ် ဢဝ်ႁႅင်းမိုၼ်းတႃ တူၺ်းသေ
“ ဢိုဝ်ႈ ဢလူဝ်ႉ လူမ်းသႃႊ ဢမ်ႇပူၼ်ႉသေ ပဵၼ်သႃႊၶမ်ဢိူဝ်ႈ ”
“ ဝႆႉသတိ ပၢႆးယူႇလီႁဝ်းၽွင်ႈလေႃႇ ဝူင်းလိူၼ် ”
“ ဝႆႉယူႇ ပေႃးမၼ်းၶႂ်ႈပဵၼ်ၼႆတႄႉ ဢမ်ႇၸၢင်ႈဝႃႈလူင် ဢေႃႈ...ၶႅတ်ႉလႃး မႂ်းၶုတ်ႇသႃႊပၼ်ၵဝ်ၽွင်ႈလူး ပေႃးဢမ်ႇပူၼ်ႉၼႆ မၼ်းဢမ်ႇသႃႇ ဢမ်ႇမဝ်သေ ဢိတ်းယဝ်ႈၵူၺ်း ”
ၶႅတ်ႉလႃးၵႂႃႇယွၼ်း ၼမ်ႉမၼ်းမၢၵ်ႇပၢဝ်ႉ တီႈမႄႈၶူးသေ ဢဝ်မႃးတင်းၵွၵ်းပဝ်ႇ ၵထိၼ်းတႅင်းၵွၵ်းၼိုင်ႈ။ ဝူင်းလိူၼ် လူင်းၵူႇ မႃးၼင်ႈတီႈတႂ်ႈသေ ဝူတ်ႈသိူဝ်ႈမၼ်းပၼ်ယူႇ။ ၶႅတ်ႉလႃး ဢဝ်ၼမ်ႉမၼ်းမၢၵ်ႇပၢဝ်ႉ တႃးသေ ဢဝ်ၵွၵ်းၶုတ်ႇပၼ်ယူႇ ၶူတ်ႉၶူတ်ႉ။ မိုၼ်ႇႁွမ်တႄႉ ဢမ်ႇမေႃလႄႈ လွမ်တူၺ်းၼႃႈ ဝူင်းလိူၼ်ယူႇ။ မိုၼ်ႇႁွမ်ထၢမ်
“ ဝူင်းလိူၼ် ၸဵပ်းၼႃႇႁႃႉ?”
“ ၸဵပ်းၵေႃႈ ၵႃႈတေလႆႈယိူၼ်ႉဢဝ်ယဝ်ႈ မိုၼ်ႇႁွမ် ၶွင်ပိူဝ်ႈယၢမ်ႈၶုတ်ႇသႃႊယဝ်ႈ လူး”
“ ဢမ်ႇၶုတ်ႇသေ သမ်းၶဵမ်ဢဝ်ဢမ်ႇလႆႈႁႃႉ?”
“ မိုၼ်ႇႁွမ် ပေႃးလူမ်းသႃႊ ၶုတ်ႇဢမ်ႇပူၼ်ႉသေ သမ်းၶဵမ်ၼႆၸၢင်ႈတၢႆဢိူဝ်ႈ ပေႃးၶုတ်ႇ ႁႂ်ႈလူမ်းသႃႊပူၼ်ႉသေ သမ်းၶဵမ်တႄႉ ဢမ်ႇပဵၼ်သင် ”
“ မိုၼ်ႇႁွမ်တႄႉ ဢမ်ႇပႆႇႁူႉလွင်ႈမၼ်ႈ ဝၢႆးၼႆႉၸင်ႇႁဵၼ်းဢဝ်တီႈၶႅတ်ႉလႃးၵႂႃႈ ၼေႃႈ”
“ လႆႈယူႇ မိုၼ်ႇႁွမ် ဢလူဝ်ႉ တူၺ်းလူးမိုၼ်ႇႁွမ် လူမ်းသႃႊမၼ်းႁႅင်းၼႃႇ သမ်ႉပေႃးၵမ်ႇမၢၼ်ႉလူင်ဝႆႉယဝ်ႈ ဝူင်းလိူၼ်ယိူၼ်ႉဢဝ်ၼႃႈ ”
ဝူင်းလိူၼ်ၵၼ်ႈတူဝ်ၵၼ်ႈၸႂ်မၼ်းဝႆႉလႄႈ ႁိူဝ်ႇမၼ်းၵေႃႈ ၸိုမ်ႉမႃးတင်းတူဝ်ယူႇ။ ၶႅတ်ႉလႃးၸင်ႇဝႃႈ
“ မိုၼ်ႇႁွမ် ဢဝ်ၽႃႈၸဵတ်ႉ ၸဵတ်ႉပၼ်ႁိူဝ်ႇဝူင်းလိူၼ်သေလႄႈ ”
မိုၼ်ႇႁွမ်ၵႂႃႇဢဝ် ၽႃႈၸဵတ်ႉၼႃႈသေ မႃးၸဵတ်ႉပၼ်ႁိူဝ်ႇဝူင်းလိူၼ် ယူႇ။
“ ဝူင်းလိူၼ် ၵဝ်တူၺ်းမႂ်းသေ ၵဝ်ပေႃးႁိူဝ်ႉၸႂ်ၸွမ်းယဝ်ႉ၊ ၶႅတ်ႉလႃး မႂ်းၶုတ်ႇႁႅင်းၼႃႇၽႅဝ်ယူဝ်ႉ ၶျေႃႉဢိတ်းၼိုင်ႈလႄႈ ”
“ ဢမ်ႇႁႅင်းသင် မိုၼ်ႇႁွမ် ၊ ဝူင်းလိူၼ်ႁၼ်မႂ်းလႄႈမၼ်းတင်ႈၸႂ် ၶၢင်းတေႃႇမႂ်းၵႂႃႈ ၼၼ်ႉၶိၵ်းၶၵ်း”
“ ၸႂ်ႈတႄႉႁႃႉ ဝူင်းလိူၼ် ”
“ ဢလူဝ်ႉ သင်ဢမ်ႇၸႂ်ႈၵူၼ်းၸၢႆးၼႆ ၵဝ်ၶႂ်ႈႁွင်ႉမင်ႁႅင်းႁႅင်းၵွၼ်ႇဢိူဝ်ႈ မိုၼ်ႇႁွမ် မၼ်းၸဵပ်းၼႃႇတႄႉၵႂႃႈ”
“ ဢိူဝ်ႈ ပေႃးမႂ်းၵႂႃႇပဵၼ် တီႈဢၼ်ဢမ်ႇမီး ၵူၼ်းမေႃၶုတ်ႇသႃႊၼၼ်ႉ မႂ်းတေႁဵတ်းႁိုဝ်ၼႆႉ?”
“ဢလူဝ်...တီႈလဵဝ် ၵႂႃႇတီႈလႂ်ၵေႃႈ မီးၵူၼ်းမေႃၶုတ်ႇယူႇၵူၺ်း ၵဝ်လႆႈယၢမ်ႈ ယဝ်ႉလူး၊ ပေႃးဢမ်ႇယၢမ်ႈၸိူင်ႉသူၼႆႉ ဢမ်ႇၶုတ်ႇၸဵမ်ပိုင်ႈၼၼ်ႉ လီဢိူဝ်ႈ ”
ဝၢႆးသေ ၶုတ်ႇတင်းလင်ယဝ်ႉ ၶႅတ်ႉလႃးၶိုၼ်းၶုတ်ႇပၼ် ၽၢႆႇၼႃႈ ၸဵမ်ၶႅၼ်မၼ်း ၸိူဝ်းၼၼ်ႉယဝ်ႈ
“ ၶႅတ်ႉလႃး မိုဝ်းၵူၼ်ႉယဝ်ႈယူဝ်ႉ?”
“ ၵူၼ်ႉၵေႃႈ ၵႃႈတေလႆႈၶုတ်ႇတေႃႇပေႃးယဝ်ႉဢိူဝ်ႈ လုမ်းလႃႈၵူၼ်းပဵၼ်ၼႆႉ ၵုသူဝ်ႇမၼ်းယႂ်ႇယူႇ ”
ဝၢႆးသေၶုတ်ႇယဝ်ႉ ၶႅတ်ႉလႃးၸင်ႇဝႃႈ မိုၼ်ႇႁွမ် ၵႂႃႇယွၼ်းမႄႈၶူး ပလႃႇၸီႇတမေႃးလုၵ်ႈၼိုင်ႈလႄႈ ဝူင်းလိူၼ် ၵိၼ်ပႃးတႅတ်ႉထရႃႇသၢႆႉၵလိၼ်းႁေႁိုဝ်ႉ လူဝ်ႇၵိၼ်သီႇဝၼ်း ဝၼ်းသီႇမဵတ်ႉ ”
ဝူင်းလိူၼ်လွမ်တူၺ်း ၶႅတ်ႉလႃးသေ
“ ၶႅတ်ႉလႃး မႂ်းပေႃးႁူႉလွင်ႈဢီႈယႃ တႃႇၸႂ်ႉတိုဝ်းယဝ်ႉၼေႃ?”
“ဢိူဝ်ႈ ၶွင်ပႂ်ႉႁွင်ႈယႃမိုၼ်ႇႁွမ်ၶဝ်ၼႃႇ ၶူးမေႃယႃလူင်သွၼ်ပၼ်ဢိူဝ်ႈ ”
ၶႅတ်ႉလႃး ႁိူဝ်ႈၼမ်ႉဢုၼ်ႇၵတ်း သမ်ႉဢဝ်ၼမ်ႉမႆႈ ၽႃႇသႂ်ႇလေႃး ႁႂ်ႈဢုၼ်ႇ တွတ်ႉတွတ်ႉသေ ပၼ်ဝူင်းလိူၼ်ယူႇ။ မိုၼ်ႇႁွမ် ဢဝ်ယႃႈယႃပၼ်လႄႈ ဝူင်းလိူၼ်ၵိၼ်ယႃသေ သူတ်ႉၼမ်ႉ ဢၼ်ၶႅတ်ႉလႃး ပၼ်ၼၼ်ႉယူႇ။ ၽွင်းၼၼ်ႉ မႄႈၶူး ၶဝ်ႈမႃးသေ
“ ၶုတ်ႇသႃႊယဝ်ႉယဝ်ႈႁႃႉ? ၶႅတ်ႉလႃး ”
“ ဢေႃႈ ယဝ်ႉၶႃႈယဝ်ႉ ”
“ ဢိူဝ်ႈ ဝူင်းလိူၼ်ၼႆႉ မၼ်းႁၢမ်ႉၼူၵ်ႇဢိတ်းဢိတ်းဢိူဝ်ႈ မႄႈၶူးဝႃးမၼ်းယူႇ ပေႃးဢၢပ်ႇၼမ်ႉယဝ်ႉ ႁႂ်ႈသွၼ်ႉသိူဝ်ႈၵမ်းလဵဝ် မိူဝ်ႈလႂ်ထၢတ်ႈၼႂ်းတူဝ်ဢုၼ်ႇမႃး ၸင်ႇၵွႆႈလွၼ်ႈသိူဝ်ႈသွၼ်ႉၼႆၵေႃႈ မၼ်းဢမ်ႇထွမ်ႇလူး...ၼႆႉ ဢၢပ်ႇၼမ်ႉယဝ်ႉသေ သမ်ႉၼုင်ႈသိူဝ်ႈပွတ်း သမ်ႉတၢၵ်ႇလူမ်းၼႃႇ ပဵၼ်ႁိုဝ်လႃႇ ၵမ်းၼႆႉ ”
ဝူင်းလိူၼ် လွမ်တူၺ်းမႄႈၶဝ်ယူႇ
“ မႄႈႁဝ်းဢမ်ႇလူဝ်ႇမႆႈၸႂ် မေႃယႃလူင်သွင်ၵေႃႉ ၽႅဝ်မႃးယဝ်ႉလူး”
ၶဝ်ဢွၼ်ၵၼ်ယုမ်ႉၸုမ်ႉၵုမ်ႉဝႆႉယူႇ။