ၶိုၼ်းထူပ်းႁၼ်ၵၼ်/တွၼ်ႈ 10 ဝူင်းလိူၼ်ႁၼ်ၶႅတ်ႉလႃး
မိုၼ်ႇႁွမ် ၶီႇရူတ်ႉၶိူင်ႈသေ ၽႅဝ်မႃးတီႈႁိူၼ်ႈဝူင်းလိူၼ်ၶဝ် ဢၼ်ၶဝ်မႃးသိုဝ်ႉ တီႈပွၵ်ႉမႂ်ႇလူင်ၼၼ်ႉယူႇ၊ လႆႈႁၼ်မႄႈၶူး တိုၵ်ႉၽုၵ်ႇမွၵ်ႇယူႇလႄႈ မိုၼ်ႇႁွမ်ၶဝ်ႈမႃး ၼႂ်းဝၢင်းသေ
“ မႂ်ႇသုင်ၶႃႈ...မႄႈၶူး ”
“ မႂ်ႇသုင်...မိုၼ်ႇႁွမ် လုၵ်ႉႁိူၼ်းမႃးႁႃႉ?”
“ ၸႂ်ႈၶႃႈဢေႃႈ...မႄႈၶူး တိုၵ်ႉၽုၵ်ႇသင်ယူႇၶႃႈၼႆႉ?”
“ ၼေႈ ...မႄႈၶူးတိုၵ်ႉၽုၵ်ႇမွၵ်ႇၶဝ်ႈတႅၵ်ႇ၊ မွၵ်ႇႁွၼ်ၵႆႇဢိူဝ်ႈ ...ပိူၼ်ႈဝႃႈ ပေႃးၶႂ်ႈသိူဝ်းၸႂ်တေႃႇၸူဝ်ႈ ႁႂ်ႈၽုၵ်ႇတူၼ်ႈမွၵ်ႇတူၼ်ႈမၢၵ်ႇၼႆၼႃႇ ”
“ မႄႈၶူး...ဝူင်းလိူၼ်ၶႃႈလူး ?”
“ မၼ်းတိုၵ်ႉၵႂႃႇ တီႈၼွၵ်ႈဢိူဝ်ႈ...ပႂ်ႉၵမ်းၼိုင်ႈၵွၼ်ႇလႄႈ မၼ်းတေမႃးၼင်ႇၵဝ်ႇယဝ်ႉ ”
“ ပေႃးၼႆ မိုၼ်ႇႁွမ်တေၽုၵ်ႇၸွႆႈမႄႈၶူးၶႃႈၼႃႈ?”
“ ၵမ်ႉမိုဝ်းမိုၼ်ႇႁွမ် ၼုၵ်းလိၼ်မူတ်းႁေယဝ်ႉဢိူဝ်ႈ ”
“ ၸၢင်ႈပဵၼ်သင်ၶႃႈ...သုၵ်ႈဢဝ်ၶႃႈဢေႃႈ ”
မိုၼ်ႇႁွမ် ၵႂႃႇၽုၵ်ႇမွၵ်ႇၸွမ်းမႄႈၶူး မူၼ်ႈမူၼ်ႈသိူဝ်းသိူဝ်းယူႇ။
ဝၢႆးသေၽုၵ်ႇယဝ်ႉ မိုၼ်ႇႁွမ် ၸွမ်းမႄႈၶူး မႃးၼင်ႈ ၼႂ်းလုၵ်းၶႅၵ်ႇတီႈၼႃႈႁိူၼ်းၶဝ်ယူႇ၊ ဢူႈဝူင်းလိူၼ်ၶဝ် လုင်းသွႆႈငိုၼ်း တိုၵ်ႉလုတ်ႇလႅၼ်းယႃႈ ၼႂ်းလုၵ်းၶႅၵ်ႇသေ လႆႈႁၼ်မိုၼ်ႇႁွမ် ၶဝ်ႈမႃး လႄႈ
“ မိုၼ်ႇႁွမ် ၽႅဝ်မႃးသေ မႃးၽုၵ်ႇမွၵ်ႇၸွႆႈမႄႈၶူးၼႆႁႃႉ?”
“ ၸႂ်ႈဢေႃႈ ...”
“ ၼင်ႈလႄႈ...ဢူႈလုင်းတိုၵ်ႉ ၸႂ်ႉဝူင်းလိူၼ်ၵႂႃႇဢဝ်မႂ်တိုုတ်း ႁိူဝ်းမိၼ်တႃႇၵႂႃႇတႃႈၵုင်ႈ ဢိူဝ်ႈ၊ သွၼ်ၵၢၼ်ပၼ်မၼ်း ၵေႃႈဝႃႈဢိူဝ်ႈ၊ ဝၢႆးၼႆႉ မၼ်းလူဝ်ႇလႆႈ ပုတ်ႈတီႈယူႇႁဝ်း ၵူၼ်းလူင်ၼၼ်ႉ ၼႃႇ ၵႂၢမ်းတႆးႁဝ်းဝႃႈ ‘လုၵ်ႈၸၢႆး’ ‘လၢႆႈၸုၵ်း ’ၼႆလူဝ်ႇလႆႈ လၢႆႈသေၸုၵ်းလႆႈ တီႈယူႇပေႃႈဢိူဝ်ႈ ဢမ်ႇၸႂ်ႈႁႃႉ?”
“ ၸႂ်ႈၶႃႈဢေႃႈ...”
“ မိုၼ်ႇႁွမ် ယဝ်ႉႁဵၼ်းသေ တေဢၢၼ်းႁဵတ်းသင်လႃႇ?”
“ ပၢႆၸၢင်ႈႁဵတ်းသင်ၵွၼ်ႇၶႃႈလုင်း... ပေႃႈဝႃႈတႄႉ တေသိုဝ်ႉပၼ်ၸၢၵ်ႈထူဝ်းသိူဝ်ႈၼႆလႄႈ တီႈလဵဝ် တိုၵ်ႉၵႂႃႇသွၼ်ထူဝ်းသိူဝ်ႈဢေႃႈ ”
“ ဢိူဝ်ႈ...မေႃသင်ၵေႃႈ ဢမ်ႇၽိတ်းၵူၺ်း ”
ဝူင်းလိူၼ် ႁေႃႈရူတ်ႉၽႅဝ်မႃးသေ လႆႈမႃးႁၼ်မိုၼ်ႇႁွမ်လႄႈ
“ ဢေႃႈ...မိုၼ်ႇႁွမ်ၽႅဝ်မႃးႁိုင်ယဝ်ႉႁႃႉ?”
“ ႁိုင်တၢၼ်ႇတၢၼ်ႇယဝ်ႉ ”
“ ပေႃႈ...မႂ်တိုတ်းလႆႈယူႇ တၢင်းသွင်ဢၼ်ၶႃႈ ...ၵၢင်ၼႂ်သိပ်းမွင်းၶိုင်ႈ ႁႂ်ႈၽႅဝ်ၶူင်ႇႁိူဝ်း မိၼ်ႁၢႆးဝူဝ်း ၼႆၶႃႈဝႃႇ ”
“ မိုၼ်ႇႁွမ် မိူဝ်ႈၽုၵ်ႈ ၵဝ်တေၸွမ်းပေႃႈႁဝ်း ၵႂႃႇတႃႈၵုင်ႈဢိူဝ်ႈ၊ တေၶႂ်ႈသင်ႇသင်?”
“ ဢမ်ႇၸၢင်ႈသင်ႇသင်ယဝ်ႉ...ၵူၺ်းၵႃႈ ပေႃးပွၵ်ႈမႃးတႄႉ တေလႆႈပႃးမႃးၶူဝ်းတွၼ်ႈ ဢၼ်ၶႅမ်ႉၶႅမ်ႉ တႃႇမိုၼ်ႇႁွမ်ဢိူဝ်ႈၼႃႈ ”
“ တမ်းၸႂ်လႃႈ...ၵဝ်တေဢဝ်မႃးပၼ် ဢၼ်ၶႅမ်ႉၶႅမ်ႉလႆ ပွၵ်ႈၼႆႉတႄႉ ႁဝ်းတေၵႂႃႇၶၢႆသႅင် ၸွမ်း ပေႃႈႁဝ်း တီႈတႃႈၵုင်ႈဢိူဝ်ႈ ”
“ တေႁိုင်လၢႆဝၼ်း ”
“ သွင်ဝူင်ႈယူႇယူဝ်ႉၼေႃ?ပေႃႈ...”
“ ၶႂ်ႈမွၵ်ႈၼၼ်ႉယဝ်ႉ...ၵွပ်ႈသင်ၼႆ ၵူၼ်းၼွၵ်ႈမိူင်းၶဝ်ၵေႃႈ တေမႃးသိုဝ်ႉၼမ်ၼႆယဝ်ႉ ပီၼႆ...ဝူင်းလိူၼ် ၶူဝ်းဢၼ်လူဝ်ႇဢဝ်ၵႂႃႇၸိူဝ်းၼၼ်ႉ ၵၢင်ၶမ်ႈမႃး မႂ်းၶိုၼ်းထတ်းတူၺ်းလီလီၼႃႈ ”
“ ဢေႃႈၶႃႈ...တမ်းၸႂ်လႃႈ ”
ဝူင်းလိူၼ်ၶဝ် သိုပ်ႇဢုပ်ႇၵၼ်တၢၼ်ႇတၢၼ်ႇသေ မိုၼ်ႇႁွမ်ၵေႃႈ ပွၵ်ႈမိူဝ်းၵႂႃႇယဝ်ႉ၊
ထႅင်ႈဝၼ်းၼိုင်ႈ ဝူင်းလိူၼ်ၶႃပေႃႈလုၵ်ႈ ၶီႇႁိူဝ်းမိၼ်သေ လူင်းမႃးၽႅဝ်တႃႈၵုင်ႈ။ ၵွပ်ႈပိူဝ်ႈ ပေႃႈဝူင်းလိူၼ်ၶဝ် ႁဵတ်းၵူၼ်းၵႃႉသႅင်လႄႈ မၼ်းၸၢင်ႇသွၼ်ၵၢၼ်ပၼ် လုၵ်ႈၸၢႆးမၼ်းယဝ်ႉ။
ၶၢဝ်းယၢမ်းၶၢႆသႅင်ၼၼ်ႉတႄႉ ဝူင်းလိူၼ် ၵုမ်ႇမီးၼႂ်းႁွင်ႈပၢႆးၶၢႆသႅင် တီႈၵမ်ႇၽႃႇဢေးသေ ၸွႆႈလၢတ်ႈပၼ် ၼႃႈၵၢၼ်ပေႃႈၶဝ်ယူႇ။ တၢမ်းၶမ်ႈမႃး ၸင်ႇတေပွၵ်ႈမႃးၼွၼ်း ႁူင်းႁႅမ်းတီႈၶဝ်လိုဝ်ႈၼၼ်ႉ ႁဵတ်းၼၼ်ယူႇၵူႈဝၼ်း။
ဝၢႆးသေ ၼႃႈၵၢၼ်ၶၢႆသႅင်ယဝ်ႉ ၵွပ်ႈပိူဝ်ႈဢူႈၶဝ် ပႂ်ႉထူပ်းၶႅၵ်ႇလႄႈ တၢမ်းၶမ်ႈသီႇမွင်း ဝူင်းလိူၼ်ၸၢင်ႈရူတ်ႉ ၵႂႃႇတီႈၵွင်းမူးလူင်သူၺ်ႇတၵုင်ႇသေ ၵႂႃႇဝႆႈၽြႃးယူႇႁင်းမၼ်းၵေႃႉလဵဝ်။ သိုဝ်ႉမွၵ်ႇသေ ၵႂႃႇလူႇ တိူင်ႇၵၢဝ်ႇယွၼ်းသူး ပႅင်ႈၼင်ႇမေႃၸႂ်မၼ်းၼၼ်ႉယူႇ။
တီႈၼႃႈၽၢႆႇႁွင်ႇ ဢၼ်ဝူင်းလိူၼ်တိုၵ်ႉဝႆႈၽြႃးယူႇၼၼ်ႉ ၼၢင်းယိင်းၸုမ်းၼိုင်ႈ ၶဝ်မီးၵဝ်ႈၵေႃႉ။ ၶဝ်ၵေႃႈ ဢဝ်မွၵ်ႇသေ မႃးလူႇၽြႃး ဝႆႈသႃယွၼ်းသူးၽႂ်မၼ်းယူႇ။ ၶဝ်ဢဝ်မွၵ်ႇၶဝ် ၵႂႃႇၼဵပ်းသႂ်ႇၼႂ်းၵွၵ်းမွၵ်ႇသေ ၶိုၼ်းဝႆႈသႃယွၼ်းသူးၽႂ်မၼ်းယူႇ။
ၼႂ်းၼၢင်းယိင်းၵဝ်ႈၵေႃႉၼၼ်ႉ ၵေႃႉဢၼ်ၶူၼ်ႁူဝ်ယၢဝ်းယၢဝ်း တူဝ်ၶိင်းႁၢင်ႈလီ၊ သီၼိူဝ်ႉ ဢမ်ႇပေႃးၶၢဝ်ၼၼ်ႉ ဝႆႈၽြႃးယဝ်ႉသေ လွမ်တူၺ်းသၢႆႉတူၺ်းၶႂႃ လွမ်တူၺ်းၵူၼ်းမႃးဝႆႈၽြႃး ၸိူဝ်းၼၼ်ႉယူႇ။ မၼ်းၼၢင်းလွမ်တူၺ်းၵႂႃႇ ၽၢႆသၢႆႉမၼ်းလႆႈႁၼ် ၵူၼ်းၸၢႆႈမၢဝ်ႇ ႁၢင်ႈၽၢင်ၶိုၵ်ႉတွၼ်း ၼုင်ႈၶူဝ်းမႂ်ႇၵဵင်ႈဝႆႉလႄႈ သၢႆတႃမၼ်းၼၢင်း ၶိုၼ်းသိုပ်ႇတူၺ်း ၸၢႆးမၢဝ်ႇၵေႃႉၼၼ်ႉ ဢၼ်တိုၵ်ႉလပ်းတႃသေ ယိပ်းမွၵ်ႇဝႆႈသႃဝႆႉၼၼ်ႉယူႇ။ သၢႆၶေႃးမၼ်းၵေႃႈ သဵၼ်ႈယႂ်ႇ၊ သၢႆမိုဝ်းမၼ်းၵေႃႈ ပဵၼ်သၢႆၶမ်း မၼ်းၼၢင်း လႆႈႁၼ်တီႈလင်မိုဝ်းၸၢႆးမၢဝ်ႇၼၼ်ႉ မီးမၢႆလမ် ဢွၵ်ႇၶူၼ်လမ်ဝႆႉလႄႈ မၼ်းၼၢင်းတူၵ်းၸႂ်ၵႂႃႇ တႄႉတႄႉ။ ၸူမ်းၵႂႃႇတႄႉတႄႉသေ ၵႄႈၵၢင်ပိူၼ်ႈ တိုၵ်ႉယဵၼ်ၽႂ်ယဵၼ်မၼ်းသေ ဝႆႈၽြႃးယူႇၼၼ်ႉ မၼ်းၼၢင်းၸင်ႇႁွင်ႉႁႅင်းႁႅင်း
“ ဝူင်းလိူၼ်...”
ၸၢႆးမၢဝ်ႇဢၼ်ဝႆႈၽြႃးၼၼ်ႉ ငိၼ်းသဵင်ႁွင်ႉၸိုဝ်ႈမၼ်းလႄႈ မၼ်းၸင်ႇၼႅတ်ႈ မိုၼ်းတႃလွမ်တူၺ်း ၵေႃႉဢၼ်ႁွင်ႉၸိုဝ်ႈမၼ်းၼၼ်ႉယူႇ။
“ ဝူင်းလိူၼ်...ၸွင်ႇၸႂ်ႈႁိုဝ်?”
ဝူင်းလိူၼ်ၵေႃႈ လွမ်တူၺ်းၼၢင်းယိင်းၼၼ်ႉ တႃပေႃးဢမ်ႇၽႅပ်ႉသေ
“ ၸႂ်ႈဢိူဝ်ႈ...”
ဝူင်းလိူၼ် လႆႈႁၼ်ၼၢင်းယိင်းၼၼ်ႉ ဢဝ်မိုဝ်းမၼ်းၽၢႆႇၶႂႃ ၸၼ်ပိုတ်ႇၶႅၼ်သိူဝ်ႈ မၼ်းၽၢႆႇသၢႆႉသေ ဝူတ်ႈၼႄမၢႆၶီႈမႅင်းမူၼ်း ဢၼ်မီးတီႈႁူဝ်ၶႅၼ်မၼ်းၼၢင်းၼၼ်ႉယဝ်ႉ၊ ဝူင်းလိူၼ် ၸူမ်းသိူဝ်းသေ
“ ၶႅတ်ႉလႃးဢမ်ႇၸႂ်ႁႃႉၼႆႉ?”
“ ၸႂ်ႈဢေႃႈ ...”
ဝူင်းလိူၼ် ၼႅတ်ႈဢဝ်မွၵ်ႇမၼ်းၵႂႃႇၼဵပ်းၼွပ်းသႂ်ႇ ၼႂ်းၵွၵ်းသေ ၼႅတ်းမႃးၸူးၶႅတ်ႉလႃး ...သွင်ၶႃဢွၵ်ႇမႃး ၼႂ်းၵႄႈၵူၼ်းဝၢႆႈၽြႃးၼၼ်ႉသေ
“ ၶႅတ်ႉလႃႈ လုၵ်ႉလႂ်မႃး တေၵႂႃႇလႂ် ယူႇလီယူႇၼေႃ မႃးသဝ်းတီႈလႂ် တေမိူဝ်း မိူဝ်ႈလႂ်?”
ၶႅတ်ႉလႃး ၸူမ်းသေ တေလႆႈႁဵတ်းႁိုဝ်တွပ်ႇၵေႃႈဢမ်ႇႁူႉ
“ ဝူင်းလိူၼ်...ထၢမ်ၵမ်းၶေႃႈၶေႃႈလေႃႇ ထၢမ်ၼမ်ပေႃးပဵၼ်တၢၼ်ႇၼႆႉ တေလႆႈတွပ်ႇ ဢၼ်လႂ်ဢွၼ်တၢင်း ပေႃးဢမ်ႇႁူႉယဝ်ႉ၊ ဝူင်းလိူၼ်ၶဝ်ယူႇလႂ်? တီႈလဵဝ် ”
“ ႁဝ်းၶၢႆႉမႃႈတူၼ်ႈတီးယဝ်ႉ မိုၼ်ႇႁွမ်ၵေႃႈ မီးတူၼ်ႈတီးၼင်ႇၵဝ်ႇဢိူဝ်ႈ၊ ႁႃးသွင်ၵေႃႉ ၵႆႉၵႆႉ တူၵ်ႇႁႃၸိုုဝ်ႈမႂ်းတႃႇသေႇယဝ်ႉ ”
“ မႃးႁဵတ်းသင်လႃႇ တီႈတႃႈၵုင်ႈၼႆႉ?”
“ မႃးၶၢႆသႅင် ၸွမ်းပေႃႈႁဝ်းဢိူဝ်ႈ ၶႅတ်ႉလႃးလူး...တီႈလဵဝ်ယူႇတီႈလႂ်?”
“ တီႈလဵဝ် ယူႇဝႆႉၼိူဝ်ၵွင်းမူးၼႆႉၼႃႇ”
“ ဢမ်ႇၸႂ်ႈ...တိုၵ်ႉယူႇတၢင်ႉယၢၼ်းယူႇႁႃႉ ?”
“ ဢမ်ႇယူႇယဝ်ႉ ”
“ မႃးႁဵတ်းသင်လႃႇ တႃႈၵုင်ႈၼႆႉ?”
“ မႃးၸွမ်းတႆးၵေႃႉႁဝ်းဢိူဝ်ႈ ႁဝ်းဢၢင်ႈတေသိုပ်ႇၵႂႃႇ တၢင်းမေႃႇလမႅင်ႇၼႆဢိူဝ်ႈၼႆႉ ”
“ ၵႂႃႇဝႆႈၽြႃးႁႃႉ?”
“ ဝႃႈၼၼ်ယဝ်ႉ...ပီႈယူၺ်ႉၵေႃႉႁၢမ်ႉပီးပီးၼၼ်ႉ တေဢွၼ်ႁဝ်း ပႅတ်ႇၵေႃႉၵႂႃႇဢိူဝ်ႈ ”
ဝူင်းလိူၼ် ဝၢႆႇတူၺ်ႈၵေႃႉဢၼ်ၶႅတ်ႉလႃးၸိၼႄၼၼ်ႉ ဢၢပ်ႈဝူင်းလိူၼ် ယၢမ်ႈႁၼ် တီႈလႂ်ၼႆ မၼ်းဢမ်ႇတွင်းလီ။ ၸိူဝ်းၶဝ်ပႅတ်ႇၵေႃႉၼၼ်ႉ ဝႆႈၽြႃးသေ လုၵ်ႉမႃးယဝ်ႉလႄႈ ၶႅတ်ႉလႃး ၸင်ႇဝႃႈ
“ ဝူင်းလိူၼ်...ၵဝ်တေၵႂႃႇၵွၼ်ႇ ဝၢႆးၼႆႉၸွင်ႇၵွႆႈထူပ်းၵၼ်ထႅင်ႈ ”
“ ၶႅတ်ႉလႃး တေသိုပ်ႇမီးတႃႈၵုင်ႈၼႆႉယူႇ ဢမ်ႇၸႂ်ႈႁႃႉ ႁိူဝ်ႈ...ၼႆႉ ပဵၼ်တီႈလိုဝ်ႈသဝ်း ၵဝ်ဢိူဝ်ႈ သိုပ်ႇၽူၼ်းၸူးၵဝ်လႄႈၼႃႈ”
“ လီယဝ်ႈ...ဝူင်းလိူၼ် ”
“ ၶႅတ်ႉလႃး...ၵဝ်ၶႂ်ႈထူပ်းမႂ်းသေ ၶႂ်ႈဢုပ်ႇမႂ်းၵတ်းၵတ်းယဵၼ်ယဵၼ် ၵူၺ်းယဝ်ႉ ၸွင်ႇမႂ်းတေ ပၼ်ၶၢဝ်းယၢမ်းလႆႈ?”
“ ၵဝ်တေသိုပ်ႇၽူၼ်းလႆ ၶဝ်ပႂ်ႉၵဝ်ဝႆႉယူႇၼၼ်ႈၼေႈ ”
ၽွင်းၶႅတ်ႉလႃးလႄႈ ဝူင်းလိူၼ်ဢုပ်ႇၵၼ်ၼၼ်ႉ ပီႈယူၺ်ႉလႆႈႁၼ်ဝူင်းလိူၼ်သေ ၼႃႈမၼ်းလူႉၵႂႃႇၵမ်းလဵဝ်။ ၵူၺ်းၵႃႈ မၼ်းဢမ်ႇပၼ်ၽႂ်ႁူႉသေ ဢွၼ်ၶႅတ်ႉလႃးၶဝ် လူင်းမိူဝ်းၵႂႃႇယဝ်ႉ။
ပေႃးၽႅဝ် တီႈၶဝ်လိုဝ်ႈၼႆၵေႃႈ မၼ်းၸႂ်ႉၶဝ်ႁႅၼ်းၶူဝ်းသေ ဢွၼ်ၶဝ်မႃးၶီႇရူတ်ႉရဵၼ်း တႃႇတေၵႂႃႇ မေႃႇလမႅင်ႇ ၶမ်ႈၼၼ်ႉၵမ်းလဵဝ်ယဝ်ႉ။ ၶႅတ်ႉလႃး ၶဝ်ၵေႃႈ ဢမ်ႇႁူႉသင်သေ ပွင်ႉပီႈယူၺ်ႉယူႇ။
“ ပီႈယူၺ်ႉၼႆႉ တေဢွၵ်ႇတၢင်းၶမ်ႈၼႆ သမ်ႉပေႃးဢမ်ႇလၢတ်ႈဝႆႉထႃႈသေဢိတ်း ”
“ ၶႅတ်ႉလႃး ...မႂ်းယႃႇပေမေႃး ၵႂႃႇတႃႈၵႂႃႇတၢင်းဢၼ်ဝႃႈၼၼ်ႉ ထုၵ်ႇလၢတ်ႈၵေႃႈ မီး ဢမ်ႇထုၵ်ႇလၢတ်ႈၵေႃႈမီးဢိူဝ်ႈ ”
ၶႅတ်ႉလႃး ၶဝ်ၶီႇရူတ်ႉရဵၼ်း ၽႅဝ်မႃးပႃႇၵိူဝ်သေ ရူတ်ႉရဵၼ်းတိုၵ်ႉပႂ်ႉဝႆႉ ရုတ်ႉရဵၼ်း ၽၢႆႇပူၼ်ႉပႆႇမႃးၼႆယူႇ။ ၵူၼ်းၼိူဝ် ရူတ်ႉရဵၼ်းၵမ်ႈၽွင်ႈၵေႃႈၼွၼ်း ၵမ်ႈၽွင်ႈၵေႃႈၵိၼ်ၶဝ်ႈ ၵမ်ႈၽွင်ႈ ၵေႃႈဢုပ်ႇၵၼ်၊ လႆႈႁၼ်ပီႈယူၺ်ႉတိုၵ်ႉၼွၼ်းဝႆႉလႄႈ ၶႅတ်ႉလႃးၸင်ႇလၢတ်ႈ တႆးၵေႃႉမၼ်း
“ ၵဝ်တေၵႂႃႇသိုဝ်ႉတၢင်းၵိၼ် တီႈတႂ်ႈၼၼ်ႉၵွၼ်ႇၼႃႈ ”
ၶႅတ်ႉလႃး လူင်းရူတ်ႉရဵၼ်းသေ ၵႂႃႇသိုဝ်ႉတၢင်းၵိၼ်ယွႆႈ ဢၼ်မၼ်းၶႂ်ႈၵိၼ်ၼၼ်ႉယူႇ။ တီႈသႅင်ႇၽၢႆႇတၢင်းၼၼ်ႉ လႆႈႁၼ်ၵူၼ်းၵေႃႉၼိုင်ႈ သိုပ်ႇၽူၼ်းယဝ်ႉယဝ်ႈလႄႈ ၶႅတ်ႉလႃးၵေႃႈ ၸင်ႇၵႂႃႇ တဵၵ်းမၢႆၽူၼ်းသေ သိုပ်ႇယူႇ။
“ ႁလူဝ်...လၢတ်ႈၶႃႈလႄႈ ”
“ ဢေႃႈ...ၶွပ်ႈၸႂ်သေ ႁွင်ႉပၼ်ပီႈဝူင်းလိူၼ် ႁွင်ႈၼွၼ်း (14)ၽွင်ႈၶႃႈ ”
“ ဢေႃႈ...ယိပ်းဝႆႉၵမ်းၼိုင်ႈလႄႈ ”
ၵူၼ်းပႂ်ႉႁူင်းႁႅမ်းၵႂႃႇ ႁွင်ႉဝူင်းလိူၼ်မႃးသေ
“ မႂ်ႇသုင်...လၢတ်ႈၶႃႈလႄႈ ပဵၼ်ဝူင်းလိူၼ်ဢေႃႈ ”
“ ဝူင်းလိူၼ်...ၵဝ်ပဵၼ်ၶႅတ်ႉလႃးဢိူဝ်ႈ ”
“ ၶႅတ်ႉလႃးႁႃႉ ...လုၵ်ႉလႂ်သိုပ်ႇမႃး?”
“ လုၵ်ႉပႃႇၵိူဝ် သိုပ်ႇမႃးဢိူဝ်ႈ ”
“ ႁဵတ်းသင် ပေႃးတၼ်းၽႅဝ်ပႃႇၵိူဝ်ယဝ်ႉလႃႇ?”
“ဢႃ...ပီႈယူၺ်ႉဢိူဝ်ႈ ဝၢႆးသေႁဝ်းပွၵ်ႈဝႆႈၽြႃး မႃးၽႅဝ်တီႈႁဝ်းသဝ်းၼႆ ၸႂ်ႉႁဝ်း သိမ်းၶူဝ်းၵမ်းလဵဝ်သေ ဢွၼ်ႁဝ်းၶီႇရူတ်ႉရဵၼ်းမေႃႇလမႅင်ႇ ၶမ်ႈၼႆႉဢိူဝ်ႈ ၶႂ်ႈႁူႉၵေႃႈ ”
“ ပေႉဢဝ်ၼႅတ်ႈလႃႇ ၶႅတ်ႉလႃး မႂ်းႁဵတ်းၵၢၼ်သင်ယူႇတီႈလဵဝ် ”
“ ၵဝ်ၵႃႉသႅင် ဢိူဝ်ႈ...လိူၼ်ပူၼ်ႉပိူၼ်ႈလႅၼ်လႄႈ ၵဝ်သုမ်းၼမ်ဝႆႉဢိူဝ်ႈ၊ ၵူၺ်းၵႃႈ ပီႈယူၺ်ႉတူၺ်းထိုင်ၵဝ်သေ ၸွႆႈထႅမ်ၵဝ်ဝႆႉဢိူဝ်ႈ။ တႃႇတေလႆႈၵၢၼ်ၵေႃႈ မၼ်းတေၶိုင်ပွင်ပၼ်ၼႆဝႃႇ ”
“ ၵၢၼ်သင် ”
“ ၵၢၼ်သင်ၵေႃႈ မၼ်ႈပႆႇဝႃႈ မၼ်းဝႃႈတေၵႂႃႇႁႃၵၢၼ်ပၼ်ႁဝ်း တီႈမိူင်း... ...”
တုတ်း...တုတ်း...တုတ်း...
ၶႅတ်ႉလႃး တိုၵ်ႉဢၢင်ႈဝႃႈ တီႈမိူင်းထႆးၼႆသေတႃႉ တိုၵ်ႉဝႃႈၽႅဝ်‘ မိူင်း’ၼႆၵူၺ်းသေ ၽူင်းၶၢတ်ႇၵႂႃႇပႅတ်ႈယဝ်ႉ။ ဝူင်းလိူၼ်ၵေႃႈ တၼ်းငိၼ်းၽႅဝ် မိူင်း...ၼႆၵူၺ်း
“ ႁလူဝ်...ဢႃ...ၽူၼ်းၶၢတ်ႇၵႂႃႇယဝ်ႉၼႆ ”
ဝူင်းလိူၼ် ယၢႆးႁူဝ်သေ ၶိုၼ်းဢဝ်ၽူၼ်းတမ်းဝႆႉယဝ်ႉ၊ ၼႂ်းၸႂ်မၼ်းဝူၼ်ႉဝႆႉတႄႉ ၶႅတ်ႉလႃး တေၶိုၼ်းသိုပ်ႇမႃးထႅင်ႈယူႇၼႆသေ ၸုၵ်းပႂ်ႉဝႆႉႁိမ်းၽူင်းၼၼ်ႉယူႇ။
“ တွတ်း...တွတ်း...တွတ်း...”
ဝူင်းလိူၼ်ၶိုၼ်းၵႂႃႇယုၵ်ႉၽူၼ်းသေ
“ ႁလူဝ်...ၶႅတ်ႉလႃးႁႃႉ”
“ ဢမ်ႇၸႂ်ႈၶႃႈ...ၶႂ်ႈထူပ်းမၢၼ်ႇၼေႇၵျႃႇဢေႃႈ ”
“ ဢေႃႈ...မၢၼ်ႇၼေႇၵျႃႇ ၽူၼ်းဢေႃႈ...”
ဝူင်းလိူၼ်ၵေႃႈ သိုပ်ႇပႂ်ႉဝႆႉတီႈႁိမ်းၼၼ်ႉယူႇ။ ယူဝ်ဝႃႈ မၢၼ်ႇၼေၵျႃႇၶဝ် တေလၢတ်ႈ ၵမ်းဢွၼ်ႇၼိုင်ႈၵူၺ်းၼႆၼႃး သမ်ႉလွမ်ယၢဝ်းဝႃႈယၢဝ်း၊ ဝူင်းလိူၼ်ၵေႃႉၼိုင်ႈတႄႉ တေၼင်ႈၵေႃႈ ဢမ်ႇၸၢင်ႈ၊ တေယၢင်ႈၵေႃႈဢမ်ႇပဵၼ်။
ၶႅတ်ႉလႃးၵေႃႈ ယူႇတီႈတႃႈရူတ်ႉရဵၼ်းပႃႇၵိူဝ်သေ ၶိုၼ်းတဵၵ်းၽူၼ်း ၸူးဝူင်းလိူၼ်ယူႇ။ ၵူၺ်းၵႃႈ ဢမ်ႇလႆႈ မၼ်းၼၢင်းၶတ်းၸႂ် တဵၵ်ႈထႅင်ႈလၢႆၵမ်းၵေႃႈ တေႃႈဢမ်ႇလႆႈ ၽွင်းၼၼ်ႉငိၼ်း သဵင်ႁွၼ်းရူတ်ႉရဵၼ်းသေ မၼ်းၼၢင်းၵေႃႈ ဢမ်ႇႁၢၼ်ႉၸႂ် ၸင်ႇၼႅတ်ႈဝၢင်းၽူၼ်း ပွၵ်ႈမႃးၶိုၼ်း ၼိူဝ်ရူတ်ႉရဵၼ်းၶဝ်ယဝ်ႉ။ ပီႈယူၺ်ႉၵေႃႈ သီတႃမၼ်းသေ လွမ်တူၺ်းႁိမ်းႁွမ်းလႆႈႁၼ် ၶႅတ်ႉလႃး သိုဝ်ႉတၢင်းၵိၼ်မႃးၸူးမၼ်းသေ
“ ပီႈယူၺ်ႉ...ၵိၼ်သူမ်ႈဢေႃႈ”
“ ၵိၼ်လႃႈ...ၵဝ်ဢမ်ႇၶႂ်ႈၵိၼ် မႂ်းၵႂႃႇလႂ်မႃးၼႆႉ?”
“ ၶႃႈၶႂ်ႈၵိၼ် တၢင်းၵိၼ်ယွႆႈလႄႈ လူင်းၵႂႃႇသိုဝ်ႉဢေႃႈ ”
“ ဢိုဝ်ႉ...ၶႅတ်ႉလႃး မႂ်းၼႆႉ ၵုမ်ႇသိုဝ်ႉၵိၼ် မဵဝ်းၼိုင်ႈယဝ်ႉမဵဝ်းၼိုင်ႈယူႇတႃႇသေႇၼေႃ ?”
“ ၵိၼ်သေတၢႆ ၶႅၼ်းသေ ယူႇလၢႆလၢႆလႄႈၶွႆႈ ၼႆၼႃႇ ပီႈယူၺ်ႉၵေႃႈ”
“ဢိူဝ်ႈ...ဢိူဝ်ႈ... ၵိၼ်တေႃႇပေႃးတၢႆလႃႈ ”
ရူတ်ႉရဵၼ်းၶဝ် သိုပ်ႇဢွၵ်ႇၶၢဝ်းတၢင်းမႃး တင်းၶိုၼ်း၊ ၶႅတ်ႉလႃးၵေႃႉၼိုင်ႈတႄႉ လပ်ႈတိုၼ်ႇလပ်းတိုၼ်ႇသေ ယွၼ်ႉပိူဝ်ႈ ပဵၼ်ၵၢင်ၶမ်ႈၵၢင်ၶိုၼ်းလႄႈ ႁွတ်ႈၽႅဝ်ႁဵင်းလႂ် ႁွတ်ႈၽႅဝ် ဝဵင်းလႂ်ၼႆၵေႃႈ မၼ်းၼၢင်းဢမ်ႇႁူႉ။
လႆႈဢွၵ်ႇတၢင်းမႃးပွၵ်ႈၼႆႉ ၼႂ်းၸႂ်မၼ်းၼၢင်း ႁၢင်ႈဢမ်ႇပေႃးၸိုၼ်ႈသႂ်။ မၢင်ၵမ်း မၢင်ၵမ်း သမ်ႉၵႂႃႇၶုၵ်းၸႂ်လႆႈ ဝူင်ႈလိူၼ်။ မိူဝ်ႈလႂ် သမ်ႉတေၶိုၼ်ႈထူပ်းၺႃးၵၼ်ထႅင်ႈ။ မၼ်းသိုပ်ႇၽူၼ်းၵေႃႈ ၸွမ်းၼင်ႇၵၢင်ၸႂ်မၼ်းမီးၼၼ်ႉ ဢမ်ႇတၼ်းလႆႈလၢတ်ႈမူတ်းလႄႈ မၼ်းၼၢင်းဢမ်ႇႁၢၼ်ႉၸႂ်။
လႆႈၶိုၼ်းႁၼ်ဝူင်းလိူၼ် ၽွင်းမိူဝ်ႈယႂ်ႇၸိူင်ႉၼႆ ၼႂ်းၸႂ်မၼ်းၼၢင်း ပဵၼ်ဝႆႉၸိူင်ႉႁိူဝ်ၼႆ မၼ်းၼၢင်း ဢမ်ႇမေႃလၢတ်ႈ။ ဢၢပ်ႈၶေႃးၶူမ်ဝႆႉၵေႃႈလူဝ်လူဝ် ဢၢပ်ႈၸႂ်လဵၵ်ႉဝႆႉၵေႃႈလူဝ်လူဝ်
ၵွပ်ႈရူတ်ႉရဵၼ်း ၸိူင်ႉႁိုင်ၸွမ်းတၢင်းလႄႈ
ထႅင်ႈဝၼ်းၼိုင်ႈမႃး ၶႅတ်ႉလႃးၶဝ် ၽႅဝ်မႃး ဝဵင်းမေႃႇလမႅင်ႇသေ ပီႈယူၺ်ႉဢွၼ်ၶဝ် ၵႂႃႇၼွၼ်းႁိူၼ်းၵူၼ်းႁူႉၸၵ်းမၼ်း ပီႈယူၺ်ႉဢွၼ်ၶဝ်ဢႅဝ်ႇလႄႇ ၼႂ်းမေႃႇလမႅင်ႇတၢၼ်ႇတၢၼ်ႇမၼ်းသေ ၵၢင်ၶမ်ႈ ၽွင်းၶဝ်ၼွၼ်းၼၼ်ႉ ၵူၼ်းလူင်ၼႂ်းပွၵ်ႉလႄႈ ႁၢၼ်ၶဝ်မႃးၸႅတ်ႈၶႅၵ်ႇ (ၵူတ်ႇၶႅၵ်ႇ )ၼႆလႄႈ ၶဝ်လႆႈလုၵ်ႉမႃးၵူႈၵေႃႉယဝ်ႉ။ ၸဝ်ႈႁိူၼ်းၸင်ႇဝႃႈ
“ ႁဝ်းၶႃႈ တၢင်ႇသဵၼ်ႈမၢႆၶႅၵ်ႇယူႇၶႃႈ ၵူၼ်းလူင်ႁဝ်းၶဝ်”
“ ၶႅၵ်ႇလၢႆၵေႃႉ ?”
“ ၵဝ်ႈၵေႃႉၶႃႈဢေႃႈ ”
“ ႁွင်ႉၶဝ်ဢွၵ်ႇမႃးလူး ”
ၶႅတ်ႉလႃးၶဝ်ၵေႃႈ ဢွၼ်ၵၼ်ဢွၵ်ႇမႃး ၸုၵ်းဝႆႉၵူႈၵေႃႉယူႇ ၼႃႈတႃပီႈယူၺ်ႉတႄႉ ဢမ်ႇလီသင်သေဢိတ်းယဝ်ႉ။ ႁူဝ်ႁၢၼ်ၵေႃႉၼိုင်ႈ ၸင်ႇဢဝ်တူၺ်း သဵၼ်ႈမၢႆၶႅၵ်ႇသေ
“ ၼၢင်းယူၺ်ႉ ပဵၼ်ၵေႃႉလႂ်?”
“ ပဵၼ်ၶႃႈဢေႃႈ...”
ႁူဝ်ႁၢၼ်ၼၼ်ႉ ၽူႈၸွပ်ႇၵေႃႉၼိုင်ႈ ငွၵ်ႈႁူဝ်ၼႄမၼ်းယူႇယဝ်ႉ။
“ မီးလႂ်မၢႆၽၢင်မႂ်း?”
ပီႈယူၺ်ႉၵေႃႈဝႃႈ
“ မီးၼႂ်းထူင်ၶူဝ်းၶႃႈဢေႃႈ ”
“ ၵႂႃႇဢဝ်မႃးလႄႈ ”
ပီႈယူၺ်ႉၶဝ်ႈၵႂႃႇ ၼႂ်းလုၵ်းတင်းႁိုင်သေ ဢမ်ႇဢွၵ်ႇမႃး ႁူဝ်ႁၢၼ်လွမ်တူၺ်း ယၢမ်းမွင်းတီႈမိုဝ်းမၼ်း ႁိုင်ႁႃႈမဵတ်ႉယဝ်ႉလႄႈ
“ ၼၢင်းယူၺ်ႉ ႁႃပႆႇႁၼ်ႁႃႉ?”
ဢမ်ႇငိၼ်း သဵင်တွပ်ႇသင်ယဝ်ႉလႄႈ မၼ်းၸင်ႇၶဝ်ႈမိူဝ်းတူၺ်းၼႂ်းလုၵ်း လႆႈႁၼ် ၽၵ်းတူႁူးလႅင်းၽုၺ်ႇဝႆႉ ၊ မၼ်းႁူႉဝႃႈ ၼၢင်းယူၺ်ႉ လၵ်ႉပၢႆႈယဝ်ႉၼႆယူႇ၊ မၼ်းဢွၵ်ႇမႃး တီႈၼွၵ်ႈ ၽႂ်းၽႂ်းသေ
“ ၼၢင်းယူၺ်ႉ ပၢႆႈယဝ်ႉ သူသူင်ႇၶၢဝ်ႇထိုင် တီႈၼႂ်းဝဵင်းၵူႈတီႈတီႈသေ ၸွမ်းႁႃ မၼ်းႁႂ်ႈလႆႈၽႂ်းၽႂ်း”
ၶႅတ်ႉလႃးၶဝ်ပႅတ်ႇၵေႃႉ လႆႈငိၼ်းၼင်ႇၼၼ် ဢွၼ်ၵၼ်တူၵ်းၸႂ် သမ်ႉပေႃးတၢၼ်ႇ ပိူၼ်ႈဢဝ်ၾႃႉသပ်းလင်ယဝ်ႉ။
“ သူပႅတ်ႇၵေႃႉၵေႃႈ မႃးၸွမ်းႁဝ်းတီႈႁူင်းႁၢၼ်တႃႉ ”
ၶဝ်ၸိူဝ်းၼၼ်ႉ ဢွၼ်ၵၼ်ႁွင်ႉႁွင်ႉႁႆႈႁႆႈသေ တွင်းပၢၼ်ႇယူႇ။
“ ႁဝ်းၶႃႈဢမ်ႇႁူႉသင်ၶႃႈ...မၼ်ႈဝႃႈ တေဢွၼ်ႁဝ်းၵႂႃႇလႄႇ မိူင်းထႆးၼႆသေ တေၵႂႃႇႁႃၵၢၼ်ပၼ်ႁဝ်းၼႆလႄႈ ႁဝ်းမႃးၸွမ်းမၼ်းၵူၺ်းဢေႃႈ ”
“ ယႃႇပေၺွပ်းႁဝ်းၶႃႈ ”
“ ယႃႇပေတီႉႁဝ်းၶႃႈ ”
“ ဢိူဝ်ႈ...တေလႆႈဝႃႈ သူပႅတ်ႇၵေႃႉ ၵၢမ်ႇလီဢိူဝ်ႈၼႆႉ။ မၼ်းဢၢၼ်းဢဝ်သူၵႂႃႇၶၢႆ ပၼ်ပိူၼ်ႈ မိူင်းထႆးသေ သူတေလႆႈၵႂႃႇႁဵတ်း မႄႈမွၵ်ႇယႃႈဢိူဝ်ႈၼၼ်ႉ ၶႂ်ႈႁူႉၵေႃႈ ”
ၶဝ်ဢွၼ်ၵၼ် တူၵ်းၸႂ်သေ မၢင်ၵေႃႉ ပေႃးဢဝ်မိုဝ်းၵမ်းဢူၵ်းၶဝ် မၢင်ၵေႃႉသမ်ႉပေႃး ဢဝ်မိုဝ်းတူမ်းသူပ်းၵူင်ၶဝ်ယူႇ။
“ ပဵၼ်ႁိုဝ်ပဵၼ် သူပႅတ်ႇၵေႃႉ ၸွမ်းႁဝ်းမိူဝ်း တီႈႁူင်းႁၢၼ်ၵွၼ်ႇလႄႈ... ယႃႇပေ ၵူဝ်သင်၊ ႁဝ်းႁူႉယူႇ သူဢမ်ႇႁူႉသင်ၼႆၼၼ်ႉ၊ ၵူၺ်းၵႃႈ ႁဝ်းလူဝ်ႇလၵ်းထၢၼ် (သၢၵ်ႈသေႇ)မၼ်း တႃႇတေၺွပ်း ၼၢင်းယူၺ်ႉၼႆႉဢိူဝ်ႈ... မၼ်းလႄႇႁဵၼ်းၼႆ ဢဝ်ၼၢင်းယိင်းဢွၼ်ႇမိူင်းႁဝ်း ၸိူင်ႉၼင်ႇသူၼႆႉ ၵႂႃႇၶၢႆလၢႆပွၵ်ႈၼႃႇယဝ်ႉ ႁဝ်းၵေႃႈ လႆႈၶၢဝ်ႇသေ ၸင်ႇတေႁႃလၢႆးၺွပ်းမၼ်းဢိူဝ်ႈ ”
ၶဝ်ၸဵတ်းၵေႃႉၼၼ်ႉတႄႉ ဢွၼ်ၵၼ်ႁႆႈသေ ၸွမ်းၵႂႃႇၽႅဝ် တီႈႁူင်းႁၢၼ်ၶဝ်ယူႇသေတႃႉ ၶႅတ်ႉလႃးတႄႉ ဢမ်ႇႁွင်ႉဢမ်ႇႁႆႈသင်။ ၵႂၢမ်းၵေႃႈ မၼ်ႈဢမ်ႇလၢတ်ႈသင်။ ၶဝ်ပႅတ်ႇၵေႃႉၼၼ်ႉ လႆႈၵႂႃႇယူႇ ၼႂ်းၶွၵ်ႈလဵၵ်းၼၢင်းယိင်းၶေႃၶေႃ ၸွမ်းပိူၼ်ႈသေ ဢွၼ်ၵၼ်ႁႆႈယူႇ ဢိုတ်ႉသိုတ်ႉဢၢတ်ႉသၢတ်ႉ။
ၶမ်ႈၼၼ်ႉ ၵၢင်ၶိုၼ်းသိပ်းမူင်းၶိုင်ႈ ႁၢၼ်ၶဝ်ၺွပ်းမႃး ၼၢင်းယူၺ်ႉသေ ဢဝ်မႃးသႂ်ႇ ၼႂ်းၶွၵ်ႈဝႆႉၸွမ်ႈၶဝ်။ ပေႃးဝႃႈ ႁၼ်ၼၢင်းယူၺ်ႉ ၶဝ်ႈမႃးယဝ်ႉၼႆ ၽွင်းႁၢၼ်ၶဝ် ၶိုၼ်းဢိုတ်းၶွၵ်ႈလဵၵ်းယဝ်ႉသေ ဢွၵ်ႇၵႂႃႇၼၼ်ႉ ၶႅတ်ႉလႃး လႅၼ်ႈပိုင်ႈၵႂႃႇၸူး ၼၢင်းယူၺ်ႉသေ ဢီးပၼ်ဢူၵ်းၼၢင်းယူၺ်ႉ ႁႅင်းႁႅင်း ဢဝ်ၵွၵ်းႁူဝ်ၼၢင်းယူၺ်ႉ ၽတ်ႉသႂ်ႇသဝ်လဵၵ်း ၼႂ်းၶွၵ်ႈၼၼ်ႉယူႇ။
တူင်ႉ...
“ ဢႃး... ”
“ ဢေးယူၺ်ႉယွၵ်း တၢႆမႂ်းလႃႈၶမ်ႈၼႆႉတႄႉ ”
ၵူၼ်းၼႂ်းၶွၵ်ႈၸိူဝ်းၼၼ်ႉ ဢွၼ်ၵၼ်ဢၢမ်းၶႅတ်ႉလႃး ဢၼ်ဢမ်ႇတၵ်းသဵင်သင်မႃးၼၼ်ႉယူႇ ၵမ်းၼႆႉတႄႉ မၼ်းၼၢင်းသမ်ႉ ပေႃးတၢၼ်ႇသိူဝ်မႃႈၽႆးယဝ်ႉ၊ ၶႅတ်ႉလႃးၸႂ်လမ်ၼႃႇယဝ်ႉလႄႈ ၵႂႃႇၸၼ်ၶူၼ်ႁူဝ် ဢေးယူၺ်ႉသေ ၽတ်ႉၵႅမ်ႈဢေးယူၺ်ႉယူႇ။
“ မႂ်းၼႆႉ ပဵၼ်ၵူၼ်းပႅတ်ႈလၢႆသေပိူၼ်ႈယဝ်ႉ... ဢၢၼ်းဢဝ်ႁဝ်းၵႂႃႇၶၢႆၵိၼ်ၼႆႁိုဝ်ႉ ၵဝ်ၼႆႉယၢမ်ႈဢဝ်တၢႆၵူၼ်းမႃးၵွၼ်ႇဢိူဝ်ႈ မႂ်းၶႂ်ႈႁူႉၵေႃႈ၊ ယၢမ်ႈတူၵ်းၶွၵ်ႈမႃးၵွၼ်ႇဢိူဝ်ႈ...ၶမ်ႈၼႆႉတႄႉ တၢႆမႂ်းလႃႈ ” ၽွင်းၶႅတ်ႉလႃး ဢၢင်ႈၼဵၵ်ႈႁူဝ်ဢေးယူၺ်ႉ လေႃႇသႂ်ႇ တီႈတႂ်ႈၼၼ်ႉ ...ၼၢင်းယိင်း ႁႅင်းယႂ်ႇ သုင်သုင်မင်ႈမင်ႈလူင်ၵေႃႉၼိုင်ႈ မႃးယိပ်းၶေႃႈမိုဝ်း ၶႅတ်ႉလႃးဝႆႉၵႅၼ်ႇၵႅၼ်ႇသေ
“ ဢေးၼွင်ႉ...ယႃႇပေႁဵတ်းယဝ်ႈ... မၼ်းဢၢၼ်းၵႂႃႇၶၢႆသူမိူင်းထႆးၼႆႁႃႉ?” ၶႅတ်ႉလႃးၵေႃႈ ပွႆႇၼၢင်းယူၺ်ႉသေ
“ ၸႂ်ႈဢေႃႈ ”
ၼၢင်းယိင်းလူင်ၵေႃႉၼၼ်ႉ ၸင်ႇထၢမ်
“ မႂ်းဢၢၼ်းဢဝ်ၶဝ်ၸိူဝ်းၼႆႉ ၵႂႃႇၶၢႆႁႃႉ?”
“ ဢမ်ႇၸႂ်ႈၶႃႈ ”
ၼၢင်းယိင်းလူင်ၼၼ်ႉ ၽတ်ႉပၼ်ၵႅမ်ႈၼၢင်းယူၺ်ႉ သွင်ၽၢႆႇသွင်ၵမ်းႁႅင်းႁႅင်းယူႇ။
“ လၢတ်ႈႈသိုဝ်ႈသိုဝ်ႈလူး...ၸွင်ႇၸႂ်ႈ?”
“ ၸႂ်ႈ...ၸႂ်ႈဢေႃး...”
“ မဵဝ်းယွၵ်း...ပေႃးပိူၼ်ႈဢဝ်လုၵ်ႈယိင်းမႂ်း၊ ၼွင်ႉယိင်းမႂ်းၵႂႃႇၶၢႆၸိူင်ႉၼႆ ၸွင်ႇတေလီႁိူဝ်?”
ၼၢင်းယိင်းလူင်ၼၼ်ႉ ၸၼ်ၼၢင်းယူၺ်ႉ လုၵ်ႉမႃးဢဝ်တႃမိုဝ်းၵႅၼ်ႇႁႅင်းလူင်မၼ်း ထုပ်ႉသႂ်ႇပုမ်ၼၢင်းယူၺ်ႉသေ ၼၢင်ႈယူၺ်ႉၸဵပ်းၼႃႇလႄႈ ၵၼ်ႈၵူမ်ႈၵႂႃႇယဝ်ႉ၊ ၵမ်းၼၼ်ႉၼၢင်းယိင်း ၼႂ်းထွင်ႇ ၸိူဝ်းၼၼ်ႉၵေႃႈဢွၼ်ၵၼ် မႃးႁႅမ်မၼ်းမေႃးပၼ်းလူင်ၵႂႃႇသဵင်ႈ။
ၵူၼ်ႈပႂ်ႉၶွၵ်ႈ ယိပ်ႈၶွၼ်ႉသေ မႃးတွႆႇသဝ်လဵၵ်း ႁွင်ႉထႃႉၶဝ်လႄႈ ၶဝ်ဢွၼ်ၵၼ်ၵိုတ်းယဵၼ်ၵႂႃႇ၊ ၸင်ႇမႃးထၢမ် လွင်ႈတၢင်းမၼ်းသေ တေသိုပ်ႇဢဝ်ဢေးယူၺ်ႉဝႆႉၸွမ်ႈၶဝ် ဢမ်ႇပဵၼ်ၼႆလႄႈ ၸင်ႇဢဝ်ၵႂႃႇဝႆႉတီႈၼိုင်ႈၶေႃၶေႃယဝ်ႉ။
ဝၢႆးၼၼ်ႉ ၼၢင်ႈယိင်းလူင်ၼၼ်ႉ ၸင်ႇမႃးၸူးၶႅတ်ႉလႃးသေ
“ မႂ်းၸိုဝ်ႈသင်?”
“ ၶႅတ်ႉလႃး ”
“ မိူဝ်ႈၵႆႈမႂ်းဝႃႈ မႂ်းယၢမ်ႈဢဝ်တၢႆၵူၼ်းမႃးၼႆၸွင်ႇၸႂ်ႈ?”
“ၸႂ်ႈဢေႃႈ”
ၶဝ်ၸိူဝ်ႈၼၼ်ႉ ဢွၼ်ၵၼ်ပႂ်ႉထွမ်ႇယူႇ
“ မႂ်းဢဝ်တၢႆၽႂ် ၵူၼ်းၸၢႆးႁႃႉ ၵူၼ်းယိင်း...ၵွပ်ႈသင်ဢဝ်တၢႆ?”
“ ပဵၼ်ၵူၼ်းၸၢႆးဢေႃႈ ... မၼ်းမႃးလူလၢႆၵၼ်ႉၶႃႈလႄႈ ၶႃႈဢဝ်မိတ်ႈတႅင်းပၼ်ပုမ်မၼ်းသေ တၢႆၵႂႃႇတီႈၼၼ်ႈ ၵမ်းလဵဝ်ယဝ်ႉ ၵွပ်ႈၼႆ ၶႃႈလႆႈပဵၼ်ဢမုသေႇ လႆႈၵႂႃႇယူႇၼႂ်းၶွၵ်ႈသွင်လိူၼ် ၸမ်ၸမ်ယဝ်ႉ ”
ၼၢင်ႈယိင်ႈလူင်ၼၼ်ႉ ႁၢၼ်ႉၸႂ်ယုမ်ႉငွၵ်ႈႁူဝ် ၸိူင်ႉၼင်ႇဢၢၵ်ႇၶၢင်ႁူဝ်ၶဵဝ်ၼၼ်ႉသေ ...ဢဝ်မိုဝ်းမၼ်းၶွၼ်ၶႂႃ ၵမ်တႃမိုဝ်းပူၵ်ႈၼိဝ်ႉပုၵ်းမၼ်းၼႄ ၶႅတ်ႉလႃးသေ
“ ၼႆႉၵႂႃႈ... ၸင်ႇပဵၼ်ၼၢင်ႈယိင်းႁတ်ႈႁၢၼ်သေ ႁတ်းၶဝ်ၶွၵ်ႈ ”
မၼ်းမႃးႁွပ်ႇဢဝ်ၶႅတ်ႉလႃး ပၼ်ႇႁွပ်ႈၼိုင်ႈသေ ၼူမ်ၵႅမ်ႈၶႅတ်ႉလႃးၵမ်းၼိုင်ႈယဝ်...
“ တူပ်းမိုဝ်းယွင်ႈယေႃး ၶႅတ်ႉလႃးလႄႈ ”
“ ပၢပ်ႉ...ပၢပ်ႉ...ပၢပ်ႉ...ပၢပ်ႉ...”
“ ႁေး...ႁေး...ႁေး...”
ၼၢင်းယိင်းလူင်ၼၼ်ႉၸင်ႇဝႃႈ
“ သူၸိူဝ်းၼႆႉ တေလႆႈၼပ်ႉယမ်ၶႅတ်ႉလႃး တေလႆႈႁၵ်ႉၶႅတ်ႉလႃးဢိူဝ်ႈၼႃႈ...မီး သင်ၵေႃႈလဵင်ႉမၼ်ႈၼႃႈ ”
မၼ်းႁွင်ႉၶႅတ်ႉလႃး မႃးၼင်ႈႁိမ်ႈမၼ်းသေ
“ ၵူၼ်းၸၢႆးဢၼ်လေႇႁႃၵၼ်ႉလူလၢႆၼၢင်းယိင်းၼႆႉ သူးလၢပ်ႈဢၼ်ၵိုင်ႇလႅပ်ႈသေ ပိူၼ်ႈၼၼ်ႉ ပဵၼ်ဢၼ်ၶႅတ်ႉလႃးပၼ်ၼၼ်ႉယဝ်ႉ”
ၼၢင်းယိင်းလူင်ၼၼ်ႉ ၶိုၼ်ႈသဵင် ႁႅင်းသေဝႃႈ
“ ထွမ်လႄႈ...ၵဝ်တေၶႆႈၼႄသူ...ၵူၼ်းၸၢႆး ဢၼ်ၵၼ်ႉၼၢင်းယိင်ႈၼၼ်ႉ သင်ဝႃႈ လႆႈတူၵ်းၶွၵ်ႈၵူၼ်းၸၢႆးၼႆ ဢမ်ႇလူမ်ႇၸႂ်ၵူၺ်း...သူၶႂ်ႈႁူႉ။ ၼႂ်းၶွၵ်ႈၵူၼ်ႈၸၢႆးၼၼ်ႉၵေႃႈ ၵေႃႉဢၼ်ႁၢႆႉသေပိူၼ်ႈ ပဵၼ်ၵႄႇၶွၵ်ႈသေ မီးသင်ၵေႃႈ လႆႈပၼ်မၼ်းဢိူဝ်ႈ...သင်ဝႃႈ ၵူၼ်းၵေႃႉၼိုင်ႈ တူၵ်းၶွၵ်ႈ ၶဝ်ႈၶွၵ်ႈၵႂႃႇၼႆၸိုင် ၵႄႇၶွၵ်ႈၼၼ်ႉ ထၢမ်ၵမ်းလဵဝ် ‘မႂ်းပဵၼ်ဢမုသင်သေတူၵ်းၶွၵ်ႈ’ သင်ဝႃႈ ‘ဢဝ်တၢႆၵူၼ်ႈသေတူၵ်းၶွၵ်ႈ’ ၼႆတႄႉ ၶဝ်ဢွၼ်ၵၼ်ယွင်ႈယေႃးဝႃႈ ‘ ၵိုင်ႇတၢင်းတူၵ်းၶွၵ်ႈ ’ၼႆႉယဝ်ႉ၊ သင်ဝႃႈ ၵၼ်ႉၸၼ်လူလၢႆၼၢင်းယိင်းသေ တူၵ်းၶွၵ်ႈၼႆတႄ...ၵႃႈပဵၼ်ၵူၼ်းၸၢႆးၼႂ်းၶွၵ်ႈၼၼ်ႉ ဢွၼ်ၵၼ်တၢင်ႇတၢင်းၽိတ်းသႂ်ႇမၼ်း‘ သင်ပိူၼ်ႈၵၼ်ႉလုၵ်ႈယိင်းမႂ်း တေလီႁႃႉ...သင် ပိူၼ်ႈၵၼ်ႉၼွင်ႉ ယိင်းမႂ်း တေလီႁႃႉ...’ၼႆသေ ထုပ်ႉထုပ်ႉႁႅမ်ႁႅမ် ပိတ်ႉပိတ်ႉထၢၵ်ႇထၢၵ်ႇ ပေႃးၶႂ်ႈၸမ်တၢႆဝႃႇ။ ၵမ်းလိုၼ်းသုတ်း ၵွႆၸႂ်ႉ မၼ်းႁဵတ်းၼႄ လွင်ႈမၼ်းၵၼ်ႉၼၢင်းယိင်း ပေႃးၸွတ်ႇပေႃးၸေးၼႆဝႃႈ။ ၵူၼ်ႈၸိူင်ႉၼၼ် ၶဝ်ဢမ်ႇပၼ်ၼႃႈလီမၼ်းသေပွၵ်ႈ ပၼ်မၼ်းၼွၼ်းတီႈ မဵၼ်ၶီႈမဵၼ်ယဵဝ်ႈၼၼ်ႉ ၼႆဝႃႈ ”
ၼၢင်းယိင်း ၼႂ်းၶွၵ်ႈၸိူဝ်းၼၼ်ႉ ဢွၼ်ၵၼ်ဝႃႈ...
“ ႁဵတ်းပၼ်ၸိူင်ႉၼင်ႇ ၶႅတ်ႉလႃးႁဵတ်းၼၼ်ႉ ထုၵ်ႇသေပိူၼ်ႈယဝ်ႉ ”ၼႆသေ ဢွၼ်ၵၼ် လၢတ်ႈၽႂ်လၢတ်ႈမၼ်ႈယူႇ။ ၶႅတ်ႉလႃးလႆႈဝၢႆႇၶဝ်ႈၶွၵ်ႈ ပွၵ်ႈသွင်ယူႇယဝ်ႉ၊ ၸိူဝ်းၶဝ်ပႅတ်ႇၵေႃႉ ဢၼ်ဢမ်ႇမီးတၢင်းၽိတ်းၼၼ်ႉတႄႉ ႁၢၼ်ၶဝ်ၸႂ်ႉ ႁႂ်ႈဢူႈမႄႈပီႈၼွင်ႉၶဝ် မႃးႁပ်ႉဢဝ်ၼႆလႄႈ ၶႅတ်ႉလႃးတႄႉ ဢမ်ႇမီးပီႈၼွင်ႉ၊ ၼၢင်းယူၺ်ႉတႄႉ ႁၢၼ်ၶဝ်ဢမ်ႇပွႆႇမၼ်း ။
မၼ်းၶုၵ်းၸႂ်လႆႈ ဝူင်းလိူၼ်သေလႄႈ ႁႂ်ႈပိူၼ်ႈသိုပ်ႇၽူၼ်းၸူး တီႈတႃႈၵုင်ႈၵေႃႈ ၵူၼ်းႁူင်းႁႅမ်းၼၼ်ႉဝႃႈ ဝူင်းလိူၼ်မိူဝ်းၵႂႃႇယဝ်ႉၼႆယူႇ၊ ထႅင်ႈဝၼ်းၼိုင်ႈ ၸိူဝ်းမီးပီႈၼွင်ႉ တီႈမေႃႇလမႅင်ႇၼၼ်ႉ ပီႈၼွင်ႉၶဝ် မႃးႁွင်ႉမိူဝ်းၵႂႃႇယူႇယဝ်ႉ၊ ၶႅတ်ႉလႃးတႄႉ တေလႆႈ မုင်ႈမွင်းၽႂ်မႃးႁွင်ႉမၼ်း ဢွၵ်ႇၵေႃႈဢမ်ႇႁူႉ။ မၼ်းၼၢင်းၸႂ်လူႉသေ ၼင်ႈဢဝ်ၼႃႈဝၢႆႇၸူးၽႃဝႆႉယူႇ။ ပိူၼ်ႈမႃးၽုၺ်ႇၽၵ်းတူ ႁွင်ႉၽႂ်ဢွၵ်ႇၵႂႃႇၵေႃႈ ႁူႉဝႃႈဢမ်ႇပႃးမၼ်းၼႆလႄႈ မၼ်းၸင်ႇၼင်ႈၵွင်လင်ဝႆႉယူႇ။
ငိၼ်းသဵင် ၽုၺ်ႇၽၵ်းတူၵေႃႈ မၼ်းတေႃႈဢမ်ႇၶဝ်ႈၸႂ်။ သဵင်ႁၢၼ်ၵေႃႉၼိုင်ႈ ႁွင်ႉ
“ ၼၢင်းၶႅတ်ႉလႃး ဢွၵ်ႇမႃးလႄႈ ”
ၶႅတ်ႉလႃးတူၵ်းၸႂ်သေ ဢမ်ႇယုမ်ႇႁူမၼ်း
“ ႁွင်ႉၶႃႈ ၶႃႈႁႃႉ?”
“ ၸႂ်ႈဢိူဝ်ႈ...ၼၢင်းၶႅတ်ႉလႃး ဢွၵ်ႇမႃးလႄႈ ”
ၶႅတ်ႉလႃးၵေႃႈ ဢွၵ်ႇမႃးသေ တီႈၼွၵ်ႈၼၼ်ႉ လႆႈႁၼ်ဝူင်းလိူၼ် ယုမ်ႉတေႃႇမၼ်းဝႆႉယူႇလႄႈ မၼ်ႈၼၢင်း ၸူမ်းသိူဝ်းၼႅတ်ႈဢႅၼ်ႇမႃးၵွတ်ႇဝူင်ႈလိူၼ်ဝႆႉ ႁႅင်းႁႅင်းယူႇယဝ်ႉ။
“ ဝူင်းလိူၼ် ”
“ ၶႅတ်ႉလႃး ”
ၶႅတ်ႉလႃး ၸူမ်ႈသိူဝ်း ပေႃးဢမ်ႇမီးတီႈတႅၵ်ႈသေ ႁႆႈယူႇသိုတ်ႉသိုတ်ႉ။ တူဝ်ဢွၼ်ႇ မၼ်းၼၢင်း တူင်ႉၶွၼ်းၵႂႃႇ တင်ႈတူဝ် ယွၼ်ႉမၼ်းသီတွၼ်ႉႁႆႈၼၼ်ႉယူႇ။ ဝူင်းလိူၼ်ၵေႃႈ လုပ်ႈပၼ် ၵွင်းလင်ၶႅတ်ႉလႃး လွႆးလွႆးသေ ၶျေႃးၶႅတ်ႉလႃးယူႇ။ ၶႅတ်ႉလႃးယိူၼ်ႉယူႇသေတႃႉ ယိူၼ်ႉဢမ်ႇလႆႈယဝ်ႉ လႄႈ
“ ဝူင်းလိူၼ် သိုတ်ႉ သိုတ်ႉ ႁိုဝ်ႉ ယႃႇ ယႃႇပေႁၢမ်ႈၵဝ် ပၼ်ၵဝ်ႁႆႈဢိမ်ႇဢိမ်ႇလႃႈ ”
ၶႅတ်ႉလႃး ဢဝ်ၼႃႈမၼ်းငူပ်ႉသႂ်ႇဢူၵ်းဝူင်းလိူၼ်သေ ႁႆႈထိုင်ၸႂ်ထိုင်ၶေႃးလႄႈ ၼႃႈဢူၵ်းဝူင်းလိူၼ် သမ်ႉပေႃးယမ်း ၼမ်ႉတႃၶႅတ်ႉလႃးၵႂႃႇသဵင်ႈယူႇယဝ်ႉ။
ဝၢႆးသေ ၶႅတ်ႉလႃးႁႆႈပေႇယဝ်ႉ ဝူင်ႈလိူၼ်ၸင်ႇၽႃၽိူဝ်းမၼ်း ၽႅဝ်မႃးႁိမ်းႁူဝ်ႁၢၼ်သေ တူင်ႉတူၵ်ႉႁူဝ်ႁၢၼ်ၼၼ်ႉယူႇ
“ ႁူဝ်ႁၢၼ်...ၶႃႈၶဝ်တေၵႂႃႇၵွၼ်ႇၶႃႈ ”
“ ဢိူဝ်ႈ ဢိူဝ်ႈ ၵမ်ႉလူး ၵဝ်တေသိုပ်ႇမိုတ်ႈပၼ်မႂ်းၵွၼ်ႇ ၼႆႉ ပဵၼ်ၵႅမ်ႁူဝ်ႁၢၼ်ႁဝ်း ဢိူဝ်ႈ၊ ၵႅမ်ႁူဝ်ႁၢၼ် ၼႆႉပဵၼ် ၸၢႆးဝူင်းလိူၼ် ၵေႃႉဢၼ်လုၵ်ႉတႃႈၵုင်ႈသေ ပၼ်ၶၢဝ်ႇၼၢင်းယူၺ်ႉမႃး တီႈႁဝ်းၼၼ်ႉၶႃႈယဝ်ႉ”
ၵႅမ်ႁူဝ်ႁၢၼ် လႄႈဝူင်းလိူၼ် တၵ်ႉၸၼ်မိုဝ်းၵၼ်သေ ၵႅမ်ႁူဝ်ႁၢၼ်ၸင်ႇဝႃႈ
“ ၶွပ်ႈၸႂ်ယဝ်ႈ ၸၢႆးဝူင်းလိူၼ်၊ ၵွပ်ႈပိူဝ်ႈ မႂ်းသူင်ႇၶၢဝ်ႇမႃးလႄႈ ၼၢင်းယိင်းဢွၼ်ႇ ဢၼ်ဢမ်ႇႁူႉသင်ၸိူဝ်းၼၼ်ႉ ၸင်ႇလွတ်ႈၽေးယဝ်ႈ”
ဝူင်းလိူၼ်ၵေႃႈ ၸင်ႇၶိုၼ်ႈတွပ်ႇဝႃႈ
“ ၼင်ႇႁိုဝ်ၵၢၼ်မိူၵ်ႈမႂ်ႈ ဢမ်ႇၸိုဝ်ႈဢမ်ႇၸႂ်ႈ တေမူတ်းယဵၼ်ၼၼ်ႉ ပုၼ်ႈၽွၼ်းမၼ်းၵေႃႈ မီးဝႆႉၼိူဝ်ႁူဝ်မႃႇ ၵူၼ်းမိူင်းၼင်ႇၵဝ်ႇယူႇၶႃႈလူး”
“ ဢိူဝ်ႈ ၸၢႆးဝူင်းလိူၼ် ပေႃးႁူႉမေႃၸွႆႈႁဝ်းၸိူင်ႉၼႆ ၶွပ်ႈၸႂ်ယွင်ႈယေႃးယူႇ၊ လူဝ်ႇတၢင်းၸွႆႈထႅမ်သင်ၵေႃႈ လၢတ်ႈလႄႈၼႃႈ”
“ ၸူမ်ႈၶႃႈယဝ်ႈ”
ႁူဝ်ႁၢၼ်ၼၼ်ႉၸင်ႇထၢမ်
“ ၼၢင်းယိင်းဢွၼ်ႇ ထူင်ၶူဝ်းယိင်း ပဵၼ်ဢၼ်လႂ်?”
“ ပဵၼ်ထူင်သွမ်ႇၼႆႉဢေႃႈ ”
“ႁိူဝ်ႈ ထတ်းတူၺ်းလႄႈ ၶူဝ်းၼႂ်းမၼ်းၸွင်ႇႁူင်ႈႁၢႆ?”
ၶႅတ်ႉလႃးၵေႃႈ ၽုၺ်ႇတူၺ်းထူင်မၼ်းၸေးၸေးသေ
“ ဢမ်ႇႁၢႆသင်ၶႃႈ ၶွပ်ႈၸႂ်ၶႃႈယဝ်ႉ ”
“ လွင်ႈဝႃႈ ၶိုၼ်းႁပ်ႉလႆႈၶူဝ်းၸဝ်ႈၵဝ်ႇၼၼ်ႉ လူင်းလၢႆးမိုဝ်းပၼ်တီႈၼႆႈလႄႈ ”
ၶႅတ်ႉလႃးၵေႃႈ လူင်းလၢႆးမိုဝ်းယဝ်ႉသေ လွမ်တူၺ်းဝူင်ႈလိူၼ်ယူႇ၊ ဝူင်းလိူၼ် ၸင်ႇဝႃႈ
“ ႁူဝ်ႁၢၼ်လႄႈ ၵႅမ်ႁူဝ်ႁၢၼ် ၶႃႈၶဝ်တေၵႂႃႇၵွၼ်ႇၶႃႈ ”
“ ဢိူဝ်ႈ ဢိူဝ်ႈ လီယဝ်ႉ ”
ႁူဝ်ႁၢၼ်ၸင်ႇဝႃႈ
“ ၵႂႃႇလွႆးလွႆး ႁႂ်ႈၶိူဝ်ႈသွင်ၵေႃႉ လႆႈသဝ်းမူၼ်ႈၸွမ်းၵၼ်ႁၵ်ႉႁၵ်ႉႁွမ်ႁွမ် တေႃႇၸူဝ်ႈၼႃႈ ”
ၽႅဝ်မႃးၼွၵ်ႈႁူင်းႁၢၼ် ၶႅတ်ႉလႃးသုတ်ႇလူမ်း တီႈၼွၵ်ႈဢိမ်ႇဢိမ်ႇယဝ်ႉသေ
“ ဝူင်းလိူၼ်...ႁူဝ်ႁၢၼ်ၸိုင်သမ်ႉဝႃႈၼၼ်ပၼ်ႁႃးလႃႇ”
“ ဝႃႈႁိူဝ်? ”
“ ႁူၼူၵ်ႇႁႃႉ? တင်ႈၸႂ်ဢမ်ႇႁူႉႁႃႉတေႃႈဝႃႈ ”
“ ဢေႃႈ...တႃႇတေမႃးဢဝ်မႂ်းဢွၵ်ႇၼႆႉ ၵဝ်လႆႈပႅတ်ႉလႅၼ်ဝႃႈ မႂ်းပဵၼ်ၵေႃႉႁၵ်ႉ ၵဝ်ၼႆ ဢိူဝ်ႈ၊ ၶွင်ၵေႃႉသူင်ႇၶၢဝ်ႇၵေႃႈ ပဵၼ်ၵဝ်လႄႇ ၶဝ်ၸင်ႇပၼ်ဢွၵ်ႇၼႆဝႃႇ သင်ဢမ်ႇၼၼ် ၶႂ်ႈယၢပ်ႇဝႆႉဢိူဝ်ႈ ”
“ ၸၢင်ႈၵႂႃႇယၢပ်ႇသင် ၵိၼ်ၵိၼ်ၼွၼ်းၼွၼ်း ၼႂ်းၶွၵ်ႈတေႃႇၸူဝ်ႈႁေယဝ်ႉဢိူဝ်ႈ ”
“ဢေႃႈ...ပႆႇလိုမ်းၶွၵ်ႈၵွၼ်ႇၼေႃႈ ”
“ ႁိူဝ်တေလိုမ်းလႆႈ ဢေႃႈ ဝူင်းလိူၼ်ႁဵတ်းႁိူဝ် ႁူႉဝႃႈပီႈယူၺ်ႉ ပဵၼ်ၵူၼ်းၵႃႉၵူၼ်းလႃႇ?’
“ ဢိူဝ်ႈ ဝၢႆးသေမႂ်းသိုပ်ႇၽူၼ်းဝႃႈ တေၵႂႃႇႁႃပၼ်ၵၢၼ် တီႈမိူင်း- ၼႆသေ ဢဝ်ၽူၼ်း ၶၢတ်ႇၵႂႃႇၼၼ်ႉ ၵဝ်မႃးၼွၼ်းဝူၼ်ႉတင်းၶိုၼ်း ဝူၼ်ႉဝႃႈ ပဵၼ်မိူင်းထႆး သမ်ႉဝူၼ်ႉ လွင်ႈၵဝ်ယၢမ်ႈႁၼ် ပီႈယူၺ်ႉ တီႈလႂ်ၼႆဢိူဝ်ႈ ထိုင်ၵၢင်ၶိုၼ်းသိပ်းသွင်မွင်းပၢႆ ၵဝ်ႇၸင်ႇဝူၼ်ႉပွင်ႇ ၵဝ်ယၢမ်ႈႁၼ်မၼ်း တီႈတႃႈၶီႈလဵၵ်း၊ မၼ်းဢွၼ် ဢွၼ်ႇယိင်းတႆးဝၢၼ်ႈၼွၵ်ႈဢွၼ်ႇႁႃႈၵေႃႉ ၵႂႃႇမႄႈသၢႆၼႆလႄႈ ၵဝ်ၸင်ႇထၢမ် ႁၢၼ်ၶဝ် တီႈတႃႈၵုင်ႈသေ ပၼ်ၶၢဝ်ႇမႃး တီႈႁၢၼ်မေႃႇလမႅင်ႇဢိူဝ်ႈ ႁၢင်ႈၽၢင်ပီႈယူၺ်ႉ ပဵၼ်ႁိူဝ် သူလၢႆၵေႃႉ ႁၢင်ႈၽၢင်မႂ်းပဵၼ်ႁိူဝ် ၶူၼ်ႁူဝ်ယၢဝ်းၼႆ ၵဝ်ယင်းလၢတ်ႈပႃးၵွၼ်ႇဢိူဝ်ႈ ”
“ ဝူင်းလိူၼ် သင်ဝႃႈ မႂ်းဢမ်ႇပၼ်လႆႈၶၢဝ်ႇၼႆ ၵဝ်ပေႃးဢမ်ႇႁတ်းဝူၼ်ႉယဝ်ႉ ၵတ်ႉၵႃႈလႃႈ ၶွပ်ႈၸႂ်တႄႉတႄႉဝႃႈဝႃႈယဝ်ႈ ဝူင်းလိူၼ် သင်ဢမ်ႇၼၼ် ၽဝႃႉၵဝ်တေၸူမ်ၸိၵ်းယဝ်ႉ ”
ၶႃသွင်ၵေႃႉ ပႆမႃးၸွမ်းတၢင်းလူင်တိၵ်းတိၵ်းသေ
“ ၶႅတ်ႉလႃး ႁႃးတေၵႂႃႇလႂ်လႃႇၼႆႉ မႂ်းတွင်ႉမႆႈၶဝ်ႈယူဝ်ႉ?”
“ ပႆႇၶႂ်ႈၵိၼ်ဝူင်းလိူၼ် ၵဝ်ၶႂ်ႈဢၢပ်ႇၼမ်ႉ လၢႆႈၶူဝ်းၵဝ်ၼႆႉၵူၺ်းယဝ်ႈ တေၵႂႃႇတီႈလႂ်?
“ ႁဵတ်းၼႆလႄႈ...မိူဝ်ႈၼႆႉၵေႃႈ ႁႃးပႆႇၸၢင်ႈမိူဝ်းတႃႈၵုင်ႈ ႁႃးၵႂႃႇလိုဝ်ႈတီႈႁူင်းႁႅမ်း ၵႂႃႇဝႆႉၶူဝ်းႁႃး ဢၢပ်ႇၼမ်ႉယဝ်ႉသေ ၸင်ႇၵႂႃႇႁႃၵိၼ် ဢမ်ႇလီႁႃႉ?”
ၶႅတ်ႉလႃးငွၵ်းႁူဝ်ၼႄ ၵမ်းၼိုင်ႈသေ ၶႃၸင်ႇၵႂႃႇတီႈႁူင်းႁႅမ်းဢၼ်ၼိုင်ႈ။ ဝူင်းလိူၼ် ၵႂႃႇဢဝ်လုၵ်းၼွၼ်း ၵေႃႉလဵဝ်သွင်လုၵ်းသေ ပၼ်ၶႅတ်ႉလႃး လုၵ်းၼိုင်ႈယဝ်ႈ။
ဝၢႆးသေလၢႆႈၶူဝ်းယဝ်ႉ သွင်ၶႃၸင်ႇၵႂႃႇတီႈသႅင်ႇၶဝ်ႈသေ ဝူင်းလိူၼ်ၵေႃႉသင်ႇၶဝ်ႈၽၵ်း ၊ၵူၼ်းပႂ်ႉသႅင်ႇၶဝ်ႈ ဢဝ်ၶဝ်ႈဢဝ်ၽၵ်းမႃး တမ်းတိၵ်းတိၵ်း ၽၵ်းသမ်ႉပေႃးတဵမ်ၽိူၼ်လႄႈ
“ ဢလူဝ်ႉ...ဝူင်ႈလိူၼ်ပႄႉသင်ႇၽၵ်းၼမ်လႃႇ ?”
“ ၶႂ်ႈလဵင်ႉၶႅတ်ႉလႃးလီလီဝၢၼ်ဝၢၼ်ဢိူဝ်ႈ...ၵိၼ်လႄႈၵဝ်တႄႉ ၵဝ်တေယွမ်းသေၵိၼ် ဢိူဝ်ႈ ”
“ တေယွမ်းသေ ၵိၼ်ႁဵတ်းသင်?”
“ ဢမ်ႇၸႂ်ႈ...ၵဝ်ဝႃႈယွမ်းသၢႆဢႅဝ်သေ ၵိၼ်ၼႆၵႂႃႈ ”
ၶႅတ်ႉလႃး ၶူဝ်ႁၢင်ႈလီႁၢင်ႈငၢမ်းယူႇယဝ်ႉ။ ဝူင်းလိူၼ်ၵေႃႈ ၵမ်းၵမ်း ဢဝ်ၽၵ်း သႂ်ႇပၼ်ၼႂ်းဝၢၼ်ႇၶႅတ်ႉလႃး မီႇၼိုင်ႈယဝ်ႉမီႇၼိုင်ႈယူႇ။
“ လႆႈယဝ်ႈဝူင်းလိူၼ် ၶႅတ်ႉလႃးတေသႂ်ႇဢဝ်ႁင်းၵူၺ်းလႆ ”
“ ၶႅတ်ႉလႃး ၶုၵ်းၸႂ်လႆႈမိူဝ်ႈႁဝ်ႈၵႂႃႇလဵင်ႉၵၼ် ၶဝ်ႈသဵၼ်ႈၶဝ်ႈသွႆးထူဝ်ႇၽူး ၶဝ်ႈၼဵဝ် ၸိူဝ်းၼၼ်ႉၵျၼေႃ ”
“ ၶုၵ်းၸႂ်လႆႈၽႅဝ်ဢိူဝ်ႈ...ၵဝ်ၶႅၼ်းၵႆႉၶုၵ်းၸႂ်လႆႈၶိူဝ်သွင်ၵေႃႉယဝ်ႉ မိုၼ်ႇႁွမ်ၵေႃႈ ယဝ်ႉႁဵၼ်းယဝ်ႉၼေႃ?”
“ ယဝ်ႉယဝ်ႈ ၵူၺ်းၵႃႈ ပၢႆးယူႇလီမၼ်းလႆႈမႆႈၸႂ်ၼႆဢိူဝ်ႈ ”
“ မၼ်ႈပဵၼ်သင် ဝူင်းလိူၼ်?”
“ ပေႃႈၶဝ်ဝႃႈ မၼ်ႈမီးလူမ်းႁူဝ်ၸႂ်ၶိုၼ်ႈၼႆဝႃႇ ”
“ ဢိူဝ်ႈ...ၸဵမ်မိူဝ်ႈႁဝ်းၵေႃႉလဵၵ်ႉ ပေႃးမၼ်းၶႂ်ႈၸႂ်လမ်မႃးၼႆ ဢမ်ႇၸႂ်ႈသင်ၵေႃႈ ၸွင်ႇမၼ်းဢမ်ႇၸႂ်လမ်ငၢႆႈၼႃႇႁိုဝ်?”
“ ၸႂ်ႈဢိူဝ်ႈ...ၵွပ်ႈၼၼ်လႄႈ ၸင်ႇပဵၼ်လူမ်းႁူဝ်ၸႂ်ယူဝ်ႉၼေႃ တီႈလဵဝ်တႄႉၵေႃႈ ယူႇသႃႇမႃးယဝ်ႉၼႆဝႃႇ ”
“ ဝူင်းလိူၼ် ၵဝ်တႃႉၶႂ်ႈထူပ်းမိုၼ်ႇႁွမ်လႃႈ ”
“ ႁႃးၸွမ်းၵၼ်မိူဝ်းတူၼ်ႈတီးၼေႃႈ ဢမ်ႇလီႁႃႉ?”
“ လီၽႅဝ်လေႃႇ...ၵႂႃႇၸွမ်းပေႃႈလဵင်ႉၵႃႉသႅင် ၼႆတႄႉ ဢမ်ႇလႆႈၶီသင်သႄႈ ဢမ်ႇၸႂ်ႈ ႁႃႉ?”
“ ဝၢႆးၼႆႉ ၵူဝ်ပဵၼ်ပေႃႈလဵင်ႉၵႃႉတႅင်ၵူၺ်းဢိူဝ်ႈ ”
ၶႃသွင်ၵေႃႉ ယုမ်ႉၶူဝ်ယူႇသေ
“ ဝူင်းလိူၼ် လႆႈမႃးထူပ်းႁၼ်မႂ်းၼင်ႇၼႆ ၵဝ်သိူဝ်းၸႂ်ၵျမႂ်းၶႂ်ႈႁူႉ။ ၵဝ်ဢမ်ႇလႆႈသိူဝ်း ၸႂ်ၸိူင်ႉၼႆၼႆႉ ႁိူင်ၼႃႇယဝ်ႉ ”
“ ႁႂ်ႈလႆႈသိူဝ်းၸႂ်သေၵမ်းလႃႈ ”
ၵၢင်ၶမ်ႈ ၶႃသွင်ၵေႃႉ ၶိုၼ်ႈမိူဝ်းၼင်ႈဢွမ်ႇလၢင်ႈဢွမ်ႇယဵၼ် တီႈၼိူဝ်ႁူင်းႁႅမ်းသေ ဢုပ်ႇၵၼ်တင်းႁိုင်ယူႇ
“ ဝူင်းလိူၼ် ဝၢႆးသေႁဝ်းၽၢတ်ႇၵၼ် တီႈတၢင်ႉယၢၼ်းယဝ်ႉ မႂ်းၽႅဝ်ၵႂႃႇတီႈလႂ်လၢႆလၢႆ?
“ ၽႅဝ်ၵႂႃႇလွႆလႅမ် သိုပ်ႇၼၼ်ႉ ၵဵင်းတုင်၊ သိုပ်ႇၼၼ်ႉပီၵၢႆၼႆႉ ပေႃႈႁဝ်း ၵႂႃႇၵႃႉသႅင်ႇ ဢွင်ႇသေ ၸင်ႇမႃးသိုဝ်ႉႁိူၼ်း တီႈတူၼ်ႈတီး ႁဝ်းၵေႃႈၸင်ႇၶၢႆႉမႃးတူၼ်ႈတီးဢိူဝ်ႈ ”
“ မႃးၺႃး မိုၼ်ႇႁွမ်ၼႃ?”
“ ၺႃးမိုၼ်ႇႁွမ်တႄႉ ၸဵမ်မိူဝ်ႈ မႄႈႁဝ်းမႃးၶိုၼ်ႈႁူင်းယႃ မိူဝ်ႈပူၼ်ႉမႃးသၢမ်ပီမွၵ်ႈၼၼ်ႉယဝ်ႈ ။ ဝၢႆးၼၼ်ႉ ပေႃးၵဝ်မႃး တွပ်ႇလိၵ်ႈ တီႈတူၼ်းတီးၼႆ ႁႃးမိုၼ်ႇႁွမ် ၺႃးၵၼ်ယူႇ။ လွင်ႈမႂ်းလူး ၶႆႈၼႄၵဝ်ၽွင်ႈလူး ႁဵတ်းႁိုဝ်ႁဵတ်းႁႃ ပိူၼ်ႈသမ်ႉပေႃးငႃတေၵႂႃႇၶၢႆပႅတ်ႈ တီႈမိူင်းထႆး”
ၶႅတ်ႉလႃး ထူၺ်ႈၸႂ်လူင်ယၢဝ်းယၢဝ်း ၵမ်းၼိုင်ႈသေ
“ ဝူင်းလိူၼ်...လွင်ႈၽဝၵဝ်ၼၼ်ႉ ၶႆႈၵေႃႈၶႂ်ႈၶႆႈၼႄမႂ်းယူႇ ၶႆႈၵေႃႈဢမ်ႇၶႂ်ႈၶႆႈၼႄမႂ်း ”
“ ၵွပ်ႈသင်သမ်ႉဝႃႈၼၼ် ”ပေႃးမႂ်းဢမ်ႇလၢတ်ႈၼႄ ၵဝ်တေႁဵတ်းႁိုဝ်ႁူႉလႃႇ ၸၢင်ႈလူဝ်ႇထိမ်ႇၵၼ်ဝႆႉႁဵတ်းသင်?”
“ မႂ်းတေၶႂ်ႈထွမ်ႇယူႇႁႃႉ?”
“ ၶႂ်ထွမ်ႇၽႅဝ်လေႃႇ ”
“ မႂ်းတေထွမ်ႇလႆႈယူႇႁႃႉ?”
“ ထွမ်ႇလႆႈယူႇ ”
ၶႅတ်ႉလႃးၵေႃႈ ၶႆႈၼႄၽဝမၼ်း လွင်ႈဢူႈဢၢဝ်ၶဝ်လူလၢႆမၼ်း၊ လွင်ႈမၼ်းပဵၼ် ဢမူႉ၊ လွင်ႈမၼ်းပၢႆႈ ဢွၵ်ႇတၢင်ႉယၢၼ်းသေ ၵႂႃႇလဵင်ႉလုၵ်ႈ၊ လွင်ႈႁဵတ်းၵူၼ်းၵႃႉ၊ လွင်ႈမႃးၺႃးပီႈယူၺ်ႉ ၸိူဝ်းၼၼ်ႉသဵင်ႈသဵင်ႈယဝ်ႈ ဝၢႆးသေမၼ်းၶႆႈၼႄယဝ်ႉ
“ ဝူင်ႈလိူၼ် ၽဝၵဝ် ဢၼ်ၽၢၼ်ပေႃႈမႄႈၼႆႉ ပဵၼ်ၼႆဝႆႉဢိူဝ်ႈ ယၢမ်းလဵဝ်တႄႉ ပဵၼ်‘မႄႈႁၢင်ႉမၢႆႈ မၢၼ်းလုၵ်ႈလၢႆလုၵ်ႈတၢႆ’ဝႆႉယဝ်ႈ ”
ဝူင်းလိူၼ် ထူၺ်ႈၸႂ်လူင်ႁႅင်းႁႅင်းၵမ်းၼိုင်ႈသေ လွမ်တူၺ်းၶႅတ်ႉလႃး လႆႈႁၼ်ၶႅတ်ႉလႃး ၼမ်ႉတႃလႆမၢႆႇၵႅမ်ႈဝႆႉယူႇလႄႈ မၼ်းၸၼ်ဢဝ်ၸေတလၢတ်ႇ ယိုၼ်ႈပၼ်ၶႅတ်ႉလႃး၊ ၶႅတ်ႉလႃး ဢဝ်ၸဵတ်ႉၼမ်ႉတႃမၼ်ႈယူႇ။
“ ၶႅတ်ႉလႃး လႆႈႁူႉလွင်ႈၽဝမႂ်းၼင်ႇၼႆ ၵဝ်ၸႂ်ဢမ်ႇလီၼင်ႇၵဝ်ႇ သင်ႁူႉၼၼ် ၵဝ်ၵေႃႈဢမ်ႇထၢမ်ၼင်ႇၵဝ်ႇ ”
“ ဢမ်ႇပဵၼ်သင် ဝူင်းလိူၼ် ၵဝ်ယၢမ်ႈတုၵ်ႉၶမႃး ၸဵမ်လဵၵ်ႉယဝ်ႉလူး ပုၼ်ႈတႃႇၵဝ် လွင်ႈတုၵ်ႉလွင်ႈသုၵ်ႉၼၼ်ႉ ပဵၼ်သိၵ်ႈၶူဝ်လႆ ဢၼ်ၵဝ်ပႆၶၢမ်ႈၼၼ်ႉယဝ်ႈ ”
ၶႅတ်ႉလႃး လွမ်တူၺ်းဝူင်းလိူၼ် လႆႈႁၼ်ဝူင်းလိူၼ်ငဝ်မိုင်သေ ယၵ်ႉတူၺ်း တီႈတႅမ်ႇဝႆႉယူႇတင်းႁိုင်
“ ဝူင်ႈလိူၼ်...မႂ်းလႆႈႁူႉလွင်ႈၽဝၵဝ်သေ မႂ်းထၢင်ႇလဵၵ်ႉၵဝ်ၵႂႃႇယဝ်ႈယူဝ်ႉ?”
ဝူင်းလိူၼ် ၼႅတ်ႈဝႆႁူဝ်ၽႂ်းၽႂ်းသေ
“ ဢမ်ႇထၢင်ႇလဵၵ်ႉၶႅတ်ႉလႃး ...ၵဝ်ယွင်ႈယေႃး ၼမ်ႉၸႂ်မႂ်ႈသေ ၵဝ်ၶႅၼ်းဢီႈလူမႂ်းယဝ်ႈ၊ ၵွပ်ႈၼႆ ဢဝ်ၼႆႉၵႂႃႇမိူဝ်းၼႃႈ ၵဝ်တႅပ်းတတ်းၸႂ်ၵဝ်ဝႃႈ မႂ်းလူဝ်ႇသင်ၵေႃႈ ၵဝ်တေၸွႆႈထႅမ်ပၼ် ၼႆယူႇ”
“ ယႃႇၽူမ်ႈတႅပ်းတတ်းၸဝ်ႉၽႅဝ်လႄႈ ဝူင်းလိူၼ် မိူဝ်ႈလႂ်ပဵၼ်လႆႈ ၸင်ႇၵွႆႈလၢတ်ႈလႄႈၽဝၵဝ်တႄႉ ၵဝ်တေလႆႈသိုပ်ႇၸုၵ်းႁိုဝ်သိုပ်ႇပႆႁိုဝ် သိုပ်ႇၼင်ႈႁိုဝ်ၼႆ ၵဝ်ပႆႇၸၢင်ႈတႅပ်းတတ်း ယိူင်ႈဢၢၼ်းၵဝ် တိုၵ်ႉၵိုတ်းယူႇထႅင်ႈပိူင်ၼိုင်ႈသေ ၵဝ်တေလႆႈသိုပ်ႇပႆၵႂႃႇၸွမ်းယိူင်းဢၢၼ်းၵဝ်ယူႇ”
“ ယိူင်းဢၢၼ်းၸိူင်ႉႁိုဝ် ၶႅတ်ႉလႃႈ...လၢတ်ႈၼႄၵဝ်ဢမ်ႇလႆႈႁႃႉ ”
“ ၼႆႉတႄႉ လၢတ်ႈပႆႇသၢင်ႇထုၵ်ႇ ဝူင်းလိူၼ် မိူဝ်ႈလႂ် ထိုင်မႃးမႂ်းၸင်ႇတေလႆႈႁူႉယဝ်ႉ ”
ၶမ်ႈၼၼ်ႉ ၶႃဢုပ်ႇၵၼ်တေႃႇထိုင် သိပ်းမူင်းၶိုင်ႈသေ ၸင်ႇၵႂႃႇမိူဝ်းၼွၼ်း တီႈလုၵ်းၽႂ်လုၵ်းမၼ်းယဝ်ႉ။