မွၵ်ႇၵွၼ်တေမွၵ်ႇၼႄယူႇ/တွၼ်ႈႁူၵ်း ယွၼ်းတၢင်းႁၵ်ႉ
ၶူးမေႃယႃ ၸၢႆးဢွၼ်ၶမ်းၼႆႉ ၵပ်းၵၢႆလူၺ်ႈ လွင်ႈၶူးမေႃယႃသေ ၽူႈလႂ်ၽႂ်ပဵၼ် တၢင်းပဵၼ်ၸိူင်ႉႁိုဝ်ၼႆၵေႃႈ မၼ်းႁူႉထိုင်လႆႈယူႇ ၽႂ်မီးလူမ်းႁူဝ်ၶိုၼ်ႈ ၽႂ်မီးလူမ်ႈႁူဝ်ၸႂ်တွတ်ႇၼႆ ၽႂ်မီးတၢင်းပဵၼ်သင်ၼႆ မၼ်းႁူႉလႆႈယူႇသေတႃႉ ၸွင်ႇၼၢင်လၢဝ်လႅင်း တေမီးႁူဝ်ၸႂ်ႁၵ်ႉမၼ်းႁိုဝ်ၼႆတႄႉ မၼ်းဢမ်ႇႁူႉလႆႈ။
ၵၢင်ၸႂ်မၼ်းတႄႉ လွမ်ႁၵ်ႉၼၢင်းလၢဝ်လႅင်းဝႆႉယဝ်ႉ၊ လွင်ႈတၢင်းမိုတ်ႈၵိုဝ်း ၶႃသွင်ၵေႃႉၵေႃႈ လိူဝ်တွၼ်းမႃးသေ ဢွၼ်တၢင်းတႄႉꧦယူႇ ၵွႃႇ ၵိၼ်ၼမ်ႉဝၢၼ် ၼမ်ႉၵတ်းၵေႃႉၵႆႉꧦၵႂႃႇၸွမ်းၵၼ် ၵႂႃႇၵိၼ်ၶဝ်ႈသဵၼ်ႈၶဝ်ႈသွႆးၵေႃႈ ယင်းၸွမ်းၵၼ်ၵွၼ်ႇယဝ်ႉ။ ပိူင်ၼိုင်ႈ ၵူၼ်းလူင်တင်းသွင်ၽၢႆႇၵေႃႈ သမ်ႉလွမ်ꧦလႆႈၸႂ် ၶႃသွင်ၵေႃႉၼင်ႇၵဝ်ႇလႄႈ လႆႈႁၼ်ထိုင်သၢႆငၢႆ ၼင်ႇၼႆ ပဵၼ်သၢႆငၢႆလီယူႇသေ ၸၢႆးဢွၼ်ၶမ်း ၸင်ႇယွၼ်းတၢင်းႁၵ်ႉ ၼၢင်လၢဝ်လႅင်းယဝ်ႉ။ ၽွင်းၶႃသွင်ၵေႃႉ ၸူဝ်းၵၼ်ၼၼ်ႉ ၸၢႆးဢွၼ်ၶမ်း ၸင်ႇဝႃႈ-
“ၼၢင်းလၢဝ်လႅင်း”
လႆႈငိၼ်းသဵင် ၸၢႆးဢွၼ်ၶမ်း ႁွင်ႉၸိုဝ်ႈမၼ်းၸိူင်ႉၼင်ႇၼႆ ၸၢႆးဢွၼ်ၶမ်း တေသိုပ်ႇလၢတ်ႈထႅင်ႈၼင်ႇႁိုဝ် ယိူင်းဢၢၼ်းၶႂ်ႈလၢတ်ႈ ၸိူင်ႉၼင်ႇႁိုဝ်ၼႆ ၼၢင်းလၢဝ်လႅင်း ပေႃးႁူႉထိုင်ဝႆႉယဝ်ႉ၊ ၼၢင်းလၢဝ်လႅင်း တေႃႉတႄႉလွမ်တူၺ်း ၸၢႆးဢွၼ်ၶမ်းသေ
“ဢီႈသင်ၶႃႇ ပီႈၸၢႆးဢွၼ်ၶမ်း”
“ဢေႃ ... ပီႈၸၢႆးၶႂ်ႈထၢမ်တူၺ်း လွင်ႈၼိုင်ႈဢိူဝ်ႈ”
“ထၢမ်ၶႃႈလႄႈ”
“ၵူၼ်းၵေႃႉၼိုင်ႈၼႆႉ ပေႃးဝႃႈ ၼႂ်းတူဝ်မၼ်း မီးဝႆႉရေႃးၵႃႇတၢင်း ပဵၼ်ၸိူင်ႉႁိုဝ်ၼႆ သင်ၸိူဝ်ႉဝႃႈ ဢမ်ႇၶိူင်ႈယိပ်း ၶူးမေႃယႃသေ ၸၢမ်းတူၺ်းၼႆ ၸွင်ႇတေႁူႉထိုင်လႆႈယူႇႁိုဝ် ၼၢင်းလၢဝ်လႅင်း”
“ၸွမ်းၼင်ႇ ဢဝ်ၶိူင်ႈယိပ်းတိုဝ်း ၵၢပ်ႈပၢၼ်ယၢမ်းလဵဝ်ၼႆႉသေ ၸၢမ်းတူၺ်းၼႆတႄႄႉ ႁူႉလႆႈယူႇဢေႃႈ”
“ပေႃးဝႃႈႁူႉလႆႈယူႇၼႆၸိုင် ယၢမ်းလဵဝ် ပီႈၸၢႆးဢွၼ်ၶမ်း ႁူႉမဵဝ်းၼိုင်ႈဢိူဝ်ႈ ၼၢင်းလၢဝ်လႅင်း”
“ၸိူင်ႉႁိုဝ် - ပီႈၸၢႆးဢွၼ်ၶမ်း”
“ဢေႃ ယၢမ်းလဵဝ် ၵၢင်ၸႂ်ပီႈၸၢႆးတႄႉ ႁၵ်ႉၼၢင်းလၢဝ်လႅင်းဝႆႉယဝ်ႉ ၼႂ်းၵၢင်ၸႂ် ၼၢင်းလၢဝ်လႅင်းၼၼ်ႉ ၸွင်ႇတေၶိုၼ်းႁၵ်ႉ ပီႈၸၢႆးၸိူင်ႉႁိုဝ်ၼႆ တေလႆႈႁဵတ်းႁိုဝ်ႁူႉဢဝ်လႃႇ ၼၢင်းလၢဝ်လႅင်း”
လႆႈငိၼ်းၵႂၢမ်းၼင်ႇၼၼ် ၵေႃႉလၢတ်ႈၵေႃႈ ႁူဝ်ၸႂ်တွတ်ႇလင်ႁႅင်းတႄႉꧦသေ လၢတ်ႈယဝ်ႉ ၵေႃႉဢၼ်ထွမ်ႇငိၼ်းၵေႃႈ ႁူဝ်ၸႂ်ပဵၼ်ဢၼ်တွတ်ႇလင်ႁႅင်းတႄႉꧦ ၼင်ႇၵဝ်ႇ ၼၢင်းလၢဝ်လႅင်း တေလႆႈႁဵတ်းႁိုဝ်တွပ်ႇၵေႃႈ မၼ်းၼၢင်းဢမ်ႇၸၢင်ႈတွပ်ႇလႆႈငၢႆႈလႄႈ မၼ်းၼၢင်းလွမ်ၵူမ်ႈၼႃႈဝႆႉ ဢိတ်းၼိုင်ႈယဝ်ႉ ၸၢႆးဢွၼ်ၶမ်း ၸင်ႇၶိုၼ်းထၢမ်ဝႃႈ-
“ၼၢင်းလၢဝ်လႅင်း တေလႆႈႁဵတ်းႁိုဝ်”
ၼၢင်လၢဝ်လႅင်း ဢမ်ႇၸၢင်ႈႁဵတ်းႁိုဝ်တွပ်ႇ ယူႇႁိုင်ၵႂႃႇတၢၼ်ႇꧦ ၸၢႆးဢွၼ်ၶမ်းထူၺ်ႈၸႂ်လူင် ၵမ်းၼိုင်ႈသေႁႃႉ?”
ၼၢင်းလၢဝ်လႅင်း ၸင်ႇလွမ်တူၺ်း ၸၢႆးဢွၼ်ၶမ်း ၵမ်းၼိုင်ႈ ၶိုၼ်းတူၺ်းၵွႃႇတၢင်ႇတီႈသေ လၢတ်ႈဝႃႈ-
“ပီႈၸၢႆးဢွၼ်ၶမ်း ... ၶေႃႈထၢမ်ပီႈၸၢႆးဢွၼ်ၶမ်း တင်းသွင်ဢၼ်ၼၼ်ႉ ဝၢႆးၼႆႉ လၢဝ်တေတွပ်ႇပၼ်ယူႇ ၵူၺ်းၵႃႈ ယၢမ်းလဵဝ်တိုၵ်ႉၸဝ်ႉလႄႈ ပိူင်ၼိုင်ႈ ပႆႇၸၢင်ႈဝူၼ်ႉလႄႈပိူင်ၼိုင်ႈ ၸမ်ပွႆးတွပ်ႇလိၵ်ႈလႄႈပိူင်ၼိုင်ႈ ၵွပ်ႈၼႆ လၢဝ်ပႆႇၸၢင်ႈမွၵ်ႇၵွၼ်ႇ ပီႈၸၢႆးဢွၼ်ၶမ်း ၶႅၼ်းတေႃႈ ပၼ်ၶၢဝ်းယၢမ်း လၢဝ်ႁႂ်ႈလႆႈဝူၼ်ႉၵွၼ်ႇလႄႈၼႃႈ”
“ဢဝ်လၢဝ်လႅင်းဝႃႈလႃႈ ... ပီႈၸၢႆးတႄႉ တေပႂ်ႉဝႆႉယူႇ ၵူႈယၢမ်းယဝ်ႉ ၵၢင်ၸႂ်ပီႈၸၢႆးဢွၼ်ၶမ်းတႄႉ မီးဝႆႉၸိူင်ႉၼင်ႇႁိုဝ်ၵေႃႈ မွၵ်ႇလၢတ်ႈၼႄၸႅင်ႈꧦယဝ်ႉ ပႅင်ႈၼင်ႇဢၼ် ပီႈၸၢႆးဢွၼ်ၶမ်း ႁၵ်ႉၼၢင်းလၢဝ်လႅင်းၼႆႉတႄႉ သင်ၸိူဝ်ႉဝႃႈ ၼၢင်းလၢဝ်လႅင်းၵေႃႈ ၽွမ်ႉၼႆၸိုင် ဢဵၼ်းဢၢၼ်း ၶပ်ႉၶိုင် ၶိုၼ်းၶႂ်ႈတွင်ႈထၢမ်ဝႆႉ တီႈပေႃႈမႄႈ ၵူၼ်းလူင်ၶဝ်ၵွၼ်ႇယဝ်ႉ ၵူၺ်းၵႃႈ ယၢမ်းလဵဝ်ၼႆႉ ပႆႇလႆႈႁူႉထိုင် ၵၢင်ၸႂ်ၼၢင်းလၢဝ်လႅင်းလႄႈ လွင်ႈၸိူဝ်းၼႆႉ တိုၵ်ႉလူဝ်ႇလႆႈဝူၼ်ႉသေ ၼွၼ်းၾၼ်ဢဝ်ၵူၺ်းၵွၼ်ႇယဝ်ႉ”
ဝၢႆးသေၸၢႆးဢွၼ်ၶမ်း ပိုတ်ႇၽုၺ်ႇႁူဝ်ၸႂ်တၢင်းႁၵ်ႉမၼ်းၼင်ႇၼႆ ၼၢင်းလၢဝ်လႅင်း လႆႈႁူႉငိၼ်းၵႂႃႇသေ မၼ်းၼၢင်း ပဵၼ်ဢၼ်ၶမ်ၸႂ်မၼ်းယူႇတႄႉꧦ မၼ်းၼၢင်း တေလႆႈႁဵတ်းႁိုဝ်တႅပ်းတတ်း တေလႆႈႁဵတ်းႁိုဝ်တွပ်ႇ ၶေႃႈၵႂၢမ်းၸၢႆးဢွၼ်ၶမ်းၼေႃး ... ၼႆဝူၼ်ႉယူႇၵေႃႈ တေႃႈဢမ်ႇႁတ်းလၢတ်ႈဢွၵ်ႇ မၢင်ၵမ်းမၢင်ၵမ်း ၼႂ်းတၢင်းဝူၼ်ႉမၼ်းၼၢင်းၼၼ်ႉ တိုၵ်ႉဝူၼ်ႉၺႃးလွင်ႈ ၸၢႆးလိုၼ်းၶမ်းယူႇတိၵ်းꧦလႄႈ တေၶၢတ်ႇပႅတ်ႈ ၸၢႆးလိုၼ်းၶမ်းႁိုဝ် တေမၢတ်ႇၸပ်းၸၢႆးဢွၼ်ၶမ်းႁိုဝ်ၼႆ မၼ်းၼၢင်းဢမ်ႇၸၢင်ႈတႅပ်း တတ်း တေၸင်းၸၢႆးလိုၼ်းၶမ်းၵေႃႈ ဢမ်ႇပႆႇပဵၼ်လႆႈ တေႁၵ်ႉၸၢႆးဢွၼ်ၶမ်းၵေႃႈ တေႃႈပႆႇပဵၼ်လႆႈလႄႈ ယၢမ်းလဵဝ်တႄႉ ပဵၼ်တၢင်းမႆႈၸႂ်ယူႇၵူၺ်းယဝ်ႉ။
ဝၼ်းၼိုင်ႈ ၸၢႆးဢွၼ်ၶမ်းႁေႃႈၵႃးသေ ၽႅဝ်မႃး တီႈႁိူၼ်း ၼၢင်းလၢဝ်လႅင်းၶဝ်ယဝ်ႈ ၸမ်ပွႆးထၢမ်လိၵ်ႈယဝ်ႉလႄႈ တိုၵ်ႉၺႃးၽွင်း ၼၢင်းလၢဝ်လႅင်း တူၺ်းလိၵ်ႈယူႇ ... ၸၢႆးဢွၼ်ၶမ်း ၶဝ်ႈမႃးၼႂ်းႁိူၼ်း မႃးႁၼ်ဢူႈၼၢင်းလၢဝ်လႅင်းၶဝ် တိုၵ်ႉတူၺ်းလိၵ်ႈၽိုၼ်ၶၢဝ်ႇယူႇ ဢူႈၼၢင်းလၢဝ်လႅင်းၶဝ် လႆႈႁၼ်ၸၢႆးဢွၼ်ၶမ်းမႃးလႄႈ မၼ်းၸင်ႇဝႃႈ-
“ဢေႃႈ ... မေႃယႃၸၢႆးဢွၼ်ၶမ်း မႃးၼင်ႈလႄႈ မႃးၼင်ႈလႄႈ”
“ဢေႃႈ ဢေႃႈ”
“ၸၢႆးဢွၼ်ၶမ်း ႁဵတ်းသင်ဝူင်ႈၼႆႉ ဢမ်ႇသူႈၽႅဝ်မႃး တီႈႁိူၼ်း လုင်းၶဝ်လႃႇ ၵၢၼ်ၼမ်ႁႃႉတေႃႈဝႃႈ”
“ဢေႃႈ ... ၵၢၼ်ၼမ်တၢၼ်ႇꧦဢေႃႈ ယၢမ်းလဵဝ် ၼႃႈၵၢၼ်ၶႃႈ တူၵ်းမႃးယဝ်ႉလႄႈ ၶႃႈတေလႆႈၶၢႆႉၵၢၼ်ၵႂႃႇတီႈ မေႇမဵဝ်ႉဢေႃႈ ၵွပ်ႈၼႆ ၶႃႈမႃးတူင်ႉတၵ်ႉလုင်းႁဝ်းၶဝ်ဢေႃႈ”
“ဢေႃႈ ... ဝႃႈၼၼ်ႁႃႉ?”
ဢူႈၼၢင်းလၢဝ်လႅင်းၶဝ် ၸင်ႇႁွင်ႉၼၢင်းလၢဝ်လႅင်း ဢၼ်မီးယူႇ တီႈၼိူဝ်ႁိူၼ်းၼၼ်ႉယဝ်ႉ၊
“လုၵ်ႈယိင်း ... ၼၢင်းလၢဝ်လႅင်း လူင်းမႃးၵမ်းၼိုင်ႈလူး”
“ဢေႃႈ ... ဢီႈသင်ၶႃႈ မႃးၶႃႈယဝ်ႉ”
ၼၢင်းလၢဝ်လႅင်းၵေႃႈ လူင်းႁိူၼ်းမႃးယဝ်ႉ လႆႈႁၼ်ၸၢႆးဢွၼ်ၶမ်း မႃးမီးဝႆႉ ၼႂ်းလုၵ်းၶႅၵ်ႇလႄႈ မၼ်းၼၢင်းၸင်ႇတၵ်ႉဝႃႈ
“ဢေႃႈ ... ပီႈၸၢႆးဢွၼ်ၶမ်း ၽႅဝ်မႃးႁိုင်ယဝ်ႉၶႃႈႁႃႉ?”
“ၸင်ႇႁႃၽႅဝ်ၵူၺ်းၼင်ႇၵဝ်ႇ”
ဢူႈၼၢင်းလၢဝ်လင်းၶဝ် ၸင်ႇဝႃႈ
“ၼႄႈ ... ၼႃႈၵၢၼ် ၸၢႆးဢွၼ်ၶမ်း တူၵ်းမႃးယဝ်ႉလႄႈ မၼ်းတေၶၢႆႉၵႂႃႇ မေႇမဵဝ်ႉၼႆဝႃႇ”
ၼၢင်းလၢဝ်လႅင်း ဢၢမ်းၵႂႃႇသေ
“တေႉႁႃႉ ပီႈၸၢႆးဢွၼ်ၶမ်း”
“တႄႉဢိူဝ်ႈ ၵွပ်ႈၼႆ ပီႈၸၢႆးဢွၼ်ၶမ်း မႃးတူင်ႉတၵ်ႉ ၼၢင်းလၢဝ်လႅင်းၶဝ်ယဝ်ႉၼႆႉ”
“ပီႈၸၢႆးဢွၼ်ၶမ်း တေၶၢႆႉၵႂႃႇမိူဝ်ႈလႂ်ၶႃႈ”
“တေဢၢင်ႈၵႂႃႇမိူဝ်ႈၼႆႉဢိူဝ်ႈ”
ၼၢင်းလၢဝ်လႅင်း လႄႈ ဢူႈၶဝ်ၵိုင်ႉၵၢင်ႉဢၢမ်းၵႂႃႇသေ ဢူႈၼၢင်းလၢဝ်လႅင်းၸင်ႇဝႃႈ
“ပႄႉၵႂႃႇၼႅတ်ႈလႃႇ ၸၢႆးဢွၼ်ၶမ်း”
“ဢေႃႈ ... ၵႂႃႇၸွမ်းၼႃႈၵၢၼ်ၶႃႈလႄႈ”
ၼၢင်းလၢဝ်လႅင်း ၸင်ႇဝႃႈ
“ပေႃးပီႈၸၢႆးဢွၼ်ၶမ်း ၽႅဝ်မေႇမဵဝ်ႉၼႆ မိူဝ်းဢႅဝ်ႇႁိူၼ်းလၢဝ်ၶဝ် တီႈမေႇမဵဝ်ႉၽွင်ႈၼႃႈ ... လၢဝ်တေတႅမ်ႈလိၵ်ႈ ပၼ်ႁဵင်းလိၵ်ႈတီႈႁိူၼ်းလႆ”
“တီႈမေႇမဵဝ်ႉၵေႃႈ လၢဝ်လႅင်းၶဝ် မီးဝႆႉႁိူၼ်း လင်ၼိုင်ႈႁႃႉ”
ၼၢင်းလၢဝ်လႅင်းယုမ်ႉသေ ငွၵ်းႁူဝ်ၼႄယဝ်ႉ ဢူႈၶဝ်ၸင်ႇဝႃႈ
“မီးဢိူဝ်ႈ ... မိူဝ်ႈသိုၼ်းၼၼ်ႉ မႄႈၼၢင်းလၢဝ်လႅင်းၶဝ် ၸင်ႇႁႃ မိူဝ်းၵႂႃႇၵူၺ်း တီႈၼၼ်ႈတႄႉ မီးပီႈဢၢႆႈလႄႈ ၼွင်ႉၸၢႆး ၼၢင်းလၢဝ်လႅင်းဝႆႉယူႇဢိူဝ်ႈ မိူဝ်းဢႅဝ်ႇၼႃႈ”
“ဢေႃႈ ... ဢေႃႈ ”
“လူဝ်ႇတၢင်းၸွႆႈထႅမ် ၸိူင်ႉႁိုဝ်ၼႆၵေႃႈ လၢတ်ႈလႄႈၼႃႈ”
“ဢေႃႈ ... ဢေႃႈ ... ၸူမ်းၶႃႈယဝ်ႉ”
ၶဝ်သိုပ်ႇဢုပ်ႇၵၼ်တၢၼ်ႇꧦသေ ဝၼ်းၼၼ်ႉ ၸၢႆးဢွၼ်ၶမ်း ၶိုၼ်ႈၵႂႃႇမေႇမဵဝ်ႉယဝ်ႉ။