ၶိုၼ်းထူပ်းႁၼ်ၵၼ်/တွၼ်ႈ 12 ၶိုၼ်းထူပ်းၵၼ်
ရူတ်ႉၽႃမၢၼ်ႇလူင် လုၵ်ႉမေႃႇလမႅင်ႇဢွၵ်ႇမႃး တႃႇတေၵႂႃႇတႃႈၵုင်ႈယူႇ၊ တီႈၼႂ်းရူတ်ႉၼၼ်ႉတႄႉ ဝူင်းလိူၼ်လႄႈၶႅတ်ႉလႃး ၼင်ႈမႃးႁိမ်းၵၼ်။ ဢုပ်ႇၵၼ်မႃး လွင်ႈၼိုင်ႈလွင်ႈသွင် ထိုင်တီႈ ပိူၼ်ႈလူင်းလိုဝ်ႈၵိၼ်တၢင်းၵိၼ်ၼႆၵေႃႈ ဝူင်းလိူၼ် ဢွၼ်ၶႅတ်ႉလႃး ၵႂႃႇၵိၼ်ၵႂႃႇယႅမ်ႉယူႇ။
ၶၢဝ်းတၢင်းၵႆယၢဝ်းၼႃႇလႄႈ ၶႅတ်ႉလႃးၼၢဝ်ႉတင်ႇဢိင်မၼ်း ငႅၵ်ႈၵႂႃႇၽၢႆႇလင် ၸိူင်ႉၼင်ႇ ဝူင်းလိူၼ်သေ လပ်းတႃမွႆႈယူႇတင်းၶိုၼ်း၊ ဝူင်းလိူၼ် လၵ်ႉလွမ်တူၺ်း ၼႃႈလီႁၵ်ႉဢွၼ်ႇၶႅတ်ႉလႃး တႂ်ႈငဝ်းၾႆးသေ လွမ်ထူၺ်ႈၸႂ်လူင်လွႆးလွႆးယူႇ၊ မၼ်းၵေႃႈ ၵူၼ်ႉမႃးၶႂ်ႈၼွၼ်းမႃးယဝ်ႉလႄႈ ၸင်ႇလပ်းတႃသေ ၶတ်းၸႂ်ၼွၼ်းယူႇသေတႃႉ မၼ်းဢမ်ႇမေႃၼွၼ်းလပ်း ၼိူဝ်ရူတ်ႉ။ ၶႅတ်ႉလႃႈတႄႉ ယၢမ်ႈၵႃႉ ၸွမ်းရူတ်ႉသေ ၶဝ်ယၢမ်ႈမေႃၼွၼ်း ၽွင်းရူတ်ႉၵႂႃႇလႄႈ ၶႅတ်ႉလႃးလပ်ႈယူႇဝႆႉဢွမ်ႈဢွမ်ႈ။
ယူဝ်ဝႃႈ ၶႅတ်ႉလႃးတေတိုၼ်ႇ လွမ်တူၺ်းၵမ်းလႂ် တိုၵ်ႉၼွၼ်းယဵၼ်ဝႆႉယူႇ၊ ၵမ်းၼိုင်ႈ ၶႅတ်ႉလႃး ဢဝ်ႁူဝ်မႃးဢိင်ႁူဝ်ၶႅၼ် ဝူင်းလိူၼ်သေ သိုပ်ႇၼွၼ်းလပ်းယူႇတင်းႁိုင်၊ ထိုင်မႃး တီႈပိူၼ်ႈလူင်း ၵိၼ်ၶဝ်ႈယဝ်ႉလႄႈ ၶႅတ်ႉလႃးတိုၵ်ႉၼွၼ်းဝၢၼ်ယူႇ၊ ဝူင်းလိူၼ် ၸင်ႇၼိုင်ႁူဝ်မႃႇမၼ်းသေ
“ ၶႅတ်ႉလႃး ၶႅတ်ႉလႃး လုၵ်ႉလႄႈ ထိုင်တီႈၵိၼ်ၶဝ်ႈယဝ်ႈ ”
ၶႅတ်ႉလႃး မိုၼ်းတႃတိုၼ်ႇမႃး လႆႈႁၼ်မၼ်း ဢိင်ႁူဝ်ၶႅၼ်ဝူင်းလိူၼ်ဝႆႉယူႇလႄႈ မၼ်းၸင်ႇၼႅတ်ႈလုၵ်ႉၼင်ႈၽႂ်းၽႂ်း ၵိုၵ်းတင်းၼႃႈလီဢၢႆဢွၼ်ႇၶိုင်ႈၼိုင်ႈသေ
“ ၽႅဝ်လႂ်ယဝ်ႈၼႆႉ?”
“ ဢမ်ႇႁူႉယဝ်ႈ ၵႂႃႇႁဝ်းလူင်း ”
ၽွင်းလူင်းၵႂႃႇၵိၼ်တၢင်းၵိၼ်ၼၼ်ႉ ၶႅတ်ႉလႃး လႆႈႁၼ်ဝူင်းလိူၼ် ဢဝ်မိုဝ်းမၼ်းၽၢႆႇသၢႆႉ မိပ်ႇႁူဝ်မႃႇႁူဝ်ၶႅၼ်မၼ်း ၽၢႆႇၶႂႃယူႇ။
“ ပဵၼ်သင် ဝူင်းလိူၼ်?”
“ ႁူဝ်မႃႇၵဝ်ၵူၼ်ႉ ၸဵမ်မိူဝ်ႈၼိူဝ်ရူတ်ႉၼၼ်ႉယဝ်ႉ ၵဝ်ဢၢင်ႈယုၵ်ႉၵမ်းလႂ်ၵေႃႈ မႂ်းသမ်ႉ ဢိင်ဝႆႉလူး ”
“ ဢေႃး...ဝူင်းလိူၼ် ပူၵ်းၵဝ်သေ ယုၵ်ႉၵေႃႈလႆႈယူႇလူး ”
“ ဢိူဝ်ႈ...ၵဝ်ၵေႃႈဝႃႈ ႁႂ်ႈမႂ်းလႆႈၼွၼ်းလီလီ ၵူဝ်မႂ်းတိုၼ်ႇၼႆသေ ၸင်ႇဢမ်ႇႁတ်းၼိုင် ႁူဝ်မႃႇၵဝ်ဢိူဝ်ႈ ”
“ ၵဝ်တေလႆႈၶိုၼ်းမိပ်ႇပၼ်ၼႄႇ ?”
ဝူင်းလိူၼ် ၶူဝ်သေ
“ ဢမ်ႇတၢပ်ႈလူဝ်ႇမိပ်ႇယဝ်ႈ ၶႅၼ်းယဝ်ႉၵူၺ်း ”
ဝၢႆးၵိၼ်ယႅမ်ႉယဝ်ႉသေ ရူတ်ႉၶဝ်သိုပ်ႇၶၢဝ်းတၢင်း ၽႅဝ်မႃးတႃႈၵုင်ႈ၊ ဝူင်းလိူၼ်ဢွၼ် ၶႅတ်ႉလႃး မႃးတီႈႁူင်းႁႅမ်း ဢၼ်ၶႃသွင်ၵေႃႉပေႃႈလုၵ်ႈ ၵႆႉမႃးလိုဝ်ႈသဝ်းတႃႇသေႇၼၼ်ႉသေ မႃးထၢမ် လုၵ်းၼွၼ်းယူႇ။ ပွၵ်ႈၼၼ်ႉ တီႈႁူင်းႁႅမ်း လုၵ်းၼွၼ်း ၵေႃႉလဵဝ်တဵမ်ပႅတ်ႈမူတ်းယဝ်ႉလႄႈ ၽူႈပႂ်ႉႁူင်း ႁႅမ်းၸင်ႇဝႃႈ
“ ဢဝ်လုၵ်း ဢၼ်သူၵႆႉမႃးၼွၼ်းၼၼ်ႉသေယဝ်ႉၼႃႇ ”
ဝူင်းလိူၼ် ၸင်ႇဝၢႆႇထၢမ်ၶႅတ်ႉလႃး
“ ၶႅတ်ႉလႃႈ လုၵ်းၵေႃႉလဵဝ် ဢမ်ႇၵိုတ်းယဝ်ႉဝႃႇ၊ ၵိုတ်းလုၵ်းသွင်ၵေႃႉ သွင်ၵူႇၵူၺ်းဝႃႇ တေႁဵတ်းႁိုဝ်? ၵႂႃႇတူၺ်းႁူင်းႁႅမ်းတၢင်ႇတီႈႁိုဝ်?”
ၶႅတ်ႉလႃး ၵဵင်ၸႂ်လႄႈၸင်ႇဝႃႈ
“ ၸၢင်ႈပဵၼ်သင်ဝူင်းလိူၼ် လိုဝ်ႈတီႈၼႆႈၵူၺ်းလႃႈ ”
ၶႃသွင်ၵေႃႉ ၸင်ႇမႃးဝႆႉၶူဝ်းလဵင်းၶႃသေ ၶႅတ်ႉလႃးၸင်ႇဝႃႈ
“ ဝူင်းလိူၼ်ၶဝ် ၵႆႉမႃးၼွၼ်းတီႈၼႆႈႁႃႉ?”
“ ၸႂ်ႈဢိူဝ်ႈ မၼ်းမူတ်းသႂ်ႇယဵၼ်ၸႂ်လီဢိူဝ်ႈ ”
“ ၶႅတ်ႉလႃး ၶဝ်တႄႉ ၸွၼ်သုၼ်ႇပေႃႈလဵင်ႉၵႃႉသႅင်ၶဝ်သေ ၸင်ႇတေယၢမ်ႈမႃးလိုဝ်ႈ ႁူင်းႁႅမ်းၶႅမ်ႉၸိူင်ႉၼႆယဝ်ႈ ”
ဝူင်းလိူၼ်ၼွၼ်းဢိင်မွၼ်ႁူဝ်သေ
“ ယူဝ်ၶႅတ်ႉလႃးၶဝ် ယၢမ်ႈၼွၼ်းတီႈဢၼ်ၶႅမ်ႉသေၼႆႉ သိပ်းသၢဝ်းပုၼ်ႈလႄႈ ၵိူဝ်ႉႁဝ်း ႁိုဝ်ၵေႃႈ ဢမ်ႇႁူႉယဝ်ႈ ?”
“ႁူး...ဢမ်ႇယၢမ်ႈၼွၼ်း တႄႉဢိူဝ်ႈဝူင်းလိူၼ် ႁဝ်းထူင်ငိုၼ်းဢမ်ႇပီၸိူင်ႉပိူၼ်ႈလႄႈ ႁိုဝ်တေၵႂႃႇႁတ်းၼွၼ်း ”
ဝၼ်းၼၼ်ႉ ဝူင်းလိူၼ်သိုပ်ႇၽူၼ်း မိူဝ်းတီႈတူၼ်ႈတီး
“ ႁလူဝ်...လၢတ်ႈၶႃႈလႄႈ ”
“ မိုၼ်ႇႁွမ်”
“ ဢေႃး ဝူင်းလိူၼ်ႁႃႉ?”
“ ၸႂ်ႈဢိူဝ်ႈ...မိူဝ်ႈၽုၵ်ႈၵၢင်ၼႂ် ၵဝ်တေၶီႇႁိူဝ်းမိၼ် မႃးႁၢႆးဝူဝ်းသေ တေၽႅဝ်တူၼ်ႈတီး ဢိူဝ်ႈ ”
“ လႆႈသင်မႃးပၼ်ၵဝ်?”
“ ဢိူဝ်ႈ...လႆႈဢၼ်မႂ်းၶႂ်ႈလႆႈၼၼ်ႉဢိူဝ်ႈ ”
“ ပဵၼ်သင်လၢတ်ႈလူး?”
“ မွၵ်ႇၶႅတ်ႉလႃး ဝႃႇ”
“ ဢႃ...မွၵ်ႇၶႅတ်ႉလႃးႁိုဝ်ႉ တူၼ်ႈတီးၼႆႉ မီးၼမ်ပေႃးထၢၼ်ႇသင် ဢမ်ႇၶႂ်ႈလႆႈ ”
“ ယႃႇပေဝႃႈလႄႈ ၵူဝ်မႂ်းၸူမ်းၼူမ်သေ လိုမ်းတူဝ်ၵႂႃႇၵူၺ်းယဝ်ႈ ”
“ တီႈလဵဝ် ဢမ်ႇပဵၼ်သင်ယဝ်ႈ ”
“ တႄႉႁႃႉ...ဢၼ်ၵဝ်တေဢဝ်မႃးပၼ်မႂ်းပွၵ်ႈၼႆႉ ဢမ်ႇၸႂ်ႈမွၵ်ႇၶႅတ်ႉလႃး ”
“ ပဵၼ်သင်လႃႇ ?”
“ ပဵၼ်ၵူၼ်းၶႅတ်ႉလႃး ဢိူဝ်ႈ ”
“ ဝူင်းလိူၼ် မႂ်းဝႃႈသင်ၵေႃ?”
“ ၵဝ်တေဢဝ် ၵူၼ်းၶႅတ်ႉလႃး မႃးပၼ်မႂ်း ဝႃႈၼႆၵေႃႈ ”
“ မႂ်းႁၼ်ၶႅတ်ႉလႃးယဝ်ႉႁႃႉၼႆႉ ?”
“ ၸႂ်ႈဢိူဝ်ႈ...မိူဝ်ႈၽုၵ်ႈ ႁႃးတေၸွမ်းၵၼ်မႃး တူၼ်ႈတီး ဢိူဝ်ႈ၊ မႂ်းပႂ်ႉၸွမ်းရူတ်ႉတီႈႁိူၼ်းႁဝ်းသေ မႃးႁပ်ႉႁႃး တီႈႁၢႆးဝူဝ်းၼႃႈၸွင်ႇတၼ်း ?”
“တၼ်းဢိူဝ်ႈ တၼ်းဢိူဝ်ႈ ဢလူဝ်ႉၵဝ်ၸူမ်းဝႃႈၸူမ်းယဝ်ႈ မႂ်းၵႂႃႇႁဵတ်းႁိုဝ်ႁၼ်မၼ်း တီႈလႂ်? လၢတ်ႈလူး ”
“ ပႂ်ႉလၢတ်ႈတေႃႇၶႅတ်ႉလႃးလႄႈ မၼ်းၵေႃႈ ၶႂ်ႈလၢတ်ႈတေႃႇမႂ်းၼႆဝႃႇ ယိပ်းၽူၼ်းဝႆႉ ၵမ်းၼိုင်ႈၼႃႈ ၵဝ်တေၵႂႃႇႁွင်ႉမၼ်းမႃးဢိူဝ်ႈ မိုၼ်ႇႁွမ် လိုမ်းတူဝ်ယဝ်ႉႁႃႉ ’‘
“ ဢမ်ႇပဵၼ်သင်ၼႆၵေႃႈ ၵႂႃႇႁွင်ႉမႃးၽႂ်းၽႂ်းလႄႈ ”
ဝူင်းလိူၼ်ၵႂႃႇ ႁွင်ႉၶႅတ်ႉလႃးၽႅဝ်မႃးသေ
“ ႁလူဝ်...မႂ်ႇသုင် မိုၼ်ႇႁွမ် ”
“ မႂ်ႇသုင်ၶႅတ်ႉလႃး ဢလူဝ်ႉယူႇလီယူႇႁႃႉ?”
“ ယူႇလီယူႇ မိုၼ်ႇႁွမ်လူး ?”
“ ယူႇလီယူႇ ၶႅတ်ႉလႃး ၵဝ်မွင်းထူပ်းႁၼ်မႂ်းတႃႇသေႇဢိူဝ်ႈ ၶႂ်ႈႁူႉၵေႃႈ ”
“ ၶႅတ်ႉလႃးၵေႃႈ ၶုၵ်းၸႂ်လႆႈမိုၼ်ႇႁွမ်ၶဝ်ယူႇတႃႇသေႇၼင်ႇၵဝ်ႇဢိူဝ်ႈ ”
“ ၶိူဝ်ဝူင်းလိူၼ် ႁဵတ်းႁိုဝ်ႁၼ်ၵၼ် တီႈလႂ်ၶႅတ်ႉလႃး?”
“ ၶႅတ်ႉလႃး ႁၼ်မၼ်းမႃးဝႆႈၽြႃး တီႈသူၺ်ႇတၵုင်ႇ၊ တွင်းမိုဝ်းမၢႆမၼ်းသေ ၸင်ႇတၵ်ႉမၼ်းဢိူဝ်ႈ၊ မၼ်းဝႆႈၽြႃး ယင်းပႆႇတၼ်းယဝ်ႉ မၼ်းဝၢႆႇတူၺ်းၵဝ်သေ ဢၢမ်းယူႇ၊ ၵဝ်သမ်ႉၼုင်ႈသိူဝ်ႈ ပွတ်းၶႅၼ်ၽူင်းဝႆႉလႄႈ ၸင်ႇဝူတ်ႈၼႄ ၶီႈမႅင်ႈမူၼ်း၊ တီႈၶႅၼ်ၵဝ်၊ မၼ်းၵေႃႈ တွင်းဝႃႈ ၵဝ်ပဵၼ်ၶႅတ်ႉလႃး ၼႆဢိူဝ်ႈ ”
“ ဢေႃႈ...ႁဵတ်းၼၼ်ႁႃႉ မိူဝ်ႈႁႃးဝူင်းလိူၼ် ၶိုၼ်းႁၼ်ၵၼ်ၼၼ်ႉ တႃႉလီၶႂ်ႈၶူဝ်လႃႈ ”
“ လၢတ်ႈၼႄလူး ”
“ ဝၼ်းၼၼ်ႉ ၵဝ်လႄႈတႆးၵေႃႉၵဝ် ၶီႇရူတ်ႉၶိူင်ႈသေ ပိၼ်ႈႁိမ်းႁူင်းယႃၸဝ်ႈၸၢမ်ႇထုၼ်းလႄႈ ႁူဝ်ၶဝ်ႇၵဝ်လွၵ်ႈသေ ၽွင်းၵဝ်ၵႂႃႇသႂ်ႇယႃၼၼ်ႉ မၼ်းသမ်ႉလုၵ်ႉၵဵင်းတုင် မႃးသူင်ႇမႄႈၶူး ၶိုၼ်ႈႁူင်းယႃ၊ သမ်ႉႁၼ်ႁူဝ်ၶဝ်ႇမၢႆၵဝ်သေ တၵ်ႉဝႃႈ ‘ၸွင်ႇၸႂ်ႈမိုၼ်ႇႁွမ် ’ၼႆဝႃႇ ”
“ မိုၼ်ႇႁွမ်ဝႃႈ ၸႂ်ႈဢိူဝ်ႈၼႆသေ ၶိုၼ်းႁူႉၵၼ်ၵႂႃႇႁႃႉ?”
“ ဢမ်ႇပႆႇဝႃႈ မိုၼ်ႇႁွမ်ဢမ်ႇတွင်းမၼ်းလူး၊ ယူဝ်ဝႃႈ ပဵၼ်မၢဝ်ႇႁႃပၢႆးသၢဝ်ၼႆလႄႈ မိုၼ်ႇႁွမ်ၵေႃႈဝႃႈ ‘ဢမ်ႇၸႂ်ႈ’ၼႆသေ မၼ်းၼႃႈမႆႈၵႂႃႇဢိူဝ်ႈ ၶိၵ်းၶိၵ်း”
“သမ်ႉၶိုၼ်းႁဵတ်းႁိုဝ်လႃႇ?”
“ ၽိူဝ်ႇႁႃးတႆးၵေႃႉဢုပ်ႇၵၼ်မႃးမိူဝ်း တႆးၵေႃႉၵဝ်ၸင်ႇဝႃႈ ‘မၢဝ်ႇၵေႃႉၼၼ်ႉ လင်မိုဝ်းမၼ်း ၽၢႆႇၶႂႃ မီးမၢႆလမ်ဝႆႉသေဢိူဝ်ႈ ’ၼႆ ၵဝ်ၸင်ႇဝူၼ်ႉလႆႈမၼ်းပဵၼ်ဝူင်းလိူၼ်ၼႆသေ ၶိုၼ်းၼႅတ်ႈၵႂႃႇ ထူပ်းမၼ်း တီႈႁူင်းယႃဢိူဝ်ႈ ”
“ မိူဝ်ႈၽုၵ်ႈႁဝ်းတေ ၽႅဝ်မႃး တီႈမိုၼ်ႇႁွမ်ဢိူဝ်ႈၼႃႈ ”
“မႃးၼွၼ်းႁိူၼ်းႁဝ်းၼႃႈ ”
“ တေမႃးယူႇ ဝၢႆးၼႆႉၸင်ႇၵွႆႈဢုပ်ႇၵၼ်လီလီၼေႃႈ ”
“ ဢိူဝ်ႈ...မွၼ်းမွၼ်း ”
“ မွၼ်း...”
ၶႅတ်ႉလႃး ဝၢင်းၽူၼ်းသေ ၶိုၼ်းၶဝ်ႈမႃးၸူး ဝူင်းလိူၼ်ၼႂ်းလုၵ်းယူႇ။
“ၶႅတ်ႉလႃး...ပႄႉလၢတ်ႈသင်ၵၼ်လၢႆလၢႆ?”
“ ဢေႃႈ...လၢတ်ႈလွင်ႈဢၼ်ႁဝ်းတႄႇထူပ်းၺႃးၵၼ်ၼၼ်ႉဢိူဝ်ႈ ”
“ တၢင်ႇမဵဝ်ႈလူး ”
“ မိုၼ်ႇႁွမ်ဝႃႈ တေလႆႈမိူဝ်းၼွၼ်းႁိူၼ်းၶဝ်ၼႆဝႃႇ ”
“ ၶႅတ်ႉလႃး ဢမ်ႇမိူဝ်းၼွၼ်းႁိူၼ်းႁဝ်းယဝ်ႉဢိူဝ်ႈၼေႃႈ ပေႃးၼႆ ”
“ ဢမ်ႇဝႃႈၼင်ႇၵဝ်ႇ၊ ဢေႃႈ...ဝူင်းလိူၼ် ၵဝ်ၶႂ်ႈလၢတ်ႈမႂ်းဝႆႉလွင်ႈၼိုင်ႈ မိုၼ်ႇႁွမ်သမ်ႉမီး လူမ်းႁူဝ်ၸႂ်ၶိုၼ်ႈလႄႈ ပေႃးမၼ်းႁူႉ ၵဝ်ယၢမ်ႈတႅင်းတၢႆၵူၼ်းၼႆ ဢမ်ႇလီယူဝ်ႉ?”
“ ၸႂ်တႄႉ ဢိူဝ်ႈ ၶႅတ်ႉလႃး လွင်ႈၼႆႉ ႁႃးထိမ်ႇဝႆႉသေ ယႃႇပေလၢတ်ႈမၼ်းၼၼ်ႉ တေလီယူႇ ”
“ မႂ်းယႃႇပေလၢတ်ႈမၼ်းၼႃႈ ဝူင်းလိူၼ် ”
“ တမ်းၸႂ်လႃႈ ”
ဝၼ်းၼၼ်ႉထုၵ်ႇၵႂႃႇသိုဝ်ႉသင် ထုၵ်ႇၵႂႃႇဢႅဝ်ႇလႂ်ၵေႃႈ ၶႃသွင်ၵေႃႉ ၵႂႃႇဢႅဝ်ႇမႃးသေ ထိုင်မႃးၵၢင်ၶမ်ႈ ၽွင်းတေၼွၼ်းၼၼ်ႉ ဝူၼ်းလိူၼ် ၵူၼ်ႉၵူၼ်ႉၶိုၼ်ႈၶိုၼ်ႈ ဢမ်ႇၸိုၼ်ႈဢမ်ႇသႃႇဝႆႉယူႇယဝ်ႉ။ ၼႃႈတႃမၼ်းၵေႃႈ ဢမ်ႇၸိုၼ်ႈလႄႈ ၶႅတ်ႉလႃးၸင်ႇထၢမ်
“ ဝူင်းလိူၼ် မႂ်းပဵၼ်သင် ၼႃႈတႃၵေႃႈ ဢမ်ႇၸိုၼ်ႈလႃႇ?”
“ ဢိူဝ်ႈ ၵဝ်ၶူပ်းၶူပ်းၶိုၼ်းၶိုၼ်ႈ တင်းတူဝ်ဢိူဝ်ႈၼႆႉ ၶေးပဵၼ်လူမ်းသႃႈယူဝ်ႉ”
ၶႅတ်ႉလႃး မႃးၸူး ၵူႇဝူင်းလိူၼ်သေ ၵမ်းတူၺ်းၼႃႈၽၢၵ်ႇဝူင်းလိူၼ် ဢုၼ်ႇႁွၼ်ႈႁွၼ်ႈဝႆႉလႄႈ
“ ဢိူဝ်ႈ...ၶႂ်ႈမီးလူမ်းၼၢဝ်ဢိတ်းဢိတ်းဢိူဝ်ႈၼႆႉ ၵိၼ်ယႃသေႁိုဝ်ႉ?”
“ ပႆႇၵိၼ်ၵွၼ်ႇ ၶႅတ်ႉလႃး ၸွင်ႇမႂ်းမေႃၶုတ်ႇသႃႈ?”
“ မေႃဢိူဝ်ႈ ၶႂ်ႈၶုတ်ႇႁႃႉ?”
“ ယႃႈမွင်ႇ (ပယုၵ်ႈသီႇ )မီးၼႂ်းၶၢင်ႈထူင်ၵဝ်ၼၼ်ႉဢိူဝ်ႈ ဢဝ်သေၶုတ်ႇပၼ်လႃႈ ”
လွမ်တူၺ်းဝူင်းလိူၼ် ပေႃးဢမ်ႇၶႂ်ႈမိုၼ်းတႃယဝ်ႉလႄႈ ၶႅတ်ႉလႃး ၸူၵ်းဢဝ်ယႃႈမွင်ႇသေ
“ ၶုတ်ႇတီႈလႂ်ဢွၼ်တၢင်း?”
“ ၶုတ်ႇၵွင်ႇၵေႃႈယဝ်ႉ ၶိုၼ်းၶုတ်ႇၵွင်းလင်လႄႈ ”
ၶႅတ်ႉလႃး ဢဝ်ယႃႈမွင်ႇၶၢဝ် တႃးပၼ် တီႈတေၶုတ်ႇသႃႈၼၼ်ႉသေ ဢဝ်ၵွၵ်းလဵၵ်း ၼမ်ႉဝၢၼ်မိူင်းထႆး ၶုတ်ႇပၼ်ယူႇၶူတ်ႉၶူတ်ႉ။
“ ဝူင်းလိူၼ် ပေႃးမႂ်းၵႆႉယၢမ်ႈၶုတ်ႇသႃႈၸိူင်ႉၼႆ ပေႃးဢမ်ႇၺႃး ၵူၼ်းမေႃၶုတ်ႇပၼ် မႂ်းတေႁဵတ်းႁိုဝ်လႃႇၼႆႉ ?”
“ လူမ်းသႃႈၵဝ်ၼႆႉ ဢမ်ႇမိူၼ်ပိူၼ်ၵူၺ်း ၶႅတ်ႉလႃး ”
“ ပဵၼ်ႁိုဝ်ဝႆႉလႃႇ ?”
“ ပေႃးၺႃး ၵူၼ်းမေႃၶုတ်ႇမၼ်းၸင်ႇပဵၼ်ဢိူဝ်ႈ ”
ၶႅတ်ႉလႃး ဢဝ်တႃမိုဝ်းထုပ်ႉပၼ် ၵွင်းလင်ဝူင်းလိူၼ်သေ
“ ၵမ်ႉၵဝ်တေဢမ်ႇၶုတ်ႇပၼ်ယူႇၼႃႈ ”
“ ဢလူဝ်ႉ...ယႃႇပေဝႃႈၼၼ် ပွၵ်ႈၼႆႉတႄႉ ႁႂ်ႈလႆႈၸႂ်ယႂ်ႇမႂ်းသေၵမ်း ”
“ တၢင်ႇပွၵ်ႈတႄႉ ဢမ်ႇလူဝ်ႇၸႂ်ယႂ်ႇၼႆဢိူဝ်ႈၼေႃႈ လီယဝ်ႈ တၢင်ႇပွၵ်ႈ ပေႃးပဵၼ်သႃႈတႄႉ ယႃႇမႃးႁွင်ႉၵဝ် ”
“ ဢမ်ႇဝႃႈၸိူင်ႉၼၼ်သႄႈၶႅတ်ႉလႃး သင်လႆႈၸႂ်ယႂ်ႇတႃႇသေႇၶႅၼ်းလီဢိူဝ်ႈ ”
“ ပေႃးလႃႈ ၵူၼ်းပဵၼ်သႃႈသင်ၵေႃႈဢမ်ႇႁူႉ လၢတ်ႈၵႂၢမ်းၶိူဝ်းၶိူဝ်းယႂ်းယႂ်း တိၵ်းတိၵ်း”
ၶႅတ်ႉလႃး ၶုတ်ႇႁႅင်းၼႃႇလႄႈ ဝူင်းလိူၼ် ၵၼ်ႈလိပ်းၵၼ်ႈလႅင်သေ
“ ဢႃး...ယႃႇပေႃးၶုတ်ႇႁႅင်းၼႃႇၽႅဝ်လေႃႇ ”
“ ၸဵပ်းႁႃႉ ? ဝူင်းလိူၼ် ယိူၼ်ႉဢဝ်လႄႈ လႅင်လႅင်ပေႃးၵမ်ႇဢိူဝ်ႈၼႆႉ ”
ၶႅတ်ႉလႃးၵေႃႈ တင်းၶုတ်ႇသႃႈပၼ်ဝူင်းလိူၼ် တင်းဝူၼ်ႉယူႇၵူၺ်းမၼ်း လႆႈႁၼ်တူဝ်ၶိင်းၶိူင်ႇဝိုၼ်ႉ ဝူင်းလိူၼ် ၼင်ႇၼႆ ၼႂ်းၸႂ်မၼ်းၼၢင်းပဵၼ်ႁိုဝ်ဝႆႉၼႆ မၼ်းဢမ်ႇမေႃလၢတ်ႈ ႁႂ်ႈမၼ်းလုမ်းလႃး ၵူၼ်းၸၢႆး ၸမ်ဢူၵ်းၸမ်ၸႂ်ၸိူင်ႉၼႆၼႆၵေႃႈ ၽဝမၼ်းပႆႇမီးသေပွၵ်ႈ။ ၼႂ်းၸႂ်မၼ်းၼၢင်းတႄႉ ၸူမ်းသိူဝ်း ၵွပ်ႈမၼ်းလႆႈလုမ်းလႃး ၶုတ်ႇသႃႈပၼ်ဝူင်းလိူၼ်ဝႆႉယူႇတႄႉတႄႉ။
ဝူင်းလိူၼ် ၸၼ်ဢဝ်ၽႃႈၸဵတ်ႉ ၸဵတ်ႉႁိူဝ်ႇၸွမ်းၼႃႈမၼ်းယူႇ၊ ၶႅတ်ႉလႃးၶိုၼ်းထၢမ်
“ ၽၢႆႇၼႃႈၵေႃႈ တေၶုတ်ႇယူႇႁႃႉ ?”
“ မိုဝ်းၵူၼ်ႉယဝ်ႉႁႃႉ? ၶႅတ်ႉလႃး ”
“ ဢမ်ႇၵူၼ်ႉ ဝၢႆႇမႃးတၢင်းၼႆႉလႄႈ ”
ၶႅတ်ႉလႃး သိုပ်ႇဢဝ်ယႃႈမွင်ႇတႃးပၼ် ၸွမ်းဢူၵ်းဝူင်းလိူၼ်သေ ၶုတ်ႇပၼ်ယူႇ။ ၶႅတ်ႉလႃးလွမ်တူၺ်း ၼႃႈဝူင်းလိူၼ် မီႇဝႃႈမီႇယဝ်ႉလႄႈ
“ ဝူင်းလိူၼ် ၼႃႈမႂ်းပႄႉမီႇလႃႇ ယုမ်ႉဢိတ်းၼိုင်ႈလေႃႇ ”
ဝူင်းလိူၼ် မိုၼ်းတႃတူၺ်း ၼႃႈႁၢင်ႈလီၶႅတ်ႉလႃး ၵမ်းၼိုင်ႈသေ
“ သိုပ်ႇၶုတ်ႇလႄႈ ၼႃႈၵဝ်မီႇၼၼ်ႉ ၵဝ်ယၢမ်ႈၵိၼ်ၽၵ်းမီႇမႃး ၸဵမ်လဵၵ်ႉၵႂႃႈ မႂ်းမေႃၶုတ်ႇသႃႈ တႄႉဢိူဝ်ႈၼႆႉ မဝ်မႃးတႄႉတႄႉယဝ်ႈ ”
ၶႅတ်ႉလႃး သိုပ်ႇၶုတ်ႇသႃႈပၼ်ဝူင်းလိူၼ် တေႃႇပေႃးယဝ်ႉၵႂႃႇယူႇ။
“ ဝူင်းလိူၼ် ယႃႈယႃၵိၼ်မီးသင်?”
“ ၼႂ်းထူင်ၵဝ် မီးတဝ်ႈဢီႈယႃယူႇ ဢဝ်မႃးထူင်ၵဝ်လႄႈ ”
ၶႅတ်ႉလႃးဢဝ်ထူင်မႃးပၼ်သေ ဝူင်းလိူၼ် လိူၵ်ႈဢဝ်ယႃႈထုၵ်ႈႁိူဝ်ႇ ဢိၵ်ႇလူၺ်ႈ ယႃႈၼွၼ်းလပ်းသေ ပႅတ်ႈၶဝ်ႈသူပ်းမၼ်းၵႂႃႇယဝ်ႉ ၶႅတ်ႉလႃး ႁိုဝ်ႈၼမ်ႉဢုၼ်ႇ ပၼ်မၼ်း ၵွၵ်းၼိုင်ႈ
“ ၶွပ်ႈၸႂ်တႄႉတႄႉယဝ်ႈၶႅတ်ႉလႃး ”
“ ဢမ်ႇၶွပ်ႈၸႂ်ၵေႃႈလႆႈယူႇ သွၼ်ႇႁႂ်ႈမႂ်းၸဵဝ်ႈယူႇလီၵူၺ်းလႃႈ ”
“ ဝူင်းလိူၼ် ၼွၼ်းႁေၼႃႈ ပေႃးလပ်းသေ တိုၼ်ႇၼိုင်ႈၼႆ တေသႃႇမႃးယူႇ ”
ဝူင်းလိူၼ်ၼၵ်းတူဝ်ၼၵ်းၸႂ်သေ လူမ်ႉၼွၼ်းၼိူဝ်ၵူႇမၼ်းၼၼ်ႉၵႂႃႇယူႇ၊ ၶႅတ်ႉလႃး ဢဝ်ၽႃႈမႆ ႁူမ်ႇပၼ်မၼ်းလီလီငၢမ်းငၢမ်းယူႇ။ ႁူင်းႁႅမ်း ဢၼ်ဝူင်းလိူၼ် မႃးၼွၼ်းၼႆႉ ယုင်းဢမ်ႇမီးလႄႈ ၶဝ်ဢမ်ႇဝႆႉသုတ်း၊ ၶႅတ်ႉလႃးၸင်ႇဝႃႈ
“ ဝူင်းလိူၼ် ၸွင်ႇတေႁပ်းပႅတ်ႈ လူမ်းၵတ်းႁိုဝ်?”
“ ၶျေႃႉဢိတ်းၼိုင်ႈၵူၺ်းလႄႈ ပၼ်ဝႆႉၶၢဝ်းယၢမ်းမၼ်း မွၵ်ႈၼိုင်ႈမွင်းၶိုင်ႈၵေႃႈ လႆႈယဝ်ႈ ”
“ ၵဝ်ဢမ်ႇမေႃဝူင်းလိူၼ် ႁိူဝ်ႈမႂ်းႁဵတ်းလႃႈ ႁဝ်းဢမ်ႇယၢမ်ႈၼွၼ်းႁူင်းႁႅမ်းမဵဝ်းၼႆႉလူး ”
ဝူင်းလိူၼ် ဢဝ်ၼဵၼ်ၸႂ်ႉၵႆၼၼ်ႉ ၼဵၵ်းသေ ထိင်းလူမ်းၵတ်းၼၼ်ႉယူႇယဝ်ႈ။
“ ၶႅတ်ႉလႃးၵေႃႈ ၼွၼ်းလႄႈ ၵၢင်ၼႂ်ႁႃးလူဝ်ႇၽႅဝ် ၶူင်ႇႁိူဝ်ႈမိၼ် ႁႃႈမူင်းၶိုင်ႈဢိူဝ်ႈၼႃႈ ”
ဝူင်းလိူၼ်တႄႉ ၵွပ်ႈပိူဝ်ႈၵိၼ်ပႃး ယႃႈၼွၼ်းလပ်းသေ ၼွၼ်းလပ်ႈဝႆႉယူႇယဝ်ႈ။ ၶႅတ်ႉလႃးတႄႉ ဝူၼ်ႉၵႂႃႇဝူၼ်းၶိုၼ်းသေ ႁႃၶေႃႈတွပ်ႇမၼ်းယူႇ။ ၵွပ်ႈသင် မၼ်းသမ်ႉႁတ်းမႃးၼွၼ်း လုၵ်းလဵဝ်ၵၼ်သွင်ၵေႃႉ ဝူၼ်ႉယူႇၵေႃႈ ဢမ်ႇႁၼ်ၶေႃႈတွပ်ႇၸႅင်ႈ၊ ၽွင်းမိူဝ်ႈမၼ်းၼၢင်းၵႃႉၵႃႉၶၢႆၶၢႆ မိူင်း တႂ်ႈမိူင်းၼိူဝ်ယူႇၼၼ်ႉ ၵူၼ်းၸၢႆးၵေႃႉလႂ်တူၺ်းမၼ်းၼၢင်းသေ ဢမ်ႇဝႃႈ သၢႆတႃၶဝ် ဢမ်ႇသိုဝ်ႈယူဝ်း၊ ၵူၺ်းၵႃႈ သၢႆတႃဢၼ်ဝူင်းလိူၼ်တူၺ်းမၼ်းၼႆႉ ပဵၼ်ႁိုဝ်ဝႆႉၼႆ မၼ်းၼၢင်းဢမ်ႇမေႃတႅပ်းတတ်း၊ ၼႂ်းၸႂ်မၼ်း ႁၢင်ႈၵတ်းယဵၼ်သိူဝ်းၸႂ်ဝႆႉၵေႃႈမီးမီး၊ တေပဵၼ် ၵွပ်ႈလႆႈပဵၼ် ဢူၺ်းၵေႃႉၵၼ်မႃးမိူဝ်ႈဢွၼ်ႇ ႁိုဝ် ၶႅတ်ႉလႃးဝူၼ်ႉသေ ၼွၼ်းၽိုၼ်ႉၵႂႃႇၽိုၼ်ႉၶိုၼ်း မၼ်းဝၢႆတူၺ်းဝူင်းလိူၼ်တႄႉ ၼွၼ်းယဵၼ်ဝႆႉယူႇ။ ၶႅတ်ႉလႃးၵေႃႈ ၼွၼ်းလပ်းၵႂႃႇသေ ၽိူဝ်ႇမၼ်းတိုၼ်ႇမႃး ၸမ်မီးႁႃႈမူင်းယဝ်ႉလႄႈ မၼ်းၸင်ႇ ၼႅတ်ႈလုၵ်ႉသေ မႃႈပူၵ်းဝူင်းလိူၼ်ၽႂ်းၽႂ်းယူႇ။
“ ဝူင်းလိူၼ် လုၵ်ႉလႄႈ ႁႃႈမူင်းတေလႆႈယဝ်ႈ ပဵၼ်ႁိုဝ်မႃး ?”
ၶႅတ်ႉလႃး ဢဝ်ၽႃႇမိုဝ်းမၼ်း ၵမ်းတူုၺ်း ၼႃႈၽၢၵ်ႇဝူင်းလိူၼ် လႆႈႁၼ်ၼိူဝ်ႉမႆႈမၼ်း ယဵၼ်ၵႂႃႇယူႇ။ ဝူင်းလိူၼ်ၸင်ႇဝႃႈ
“ ယူႇလီယဝ်ႈ ”
ၶႃၵႂႃႇသုၵ်ႈၼႃႈသုၵ်ႈတႃသေ ႁူင်းႁႅမ်းၶဝ်ၼၼ်ႉ လုၵ်းဢၢပ်ႇၼမ်ႉၵေႃႈ မီးဝႆႉၼႂ်းလုၵ်းၼွၼ်းလႄႈ ဝၢႆးၶႅတ်ႉလႃးဢွၵ်ႇမႃး သိမ်းၶူဝ်း ဝူင်းလိူၼ်တွင်ႈၼမ်ႉသေ ဢၢပ်ႇၼမ်ႉယူႇသူဝ်ႉသူဝ်ႉ
“ ဝူင်းလိူၼ်...ဢၢပ်ႇၼမ်ႉႁဵတ်းသင် ဢူဝ်...ၶိုၵ်ႉၵျလႆ ”
ဝၢႆးသေ ဝူင်းလိူၼ်ဢၢပ်ႇၼမ်ႉယဝ်ႉသေ ဢွၵ်ႇမႃး
“ ဝူင်းလိူၼ် သမ်ႉၼႅတ်ႈၵႂႃႇဢၢပ်ႇၼမ်ႉႁဵတ်းသင်လႃႇ?”
“ ၵဝ်ယၢမ်ႈဢၢပ်ႇၼမ်ႉၵၢင်ၼႂ်ဢိူဝ်ႈ ဢၢပ်ႇၼမ်ႉၵၢင်ၼႂ်ၸႂ်လီတင်းဝၼ်းၼႆဝႃႇ ”
“ သုတ်းတီႈ လူမ်းၼၢဝ်ၸင်ႇႁႃတူၵ်းၵႂႃႇၵူၺ်းၵေႃႈ ”
“ ဢမ်ႇပဵၼ်သင် ၶႅတ်ႉလႃးမႆႈၸႂ်ႁႃႉ ?”
“ ဢမ်ႇမႆႈၸႂ်သေပႅၵ်ႉ တူဝ်ၽႂ်ႇၸႂ်မၼ်းၼင် ”
ဝူင်းလိူၼ်ၵေႃႈ မႃးသိမ်းၶူဝ်းမၼ်းသေ ႁၢၼ်ႉၸႂ်ၸွမ်း လွင်ႈၶႅတ်ႉလႃး မႆႈၸႂ်တၢင်မၼ်းၼၼ်ႉယူႇ။
ၶႃသွင်ၵေႃႉ ၽႅဝ်မႃးတီႈၶူင်ႇႁိူဝ်းမိၼ် တႃႈၵုင်ႈသေ ၽွင်ႈမႃးၼင်ႈပႂ်ႉႁိူပ်းမိၼ်ယူႇၼၼ်ႉ ၶႃသွင်ၵေႃႉ ၵႂႃႇသိုဝ်ႉၼမ်ႉၼဵင်ႈဝၢၼ်ၶဝ်မုၼ်းသေ မႃးၵိၼ်တီႈၼႂ်းပိူၼ်ႈၼင်ႈပႂ်ႉႁိူဝ်းမိၼ်ၼၼ်ႉယူႇ။
“ ဝူင်းလိူၼ် ယႃႇပေလိုမ်းၵိၼ်ယႃႈယႃၼႃႈ?”
ဝူင်းလိူၼ်ယုမ်ႉသေ ငွၵ်းႁူဝ်ၼႄၶႅတ်ႉလႃးယူႇ။ဝၢႆးဝူင်းလိူၼ် ၵိၼ်ယႃႈယႃယဝ်ႉ ယူႇၵမ်း ၼိုင်ႈ ပိူၼ်ႈႁွင်ႉတႃႇၵႂႃႇႁၢႆးဝူဝ်းယဝ်ႉလႄႈ သွင်ၶႃၸင်ႇၵႂႃႇၶိုၼ်ႈႁိူဝ်းမိၼ်ယဝ်ႈ။
ၶႅတ်ႉလႃးၼင်ႈႁိမ်းႁူးလႅင်း ဝူင်းလိူၼ်သမ်ႉ ၼင်ႈႁိမ်းၶႅတ်ႉလႃးသေ ၶႃလွမ်တူၺ်း တီႈၼွၵ်ႈယူႇ။ ၼၢင်းသၢဝ် ႁိူဝ်းမိၼ် ဢဝ်ၵေႃႇၾီႇလႄႈ ၶဝ်ႈမုၼ်းမႃးပၼ်ၵူၼ်းၶီႇႁိူဝ်းမိၼ်ယူႇ။ ဝူင်းလိူၼ်ဢဝ်ပၼ်ၶႅတ်ႉလႃးသေ
“ ၵိၼ်လႄႈ ၶႅတ်ႉလႃး ”
“ ဢိမ်ႇယဝ်ႈ ဝူင်းလိူၼ် ”
“ ၵိၼ်လႄႈ ၵိၼ်ၸၼ်ႉသုင်ဢိူဝ်ႈၼႆႉ ”
ၶႅတ်ႉလႃး ဢဝ်သူတ်ႉၵိၼ်ယဝ်ႉသေ
“ ႁိုဝ်ႉ ...ႁေဝႃႈ ၸၼ်ႉသုင်ဝႃႇ ဢမ်ႇၵႂႃႇပိူင်ႈသင် ”
“ ၵဝ်ဝႃႈ ၸိူင်ႉၼၼ် ဢမ်ႇၸႂ်ႈၵူၺ်း ၶႅတ်ႉလႃး ”
“ ၸၼ်ႉသုင်ၸိူင်ႉႁိုဝ်လႃႇ ?”
“ ႁိူဝ်းမိၼ်ႁဝ်းသုင်သေ ၼမ်ႉပၢင်ႇလၢႆႇ မိုၼ်ႇပႄႇပၢႆလႄႈ ၵဝ်ဝႃႈ ၸၼ်ႉသုင်ၼႆဢိူဝ်ႈ။
“ ယူဝ်ဝႃႈ သုင်သင်ၼႆၼႃးႁိုဝ်ႉ ”
ၶႅတ်ႉလႃးဢဝ်ငွၵ်းသွၵ်ႇ တွၵ်ႈပၼ်ၶႅၼ်ဝူင်းလိူၼ် သမ်ႉၺႃးဝူင်းလိူၼ် ဢၢင်ႈသူတ်ႉၵိၼ် ၵေႃႇၾီႇမၼ်းလႄႈ ဢဝ်ၵေႃႇၾီႇႁေႈသႂ်ႇၼိူဝ်ၽိူၼ် ဢမ်ႇမၼ်းပိၼ်ႈသိူဝ်ႇဝႆႉ ၽၢႆႇၼႃႈမၼ်းၼၼ်ႉယူႇ။
“ ဢႃး...ႁေႈမူတ်းယဝ်ႉ ”
“ ၵၼ်ႇတေႃး ၵၼ်ႇတေႃး ”
ၶႅတ်ႉလႃး ၼႅတ်ႈဢဝ်ၽႅၼ်ႇမၼ်းၸဵတ်ႉပၼ်ၽႂ်းယူႇ။ ၼၢင်းသၢဝ်ႁိူဝ်းမိၼ်ၶိုၼ်းမႃး ၽဵဝ်ႈၵႂႃႇသေ ၶႅတ်ႉလႃးၸင်ႇဝႃႈ
“ ဝူင်းလိူၼ် ၸွင်ႇမိုၼ်ႇႁွမ် တေမႃးႁပ်ႉႁဝ်းႁိုဝ်?”
“ မႃးၵႂႃႈ ၵဝ်ၸႂ်ႉရူတ်ႉတီႈႁိူၼ်း ၵႂႃႇႁွင်ႉမၼ်းသေ မႃးႁပ်ႉႁဝ်း တီႈႁၢႆးဝူဝ်းဝႆႉဢိူဝ်ႈ ”
“ ၵဝ်ပေႃးၶႂ်ႈႁၼ်မိုၼ်ႇႁွမ် ၼႅၼ်ႇယဝ်ႈ ”
“တေလႆႈႁၼ်ယူႇလူး တမ်းၸႂ်လႃႈ ”
ၶႃဢုပ်ႇၵၼ်မႃးသေ ႁိူဝ်းမိၼ်ၶဝ်ၵေႃႈ ၶၢမ်ႈလွႆမိူင်းတႆး လုၵ်ႈၼိုင်ႈယဝ်ႉလုၵ်ႈၼိုင်ႈ၊ ၶႅတ်ႉလႃး လွမ်တူၺ်း ပဵၼ်ဢၼ်လၢၵ်ႇလၢႆးတႃမၼ်းသေ ဢၢင်ႈထၢမ်၊ ဝူင်းလိူၼ်ၵေႃႈ လိူၼ်းၶေႃးမၼ်းသေ တိုၵ်ႉငွၵ်ႈတူၺ်း ၸွင်ႇမုင်ႈႁၼ်ၼွင်ႁၢႆးယႃႈ ၼႆယူႇ။ ၶႅတ်ႉလႃးတႄႉ ဢဝ်ၼႃႈမၼ်း ဢိူမ်ႈႁူးလႅင်းမၢၼ်ႇသေ ဢၢင်ႈထၢမ်ဝူင်းလိူၼ် ဢၼ်မၼ်းႁၼ်ၼၼ်ႉယူႇ။ ၽိူဝ်ႇမၼ်းဝၢႆႇၼႃႈမၼ်းသေ ဢၢင်ႈထၢမ်ၼၼ်ႉ သမ်ႉၺႃး မိူဝ်ႈဝူင်းလိူၼ်တိုၵ်ႉလိူၼ်းၶေႃး ငွၵ်ႈတူၺ်းလႄႈ သီႇသူပ်းလႅင် ၶႅတ်ႉလႃး ထုၺ်ၺႃး ၵႅမ်ႈဝူင်းလိူၼ်ၵႂႃႇသေ ယွမ်ႉသူပ်းလႅင်ၶႅတ်ႉလႃး ၼုၵ်းၸပ်းဝႆႉ တီႈၵႅမ်ႈဝူင်ႈလိူၼ် လႅင်ဝႆႉယူႇ။
“ ဢူဝ်”
“ ဢိုဝ်ႈ ” ၶႃလီဢၢႆၵၼ်ၵႂႃႇၵမ်းၼိုင်ႈ
ၶႅတ်ႉလႃး တူၺ်းႁၼ်ၵႅမ်ႈဝူင်းလိူၼ် လႅင်ဝႆႉလႄႈ မၼ်းၶႂ်ႈၶူဝ်သေ ၸင်ႇၼႅတ်ႈဢဝ်ၽႃႈၸဵတ်ႉမၼ်း ဢၢင်ႈၸဵတ်ႉပၼ်ယူႇ။
“ ဢီႈသင်? ၶႅတ်ႉလႃး”
“ ၸဵတ်ႉပႅတ်ႈသေလႄႈ ၵူဝ်ပိူၼ်ႈႁၼ် ”
“ ၸဵတ်ႉဢီႈသင် ?”
ၶႅတ်ႉလႃး ၽုၺ်ႇထူင်ၼင်မၼ်း ဢဝ်မၢၼ်ႇၸမ်ႈပၼ် ဝူင်းလိူၼ်၊ ဝူင်းလိူၼ်တူၺ်းလႆႈႁၼ် ႁွႆးသူပ်းလႅင်ၶႅတ်ႉလႃး ၸပ်းဝႆႉလႄႈ မၼ်းၵေႃႈၶႂ်ႈၶူဝ်သေ
“ ၶႅတ်ႉလႃး ဢမ်ႇၸဵတ်ႉၵေႃႈ ဢမ်ႇပဵၼ်သင် ဝႆႉႁဵတ်းၼႆလႃႈ ”
“ ဝူင်းလိူၼ် ၸဵတ်ႉပႅတ်ႈသေလႄႈ ”
“ ဢမ်ႇၸဵတ်ႉယဝ်ႈ ဝႆႉပဵၼ်တီႈမၢႆတွင်းသေ ၵဝ်တေဢမ်ႇသုၵ်ႈၼႃႈသေပွၵ်ႈၵွၼ်ႇယဝ်ႈ”
“ ၸဵတ်ႉလႄႈ လီဢၢႆပိူၼ်ႈ ”
“ ဢမ်ႇၸဵတ်ႉ ၵဝ်ဢဝ်ၼုၵ်းၵေႃႈ ဢမ်ႇၸႂ်ႈ ”
“ မႃး မႃး ၵဝ်ၸဵတ်ႉပၼ် ”
ဝူင်းလိူၼ်ၵေႃႈ ပၼ်ၸဵတ်ႉသေ
“ ဢမ်ႇၸဵတ်ႉၵဵင်ႈၵေႃႈ ဢမ်ႇပဵၼ်သင် ၶႅတ်ႉလႃး ”
“ ယႃႇပေမေႃးယဝ်ႈ ၼၼ်ႉပဵၼ်တီႈလႂ်ၼၼ်ႉ? ဝူင်းလိူၼ် ”
“ ဢေႃႈ...ပဵၼ်ၼွင်ႁၢႆးယႃႈဢိူဝ်ႈ ၵဝ်ဢၢင်ႈၼႄမႂ်းဢၼ်ၼႆႉ ၼင်ႇၵဝ်ႇယဝ်ႈ မိူဝ်ႈၵႆႈၼၼ်ႉ ”
ၶႅတ်ႉလႃး ဝူၼ်ႉတူၺ်းၶိုၼ်း ဢၼ်ပဵၼ်ၵႂႃႇမိူဝ်ႈၵႆႈၼၼ်ႉသေ ၶႂ်ႈၶူဝ်ၵေႃႈၶႂ်ႈၶူဝ် လီၵေႃႈလီဢၢႆ ဝႆႉယူႇ ႁင်းမၼ်းယဝ်ႈ။ ယူႇၵမ်းၼိုင်ႈ ႁိူဝ်းမိၼ်ၶဝ် ၸိူဝ်ႈလူင်းၸူးၶူင်ႇႁိူဝ်းမိၼ်ႁၢႆးဝူဝ်းယူႇယဝ်ႉ ။
ၽွင်းၶႃသွင်ၵေႃႉ တိဝ်ႈၶူဝ်းၶႃ ဢွၵ်ႇမႃးတီႈၼွၵ်ႈၼၼ်ႉ
“ ၶႅတ်ႉလႃး ဝူင်းလိူၼ် ”
လႆႈႁၼ် မိုၼ်ႇႁွမ် ဢႅၼ်ႇမႃးၸူးၶႅတ်ႉလႃးလႄႈၶႅတ်ႉလႃး ႁပ်ႉၵွတ်ႇဢဝ်တူဝ်ႁၢင်ႈလီ ဢွၼ်ႇမိုၼ်ႇႁွမ်ဝႆႉယူႇ။
“မိုၼ်ႇႁွမ်”
ၶႃသွင်ၵေႃႉ ၸူမ်းသိူဝ်းၼႃႇသေ ၼမ်ႉတႃပေႃးယွႆႉ တူၵ်းၵေႃႉဢိတ်းဢိတ်းယူႇ။
“ မိုၼ်ႇႁွမ် ၸူမ်းဝႃႈၸူမ်းယဝ်ႉၼႆႉ ”
ၶႃသွင်ၵေႃႉ ၸဵတ်ႉပၼ်ၼမ်ႉတႃၵၼ်သေ
“ ၶႅတ်ႉလႃးၵေႃႈ ၸူမ်းပေႃးဢမ်ႇမီးတီႈတႅၵ်ႈယဝ်ႈ ”
မိုၼ်ႇႁွမ်ၸင်ႇဝၢႆႇၸူႈဝူင်းလိူၼ်သေ
“ ဝူင်းလိူၼ် ရူတ်ႉမီးတင်းၼၼ်ႉဢိူဝ်ႈ။ ၵႂႃႇႁဝ်းၵႂႃႇ ပွၵ်ႈၼႆႉ မႂ်းလႆႈၶွင်ၾၢၵ်ႇလီ မႃးပၼ် ၵဝ်တႄႉယဝ်ႈ ”
“ ပေႃးၼမ်ႉယၢတ်ႇပႆႇမူတ်း ၸၢင်ႈၶိုၼ်းသုတ်ႇတူတ်းၵၼ် ’ၼႆၼႃႇ ”
ၶဝ်ဢွၼ်ၵၼ်ၶူဝ်သေ မိုၼ်ႇႁွမ်ၸင်ႇဝႃႈ
“ ဝူင်းလိူၼ်ၼႆႉၼေႃ သႅၼ် ဝႃႈၼႃႇ ”
“ မိုၼ်ႇႁွမ် ၽႂ်ႁေႃႈရူတ်ႉမႃး?”
“ လုင်းထႃး သူဢိူဝ်ႈ ”
ၶဝ်မႃးၶီႇရူတ်ႉသေ ရူတ်ႉၶဝ်သိုပ်ႇၶၢဝ်းတၢင်းမႃး တူၼ်ႈတီးယူႇ။ မိုၼ်ႇႁွမ်ၵျေႃႇၸႂ်ၼႃႇ လႄႈ ၵွတ်ႇၶႅတ်ႉလႃးဝႆႉသေ
“ ၶႅတ်ႉလႃး သူၵိၼ်သင် သူပေႉႁၢင်ႈလီ ပေႃးပဵၼ်တၢၼ်ႇၼႆႉ?”
“ မိုၼ်ႇႁွမ်သမ်ႉၵိၼ်သင်သေ ႁၢင်ႈလီတၢၼ်ႇၼႆႉလႃႇ?”
“ ႁဝ်းဢမ်ႇႁၢင်ႈလီပဵင်းၶဵတ်ႉလႃးၵူၺ်း ”
ဝူင်းလိူၼ် ၼင်ႈတီႈၼႃႈသေ လၢတ်ႈဝႃႈ
“ ၽႂ်ဢမ်ႇႁၢင်ႈၸႃႉတၢၼ်ႇ ဝူင်းလိူၼ်ၵူၺ်း ”
ၶဝ်ဢွၼ်ၵၼ်ယုမ်ႉၶူဝ် သိူဝ်းၼူဝ်တင်းတၢင်းယူႇ။ ရူတ်ႉၶဝ်ၶိုၼ်းမႃးၽႅဝ်ၼိူဝ်လွႆယဝ်ႉ လႄႈမိုၼ်ႇႁွမ်ၸင်ႇဝႃႈ
“ ဝူင်းလိူၼ် မိူဝ်းႁိူၼ်းႁဝ်း ဢွၼ်တၢင်းၵွၼ်ႇဢိူဝ်ႈ ”
“ ႁိူဝ်တေၸႂ်ႈ မိူဝ်းႁိူၼ်းႁဝ်းဢွၼ်တၢင်းဢိူဝ်ႈ မိူဝ်းၵိၼ်ၶဝ်ႈဝၼ်း ႁိူၼ်းႁဝ်းဢွၼ်တၢင်းၵွၼ်ႇၵႂႃႈ ၶဝ်ၶမ်ႈၸင်ႇမိူဝ်းၵိၼ် တီႈႁိူၼ်းမိုၼ်ႇႁွမ်ၶဝ်ၼႃႇ ၸွင်ႇၽွမ်ႉ?”
“ ၽွမ်ႉယူႇ ၼေႃႈ ၶႅတ်ႉလႃးၼေႃႈ ”
“ ၶႅတ်ႉလႃးတႄႉ ၶႅၼ်းၽွမ်ႉၽႅဝ်လေႃႇ ဝၢႆးၼႆႉၵူဝ်ၸဝ်ႈႁိူၼ်းဝႃႈ ‘ၶႅၵ်ႇၼၢၼ်းမိူဝ်း လၢႆးတၢၼ်းသိူဝ်းပေႃးႁၢႆ ’ၼႆၵူၺ်းယဝ်ႈ ”
“ ဢမ်ႇဝႃႈၵူၺ်း ”
ၶဝ်ၽႅဝ်မႃး ႁိူၼ်းဝူင်းလိူၼ်ၶဝ် တီႈပွၵ်ႉမႂ်ႇလူင်သေ မႃးလူင်းရူတ်ႉယူႇ။ မိုၼ်ႇႁွမ်ၸင်ႇ တၵ်ႉ
“ မႂ်ႇသုင်ၶႃႈမႄႈၶူး ”
“ မႂ်ႇသုင် ”
“ ၼႆႉပဵၼ်ၶႅတ်ႉလႃးဢေႃႈ ၸွင်ႇမႄႈၶူးတွင်းၶႃႈႁိုဝ်?”
“ ၶႅတ်ႉလႃးတၢင်ႉယၢၼ်းႁႃႉ ”
“ ၸႂ်ႈဢေႃႈ ”
“ ဢလူဝ်...သူပေႃးၵေႃႉယႂ်ႇမူတ်းယဝ်ႉလူင်ၼႆႉ တွင်းယဝ်ႈ တွင်းယဝ်ႈ ”
“ မႂ်ႇသုင်ၶႃႈ မႄႈၶူး ”
“ မႂ်ႇသုင်...သၢင်ႇထုၵ်ႇယဝ်ႈ မႄႈၶူးႁုင်ၶဝ်ႈႁုင်ၽၵ်းဝႆႉ ၼမ်ဢိူဝ်ႈမိူဝ်ႈၼႆႉ ၵိၼ်ၶဝ်ႈဝၼ်း တီႈၼႆႈၼႃႈ ”
“ ၸူမ်းၶႃႈမႄႈၶူး ”
ၽွင်းၵိၼ်ၶဝ်ႈၼၼ်ႉ ဝူင်းလိူၼ်လႄႈ ၶႅတ်ႉလႃး ၶႆႈၼႄလွင်ႈၶႃသွင်ၵေႃႉ ၼႄမိုၼ်ႇႁွမ်လႄႈ ဢူႈမႄႈဝူင်းလိူၼ်ၶဝ်ယဝ်ႈ လွင်ႈၶႅတ်ႉလႃး လႆႈဢဝ်တၢႆၵူၼ်းၼၼ်ႉတႄႉ ၶႃဢမ်ႇၶႆႈၼႄ။ ဝၢႆးသေဢုပ်ႇၶႆႈၼႄယဝ်ႉ ၶႅတ်ႉလႃးၸင်ႇဝႃႈ
“ မႄႈၶူး ၵတ်ႉၵႃႈမီးဝူင်းလိူၼ်လႃႈ သင်ဢမ်ႇၼၼ်တႄႉ ၶႅတ်ႉလႃး ပေႃးဢမ်ႇႁတ်းဝူၼ်ႉယဝ်ႉ ”
မႄႈၶူးထူၺ်းၸႂ်လူင်သေ
“ ဢိူဝ်း...ပၢၼ်တီႈလဵဝ် ၵူၼ်းၼႆႉ ယုမ်ႇၵၼ်ဢမ်ႇလႆႈၵူၺ်းၼေႃႈ ”
ဝၼ်းၼၼ်ႉ ၶဝ်ဢုပ်ႇၵၼ်ထႅင်ႈတင်းၼမ်သေ ထိုင်မႃး တၢမ်းၶမ်ႈ ဝူင်းလိူၼ် ၸင်ႇႁေႃႈရူတ်ႉ မိူဝ်းသူင်ႇၶႃသွင်ၵေႃႉ ႁိူၼ်းမိုၼ်ႇႁွမ်ၶဝ်ယဝ်ႈ။ ဝၢႆးၵိၼ်ၶဝ်ႈၶမ်ႈယဝ်ႉ ဝူင်းလိူၼ်ၶိုၼ်းမႃးမိူဝ်းသေ ၶႅတ်ႉလႃး ၼွၼ်းႁိူၼ်းမိုၼ်ႇႁွမ်ၶဝ်ယဝ်ႈ။ မိုၼ်ႇႁွမ်ႁွင်ႉၶႅတ်ႉလႃး ၼွၼ်းၸွမ်းမၼ်းသေ ၵၢင်ၶမ်ႈမႃး ၶႃဢုပ်ႇၵၼ် ဢိၼ်းဢွၼ်းဢိၼ်းဢွၼ်းယူႇ။
“ ၶႅတ်ႉလႃး ၽဝႃႉမႂ်းၵေႃႈ ၽၢၼ်ႇမႃးၸေးၼႃႇၼေႃႈ ?”
“ တေၸၢင်ႈႁဵတ်းႁိုဝ်လႃႇ တေလႆႈဝႃႈ ၵၢမ်ႇႁဝ်း ဢမ်ႇလီမိူၼ်ပိူၼ်ႈၼႆၵူၺ်းဢိူဝ်ႈ ”
“ ယႃႇပေၸႂ်လဵၵ်ႉၼင်ႇၵဝ်ႇ ၵူၼ်းႁဝ်းၼႆႉ ‘ႁၼ်မၼ်းမႅၵ်ႇမႆႉ ဢမ်ႇႁၼ်မၼ်းမႅၵ်ႇၵၢမ်ႇ ’ၼႆဝႃႇ ဝၢႆးၼႆႉ ၶႅတ်ႉလႃး ယင်းတေၵၢမ်ႇလီသေႁဝ်း ၵွၼ်ႇႁိုဝ်ဢမ်ႇႁူႉလူင် ”
“လီလီၸႃႉၸႃႉ တၢၼ်ႇႁိူဝ်ၵေႃႈလၢႆး ယၢမ်းလဵဝ်တႄႉ ၼႃထိုဝ်မႃးတၢၼ်ႇတၢၼ်ႇယဝ်ႉလူး ”
“ ပေႃးၼႆ မိူဝ်းၼႃႈ ၶႅတ်ႉလႃး တေသိုပ်ႇႁဵတ်းသင်လႃႇ ?”
“ မင်ၵမ်း တႃႉၶႂ်ႈၵႂႃႇႁဵတ်းၼၢႆးၶၢဝ်လႃႈ ”
“ ဢလူဝ်ႉ ယႃႇပေႁဵတ်းဢႄႉ လီသေလၢႆၶူၼ်ႁူဝ်ၶႅတ်ႉလႃး တူၺ်းလူး ၶူၼ်ႁူဝ်ၶႅတ်ႉလႃး ယၢဝ်းပေႃးၸမ်ၽႅဝ်တွင်ႇၼွင်ႈၼႆႉ လႅပ်ႈၶႅတ်ႉလႃးၵျ။ ယႃႇပေၵႂႃႇၵႅတ်းပွတ်းပႅတ်ႈၼႃႈ ”
“ မိုၼ်ႇႁွမ် သမ်ႉဝႆႉပွတ်းႁဵတ်းသင်လႃႇ ? ပေႃးၼႆ ”
“ ၶူၼ်ႁူဝ်ႁဝ်း ပၢႆမၼ်းသိၵ်ႇတိၵ်းတိၵ်းသေ သမ်ႉငေႃးလူး ၵွပ်ႈၼႆ ႁဝ်းၵႅတ်းပွတ်ႈဢိူဝ်ႈ။ ၶႅတ်ႉလႃႈတေၶႂ်ႈႁဵတ်းသင်တႄႉတႄႉ လၢတ်ႈႁဝ်းသိုဝ်ႈသိုဝ်ႈလႄႈ ထုၵ်ႇၸွႆႈၵေႃႈ ယူဝ်ၸၢင်ႈၸွႆႈဢိူဝ်ႈ ”
“ မိုၼ်ႇႁွမ် တႃႇတေၵႃႉၶၢႆ မိူင်းတႂ်ႈမိူင်းၼိူဝ်ၼၼ်ႉၵေႃႈ ၵဝ်ၶႂ်ႈဢိမ်ႇယဝ်ႈ၊ သင်လႆႈၵၢၼ် ဢၼ်သၢင်ႇထုၵ်ႇ တႃႇၼၢင်းယိင်းသေဢၼ်ဢၼ်တႄႉ ၵဝ်ၶႂ်ႈႁဵတ်းယူႇ။ ”
ၶမ်ႈၼၼ်ႉ ၶႃဢုပ်ႇၵၼ်ၵေႃႈ တေႃႈဢမ်ႇႁၼ်ၼမ်ႉႁၼ်တူဝ်မႃးသင်သေပိူင်
ၵၢင်ၼႂ်မိူင်းလႅင်းမႃး ဝူင်းလိူၼ် လုၵ်ႉမႃးၵိၼ်ၵေႃႇၾီႇၶဝ်ႈမုၼ်း ၼႂ်းဝၢင်းႁိူၼ်းၶဝ်ယူႇ မၼ်းလွမ်တူၺ်း ၼိူဝ်လိၼ်လႆႈႁၼ်မွၵ်ႇၶႅတ်ႉလႃး ဢွၼ်ႇႁူင်ႈတူၵ်းဝႆႉ ပေႃးၽိူၵ်ႇၵႂႃႇ။
“ ဢေႃး...မွၵ်ႇၶႅတ်ႉလႃး ပေႃးတၼ်းမွၵ်ႇယဝ်ႉလူင်ၼႆႉ ”
မၼ်းၼင်ႈငွမ်သေ ၵဵပ်းမွၵ်ႇၶႅတ်ႉလႃး လူင်ႇၼိုင်ႈယဝ်ႉ လူင်ႇၼိုင်ႈယူႇ။ ငိၼ်းသဵင် ရူတ်ႉၶိူင်ႈမႃးလႄႈ မၼ်းဝၢႆႇတူၺ်းၵႂႃႇ လႆႈႁၼ်ပဵၼ်ၶႅတ်ႉလႃးလႄႈ မိုၼ်ႇႁွမ်ၽႅဝ်မႃး
“ ဝူင်းလိူၼ် တိုၵ်ႉႁဵတ်းသင်ယူႇ?”
“ ဢေႃႈ...မႃးလႄႈ ၼေႈမွၵ်ႇၶႅတ်ႉလႃးမွၵ်ႇသေ ႁူင်ႈယူႇလႄႈ ၵဝ်ၵဵပ်းမွၵ်ႇဢိူဝ်ႈ ”
မိုၼ်ႇႁွမ်လႄႈၶႅတ်ႉလႃးၵေႃႈ မႃးၵဵပ်းမွၵ်ႇသေ မိုၼ်ႇႁွမ်ၸင်ႇဝႃႈ
“ တႃႉလီိၶုၵ်းၸႂ်လႆႈ မိူဝ်ႈႁဝ်းလဵၵ်ႉ ဢၼ်ႁဝ်းၵဵပ်းမွၵ်ႇၶႅတ်ႉလႃးၸွမ်းၵၼ် တီႈဝၢင်းၽြႃးလူင်ၼၼ်ႉ ၵျၼေႃ? ၶႅတ်ႉလႃး ”
“ ၸႂ်ႈတႄႉဢိူဝ်ႈ ၵမ်းၼႆႉ ၵေႃႈႁဝ်းသၢမ်ၵေႃႉ ၶိုၼ်းလႆႈမႃးၵဵပ်းမွၵ်ႇႁူမ်ႈၵၼ်ယဝ်ႈလူး ‘’
ဝူင်းလိူၼ် ၸင်ႇဝႃႈ
“ၶႅတ်ႉလႃး ႁဝ်းသွႆႉသေ ၵႂႃႇၶၢႆၼႂ်းၵၢတ်ႇႁိုဝ်ႉ?”
“ ၵႂႃႇလႄႈ ထၢင်ႇၶႅတ်ႉလႃး ဢမ်ႇႁတ်းႁႃႉ ”
မိုၼ်ႇႁွမ်ၸင်ႇသၢၼ်ၶတ်းဝႃႈ
“ ဢူဝ်...ဢမ်ႇလူဝ်ႇၵႂႃႇၶၢႆ ပၢႆသလိူဝ် ၶႅတ်ႉလႃးႁၢင်ႈလီၸိူင်ႉၼႆႉ ၵမ်ႉပေႃးပိူၼ်ထၢမ်သိုဝ်ႉပႃး ၸဝ်ႈမၼ်းတေႁဵတ်းႁိုဝ်?”
ၶဝ်သိုပ်ႇၵဵပ်းမွၵ်ႇ ႁူမ်ႈၵၼ်ယဝ်ႉသေ မိုၼ်ႇႁွမ်ၸင်ႇဝႃႈ
“ ဝူင်းလိူၼ် ႁႃးမႃးၸူဝ်းမႂ်း ၵႂႃႇၵိၼ်ၶဝ်ႈသွႆႈတႆးဢိူဝ်ႈၼႆႉ ”
“ ၵႂႃႇလႄႈရူတ်ႉၶိူင်ႈၶိူဝ် ဝႆႉတီႈၼႆႈသေ ႁဝ်းဢဝ်ရူတ်ႉတီႈႁိူၼ်းႁဝ်းၵႂႃႇဢဝ်ၼေႃႈ?”
ၶဝ်ၶီႇရူတ်ႉ ဢွၵ်ႇမႃးသေ
“ မိုၼ်ႇႁွမ် တေၵႂႃႇတီႈသႅင်ႇလႂ်?”
“ ၵႂႃႇတီႈသႅင်ႇတႆး ဢၼ်ႁဝ်းၵႆႉၵိၼ်ၼၼ်ႉဢိူဝ်ႈ ”
“ ပေႃးဢမ်ႇၸႂ်ႈသႅင်ႇတႆး ဢမ်ႇၵိၼ်ႁႃႉ?”
“ ဝူင်းလိူၼ် ပေႃးမႂ်းဢမ်ႇမီးၸႂ် ၶႂ်ႈပၼ်ႁႅင်းတႆးၼႆၵေႃႈ ၵႂႃႇတီႈသႅင်ႇဢၼ်ဢမ်ႇၸႂ်ႈတႆး ၼၼ်ႉလႄႈ။ ပေႃးမႂ်းမီးၸႂ်ၶႂ်းပၼ်ႁႅင်းတႆးၼႆၵေႃႈ ၵႂႃႇတီႈသႅင်ႇတႆးလႄႈ ”
ၶႅတ်ႉလႃးၵေႃႈ ၸင်ႇဝႃႈ
“ဝူင်းလိူၼ် ဢၼ်မိုၼ်ႇႁွမ်ဝႃႈၼႆႉ မီးတီႈပွင်ႇတႄႉဢိူဝ်ႈ ”
“သပ်းလႅင်း ၼႄလူး ”
ၶႅတ်ႉလႃးၶိုၼ်းသိုပ်ႇဝႃႈ
“ ၽွင်းမိူဝ်ႈၵဝ်ၵႃႉၵႃႉၶႃႇၶၢႆၼၼ်ႉ တႆးၵေႃႉၵဝ်ၵေႃႉၼိုင်ႈ ပဵၼ်ၵလႃးဢိူဝ်ႈ ဢေးၵလႃးၼၼ်ႉ ႁဝ်းၵႂႃႇၽႅဝ်တီႈလႂ်သေဢမ်ႇဝႃႈ မၼ်းၶႂ်ႈသိုဝ်ႉၵိၼ်သင်ၵေႃႈယဝ်ႉ မၼ်းၵႂႃႇသိုဝ်ႉၵိၼ် တီႈသႅင်ႇၵလႃးၶဝ် လွၼ်ႉလွၼ်ႉယဝ်ႉ ”
“ မၼ်းဢမ်ႇၵိၼ်ၼိူဝ်ႉမူလႄႈဝႃႈၵႂႃႈ ”
“ ၵွမ်ႉဢၼ်ၼၼ်ႉ ဢၼ်လဵဝ်တႄႉ ဢမ်ႇၸႂ်ႈၵူၺ်း၊ သိုဝ်ႉၵိၼ်တၢင်းၵိၼ်ယွႆႈၵေႃႈ ၵႂႃႇႁႃသိုဝ်ႉ တီႈသႅင်ႇၵလႃးၶဝ်ၵူၺ်းဢိူဝ်ႈ ”
မိုၼ်ႇႁွမ်ၸင်ႇဝႃႈ
“ ၼၼ်ႉတေလႆႈဝႃႈ ၶဝ်ပၼ်ႁႅင်းၶဝ်ၼႆဢိူဝ်ႈၼေႃႈ?”
“ ၸႂ်ႈဢိူဝ်ႈ မိုၼ်ႇႁွမ် ‘ဢီႈသင်ႁေႈ ႁႂ်ႈၶိုၼ်းႁေႈၼႂ်းထွင်းၸဝ်ႈၵဝ်ႇ ’ၼႆဝႃႇ ဝူင်းလိူၼ် ၸိူင်ႉမိုၼ်ႇႁွမ်ဝႃႈ ပၼ်ႁႅင်းတႆး ဢၼ်ဝႃႈၼၼ်ႉ ၵႂႃႇတီႈသႅင်ႇတႆးလႄႈ ”
ဝူင်းလိူၼ် ၸင်ႇဝႃႈ
“ ပေႃးဝႃႈ ၵႂႃႇတီႈလႂ်ၵေႃႈ ႁႂ်ႈပၼ်ႁႅင်းတႆးၼႆ မၢင်တီႈသမ်ႉဢမ်ႇမီးသႅင်ႇတႆးလူး တေႁဵတ်း ႁိုဝ်လႃႇ?”
“ပေႃးဢမ်ႇမီးသႅင်ႇတႆးၼႆတႄႉ ၵႃႈတေလႆႈပၼ်ႁႅင်းပိူၼ်ႈဢိူဝ်ႈ ပေႃးမီးသႅင်ႇတႆးၼႆတႄႉ ပၼ်ႁႅင်းတႆးဢိူဝ်ႈ ဢမ်ႇလီႁႃႉ ဝူင်းလိူၼ် ”
“ လီႅၽႅဝ်လေႃႇ ဝၢႆးၼႆႉ ပေႃးဝႃႈ ၵဝ်ၽုၺ်ႇလၢၼ်ႉၶၢႆၶူဝ်းၼႆ ၵဝ်တေသႂ်ႇၸိုဝ်ႈ လၢၼ်ႉ ၶၢႆၵဝ်ဝႃႈ “ ပၼ်ႁႅင်းတႆး ”ၼႆၸွင်ႇတေလီ?”
“ လီဢိူဝ်ႈ...”
ဝူင်းလိူၼ် ၸင်ႇဝူၼ်ႉသေလၢတ်ႈ
“ ၵျပၢၼ်ၼႆႉ မိူင်းၶဝ်ၶိုၼ်ႈယႂ်ႇ မႂ်ႇသုင် ၶိူဝ်းၶဝ်ၵေႃႈ ၶိုၼ်ႈယႂ်ႇမႂ်ႇသုင်တႄႉတႄႉ။ ၵူၼ်းၶိူဝ်းၵျပၢၼ်ႇၶဝ်ၼႆႉ ၶဝ်ၵႂႃႇႁွတ်ႈၸွတ်ႇတင်းလုမ်ႈၾႃႉ ၶဝ်ၵႂႃႇၽႅဝ်တီႈလႂ်သေဢမ်ႇဝႃႈ ၶဝ်ၵူၺ်း သိုဝ်ႉယိပ်းတိုဝ်း ၶူဝ်းဢၼ်ႁဵတ်းဢွၵ်ႇမိူင်းၵျပၢၼ်ႇၶဝ်ၵူၺ်းၼႆဢိူဝ်ႈ။ ၶူဝ်းတၢင်ႇမိူင်း ႁဵတ်းၼၼ်ႉ ၶဝ်ဝႄႈလႆႈတၢၼ်ႇ ႁိူဝ်ၵေႃႈဝႄႈၼႆယဝ်ႉ ”
မိုၼ်ႇႁွမ်ၵေႃႈ ၸင်ႇၵမ်ႉ ထႅမ်သေဝႃႈ
“ ၸႂ်ႈတႄႉ ဢိူဝ်ႈၼႆႉ တႆးၵေႃႉ မိုၼ်ႇႁွမ်ၵေႃႉၼိုင်ႈ ၵႂႃႇႁဵတ်းၵၢၼ်တီႈတႃႈၵုင်ႈ ပေႃႈလဵင်ႉၶဝ် ပဵၼ် ပေႃႈလဵင်ႉၵျပၢၼ်ႇ။ ပေႃႈလဵင်ႉၵျပၢၼ်ႇ ႁဵတ်းဝၼ်းၵိူတ်ႇမၼ်းသေ တႃႇၶွင်ၽၢၵ်ႇပၼ်လုၵ်ႈ လဵင်ႉမၼ်းတင်းသဵင်ႈၼၼ်ႉ ၽႂ်ၶႂ်ႈလႆႈသင်ၼႆ မၼ်းမၵ်းၶၢၼ်းၵႃႈၶၼ်မၼ်းဝႆႉသေ မၼ်းဢွၼ်လုၵ်ႈလဵင်ႉမၼ်း ၵႂႃႇၼႂ်းလၢၼ်ႉၶၢႆ။ တေလႆႈလိူၵ်ႈဢဝ် ၶူဝ်းၶွင်ဢၼ်ႁဵတ်းဢွၵ်ႇ မိူင်းၵျပၢၼ်ႇၵူၺ်းၼႆယဝ်ႉ ။ ၼၼ်ႉပွင်ႇဝႃႈ ၸဝ်ႈၵဝ်ႇပၼ်ႁႅင်းဝၢၼ်ႈမိူင်းလႄႈ ၸိူဝ်ႉၶိူဝ်း ၸဝ်ႈၵဝ်ႇၼႆဢိူဝ်ႈ ”
ဝူင်းလိူၼ်ၸင်ႇဝႃႈ
“ ပေႃးၼႆ တႄႇဢဝ်မိူဝ်ႈလဵဝ်ၼႆႇၵႂႃႇ ၵဝ်တႅပ်းတတ်းၸႂ်ၵဝ်ဝႃႈ မၢႆၼိုင်ႈပၼ်ႁႅင်းတႆး ၼႆယဝ်ႈ ၶိူဝ်သွင်ၵေႃႉလူး?”
“ မၢႆၼိုင်ႈ ပၼ်ႁႅင်ႈတႆး”
“ မၢႆၼိုင်ႈ ပၼ်ႁႅင်းတႆး”
ဝူင်းလိူၼ် ႁေႃႈရူတ်ႉမၼ်း ၵႂႃႇၵိုတ်းတီႈသႅင်ႇၶဝ်ႈသွႆးတႆးသေ ၶဝ်သၢမ်ၵေႃႉ ႁူမ်ႈၵၼ် ပၼ်ႁႅင်းတႆးယူႇ။ သင်ဝႃႈ တႆးႁဝ်းၽွမ်ႉၵၼ် ပၼ်ႁႅင်းတႆးၼႆၸိုင် တႆးတေမီးႁႅင်းတိၵ်းတိၵ်းသေ တေထိုင်ၸိၵ်းၸွမ် ၵူႈပိူင်ယူႇ။ သင်ဝႃႈတႆးႁဝ်းမေႃၶိုင်ပွင်ပႃး ႁႂ်ႈပိူၼ်ႈၵေႃႈ မေႃပၼ်ႁႅင်းတႆးၼႆၸိုင် ၶႅၼ်းတေဢမ်ႇ မီးတီႈဝႃႈယဝ်ႉ။