ဢပုမ်ႇပွတ်းလႄႈၵႂၢမ်းၵပ်းထုၵ်ႇ/တၢႆၼႆႉၽႂ်ၵေႃႈၵူဝ် ႁၵ်ႉတူဝ်ၵဝ်ႇလိူဝ်ပိူၼ်ႈ

လုၵ်ႉတီႈ ဝီႇၶီႇပပ်ႉ မႃး

ဢေႃႈ... ႁဝ်းၶႃႈမႄႈလုၵ်ႈ ၸႂ်ဢိင်ၶိင်းပိုင်ႈ ယူႇတႂ်ႈႁူမ်ႈတႂ်ႈငဝ်း - ပိုင်ႈမုၼ်ပိုင်ႈၽုင်း - လုင်းသြႃႇႁဝ်း ၶႅၼ်းတေႃႈဝႆႉၸႂ် ယႂ်ႇယႂ်ႇယၢဝ်းယၢဝ်းသေလႄႈ - ယႃပၼ်ၶိင်းလူင်ၶႃႈၼႆႉသေၵမ်းၶႃႈ။ ၶိင်းလူင်ၶႃႈၼႆႉ မၼ်းမေႃႁၵ်ႉႁဝ်းၶႃႈမႄႈလုၵ်ႈၼႃႇၼႃႇ - ႁူမ်ႈဝႃႈမၼ်းၵႆႉၵိၼ်ၶဝ်ႈမဝ်းၵမ်ၵေႃႈ မၼ်းဢံႇသူပ်းၼမ်ၵႂၢမ်းၶိူဝ်း - ၸိူဝ်းႁဝ်းမႄႈလုၵ်ႈၼႆႉ - မၼ်းဢမ်ႇတွၼ်ႉထႃႉသေပွၵ်ႈၶႃႈၼေႈ -

"ဢိူဝ်ႈ - ၸႂ်ႈဢိူဝ်ႈ ၸႂ်ႈဢိူဝ်ႈ မၼ်းၵေႃႈႁၵ်ႉသူမႄႈလုၵ်ႈ သူမႄႈလုၵ်ႈၵေႃႈ ႁၵ်ႉမၼ်းတႄႉတႄႉယဝ်ႉၼေႃ"

ၸႂ်ဢေႃႈ - ႁဝ်းမႄႈလုၵ်ႈႁၵ်ႉမၼ်း လိူဝ်သေၸႂ်ႁဝ်းၶႃႈလူၵွၼ်ႇ - မီးၽၵ်းဢွၼ်ႇဢိတ်းဢိတ်းဢီႈဢီႈၵေႃႈ ဝႆႉပၼ်မၼ်း - ပုၼ်ႈတႃႇႁဝ်းၶႃႈတႄႉ လႆႈၵိၼ်သင်ၵေႃႈယဝ်ႉ - ပုၼ်ႈတႃႇဢူႈၶဝ်တႄႉ မၢၵ်ႇလုၵ်ႈလႂ်ယႂ်ႇ - ၽၵ်းဢၼ်လႂ်ဝၢၼ် - ၼိူဝ်ဢၼ်လႂ်မွၼ်းၵေႃႈ ႁဝ်းၶႃႈလိူၵ်ႈပၼ်ဢွၼ်တၢင်းၵေႃႈ -

ၸႂ်ႈတႄႉၶႃႈဢိူဝ်ႈ လုင်းသြႃႇ႟ - ပေႃးလုင်းႁဝ်းယႃပၼ် ဢူႈႁဝ်းၶႅၼ်းယဝ်ႉတႄႉ ႁဝ်းပီႈၼွင်ႉ ဢမ်ႇလိုမ်းၵုင်ႇလိုမ်းမုၼ် လုင်းသြႃႇႁဝ်းသေပွၵ်ႈ - ၶႂ်ႈလႆႈသင် ၶႂ်ႈၵိၼ်သင်ၵေႃႈ ႁဝ်းတေသိုဝ်ႉမႃးလူႇဢေႃႈ -

ၶႃႈၵေႃႈဝႃႈ မိူၼ်ပီႈၼၢင်းႁဝ်းလၢတ်ႈၼၼ်ႉၼင်ႇၵဝ်ႇ ပေႃးလူင်းသြႃႇႁဝ်းၵၢၼ်ၼမ် - လူဝ်ႇတမ်ယႃႈယႃလူဝ်ႇတဵၵ်းၼမ်ႉတမ်ၶဝ်ႈၸိူဝ်းၼႆႉ ၸႂ်ႉၶႃႈလႄႈ - ၶႃႈတေၵႂႃႇၸွႆႈၵူႈဝၼ်း ၵူႈဝၼ်း၊

ဢိူဝ်ႈ ဢိူဝ်ႈ - ၸႂ်ႈယဝ်ႉ ၸႂ်ႈယဝ်ႉ - သူပီႈၼွင်ႉၵေႃႈ ႁၵ်ႉဢူႈသူတႄႉတႄႉ ဢူႈသူၵေႃႈ ႁၵ်ႉလုၵ်ႈယိင်း လုၵ်ႈၸၢႆးမၼ်း ၵူႈၵေႃႉယူႇ ၵဝ်တေယႃပၼ်ႁႂ်ႈၸဵဝ်းႁၢႆ ၸဵဝ်းၶႅၼ်းၵႂႃႈ၊ ယႃႇပေမႆႈၸႂ်သင် - ၸိူဝ်းတင်ႈၼမ်ႉဢုၼ်ႇၵေႃႈ ၵႂႃႇတင်ႈလႄႈ - ၸိူဝ်းလူဝ်ႇႁုင်ၶဝ်ႈႁုင်ၽၵ်းၵေႃႈႁုင် - ၵၢၼ်ၽႂ်ၵၢၼ်မၼ်း - ပေႃးၵဝ်လူဝ်ႇၸႂ်ႉလူဝ်ႇလၢတ်ႈ ၵဝ်ၸင်ႇႁွင်ႉသူမႃး - ယႃႇမႆႈၸႂ်သင် ၵႂႃႇ - ၵႂႃႇ - ၵႂႃႇ....

ဢိူဝ်ႈ လုင်းသြႃႇ႟ - ၵဝ်ၶႃႈၼႆႉ သၢမ်ဝၼ်းသီႇဝၼ်းယဝ်ႉ ၶဝ်ႈဢမ်ႇတူၵ်းၶေႃးသေမဵတ်ႉ - ပေႃးၵိၼ်ၶဝ်ႈသမ်ႉ ႁၢၵ်ႈတိၵ်းတိၵ်း -= သၼ်လင်ပေႃးမူၺ်ႈၸိုတ်ႈၸိုတ်ႈ ဢလိုဝ်ႉလိုဝ်ႉ - ၶႃႈၵူဝ်တၢႆၼႃႇ - လုၵ်ႈမႄးၶႃႈၵေႃႈပႆႇပႄႉတူဝ် - ၶဝ်သမ်ႉႁၵ်ႉၶႃႈၼႃႇၼႃႇၼေႈ။

ၸႂ်ႈဢိူဝ်ႈၸႂ်ႈဢိူဝ်ႈ - ၵွႆးၵႃႈ ပေႃးၸဝ်ႈၵဝ်ႇ ၶႂ်ႈႁုလုၵ်ႈမေးၸဝ်ႈၵဝ်ႇ ႁၵ်ႉၸဝ်ႈၵဝ်ႇ ၵႃႈႁိုဝ်ၼႆၵေႃႈပႂ်ႉထႃႈတူၺ်း - ႁႃးတေပၼ်ယႃႈယႃဝၢၼ်ႇ ႞ - ပေႃးၸဝ်ႈၵဝ်ႇၵိၼ်ယဝ်ႉ တေမိူၼ်ၼင်ႇ ၵူၼ်းတၢႆဝႆႉ - ၵွႆးၵႃႈပိူၼ်ႈလၢတ်ႈသင်ၵေႃႈ သမ်ႉတေငိုၼ်းယူႇ၊ ႁုယူႇ ပေႃးၸဝ်ႈၵဝ်ႇယဝ်ႉ ႁုယဝ်ႉ ငိၼ်းယဝ်ႉ လီလီငၢမ်းငၢမ်း ႁႃးၸင်ႇပၼ်ယႃႈၵႄႈမၼ်း - ယႃႈတၢႆၶိုၼ်းဢိူဝ်ႈ ရေႃးၵႃႇတၢင်းပဵၼ်ၸဝ်ႈၵဝ်ႇၵေႃႈ တေႁၢႆၸွမ်း ၶႅၼ်းၸွမ်းၵမ်းလဵဝ်ယဝ်ႉ -

ဢေႃႈ ဢေႃႈ... ၸူမ်းၶႃႈ

ႁိူဝ်ႉ ႁိူဝ်ႉ - ၵိၼ်လႄႈ ဢိုၵ်ႉသဵင်ႈသဵင် - ပေႃးယဝ်ႉၵေႃႈ မႄးၼွၼ်းလီလီ။

“ ဢႁိူမ်ႉ ဢႁိူမ်ႉ - လၢၼ်ယိင်း လၢၼ်ၸၢႆးဢွၼ်ႇၶဝ်ၸိူဝ်းၼႆႉ႟ - ႁွင်ႉပႃးမႄႈသူမႃးဝႆးဝႆး မႃးတူၺ်းဢူႈသူၼႆႉလူး“

ဢေႃႈ ဢေႃႈ - မႃးယဝ်ႉ မႃးယဝ်ႉၶႃႈ။

ၵဝ်ၸင်ႇ တေတိုၵ်းပၼ်ယႃႈယႃဝၢၼ်ႇ ႞ ၵွႆး - ဢူႈသူၼႆႉ မိူၼ်ႁၢင်ႈ ပေႃးဢံႇထူၺ်ႈၸႂ်ယဝ်ႉၼေႈ ၵံးတူၺ်းလူး ၵံးတူၺ်းလူး -

ပေႃးၵမ်းၼၼ်ႉ လုၵ်ႈလၢင်း ၼၢင်းမေးမၼ်း ဢွၼ်ၵၼ်ႁႆႈ ပေႃးပၼ်းၸွင်ႇၸွင်ႇ - လုင်းသြႃႇ႟ တေႁတေ်းႁိုဝ်ၶႃႈ ၸွႆႈပၼ်ႁဝ်းသေၵမ်းၼႆလႄႈ ပူႇသြႃႇၸင်ႇဝႃႈ...

ဢိူဝ်ႈ - သူႁၵ်ႉဢူႈသူ လိူဝ်သေၸႂ်ၵဝ်ႇဢမ်ႇၸႂ်ႈႁႃႉ?

ၶဝ်ၽွမ်ႉၵၼ်ဝႃႈ ႁၵ်ႉဢေႃႈ ႁၵ်ႉဢေႃႈ ႁၵ်ႉလိူဝ်ၸႂ် - ႁၵ်ႉလိူဝ်ၵူၼ်းတင်းမိူင်းၶႃႈယဝ်ႉ - ယႃပၼ်ဝႆးဝႆးၶႃႈလႄႈ

ဢိူဝ်ႈ - လီယဝ်ႉ လီယဝ်ႉ ၵဝ်တေယႃပၼ်ဝႆးဝႆး - ၵွႆးၵႃႈယႃႈယႃၵဝ်ဝၢၼ်ႇၼႆႉ ၽႂ်တေၵိၼ် ပေႃးၵိၼ်ယဝ်ႉ တေႁၢၵ်ႈ - ႁၢၵ်ႈသူၼၼ်ႉ ၵဝ်သံႉတေဢဝ်သႂ်ႇလေႃး ယႃႈယႃထႅင်ႈၼႄး ႞ တိုၵ်းပၼ်ဢူႈသူ - ဢူႈသူတႄႉ တေၶႅၼ်းၵမ်းလဵဝ် - ရေႃးၵႃႇတၢင်းပဵၼ်မၼ်းၵေႃႈ တေႁၢႆလၢႆမူတ်းမူတ်း ၵွႆးၵႃႈ - ၵေႃႉႁၢၵ်ႈၼၼ်ႉသမ်ႉ တေတၢႆဢိူဝ်ႈ - မႃးလႄႈ ၽႂ်တေၵိၼ်။

ယၢမ်းၼၼ် ၽႂ်ၵေႃႈဢမ်ဢိုတ်း ဢမ်ဢိုတ်း ယိုဝ်ႈယိုတ်းၵိုတ်းၵၢတ်းၵႂင်ၵိင်လူင်ယူႇ ႁင်းၽႂ်ႁင်းမၼ်း - ႁႆႈၵေႃႈဢမ်ႇႁတ်းႁႆႈ ၵိၼ်ၵေႃႈဢမ်ႇႁတ်းၵိၼ် ဢမ်ႇၸၢင်ႈတွပ်ႇၵႂၢင်းပူႇသြႃႇၼၼ်ႉသေၵေႃႉ - တေႃႉတႄႉ ၽႅပ်ႉတႃယွပ်းယွပ်းယႅပ်းယႅပ်း - မႄႈယၵ်ႉတူၺ်းလုၵ်ႈ လုၵ်ႈဝၢႆတူၺ်းမႄႈယူႇ

ပူႇသြႃႇဝႃႈ မႃးလႄႈ - မႃးလႄႈ - ၵေႃႉလႂ်တေၵိၼ်၊ ၸိုင်ဝႃႈသူႁၵ်ႉဢူႈသူ လိူဝ်သေၸႂ်ၵဝ်ႇၵွၼ်ႇၼႆ - မႃးလႄႈ ၵေႃႉလႂ်ႁၵ်ႉ - ႁၵ်ႉၵူႈၵေႃႉယူႇၶႃႈ ၵွႆးၵႃႈႁဝ်းဢမ်ႇႁတ်းၵိၼ် ၊ ပူႇသြႃႇၸင်ႇ ယိပ်းငမ်ၵမ်ဢဝ်ၽွင်ႈယႃႈယႃ ၽုၵ်းသႂ် ၼႂ်းသူပ်းဢူႈၶဝ်၊ ဢူႈၶဝ်ၵေႃႈ ၵိုင်ႉၵၢင်ႉ ၽုတ်ႇၽၢတ်ႇလုၵ်ႈမႃးၼင်ႇယူႇ တုၵ်းသုၵ်းသေ ယဝ်ႉဝႃႈ - ဢေႃႈ တၢႆၼႆႉၽႂ်ၵေႃႈၵူဝ် - ႁၵ်ႉတူဝ်ၵဝ်ႇလိူဝ်ပိူၼ်ႈ ဢၼ်ဝႃႈၼႆႉ - ၵဝ်ပွင်ႇၸႂ်လီလီငၢမ်းငၢမ်းယဝ်ႉ။