ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ၺၢၼ်ႇလီၸင်ႇၵေႃႉၸၢႆး လၢႆးလီၸင်ႇပႄႉပိူၼ်ႈ

လုၵ်ႉတီႈ ဝီႇၶီႇပပ်ႉ မႃး

"ၵရုၵ်းတူၵ်း - တူၵ်း - ၵလွၵ်း တွၵ်းတွၵ်း တူင်းတၢင်းတိင်းတဵင်းတႅင်းတွင်း ႁုတ်ႇဢူဝ်ႉႁုတ်ႇဢူဝ်ႉ ဢံႇပူဝ်ႉငွ ငုၺ်ႉႁႃႉႁႃႉ ၶႂ်းၺႃးမၢၵ်ႇၵူင်ၵွၼ်ယူဝ်ႉ၊ ဝႄႉတီႈ ႞ ၵိုတ်းတီႈ ႞ ၼႆႉ ၵႂၢႆးၵႂႃႇၸွမ်းၵႂၢႆး - ဝူဝ်းၵႂႃႇၸွမ်းဝူဝ်းလီလီလႄႈ - ပၢႆလိူဝ်ၾႃႉၵၢမ်ႈၽူၼ်ႈဢုမ်း ဢံႇႁၼ်လိူၼ်ႁၼ်ဝၼ်းသေဢိတ်း လပ်းပေႃးသိင်ႇၽိတ်းၽိတ်းတင်းမိူင်း ပေႃးသူၵႂႃႇထိူင်းတႄႉ ဢံႇၽႅဝ်ႁိူၼ်းလႆႈယဝ်ႉဢိူဝ်ႈ - ႁိူၺ်ႉ - ႁိူၺ်ႉ“

“ ၵ - လၢႆလၢႆဝႃႈ ၵ - ၵ -ၶျႃးဝႃ ၵႃ ၊ ၵ - တၢင်ႇလၢႆ ဝႃႈ ၵိ၊ ႁႂ်ႈ မိူဝ်ႈၼႆႉ ယင်းတိုၵ်ႉၸဝ်ႈယူႇလူင်ၼႆႉ လုၵ်ႈဢွၼ်ႇႁူင်းႁဵၼ်းၶဝ် ယင်းပႆႇလူင်းႁူင်းႁဵၼ်း ၵဝ်ႇပွႆႇဝူဝ်းၵႂၢႆးၵဝ် ၵိၼ်ယိူဝ်ႈတီႈၼႆႈ ၵံး ႞ ၵွၼ်ႇလႄႈ"

"ဢေႃး...လုၵ်ႈပိူၼ်ႈတႄႉ ၼုင်ႈၶူဝ်းမႂ်ႇမႂ်ႇ - ပႅၵ်ႉသၢၼ်ႇသႂ်ႇထွင်း ယူႇၵျွင်းသွၼ်လိၵ်ႈ ပိူၼ်ႈဢၢၼ်ႇလိၵ်ႈႁဵၼ်းလၢႆး ဢဝ်သံႉလႆႈလဵင်ႉၵႂၢႆး ၼုင်ႈၶူဝ်းယွၵ်းၶဝ်ႈထိူၼ်ႇ တႃႉလီၶွႆပိူၼ်ႈတႄႉၼေႃး"

ထိုင်ၵၢင်ၶမ်ႈမႃး မၼ်းၵွႃႇၸူးတႆးၵေႃႉမၼ်း ၸိုဝ်ႈ ဢၢႆႈၵိုတ်းၼၼ်ႉ သွၼ်လိၵ်ႈပၼ် ဢၢႆးၵိုတ်းၵေႃႈ သွၼ်ပၼ်ၵူႈၶံႈ ၵူႈၶံႈယဝ်ႉ၊ ထိုင်ယၢမ်းၵၢင်ဝၼ်း မိူဝ်ႈမၼ်းၵႂႃႇလဵင်ႉဝူဝ်းၵႂၢႆးၼႂ်းပႃႇၵေႃႈ ဢဝ်ထၢၼ်ႇမီႈတႅမ်ႈသႂ်ႇ ၼိူဝ်ၵၢပ်ႇၼႃသေ ၽိုၵ်းယူႇႁင်းမၼ်း တင်းဝၼ်းတင်းဝၼ်း။

ထိုင်မႃးပွၵ်ႈ ႞ ၶူးသွၼ်လူင် မိူင်းတၵ်ႉၵသူဝ်ႇ မႃးႁၼ်မိူဝ်ႈမၼ်းလဵင်ႉဝူဝ်းၵႂၢႆးသေ ဢၢၼ်ႇလိၵ်ႈႁဵၼ်းလၢႆးယူႇၵေႃႉလဵဝ် ငိၼ်းပဵၼ် ဢိတ်းလူမၼ်းတူၺ်းၼႃႈတႃမၼ်းၵေႃႈ လႅပ်ႈပဵၼ်ၵူၼ်းလႅတ်းၵူၼ်းသႅဝ်းဢွၼ်ႇဝႆႉ ၵေႃႉ ႞ ၸင်ႇႁွင်ႉထၢမ်ဝႃႈ -

ဢၢႆႈၸၢႆး - ဢၢႆႈၸၢႆး - မႂ်းၸိုဝ်ႈသင်

ဢေႃႈ... ၶႃႈၸိုဝ်ႈဢၢႆႈႁိူင်းဢေႃႈ

ပေႃႈမႄႈမႂ်းၸိုဝ်ႈသင် - ယူႇတီႈလႂ်

ပေႃႈၶႃႈၸိုဝ်ႈပူႇသႂ် - မႄႈၶႃႈၸိုဝ်ႈၼၢႆးၸိုၼ်ႈ

ယူႇဝၢၼ်ႈလူင်ပဝ်းဢေႃႈ

ပေႃးမႂ်းၶႂ်ႈမေႃလိၵ်ႈမေႃလၢႆး မႃးၸွမ်းၵဝ်လႄႈ

ဢမ်ႇၸွမ်းလႆႈ - ၶႃႈလူဝ်ႇလဵင်ႉဝူဝ်းၵႂၢႆး

ဝၼ်းငၢႆး လူဝ်ႇလုမ်းလႃး ပေႃႈမႄႈ

ၵဝ်တေၵမ်ႉငိုၼ်းဝႆႉ တီႈပေႃႈမႄႈမႂ်းဢိူဝ်ႈ ဝႃႈၼႆသေ - ၸွမ်းဢၢႆႈႁိူင်းဢွၼ်ႇ မိူဝ်းယွၼ်းဢၶႂၢင်ႉ ဝၢင်းပၼ်ငိုၼ်းပၼ်ၶမ်း တႃႇၶဝ်ၵိၼ် ၵုမ်ႇလူမ်ႈသၢမ်ပီယဝ်ႉ။

ဝၢႆးၼၼ်ႉ ဢၢႆႈႁိူင်းဢွၼ်ႇ လႆႈႁဵၼ်းလိၵ်ႈႁဵၼ်းလၢႆး လီလီ ထိုင်သၢမ်ပီယဝ်ႉ ၸင်ႇမႃးၸႂ်းပေႃႈမႄႈမၼ်း မႃးထိုင်ၵၢင်တၢင်း လႆႈႁၼ်ၽီၽၢႆးလူင်တူဝ် ႞ ၶႂၢင်းၶိင်းၶႂၢင်းၶိင်းႁႄႉမၼ်းဝႆႉ၊ ၵမ်းၼႆႉ ဢၢႆႈႁိူင်း လၢၵ်ႈဢဝ် လၢႆးၶွၼ်ႉ ၽွၼ်ႉတၢပ်ႇႁၢပ်ႇသႂ်ႇႁူဝ်းၽၢႆး လၢႆးမၼ်းၵတ်ႉၶႅၼ်ႇဝႅၼ်မဝ် - ၽၢႆးသမ်ႉဝၵ်ႉဢဝ်ၶွၼ်ႉ ႁၵ်းဝိုတ်ႉပႅတ်ႈ ဢၢႆႈႁိူင်း ၼႅတ်ႈဢဝ်ပိုၼ်ၵၢင် တၢင်ႇသႂ်ႇၼႂ်းႁွင်ႈ ယွင်ႈလၼ်ႇပိုတ်းထူၵ်း - ၽၢႆးသမ်ႉၵွမ်းလူင်မႃး ၵိူၵ်းငိူၵ်းၵိူၵ်းငိူၵ်း ဢမ်ႇပဵၼ်ႁိုဝ် - ဢၢႆႈႁိူင်းၵေႃႈ တိုဝ်တႃ တိုတ်ႉဢဝ် ႁွၵ်ႇပုမ်းလူင်မၼ်းယဝ်ႈ - ၼႆႉၵေႃႈ သမ်ႉဢမ်ႇၶဝ်ႈလႃးလႃး - ၽၢႆးယင်း သုတ်ႉမႃးထႅင်ႈလူၵွၼ်ႇ -

ဢၢႆးႁိူင်းၵေႃႈ ႁွၼ်ႇၵူဝ်သေၶႅၵ်း - ၽၢႆးၵႅၵ်းတူဝ်ၼႆႉ မႂ်းၶႂ်ႈၺႃးလႅဝ်းယူဝ်ႉၼႆလႄႈ - ထွတ်ႇလႅဝ်းၽၼ်းၽၢႆႉ လၢႆႉတိုတ်ႉဝိုတ်ႉသႂ်ႇ လၢႆးၵႃႈလၢႆးတႅၼ်း သၢမ်လႅမ်ၸဵတ်းလွၵ်း ၵျွၵ်းမူပ်ႇတူပ်ႇပၼ်ၽၢႆးပေႃးလူမ်ႉၵႂႃႇ ပဵၼ်ၵမ်းပဵၼ်ၵမ်း ၽၢႆးသမ်ႉ ၽုတ်ႇလုၵ်ႉၽြုၵ်ႉၽြၵ်ႉ ဝၵ်ႉဢဝ်လႅဝ်းထိုမ်ႈပႅတ်ႈ ဢၢႆးႁိူင်း ၼႅတ်ႈထူတ်ႇမိတ်ႈယဝ်ႈၼႆႉၵေႃႈ သမ်ႉဢမ်ႇၶဝ်ႈလႃးလႃး - တႃမိုဝ်းႁမ်း ၵမ်းၼႆႉ မိုဝ်းသမ်ႉၸပ်းဝႆႉတင်းသွင်ၽၢႆႇ - ဝၢႆႇဝိၼ်ႇပိၼ်ႇတူဝ်သေ လႄႈ တိၼ်ပိၼ်ႉသႂ်ႇတိၼ်သမ်ႉၸပ်းဝႆႉတင်းသွင်ၶွၼ် -

ဢၢႆးႁိူင်းၸင်ႇဝႃႈ - ပေႃးမႂ်းႁတ်းၵိၼ်ၵဝ်ၵေႃႈ ၵိၼ်လႄႈ ၶိူင်ႈယိင်းတၢင်းတိုဝ်း တိၼ်မိုဝ်းၼွၵ်ႈတူဝ်ၵဝ်ၸိူဝ်းၼႆႉ ဢမ်ႇပႄႉမႂ်းၵေႃႈ ၶိူင်ႈလၢၵ်ႈၼၢၵ်ႈၸၵ်ႉၵျႃႇၼႂ်းတွင်ႉၵဝ်ၼႆႉ ယင်းမီးၼံတႄႉတႄႉ ပေႃးမႂ်းၵိၼ်ၵဝ် - သႆႈၶူင်းၼႂ်းမႂ်းတေၶၢတ်ႇ ပဵၼ်ပွတ်းပဵၼ်တွၼ်ႈ ယင်းတေတၢႆဢွၼ်တၢင်းၵဝ်လူၵွၼ်ႇဢိူဝ်ႈ -

ၽၢႆးလူင်ဝူၼ်ႉၼႂ်းၸႂ်မၼ်းဝႃႈ... ဢႃး - ၵူၼ်းၵေႃႉၼႆႉ တိုၼ်းဢမ်ႇၵူဝ်တၢႆသေဢိတ်း - တေမိူၼ်ၼင်ႇ မၼ်းဝႃႈတႄႉယူဝ်ႉ - ၵဝ်ဢမ်ႇႁတ်းၵိၼ်ယဝ်ႈ - ႁၼ်ၶီႈမၼ်းၵေႃႈ ဢမ်ႇႁတ်းယဵပ်ႇယဝ်ႈ - ၽၢႆးလူင်ၸင်ႇပွႆႇဢွၵ်ႇသေယဝ်ႉ ၶုပ်ႉဝႆႈ ဢၢႆႈႁိူင်းသၢမ်ၵမ်း ဢႅၼ်ႇပတ်ႉၶဝ်ႈထိူၼ်ႇၵႂႃႇၼႆႉယဝ်ႉ "ၺၢၼ်ႇလီၸင်ႇၵေႃႉၸၢႆး - လၢႆးလီၸင်ႇပႄႉပိူၼ်ႈ"။