မွၵ်ႇၵွၼ်တေမွၵ်ႇၼႄယူႇ/တွၼ်ႈၸဵတ်း ပႃႈသွႆႈၶမ်း ၶဝ်မေႈလုၵ်ႈ
ဝဵင်းမေႇမဵဝ်ႉ ဢမ်ႇၼၼ် ဝဵင်းႁူဝ်ပၢင်ႇ ပဵၼ်ဝဵင်းႁၢင်ႈလီဝဵင်းၼိုင်ႈယဝ်ႉ၊ ယၢမ်းလဵဝ် ၸၢႆးဢွၼ်ၶမ်း မႃးလူင်ၵၢၼ်မၼ်း တီႈႁူင်းယႃလူင်ၵူၼ်းမိူင်းယူႇ ႁဵတ်းၼႆသေ မူတ်းၶၢဝ်းယၢမ်းၵႂႃႇ ဝၼ်းၼိုင်ႈယဝ်ႉဝၼ်းၼိုင်ႈ သမ်ႉပေႃးလႆႈၵႂႃႇလိူၼ်ၼိုင်ႈယဝ်ႉ။
ၸွမ်းၼင်ႇၼႃႈၵၢၼ်မီးဝႆႉၼၼ်ႉ ၼႂ်ၼႆႉၶူးမေႃယႃၸၢႆးဢွၼ်းၶမ်း လဵပ်ႈတူၺ်းၵူၼ်းပဵၼ် သမ်းၶဵမ်ပၼ် တႅၵ်ႈလိူတ်ႈတႅၵ်ႈလူမ်းၼၢဝ်ပၼ်မေႃယႃ တႅမ်ႈပၼ်ဢၼ်ၵူၼ်းပဵၼ်လူဝ်ႇၼၼ်ႉ ၵေႃႉၼိုင်ႈယဝ်ႉၵေႃႉၼိုင်ႈ တီႈၵူႇၼိုင်ႈယဝ်ႉၵူႇၼိုင်ႈယူႇ။
ႁွတ်ႈထိုင်မႃး တီႈၵူႇဢၼ်ၼိုင်ႈ ၵူၼ်းပဵၼ်ၵေႃႉၼႆႉ မိူဝ်ႈဝႃးပႆႇႁၼ်မီး မၼ်းတိုၵ်ႉႁၼ် ၼႂ်ၼႆႉၵူၺ်းလႄႈ မၼ်းၸင်ႇမႃးဢဝ်တူၺ်း ၶႅပ်း တီႈတိၼ်ၵူႇၼၼ်ႉယဝ်ႉ၊ ၸိုဝ်ႈၵူၼ်းပဵၼ်ၼၼ်ႉ လႆႈႁၼ်တႅမ်ႈဝႆႉဝႃႈ “မေႃသွၼ်ပႃႈသွႆႈၶမ်း” ဢႃႇယူႉ (50) ၼႆလႄႈ မၼ်းၸင်ႇထၢမ်ဝႃႈ
“ဢေႃႈ ... မေႃသွၼ်ပႃႈသွႆႈၶမ်း မႃးၶိုၼ်ႈႁူင်းယႃ မိူဝ်ႈဝႃးၶႃႈႁႃႉ?”
ပႃႈသွႆႈၶမ်းၵေႃႈ ယၵ်ႉတူၺ်းၼႃႈ ၶူးမေႃယႃမႂ်ႇၼၼ်ႉသေ
“ၸႂ်ႈဢေႃႈ ၶူးမေႃယႃ”
“ပဵၼ်တၢင်းပဵၼ် ၸိူင်ႉႁိုဝ်ၶႃႈ”
“မီးလူမ်းၼၢဝ်ဢေႃႈ ... ၽႃႇတိၼ်ၽႃႇမိုဝ်းၵေႃႈ ၵတ်းဝႆႉသေႇꧦ ႁူဝ်ၶႆႈၵွင်ႇၵေႃႈၼၵ်းဢေႃႈ”
ၶူးမေႃယႃၸၢႆးဢွၼ်ၶမ်း ဢဝ်ဢၼ်ထွမ်ႇႁူ ၸၢမ်းတူၺ်း တီႈဢူၵ်း ပႃႈသွႆႈၶမ်းသေ ၵမ်းတူၺ်းသၢႆလိူတ်ႈ တီႈၶေႃႈမိုဝ်း ပႃႈသွႆႈၶမ်းယဝ်ႉ မၼ်းၸင်ႇထၢမ်ဝႃႈ-
“မေႃသွၼ်ပႃႈသွႆႈၶမ်း ၼၢဝ်လႆႈလၢႆဝၼ်းယဝ်ႉ”
“လႆႈမႃးႁႃႈဝၼ်းယဝ်ႉ ၶူးမေႃယႃ ဢၼ်ႁူဝ်ၶႆႈၼႆႉဢိူဝ်ႈ ယူႇယၢပ်ႇၼႃႇသေပိူၼ်ႈ”
ၸၢႆးဢွၼ်ၶမ်း ၸင်ႇယုမ်ႉသေ လၢတ်ႈဝႃႈ-
“ယႃႇပေမႆႈၸႂ်ၶႃႈၼႃႈ - ပေႃးၽႅဝ်မႃးႁူင်းယႃၼႆ တေၶႅၼ်းယူႇ”
ၸၢႆးဢွၼ်ၶမ်း သမ်းၶဵမ်ပၼ် ပႃႈသွႆႈၶမ်းမၢၵ်ႈၼိုင်ႈသေ တႅမ်ႈပၼ်ပုၼ်ႈတႃႇ ယႃႈယႃၵိၼ်ယဝ်ႉ မေႃယႃဢွၼ်ႇၶဝ်ၵေႃႈ ဢဝ်ယႃႈယႃသေ ပၼ်ပႃႈသွႆႈၶမ်းယူႇ ၸၢႆးဢွၼ်ၶမ်းၸင်ႇဝႃႈ
“ယႃႈယႃဢၼ်ပၼ်ဝႆႉၼႆႉ ၶႅၼ်ႈသီႇမူင်းသီႇမူင်း ၵိၼ်ပၼ် သေႇꧦၼႃႈ”
“ဢေႃႈ ဢေႃႈ ၸူမ်းၶႃႈယဝ်ႉ”
ၶူးမေႃယႃၸၢႆးဢွၼ်ၶမ်း ဝၢႆႇတူၺ်းမႃး တၢင်းၶူးမေႃယႃဢွၼ်ႇၶဝ် ၸိူဝ်းဢၼ်ၼုင်ႈသိူဝ်ႈၽိူၵ်ႇ သိၼ်ႈလႅင်ၼၼ်ႉသေ မၼ်းၸင်ႇႁွင်ႉဝႃႈ ၶူးမေႃယႃဢွၼ်ႇ ဢၼ်ပဵၼ်တႆးဢၼ်ၸိုဝ်ႈဝႃႈ ၼၢင်းၸၢမ်ႁွမ် ဢၼ်လုၵ်ႉၵျွၵ်ႉမႄးမႃးၼၼ်ႉယဝ်ႉ။
“ၼၢင်းၸၢမ်ႁွမ် ပေႃးလဵပ်ႈတူၺ်း ၵူၼ်းပဵၼ်ယဝ်ႉၼႆ မႃးၸူး တီႈလုၵ်း မေႃယႃၵမ်းၼိုင်ႈၼႃႈ”
ၼၢင်းၸၢမ်ႁွမ်ၵေႃႈ ငွၵ်းႁူဝ်ၼႄၵမ်းၼိုင်ႈသေ
“ဢေႃႈ ... ဢေႃႈ ...”
“မေႃယႃတေပၼ် ယႃႈယႃမႃး ပုၼ်ႈတႃႇပႃႈသွႆႈၶမ်းဢိူဝ်ႈၼႃႈ”
“ဢေႃႈ ”
ၸုမ်းၶူးမေႃယႃၶဝ် သိုပ်ႇပူၼ်ႉၵွႃႇတူၺ်း ၵူၼ်းပဵၼ်တၢင်ႇၸိူဝ်းယူႇ ၼႂ်းၸႂ်ပႃႈသွႆႈၶမ်းတႄႉ လႆႈမႃးငိၼ်းသဵင်လၢတ်ႈ ၶူးမေႃယႃဢွၼ်ႇၵေႃႉၼႆႉ လႆႈမႃးႁၼ်ၶူးမေႃယႃဢွၼ်ႇၵေႃႉၼႆႉၼႆ ၼႂ်းၸႂ်မၼ်း ၵိုင်ႉၵၢင်ႉၵႂႃႇၶုၵ်းၸႂ်လႆႈ လုၵ်ႈၸၢႆးမၼ်းတႄႉꧦ ယွၼ်ႉပိူဝ်ႈ ၶူးမေႃယႃၵေႃႉၼႆႉ မေႃလၢတ်ႈမေႃၸႃ လႄႈ တၢင်းပဵၼ်ရေႃးၵႃႇမၼ်း ဢၢပ်ႈပေႃးႁၢႆၶႅၼ်းၵႂႃႇ ၶိုင်ႈၼိုင်ႈယဝ်ႉ။
ၶူးမေႃယႃၸၢႆးဢွၼ်ၶမ်းၵေႃႈ ဝၢႆးသေလဵပ်ႈတူၺ်းၵူၼ်းပဵၼ်ယဝ်ႉမူတ်း မၼ်းၽႅဝ်မႃး ၼႂ်းလုၵ်းႁွင်ႈၵၢၼ်မၼ်း မႃးလိုဝ်ႈႁိုဝ်ႉသေဝူၼ်ႉယူႇ ၼႂ်းတႃမၼ်းတႄႉ ၵႂႃႇႁၼ်ၺႃး ပႃႈသွႆႈၶမ်းယူႇယဝ်ႉ ၵွပ်ႈပိူဝ်ႈသင် ၼမ်ႉၸႂ်မၼ်းၸိုင်သမ်ႉၵိုင်ႉၵၢင်ႉ မိုတ်ႈၵိုဝ်း မေႃသွၼ်ပႃႈသွႆႈၶမ်း ၵမ်းလဵဝ်ၼႆၵေႃႈ မၼ်းဝူၼ်ႉဢမ်ႇလႆႈ
(ၾိင်ႈထုင်းၶူးမေႃယႃၶဝ်ၼႆႉ တိုၼ်းလႆႈမီး ၸႂ်ႁၵ်ႉႁွမ်မိုတ်ႈၵိုဝ်း ၵူၼ်းပၼ်မိူၼ်ၼင်ႇပူႇၶဝ်ၼၢႆးၶဝ် ဢူႈမႄႈၶဝ် ဢမ်ႇၼၼ် ၼွင်ႉယိင်း ၼွင်ႉၸၢႆး ပီႈဢၢႆႈ ပီႈၼၢင်းၶဝ်ဢွၵ်ႇꧦ လုၵ်ႈလၢင်းၶဝ်ဢွၵ်ႇꧦ ၵူႈၵေႃႉၽဵင်ႇၵၼ် ၼၼ်ႉယဝ်ႉ)
ၵူၺ်းၵႃႈ မေႃသွၼ်ပႃႈသွႆႈၶမ်းၼႆႉ မၼ်းၸင်ႇႁႃႁၼ်ၺႃး ၼႂ်ၼႆႉၵူၺ်း ႁဵတ်းသင် မၼ်းသမ်ႉၵိုင်ႉၵၢင်ႉ လွမ်မိုတ်ႈႁႅင်းၼႃႇသေ ၵူၼ်းပဵၼ် တၢင်ႇၵေႃႉၼႆၵေႃႈ မၼ်းဝူၼ်ႉဢမ်ႇလႆႈ ၼႂ်းၸႂ်မၼ်းတႄႉ ပေႃးဝႃႈ လႆႈယူတ်းယႃပၼ်ၵူၼ်းပဵၼ် ဢၼ်မီးဢႃႇယူႉ (40. 50. 60)ၼႆၸိုင် သင်ပဵၼ်ၵူၼ်းၸၢႆးၼႆ မၼ်းၵႂႃႇၶုၵ်းၸႂ်လႆႈဢူႈမၼ်းယဝ်ႉ သင်ပဵၼ်ၵူၼ်းယိင်းၼႆၵေႃႈ မၼ်းၵႂႃႇၶုၵ်းၸႂ်လႆႈ မႄႈမၼ်း ဢၼ်သဵင်ႈၸူဝ်ႈပၢၼ်ၵူၼ်း ၵႂႃႇပႅတ်ႈမၼ်းၼၼ်ႉယဝ်ႉ ယွၼ်ႉပိူဝ်ႈ မၼ်းၵုမ်ႇဝူၼ်ႉလွင်ႈ ပႃႈသွႆၶမ်းယူႇ လႄႈ မေႃယႃဢွၼ်ႇၼၢင်ႈၸၢမ်ႁွမ် ၶဝ်ၽႅဝ်မႃး ၼႂ်းလုၵ်းႁွင်ႈၵၢၼ်မၼ်း မိူဝ်ႈလႂ်ၵေႃႈ မၼ်းဢမ်ႇတၼ်းႁူႉထိုင် ၼၢင်းၸၢမ်ႁွမ်ၵေႃႈ ငဝ်တူၺ်းၶူးမေႃယႃၸၢႆးဢွၼ်ၶမ်းယူႇ ယူႇႁိုင်တၢၼ်ႇꧦ မၼ်းၼၢင်းၸင်ႇဝႃႈ-
“ၶူးမေႃယႃ”
လႆႈငိၼ်းသဵင်ႁွင်ႉၸိုဝ်ႈမၼ်းလႄႈ ၸၢႆးဢွၼ်ၶမ်း ၸင်ႇၼႅတ်ႈ ႁႅၼ်တူၺ်းၽႂ်းꧦယဝ်ႉ
“ဢေႃႈ ... ၼၢင်းၸၢမ်ႁွမ် ၼင်ႈလႄႈ”
ၼၢင်းၸၢမ်ႁွမ်ၵေႃႈ ၸင်ႇၼင်ႈၼိူဝ်တင်ႇ ဢၼ်တေႃႇၼႃႈၶူးမေႃယႃၸၢႆးဢွၼ်ၶမ်းသေ ထၢမ်ဝႃႈ
“ၶူးမေႃယႃ ၵုမ်ႇဝူၼ်ႉလွင်ႈသင်ၶႃႈ ၸၢမ်ႁွမ်ၶဝ်ႈမႃးၵေႃႈ ဢမ်ႇႁူႉၶႃႈႁႃႉ?”
“ၼၢင်းၸၢမ်ႁွမ် ၽႅဝ်မႃးႁိုင်ယဝ်ႉႁႃႉ?”
“မႃးၸုၵ်းဝႆႉႁိုင်တၢၼ်ႇꧦဢေႃႈ”
ၶူးမေႃယႃ ၸၢႆးဢွၼ်ၶမ်း ပဵၼ်ဢၼ်ဢႃးၼႃႇ ၼၢင်းၸၢမ်ႁွမ် ၵႂႃႇတႄႉꧦသေ
“တႄႉႁႃႉ...? မေႃယႃၵုမ်ႇဝူၼ်ႉလွင်ႈ ပႃႈသွႆၶမ်းယူႇဢိူဝ်ႈ ၵွပ်ႈၼႆ ၸင်ႇဢမ်ႇတၼ်းႁူႉ ၼၢင်းၸၢမ်ႁွမ် ၶဝ်ႈမႃးယဝ်ႉ”
ၼၢင်းၸၢမ်ႁွမ် ၸင်ႇလွမ်ယုမ်ႉသေ
“ယူဝ်ၶေး ဝူၼ်ႉတၢင်ႇၸိူဝ်ႉယူဝ်ႉ ၶူးမေႃယႃ ၶိၵ်း ၶိၵ်း”
“ဢမ်ႇဝူၼ်ႉၵူၺ်း ... ၾႃႉၽႃႇလႃႈ”
ယွၼ်ႉပိူဝ်ႈၼႃႈၵၢၼ် မိူၼ်ၵၼ်လႄႈပိူင်ၼိုင်ႈ ယွၼ်ႉပိူဝ်ႈပဵၼ်တႆးၼင်ႇၵၼ်လႄႈပိူင်ၼိုင်ႈ ၸၢႆးဢွၼ်ၶမ်းလႄႈ ၼၢင်းၸၢမ်ႁွမ်ၵေႃႈ မိုတ်ႈၵၼ် မိူၼ်ၼင်ႇပီႈဢွၵ်ႇၼွင်ႉၵၼ်ဝႆႉယဝ်ႉ......
ၸၢႆးဢွၼ်ၶမ်း ၸင်ႇဢဝ်ယႃႈယႃ ပၼ်ၼၢင်းၸၢမ်ႁွမ်သေ ၸႂ်ႉႁႂ်ႈၵႂႃႇပၼ် ပႃႈသွႆႈၶမ်းယဝ်ႉ၊
ၼၢင်းၸၢမ်ႁွမ်ၵေႃႈ ဢဝ်ယႃႈယႃၸိူဝ်းၼၼ်ႉသေ မႃးၸူးပႃႈသွႆႈၶမ်းယဝ်ႉ
“ပႃႈ ... ယႃႈယႃၸိူဝ်းၼႆႉ ၶူးမေႃယႃၸႂ်ႉၶႃႈ ဢဝ်မႃးပၼ်ပႃႈဢေႃႈ”
“ဝႃႈၼၼ်ႁႃႉ ဢိူဝ်ႈဢိူဝ်ႈၸူမ်းယဝ်ႉ ဢေႃမေႃယႃယိင်းဢွၼ်ႇလူး ပဵၼ်တႆးတီႈလႂ်”
“ယူႇၵျွၵ်ႉမႄးသေ ၸင်ႇႁႃၶၢႆႉၵၢၼ်မႃးတီႈၼႆႈ တိုၵ်ႉလႆႈလိူၼ်ပၢႆၵူၺ်းဢေႃႈ”
“ဢေႃႈ ... ယူႇၵျွၵ်ႉမႄးၼႆႁႃႉ ယူႇပွၵ်ႉလႂ်”
“ယူႇပွၵ်ႉၵုင်းမူင်ႈဢေႃႈ”
“ၸွင်ႇႁူႉၸၵ်း ပႃႈငိုၼ်းႁွမ်ႁိုဝ်?”
“ပႃႈငိုၼ်းႁွမ် ပဵၼ်မႄႈၶႃႈဢေႃႈ”
ပႃႈသွႆႈၶမ်း ဢၢမ်းၵႂႃႇတႄႉꧦသေ
“တႄႉႁႃႉ တင်းမႄႈသူႁေ ပႃႈၼႆႉ ပဵၼ်တႆးၵေႃႉႁၵ်ႉၵၼ် မိူဝ်ႈလဵၵ်ႉဢိူဝ်ႈၼၼ်ႉ ၸိုဝ်ႈမေႃယႃဝႃႈႁိုဝ်ၵေႃ?”
“ၼၢင်းၸၢမ်ႁွမ် ၼႆဢေႃႈ”
“ဢေႃး ... ၼၢင်းၸၢမ်ႁွမ်ၼႆႉႁႃႉ ဢိူဝ်ႈ ... ဢိူဝ်ႈ ... ၸိုဝ်ႈၵေႃႈ ႁၢင်ႈလီ ၵူၼ်းၵေႃႈႁၢင်ႈလီၼင်ႇၵၼ်တႄႉꧦယဝ်ႉၼႆႉ”
လႆႈငိၼ်းပႃႈသွႆႈၶမ်း လၢတ်ႈၵႂႃႇၼႄ ၼၢင်းၸၢမ်ႁွမ် ပဵၼ်ဢၼ် ယုမ်ႉတူၵ်းၸႂ်ၵႂႃႇတႄႉꧦ
“ႁႆး ... ပႃႈၼႆႉမေႃယွင်ႈပိူၼ်ႈၼႃႇလူင်”
“ဢမ်ႇယွင်ႈသႄႈ ပႃႈလၢတ်ႈၸွမ်း ဢၼ်ၸႂ်ႈဢၼ်မႅၼ်ႈဢိူဝ်ႈၼႆႉ ဝၢႆးၼႆႉပေႃးတၼ်းၼႆ မိူဝ်းဢႅဝ်ႇႁိူၼ်းပႃႈၶဝ်ၼႃႈ မီးတီႈပွၵ်ႉသုမင်ႇၵလႃႇဢိူဝ်ႈ”
“ဢေႃႈ ... တေမႃးယူႇၶႃႈ”
“မႃးတႄႉꧦၼႃႈ တီႈမႄႈသူၶဝ် ၵျွၵ်ႉမႄးၵေႃႈ ပႃႈၶုၵ်းၸႂ်လႆႈၶႂ်ႈၸႂ် ထိုင်ၶဝ်ယူႇၼႆ မွၵ်ႇပၼ်ၽွင်ႈၼႃႈ”
“ဢေႃႈ ... ဢေႃႈ... ၶႃႈမီးၵၢၼ်လႄႈ တေၵႂႃႇၵွၼ်ႇၶႃႈ လူဝ်ႇတၢင်းၸွႆႈထႅမ်ၸိူင်ႉႁိုဝ်ၶႃႈၵေႃႈ လၢတ်ႈၶႃႈလႄႈၼႃႈ”
“ၸူမ်းယဝ်ႉ ၼၢင်းၸၢမ်ႁွမ်”
ပႃႈသွႆႈၶမ်းၵေႃႈ လွမ်တူၺ်း ၼၢင်းၸၢမ်ႁွမ် ဢၼ်ပႆၽၢတ်ႇယၢၼ်မၼ်းၵႂႃႇၼၼ်ႉ တေႃႇပေႃးသုတ်းသေ မၼ်းလွမ်ယုမ်ႉငွၵ်းႁူဝ်ယူႇၵူၺ်းမၼ်း တီႈၼိူဝ်ၵူႇၼၼ်ႉယဝ်ႉ။
ထိုင်မႃးထႅင်ႈဝၼ်းၼိုင်ႈ သိုပ်ႇလဵပ်ႈတူၺ်း ၵူၼ်းပဵၼ်ထႅင်ႈသေ ပေႃးဝႃႈ ၽႅဝ်မႃးႁိမ်း ပႃႈသွႆႈၶမ်းၼႆ ၸၢႆးဢွၼ်ၶမ်း ၸင်ႇတူင်ႉတၵ်ႉထၢမ်ဝႃႈ
“ၶႅၼ်းမႃးၶႃႈယဝ်ႉႁႃႉ မေႃသွၼ်ပႃႈသွႆႈၶမ်း”
“ဢေႃႈ ... ၶႅၼ်းမႃးသေမိူဝ်ႈဝႃးတႄႉꧦယဝ်ႉ ၶူးမေႃယႃ”
ၸၢႆးဢွၼ်ၶမ်း ၸင်ႇယုမ်ႉသေလၢတ်ႈဝႃႈ
“ထႅင်ႈသွင်သၢမ်ဝၼ်းမႃးတႄႉ တေၶႅၼ်းလီꧦၶႃႈယဝ်ႉ ဝႆႉၸႂ်ယဵၼ်ၶႃႈၼႃႈ မိူဝ်ႈၼႆႉတႄႉ ၶႃႈတေသမ်းပၼ်ပႃး ယႃႈယႃႁႅင်းဢေႃႈ”
“ၸူမ်းယဝ်ႉ ၶူးမေႃယႃဢိူဝ်ႉ”
ဝၢႆးသေသမ်းၶဵမ် ယႃႈႁႅင်းပၼ်ယဝ်ႉ ၸၢႆးဢွၼ်ၶမ်းၶိုၼ်း ထၢမ်ဝႃႈ
“မေႃသွၼ်ပႃႈသွႆႈၶမ်း ဢမ်ႇမီးလုၵ်ႈယိင်းလုၵ်ႈၸၢႆႈသေၵေႃႉ ၶႃႈႁႃႉ ၽႂ်မႃးသူင်ႇၶဝ်ႈပၼ် လူႁၼ်လုမ်းလႃးလႃႇ”
“ပႃႈမီးဝႆႉလုၵ်ႈၸၢႆးၵေႃႉၼိုင်ႈဢေႃႈ မိူဝ်ႈလဵဝ်တႄႉ မၼ်းတိုၵ်ႉၵႂႃႇၶိုၼ်ႈ ၸၼ်ႉၸွမ် တီႈဝဵင်းလိူဝ်ႇဢေႃႈ ၶူးမေႃယႃ”
“လွင်ႈဢၼ်ပႃႈႁဝ်း လႆႈမႃးၶိုၼ်ႈႁူင်းယႃၼႆႉ လုၵ်ႈၸၢႆးပႃႈႁဝ်း ဢမ်ႇႁူႉၶႃႈႁႃႉ?”
ပႃႈသွႆႈၶမ်း ၸင်ႇယုမ်ႉၵမ်းၼိုင်ႈသေဝႃႈ
“ယၢမ်းလဵဝ် ၶဝ်တိုၵ်ႉတွပ်ႇလိၵ်ႈဝႆႉဢိူဝ်ႈ ၶူးမေႃယႃ ... ၵွပ်ႈၼႆ ၵူဝ်ပဵၼ်လွင်ႈသုၵ်ႉၸႂ်မၼ်းလႄႈ ဢမ်ႇပႆႇပွင်ႇၶၢဝ်ႇထိုင်မၼ်းလႄႈ ဢမ်ႇပႆႇပွင်ႇၶၢဝ်ႇထိုင်မၼ်းၵူၺ်း”
“လုၵ်ႈၸၢႆးပႃႈ ၽႅဝ်ၸၼ်ႉပီလႂ်ယဝ်ႉ”
“မၼ်းပဵၼ်ၽၢႆႇပၢႆးၼပ်ႉ ပီလိုၼ်းသုတ်းယဝ်ႉ ၸိုဝ်ႈမၼ်းတႄႉ ပဵၼ်ၸၢႆးလိုၼ်းၶမ်းၼႆဝႃႇ”
“ဢေႃႈ ... ၸၢႆးလိုၼ်းၶမ်ၼႆႁႃႉ ပေႃးၼႆ ယၢမ်းလဵဝ်ၽႂ်သူင်ႇၶဝ်ႈၽၵ်းပၼ်လႃႇ”
“ၼွင်ႉယိင်းပႃႈမႃးသူင်ႇပၼ်ယူႇ ဢၼ်မႃးၼွၼ်းပႂ်ႉတႄႉ လုၵ်ႈႁဵၼ်းၶဝ်ပၼ်ႇပုတ်ႈၵၼ် မႃးပႂ်ႉပၼ်ဢေႃႈ”
ၸၢႆးဢွၼ်ၶမ်း ပွင်ႇၸႂ်ငွၵ်းႁူဝ်သေ
“ဢေႃႈ ... လီယဝ်ႉပေႃးပဵၼ်ၼႆ လူဝ်ႇသင်ၵေႃႈလၢတ်ႈၶႃႈလႄႈၼႃႈ”
“ဢေႃႈ ဢေႃႈ ၸူမ်းၶွပ်ႈၸႂ်ယဝ်ႉ ၶူးမေႃယႃ”
ႁဵတ်းၼၼ်သေ ၸၢႆးဢွၼ်ၶမ်း သိုပ်ႇပူၼ်ႉၵႂႃႇတူၺ်းထႅင်ႈၵူၼ်းပဵၼ်တၢင်ႇၸိူဝ်းယူႇ။