မွၵ်ႇၵွၼ်တေမွၵ်ႇၼႄယူႇ/တွၼ်ႈသိပ်း သၢမ်ႁူဝ်ၸႂ်
ယွၼ်ႉပိူဝ်ႈ ၼွၼ်းလိုၵ်းလႄႈ ၼႂ်ၼႆႉ လႅတ်ႇပေႃးဢွၵ်ႇယဝ်ႉသေတႃႉ ၸၢႆးလိုၼ်းၶမ်း ယင်းတိုၵ်ႉၼွၼ်းဝၢၼ်ယူႇ မႄႈၶဝ်ၸင်ႇဝႃႈ
“လုၵ်ႈၸၢႆး ၸၢႆးလိုၼ်းၶမ်း လုၵ်ႉလႄႈ မႄႈလူဝ်ႇၸႂ်ႉၸၢႆး မဵဝ်းၼိုင်ႈဢိူဝ်ႈ”
“ဢႃႉ ... ဢိုဝ်း ... ႁိုဝ်”
ၸၢႆးလိုၼ်းၶမ်းၵေႃႈ ယဵတ်ႇၵူၼ်ႉယဵၼ်ႇၶၢၼ်ႉမၼ်းသေ လုၵ်ႉၵႂႃႇ သုၵ်ႈၼႃႈမၼ်းသေ ၶိုၼ်းမႃးၸူးမႄႈၶဝ်ယဝ်ႉ
“လူဝ်ႇၸႂ်ႉၸိူင်ႉႁိုဝ်ၶႃႈမႄႈ”
“ဢေႃႈ ... မိူဝ်ႈၼႆႉမႄႈတေႁုင်ၽၵ်းပႃသေ ၶႂ်ႈၵႂႃႇလူႇတီႈၵျွင်းဢိူဝ်ႈ ၵွပ်ႈၼႆ လုၵ်ႈၸၢႆး ၵႂႃႇႁႃသိုဝ်ႉပႃ ၼႂ်းၵၢတ်ႇမႃးပၼ်မႄႈလူး”
“ဢေႃႈ ဢေႃႈ တေသိုဝ်ႉပႃသင်ၶႃႈမႄႈ”
“သိုဝ်ႉမႃးပႃၼႆးဢိူဝ်ႈ သိုဝ်ႉမႃးသွင်ၸွႆႉၼႃႈ”
“ဢေႃႈ ... ”
ၸၢႆးလိုၼ်းၵေႃႈ ၼႅတ်ႈဢဝ်ငိုၼ်းဢဝ်သႃႉ ဢဝ်လႅင်သေ ၵႂႃႇသိုဝ်ႉပႃ ၼႂ်းၵၢတ်ႇလူင်ယဝ်ႉ ၼႂ်းၸႂ်မၼ်းတႄႉ မိူဝ်ႈၼႆႉ မၼ်းဢၢၼ်းၵႂႃႇ တီႈၼၢင်းလၢဝ်လႅင်းသေ ဢၢၼ်းၵႂႃႇပၼ်လိၵ်ႈ ဢၼ်မၼ်းတႅမ်ႈဝႆႉ ၶမ်ႈဝႃးၼၼ်ႉၼႆယဝ်ႉ ၼႂ်ၼႆႉတႄႉ ယွၼ်ႉပိူဝ်ႈ မႄႈၶဝ်ၸႂ်ႉမၼ်း ၵႂႃႇၵၢတ်ႇလႄႈ မၼ်းပႆႇတၼ်းၵႂႃႇတီႈ ၼၢင်းလၢဝ်လႅင်း ၽႅဝ်မႃးၼႂ်းၵၢတ်ႇ မၼ်းၼႅတ်ႈသိုဝ်ႉ ပႃသေ ဢဝ်မႃးႁိူၼ်းၽႂ်းꧦယဝ်ႉ။
ၽႅဝ်မႃးတီႈႁိူၼ်း မႄႈၶဝ်ႈသမ်ႉၸႂ်ႉမၼ်း သုၵ်ႈပႃ တႅပ်းပႃသေ သမ်ႉလႆႈၸွႆႈမႄႈၶဝ် ႁုင်ၽၵ်း သမ်ႉလႆႈဢဝ် ၽၵ်းသႂ်ႇၵႅင်ႉၵႂႃႇလူႇပၼ် တီႈၵျွင်းလႄႈ ၼႂ်ၼၼ်ႉ မၼ်းဢမ်ႇပဵၼ်ၵႂႃႇ တီႈၼၢင်းလၢဝ်လႅင်းယဝ်ႉ။
ထိုင်မႃးဝၢႆးဝၼ်း မၼ်းၸင်ႇပဵၼ်ၵႂႃႇတီႈႁိူၼ်းၼၢင်းလၢဝ်လႅင်း ၶဝ်ယဝ်ႉ မၼ်းဢၢၼ်းၵႂႃႇတႅပ်းၶၢတ်ႇꧦလႄႈ ၸဵမ်လိၵ်ႈ ၸဵမ်ၶွင်ၽၢၵ်ႇဢၼ် ၶႃသွင်ၵေႃႉ ၼၢင်းလၢဝ်လႅင်း လႆႈႁၵ်ႉၵၼ်သေ ၽၢၵ်ႇတွၼ်ႈပၼ်ၵၼ်ဝႆႉ ၸိူဝ်းၼၼ်ႉ မၼ်းႁေႃႇႁဵတ်းပူၵ်ႉလဵဝ်ၶႅမ်ႉꧦသေ ဢဝ်ပႃးမႃးမူတ်းꧦယဝ်ႉ လႆႈႁၼ်ၽၵ်းတူဝၢင်းၶဝ် ၽုၺ်ႇဝႆႉလႄႈ ၸၢႆးလိုၼ်းၶမ်း ပႆၶဝ်ႈမႃးၼႂ်းႁိူၼ်းယဝ်ႉ။
ဝၢႆးသေၵိၼ်ၶဝ်ႈဝၼ်းယဝ်ႉ ၼၢင်းလၢဝ်လႅင်းၵေႃႈ ဢမ်ႇၸၢင်ႈၵႂႃႇဢႅဝ်တီႈလႂ်လႄႈ မၼ်းၼၢင်း မႃးယူႇၼႂ်းသူၼ်ၶဝ်သေ ၼင်ႈထူဝ်းသိူဝ်ႈယူႇ ဢွၼ်တၢင်း မိူဝ်ႈၸၢႆးလိုၼ်းၶမ်း ပႆႇၽႅဝ်မႃးၼၼ်ႉ ၶူးမေႃယႃ ၸၢႆးဢွၼ်ၶမ်းၵေႃႈ သမ်ႉမႃးဢႅဝ်ႇ ၼၢင်းလၢဝ်လႅင်းလႄႈ မႃးႁၼ်ၼၢင်းလၢဝ်လႅင်း တိုၵ်ႉၼင်ႈတင်ႉဝႆ (တင်ႇဢူႇ) ဢွမ်ႇလႅတ်ႇ ထူဝ်းသိူဝ်ႈယူႇၼႂ်းသူၼ်ယဝ်ႉ ၼၢင်းလၢဝ်လႅင်းၵေႃႈ ၸင်ႇႁွင်ႉၸၢႆးဢွၼ်ၶမ်း ၼင်ႈတင်ႇဝႆ ၸွမ်းမၼ်းၼၢင်းသေ ဢုပ်ႇၵၼ်ဝႆႉယူႇ။
“မႃးၼင်ႈၶႃႈလႄႈ ပီႈၸၢႆးဢွၼ်ၶမ်း ၵိၼ်ၶဝ်ႈမႃးယဝ်ႉႁႃႉ?”
“ၵိၼ်ယဝ်ႉယဝ်ႈ ၽၵ်းတႄႉၵိၼ်ၶႆႇၵႆႇၶူဝ်ႈ ၽၵ်းၵမ်ႇၸွၼ်းၶူဝ်ႈ ၼမ်ႉၽၵ်းသူမ်ႈထၢင်ႈဝႃႇ”
ၼၢင်းလၢဝ်လႅင်း ယုမ်ႉသေၶိုၼ်းဝႃႈ
“ၶိၵ်း ၶိၵ်း လၢဝ်ၵူၺ်းထၢမ်ဝႃႈ ၵိၼ်ၶဝ်ႈယဝ်ႉႁႃႉၼႆၵူၺ်း ပီႈၸၢႆးဢွၼ်ၶမ်း သမ်ႉပေႃးတၼ်းတွပ်ႇလၢတ်ႈပႃး ၽၵ်းၵမ်းလဵဝ်ယဝ်ႉလႃႇ”
“ၸႂ်ႈဢိူဝ်ႈ ထုင်းၵႂၢမ်းဝႃႈ လၢတ်ႈဝႆႉၼႆႉ ၶႅၼ်းသေဝႆႉလၢတ်ႈၼႆယဝ်ႉ ပေႃးဝႃႈ ထၢမ်ၶိူဝ်းၶဝ်ႈၼႆ ႁူႉၵႃႈလူဝ်ႇထၢမ်ပႃးၽၵ်း ဢမ်ႇၸႂ်ႈႁႃႉ ၵွပ်ႈၼႆ ပီႈၸၢႆးၸင်ႇလၢတ်ႈဝႆႉထႃႈ ဢွၼ်တၢင်းယဝ်ႉ ၵူၺ်းၵႃႈ”
ၸၢႆးဢွၼ်ၶမ်း လၢတ်ႈဝႃႈ “ၵူၺ်းၵႃႈ”ၼႆသေ ၵိုတ်းၶေႃႈၵႂၢမ်း မၼ်းဝႆႉယဝ်ႉ ၼၢင်းလၢဝ်လႅင်း ၸင်ႇဝႃႈ-
“ၵူၺ်းၵႃႈ ဢီႈသင်ထႅင်ႈလႃႇ ပီႈၸၢႆးဢွၼ်ၶမ်း”
“ၵူၺ်းၵႃႈ ဢၼ်ပီႈၸၢႆးဢွၼ်ၶမ်း ထၢမ်ၼၢင်းလၢဝ်လႅင်းဝႆႉ မိူဝ်ႈတိုၵ်ႉမီးဝဵင်းလိူဝ်ႇၼၼ်ႉ မီးဝႆႉသွင်ၶေႃႈလူး ၼၢင်းလၢဝ်လႅင်းပႆႇတွပ်ႇလၢတ်ႈၶိုၼ်းသေၶေႃႈ ဢမ်ႇၸႂ်ႈႁႃႉ? ၵွပ်ႈၼႆ ပီႈၸၢႆးဢွၼ်ၶမ်း ၶႂ်ႈႁူႉသွင်ဢၼ်ၼႆႉၵူၺ်းယဝ်ႉ”
ၼၢင်းလၢဝ်လႅင်းၼႆႉ မၼ်းၼၢင်းတေလႆႈႁဵတ်းႁိုဝ်တွပ်ႇၵေႃႈ ဢမ်ႇၸၢင်ႈလႄႈ မၼ်းၼၢင်း ၵူမ်ႈၼႃႈမၼ်းဝႆႉသေ သိုပ်ႇထူဝ်းသိူဝ်ႈမၼ်းဝႆႉယူႇ ၸၢႆးဢွၼ်ၶမ်းတႄႉ မုင်ႈမွင်းပႂ်ႉၶေႃႈတွပ်ႇ ၼၢင်းလၢဝ်လႅင်းဝႆႉယူႇ။
ၽွင်းၼၼ်ႉ ၸၢႆးလိုၼ်းၶမ်း ၶဝ်ႈမႃးလႆႈမႃးႁၼ် ၼၢင်းလၢဝ်လႅင်း လႄႈ ၸၢႆးဢွၼ်ၶမ်း တိုၵ်ႉၼင်ႈႁူမ်ႈၵၼ်သေ ဢုပ်ႇၵၼ်ယူႇ ၵူၺ်းၵႃႈ ၶႃဢုပ်ႇသင်ၵၼ်ၼႆတႄႉ မၼ်းဢမ်ႇလႆႈငိၼ်း လႆႈမႃးႁၼ်ၼင်ႇၼၼ် ၼႂ်းၸႂ်မၼ်း ပဵၼ်လိူတ်ႇႁၢဝ်ႈ ၸႂ်လမ်မႃးၵမ်းလဵဝ်ယဝ်ႉ မၼ်းၸင်ႇဢႆဢွၵ်ႇသဵင် ၵမ်းၼိုင်ႈယဝ်ႉ
“ဢႁႅမ်ႉ”
လႆႈငိၼ်းသဵင်ဢႆလႄႈ ၶႃသွင်ၵေႃႉ ၼႅတ်ႈဝၢႆႇတူၺ်းၼင်ႇၵၼ်ယဝ်ႉ ၼၢင်းလၢဝ်လႅင်း ၵိုင်ႉၵၢင်ႉ ယူႇယၢပ်ႇၵႂင်ၸႂ်ၵႂႃႇသေ ဢမ်ႇၽၢင်ႉဢမ်ႇထိူမ် မၼ်းၼၢင်းၵေႃႈ တၼ်းလၢတ်ႈ ဢွၵ်ႇသူပ်းၵွႃႇၼင်ႇၼႆယဝ်ႉ
“ၸၢႆးလိုၼ်းၶမ်း မႃးႁဵတ်းသင်”
ၸၢႆးလိုၼ်းၶမ်း ဢမ်ႇယုမ်ႉဢမ်ႇၶူဝ် ဝႆႉၼႃႈၶဵင်ႈꧦသေ သိုပ်ႇပႆမႃး ႁိမ်းၶႃသွင်ၵေႃႉယူႇ လႆႈႁၼ် ၸၢႆးလိုၼ်းၶမ်းမႃးၸူးၶႃလႄႈ ၶႃသွင်ၵေႃႉ လုၵ်ႉၸုၵ်ႈတင်းသွင်ၵေႃႉယဝ်ႉ ၼၢင်းလၢဝ်လႅင်းၶိုၼ်းဝႃႈ
“မႃးၼင်ႈလႄႈ ၸၢႆးလိုၼ်း”
ၸၢႆႈလိုၼ်ႈယၵ်ႉတူၺ်းၼႃႈ ၼၢင်းလၢဝ်လႅင်းသေ လၢတ်ႈဝႃႈ
“ၵဝ်မႃးၼႆႉ တႃႇမႃးၼင်ႈဢမ်ႇၸႂ်ႈၵူၺ်း”
လႆႈငိၼ်းၵႂၢမ်း ၸၢႆးလိုၼ်း လၢတ်ႈၼင်ႇၼၼ် ၼၢင်းလၢဝ်လႅင်း ပဵၼ်ဢၼ်ဢၢမ်းၵႂႃႇယဝ်ႉ ၸၢႆးဢွၼ်ၶမ်းၵေႃႈ လႆႈႁၼ်ၸၢႆးလိုၼ်းၶမ်း လၢတ်ႈၵႂၢမ်းၸိူင်ႉၼင်ႇၼႆ ၼႂ်းၸႂ်မၼ်း တႅပ်းတတ်းဝႃႈ ပဵၼ်ၶေႃႈၵႂၢမ်း ဢမ်ႇယဵၼ်ႇငႄႈၼႆယူႇ ၼၢင်းလၢဝ်လႅင်း ၶိုၼ်းဝႃႈ
“ၸၢႆးလိုၼ်း ၸၢႆးလိုၼ်းဝႃႈသင်ၼႆႉ လၢဝ်တႄႉဢမ်ႇႁူႉပွင်ႇယဝ်ႉ”
ၸၢႆးလိုၼ်းၸင်ႇယုမ်ႉ ဢဝ်လူမ်းဢွၵ်ႇတင်းၶူးၼင်သေ
“ႁိုဝ်ႉ! ... ဢမ်ႇႁူႉပွင်ႇႁႃႉ ၵဝ်မႃးတီႈလဵဝ်ၼႆႉ တႃႇမႃးၼင်ႈဢမ်ႇၸႂ်ႈၵူၺ်း တႃႇမႃးပၼ်ၶူဝ်းၸိူဝ်းၼႆႉယဝ်ႉ”
ၸၢႆးလိုၼ်းၶမ်း ယုၵ်ႉၼႄ ၶူဝ်းဢၼ်မၼ်းဢဝ်မႃးၼၼ်ႉယဝ်ႉ
“ပဵၼ်ဢီႈသင်ၼၼ်ႉ ၸၢႆးလိုၼ်း”
“ဢေႃႈ ... ၼႆႉႁႃႉ ပဵၼ်ၶွင်ၽၢၵ်ႇတၢင်းႁၵ်ႉ လုၵ်ႈယိင်းသထေး ဢၼ်ၽၢၵ်ႇပၼ် လုၵ်ႈၸၢႆးၵူၼ်းၽၢၼ်ၼၼ်ႉဢိူဝ်ႈ မိူဝ်ႈလဵဝ်လုၵ်ႈယိင်း သထေး ဢမ်ႇမီးသၸ်ႉၸႃႇယဝ်ႉလႄႈ လုၵ်ႈယိင်းသထေး လႄႇႁႃႁၵ်ႉ ထႅင်ႈၵေႃႉမႂ်ႇယဝ်ႉလႄႈ”
လႆႈငိၼ်း ၸၢႆးလိုၼ်းၶမ်း ဝႃႈတီႈမၼ်းၼၢင်းၼင်ႇၼၼ် မၼ်းပဵၼ်ဢၼ်ၸႂ်လမ် ၶၢၼ်ႉၶၢမ်ႇၶၢၼ်ႉငိၼ်းလႄႈ ၽွင်းမိူဝ်ႈၸၢႆးလိုၼ်း လၢတ်ႈၵႂၢမ်းပႆႇတၼ်းသုတ်းၼၼ်ႉ မၼ်းၼၢင်း ဢဝ်ၽႃမိုဝ်းမၼ်း ၽတ်ႉႁႅမ်ပၼ်ၵႅမ်ႈ ၸၢႆးလိုၼ်းၶမ်း ႁႅင်းꧦယဝ်ႉ။
“ပၢပ်ႉ”
ၽႃႇမိုဝ်းၼုမ်ႇꧦဢွၼ်ႇ ၼၢင်းလၢဝ်လႅင်းၵေႃႈ လိူတ်ႇမႆႈၵႂႃႇ ၵႅမ်ႈၸၢႆးလိုၼ်းၶမ်းၵေႃႈ လိူတ်ႇမႆႈၵႂႃႇဝူႈꧦယဝ်ႉ ၸၢႆးလိုၼ်းၶမ်း ယၵ်ႉတူၺ်း ၼႃႈၼၢင်းလၢဝ်လႅင်းသေ လၢတ်ႈဝႃႈ
“ဢေႃႈ ... ၼၢင်းလၢဝ်လႅင်း ႁႅမ်ထႅင်ႈလႄႈယေႃႈ ယူဝ်ၶႄး ၽႃႇမိုဝ်းလၢဝ်ၸဵပ်းၵႂႃႇယဝ်ႉယူဝ်ႉ”
ၼၢင်းလၢဝ်လႅင်း ဢဝ်မိုဝ်းဢိုတ်းႁူမၼ်းသေ
“ဢူဝ် ... လၢဝ်ဢမ်ႇၶႂ်ႈငိၼ်း ၵႂႃႇလႄႈ ၵႂႃႇလႄႈ”
ၸၢႆးလိုၼ်းၶမ်း ဢဝ်ပူၵ်ႉၶူဝ်းၶွင်ၽၢၵ်ႇၼၼ်ႉ ယိုၼ်ႈပၼ်ၼၢင်းလၢဝ်လႅင်းသေ လၢတ်ႈဝႃႈ
“ပေႃးဝႃႈ ၸဝ်ႈႁိူၼ်းလိုပ်ႈဢွၵ်ႇႁိူၼ်းၼႆတႄႉ ႁူႉၵႃႈတေလႆႈ ဢွၵ်ႇၵႂႃႇယူႇ ပိၵ်ႉသမ်ႉဝႃႈ ဢမ်ႇလိုပ်ႈဢွၵ်ႇၼႆၵေႃႈ တေဢၢၼ်းဢွၵ်ႇၵႂႃႇယူႇယဝ်ႈ ယေႃႈ ၼၢင်းလၢဝ်လႅင်း ၶိုၼ်းဢဝ်ဢၼ်ၼႆႉသေ ၵွၼ်ႇလႄႈ”
ၼၢင်းလၢဝ်လႅင်း ၶွၼ်းႁူဝ်ၼမ်ႉတႃတူၵ်းသေ
“ဢူဝ် ဢမ်ႇဢဝ် ဢမ်ႇဢဝ် ၵႂႃႇလႄႈ ၵႂႃႇလႄႈ”
“ပေႃးဢမ်ႇဢဝ်ၼႆ ၵေႃႉဢၼ်မႃးပၼ်ၼၼ်ႉ ပႆႇၸၢင်ႈၵႂႃႇၵူၺ်း”
ၼၢင်းလၢဝ်လႅင်းႁႆႈသေ
“ၵႂႃႇလႄႈ လၢဝ်ဢမ်ႇဢဝ် လၢဝ်ဢမ်ႇၶႂ်ႈႁၼ် သိုတ်ႉသိုတ်ႉ”
ၸၢႆးလိုၼ်းၶမ်းၵေႃႈ ၸႂ်ႉႁႂ်ႈဢဝ်ယူႇတိၵ်းꧦ ၼၢင်းလၢဝ်လႅင်း သမ်ႉဢမ်ႇဢဝ် ၽွင်းၼၼ်ႉ ၶူးမေႃယႃၸၢႆးဢွၼ်ၶမ်း ၸင်ႇမႃးယိပ်းႁူဝ်မႃႇ ၸၢႆးလိုၼ်းၶမ်းသေ လၢတ်ႈဝႃႈ
“ၸၢႆးလိုၼ်းၶမ်း ၸၢႆးလိုၼ်းၶမ်း ႁဵတ်းပွင်ႇသင်ၸိူင်ႉၼႆ”
ၸၢႆးလိုၼ်းၶမ်း ၸင်ႇပၢၵ်ႈမိုဝ်းၸၢႆးဢွၼ်ၶမ်းသေ လၢတ်ႈဝႃႈ
“ႁေႉ ... ၶူးမေႃလူင် ၸၢႆးဢွၼ်ၶမ်း ၵပ်းၵၢႆႇလူၺ်ႈ မိူဝ်ႈလဵဝ်ၼႆႉ ယႃႇပေမႃးမေႃးၸွမ်းသင် ယႃႇပေၶႂ်ႈႁဵတ်း ၵူၼ်းၵဝ်းၵူႈတီႈလေႃႇ”
လႆႈငိၼ်းၵႂၢမ်း ၸၢႆးလိုၼ်းၶမ်း လၢတ်ႈၶႅင်တေႃႇမၼ်းၼင်ႇၼႆ သမ်ႉဝႃႈ မၼ်းပဵၼ်ၵူၼ်းၵဝ်းၼႆလႄႈပိူင်ၼိုင်ႈ ၽွင်းမိူဝ်ႈ မၼ်းတိုၵ်ႉမွင်းၵႂၢမ်းႁၵ်ႉ ဢၼ်ၼၢင်းလၢဝ်လႅင်း တေတွပ်ႇၼၼ်ႉ ၸၢႆးလိုၼ်းၶမ်း သမ်ႉၽႅဝ် မႃးသေ မိူၼ်ၼင်ႇ မႃးပၼ်တၢင်းယႃႉၵဝ်းမၼ်းလႄႈ ၸၢႆးဢွၼ်ၶမ်း ၵိုင်ႉၵၢင်ႉၸႂ်လမ်ၼႃႈမႆႈသေ ၼႅတ်ႈဢဝ်တႃမိုဝ်း ထုပ်ႉပၼ်ၵႅမ်ႈ ၸၢႆးလိုၼ်းၶမ်းႁႅင်းꧦယဝ်ႉ ၸၢႆးလိုၼ်းၶမ်းၵေႃႈ ဢမ်ႇထၢင်ႇဝႆႉလႄႈ လႆႈၺႃးၵိၼ် တႃမိုဝ်းၼင်ႇၼၼ်သေ မၼ်းၸၢႆးပိၼ်ႈလူမ်ႉၵႂႃႇ ၽႃႇၺႃးဢုမ်မွၵ်ႇသေ ဢုမ်မွၵ်ႇၵေႃႈယၢတ်ႇတူၵ်းလႅဝ်ယဝ်ႉ။
ၽွင်းမိူဝ်ႈ ၸၢႆးလိုၼ်းၶမ်း ပိၼ်ႈလူမ်ႉၵႂႃႇၼၼ်ႉ ပူၵ်ႉၶွင်ၽၢၵ်ႇမၼ်း ဝူင်ၵႂႃႇၺႃးသႂ်ၼႂ်းဢူၵ်း ၼၢင်းလၢဝ်လႅင်းလႄႈ ၼၢင်းလၢဝ်လႅင်းၵေႃႈ ႁပ်ႉဢဝ်ဝႆႉယူႇယဝ်ႉ လႆႈႁၼ်ပဵၼ်ၵႂႃႇၼင်ႇၼၼ် မၼ်းၼၢင်းၵႂင်ၵႂႃႇလႄႈ မၼ်းၼၢင်း တေလႆႈႁဵတ်းႁိုဝ်ၵေႃႈဢမ်ႇႁူႉ မၼ်းၼၢင်းသတိလႆႈသေ ၸင်ႇၼႅတ်ႈၵႂႃႇၸၼ် ၸၢႆးလိုၼ်းၶမ်းလုၵ်ႉယဝ်ႉ ၼႂ်းသူပ်းၸၢႆးလိုၼ်းၶမ်း တႄႉ ဢွၵ်ႇလိူတ်ႈလႅင်ဝႆႉယူႇ မၼ်းဢဝ်ႁႅင်းလုၵ်ႉသေ ဢၢင်ႈၶိုၼ်းတွပ်ႇတႅၼ်း ၸၢႆးဢွၼ်ၶမ်းယူႇ ၼၢင်းလၢဝ်လႅင်း ၵူဝ်ၸၢႆးလိုၼ်း ၶိုၼ်းႁဵတ်းတီႈ ၸၢႆးဢွၼ်ၶမ်းလႄႈ မၼ်းၼၢင်းၼႅတ်ႈၸၼ်မိုဝ်း ၸၢႆးလိုၼ်းဝႆႉယဝ်ႉ။
“ၸၢႆးလိုၼ်း ယႃႇပေႁဵတ်း ... တေၽိတ်းၵၼ်မူတ်းယဝ်ႉ”
ၵူၺ်းၵႃႈ ၸၢႆးလိုၼ်း ၶိုၼ်းသတိလႆႈလႄႈ မၼ်းၶိုၼ်းမႄးယိုတ်းၸႂ် တႃႇတေတွပ်ႇတႅၼ်းၼၼ်ႉပႅတ်ႈယဝ်ႉ မၼ်းၸဵတ်ႉလိူတ်ႈ တီႈသူပ်းမၼ်းၼၼ်ႉသေ လၢတ်ႈဝႃႈ
“ၶူးမေႃယႃ ၸၢႆးဢွၼ်ၶမ်း ယွၼ်ႉပိူဝ်ႈၼပ်ႉယမ်ႁၼ်ထိုင် ၼမ်ႉၸႂ် ၸေႇတၼႃႇၵျေးၸူး လွင်ႈဢၼ်ၶူးမေႃယႃ လႆႈယူတ်းယႃပၼ် မႄႈၶႃႈႁဝ်းလႄႈ တႃႇတေၶိုၼ်းၶဵင်ႇႁႅင်းတွပ်ႇတႅၼ်းမင်ၶိုၼ်း ၸဝ်ႈၵျေးၸူးမႄႈၶႃႈၼၼ်ႉ ၶႃႈဢမ်ႇၶႂ်ႈႁဵတ်းၶႃႈ”
ၸၢႆးလိုၼ်းၶမ်း ဝႃႈၼင်ႇၼႆ ပၢၵ်ႈပႅတ်ႈမိုဝ်း ၼၢင်းလၢဝ်လႅင်း ဢၼ်ယိပ်းမၼ်းဝႆႉၼၼ်ႉသေ ပႆဢွၵ်ႇႁိူၼ်းၵႂႃႇယဝ်ႉ ၼၢင်းလၢဝ်လႅင်း ႁွင်ႉဝႃႈ
“ၸၢႆးလိုၼ်း ၸၢႆးလိုၼ်း”
ၼၢင်းလၢဝ်လႅင်း ႁွင်ႉမၼ်းသေတႃႉ ၸၢႆးလိုၼ်းၶမ်း တိုၼ်းဢမ်ႇဝၢႆႇတူၺ်း ၸၢႆးဢွၼ်ၶမ်း လႄႈ ၼၢင်းလၢဝ်လႅင်းၵေႃႈ ငဝ်တူၺ်းၸၢႆးလိုၼ်းၶမ်း ဢၼ်ပႆဢွၵ်ႇၵႂႃႇၼၼ်ႉယူႇ ၼမ်ႉတႃ ၼၢင်းလၢဝ်လႅင်းတႄႉ လႆဢွၵ်ႇ ၵိင်ႈလူင်းၸွမ်းၵႅမ်ႈမၼ်းၼၢင်းသေ မၼ်းႁႆႈယူႇယဝ်ႉ။
ဝၢႆးသေ ၸၢႆးလိုၼ်းၶမ်း ဢွၵ်ႇဝၢင်းႁိူၼ်းၵႂႃႇ ၼၢင်းလၢဝ်လႅင်းမႃး လိတ်ႈတူၺ်း ပူၵ်ႉၶွင်ၽၢၵ်ႇ ဢၼ်ၸၢႆးလိုၼ်း ၶိုၼ်းမႃးပၼ်ၼၼ်ႉ လႆႈႁၼ် လိၵ်ႈၽိုၼ်ၼိုင်ႈလႄႈ မၼ်းၼၢင်းၸင်ႇၽုၺ်ႇထူၺ်ႈယဝ်ႉ။
ထိုင်/
ၵေႃႉႁဵတ်းလႆႈ လၢဝ်
ၸဵမ်မိူဝ်ႈဝဵင်းလိူဝ်ႇၼၼ်ႉ လၢဝ်ၵႂႃႇတၢင်းလႂ် ပႆတၢင်းလႂ် ၵႂႃႇၸွမ်းၽႂ်ၼႆ ၸၢႆးလိုၼ်းႁူႉယူႇ ႁၼ်ယူႇမူတ်းꧦ
ၵွပ်ႈၼႆ မိူဝ်ႈပူၼ်ႉမႃး သီႇပီၼၼ်ႉ မွၵ်ႇၵွၼ်တေမွၵ်ႇၼႄယူႇ ၼႆၼၼ်ႉ ယၢမ်းလဵဝ်မွၵ်ႇၵွၼ် ဢမ်ႇမွၵ်ႇသေတႃႉ ၸၢႆးလိုၼ်းႁူႉယဝ်ႉ လွင်ႈတၢင်းႁၵ်ႉႁႃးၼၼ်ႉ ႁႂ်ႈသုတ်းတီႈၼႆႈသေလႃႈ
ၵေႃႉဢမ်ႇမီးသၸ်ႉၸႃႇၼၼ်ႉ ၸၢႆးလိုၼ်းတေဝႄႈပၢႆႈၵႆꧦယဝ်ႉ။
ၵေႃႉယၢမ်ႈႁၵ်ႉလၢဝ် ၸၢႆးလိုၼ်း
ၼၢင်းလၢဝ်လႅင်း လူတူၺ်းလိၵ်ႈၼၼ်ႉသေ ႁႆႈယူႇယဝ်ႉ ဝၼ်းၼၼ်ႉ ၼၢင်းလၢဝ်လႅင်း ၶိုၼ်းၶႆႈၼႄ ၸၢႆးဢွၼ်ၶမ်း လွင်ႈဢၼ်ၶႃသွင်ၵေႃႉ ၸၢႆးလိုၼ်းၶမ်း ပဵၼ်ၵေႃႉႁၵ်ႉၵၼ်မႃးၸဵမ်လဵၵ်ႉ လွင်ႈဢၼ်ၶႃသွင်ၵေႃႉ ၸၢႆးလိုၼ်းၶမ်း လႆႈႁၵ်ႉၵၼ်မႃးၼၼ်ႉ သဵင်ႈꧦယဝ်ႉ။
ထိုင်မႃး တၢမ်းၶမ်ႈ ၸၢႆးဢွၼ်ၶမ်းၵေႃႉလဵဝ် ႁေႃႈၵႃးမႃးတီႈႁိူၼ်း ၸၢႆးလိုၼ်းၶမ်းၶဝ်ယဝ်ႉ ပႃႈသွႆႈၶမ်း လႆႈႁၼ်ၸၢႆးဢွၼ်ၶမ်းမႃးလႄႈ မၼ်းၸင်ႇဝႃႈ
“ဢေႃႈ ... ၶူးမေႃယႃ မႃးၶႃႈလႄႈ ၶဝ်ႈမႃးၼႂ်းႁိူၼ်းသေ မႃးၼင်ႈ ၶႃႈလႄႈ”
ၽွင်းမိူဝ်ႈ ၸၢႆးဢွၼ်ၶမ်း ၶဝ်ႈမႃးၼႂ်းႁိူၼ်းၼၼ်ႉ ၸၢႆးလိုၼ်းၶမ်းၵေႃႈ လုၵ်ႉတီႈၼွၵ်ႈသေ ပွၵ်ႈမႃးမိူဝ်း မႃးလႆႈႁၼ်ၵႃး ၸၢႆးဢွၼ်ၶမ်း မီးဝႆႉယူႇ တီႈၼႃႈႁိူၼ်းၶဝ်လႄႈ မၼ်းၸင်ႇလွမ်ꧦ ၶဝ်ႈမႃးၼႂ်းဝၢင်းႁိူၼ်းသေ မႃးယူႇတီႈၼွၵ်ႈတီႈၼိုင်ႈ လၵ်ႉလွမ်ထွမ်ႇ ဢၼ်ၶႃဢုပ်ႇၵၼ်ၼၼ်ႉယူႇ-
ပႃႈသွႆႈၶမ်း ၼႅတ်ႈႁိုဝ်ႈၼမ်ႉၼဵင်ႈၶူမ် ဢဝ်မၢၵ်ႇဢူမ်မၢၵ်ႇဝၼ်းဝၢႆႇ တမ်းပၼ်ၶူးမေႃယႃယဝ်ႉ
“ၵိၼ်လႄႈ ၶူးမေႃယႃ ယႃႇပေဢႃးၼႃႇသင်ၼႃႈ”
“ဢေႃႈ ဢေႃႈ ၸၢႆးလိုၼ်းၶမ်း ၵႂႃႇလႂ်ၶႃႈလႃႇၼႆႉ”
“ဢမ်ႇႁူႉယဝ်ႉ မိူဝ်ႈၵၢင်ဝၼ်းၼၼ်ႉၵေႃႈ မၼ်းၵႂႃႇႁဵတ်းသင်မႃး ၵေႃႈဢမ်ႇႁူႉယဝ်ႉ ၵႅမ်ႈမၼ်းၵေႃႈ ၸဵပ်းသေ မႃးမိူဝ်းဢိူဝ်ႈ ပႃႈထၢမ်တူၺ်းတႄႉ မၼ်းဝႃႈ မၼ်းၶီႇလႅင်လူမ်ႉသေ ပဵၼ်ၵႂႃႇၼႆယဝ်ႉ”
ၸၢႆးဢွၼ်ၶမ်း လႆႈငိၼ်းၼင်ႇၼၼ် မၼ်းလွမ်ဢၢမ်းၼမ်ႉၸႂ် ၸၢႆးလိုၼ်းၶမ်းယူႇ မၼ်းၸင်ႇဝႃႈ
“ဢၼ်ၶႃႈမႃးဢႅဝ်ႇ တီႈလဵဝ်ၼႆႉ မႃးၵွပ်ႈလွင်ႈၼႆႉဢေႃႈ”
ပႃႈသွႆႈၶမ်း ဢမ်ႇပွင်ႇၸႂ်လႄႈ ၸင်ႇထၢမ်ဝႃႈ
“ပဵၼ်ၸိူင်ႉႁိုဝ်ၼႆႉ ပႃႈတႄႉ ဢမ်ႇႁူႉပွင်ႇသင်ယဝ်ႉ လၢတ်ႈၼႄလူး”
ၸၢႆးဢွၼ်ၶမ်းၵေႃႈ သပ်းလႅင်းၶႆႈၼႄ ဢၼ်ပဵၼ်ပူၼ်ႉမႃးၼၼ်ႉ သဵင်ႈꧦသေ ပႃႈသွႆႈၶမ်းၵေႃႈ ပွင်ႇၸႂ်ၵႂႃႇယဝ်ႉ
“ၵွပ်ႈၼႆ ၶႃႈဢၢင်ႈမႃးတွင်းပၢၼ်ႇ ၸၢႆးလိုၼ်းၶမ်းဢေႃႈ ၽွင်းမိူဝ်ႈ ၵၢင်ဝၼ်းၼၼ်ႉ ၶႃႈၵိုင်ႉၵၢင်ႉ ၸႂ်လမ်ၵႂႃႇလႄႈ ၸင်ႇလႆႈပူၼ်ႉတိၼ်ပူၼ်ႉမိုဝ်းၵႂႃႇဢေႃႈ”
“ၼႆႉတႄႉ ဢမ်ႇပဵၼ်သင် ပေႃးၸၢႆးလိုၼ်းမႃးၼႆ ပႃႈတေလၢတ်ႈ ၼႄသဵင်ႈꧦလႆ”
ပႃႈသွႆႈၶမ်း ပႆႇႁူႉၸိုဝ်ႈၸၢႆးဢွၼ်ၶမ်းၵွၼ်ႇလႄႈ မၼ်းၸင်ႇထၢမ်
“ဢေႃ ... ၸိုဝ်ႈၸၢႆးၶူးမေႃယႃ ဝႃႈႁိုဝ်တႄႉၵေႃႈ ပႃႇပႆႇႁူႉလူင်”
“ၸၢႆးဢွၼ်ၶမ်း ၼႆဢေႃႈ”
လႆႈငိၼ်းၼင်ႇၼၼ် ပႃႈသွႆႈၶမ်း ပဵၼ်ဢၼ်ဢၢမ်းၵႂႃႇတႄႉꧦ ယဝ်ႉ။
“ၸၢႆးဢွၼ်ၶမ်းၼႆႁႃႉ...! ဢူႈမႄႈ ၸၢႆးဢွၼ်ၶမ်းၶဝ်လူး”
မႄႈၶႃႈတႄႉ သဵင်ႈႁၢႆတၢႆၵႂႃႇ မိူဝ်ႈၶႃႈလႆႈသွင်ၶူပ်ႇၼၼ်ႉသေ ဢူႈတႄႉသဵင်ႈၵႂႃႇ မိူဝ်ႈၶႃႈတိုၵ်ႉလႆႈ ႁူၵ်းၶူပ်ႇၼၼ်ႉဢေႃႈ”
“ဢေႃ ၽႂ်သမ်ႉသိုပ်ႇလဵင်ႉ တေႃႇပေႃးယႂ်ႇလႃႇ”
“ပီႈဢၢႆႈဢူႈၶႃႈ ၶိုၼ်းသိုပ်ႇၵဵပ်းလဵင်ႉဢေႃႈ”
“ဢူႈမႄႈၶူးမေႃယႃ ၶဝ်ပဵၼ်ၵူၼ်းတၢင်းလႂ်”
“ပဵၼ်ၵူၼ်း တၢင်းၵျွၵ်ႉမႄးဢေႃႈ”
ပႃႈသွႆႈၶမ်း ပဵၼ်ဢၼ်ဢၢမ်းလူင်ဢၢမ်ႈလၢင် ၵႂႃႇတိၵ်းꧦယဝ်ႈ
“ၸိုဝ်ႈဢူႈမႄႈ ဝႃႈႁိုဝ်?”
“ၸိုဝ်ႈမႄႈၶႃႈတႄႉ မိူၼ်ၸိုဝ်ႈ ပႃႈသွႆႈၶမ်းဢေႃႈ... ႁွင်ႉဝႃႈ ပႃႈသွႆႈၶမ်းၼႆ ၼင်ႇၵဝ်ႇၶႃႈယဝ်ႉ”
“ႁႃ ... ၸိုဝ်ႈဢူႈလူး”
“ပဵၼ်လုင်းၶိူဝ်းသုင် ၼႆဢေႃႈ”
ပႃႈသွႆႈၶမ်း ဢၢမ်းတႄႉဢၢမ်းဝႃႈသေ ၸင်ႇတၵ်ႉဝႃႈ
“ပေႃးၼႆ တီႈၼိူဝ်ႁူဝ်ၼူမ်း ၸၢႆးဢွၼ်ၶမ်း ၽၢႆႇသၢႆႉၼၼ်ႉ မီးမၢႆလႅင်ဝႆႉ ဢၼ်ၼိုင်ႈ ဢမ်ႇၸႂ်ႈႁႃႉ?”
ၸၢႆးဢွၼ်ၶမ်း ၶိုၼ်းဢၢမ်းၵႂႃႇသေ လွင်ႈဢၼ်ပႃႈသွႆႈၶမ်း ႁဵတ်းႁိုဝ်ႁူႉ တီႈၼိူဝ်ႁူဝ်ၼူမ်းၽၢႆႇသၢႆႉမၼ်း မီးဝႆႉမၢႆလႅင်ၼၼ်ႉယူႇ မၼ်းၸင်ႇ ထၢမ်ဝႃႈ
“မီးဢေႃႈ ပႃႈသွႆႈၶမ်း ႁဵတ်းႁိုဝ်ႁူႉၶႃႈၼႆႉ”
“ႁူႉဢိူဝ်ႈ ၸၢႆးဢွၼ်ၶမ်းၼႆႉ ပဵၼ်လုၵ်ႈၸၢႆးမႄႈယဝ်ႉ”
ၸၢႆးဢွၼ်ၶမ်း ပဵၼ်ဢၼ်ဢၢမ်းၵႂႃႇထႅင်ႈသေ
“ဢီႈသင်ၶႃႈၵေႃႈ”
ပႃႈသွႆႈၶမ်း ၸင်ႇလုၵ်ႉၵႂႃႇဢဝ်ၶႅပ်းႁၢင်ႈ ဢၼ်ၼိုင်ႈမႃးၼႄ ၸၢႆးဢွၼ်ၶမ်းယဝ်ႉ။
“ၼႆႉ ပဵၼ်ၶႅပ်းႁၢင်ႈၽႂ်ၼႆႉ တူၺ်းလူး ၸၢႆးဢွၼ်ၶမ်း”
ၸၢႆးဢွၼ်ၶမ်းၵေႃႈ ဢဝ်တူၺ်းၶႅပ်းႁၢင်ႈၼၼ်ႉၼႆ လႆႈႁၼ်ၶႅပ်းႁၢင်ႈမၼ်း မိူဝ်ႈလဵၵ်ႉလႄႈ တင်းဢူႈမႄႈမၼ်းထႆႇဝႆႉ ႁူမ်ႈၵၼ်ၼၼ်ႉယဝ်ႉ မၼ်းၸင်ႇဝႃႈ
“ၼႆႉပဵၼ်ၶႅပ်းႁၢင်ႈၶႃႈလႄႈ ဢူႈမႄႈၶႃႈယဝ်ႉ”
ၸၢႆးဢွၼ်ၶမ်း ၼႅတ်ႈဝၢင်းဝႆႉ ၶႅပ်းႁၢင်ႈၼၼ်ႉသေ လုၵ်ႉမႃးၸူး မႄႈမၼ်း ပႃႈသွႆႈၶမ်းယဝ်ႉ ၼႂ်းၸႂ်မၼ်းၸၢႆး ၸူမ်းသိူဝ်းၵေႃႈပႃး ၶေႃးၶူမ် ၵေႃႈပႃး မၼ်းၸင်ႇႁွင်ႉဝႃႈ“မႄႈ”ၼႆယဝ်ႉ ပႃႈသွႆႈၶမ်းၵေႃႈ ႁွင်ႉဝႃႈ “လုၵ်ႈၸၢႆး” ၼႆသေ ၶႃသွင်ၵေႃႉ မႄႈလုၵ်ႈၸူမ်းသိူဝ်း ၵွတ်ႇၵၼ်ဝႆႉယဝ်ႉ ၼမ်ႉတႃ ဢၼ်မႄႈႁၵ်ႉလုၵ်ႈ ဢိၵ်ႇလူၺ်ႈ ၼမ်ႉတႃ ဢၼ်လုၵ်ႈႁၵ်ႉမႄႈၼၼ်ႉ ယွႆႉတူၵ်းလူင်းၼင်ႇၵၼ်ယဝ်ႉ။
ၶႃသွင်ၵေႃႉမႄႈလုၵ်ႈ ဝူၼ်ႉႁၼ်ထိုင် လွင်ႈဢၼ်ႁၼ်ၵၼ် တီႈႁူင်းယႃၼၼ်ႉသေတႃႉ ဢမ်ႇႁူႉၸၵ်း လွင်ႈဝႃႈ ပဵၼ်မႄႈလုၵ်ႈၵၼ် ၸဵမ်မိူဝ်ႈၼၼ်ႉလႄႈ ပဵၼ်ဢၼ်ၶေႃးၶူမ်တႄႉꧦယူႇယဝ်ႉ ၵူၺ်းၵႃႈ ယၢမ်းလဵဝ် လႆႈၶိုၼ်းႁၼ်ၵၼ်လႄႈ ပဵၼ်ဢၼ်ၸူမ်းသိူဝ်း ပေႃးဢမ်ႇမီးတီႈတႅၵ်ႈယဝ်ႉ ၸၢႆးဢွၼ်ၶမ်း ၸင်ႇထၢမ်ဝႃႈ
“မႄႈ ၵွပ်ႈပိူဝ်ႈသင် ဢူႈႁဝ်းသမ်ႉလႅၼ် လုၵ်ႈၸၢႆးဝႃႈ မႄႈႁဝ်းတၢႆ ယဝ်ႉၼႆလႃႇ”
“ၼႆႉႁႃႉ ... ဢူႈၸၢႆးၶဝ်ထၢင်ႇၽိတ်းၼိူဝ်မႄႈလႄႈ မၼ်းၸဵပ်းၸႂ်သေ မၼ်းၸင်ႇဝႃႈ ၼင်ႇၼၼ်ယဝ်ႉ”
“ၵွပ်ႈသင် ဢူႈႁဝ်းသမ်ႉထၢင်ႇၽိတ်း မႄႈႁဝ်းၸိူင်ႉႁိုဝ်လႃႇ”
ပႃႈသွႆႈၶမ်း ၶႆႈၼႄလုၵ်ႈၸၢႆးမၼ်း လွင်ႈၽႃႉဝမၼ်းယဝ်ႉ။
“ၽဝမႄႈၼႆႉ ဢူႈမႄႈ လႆႈလူႉလႆႈတၢႆၵႂႃႇ ၽွင်းမိူဝ်ႈမႄႈတိုၵ်ႉလဵၵ်ႉၼၼ်ႉယဝ်ႉ ယွၼ်ႉပိူဝ်ႈ ဢူႈမႄႈႁဝ်းတၢႆၵႂႃႇယဝ်ႉလႄႈ ၵေႃႉပဵၼ်ၼၢႆး သိုပ်ႇလဵင်ႉတေႃႇပေႃးယႂ်ႇမႃး ပဵၼ်ပၢၼ်သၢဝ်ယဝ်ႉ ဝၢႆးသေၼၼ်ႉ ၼၢႆးၵေႃႈ သမ်ႉတၢႆလႄႈ မႄႈၵေႃႈၸင်ႇတေႇၼႃႈႁိူၼ်း ၸွမ်းဢူႈသူဢိူဝ်ႈ ဢူႈၸၢႆးၶဝ်ၼႆႉ ပဵၼ်ၵူၼ်းၶႅၼ်းၸႂ်ၵေႃႉၼိုင်ႈယဝ်ႉ ၵွပ်ႈသင်လႄႈ မႄႈလႆႈတႄႇၼႃႈႁိူၼ်းၸွမ်း ဢူႈၸၢႆးၶဝ်ၼႆ ၽွင်းမိူဝ်ႈမႄႈတိုၵ်ႉပဵၼ်သၢဝ်ၼၼ်ႉ မႄႈမီးဝႆႉ ၵေႃႉႁၵ်ႉမႄႈ ၵေႃႉၼိုင်ႈယဝ်ႉ ၵေႃႉႁၵ်ႉမႄႈၼၼ်ႉ ပုၼ်ႈတႃႇ တေတေႇၼႃႈႁိူၼ်းလူၺ်ႈမႄႈၼႆ မၼ်းဢွၵ်ႇႁႃငိုၼ်းသေ ပေႃးဝႃႈ လႆႈငိုၼ်းမႃးၼႆ ဢၢၼ်းတေ မႃးဢဝ်မႄႈၼႆယဝ်ႉ ၵူၺ်းၵႃႈ ... ၽွင်းမိူဝ်ႈမၼ်းတိုၵ်ႉၵႂႃႇႁႃငိုၼ်းၼၼ်ႉ သမ်ႉလႆႈငိၼ်းၶၢဝ်ႇဝႃႈ မၼ်းၼၢဝ်ၼူၵ်ႉသေတၢႆယဝ်ႉၼႆဢိူဝ်ႈ”
ၸၢႆးဢွၼ်ၶမ်း ၶဝ်ႈၸႂ်သေ ၸင်ႇထၢမ်
“မၼ်းၵႂႃႇႁႃငိုၼ်း တၢင်းလႂ်လႃႇမႄႈ”
“မၼ်းၵႂႃႇၶုတ်းသႅင် မိူင်းၵွင်းၽႃၵၢၼ်ႉသေ လႆႈငိၼ်းၶၢဝ်ႇဝႃႈ မၼ်းပဵၼ်ၼၢဝ်ၼူၵ်ႉသေ တၢႆၼႂ်းထိူၼ်ႇၼႆယဝ်ႉ”
“မႄႈသမ်ႉ ၸူးႁဵတ်းႁိုဝ်လႃႇ”
“ၸိူဝ်းဢၼ် လႆႈငိၼ်းၶၢဝ်ႇမႃးၵေႃႈ သမ်ႉမႃးလၢတ်ႈၼႄတႄႉꧦ လႄႈ ၽႂ်ၵေႃႈဢွၼ်ၵၼ်မၵ်းမၢႆဝႃႈ မၼ်းတၢႆၵူႈၵေႃႉယဝ်ႉ မၼ်းလႄႈဢူႈၸၢႆးၶဝ်ၼႆႉသမ်ႉ ပဵၼ်တႆးၵေႃႉႁၵ်ႉၵၼ်ဢိူဝ်ႈ ... ဢူႈၸၢႆးၶဝ်ၵေႃႈ ဢီးလူမႄႈသေ ၸင်ႇယွၼ်းဢဝ်မႄႈယဝ်ႉ”
ပႃႈသွႆႈၶမ်း သူတ်ႉၵိၼ်ၼမ်ႉၼဵင်ႈၶူမ် ၵမ်းၼိုင်ႈယူႇ ၸၢႆးဢွၼ်ၶမ်း ၸင်ႇထၢမ်ဝႃႈ
“ဝၢႆးသေၼၼ်ႉ သမ်ႉႁဵတ်းႁိုဝ်ထၢင်ႇပိူင်ႈၵၼ်လႃႇမႄႈ”
“ဝၢႆးသေ ၶၢဝ်းတၢင်းၼႃႈႁိူၼ်းမႄႈၶဝ် လႆႈမႃးသၢမ်ပီ ၽွင်းၼၼ်ႉ လုၵ်ႈၸၢႆးတိုၵ်ႉလႆႈသွင်ၶူပ်ႇယဝ်ႉ ဢမ်ႇမုင်ႈဢမ်ႇမွင်း ၵေႃႉႁၵ်ႉမႄႈၼၼ်ႉ သမ်ႉဢမ်ႇတၢႆသေ ၶိုၼ်းၽႅဝ်မႃးယဝ်ႉ မႄႈၵေႃႈ တေၸၢင်ႈႁဵတ်းႁိုဝ်လႃႇ မႄႈႁၵ်ႉမၼ်းယူႇသေတႃႉ မႄႈပေႃးပဵၼ်မႄႈၸဝ်ႈႁိူၼ်းၵေႃႉ ၼိုင်ႈယဝ်ႉလူး ယွၼ်ႉပိူဝ်ႈပၢၼ်ဢွၼ် ဢမ်ႇႁူမ်ႈၵၼ်မႃးလႄႈ ၸင်ႇဢမ်ႇထိူၵ်ႈၺႃးၵၼ်ဢိူဝ်ႈ လုၵ်ႈၸၢႆး... ဢူႈၸၢႆးၶဝ်လႄႈ မၼ်းၼႆႉ သမ်ႉပဵၼ်တႆးၵေႃႉၵၼ်လႄႈ မၼ်းၵႆႉꧦ မႃးဢႅဝ်ႇတီႈမႄႈသေႇꧦယဝ်ႉ မီးဝၼ်းၼိုင်ႈ မၼ်းမဝ်းလဝ်ႈသေ ၽႅဝ်မႃးလႄႈ မၼ်းၶိုၼ်းမႃးလၢတ်ႈ ၵႂၢမ်းႁၵ်ႉတေႃႇမႄႈၵူႈၸိူဝ်ႉꧦယဝ်ႉ ၽွင်းမိူဝ်ႈမၼ်း မဝ်းလဝ်ႈသေ မႃးၸၼ်မိုဝ်းမႄႈယူႇၼၼ်ႉ မႄႈႁၢမ်ႈသီးမၼ်းယူႇၵေႃႈ မၼ်းဢမ်ႇထွမ်ႇ ဢမ်ႇၶဝ်ႈႁူမၼ်း ၽွင်းမၼ်း တိုၵ်ႉၸၼ်မိုဝ်းမႄႈ ယူႇၼၼ်ႉ ဢူႈၸၢႆးၶဝ် သမ်ႉမႃးႁၼ်ၵႂႃႇသေ တေႇဢဝ်တီႈၼၼ်ႈ ၵႂၢမ်းၼမ်ၵၼ် ထဵင်ၵၼ်သေ ၵၢင်ၶိုၼ်း ၽွင်းမိူဝ်ႈမႄႈ ဢမ်ႇတၼ်းႁူႉၼၼ်ႉ ဢူႈၸၢႆးၶဝ် ဢဝ်တင်းလုၵ်ႈၸၢႆးသေ ဢွၵ်ႇႁိူၼ်းၵႂႃႇယဝ်ႉ”
ၸၢႆးဢွၼ်ၶမ်း ၵူမ်ႈႁူဝ်သေ ထွမ်ႇဢၼ်မႄႈၶဝ် ၶႆႈၼႄၼၼ်ႉယူႇ
“ဝၢႆးသေဢူႈၸၢႆးၶဝ်ပၢႆႈၵႂႃႇ ၼင်ႇႁိုဝ် တေၶိုၼ်းႁၼ်ၵၼ်ၼၼ်ႉ မႄႈၵေႃႈ ၶတ်းၸႂ်ၸွပ်ႇႁႃယူႇ ၵူၺ်းၵႃႈ မႄႈဢမ်ႇၸၢင်ႈႁဵတ်းႁိုဝ်ႁႃႁၼ်လႆႈ လႄႈ ၵမ်းလိုၼ်းမႄႈၸင်ႇပၢႆႈမႃး ယူႇၸွမ်းၼွင်ႉယိင်းမႄႈ တီႈမေႇမဵဝ်ႉၼႆႉယဝ်ႉ ႁဵတ်းၼႆသေ ၽွင်းၼၼ်ႉ မႄႈသမ်ႉ လႆႈမီးသၼ်ႇထေႇ ၸၢႆးလိုၼ်းၶမ်းမႃးဝႆႉလႄႈ ၸင်ႇမႃးၵိူတ်ႇၸၢႆးလိုၼ်းၶမ်း တီႈမေႇမဵဝ်ႉၼႆႉယဝ်ႉ”
ၸၢႆးဢွၼ်ၶမ်း ၸင်ႇဝႃႈ
“ပေႃးၼႆ ၸၢႆးလိုၼ်းၶမ်းၼႆႉ ပဵၼ်ၼွင်ႉၸၢႆးၶႃႈ ဢွၵ်ႇꧦဢိူဝ်ႈ ၼေႃႈ”
“ၸႂ်ႈဢိူဝ်ႈ လုၵ်ႈၸၢႆး ၶိူဝ်ပဵၼ်ပီႈၼွင်ႉၵၼ်ဢွၵ်ႇꧦယဝ်ႉ လုၵ်ႈၸၢႆး ပဵၼ်ၵေႃႉဢွၼ်တၢင်းလႄႈ မႄႈၸင်ႇသႂ်ႇၸိုဝ်ဝႃႈ ၸၢႆးဢွၼ်ၶမ်းၼႆယဝ်ႉ ၼွင်ႉၸၢႆးမႂ်းတႄႉ ပဵၼ်ၵေႃႉလိုၼ်းလႄႈ မႄႈၸင်ႇသႂ်ႇၸိုဝ်ႈဝႃႈ ၸၢႆးလိုၼ်းၶမ်းၼႆဢိူဝ်ႈ”
ၸၢႆးဢွၼ်ၶမ်းၵေႃႈ ပွင်ႇၸႂ်ၵႂႃႇမူတ်းꧦသဵင်ႈꧦသေ မၼ်းပဵၼ် ဢၼ်ၵျေႃႇသိူဝ်းၸႂ်တႄႉꧦ မၼ်းၸင်ႇဝႃႈ
“မႄႈ ၸၢႆးလိုၼ်းၶမ်း တိုၵ်ႉၵႂႃႇလႂ် မၼ်းပႆႇမႃးႁႃႉ လွင်ႈၸိူဝ်းၼႆႉ ၸွင်ႇမၼ်းႁူႉထိုင်ယဝ်ႉႁိုဝ်?”
“မႄႈၵေႃႈ ဢမ်ႇလၢတ်ႈၼႄမၼ်းလႄႈ မၼ်းၵေႃႈဢမ်ႇပႆႇႁူႉၼင်ႇၵဝ်ႇ လုၵ်ႈၸၢႆး”
“ပေႃးမၼ်းႁူႉၼႆ မၼ်းၵေႃႈ တေၸူမ်းဢိူဝ်ႈၼေႃမႄႈ မၼ်းပႆႇမႃးႁႃႉ”
ၸၢႆးလိုၼ်းၶမ်းၵေႃႈ ယူႇတီႈၼွၵ်ႈသေ လွမ်ထွမ်ႇလႆႈႁူႉလႆႈငိၼ်း သဵင်ႈꧦလႄႈ မၼ်းၸင်ႇပႆၶဝ်ႈမႃး ၼႂ်းႁိူၼ်းသေ လၢတ်ႈဝႃႈ
“ၸူမ်းဢိူဝ်ႈ ၼွင်ႉၸၢႆးၶႅၼ်းၸူမ်းယဝ်ႉ ပီႈၸၢႆးဢွၼ်ၶမ်း”
လႆႈငိၼ်းၸၢႆးလိုၼ်းၶမ်း ဝႃႈၼင်ႇၼၼ် ၸၢႆးဢွၼ်ၶမ်းလႄႈ မႄႈၶဝ် ပဵၼ်ဢၼ်ဢၢမ်းၵႂႃႇတႄႉꧦ ၸၢႆးဢွၼ်ၶမ်း ၸင်ႇၽုတ်ႇၽၢတ်ႇလုၵ်ႉသေ မႃးၸူးၸၢႆးလိုၼ်းၶမ်းယဝ်ႉ ၶႃသွင်ၵေႃႉ ပီႈၼွင်ႉၸူမ်းၼင်ႇၵၼ်သေ ၶႃမႃးၵွတ်ႇၵၼ်သေဝႆႉႁႅင်းꧦယဝ်ႉ
“ၼွင်ႉၸၢႆး ၸၢႆးလိုၼ်း”
“ပီႈဢၢႆႈ ပီႈၸၢႆးဢွၼ်ၶမ်း”
မႄႈၶဝ်ၵေႃႈ ၸူမ်းသိူဝ်းၸိူင်ႉၼင်ႇၶႃသွင်ၵေႃႉ ပီႈၼွင်ႉၼၼ်ႉယူႇ
“ၼွင်ႉၸၢႆး ၽႅဝ်မႃးႁိုင်ယဝ်ႉႁႃႉ?”
“ၽႅဝ်မႃးၸဵမ်မိူဝ်ႈ ပီႈဢၢႆႈတေႇၸႃႉၽႅဝ်မႃးၼၼ်ႉဢေႃႈ ၼွင်ႉၸၢႆး မႃးယူႇတီႈၼွၵ်ႈသေ ပႂ်ႉထွမ်ႇဝႆႉလႄႈ ဢၼ်ပီႈဢၢႆႈႁဝ်းၶဝ်လၢတ်ႈၼၼ်ႉ ၼွင်ႉၸၢႆးႁူႉငိၼ်းသဵင်ႈꧦယဝ်ႉ”
ၸၢႆးဢွၼ်ၶမ်း ၸင်ႇလွမ်တူၺ်းၼႃႈ ၸၢႆးလိုၼ်းၶမ်းသေ
“ၵႅမ်ႈၼွင်ႉၸၢႆး တိုၵ်ႉၸဵပ်းယူႇႁႃႉ ပီႈဢၢႆႈယွၼ်းတွင်းပၢၼ်ႇယူႇ ၼွင်ႉၸၢႆး”
ၸၢႆးလိုၼ်းၶမ်း ၸင်ႇယုမ်ႉသေ တွပ်ႇဝႃႈ
“ၽၢႆႇသၢႆႉဢၼ်ၺႃးတႃမိုဝ်းပီႈဢၢႆႈ ႁႅမ်ၼၼ်ႉတႄႉ ဢမ်ႇၸဵပ်းတၢၼ်ႇၽၢႆႇၶႂႃ ဢၼ်ၺႃးၽႃႇမိုဝ်းၼၼ်ႉၵူၺ်း ... ဢၼ်ၺႃးၽႃႇမိုဝ်းၼၼ်ႉတႄႉ ၽတ်ႉၵမ်းလဵဝ်သေတႃႉ ၸဵပ်းသွင်ၵမ်းယဝ်ႉ ပီႈဢၢႆႈ”
“ၸဵပ်းတႄႉꧦႁႃႉ ၼွင်ႉၸၢႆး”
“ဢေႃႈ”
“ယႃႈယႃၸဵပ်းႁၢႆမၼ်း မီးဢိူဝ်ႈမဵဝ်းၼႆႉ ၼွင်ႉၸၢႆး”
“မီးတီႈလႂ်”
“မီးတီႈၵေႃႉဢၼ် ပၼ်တၢင်းၸဵပ်းၼၼ်ႉ ၼင်ႇၵဝ်ႇဢိူဝ်ႈ”
“ၼွင်ႉၸၢႆး ဢမ်ႇၶႂ်ႈဢဝ်ယဝ်ႉပီႈဢၢႆႈ”
ၽွင်းၼၼ်ႉ ပႃႈသွႆႈၶမ်း ၸင်ႇဝႃႈ-
“လုၵ်ႈၸၢႆးၶဝ် ဢုပ်ႇၵၼ်ဝႆႉၵွၼ်ႇလႄႈ မႄႈတေၵႂႃႇႁႅၼ်း ၽိူၼ်ၶဝ်ႈၵွၼ်ႇၼႃႈ မိူဝ်ႈၼႆႉတႄႉ ႁဝ်းမႄႈလုၵ်ႈ ႁူမ်ႈၵၼ်ၵိၼ်ဝၢၼ် ꧦၵႂႃႈ”
ၶဝ်မႄႈလုၵ်ႈသၢမ်ၵေႃႉ ဢွၼ်ၵၼ်ယုမ်ႉဝႆႉယူႇ ဝၢႆးသေမႄႈၶဝ် ၶဝ်ႈၵႂႃႇၼႂ်းသွင်ႇၾႆးယဝ်ႉ ၸၢႆးဢွၼ်ၶမ်း လႄႈ ၸၢႆးလိုၼ်းၶမ်း မႃးၼင်ႈတင်ႇသေ ဢုပ်ႇၵၼ်ယူႇ ၸၢႆးဢွၼ်ၶမ်း ၸင်ႇဝႃႈ
“လွင်ႈလူၺ်ႈ ၼွင်ႉၸၢႆး လႄႈ ၼၢင်းလၢဝ်လႅင်းၼၼ်ႉ ပီႈဢၢႆႈ ႁူႉထိုင်မူတ်းꧦယဝ်ႉ ၼွင်ႉၸၢႆး”
“ၽႂ်လၢတ်ႈၼႄ ပီႈဢၢႆႈလႃႇ”
“ၼၢင်းလၢဝ်လႅင်း လၢတ်ႈၼႄဢိူဝ်ႈ ၵွပ်ႈပိူဝ်ႈ ၼွင်ႉၸၢႆးထၢင်ႇၽိတ်းမၼ်းလႄႈ မၼ်းၶေႃးၶူမ်တႄႉꧦၼႆယဝ်ႉ”
“လွင်ႈၸိူဝ်းၼႆႉ ယႃႇပေလၢတ်ႈထႅင်ႈယဝ်ႉ ပီႈဢၢႆႈ”
“ၼွင်ႉၸၢႆး ဢမ်ႇၶႂ်ႈငိၼ်းႁႃႉတေႃႈဝႃႈ”
“ဢမ်ႇၶႂ်ႈငိၼ်း”
“ၼွင်ႉၸၢႆး ဢမ်ႇႁၵ်ႉၼၢင်းလၢဝ်လႅင်းယဝ်ႉႁႃႉ”
“တေၸဵမ်မိူဝ်ႈၶမ်ႈဝႃး ၼွင်ႉၸၢႆးၸင်းမၼ်းယဝ်ႉၼႆ ၼွင်ႉၸၢႆး တႅပ်းတတ်းဝႆႉယဝ်ႉ”
“ၵွပ်ႈသင်ၼွင်ႉၸၢႆႈ သမ်ႉၸင်းမၼ်းလႃႇ”
“ၵွပ်ႈပိူဝ်ႈ မၼ်းဢမ်ႇႁၵ်ႉၼွင်ႉၸၢႆးယဝ်ႉလႄႈ ၼွင်ႉၸၢႆးၵေႃႈ ဢမ်ႇႁၵ်ႉမၼ်းယဝ်ႉ”
“မၼ်းဢမ်ႇႁၵ်ႉၼွင်ႉၸၢႆးၼႆ ၸွင်ႇမၼ်းဝႃႈႁိုဝ်”
“မၼ်းဢမ်ႇဝႃႈသေတႃႉၵေႃႈ ၼွင်ႉၸၢႆးႁၼ်ယူႇလူး”
“ၼွင်ႉၸၢႆးႁဵတ်းႁိုဝ်ႁူႉလႃႇ”
“မၼ်းၵႂႃႇႁၵ်ႉထႅင်ႈၵေႃႉမႂ်ႇယဝ်ႉလူး”
“မၼ်းၵႂႃႇႁၵ်ႉၽႂ် ၼွင်ႉၸၢႆး”
“မၼ်းႁၵ်ႉ ပီႈဢၢႆႈ ၸၢႆးလိုၼ်းၶမ်းၶဝ်ယဝ်ႉ ဢမ်ႇၸႂ်ႈႁႃႉ?”
ၸၢႆးဢွၼ်ၶမ်းဝႆႁူဝ်သေ
“ဢမ်ႇၸႂ်ႈၵူၺ်း ၼွင်ႉၸၢႆး ... မိူဝ်ႈဝၼ်းၼၼ်ႉ ပီႈဢၢႆႈႁၵ်ႉမၼ်းသေ ယွၼ်းတၢင်းႁၵ်ႉမၼ်းယူႇသေတႃႉ မၼ်းဢမ်ႇတွပ်ႇၶေႃႈတွပ်ႇၵူၺ်း”
“ၵွပ်ႈသင်သမ်ႉ ဢမ်ႇပၼ်လႃႇ”
“ၵွပ်ႈပိူဝ်ႈ မၼ်းႁၵ်ႉၼွင်ႉၸၢႆးဝႆႉၼၼ်ႉယဝ်ႉ”
“မၼ်းတိုၵ်ႉႁၵ်ႉၼွင်ႉၸၢႆးယူႇသေတႃႉ ၼွင်ႉၸၢႆးဢမ်ႇႁၵ်ႉမၼ်း ယဝ်ႉလူး ... ၽဝမၼ်းလႄႈ ၼွင်ႉၸၢႆးၵေႃႈ ဢမ်ႇၵိုင်ႇၵၼ်ယဝ်ႉ ... မၼ်း လႄႈပီႈဢၢႆႈၵူၺ်းဢိူဝ်ႈ ၵိုင်ႇၼၼ် ပီႈဢၢႆႈၵေႃႈ ပဵၼ်ၶူးမေႃယႃ မၼ်းၵေႃႈ တေပဵၼ်ၶူးမေႃယႃ ၼင်ႇၵဝ်ႇဢမ်ႇၸႂ်ႈႁႃႉ”
ၵၢင်ၸႂ်ၸၢႆးလိုၼ်းၶမ်းတႄႉ ႁၵ်ႉၼၢင်းလၢဝ်လႅင်းၵေႃႉလဵဝ်ၵူၺ်း သေတႃႉ ယွၼ်ႉပိူဝ်ႈ မၼ်းၶႂ်ႈဝႄႈပၼ် ပီႈဢၢႆႈမၼ်းလႄႈ မၼ်းၸင်ႇလၢတ်ႈၼင်ႇၼႆယဝ်ႉ ၸၢႆးဢွၼ်ၶမ်း ၸင်ႇၶိုၼ်းဝႃႈ
“ဢမ်ႇၸႂ်ႈၵူၺ်းၼွင်ႉၸၢႆး ၼွင်ႉၸၢႆးၼႆႉ ပဵၼ်ၵေႃႉမၢႆၼိုင်ႈ ပီႈဢၢႆႈၼႆႉ ပဵၼ်ၵေႃႉမၢႆသွင်ယဝ်ႉ ... ၵၢင်ၸႂ်ပီႈဢၢႆႈတႄႉ ၶႂ်ႈႁႂ်ႈၵေႃႉႁၵ်ႉၵၼ် ထူပ်းၺႃးၵၼ်သဵင်ႈꧦယဝ်ႉ။ ၼႂ်းၵႄႈၵၢင် တၢင်းႁၵ်ႉ ၼွင်ႉၸၢႆးလႄႈ ၼၢင်းလၢဝ်လႅင်းၼၼ်ႉ ယွၼ်ႉပိူဝ်ႈ ပီႈဢၢႆႈလႄႈ တေလႆႈတႅၵ်ႇယၢႆႈၵၼ်ၵႂႃႇၼၼ်ႉၼႆ ပီႈဢၢႆႈ ဢမ်ႇၶႂ်ႈႁႂ်ႈမၼ်းပဵၼ်ၵူၺ်း ၼင်ႇႁိုဝ် ၼွင်ႉၸၢႆးလႄႈ ၼၢင်းလၢဝ်လႅင်း တေၶိုၼ်းထူပ်းၵၼ်ၼၼ်ႉ ပုၼ်ႈၽွၼ်းမီးတီႈပီႈဢၢႆႈမူတ်းꧦယဝ်ႉ”
“ပီႈဢၢႆႈ ... ၼွင်ႉၸၢႆးဝႃႈယဝ်ႉလူး ၼွင်ႉၸၢႆးဢမ်ႇႁၵ်ႉမၼ်းယဝ်ႉ ၼႆ”
“ႁေး ႁေး သူပ်းတႄႉဝႃႈလႆႈယူႇသေတႃႉ ၼႂ်းၸႂ်ၼွင်ႉၸၢႆး ပဵၼ်ႁိုဝ်ဝႆႉၼႆ ပီႈဢၢႆႈႁူႉထိုင်ယူႇၵူၺ်း ယႃႇပေလႅၼ်ၼႃႈ”
“ဢမ်ႇလႅၼ်”
ၸၢႆးဢွၼ်ၶမ်း ၸင်ႇယုမ်ႉၶူဝ်သေဝႃႈ
“ႁႄး ႁႄး ဢေႃ ၼွင်ႉၸၢႆးတိုၵ်ႉဝႃႈ ဢမ်ႇလႅၼ်ဢမ်ႇလႅၼ်ၼႆ ယူႇႁႃႉ ၵမ်ႉမႃး ပေႃးပီႈဢၢႆႈ ၸႂ်လမ်မႃးၼႆ တေၺႃးတႃမိုဝ်း ထုပ်ႉႁႅမ်ႈၵႅမ်ႈ ၼွင်ႉၸၢႆးထႅင်ႈယူႇၼႃႈ”
“ႁႄး ႁႄး ပေႃးပီႈဢၢႆႈ ထုပ်ႉထႅင်ႈပွၵ်ႈၼႆႉတႄႉ ၼွင်ႉၸၢႆးတေ ဢမ်ႇၸၢင်ႈၵိၼ်ၶဝ်ႈႁူမ်ႈၸွမ်း ပီႈဢၢႆႈႁေယဝ်ႉဢိူဝ်ႈ”
“ပေႃးၼႆ ယႃႇပေလႅၼ်လေႃႇ”
“ဢမ်ႇလႅၼ် လႅၼ်ဢိူဝ်ႈ ဢမ်ႇလႅၼ် လႅၼ်ဢိူဝ်ႈ”
ၶႃသွင်ၵေႃႉပီႈၼွင်ႉ တိုၵ်ႉၸူမ်းၶူဝ်ယူႇ မႄႈၶဝ်ယူႇၼႂ်းသွင်ႇၾႆးသေ
“လုၵ်ႈၸၢႆး ... မႃးလႄႈ မႃးၵိၼ်ၶဝ်ႈလႄႈ”
“ဢေႃႈ ဢေႃႈ မႃးၶႃႈယဝ်ႉ”
ၶႃသွင်ၵေႃႉ ပီႈၼွင်ႉၵေႃႈ ယိပ်းၸၼ်မိုဝ်းၵၼ်သေ ၵႂႃႇၼႂ်းသွင်ႇၾႆးယဝ်ႉ ပႃႈသွႆႈၶမ်း ၸင်ႇယၵ်ႉတူၺ်း ၼႃႈလုၵ်ႈၸၢႆးမၼ်းသွင်ၵေႃႉသေ ထၢမ်ဝႃႈ
“လုၵ်ႈၸၢႆးၶဝ် ၵုမ်ဢုပ်ႇၵၼ်လွင်ႈသင်ၵူၺ်းꧦၼႆ လၢတ်ႈၼႄ မႄႈၽွင်ႈလူး”
“ဢေႃႈ ... လုၵ်ႈၸၢႆးၶဝ်ဢုပ်ႇၵၼ် ၶိူဝ်းမၢၵ်ႇႁူဝ်ၸႂ်ဢေႃႈ”
ပႃႈသွႆႈၶမ်း ယုမ်ႉၵမ်းၼိုင်ႈသေ ထၢမ်ဝႃႈ
“ၶိူဝ်းမၢၵ်ႇႁူဝ်ၸႂ်ၸိူင်ႉႁိုဝ် သပ်းလႅင်းၼႄမႄႈၽွင်ႈလူး”
ၶဝ်မႄႈလုၵ်ႈၵိၼ်ၶဝ်ႈသေ ၸၢႆးဢွၼ်ၶမ်းၵေႃႈ သပ်းလႅင်းၼႄ လွင်ႈၶိူဝ်းၶႃပီႈၼွင်ႉလႄႈ ၼၢင်းလၢဝ်လႅင်းၼၼ်ႉ သဵင်ႈꧦယဝ်ႉ ... ပႃႈသွႆႈၶမ်းၵေႃႈ ပွင်ႇၸႂ်ၵႂႃႇလီꧦသေ မၼ်းၸင်ႇထၢမ်ဝႃႈ “ပေႃးၼႆ ၶိူဝ်သွင်ၵေႃႉပီႈၼွင်ႉ တေႁဵတ်းႁိုဝ် မွၵ်ႇလူင်ႇလဵဝ်ၼႆႉ ၵူၼ်းပိတ်းမၼ်း မီးဝႆႉသွင်ၵေႃႉယဝ်ႉလူး”
ၸၢႆးဢွၼ်ၶမ်း ၸင်ႇဝႃႈ
“မွၵ်ႇလူင်ႇၼၼ်ႉ ပဵၼ်မွၵ်ႇဢၼ်မီးဝႆႉ ၼႂ်းမိုဝ်းၸၢႆးလိုၼ်း ဢွၼ်တၢင်းယဝ်ႉ ၵွပ်ႈၼႆလုၵ်ႈၸၢႆးတႄႉ ဢမ်ႇၶႂ်ႈႁိမ်ဢဝ် မွၵ်ႇၼႂ်းမိုဝ်း ၼွင်ႉၸၢႆးၵူၺ်း”
မႄႈၶဝ်လွမ်တူၺ်းၼႃႈ ၸၢႆးဢွၼ်ၶမ်းသေ ထၢမ်ဝႃႈ
“ပေႃးၼႆ လုၵ်ႈၸၢႆးဢွၼ်ၶမ်းတႄႉ တေဢၢၼ်းဢဝ် မွၵ်ႇဢၼ် ပႆႇမီးၸဝ်ႈၼၼ်ႉ ၵူၺ်းႁႃႉ?”
“လုၵ်ႈၸၢႆးတႄႉ ဢဵၼ်းဢၢၼ်းဝႆႉ ၼင်ႇၼၼ်ဢေႃႈ”
ပႃႈသွႆႈၶမ်း ၶိုၼ်းတူၺ်းၼႃႈ ၸၢႆးလိုၼ်းၶမ်းသေ
“ႁဵတ်းႁိုဝ် ၸၢႆးလိုၼ်း ၸိုင်ဢမ်ႇတၵ်းသဵင်လႃႇ”
“လုၵ်ႈၸၢႆးပႂ်ႉထွမ်ႇ ဢၼ်မႄႈႁဝ်းလၢတ်ႈၼၼ်ႉယူႇဢေႃႈ”
“လုၵ်ႈၸၢႆး ၸၢႆးလိုၼ်းတေဝႃႈႁိုဝ်လႃႇ ဢၼ်ၼၢင်းလၢဝ်လႅင်းၼၼ်ႉ” ၸၢႆးလိုၼ်းၶမ်း ဢမ်ႇၵိုင်ႉၵၢင်ႉ ၸၢင်ႈၶိုၼ်းတွပ်ႇလႆႈၵမ်းလဵဝ် မၼ်းထူၺ်ႈၸႂ်မူၺ်ႈလူင် ၵမ်းၼိုင်ႈသေ ၶိုၼ်းထၢမ်ဝႃႈ
“လုၵ်ႈၸၢႆးတေလႆႈ ႁဵတ်းႁိုဝ်လၢတ်ႈၵေႃႈ ဢမ်ႇမေႃဝႃႈယဝ်ႉ”
ပႃႈသွႆႈၶမ်း လႄႈ ၸၢႆးဢွၼ်ၶမ်း ယုမ်ႉၶူဝ်ဝႆႉယူႇ
“လုၵ်ႈၸၢႆးဢမ်ႇၸၢင်ႈလၢတ်ႈၸိူင်ႉႁိုဝ်ယဝ်ႉႁႃႉ ပေႃးၼႆမႄႈတေ လၢတ်ႈလႆ ပႂ်ႉထွမ်ႇလႄႈ ၸွင်ႇလုၵ်ႈၸၢႆးမႄႈတင်းသွင်ၵေႃႉ တေၸွမ်းလႆႈ ၶေႃႈၵႂၢမ်းမႄႈႁိုဝ်?”
ၶႃသွင်ၵေႃႉ ပီႈၼွင်ႉၵေႃႈ တွပ်ႇဝႃႈ
“ဢေႃႈ ... ၸွမ်းလႆႈယူႇၶႃႈ”
ပႃႈသွႆႈၶမ်း ယုမ်ႉႁၢၼ်ၸႂ်သေ သူတ်ႉၵိၼ်ၼမ်ႉၽၵ်းၵမ်းၼိုင်ႈယူႇ ၶႃသွင်ၵေႃႉပီႈၼွင်ႉၵေႃႈ ႁူဝ်ၸႂ်တွတ်ႇသေ ပႂ်ႉထွမ်ႇၵႂၢမ်း ဢၼ်မႄႈၶဝ် တေလၢတ်ႈပၼ်ၼၼ်ႉယူႇ
“ထွမ်ႇလႄႈၼႃႈ လုၵ်ႈၸၢႆး တီႈၵျွၵ်ႉမႄးၼၼ်ႉ မႄႈမီးဝႆႉ တႆး ၵေႃႉႁၵ်ႉမႄႈ ၵေႃႉၼိုင်ႈဢိူဝ်ႈ ... မိူဝ်ႈမႄႈၶဝ် တိုၵ်ႉပဵၼ်သၢဝ်ၼၼ်ႉၼႆ ႁႃးသွင်ၵေႃႉ ပၼ်ၵႂၢမ်းမၼ်ႈပၼ်ႈၵႅၼ်ႇၵၼ်ဝႆႉယဝ်ႉ”
ၸၢႆးလိုၼ်းၶမ်း ၸင်ႇထၢမ်ဝႃႈ
“ၵႂၢမ်းၸိူင်ႉႁိုဝ် ၶႃႈမႄႈ”
“လွႆးꧦလေႃႇ လုၵ်ႈၸၢႆး မႄႈတေလၢတ်ႈၵႂႃႈ”
ပႃႈသွႆႈၶမ်း ၶဝ်ႈမိူဝ်းၼႂ်းႁိူၼ်းသေ မိူဝ်းဢဝ်လိၵ်ႈမႃးၽိုၼ်ၼိုင်ႈယဝ်ႉ
“ယေႃႈ လုၵ်ႈၸၢႆး လိၵ်ႈဢၼ်ၼႆႉ တႆးၵေႃႉမႄႈ ပၼ်မႃးမိူဝ်ႈဝႃးဢိူဝ်ႈ လူတူၺ်းလူး”
ထိုင်
ၵေႃႉမိူဝ်ႈဢွၼ်ႇ - သွႆႈၶမ်း
ႁဝ်ႈမီးလိၵ်ႈ ၶုၵ်းၸႂ်လႆႈ ၶႂ်ႈၸႂ်ထိုင်သေ ပၼ်မႃးတီႈသွႆႈၶမ်း ဢိူဝ်ႈ
ၶိုၼ်းယူႇလီယဝ်ႉၼေႃ မိူဝ်ႈဝူင်ႈပူၼ်ႉၼၼ်ႉ လုၵ်ႈယိင်းႁဝ်း ၼၢင်းၸၢမ်ႁွမ် ယူႇတီႈမေႇမဵဝ်ႉသေ တႅမ်ႈလိၵ်ႈမႃး တီႈႁဝ်းဢိူဝ်ႈ လွင်ႈဢၼ်သွႆႈၶမ်း ဢမ်ႇယူႇလီသေ လႆႈၶိုၼ်ႈႁူင်းယႃ လွင်ႈဢၼ်ဝႃႈ မၼ်းလႆႈ ႁူႉၸၵ်းသွႆႈၶမ်း လွင်ႈဢၼ်ႁဝ်းပဵၼ်တႆးၵေႃႉၵၼ်မိူဝ်ႈလဵၵ်ႉ လွင်ႈဢၼ်သွႆႈၶမ်း ၶႆႈၼႄမၼ်း မွၵ်ႇၼႄမၼ်း ၸိူဝ်းၼၼ်ႉၵေႃႈ မၼ်းၶိုၼ်းတႅမ်ႈလိၵ်ႈ မွၵ်ႇလၢတ်ႈၼႄႁဝ်းမူတ်းꧦယူႇယဝ်ႉ...
ဢေႃႈ ... သွႆႈၶမ်း ၸွင်ႇသွႆႈၶမ်း တိုၵ်ႉတွင်း ၵႂၢမ်းဢၼ်ႁဝ်း လႆႈလၢတ်ႈၵၼ် မိူဝ်ႈတိုၵ်ႉ ပဵၼ်သၢဝ်ၼၼ်ႉႁိုဝ်? ဢၼ်ဝႃႈတေႃႇပၢၼ်လုၵ်ႈယိင်း လုၵ်ႈၸၢႆးၵၼ်ၼၼ်ႉဢိူဝ်ႈ လုၵ်ႈယိင်းႁဝ်းတႄႉ မၼ်းတိုၼ်းထွမ်ႇ ၵႂၢမ်းႁဝ်းတႃႇသေႇဢိူဝ်ႈ လုၵ်ႈၸၢႆးသူလႃႇသွႆႈၶမ်း ပီၼႆႉမၼ်းယဝ်ႉၸၼ်ႉ ၸွမ်ယဝ်ႉ ဢမ်ႇၸႂ်ႈႁႃႉ? ယူဝ်ၶႄး မၼ်းမီးၵေႃႉႁၵ်ႉဝႆႉၶေႃꧦယဝ်ႉယူဝ်ႉ...
လုၵ်ႈယိင်းႁဝ်းတႉ ႁဝ်းသင်ႇလၢတ်ႈမၼ်းဝႆႉ ယႃႇပေဝႆႉၸူႉၼႆ လွင်ႈဢၼ်ၵႂၢမ်းပေႃႈမႄႈ လႆႈမီး ၵႂၢမ်းမၼ်ႈၵႅၼ်ႇၵၼ်ၼၼ်ႉၵေႃႈ ႁဝ်းလၢတ်ႈထိုင် လုၵ်ႈယိင်းႁဝ်းဝႆႉဢိူဝ်ႈ...
လုၵ်ႈယိင်းႁဝ်းတႄႉ မၼ်းဝႃႈ“ပေႃးပေႃႈမႄႈႁဝ်းၶဝ်ဝႃႈၼၼ်ၼႆ လုၵ်ႈယိင်းပွင်ႇၸႂ်ယူႇ လုၵ်းယိင်း တေထွမ်ႇၵႂၢမ်း ပေႃႈမႄႈယူႇဢေႃႈ”ၼႆ ယဝ်ႉ ... ၵွပ်ႈၼႆ ၽၢႆႇလုၵ်ႈယိင်းႁဝ်းတႄႉ တူဝ်ႈတၼ်းဝႆႉယဝ်ႉ ၵိုတ်းၽၢႆႇ သွႆႈၶမ်းၶဝ်တေဝႃႈႁိုဝ်?... ထိုင်ၶၢဝ်းမွၵ်ႇၵေႃႈလူဝ်ႇမွၵ်ႇ ထိုင်ၶၢဝ်းမၢၵ်ႇၵေႃႈ လူဝ်ႇမၢၵ်ႇယဝ်ႉလူး...
ဢေႃး... လိူဝ်သေၼၼ်ႉ ၶၢဝ်ငၢဝ်းလုၵ်ႈၸၢႆးလူင်သူ ၸၢႆးဢွၼ်ၶမ်းၼၼ်ႉလူး ဢမ်ႇပႆႇငိၼ်းၶၢဝ်ႇသင်ႁႃႉ ႁႂ်ႈၸဵဝ်းၶိုၼ်ႈထူပ်းၵၼ်သေၵမ်းၼႆ ယူႇတီႈၵႆသေ ယွၼ်းသူးပၼ်ယူႇ။
ၵွပ်ႈၼႆ ပွင်ႇၶၢဝ်ႇမႃးလႄႈ
ၵေႃႉသူမိူဝ်ႈဢွၼ်ႇ
ငိုၼ်းႁွမ် - ၵျွၵ်ႉမႄး
ၸၢႆးလိုၼ်းၶမ်း လႄႈ ၸၢႆးဢွၼ်ၶမ်း တူၺ်းလိၵ်ႈယဝ်ႉၵႂႃႇသေ ၶိုၼ်းလွမ်တူၺ်း ၼႃႈမႄႈၶဝ်ယူႇ မႄႈၶဝ်ၸင်ႇလၢတ်ႈဝႃႈ-
“ၸွမ်းၼင်ႇ လိၵ်ႈဢၼ်တႆးၵေႃႉမႄႈ ပၼ်မႃးၼၼ်ႉ လုၵ်ႈၸၢႆး မႄႈ တင်းသွင်ၵေႃႉ တေၶႂ်ႈႁႂ်ႈပဵၼ်ၸိူင်ႉႁိုဝ်?”
ၶႃသွင်ၵေႃႉပီႈၼွင်ႉ ပႆႇၸၢင်ႈလၢတ်ႈၸိူင်ႉၼင်ႇႁိုဝ် ၵူမ်ႈႁူဝ်ဝႆႉယူႇ တင်းသွင်ၵေႃႉယဝ်ႉ ပႃႈသွႆႈၶမ်း ၸင်ႇထၢမ်ဝႃႈ
“ႁဵတ်းႁိုဝ် ... ၽႂ်ၵေႃႈဢမ်ႇတၵ်းသဵင်သင်လႃႇ တေဢဝ်မႄႈဝႃႈ ႁႃႉ?”
ၶႃသွင်ၵေႃႉၵေႃႈ ငွၵ်းႁူဝ်ၼင်ႇၵၼ်သေဢေႃႈ” ၼႆၼင်ႇၵၼ် ယဝ်ႉ ... ႁူဝ်ၸႂ်ၶႃသွင်ၵေႃႉၵေႃႈ တွတ်ႇလင်ႁႅင်း ၼင်ႇၵၼ်သေ ပႂ်ႉထွမ်ႇဝႆႉယူႇ
“ပေႃးဢဝ်မႄႈဝႃႈတႄႉ... ပႃႈငိုၼ်းႁွမ်ၶဝ် ၵျွၵ်ႉမႄးတႄႉ ယိူင်းဢၢၼ်း ၸၢႆးလိုၼ်းၶမ်းသေ တႅမ်ႈမႃးယဝ်ႉ... လွင်ႈဢၼ်ႁဝ်းၶိုၼ်းၺႃး ၸၢႆးဢွၼ်ၶမ်းၼႆႉ ၶဝ်ပႆႇႁူႉလူး”
ပႃႈသွႆႈၶမ်း လွမ်တူၺ်းလုၵ်ႈၸၢႆးမၼ်း တင်းသွင်ၵေႃႉသေ
“ၵွပ်ႈၼႆ ၵၢင်ၸႂ်မႄႈတႄႉ ၸွမ်းၼင်ႇၵႂၢမ်းလႆႈဝႃႈ ၽႃႉလႆႈမၵ်း ၼႆၼၼ်ႉ ဢၢၼ်းၶႂ်ႈဢဝ် ၸၢႆးလိုၼ်းလႄႈ ၼၢင်းၸၢမ်ႁွမ်ပၼ်ၵၼ်ယဝ်ႈ”
လႆႈငိၼ်းၼင်ႇၼၼ် ၶႃသွင်ၵေႃႉ ပီႈၼွင်ႉမိုင်ငဝ်ၵႂႃႇတင်းသွင်ၵေႃႉယဝ်ႉ ပႃႈသွႆႈၶမ်း ၶိုၼ်းသိုပ်ႇလၢတ်ႈဝႃႈ
“ၵူၺ်ႈၵႃႈ”
လႆႈငိၼ်းၵႂၢမ်း ဢၼ်မႄႈၶဝ်ၶိုၼ်းသိုပ်ႇဝႃႈ ၵူၺ်းၵႃႈၼႆလႄႈ ၸႂ်ၶႃ သွင်ၵေႃႉ ၶိုၼ်းတူင်ႉၼိုင်မႃးသေ ၶိုၼ်းပႂ်ႉထွမ်ႇယူႇ
“ၵူၺ်းၵႃႈ ၸၢႆးလိုၼ်းၶမ်း သမ်ႉမီးဝႆႉၵေႃႉႁၵ်ႉၼၢင်းလၢဝ်လႅင်း ယဝ်ႉလႄႈပိူင်ၼိုင်ႈ ၵၢင်ၸႂ် ၸၢႆးဢွၼ်ၶမ်း သမ်ႉဝႃႈ ဢမ်ႇၶႂ်ႈႁိမ်ဢဝ် မွၵ်ႇၼႂ်း မိုဝ်းပိူၼ်ႈလႄႈပိူင်ၼိုင်ႈ မႄႈၶိုၼ်းမေးတႅပ်းတတ်း လတ်းပဵၼ်ဢၼ်မႂ်ႇသေ တေဢဝ်ၸၢႆးဢွၼ်ၶမ်း လႄႈ ၼၢင်းၸၢမ်ႁွမ် ဢိၵ်ႇသမ်ႉ ၸၢႆးလိုၼ်းၶမ်း လႄႈ ၼၢင်းလၢဝ်လႅင်း ႁႂ်ႈႁၵ်ႉပႅင်းၵၼ်ၵႂႃႇတေႃႇၸူဝ်ႈ ႁႂ်ႈပဵၼ်လုၵ်ႈပႂ်ႉမႄႈ တင်ႈသွင်ၵေႃႉယဝ်ႉ ဢမ်ႇလီႁႃႉ?” လႆႈငိၼ်းၼင်ႇၼၼ် ၶႃသွင်ၵေႃႉ ပဵၼ်ဢၼ်ၸူမ်းသိူဝ်းမဝ်ၸႂ်ၵႂႃႇ တင်းသွင်ၵေႃႉ ၶႃသွင်ၵေႃႉ ယုမ်ႉသေ တူၺ်းၼႃႈၵၼ်ၵမ်းၼိုင်ႈ ၶိုၼ်းလွမ်ယုမ်ႉတေႃႇမႄႈၶဝ်ယူႇ...
လွင်ႈတၢင်းၸူမ်းသိူဝ်း ၶႃသွင်ၵေႃႉ ပီႈၼွင်ႉပဵၼ်ဢၼ်တဵမ်ထူၼ်ႈ တူၼ်ႈၸႂ်မူၼ်ႈသိူဝ်းလူၼ်ႉလိူဝ်ၵႂႃႇလႄႈ ၶႃသွင်ၵေႃႉပီႈၼွင်ႉလုၵ်ႉ မႃးၵွတ်ႇမႄႈၶဝ်ဝႆႉ တင်းသွင်ၵေႃႉယဝ်ႉ... ၶႃသွင်ၵေႃႉႁူမ်ႈၵၼ်ဝႃႈ-
“မႄႈႁဝ်းၼႆႉ မေႃၵျႃႉ”
ပႃႈသွႆႈၶမ်းၵေႃႈ ပဵၼ်ဢၼ်ၸူမ်းသိူဝ်းယူႇတႄႉꧦ ၵူၺ်းၵႃႈ မၼ်းၵႂႃႇၶုၵ်းၸႂ်လႆႈ မိုဝ်းလုၵ်ႈၸၢႆးမၼ်း တင်းသွင်ၵေႃႉ ၼုၵ်းၵူဝ်ႈၶဝ်ႈၵူဝ်ႈၽၵ်းသေ မႃးၵွတ်ႇမၼ်းဝႆႉလႄႈ မၼ်းၸင်ႇၼႅတ်ႈဢီး ၶႃသွင်ၵေႃႉပီႈၼွင်ႉပႅတ်ႈသေ လၢတ်ႈႁႅင်းꧦၼင်ႇၼႆယဝ်ႉ။
“ပၢႆႈလူး ... မိုဝ်းၶိူဝ်သွင်ၵေႃႉပီႈၼွင်ႉ သုၵ်ႈၵေႃႈဢမ်ႇသုၵ်ႈ တူၺ်းလူး သိူဝ်ႈၶူဝ်းမႄႈၼႆႉ ၼုၵ်းဢိူၵ်ႇၽၵ်းမူတ်းယဝ်ႉ...တင်းႁဵတ်းၶိူဝ်သွင်ၵေႃႉၼႆႉ ”
ၶႃသွင်ၵေႃႉ ပီႈၼွင်ႉၵေႃႈ ၼႅတ်ႈၶိုၼ်းၶုၵ်းၸႂ်လႆႈသေ ၼႅတ်ႈလွမ်တူၺ်း မိုဝ်းၶႃတင်းသွင်ၵေႃႉယဝ်ႉ ၶႃသွင်ၵေႃႉ ယုမ်ႉပိူဝ်ႉယုမ်ႉပိူဝ်ႉ လွမ်တူၺ်းၼႃႈၵၼ်သေ ၶိုၼ်းလွမ်တူၺ်း ၼႃႈမႄႈၶဝ်ယဝ်ႉ မႄႈၶဝ်ၵေႃႈယုမ်ႉသေ-
“ၵွပ်ႈပိူဝ်ႈ ၶိူဝ်သွင်ၵေႃႉ ပီႈၼွင်ႉယဝ်ႉၼႆ တူၺ်းလူးသိူဝ်ႈၶူဝ်းမႄႈၼႆႉ ၼုၵ်းၽၵ်းဢိူၵ်ႇၽၵ်းမူတ်းယဝ်ႉ ... ႁိုဝ်!... ၶိူဝ်ပီႈၼွင်ႉ လူဝ်ႇလႆႈၵွႃႇႁႃ ႁွင်ႉလုၵ်ႈပႂ်ႉမႄႈ မႃးလွႆးမႃးသၵ်ႉပၼ်ဢိူဝ်ႈၼႆႉ”
လႆႈငိၼ်းၼင်ႇၼၼ် ၶႃသွင်ၵေႃႉ ပီႈၼွင်ႉၸူမ်းၶူဝ်ၵႂႃႇတႄႉꧦ
“ႁႃး ... ႁႃး ... ႁႃး ... ႁႃး...”
ၽွင်းၼၼ်ႉ မႄႈၼႃႉဢူႈၼႃႉၶဝ် ၵႂႃႇဢႅဝ်ႇသေ ၽႅဝ်မႃး လႆႈငိၼ်းသဵင်ၶူဝ် မေႃးယူႇၼႂ်းသွင်ႇၾႆးလႄႈ ၶႃၼႅတ်ႈမႃးတူၺ်းၽႂ်းꧦယဝ်ႉ ၼွင်ႉယိင်းပႃႈသွႆႈၶမ်း ၸင်ႇထၢမ်ဝႃႇ-
“သူၶူဝ်သင်ၼႆႉ”
ပႃႈသွႆႈၶမ်းၵေႃႈ သပ်းလႅင်းၼႄၼွင်ႉယိင်းမၼ်း လွင်ႈဢၼ်ၶူးမေႃယႃၸၢႆးဢွၼ်ၶမ်း ပဵၼ်လုၵ်ႈၸၢႆးမၼ်း လွင်ႈဢၼ်မၼ်းၶိုင်ပွင်ပၼ် လုၵ်ႈၸၢႆးမၼ်း လွင်ႈလုၵ်ႈၸၢႆးမၼ်းၸူမ်းသိူဝ်းသေ ဢဝ်သိူဝ်ႈမၼ်းၵိူဝ်ႇပႅတ်ႈၼၼ်ႉ သဵင်ႈꧦယဝ်ႉ လႆႈငိၼ်းၼင်ႇၼၼ် ၶဝ်ၵေႃႈမႃးဢွၼ်ၵၼ် ၸူမ်းသိူဝ်းၸွမ်းတႉꧦ၊ ၶမ်ႈၼၼ်ႉ ၶဝ်ၸူမ်းသိူဝ်း ဢုပ်ႇၵၼ်တေႃႇထိုင်ၵၢင်ၶိုၼ်း သိပ်းဢဵတ်းမူင်းပၢႆꧦယဝ်ႉ။
ဝၢႆးသေၼၼ်ႉ ၸၢႆးဢွၼ်ၶမ်း ၶိုၼ်းပွၵ်ႈမႃးမိူဝ်းတီႈယူႇမၼ်းယဝ်ႉ... ၶမ်ႈၼၼ်ႉ မၼ်းၽႅဝ်မႃး တီႈယူႇမၼ်းသေ မၼ်းဢမ်ႇၵိုင်ႉၵၢင်ႉၼွၼ်းလႆႈ မၼ်းၵုမ်ႇဝူၼ်ႉ လွင်ႈၸိူဝ်းဢၼ်ပူၼ်ႉမႃးၼၼ်ႉယူႇ
လိူဝ်သေၼၼ်ႉ မၼ်းဝူၼ်ႉပႃး လွင်ႈမေႃယႃဢွၼ်ႇ ၼၢင်းၸၢမ်ႁွမ်ယဝ်ႉ ဢွၼ်တၢင်းၼႆႉ ဝူၼ်ႉၶွပ်ႈယူႇသေတႃႉၵေႃႈ မၼ်းဢမ်ႇဝူၼ်ႉလိုၵ်ႉ ပွၵ်ႈၼႆႉတႄႉ မၼ်းဝူၼ်ႉၶိုၵ်ႉဝႆႉယဝ်ႈ လွင်ႈဢၼ် မၼ်းလႄႈ ၸုမ်းမေႃယႃဢွၼ်ႇၼၢင်းၸၢမ်ႁွမ်ၶဝ် ၽွင်းမိူဝ်ႈ တူၵ်းပုၼ်ႈၽွၼ်းသေ လဵပ်ႈတူၺ်းၵူၼ်းပဵၼ်ႁူမ်ႈၵၼ် ပေႃးဝႃႈ သမ်းၶဵမ်ယႃႈယႃတဝ်ႈလူင်ပၼ်ၵူၼ်းပဵၼ်ၼႆ ၼၢင်းၸၢမ်ႁွမ် ၵေႃႉယိပ်း တဝ်ႈယႃႈယႃပၼ်မၼ်း ဢဝ်ၶဵမ်ပၼ်မၼ်း ဢဝ်ၽႅၼ်ႇယၢင်ပၼ်မၼ်း ၸိူဝ်းၼၼ်ႉ မၼ်းၶိုၼ်းၵႂႃႇဝူၼ်ႉၶွပ်ႈႁၼ်ထိုင် ၼႂ်းတႃမၼ်းယူႇ...
ပေးဝႃႈ မၼ်းလၢတ်ႈသင်ႇ မေႃယႃဢွၼ်ႇၶဝ် လူဝ်ႇႁဵတ်းၸိူင်ႉၼႆ ၸိူင်ႉၼႆပၼ်ၵူၼ်းပဵၼ်ၶဝ် လူဝ်ႇပၼ်ယႃႈယႃၸိူင်ႉၼႆ တမ်ႈတီႈ ၵူၼ်းပဵၼ်ၶဝ်ၼႆ လွင်ႈဢၼ်ၼၢင်းၸၢမ်ႁွမ် ၽႅပ်ႉတႃငွၵ်းႁူဝ်မၼ်းၼၢင်းသေ ဢေႃႈဢဝ်ၶေႃႈလႂ်ၶေႃႈၼၼ်ႉ ၼႆၵေႃႈ ၸၢႆးဢွၼ်ၶမ်း ၶိုၼ်းမႃးႁၼ်ယူႇၼႂ်းတႃ ငိၼ်းယူႇၼႂ်းႁူသဵင်ႈꧦယဝ်ႉ။
တၢင်းႁၢင်ႈလီဢွၼ်ႇ ၼၢင်းၸၢမ်ႁွမ်ၵေႃႈ မၼ်းလွမ်ꧦၶိုၼ်းႁၼ်မႃး ၼႂ်းတႃမၼ်းယူႇ ... ယွၼ်ႉပိူဝ်ႈ ပဵၼ်လုၵ်ႈမႄႈတႆးလႄႈ သီၼိူဝ်ႉၼင် ၶၢဝ်ၶွင်ႇၸိုၼ်ႈသႂ်လီ တူဝ်ၶိင်းႁၢင်ႈၽၢင်ၵေႃႈ ႁၢင်ႈလီဝႆႉယူႇၼၼ်ႉ ပေႃးဝႃႈ မၼ်းၼၢင်းမႃးၼုင်ႈသိူဝ်ႈၽိူၵ်ႇ သိၼ်ႈလႅင်ဢွၼ်ႇၼႆ ၶႅၼ်းပဵၼ်ဢၼ်ႁၢင်ႈလီ လႅပ်ႈႁၢင်ႈၽၢင်ဢွၼ်ႇမၼ်းၼၢင်းတႄႉꧦယဝ်ႉ၊ တၢင်းယုမ်ႉႁၢင်ႈလီဢွၼ်ႇ မၼ်းၼၢင်းၼၼ်ႉ ယၢမ်းလဵဝ်မႃးတုမ်ႉသႂ်ႇႁူဝ်ၸႂ် ၸၢႆးဢွၼ်ၶမ်း ၵူႈၵမ်း ၵူႈၵမ်းယဝ်ႉ။
ၵႂၢမ်းဢၼ်ၶဝ် မေႃယႃဢွၼ်ႇၼင်ႇၵၼ် ယဝ်ႉယွၵ်ႇၵၼ်ၼၼ်ႉၵေႃႈ မၼ်းၶိုၼ်းႁၼ်ထိုင်သေ ၶိုၼ်းငိၼ်းမႃးၼႂ်းႁူမၼ်းယဝ်ႉ ... ဢၼ်မၼ်းၶိုၼ်းႁၼ်ထိုင်ငိၼ်းထိုင်ၼၼ်ႉတႄႉ-
ဝၼ်းၼိုင်ႈ ၽွင်းမိူဝ်ႈလိုဝ်ႈၵၢၼ်သေ ၽွင်းၸၢႆးဢွၼ်ၶမ်း မႃးလိုဝ်ႈႁိူဝ်ႉၼင်ႈၼိူဝ်တင်ႇ ၼႂ်းလုၵ်းမေႃယႃမၼ်းၼၼ်ႉ မၼ်းလႆႈငိၼ်းသဵင် မေႃးမႄး ၶဝ်ႈႁူမၼ်းမႃးလႄႈ ၸၢႆးဢွၼ်လႅင်း ၸင်ႇပၢၵ်ႈၽႃႈၵင်ႈ ၽၵ်းတူ ႁူးလႅင်းသေ ငွၵ်ႈတူၺ်းၵႂႃႇယဝ်ႉ ... ၽၢႆႇၼွၵ်ႈၼၼ်ႉၼႆ လႆႈႁၼ် ၼၢင်းၸၢမ်ႁွမ် လႄႈ မေႃယႃဢွၼ်ႇၶဝ် ၼင်ႈဢွမ်ႇလႅတ်ႇသေ ဢုပ်ႇမူၼ်ႈတူၼ်ႈၸႂ်ၵၼ်ယူႇ ... ၵႂၢမ်းၸိူဝ်း ဢၼ်ၶဝ် ဢုပ်ႇၵၼ်ၼၼ်ႉၵေႃႈ ၸၢႆးဢွၼ်ၶမ်း ငိၼ်းသဵင်ႈꧦယဝ်ႉ တႆးၵေႃႉ ၼၢင်းၸၢမ်ႁွမ် ၵေႃႉၼိုင်ႈၸင်ႇဝႃႈ-
“ႁေႉ ... ၸၢမ်ႁွမ် ...ၶူးမေႃယႃဢွၼ်ႇ ဢၼ်မႃးမႂ်ႇၼႆႉ ႁၢင်ႈလီၵျႃႉၼေႃ လႅတ်းၵေႃႈလႅတ်းၵျႃႉၼေႃ”
“ဢူဝ် ... ၵႂႃႇထၢမ်တၢင်ႇၵေႃႉလေႃႇ ... ယႃႇမႃးထၢမ်ၸၢမ်ႁွမ်”
“ႁႃး ႁႃး ႁႃး ... ၶိၵ်း ၶိၵ်း ၶိၵ်း”
တႆးၵေႃႉမၼ်းၸိူဝ်းၼၼ်ႉ ၶဝ်တိုၼ်းဢဝ်ၶူးမေႃယႃၸၢႆးဢွၼ်ၶမ်း ယွၵ်ႇၵူပ်း ၼၢင်းၸၢမ်ႁွမ်တႃႇသေႇလႄႈ ၶဝ်တင်ႈၸႂ်ထၢမ်မၼ်းၼၢင်း ၼင်ႇၼၼ်သေ ၸူမ်းၶူဝ်ယူႇ ဢတႃႇၵေႃႉၼိုင်ႈၶိုၼ်းဝႃႈ
“ပေႃးဢဝ်ႁဝ်းဝႃႈတႄႉ ႁၢင်ႈလီဢိူဝ်ႈ ၸၢမ်ႁွမ်လူး တေဝႃႈႁိုဝ်”
“ဢူဝ် ... ဢမ်ႇႁူႉ ဢမ်ႇႁူႉ”
ၼၢင်းၸၢမ်ႁွမ် ဝႃႈၼင်ႇၼႆသေ ဢဝ်တႃမိုဝ်းမၼ်း ထုပ်ႉႁႅမ်ၶဝ် ၸိူဝ်းၼၼ်ႉယူႇ “ၸၢမ်ႁွမ် ဢမ်ႇႁူႉတႄႉꧦႁႃႉ ... ႁဝ်းတႄႉႁူႉဢိူဝ်ႈ ပေႃးဝႃႈ ၸၢမ်ႁွမ်လႄႈ မၼ်းၵႂႃႇၸွမ်းၵၼ် ၽွင်းမိူဝ်ႈ ၵႂႃႇတူၺ်းၵူၼ်းပဵၼ်ၶဝ်ၼၼ်ႉၼႆ လႅပ်ႈၵၼ်ၵျႃႉ ... ၶိၵ်းꧦ”
ၼၢင်းၸၢမ်ႁွမ် လီဢၢႆသေ ယၵ်းလိမ်ႇပၼ်ၶႅၼ် ၵေႃႉဢၼ်ဝႃႈ တီႈမၼ်းၼၼ်ႉယဝ်ႉ မၼ်းၼၢင်းၸင်ႇဝႃႈ
“သူၸိူဝ်းၼႆႉၼေႃ ... ႁိုဝ်...! မိူဝ်ႈလႂ်ၵေႃႈ ၵုမ်ႇဢဝ်မေႃယႃၼႆႉ ယွၵ်ႇပိူၼ်ႈ ၵိုၵ်းၵၼ်တိၵ်းꧦဝႃႇ”
“ၸၢမ်ႁွမ် ဢမ်ႇလႆႈၸႂ်ႁႃႉ”
“ဢမ်ႇလႆႈၸႂ်”
“ပေႃးၼႆၵေႃႈ လူဝ်ႇလႆႈယွၵ်ႇၵိုၵ်းၽႂ်လႃႇ”
“ဢမ်ႇလူဝ်ႇယွၵ်ႇၵိုၵ်းၽႂ်”
“ၸၢမ်ႁွမ်မီးၵေႃႉမၵ်းမၢႆဝႆႉယဝ်ႉႁႃႉ တေႃႈဝႃႈ”
“မီးဢိူဝ်ႈ”
“ဢမ်ႇၸႂ်ႈမေႃယႃၼႆႉႁႃႉ”
“ဢမ်ႇၸႂ်ႈ”
“ၸႂ်ႈယူႇယူဝ်ႇ ဢိတ်းၼိုင်ႈ”
မၼ်းၼၢင်းၶၢၼ်ႉၶၢမ်ႇလႄႈ ၸင်ႇဝႃႈ
“ပေႃးသူၶႂ်ႈႁူႉၵေႃႈ တွင်းဝႆႉလႄႈ ႁိုဝ်ႉ ပုၼ်ႈတႃၸၢမ်ႁွမ်ၼၼ်ႉ ပေႃႈမႄႈ ၸၢမ်ႁွမ်ၶဝ် ႁႃဝႆႉပၼ်ယဝ်ႉဝႃႈ”
“ပဵၼ်ၵေႃႉလႂ်လႃႇ လၢတ်ႈၼႄႁဝ်းၽွင်ႈလူး”
“ဢူဝ် ... ၼႆႉတႄႉ ၶၢဝ်းယၢမ်းမၼ်းပႆႇထိုင်ၵွၼ်ႇ”
“ဢေႃး ... ၸၢမ်ႁွမ် ... ၸၢမ်ႁွမ် ဢၢၼ်းဢဝ်ဢၼ်ပေႃႈမႄႈ ႁႃပၼ်ၼၼ်ႉၼႆႁႃႉ?”
“ၸႂ်ႈဢိူဝ်ႈ”
“ဢမ်ႇၵူဝ် ပေႃႈမႄႈ ႁႃပၼ်ဢၼ်ထဝ်ႈႁႃႈ”
“ႁႃး ... ႁႃး... ၶိၵ်း ၶိၵ်း ...ႁီႉ ႁီႉ”
“ဢမ်ႇၵူဝ်... ပဵၼ်ၸိူင်ႉႁိုဝ်ၵေႃႈ ဢဝ်ဢၼ်ပေႃႈမႄႈႁႃပၼ်ယဝ်ႉ”
“ဢလူဝ်ႉ... ဝႃႈတေႉႁႃႉၸၢမ်ႁွမ် - ဢမ်ႇႁၵ်ႉၵေႃႈဢဝ်ယူႇႁႃႉ”
“ဝႃႈတႄႉဢိူဝ်ႈ ထွမ်ႇလႄႈ မိူဝ်ႈပၢၼ်ၽြႃးဢလွင်းတိုၵ်ႉပဵၼ်ရသေႉၼၼ်ႉ မီးၼၢင်းယိင်းၵေႃႉၼိုင်ႈ ထွမ်ႇသူပ်းဢဝ်ၵႂၢမ်း ပေႃႈမႄႈၶဝ်သေ ၸွမ်းၼင်ႇပေႃႈမႄႈၶဝ် တႄႇၼႃႈႁိူၼ်းပၼ်မၼ်းၼၼ်ႉ ဢမ်ႇႁၵ်ႉသေတႃႉၵေႃႈ မၼ်းထွမ်ႇၵႂၢမ်း ပေႃႈမႄႈၶဝ်သေ ဢဝ်ယဝ်ႉဝႃႈ”
ၶဝ်ၸိူဝ်းၼၼ်ႉ ဢွၼ်ၵၼ်ၶဝ်ႈၸႂ်သေ ပႂ်ႉထွမ်ႇဝႆႉယူႇ ၵေႃႉၼိုင်ႈ ၸင်ႇၼႅတ်ႈဝႃႈ
“ဢေႃ ဢေႃ ဢမ်ႇႁၵ်ႉၵေႃႈ ယိူၼ်ႉၸႂ်ၸုပ်ႇ ဢမ်ႇၸင်းၵေႃႈ ယိူၼ်ႉၸႂ်ၼူမ်ၼႆယူဝ်ႉ”
ၶဝ်ဢွၼ်ၵၼ် ယၵ်းပၼ်ၵေႃႉဢၼ်လၢတ်ႈၼၼ်ႉသေ
“သိုပ်ႇၶႆႈလႄႈ ၸၢမ်ႁွမ်”
“ႁဵတ်းၼၼ် မၼ်းၼၢင်းယူႇၸွမ်း ဢၼ်ပေႃႈမႄႈၶဝ် ဢဝ်ပၼ်ၼၼ်ႉသေ တေႃႇထိုင်ပေႃးမီးလုၵ်ႈၸၢႆးၵေႃႉၼိုင်ႈယဝ်ႉ ထိုင်တီႈလုၵ်ႈၸၢႆးၶဝ် ယႂ်ႇမႃး ငူးသမ်ႉသၵ်းၺႃး လုၵ်ႈၸၢႆးၶဝ်သေ ဢဝ်လုၵ်ႈၸၢႆးၶဝ်တၢႆၵႂႃႇဝႃႇ ၵမ်းၼၼ်ႉ ၶဝ်ၸင်ႇဢွၼ်ၵၼ်မႃး လၢတ်ႈၵႂၢမ်းသၸ်ႉၸႃႇ ႁင်းၽႂ်ႁင်းမၼ်းယဝ်ႉ ၽူဝ်မၼ်းတႄႉ ၵဝ်လႃႈလီယုမ်ႇယမ်ၸဝ်ႈရသေႉၼႆႉ ၸွမ်းၼင်ႇ ဢၼ်ဢူႈမႄႈ ၵိူဝ်းလီမႃးၼၼ်ႉၵူၺ်း ဢမ်ႇယုမ်ႇယမ်တႄႉꧦၼႆ ၸဝ်ႈရသေႉၼႆႉ မၼ်းဢမ်ႇပျေႃႇၸႂ် မၼ်းၶႂ်ႈထၢၵ်ႈတိၵ်းꧦၼႆယဝ်ႉ မၼ်းၼၢင်းတႄႉ မၼ်းဝႃႈ မၼ်းဢမ်ႇႁၵ်ႉၽူဝ်မၼ်းသေဢိတ်း လီၸင်းၼႃႇသေ ငူး ဢၼ်သၵ်းလုၵ်ႈမၼ်းၼႆၵွၼ်ႇၼႆယဝ်ႉ ၵူၺ်းၵႃႈ ၸွမ်းၼင်ႇထုင်းၵႂၢမ်းဢူႈမႄႈ ၶဝ်ဢဝ်ပၼ်သေလႄႈ လႆႈဢဝ်ၵူၺ်းၼႆယဝ်ႉ ယွၼ်ႉပိူဝ်ႈၵႂၢမ်းသၸ်ႉၸႃႇၶဝ်ၼၼ်ႉ ၸိုဝ်ႈၸႂ်ႈၵူႈဢၼ်လႄႈ လုၵ်ႈၸၢႆးၶဝ်ၵေႃႈ ၶိုၼ်းမီးၸႂ်မႃးၼႆယဝ်ႉ ၽူဝ်မၼ်းၵေႃႈ ၶႅၼ်းႁၵ်ႉမၼ်းလိူဝ်တွၼ်းသေၵဝ်ႇꧦၼႆယဝ်ႉ ၵွပ်ႈၼႆ ထွမ်ႇၵႂၢမ်းပေႃႈမႄႈၼႆႉ ဢမ်ႇၽိတ်းၵူၺ်း ၸၢမ်ႁွမ်တႄႉ ယုမ်ႇယမ်ဢဝ် ထုင်းၼင်ႇၼႆယဝ်ႉ”
ၼၢင်းၸၢမ်ႁွမ် လၢတ်ႈၼႄၶဝ်ၼင်ႇၼႆသေ ပၢႆႈၽၢတ်ႇၽုင်ၶဝ် ၵႂႃႇယဝ်ႉ ၽွင်းမိူဝ်ႈမၼ်းၼၢင်းသတိဝႆႉသေ ဝၢႆႇမႃးတၢင်းလုၵ်းၸၢႆးဢွၼ်ၶမ်းၼၼ်ႉ လႆႈႁၼ်ၸၢႆးဢွၼ်ၶမ်း လၵ်ႉလွမ်ထွမ်ႇ ဢၼ်မၼ်းၼၢင်း လၢတ်ႈၼၼ်ႉလႄႈ မၼ်းၼၢင်းလီဢၢႆၵႂႃႇယဝ်ႉ...၊
လွင်ႈဢၼ် ၼၢင်းၸၢမ်ႁွမ် လီဢၢႆၵႂႃႇၼင်ႇၼၼ်ၼၼ်ႉ ၸၢႆးဢွၼ်ၶမ်း တိုၵ်ႉမႃးႁၼ်ယူႇ ၼႂ်းတႃမၼ်း တေႃႇထိုင်တီႈလဵဝ်၊ ၶမ်ႈၼႆႉတႄႉ မၼ်းပဵၼ်ဢၼ်ဝူၼ်ႉပူၼ်ႉၵႂႃႇတႄႉလႄႈ ၼိုင်ႈမူင်းပၢႆယဝ်ႉသေတႃႉ မၼ်းတိုၵ်ႉပႆႇပဵၼ်ၼွၼ်းလပ်းလႆႈ မၼ်းၸင်ႇဝႃႈ “ဢိူဝ် ... ၵဝ်ၵုမ်ႇဝူၼ်ႉပူၼ်ႉယူႇ ပေႃးပဵၼ်တၢၼ်ႇၼႆႉလႃႇၼႆႉ မိူဝ်ႈၽုၵ်ႈၵေႃႈ ၵဝ်မီးၵၢၼ်ၵွၼ်ႇဢိူဝ်ႈ ပေႃးဢမ်ႇၼွၼ်းလပ်းၼႆ ဢမ်ႇပဵၼ်ၵူၺ်း ၵဝ်လူဝ်ႇလႆႈသမ်ႉယႃၼွၼ်းလပ်းၵွၼ်ႇယဝ်ႉၼႆႉ”
မၼ်းဝူၼ်ႉလၢတ်ႈၼင်ႇၼႆ ၵေႃႉလဵဝ်မၼ်းယူႇ မၼ်းၶိုၼ်းသမ်းယႃႈၼွၼ်းလပ်း ႁင်းၵူၺ်းမၼ်းသေ ၶတ်းၸႂ်ႁႂ်ႈၼွၼ်းလပ်းယဝ်ႉ ထိုင်မႃး ၼႃႈမိူင်းတေလႅင်း ၼႂ်းၽၼ်မၼ်းၼၼ်ႉ တိုၵ်ႉႁၼ်ၼႃႈ ၼၢင်းၸၢမ်ႁွမ် ၵွၼ်ႇယဝ်ႉ။