မွၵ်ႇၵွၼ်တေမွၵ်ႇၼႄယူႇ/တွၼ်ႈပႅတ်ႇ ၸၢႆးသွင်ၸၢႆး ၺႃးၵၼ်
ၼႂ်ၼႆႉ ပွႆးထၢမ်လိၵ်ႈၸၼ်ႉၸွမ် ပီလိုၼ်းသုတ်းၶဝ် ယဝ်ႉတူဝ်ႈ ၵႂႃႇယဝ်ႉလႄႈ ၸၢႆးလိုၼ်းၶမ်း တွပ်ႇလႆႈသဵင်ႈ ꧦသေ ပဵၼ်ဢၼ်မဝ်တူဝ် မဝ်ၸႂ်ၸူမ်းသိူဝ်းတႄႉꧦ ၽွင်းမိူဝ်ႈမၼ်းၸူမ်းသိူဝ်းသေ ပွၵ်ႈမႃးၼၼ်ႉ ပေႃးဝႃႈၽႅဝ်တီႈႁူင်းသဝ်း မၼ်းလႆႈႁၼ်ဢူႈၼႃႉၶဝ်လႄႈ မၼ်းၸင်ႇထၢမ်ဝႃႈ
“ဢေႃႈ ... ဢူႈၼႃႉ ၽႅဝ်မႃးႁိုင်ယဝ်ႉၶႃႈႁႃႉ”
“ပႆႇႁိုင်ၼင်ႇၵဝ်ႇ တွပ်ႇလႆႈလီယူႇႁႃႉ ၸၢႆးလိုၼ်း”
“ဢေႃႈ ... တွပ်ႇလႆႈယူႇၵူႈဢၼ်ဢေႃႈ”
“ဢိူဝ်ႈဢိူဝ်ႈၸူမ်းယဝ်ႉလီယဝ်ႉ ဢူႈၼႃႉ မႃးႁပ်ႉမႂ်းမိူဝ်းမိူဝ်ႈၼႆႉ ၵမ်းလဵဝ်ၼႆဢိူဝ်ႈၼႆႉ”
လႆႈငိၼ်းၼင်ႇၼႆ ၸၢႆးလိုၼ်းတူၵ်းၸႂ်ၵႂႃႇသေ
“မိူဝ်းမိူဝ်ႈၼႆႉၵမ်းလဵဝ်ၼႆႁႃႉဢူႈၼႃႉ”
ဢူႈၼႃႉၶဝ် ငွၵ်းႁူဝ်ၼႄမၼ်းယဝ်ႉ မၼ်းၸင်ႇထၢမ်ဝႃႈ
“မီးလွင်ႈတၢင်းယႂ်ႇၶိုၵ်ႉၸိူင်ႉၼင်ႇႁိုဝ်ၶႃႈ ဢူႈၼႃႉ”
“လွင်ႈတၢင်းတႄႉ ဢမ်ႇၶိုၵ်ႉသင်ၼင်ႇၵဝ်ႇ ယၢမ်းလဵဝ် မႄႈၸၢႆးလိုၼ်းၶဝ် လႆႈၶိုၼ်ႈႁူင်းယႃႉဝႆႉဢိူဝ်ႈ”
“တႄႉႁႃႉ ... မီးလၢႆဝၼ်းယဝ်ႉၶႃႈ”
“ဢိူဝ်ႈ ... မီးၸဵတ်းဝၼ်း ပႃးမိူဝ်ႈၼႆႉယဝ်ႉ ၶႅၼ်းတႄႉၶႅၼ်းမႃးယဝ်ႉ မိူဝ်ႈတေၸႃႉၶိုၼ်ႈၼၼ်ႉ သမ်ႉၺႃးၽွင်းၸၢႆးလိုၼ်း တိုၵ်ႉတွပ်ႇလိၵ်ႈလႄႈ ဢူႈၼႃႉၶဝ်ၵေႃႈ ဢမ်ႇႁတ်းပၼ်ၸၢႆးလိုၼ်းႁူႉၵူၺ်း”
ၸၢႆးလိုၼ်းၶမ်းၵေႃႈ ၼႅတ်ႈမိူဝ်းသိမ်းၶူဝ်းမၼ်းၽႂ်းꧦယူႇ ပႅင်ႈၼင်ႇဢၼ်လူဝ်ႇႁဵတ်းလူဝ်ႇသၢင်ႈ မၢင်မဵဝ်းၼၼ်ႉ ဢဝ်ဢၢပ်ပၼ်တႆးၵေႃႉမၼ်း ၸၢႆးသၢမ်သေ မၼ်းၸွမ်းဢူႈၼႃႉၶဝ် ၶိုၼ်ႈမႃးမေႇမဵဝ်ႉယဝ်ႉ။
ပီၸိူဝ်းဢၼ်ပူၼ်ႉမႃးၼၼ်ႉ ပေႃးဝႃႈ ႁွတ်ႈထိုင်ဝၼ်းပွႆးထၢမ်လိၵ်ႈယဝ်ႉၸိူင်ႉၼႆၼႆႉ ပဵၼ်ဝၼ်းဢၼ်ၶႃသွင်ၵေႃႉ ၼၢင်းလၢဝ်လႅင်း ၵႂႃႇတူၺ်းငဝ်းၸွမ်းၵၼ်ယဝ်ႉ ပီၼႆႉတႄႉ သၢႆငၢႆမၼ်း လႅၵ်ႈလၢႆႈၵူႈပိူင်ပိူင်ယဝ်ႉ ၼၢင်းလၢဝ်လႅင်းၵေႃႈ မိူၼ်ၸိူင်ႉၼင်ႇ ဝၼ်းပွႆးထၢမ်လိၵ်ႈယဝ်ႉၸိူင်ႉၼႆ မၼ်းၶုၵ်ႈၸႂ်လႆႈၶိုၼ်း ဢၼ်ပဵၼ်ပူၼ်ႉမႃးၼၼ်ႉယူႇ ၵူၺ်းၵႃႈ ဢမ်ႇလႆႈႁၼ် ၸၢႆးလိုၼ်းၽႅဝ်မႃး တီႈမၼ်းၼၢင်း မၼ်းၼၢင်း လႆႈငိၼ်းၶၢဝ်ႇၸၢႆးလိုၼ်း တမ်ႈတီႈ ၸၢႆးသၢမ်လႄႈ မၼ်းၼၢင်းလွမ်ၸႂ်လဵၵ်ႉၶေႃႈၶူမ်ယူႇ။
ၸၢႆးလိုၼ်းၶမ်း ၽႅဝ်မႃးမေႇမဵဝ်ႉသေ ၵႂႃႇၸူးမႄႈၶဝ် တီႈႁူင်းယႃယဝ်ႉ လႆႈႁၼ်မႄႈၶဝ် တိုၵ်ႉၼွၼ်းလပ်းဝႆႉၼိူဝ်ၵူႇယူႇလႄႈ မၼ်းၸၢႆးၸင်ႇ လွမ်ꧦႁွင်ႉဝႃႈ-
“မႄႈ ... မႄႈ ”
လႆႈငိၼ်းသဵင်ၼင်ႇၼႆလႄႈ ပႃႈသွႆႈၶမ်း မိုၼ်းတႃႁႃ ၵေႃႉဢၼ်ႁွင်ႉမၼ်းၼၼ်ႉယူႇ လႆႁၼ်လုၵ်ႈၸၢႆးမၼ်း ၸၢႆးလိုၼ်းၶမ်းလႄႈ မၼ်းၸူမ်း ပေႃးဢမ်ႇမီးတီႈဝႃႈသေ ဢၢင်ႈလုၵ်ႉၼင်ႈၵမ်းလဵဝ်ယဝ်ႉ ၸၢႆးလိုၼ်းၶမ်း ၸင်ႇဢဝ်မိုဝ်းဢီးဢူၵ်းမႄႈၶဝ်သေ
“မႄႈ ယႃႇပေၵိုင်ႉၵၢင်ႉလုၵ်ႉၵမ်းလဵဝ်လႄႈ ၵူဝ်မဝ်းဢိူဝ်း မႄႈယူႇလီမႃးယဝ်ႉၼေႃ”
ပႃႈသွႆႈၶမ်း လုၵ်ႉၼင်ႈၵွတ်ႇဢဝ် လုၵ်ႈၸၢႆးမၼ်းသေ လပ်းတႃသွင်ၶွၼ်ဝႆႉယူႇ ယွၼ်ႉပိူဝ်ႈ ၸႂ်ႁၵ်ႉလုၵ်ႈ ၸႂ်ထိုင်လုၵ်ႈလႄႈ ၼမ်ႉတႃမၼ်း လႆယွႆႉတူၵ်းၵႅမ်ႈမၼ်းယဝ်ႉ။
“မႄႈယူႇလီမႃးယဝ်ႉ လုၵ်ႈၸၢႆးလူး ၸွင်ႇတွပ်ႇလႆႈလိၵ်ႈႁိုဝ်”
“လႆႈဢေႃႈ မႄႈ”
“ႁဵတ်းၼႆၵႂႃႈ လုၵ်ႈၸၢႆးမႄႈၼႆႉ ၵတ်ႉၶႅၼ်ႇလၵ်ႈလႅမ်တႄႉꧦယဝ်ႉ”
ၶႃသွင်ၵေႃႉမႄႈလုၵ်ႈ ၸူမ်းသိူဝ်းဢုပ်ႇၵၼ် ပေႃးဢမ်ႇယဝ်ႉဢမ်ႇတူဝ်ႈလႆႈ ယွၼ်ႉပိူဝ်ႈ လႆႈမႃးတူၺ်းၵူၼ်းပဵၼ် မႃးမႂ်ႇထႅင်ႈၵေႃႉၼိုင်ႈလႄႈ ၶူးမေႃယႃၸၢႆးဢွၼ်ၶမ်း ယူႇတီႈဢမ်ႇၸမ်ဢမ်ႇၵႆသေ လႆႈႁၼ်လႆႈငိၼ်း ပႃႈသွႆႈၶမ်း ၶႃသွင်ၵေႃႉမႄႈလုၵ်ႈ ၸူမ်းသိူဝ်းဢုပ်ႇၵၼ်ၼင်ႇၼၼ် မၼ်း လွမ်ႁၢၼ်ႉၸႂ်ၸွမ်းပိူၼ်ႈယူႇ ၵူၺ်းၵႃႈ မၼ်းသမ်ႉဢမ်ႇမီးမႄႈၸိူင်ႉၼင်ႇပိူၼ်ႈလႄႈ ပေႃးဝႃႈ လႆႈႁၼ်ပိူၼ်ႈမႄႈလုၵ်ႈၵၼ် ၸိူင်ႉၼင်ႇၼႆ လႆႈႁၼ်ၼမ်ႉမႅတ်ႉတႃႇမႄႈလႄႈလုၵ်ႈ လုၵ်ႈလႄႈမႄႈ ႁူမ်ႇထိုင်ပၼ်ၵၼ်ၼင်ႇၼႆ မၼ်းသမ်ႉ ဢမ်ႇမီးမႄႈ တႃႇတေမႃးႁူမ်ႇမႅတ်ႉတႃႇပၼ် ၸိူင်ႉၼင်ႇပိူၼ်ႈလႄႈ ၸၢႆးဢွၼ်ၶမ်း ပဵၼ်ဢၼ်လွမ်ၸႂ်လဵၵ်ႉၶေႃးၶူမ်ယူႇ
ပုၼ်ႈၽွၼ်း တႃႇမႃးတူၺ်း ၵူၼ်းပဵၼ်မႃးမႂ်ႇၼၼ်ႉယဝ်ႉၵႂႃႇယဝ်ႉလႄႈ ၶူးမေႃယႃၸၢႆးဢွၼ်ၶမ်း သိမ်းဢဝ်ၶိူင်ႈၶူဝ်းမၼ်းသေ ပႆမႃးယဝ်ႉ သမ်ႉလႆႈ လဵပ်ႈမႃးႁိမ်း ပႃႈသွႆႈၶမ်းလႄႈ ပႃႈသွႆႈၶမ်းၸင်ႇဝႃႈ-
“ၼႄႈ ... ၶူးမေႃယႃ ၵေႃႉၼႆႉယဝ်ႉ လုၵ်ႈၸၢႆးပႃႈ ဢၼ်ပႃႈလၢတ်ႈဝၼ်းပူၼ်ႉၼၼ်ႉဢိူဝ်ႈ ၸၢႆးလိုၼ်းၶမ်းဢိူဝ်ႈ”
ၶူးမေႃယႃၸၢႆးဢွၼ်ၶမ်း ၸင်ႇယုမ်ႉတေႃႇ ၸၢႆးလိုၼ်းၶမ်းယဝ်ႉ ပႃႈသွႆႈၶမ်း ၸင်ႇသိုပ်ႇဝႃႈ
လုၵ်ႈၸၢႆး ၸၢႆးလိုၼ်း ၼႆႉပဵၼ်ၶူးမေႃယႃမႂ်ႇ ဢၼ်ၶတ်းၸႂ်ယႃပၼ်မႄႈ ႁႂ်ႈပေႃးၶႅၼ်းၼၼ်ႉယဝ်ႉ”
ၸၢႆးလိုၼ်းၶမ်း တူၺ်းႁၼ်ၼႃႈတႃ ၶူးမေႃယႃၵေႃႉၼႆႉ ပဵၼ်ၽႂ်ၼႆ မၼ်းတိုၼ်းႁူႉၸၵ်းဝႆႉ ၸဵမ်မိူဝ်ႈဝဵင်းလိူဝ်ႇ မိူဝ်ႈၸၢႆးသၢမ်လၢတ်ႈၼႄမၼ်းၼၼ်ႉယဝ်ႉ ၶူးမေႃယႃၸၢႆးဢွၼ်ၶမ်းၵေႃႉၼႆႉ ပဵၼ်ၶူးမေႃယႃ ဢၼ်ၽႃႇမၢၵ်ႇႁူဝ်ၸႂ်တၢင်းႁၵ်ႉမၼ်းသေ ႁိမ်ဢဝ်ၸူႉႁၵ်ႉမၼ်း ၼၢင်းလၢဝ်လႅင်း ၼၼ်ႉၼႆ မၼ်းၸၢႆးႁူႉထိုင်ဝႆႉလႄႈ လႆႈႁၼ်ၶူးမေႃယႃ ၸၢႆးဢွၼ်ၶမ်း ယုမ်ႉတေႃႇမၼ်းသေတႃႉ မၼ်းဢမ်ႇထုၵ်ႇတႃမၼ်းသေဢိတ်း ၵူၺ်းၵႃႈ ၽၢႆႇၼိုင်ႈၼႆႉ သမ်ႉပဵၼ် ၵေႃႉၽူႈဢၼ်ယူတ်းယႃပၼ် မႄႈၸဝ်ႈၵေးၸူး ၵေႃႈပိူင်ၼိုင်ႈ သမ်ႉလူဝ်ႇလႆႈၸွမ်း ၾိင်ႈငႄႈထုင်းၵူၼ်း လွင်ႈၼႃႈတႃမိုတ်ႈ ၵိုဝ်းၵၼ်ၼၼ်ႉၵေႃႈ ပိူင်ၼိုင်ႈ ၸၢႆးလိုၼ်းၶမ်း ၸင်ႇဝူၼ်ႉၵူႈလွင်ႈꧦသေ ၸင်ႇဝႃႈ-
“ၸူမ်းၶႃႈယဝ်ႉ ၶူးမေႃယႃ ယွၼ်ႉပိူဝ်ႈၸွႆႈထႅမ် ယူတ်းယႃပၼ် မႄႈၶႃႈႁဝ်းၶဝ်လႄႈ ၶွပ်ႈၸႂ်တႄႉꧦဢေႃႈ”
“လႆႈယူႇၵူၺ်း ၸၢႆးလိုၼ်းၶမ်း ၼႆႉတႄႉပဵၼ်ပုၼ်ႈၽွင်းႁဝ်း ၶူးမေႃယႃယဝ်ႉ”
ၶူးမေႃယႃ ၸၢႆးဢွၼ်ၶမ်း ဢဝ်တူၺ်းၶႅပ်းမၢႆ တီႈတိၼ်ၵူႇ ပႃႈသွႆႈၶမ်းၼၼ်ႉသေ လၢတ်ႈဝႃႈ
“ဢေႃႈ ... ပႃႈသွႆႈၶမ်း မိူဝ်ႈႁိုဝ်းမႃးၼႆ လူင်းႁူင်းယႃလႆႈယဝ်ႉ”
“တႄႉၶႃႈႁႃႉ ... ၶူးမေႃယႃ ၸူမ်းယဝ်ႉ ပႃႈတႄႉတေဢမ်ႇလိုမ်း ၵုင်ႇၵျေးၸူး ၶူးမေႃယႃၶဝ်သေပွၵ်ႈၵူၺ်း ဝၢႆးၼႆႉၵေႃႈ မႃးဢႅဝ်ႇႁိူၼ်းပႃႈၶဝ်လႄႈၼႃႈ”
“ဢေႃႈ ... လီၶႃႈယဝ်ႉ ၶႃႈတေၵႂႃႇၵွၼ်ႇ”
ဝၼ်းမိူဝ်ႈၼႆႉ ပႃႈသွႆႈၶမ်း တေလႆႈလူင်းႁူင်းယႃယဝ်ႉလႄႈ မၼ်းသိူဝ်းၸႂ်တႄႉꧦ ၸၢႆးလိုၼ်းၶမ်းၵေႃႈ တိုၵ်ႉၽဵဝ်ႈတိုၵ်ႉသိမ်းၶူဝ်း သႂ်ႇၼႂ်းသႃႉ ၼႂ်းထူင်ယူႇ ၽွင်းမိူဝ်ႈၼၼ်ႉ ၶူးမေႃယႃ ၸၢႆးဢွၼ်ၶမ်းၽႅဝ်မႃးသေ
“ဢေႃႈ... ပႃႈသွႆႈၶမ်း ပေႃးသိမ်းၶူဝ်းယဝ်ႉၶႃႈႁႃႉ”
“ၸႂ်ႈဢေႃႈ ... ၶူးမေႃယႃ မႃးၼင်ႈၶႃႈလႄႈ မိူဝ်ႈၼႆႉ ၶူးမေႃယႃ ပႄႉမႃးၸဝ်ႉၶႃႈလႃႇ”
“ၶႃႈတင်ႈၸႂ်မႃးၸဝ်ႉꧦဢေႃႈ”
ၸၢႆးဢွၼ်ၶမ်း ဢဝ်ယႃႈယႃႁႅင်း ၵူႈၸိူဝ်ႉၵူႈပိူင် ဢိၵ်ႇပႃးၵိူဝ်ဝၢၼ်ၽွင် ၼမ်ႉၼူမ်းၽွင် (ႁေႃးလိၵ်ႉၶ်)သေ ပၼ်ပႃႈသွႆႈၶမ်းယူႇယဝ်ႉ။
“ပႃႈသွႆႈၶမ်း ယႃႈယႃႁႅင်းၸိူဝ်းၼႆႉတႄႉ ၶႃႈမႃးတွၼ်ႈပၼ်လူႇပၼ် ပႃႈသွႆႈၶမ်း တႃႇမိူဝ်းၵိၼ် တီႈႁိူၼ်းဢေႃႈ”
လႆႈႁၼ်ၼင်ႇၼၼ် ပႃႈသွႆႈၶမ်း ပဵၼ်ဢၼ်ဢႃးၼႃႇတႄႉꧦသေ
“ဢလူဝ်း ... ၶူးမေႃယႃ ပႃႈဢႃးၼႃႇတႄႉꧦ ဢိူဝ်ၼႆႉ”
“ဢမ်ႇလူဝ်ႇဢႃးၼႃႇၶႃႈ ... ၶႃႈၵေႃႈမၢတ်ႈမိူၼ်ၼင်ႇမႄႈၶႃႈ ၵေႃႉၼိုင်ႈသေ ၸွႆႈထႅမ်လူႇပၼ်ဢေႃႈ ၶႅၼ်းတေႃႈ ဢဝ်မိူဝ်းၶႃႈလႄႈ”
“ၸူမ်းယဝ်ႉ ၶူးမေႃယႃ ပႅင်ႈၼင်ႇၵၢင်ၸႂ် ၶူးမေႃယႃမီးဝႆႉၼၼ်ႉ ႁႂ်ႈတဵမ်ထူၼ်ႈသေၵမ်းၼႆ ပႃႈသူးတွင်းပၼ်ယူႇယဝ်ႉ”
လႆႈငိၼ်းၼင်ႇၼၼ် ၶူးမေႃယႃၸၢႆးဢွၼ်ၶမ်း ပဵၼ်ဢၼ်ၸူမ်းသိူဝ်းၵႂႃႇတႄႉꧦ ၸၢႆးလိုၼ်းၶမ်းၵေႃႈ ၸင်ႇဝႃႈ
“ၸူမ်းၶွပ်ႈၸႂ်တႄႉꧦၶႃႈယဝ်ႉ ၶူးမေႃယႃ”
“လႆႈယူႇၵူၺ်း ၸၢႆးလိုၼ်းၶမ်း”
ၸၢႆးဢွၼ်ၶမ်းၶိုၼ်း ဝၢႆႇၼႃႈၸူး ပႃႈသွႆႈၶမ်းသေ လၢတ်ႈဝႃႈ
“ပႃႈသွႆႈၶမ်းၵေႃႈ ပေႃးၽႅဝ်မိူဝ်းႁိူၼ်းၼႆ ဝႆႉသတိလွင်ႈယူႇလီၶႃႈလႄႈၼႃႈ ... ဢီႈယႃႁႅင်းၸိူဝ်းၼႆႉၵေႃႈ ၵိၼ်ပၼ်သေႇꧦ ၵိၼ်ၸွမ်းၶၢဝ်းလႂ်ၶၢဝ်းၼၼ်ႉၶႃႈလႄႈ ပေႃးၽႅဝ်ႁိူၼ်းၼႆ မိူဝ်းလိုဝ်ႈႁိူဝ်ႉလိုဝ်ႈၸႂ် လီꧦၵွၼ်ႇ ၶႃႈၼႃႈ”
ၸၢႆးဢွၼ်ၶမ်း ၶိုၼ်းတူၺ်း ၸၢႆးလိုၼ်းၶမ်းသေ လၢတ်ႈဝႃႈ
“ၸၢႆးလိုၼ်းၶမ်းၵေႃႈ ၶတ်းၸႂ်လူႁၼ်လုမ်းလႃးမႄႈလီꧦၼႃႈ”
“ဢေႃႈ ... ဢေႃႈ”
“လီယဝ်ႉပေႃးၼႆ ၶႃႈတေၵႂႃႇၵွၼ်ႇ”
ဝၢႆးသေ ၸၢႆးဢွၼ်ၶမ်း ဢွၵ်ႇၵႂႃႇယဝ်ႉ ၵႅပ်ႉၼိုင်ႈ မေႃယႃဢွၼ်ႇ ၼၢင်းၸၢမ်ႁွမ် ၽႅဝ်မႃးတီႈ ပႃႈသွႆႈၶမ်းယဝ်ႉ မၼ်းၸင်ႇထၢမ်ဝႃႈ
“ၸိုင်ဝႃႈ ပႃႈတေလႆႈလူင်းႁူင်းယႃမိူဝ်ႈၼႆႉၼႆလႃႇ”
“ၸႂ်ႈဢိူဝ်ႈ ၼၢင်းၸၢမ်ႁွမ်”
“ၶႃႈၸင်ႇႁႃႁူႉ မိူဝ်ႈၵႆႈၼႆႉၵူၺ်းဢေႃႈ”
“ၸႂ်ႈတႄႉဢိူဝ်ႈ မိူဝ်ႈဝႃးမိူဝ်ႈသိုၼ်း ႁဵတ်ႈသင်ၼၢင်းၸၢမ်ႁွမ် ဢမ်ႇလူင်းၵၢၼ်”
“ၶႃႈၵွႃႇသူင်ႇတႆးၵေႃႉၶႃႈ တီႈဝဵင်းလိူဝ်ႇဢေႃႈ”
ပႃႈသွႆႈၶမ်း ၸင်ႇသိုပ်ႇမိုတ်ႈ ပၼ်ၸၢႆးလိုၼ်းယဝ်ႉ
“ၼႄႈ ... ၼၢင်းၸၢမ်ႁွမ် ၼႆႉပဵၼ်လုၵ်ႈၸၢႆးပႃႈ ၸၢႆးလိုၼ်းၶမ်း ဢိူဝ်ႈ ... လုၵ်ႈၸၢႆး ၸၢႆးလိုၼ်း မေႃယႃဢွၼ်ႇၵေႃႉၼႆႉတႄႉ ပဵၼ်ၼၢင်းၸၢမ်ႁွမ် ၼႆယဝ်ႉ ပဵၼ်လုၵ်ႈယိင်းတႆးၵေႃႉမႄႈ တီႈၵျွၵ်ႉမႄးဢိူဝ်ႈ တွင်းဝႆႉလႄႈၼႃႈ ၸူဝ်ႈမႄႈ မႃးၶိုၼ်ႈႁူင်းယႃၼႆႉ ၼၢင်းၸၢမ်ႁွမ်ၵေႃႈ မႃးၶတ်းၸႂ်လုမ်းလႃးပၼ် ၼမ်တႄႉꧦယဝ်ႉ လုၵ်ႈၸၢႆး”
ၸၢႆးလိုၼ်းၶမ်း ၸင်ႇယၵ်ႉတူၺ်း ၼၢင်းၸၢမ်ႁွမ်သေ-
“ၶွပ်ႈၸႂ်ယႂ်ႇၼမ်တႄႉꧦယဝ်ႉ ၼၢင်းၸၢမ်ႁွမ်”
“ဢမ်ႇပဵၼ်သင်လႆႈယူႇၵူၺ်း ၸၢႆးလိုၼ်းၶမ်း”
ၼၢင်းၸၢမ်ႁွမ် ၸင်ႇထၢမ်ဝႃႈ
“တေလႆႈၸွမ်းဢဝ် ၶူဝ်းသင်ပၼ် တိုၵ်ႉလူဝ်ႇသိမ်းထႅင်ႈယူႇ ၶႃႈႁႃႉပႃႈ”
“ၸၢႆးလိုၼ်းၶမ်း ပေႃးသိမ်းဝႆႉမူတ်းယဝ်ႉ ၼၢင်းၸၢမ်ႁွမ်”
“ဢေႃႈ ... ဢေႃႈ ”
ဝၼ်းၼၼ်ႉ ၸၢႆးလိုၼ်းၶမ်း ၶဝ်မႄႈလုၵ်ႈၶီႇမႃႉလေႃႉသေ ပွၵ်ႈမႃးမိူဝ်းႁိူၼ်းယဝ်ႉ ယွၼ်ႉပိူဝ်ႈ ပႃႈသွႆႈၶမ်း လူင်းႁူင်းယႃၵႂႃႇယဝ်ႉလႄႈ ၼႂ်းၸႂ် ၶူးမေႃယႃ ၸၢႆးဢွၼ်ႇၶမ်းၼႆႉ ပဵၼ်ဝႆႉႁူဝ်ႇလူဝ်ႇႁၢင်းလၢင်းယဝ်ႉ ၵွပ်ႈပိူဝ်ႈ မၼ်းၼႆႉ ပဵၼ်မေႃယႃ ဢၼ်မီးၼမ်ႉၸႂ်လီ ၸႂ်ဢီးလူၼိူဝ်ၵူၼ်းပဵၼ် ၼၼ်ႉယဝ်ႉ။
ပႃႈသွႆႈၶမ်း ၶဝ်ၽႅဝ်မႃးတီႈႁိူၼ်းသေ မႃးဢုပ်ႇၵၼ် ၶိူဝ်းဢၼ်မၼ်းလႆႈၵႂႃႇၶိုၼ်ႈ ႁူင်းယႃၼၼ်ႉယူႇ ပႃႈသွႆႈၶမ်း ၸင်ႇဝႃႈ
“ဢေႃး ... ၶူးမေႃယႃဢွၼ်ႇၵေႃႉၼႆႉ ၸႂ်လီဝႃႈၸႂ်လီယဝ်ႉၼေႃ ၸၢႆးလိုၼ်ႈ”
“ဢေႃႈ”
“ႁိူဝ်ႇ ... ၸိုဝ်ႈမၼ်းဝႃႈႁိုဝ်ၼႆ မႄႈပေႃးလိုမ်းထၢမ်မႃးၵွၼ်ႇဢိူဝ်ႈၼႆႉ လုၵ်ႈၸၢႆးဢမ်ႇႁူႉႁႃႉ?”
လွင်ႈဝႃႈ ၸိုဝ်ႈၶူးမေႃယႃၼၼ်ႉ ပဵၼ်ၸၢႆးဢွၼ်ၶမ်းၼႆႉ ၸၢႆးလိုၼ်းၶမ်း တိုၼ်းႁူႉဝႆႉၸဵမ်မိူဝ်ႈ ဝဵင်းလိူဝ်ႇၼၼ်ႉယဝ်ႉ ၵူၺ်းၵႃႈ ယွၼ်ႉပိူဝ်ႈ ၸၢႆးဢွၼ်ၶမ်းလႄႈ ၶႃသွင်ၵေႃႉ ၼၢင်လၢဝ်လႅင်း ၸင်ႇလႆႈၽၢတ်ႇၵၼ်ယဝ်ႉ ... ၵွပ်ႈၼႆ ၸိုဝ်ႈဢၼ်ဝႃႈ ၸၢႆးဢွၼ်ၶမ်းၼႆၼၼ်ႉ ၸၢႆးလိုၼ်းၶမ်း ဢမ်ႇၶႂ်ႈငိၼ်း လၢတ်ႈၵေႃႈ ဢမ်ႇၶႂ်ႈလၢတ်ႈ တူၵ်ႇၵေႃႈမၼ်ႈဢမ်ႇၶႂ်ႈတူၵ်ႇလႄႈ မၼ်းႁူႉယူႇသေတႃႉ မၼ်းၸင်ႇလႅၼ်ဝႃႈ-
“လုၵ်ႈၸၢႆးၵေႃႈ ဢမ်ႇႁူႉၶႃႈ”
ပႃႈသွႆႈၶမ်း ၸင်ႇထူၺ်ႈၸႂ်လူင်ၵမ်းၼိုင်ႈသေ
“ဢိူဝ်ႈ ... ၶူးမေႃယႃဢွၼ်ႇ ၶူးမေႃယႃဢွၼ်ႇ”