ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ပိူၼ်ႈဝႃႈႁိုဝ်ၼႅတ်ႈယုမ်ႇ ပေႃးၵုမ်ႇမိုင်ႉသုမ်းၸွမ်း

လုင်းပၢၼ်းၶီႇၼိူဝ်မႃႉ ဢၢႆႈဝႃႉသမ်ႉၵေႃႉၸုင် - ၵႂႃႇႁူပ်ႉ ၵူၼ်းၽုင် ႞ ပိူၼ်ႈဝႃႈယႂ်ႇတၢၼ်ႇၼႆႉ သမ်ႉဢမ်ႇၶႂ်ႈပႆတၢင်း- ၸႂ်ႉလုၵ်ႈလၢင်းပေႃးတၢႆ ဢၼ်ဝႃႈၼၼ်ႉ ပဵၼ်ၶဝ်ၼႆႉယူဝ်ႉ၊ လုၵ်ႈၸၢႆးဢွၼ်ႇမၼ်း ၵေႃႉလဵၵ်ႉလဵၵ်ႉသမ်ႉလႆႈၸုင်မႃႉ - တႃႉလီဢိတ်းလူလႃႈ။ လုင်းပၢၼ်းဝႃႈ ဢၢႆႈလုၵ်ႈၸၢႆး႟ မႂ်းမႃးၶီႇလႄႈ ၵဝ်တေၸုင်။

ၸူဝ်ႈ ႞ သမ်ႉၵႂႃႇႁူပ်ႉၵူၼ်း ထႅင်ႈၽုင် ႞ ပိူၼ်ႈသံႉဝႃႈ ဢလူဝ်ႉ - လုၵ်ႈလၢင်း ဢံႇယဵၼ်ႇဢမ်ႇငႄႈ - ဢံႇႁုၵုင်ႇပေႃႈမႄႈ ဢၼ်ၼႆႉတူၺ်းလူ တူဝ်မၼ်း တိုၵ်ႉၼုမ်ႉတိုၵ်ႉႁႅင်း လႆႈၶီႇမႃႉၽႅၼ်တိၼ် - ၵူၼ်းထဝ်ႈသမ်ႉ လႆႈပႆလိၼ် ယင်းပၢႆၸုင်မႃႉ ၵျႃႉဢိူဝ်ႈၵျႃႉဢိူဝ်ႈ လုၵ်ႈဢွၼ်ႇသင်ပေႉမႃးယွၵ်း မႄႉမႃးလိူင်း။

လုင်းပၢၼ်းဝႃႈ ဢၢႆႈလုၵ်ႈၸၢႆး႟... ပႆႇၸႂ်ႈလၢႆးမၼ်းလူၵွၼ်ႇ လုၵ်ႈဢွၼ်ႇၶီႇၵွႆးၵေႃႈဢမ်ႇႁူင် ၵူၼ်းလူင်ၶီႇၵေႃႈသမ်ႉပႆႇၸႂ်ႈ - ႁႃးလူဝ်ႇၶီႇ တင်းသွင်ၵေႃႉယဝ်ႉၼႆလႄႈ ၶီႇသွၼ်ႉၵၼ်ၵႂႃႇယဝ်ႉ...

ႁႂ်ႈ? ဢလူဝ်ႉ... တူဝ်ၵူၼ်းၸႂ်သတ်း ႁတ်းပေႃးဢမ်ႇၵူဝ်ပိူၼ်ႈတၢႆ ဢၼ်ဝႃႈၼၼ်ႉ ၸႃႉၼႆႉယူဝ်း - သွင်ၵေႃႉပေႃႈလုၵ်ႈလႃးလႃး သမ်ႉမႃးတဵၵ်းၶီႇမႃႉဢွၼ်ႇတူဝ် ႞ ၽိူဝ်ႇသွင်ၶႃၶီႇမႃႉ - တႃႉသွင်ၶႃ ႁၢမ်ၵႂႃႇလႄႈ ယင်းတေလႆႈ ၵုသူလ်ႇလူၵွၼ်ႇဢိူဝ်ႈ - ငိူဝ်ႈဢမ်ႇလိူၵ်ႈငိူဝ်ႈ - ႁႃဢႃႉၵုသူလ်ႇသႂ်ႇတူဝ် ပႄႉလီၵူဝ် - ၼင်ႁူဝ်ပွၵ်ႇၼေႃ။

ယၢမ်းၼၼ် သွင်ၶႃပေႃႈလုၵ်ႈ ၼႅတ်ႈလူင်းမႃႉသေယဝ်ႉ မတ်ႉတိၼ်မႃႉ သွင်ၶွၼ်ပႃႈၼႃႈၸပ်းၵၼ် သွင်ၶွၼ်ပႃႈလင်ၸပ်းၵၼ် ၸၼ်ႁိုတ်ႉတိုတ်ႉယဝ်ႉ ဢဝ်မႆႉၵၢၼ်းသွတ်ႇ လုၵ်ႈၸၢႆးယူႇပႃႈၼႃႈ ဢူႈမၼ်းယူႇပႃႈလင် ႁၢမ်မင်တႆႇၶူဝ်လူင်ၵႂႃႇ ၽိူဝ်ႇၽႅဝ်ၵၢင်ၶူဝ် - ဢလူဝ်ႉလူဝ်ႉ ၼၵ်းၼႃႇ ႁႃးလၢႆႈမႃႇႁႃးၵမ်း ႞ ဝၢင်းလႄႈ ဝၢင်းလႄႈ - မႃႉၵေႃႈ ၶုၼ်ႇတဵၼ်ႈ ၽြုၵ်ႉ ၽြၵ်ႉ ၽြုင်ႉ.. သဵၼ်တူၵ်းၼမ်ႉ တၢႆလၢႆလၢႆယဝ်ႉ၊ ဢေႃး... "ပိူၼ်ႈဝႃႈႁိုဝ်ၼႅတ်ႈယုမ်ႇ ပေႃးၵုမ်ႇမိုင်ႉသုမ်းၸွမ်း" ပဵၼ်ႁႃးပေႃႈလုၵ်ႈယဝ်ႉ - တင်ႈဢဝ်မိူဝ်ႈၼႆႉၵႂႃႇ - ယႃႇပေယုမ်ႇၵႂၢမ်းၽႂ်လႃးလႃးတႃႉ။