မွၵ်ႇၵွၼ်တေမွၵ်ႇၼႄယူႇ/တွၼ်ႈသၢမ် မၢႆဢွင်ႇၸၼ်ႉသိပ်း
ဝၼ်းမိူဝ်ႈၼႆႉ ပဵၼ်ဝၼ်းမၢႆပူၼ်ႉၸၼ်ႉသိပ်း ဢွၵ်ႇလႄႈ ၼၢင်းလၢဝ်လႅင်း မႃးႁွင်ႉ ၸၢႆးလိုၼ်းၶမ်း တႃႇၵႂႃႇတူၺ်း သဵၼ်မၢႆပူၼ်ႉၸၼ်ႉသိပ်းၼႆယဝ်ႉ၊ ၽႅဝ်မႃး ၼႃႈႁိူၼ်း ၸၢႆးလိုၼ်းၶမ်းၶဝ်ယဝ်ႉလႄႈ မၼ်းၼၢင်း ၸင်ႇၵႂႃႇႁွင်ႉဝႃႈ-
“ၸၢႆးလိုၼ်း ... ၸၢႆးလိုၼ်း”
လႆႈငိၼ်း သဵင်ႁွင်ႉၸိုဝ်ႈမၼ်းၼင်ႇၼႆ မၼ်းၸင်ႇ ယူႇတီႈၼမ်ႉမေႃႇၼႂ်းဝၢင်းႁိူၼ်းၶဝ်ၼၼ်ႉသေ တွပ်ႇဝႃႇ-
“ဢေႃး... လၢဝ် ... ၶဝ်ႈမႃးလႄႈ”
ဢမ်ႇၶဝ်ႈယဝ်ႉ ၸၢႆးလိုၼ်း... မိူဝ်ႈၼႆႉၸိုဝ်ႈသဵင်သဵၼ်ႈမၢႆပူၼ်ႉၸၼ်ႉသိပ်းဢွၵ်ႇယဝ်ႉဝႃႇ - လၢဝ်မႃးႁွင်ႉ ၸၢႆးလိုၼ်း ၵႂႃႇတူၺ်းဢိူဝ်ႈၼႆႉ”
“တႄႉႁႃႉ ... ပေႃးၼႆၵေႃႈ ၶဝ်ႈမႃးပႂ်ႉ ၼႂ်းႁိူၼ်းၼႆႉ ၵမ်းဢွၼ်လႄႈ ၸၢႆးလိုၼ်း ၸင်ႇႁႃႇလွႆႈၶူဝ်းယဝ်ႉသေ ဢၢင်ႈဢၢပ်ႇၼမ်ႉၼႆဢိူဝ်ႈ”
ၼၢင်းလၢဝ်လႅင်းၵေႃႈ ထွင်းလႅင်မၼ်းသေ မႃးၼင်ႈပႂ်ႉဝႆႉ ၼိူဝ်တင်ႇၼႂ်းသူၼ် ၸၢႆးလိုၼ်းၶမ်းၶဝ်ယဝ်ႉ။ ဝၢႆးသေ ၸၢႆးလိုၼ်း ၶမ်ဢၢပ်ႇၼမ်ႉယဝ်ႉ မၼ်းၸၢႆးၵေႃႈ ဢဝ်လႅင်းမၼ်းသေ ဢွၵ်ႇႁိူၼ်းမႃးယဝ်ႉ၊
“လၢဝ် ... ၵႂႃႇႁဝ်းၵႂႃႇ”
“ၸၢႆးလိုၼ်း ဢၢပ်ႇၼမ်ႉယဝ်ႉသေ ဢမ်ႇသွၼ်ႉသိူဝ်ႈၼႃႁႃႉ ... ၵမ်ႉမႃး ၵူဝ်ၵတ်းၶဝ်ႈလိုၵ်ႉသေ ၵူဝ်ၼၢဝ်ဢိူဝ်ႈ ၸၢႆးလိုၼ်း”
ၸၢႆးလိုၼ်းၶမ်း ၸင်ႇယုမ်ႉသေ-
“ပေႃးလႆႈၵႂႃႇလႆႈပႆၸွမ်းၵေႃႉႁၵ်ႉ ၸၢႆးလိုၼ်းၼႆတႄႉ တိုၼ်းဢုၼ်ႇတူဝ်ဢုၼ်ႇၸႂ်ယူႇ တႃႇသေယဝ်ႉဝႃႇ ... ၵွပ်ႈၼႆ ၸၢႆးလိုၼ်းဢုၼ်ႇယဝ်ႉလူး”
ၼၢင်းလၢဝ်လႅင်း လပ်းတႃသွင်ၶွၼ် ဝၢႆႇၼႃႈပႅတ်ႈ ၸၢႆးလိုၼ်းၶမ်းသေ
“ႁိုဝ်ႉ! ... လၢဝ်တႃႉမႆႈၸႂ်သေ လၢတ်ႈလီꧦ ၸၢႆးလိုၼ်းၼႆႉ”
“ ဢေႃႈ ... လၢဝ် ၸၢႆးလိုၼ်းဢမ်ႇၵတ်း ... တႄႉဢိူဝ်ႈ ... ယၢမ်းလဵဝ် တေပူၼ်ႉၸၼ်ႉသိပ်းႁိုဝ် ဢမ်ႇပူၼ်ႉႁိုဝ်ၼႆ ပႆႇႁူႉလႆႈလႄႈ ယင်းမႆႈၸႂ်ဝႆႉၵွၼ်ႇဢိူဝ်ႈ”
“ပူၼ်ႉယူႇၵႂႃႈ”
ၶႃသွင်ၵေႃႉ ၶီႇလႅင်ယႆၶၢင်ႈၵၼ် ဢွၵ်ႇမႃးၸူး ႁူင်းႁဵၼ်းၸၼ်ႉသုင်မၢႆၼိုင်ႈယဝ်ႉ၊ ၼႂ်းဝၢင်းႁူင်းႁဵၼ်းၼၼ်ႉ လုၵ်ႈႁဵၼ်းၶဝ်ၽႂ်ꧦမၼ်းꧦ ဢွၼ်ၵၼ်မႃးၸိုၵ်ႉꧦသၢႆꧦယူႇ ... ၶႃသွင်ၵေႃႉၵေႃႈ ၽႅဝ်မႃး တီႈပိူၼ်ႈၼႄ မၢႆၸၼ်ႉသိပ်းၼၼ်ႉလႄႈ ၸင်ႇဝႆႉလႅင်ၶႃသေ ၸူဝ်းၵၼ်ၵႂႃႇတူၺ်းယဝ်ႉ။ ၵူၼ်းမႃးတူၺ်း မီးၼမ်ဝႆႉလႄႈ ၶႃသွင်ၵေႃႉၵေႃႈ လႆႈႁူမ်ႈၵၼ်ၽိုတ်ႉပိူၼ်ႈ ၶဝ်ႈၵႂႃႇတူၺ်းၸိုဝ်ႈၶႃယူႇ။ ၸိုဝ်ႈၶႃ တေပႃးဢမ်ႇပႃးၼႆ ၶႃမႆႈၸႂ်သေ ႁူဝ်ၸႂ် လွမ်တွတ်ႇတင်းသွင်ၵေႃႉယူႇ ၶႃသွင်ၵေႃႉ ႁႃတူၺ်းၸိုဝ်ႈၶႃ ပေႃးဢမ်ႇတၼ်းၽႅပ်ႉတႃယဝ်ႉ၊ ၼၢင်းလၢဝ်လႅင်း ၸင်ႇၸူမ်းသိူဝ်းသေဝႃႈ-
“ၸၢႆးလိုၼ်း ... ၼႄႈ ... ၸိုဝ်ႈၸၢႆးလိုၼ်း မီးတီႈၼႆႈၼႄႈ ပႃးတီႇၸေးသိၼ်း ပၢႆးၼပ်ႉ ဢၼ်ၼိုင်ႈႁေဢိူဝ်ႈ”
ၸၢႆးလိုၼ်းၶမ်း ပႆႇႁၼ်ၸိုဝ်ႈမၼ်းလႄႈ မၼ်းၸင်ႇထၢမ်ဝႃႈ-
“မီးလႂ် ... လၢဝ် ... မီးလႂ်”
“ၼႆႉၼႃႇ ၸၢႆးလိုၼ်း”
ၸၢႆးလိုၼ်းၶမ်း လႆႈႁၼ်ၸိုဝ်ႈမၼ်းၵႂႃႇယဝ်ႉလႄႈ မၼ်းၸူမ်းၼႃႇသေ မၼ်းယိပ်းၵမ်ၽၼ်ႉ ၽႃႇမိုဝ်းၼုမ်ႇဢွၼ်ႇ ၼၢင်းလၢဝ်လႅင်းဝႆႉႁႅင်းꧦယဝ်ႉ၊ ၶႃသွင်ၵေႃႉ ၶိုၼ်းသိုပ်ႇႁႃတူၺ်း ၸိုဝ်ႈၼၢင်းလၢဝ်လႅင်းယူႇ ၼၢင်းလၢဝ်လႅင်း သိုပ်ႇလၢမ်းတူၺ်း မၢႆၽိူၼ်ဢၼ်ၼိုင်ႈယဝ်ႉဢၼ်ၼိုင်ႈသေ ပူၼ်ႉမၢႆၶူင်ႇမၼ်းၵႂႃႇသေတႃႉ ဢမ်ႇႁၼ်ၸိုဝ်ႈမၼ်းလႄႈ ၼမ်ႉတႃမၼ်းၼၢင်း ဢိူမ်ႈႁူၺ်ႇမႃးယဝ်ႉ... ၼႂ်းၸႂ်မၼ်းၼၢင်းၵေႃႈ ပဵၼ်ႁိုဝ်ၵႂႃႇၵေႃႈဢမ်ႇႁူႉ ၼႂ်းတႃမၼ်းၵေႃႈ ယွၼ်ႉပိူဝ်ႈၼမ်ႉတႃတဵမ်ႁူၺ်ႇဝႆႉလႄႈ မၼ်းၼၢင်းတူၺ်း တူဝ်လိၵ်ႈၸိူဝ်းၼၼ်ႉၵေႃႈ ၽိူဝ်ႈဝႆႉယဝ်ႉ၊ ၼႂ်းႁူမၼ်း ၸင်ႇလႆႈငိၼ်းဝႃႈ-
“လၢဝ် ... ၼႄႈ ... မၢႆၶူင်ႇ 847 ၼၢင်းလၢဝ်လႅင်း လိၵ်ႈမၢၼ်ႈ ဢင်းၵိတ်ႉ ပၢႆးထၢတ်ႈလႄႈရူႇပ ပၢႆးပၢႆႇဢူဝ်ႇ ပၢႆးၼပ်ႉဝႃႇ”
လႆႈငိၼ်း သဵင်ၸၢႆးလိုၼ်းၶမ်းၼင်ႇၼၼ် မၼ်းၼၢင်းၽႅပ်ႉတႃ မၼ်းၽႂ်းꧦသီႇႁႃႈၵမ်းသေ ၼႅတ်ႈလွမ်တူၺ်းယဝ်ႉ၊ ၽွင်းမိူဝ်ႈမၼ်း ၽႅပ်ႉတႃမၼ်းၼၼ်ႉ ၼမ်ႉတႃဢွၼ်ႇမၼ်းၼၢင်း ယွႆႉတူၵ်းၵွႃႇ ၼိူဝ်လိၼ်ယဝ်ႉ။
“မီးလႂ်ၸၢႆးလိုၼ်း”
ၸၢႆႈလိုၼ်းၸင်ႇၸီႉၼႄသေ
“ၼႆႉၼႃႇ လၢဝ် ... တူၺ်းလီꧦလႄႈ ”
ၼၢင်းလၢဝ်လႅင်း လႆႈႁၼ်ၸိုဝ်ႈမၼ်းပူၼ်ႉၸၼ်ႉသိပ်းသေ ပႃးတီႇ (ၵူင်ႇထူး) ႁႃႈဢၼ်လႄႈ မၼ်းၼၢင်း ၸူမ်းသိူဝ်း ပေႃးဢမ်ႇမီးတီႈတႅၵ်ႈယဝ်ႉ။ ၸိုဝ်ႈသဵင်မၼ်းၼၢင်းၼၼ်ႉ မၼ်းၶိုၼ်း လူတူၺ်းထႅင်ႈ တၢင်းၼမ်ယဝ်ႉ၊ မၼ်းၼၢင်း ၸူမ်းသိူဝ်းၼႃႇလႄႈ မၼ်းၶိုၼ်း ယိပ်းၽၼ်ႉမိုဝ်း ၸၢႆးလိုၼ်းၶမ်းဝႆႉႁႅင်းꧦသေ လၢတ်ႈဝႃႈ-
“ၸၢႆးလိုၼ်း ... လၢဝ် လၢဝ် ၸူမ်းသိူဝ်းဝႃႈၸူမ်းသိူဝ်းယဝ်ႉ... ၸၢႆးလိုၼ်းလူး ဢမ်ႇၸူမ်းသိူဝ်းႁႃႉ”
“ၸူမ်းသိူဝ်းဢိူဝ်ႈ လၢဝ်”
ၶႃသွင်ၵေႃႉ ဢွၵ်ႇၽၢတ်ႇယၢၼ် တီႈၵူၼ်းၼမ်မႃးယဝ်ႉ၊ လႆႈမႃးႁၼ် တႆးၵေႃႉၶဝ်ၼႆၵေႃႈ ၶႃၸူမ်းသိူဝ်းတွပ်ႇလၢတ်ႈမွၵ်ႇလၢတ်ႈ တႆးၵေႃႉၶႃ ပေႃးဢမ်ႇၶႂ်ႈၸၢင်ႈယဝ်ႉလႆႈယဝ်ႉ။ ဝၢႆးသေၼၼ်ႉ ၶႃၶိုၼ်းၶီႇလႅင် ဢွၵ်ႇမႃး ၼႂ်းဝၢင်းႁူင်းႁဵၼ်းမၢႆၼိုင်ႈသေ ၼၢင်းလၢဝ်လႅင်း ၸင်ႇထၢမ်ဝႃႈ-
“ၸၢႆးလိုၼ်း ... လၢဝ်တူၺ်း ဢၢပ်ႈၸၢႆးလိုၼ်း ဢမ်ႇပေႃးၸူမ်းသိူဝ်းဝႆႉလႃႇ ... ပဵၼ်သင်ၸၢႆးလိုၼ်း”
ၸၢႆးလိုၼ်းၶမ်း ထူၺ်ႈၸႂ်လူင်ၵမ်းၼိုင်ႈသေ
“ၸူမ်းဢိူဝ်ႈ ... လၢဝ်”
ၼၢင်းလၢဝ်လႅင်း လႆႈႁၼ် ၸၢႆးလိုၼ်းၸူမ်းသိူဝ်း ပဵၼ်မဵဝ်ႈၼိုင်ႈဝႆႉလႄႈ မၼ်းၸင်ႇထၢမ်ဝႃႈ-
“တူၺ်းၸၢႆးလိုၼ်း ဢၢပ်ႈဢမ်ႇပေႃးသိူဝ်းဝႆႉ ၼႆယဝ်ႉ... ပဵၼ်သင်ၸၢႆးလိုၼ်း”
“ဢမ်ႇပဵၼ်သင်လၢဝ်”
“ၸၢႆးလိုၼ်း ... လၢဝ်ထၢင်ႇတႄႉ ဢၼ်ၸၢႆးလိုၼ်း ဢမ်ႇပေႃးသိူဝ်းၸႂ်ၼႆႉ ... ၸၢႆးလိုၼ်း ၵူဝ်ႇဢမ်ႇမီးႁႅင်းငိုၼ်း ၵႂႃႇၶိုၼ်ႈၸၼ်ႉၸွမ်ဢမ်ႇၸႂ်ႈႁႃႉ?”
“ၸႂ်ႈဢိူဝ်ႈ ... လၢဝ်”
“ဢူဝ် ၸၢႆးလိုၼ်းၵေႃႈ ဢမ်ႇပေႉပဵၼ်တၢၼ်ႇၼၼ်ႉသႄႈ မႄႈၸၢႆးလိုၼ်းၶဝ်ၵေႃႈ တေၶႂ်ႈႁႂ်ႈ ၸၢႆးလိုၼ်း ၶိုၼ်ႈၸၼ်ႉၸွမ်ယူႇ ဢမ်ႇႁၢင်ႉယဝ်ႉ၊ ...ပိၵ်ႉသမ်ႉဝႃႈ ၽႂ်ဢမ်ႇၵမ်ႉထႅမ်လႆႈၼႆသေတႃႉ လၢဝ်တေၶတ်းၸႂ် ၵမ်ႉထႅမ်ပၼ်လႆ”
လႆႈငိၼ်းၼင်ႇၼၼ် ၸၢႆးလိုၼ်းၶမ်း လွမ်ယၵ်ႉတူၺ်းၼႃႈ ၼၢင်းလၢဝ်လႅင်း ၵမ်းၼိုင်ႈ ၼၢင်းလၢဝ်လႅင်းၶိုၼ်းဝႃႈ-
“ၸၢႆးလိုၼ်း”
“ဢီႈသင် လၢဝ်”
“ဢေႃႈ ... မိူဝ်ႈၼႆႉ ပဵၼ်ဝၼ်း ဢၼ်ၸၢႆးလိုၼ်း လႄႈ လၢဝ် ပူၼ်ႉၸၼ်ႉသိပ်းၼင်ႇၵၼ်လႄႈ လွင်ႈၶီၸႂ်ၼၼ်ႉ ၶႅၼ်းတေႃႈ ဢဝ်မွတ်ႇႁၢႆသေ မႄးလႅၵ်ႈလၢႆႈပဵၼ်ၸႂ်သိူဝ်ႈလႃႈ ၸၢႆးလိုၼ်း ဝၼ်းမိူဝ်ႈၼႆႉ ပဵၼ်ဝၼ်း ၽူႈဢၼ်ပူၼ်ႉ ၸၼ်ႉသိပ်းၶဝ် ၸူမ်းသိူဝ်းလႄႈ လၢဝ်လႄႈၸၢႆးလိုၼ်း လူဝ်ႇလႆႈၸူမ်းသိူဝ်းယဝ်ႉ၊ ဢမ်ႇၸႂ်ႈႁႃႉၸၢႆးလိုၼ်း”
ၸၢႆးလိုၼ်းၵေႃႈ မႄးလႅၵ်ႈလၢႆႈၸႂ်ၶီ မႄးပိၼ်ႇပဵၼ်ၸႂ်လီသေ
“ၸႂ်ႈဢိူဝ်ႈလၢဝ် ... လၢဝ်ပူၼ်ႉၸၼ်ႉသိပ်း ပႃးတီႇႁႃႈလုၵ်ႈလႄႈ လၢဝ်တေလဵင်ႉ ၸၢႆးလိုၼ်းဢီႈသင်”
“ၸၢႆးလိုၼ်းၶႂ်ႈၵိၼ်သင် ... ဢဝ်ၵၢင်ၸႂ် ၸၢႆးလိုၼ်းဝႃႈယဝ်ႉ လၢဝ်တေလဵင်ႉပၼ်လႆ”
“ၶႂ်ႈၵိၼ် ... ပရၼ်ႇတီႇ၊ ဝီႇသၵီႇ၊ ယႃႈမၢႆသီႇ၊”
“ဢူဝ် ... ၸၢႆးလိုၼ်းၼႆႉ ... မဵဝ်းၼႆႉတႄႉ လၢဝ် ဢမ်ႇလဵင်ႉလႆႈ”
“ၸၢႆးလိုၼ်းလႃႈလီဝႃႈၵူၺ်း လၢဝ် ... ဢမ်ႇလဵင်ႉသင်ၵေႃႈလႆႈယဝ်ႉ”
ၼၢင်းလၢဝ်လႅင်း လွမ်တူၺ်း ယၢမ်းမူင်း ဢၼ်မီးတီႈမိုဝ်းမၼ်းၼၢင်းၼၼ်ႉ မီႈသိပ်းဢဵတ်းမူင်းပၢႆꧦယဝ်ႉလႄႈ မၼ်းၼၢင်းၸင်ႇဝႃႈ-
“ၸၢႆးလိုၼ်း ... မိူဝ်ႈလဵဝ် မီးသိပ်းဢဵတ်းမူင်းပၢႆယဝ်ႉ၊ ၸၢႆးလိုၼ်း တွင်ႉမႆႈၶဝ်ႈယဝ်ႉႁႃႉ ... ႁဝ်းၵႂႃႇၵိၼ်ၼႂ်းသႅင်ၼေႃႈ ... လၢဝ်တေလဵင်ႉလႆ တေၵႂႃႇယူႇဢမ်ႇၸႂ်ႈႁႃႉ ၸၢႆးလိုၼ်း”
ၸၢႆးလိုၼ်းၶမ်း ယုမ်ႉငွၵ်းႁူဝ်ၼႄ ၼၢင်းလၢဝ်လႅင်းယဝ်ႉ၊ ၶႃသွင်ၵေႃႉ ႁူမ်ႈၵၼ်ၵႂႃႇၵိၼ်ၶဝ်ႈ ၼႂ်းသႅင်ႇသေ ဝၼ်းၼၼ်ႉ ၶႃသွင်ၵေႃႉၸူမ်းသိူဝ်းတႄႉꧦ ဝၢႆးသေၵိၼ်ၶဝ်ႈယဝ်ႉ ၶႃသွင်ၵေႃႉ ပွၵ်ႈမႃးမိူဝ်းႁိူၼ်း ၸၢႆးလိုၼ်းၶမ်းၶဝ် ဢွၼ်တၢင်းယဝ်ႉ... ပေႃးဝႃႈ ၶဝ်ႈၽႅဝ်မႃးၼႂ်း ႁိူၼ်းယဝ်ႉၼႆ ၸၢႆးလိုၼ်းၶမ်း ၸူမ်းသိူဝ်းသေ ႁွင်ႉမွၵ်ႇလၢတ်ႈမႄႈၶဝ်ယူႇယဝ်ႉ။
“မႄႈ မႄႈ ... လုၵ်ႈၸၢႆးပူၼ်ႉၸၼ်ႉသိပ်းဢိူဝ်ႈ ပႃးတီႇပၢႆးၼပ်ႉ ဢၼ်ၼိုင်ႈဢေႃႈ”
“တႄႉႁႃႉ လုၵ်ႈၸၢႆး ... ဢလူဝ်ႉ မႄႈတႄႉၸူမ်းဝႃႈၸူမ်းယဝ်ႉ”
ၽွင်းၼၼ်ႉမႄႈၼႃႉၶဝ် ၽႅဝ်မႃးသေ မႃးၸူမ်းၸွမ်း ၸၢႆးလိုၼ်းၶမ်းယဝ်ႉ။
“ၸၢႆးလိုၼ်း ပူၼ်ႉၸၼ်ႉသိပ်းၼႆႁႃႉ”
“ပူၼ်ႉဢေႃႈ မႄႈၼႃႉ ... ပႃး ပၢႆးၼပ်ႉဢၼ်ၼိုင်ႈဢေႃႈ”
“ပေႃးၼႆ လၢၼ်ၸၢႆး မႄႈၼႃႉတေပဵၼ် လုၵ်ႈႁဵၼ်းၸၼ်ႉၸွမ်ယဝ်ႉၼႆႉ”
လႆႈငိၼ်းၵႂၢမ်းမႄႈၼႃႉၶဝ် လၢတ်ႈၼင်ႇၼၼ် ၸၢႆးလိုၼ်းၶမ်း ၸင်ႇဝၢႆႇတူၺ်း ၼႃႈမႄႈၶဝ်သေ ထၢမ်ဝႃႈ-
“မႄႈ ... မႄႈ တေသူင်ႇလုၵ်ႈၸၢႆး ၶိုၼ်ႈၸၼ်ႉၸွမ်ယူႇႁႃႉ”
“တေသူင်ႇဢိူဝ်ႈ လုၵ်ႈၸၢႆး ၼင်ႇႁိုဝ်လုၵ်ႈၸၢႆး တေပဵၼ်ၵူၼ်းႁပ်ႉၶူးၵေႃႉၼိုင်ႈၼၼ်ႉ မႄႈတိုၼ်းမီးၵၢင်ၸႂ်ဝႆႉ ၸဵမ်မိူဝ်ႈလုၵ်ႈၸၢႆးတိုၵ်ႉ ၵေႃႉလဵၵ်ႉၼၼ်ႉယဝ်ႉ”
မႄႈၼႃႉၶဝ်ၵေႃႈဝႃႈ-
“မႄႈၼႃႉၶဝ်ၵေႃႈ မီးယူႇလူး ... မႄႈၼႃႈၵေႃႈ တေၸွႆႈထႅမ်ပၼ် ၵူႈလွင်ႈꧦယူႇဢိူဝ်ႈ ၸၢႆးလိုၼ်း”
လႆႈငိၼ်းမႄႈၼႃႉၶဝ် လၢတ်ႈၼင်ႇၼႆ ၸၢႆးလိုၼ်းၶမ်း ပဵၼ်ဢၼ်ၸူမ်းသိူဝ်းၵႂႃႇတႄႉꧦ မႄႈၸၢႆးလိုၼ်းၶဝ် ၸင်ႇၶိုၼ်းထၢမ်ဝႃႈ
“ဢေႃ ... ၼၢင်းလၢဝ်လႅင်ႈလူး ၸွင်ႉပူၼ်ႉႁိုဝ်”
ၼၢင်းလၢဝ်လႅင်း ငွၵ်းႁူဝ်ၼႄသေ လၢတ်ႈဝႃႈ
“ပူၼ်ႉဢေႃႈ”
ၸၢႆးလိုၼ်းၶမ်း ၸင်ႇတွပ်ႇဝႃႈ-
“ၼၢင်းလၢဝ်လႅင်း ပႃးတီႇၸေးသိၼ်း ႁႃႈဢၼ်ၵွၼ်ႇဢေႃႈ ဝၢႆးၼႆႉ တေပဵၼ် ၶူးမေႃယႃလူင် ၵေႃႉၼိုင်ႈယူႇယဝ်ႉ”
လႆႈငိၼ်းၸၢႆးလိုၼ်း လၢတ်ႈၵႂႃႇၼင်ႇၼၼ် ၼၢင်းလၢဝ်လႅင်း တေလႆႈႁဵတ်းႁိုဝ် ဝႆႉၼႃႈၵေႃႈ ဢမ်ႇႁူႉယဝ်ႉ၊ မႄႈၸၢႆးလိုၼ်းၶမ်းၶဝ် ၸင်ႇဝႃႈ
“ၼၢင်းလၢဝ်လႅင်းတႄႉ တိုၼ်ႈၶႅၼ်ႇလိၵ်ႈ ၸဵမ်မိူဝ်ႈလဵၵ်ႉယဝ်ႉ၊ မေႃသွၼ်ႁူႉၵႂႃႈ မိူဝ်ႈသူလဵၵ်ႉၼၼ်ႉ မေႃသွၼ် ယၢမ်ႈသွၼ်လိၵ်ႈပၼ်သူ မႃးယူႇလူး ...”
မႄႈၸၢႆးလိုၼ်းၶမ်းၶဝ် လႆႈႁၼ်လုၵ်ႈႁဵၼ်းမၼ်း ပူၼ်ႉၸၼ်ႉသိပ်းၼင်ႇၼႆသေ တေပဵၼ်ၵူၼ်းႁပ်ႉၶူး တေပဵၼ်ၵူၼ်းမေႃလိၵ်ႈမႃးၵေႃႉၼိုင်ႈၼႆ ၼႂ်းၸႂ်မၼ်ႈၼၢင်း ၸူမ်းသိူဝ်းႁၢၼ်ႉၸႂ်ဝႆႉယူႇယဝ်ႉ။
ၼၢင်းလၢဝ်လႅင်းၵေႃႈ ၸူမ်းꧦသိူဝ်းꧦ ပွၵ်ႈမိူဝ်း မွၵ်ႇလၢတ်ႈၼႄဢူႈမႄႈၶဝ် လွင်ႈဢၼ်မၼ်း ပူၼ်ႉၸၼ်ႉသိပ်းသေ ပႃးတီႇႁႃႈဢၼ်ၼၼ်ႉယူႇ ပေႃႈမႄႈမၼ်းၼၢင်းၵေႃႈ ၸူမ်းသိူဝ်း ဢဝ်မုၼ်ယွင်ႈယေႃး လုၵ်ႈယိင်းၶဝ်တႄႉတႄႉ။