မွၵ်ႇလူင်ႇလဵဝ်/တွၼ်ႈႁႃႈ
ႁွတ်ႈထိုင်မႃးၵၢင်ၼႂ် ၼႃႈမိူင်းပႆႇတၼ်းသႂ်လႅင်းလီ မၼ်းၸၢႆး ၼႅတ်ႈလုၵ်ႉမႃး ပွတ်ႈသုၵ်ႈသီၼႃႈသီတႃ လၢင်ႉသူပ်းလၢင်ႉပၢၵ်ႇ မၼ်းယူႇယဝ်ႉ၊ ပုၼ်ႈတႃႇတေထႅမ်တွင်ႉမၼ်းၼၼ်ႉ မၼ်းၵႂႃႇသိုဝ်ႉၵိၼ်ၼမ်ႉၼဵင်ႈဝၢၼ်လႄႈ ၶဝ်ႈမုၼ်းတီႈၼႂ်းသႅင်တီႈၼိုင်ႈယဝ်ႉ။ ဝၢႆးသေၼၼ်ႉ မၼ်းၵႂႃႇဢႅဝ်ႇ တီႈၼိုင်ႈယဝ်ႉတီႈၼိုင်ႈသေ မႃးပႂ်ႉတူၺ်း ၼၢင်းမူဝ်ၶၢဝ်ၶဝ်ယူႇ၊ ၵၢင်ၼႂ်ၸဝ်ႉမွၵ်ႇပႅတ်ႇမူင်းၼၼ်ႉ ၽြႃး တေလုၵ်ႉတီႈၵျွင်းယေႇသႃႇ ၽႅဝ်မႃးတီႈၽွင်ႇတေႃႇဢူးလႄႈ ၸွမ်းၽင်ႇၼွင်ႁိမ်းၵျွင်းၼၼ်ႉ ပဵၼ်ၵူၼ်းမႃးပႂ်ႉဝႆႉ ပေႃးတဵမ်ဝႆႉၵူႈတီႈၼႆယဝ်ႉ၊ ၸၢႆးမွၼ်းၶိူဝ်း ၸင်ႇမႃးပႂ်ႉတူၺ်းႁိူဝ်းၼၢင်းမူဝ်ၶၢဝ်ၶဝ် ၽၢႆႇႁွင်ႇၼႆႉယဝ်ႉ။ ယူႇၸူဝ်ႈၼိုင်ႈ လႆႈႁၼ် ႁိူဝ်းၼၢင်းမူဝ်ၶၢဝ်ၶဝ် မႃးလႄႈ မၼ်းၼႅတ်ႈႁၢင်ႈၵႅမ်ႇမရႃႇမၼ်းသေ ယိူင်းဝႆႉလီလီယဝ်ႉ၊ ၼၢင်းမူဝ်ၶၢဝ်ၵေႃႈ ယူႇၼိူဝ်ႁိူဝ်းသေ လွမ်ႁႃတူၺ်း ၸၢႆးမွၼ်းၶိူဝ်း ၼႂ်းၵႄႈၵူၼ်း ၼၢင်းမူဝ်ၶၢဝ်ၵေႃႈ ယူႇၼိူဝ်ႁိူဝ်းသေ လွမ်ႁႃတူၺ်းၸၢႆးမွၼ်းၶိူဝ်း ၼႂ်းၵႄႈၵူၼ်းၼမ်ၸိူဝ်းၼၼ်ႉယူႇ၊ ၵူၺ်းၵႃႈ မၼ်းၼၢင်းတႄႉပႆႇႁၼ် ... ၽွင်းၼၼ်ႉ ႁိူဝ်းၶဝ် ၽႅဝ်မႃးႁိမ်းၸၢႆးမွၼ်းၶိူဝ်းလႄႈ ၸၢႆးမွၼ်းၶိူဝ်း ၵေႃႈ ထႆႇဢဝ်ၶႅပ်းႁၢင်ႈၶႅပ်းၼိုင်ႈယဝ်ႉ၊ ယွၼ်ႉပိူဝ်ႈ ၾႆးၵႅမ်မရႃႇမၢပ်ႈသႂ်ႇၶဝ်လႄႈ ၼၢင်းမူဝ်ၶၢဝ်ၶဝ် ၸင်ႇဢွၼ်ၵၼ်ဝၢႆႇတူၺ်း တီႈၾႆးမၢပ်ႈၼၼ်ႉ၊ ၶဝ်ၸင်ႇလႆႈႁၼ် ၸၢႆးမွၼ်းၶိူဝ်းလႄႈ ၶဝ် ဢွၼ်ၵၼ်ယုၵ်ႉမိုဝ်းၼႄမၼ်းယဝ်ႉ။
လႆႈႁၼ်ႁိူဝ်းၶဝ် ၵႂႃႇတၢင်းၽၢႆႇတူၵ်းၵျွင်းလႄႈ ၸၢႆးမွၼ်းၶိူဝ်းၵေႃႈ ၶိုၼ်းၵႂႃႇၸူးၶဝ်ယဝ်ႉ၊ ၵူၼ်းမၢင်ၸိူဝ်း ယူႇၼိူဝ်ႁိူဝ်းသေ ပႂ်ႉတူၺ်းၽြႃးဝႆႉယူႇ။ မၢင်ၸိူဝ်းၵေႃႈ ဢွၵ်ႇမႃးဢႅဝ်ႇၼႂ်းပွႆးယဝ်ႉ၊ ၸၢႆး မွၼ်းၶိူဝ်းလႄႈ ၼၢင်းမူဝ်ၶၢဝ်ၶဝ် ၶိုၼ်းမႃးထူပ်းၵၼ်သေ ၼၢင်းမူဝ်ၶၢဝ်ၸင်ႇထၢမ်ဝႃႈ-
“ၽြႃးၸမ်တေၽႅဝ်မႃးယဝ်ႉႁႃႉ ပီႈၸၢႆးမွၼ်းၶိူဝ်း”
ၸၢႆးမွၼ်းၶိူဝ်း ယၵ်ႉတူၺ်းယၢမ်းမူင်း တီႈမိုဝ်းမၼ်း မီး ၸဵတ်းမူင်းၶိုင်ႈပၢႆယဝ်ႉလႄႈ မၼ်းၸင်ႇဝႃႈ
“ဢမ်ႇပေႃးဝႃႈယဝ်ႉ တေမႃးယဝ်ႉ”
“မူဝ်ၶဝ်တေလႆႈၵႂႃႇယူႇတီႈလႂ်သေ တူၺ်းလႃႇၼႆႉ”
“ၶိုၼ်းၵႂႃႇတီႈ ပီႈၸၢႆးမွၼ်းၶိူဝ်းယူႇၼၼ်ႉႁိုဝ်ႉ တီႈၼၼ်ႈ ၼႆ တေလႆႈႁၼ်ပႃး မိူဝ်ႈပိူၼ်ႈ ပၢင်းၽြႃးလူင်းႁိူဝ်းသေ ဢဝ်ၶဝ်ႈၵျွင်း ၼၼ်ႉဢိူဝ်ႈ”
ၼၢင်းၸၢမ်သႅင်း ၸင်ႇဝႃႈ
“ၵႂႃႇယၢပ်ႇယူဝ်ႉ ၵူၼ်းၼမ်ပေႃးပဵၼ်တၢၼ်ႇၼႆႉ”
“ဢမ်ႇပေႃးယၢပ်ႇၼင်ႇၵဝ်ႇ ၵူၺ်းၼႃႇ လူဝ်ႇလႆႈၽိုတ်ႉပိူၼ်ႈ ဢိတ်းဢိတ်းၵူၺ်းဢိူဝ်ႈ”
“ပေႃးၼႆ ပီႈၸၢႆးမွၼ်းၶိူဝ်း ဢွၼ်မူဝ်ၶဝ်ၵႂႃႇလႄႈ မူဝ်ၶဝ် တေၸွမ်းၽၢႆႇလင်လႆ”
ၸၢႆးမွၼ်းၶိူဝ်းၵေႃႈ ဢွၼ်ၶႃသွင်ၵေႃႉ ၶဝ်ႈမႃးၼႂ်းၵႄႈၵူၼ်းၼမ်သေ မႃးဢဝ်တီႈယူႇ တီႈၽၢႆႇႁွင်ႇၵျွင်း တီႈႁိမ်းပိူၼ်ႈတေပၢင်း ၽြႃး ၶိုၼ်ႈၵျွင်းၼၼ်ႉယဝ်ႉ၊ မၼ်းၸင်ႇၵႂႃႇၸုၵ်းႁိမ်း ၼၢင်းယိင်း ၸုမ်းၼိုင်ႈသေ
“မႃးလႄႈ ၼၢင်းမူဝ် ... ၼၢင်းၸၢမ်သႅင်း မႃးၸုၵ်းတီႈၼႆႈ လႆႈယူႇ”
ၶႃသွင်ၵေႃႉၵေႃႈ မႃးၸုမ်းႁိမ်းၸၢႆးမွၼ်းၶိူဝ်းသေ ပႂ်ႉတူၺ်း ၽြႃးဢၼ်တေၽႅဝ်မႃးၼၼ်ႉယူႇ၊ ၸွမ်းၽင်ႇၼွင် ပဵၼ်ၵူၼ်း ပေႃးတဵမ်လူင်ၵႂႃႇၵူႈတီႈ ပေႃးတၢၼ်ႇ ၽင်ႇၼွင်တေၵူၼ်ႇတေပင်း ယဝ်ႉ မၢင်ၸိူဝ်းၵေႃႈ ယူႇၼိူဝ်ႁိူဝ်းသေ ပႂ်ႉတူၺ်းမီးတင်းၼမ် ႁိူဝ်းၶဝ်ယႆၵၼ်ဝႆႉ သမ်ႉပေႃးဢမ်ႇၶႂ်ႈၸၢင်ႈၵႂႃႇတၢင်းလႂ်၊ လွမ်တူၺ်း ႁိူဝ်းၶဝ် ၶပ်ႉယႆၵၼ်ဝႆႉ သမ်ႉပေႃးတဵမ်ၵူႈတၢင်း၊ လွမ်တူၺ်းၼိူဝ် ႁိူဝ်းၽႂ်ၵေႃႈ ၵူၼ်းပေႃးတဵမ်ဝႆႉ ၵူႈလမ်းၵူႈလမ်းယူႇ။ ၽွင်းၼၼ်ႉ ၵူၼ်းၶၢႆၶဝ်ႈၶႅပ်ႈ ဢဝ်ၵူၺ်ၶဝ်ႈၶႅပ်ႈ တၢင်ႇႁိူဝ်းဢွၼ်ႇၶဝ်သေ မႃးႁႃၶၢႆ ၸွမ်းႁိူဝ်းၸွမ်းၽင်ႇၼမ်ႉယူႇ၊ ၸၢႆးမွၼ်းၶိူဝ်း ၸင်ႇတူပ်းမိုဝ်း ႁွင်ႉဢဝ်ၶဝ်ႈလႄႈ ၶဝ်ၽၢႆးႁိူဝ်းၶဝ်သေ မႃးႁိမ်းၽင်ႇၼမ်ႉ တီႈႁိမ်းၸၢႆးမွၼ်းၶိူဝ်းယဝ်ႉ။
ၸၢႆးမွၼ်းၶိူဝ်း ၸင်ႇသိုဝ်ႉလႄႈ ၸဝ်ႈဢၼ်ၶၢႆၼၼ်ႉၵေႃႈ ဢဝ်ၶဝ်ႈၶႅပ်ႈသဵပ်ႇသႂ်ႇသွႆႉသေ ယိုၼ်ႈပၼ်ၶဝ်ယဝ်ႉ၊ လႆႈႁၼ်ၸၢႆးမွၼ်းၶိူဝ်းသိုဝ်ႉၼင်ႇၼၼ် ၵူၼ်းၸိူဝ်းႁိမ်းႁွမ်းၶဝ်ၵမ်ႈၽွင်ႈၵေႃႈ ဢွၼ်ၵၼ်သိုဝ်ႉၵိၼ် ၸိူင်ႇၼင်ႇၶဝ်ယဝ်ႉ၊ ၸၢႆးမွၼ်းၶိူဝ်း ဢဝ်ၶဝ်ႈၶႅပ်ႈပၼ်ၼၢင်းမူဝ်ၶၢဝ် ၶႃသွင်ၵေႃႉသေ
“ယေႃႈ ... ၸိမ်းတူၺ်းလႄႈ ၶဝ်ႈၶႅပ်းၼႂ်းၼွင်ဢိူဝ်ႈၼႆႉ”
ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းၵေႃႈ ၸၼ်ဢဝ်ၵေႃႉ ၶႅပ်းၶႅပ်းယူႇ ၼၢင်းမူဝ်ၶၢဝ်ၸင်ႇထၢမ်
“ဢေႃႈ ... မိူဝ်ႈဝႃးတႆးၵေႃႉ ပီႈၸၢႆးမွၼ်းၶိူဝ်းမႃးယူႇႁႃႉ?”
“ဢမ်ႇႁၼ်မႃးလူင်”
“မူဝ်ဝႃႈယူႇလႄႇ ယူဝ်ၶႄးၶဝ်ဢမ်ႇမႃးၼႆ ပီႈၸၢႆးမွၼ်ၶိူဝ်း ဢမ်ႇထွမ်ႇလူး ပေႃးၼႆ ၶမ်ႈဝႃးပီႈၸၢႆးမွၼ်းၶိူဝ်း ၵႂႃႇၼွၼ်းတီႈလႂ်လႃႇ?”
“ၵႂႃႇၼွၼ်းထူၼွၼ်းထႃ တီႈၼႂ်းၵျွင်းၽြႃး ၸိူင်ႇၼင်ႇ ပိူၼ်ႈၼွၼ်းၼၼ်ႉဢိူဝ်ႈ”
“ၵူၼ်းဢၼ်ၼွၼ်းၸိူင်ႉၼၼ် မီးၼမ်ယူႇႁႃႉ?”
“သမ်ႉပေႃးတဵမ်ၵျွင်းၽြႃးၼၼ်ႉယူႇၼႃႇ ... ၼမ်ဢိူဝ်ႈ”
ၼၢင်းၸၢမ်သႅင်း ၸင်ႇဝႃႈ
“ပေႃးၼႆ ၶမ်ႈဝႃးၼႆႉ ပီႈၸၢႆးမွၼ်းၶိူဝ်း လႆႈၵူႉသူဝ်ႇၼမ်သုတ်းယဝ်ႉၼႆႉ”
“ၸိူင်ႉႁိုဝ်ဝႃႈ ... ၵွပ်ႈသင် ... လၢတ်ႈလူး”
“ဢေႃႈ ... ၵွပ်ႈပိူဝ်ႈၼွၼ်းပႂ်ႉၽြႃးၼၼ်ႉဢိူဝ်ႈ ... ၶိၵ်းၶိၵ်း”
ၶဝ်သၢမ်ၵေႃႉၸူမ်းၶူဝ်သိူဝ်းၼူဝ်ၵႂႃႇတႄႉတႄႉ ... ၵူၼ်းႁိမ်းႁွမ်းၼၼ်ႉ လွမ်ၵႄႉတႃတူၺ်း ၶဝ်ၵမ်ႈၽွင်ႈယူႇ ၸၢႆးမွၼ်းၶိူဝ်းၸင်ႇဝႃႈ
“ဢေႃႈ ... ၵူႉသူဝ်ႇဢၼ်ၼွၼ်းပႂ်ႉၽြႃးၼၼ်ႉ ၸၢမ်သႅင်း ဢမ်ႇၶႂ်ႈလႆႈႁႃႉ?”
“ဢမ်ႇၶႂ်ႈလႆႈ ... ၵူႉသူဝ်ႇဢၼ်ၼွၼ်းပႂ်ႉၽြႃးၼၼ်ႉ ယူဝ်ၸၢင်ႈၼွၼ်းလူင်ႁိုဝ်ဢမ်ႇႁူႉယဝ်ႉ”
“ဢမ်ႇၼွၼ်းလူင်သႄႈ ၼၢင်းၸၢမ်သႅင်း၊ ၽွၼ်းလီမၼ်းၼၼ်ႉ ၸၢင်ႈပၼ်ၼွၼ်းလပ်းငၢႆႈ ၼွၼ်းလပ်းၾၼ်လီ တိုၼ်ႇၵေႃႈ လႆႈတိုၼ်ႇလီၼႆဝႃႇ”
“ပေႃးၼႆၵေႃႈ ၶႂ်ႈလႆႈဢိူဝ်ႈ”
“ပေႃးၶႂ်ႈလႆႈၵေႃႈ ၼၢင်းၸၢမ်သႅင်းၵႂႃႇၼွၼ်းပႂ်ႉဢဝ် ယဝ်ႉၼႃႇ”
“ဢူဝ် ... ယူဝ်ဝႃႈ ပီႈၸၢႆးမွၼ်းၶိူဝ်း တေၽႃႇၵၢင်ဝၢင်းၶိုင်ႈသေ ၽႄၵူႉသူဝ်ႇပၼ်ၼႆၼႃး”
“ပေႃးၽႄ ၵူႉသူဝ်ႇသေ ၽႃႇၵၢင်ဝၢင်းၶိုင်ႈပၼ်ၼႆ တေလႆႈၶိုင်ႈၼိုင်ႈၵူၺ်းဢိူဝ်ႈ ပေႃးၼွၼ်းပႂ်ႉဢဝ်ၼၼ်ႉ ၸင်ႇလႆႈတဵမ်တဵမ်ထူၼ်ႈထူၼ်ႈယဝ်ႉ”
“ပီႈၸၢႆးမွၼ်းၶိူဝ်းၼႆႉ ထီႇၼဵဝ်ၵျႃႉၼေႃ ၵူႉသူဝ်ႇၵေႃႈ ဢမ်ႇၶႂ်ႈပၼ်ပိူၼ်ႈဝႃႇ မဵဝ်းမေႃယွမ်းၵေႃႈဢမ်ႇၸႂ်ႈ”
“ပေႃးၼႆ ၼၢင်းၸၢမ်သႅင်းတေဢဝ်ယူႇႁႃႉ?”
“ဢမ်ႇဢဝ်”
ၽွင်းၼၼ်ႉ ၼၢင်းမူဝ်ၶၢဝ် ၸင်ႇဝႃႈ
“ၼႄႈ ... ၽြႃးၵျွႃႉၽႅဝ်မႃးယဝ်ႉဝႃႇ”
ၶဝ်ဢွၼ်ၵၼ်ဝၢႆႇ တူၺ်းၵႂႃႇ တၢင်းၵျွင်းလႄႇၶျႄႇၼၼ်ႉ လႆႈႁၼ်ႁိူဝ်းဢွၼ်ႇ ဢၼ်ဢွၼ်ၸၼ်မႃး ၽၢႆႇၼႃႈႁိူဝ်းၼူၵ်ႉၵရဝႅၵ်ႉလူင်ၼၼ်ႉယဝ်ႉ၊ ၽႂ်ၽႂ်ၵေႃႈ ၶႂ်ႈတူၺ်းၶႂ်ႈႁၼ်လႄႈ ဢွၼ်ၵၼ် ၽိုတ်ႉၵၼ်ငွၵ်ႈတူၺ်းယူႇ ... ၵူၼ်းၸိူဝ်းၼၼ်ႉ ၽိုတ်ႉၵၼ်ဢီးၵၼ်လႄႈ ၼၢင်းၸၢမ်သႅင်း ၸင်ႇဢဝ်တူဝ်မၼ်း ၵႂႃႇဢႅပ်ႈၸပ်းတူဝ် ၼၢင်းမူဝ်ၶၢဝ်ဝႆႉယဝ်ႉ၊ တူဝ်ၼၢင်းမူဝ်ၶၢဝ်ၵေႃႈ ၶိုၼ်းၵႂႃႇဢႅပ်ႈၸပ်း တိုဝ်ႉၺႃး တူဝ်ၸၢႆႈမွၼ်းၶိူဝ်းဝႆႉယူႇ ၼၢင်းမူဝ်ၶၢဝ်ၸင်ႇဝႃႈ-
“ဢူဝ် ... ၵူၼ်းၸိူဝ်းၼႆႉ ပေႉဢီးၵၼ်ႁဵတ်းသင်ၵေႃႈ ဢမ်ႇႁူႉယဝ်ႉ”
ၽွင်းၼၼ်ႉ ၵူၼ်းၽၢႆႇလင်ၸိူဝ်းၼၼ်ႉ ၸႂ်ႉႁႂ်းၵူၼ်းၽၢႆႇ ၼႃႈၼင်ႈသေတူၺ်းၼႆလႄႈ ၼၢင်းမူဝ်ၶၢဝ်ၵေႃႈ လႆႈၼင်ႈသေ တူၺ်းယဝ်ႉ၊ ၸၢႆးမွၼ်းၶိူဝ်း ဢမ်ႇပႆႇၸၢင်ႈၼင်ႈလႆႈလီလီ ၼၢင်းမူဝ် ၶၢဝ်ၸင်ႇသုတ်ႉပၼ်ဢိတ်းၼိုင်ႈသေ
“ပီႈၸၢႆးမွၼ်းၶိူဝ်း ... ၼင်ႈတီႈၼႆႈလႄႈ”
ၸၢႆးမွၼ်းၶိူဝ်းၵေႃႈ ဢမ်ႇၸၢင်ႈႁဵတ်းႁိုဝ်လႄႈ မၼ်းၸင်ႇ လႆႈၼင်ႈထီႉတိူဝ်ႉၼိူဝ်ႉ ၼၢင်းမူဝ်ၶၢဝ်ဝႆႉယူႇယဝ်ႉ ... မၼ်းၸင်ႇ ဝႃႈ-
“ၼၢင်းမူဝ်ၶၢဝ် ဢမ်ႇလႆႈၼင်ႈလီလီယူဝ်ႉ”
“ဢမ်ႇပဵၼ်သင်လႆႈယူႇ ပီႈၸၢႆးမွၼ်းၶိူဝ်း” ၶဝ်ၼင်ႈၼိူဝ် သိၵ်ႈၶူဝ်လႆဢုတ်ႇသေ ပႂ်ႉတူၺ်းႁိူဝ်းလူင် ဢၼ်တၢင်ႇၽြႃးမႃးၼၼ်ႉယူႇ လႆႈႁၼ်ႁိူဝ်းဢွၼ်ႇ ဢၼ်ဢဝ်ၵူၼ်းၽၢႆးသေ ၸၼ်ႁိူဝ်းလူင်ၼၼ်ႉ ၽႅဝ်မႃးၽၢႆႇၼႃႈၶဝ်လႄႈ မိူၼ်ၵၼ် ၵူႈၵေႃႉ ႁွင်ႉမေႃးဝႃႈ“ယီးလႄးလေး” ... ယီးလႄးလေး”ၼႆယူႇ၊ ၵူၼ်းၽၢႆးႁိူဝ်းဢွၼ်ႇၸိူဝ်းၼၼ်ႉ ဢွၼ်ၵၼ်ၼုင်ႈသိူဝ်ႈႁၢၼ်ၸႃးၶွၼ်ႇ ၵူၼ်ႁၢၼ်ႇၸႃးၶွၼ်ႇၽဵင်ႇၵၼ် မိူၼ်ၵၼ်ၵူႈၵေႃႉသေ ၶူးလၢႆး ၶဝ်ၽၢႆးႁိူဝ်းၼႆၵေႃႈ ဢဝ်တိၼ်ၶတ်းမႆႉၽၢႆးသေ ၽၢႆးဢဝ်ယဝ်ႉ၊ သဵင်ၵွင်မွင်းသႅင်ႇၵေႃႈ ဢိုတ်ႇၼၼ်ႈပၼ်းမေႃး ၸွမ်းၼိူဝ်ႁိူဝ်း ဢွၼ်ႇၶဝ်ၼၼ်ႉသေ မၢင်ၸိူဝ်းၵေႃႈ ၵႃႈလၢႆးၶႅၼ်ႉ ၸွမ်းမႃးၼိူဝ်ႁိူဝ်း ၵွၼ်ႇယဝ်ႉ ... ႁိူဝ်းၼၢမ်းဢၼ်ၸၼ်ၶဝ်ၼႆႉ လမ်းၼိုင်ႈလႄႈလမ်းၼိုင်ႈ သိုပ်ႇသၢႆၸိူၵ်ႈလဵၵ်း ၵွင်ႉၵၼ်သေ ၶဝ်သိပ်းသီႇလမ်းၽွမ်ႉ ၵၼ်ၸၼ်ဢဝ်ႁိူဝ်းၵရဝႅၵ်ႉလူင်ၼၼ်ႉ မႃးယဝ်ႉ၊ လႆႈႁၼ်ၼင်ႇၼၼ် ၽႂ်ႁၼ်ၵေႃႈ ပဵၼ်ဢၼ်ၵျေႃႇသိူဝ်းၸႂ် ၵူႈၽႂ်မၼ်းယဝ်ႉ ... ၼၢင်းမူဝ်ၶၢဝ် ၸင်ႇဝႃႈ-
“ဢၼ်ၶဝ်ၽၢႆးႁိူဝ်းၼႆႉ လီတူၺ်းၵျႃႉၼေႃ ပီႈၸၢႆးမွၼ်းၶိူဝ်း”
“ဢိူဝ်ႈ ... လီတူၺ်းဢိူဝ်ႈ ... လၢႆးဢၼ်ဢဝ်တိၼ်ၽၢႆး ႁိူဝ်းၸိူင်ႉၼႆၼႆႉ ၼႂ်းလုမ်ႈၾႃႉပတ်းပိုၼ်ႉၼႆႉ မီးတီႈၼႆႈဢၼ်လဵဝ်ၵူၺ်းဢိူဝ်ႈ”
လႆႈႁၼ်ပိူၼ်ႈသိုပ်ႇၸၼ်မႃးၼင်ႇၼၼ် ႁိူဝ်းလူင်ၼူၵ်ႉလူင်ၵေႃႈ ၽႅဝ်းမႃး ဢမ်ႇပေႃးၸမ်ဢမ်ႇပေႃးၵႆၶဝ်ယဝ်ႉလႄႈ ၸၢႆးမွၼ်းၶိူဝ်း ၸင်ႇဝႃႈ-
“ၼၢင်းမူဝ် ... ဢဝ်ထူင်ၼႆႉဝႆႉၵမ်းၼိုင်ႈလူး ... ပီႈၸၢႆးမွၼ်းၶိူဝ်း တေၸုၵ်းသေ ထွတ်ႇႁၢင်ႈၵမ်းၼိုင်ႈဢိူဝ်ႈ”
ၼၢင်းမူဝ်ၶၢဝ်ၵေႃႈ ႁပ်ႉဢဝ်ထူင်ၸၢႆးမွၼ်းၶိူဝ်းသေ ဢဝ်တၢင်ႇဝႆႉၼိူဝ်တၵ်းမၼ်းယဝ်ႉ၊ ၸၢႆးမွၼ်းၶိူဝ်းၵေႃႈ လုၵ်ႉၸုၵ်းသေ ယိူင်းထႆႇဢဝ်ၶႅပ်းႁၢင်ႈယူႇ၊ ယွၼ်ႉပိူဝ်ႈၾႆးၵႅမ်ႇမရႃႇမၼ်း မၢပ်ႈသႂ်ႇ ပိူၼ်ႈလႄႈ သၢႆတႃပိူၼ်ႈၸိူဝ်းၼၼ်ႉ ၵမ်ႈၽွင်ႈဢွၼ်ၵၼ်တူၺ်း မၼ်းဝႆႉယူႇသေတႃႉ မၼ်းၸၢႆးတႄႉ ဢမ်ႇတၼ်းတူၺ်းပိူၼ်ႈ။ ၽွင်းႁိူဝ်းၼူၵ်ႉၵရဝႅၵ်ႉလူင် ၽႅဝ်မႃးႁိမ်းမၼ်းၼၼ်ႉၵေႃႈ မၼ်း သိုပ်ႇထႆႇဢဝ်ၶႅပ်းႁၢင်ႈထႅင်ႈယူႇ။ ဝၢႆးၼၼ်ႉ မၼ်းၸင်ႇ ၶိုၼ်းယွၼ်း ဢဝ်ထူင်မၼ်း တီႈ ၼၢင်းမူဝ်ၶၢဝ်ယဝ်ႉ။
“ၼၢင်းမူဝ် ... ဢဝ်မႃးထူင်လႄႈ”
ၸၢႆးမွၼ်းၶိူဝ်း ႁပ်ႉဢဝ်ထူင်သေ ၶိုၼ်းၼင်ႈဝႆႈၽြႃးယဝ်ႉ လႆႈႁၼ်ၸၢႆးမွၼ်းၶိူဝ်း ႁွမ်းမိုဝ်းသွင်ၶွၼ် တၢင်ႇတႃႈၼႃႈၽၢၵ်ႇသေ ဝႆႈၽြႃးယူႇလႄႈ ၶႃသွင်ၵေႃႉၵေႃႈ ႁွမ်းမိုဝ်းသေ ဝႆႉၸိူင်ႉၼင်ႇမၼ်း ၸၢႆယဝ်ႉ၊ ဝၢႆးသေ ၼူၵ်ႉၵရဝႅၵ်ႉ မႃးၵိုတ်းတီႈၽၢႆႇႁွင်ႇၵျွင်း ပၢင်းဢဝ် ၽြႃးၶိုၼ်းၵျွင်းယဝ်ႉ ၊ ၶဝ်သိုပ်ႇပႂ်ႉတူၺ်း ပိူၼ်ႈၽၢႆးႁိူဝ်းၶေႉၵၼ် တေႃႇပေႃးယဝ်ႉယဝ်ႉ၊ ဝၢႆးသေၼၼ်ႉ ၶဝ်ၸင်ႇဢွၼ်ၵၼ်ၶိုၼ်ႈမႃး ၼိူဝ်ၵျွင်းယူႇ ၼၢင်းၸၢမ်သႅင်းၸင်ႇဝႃႈ-
“ၸိုင်ဝႃႈ မူဝ်တေၶႂ်ႈတဵၵ်းၶမ်း ၶႂ်ႈလူႇၶမ်းၽြႃးၼႆၼႃႇ”
“ၸႂ်ႈတႄႉဢိူဝ်ႈ ... ၵႂႃႇႁဝ်းၵႂႃႇသိုဝ်ႉၶမ်းသိူင်းၵွၼ်ႇ”
ၶဝ်သၢမ်ၵေႃႉ ၵႂႃႇႁႃသိုဝ်ႉၶမ်းသိူင်းယဝ်ႉသေ ၼၢင်းမူဝ်ၶၢဝ် ၸင်ႇဝႃႈ
“ဢေႃႈ ... ပီႈၸၢႆးမွၼ်းၶိူဝ်း ဢဝ်ၶမ်းသိူင်းမူဝ်ၶဝ်ၼႆႉၵႂႃႇ တဵၵ်းပၼ်ၽွင်ႈၼႃႈ ... မူဝ်ၶဝ် တေယူႇတီႈၼႆႈသေ ဝႆႈဢဝ်ယဝ်ႉ”
ၸၢႆးမွၼ်းၶိူဝ်းၵေႃႈ ႁပ်ႉဢဝ်ၶမ်းသိူင်း တီႈၼၢင်းမူဝ်ၶၢဝ် လႄႈၼၢင်းၸၢမ်သႅင်းသေ ၶိုၼ်းၵႂႃႇ တဵၵ်းၶမ်းၽြႃးၸွမ်းပိူၼ်ႈယူႇယဝ်ႉ၊ ၼၢင်းမူဝ်ၶၢဝ် လႄႈ ၼၢင်းၸၢမ်သႅင်းတႄႉ ႁွမ်းမိုဝ်းသေ လွမ်တူၺ်း ၸၢႆးမွၼ်းၶိူဝ်း ဢၼ်တိုၵ်ႉၽိုတ်ႉပိူၼ်ႈသေ တဵၵ်းၶမ်းၽြႃးၼၼ်ႉယူႇ၊ ဝၢႆးသေ ၶဝ်လူႇဝႆႈယဝ်ႉ ၶဝ်ၸင်ႇၶိုၼ်းလူင်းမႃး တၢင်းတူၵ်းၼႆႉယဝ်ႉ၊ ၼၢင်းၸၢမ်သႅင်းၸင်ႇဝႃႈ-
“ႁဝ်းၵႂႃႇတူၺ်း တီႈႁိူဝ်းႁဝ်းၵမ်ႉၼိုင်ႈၼေႃႈ ... မူဝ်”
“ၵႂႃႇလႄႈ ... ယူဝ်ၶဝ်ပႂ်ႉႁဝ်းယူႇယဝ်ႉယူဝ်ႉ”
ၶဝ်သၢမ်ၵေႃႉ ပႆမႃးၸူးတီႈႁိူဝ်းၶဝ်ယဝ်ႉ ... ဢူႈၼၢင်းမူဝ် ၶၢဝ်ၸင်ႇထၢမ်ဝႃႈ-
“လုၵ်ႈယိင်းၶဝ် ၵိၼ်ၶဝ်ႈဝၼ်းယဝ်ႉယဝ်ႉႁႃႉ?”
“ပႆႇၵိၼ်ၶႃႈ”
“ၵႂႃႇၵိၼ်လႄႈ ႁဝ်းတိုၵ်ႉၸင်ႇႁႃၵိၼ်ယဝ်ႉမိူဝ်လဵဝ်ၵူၺ်း ၼင်ႇၵဝ်ႇ”
ၶဝ်သၢမ်ၵေႃႉၵေႃႈ ၸင်ႇၸူဝ်းၵၼ်သေ မႃးၵိၼ် တီႈသႅင်ႇၶဝ်ႈ“မၢၼ်ႈၼွင်ဢွၼ်ႇ” ယဝ်ႉ ၼၢင်းမူဝ်ၶၢဝ် ၸင်ႇထၢမ်ဝႃႈ-
“ပီႈၸၢႆးမွၼ်းၶိူဝ်း တေၶႂ်ႈၵိၼ်သင်”
ၸၢႆးမွၼ်းၶိူဝ်း ဢဝ်ၵလႅပ်းၸိုဝ်ႈၽၵ်း ဢၼ်တႅမ်ႈဝႆႉၼၼ်ႉ မႃးတူၺ်းသေ မၼ်းၸင်ႇဝႃႈ-
“ပေႃးသင်ႇၵိၼ်ၽၵ်းၼႆတေႁိုင်ယူဝ်ႉ သင်ႇၵိၼ်ၶဝ်ႈၶူဝ်ႈ ဢဝ်ႁိုဝ်ႉ ၼၢင်းမူဝ်?”
“လီယူႇၼႃႇ ... ဢေႃႈ ... ၸၢမ်သႅင်းလူး တေၶႂ်ႈၵိၼ်သင်”
“ၵိၼ်ၶဝ်ႈၶူဝ်ႈၼင်ႇၵဝ်ႇယဝ်ႉ”
ၶဝ်ဢွၼ်ၵၼ် ၵိၼ်ၶဝ်ႈၶူဝ်ႈႁူမ်ႈၵၼ်သေ ၼၢင်းမူဝ်ၶၢဝ် ၸင်ႇၵႂၢမ်းဝႃႈ-
“ပီႈၸၢႆးမွၼ်းၶိူဝ်း ... မိူဝ်ႈၶမ်ႈဝႃႈ မူဝ်ၶဝ်မိူဝ်းၵႂႃႇယႂႃႇမႃႉသေ မိူဝ်းဢုပ်ႇၵၼ် မဵဝ်းၼိုင်ႈဢိူဝ်ႈ”
“ၸိူင်ႉႁိုဝ်” “ဢေႃႈ ... မၢင်ၸိူဝ်း သမ်ႉဝႃႈၶႂ်ႈပူၼ်ႉၵႂႃႇဢႅဝ်ႇ ၼိူဝ်လွႆ ၼူၵ်ႉယုင်းၶမ်းၼႆလႄႈ ... ၶပ်းမၢႆၶၢဝ်းတၢင်းမူဝ်ၶဝ်မိူဝ်ႈၼႆႉ ဢၢင်ႈၶိုၼ်းပူၼ်ႉၵႂႃႇ ၼိူဝ်လွႆၼူၵ်ႉယုင်းၼႆယဝ်ႉ ... ၵွပ်ႈၼႆ”
ၼၢင်းမူဝ်ၶၢဝ်လၢတ်ႈၼင်ႇၼႆ ၵိုတ်းၶေႃႈၵႂၢမ်းသေ သူတ်ႉၵိၼ်ၼမ်ႉၽၵ်းယူႇ ... ၸၢႆးမွၼ်းၶိူဝ်းၸင်ႇဝႃႈ-
“ၵွပ်ႈၼႆ ... ဢီႈသင်လႃႇ?”
“ဢေႃႈ ... ၵွပ်ႈၼႆ ၸွင်ႇပီႈၸၢႆးမွၼ်းၶိူဝ်းတေၸွမ်းႁိုဝ် ၼႆယဝ်ႉ”
“ပေႃးႁွင်ႉၸွမ်း ပေႃးပၼ်ၸွမ်းၼႆ ၶႂ်ႈၸွမ်းၵႂႃႇယူႇ”
“ပေႃးဢမ်ႇႁွင်ႉၼႆလူး”
“ပေႃးဢမ်ႇႁွင်ႉၼႆၵေႃႈ လူဝ်ႇၶိုၼ်းၼႃႈလဵၵ်ႉသေ ၼႃႈႁဵဝ်ႇၵေႃႉလဵဝ်သေ ပွၵ်ႈမိူဝ်းၵူၺ်းယဝ်ႉ”
“မူဝ်ၶဝ်လႃႈလီႈဝႃႈၼင် ဝႃႈတႄႉၵေႃႈၸွမ်းတႄႉၼႃႈ ... မူဝ်ၶဝ်ၶႂ်ႈထႆႇၶႅပ်းႁၢင်ႈၼိူဝ်လွႆၼၼ်ႉဢိူဝ်ႈ”
“ယွၼ်ႉပိူဝ်ႈ ၶႂ်ႈၵႂႃႇထႆႇၶႅပ်းႁၢင်ႈလႄႈ ၸင်ႇႁွင်ႉယူဝ်ႉ ၼၢင်း မူဝ် ဢမ်ႇၸႂ်ႈႁႃႉ?”
“ဢမ်ႇၸႂ်ႈၵူၺ်း ပေႃးၶႂ်ႈထႆႇၶႅပ်းႁၢင်ႈ လွင်ႈလဵဝ်ၵူၺ်းၼႆတႄႉ ၵႂႃႇၸူးၵူၼ်းထႆႇႁၢင်ႈၼိူဝ်လွႆၼၼ်ႉ ထႆႇပၼ်ၵေႃႈ လႆႈယူႇလူး ဢမ်ႇၼၼ် ယိမ်ၵႅမ်ႇမရႃႇပီႈၸၢႆးမွၼ်းၶိူဝ်းၵႂႃႇၵေႃႈ လႆႈယူႇလူး ဢမ်ႇၸႂ်ႈႁႃႉ?”
ၸၢႆးမွၼ်းၶိူဝ်း ၸင်ႇယိပ်းၵႅမ်ႇမရႃႇမၼ်းၼၼ်ႉသေ လၢတ်ႈ
“ပေႃးယွၼ်းယိမ် ၵႅမ်ႇမရႃႇၼႆႉတႄႉ ဢမ်ႇလႆႈၵူၺ်း”
“ၵွပ်ႈသင်လႃႇ”
“ၵွပ်ႈၵႅမ်ႇမရႃႇၼႆႉ မၼ်းဢမ်ႇၽၢတ်ႇလႆႈၸဝ်ႈမၼ်းဝႃႇ”
“ပေႃးၼႆၵေႃႈ မူဝ်ၶဝ်ႁွင်ႉၸွမ်းၼင်ႇၵၼ်ယဝ်ႉ ၸဵမ်ၵႅမ်ႇမရႃႇ ၸဵမ်ၸဝ်ႈၵႅမ်ႇမရႃႇ ၸွမ်းမႃးၼင်ႇၵၼ်တႃႉ”
ၼၢင်းၸၢမ်သႅင်းၵေႃႈၸင်ႇဝႃႈ
“ၾိမ်း(ၾလိၼ်ႇ) ပီႈၸၢႆးမွၼ်းၶိူဝ်း တိုၵ်ႉၵိုတ်းၼမ်ယူႇႁႃႉ?”
“ၵိုတ်းၼမ်ယူႇ ဢၼ်လိူဝ်မၼ်း ၵိုတ်းထႅင်ႈသွင်ၵဵၼ်ၵွၼ်ႇ”
“ပေႃးၼႆ ၸၢမ်သႅင်းၶဝ်တေထႆႇၼမ်ၼမ်ယူႇ ပွၵ်ႈပူၼ်ႉ မိူဝ်ႈၸၢမ်သႅင်းၶဝ်ၵႂႃႇၼၼ်ႉ လႆႈထႆႇမႃးသေတႃႉ ၾိမ်းဢၼ်ပဵၼ်သီ(ၵႃႇလႃႇ)မူတ်းၵႂႃႇၼႆလႄႈ ၵူၺ်းလႆႈထႆႇမႃးး ဢၼ်ၽိူၵ်ႇဢၼ် လမ်ၵူၺ်း လီၵေႃႈဢမ်ႇလီသင်”
“ၼၼ်ႉတႄႉ မၼ်းပဵၼ်ၵူၼ်းထႆႇၵူၼ်းသုၵ်ႈမၼ်း ဢမ်ႇလီဢိူဝ်ႈၼၼ်ႉ ၸဝ်ႈမၼ်းတႄႉႁၢင်ႈလီယူႇလူင်”
“ႁီႉ ႁီႉ ပီႈၸၢႆးမွၼ်းၶိူဝ်း ႁႅင်ႉမေႃယွင်ႈၼႃႇလႄႈ ၶဝ်ႈၶူဝ်ႈ တႃႇၼႆႉတႄႉ ၸၢမ်သႅင်းတေလဵင်ႉပၼ်လၢႆလၢႆ”
ၼၢင်းမူဝ်ၶၢဝ် ၸင်ႇယၵ်ႉတူၺ်းၸၢမ်သႅင်းသေဝႃႈ-
“ၸၢမ်သႅင်း လဵင်ႉပီႈၸၢႆးမွၼ်းၶိူဝ်းၵူၺ်းႁႃႉ ဢမ်ႇလဵင်ႉပႃး မူဝ်ႁႃႉ?”
“ဢမ်ႇပႃး ဝႃႈတႄႉၵေႃႈ ပႃးၼင်ႇၵၼ်ယဝ်ႉ”
ဝၢႆးၶဝ်ၵိၼ်ၶဝ်ႈယဝ်ႉ ၶဝ်ၶိုၼ်းမႃးၸူးႁိူဝ်းၶဝ်သေ ၵူၼ်းၶဝ်ၵေႃႈ မႃးမီးၼိူဝ်ႁိူဝ်းမူတ်းယဝ်ႉလႄႈ ၶဝ်ၸင်ႇပူၼ်ႉၵႂႃႇ ၼိူဝ်လွႆၼူၵ်ႉယုင်းၶမ်းယဝ်ႉ၊ ၽွင်းမိူဝ်ႈႁိူဝ်းၶဝ် ႁေႃႈဢွၵ်ႇၽၢတ်ႇၽြႃးၽွင်ႇတေႃႇဢူးၼၼ်ႉ ၸွမ်းတၢင်း ၶဝ်မႃးႁၼ်ႁိူဝ်းတၢင်းၼမ်ယဝ်ႉ၊ မိူဝ်ႈ တိုၵ်ႉလဵပ်ႈမႃး ႁိမ်းႁိူဝ်းလမ်းၼိုင်ႈၼၼ်ႉ ၶဝ်သၢမ်ၵေႃႉတိုၵ်ႉႁူမ်ႈၵၼ် ၵူမ်ႈတူၺ်း ၶႅပ်းႁၢင်ႈၽြႃး ဢၼ်သိုဝ်ႉမႃးၸိူဝ်းၼၼ်ႉယူႇလႄႈ လွင်ႈဝႃႈ ၼိူဝ်ႁိူဝ်းၼၼ်ႉ မီးဝႆႉၸၢႆးသႅင်မိူင်းၼႆၵေႃႈ ၶဝ်ဢမ်ႇတၼ်း ႁၼ်သေၵေႃႉ၊ ၸၢႆးသႅင်မိူင်းတႄႉ ၵိုင်ႉၵၢင်ႉလႆႈႁၼ် ၼၢင်းမူဝ်ၶၢဝ် လႄႈ မၼ်းၸူမ်းၵႂႃႇတႄႉတႄႉ။ ၽိူဝ်ႇမၼ်းလႆႈႁၼ်ပႃး ၸၢႆးမွၼ်းၶိူဝ်း ၶဝ်မီးဝႆႉႁိမ်းၼၢင်းမူဝ်ၶၢဝ်ၼႆၸိုင် တၢင်းၸူမ်းသိူဝ်းမၼ်းၼၼ်ႉ ၵိုင်ႉၵၢင်ႉႁၢႆလၢႆၵႂႃႇၵမ်းလဵဝ်သေ ဢဝ်တႃလိပ်းတႃၶဵဝ်ပၵ်းတူၺ်း ၸၢႆးမွၼ်းၶိူဝ်းယူႇ၊ မၼ်းဢမ်ႇႁၢၼ်ႉၸႂ်သေတႃႉ မၼ်းဢမ်ႇၸၢင်ႈ ႁဵတ်းႁိုဝ်။ ႁိူဝ်းၶဝ်ၵေႃႈၽၢတ်ႇၵႆၵႂႃႇယူႇတိၵ်းတိၵ်း၊ ႁိူဝ်းၼၢင်းမူဝ်ၶၢဝ်ၶဝ် သိုပ်ႇႁေႃႈမႃး ၸွမ်းႁွင်ႈဢိၼ်းတဵင်ႇ(ဢၢင်းတိင်ႇ)သေ မႃးၵိုတ်းတီႈ တႃႈႁိူဝ်းဢၢင်းတိင်ႇယဝ်ႉ။ ၶဝ်မႃးဝႄႉဝႆႈၽြႃးဢၢင်းတိင်ႇသေ သိုပ်ႇ ပူၼ်ႉပႆၶိုၼ်ႈမႃး ၼိူဝ်လွႆၼူၵ်ႉယုင်းၶမ်းယဝ်ႉ ၸၢႆးမွၼ်းၶိူဝ်း ၸင်ႇထၢမ်-
“ၼၢင်းမူဝ် ယၢမ်ႈၽႅဝ်လၢႆပွၵ်ႈယဝ်ႉ ၼိူဝ်လွႆၼႆႉ”
“လႆႈၽႅဝ်သွင်ပွၵ်ႈၵူၺ်း ပႃးပွၵ်ႈၼႆႉတႄႉ သၢမ်ပွၵ်ႈယဝ်ႉ၊ ပီႈၸၢႆးမွၼ်းၶိူဝ်းလူး?”
“သၢမ်ပွၵ်ႈပႃးပွၵ်ႈၼႆႉဢိူဝ်ႈ ၼၢင်းၸၢမ်သႅင်းလူး”
“သီႇပွၵ်ႈ ပႃးပွၵ်ႈၼႆႉဢိူဝ်ႈ မိူဝ်ႈပွႆးၸႃႇပၼမၼ်းၸဝ်ႈၼၼ်ႉ ပီႈၸၢႆးမွၼ်းၶိူဝ်း မႃးယူႇဢမ်ႇၸႂ်ႈႁႃႉ?”
“မႃးဢိူဝ်ႈ ၸၢမ်သႅင်းလူး”
“ၸၢမ်သႅင်းၵေႃႈမႃးဢိူဝ်ႈ ၸၢမ်သႅင်းယင်းဢၢပ်ႈၺႃးႁၼ် ပီႈၸၢႆးမွၼ်းၶိူဝ်းယူႇ ၵႅပ်ႉၼိုင်ႈယဝ်ႉ”
“တႄႉႁႃႉ ... ႁၼ်တီႈလႂ်”
“ႁၼ်တီႈလူင်းၶူဝ်လႆ ႁိမ်းၵျွင်းသၢမ်ၸၼ်ႉၼၼ်ႉဢိူဝ်ႈ။ ပီႈၸၢႆးမွၼ်းၶိူဝ်း ၼုင်ႈသိူဝ်ႈၵျိၼ်းဢၼ်သွမ်ႇ လႄႈ ၵူၼ်တႆးသွမ်ႇ လၢင်းၶိူဝ်းၼၼ်ႉ ဢမ်ႇၸႂ်ႈႁႃႉ?”
“ၸႂ်ႈဢိူဝ်ႈ ပီႈၸၢႆးမွၼ်းၶိူဝ်းယင်းဢမ်ႇႁၼ် ၼၢင်းၸၢမ်သႅင်းဢေႉ”
“ႁိုဝ်ႁၼ်လႃႇ ပီႈၸၢႆးမွၼ်းၶိူဝ်း ၵုမ်ႇတူၺ်းသင်ယူႇ ဢမ်ႇႁူႉလႄႇ”
ၼၢင်းမူဝ်ၶၢဝ် ၸင်ႇဝႃႈ-
“ယူဝ်ၶေးၵုမ်ႇတူၺ်း သၢဝ်ပဢူဝ်းယူႇယူဝ်ႉ”
“ဢမ်ႇၸႂ်ႈၵူၺ်း ၵူၼ်းႁႅင်ႉၼမ်ၼႃႇလႄႇ ၸင်ႇဢမ်ႇတၼ်းႁၼ်ယဝ်ႉ ၼၢင်းမူဝ်ၵေႃႈ မႃးယူႇႁႃႉ ဝၼ်းၼၼ်ႉ”
“ႁႃးၸၢမ်သႅင်း မႃးၸွမ်းၵၼ်လူး မူဝ်ၵေႃႈ ႁၼ်ပီႈၸၢႆးမွၼ်းၶိူဝ်းယူႇၵူၺ်း”
“တႄႉႁႃႉ ... ႁဵတ်းသင် သမ်ႉဢမ်ႇလၢတ်ႈတေႃႇလႃႇ”
“ဢူဝ် ... ၸွင်ႇႁဝ်းပႃႈႁူႉၸၵ်းၵၼ်ၵေႃႈဢမ်ႇၸႂ်ႈ”
“ဢမ်ႇႁူႉၸၵ်းၵေႃႈ လၢတ်ႈတေႃႇလႆႈယူႇလူး ဝၼ်းၼၼ်ႉ ပေႃးပီႈၸၢႆးမွၼ်းၶိူဝ်းႁၼ်ၼႆ ပီႈၸၢႆးမွၼ်းၶိူဝ်းဢၢၼ်းလၢတ်ႈတေႃႇ ယူႇၵူၺ်း”
“ဢမ်ႇဝႃႈယူဝ်ႉ”
“တႄႉဢိူဝ်ႈ ... တေႃႈပီႈၼွင်ႉတႆး ၸိူဝ်းဢၼ်လုၵ်ႉတၢင်း ပၢင်လွင်းမႃးၸိူဝ်းၼၼ်ႉ ပီႈၸၢႆးမွၼ်းၶိူဝ်း ယင်းလၢတ်ႈတေႃႇယူႇၵူၺ်း”
“ဢမ်ႇဝႃႈယူဝ်ႉ”
“တႄႉဢိူဝ်ႈ တေႃႈပီႈၼွင်ႉတႆး ဢၼ်လုၵ်တၢင်းပၢင်လွင်း မႃးၸိူဝ်းၼၼ်ႉ ပီႈၸၢႆးမွၼ်းၶိူဝ်းယင်းၵႂႃႇဢုပ်ႇၶဝ် လၢတ်ႈတေႃႇၶဝ်ယူႇ”
ၼၢင်းၸၢမ်သႅင်းၸင်ႇဝႃႈ
“ပီႈၸၢႆးမွၼ်းၶိူဝ်း ႁဵတ်းႁိုဝ်ၵႂႃႇဢုပ်ႇၶဝ် ၵႂႃႇဢုပ်ႇၶဝ် ၵႂၢမ်းမၢဝ်ႇၵႂၢမ်းသၢဝ်တေႃႇၶဝ်ႁႃႉ ၸွင်ႇၶဝ်ၽွမ်ႉႁိုဝ်?”
“ဢူဝ် ... ဢမ်ႇၸႂ်ႈၵူၺ်း ... လႃႈလီဝႃႈ”
“မူဝ် ... ထၢင်ႇတႄႉ ၶႄးၸႂ်ႈယူႇယူဝ်ႉ ပီႈၸၢႆးမွၼ်းၶိူဝ်း”
“ဢမ်ႇၸႂ်ႈၵူၺ်း ... ဢၼ်ၵႂႃႇလၢတ်ႈတေႃႇၼၼ်ႉ ပဵၼ် ၵူၼ်းထဝ်ႈၼင် ... လႆႈငိၼ်းၶဝ်ဢုပ်ႇၵၼ် ၵႂၢမ်းတႆးလႄႈ ၸင်ႇၵႂႃႇ ထၢမ်တူူၺ်း ၶဝ်ယူႇတီႈလႂ်ၼႆယဝ်ႉ”
ၼၢင်းၸၢမ်သႅင်းၸင်ႇဝႃႈ
“ဢေႃႈ ... ပဵၼ်ၵူၼ်းထဝ်ႈႁႃႉ ... ယူဝ်ဝႃႈပဵၼ်သၢဝ်ပၢင်လွင်းၼႆ ဢမ်ႇၸႂ်ႈႁႃႉ?”
“ဢမ်ႇၸႂ်ႈသႄႈ”
ၼၢင်းမူဝ်ၶၢဝ် ၸင်ႇၶိုၼ်းဝႃႈ
“ၶလိူၵ်း ... ပီႈၸၢႆးမွၼ်းၶိူဝ်းလႅၼ်ဢိူဝ်ႈၼၼ်ႉ”
“ဢမ်ႇလႅၼ် ... ဢလူဝ်ႉဢမ်ႇယုမ်ႇႁႃႉ?”
“ဢမ်ႇယုမ်ႇ”
“တႄႉဢိူဝ်ႈၼႆႉ”
“ဢမ်ႇတႄႉ”
“ႁႃႉ ... တၢႆလႃႈ ... ၼႄႈတေႃႇထိုင်ဝၼ်းမိူဝ်ႈၼႆႉ ဢမ်ႇပႆႇႁတ်းလၢတ်ႈတေႃႇ သၢဝ်သေၵေႃႉၵူၺ်း”
“ၼႆႉ မူဝ်ၶႅၼ်းဢမ်ႇယုမ်ႇသေဢိတ်းယဝ်ႉ”
“ၼၢင်းမူဝ် ဢမ်ႇယုမ်ႇႁႃႉ?” “ဢမ်ႇယုမ်ႇ”
“ၼၢင်းၸၢမ်သႅင်းလူး”
“ဢမ်ႇယုမ်ႇ”
“ဢမ်ႇယုမ်ႇတႄႉတႄႉႁႃႉ”
“ဢမ်ႇယုမ်ႇတႄႉတႄႉ”
“ပေႃးဢမ်ႇယုမ်ႇၼႆၵေႃႉ မၵ်းမၢႆပဵၼ်ဢပုမ်ႇဢပုမ်း ဝႅၼ်တူၵ်းယုမ်းပုမ်သွင်ႇ ဝႅၼ်တူၵ်းႁွင်ႇပုမ်သႃး ဝႅၼ်ၶဝ်ႈၼႃးႁၢႆလၢႆသေလႄႈ”
“ဢမ်ႇယုမ်ႇ ဢမ်ႇၸႂ်ႈဢပုမ်ႇ”
“ပေႃးၼႆၵေႃႈထွမ်ႇလႄႈ ... ပီႈၸၢႆးမွၼ်းၶိူဝ်း ၵႂႃႇဢုပ်ႇၶဝ် တႄႉတႄႉယဝ်ႉ သၢဝ်ပၢင်လွင်း ဢၼ်ၵႅမ်ႈၶွင်သွင်းႁွင်းၼၼ်ႉၵေႃႈ ၽွမ်ႉၵမ်းလဵဝ်ယဝ်ႉ ... ၶဝ်ႁွင်ႉမိူဝ်းၸွမ်း ပၢင်လွင်းၵမ်းလဵဝ်သေ ဢူႈမႄႈၶဝ်ၵေႃႈ လႆႈၸႂ်ၵမ်းလဵဝ်ယဝ်ႉ ... ဢမ်ႇယုမ်ႇႁႃႉ?”
ၼၢင်းမူဝ်ၶၢဝ် ၸင်ႇဝႆႁူဝ်သေဝႃႈ “ယုမ်ႇယူႇ”ၼႆယဝ်ႉ၊ ၼၢင်းၸၢမ်သႅင်းတႄႉ ငွၵ်းႁူဝ်သေလၢတ်ႈဝႃႈ“ဢမ်ႇယုမ်ႇ”ၼႆယူႇ၊ ၶဝ်သၢမ်ၵေႃႉ သိုပ်ႇၶိုၼ်ႈလွႆမႃးသေ မႃးပႂ်ႉဝႆႉ တီႈဢၼ်မီးတင်ႇဢုတ်ႇဢွၼ်ႇၼၼ်ႉယဝ်ႉ ... ယူႇၼိူဝ်လွႆၼၼ်ႉသေ ပေႃးမုင်ႈတူၺ်းၵႂႃႇ ၼႂ်းၼွင်ၼႆၸိုင် လႆႈႁၼ်ၼွင်လူင် တၢင်းဢွၵ်ႇတၢင်းတူၵ်း ဢၼ်ၵႂၢင်ႈမီးပဵၼ်သီႇႁႃႈလၵ်း ဢၼ်တၢင်းႁွင်ႇတၢင်းၸၢၼ်း ယၢဝ်းၵႂၢင်ႈမီးပဵၼ်သိပ်းႁႃႈသိပ်းႁူၵ်းလၵ်း ဝၢၼ်ႈဢွၼ်ႇႁိူၼ်းဢွၼ်ႇ ပဵၼ်ယွမ်ႇပဵၼ်ယွမ်ႇ ၶပ်ႉၸပ်းၵၼ်ဝႆႉ ပဵၼ်ဝၢၼ်ႈပဵၼ်ဝၢၼ်ႈသေ ပဵၼ်ဢၼ်လီယဵမ်ႈလီတူၺ်းတႄႉတႄႉ။
ၸၢႆးမွၼ်းၶိူဝ်းၸင်ႇဝႃႈ
“ထႆႇႁၢင်ႈတီႈၼႆႈၶႅမ်ႉဢိူဝ်ႈၼႆႉ ၼႂ်းၼွင်ၵေႃႈ လႆႈပႃးယဝ်ႉ ဢမ်ႇထႆႇႁႃႉ”
“မူဝ်တေထႆႇဢိူဝ်ႈ ပီႈၸၢႆးမွၼ်းၶိူဝ်း တီႈလႂ်တေလီ”
“သုတ်ႉမႃးၸုၵ်းတီႈၼႆႈလႄႈ”
ၸၢႆးမွၼ်းၶိူဝ်းၵေႃႈ ဢဝ်ၵႅမ်ႇမရႃႇမၼ်း ယိူင်းတူၺ်းႁၢင်ႈ ၼၢင်းမူဝ်ၶၢဝ်သေ ထႆႇပၼ်ယဝ်ႉ ... ၼၢင်းၸၢမ်သႅင်းၵေႃႈဝႃႈ
“ၸၢမ်သႅင်းၵေႃႈ တေထႆႇၶႅပ်းၼိုင်ႈ”
“လႆႈယူႇ ... ဢိူဝ်ႈၸုၵ်ႈတီႈၼၼ်ႈလႄႈ ထႆႇယဝ်ႉ ၼိုင်ႈ ... သွင် ... သၢမ်”
“ၶလႅၵ်ႉ...!
ၼၢင်းမူဝ်ၶၢဝ် ၸင်ႇဝႃႈ
“ပီႈၸၢႆးမွၼ်းၶိူဝ်းလႃႇ ဢမ်ႇထႆႇႁႃႉ မႃးလႄႈ မူဝ်ထႆႇပၼ်”
“ထႆႇဢိူဝ်ႈ ... ႁိူဝ်ႈ”
ၼၢင်းမူဝ်ၶၢဝ် ထႆႇပၼ်ၸၢႆးမွၼ်းၶိူဝ်းယဝ်ႉ ၼၢင်းမူဝ်ၶၢဝ် ၸင်ႇဝႃႈ
“ႁဝ်းပႂ်ႉၶဝ် တီႈၼႆႈၵမ်းၼိုင်ႈၵွၼ်ႇၼေႃႈ ဢမ်ႇလီႁႃႉ”
“ပႂ်ႉလႄႈ ... လီယူႇၼႃႇ”
ၶဝ်မႃးၼင်ႈၼိူဝ်တင်ႇဢုတ်ႇၼၼ်ႉသေ မုင်ႈတူၺ်း တၢင်းႁၢင်ႈလီၼႂ်းၼွင်ယူႇ ... ၼၢင်းၸၢမ်သႅင်းၸင်ႇဝႃႈ
“မုင်ႈသႃႇၵျႃႉၼေႃ ... မူဝ်”
“ဢိူဝ်ႈ … မုင်ႈသႃႇတႄႉဢိူဝ်ႈ ... ႁိူဝ်ႉပေႃးႁၢႆၵမ်းလဵဝ်ယဝ်ႉ”
“ပေႃးႁိူဝ်ႉႁၢႆၼႆ ႁွင်ႉၵႂၢမ်းၼႄ ၸၢမ်သႅင်းၶဝ်လႄႈ”
“ၶႂ်ႈထွမ်ႇၵႂၢမ်းသင်”
“ၵႂၢမ်းသင်ၵေႃႈလီယဝ်ႉ”
“ၵႂၢမ်းသင်ၵေႃႈလီၼႆႁႃႉ ... ပေႃးၼႆၵေႃႈထွမ်ႇၵႂၢမ်းၵူၼ်း ဢႃႉလႄႈ မူဝ်တေႁွင်ႉၼႄ”
“ဢူဝ် ... မူဝ်ၼႆႉ ၵူၼ်းဢႃႉၸွင်ႇတေမေႃႁွင်ႉၵႂၢမ်းႁိုဝ်”
“ဢမ်ႇမေႃၼႃး ... ၵွပ်ႈၼႆ မူဝ်ၵေႃႈဢမ်ႇမေႃႁွင်ႉၵႂၢမ်းလႄႈ ၸႂ်ႈႁႂ်ႈပီႈၸၢႆးမွၼ်းၶိူဝ်းႁွင်ႉၼႄလႄႈ”
“ပီႈၸၢႆးမွၼ်းၶိူဝ်း ႁွင်ႉၵႂၢမ်းၼႄၸၢမ်သႅင်းၶဝ် ပုၵ်ႈၼိုင်ႈလႄႈ ”
“သဵင်ဢမ်ႇလီ ... ပေႃးၶႂ်ႈထွမ်ႇၼႆ မီးၵႅတ်ႉသႅတ်ႉဢွၼ်ႇ ယူႇလူး”
“မီးတႄႉႁႃႉ”
ၸၢႆးမွၼ်းၶိူဝ်းၵေႃႈ ဢဝ်ၸၢၵ်ႈၵႂၢမ်းဢွၼ်ႇ ၼႂ်းထူင်ႇမၼ်း ဢွၵ်ႇမႃးသေ မႃးၽုၺ်ႇတူၺ်းယဝ်ႉ၊ မၼ်းၸင်ႇဢဝ်ဢၼ်ထွမ်ႇႁူ ထွမ်ႇၸၢမ်းတူၺ်းသေ ၼၢင်းမူဝ်ၶၢဝ်ၸင်ႇဝႃႈ
“ဢဝ်မႃးလႄႈ ပီႈၸၢႆးမွၼ်းၶိူဝ်း မူဝ်တေထွမ်ႇတူၺ်း ဢွၼ်တၢင်း”
ၼၢင်းၸၢမ်သႅင်းၵေႃႈဝႃႈ
“ႁိုဝ်ႉ ... ၸၢမ်သႅင်းယွၼ်းဝႆႉ ဢွၼ်တၢင်းလူင်”
“ႁႆး ... ယွၼ်းမိူဝ်ႈလႂ်”
“ပေႃးၼႆၵေႃႈ ႁႃးၶီႈၶင်ၶေႃႉ ၵၼ်ၽႂ်ပေႉၵေႃႈမၼ်းလႆႈ ထွမ်ႇဢွၼ်တၢင်း” (ၶီႈၶၢင်ႉၶေႃႉၵၼ် သႃႉၵၼ် သၢင်ႇၶူၺ်ႉသီႉၵၼ်ၼႆ ၵေႃႈဝႃႈ လၢႆးမၼ်းၸမ်ႉ ... ပေႃးဝႃႈဢဝ်ၼိဝ်ႉၸီႉဢွၵ်ႇၼိဝ်ႉလဵဝ်ၼႆ ႁွင်ႉဝႃႈ“လဵၵ်းၸီး”။ ပေႃးဝႃႈ ဢဝ်မိုဝ်းတင်းၽႃႇ ႁဵတ်းၸိူင်ႉၼင်ႇ ၽႃႉတုင်းၼၼ်ႉၼႆ ႁွင်ႉဝႃႈ“ၽႃႉ”။ ပေႃးဝႃႈ ဢဝ်မိုဝ်းႁဵတ်းၸိူင်ႉ ၼင်ႇၵိမ်းပူ ႁဵတ်းၸိူင်ႉၼင်ႇမိုဝ်းၵူၼ်းတုတ်ႈၼၼ်ႉ ၼႆၸိုင် ႁွင်ႉဝႃႈ “ၵိမ်းပူ”။ ၼႂ်းၶဝ်သၢမ်ဢၼ်ၼႆႉ လဵၵ်းၸီးပႄႉၽႃႉ ... ၽႃႉပႄႉပူ ပူပႄႉလဵၵ်းၸီးၼႆယဝ်ႉ)
ၼၢင်းၸၢမ်သႅင်းၵေႃႈ ၸင်ႇၽွမ်ႉသေဝႃႈ
“ဢိူဝ်ႈ ... လီယဝ်ႉ ... ၼိူင်ႈ ... သွင် ... သၢမ်”
ၶႃသွင်ၵေႃႉ ႁူမ်ႈၵၼ်ဢၢၼ်ႇၼိုင်ႈသွင်သၢမ်ၼႆသေ ၼၢင်းၸၢမ်သႅင်းဢဝ်မိုဝ်းမၼ်း ႁဵတ်းၵိမ်းပူ ၼၢင်းမူဝ်ၶၢဝ်သမ်ႉၽႃႉလႄႈ ၼၢင်းမူဝ်ၶၢဝ်ပႄႉၵႂႃႇယဝ်ႉ ... မၼ်းၼၢင်းၸင်ႇၸူမ်းသေ
“ဢလႄး ... မူဝ်ပႄႉယဝ်ႉ ... ဢဝ်မႃးလႄႈ ပီႈၸၢႆးမွၼ်းၶိူဝ်း မူဝ်လူဝ်ႇလႆႇထွမ်ႇဢွၼ်တၢင်းယဝ်ႉ”
ၼၢင်းမူဝ်ၶၢဝ်ၵေႃႈ ဢဝ်ၸၢၵ်ႈလႄႈ ဢွမ်ထွမ်ႇႁူၼၼ်ႉ မႃးသုပ်းသႂ်ႇ ႁူမၼ်းသွင်ၽၢႆႇယူႇ ... ၵႂၢမ်းဢၼ်မၼ်းတိုၵ်ႉထွမ်ႇယူႇၼၼ်ႉတႄႉ ပဵၼ်ၵႂၢမ်းဢၼ်ဝႃႈ“လိူဝ်သေၸၢႆးဢမ်ႇႁၵ်ႉၽႂ်”ၼႆၼၼ်ႉယူႇ ပဵၼ်ၵႂၢမ်း ဢၼ်မၼ်းလႆႈဝႆႉလႄႈ မၼ်းၼၢင်းႁွင်ႉမေႃၸွမ်းယူႇ ၵူႈၶေႃႈ တေႃႇပေႃးသုတ်းယဝ်ႉ
“ လိူဝ်သေၸၢႆး ... လိူဝ်သေၸၢႆး ... လိူဝ်သေၸၢႆး ...ဢမ်ႇ ႁၵ်ႉၽႂ် ... ဢမ်ႇႁၵ်ႉၽႂ် ... ဢမ်ႇႁၵ်ႉၽႂ် ... ၼၢင်းဢမ်ႇႁၵ်ႉၽႂ် …”
ဝၢႆးသေၼၼ်ႉ ၼၢင်းၸၢမ်သႅင်း ၸင်ႇဝႃႈ
“မူဝ်… ပၼ်ၸၢမ်သႅင်းထွမ်ႇၽွင်ႈလေႃႇ”
ၼၢင်းမူဝ်ၶၢဝ်ၵေႃႈ ၶိုၼ်ႈဢဝ်ပၼ်ၼၢင်းၸၢမ်သႅင်းထွမ်ႇယဝ်ႉ ယူႇၵမ်းၼိုင်ႈ ... ၼၢင်းမူဝ်ၶၢဝ် ၶိုၼ်းယွၼ်းဢဝ်ထွမ်ႇထႅင်ႈယဝ်ႉ။
“ၸၢမ်သႅင်း ... ပၼ်မူဝ်ထွမ်ႇထႅင်ႈၵမ်းၼိုင်ႈလႄႈ”
“ၵမ်ႉလေႃႇ ... မူဝ်ၵေႃႈ”
ၸၢႆးမွၼ်းၶိူဝ်း ၸင်ႇဝႃႈ
“ပေႃးၸၼ် ဢၼ်ထွမ်ႇႁူမၼ်းဢွၵ်ႇၼႆ မၼ်းၶိုၼ်းမႃး မေႃးၽၢႆႇလင်မၼ်းယူႇ ... ၸၼ်ဢွၵ်ႇလႄႈ ... ႁဝ်းၸင်ႇလႆႈထွမ်ႇ ၵူႈၵေႃႉဢိူဝ်ႈ”
ပေႃးဝႃႈၼၢင်းၸၢမ်သႅင်း ၸၼ်ဢွၵ်ႇၵေႃႈ ၶဝ်လႆႈထွမ်ႇ ၼင်ႇၵၼ်ၵူႈၵေႃႉယဝ်ႉ။
ယူႇၵမ်းၼိုင်ႈၵူၼ်းလူင်ၶဝ်ၸိူဝ်းၼၼ်ႉ ဢွၼ်ၵၼ်ၶိုၼ်း ၽႅဝ်မႃးတီႈၶဝ်ယဝ်ႉ၊ ဢူႈၼၢင်းမူဝ်ၶၢဝ်ၶဝ် ဢဝ်ၽႃႈၸဵတ်ႈ ၸဵတ်ႉႁိူဝ်ႇတီႈၼႃႈၽၢၵ်ႇမၼ်းသေ ထူၺ်ႈၸႂ်လူင် ဢဝ်လူမ်းတိုင်ႈဢွၵ်ႇ တင်းသူပ်း
“ႁူး ... ႁိူဝ်ႉၼႃႇတႄႉ ... သူသၢမ်ၵေႃႉ ၽႅဝ်မႃးတၢင်းႁိုင် ယဝ်ႉႁႃႉ”
“ဢမ်ႇပႆႇပေႃးႁိုင်ၼင်ႇၵဝ်ႇ ႁိူဝ်ႉတိုၵ်ႉႁႃႁၢႆၵႂႃႇၵူၺ်းဢေႃႈ ပေႃႈႁဝ်း ဢမ်ႇမႃးၼင်ႈလိုဝ်ႈႁိူဝ်ႉၵွၼ်ႇၶႃႈလႃႇ”
ၼၢင်းမူဝ်ၶၢဝ်ၶၢႆႉပၼ်တီႈယူႇယဝ်ႉ လုင်းၸိုၼ်ႈ ၸင်ႇပွႆႇ တူဝ်မၼ်းၼင်ႈသႂ်ႇၼိူဝ်တင်ႇၼၼ်ႉသေ
“ဢလူဝ်ႉ ... ႁူႉ ... ႁိူဝ်ႉဝႃႈႁိူဝ်ႉ”
ၼၢင်းမူဝ်ၶၢဝ် ၶိုၼ်းမႃးၼင်ႈႁိမ်းဢူႈၶဝ်သေ လၢတ်ႈဝႃႈ
“ပီႈၸၢႆးမွၼ်းၶိူဝ်း ... ထႆႇပၼ်ၶႅပ်းႁၢင်ႈ တီႈၼႆႈ ၶႅပ်းၼိုင်ႈ လႄႈ”
“လႆႈယူႇ”
လုင်းၸိုၼ်ႈၸင်ႇဝႃႈ
“ႁႃ ... ၸၢႆးမွၼ်းၶိူဝ်းပႃးၵႅမ်ႇမရႃႇမႃးၼႆႉ သၢင်ႇထုၵ်ႇဢိူဝ်ႈၼႆႉ ထႆႇလႄႈ”
ၸၢႆးမွၼ်းၶိူဝ်းၵေႃႈ ထႆႇႁၢင်ႈပၼ် လုင်ႈၸိုၼ်ႈၶႃႈပေႃႈလုၵ်ႈ ဢၼ်ၼင်ႈလိုဝ်ႈႁိူဝ်ႉၼၼ်ႉယူႇ ... လိူဝ်သေၼၼ်ႉ ၸိူဝ်းဢၼ် ၶဝ်မႃးၸွမ်းၵၼ် ၸိူဝ်းဢၼ်ၶႂ်ႈထႆႇၼၼ်ႉၵေႃႈ မၼ်းထႆႇပၼ်ၵူႈၵေႃႉယဝ်ႉ။ ၶဝ်လုၵ်ႉတီႈၼၼ်ႈသေ ၶိုၼ်းသိုပ်ႇၶိုၼ်ႈမႃးတေႃႇထိုင် ၸိၵ်းလွႆယဝ်ႉ၊ ၶဝ်မႃးဝႆႉၶူဝ်း တီႈၵျွင်းလူင်သၢမ်ၸၼ်ႉ တီႈၸၼ်ႉၵၢင်လိုဝ်ႈႁိူဝ်ႉလိုဝ်ႈၸႂ်ၶဝ်ယူႇ ၼၢင်းၸၢမ်သႅင်း ၸင်ႇဝႃႈ-
“မူဝ် ... ၵႂႃႇႁဝ်းၵႂႃႇဢႅဝ်တူၺ်းၵူႈတီႈတီႈ”
“ၵႂႃႇလႄႈ”
ၶႃသွင်ၵေႃႉ ၸူဝ်းၵၼ်ၶိုၼ်ႈမႃးဝႆႈၽြႃး တီႈၵွင်းမူးသေ ပၼ်ႇလဵပ်ႈၵွင်းမူးယူႇ၊ တီႈၸဵင်ႇႁွင်ႇဝၼ်းတူၵ်းၵွင်းမူးၼၼ်ႉ ၶႃလႆႈႁၼ် ၸၢႆးမွၼ်းၶိူဝ်းၵေႃႉလဵဝ် တိုၵ်ႉဢဝ်ဢၼ်ထွမ်ႇႁူၼၼ်ႉ သႂ်ႇဝႆႉ တီႈႁူမၼ်းထွမ်ႇၵႂၢမ်းသေ မုင်ႈတူၺ်းၽၢႆႇတူၵ်းလွႆယူႇ...
မၼ်းပဵၼ်ဢၼ်သိူဝ်းၸႂ်ၼႃႇလႄႈ မၼ်းလွမ်လွမ်ဝတ်ႉၵႂၢမ်း ၸွမ်းၸၢၵ်ႈမၼ်းယူႇ ... ၵႂၢမ်းဢၼ်မၼ်းႁွင်ႉၸွမ်းၼၼ်ႉတႄႉ ပဵၼ်ၵႂၢမ်းၸၢႆးသၢႆမၢဝ်း ပုၵ်ႈၼိုင်ႈ ဢၼ်ၸိုဝ်ႈဝႃႈ“ပီႈၽၢၵ်ႇႁူဝ်ၸႂ်” ၼႆၼၼ်ႉယူႇ။
မၼ်းၸၢႆးၸၼ်သဵင်သေ ႁွင်ႉၸွမ်းတေႃႇပေႃးသုတ်းယဝ်ႉ၊ လွင်ႈဝႃႈ ၼၢင်းမူဝ်ၶၢဝ်လႄႈ ၼၢင်းၸၢမ်သႅင်း ၽႅဝ်မႃး ၽၢႆႇလင်မၼ်းသေ လွမ်လွမ်မႃးထွမ်ႇမၼ်းယူႇၼၼ်ႉ မၼ်းၸၢႆးဢမ်ႇႁူႉထိုင် ပေႃးဝႃႈ မၼ်းၸၢႆးႁွင်ႉမေႃသုတ်းယဝ်ႉၼႆ ၼၢင်းမူဝ်ၶၢဝ် လႄႈ ၼၢင်းၸၢမ်သႅင်း ယုမ်ႉၶူဝ်သေ တူပ်းမိုဝ်းပၼ်မၼ်းယူႇယဝ်ႉ၊ လႆႈငိၼ်းသဵင်တူပ်းမိုဝ်းလႄႈ မၼ်းၸၢႆးတူၵ်းၸႂ်ၵႂႃႇလႄႈ မၼ်းၸင်ႇ ၼႅတ်ႈပူတ်း ဢၼ်ထွမ်ႇႁူမၼ်းၽႂ်းၽႂ်းသေ ဝၢႆႇတူၺ်းတၢင်းလင်ယဝ်ႉ ၼၢင်းမူဝ်ၶၢဝ် ၸင်ႇဝႃႈ-
“ၶိၵ်း ... ၶိၵ်း ... မူဝ်ၶဝ်ယူဝ်ဝႃႈ ၸၢႆးသၢႆမၢဝ်းၽႅဝ်မႃးသေ မႃးႁွင်ႉၵႂၢမ်းၼႆၼႃး ... ႁႃးတႄႉ ပဵၼ်ပီႈၸၢႆးမွၼ်းၶိူဝ်း မႃးဝတ်ႉၵႂၢမ်း ၽၢၵ်ႇႁူဝ်ၸႂ်ယူႇၵေႃႉလဵဝ် ... ၶိၵ်းၶိၵ်း”
ၼၢင်းၸၢမ်သႅင်းၵေႃႈ ၸင်ႇဝႃႈ
“ၽၢၵ်ႇၵႂႃႇၸူးသၢဝ်ပၢင်လွင်း မိူဝ်ႈၽွင်းႁၼ်ၵၼ် တီႈၼိူဝ်လွႆၼႆႉၼၼ်ႉယူဝ်ႉ ... ၶိၵ်း ၶိၵ်း”
ၸၢႆးမွၼ်းၶိူဝ်းၼႃႈမႆႈၵႂႃႇသေ မၼ်းၸၢႆးၸင်ႇဝႃႈ
“သူၽႅဝ်မႃးႁိုင်ယဝ်ႉႁႃႉ”
“မူဝ်ၶဝ်ၽႅဝ်မႃး ... လႆႈမႃးတေငိၼ်း ပီႈၸၢႆးမွၼ်းၶိူဝ်း ႁွင်ႉၵႂၢမ်း“ပီႈၽၢၵ်ႇႁူဝ်ၸႂ်”ၼၼ်ႉ ၸဵမ်မိူဝ်ႈတႄႇႁွင်ႉတေႃႇပေႃး သုတ်းယဝ်ႉ၊ သဵင်ပီႈၸၢႆးမွၼ်းၶိူဝ်း ယင်းၶႂ်ႈၶႅမ်ႉသေ ၸၢႆးသၢႆမၢဝ်း ၵွၼ်ႇယဝ်ႉ”
“တႄႉႁႃႉ ... ပေႃးၼႆ ႁဵတ်းၵိၼ်ၵူၼ်းႁွင်ႉၵႂၢမ်း တေလႆႈယူႇယဝ်ႉ”
“လႆႈၼႅၼ်ႇယဝ်ႉ”
ၼၢင်းၸၢမ်သႅင်းၵေႃႈဝႃႈ
“လႆႈတေႉဢိူဝ်ႈ ... ပီႈၸၢႆးမွၼ်းၶိူဝ်း”
“ယူဝ်ၶႄး ... တေလႆႈမၢၵ်ႇဢုတ်ႇၼမ်ၼမ်ၵူၺ်းယူဝ်ႉ”
ၼၢင်းမူဝ်ၶၢဝ်ၸင်ႇဝႃႈ
“ဢေႃႈ ... ၸၢမ်သႅင်း ႁဝ်းထႆႇၶႅပ်းႁၢင်ႈၵိုၵ်းၵွင်းမူးၼႆႉ ၸွမ်းၵၼ်ၼေႃႈ”
“ဢိူဝ်ႈ ... ထႆႇလႄႈ ... ဢမ်ႇလၢႆႈၶူဝ်းသင်ယဝ်ႉႁႃႉ?”
“တႄႉဢိူဝ်ႈၼေႃ ... ပေႃႈၼႆ ပီႈၸၢႆးမွၼ်းၶိူဝ်း ပႂ်ႉဝႆႉၵႅပ်ႉ ၼိုင်ႈၼႃႈ ... မူဝ်ၶဝ်တေၵႂႃႇလၢႆႈၶူဝ်းၵွၼ်ႇ”
“လႆႈယူႇ”
ၼၢင်းမူဝ်ၶၢဝ်ၶႃသွင်ၵေႃႉၵေႃႈ လူင်းၵႂႃႇလၢႆႈၶူဝ်းသေ ၵႂႃႇသင်ႇလၢတ်ႈဝႃႈ ပေႃးၵူၼ်းမႃးၸေးၵၼ် ႁႂ်ႈမႃးထႆႇၶႅပ်းႁၢင်ႈႁူမ်ႈၵၼ် တီႈၼိူဝ်ဝၢင်းၵွင်းမူးၼႆႉ ၼႆယဝ်ႉ၊ ၶႃသွင်ၵေႃႉ လၢႆႈၶူဝ်းယဝ်ႉသေ ၶိုၼ်းမႃးၸူး ၸၢႆးမွၼ်းၶိူဝ်းယဝ်ႉ ... ၼၢင်းမူဝ်ၶၢဝ်ၸင်ႇထၢမ်-
“တီႈလႂ်တေလီ ... ပီႈၸၢႆးမွၼ်းၶိူဝ်း”
“မႃးတီႈၶူဝ်လႆၼႆႉလႄႈ ... တေလႆႈႁၼ်ပႃးၵွင်းမူးဢိူဝ်ႈ”
ၶႃသွင်ၵေႃႉ မႃးၼင်ႈဢဝ်တီႈယူႇသေ ထႆႇဢဝ်ၶႅပ်းႁၢင်ႈယူႇ လိူဝ်သေၼၼ်ႉ ၶႃၶိုၼ်းထႆႇဢဝ်ၵေႃႉလဵဝ် ... ၼၢင်းမူဝ်ၶၢဝ်ၵေႃႈ မႄးလၢႆႈၶူဝ်းၸုမ်ႇၼိုင်ႈယဝ်ႉၸုမ်ႇၼိုင်ႈသေ ၵႂႃႇထႆႇတီႈၼိုင်ႈယဝ်ႉ တီႈၼိုင်ႈယူႇ။ ၼႂ်းတႃၸၢႆးမွၼ်းၶိူဝ်းတႄႉ လႆႈႁၼ်ၼၢင်းမူဝ်ၶၢဝ် လၢႆႈၶူဝ်း ဢၼ်လႂ်ၵေႃႈ တိုၼ်းႁၢင်ႈလီဝႆႉယူႇ ၵူႈၵမ်းယဝ်ႉ၊ ႁၢင်ႈၽၢင်ဢွၼ်ႇမၼ်းၼၢင်း ဢၼ်မိူၼ်ၸိူင်ႉ မွၵ်ႇၵီႈမႂ်ႇၼၼ်ႉ ဢမ်ႇပေႃးတႅမ်ႇ ဢမ်ႇပေႃးသုင် ဢမ်ႇပေႃးပီး ဢမ်ႇပေႃးယွမ် တူဝ်ၶိင်း မၼ်းၼၢင်းၼၼ်ႉ ယွၼ်ႉပိူဝ်ႈဢႅင်ႈၶႅဝ်ႉဢွၼ်ႇမၼ်းၼၢင်း မႃးတတ်းတွၼ်ႈပၼ်လႄႈ ပဵၼ်ဢၼ်လီယဵမ်ႈလီတူၺ်းတႄႉတႄႉ။
ၼႃႈဢွၼ်ႇမၼ်းၼၢင်းၵေႃႈ ပဵၼ်ၼႃႈမွၵ်ႇၼႃႈႁၢင်ႈလီ ၼႃႈလီႁၵ်ႉဝႆႉယဝ်ႉ။ မၢၵ်ႇတႃလမ်ဢွၼ်ႇမၼ်းၼၢင်းၵေႃႈ မီးႁႅင်း ၸၼ်ၸႂ်ပိူၼ်ႈတႄႉတႄႉ၊ ၶူၼ်တႃမွင်ႇဢွၼ်ႇမၼ်းၼၢင်းၵေႃႈ ဢမ်ႇၸိုဝ်ႈလႄႈဝႃႈထူၺ်ႈပဵၼ်ဢဝ် ... တိုၼ်းပဵၼ်လူၺ်ႈၵူႉသူဝ်ႇၵၢမ်ႇ မၼ်းၼၢင်းၽၢၼ်ႇပဵၼ်လႄႈ မွင်ႉၵွင်ႉငွင်ႈ ငၢႆးမိူၼ်လိူၼ်လွင်ႈလပ်းယဝ်ႉသေ ၶိုၼ်းမႂ်ႇသၢမ်ဝၼ်းၼၼ်ႉယဝ်ႉ၊ ၶူႈၼင်မၼ်းၼၢင်းၵေႃႈ ဢမ်ႇၽႅပ်ႉဢမ်ႇၵုင်း သီႇသူပ်းမၼ်းၼၢင်းၵေႃႈ ဢမ်ႇၼႃဢမ်ႇမၢင် တိုၵ်ႉပဵၼ် ဢၼ်ႁၢင်ႈလီသေဢမ်ႇၵႃး ၵႅမ်ႈဢွၼ်ႇမၼ်းၼၢင်းၵေႃႈ လွၵ်းလႆႈႁၢင်ႈလီတႄႉတႄႉ။
မၢင်ပွၵ်ႈမၢင်လႂ် ပေႃးဝႃႈ မၼ်းၼၢင်းယုမ်ႉၶူဝ်သေ ငႅၼ်ႈမႃး ၼႆၸိုင် ၶဵဝ်ႈၶၢဝ်ၶၢဝ်ဢွၼ်ႇမၼ်းၼၢင်း ပေႃးမိူၼ်ၼင်ႇ ပိူၼ်ႈဢဝ်သႅင်ပလႄးၶပ်ႉၽဵင်ႇယႆၵၼ်ဝႆႉယဝ်ႉ၊ ၶူၼ်ႁူဝ်မၼ်းၼၢင်းၵေႃႈဢမ်ႇ ဝႆႉပွတ်းမိူၼ်ၸိူင်ႉၼင်ႇပိူၼ်ႈ ၶူၼ်ႁူဝ်မၼ်းၼၢင်း လမ်လိူမ်ႈလီဝႆႉသေ ယၢဝ်းယွၼ်ႇလူင်းပူၼ်ႉဢႅင်ႈမၼ်းၼၢင်းယူႇ ယွၼ်ႉပိူဝ်ႈ တၢင်းႁၢင်ႈလီ ၵၢင်းလွတ်ႈတၢင်းၶီဢွၼ်ႇမၼ်းၼၢင်းလႄႈ ၽွင်းမိူဝ်ႈ ထႆႇႁၢင်ႈၼၼ်ႉ ၸၢႆးမွၼ်းၶိူဝ်းၵုမ်ႇလၵ်ႉလွမ်တူၺ်းမၼ်း ၼၢင်းယူႇ ... မၢင်ၵမ်းမၢင်ၵမ်း မၼ်းပေႃးဢၢင်ႈလိုမ်းၼဵၵ်းၼဵၼ် ဢၼ်ထႆႇ ႁၢင်ႈမၼ်းၼၼ်ႉယဝ်ႉ။
ၼၢင်းၸၢမ်သႅင်းၵေႃႈ တေႃႈပဵၼ်ၼၢင်းယိင်းႁၢင်ႈလီၵေႃႉ ၼိုင်ႈၼင်ႇၵဝ်ႇ ... ၵူၺ်းၵႃႈ ၼႂ်းတႃၸၢႆးမွၼ်းၶိူဝ်းတႄႉ မၵ်းမၼ်ႈဝႃႈ ၼၢင်းမူဝ်ၶၢဝ်ႁၢင်ႈလီသေ ၼၢင်းၸၢမ်သႅင်းယူႇၼႆယဝ်ႉ၊ ဝၢႆးသေ ၶဝ်ႁူမ်ႈၵၼ်ထႆႇႁၢင်ႈယဝ်ႉ ပိူၼ်ႈမႃးႁွင်ႉၶဝ်ၵႂႃႇၵိၼ် ၶဝ်ႈၶမ်ႈလႄႈ ၶဝ်ၵေႃႈၵႂႃႇၵိၼ်ၶဝ်ႈႁူမ်ႈၵၼ်ယဝ်ႉ ... ၼၢင်းမူဝ်ၶၢဝ်ၸင်ႇဝႃႈ
“မိူဝ်ႈၸဝ်ႈသြႃႇလွႆၼူၵ်ႉယုင်း တိုၵ်ႉမီးၼၼ်ႉၵေႃႈ ၶဝ် တိုၼ်းလဵင်ႉၶဝ်ႈ ႁဵတ်းၼႆတႃႇသေႇဢိူဝ်ႈၼေႃ”
ၼၢင်းၸၢမ်းသႅင်းၸင်ႇတွပ်ႇဝႃႈ
“ၸႂ်ႈဢိူဝ်ႈ ... တိုၼ်းလဵင်ႉတႃႇသေႇယဝ်ႉ ပဵၼ်လူၺ်ႈ ၽုင်းၵၢမ်ႇပႃႇရမီႇမၼ်းၸဝ်ႈဢိူဝ်ႈ ... မိူဝ်ႈပွႆးသၢင်းၵျူဝ်ႇမၼ်းၸဝ်ႈၼၼ်ႉၵေႃႈ ၵူၼ်းၵိုၼ်းၵူၼ်းၼမ်ပေႃးမီးသႅၼ်ပၢႆ တေႃႈယင်း လဵင်ႉလႆႈသဵင်ႈသဵင်ႈၵွၼ်ႇယဝ်ႉ”
“မူဝ်လႆႈႁူႉတႄႉ ၸိုင်ဝႃႈဢူႈမၼ်ႈၸဝ်ႈပဵၼ်တႆး မႄႈ မၼ်းၸဝ်ႈပဵၼ်ပဢူဝ်းၼႆၸွင်ႇၸႂ်ႈႁိုဝ် ပီႈၸၢႆးမွၼ်းၶိူဝ်း”
“ၸႂ်ႈဢိူဝ်ႈ ... ၼႂ်းပိုၼ်းမၼ်းၸဝ်ႈၵေႃႈတႅမ်ႈဝႆႉယူႇလူး” ၼၢင်းၸၢမ်သႅင်းၸင်ႇတွပ်ႇဝႃႈ
“ၸိုဝ်ႈသဵင်မၼ်းၸဝ်ႈၵေႃႈ ဢမ်ႇငၢႆႈငၢႆႈၼင်ႇၵဝ်ႇ ၼႂ်းမိူင်းမၢၼ်ႈၼႆႉ လႆႈဝႃႈ ၸွတ်ႇၵူႈတီႈၼင်ႇၵဝ်ႇဢိူဝ်ႈၼေႃ”
“ၸႂ်ႈဢိူဝ်ႈ ... မိူဝ်ႈပွႆးၸႃႇပၼမၼ်းၸဝ်ႈၼၼ်ႉ ၵူၼ်းၵူႈ တီႈတီႈၵေႃႈ မႃးၼမ်ဝႆႉၼင်ႇၵဝ်ႇဢိူဝ်ႈ၊ ပီႈၸၢႆးမွၼ်းၶိူဝ်း ယင်းၺႃးၵူၼ်း ၵဵင်းတုင်သေထၢမ်တူၺ်း ၶဝ်လႆႈပၼ်ၵႃႈႁိူဝ်းမိၼ်ဢၢၼ်ႇႁဵင်မၼ်းသေ မႃးႁႂ်ႈၶိုတ်းပွႆးၸႃႇပၼမၼ်းၸဝ်ႈၼႆယဝ်ႉ၊ လိူဝ်သေၼၼ်ႉ ၵူၼ်းဝဵင်းလိူဝ်ႇ တႃႈၵုင်ႈ ၸိူဝ်းၼႆႉၵေႃႈ မႃးၶဝ်ႈပွႆးမၼ်းၸဝ်ႈၵွၼ်ႇဢိူဝ်ႈ”
ၼၢင်းမူဝ်ၶၢဝ် ၸင်ႇယွၵ်ႇၸၢႆးမွၼ်းၶိူဝ်း
“ၵူၼ်းပၢင်လွင်းၵေႃႈ မႃးၼမ်ၵျႃႉဢမ်ႇၸႂ်ႈႁႃႉ”
ၶဝ်သၢမ်ၵေႃႉ ဢွၼ်ၵၼ်ယုမ်ႉတူၺ်းၼႃႈၵၼ်သေ သိုပ်ႇၵိၼ်ၶဝ်ႈယူႇ ဝၢႆးသေၵိၼ်ၶဝ်ႈယဝ်ႉ ၶဝ်ဢွၼ်ၵၼ်ပွၵ်ႈမႃးၸူး တီႈၼွၼ်းၽႂ်မၼ်းသေ မၢင်ၸိူဝ်းၵေႃႈလိုဝ်ႈႁိူဝ်ႉလိုဝ်ႈၸႂ် ၼွၼ်းၵမ်းလဵဝ်ယဝ်ႉ။
ၶဝ်သၢမ်ၵေႃႉတႄႉ မႃးယူႇတီႈၽၢႆႇဢွၵ်ႇၵွင်းမူး တီႈၼိူဝ် ဝၢင်းၵွင်းမူးသေ မုင်ႈတူၺ်းၼႂ်းၼွင်ယူႇ ၵၢင်ဝၼ်းၵေႃႈ လပ်ႉလွႆၵႂႃႇ ယဝ်ႉလႄႈ ၶဝ်လႆႈႁၼ်ၼႂ်းၼွင် တႆႈၾႆးလႅင်းဝႆႉ ပဵၼ်တီႈပဵၼ်တီႈ မိူၼ်လၢဝ်လႅင်းဢွၼ်ႇဝႆႉၼၼ်ႉယူႇ ... ၸၢႆးမွၼ်းၶိူဝ်းၸင်ႇထၢမ်ဝႃႈ
“ၼၢင်းမူဝ်”
“ဢီႈသင် ... ပီႈၸၢႆးမွၼ်းၶိူဝ်း”
“ပီႈၸၢႆးမွၼ်းၶိူဝ်းၶႂ်ႈထၢမ် ၼၢင်းမူဝ်မဵဝ်းၼိုင်ႈဢိူဝ်ႈ”
“ထၢမ်လႄႈ”
“ၸိုဝ်ႈၼၢင်းမူဝ်တဵမ်တဵမ်ထူၼ်ႈထူၼ်ႈ ႁွင်ႉဝႃႈႁိုဝ်”
“ဝႃႈၼၢင်းမူဝ်ၶၢဝ်ၼႆဝႃႇ”
“ဢေႃႈ ... ၼၢင်းမူဝ်ၶၢဝ်ၼႆႁႃႉ”
“ၸိုဝ်ႈ ပီႈၸၢႆးမွၼ်းၶိူဝ်းလူး”
“ၸၢႆးမွၼ်းၶိူဝ်း မိူင်းၶွၼ်းဝႃႇ”
“လႃႈလီဝႃႈ”
“တႄႉဢိူဝ်ႈ ... ၼၢင်းမူဝ်ၶၢဝ်”
“ဢူဝ် ... ယႃႇပေႁွင်ႉဝႃႈၼၼ်လေႃႇ ၼၢင်းၼႆႉဢမ်ႇသႂ်ႇ ၵေႃႈလႆႈယဝ်ႉ ႁွင်ႉဝႃႈမူဝ်ၶၢဝ်ၼႆၵေႃႈ လႆႈယူႇလူး ပီႈၸၢႆးမွၼ်းၶိူဝ်း”
“ဢေႃႈ ... ႁွင်ႉဝႃႈမူဝ်ၶၢဝ်ၼႆႁႃႉ ... ပေႃးၼႆၼၢင်းၸၢမ်သႅင်းၼၼ်ႉၵေႃႈ လူဝ်ႇလႆႈႁွင်ႉဝႃႈ ၸၢမ်သႅင်းၼႆၵူၺ်းၼႃ”
“ႁွင်ႉလႆႈယူႇ ... ပေႃးၼႆၸၢမ်သႅင်းၶဝ်ၵေႃႈ တေလႅၵ်ႈလၢႆႈႁွင်ႉၸိုဝ်ႈပီႈၸၢႆးမွၼ်းၶိူဝ်းဢိူဝ်ႈ ... တေလႆႈႁွင်ႉဝႃႈႁိုဝ်လႃႇ”
ၼၢင်းမူဝ်ၶၢဝ်ၸင်ႇဝႃႈ
“ႁွင်ႉဝႃႈ ... ပီႈၸၢႆးၶိူဝ်းၼႆႁိုဝ်ႉ ၸၢမ်သႅင်း”
“ႁွင်ႉငၢႆႈယူႇလႄႈ ... ပီႈၸၢႆးၶိူဝ်းၼႆၶႅမ်ႉယူႇ”
“ပီႈၸၢႆးမွၼ်းၶိူဝ်း ... မူဝ်ၶဝ်တေႁွင်ႉဝႃႈ ပီႈၸၢႆးၶိူဝ်းၼႆ ၵူၺ်းယဝ်ႉၼႃ”
“လႆႈယူႇ ... ၶႂ်ႈႁွင်ႉၸိူင်ႉႁိုဝ်ၵေႃႈ ဢမ်ႇပဵၼ်သင်”
လူမ်းဢွၼ်ႇထွင်းပဝ်ႇမႃးလႄႈ ပဵၼ်ဢၼ်ၵတ်းမႃး တၢၼ်ႇတၢၼ်ႇယဝ်ႉ ၼၢင်းၸၢမ်သႅင်းၸင်ႇဝႃႈ
“ၵတ်းမႃးယဝ်ႉၼေႃ ... ၸၢမ်သႅင်းတေၵႂႃဢဝ်သိူဝ်ႈသွၼ်ႉၵမ်ႉၼိုင်ႈၵွၼ်ႇၼႃမူဝ် ... မူဝ်လူးဢမ်ႇဢဝ်ႁႃႉ”
“ဢဝ်ဢိူဝ်ႈ ... ဢဝ်မႃးပၼ်မူဝ်ၽွင်ႈၼႃႈ”
ၸၢႆးမွၼ်းၶိူဝ်းၸင်ႇဝႃႈ
“ပေႃးမီးၾႆးသၢႆၵေႃႈ ဢဝ်မႃးလႄႈၼႃႈ ၸၢမ်သႅင်း”
ၼၢင်းမူဝ်ၶၢဝ် ၸင်ႇထၢမ်ဝႃႈ
“ပီႈၸၢႆးမွၼ်းၶိူဝ်ႈ ... ဢေႃႈဢမ်ႇၸႂ်ႈ ... ပီႈၸၢႆးၶိူဝ်း တေတႆႈတူၺ်းသင်”
“ဢေႃႈ ... ၶႂ်ႈၼႄလွင်ႈမၢႆတွင်းမဵဝ်းၼိုင်ႈဢိူဝ်ႈ”
“မဵဝ်းႁိုဝ် ... ပီႈၸၢႆးၶိူဝ်း”
“ဢေႃႈ ... မိူဝ်ႈႁဝ်းထူပ်းၵၼ် တီႈသႅင်ၶဝ်ႈသွႆးတူၼ်ႈတီးသေ ဢၼ်ပႃႈၶၢႆၶဝ်ႈသွႆး တုမ်ႉငိုၼ်းၽိတ်းၼၼ်ႉ ၸွင်ႇမူဝ်ၶၢဝ် တိုၵ်ႉတွင်းႁိုဝ်”
“တွင်ႈဢိူဝ်ႈ ... ပီႈၸၢႆးၶိူဝ်း”
“ပီႈၸၢႆးၶိူဝ်း ၶႂ်ႈၼႄလွင်ႈမၢႆတွင်းၼၼ်ႉဢိူဝ်ႈ ၸွင်ႇၶႂ်ႈတူၺ်းႁိုဝ်”
“ၶႂ်ႈတူၺ်းဢိူဝ်ႈ”
ၼၢင်းၸၢမ်သႅင်းၵေႃႈ ၽႅဝ်မႃးယဝ်ႉလႄႈ ၸၢႆးမွၼ်ႈၶိူဝ်း ၸင်ႇၸၼ်ဢဝ်မၢင်ႁႃႈပျႃး ဢၼ်ၶႃၼၢင်းမူဝ်ၶၢဝ် လႅၵ်ႈၵၼ်ၼၼ်ႉ မႃးၼႄယဝ်ႉ
“ၼႆႉၼႃႇ”
ၼၢင်းမူဝ်ၶၢဝ် ၸင်ႇဝႃႈ
“ဢေႃႈ မၢင်ႁႃႈပျႃး ဢၼ်မူဝ်ၶဝ်လႅၵ်ႈၵၼ်ၼၼ်ႉႁႃႉ”
“ၸႂ်ႈဢိူဝ်ႈ မူဝ်ၶၢဝ် မၼ်းဢမ်ႇၼပ်ႉတေႃႈ လႃႈလီထူပ်းၺႃးၵၼ်လႄႈ ပီႈၸၢႆးမွၼ်းၶိူဝ်း ဢဝ်ႁဵတ်းပဵၼ်တီႈမၢႆတွင်းသေ ၸင်ႇသိမ်းဝႆႉယဝ်ႉ ... မိူဝ်ႈဢွၼ်တၢင်းၼၼ်ႉ တႃႇတေၶိုၼ်းထူပ်းၺႃးၵၼ် ၸိူင်ႉၼႆသေ တေမႃးမိုတ်ႈၵၼ်ၸိူင်ႉၼႆၼႆႉ ပီႈၸၢႆးၶိူဝ်း ဢမ်ႇထၢင်ႇသေဢိတ်းၵူၺ်း တႃႇတေၶိုၼ်းထူပ်းႁၼ်ၵၼ်ၼၼ်ႉ လွမ်လွမ်မုင်ႈမွင်းဝႆႉယူႇဢိူဝ်ႈ”
ၼၢင်းမူဝ်ၶၢဝ် ၸင်ႇဝႃႈ
“ပီႈၸၢႆးၶိူဝ်း လႃႈလီဝႃႈၵူၺ်းဢိူဝ်ႈ”
“တႄႉဢိူဝ်ႈ မူဝ်ၶၢဝ်ၼႆႉၼႃႇ တီႈၸေႈႁႃႈပျႃးၼႆႉ ပီႈၸၢႆးၶိူဝ်း ယင်းတႅမ်ႈလိၵ်ႈမၢႆဝႆႉၵွၼ်ႇဢိူဝ်ႈ ... လူတူၺ်းလႄႈ”
ၼၢင်းမူဝ်ၶၢဝ် လႄႈၼၢင်းၸၢမ်သႅင်းၵေႃႈ ဢဝ်တူၺ်း ၸေႈႁႃႈပျႃးၼၼ်ႉယဝ်ႉ
“ၸၢမ်သႅင်း ပိူင်းထွင်ႇၾႆးလူး”
ၶႃသွင်ၵေႃႉ လူတူၺ်းႁူမ်ႈၵၼ်
✽ လႆႈမႃႈႁၼ်ၵၼ် - ၸူဝ်ႈဢၼ်ၼိုင်ႈၵႅပ်ႉ
ၸူဝ်ႈၽႅပ်ႉတႃၵေႃႈ - ႁဝ်းတေႃႈဢမ်ႇလိုမ်း
တွင်းၵိုမ်းၼႂ်းၸႂ် - မိူဝ်ႈလႂ်ႁဝ်းႁႃး
တေၶိုၼ်းၺႃးၵၼ်ထႅင်ႈ။
ၶႃသွင်ၵေႃႉလူတူၺ်းယဝ်ႉၵႂႃႇသေ ၼၢင်းမူဝ်ၶၢဝ်ၸင်ႇဝႃႈ
“ပီႈၸၢႆးၶိူဝ်း မီးဝႃႇသၼႃႇမေႃတႅမ်ႈလိၵ်ႈဝွၵ်းႁေၼေႃ”
“မေႃတႄႉဢမ်ႇမေႃၼင်ႇၵဝ်ႇ တိုၵ်ႉၽိုၵ်းတႅမ်ႈဢိူဝ်ႈ”
ၼၢင်းၸၢမ်သႅင်းၵေႃႈ ၸင်ႇဝႃႈ
“ၺႃးၵၼ်ယဝ်ႉ ၵူၼ်းမေႃတႅမ်ႈဝွၵ်းၼင်ႇၵၼ် မႃးၺႃး ၵၼ်ယဝ်ႉ ၼၢင်းမူဝ်ၶၢဝ်ၵေႃႈၵႆႉၵႆႉတႅမ်ႈၵျႃႉ ပီႈၸၢႆးၶိူဝ်းၶႂ်ႈႁူႉ ဢၼ် မၼ်းတႅမ်ႈဝႆႉတီႈ ၸေႈၶၼ်သွင်မၢင်ၼၼ်ႉၵေႃႈ ယင်းမီးၵွၼ်ႇဢိူဝ်ႈ”
“တႄႉႁႃႉ မူဝ်ၶၢဝ် ၼႄၽွင်ႈလူး တႅမ်ႈဝႆႉဝႃႈႁိုဝ်”
“မူဝ်ဢမ်ႇပႃးမႃး”
ၼၢင်းၸၢမ်သႅင်းၸင်ႇဝႃႈ
“ယႃႇပေလႅၼ်လႄႈမူဝ် ... ၼႄပီႈၸၢႆးၶိူဝ်ႈလႄႈ လႅၵ်ႈလၢႆႈတၢင်းႁူႉၵၼ်ဢိူဝ်ႈ မိူဝ်ႈၶမ်ႈဝႃး မူဝ်ယင်းၼႄၸၢမ်သႅင်းယူႇ”
ၼၢင်းမူဝ်ၶၢဝ်ၵေႃႈ ၽုၺ်ႇဢဝ်မၢင်ၶၼ်သွင်မၢင်ၼႂ်းထူင် ငိုၼ်းမၼ်းသေ ၼႄပၼ် ၸၢႆးမွၼ်းၶိူဝ်းယဝ်ႉ။
“ယေႃႈ ... ပီႈၸၢႆးၶိူဝ်း လူတူၺ်းလႄႈ”
ၸၢႆးမွၼ်းၶိူဝ်းၵေႃႈ ဢဝ်သေလူတူၺ်းယူႇ
✽ ဢမ်ႇထၢင်ႇတေမႃး - ထူပ်းၺႃးႁၼ်ၵၼ်
မၢင်ၶၼ်ႁႃႈပျႃး - လႆႈမႃးလႅၵ်ႈၵၼ်
ပၼ်ပဵၼ်ၸႂ်တိတ်း - ဝူၼ်ႉၶိတ်းၶိုၼ်းယူႇၵူႈဝၼ်းၼႂ်။
“ပီႈၸၢႆးမွၼ်းၶိူဝ်း ... ၼႆႉပဵၼ်ထႅင်ႈဢၼ်ၼိုင်ႈဢိူဝ်ႈ”
ၸၢႆးမွၼ်းၶိူဝ်းၵေႃႈ ဢဝ်လူတူၺ်းထႅင်ႈ
✽ ထူပ်းၺႃးၵၼ်ၵေႃႈ - တေႃႈပႆႇႁူႉၸိုဝ်ႈ
ၵေႃႉမႃးလိုဝ်ႈသဝ်း - ၵေႃႉၶိုၼ်းၽၢတ်ႇႁဝ်းၵႂႃႇယဝ်ႉ။
ယွၼ်ႉပိူဝ်ႈလႆႈႁူႉၼၢင်းမူဝ်ၶၢဝ် ပဵၼ်ၽူႈတႅမ်ႈဝွၵ်း ၽူႈဝႃႇသၼႃႇ လိၵ်ႈလၢႆးမိူၼ်မၼ်းၸၢႆးလႄႈ မၼ်းပဵၼ်ဢၼ်ၸမ်ၸႂ် ၼပ်ႉယမ် ၼၢင်းမူဝ်ၶၢဝ် ၵႂႃႇတႄႉတႄႉ ... မၼ်းၸင်ႇဝႃႈ
“မူဝ်ၶၢဝ်တႅမ်ႈၼႆႉ ယင်းၶႅမ်ႉသေ ပီႈၸၢႆးၶိူဝ်းၵွၼ်ႇဢိူဝ်ႈ ၼႆႉ”
“ဢမ်ႇၶႅမ်ႉၵူၺ်း ... ဢၼ်ပီႈၸၢႆၶိူဝ်းတႅမ်ႈၼၼ်ႉ ၶႅမ်ႉသေမူဝ်ဢိူဝ်ႈ”
ၼၢင်းၸၢမ်သႅင်း ၸင်ႇဝႃႈ
“ထွမ်ႇလႄႈ ထွမ်ႇလႄႈ ၸၢမ်သႅင်းတေတႅပ်းတတ်းပၼ် ၶႅမ်ႉၼင်ႇၵၼ်ယဝ်ႉ ၼင်ႇႁိုဝ်တေၶႅမ်ႉသေၼႆႉၵေႃႈ ၶႅၼ်းတေႃႈ သိုပ်ႇၶတ်းၸႂ် လပ်ႉပၢႆၵမ်ၽၢႆၽၢႆသေၵမ်းၼႆ ၸၢမ်သႅင်း ပၼ်ႁႅင်း တိုၵ်းသူၼ်းယူႇတင်းသွင်ၵေႃႉယဝ်ႉ”
ၶႃသွင်ၵေႃႉၵေႃႈ ႁူမ်ႈၵၼ်ဝႃႈ“တေသိုပ်ႇၶတ်းၸႂ်ယူႇဝႃႇ” ၼႆသေ ၶဝ်သိုပ်ႇဢုပ်ႇၵၼ်ထႅင်ႈတၢၼ်ႇတၢၼ်ႇယူႇ။ ယွၼ်ႉပိူဝ်ႈၶိုၼ်ႈလွႆ မႃးပဵၼ်ဢၼ်ႁိူဝ်ႉတူဝ်ႁိူဝ်ႉၸႂ် ႁင်းၽႂ်ႁင်းမၼ်းလႄႈ ၶဝ်ၵႂႃႇမိူဝ်ႈ ၼွၼ်းၽႂ်မၼ်းယဝ်ႉ၊ ယွၼ်ႉပိူဝ်ႈႁိူဝ်ႉၶၢဝ်းတၢင်းလႄႈ ၶဝ်ပဵၼ် ဢၼ်ၼွၼ်းလပ်းလီၵူႈၵေႃႉယဝ်ႉ။
လႆႈႁၼ် ၶဝ်ပွၵ်ႈမိူဝ်း ႁိူဝ်းၶဝ်ပွၵ်ႈၽႅဝ်မႃးတီႈၼႂ်းၵၢင် ၼွင်ယူႇ ၼၢင်းမူဝ်ၶၢဝ် ၶႂ်ႈထႆႇႁၢင်ႈတီႈၼႂ်းၵၢင်ၼွင်လႄႈ မၼ်းၸင်ႇ ဝႃႈ
“ပီႈၸၢႆးၶိူဝ်း ... မူဝ်ၶႂ်ႈထႆႇၶႅပ်ႈႁၢင်ႈၼႂ်းၵၢင်ၼွင်ၼႆႉဢိူဝ်ႈ ၸွင်ႇတေလီ”
“မူဝ်ၶၢဝ် တေယူႇတီႈလႂ်သေထႆႇလႃႇ”
“မူဝ်တေၶိုၼ်ႈယူႇတီႈ ႁူဝ်ႁိူဝ်းၼႆႉဢိူဝ်ႈ ပီႈၸၢႆးၶိူဝ်း သုတ်ႉၵႂႃႇၽၢႆႇလင် ယူႇတီႈၵၢင်ႁိူဝ်းၼၼ်ႉသေ ထႆႇပၼ်လႄႈၼႃႈ”
ၸၢႆးမွၼ်းၶိူဝ်းၵေႃႈ မႃးယူႇတီႈၵၢင်ႁိူဝ်းသေ ယိူင်းထႆႇပၼ် ၼၢင်းမူဝ်ၶၢဝ် ဢၼ်ၼင်ႈတီႈႁူဝ်ႁိူဝ်းၼၼ်ႉယူႇ ... ဝၢႆးသေထႆႇယဝ်ႉ ၼၢင်းမူဝ်ၶၢဝ် ၸင်ႇဝႃႈ
“ထႆႇပၼ်ထႅင်ႈၶႅပ်းၼိုင်ႈလႄႈ ပီႈၸၢႆးၶိူဝ်း ... ပွၵ်ႈၼႆႉ တႄႉ မူဝ်တေၸုၵ်းဢဝ်ဢိူဝ်ႈ”
ၸၢႆးမွၼ်းၶိူဝ်းမႆႈၸႂ်ၵႂႃႇသေ
“ဢမ်ႇပဵၼ်ယူဝ်ႉမူဝ်”
“ဢမ်ႇပဵၼ်သင် ပီႈၸၢႆးၶိူဝ်း မူဝ်ႁတ်းၸုၵ်းယူႇၵူၺ်း”
ၼၢင်းမူဝ်ၶၢဝ်လၢတ်ႈၼင်ႇၼၼ်သေ လုၵ်ႉၸုၵ်းယဝ်ႉ ၽွင်းမိူဝ်ႈမၼ်းၼၢင်းလုၵ်ႉၸုၵ်းၼၼ်ႉ ႁိူဝ်းၶဝ်ဢိူင်ႇဢၢင်ၵႂႃႇလႄႈ ၼၢင်းမူဝ်ၶၢဝ် ဢမ်ႇသင်ႉတူဝ်လႆႈလႃးလႃးယဝ်ႉ၊ မၼ်းၼၢင်းႁွင်ႉဝႃႈ “ဢႃး”ၼႆသေ ဝူင်ႇတူၵ်းၵႂႃႇၼႂ်းၼွင် “ပလူင်ႈ”ၼႆယဝ်ႉ၊ ၸၢႆးမွၼ်း ၶိူဝ်းဢၢင်ႈဢဝ်မၼ်းၼၢင်းသေတႃႉ ယွၼ်ႉပိူဝ်ႈ မၼ်းမီးယၢၼ်ၵႆဝႆႉ လႄႈ မၼ်းဢမ်ႇၸၢင်ႈႁဵတ်းႁိုဝ်ဢဝ် ႁိူဝ်းၶဝ်ၵေႃႈဢမ်ႇၵိုင်ႉၵၢင်ႉ ၵိုတ်းလႆႈလႄႈ ပူၼ်ႉမၼ်းၼၢင်းၵႂႃႇပႅတ်ႈယဝ်ႉ ၸၢႆးမွၼ်းၶိူဝ်း မႆႈၸႂ် သေ တူၺ်းႁၼ်ၼၢင်းမူဝ်ၶၢဝ် ဢၼ်ၸူမ်ၽူးၸူမ်ၽူးဝႆႉ ၼႂ်းၼမ်ႉၼၼ်ႉယူႇ ... ၵူၼ်းၼိူဝ်ႁိူဝ်းၸိူဝ်းၼၼ်ႉၵေႃႈ ဢွၼ်ၵၼ်တူၵ်းၸႂ် မႆႈၸႂ်ၵူႈၵေႃႉယဝ်ႉ။
ၸၢႆးမွၼ်းၶိူဝ်း ၸင်ႇဝႃႈတီႈၸဝ်ႈႁိူဝ်း ႁႂ်ႈဢဝ်ႁိူဝ်း ၵႂႃႇတီႈ ၼၢင်းမူဝ်ၶၢဝ်ယဝ်ႉ ၸဝ်ႈႁိူဝ်းၵေႃႈ “ဢိူဝ်ႈ” ၼႆသေ ၼႅတ်ႈငွၵ်း ႁူဝ်ႁိူဝ်းမၼ်းယူႇ လိူၵ်ႈလိူၵ်ႈသေပဵၼ် ၸၢၵ်ႈႁိူဝ်းမၼ်း သမ်ႉဢဝ်ၵိုတ်းပႅတ်ႈ တီႈၼၼ်ႈယဝ်ႉ၊ ၸဝ်ႈမၼ်းၵေႃႈၼႅတ်ႈ ၶတ်းၸႂ်ႁႂ်ႈၸၢၵ်ႈ မၼ်းပဵၼ်တူဝ်ယူႇ ... ၵူၺ်းၵႃႈ ဢမ်ႇလႆႈ ... ၼၢင်းမူဝ်ၶၢဝ်တႄႉ ၸူမ်လူမ်ၵႂႃႇႁိုင်ႁိုင်သေ ၶိုၼ်းၽူးမႃးၼိုင်ႈၵႅပ်ႉ တၼ်းႁွင်ႉဝႃႈ “ပီႈ ၸၢႆးၶိူဝ်း” ၼႆၵူၺ်းသေ ၶိုၼ်းၸူမ်ၵႂႃႇယူႇ...
ၸၢႆးမွၼ်းၶိူဝ်းၵေႃႈ မႆႈၸႂ်တၢင်ၼၢင်းမူဝ်ၶၢဝ်တႄႉတႄႉ ၵူၼ်းၼိူဝ်ႁိူဝ်းၸိူဝ်းၼၼ်ႉၵေႃႈ ၼိုင်ႈႈၵေႃႉဝႃႈၼိုင်ႈလၢႆး ၵႂင်ၵႂင်ၵႃးၵႃးသေ ဢွၼ်ၵၼ်ဝႃႈ“ဢဝ်လႄႈ ဢဝ်ၽႂ်းၽႂ်းလႄႈ” ၼႆယူႇ ... ၸဝ်ႈႁိူဝ်း ၵေႃႈၼႅတ်ႈမေးႁိူဝ်းမၼ်း တၢၼ်ႇႁိုဝ်ၵေႃႈဢမ်ႇလႆႈ... ၼၢင်းမူဝ်ၶၢဝ် ၸူမ်ၼမ်ႉ သမ်ႉပေႃးၵႅၼ်ႇယူႇ “ဢႅၵ််ႉၶႅၵ်ႉ ဢႅၵ်ႉၶႅၵ်ႉယဝ်ႉ ၸၢႆးမွၼ်းၶိူဝ်းၵေႃႈ ဢမ်ႇတၼ်းထွတ်ႇသိူဝ်ႈၶူဝ်းမၼ်းသင်ယဝ်ႉ မၼ်းပူတ်းၵႅမ်ႇမရႃႇမၼ်းဝႆႉသေ ၸင်ႇၼႅတ်ႈဝႅၼ်လူင်းၵႂႃႇၼႂ်း ၼမ်ႉၽႂ်းၽႂ်းယဝ်ႉ။ ၵူၺ်းၵႃႈ မၼ်းဝႅၼ်လူင်းၵႂႃႇၼႂ်းၼမ်ႉသေတႃႉ မၼ်းၸၢႆး ဢမ်ႇပႆႇတၼ်းတူၵ်းထိုင်ၼမ်ႉ ... မၼ်းၸၢႆးၵိုင်ႉၵၢင်ႉၽႅတ်းတိုၼ်ႇ မႃးသေ မၼ်းၶိုၼ်းႁူႉတူဝ်မၼ်း လွင်ႈဝႃႈ မၼ်းၼွၼ်းၾၼ်ႁၼ် သေ မီးဝႆႉယူႇၼႂ်းၽႃႈမၼ်းၼၼ်ႉယဝ်ႉ ႁူဝ်ၸႂ်မၼ်းၸၢႆးတွတ်ႇယူႇ ပိုၵ်ႉပိုၵ်ႉယဝ်ႉ မၼ်းထူၺ်ႈၸႂ်လူင် ယူႇၵမ်းၼိုင်ႈသေ လွမ်လွမ်ဝႃႈ-
“ႁူး ... ၵတ်ႉၵႃႈလႃႈ ... ၵဝ်ယူဝ်ပဵၼ်ဢၼ်တႄႉၼႆ ၼႃး”
မၼ်းၸၢႆးဝႃႈၼႆ လွႆးလွႆးသေ ၶိုၼ်းၼွၼ်းလပ်းယဝ်ႉ၊ မၼ်း ၶိုၼ်းတၼ်းလပ်းၵႂႃႇ ၶၢဝ်းလႂ်ၵေႃႈဢမ်ႇႁူႉ ... ပေႃးဝႃႈ မၼ်းၶိုၼ်း တိုၼ်ႇမႃးၼႆ မၼ်းလွမ်တူၺ်းယၢမ်းမူင်းမၼ်း မီးႁႃႈမူင်းပၢႆလႄႈ မၼ်းလုၵ်ႉမႃးတူပ်ႉၽႃႈမၼ်း ၵႂႃႇသုၵ်ႈၼႃႈမၼ်း သီၶဵဝ်ႈမၼ်းယဝ်ႉသေ ၶိုၼ်ႈၵႂႃႇဝႆႈၽြႃးၵေႃႉလဵဝ် တီႈၵွင်းမူးယဝ်ႉ၊ ၵူၼ်းၸိူဝ်းဢၼ် ၶဝ်မႃးႁူမ်ႈၵၼ်ၼၼ်ႉတႄႉ ၽႂ်ၵေႃႉပႆႇလုၵ်ႉတိုၵ်ႉၼွၼ်းဝၢၼ်ယူႇ။
မၼ်းၸၢႆးလပ်းတႃဝႆႈၽြႃးယူႇၼင်ႇၼၼ် ႁိုဝ်ၵႂႃႇတၢၼ်ႇ ႁိုဝ်ၵေႃႈဢမ်ႇႁူႉလၢမ်းလႆႈ
“ပီႈၸၢႆးၶိူဝ်း ... ပီႈၸၢႆးၶိူဝ်း”
လႆႈငိၼ်းသဵင်ႁွင်ႉၸိုဝ်ႈမၼ်း ၼင်ႇၼႆလႄႈ မၼ်းၸင်ႇ ၶိုၼ်းမိုၼ်းတႃလွႆးလွႆး မႄးၶူပ်ႉဝႆႈၽြႃးသၢမ်ၵမ်း ယိူင်းဢၢၼ်းထိုင် ဢူႈၸဝ်ႈၵျေးၸူး ဢၼ်လပ်းတႃလိုမ်းမိူင်းပႅတ်ႈ မၼ်းၸၢႆးၼၼ်ႉ မၼ်းၽႄၵူႉသူဝ်ႇပၼ်ယူႇ၊ မၼ်းၸင်ႇဝၢႆႇ လႆႈႁၼ်ၼၢင်းမူဝ်ၶၢဝ်လႄႈ ၼၢင်းၸၢမ်သႅင်း မႃးႁွင်ႉမၼ်းယူႇယဝ်ႉ ၼၢင်းမူဝ်ၶၢဝ်ၸင်ႇဝႃႈ-
“ယူဝ်ၶႄးမူဝ်ၶဝ်မႃးပၼ်ပဵၼ် တၢင်းယႃႉၵဝ်း ပီႈၸၢႆးၶိူဝ်း ၵႂႃႇယဝ်ႉႁိုဝ်ၵေႃႈဢမ်ႇႁူႉယဝ်ႉ”
“ဢမ်ႇပဵၼ်ၵူၺ်း ... ပီႈၸၢႆးၶိူဝ်းၵေႃႈ ဢၢင်ႈပေႃးၼင်ႇၵဝ်ႇယဝ်ႉ”
“မူဝ်ၶဝ်ယူဝ်ဝႃႈ ပီႈၸၢႆးၶိူဝ်း ၵႂႃႇမီးတၢင်းၵျွင်းၼိပ်ႉပၢၼ်ႇၼၼ်ႉၼႆၼႃး မူဝ်ၶဝ်ယင်းၵႂႃႇႁႃတူၺ်း တၢင်းပုၼ်ႉၵွၼ်ႇဢိူဝ်ႈ ၵႂႃႇၵိၼ်ၶဝ်ႈဝႃႈ”
“ၵႂႃႇလႄႈ ပေႃးၼႆ”
ၽွင်းၶဝ်ၽႅဝ်မႃး တီႈလဵင်ႉၶဝ်ႈၼၼ်ႉ ၵူၼ်းလူင်ၶဝ် တိုၵ်ႉၵိၼ်ယူႇ ... ဢူႈၼၢင်းမူဝ်ၶဝ်ၸင်ႇဝႃႈ-
“မႃးလႄႈ ... မႃးၼင်ႈၵိၼ်တီႈၼႆႈလႄႈ ၸၢႆးမွၼ်းၶိူဝ်းၵႂႃႇလႂ်ၼႆႉ မိူဝ်ၵႆႈ”
ၼၢင်းမူဝ်ၶၢဝ်ၸင်ႇဝႃႈ
“မၼ်းၵႂႃႇမီး ၼႂ်းၵျွင်း ၽၢႆႇဢွၵ်ႇၵွင်းမူးၼၼ်ႉဢေႃႈ”
“ဢေႃႈ ... ၵႂႃႇမီးတီႈၼၼ်ႈႁႃႉ ... ဢိူဝ်ႈဢိူဝ်ႈ ၵိၼ်ၶဝ်ႈ လႄႈ ႁဝ်းဢၢင်ႈလူင်းမိူဝ်းၸဝ်ႉၸဝ်ႉ လႅတ်ႇပႆႇမႆႈၼႆႉၼႆၵႂႃႈ”
ၶဝ်သိုပ်ႇၵိၼ်ၶဝ်ႈယဝ်ႉသေ ဝၢႆးၼၼ်ႉ ၶဝ်ၶိုၼ်း လူင်းလွႆမႃးယဝ်ႉ ၽွင်းလူင်းလွႆမႃးၼၼ်ႉ ၼၢင်းၸၢမ်သႅင်းၸင်ႇဝႃႈ-
“မူဝ် ... ၶိုၼ်ႈလွႆလႄႈ လူင်းလွႆၼႆႉ ဢၼ်လႂ်ယၢပ်ႇ”
“ပေႃးဢဝ်မူဝ်ဝႃႈတႄႉ လူင်းလွႆၼႆႉ ယၢပ်ႇသေ ၶိုၼ်ႈလွႆယူႇယဝ်ႉ၊ ၵွပ်ႈသင်ၼႆ ... ပေႃးလူင်းႁိုင်မႃး တွင်ႇၼွင်ႈဢူၼ်ႈဢိူဝ်ႈ ဢမ်ႇၸႂ်ႈႁႃႉ”
“ၸႂ်ႈယူႇယူဝ်ႉ ... ထၢမ်တူၺ်း ပီႈၸၢႆးၶိူဝ်းလႄႈ”
“ဢၼ်မူဝ်ဝႃႈၼၼ်ႉ ၸွင်ႇၸႂ်ႈႁိုဝ်ပီႈၸၢႆးၶိူဝ်း”
“ၸႂ်ႈယူႇ”
“ဢေႃႈ ... မူဝ်ဢၢင်ႈထၢမ် မဵဝ်းၼိုင်ႈၼႆ ၸဵမ်မိူဝ်ႈၵႆႈဢိူဝ်ႈၼႆႉ ၸွင်ႇပီႈၸၢႆးၶိူဝ်း ယၢမ်ႈၽႅဝ်ၶွင်ႇတႅင်ႇႁိုဝ်”
“ယၢမ်ႈၽႅဝ်ဢိူဝ်ႈ”
“မိူဝ်ႈလႂ်ၼၼ်ႉ”
“ဢေႃႈ ... မိူဝ်ႈပီႈၸၢႆးၶိူဝ်းၶဝ် ယူႇၸၼ်ႉပႅတ်ႇၼၼ်ႉဢိူဝ်ႈ”
ၼၢင်းၸၢမ်သႅင်းၸင်ႇဝႃႈ
“ဢေႃႈ ... မိူဝ်ႈပီႈၸၢႆးၶိူဝ်း ပႃးၼႂ်းလူႇယေႇၶျႃၼ်ႇၼၼ်ႉႁႃႉ”
“ၸႂ်ႈဢိူဝ်ႈ”
“ၸွင်ႇၵျေႃႇႁိုဝ် ပီႈၸၢႆးၶိူဝ်း”
ၸၢႆးၶိူဝ်းပႆႇတၼ်းတွပ်ႇ ၼၢင်းမူဝ်ၶၢဝ်ၸင်ႇဝႃႈ
“ဢူဝ် ... ၸၢမ်သႅင်းၼႆႉၵေႃႈ ပေႃးပဵၼ်လူႇယေႇၶျႃၼ်ႇ ၼႆႁဵတ်းႁိုဝ်တေဢမ်ႇၵျေႃႇ ...ၵျေႃႇသုတ်းဢိူဝ်ႈ ... လႆႈၵႂႃႇလဵပ်ႈ ႁဵၼ်းတူၺ်းၵူႈတီႈယဝ်ႉ”
“လူႇယေႇၶျႃၼ်ႇၼႆႉ ၵႂၢမ်းတႆးတေဝႃႈႁိုဝ် မူဝ်”
ၼၢင်းမူဝ် ဝူၼ်ႉတူၺ်းၵႅပ်ႉၼိုင်ႈသေ ၸင်ႇဝႃႈ
“ဢမ်ႇႁူႉယဝ်ႉဢေႉ ... မူဝ်ဢမ်ႇမေႃဝႃႈ ... တေလႆႈဝႃႈ ႁိုဝ် ပီႈၸၢႆးၶိူဝ်း”
“လူဝ်ႇလႆႈဝႃႈ ၵူၼ်းၵတ်ႉၶႅၼ်ႇၼႆၵူၺ်းယူဝ်ႉ”
“ဢေႃ မူဝ်တေထၢမ်မဵဝ်းၼိုင်ႈ မိူဝ်ႈပိူၼ်ႈတေလိူၵ်ႈ တႃႇပေႃးပဵၼ်တေပဵၼ် လူႇယေႇၶျႃၼ်ႇၵူၼ်းၵတ်ႉၶႅၼ်ႇၼၼ်ႉ ၶဝ်ထၢမ် ပီႈၸၢႆးၶိူဝ်း ၶေႃႈထၢမ်ၸိူင်ႉႁိုဝ် လၢႆလၢႆ”
“ၶဝ်ထၢမ်ဝႃႈ ၸွင်ႇယၢမ်ႈၽႅဝ်ၵွင်ႈမူးသူၺ်ႇတၵူင်ႇၼႆ ယဝ်ႉ၊ ပီႈၸၢႆးၶိူဝ်းၵေႃႈဝႃႈ ယၢမ်ႈၽႅဝ်ဢိူဝ်ႈ ၼႆသေ ၶဝ်ၶိုၼ်းထၢမ်ဝႃႈ ၶူဝ်လႆမ်းမီးလၢႆသိၵ်ႈၼႆယဝ်ႉ”
“ပီႈၸၢႆးၶိူဝ်း တွပ်ႇဝႃႈႁိုဝ်လႃႇ”
“ပီႈၸၢႆးၶိူဝ်းၵေႃႈဢမ်ႇႁူႉလႄႇ ... ပီႈၸၢႆးၶိူဝ်းၵေႃႈ တွပ်ႇဝႃႈ ဢမ်ႇၶိုၼ်ႈၸွမ်းၶူဝ်လႆ ၶႃႈၶိုၼ်ႈၸွမ်း ၶူဝ်လႆထၢတ်ႈဢိူဝ်ႈၼႆယဝ်ႉ”
“တွပ်ႇၸိူင်ႉၼၼ်ၵေႃႈ လႆႈယူႇႁႃႉ ပီႈၸၢႆးၶိူဝ်း”
“ဢမ်ႇႁူႉလႄႇ ... ပိူၼ်ႈဝႃႈတႄႉ လူဝ်ႇလႆႈႁတ်းလၢတ်ႈ ႁတ်းၸႃၼႆၼႃႇ”
“လိူဝ်သေၼၼ်ႉ ထၢမ်ၸိူင်ႉႁိုဝ်ၵူၺ်းၵူၺ်းလႃႇ”
“ထၢမ် ၸိုဝ်ႈၵူၼ်းလူင်ၼွၵ်ႈမိူင်းၼႂ်ႈမိူင်း ... ထၢမ်ၵႂႃႇၵမ်ႉ ၶဝ်ၶႂ်ႈထၢမ်ယဝ်ႉ ... ပိူင်လူင်မၼ်းတႄႉ လူဝ်ႇလႆႈမီးတၢင်းႁူႉၼမ် တၢင်းႁၼ်ၵႂၢင်ႈသေ လူဝ်ႇလႆႈၵတ်ႉၶႅၼ်ႇၵူႈၽၢႆႇၼၼ်ႉၵူၺ်း”
“မိူဝ်ႈၼႆႉ မူဝ်ၶဝ်တေပူၼ်ႉၵႂႃႇ တီႈၶွင်ႇတႅင်ႇတေသိုပ်ႇ ပူၼ်ႉၵႂႃႇဢၢပ်ႇၼမ်ႉဢုၼ်ႇသေ ၸင်ႇပူၼ်ႉမိူဝ်းတူၼ်ႈတီးၼႆ ယဝ်ႉ”
“တႄႉႁႃႉ”
“တႄႉဢိူဝ်ႈ ... ပီႈၸၢႆးၶိူဝ်းဢမ်ႇၶႂ်ႈၵႂႃႇၸွမ်းႁႃႉ”
“ၶႂ်ႈၵႂႃႇဢိူဝ်ႈ ... ပေႃးၼၢင်းမူဝ်ၶဝ်ႁွင်ႉၵႂႃႇတႄႉ”
“ႁွင်ႉယူႇဝႃႇ ... ၸဝ်ႈၵႅမ်ႇမရႃႇၵေႃႈႁွင်ႉ ၵႅမ်ႇမရႃႇၵေႃႈႁွင်ႉ ႁွင်ႉၼင်ႇၵၼ်ယဝ်ႉ”
ၶဝ်သၢမ်ၵေႃႉ ယုမ်ႉၶူဝ်ၵႂႃႇၼင်ႇၵၼ်ယဝ်ႉ၊ ၶဝ်သိုပ်ႇဢုပ်ႇ ၵၼ်လူင်းလွႆမႃး တေႃႇၽႅဝ်ဢိၼ်းတိင်ႇလႄႈ ၶဝ်မႃးပႂ်ႉၵူၼ်းလူင်ၶဝ် ယူႇတီႈတႃႈႁိူဝ်းယဝ်ႉ၊ ဝၢႆးသေ ၵူၼ်းၶဝ်ၸေးမူတ်း ၶဝ်သိုပ်ႇပူၼ်ႉ မႃးဝႄႉတူၺ်းၶွင်ႇတႅင်ႇသေ ၸၢႆးမွၼ်းၶိူဝ်းၵေႃႈ သပ်းလႅင်းလၢတ်ႈၼႄ တီႈလႂ်ပဵၼ်တီႈလႂ် လွင်ႈမိူဝ်ႈၶဝ်ပဵၼ် လူႇယေႇၶျႃၼ်ႇမႃးၼၼ်ႉ လႆႈမႃးသဝ်းတီႈလႂ် လႆႈမႃးႁဵတ်းၸိူင်ႉႁိုဝ်ၼႆ မၼ်းၸႂ်ယႂ်ႇၸႂ်ယၢဝ်းသေ လၢတ်ႈၼႄသဵင်ႈသဵင်ႈလႄႈ ၼၢင်းမူဝ်ၶၢဝ် ၼၢင်းၸၢမ်သႅင်းၵေႃႈ ၶဝ်ႈၸႂ်ထွမ်ႇဢဝ်တႄႉတႄႉယူႇ။
ဝၢႆးသေၼၼ်ႉ ၶဝ်ၶိုၼ်းပူၼ်ႉမႃး တီႈၼမ်ႉဢုၼ်ႇယဝ်ႉ၊ ပေႃးဝႃႈ ၶဝ်ႁွတ်ႈၽႅဝ်ထိုင်မႃး တီႈၼမ်ႉဢုၼ်ႇၼႆ ၸၢႆးမွၼ်းၶိူဝ်း ၸင်ႇဝႃႈ
“မူဝ်ၶၢဝ် ထႆႇႁၢင်ႈဝႆႉလႄႈ တီႈၼႆႈႁၢင်ႈလီဢိူဝ်ႈ”
“ထႆႇဢိူဝ်ႈ ပီႈၸၢႆးၶိူဝ်း ထႆႇပၼ်ၶႅမ်ႉၶႅမ်ႉၼႃ”
“တမ်းၸႂ်လႃႈ”
“တီႈလႂ်တေၶႅမ်ႉ ... ပီႈၸၢႆးၶိူဝ်း”
“ထႆႇတီႈတင်ႇၼင်ႈ တႂ်ႈၸွင်ႈၼႆႉၼႆ ႁၢင်ႈလီဢိူဝ်ႈ မူဝ်ၶၢဝ် တူၼ်ႈပႅၵ်ႇဢွၼ်ႇၸိူဝ်းၼႆႉၵေႃႈ ပႃးဢိူဝ်ႈ”
ၼၢင်းမူဝ်ၶၢဝ်ၵေႃႈ မႃးၼင်ႈဢိင်တင်ႇ ဢဝ်ၶႃၵၢႆႇၵၼ်သေ ယုမ်ႉဝႆႉယူႇ မၼ်းၼၢင်းၸင်ႇဝႃႈ-
“ႁဵတ်းၼႆ ၸွင်ႇတေႁၢင်ႈလီ ပီႈၸၢႆးၶိူဝ်း”
“ၵူၼ်းႁၢင်ႈလီၼႆႉ ႁဵတ်းႁိုဝ်ၵေႃႈ တိုၼ်းႁၢင်ႈလီယဝ်ႉ၊ တူၺ်းတီႈၼႆႈ ထႆႇယဝ်ႉၼႃႈ ... ၼိုင်ႈ သွင် သၢမ်”
“ၶလႅၵ်ႉ”
ၼၢင်းမူဝ်ၶၢဝ် ၸင်ႇၶိုၼ်းႁွင်ႉ ၼၢင်းၸၢမ်သႅင်းထႆႇၸွမ်းမၼ်း ထႅင်ႈယဝ်ႉ။
“ၸၢမ်သႅင်း ... မႃးၼင်ႈတီႈၼႆႈလႄႈ ႁႃးထႆႇၸွမ်းၵၼ်”
ၼင်ႈႁဵတ်းၼႆလၢႆလၢႆသေ ထႆႇတႄႉ ဢမ်ႇလီယူဝ်ႉမူဝ်”
“တေၶႂ်ႈႁဵတ်းႁိုဝ်လႃႇ”
“သင်ႇဢဝ် ၼမ်ႉဝၢၼ်သဝႅၼ်းဢၢပ်ႉ ၵိၼ်ဝႆႉသေထႆႇ ဢမ်ႇလီႁႃႉ”
“လီဢိူဝ်ႈ ... ၵႂႃႇသင်ႇမႃးလႄႈ”
ၼၢင်းၸၢမ်သႅင်းၵေႃႈ ၵႂႃႇသင်ႇဢဝ်ၼမ်ႉဝၢၼ်မႃးသေ ၽွင်းမိူဝ်ႈၼင်ႈၵိၼ်ၼမ်ႉဝၢၼ်ၼၼ်ႉ ၶႃၸႂ်ႉ ၸၢႆးမွၼ်းၶိူဝ်း ထႆႇၶႅပ်းႁၢင်ႈၶႃသွင်ၵေႃႉယဝ်ႉ ... ၼၢင်းမူဝ်ၶၢဝ်ၸင်ႇဝႃႈ-
“ပီႈၸၢႆးၶိူဝ်းလူး ... ဢမ်ႇထႆႇႁႃႉ ... မႃးလႄႈ မူဝ်ထႆႇပၼ်”
ၼၢင်းမူဝ်ၵေႃႈ ယွၼ်းဢဝ်ၵႅမ်ႇမရႃႇ ၼႂ်းမိုဝ်း ၸၢႆးမွၼ်းၶိူဝ်းသေ ယိူင်းတူၺ်း ႁၢင်ႈၸၢႆးမွၼ်းၶိူဝ်းယူႇ ၸၢႆးမွၼ်းၶိူဝ်းၸင်ႇဝႃႈ-
“တေႁဵတ်းႁိုဝ်ထႆႇ တေလီမူဝ်ၶၢဝ်”
“ပီႈၸၢႆးၶိူဝ်း မႃးၸုၵ်းတီႈၼႆႈသေ ထႆႇၼႆ ဢမ်ႇလီႁႃႉ တူၼ်ႈပႅၵ်ႇၵေႃႈပႃးၸွင်ႈၵေႃႈပႃး ၵူၼ်းၸိူဝ်းၼၼ်ႉၵေႃႈ ပႃးသဵင်ႈသဵင်ႈယဝ်ႉ”
ၸၢႆးမွၼ်းၶိူဝ်းၵေႃႈ မႃးၸုၵ်း တီႈၼၢင်းမူဝ်ၶၢဝ်ဝႃႈၼၼ်ႉသေ ၶၢမ်ႇထႆႇဢဝ်ၶႅပ်းႁၢင်ႈၶႅပ်းၼိုင်ႈယဝ်ႉ ဝၢႆးၼၼ်ႉမၼ်းၸင်ႇဝႃႈ
“မူဝ်ၶၢဝ်လႄႈၸၢမ်သႅင်း ... ႁဝ်းသၢမ်ၵေႃႉထႆႇႁူမ်ႈၵၼ် ၶႅပ်းၼိုင်ႈႁိုဝ်ႉ”
“လီဢိူဝ်ႈ ... ပီႈၸၢႆးၶိူဝ်း တေႁႂ်ႈၽႂ်ထႆႇပၼ်လႃႇ”
ၸၢႆးမွၼ်းၶိူဝ်းၵေႃႈ ႁွင်ႉဢဝ်ၵူၼ်း ဢၼ်မီးတီႈၼၼ်ႈသေ ၸႂ်ႉႁႂ်ႈထႆႇပၼ်ၶဝ်သၢမ်ၵေႃႉ ဢၼ်ၼင်ႈၵိၼ်ၼမ်ႉဝၢၼ်ႁူမ်ႈၵၼ်ၼၼ်ႉယူႇ ဝၢႆးသေၼၼ်ႉ ၼၢင်းၸၢမ်သႅင်းၵေႃႈ ၶႂ်ႈထႆႇၵေႃႉလဵဝ် ၼႆလႄႈ ၸၢႆးမွၼ်းၶိူဝ်းၵေႃႈ တိုၵ်ႉထႆႇပၼ်မၼ်းယူႇ၊ ၽွင်းၼၼ် ဢူႈၼၢင်းမူဝ်ၶၢဝ်ၸင်ႇမႃးဝႃႈ
“ၶႂ်ႈဢၢပ်ႇၼမ်ႉၵေႃႈ ၵႂႃႇဢၢပ်ႇလႄႈ ပေႃးဢၢပ်ႇယဝ်ႉၵေႃႈ ႁဝ်းလူဝ်ႇၵိၼ်ၶဝ်ႈသေ လူဝ်ႇမိူဝ်းယဝ်ႉ” ၼၢင်းမူဝ်ၶၢဝ်ၸင်ႇဝႃႈ
“ဢေႃႈ ... ဢူႈ ... မႃးၼင်ႈတီႈၼႆႈၵမ်းၼိုင်ႈၶႃႈလႄႈ လုၵ်းယိင်းတေထႆႇႁၢင်ႈၸွမ်းဢူႈႁဝ်းဢိူဝ်ႈ”
“ဢေႃ ... လုၵ်ႈယိင်းတႄႉ ၵႂႃႇလႂ်ၵေႃႈ ၵုမ်ႇထႆႇႁၢင်ႈယူႇ တိၵ်းတိၵ်ႈၼေႃ”
“ဢူဝ် ... ဢူႈၼႆႉၵေႃႈ လုၵ်ႈယိင်းၶႂ်ႈထႆႇ တီႈမၢႆတွင်းၼႃႇ မႃးၼင်ႈလႄႈ”
လုင်းၸိုၼ်ႈၵေႃႈ ႁၵ်ႉလုၵ်ႈယိင်းမၼ်းလႄႈ မၼ်းၸွမ်းၸႂ် လုၵ်ႈယိင်းမၼ်းတႃႇသေႇယဝ်ႉ၊ မၼ်းၸင်ႇမႃႈၼင်ႈတင်ႇသေ
“သႂ်ႇလႄႈ ... ၸၢႆးမွၼ်းၶိူဝ်း ... ထႆႇပၼ်လႄႈ”
ၸၢႆးမွၼ်းၶိူဝ်းၵေႃႈ ထႆႇပၼ်ယူႇယဝ်ႉ၊ ဝၢႆးၼၼ်ႉ ၼၢင်းမူဝ် ၶၢဝ်ၸင်ႇထၢမ်ဝႃႈ-
“ပီႈၸၢႆးၶိူဝ်း တေၵႂႃႇဢၢပ်ႇၼမ်ႉႁႃႉ”
“ၸႂ်ႈဢိူဝ်ႈ ... မူဝ်ၶၢဝ်လူး ဢမ်ႇဢၢပ်ႇႁႃႉ ... တီႈၵူၼ်းယိင်းဢၢပ်ႇ မီးတၢင်းပုၼ်ႉဢိူဝ်ႈ ၵႂႃႇဢၢပ်ႇလႄႈ”
ၸၢႆးမွၼ်းၶိူဝ်းဝႃႈၼၼ်သေ ၶဝ်ႈၵႂႃႇ တီႈၵူၼ်းၸၢႆးဢၢပ်ႇ ၼမ်ႉၼၼ်ယဝ်ႉ၊ ၼႂ်းၼၼ်ႉ မီးၼွင်မီးလုၵ်းဢၢပ်ႇၼမ်ႉသေ ၵူၼ်း ဢၼ်ဢၢပ်ႇၼမ်ႉလုၺ်းၼမ်ႉၵေႃႈ မီးၼမ်တၢၼ်ႇတၢၼ်ႇ ၼင်ႇၵဝ်ႇ မၢင်ၸိူဝ်းတႄႉ ၼင်ႈၼိူဝ်ၽင်ႇမၼ်းသေ သီၶႆးၶဝ် ထူၵ်းၵဵတ်ႈလွၵ်ႈၶၢပ်ႈၶဝ်ယူႇ၊ ၸၢႆႈမွၼ်းၶိူဝ်းၵေႃႈ ၵႂႃႇလၢႆႈၶူဝ်းထွတ်ႇၶူဝ်းမၼ်း ၼုင်ႈၵူၼ်ပိတ်းသေ မႃးတီႈႁိမ်းၽင်ႇၼွင် ဢၼ်မူၼ်းမိူၼ်ႁၢင်ႈၶႆႇပဵတ်း ဢၼ်ပိူၼ်ႈဢဝ်ဢုတ်ႇၵေႃႇႁဵတ်းဝႆႉၶႅမ်ႉၶႅမ်ႉၼၼ်ႉယူႇ”
တႃႇတေၵိုင်ႉၵၢင်ႉ လူင်းဢၢပ်ႇၵမ်းလဵဝ်ၼၼ်ႉ တိုၵ်ႉပႆႇ ၸၢင်ႈၵမ်းလဵဝ် တိုၵ်ႉလိူတ်ႇလႄႈ မၼ်းဢဝ်တိၼ်မၼ်း ၸႄႈယွၼ်ႇလူင်းဢွၼ်တၢင်းသေ ဝၵ်ႉဢဝ်ၼမ်ႉ ၼႂ်းၼွင်ႁူတ်းသႂ်ႇတူဝ် မၼ်းယူႇ ဝၢႆးသေၼၼ်ႉ မၼ်းၸၢင်ႈလူင်းဢၢပ်ႇၼႂ်းမၼ်းယဝ်ႉ ၵူၼ်းၸၢႆးလူင် ၸိူဝ်းဢၼ်ၶဝ်မႃးၸွမ်းၵၼ်ၼၼ်ႉၵေႃႈ ဢွၼ်ၵၼ် ၸူမ်းသိူဝ်းသေ မႃးဢၢပ်ႇယူႇ ဢူႈၼၢင်းမူဝ်ၶၢဝ်ၶဝ် လုင်းၸိုၼ်ႈ ၸင်ႇမႃးႁိမ်း ၸၢႆးမွၼ်းၶိူဝ်းသေ
“ၼမ်ႉၼႆႉ ဢမ်ႇၵိုင်ႉၵၢင်ႉဢၢပ်ႇလႆႈၵမ်းလဵဝ်ၼေႃႈ လိူတ်ႇဝႆႉၼင်ႇၵဝ်ႇဢိူဝ်ႈၼႆႉ”
“ၸႂ်ႈဢေႃႈ ... လႆႈဝၵ်ႉဢၢပ်ႇဢဝ်ၵမ်းဢိတ်းဢိတ်းသေ ၸင်ႇတေၸၢင်ႈဢၢပ်ႇတင်းတူဝ်ယဝ်ႉ”
ဢူႈၼၢင်းမူဝ်ၶၢဝ်ၶဝ် လုင်းၸိုၼ်ႈသီၶႆးမၼ်းသေဝႃႈ
“ဢလူဝ်ႉ ... ! ၶႆးဢွၵ်ႇလီၵျႃႉၼႆႉ”
“ၸႂ်ႈဢေႃႈ”
ၸၢႆးမွၼ်းၶိူဝ်း ၶုၵ်းၸႂ်လႆႈမဵဝ်ႈၼိုင်ႈလႄႈ မၼ်းမႄးသုၵ်ႈတိၼ်သုၵ်ႈမိုဝ်းမၼ်းသေ ဢၢင်ႈၵႂႃႇဢဝ်ၵႅမ်ႇမရႃႇမၼ်းယဝ်ႉ လုင်းၸိုၼ်ႈၸင်ႇထၢမ်ဝႃႈ-
“ၸၢႆးမွၼ်းၶိူဝ်း ပေႃးယဝ်ႉႁႃႉၼႆႉ”
“ပႆႇပေႃးၶႃႈ ... ၶႃႈဢၢင်ႈဢဝ်ၵႅမ်ႇမရႃႇသေ ထႆႇႁၢင်ႈမိူဝ်ႈ လုင်းႁဝ်း တိုၵ်ႉဢၢပ်ႇၼမ်ႉၼၼ်ႉၼႆဢေႃႈ”
“ဢိူဝ်ႈ ... ဢိူဝ်ႈ ... ၵႂႃႇဢဝ်မႃးလႄႈ”
ၸၢႆးမွၼ်းၶိူဝ်းၵေႃႈ ႁႂ်ႈလုင်းၸိုၼ်ႈၸုၵ်ႈၼႂ်းၼမ်ႉသေ ထႆႇပၼ်ၶႅပ်းၼိုင်ႈယဝ်ႉ ... ဝၢႆးၼၼ်ႉ မၼ်းၶိုၼ်းမႃးသိုပ်ႇဢၢပ်ႇၼမ်ႉယူႇ လုင်းၸိုၼ်ႈၸင်ႇထၢမ်-
“ၸၢႆးမွၼ်းၶိူဝ်း ... ဢမ်ႇယူႇႁူင်းႁဵၼ်းႁႃႉ”
“ယူႇဢေႃႈ”
“ၽႅဝ်ၸၼ်ႉလႂ်ယဝ်ႉ”
“ပူၼ်ႉၸၼ်ႉသိပ်း ပီၼႆႉဢေႃႈ”
“ဢေႃ ... တင်းလုၵ်ႈယိင်းလုင်းသေ မိူၼ်ၵၼ်ယဝ်ႉ ပေႃးၼႆ”
“ၸႂ်ႈဢေႃႈ”
“ဢိူဝ်ႈ ... ဢိူဝ်ႈ သိုပ်ႇၶတ်းၸႂ်လႄႈၼႃႈ ၼင်ႇႁိုဝ်ပေႃးတေပဵၼ် ၽူႈႁပ်ႉၶူးၼၼ်ႉဢိူဝ်ႈ ... ၼႂ်းတႆးႁဝ်းၼႆႉ မၼ်းလူဝ်ႇမီး ၵူၼ်းမေႃလိၵ်ႈၵူၼ်းႁူႉၵူၼ်းႁၼ် ၼမ်ၼမ်ယဝ်ႉ”
“ၸႂ်ႈဢေႃႈ ... ၶႃႈတေၶတ်းၸႂ်ယူႇ”
“ဢိူဝ်ႈ ... ဢွၼ်တၢင်းၼႆႉ ထုင်းၵႂၢမ်းမီးဝႆႉယူႇလူး ပိူၼ်ႈဝႃႈ ၶႄႇပႄႉၶႄႇၶုတ်းၶူး မၢၼ်ႈပေႉ တႄႇၵွင်းမူး တႆးပေႉတႆး လူးလဝ်ႈၼႆဝႃႇ ၵွပ်ႈၼႆ ၵၢပ်ႈပၢၼ်လၢႆးမႂ်ႇ တီႈလဵဝ်ၼႆႉ လူဝ်ႇလႆႈပဵၼ် ၸိူင်ႉႁိုဝ်ၼႆ လူဝ်ႇႁႂ်ႈပဵၼ် တႆးပေႉတႆးႁပ်ႉၶူးၼႆယဝ်ႉ”
လႆႈငိၼ်းၼင်ႇၼၼ် ၸၢႆးမွၼ်းၶိူဝ်းလႆႈၸႂ်ၵႂႃႇတႄႉတႄႉသေ
“ၵႂၢမ်းၶေႃႈၼႆႉ ၶႃႈတေတွင်းဝႆႉတေႃႇၸူဝ်ႈယူႇၶႃႈ လုင်း”
“ဢိူဝ်ႈ ... ဢိူဝ်ႈ ...တွင်းဝႆႉလႄႈ”
ၼႃသွင်ၵေႃႉ ဢုပ်ႇၵၼ်သေ ဢၢပ်ႇၼမ်ႉႁၢၼ်ႉၸႂ်ႁၢၼ်ႉၶေႃးၶႃယူႇ။
✽ ✽ ✽ ✽ ✽