ၶိုၼ်းထူပ်းႁၼ်ၵၼ်

ၶိုၼ်းထူပ်းႁၼ်ၵၼ်

ႁႅင်းသိူဝ်ၶႅင် (တၢင်ႉယၢၼ်း)

ပပ်ႉဢၼ်ၼႆႉ ပဵၼ် ပပ်ႉၸိူင်း လႆႈၸိုဝ်ႈဝႃႈ ၶိုၼ်းထူပ်းႁၼ်ၵၼ် ဢၼ် ႁႅင်းသိူဝ်ၶႅင် (တၢင်ႉယၢၼ်း) တႅမ်ႈဝႆႉသေ တီႈၼႂ်းပပ်ႉၼႆႉ တေ ၶဝ်ႈပႃးဝႆႉ တွၼ်ႈလိၵ်ႈ 21 တွၼ်ႈယဝ်ႉ။

ၶေႃႈသင်ႇ

ၽူႈလူလိၵ်ႈၶဝ်တင်းသဵင်ႈ

ၵၢင်ၸႂ်ၽူႈတႅမ်ႈလိၵ်ႈတႄႉ ၼင်ႇႁိူဝ်ပပ်ႉတႆးႁဝ်း-

တေဢွၵ်ႇ ၼမ်ၼမ်

တေယမ် လိုၵ်ႉလိုၵ်ႉ

တေၶိုၵ်ႉ တွၼ်းတွၼ်း

မီးၽွၼ်းယႂ်ႇယႂ်ႇ ၼၼ်ႉၶတ်းၸႂ်ၶိုင်ပွင်ယူႇ။

ၵူၺ်းၵႃႈ...ၵူၺ်းၵႃႈ...ၼႃႈၵၢၼ်လႄႈၶၢဝ်းယၢမ်းၽူႈတႅမ်ႈလိၵ်ႈသမ်ႉ လႆႈတိုတ်ႉတၢႆးဢဝ် ပႅင်ႈၼင်ႇ တၢႆးၶိုတ်းၼၼ်ႉၵူၺ်း။

သင်ဝႃႈ ပပ်ႉၽူႈတႅမ်ႈလိၵ်ႈ ဢမ်ႇဢွၵ်ႇမႃးၼႆ ၽူႈလူလိၵ်ႈႁဝ်းၶဝ်သမ်ႉတေမွင်းဝႃႈ “ပီၼႆႉပပ်ႉႁႅင်း သိူဝ်ၶႅင်ဢမ်ႇဢွၵ်ႇဢႄႉ”ၼႆသေ သမ်ႉတေဝူၼ်ႉ “ၵွပ်ႈသင်ဢမ်ႇဢွၵ်ႇၼေႃး...။ ယူဝ်ၶေး...ယူဝ်ၶေး” ၼႆယူႇႁိူဝ်။

ၸဵမ်မိူဝ်ႈ ၽူႈလူလိၵ်ႈႁဝ်းၶဝ် လႆႈတႄႇၸိမ်းတူၺ်း မၢၵ်ႇၵႅမ်ႈၶွင်ႇ၊ လႆႈပွႆႇၼူဝ်ႉသႅဝ်းဢွၼ်ႇလႆႈႁၼ် မွၵ်ႇၵွၼ်မွၵ်ႇ၊ လႆႈၼူမ်မွၵ်ႇလူင်ႇလဵဝ်၊ လႆႈၸႂ်တိတ်းၶႅၵ်ႇ၊ လႆႈလင်ၸီး လီၸင်း မႃးသေ ပီၼႆႉ ႁဝ်းႁႃး လႆႈမႃး‘ၶိုၼ်းထူပ်းႁၼ်ၵၼ်’တူၺ်းယူႇယဝ်ႉ။

‘လွင်ႈထူပ်းႁၼ် ၵၼ်ၼႆႉ ပဵၼ်ငိူၼ်ႈတႃႇတေၽၢတ်ႇယၢၼ်ၵၼ်’ဝႃႈၼႆသေတႃႉ ‘လွင်ႈၽၢတ်ႇ ယၢၼ်ၵၼ်ၼၼ်ႉလူး ဢမ်ႇၶိုၼ်းပဵၼ်လႆႈငိူၼ်ႈတႃႇတေထူပ်းၵၼ်ၼႄႇ။

တီႈၼႂ်းၸိူင်း “ၶိုၼ်းထူပ်းႁၼ်ၵၼ်”ၼႆႉ ၸၢႆးဝူင်းလိူၼ် ၼၢင်းမိုၼ်ႇႁွမ် ၼၢင်းၶႅတ်ႉလႃးၶဝ် တေၶိုၼ်းႁဵတ်းႁိူဝ်ထူပ်းႁၼ်ၵၼ် တေသိုပ်ႇပဵၼ်ႁိူဝ်ပဵၼ်ႁႃၵႂႃႇ...ၼႆၼၼ်ႉ ၽူႈလူႈလိၵ်ႈႁဝ်းၶဝ် ၽိုၼ်ႉတူၺ်ႈၶူၼ်ႉတူၺ်းဢဝ်လႃႈ။ ၵူၺ်းၵႃႈ ယႃႇပေႁႂ်ႈပိူၼ်ႈ လႆႈဝႃႈတီႈၽူႈလူလိၵ်ႈႁဝ်းၶဝ် “ၵိၼ်ႁႅင်း သိူဝ်ၶႅင်ၼၼ်ႉလႃႈ”ၼႆၼႃႈ။

မီးတီႈၸမ် မီးတီႈၵႆ မီးတီႈလႂ်သေဢမ်ႇဝႃႈ ၽူႈတႅမ်ႈလိၵ်ႈႁႅင်ႈသိူဝ်ၶႅင်လႄႈ ၽူႈလူလိၵ်ႈႁဝ်းၶဝ် တႄႉ“တူဝ်ၸမ်ၵေႃႈ ၸႂ်ဢမ်ႇလႆ တူဝ်ၵႆၵေႃႈ ၸႂ်ဢမ်ႇယၢၼ်”သေပွၵ်ႈၼႆယုမ်ႇ...။

ၼပ်ႉယမ်ယႂ်ႇၼမ်သေ

ႁႅင်းသိူဝ်ၶႅင် တၢင်ႉယၢၼ်း

တွၼ်ႈ