ဢပုမ်ႇပွတ်းလႄႈၵႂၢမ်းၵပ်းထုၵ်ႇ/ထၢင်ႇလီသမ်ႉၸႃႉ ထၢင်ႇၵျႃႉၶႅၼ်းၽိတ်း

ၵႂၢင်လူင်တူဝ် ႞ ယူႇတီႈၼႂ်းထိူၼ်ႇ ၼိူဝ်လွႆသုင်သုင် ၽၢတ်ႇၽုင်ၽၢတ်ႇၵေႃႉ သေႃႉလေႃႉၵျွၵ်းဢႅၼ်ႇ လႅၼ်ႈဝႅၼ်လူင်းမႃး ၺႃးၼမ်ႉၼွင်လူင် လုၵ်ႈ ႞ မၼ်းၵိုတ်းၵိၼ်ၼမ်ႉ သမ်ႉမုင်ႈႁၼ်ငဝ်းတူဝ်မၼ်း ပေႃႇမႃးၼႂ်းၼွင် - မၼ်းၵေႃႈ ယဵၵ်ႉယဵင်း တူၺ်းၸွတ်ႇတူၺ်းၸေး - ဝူၼ်ႈဝႃႈ ဢႅင်ႇၵႃႇလၵ်ႉၶၼႃႇ ႁူတႃၶႃဢႅဝ် ၼႂ်းတူဝ်ၶၼ်ႇထႃႇလူင်ၵဝ်ၼႆႉ ဢၼ်လႂ်ႁၢင်လီသေပိူၼ်ႈဢေး - ႁူၵဝ်ၼႆႉ မိူၼ်ၵတေႃႉဢူတ်ႇမွၵ်ႇ - ႁၢင်ဢၼ်ဢွၵ်ႇတီႈၵူၼ်ႈသမ်ႉ မိူၼ်ၸိူၵ်ႈပၢႆပူင်း မီးၽူင်းဢွၼ်ႇၶွၼ်းလွၵ်းလွၵ်း - တိၼ်ဢၼ်မေႃၵျွၵ်း မေႃပႆၼႆႉ သမ်ႉမိူၼ်သဝ်ၵီႇ သဝ်ၵူင်း တူၺ်းလူင်ထိုင်ႁူဝ်ၶဝ်ႇ ငဝ်ႈၶႃႈတေႃႇပၢႆတိၼ်ၵေႃႈ ဢမ်ႇမီးတီႈႁၢင်ႈလီႁၢင်ႈငၢမ်း - ဢမ်ႇမီးတီးလီယွင်ႈလီဢၢမ်းသင် ပဵၼ်သီႇတိၼ်ႁၢမ်ပုမ်ၶီႈႁႃလူင်ဝႆႉလၢႆလၢႆ ။

ၶဝ်ၵဝ်ၼႆႉၵွႆးယဝ်ႉ တီႈဢွၵ်ႇမၼ်းၵေႃႈ တိုင်ႈၽုတ်းၸလုတ်း ဢွၵ်ႇမႃးၼိူဝ်ႁူဝ် - သုင်ပေႃႈပူၼ်ႉတူဝ်ပူၼ်ႉလင်ယူၺ်းယူၺ်း - ပဵၼ်ငုၵ်းပဵၼ်ငူၺ်း ပဵၼ်ၵိင်ႇပဵၼ်ႃႈပွတ်ႇလိူမ်ႈ​ၶျေႃးလီ ပၢႆမၼ်းပေႃးလႅမ်ဝိတ်းဝိတ်း မိတ်းသၢႆႉဝၢႆႇၶႂႃ တူၺ်းၽၢႆႇလႂ်ၵေႃႈ ႁၢင်ႈလီမီးၵုင်ႇပႃႇဝႃႇၵွပ်ႈမၼ်းတႄႉတႄႉ ၶဝ်ၵဝ်ၼႆႉ ႁၢင်ႈလီသေပိူၼ်ႈတင်းမိူင်းယဝ်ႉ - ၵဝ်ႁၵ်ႉၼႃႇ သေၸႂ်လူၵွၼ်ႇ။

ယၢမ်းၼၼ် သိူဝ်လၢႆးၵၢႆႇၵွၼ်လူင်တူဝ် ႞ ၶုပ်ႉၶၢပ်ႉယူင်ႇယၢင်ႇ ယၢင်ႈႁၢင်ႈၵျွၵ်းႁူင် ဝႅၼ်ဝူင်ႁွတ်ႈမႃးၽၢႆႇလင်ၵႂၢင် - ၵႂၢင်ၵေႃႈတူၵ်းၸႂ် ၶုၼ်ႇဝတ်ႉပတ်ႉဢႅၼ်ႇလႅၼ်ႈ ပြိုဝ်ႈ - ႁၢင်ႈပေႃးသိုဝ်ႈႁိူဝ်ႈပေႃးယမ်း - မၼ်းၽႅဝ်ၵႂႃႇ တီႈဢၼ်မီးၶိူဝ်း ပၢႆႉထူင်ႇၼူင်ႇၼၢင်ႇတၢင်ႇပၢတ်ႈ ပေႃးၶႂၢႆႇပေႃးၶႂၢင် - ၶဝ်ၵႂၢင်ႁၢင်ႈလီၼၼ်ႉ ၵႂႃႇၶွင်ႉၵွင်ႉၺႃးၶိူဝ်း - ၵႂၢင်ပေႃးတဵၼ်ႈတွၵ်ႇ ၵျွၵ်းဝႅၼ်ယေႈႅၼ်းသွတ်ႉႁတ်ႉ မတ်ႉထႅင်ႈတိၵ်းတိၵ်း။

ယၢမ်းၼၼ် သိူဝ်လူင်လမ်းမႃး ၺႃးၵႂၢင်ၶမ်ၶိူဝ်း ၸူမ်းသိူဝ်းၼႅၼ်ႇၼႃႇ လေႃႈၵႂႃႇၶူပ်းဢဝ်ငၢႆႈငၢႆႈ - ဢၢႆႈၵႂၢင်ဝူၼ်ႉဝႃႈ ဢေႃး... ၵွပ်ႈပိူဝ်ႈ ၶဝ်ႁၢင်ႈလီၵဝ်ၼႆႉယဝ်ႉ ၸင်ႇလႆးပဵၼ်ယိူဝ်ႇ သိူဝ်လူင် - ပေႃးၵွမ်ႉတိၼ်ၵဝ်ႉတႄႉ ပၢႆႈပူၼ်ႉလႆႈယူႇ “ထၢင်ႇလီသမ်ႉၸႃႉ - ထၢင်ႇၵျႃႉၶႅၼ်းၽိတ်း“ ယဝ်ႉ။