မွၵ်ႇၵွၼ်တေမွၵ်ႇၼႄယူႇ/တွၼ်ႈသွင် ၵေႃႉမိူဝ်ႈဢွၼ်ႇ
ၸၢႆးလိုၼ်းၶမ်း လႄႈ ၼၢင်းလၢဝ်လႅင်း ၶႃသွင်ၵေႃႉ ႁူပ်ႉထူပ်း မိုတ်ႈၵၼ်မႃး ၸဵမ်မိူဝ်ႈလဵၵ်ႉယဝ်ႉ ၸဵမ်ႈမိူဝ်ႈယူႇႁူင်းႁဵၼ်းၸၼ်ႉငဝ်ႈ၊ ႁူင်းႁဵၼ်းၸၼ်ႉၵၢင် ယၢမ်းလဵဝ် တေႃႇပေႃးႁွတ်ႈထိုင် ႁူင်းႁဵၼ်းၸၼ်ႉသုင်ၼႆႉ တိုၼ်းၶိုၼ်ႈႁူင်းႁဵၼ်းႁူမ်ႈၵၼ်ယဝ်ႉ။
ၶႃသွင်ၵေႃႉ လုၵ်ႉတီႈၼိူဝ်သဵၼ်ႈတၢင်း ဢၼ်မိုတ်ႈၵိုဝ်းၵၼ်ၼၼ်ႉ ယၢမ်းလဵဝ်ၶၢမ်ႈပူၼ်ႉလူၼ်ႉလိူဝ် တီႈၼိူဝ်သဵၼ်ႈတၢင်းမိုတ်ႈၵိုဝ်းၵၼ်ၼၼ်ႉသေ ပႆႁွတ်ႈမႃး ၼိူဝ်သဵၼ်ႈတၢင်းႁၵ်ႉဝႆႉယူႇယဝ်ႉ။
ပေႃးတေမႃးတူၺ်း ၽဝၶႃသွင်ၵေႃႉၼႆႉၸိုင် ၼၢင်းလၢဝ်လႅင်းၶဝ်ၼႆႉ ပဵၼ်ဢၼ်ၶႅၼ်းၸႂ်သေ ၸၢႆးလိုၼ်းၶမ်းၶဝ်ယဝ်ႉ။ ၼၢင်းလၢဝ်လႅင်းၶဝ်ၼႆႉတႄႉ မီးၵႃးသေ ႁိူၼ်းၶဝ်ၵေႃႈ ပဵၼ်ႁိူၼ်းဢုတ်ႇၶႅမ်ႉꧦလင်ၼိုင်ႈယဝ်ႉ။ ၶဝ်မီးပီႈၼွင်ႉသၢမ်ၵေႃႉသေ ၼၢင်းလၢဝ်လႅင်းၼႆႉ ပဵၼ်ၵေႃႉၵၢင် ယဝ်ႉ။ ပီႈဢၢႆႈမၼ်း ၸၢႆးယွတ်ႈၶိူဝ်းတႄႉ တိုၵ်ႉၶိုၼ်ႈၸၼ်ႉၸွမ်ပၢႆးပိူင်မီႈ ပီလိုၼ်းသုတ်း တီႈတႃႈၵုင်ႇယူႇ ၼွင်ႉၸၢႆးဢွၼ်ႇမၼ်းတႄႉ တိုၵ်ႉၽႅဝ် ၸၼ်ႉၸဵတ်း ၸၢႆးလိုၼ်းၶမ်းတႄႉ မႄႈၶဝ် ပႃႈသွႆႈၶမ်း ပဵၼ်မေႃသွၼ် တီႈႁူင်းႁဵၼ်းၸၼ်ႉငဝ်ႈသေ ၶႃသွင်ၵေႃႉမႄႈလုၵ်ႈ မႃးယူႇၸွမ်းမႄႈၼႃႉၶဝ်ယဝ်ႉ။ မႄႈၼႃႉၸၢႆးလိုၼ်းၶဝ်ၼႆႉတႄႉ ၶႃသွင်ၵေႃႉဢမ်ႇမီးလုၵ်ႈသေၵေႃႉ လႄႈ ၶႃပူႇဢွၵ်ႇႁၵ်ႉၸၢႆးလိုၼ်းၶမ်း မိူၼ်ၸိူင်ႉၼင်ႇ လုၵ်ႈၸၢႆးၶႃသွင်ၵေႃႉယဝ်ႉ။
ႁိူၼ်းၶဝ်ၼႆႉ မီးပွၵ်ႉသုမင်ႇၵလႃႇသေ လင်ၼိုင်ႈလႄႈ လင်ၼိုင်ႈ ဢမ်ႇပေႃးၵႆၵၼ် ၶႅၼ်ႈၵၼ် ၸဵတ်းႁိူၼ်းၵူၺ်းလႄႈ ပေႃးဝႃႈ ၵႂႃႇၶိုၼ်ႈႁူင်းႁဵၼ်းၼႆၸိုင် ၸၢႆးလိုၼ်းၶမ်းလႄႈ ၼၢင်းလၢဝ်လႅင်း ၵႂႃႇၶိုၼ်ႈၸွမ်းၵၼ် ၶိုၼ်ႈႁူင်းႁဵၼ်းၸၼ်ႉသုင်မၢႆသီႇၼင်ႇၵၼ်၊ ယူႇသဝ်းႁူင်းႁဵၼ်းလဵဝ်ၵၼ်ယဝ်ႉ။
ယွၼ်ႉပိူဝ်ႈ ပွႆးထၢမ်လိၵ်ႈၵေႃႈ ၸမ်မႃးယဝ်ႉလႄႈ လုၵ်ႈႁဵၼ်းၶဝ်ၵေႃႈ ဢွၼ်ၵၼ် ၶတ်းၸႂ်လိၵ်ႈၵူႈၽႂ်မၼ်းယူႇ။
မိူဝ်ႈၼႆႉ ၼၢင်းလၢဝ်လႅင်း ၵႂႃႇၶိုၼ်ႈၵျူႇသျိၼ်ႇ(Tuition )သေ တၢမ်းၶမ်ႈ ၽွင်းမိူဝ်ႈမၼ်းၼၢင်း လူင်းၵျူႇသိၼ်ႇမႃးၼၼ်ႉ မၼ်းမိူဝ်းဝႄႉဢဝ် ပပ်ႉလိၵ်ႈ တီႈႁိူၼ်း တႆးၵေႃႉမၼ်းၼၢင်းသေ ပွၵ်ႈမႃးမိူဝ်းၵေႃႉလဵဝ်ယဝ်ႉ။
ၽွင်ႈမိူဝ်ႈမၼ်းၼၢင်းၶီလႅင်သေ ငွၵ်းၽႅဝ်မႃး တီႈသဵၼ်ႈတၢင်း သူၺ်ႇၸီးၶူင်ႇ ၽၢႆႇတူၵ်း ဝၢင်းမၢၵ်ႇၼင်ၼၼ်ႉ မၼ်းၼၢင်းလႆႈႁၼ်မၢဝ်သွင်ၵေႃႉ ၶီလႅင်သေ လမ်းမႃးၸွမ်းၽၢႆႇလင်မၼ်းၼၢင်းယဝ်ႉ။ မၼ်းၼၢင်းၶၢၼ်ႉ ႁၼ်ၶႃသွင်ၵေႃႉၼၼ်ႉလႄႈ မၼ်းၼၢင်း ယဵပ်ႇလႅင်မၼ်းၽႂ်းꧦယဝ်ႉ။ မၢဝ်ႇသွင်ၵေႃႉၼၼ်ႉၵေႃႈ ၶီႇလႅင်မႃးၶိုတ်း ၼၢင်းလၢဝ်လႅင်းသေ လၢတ်ႈၼိုင်ႈ လၢတ်ႈသွင် လၢတ်ႈယဝ်ႉ လၢတ်ႈယွၵ်ႇၼၢင်းလၢဝ်လႅင်းယူႇ-
“ႁေႉ... ႁေႉ... ၼွင်ႉယိင်းၵေႃႉလဵဝ်ၵူၺ်းႁႃႉ ... ဢမ်ႇလူဝ်ႇၵူၼ်းၸွမ်းသူင်ႇႁႃႉ...”
“ပေႃးလူဝ်ႇၼႆ ပီႈၸၢႆးၶဝ်ၸွမ်းတေမိူဝ်းသူင်ႇပၼ်လႆ ... ႁိူၼ်း မီးၵႆႁႃႉ”
ၶႃလၢတ်ႈၼၼ်သေတႃႉ ၼၢင်ႈလၢဝ်လႅင်း ဢမ်ႇတၵ်းသဵင်တေႃႇၶႃသွင်ၵေႃႉ ၵူႈပွၵ်ႈတႄႉ ပေႃးဝႃႈ မၼ်းၼၢင်းပွၵ်ႈမႃးႁိူၼ်းၼႆ ၶဝ်တႆးၵေႃႉၵၼ် သီႇၵေႃႉ ဢမ်ႇၼၼ်ႁႃႈၵေႃႉ ပွၵ်ႈမႃးမိူဝ်းၸွမ်းၵၼ်သေႇꧦယူႇ ပွၵ်ႈၼႆႉတႄႉ ယွၼ်ႉပိူဝ်ႈ မၼ်းၼၢင်းၵႂႃႇဝႄႉဢဝ်ပပ်ႉ တီႈႁိူၼ်းတႆးၵေႃႉမၼ်းၼၢင်းလႄႈ ၽွင်းမိူဝ်ႈပွၵ်ႈမႃးမိူဝ်း ၵေႃႉလဵဝ်ၼင်ႇၼႆ ၸင်ႇမႃးၺႃး မၢဝ်ႇၼႃႈလိူမ်ႈသွင်ၵေႃႉ ၼႆႉယဝ်ႉ။
ပေႃးဝႃႈ မၼ်းၼၢင်းၶီႇလႅင်ယဵပ်ႇၽႂ်းꧦၼႆၵေႃႈ ၶႃသွင်ၵေႃႉ ၸွမ်းမႃး ယႆဝႆႉ သွင်ၽၢၵ်ႇၶၢင်ႈမၼ်းၼၢင်းသေ လၢတ်ႈယွၵ်ႇမၼ်းၼၢင်းယူႇ...
“ပႄႉၼႅတ်ႈလႃႇၼွင်ႉယိင်း ... တီႈႁိူၼ်းမီးၵၢၼ်ႁႃႉတေႃႈဝႃႈ”
“ႁႄး ... ႁႄး ... ပေႃးယဵပ်ႇၽႂ်းးꧦၸိူင်ႉၼႆ မၢၵ်ႇမၼ်းပၼ်ႇၽႂ်း ၵျႃႉၼေႃ ... ၼွင်ႉယိင်း တွင်ႉမႆႈၶဝ်ႈယူဝ်ႉတေႃႈဝႃႈ”
ပေႃးဝႃႈ မၼ်းၼၢင်းၶီႇထိူင်းၼႆၵေႃႈ ၶႃသွင်ၵေႃႉၶီႇထိူင်းꧦ ၸွမ်းမၼ်းၼၢင်းယဝ်ႉ မၼ်းၼၢင်း တေလႆႈႁဵတ်းႁိုဝ်ၵေႃႈ ဢမ်ႇႁူႉ ... ၼႂ်းၸႂ်မၼ်းၼၢင်းတႄႉ ၸႂ်လမ်ၵေႃႈလူဝ်ꧦ ၶႂ်ႈႁႆႈၵေႃႈလူဝ်ꧦယဝ်ႉ ... ယွၼ်ႉပိူဝ်ႈမၼ်းၼၢင်း ဢမ်ႇတၵ်းသဵင်တေႃႇၶႃလႄႈ ၶႃၶိုၼ်းဝႃႈ-
“ၼွင်ႉယိင်း ဢမ်ႇမေႃလၢတ်ႈၵႂၢမ်းႁႃႉ”
ၼၢင်းလၢဝ်လႅင်းၸႂ်လမ်တႄႉသေ ၼႃႈတူႇၶႂ်ႈၸႃႉတေႃႇၶႃယဝ်ႉ
“ဢူဝ် ဢူဝ်... ၼွင်ႉယိင်းမေႃၸႂ်လမ်ယူႇၼေႃ ႁႄး ႁႄး ပေႃးမေႃၸႂ်လမ်ၼႆတႄႉ ႁဵတ်းႁိုဝ်ၵေႃႈ တေမေႃၸႂ်ၶဝ်သေ တေမေႃႁၵ်ႉယူႇယူဝ်ႉ ႁႄးႁႄး...”
ၵၢင်ၸႂ်မၼ်းၼၢင်းတႄႉ ၶႂ်ႈလူင်းလႅင်သေ ၽတ်ႉပၼ်ၵႅမ်ႈ ၶႃသွင်ၵေႃႉယဝ်ႉ။ ၵူၺ်းၵႃႈ တေႁဵတ်းၼၼ်ၼႆၵေႃႈ သမ်ႉဢမ်ႇပဵၼ်လႆႈငၢႆႈꧦ လႄႈ ၼင်ႇႁိုဝ် တေၸဵဝ်းထိုင်ႁိူၼ်းၼၼ်ႉ မၼ်းၼၢင်းၶတ်းၸႂ် ယဵပ်ႇလႅင် တိၵ်းꧦယူႇ ... လႅင်ၶႃသွင်ၵေႃႉ သွင်လမ်းမႃးမီးဝႆႉ သွင်ၽၢၵ်ႇၶၢင်ႈ မၼ်းၼၢင်းလႄႈ ၼင်ႇႁိုဝ်တေဢမ်ႇၽႃႇၺႃး လႅင်ၶႃသွင်ၵေႃႉၼၼ်ႉ လႆႈဝႆႉသတိသေ ယိပ်းႁူဝ်လႅင်မႃးယူႇယဝ်ႉ။
တီႈၽၢႆႇၼႃႈၼၼ်ႉ လႆႈႁၼ်ၵူၼ်းၸၢႆးၵေႃႉၼိုင်ႈ ၼုင်ႈၵူၼ်တႆးသေ ပႆၵႂႃႇယူႇလႄႈ ၼၢင်းလၢဝ်လႅင်း ပဵၼ်ဢၼ်မီးႁႅင်းၸႂ်ဢုၼ်ႇၸႂ်မႃး ဢိတ်းၼိုင်ႈယဝ်ႉ ၽိူဝ်ႇႁွတ်ႈၵႂႃႇၸမ်ꧦၼႆ လႆႈႁၼ်ႁူႉဝႃႈ ပဵၼ်ၸၢႆးလိုၼ်းၶမ်း ၵေႃႉႁၵ်ႉမၼ်းလႄႈ ၼၢင်းလၢဝ်လႅင်း ၸင်ႇယဵပ်ႇလႅင်မၼ်းၵႂႃႇႁိမ်း ၸၢႆးလိုၼ်းၶမ်းသေ ႁွင်ႉလၢတ်ႈဝႃႈ ‘ၸၢႆးလိုၼ်း’ၼႆယဝ်ႉ။
ၸၢႆးလိုၼ်းၶမ်းၵေႃႈ ၼႅတ်ႈဝၢႆႇတူၺ်းၽၢႆႇလင်ၽႂ်းꧦသေ မၼ်းၸင်ႇထၢမ်ဝႃႈ-
“ပဵၼ်သင် ... လၢဝ်”
“လၢဝ် ... လူင်းၵျူႇသိၼ်ႇမႃးၵေႃႉလဵဝ်ၼႆ ၶဝ်မႃးၸွမ်းယွၵ်ႇလၢဝ် ဢိူဝ်ႈ”
ၸၢႆးလိုၼ်းၶမ်းၵေႃႈ လွမ်တူၺ်း ၼႃႈၵူၼ်းၸၢႆးသွင်ၵေႃႉၼၼ်ႉသေ
“တႆးၵေႃႉၶဝ် ... ယႃႇပေမီးၸႂ် ၶႂ်ႈပၼ်တၢင်းယႃႉၵဝ်းပိူၼ်ႈလေႃႇ”
ၶႃသွင်ၵေႃႉၵေႃႈ လူင်းလႅၼ်မႃးသေ ၵေႃႉၼိုင်ႈၸင်ႇဝႃႈ-
“ႁႄး ႁႄး...ႁဝ်းဢမ်ႇမီးၸႂ်ၶႂ်ႈယႃႉၵဝ်းပိူၼ်ႈသႄႈ ... ၼႆႉတႄႉ ပဵၼ်ထုင်း ၸၢမ်ႇမၢဝ်ႇသၢဝ်ၵူၼ်းၼုမ်ႇ ၸွမ်းဢုပ်ႇၵၼ်ဢမ်ႇၸႂ်ႈႁႃႉ”
ထႅင်ႈၵေႃႉၼိုင်ႈၵေႃႈဝႃႈ-
“ႁဝ်းဢမ်ႇၸႂ်ႈ ၵူၼ်းပၼ်တၢင်းယႃႉၵဝ်းပိူၼ်ႈသႄႈ ... တီႈလဵဝ်ၼႆႉၵူၺ်းဢိူဝ်ႈ မႂ်းပၼ်တၢင်းယႃႉၵဝ်းႁဝ်း ... ႁႄးႁႄး”
လႆႈငိၼ်းၼင်ႇၼၼ် ၸၢႆးလိုၼ်းၶမ်း ပဵၼ်ဢၼ်ၸႂ်လမ်ၵႂႃႇတႄႉꧦသေဝႃႈ-
“ဢီႈသင်ၵေႃ”
“ဢေႃႈ...ႁႄး ...ႁေး ပေႃးဢမ်ႇငိၼ်းလီၼႆၵေႃႈ ၶွၵ်းၶီႈႁူသေ ထွမ်ႇလေႃႇ မႂ်းၵူၺ်းဢိူဝ်ႈ ပဵၼ်ၵူၼ်းယႃႉၵဝ်း ၼႄႈ... တႆးၵေႃႉ၊ တီႈၼႆႈၼႆႉ တႆးၵေႃႉၶဝ်ၵေႃႉလဵဝ် ထုၵ်ႇလီဝႄႈတၢင်း ပၼ်ႁဝ်းယူႇယူဝ်း ႁႄးႁႄး”
ယိုင်ႈလၢတ်ႈယိုင်ႈလိူင်းမႃးတိၵ်းꧦသေ ၸၢႆးလိုၼ်းၶမ်း ၶၢၼ်ႉၶၢမ်ႇ လႄႈ မၼ်းၸင်ႇဝႃႈ-
“ၶိူဝ်သွင်ၵေႃႉ တေႁူၼ်လင်ႁႃႉ ဢမ်ႇႁူၼ်လင်ႁႃႉလၢတ်ႈလူး”
ၶႃသွင်ၵေႃႉ ယၵ်ႉတူၺ်းၼႃႈၵၼ်ၵမ်းၼိုင်ႈသေ ၶူဝ်ယူႇ
“ႁႃႉ ... ႁႃႉ ... ႁႃႉ ... ႁႃႉ”
“ႁႃႉ ... ႁႃႉ ... ႁဝ်းၼႆႉ ဢမ်ႇၸႂ်ၸႂ်ႈၵူၼ်းႁူၼ်လင်ၵူၺ်း ... ၶႂ်ႈႁူႉၵေႃႈ”
ပေႃးဝႃႈ လႆႈငိၼ်းၼင်ႇၼၼ် ၸၢႆးလိုၼ်းၶမ်း ႁဵတ်းႁိုဝ်တၼ်းၽႅဝ် ၵႂႃႇတီႈၶႃသွင်ၵေႃႉၼၼ်ႉၵေႃႈ ဢမ်ႇႁူႉ မၼ်းၸၢႆးၼႆႉ ၽႂ်းၽၢႆတၢၼ်ႇသိူဝ်ၸုမ်ႈတူဝ်ၼိုင်ႈယဝ်ႉ။ ၵေႃႉၼိုင်ႈတႄႉ ၺႃးၵိၼ်သၼ်တိၼ် ဢၼ်ၸၢႆးလိုၼ်းပိတ်ႉလႄႈ လူမ်ႉသႂ်ၼိူဝ်လႅင်မၼ်းၵႂႃႇယဝ်ႉ။
ၵိုတ်းထႅင်ႈၵေႃႉၼိုင်ႈတႄႉ မႃးယူႇတေႃႇၼႃႈ ၸၢႆးလိုၼ်းသေ ၵၢင်လၢႆးတေႃႇၵၼ်ယူႇ ... ၸၢႆးလိုၼ်းၶမ်းၵေႃႈ ပႆႇၶဝ်ႈၵမ်းလဵဝ် မၼ်းလွမ်တူၺ်း လွၵ်းလၢႆးသၢႆငၢႆမၼ်းယူႇ၊ ၵေႃႉဢၼ်လူမ်ႉၵႂႃႇၼၼ်ႉ ပဵၼ်ဢၼ်ၸႂ်လမ်တႄႉꧦလႄႈ မၼ်းၼႅတ်ႈလုၵ်ႉသေ ဝႅၼ်လေႃႈၶဝ်ႈၸူး ၸၢႆးလိုၼ်းထႅင်ႈယဝ်ႉ “ၵျႃႉ”
ၸၢႆးလိုၼ်းၶမ်း ငိူင်ႉဝႄႈပႅတ်ႈလႄႈ ဢမ်ႇတၼ်းၺႃးမၼ်း ... ၶႃသွင်ၵေႃႉ ၸၢႆးလိုၼ်ႈၶမ်းၵေႃႉလဵဝ် မင်ၵၼ်ယူႇ လႆႈႁၼ်ၼင်ႇၼၼ် ၼၢင်းလၢဝ်လႅင်း ပဵၼ်ဢၼ်မႆႈၸႂ်ယူႇသေတႃႉ မၼ်းၼၢင်း ဢမ်ႇမေႃၸွႆႈသင်
ၶႃသွင်ၵေႃႉ လၵ်ႉလွမ်လိၵ်းတႃတေႃႇၵၼ်သေ ဝႅၼ်ၶဝ်ႈမႃႈၸူး ၸၢႆးလိုၼ်းၶမ်းႁူမ်ႈၵၼ်ယဝ်ႉ၊ ၸၢႆးလိုၼ်းၶမ်း ငိူင်ႉတူဝ်မၼ်းဝႄႈဢွၵ်ႇ တၢင်းၶၢင်ႈလႄႈ တေႃႉတႄႉဝႄႈလွတ်ႈၵႂႃႇၵူၺ်း... ဢမ်ႇၽၢင်ႉဢမ်ႇထိူမ် ၵေႃႉဢၼ်လူမ်ႉသႂ်ႇၼိူဝ်လႅင်ၼၼ်ႉ ၼႅတ်ႈဝိၼ်ႇလင် ဢဝ်လင်တႃမိုဝ်း မၼ်းၽတ်ႉမႃးလႄႈ ၸၢႆးလိုၼ်းဢမ်ႇတၼ်းဝႄႈလႆႈသေ တႃမိုဝ်းၺႃးတိူဝ်ႉ သႂ်ႇၵႅမ်ႈ ၸၢႆးလိုၼ်းၶမ်းယူႇယဝ်ႉ၊ တီႈသူပ်းၸၢႆးလိုၼ်းၶမ်းၵေႃႈ လႆႈႁၼ် လိူတ်ႈဢွၵ်ႇမႃးသေ ၼၢင်းလၢဝ်လႅင်းမႆႈၸႂ်ၵႂႃႇတႄႉꧦ-
ၸၢႆးလိုၼ်းၶမ်း ပဵၼ်ဢၼ်ၸႂ်ႁၢဝ်ႈ လိူတ်ႇလိူဝ်တွၼ်းမႃးလႄႈ မၼ်းၸင်ႇလေႃႈၶဝ်ႈၸူး ၶႃသွင်ၵေႃႉယဝ်ႉ ၶႃသွင်ၵေႃႉႁူၼ်လင်ၵေႃႉယၢင်ႈꧦ သေ ၶိုၼ်းဢဝ်တီႈယူႇ ၽၢႆႇၼႃႈၵေႃႉၼိုင်ႈ ၽၢႆႇလင်ၵေႃႉၼိုင်ႈယဝ်ႉ - ၸၢႆးလိုၼ်းၶမ်း ဝႆႉသတိယႂ်ႇꧦသေ ပႂ်ႉတွၼ်းၶႃသွင်ၵေႃႉ ဢၼ်တေၶဝ်ႈမႃး ၼၼ်ႉယူႇ ၶႃသွင်ၵေႃႉၵေႃႈ ၶိုၼ်းၶဝ်ႈမႃး ၸိူင်ႉၼင်ႇမိူဝ်ႈၵႆႈၼၼ်ႉယဝ်ႉ... ပွၵ်ႈၼႆႉတႄႉ ၸၢႆးလိုၼ်း ဢမ်ႇဝႄႈဢွၵ်ႇတၢင်းၶၢင်ႈ၊ မၼ်းၶိုၼ်းၶဝ်ႈၸူး ၽၢႆႇၼိုင်ႈသေ ၸိူင်ႉၼင်ႇသြႃႇမၼ်းသွၼ်ဝႆႉၼၼ်ႉ မၼ်းဢဝ်တႃမိုဝ်းၵေႃႉၼိုင်ႈ ၶိုၼ်းယဝ်ႈၸူးၵေႃႉၼိုင်ႈယဝ်ႉ၊ ၶႃၼင်ႇၵၼ်ၶိုၼ်းၽႃႇၺႃးၵၼ် ႁႅမ်ၺႃးၵၼ်ၶိုၼ်းသေ ဢိူင်ႇဢၢင်ၸိူင်ႇၸၢင်ၵိူင်းၵႂႃႇယဝ်ႉ၊
ၽွင်းၼၼ် ၸၢႆးလိုၼ်းၶမ်း ၶိုၼ်းၼႅတ်ႈဢဝ်တိၼ်ပိတ်ႉၸွမ်း လႄႈ ၶႃၺႃးၵိၼ်တိၼ်ၸၢႆးလိုၼ်းသေ လူမ်ႉၵႂႃႇတင်းသွင်ၵေႃႉယဝ်ႉ၊
ၶႃသွင်ၵေႃႉ ၼႅတ်ႈၶိုၼ်းလုၵ်ႉမႃးၽႂ်းꧦသေ ဢဝ်တီႈယူႇဝႆႉထႅင်ႈယဝ်ႉ၊ ၶႃဢမ်ႇႁတ်းၶဝ်ႈၸူး ၸၢႆးလိုၼ်းၶမ်း ၸိူင်ႉၼင်ႇဢွၼ်တၢင်းၼၼ်ႉယဝ်ႉလႄႈ ၶႃလွမ်တူၺ်းသၢႆငၢႆႈမၼ်းယူႇ၊ လႆႈႁၼ် ၸၢႆးလိုၼ်းၶမ်း ၶဝ်ႈၸူး ၵေႃႉၼိုင်ႈလႄႈ ၵေႃႉဢၼ်ၵိုတ်းဝႆႉၼၼ်ႉ ဢႅၼ်ႇၶဝ်ႈမႃးၸွမ်းၽၢႆႇလင် ၸၢႆးလိုၼ်းၶမ်းယဝ်ႉ ၸၢႆးလိုၼ်းၶမ်း ၼႅတ်ႈဢဝ်တိၼ်ပိတ်ႉထိပ်ႇၶိုၼ်း ၽၢႆႇလင်လႄႈ ၸပ်းတိူဝ်ႉသႂ်ႇပုမ် ၵေႃႉဢၼ်ၶဝ်ႈမႃးၽၢႆႇလင်ၼၼ်ႉယဝ်ႉ၊...
“ဢူႉ”
ၵေႃႉၼၼ်ႈ ဢဝ်မိုဝ်းၼဵၵ်းတွင်ႉၵမ်းတွင်ႉမၼ်းသေ ပၼ်ႇယူႇ ၼိူဝ်တၢင်းၼၼ်ႉယဝ်ႉ၊ ၵိုတ်းထႅင်ႈၵေႃႉၼိုင်ႈ မၼ်းၶိုၼ်းဢဝ်တိၼ်ပိတ်ႉ ပၼ်ၸၢႆးလိုၼ်းၶမ်း ဢဝ်တႃမိုဝ်းမၼ်းၵေႃႈ ပွႆႇၸွမ်းမႃးၼင်ႇၵၼ်ယဝ်ႉ၊ ၸၢႆးလိုၼ်းၶမ်း ဢဝ်မိုဝ်းမၼ်း ၼႅတ်ႈႁေႉၽၢႆႇတႂ်ႈၽၢႆႇၼိူဝ်ယဝ်ႉ ... ၸၢႆးလိုၼ်းၶမ်းတၼ်းႁပ်ႉလႆႈ ၶေႃႈမိုဝ်းမၼ်းလႄႈ ၸၢႆးလိုၼ်းၶမ်းၸၼ်လိမ်ႇ ၶေႃႈမိုဝ်းၵေႃႉၼၼ်ႉ ၶွၼ်ၼိုင်ႈ သမ်ႉပၢၵ်ႈယုၵ်ႉတိၼ်ဢၢႆႈၼၼ်ႉသေ ဢဝ်မိုဝ်းမၼ်း ၶိုၼ်းသွတ်ႇတွင်ႇၼွင်ႈမၼ်းၶိုၼ်းသေ ၸၢႆးလိုၼ်းဢဝ် တိၼ်ပိတ်ႉပၼ်ၵူၼ်ႈဢၢႆႈၼၼ်ႉယဝ်ႉ ဢီးယဝ်ႈၵွႃႇၸူး ၵေႃႉဢၼ်တိုၵ်ႉတဵၵ်း တွင်ႉမၼ်းလူမ်ႉၼင်ႈဝႆႉယူႇၼိူဝ်တၢင်းၼၼ်ႉယဝ်ႉ ... ၶႃသွင်ၵေႃႉ ဝူဝႃလူမ်ႉတဵင်သႂ်ႇၵၼ်သေ ဝၢႆႇတူၺ်းၸၢႆးလိုၼ်းၶမ်းယူႇ ... လွင်ႈဝႃႈ ၶႃဢမ်ႇႁႅမ်ပႄႉလႆႈ ၸၢႆးလိုၼ်းၶမ်းၼႆၵေႃႈ ၶႃႁူႉတူဝ်ၶႃၵႂႃႇလႄႈ ၼႃႈတႃၶႃသွင်ၵေႃႉ လွမ်ၵူဝ်ၸၢႆးလိုၼ်းၶမ်း ၶိုၼ်းႁႅမ်ၶႃထႅင်ႈၼၼ်ႉယူႇ ... ၸၢႆးလိုၼ်းၶမ်း ၸင်ႇမႃးဢဝ်တိၼ်ပိတ်ႉပၼ်ၶႃ ထႅင်ႈၵေႃႉၵမ်းꧦသေ လၢတ်ႈဝႃႈ-
“ၶိူဝ်သွင်ၵေႃႉ တွင်းဝႆႉလီꧦၼႃႈ ... ပွၵ်ႉၼႆႉတႄႉ မၵ်းမၢႆဝႆႉ တၢၼ်ႇၼႆႉၵူၺ်းၵွၼ်ႇလႃႈ ... တၢင်ႇပွၵ်ႈမႃး ပေႃးပဵၼ်မႃးထႅင်ႈတႄႉ ၶိူဝ်တေ လႆႈၸဵပ်းၼမ်သေၼႆႉ ပၢၵ်ႇပုၼ်ႈၵွၼ်ႇဢိူဝ်ႈတွင်းဝႆႉလႃႈ”
ၶႃသွင်ၵေႃႉ ဢမ်ႇပႆႇၸၢင်ႈလုၵ်ႉၵမ်းလဵဝ် ၶႃၼႃႈႁူတႃႁႄသေ လွမ်ၵူဝ်လွမ်တူၺ်း ၸၢႆးလိုၼ်းၶမ်းယူႇ၊ ... ၸၢႆးလိုၼ်းၶမ်း ၶိုၼ်းမႃးၸူး ၼၢင်းလၢဝ်လႅင်းသေ လၢတ်ႈဝႃႈ-
“လၢဝ် ... ၵႂႃႇႁဝ်းမိူဝ်း”
“ၸၢႆးလိုၼ်းၸဵပ်းၼမ်ႁႃႉ”
“ဢိတ်းၼိုင်ႈၵူၺ်းၼင်ႇၵဝ်ႇ”
ၸၢႆးလိုၼ်းၶပ်ႉဢဝ်လႅင် ၼၢင်းလၢဝ်လႅင်းသေ ၶႃသွင်ၵေႃႉ ဢၢင်ႈပွၵ်ႈမိူဝ်းယဝ်ႉ၊ ၸၢႆးလိုၼ်းၶမ်း ယဵပ်ႇလႅင်သေ ၼၢင်းလၢဝ်လႅင်းၵေႃႈ ၶိုၼ်ႈၼင်ႈၼိူဝ်ၶႅင်းၽၢႆႇလင်လႅင်ယဝ်ႉ... ၼၢင်းလၢဝ်လႅင်းလွမ်တူၺ်း ဢၢႆႈၼႃႈလိူမ်ႈသွင်ၵေႃႉ ဢၼ်တိုၵ်ႉၸၼ်ၵၼ် လုၵ်ႉယူႇၼၼ်ႉလႄႈ မၼ်းၼၢင်းဢဝ်မိုဝ်းၼိဝ်ႉၸီႉမၼ်း ပၢႆႇသီႇသူပ်းမၼ်းသေ ႁဵတ်းဢႃးလႃးဝူး တေႃႇၶႃသွင်ၵေႃႉယူႇ- ၶႃသွင်ၵေႃႉ လႆႈႁၼ်ၼင်ႇၼၼ် ၶႃပဵၼ်ဢၼ်ၶၢမ်ႇယၢပ်ႇသေ ၶႃသွင်ၵေႃႉ ၶူပ်းသူပ်း တဝ်ႉဢႅင်ႈသေ ငမ်တႃမိုဝ်း ယုၵ်ႉၼႄ ၼၢင်းလၢဝ်လႅင်းယူႇ။ ၼၢင်းလၢဝ်လႅင်း ၶိုၼ်းၼႅတ်ႈမွၵ်ႇလၢတ်ႈ ၸၢႆးလိုၼ်းၶမ်းယဝ်ႉ။
“ၸၢႆးလိုၼ်း ... ၸၢႆးလိုၼ်း ...ဢၢႆႈသွင်တူဝ်ၼၼ်ႉ ၵမ်တႃမိုဝ်း တေႃႇလၢဝ်ယူႇၼႄႈ ... တူၺ်းလူး”
“တႄႉႁႃႉ”
“တႄႉဢိူဝ်ႈ”
ၸၢႆးလိုၼ်းၶမ်း ငွၵ်းႁူဝ်လႅင်မၼ်းသေ ၶိုၼ်းဝၢႆႇမႃးၸူးၶႃသွင်ၵေႃႉယဝ်ႉ၊ လႆႈႁၼ် ၸၢႆးလိုၼ်းၶမ်း ငွၵ်းႁူဝ်လႅင်မၼ်း ဝၢႆႇမႃးၸူးၶႃသွင်ၵေႃႉလႄႈ ၶႃသွင်ၵေႃႉၵူဝ်သေ ၼႅတ်ႈၶိုၼ်ႈၶီႇလႅင်ၽႂ်လႅင်မၼ်း ပၢႆႈၽႂ်းꧦယဝ်ႉ၊
ယွၼ်ႉပိူဝ်ႈ ၶႃပၢႆႈၶိုၼ်းၶီႇလႅင်ၽႂ်းၼႃႇလႄႈ လႅင်ၶႃသွင်ၵေႃႉ ၽႃႇၺႃးၵၼ်သေ ၶိုၼ်းလူမ်ႉၵႂႃႇထႅင်ႈယဝ်ႉ၊ ... ၶႃၼႅတ်ႈၶိုၼ်းလုၵ်ႉၶိုၼ်းဝၢႆႇတူၺ်း ၸၢႆးလိုၼ်းၶမ်းၽႂ်းꧦသေ ၸၢႆးလိုၼ်းၶမ်း ႁဵတ်းၵဵင်ႈ ဢၢင်ႈၵႂႃႇၸူးၶႃလႄႈ ၶႃၼႅတ်ႈၶိုၼ်းၶီလႅင်ၶႃသေ ပၢႆႈၽႂ်းꧦယဝ်ႉ။
လႆႈႁၼ်ၶႃသွင်ၵေႃႉ ပၢႆႈၼင်ႇၼၼ် ၸၢႆးလိုၼ်းၶမ်းလႄႈ ၼၢင်း လၢဝ်လႅင်း ပဵၼ်ဢၼ်ၸူမ်းၶူဝ်တႄႉꧦသေ ၶိုၼ်းၶီႇလႅင် ပွၵ်ႈမႃးမိူဝ်းၸွမ်းၵၼ်ယဝ်ႉ... ။