ၶိုၼ်းထူပ်းႁၼ်ၵၼ်/တွၼ်ႈ 11 ၸဵပ်းသွၼ်ႉ
ဝူင်းလိူၼ်လႄႈၶႅတ်ႉလႃး ၵႂႃႇဢႅဝ်ႇၸွမ်းၵၼ်မူၼ်ႈမူၼ်ႈသိူဝ်းသိူဝ်း ႁိမ်းၽင်ႇၼမ်ႉပၢင်ႇလၢႆႇသေ ၶႃသွင်ၵေႃႉ လမ်းၵၼ်လဵၼ်ႈယူႇ၊ ဢႅၼ်ႇလႅၼ်ႈဢဵၼ်ႈၸွမ်းႁၢတ်ႇသၢႆးၵေႃႈ သမ်ႉပေႃး ဢမ်ႇႁူႉႁိူဝ်ႉ။ ၼႂ်းတႃၶႅတ်ႉလႃးၼႆႉ ပွၵ်ႈၼႆႉၶူင်းၵၢင်ပႄႉမႃးႁၢင်ႈလီ ပုၼ်ႈတႃႇမၼ်း
ဝူင်းလိူၼ် ဝၵ်ႉဢဝ်ၼမ်ႉႁူတ်းမၼ်း မၼ်းၵေႃႈ ၶိုၼ်းႁူတ်း ဝူင်းလိူၼ်သေ ယုမ်ႉၶူဝ်သိူဝ်းၼူဝ်ၼင်ႇၵၼ်။
ႁွၼ်ၼမ်ႉပၢင်ႇလၢႆႇ မႃးၽၢပ်ႈသႂ်ႇမၢၵ်ႇႁိၼ် ၽူင်ႉၵႂႃႇၼိူဝ်မၢၵ်ႇႁိၼ် ဢၼ်ၼိုင်ႈသေ ဝူင်းလိူၼ် ႁွင်ႉၶႅတ်ႉလႃးလႄႈ မၼ်းၵေႃႈဢဝ်ႁႅင်းသေ ၶိုၼ်ႈၵႂႃႇၸွမ်း၊ ဝူင်းလိူၼ် ႁပ်ႉၸၼ်ဢဝ်မိုဝ်းမၼ်းသေ ၶႃမႃး ၸုၵ်းၼိူဝ်မၢၵ်ႇႁိၼ် လွမ်တူၺ်းႁွၼ်ၼမ်ႉ ၊ လွမ်တူၺ်းၼမ်ႉပၢင်လၢႆႇ သၢႆတႃပေႃးသုတ်း။
လူမ်းၼမ်ႉပၢင်ႇလၢႆႇ ပဝ်ႇထွင်းလႄႈ ၶူၼ်ႁူဝ်ၶႅတ်ႉလႃးပိဝ်ယူႇယူၼ်ႈယူၼ်ႈ၊ၸႂ်ဢွၼ်ႇ မၼ်းၼၢင်းၵေႃႈ မူၼ်ႈဝႃႈမူၼ်ႈ ဝူင်းလိူၼ်ၶိုၼ်းဢွၼ်မၼ်း လူင်းၵႂႃႇ ၽၢႆႇပုၼ်ႉမၢၵ်ႇႁိၼ်သေ ဝူင်းလိူၼ် ၽႅဝ်ၵႂႃႇ တီႈတႂ်ႈဢွၼ်တၢင်း၊ ၶႅတ်ႉလႃးၵေႃႈ ဝႆႉသတိသေ ၶတ်းၸႂ်လူင်းၸွမ်းဝူင်းလိူၼ်၊ ၽွင်းၸမ်တေၽႅဝ် တီႈတႂ်ႈ ႁိမ်းဝူင်းလိူၼ်ၼၼ်ႉ ၶႅတ်ႉလႃး ပလၢတ်ႈသေ ၵိူင်ႈၵႂႃႇၸူးဝူင်းလိူၼ်၊ ဝူင်းလိူၼ်ၵေႃႈ တၼ်းႁပ်ႉၵွတ်ႇဢဝ်မၼ်းၼၢင်းဝႆႉ ၶႅတ်ႉလႃးလီဢၢႆသေ ၽိုတ်ႉတူဝ်မၼ်းဢွၵ်ႇသေတႃႉ ဝူင်ႈလိူၼ် ဢမ်ႇပွႆႇ။
“ ၶႅတ်ႉလႃး...ၸွင်ႇႁၵ်ႉဝူင်းလိူၼ်ႁိုဝ်?”
“ ဢူဝ်...ဢမ်ႇႁူႉ ”
“ လၢတ်ႈလႄႈ ၶႅတ်ႉလႃး ”
ၶႅတ်ႉလႃး ဢမ်ႇတၵ်းသဵင်သေ ဢဝ်ႁူဝ်မၼ်းဢိင်ဝႆႉ ၼႂ်းၵႄႈဢူၵ်းဝူင်းလိူၼ်ယူႇ၊ သီႇသူပ်းဢုၼ်ႇဢုၼ်ႇဢွၼ်ႇ ဝူင်းလိူၼ်မႃးတိူဝ်ႉသႂ်ႇ ၼႃႈၽၢၵ်ႇၶႅတ်ႉလႃးၵမ်းၼိုင်ႈသေ မၼ်းၵွတ်ႇၶႅတ်ႉလႃး ဝႆႉႁႅင်းႁႅင်းယူႇ၊ လိူဝ်သေၼၼ်ႉ ၵႅမ်ႈၶႅတ်ႉလႃႈၵေႃႈ လႅင်ၵႂႃႇတင်ႈသွင်ၽၢႆႇ၊ ဝူင်းလိူၼ် တဵၵ်းဢဝ်တူဝ်ၶႅတ်ႉလႃး လူမ်ႉၵႂႃႇၼိူဝ်ႁၢတ်ႇသၢႆးယူႇ။
“ ဝူင်းလိူၼ် ယႃႇႁဵတ်းၼၼ် ၶႅတ်ႉလႃးဢမ်ႇလႆႈၸႂ် ”
“ ၶႅတ်ႉလႃး ၵဝ်ႁၵ်ႉမႂ်းတႄႉဢိူဝ်ႈ ”
ၶႅတ်ႉလႃး ဢမ်ႇၽွမ်ႉသေ ဢီးဝူင်းလိူၼ် တၢၼ်ႇႁိုဝ်ၵေႃႈ ဢမ်ႇလႆႈ၊ ဢဝ်ႁႅင်းတဵၼ်ႈ ၽိုၼ်ႉတၢၼ်ႇႁိုဝ်ၵေႃႈ ဢမ်ႇပႄႉလႆႈ ႁႅင်ႈဝူင်းလိူၼ်၊ မၼ်းၼၢင်း ယၢမ်ႈမၢတ်ႇၸဵပ်းမႃးၸိူင်ႉၼႆ ပွၵ်ႈၼိုင်ႈယဝ်ႉလႄႈ မၼ်းၼၢင်းႁၼ်မႆႉလႅမ်ပွတ်းၼိုင်ႈ မီးႁိမ်းမၼ်း၊ မၼ်းၸင်ႇယိပ်းၵမ်ဢဝ်ၵႅၼ်ႇၵႅၼ်ႇသေ တမ်ပၼ်ပဵမ်ႉဝူင်းလိူၼ်ႁႅင်းႁႅင်း ဢီးဝူင်းလိူၼ်ပႅတ်ႈယဝ်ႉ။
ၶႅတ်ႉလႃႈ ၽႅတ်းတိုၼ်ႇမႃး လႆႈႁၼ် မၼ်းဢီးပႅတ်ႈ မွၼ်ၵွတ်ႇယၢဝ်းလူင် ဢၼ်မၼ်းၵွတ်ႇၼွၼ်း ၶမ်ႈဝႃးၼၼ်ႉ ဝူင်တူၵ်းၵႂႃႇ မီးတႂ်ႈၵူႇဝႆႉယူႇ၊ မၼ်းၼၢင်း ဢဝ်မိုဝ်းၵမ်းဢူၵ်းမၼ်းသေ
“ ဢလူဝ်...ၵဝ်ၼွၼ်းၾၼ်လူင်ၼႆႉ ၵတ်ႉၵႃႈ ဢမ်ႇၸႂ်ႈဢၼ်တႄႉလႃႈ ”
ၶႅတ်ႉလႃး ၶိုၼ်းၵဵပ်းမွၼ်ၵွတ်ႇယၢဝ်းၼၼ်ႉ မႃးဝႆႉႁိမ်းၶၢင်ႈမၼ်းသေ ဝူၼ်ႉတႂ်ႈဝူၼ်ႉၼိူဝ် မၼ်းၶိုၼ်းလပ်းၵႂႃႇမိူဝ်ႈလႂ်ၵေႃႈ တေႃႈဢမ်ႇႁူႉ၊ ထိုင်တီႈ မၼ်းတိုၼ်ႇမႃး သမ်ႉပေႃးမီးပႅတ်ႇမူင်းပၢႆယဝ်ႉလႄႈ မၼ်းၸင်ႇၵႂႃႇသုၵ်ႈၼႃႈ သီၶဵဝ်ႈမၼ်းၽႂ်းၽႂ်း ၸဵတ်ႉၼႃႈၸဵတ်ႉတႃမၼ်းသေ ၽုၺ်ႇၽၵ်းတူ လုၵ်းမၼ်း တူၺ်းဝူင်းလိူၼ်ယူႇ။ လႆႈႁၼ်ဝူင်းလိူၼ် ပႆၵႂႃႇပႆၶိုၼ်း ႁိမ်းလုၵ်းမၼ်းၼၼ်ႉလႄႈ ဝူင်းလိူၼ် ၸင်ႇယုမ်ႉသေ ထၢမ်
“ ၶႅတ်ႉလႃး ၼွၼ်းလပ်းလီယူႇႁႃႉ?”
“ လပ်းလီပူၼ်ႉၵႂႃႇဢိတ်းၼိုင်ႈဢိူဝ်ႈ ”
“ လူဝ်ႇႁဵတ်းသင်ၵေႃႈႁဵတ်းလႄႈ ပေႃးယဝ်ႉ ႁႃးၵႂႃႇၵိၼ်တၢင်းၵိၼ်သေပိူင်ပိူင်တီႈၼွၵ်ႈ ”
“ ပႂ်ႉၵမ်းၼိုင်ႈၼႃႈ ပေႃးၼႆ ”
ၶႅတ်ႉလႃး ၶိုၼ်းႁပ်းၽၵ်းတူမၼ်းသေ ၼႅတ်ႈၵႂႃႇလၢႆႈၶူဝ်ႈလဵင်း ႁၢင်ႈၶိူင်ႈမၼ်းၽႂ်းၽႂ်းယူႇ။ ယူႇၵမ်းၼိုင်ႈ မၼ်းဢွၵ်ႇမႃးလႄႈ ဝူင်းလိူၼ် တူၺ်းတၢင်းႁၢင်ႈလီမၼ်း တႃပေႃးဢမ်ႇၽႅပ်ႉ
“ ဝူင်ႈလိူၼ် သမ်ႉပေႃးတၢၼ်ႇ ဢမ်ႇယၢမ်ႈႁၼ်ၼၼ်ႉယဝ်ႈ တူၺ်းၵူၼ်းပေႃးပဵၼ်တၢၼ်ႇၼၼ်ႉဝႃႈ”
“ ယူဝ်ဝႃႈ ၼၢင်ႈၽီဢွၼ်ႇဢွၵ်ႇမႃးၼႆၵႂႃႈ ”
ၶႅတ်ႉလႃး ယၵ်ႈလိမ်ႇပၼ်ၶႅၼ်ဝူင်းလိူၼ်ၵမ်းၼိုင်ႈသေ
“ ယႃႇဢမ်ႇယႃႇလႄႈယွင်ႈ တေမီးလွင်ႈတၢင်းသေပိူင်ပိူင်ၼႆဝႃႇ ပိူၼ်ႈဝႃႈ ယွင်ႈဢမ်ႇယွင်ႈၵေႃႈ ၶႅတ်ႉလႃး ဢမ်ႇၸၢင်ႈလဵင်ႉသင်ၵွၼ်ႇ ၶွင်ၵွတ်းယဝ်ႉလူး မိူဝ်ႈလဵဝ် ”
ၶႃသွင်ၵေႃႉ ဢွၵ်ႇမႃးတီႈၼွၵ်ႈသေ ႁႃတူၺ်းသႅင်ႇတၢင်းၵိၼ်ယူႇ။
“ ၶႅတ်ႉလႃး ၵႂႃႇႁဝ်းၵႂႃႇၵိၼ်ၶဝ်ႈသဵၼ်ႈၵိူမ်ႈ (မူင်ႉႁိၼ်းၶႃး )တီႈၼၼ်ႈ ”
“ ဝူင်းလိူၼ် သမ်ႉပေႃးတၢၼ်ႇမႂ်းႁူႉ ၸႂ်ၵဝ်ယဝ်ႈၼေႃ ၵဝ်ၵေႃႈ ဢၢင်ႈဝႃႈ ၶႂ်ႈၵႂႃႇၵိၼ်ၶဝ်ႈ သဵၼ်ႈၵိူမ်ႈၼႆၼင်ႇၵဝ်ႇဢိူဝ်ႈ ”
ၶႃသွင်ၵေႃႉ ၵႂႃႇၼင်ႈၵိၼ်ၶဝ်ႈသဵၼ်ႈၵိူမ်ႈသေ ဝူင်းလိူၼ်ၸင်ႇဝႃႈ
“ ၶႅတ်ႉလႃး မိူဝ်ႈၼႆႉ ၶႂ်ႈၵႂႃႇလႂ် ၶႂ်ႈၵႂႃႇဝႆႈၽြႃးၼႄႇ ၶႂ်ႈမိူဝ်းတႃႈၵုင်ႈၼႄႇ?”
“ဝူင်ႈလိူၼ် ၸူဝ်ႈၸၢင်ႈၽႅဝ်မေႃႇလမႅင်ႇၼႆႉ ၵဝ်ၶႂ်ႈၵႂႃႇဝႆႈၽြႃး မေႃႇလမႅင်ႇၸေးၸေးဢိူဝ်ႈ ”
“ ပေႃးၼႆ မိူဝ်ႈၽုၵ်ႈ ႁဝ်းၸင်ႇၶီႇရူတ်ႉၽႃမၢၼ်ႇလူင်မိူဝ်းၼေႃႈ ? ၸဵဝ်းၽႅဝ်သေ ရူတ်ႉၾႆးဢိူဝ်ႈ ”
“ ဢဝ်ပေႃႈလဵင်ႉၵႃႉသႅင်ႁဝ်း ဝႃႈၶႃႈယဝ်ႈ ”
ဝၼ်းၼၼ်ႉ ၶႃသွင်ၵေႃႉ ၵႂႃႇဝႆႈၽြႃး ၵျႆႉၶမီႇ၊ ၵျႆႉမယေႃးလႄႈ ဢႅဝ်တူၺ်ႈမေႃႇလမႅင်ႇ ၸေးၸေးယူႇယဝ်ႉ။