မွၵ်ႇၵွၼ်တေမွၵ်ႇၼႄယူႇ

ႁႅင်းသိူဝ်ၶႅင် (တၢင်ႉယၢၼ်း)

ၶၢဝ်းမွၵ်ႇၵွၼ်ၵီႈၶွင်ႇ
ပွင်ႇႁွတ်ႈၽႅဝ်တီႈဝဵင်း
ႁဵင်းၵူၼ်းဢွၼ်ၵၼ်တဝ်ႈ
လႆႈၶဝ်ႈႁွတ်ႈဢႅဝ်ႇမူၼ်ႈ
တူၼ်ႈၸႂ်ဝူၼ်ႉၶူၼ်ႉသွၼ်ႇ
မွၵ်ႇၵွၼ်ဢွၼ်ႇၵီႈဢွၵ်ႇ
မွၵ်ႇၼႄသိူဝ်းၸႂ်လႄႈ
တၢင်းႁၢင်ႈလီမႄႈမိူင်းတႆးယူႇ။

ၼၢင်းလၢဝ်လႅင်းလႄႈ ပိုၼ်း
ၸၢႆးလိုၼ်းၶမ်းၶႃၵေႃႈ
တေႃႈမိူၼ်ၼၼ်ၼင်ႇၵဝ်ႇ
ၽဝ်ႇၼၼ်ႉထူပ်းၺႃးၵၼ်
ဝူၼ်ႉႁၼ်မၵ်းမၢႆသေ
မွၵ်ႇၵွၼ်တေမွၵ်ႇၼႄယူႇ။

ၵွပ်ႈၼႆ

ပီပူၼ်ႉမႃးၼၼ်ႉၵေႃႈ မွၵ်ႇၵွၼ်တေမွၵ်ႇၼႄယူႇ။
ထိုင်မႃးပီၼႆႉၵေႃႈ မွၵ်ႇၵွၼ်တေမွၵ်ႇၼႄယူႇ။
မိူဝ်းၼႃႈမႃးၵေႃႈ မွၵ်ႇၵွၼ်တေမွၵ်ႇၼႄယူႇ။

ၸၢႆးဢွၼ်လႅင်း (ပၢင်ႇလွႆငိုၼ်း)

မွၵ်ႇၵွၼ် ... သဵၼ်ဢၼ်ၼႆႉ ငိၼ်းဝၢၼ်ႁူၵတ်းယဵၼ်မႅၼ်ႈၸႂ်

ၸိူဝ်းယၢမ်ႈတွၼ်ႉလႆႈထူပ်းႁၼ်သၼ်လွႆမွၵ်ႇၵွၼ် မူၺ်ၼၢႆးၽွင် ၵူႈၽႂ်မၼ်း၊ မွၵ်ႇၵွၼ် (ဢမ်ႇၼၼ်) မွၵ်ႇၸဵင်ၼႆႉ ႁၢင်ႈၶိူင်ႈပၼ်မိူင်းတႆးဝႆႉႁိုဝ်?။ မိူင်းတႆး ပဵၼ်တီႈမွၵ်ႇၵွၼ်ၵီႈလွၼ်ႉႁိုဝ်? လႆႈဝႃႈ တိုၼ်းႁွမ်းၵၼ်ဝႆႉ။ လိူဝ်ၼႆႉ လိူၼ်တႄႇငဝ်ႈ ပီတႆး လိူၼ်ၸဵင်၊ ပီမႂ်ႇတႆး၊ မွၵ်ႇၵွၼ် ၶၢဝ်းၵတ်းၶဝ်ၸိူဝ်းၼႆႉ တိုၼ်းၵိုၵ်းႁွမ်းၸွမ်းၵၼ် ပၼ်တၢင်းႁၢင်ႈလီ သိူဝ်းၸႂ်ၵတ်းယဵၼ် ၵူၼ်းသဝ်းၼႂ်းမိူင်းႁဝ်းၵူႈၵေႃႉယူႇ။

ႁဝ်းတင်းသဵင်ႈၵေႃႈ ဢွၼ်မုင်မွင်း ႁႂ်ႈၸဵဝ်းထိုင် ၽွင်းလိူၼ် ၸဵင်ပီမႂ်ႇတႆး ၶၢဝ်းမွၵ်ႇၵွၼ်ၵီႈလွၼ်ႉၼၼ်ႉယူႇ။ ၵေႃႉဢၼ်မွင်းလိူဝ် ၼႃႇသေႁဝ်းၼၼ်ႉ သမ်ႉမီးထႅင်ႈလူးၵွၼ်။ မိူၼ်ၸိူင်ႉၼင်ႇ ၸၢႆးလိုၼ်းၶမ်း လႄႈ ၼၢင်းလၢဝ်လႅင်းၶဝ် မွၵ်းၶႂ်ႈႁႂ်ႈၸဵဝ်းထိုင် ၶၢဝ်းမွၵ်ႇၵွၼ်ၵီႈၼႃႇ။ သင်ပဵၼ်လႆႈ ယင်းၶႂ်ႈႁႂ်ႈမွၵ်ႇၵွၼ် မွၵ်ႇၼႄယူႇ ၵူႈသၢမ်ၶၢဝ်း။ ၵူၺ်းမွၵ်ႇၵွၼ် ဢမ်ႇယႃႉသတ်ႉၸႃႇ။ ၶႂ်ႈႁႂ်ႈပဵၼ်ပုၼ်ႈတႃႇ ၽူႈပႂ်ႉသၸ်ႉၸႃႇၵူၺ်း ၼင်ႇၵဝ်ႇ။

“မွၵ်ႇၵွၼ်တေမွၵ်ႇၼႄယူႇ” ၼႆ တေႁဵတ်းႁိုဝ်မွၵ်ႇၼႄ? ပေႃႈၶႂ်ႈႁူႉ လူဝ်ထၢမ် ၸၢႆးလိုၼ်းၶမ်းသွင်ၶႃ ၼၢင်းလၢဝ်လႅင်း။ ၶႃသွင်ၵေႃႉ သမ်ႉႁႂ်ႈထၢမ် “ႁႅင်းသိူဝ်ၶႅင်”ၼႆဝႃႇ ႁႅင်းသိူဝ်ၶႅင်သမ်ႉ ဢမ်ႇလၢတ်ႈၼႄ လႆႈၵူႈၵေႃႉလူး။ တေႁဵတ်းႁိုဝ်? ဢမ်ႇယၢပ်ႇ ႁႅင်းသိူဝ်ၶႅင်သိုပ်ႇလၢတ်ႈဝႃႈ “ တၢင်းႁူႉမီးၼႂ်းလၢႆး ယိင်းၸၢႆးလူဝ်ႇမေႃဢဝ်” လူတူၺ်း ပပ်ႉသၢင်းၼႆႉ ႁႂ်ႈသုတ်းလႄႈ... တေလႆႈႁူႉ လွင်ႈ “မွၵ်ႇၵွၼ်တေမွၵ်ႇၼႄယူႇ” မွၵ်ႇၵွၼ်တေမွၵ်ႇၼႄယူႇ...

တိုၼ်းလႅင်းၸွမ် (ႁွမ်ၸၢမ်ငိုၼ်း)

ၶေႃႈသင်ႇ

ၸိူင်း“မွၵ်ႇၵွၼ်တေမွၵ်ႇၼႄယူႇ” ၼႆႉ ၼင်ႇႁိုဝ် ပေႃးတေငၢမ်ႇမႅၼ်ႈ သၽႃႇဝတိုၼ်းတႆးၼၼ်ႉ ၸင်ႇလႆႈၶတ်းၸႂ်သေ တႅမ်ႈဢွၵ်ႇမႃးယဝ်ႉ။ ထုင်းၵႂၢမ်းတႆးႁဝ်းမီးဝႆႉဝႃႈ “ႁဵတ်းဝႆႉၼႆႉ လီသေဝႆႉႁဵတ်း” ၼႆလႄႈ ၽူႈတႅမ်ႈလိၵ်ႈၵေႃႈ ၸင်ႇဝူၼ်ႉဝႃႈ “တႅမ်ႈဝႆႉၼႆႉ လီသေဝႆႉတႅမ်ႈ” ၼႆသေ ၸွမ်းၼင်ႇဢၼ်ဝူၼ်ႉထိုင်လႆႈၼၼ်ႉ ၸင်ႇလႆႈၶတ်းၸႂ်တႅမ်ႈဝႆႉယဝ်ႉ။

ၼႂ်းၸိူင်းၼႆႉ ၸိုဝ်ႈၽူႈၶဝ်ႈၸိူင်းလႄႈသင် တၢင်းၵႂႃႇတၢင်းဢဝ် ၸိူင်းလႄႈသင် သင်ၸိူဝ်ႉဝႃႈ ၵႂႃႇငၢမ်ႇမႅၼ်ႈမိူၼ်ၸိုဝ်ႈ၊ မိူၼ်ထႅဝ်ပဵၼ်တၢင်း ပဵၼ်ၽူႈလူလိၵ်ႈၶဝ်ၼႆၸိုင် ၶႅၼ်းတေႃႈ မႅတ်ႉတႃႇဢွၼ်ၼႃႈသေ ဝၢင်းၶႂၢင်းပၼ် ၽူႈတႅမ်ႈလိၵ်ႈသေၵမ်း။

လွင်ႈဢၼ် ၽူႈတႅမ်ႈလိၵ်ႈ လႆႈတႅမ်ႈၸိူဝ်းၼႆႉ ယွၼ်ႉပိူဝ်ႈၵတ်ႉၶႅၼ်ႇ လႅၼ်ႇၽၢႆၼႃႇသေလႄႈ တႅမ်ႈတႄႉဢမ်ႇၸႂ်ႈၼႆ ႁႂ်ႈလႆႈပၼ်သတိ ၽူႈလူလိၵ်ႈၶဝ်ဝႆႉသေၵမ်း၊ ယွၼ်ႉပိူဝ်ႈ မီးဝႃႇသၼႃႇတႅမ်ႈလိၵ်ႈလႄႈ ၸင်ႇလႆႈၶတ်းၸႂ်လပ်ႉတူၺ်း ပၢႆၵမ်သေ ၽိုၵ်းတႅမ်ႈတူၺ်းႁႂ်ႈပေႃး ပဵၼ် ၸိူင်းတႆးယဝ်ႉ။ ၵွပ်ႈပိူဝ်ႈၼႆ တီႈၼႂ်းၸိူင်းၼႆႉ သင်ၸိူဝ်ႉဝႃႈ ၺႃးႁၼ်မႅၼ်ႈ တီႈၽိတ်းတီႈပိူင်ႈ တီႈႁိူင်ႈတီႈၵိူင်း တီႈဢၼ်ဢမ်ႇထုၵ်ႇၸႂ်ၼႆၸိုင် ၶႅၼ်းတေႃႈ ဝၢင်းၶႂၢင်းပၼ် တၢင်းယူပ်ႈယွမ်း ၽူႈတႅမ်ႈလိၵ်ႈသေ ၸွႆႈထႅမ်မူၼ်ႉမႄးပၼ် ယႂ်ႇꧦၼမ်ꧦသေၵမ်း။

ယုမ်ႇယမ်ဝႃႈ ၼိုင်ႈၵေႃႉႁူႉၼိုင်ႈဢၼ် ၼိုင်ႈၵေႃႉႁၼ်ၼိုင်ႈလွင်ႈ ၼႆသေ ပႂ်ႉမုင်ႈမွင်းတၢင်းၸွႆႈထႅမ် တၢင်းၶႂ်ႈၸႂ် ၽူႈဢၼ်လူလိၵ်ႈ ပၼ်ႁႅင်းၶဝ်ယူႇၵူႈယၢမ်း။

ႁႅင်းသိူဝ်ၶႅင် (တၢင်ႉယၢၼ်း)

သပ်ႉပႃႇယၵေႇႁႃ ပွၵ်ႉသီႇ ဝဵင်းတၢင်ႉယၢၼ်း

တွၼ်ႈ