မွၵ်ႇၵွၼ်တေမွၵ်ႇၼႄယူႇ/တွၼ်ႈၵဝ်ႈ တိူဝ်ႉၸႂ်
ဝၼ်းၼိုင်ႈပူၼ်ႉၵႂႃႇယဝ်ႉ ဝၼ်းၼိုင်ႈၽႅဝ်မႃး မိူၼ်ၼင်ႇၼၼ် သင်တႅၵ်ႈတူၺ်းၼမ်ႉႁွင်ႈၼႆၵေႃႈ ၼမ်ႉၵဝ်ႇလႆၵႂႃႇယဝ်ႉ ၼမ်ႉမႂ်ႇလႆႈမႃးယူႇယဝ်ႉ ၵူၼ်းပဵၼ်ၼႂ်းႁူင်းယႃၵေႃႈ ဢၼ်ၵဝ်ႇမိူဝ်းၵႂႃႇ ဢၼ်မႂ်ႇၽႅဝ်မႃး ဢမ်ႇထၢတ်ႇဢမ်ႇဝၢႆး မိူၼ်ၼင်ႇၼမ်ႉၼၼ်ႉယဝ်ႉ ၶူးမေႃယႃၸၢႆးဢွၼ်ၶမ်းၵေႃႈ မူတ်းၶၢဝ်းယၢမ်းၸွမ်းၼႃႈၵၢၼ်မၼ်း ဝၼ်းၼိုင်ႈယဝ်ႉဝၼ်းၼိုင်ႈယူႇ။
ဝၼ်းၼိုင်ႈမၼ်းတိုၵ်ႉၼင်ႈသေ တူၺ်းလိၵ်ႈ ၼႂ်းလုၵ်းႁွင်ႈယႃမၼ်းယူႇ လႆႈငိၼ်းသဵင်တွႆႇၽၵ်းတူယဝ်ႉ
“တွၵ်ႉ ... တွၵ်ႉ တွၵ်ႉ”
“မီးလွင်ႈၵိတ်ႉၸသင် ၶဝ်ႈမႃးလႄႈ”
ၽၵ်ႇတူၽုၺ်ႇငၢၵ်ႈမႃးသေ ၸၢႆးဢွၼ်ၶမ်း လႆႈႁၼ်ၼၢင်းယိင်း ၵေႃႉၼိုင်ႈၶဝ်ႈမႃးလႄႈ မၼ်းၸင်ႇၸူမ်းသိူဝ်းသေ လၢတ်ႈဝႃႈ-
“ဢေႃး ... ၼၢင်းလၢဝ်လႅင်း မႃးၼင်ႈလႄႈ ၽႅဝ်မႃးမိူဝ်ႈလႂ်”
ၼၢင်းလၢဝ်လႅင်းၵေႃႈ မႃးၼင်ႈတေႃႇၼႃႈ ၸၢႆးဢွၼ်ၶမ်းသေ
“ၽႅဝ်မႃး မိူဝ်ႈဝႃးဢေႃႈ”
“ၼၢင်းလၢဝ်လႅင်း တွပ်ႇလႆႈလိၵ်ႈယူႇႁႃႉ?”
“လႆႈယူႇဢေႃႈ ... ပီႈၸၢႆးဢွၼ်ၶမ်း ၸွင်ႇမိုတ်ႈ ဝဵင်းမေႇမဵဝ်ႉယူႇႁိုဝ်?”
“ပဵၼ်ဝဵင်း ၼၢင်းလၢဝ်လႅင်းၶဝ်လႄႈ မိုတ်ႈယူႇ ... ဝဵင်းဢၼ်ၼႆႉ ႁၢင်ႈၵေႃႈႁၢင်ႈလီ ထုၵ်ႇတႃထုၵ်ႇၸႂ်တႄႉꧦယဝ်ႉ”
ၼၢင်းလၢဝ်လႅင်း ၸင်ႇယုမ်ႉသေ
“ဝဵင်းတႄႉႁၢင်ႈလီ ၵူၼ်းတႄႉႁၢင်ႈၸႃႉယူဝ်ႉ ပီႈၸၢႆးဢွၼ်ၶမ်း”
“ဝဵင်းၵေႃႈႁၢင်ႈလီ ၵူၼ်းၵေႃႈႁၢင်ႈလီယဝ်ႉ”
“ၶိၵ်း ၶိၵ်း ပီႈၸၢႆးဢွၼ်ၶမ်း ႁႅင်ႉမေႃယွင်ႈဝဵင်းမေႇမဵဝ်ႉၵူၼ်းမေႇမဵဝ်ႉၼႃႇလႄႈ မိူဝ်ႈၼႆႉ လၢဝ်တေတၢင်တူဝ် ၵူၼ်းဝဵင်းမေႇမဵဝ်ႉသေ ၽိတ်ႈမွၵ်ႇ ပီႈၸၢႆးဢွၼ်ၶမ်း မိူဝ်းၵိၼ်ၶဝ်ႈၶမ်ႈ တီႈႁိူၼ်းလၢဝ်ၶဝ်ဢေႃႈ”
“တႄႉႁႃႉ ... ၼၢင်းလၢဝ်လႅင်း”
“တႄႉဢေႃႈ မႄႈလၢဝ်ၶဝ်ၵေႃႈ ယင်းဝႃႈၵွၼ်ႇဢေႃႈ ပီႈၸၢႆးဢွၼ်ၶမ်း ဢမ်ႇမိူဝ်းၽႅဝ်ႁိူၼ်းၵေႃႈ ပေႃးႁိုင်တၢၼ်ႇꧦယဝ်ႉ ၼႆဝႃႇ ၸွင်ႈၸႂ်ႈ ၶႃႈႁိုဝ်?”
“ဝူင်ႈၼႆႉ ၵူၼ်းပဵၼ်ၵေႃႈၼမ် ၵၢၼ်ၵေႃႈသုၵ်ႉလႄႈ ဢမ်ႇပဵၼ်မိူဝ်းၵူၺ်း ပေႃးလႆႈႁူႉဝႃႈ ၼၢင်းလၢဝ်လႅင်း ၽႅဝ်မႃးၼႆတႄႉ တေၵႆႉꧦမိူဝ်းယူႇ ၵူၺ်းၵႃႈဝၢႆးၼႆႉ ယူဝ်ၶႄးတေဢိုတ်းၽၵ်းတူဝၢင်းပႅတ်ႈယူဝ်ႉ”
“ဢေႃႈ ... ဢမ်ႇဢိုတ်းသႄႈ ႁိူၼ်းလၢဝ်ၶဝ်ၼႆႉ တိုၼ်းၽုၺ်ႇၽၵ်းတူ ႁပ်ႉတွၼ်ႈၶႅၵ်ႇတႃႇသေႇယဝ်ႉ ၶမ်ႈၸူင်ႈလၢဝ် တေပႂ်ႉဝႆႉဢေႃႈ မႃးတႄႉꧦၶႃႈၼႃႈ ပီႈၸၢႆးဢွၼ်ၶမ်း”
“တမ်းၸႂ်လႃႈ တေမႃးယူႇ”
“လီယဝ်ႉပေႃးၼႆ လၢဝ်မႃးၸၢႆႇၵၢတ်ႇသေ ပူၼ်ႉမႃးတီႈႁူင်းယႃ ဢေႃႈၼႆႉ လၢဝ်တေမိူဝ်းၵွၼ်ႇၼႃႈ”
“ဢိူဝ်ႈ ဢိူဝ်ႈ မိူဝ်းလွႆးꧦ”
ၸၢႆးဢွၼ်ၶမ်းၵေႃႈ ဢွၵ်ႇမႃးၸွမ်းသူင်ႇ ၼၢင်းလၢဝ်လႅင်း ထိုင်တီႈ ၵႃးယဝ်ႉ ၼၢင်းလၢဝ်လႅင်းၵေႃႈ ႁေႃႈၵႃးသေ ၵၵ်းၵႆမိုဝ်း“မွၼ်း ... မွၼ်း”ၼႆသေ ႁေႃႈၵႃးဢွၵ်ႇဝၢင်းႁူင်းယႃၵႂႃႇယဝ်ႉ။
ၼၢင်းလၢဝ်လႅင်း ပူၼ်ႉၵႂႃႇယဝ်ႉသေတႃႉ ၼႂ်းတႃၸၢႆးဢွၼ်ၶမ်းၼႆႉ တူၺ်းႁၼ် ၼၢင်းလၢဝ်လႅင်း ပဵၼ်ဢၼ်ႁၢင်ႈလီတွၼ်းမႃးတႄႉꧦ။ ၼၢင်းလၢဝ်လႅင်းၵေႃႈ တိုၼ်းပဵၼ်ၼၢင်းယိင်းႁၢင်ႈလီၵေႃႉၼိုင်ႈယဝ်ႉ ၼိူဝ်ႉၼင်ၶၢဝ် တူဝ်ၶိင်းႁၢင်ႈလီ ၼႃႈတႃၸိုၼ်ႈပၢင်ႇသႂ်လီ ၶူၼ်တႃလမ် ၽွမ်ႉၽဵင်ႇၵၼ်ႁၢင်ႈလီဝႆႉ မၢၵ်ႇတႃၵေႃႈလမ်လီသေ မီးႁႅင်းၸၼ်ၸႂ်ပိူၼ်ႈတႄႉꧦ၊ ၼႃႈတႃၶူးၼင်သီႇသူပ်းမၼ်းၼၢင်း ၶႅမ်ႉလႅပ်ႈႁၢင်ႈလီ လိူဝ်တွၼ်းပိူၼ်ႈတႄႉꧦ ပေႃးဝႃႈ မၼ်းၼၢင်းယုမ်ႉၶူဝ်ၼႆၸိုင် လႆႈႁၼ် ၶဵဝ်ႈဢွၼ်ႇမၼ်းၼၢင်း ၶၢဝ်သွတ်ႇလွတ်ႇပွတ်ႇၸွၼ်းငွၼ်း ပေႃးငၢႆးမိူၼ်ၼင်ႇ တင်ႈၸႂ်ဢဝ်သႅင်ပလႄးၶၢဝ် ၶပ်ႉၽဵင်ႇၵၼ်ဝႆႉၼၼ်ႉယဝ်ႉ။
တူဝ်ၶိင်းႁၢင်ႈၽၢင်မၼ်းၼၢင်းၼႆၵေႃႈ ဢမ်ႇပေႃးသုင် ဢမ်ႇပေႃးတႅမ်ႇ ဢမ်ႇပေႃးယွမ် ဢမ်ႇပေႃးပီး ဢႅင်ႈၶႅဝ်ႉဢွၼ်ႇမၼ်းၼၢင်းတႄႉ တင်းတူဝ်ၶိင်းမၼ်းၼၢင်း ပဵၼ်ဢၼ်လႅပ်ႈၵၼ်တႄႉꧦ ၶူၼ်ႁူဝ်မၼ်းၼၢင်းၵေႃႈ လမ်လိူမ်ႈလီဝႆႉ ဢမ်ႇပွတ်းဢမ်ႇယၢဝ်း တိုၵ်ႉလီယဵမ်ႈလီတူၺ်းယဝ်ႉ တၢင်းႁၢင်ႈလီ မၼ်းၼၢင်းၼႆႉ ပေႃးတေဢဝ်ၼႂ်းလိၵ်ႈၵူႈပွၵ်ႈဝႃႈၸိုင် “တူၺ်းတၢင်းလၢင် ပေႃးတၢၼ်ႇၼူၵ်ႉယုင်းၶမ်းတေၵႃႈ တူၺ်းတၢင်းၼႃႈ ပေႃးတၢၼ်ႇၼူၵ်ႉယုင်းၶမ်း တေမိၼ်”ယဝ်ႉ။
တၢင်းႁၢင်ႈလီမၼ်းၼၢင်းၼႆႉ ႁၢင်ႈလီသေဢမ်ႇၵႃး ၼမ်ႉၸႂ်မၼ်းၼၢင်းၵေႃႈ လႆႈႁၼ် ပဵၼ်ဢၼ်ႁၢင်ႈလီလႄႈ ၸၢႆးဢွၼ်ၶမ်း ပဵၼ်ဢၼ်လႆႈၸႂ်ထုၵ်ႇၸႂ်သေ ၼၢင်းယိင်းတၢင်ႇၸိူဝ်းယဝ်ႉ မိူဝ်ႈၼႆႉ ယွၼ်ႉပိူဝ်ႈ ၼၢင်လၢဝ်လႅင်း မႃးၽိတ်ႈမွၵ်ႇမၼ်း မိူဝ်းၵိၼ်ၶဝ်ႈၶမ်ႈၼႆလႄႈ မၼ်းပဵၼ် ဢၼ်ၸူမ်းသိူဝ်းတႄႉꧦသေ ပႂ်ႉထႃႈၽွင်းယၢမ်း တၢမ်းၶမ်ႈတေထိုင်ၼၼ်ႉယူႇ။
ႁွတ်ႈထိုင်မႃးတၢမ်းၶမ်ႈ ၸၢႆးဢွၼ်ၶမ်းၵေႃႈ ဢၢပ်ႇၼမ်ႉလႆႈၶူဝ်းယဝ်ႉသေ ႁေႃႈၵႃးမၼ်း ၵႂႃႇၸူးတီႈႁိူၼ်း ၼၢင်းလၢဝ်လႅင်းၶဝ်ယဝ်ႉ ၼၢင်းလၢဝ်ၶဝ်ၵေႃႈ ၸူမ်းသိူဝ်းႁပ်ႉတွၼ်ႈမၼ်းသေ ၶဝ်ႁူမ်ႈၵၼ် ၵိၼ်ၶဝ်ႈၶမ် ဝၢၼ်ꧦမၼ်းꧦယူႇ ဝၢႆးသေၵိၼ်ၶဝ်ႈ ဢုပ်ႇၵၼ်ယဝ်ႉ ၽွင်းမိူဝ်ႈၸၢႆးဢွၼ်ၶမ်း တေမိူဝ်းၼၼ်ႉ မၼ်းၸင်ႇထၢမ်ဝႃႈ-
“ဢေႃႈ ... ၼၢင်းလၢဝ််လႅင်း ၸွင်ႇႁူႉၸၵ်းႁိူၼ်း ပႃႈသွႆႈၶမ်း ၸၢႆးလိုၼ်းၶမ်း ၶဝ်ႁိုဝ်?”
ၵိုင်ႉၵၢင်ႉလႆႈငိၼ်း ၸၢႆးဢွၼ်ၶမ်းထၢမ်ၼင်ႇၼႆ ၼၢင်းလၢဝ်လႅင်း တူၵ်းၸႂ်ဢၢမ်းၵႂႃႇတႄႉꧦသေ ၶိုၼ်းထၢမ်ဝႃႈ-
“ႁိူၼ်း ၽႂ်ၶႃႈၵေႃ?”
“ႁိူၼ်းမေႃသွၼ်ပႃႈသွႆႈၶမ်းၶဝ်ဢိူဝ်ႈ ၶဝ်ၵေႃႈဝႃႈ ၶဝ်မီးၼႂ်းပွၵ်ႉၼႆႉၼႆယဝ်ႉ”
ၼၢင်းလၢဝ်လႅင်း ၸင်ႇဝႃႈ
“မီးႁိမ်းၼႆႉၵူၺ်း ၼင်ႇၵဝ်ႇၶႃႈ ဢမ်ႇပေႃးၵႆၵူၺ်း”
“ပေႃးၼႆ ၼၢင်းလၢဝ်လႅင်း တၼ်းယူႇဢမ်ႇၸႂ်ႈႁႃႉ ၵႂႃႇၸွမ်းသူင်ႇ ပီႈၸၢႆးဢွၼ်ၶမ်း တီႈႁိူၼ်ႈၶဝ်လႄႈၼႃႈ”
လႆႈငိၼ်းၼင်ႇၼၼ် ၼၢင်းလၢဝ်လႅင်း ပဵၼ်ဢၼ်ႁူဝ်ၸႂ်တွတ်ႇ တႄႉꧦ မႄႈၼၢင်းလၢဝ်လႅင်းၶဝ်ၸင်ႇဝႃႈ
“မီးၸမ်ယူႇလူး လုၵ်ႈယိင်း ၵႂႃႇၸွမ်းၼႄပၼ်သေလႄႈ”
ၼၢင်းလၢဝ်လႅင်းၵေႃႈ ၼႅတ်ႈဝႃႈ “ဢေႃႈ ... ဢေႃႈ” ၼႆသေ ဢွၵ်ႇႁိူၼ်းမႃးယဝ်ႉ၊ ပုၼ်ႈတႃႇတေထူပ်း ၸၢႆးလိုၼ်းၶမ်းၼၼ်ႉ ႁဵတ်းသင် လႄႈ ႁူဝ်ၸႂ်မၼ်းၼၢင်း သမ်ႉပေႃးလႆႈတွတ်ႇလင်ႁႅင်း ပေႃးပဵၼ်တၢၼ်ႇၼႆႉၼႆ မၼ်းၼၢင်းဝူၼ်ႉဢမ်ႇလႆႈ။
ၶႃသွင်ၵေႃႉ ၸၢႆးဢွၼ်ၶမ်း ၶီႇၵႃးႁူမ်ႈၵၼ်သေ ဢွၵ်ႇမႃးယဝ်ႉ ႁူဝ်ၸႂ်ၼၢင်းလၢဝ်လႅင်းၵေႃႈ ပဵၼ်ဢၼ်တွတ်ႇလင်မႃးတႄႉꧦ မၼ်းၸင်ႇ ထၢမ်
“ပီႈၸၢႆးဢွၼ်ၶမ်းၶဝ် ႁူႉၸၵ်းၵၼ်ႁိုင်ယဝ်ႉ ၶႃႈႁႃႉ?”
“ပႆႇပေႃးႁိုင်သင်ၼင်ႇၵဝ်ႇ”
ၸၢႆးဢွၼ်ၶမ်းၵေႃႈ ၶိုၼ်းၶႆႈၼႄ လွင်ႈဢၼ်မၼ်းတႄႇၸႃႉလႆႈ ႁူႉၸၵ်း ပႃႈသွႆႈၶမ်းလႄႈ ၸၢႆးလိုၼ်းၶမ်းၼၼ်ႉသဵင်ႈꧦယဝ်ႉ ႁဵတ်းၼၼ် ၵႃးၶဝ်ၵေႃႈ ၽႅဝ်မႃး တီႈၼႃႈႁိူၼ်း ၸၢႆးလိုၼ်းၶမ်းၶဝ်ယဝ်ႉလႄႈ
“ပဵၼ်လင်ၼႆႉဢေႃႈ ပီႈၸၢႆးဢွၼ်ၶမ်း”
ၸၢႆးဢွၼ်ၶမ်း ၵိုတ်းၵႃးမၼ်းသေ ၶႃသွင်ၵေႃႉ ၽုၺ်ႇၽၵ်းတူ လူင်းၵႃးမႃးယဝ်ႉ ... ႁူဝ်ၸႂ်ၼၢင်းလၢဝ်ၼႆႉ ပဵၼ်ဢၼ်တွတ်ႇလင်ႁႅင်းမႃးသေ ၵဝ်ႇတႄႇꧦ၊ ပေႃးဝႃႈ ႁူပ်ႉထူပ်းၺႃး ၸၢႆးလိုၼ်းၶမ်းၼႆ မၼ်းၼၢင်း တေလႆႈႁဵတ်းႁိုဝ်ၵေႃႈ မၼ်းၼၢင်းဝူၼ်ႉဢမ်ႇလႆႈ ၽွင်းၼၼ်ႉ မႄႈၼႃႉၸၢႆးလိုၼ်းၶမ်းၶဝ် ၸင်ႇဢွၵ်ႇႁိူၼ်းမႃးသေ
“ဢေႃႈ ... ၶူးမေႃယႃၶဝ် ... မႃးၶႃႈလႄႈ မႃးၼင်ႈၼႂ်းႁိူၼ်းလႄႈ”
ၶႃသွင်ၵေႃႉၵေႃႈ ၶဝ်ႈမိူဝ်းၼင်ႈ ၼႂ်းႁိူၼ်းယဝ်ႉ ၸၢႆးဢွၼ်ၶမ်း ၸင်ႇထၢမ်-
“ပႃႈသွႆႈၶမ်း ဢမ်ႇမီးၶႃႈႁႃႉ?”
“ၶႃသွင်ၵေႃႉမႄႈလုၵ်ႈ တိုၵ်ႉၵႂႃႇပႆတၢင်းဢေႃႈ ၶူးမေႃယႃ ယူဝ်ၶႄး တေၽႅဝ်မႃး ၼင်ႇၵဝ်ႇယဝ်ႉယူဝ်ႉ ပႂ်ႉတူၺ်းၵမ်ႉၼိုင်ႈၶႃႈလႄႈ”
မႄႈၼႃႉ ၸၢႆးလိုၼ်းၶမ်းၶဝ်ၵေႃႈ ၼႅတ်ႈႁိုဝ်ႈၼမ်ႉၼဵင်ႈၶူမ် တမ်းပၼ်ၶႃသွင်ၵေႃႉယဝ်ႉ။
“သူတ်ႉၼမ်ႉၼဵင်ႈၶူမ်ၶႃႈလႄႈ ၶူးမေႃယႃ ... သူတ်ႉလႄႈ ၼၢင်းလၢဝ်လႅင်း”
“ဢေႃႈ ဢေႃႈ”
“ၼၢင်းလၢဝ်လႅင်း ၶိုၼ်းၽႅဝ်မႃးမိူဝ်ႈလႂ်ၼႆႉ”
“ၽႅဝ်မႃးမိူဝ်ႈဝႃးဢေႃႈ”
“ယူႇလီယူႇၼေႃႈ”
“ဢေႃႈ ယူႇလီယူႇၶႃႈ ၼႃႉႁဝ်းၶဝ်လူး ယူႇလီယူႇၶႃႈၼေႃႈ”
“ယူႇလီယူႇ မီးမေႃသွၼ်သူၵူၺ်းဢိူဝ်ႈ ဝၼ်းပုၼ်ႉ ဢမ်ႇပေႃးယူႇလီသေ လႆႈၵႂႃႇ ၶိုၼ်ႈႁူင်းယႃၵွၼ်ႇယဝ်ႉ ၵတ်ႉၵႃႈလိူၵ်ႈꧦ ၵႂႃႇၺႃးၶူးမေႃယႃၶဝ် ၼႆႉလႄႈ တီႈလဵဝ်ၶႅၼ်းယဝ်ႉ”
ၶဝ်သိုပ်ႇဢုပ်ႇၵၼ်သေ ပႂ်ႉဝႆႉယူႇ ၼၢင်းလၢဝ်လႅင်းတႄႉ လွမ်ꧦမႆႈၸႂ်ဝႆႉယူႇၵေႃႉလဵဝ်ယဝ်ႉ ယူႇထႅင်ႈၵႅပ်ႉၼိုင်ႈ ၸၢႆးဢွၼ်ၶမ်းၸင်ႇဝႃႈ
“ဢေႃႈ ... ပေႃးၼႆ ၶႃႈၶဝ်တေမိူဝ်းၵွၼ်ႇၶႃႈ တၢင်ႇပွၵ်ႈမႃး ၸင်ႇၶိုၼ်းမႃးဢႅဝ်ႇဢဝ်ယဝ်ႉ ၶႅၼ်းတေႃႈ လၢတ်ႈပၼ် ပႃႈသွႆႈၶမ်းၶႃႈလႄႈၼႃႈ”
“ဢေႃႈ ဢေႃႈ တေလၢတ်ႈပၼ်ယူႇၶႃႈ”
ၶႃသွင်ၵေႃႉ ၶိုၼ်းမႃးၶီႇၵႃးသေ ပွၵ်ႈမိူဝ်းယဝ်ႉ ထိုင်မႃးၵၢင်ၶမ်ႈ ပေႃးဝႃႈ ၸၢႆးလိုၼ်းၶမ်း ၶႃသွင်ၵေႃႉမႄႈလုၵ်ႈ ၽႅဝ်မႃးၼႆ မႄႈၼႃႉၶဝ်ၸင်ႇ ႁပ်ႉလၢတ်ႈဝႃႈ-
“ပီႈၼၢင်းႁဝ်းၶဝ် ၼၢၼ်းပွၵ်ႈမႃးၼႃႇလႄႇ မိူဝ်ႈၼႆႉ”
“ပဵၼ်သင်လႃႇ”
“မိူဝ်ႈတၢမ်းၶမ်ႈၼၼ်ႉ ၶူးမေႃယႃ မႃးဢႅဝ်ႇတီႈၼႆႉဢေႃႈ”
“တႄႉႁႃႉ ၶူးမေႃယႃမိူဝ်းၵႂႃႇႁိုင်ယဝ်ႉႁႃႉ”
“ၶႃသွင်ၵေႃႉ မႃးၼင်ႈပႂ်ႉၼႂ်းႁိူၼ်း ၵမ်းၼိုင်ႈသေ ပႂ်ႉဝႆႉယူႇ ပီႈၼၢင်းႁဝ်းၶဝ်ၼၢၼ်းမႃးလႄႈ ၶႃသွင်ၵေႃႉ ၶိုၼ်းမိူဝ်းၵႂႃႇဢေႃႈ တၢင်ႇပွၵ်ႈ ၸင်ႇၶိုၼ်းမႃးဢႅဝ်ႇထႅင်ႈၼႆဝႃႇ”
“ၼႃသွင်ၵေႃႉၼႆႁႃႉ ၵေႃႉၼိုင်ႈပဵၼ်ၽႂ်”
“ပဵၼ်ၼၢင်းလၢဝ်လႅင်းဢိူဝ်ႈ ... ၼၢင်းလၢဝ်လႅင်း မႃးၸွမ်းၼႄပၼ်ဢိူဝ်ႈ”
“ဢိူဝ်ႈ ႁႃးၸၢႆးလိုၼ်းၵေႃႈ သမ်ႉလိူၵ်ႈꧦ ၵႂႃႇၵိၼ်ၼမ်ႉၼူမ်းတီႈ သႅင်ႇ“မၢဝ်းႁၢင်ႈလီ” ၼၼ်ႉလႄႈ ၸင်ႇဢဝ်တူၵ်းလိုၼ်းၵႂႃႇဢိူဝ်ႈၼႆႉ”
ၸၢႆးလိုၼ်းၶမ်း လႆႈငိၼ်းမႄႈၼႃႉၶဝ် လၢတ်ႈၵႂႃႇၼင်ႇၼၼ် ပဵၼ်ဢၼ်မႃးတိူဝ်ႉၸႂ်မၼ်းတႄႉꧦ မၼ်းၸင်ႇဝူၼ်ႉဝႃႈ
“ဢေႃႈ ... လၢဝ် လၢဝ် ... မႂ်းၼႆႉႁဵတ်းလႆႈတႄႉၼေႃ မႂ်းတင်ႈၸႂ်ဢွၼ် ၸူႉမႂ်ႇမႂ်းမႃးၼႄၵဝ်ႁႃႉ ပေႃးမႂ်းႁဵတ်းလႆႈတၢၼ်ႇၼႆႉၼႆၵေႃႈ တင်ႈတေႇဢဝ်ဝၼ်းမိူဝ်ႈၼႆႉၵႂႃႇ ၵဝ်တေၶတ်းၸႂ် လိုမ်းမႂ်းပႅတ်ႉယူႇယဝ်ႉ ၽဝမႂ်းၼႆႉ မိူၼ်ၼင်ႇလၢဝ်မီးယူႇတီႈသုင် ၼိူဝ်ၵၢင်ႁၢဝ်ပုၼ်ႉလႄႈ ၵူၼ်းၽၢၼ် ၸိူင်ႉၼင်ႇၵဝ်ၼႆႉ ဢမ်ႇၸၢင်ႈယိုၼ်းထိုင်လႆႈ ဢေႃး ... ၵေႃႉဢၼ်မႂ်း တေသိုပ်ႇၸုင်မိုဝ်းၵႂႃႇၼၼ်ႉ သမ်ႉပဵၼ်ၶူးမေႃယႃ မႂ်းၵေႃႈဢမ်ႇႁိုင်သင် တေပဵၼ်ၶူးမေႃယႃ ၵေႃႉၼိုင်ႈၼင်ႇၵဝ်ႇလႄႈ ႁႂ်ႈၽဝၶူးမေႃယႃတႆးသွင်ၵေႃႉ သိူဝ်းသႃႇသေၵမ်းၼႆႉ ၵဝ်ယွၼ်းသူးပၼ်ယူႇ”
ၶမ်ႈၼၼ်ႉ ၸၢႆးလိုၼ်းၶမ်း တႅပ်းတတ်းၸႂ်မၼ်းသေ တႅမ်ႈလိၵ်ႈ ပုၼ်ႈတႃႇပၼ်ၼၢင်းလၢဝ်လႅင်း ၽိုၼ်ၼိုင်ႈယဝ်ႉ ထိုင်မႃးၵၢင်ၶိုၼ်းမၼ်း ၼွၼ်းၵေႃႈ ဢမ်ႇလပ်းလႆႈလႄႈ မၼ်းၸင်ႇဢဝ်တိင်ႇမၼ်း ဢွၵ်ႇမႃး ယူႇၼႂ်းသူၼ်ၶဝ် မႃးၼင်ႈတင်ႇလုၵ်ႈၼိုင်ႈသေ လဵတ်းတိင်ႇႁွင်ႉၵႂၢမ်း ယူႇၵေႃႉလဵဝ် မၼ်းယဝ်ႉ
“တေႇၸႃႉဢဝ် ယၢမ်းမိူဝ်ႈလဵဝ်ၼႆႉၵႂႃႇ ၸၢႆးႁဝ်းတေလိုမ်းမႂ်းယဝ်ႉ ၸၢႆးႁဝ်းတေၸင်းမႂ်းယဝ်ႉ ၼွင်ႇဢွၼ်ႇဢိူၺ် ၵွပ်ႈပိူဝ်ႈတၢင်းႁၵ်ႉသူလႄႈ ႁဝ်းၼႆႉ မၼ်းဢမ်ႇထိူၵ်ႈၶွႆႈၵၼ်ယဝ်ႈ ၼွင်ႉဢိူၺ် မၼ်းဢမ်ႇထိူၵ်ႈၶွႆႈၵၼ်ယဝ်ႉ ၵၢင်ၸႂ်ၼွင်ႉၼၢင်း တေၸင်းၸၢႆးသေ မိူဝ်းႁၵ်ႉၵေႃႉမႂ်ႇၵေႃႈ”
သဵင်တွႆႇတိင်ႇမၼ်း ဢိၵ်ႇလူၺ်ႈသဵင်ႁွင်ႉၵႂၢမ်းမၼ်း ဢိုတ်ႇယူႇ ၼႂ်းလပ်းသိင်ႇသေ မႅင်းႁိင်ႇႁွႆႈဢွၼ်ႇ မႃးၸွႆႈပိူင်းၾႆးပၼ်ယူႇသေတႃႉ ဢမ်ႇၶႄႉၶဵင်ႇ တၢင်းလပ်းသိင်ႇလႆႈ သဵင်ၵႂၢမ်း ဢိၵ်ႇသဵင်ႁႆႈၵေႃႈ ၽႃႁွမ်းၸွမ်းၵၼ် ပဵၼ်ၶေႃႈပဵၼ်ၶေႃႈယူႇ မၼ်းၸၢႆးသိုပ်ႇႁႆႇတိင်ႇ သိုပ်ႇႁွင်ႉၵႂၢမ်း ပုၵ်ႈၼိုင်ႈယဝ်ႉပုၵ်ႈၼိုင်ႈယူႇ။
မႄႈၸၢႆးလိုၼ်းၶဝ် ယူႇၼႂ်းၽႃႈသေတိုၼ်ႇမႃး လႆႈငိၼ်း သဵင်လုၵ်ႈၸၢႆးမၼ်း ႁွင်ႉၵႂၢမ်းယူႇလႄႈ မၼ်းၸင်ႇလုၵ်ႉဢွၵ်ႇၽႃႈမႃးသေ မႃးၸူးလုၵ်ႈၸၢႆးမၼ်းယဝ်ႉ
“လုၵ်ႈၸၢႆး ၸၢႆးလိုၼ်း လုၵ်ႈၸၢႆးပႆႇၼွၼ်းႁႃႉၼႆႉ တူၺ်းလူး ၵၢင်ၶိုၼ်းသိပ်းသွင်မူင်း ပေႃးတေၶိုင်ႈယဝ်ႉၼႆႉ”
ၸၢႆးလိုၼ်းၶမ်း ၵိုတ်းတွႆႇတိင်ႇမၼ်း မၼ်းလွမ်တူၺ်းမႄႈၶဝ်သေ
“လုၵ်ႈၸၢႆး ဢမ်ႇပႆႇၶႂ်ႈၼွၼ်းမႄႈ”
“ပဵၼ်သင်လႃႇ လုၵ်ႈၸၢႆး ၶၢဝ်းပိူၼ်ႈၼွၼ်းၵေႃႈ တေႃႈလူဝ်ႇလႆႈၼွၼ်းဢိူဝ်ႈ ၵႂႃႇလႄႈ ၵႂႃႇၼွၼ်းလႄႈမႄႈဝႃႈ တီႈၼွၵ်ႈၼႆႉၵတ်းဢိူဝ်ႈ ၵူဝ်လုၵ်ႈၸၢႆးၼၢဝ်ဢိူဝ်ႈ ၵႂႃႇမိူဝ်းၼွၼ်းလႄႈ မႄႈဝႃႈ”
ၸၢႆးလိုၼ်းၶမ်းၵေႃႈ ဢမ်ႇၶိုၼ်းတၵ်းသဵင်တေႃႇမႄႈၶဝ်ဢီႈသင် မၼ်းဢဝ်တိင်ႇမၼ်းသေ ၶဝ်ႈမိူဝ်းၼႂ်းလုၵ်းၼွၼ်းမၼ်းယဝ်ႉ ပႃႈသွႆႈၶမ်း ၽႅဝ်မႃးၼႂ်းၽႃႈမၼ်းသေ မႃးဝူၼ်ႉထတ်းသၢင်ႈတူၺ်း လွင်ႈလုၵ်ႈၸၢႆးမၼ်း ၵူႈလွင်ႈꧦယူႇ”
ဢၼ်ပူၼ်ႉမႃး သၢမ်ပီၼၼ်ႉ ပေႃးဝႃႈ ပွႆးထၢမ်လိၵ်ႈယဝ်ႉၼႆ ပေႃးဝႃႈ ၼၢင်းလၢဝ်လႅင်း ၽႅဝ်မႃးမေႇမဵဝ်ႉၼႆ တိုၼ်းမႃးၸႂ်းလုၵ်ႈၸၢႆးမၼ်း ၸၢႆးလိုၼ်းၶမ်းတႃႇသေႇ ၸၢႆးလိုၼ်းၶမ်းၵေႃႈ ၵႆႉꧦၵႂႃႇၸူး ၼၢင်းလၢဝ်လႅင်းယူႇတႃႇသေႇယဝ်ႉ ပီၼႆႉတႄႉ ဢမ်ႇလႆႈႁၼ် မိူၼ်ၸိူင်ႉၼင်ႇၵူႈပီလႄႈ ပႃႈသွႆႈၶမ်း လွမ်လၢမ်းႁၼ်ထိုင် လွင်ႈဢၼ်ၸၢႆးလိုၼ်းၶမ်း လႄႈ ၼၢင်းလၢဝ်လႅင်း ဢၢပ်ႈတေမီး လွင်ႈၶွင်ႈၶမ်ၵၼ်ၼၼ်ႉယူႇ။