မွၵ်ႇလူင်ႇလဵဝ်/တွၼ်ႈႁူၵ်း
ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းၵေႃႈ ၼုင်ႈသိၼ်ႈတႃႈဢူၵ်းသေ မႃးတီႈၽင်ႇၼမ်ႉၼွင် တီႈၼၢင်းယိင်းဢၢပ်ႇၼၼ်ႉယူႇ
“ၸွင်ႇမႆႈႁိုဝ် ၸၢမ်သႅင်း”
ၼၢင်းၸၢမ်သႅင်း ဢဝ်မိုဝ်းမၼ်း ဝၵ်ႉၼမ်ႉသေ ႁူတ်းပၼ် ၼၢင်းမူဝ်ၶၢဝ်ယဝ်ႉ
“ႁေႉ ... ၸၢမ်သႅင်း ယႃႇပေႁဵတ်းၼၼ်လေႃႇ”
“ၶိၵ်း ... ၶိၵ်း မၼ်းဢမ်ႇမႆႈၵူၺ်း မူဝ် ... မႃးဢၢပ်ႇလႄႈ”
ၶႃသွင်ၵေႃႉ မႃးၼင်ႈတီႈၽင်ႇၼွင် ဢဝ်တိၼ်ယွၼ်ႇလူင်း ၸႄႈၼႂ်းၼမ်ႉဢုၼ်ႇသေ ဝၵ်ႉဢဝ်ၼမ်ႉသုၵ်ႈၼႃႈသုၵ်ႈၶႅၼ်ၶႃသွင်ၵေႃႉယူႇ ၼၢင်းမူဝ်ၶၢဝ် ၸင်ႇဝႃႈ
“လီဢၢပ်ႇၵျႃႉၼေႃ ၸၢမ်သႅင်း”
“လီဢၢပ်ႇဢိူဝ်ႈ ... ၵူၺ်းၼႃႇ ပေႃးဢၢပ်ႇႁိုင်ၼႃႇၽႅဝ်ၼႆ ဢမ်ႇလႆႈၵူၺ်း”
“ပဵၼ်သင်လႃႇ ၸၢင်ႈမဝ်းႁႃႉ”
“မဝ်းဢမ်ႇမဝ်းတႄႉ ဢမ်ႇႁူႉယဝ်ႉ ၸၢမ်သႅင်းတႄႉ ဢမ်ႇႁတ်းဢၢပ်ႇႁိုင်ၵူၺ်း”
“ႁဵတ်းသင် ဢမ်ႇႁတ်းဢၢပ်ႇႁိုင်လႃႇ”
“ၸၢမ်သႅင်းၵူဝ်ဢိူဝ်ႈ”
“ၵူဝ်သင်”
“ပေႃးဢၢပ်ႇႁိုင်ၼႆ ၵူဝ်သုၵ်းၵႂႃႇဢိူဝ်ႈ ၶိၵ်းၶိၵ်း”
“လႃႈလီႈသႅၼ်ဝႃႈဝီႈလူင်ၵႂႃႇ”
“တႄႉဢိူဝ်ႈမူဝ် ... တေႃႈဝႃႈပေႃးဢဝ်ၶႆႇၵႆႇၶႆႇပဵတ်း မႃးၸႄႈၼႆ ယင်းၸၢင်ႈသုၵ်းၵွႃႇၼႆယဝ်ႉ”
“ၼၼ်ၵႂႃႈ ... ၼၼ်ႉတႄႉပဵၼ်ၶႆႇၵႆႇၶႆႇပဵတ်ႈလႄႇ ၸွင်ႇပဵၼ်ၵူၼ်းၵေႃႈဢမ်ႇၸႂ်ႈ”
“ၵူၼ်းၵေႃႈသုၵ်းယူႇၵူၺ်း ... ပေႃးမူဝ်ဢမ်ႇယုမ်ႇၵေႃႈ ၸႄႈတူၺ်းႁိုင်ႁိုင်လႄႈ”
“ၸၢမ်သႅင်းၵေႃႉဝႃႈၼႃႇ ၸၢမ်သႅင်း လူဝ်ႇၸေႈတူၺ်း ဢိူဝ်ႈ”
“မူဝ်လူဝ်ႇၸေႈတူၺ်ႈႁိုင်ႁိုင်ဢိူဝ်ႈ ၶွင်ပိူဝ်ႈမူဝ်ဢမ်ႇယုမ်ႇၼႆ ၼႃႇ လူင်းၸႄႈလႄႈ ... ပေႃႈမူဝ်သုၵ်းၼႆ လူဝ်ႇၵိၼ်ၵပ်းၶဝ်ႈယဝ်ႉ”
ၼၢင်းမူဝ်ၶၢဝ် လူင်းၸႄႈၼႂ်းၼွင်ၼမ်ႉၼၼ်ႉသေ ဢဝ်ၼမ်ႉဢုၼ်ႇႁူတ်းၸၢမ်သႅင်းယဝ်ႉ၊ ၼၢင်းၸၢမ်သႅင်းၵေႃႈ ဢမ်ႇၶႂ်ႈၶၢမ်ႇလႄႈ မၼ်းၼၢင်းၵေႃႈၶို ၼ်းလူင်းၼႂ်းၼွင်သေ ၶိုၼ်းႁူတ်း ၼၢင်းမူဝ်ၶၢဝ်ယူႇ ၶႃသွင်ၵေႃႉ ၵျေႃႇသိူဝ်းသေႁူတ်းၵၼ်ယူႇ ... ၼၢင်းၸၢမ်သႅင်းၸင်ႇဝႃႈ
“မူဝ် ... ဢလူဝ်ႉပေႃးၵွၼ်ႇလႄႈ ၼမ်ႉၶဝ်ႈႁူၸၢမ်သႅင်း မူတ်းယဝ်ႉ”
“ၶိၵ်းၶိၵ်း ဢိတ်းၼိုင်ႈၵူၺ်း ... ဢမ်ႇၶဝ်ႈလႆႈမူတ်းယူဝ်ႉ ၼမ်ႉၼမ်ပေႃးပဵၼ်တၢၼ်ႇၼႆႉ ... ၶိၵ်းၶိၵ်း” ၼၢင်းၸၢမ်သႅင်း ၵိူင်းႁူဝ်မၼ်းသေ ၽႅတ်းႁႂ်ႈၼမ်ႉၼႂ်းႁူမၼ်းဢွၵ်ႇယူႇ မၼ်းၸင်ႇပွင်ႉဝႃႈ
“မူဝ်လႃႈလီႁူတ်းၼႃႇလူင်မေႃႉ ... ၼမ်ႉၶဝ်ႈႁူၸၢမ်သႅင်း ယဝ်ႉၼႃႇ တေႁဵတ်းႁိုဝ်ဢဝ်ဢွၵ်ႇ ၵမ်းၼႆႉ” “ႁႆး ... ၸၢမ်သႅင်းၶႅၼ်းလႃႈလီႁူတ်းယဝ်ႉ ၶူၼ်ႁူဝ်မူဝ်ၵေႃႈ ဢမ်ႇယမ်းမူတ်းယဝ်ႉႁိုဝ်”
“မူဝ် ... လူဝ်ႇသုၵ်ႈႁူဝ်ယူႇ ဢမ်ႇၸိုဝ်ႈႁိုဝ်လႃႇ”
“မိူဝ်ႈၸဝ်ႉၼၼ်ႉ ဢမ်ႇဢၢၼ်းသုၵ်ႈၵူၺ်း”
“သုၵ်ႈၼမ်ႉဢုၼ်ႇၼႆႉ ၶႅၼ်းၵဵင်ႈလီဢိူဝ်ႈ မူဝ်”
ၼၢင်းၸၢမ်သႅင်း ဢမ်ႇပႆႇၸၢင်ႈဢဝ် ၼမ်ႉၼႂ်းႁူမၼ်းဢွၵ်ႇလႆႈၵွၼ်ႇလႄႈ ၼၢင်းမူဝ်ၶၢဝ်ၸင်ႇထၢမ်ဝႃႈ-
“ဢမ်ႇပႆႇဢွၵ်ႇလႆႈႁႃႉ ၸၢမ်သႅင်း”
“ပႆႇဢွၵ်ႇ ... ပေႃးဢဝ်တႃမိုဝ်းထုပ်ႉၼႆ တိုၵ်ႉမႃးယွၼ်ႈ ၼႂ်းႁူၼႆႉယူႇ “တိုင်းတိုင်း”ၼႆယဝ်ႉ”
“ၵျႃႉယဝ်ႉၼႃႇ ... ၶႅၼ်းလႆႈထွမ်ႇ သဵင်ၵွင်မွင်းသိူင်းဢိူဝ်ႈၼၼ်ႉ ဢမ်ႇၸႂ်ႈႁႃႉ”
“မူဝ်ၼႆႉၼေႃ ... ယွၼ်ႉပိူဝ်ႈမူဝ်လႄႈ ၼမ်ႉၶဝ်ႈႁူၸၢမ်သႅင်းယဝ်ႉ ၵမ်ႉတႄႉ ၸၢမ်သႅင်း တေၸႂ်လမ်ယူႇၼႃႈ”
“ယႃႇပေၸႂ်လမ်ၼႃႈ မူဝ်တွင်းပၢၼ်ႇယူႇ ... ယွၼ်ႉပိူဝ်ႈ ၸၢမ်သႅင်းဢမ်ႇတွၼ်ႉလၢင်ႉႁူ သေပွၵ်ႈလႄႈ ပွၵ်ႈၼႆႉတႄႉ ဝႆႉၸႂ်ဝႃႈ မူဝ်လၢင်ႉႁူပၼ်ၼႆႁေယဝ်ႉၼႃႇ မႃးလႄႈ မူဝ်ဢဝ်ဢွၵ်ႇပၼ်”
“တေႁဵတ်းႁိုဝ်ဢဝ်ဢွၵ်ႇ”
“ၶိုၼ်းဢဝ် ၼမ်ႉသႂ်ႇထႅင်ႈသေ ပေႃးၶိုၼ်းၵိူင်းႁူၼႆ မၼ်းတေၶိုၼ်းႁူမ်ႈၵၼ် ဢွၵ်ႇမႃးမူတ်းမူတ်းယူႇ”
“ဢမ်ႇၸႂ်ႈယူဝ်ႉ မူဝ်”
“ၸႂ်ႈဢိူဝ်ႈ ... ၵိူင်းႁူၸၢမ်သႅင်းလႄႈ မူဝ်တေသႂ်ႇပၼ်”
ၼၢင်းၸၢမ်သႅင်းၵေႃႈ ၵိူင်းႁူဝ်မၼ်းပၼ်သေ ၼၢင်းမူဝ်ၶၢဝ် ဝၵ်ႉဢဝ်ၼမ်ႉထွၵ်ႇသႂ်ႇ ၼႂ်ႈႁူၼၢင်းၸၢမ်သႅင်းထႅင်ႈယဝ်ႉ၊ သဵင်ၼမ်ႉမေႃးၼႂ်းႁူမၼ်းယူႇ ဝိုင်းဝိုင်းလႄႈ
“ဢႃ ... ဢမ်ႇၸႂ်ႈလၢႆးမၼ်းယူဝ်ႉ မူဝ်”
“ၸႂ်ႈဢိူဝ်ႈ ... ယူႇဝႆႉႁဵတ်းၼႆၵမ်းၼိုင်ႈလႄႈ”
ၼၢင်းၸၢမ်သႅင်းၵေႃႈ ႁူႇၼႃႈမၼ်းသေ ယူႇဝႆႉယူႇႁဵတ်းၼၼ်ယဝ်ႉ ယူႇႁိုင်ၵမ်းၼိုင်ႈ ၼၢင်းမူဝ်ၶၢဝ် ၸင်ႇဝႃႈ
“ၶိုၼ်းၵိူင်းႁူဝ်သေ ထွၵ်ႇလႄႈၵမ်းၼႆႉ ၸၢမ်သႅင်း”
ၼၢင်းၸၢမ်သႅင်းၵေႃႈ ၵိူင်းႁူမၼ်းသေ ထွၵ်ႇၼမ်ႉဢွၵ်ႇယူႇ
“ၸွင်ႇဢွၵ်ႇမူတ်းယဝ်ႉႁိုဝ် ၸၢမ်သႅင်း”
“ဢွၵ်ႇယဝ်ႉ”
ဝၢႆးသေၼၼ်ႉ ၶႃသွင်ၵေႃႉ ၶိုၼ်းသိုပ်ႇဢၢပ်ႇၼမ်ႉလုၺ်းလဵၼ်ႈၼမ်ႉသိူဝ်းသိူဝ်းၼူဝ်ၼူဝ် ယုမ်ႉယုမ်ႉၶူဝ်ၶူဝ်ယူႇ။
ၸၢႆးမွၼ်းၶိူဝ်း ဢၢပ်ႇၼမ်ႉႁၢၼ်ႉၸႂ်ယဝ်ႉသေ မၼ်းၸင်ႇမႃးၸဵတ်ႉတူဝ်မၼ်း မႃးလၢႆႈၶူဝ်းမၼ်းယူႇ ... ယွၼ်ႉပိူဝ်ႈလႆႈဢၢပ်ႇ ၼမ်ႉဢုၼ်ႇလႆႈသီၶႆးဢွၵ်ႇပႅတ်ႈတၢင်းၼမ်လႄႈ ၼႂ်းၸႂ်မၼ်း ပဵၼ်ဢၼ်မဝ်တူဝ်မဝ်ၸႂ်ဝႆႉတႄႉတႄႉ ... လွင်ႈၵူၼ်ႉလွင်ႈၶိုၼ်ႈ တၢမ်ႇၵူၼ်ႉ ဢၼ်ၶိုၼ်ႈၵႂႃႇ ၼိူဝ်လွႆၸိူဝ်းၼၼ်ႉၵေႃႈ ႁၢႆလၢႆၵႂႃႇၼႂ်းၼမ်ႉဢုၼ်ႇ မူတ်းယဝ်ႉ။
မၼ်းၸၢႆးၼုင်ႈၶူဝ်းယဝ်ႉ မၼ်းၸၢႆးဢွၵ်ႇမႃးတီႈၼွၵ်ႈသေ မႃးၼင်ႈၼိူဝ်တင်ႇ တႂ်ႈၸွင်ႈလၢႆးၶဵဝ်လၢႆးလိူင်လၢႆးသွမ်ႇဢွၼ်ႇ တီႈ ၼိုင်ႈယူႇ၊ ၽွင်းၼၼ်ႉ ၼၢင်းမူဝ်ၶၢဝ်ၵေႃႈ ဢဝ်ၽႃႈၸဵတ်ႉ ၸဵတ်ႉပွတ်ႈႁူဝ်ၶူၼ်ႁူဝ်မၼ်းသေ ဢွၵ်ႇမႃးယူႇ၊ ၼၢင်းၸၢမ်သႅင်းၵေႃႈ ဢွၵ်ႇမႃးၸွမ်းၽၢႆႇလင်မၼ်းယဝ်ႉ ... ၶႃသွင်ၵေႃႉ လႆႈႁၼ်ၸၢႆးၶိူဝ်း ၼင်ႈပႂ်ႉတီႈတင်ႇၼၼ်ႉလႄႈ ၶႃသွင်ၵေႃႉၵေႃႈ မႃးၼင်ႈထႅင်ႈ တီႈတင်ႇ ၵေႃႉလုၵ်ႈလုၵ်ႈယဝ်ႉ။
ၼၢင်းမူဝ်ၶၢဝ် ၸင်ႇထၢမ်ဝႃႈ
“ပီႈၸၢႆးၶိူဝ်း ပေႃးမႃးႁိုင်ယဝ်ႉႁႃႉ”
“ၸင်ႇႁႃဢွၵ်ႇမႃး ၼင်ႈၵႅပ်ႉၼိုင်ႈၵူၺ်းၼင်ႇၵဝ်ႇ”
“ဢူႈမူဝ်ၶဝ်လူး ပႆႇဢၢပ်ႇယဝ်ႉႁႃႉ ပီႈၸၢႆးၶိူဝ်း”
“ယဝ်ႉၼင်ႇၵဝ်ႇယဝ်ႉ ... ၼႄႈ ... ဢွၵ်ႇမႃးတီႈၼၼ်ႈယဝ်ႉလူး”
လုင်းၸိုၼ်ႈၵေႃႈ ၸင်ႇမႃးၸူး ၶဝ်သၢမ်ၵေႃႉၼၼ်ႉသေ ထၢမ်ဝႃႈ
“ၶဝ်ပႆႇဢဝ်ၶဝ်ႈၽၵ်းမႃးတမ်းႁႃႉ ... ဢူႈသင်ႇဝႆႉ ၸဵမ်မိူဝ်ႈၵႆႈယဝ်ႉၼႆႉ”
လုင်းၸိုၼ်ႈၵေႃႈ ၸင်ႇႁွင်ႉလၢတ်ႈ ႁႂ်ႈဢဝ်ၶဝ်ႈၽၵ်း မႃးတမ်းယဝ်ႉ၊ ၵူၼ်းၸိူဝ်းဢၼ် ၶဝ်မႃးၸွမ်းၵၼ်ၼၼ်ႉ မၢင်ၸိူဝ်း ၵႂႃႇသိုဝ်ႉၵိၼ်ၼႂ်းသႅင်ႇ တီႈၼွၵ်ႈမၼ်း ၵမ်ႈၽွင်ႈယဝ်ႉ... ဝၢႆးသေၶဝ် ၵိၼ်ၶဝ်ႈယဝ်ႉ ၶဝ်ၶိုၼ်ႈမိူဝ်းလႄႇတူၺ်း ၼိူဝ်လွႆၵွင်းမူႈယဝ်ႉ။
ၶူဝ်လႆဢၼ်ၶိုၼ်ႈမႃး ၼိူဝ်လွႆ ၵွင်းမူးၼၼ်ႉ ပဵၼ်ဢၼ် ၸၼ်းဝႆႉတၢၼ်ႇတၢၼ်ႇလႄႈ ၽွင်းၶဝ်ၶိုၼ်ႈႁွတ်ႈထိုင် ၵၢင်မၼ်းၼၼ်ႉ ၸၢႆးမွၼ်းၶိူဝ်းၸင်ႇထၢမ်ဝႃႈ
“ႁိူဝ်ႉယဝ်ႉႁႃႉ ... မူဝ်ၶၢဝ် ၸၢမ်သႅင်း ... ပေႃးႁိူဝ်ႉၵေႃႈ လိုဝ်ႈၵမ်းၼိုင်ႈလႄႈ”
ၼၢင်းၸၢမ်သႅင်းၸင်ႇဝႃႈ
“ၶႃၵူၼ်ႉဢိူဝ်ႈ ... ၼင်ႈတီႈၼႆႈၵမ်ႉၼိုင်ႈလႄႈမူဝ်”
ၼၢင်းမူဝ်ၶၢဝ်ၵေႃႈ ၼင်ႈၼိူဝ်သိၵ်ႈၶူဝ်လႆသေ ဝၢႆႇတူၺ်းမႃး တၢင်းဢၼ်ၶဝ်တႄႇၶိုၼ်ႈမႃးၼၼ်ႉယဝ်ႉ၊ ၸၢႆးမွၼ်းၶိူဝ်းတႄႉ ၸုၵ်းႁိမ်းၶၢင်ႈ ၼၢင်းမူဝ်ၶၢဝ်သေ လိုဝ်ႈႁိူဝ်ႉယူႇ မၼ်းၸင်ႇထၢမ်ဝႃႈ
“တေထႆႇႁၢင်ႈ တီႈၼႆႉႁႃႉ မူဝ်ၶၢဝ်”
“ပႆႇၵွၼ်ႇ ပီႈၸၢႆးၶိူဝ်း ပႂ်ႉမိူဝ်းထႆႇ တီႈၼိူဝ်ၼၼ်ႉဢဝ်ယဝ်ႉ”
ၸၢႆးမွၼ်းၶိူဝ်း ၵမ်းၵမ်းယၵ်ႉတူၺ်း ၶႃသွင်ၵေႃႉယူႇတိၵ်းတိၵ်းလႄႈ ၼၢင်းမူဝ်ၶၢဝ်ၸင်ႇဝႃႈ
“ပီႈၸၢႆးၶိူဝ်း ... ႁဵတ်းသင်ပႄႉတူၺ်ႈပိူၼ်ႈတိၵ်းတိၵ်းလႃႇ”
“ဢမ်ႇတူၺ်းပိူၼ်ႈသႄႈ တူၺ်းမူဝ်ၶၢဝ်ၶႃသွင်ၵေႃႉၵူၺ်းဢိူဝ်ႈ”
“တူၺ်းႁဵတ်းသင်လႃႇ”
“ဢေႃ ... ဝၢႆးသေဢၢပ်ႇၼမ်ႉဢုၼ်ႇယဝ်ႉ ဢၢပ်ႈႁၢင်ႈလီ မႃးတႄႉတႄႉၼႆလႄႈ ၸင်ႇတူၺ်းယဝ်ႉ”
“ပေႃးၼႆ မိူဝ်ႈပႆႇဢၢပ်ႇၼမ်ႉၼၼ်ႉ ဢမ်ႇႁၢင်ႈလီႁႃႉ”
“ႁၢင်ႈလီယူႇ ဝၢႆးသေ ဢၢပ်ႇၼမ်ႉယဝ်ႉ ၶႅၼ်းႁၢင်ႈလီမႃး ၼႆၵႂႃႈ”
“ၶိၵ်း ... ၶိၵ်း ... ဝႃႈတႄႉႁႃႉ ပီႈၸၢႆးၶိူဝ်း ၶႂ်ႈၵိၼ်သင်”
“ဢမ်ႇၶႂ်ႈၵိၼ်သင်ယဝ်ႉ ... တွင်ႉတိုၵ်ႉၵႂ်ႈယူႇလူး”
ယူႇၼိုင်ႈၵႅပ်ႉ ၶဝ်သၢမ်ၵေႃႉ သိုပ်ႇၶိုၼ်ႈမႃးထိုင်ၼိူဝ်လွႆသေ မႃးဝႆႈၽြႃးၼိူဝ်လွႆယူႇ ဝၢႆးသေဝႆႈၽြႃးယဝ်ႉ ၼၢင်းၸၢမ်သႅင်း ၸင်ႇထၢမ်
“မူဝ် ... ဝႆႈႁိုင်ၵျႃႉလႃႇ ယွၼ်းသူးသင်”
“ၸၢမ်သႅင်းလူး ယွၼ်းသူးသင်လႃႇ”
“မူဝ်လၢတ်ႈဢွၼ်တၢင်းလႃႇ”
ၼၢင်းမူဝ်ၶၢဝ် ၸင်ႇၶိုၼ်းထၢမ် ၸၢႆးၶိူဝ်းယဝ်ႉ
“ပီႈၸၢႆးၶိူဝ်းၼႃႇ ... ယွၼ်းသူးသင်”
“ယွၼ်းသူး ႁႂ်ႈလႆႈမႃးဢၢပ်ႇၼမ်ႉဢုၼ်ႇထႅင်ႈၼႆဝႃႇ”
“ဢူဝ် ... ၶိၵ်း ... ၶိၵ်း ... ပီႈၸၢႆးၶိူဝ်းယွၼ်းသူးၼႆႉ ပဵၼ်ဝႆႉမဵဝ်းၼိုင်ႈလႃႇ ယင်းဢမ်ႇမိူၼ်ပိူၼ်ႈ”
“ပိူၼ်ႈယွၼ်းသူး ၸိူင်ႇႁိုဝ်လၢႆလၢႆလႃႇ မူဝ်ၶၢဝ်”
“ႁႂ်ႈၵၢင်ၸႂ်မုင်ႈမွင်းတဵမ်ထူၼ်ႈသေၵမ်း ႁႂ်ႈလႆႈမူၼ်ႈ တူၼ်ႈၸႂ်သေၵမ်း ႁႂ်ႈယူႇလီသေၵမ်း တႄႉဢဝ်ၸိူဝ်းၼႆႉသေ ၵမ်းလိုၼ်း ႁႂ်ႈႁွတ်ႈၼိပ်ႉပၢၼ်ႇသေၵမ်း ၼႆဢိူဝ်ႈ၊ ၼႆႉပီႈၸၢႆးၶိူဝ်းယွၼ်း သူးသမ်ႉဝႃႈ ႁႂ်ႈလႆႈမႃးဢၢပ်ႇၼမ်ႉဢုၼ်ႇထႅင်ႈသေၵမ်းၼႆဝႃႇ”
“ဢၼ်ပီႈၸၢႆးၶိူဝ်းယွၼ်းသူးၼႆႉၵေႃႈ ၶဝ်ႈပႃး ၼႂ်းၸိူင်ၼင်ႇပိူၼ်ႈယွၼ်းသူးၼင်ႇၵဝ်ႇလူးမူဝ်ၶၢဝ်”
“ၶဝ်ႈပႃးၸိူင်ႉႁိုဝ်”
“ဢေႃႈ ... ပေႃးဢၢပ်ႇၼမ်ႉဢုၼ်ႇၼႆ မူၼ်ႈသိူဝ်းၸႂ်ယူႇၼႃႇ သမ်ႉလႆႈသုၵ်ႈတူဝ်သီၶိင်းသေ တေလႆႈယူႇလီယူႇၼႃႇ ... လိူဝ်သေၼၼ်ႉ လႆႈဢုၼ်ႇတူဝ်ဢုၼ်ႇၸႂ်ယူႇလူး”
ၼၢင်းၸၢမ်သႅင်းၸင်ႇဝႃႈ
“ပေႃးၼႆ ပီႈၸၢႆးၶိူဝ်း ၶႂ်ႈယွၼ်းသူး ႁႂ်ႈလႆႈဢၢပ်ႇၼမ်ႉဢုၼ်ႇသေႇသေႇ ၼႆၵွၼ်ႇယူဝ်ႉ ... ဢမ်ႇၸႂ်ႈႁႃႉ”
“ၸႂ်ႈဢိူဝ်ႈ ၸၢမ်သႅင်း”
“ၼမ်ႉဢုၼ်ႇတီႈၼႆႉ လိူတ်ႇဝႆႉတၢၼ်ႇတၢၼ်ႇ ဢမ်ႇၸႂ်ႈႁႃႉ”
“ၸႂ်ႈဢိူဝ်ႈ”
“ပေႃးတူမ်ႈၶႆႇၵႆႇၸွင်ႇသုၵ်းႁိုဝ်”
“သုၵ်းဢိူဝ်ႈ”
“ပေႃးၼႆ ဢမ်ႇႁိုင်ဢမ်ႇၼၢၼ်း ပေႃးပီႈၸၢႆးၶိူဝ်းဢၢပ်ႇ သေႇသေႇၼႆတႄႉ ပီႈၸၢႆးၶိူဝ်းတေသုၵ်းယဝ်ႉ တေပဵၼ်ၵူၼ်းသုၵ်းယဝ်ႉ”
“သုၵ်းၵေႃႈၸၢင်ႈပဵၼ်သင် ၽင်ပႅတ်ႈႁေယဝ်ႉၼႃႇ”
ၶႃသွင်ၵေႃႉၵႂင်ၵႂႃႇသေ ၼၢင်းမူဝ်ၶၢဝ်ၸင်ႇထၢမ်ဝႃႈ
“ပီႈၸၢႆးၶိူဝ်း ၶႂ်ႈဝႃႈပွင်ႇသင်ၼႆ မူဝ်ၶဝ်တႄႉဢမ်ႇႁူႉပွင်ႇယဝ်ႉ”
“သုၵ်းလႄႈလိပ်း ... လိပ်းလႄႈသုၵ်းးၼႆႉ ပဵၼ်ၵႂၢမ်း သၢၼ်ၶတ်းၵၼ်ဢမ်ႇၸႂ်ႈႁႃႉ ဢၼ်ၸၢမ်သႅင်းဝႃႈ တေပဵၼ်ၵူၼ်းသုၵ်းၼႆၼၼ်ႉ ပွင်ႇဝႃႈ တေပဵၼ်ၵူၼ်းဢမ်ႇလိပ်းၼႆဢမ်ႇၸႂ်ႈႁႃႉ ၵူၼ်းဢမ်ႇလိပ်းၼႆ ပဵၼ်ၵူၼ်းတၢႆၵူၺ်းဢိူဝ်ႈ ၵွပ်ႈၼႆ ပီႈၸၢႆးၶိူဝ်း ၸင်ႇဝႃႈ သုၵ်းၵေႃႈဢမ်ႇပဵၼ်သင် ၽင်ပႅတ်ႈလႄႈၼႆယဝ်ႉ”
ၼၢင်းၸၢမ်သႅင်းၸင်ႇၶိုၼ်းဝႃႈ
“ဢေႃႈ ... ပီႈၸၢႆးၶိူဝ်း ယႃႇပေၽိတ်းၸႂ်ၼႃႈ ၸၢမ်သႅင်းတႄႉ လၢတ်ႈၵႂႃႇသေတႃႉ ယင်းဢမ်ႇဝူၼ်ႉထိုင် လွင်ႈဝႃႈ တေၵႂႃႇဝႃႈ ၺႃးလွင်ႈတၢႆၼၼ်ႉလႃႈ”
“ဢမ်ႇၽိတ်းၸႂ်ၵူၺ်း ၸၢမ်သႅင်း ... ၵူၼ်းၸိူင်ႉၼင်ႇပီႈ ၸၢႆးၶိူဝ်းၼႆႉ ပိၵ်ႉသမ်ႉဝႃႈ တၢႆၵႂႃႇၵေႃႈ တေႃႈယင်းတေဢမ်ႇမီးၵေႃႉ သေလၢႆယူဝ်ႉ”
လႆႈငိၼ်း ၸၢႆးမွၼ်းၶိူဝ်းလၢတ်ႈၵႂႃႇၼင်ႇၼႆ ၶေႃႈၵႂၢမ်းမၼ်းၼၼ်ႉ လွမ်လွမ်မႃးတိူဝ်ႉသႂ်ႇၸႂ် ၼၢင်းမူဝ်ၶၢဝ်ဝႆႉယူႇယဝ်ႉ မၼ်းၼၢင်း ၸင်ႇဝႃႈ
“ယူဝ်ၶႄး မီးဝႆႉယူႇယူဝ်ႉ ပီႈၸၢႆးၶိူဝ်း”
“လိူဝ်သေ မႄႈ ဢမ်ႇမီးၽႂ်သႄႈ”
“မီးဢိူဝ်ႈ”
“မီးတီႈလႂ်”
“မီးတၢင်းပၢင်လွင်းပုၼ်ႉၼႃႇ သၢဝ်ပၢင်လွင်းၶဝ်ဢိူဝ်ႈ”
“ဢႃ ... မူဝ်ၶၢဝ်လႃႈလီဝႃႈ”
“ပီႈၸၢႆးၶိူဝ်း ဢမ်ႇယုမ်ႇႁႃႉ”
“ဢမ်ႇယုမ်ႇ”
ၼၢင်းၸၢမ်သႅင်း ၸင်ႇဝႃႈ
“ပေႃးဢမ်ႇယုမ်ႇၵေႃႈ တၢႆတူၺ်းလႄႈ ၵူၼ်းသေးလၢႆ ပီႈၸၢႆးၶိူဝ်း မီးဝႆႉယဝ်ႉ တီႈလဵဝ်”
“တႄႉႁႃႉ ၸၢမ်သႅင်း”
“တႄႉဢိူဝ်ႈ”
“မီးတီႈလႂ်ပေႃးၼႆ”
ၼၢင်းၸၢမ်သႅင်း ၸင်ႇဢဝ်မိုဝ်းမၼ်းၸီႉ ၼၢင်းမူဝ်ၶၢဝ် သေလၢတ်ႈဝႃႈ
“မီးၼႆႉၼႃႇ”
ၼၢင်းမူဝ်ၶၢဝ် လီဢၢႆၼႃႈမႆႈၵႂႃႇသေ မၼ်းၼၢင်းၸင်ႇ ၼႅတ်ႈထဵင်ဝႃႈ
“ဢမ်ႇၸႂ်ႈ”
ၼႆသေ ဢဝ်တႃမိုဝ်းထုပ်ႉပၼ် ၼၢင်းၸၢမ်သႅင်းယဝ်ႉ
ၼၢင်းၸၢမ်သႅင်း ၸင်ႇၶိုၼ်းဝႃႈ
“ပေႃးမူဝ်ဢမ်ႇသေလၢႆၼႆ”
ၼၢင်းမူဝ်ၶၢဝ် ၶိုၼ်းဝႃႈ
“ဢူဝ် ... ၸၢမ်သႅင်းၼႆႉ ၵႂၢမ်ႈဢမ်ႇမီးၼမိၵ်ႈလီမဵဝ်းၼႆႉ ဢမ်ႇလီလၢတ်ႈၵူၺ်း ပေႃးၶႂ်ႈလၢတ်ႈၵေႃႈ လၢတ်ႈတၢင်ႇမဵဝ်ႈလေႃႇ”
“ပေႃးၼႆၵေႃႈ မူဝ်သူးတွင်းသင်လႃႇ ၸၢမ်သႅင်းၶႂ်ႈႁူႉ ဢိူဝ်ႈ”
“ၸၢမ်သႅင်းလၢတ်ႈဢွၼ်တၢင်းလႄႈ”
“မူဝ်လၢတ်ႈလေႃႇ”
ၼၢင်းမူဝ် ၸင်ႇဢဝ်မဵတ်ႉႁႃႈပႅၵ်ႉဢွၵ်ႇမႃးသေ
“ပေႃးၼႆၵေႃႈ ဢဝ်မဵတ်ႉႁႃႈပႅၵ်ႉၼႆႉဝႃႈဢဝ်ႁိုဝ်ႉ ၸၢမ်သႅင်း တေဢဝ်ၽၢႆႇလႂ်”
“ၸၢမ်သႅင်းႁႃႉ ဢဝ်ၽၢႆႇမွၵ်ႇ”
“ဢိူဝ်ႈ ... လီယဝ်ႉ ... မူဝ်ဢဝ်ၽၢႆႇဢၼ်မီးၵွၵ်းႁူဝ် ပေႃးဝႃႈ မဵတ်ႉပေးၼႆႉ ပဵၼ်ၵွၵ်းႁူဝ်ၼႆ ၸၢမ်သႅင်း လူဝ်ႇလႆႈလၢတ်ႈဢွၼ်တၢင်းၼႃႈ”
“ဢိူဝ်ႈ”
“ၼၢင်းမူဝ်ၶၢဝ် ဢဝ်မဵတ်ႉပေးဝိုတ်ႉၶိုၼ်ႈတီႈၼိူဝ်သေ ၶိုၼ်းဝူင်တူၵ်းမႃး ၼႂ်းၵၢင်ၶဝ်သၢမ်ၵေႃႉယဝ်ႉ၊ ၶဝ်သၢမ်ၵေႃႉၵေႃႈ ၶႂ်ႈႁူႉ တေပဵၼ်ၽၢႆႇလႂ်ၼႆလႄႈ ၶဝ်ဢွၼ်ၵၼ်ၵူမ်ႈတူၺ်း မဵတ်ႉပေးၼၼ်ႉ တင်းသၢမ်ၵေႃႉယဝ်ႉ
“တိုၵ်ႉ! တိုၵ်ႉ!”
“ဢႃႉ ! ဢူဝ်ႉ! ဢႂ်ႉ! ၼၢင်းမူဝ်ၶၢဝ် လုပ်ႈၵမ်းႁူဝ်းမၼ်းသေ ၼႅတ်ႈဝႃႈ
“ႁေး ၼႄႈ ... တူၺ်းလႄႈ ပဵၼ်ၽၢႆႇၵွၵ်းႁူဝ်ဢိူဝ်ႈ ၼႄႈ ၸၢမ်သႅင်း လူဝ်ႇလႆႈလၢတ်ႈဢွၼ်တၢင်းယဝ်ႉ”
ယွၼ်ႉပိူဝ်ႈ ၸၢႆးမွၼ်းၶိူဝ်းၶႃ ၼၢင်းမူဝ်ၶၢဝ်ႁူမ်ႈၵၼ်တုမ်ႉ ၺႃးႁူဝ်မၼ်းၼၢင်းၸၢမ်သႅင်း ႁႅင်းတၢၼ်ႇတၢၼ်ႇလႄႈ ႁူဝ်မၼ်းၼၢင်း ၸဵပ်းၵႂႃႇတၢၼ်ႇတၢၼ်ႇသေ မၼ်းဢဝ်မိုဝ်းမၼ်းသွင်ၶွၼ် ပွတ်ႈၼႃႈၽၢၵ်ႇမၼ်း သွင်တီႈယူႇ ၼၢင်းမူဝ်ၶၢဝ် ၸင်ႇဝႃႈ-
“လၢတ်ႈလႄႈ ၸၢမ်သႅင်း”
“ဢမ်ႇလၢတ်ႈ ၽႂ်ၸႂ်ႉၶိူဝ်သွင်ၵေႃႉ ႁူမ်ႈၵၼ်သေ ဢဝ်ႁူဝ် မႃးတုမ်ႉပၼ် ၸၢမ်သႅင်းတင်းသွင်ၵေႃႉဝႃႇ ... ႁိုဝ်ႉ!”
“ဢူဝ် ... ၸၢမ်သႅင်းၵေႃႈ ၼႆႉတႄႉဢမ်ႇၽၢင်ႉဢမ်ႇထိူမ်သေလႄႈ ပဵၼ်ၵႂႃႇ ၸွင်ႇမူဝ်ၶဝ် တင်ႈၸႂ်ႁဵတ်းၵေႃႈ ဢမ်ႇၸႂ်ႈ”
ၸၢႆးမွၼ်းၶိူဝ်းၵေႃႈ ၸင်ႇၶိုၼ်းဝႃႈ
“ၸဵပ်းၼမ်ႁႃႉ ၸၢမ်သႅင်း”
“ၸဵပ်းဢိူဝ်ႈ”
“ပေႃးၸဵပ်းၼႆ ယႃႇပေႁႆႈၼႃႈ ပေႃးႁႆႈၼႆ ႁဝ်းတေထႆႇႁၢင်ႈဝႆႉၼႆ မၼ်းတေဢမ်ႇႁၢင်ႈလီယဝ်ႉ”
ၼၢင်းမူဝ်ၶၢဝ် ၸင်ႇၶိုၼ်းဝႃႈ
“တႄႉဢိူဝ်ႈ ႁဝ်းတေထႆႇတီႈလႂ်တေလီၼႆႉ ပီႈၸၢႆးၶိူဝ်း”
ၸၢႆးမွၼ်းၶိူဝ်းၵေႃႈ လွမ်တူၺ်း တီႈတေထႆႇႁၢင်ႈၶႃသွင်ၵေႃႉသေ ထႆႇပၼ်တီႈမၢႆတွင်း ၶႃသွင်ၵေႃႉယဝ်ႉ၊ ဝၢႆးသေၶဝ်ထႆႇႁၢင်ႈယဝ်ႉ ဝၢႆႇသေလႄႈ မုင်ႈတူၺ်းၵူႈၽၢႆႇၽၢႆႇယဝ်ႉ၊ ၶဝ်သၢမ်ၵေႃႉၶိုၼ်း လူင်းၶူဝ်လႆမႃးသေ ဢုပ်ႇၵၼ်မႃးယူႇ။ ၼၢင်းမူဝ်ၶၢဝ်ၸင်ႇဝႃႈ
“ၸၢမ်သႅင်းထုၵ်ႇၼီႈမူဝ်ဝႆႉ မဵဝ်းၼိုင်ႈ”
“ၼီႈ ဢီႈသင်”
“ၼီႈဢၼ်လူဝ်ႇလၢတ်ႈ လွင်ႈယွၼ်းသူးသင်ဢၼ်ဝႃႈ ၼၼ်ႉဢိူဝ်ႈ”
“ဢေႃ ...ၼႆႉႁႃႉ ... ၸၢမ်သႅင်းယွၼ်းသူးတႄႉ မွၵ်ႇဢၼ်ၵီႈလူင်ႇလဵဝ်ၼၼ်ႉ ႁႂ်ႈပဵၼ်ပုၼ်ႈတႃႇၵေႃႉလဵဝ်သေၵမ်း ၼႆဝႃႇ မူဝ်လူး ယွၼ်းသူးသင် လၢတ်ႈလႄႈ”
“မူဝ်လိုမ်းၵႂႃႇယဝ်ႉလႄႇ ၸၢမ်သႅင်း”
“ဢမ်ႇလႆႈ ... ဢမ်ႇလႆႈၵူၺ်း ... လၢတ်ႈလႄႈမူဝ်”
“ဝႃႈတႄႉၵေႃႈ မူဝ်ယွၼ်းသူး ယႃႇပေႁႂ်ႈထူပ်းၽေးသင် သေၵမ်းၼႆယဝ်ႉ”
“ၼႆႉၵူၺ်းႁႃႉမူဝ်”
ၼၢင်းမူဝ်ၶၢဝ် ငွၵ်းႁူဝ်ၼႄ ၸၢမ်သႅင်းသေ ၶိုၼ်းထၢမ်ဝႃႈ
“ဢေႃႈ ... ပီႈၸၢႆးၶိူဝ်း တင်းယွၼ်းသူးၼႆႉ ၸွင်ႇတေ ပဵၼ်မႃးလႆႈယူႇ တႄႉတႄႉႁိုဝ်”
ၸၢႆးမွၼ်းၶိူဝ်းၵေႃႈ ၸင်ႇၶႆႈၸႂ်တူၺ်းလီလီသေတွပ်ႇဝႃႈ
“သိပ်းသမ်ႇသႅၼ်ပိူင် မီးတီႈၸႂ်ၼႆၼႃႇ မူဝ်ၶၢဝ် ပိူင်လူင်မၼ်းတႄႉ ပဵၼ်တီႈၸႂ်ၵူၺ်းယဝ်ႉ”
“ပေႃးၼႆ လီယွၼ်းသူးယူႇၼေႃႈ ပီႈၸၢႆးၶိူဝ်း”
“လီယူႇၵူၺ်း ... ယွၼ်းသူးဝႆႉၼႆႉ လီသေ ဝႆႉယွၼ်းသူးယဝ်ႉ ၵွပ်ႈၼႆ ဢၼ်မူဝ်ၶၢဝ်ယွၼ်းသူးၼၼ်ႉၵေႃႈ ႁႂ်ႈတဵမ်ထူၼ်ႈ တူၼ်ႈၸႂ်သေၵမ်းၼႆ ပီႈၸၢႆးၶိူဝ်းၶိုၼ်းယွၼ်းသူးပၼ်ယူႇ”
လႆႈငိၼ်းၸၢႆးမွၼ်းၶိူဝ်းဝႃႈၼင်ႇၼၼ် ၼၢင်းမူဝ်ၶၢဝ် ပဵၼ် ဢၼ်ၸူမ်းသိူဝ်းၼႂ်းၸႂ်မၼ်းၼၢင်းယူႇ ၼၢင်းၸၢမ်သႅင်း ၸင်ႇဝႃႈ
“ပီႈၸၢႆးၶိူဝ်း ... ဢၼ်ၸၢမ်သႅင်းယွၼ်းသူးၼၼ်ႉလူး ပီႈၸၢႆးၶိူဝ်းဢမ်ႇၸွႆႈယွၼ်းသူးပၼ်ႁႃႉ”
“ယွၼ်းသူးပၼ်ယူႇၵူၺ်း ၸၢမ်သႅင်း မွၵ်ႇဢၼ်ၵီႈလူင်ႇလဵဝ်ၼၼ်ႉ ႁႂ်ႈပဵၼ်တႃႇၵေႃႉလဵဝ်သေၵမ်းလႃႈ”
ၶၢဝ်သၢမ်ၵေႃႉ လူင်းၽႅဝ်တီႈၼိူဝ်တၢင်းၵႃးသေ ၽွင်းၼၼ်ႉ ၵူၼ်းၶဝ်ၵေႃႈ ၽႅဝ်ႁွတ်ႈမႃးမူတ်းယဝ်ႉလႄႈ ၶဝ်ၸင်ႇဢွၼ်ၵၼ် ၶိုၼ်းပႆၵႂႃႇၸူးႁိူဝ်းၶဝ်သေ ႁိူဝ်းၶဝ်ၵေႃႈ ၶိုၼ်းႁေႃႈမႃး ယွင်ႈႁူၺ်ႇယဝ်ႉ၊ ႁွတ်ႈၽႅဝ်ထိုင်မႃး ယွင်ႈႁူၺ်ႇယဝ်ႉလႄႈ ၶဝ်မႃးၶီႇၵႃး ၼၢင်းမူဝ်ၶၢဝ်ၶဝ်သေ ၶိုၼ်းမိူဝ်းတူၼ်ႈတီးယဝ်ႉ ၵႃးၶဝ်ပူၼ်ႉသူၺ်ႇၺွင်ႇမႃးသေ ၽွင်းတိုၵ်ႉ ဢဝ်ႁႅင်းၼဵင်ႇၶိုၼ်ႈလွႆယူႇတိၵ်းတိၵ်းၼၼ်ႉ ၽႅဝ်မႃးတီႈၼိုင်ႈဢဝ်ၸၢၵ်ႈၵႃးၶဝ် မႃးလူႉလႄႈ ၶဝ်လႆႈၵိုတ်းၵႃးၶဝ်ဝႆႉ တီႈႁိမ်းၽင်ႇတၢင်းသေ ၵူၼ်းႁေႃႈၵႃး ၼၢင်းမူဝ်ၶၢဝ်ၶဝ် မႃးၽုၺ်ႇ တူၺ်းႁူဝ်ၵႃး ႁၢႆးလဵၵ်ႉၶဝ်သေ ႁႃတူၺ်းတီႈလူႉမၼ်းယူႇ၊ ၵူၼ်းၼိူဝ်ၵႃးၸိူဝ်းၼၼ်ႉၵေႃႈ ဢွၼ်ၵၼ်လူင်းၵႃးသေ မႃးယူႇသဝ်းလိုဝ်ႈႁိမ်း ၵႃးၼၼ်ႉယူႇ ၸၢႆးမွၼ်းၶိူဝ်းးတႄႉ မႃးတူၺ်းတီႈႁူဝ်ၵႃးၼၼ်ႉသေ ဢူႈၼၢင်ႈမူဝ်ၶၢဝ်ၶဝ် ၸင်ႇဝႃႈ
“ပဵၼ်သင်တီႈလႂ်”
“ဢမ်ႇပႆႇႁူႉၶႃႈ ... ၶႄးပဵၼ်တီႈၵၢပ်ႇပေႇတႃႇမၼ်းၼႆႉယူဝ်ႉ”
ၸၢႆးမွၼ်းၶိူဝ်းၵေႃႈ မႃးၸွႆႈႁႃ တီႈလူႉမၼ်းယူႇ တီႈဢၼ် လူဝ်ႇၽုၺ်ႇႁီႉမၼ်းၸိူဝ်းၼၼ်ႉၵေႃႈ ၸွမ်းၼင်ႇလုင်းထုၼ်းၸႂ်ႉ မၼ်ႈၸၢႆးၼၼ်ႉ မၼ်းၸၢႆးၶတ်းၸႂ်ၸွႆႈ ထႅမ်လုင်းထုၼ်းယူႇ လုင်းထုၼ်း ၸင်ႇထၢမ်ဝႃႈ
“ၽုၺ်ႇလႆႈယူႇႁႃႉ ... ႁီႉမၼ်းၸိူဝ်းၼၼ်ႉ ၸၢႆး”
“ဢၼ်ၼိူဝ်ၼႆႉတႄႉ လႆႈယူႇလုင်း ဢၼ်ၸိူဝ်းၼႆႉတႄႉ လူဝ်ႇယူႇတႂ်ႈၵႃးသေ ၽုၺ်ႇဢဝ်ၸင်ႇတေလႆႈယူဝ်ႉ”
“ဢိူဝ်ႈ ... ၽုၺ်ႇႁႂ်ႈမၼ်းလႆႈလႄႈ”
ၸၢႆးမွၼ်းၶိူဝ်း မႄးၸဵတ်ႉမိုဝ်းမၼ်း ဢၼ်ၼုၵ်းဢိူၵ်ႇ ၼမ်ႉမၼ်းၵႃးၼၼ်ႉသေ မၼ်းၸၢႆႈတေၶဝ်ႈတႂ်ႈၵႃးလႄႈ မၼ်းၸၢႆး ၵူဝ်သိူဝ်ႈမၼ်း ၼုၵ်းၼမ်ႉမၼ်းၼႆ မၼ်းၸၢႆးၸင်ႇလွၼ်ႈသိူဝ်ႈမၼ်း မူတ်းမူတ်းယဝ်ႉ၊ ၼၢင်းမူဝ်ၶၢဝ်ၶႃၵေႃႈ လွမ်တူၺ်းမၼ်းဝႆႉယူႇ၊ မၼ်း ၸၢႆးၼၼ်ႉ ပဵၼ်ၵူၼ်းၶၢဝ် ၵူၼ်းႁၢင်ႈလီၵေႃႉၼိုင်ႈယဝ်ႉ၊ ႁၢင်ႈၽၢင် တူဝ်ၶိင်းမၼ်းၵေႃႈ ပဵၼ်ဢၼ်တိုၵ်ႉယိုတ်ႈယႂ်ႇ တိုၵ်ႉႁၢင်ႈလီ ဢွၵ်ႇႁၢင်ႈပၵ်းၽၢင်ၵူၼ်းၸၢႆးပီလီတႄႉတႄႉ၊ လုင်းထုၼ်း ဢဝ်သၢတ်ႇဢွၼ်ႇ ၽိုၼ်ၼိုင်ႈ ယိုၼ်ႈပၼ်မၼ်းၸၢႆးလႄႈ မၼ်းဢဝ်သိူဝ်ႇတႂ်ႈၵႃးသေ မၼ်းမူၼ်ႉၶဝ်ႈၵႂႃႇတႂ်ႈၵႃး ... မၼ်းၼွၼ်းတၢၵ်ႇႁၢႆသေ ဢဝ်ၵႂႃႉၽုၺ်ႇသေႈၵႃးယူႇ။ ၽွင်းမိူဝ်ႈတိုၵ်ႉၽုၺ်ႇသႄႈၵႃး ဢၼ်ၼိုင်ႈယဝ်ႉ ဢၼ်ၼိုင်ႈၼၼ်ႉ ၶူးၼင်မၼ်းၸၢႆးၶူမ်းလႄႈ မၼ်းဢဝ်မိုဝ်းမၼ်း ပွတ်ႈသီၶူႈၼင်မၼ်းသွင်သၢမ်ၵမ်းသေ ၶိုၼ်းသိုပ်ႇၽုၺ်ႇ လႅမ်ႈသေႈၵႃးယူႇ ယွၼ်ႉပိူဝ်ႈ မိုဝ်းမၼ်းၼုၵ်းၼမ်ႉမၼ်းလမ်ဝႆႉလႄႈ ၽွင်းမိူဝ်ႈမၼ်းဢဝ်မိုဝ်းမၼ်း သီၶူႈၼင်ႇမၼ်းၼၼ်ႉ ၼမ်ႉမၼ်းၵႃး ၼုၵ်းဢိူၵ်ႇဝႆႉၽၢႆႇၼိူဝ်သူပ်းမၼ်းသေ ပဵၼ်ၼူတ်ႇၶွပ်ႇ လမ်ၽိုတ်းဝႆႉယူၼႆ မၼ်းၸၢႆးဢမ်ႇႁူႉ
ဝၢႆးသေၽုၺ်ႇလႆႈယဝ်ႉ မၼ်းၸင်ႇမူၼ်ႉဢွၵ်ႇတႂ်ႈၵႃးမႃးယဝ်ႉ၊ ၼၢင်းမူဝ်ၶၢဝ် ၼၢင်းၸၢမ်သႅင်း ဢိၵ်ႇလူၺ်ႈ ၵူၼ်းၸိူဝ်းၼၼ်ႉ လႆႈႁၼ်မၼ်းၸၢႆး မီးၼူတ်ႇဝႆႉလႄႈ ၶဝ်ဢွၼ်ၵၼ်ၸူမ်းၶူဝ်မၼ်း ယူႇသေတႃႉ မၼ်းပႆႇႁူႉတူဝ်မၼ်း၊ မၼ်းၵေႃႈ လႃႈလီႈယုမ်ႉၶူဝ် ၸွမ်းၶဝ်ယူႇ ၶဝ်လႆႈႁၼ်မၼ်း ယုမ်ႉၶူဝ်ၼင်ႇၼၼ် ၶဝ်ၶႅၼ်းပဵၼ်ဢၼ်ၸူမ်းၶူဝ်ၵႂႃႇတႄႉတႄႉယဝ်ႉ၊ ၼၢင်းမူဝ်ၶၢဝ်ၸင်ႇဝႃႈ
“ၶိၵ်း ... ၶိၵ်း ... ပီႈၸၢႆးၶိူဝ်း ၵႂႃႇတူၺ်းႁၢင်ႈပီႈၸၢႆးၶိူဝ်း ၼႂ်းမၢၼ်ႇၸမ်ႈၼၼ်ႉလူး”
“ၵႂႃႇတူၺ်းႁဵတ်းသင်”
“ဢမ်ႇႁဵတ်းသင်သေတႃႉ ၵႂႃႇတူၺ်းၵွၼ်ႇလႄႈ ၶိၵ်းၶိၵ်း”
ၸၢႆးၶိူဝ်း ၵႂႃႇလွမ်တူၺ်းႁၢင်ႈမၼ်း ၼႂ်းမၢၼ်ႇၸမ်ႈၵႃးၼၼ်ႉၼႆ မၼ်ႈလႆႈႁၼ်ႁၢင်ႈမၼ်း မီးၼူတ်ႉဝႆႉလႄႈ မၼ်းၶိုၼ်းၶူဝ်တူဝ်မၼ်းယူႇ လုင်းထုၼ်းၸင်ႇဝႃႈ
“ႁႃႉ ... ႁႃႉ ... ၼူတ်ႇၸၢႆးႁၢင်ႈလီၵျႃႉ မိူၼ်ၼူတ်ႉပႃလုၵ်း လီလီယဝ်ႉ”
ၶဝ်ဢွၼ်ၵၼ်ၶူဝ်မၼ်းယူႇ မၼ်းၸၢႆးၵေႃႈ ၸင်ႇၼႅတ်ႈ ၸဵတ်ႉပႅတ်ႈၽႂ်းၽႂ်းသေ ၶိုၼ်းမႃးၸွႆႈလုင်းထုၼ်းယူႇ လုင်းထုၼ်း ၸင်ႇထၢမ်ဝႃႈ
“ၸၢႆးယၢမ်ႈမေႃမႄးၵႃးယူႇႁႃႉ”
“ဢေႃႈ ... မေႃဢိတ်းဢိတ်းဢွတ်းဢွတ်းဢေႃႈ”
“လႆႈၵႂႃႇသွၼ်တီႈလႂ်လႃႇ”
“ဢူႈႁဝ်းၵေႃႈ ပဵၼ်ၵူၼ်းႁေႃႈၵႃးၵေႃႉၼိုင်ႈလႄႈ ၽွင်းမိူဝ်ႈမၼ်းမႄးၵႃးၼၼ်ႉ ၶႃႈယၢမ်ႈၸွႆႈမၼ်းလႄႈ ႁူႉဝႆႉၵမ်ႈၽွင်ႈဢေႃႈ”
“ဢိူဝ်ႈ ဢိူဝ်ႈ လီဢိူဝ်ႈ ပိူၼ်ႈဝႃႈယူႇလူး ႁူႉဝႆႉၼႆႉလီသေ ဝႆႉႁူႉ၊ မေႃဝႆႉၼႆႉလီသေဝႆႉမေႃၼႆဝႃႇ ... သင်ၸိူဝ်ႉဝႃႈ ၸၢႆးဢမ်ႇႁူႉဝႆႉ ဢမ်ႇမေႃဝႆႉၼႆ လုင်းၵေႃႉလဵဝ်လူဝ်ႇလႆႈယၢပ်ႇႁၢင်းၵူၺ်းတႄႉတႄႉယဝ်ႉၼႆႉ”
တီႈလူဝ်ႇသုၵ်ႈလၢင်ႉၵေႃႈ ၸၢႆးမွၼ်းၶိူဝ်း ၸွႆႈထႅမ်သုၵ်ႈလၢင်ႉ တီႈလူဝ်ႇသႂ်ႇၵေႃႈ မၼ်းၸွႆႈထႅမ်သႂ်ႇပၼ်လႄႈ ဢမ်ႇႁိုင် ဢမ်ႇၼၢၼ်း ၶိုၼ်းပဵၼ်ဢၼ်ယဝ်ႉတူဝ်ႈၵႂႃႇယဝ်ႉ၊ လုင်းထုၼ်းၸင်ႇ ၶိုၼ်းၸၢမ်းတူၺ်း ၸၢၵ်ႈၵႃးမၼ်းယူႇယဝ်ႉ။
“ၶလႅၵ်ႉ ... ႁိုၼ်ႉ...! ႁိုၼ်ႉ...!
လႆႈငိၼ်းသဵင်ၵႃးၶဝ် မေႃးလင်ပဵၼ်တူဝ်ၶိုၼ်းယဝ်ႉလႄႈ ၶဝ်ပဵၼ်ဢၼ်ၸူမ်းသိူဝ်းၵႂႃႇၵူႈၵေႃႉယဝ်ႉ၊ ဝၢႆးသေ ၸွႆႈသိမ်းၶိူင်ႈယိပ်းၸိူဝ်းၼၼ်ႉယဝ်ႉ လုင်းထုၼ်းၶႃ ၸၢႆးမွၼ်းၶိူဝ်း မႃးသုၵ်ႈမိုဝ်းၶႃယူႇ ... လုင်းထုၼ်း ဢဝ်ၽႅၼ်ႇပွတ်းၼိုင်ႈ ၸုပ်ႉထၢတ်ႈသီႇသေ ပၼ်ၸၢႆးမွၼ်းၶိူဝ်းယဝ်ႉ။
“ႁိူဝ်ႈ ... ဢဝ်ၽႅၼ်ႇၼႆႉ ၸဵတ်ႉဢွၼ်တၢင်းလႄႈ”
ၸၢႆးမွၼ်းၶိူဝ်းၵေႃႈ ၸဵတ်ႉမိုဝ်းမၼ်းၵဵင်ႈၵဵင်ႈယဝ်ႉသေ ၶိုၼ်းဢဝ်ၽႅၼ်ႇၼၼ်ႉ ပၼ်လုင်းထုၼ်းယဝ်ႉ၊ လုင်းထုၼ်း ၸဵတ်ႉမိုဝ်းမၼ်းသေဝႃႈ
“ၼႄႈ ... ဢဝ်ၼမ်ႉလႄႈ ၵွၼ်ႈသီၼႆႉသေ သုၵ်ႈလႄႈ ၸၢႆး”
“ဢေႃႈ ... ဢေႃႈ”
ၸၢႆးမွၼ်းၶိူဝ်းၵေႃႈ သုၵ်ႈမိုဝ်းမၼ်းယဝ်ႉသေ ၶိုၼ်းဢဝ် ၼမ်ႉထွၵ်ႇပၼ်မိုဝ်းလုင်းထုၼ်းယူႇ
“လႆႈယဝ်ႉ ... လႆႈယဝ်ႉ ... ၸၢႆး”
ဝၢႆးသေၼၼ်ႉ ၶဝ်ၸင်ႇဢွၼ်ၵၼ်ၶိုၼ်းၶိုၼ်ႈၵႃးယဝ်ႉ၊ ၸၢႆးမွၼ်းၶိူဝ်းၵေႃႈ ၼႅတ်ႈၶိုၼ်းၼုင်ႈသိူဝ်ႈမၼ်းသေ မႃးၶိုၼ်ႈၼင်ႈ ၽၢႆႇလင်ၵႃးယဝ်ႉ ၼၢင်းမူဝ်ၶၢဝ် ၸင်ႇသုတ်ႉပၼ် တီႈၼင်ႈဢိတ်း ၼိုင်ႈသေ
“ၼင်ႈလႄႈ ပီႈၸၢႆးၶိူဝ်း”
မၼ်းၸၢႆးၵေႃႈ ၼင်ႈဢႅပ်ႉသႂ်ႇႁိမ်းၼၢင်းမူဝ်ၶၢဝ်ဝႆႉယဝ်ႉ၊ ၼႂ်းၸႂ်ၶႃသွင်ၵေႃႉတႄႉ လွမ်လွမ် ပဵၼ်ဝႆႉမဵဝ်းၼိုင်ႈၼင်ႇၵၼ်ယူႇ ၼၢင်းမူဝ်ၶၢဝ်ၸင်ႇဝႃႈ
“ပီႈၸၢႆးၶိူဝ်း ယၢပ်ႇၸႂ်သေႁိူဝ်ႉၵႂႃႇယဝ်ႉယူဝ်ႉ”
“ဢမ်ႇယၢပ်ႇၵူၺ်း ႁိူဝ်ႉၵေႃႈဢမ်ႇႁိူဝ်ႉသင်ၼင်ႇၵဝ်ႇ”
“ၵႃးၶဝ်သိုပ်ႇႁေႃႈၶိုၼ်ႈၽႅဝ်မႃးတူၼ်ႈတီးယူႇ ၶဝ်မႃး ၼႂ်းပွၵ်ႉဢူးၵျီးၶမ်းသေ ၽႅဝ်မႃးႁိူၼ်းၼၢင်းမူဝ်ၶၢဝ်ၶဝ်ယဝ်ႉ ၼၢင်းမူဝ်ၶၢဝ်ၸင်ႇဝႃႈ
“ၼႆႉပဵၼ်ႁိူၼ်း မူဝ်ၶဝ်ဢိူဝ်ႈၼႆႉ ပီႈၸၢႆးၶိူဝ်း လူင်းလႄႈ”
ၸၢႆးၶိူဝ်းၵေႃႈလူင်းၵႃးမႃးသေ လွမ်တူၺ်းႁိူၼ်းၼၢင်းမူဝ် ၶၢဝ်ၼႆ လႆႈႁၼ်ၸဵမ်ဝၢင်းႁိူၼ်း ၸဵမ်ႁိူၼ်းဢုတ်ႇသွင်ၸၼ်ႉ ပဵၼ် ဢၼ်ႁၢင်ႈလီၶႅမ်ႉလႅပ်ႈတႄႉတႄႉ မၼ်းၸၢႆးၶိုၼ်ႈဢဝ်ထူင်မၼ်းၼိူဝ် ၵႃးသေ ၶိုၼ်းလူင်းမႃးယူႇ ၼၢင်းမူဝ်ၶၢဝ်ၸင်ႇဝႃႈ
“မိူဝ်းၼင်ႈၼႂ်းႁိူၼ်းၵွၼ်ႇလႄႈ ပီႈၸၢႆးၶိူဝ်း”
“လႆႈယဝ်ႉ မူဝ်”
ဢူႈၼၢင်းမူဝ်ၶၢဝ်ၶဝ်ၵေႃႈ ၸင်ႇဝႃႈ
“တႄႉဢိူဝ်ႈ ၸၢႆးမွၼ်းၶိူဝ်း ... မိူဝ်းၵိၼ်ၼမ်ႉၼဵင်ႈၶူမ် ၵွၼ်ႇလႄႈ”
“မႃးလႄႈ ပီႈၸၢႆးၶိူဝ်း”
ၸၢႆးမွၼ်းၶိူဝ်းၵေႃႈၵဵင်ၸႂ်သေ ၸွမ်းမိူဝ်းၼႂ်းႁိူၼ်း မိူဝ်းၼင်ႈၸွမ်းၵူၼ်းလူင်ၶဝ်သေ ၵိၼ်ၼမ်ႉၼဵင်ႈၶူမ် ၵိၼ်မၢၵ်ႇဝၼ်းဝၢႆႇ မၢၵ်ႇဢူမ်ၸွမ်းပိူၼ်ႈယူႇ ... ပိူၼ်ႈပဵၼ်ၵူၼ်းလူင်ၵူၺ်းၵူၺ်းလႄႈ မၼ်းဢမ်ႇပေႃးမေႃယူႇႁိုင် ၵွပ်ႈၼႆ ဝၢႆးသေမၼ်းသူတ်ႉၼမ်ႉၼဵင်ႈယဝ်ႉ ယူႇၵႅပ်ႉၼိုင်ႈ မၼ်းၸင်ႇဝႃႈ-
“ၶႃႈတေ ပူၼ်ႉမိူဝ်းၵွၼ်ႇၶႃႈလုင်း”
လုင်းၸိုၼ်ႈၸင်ႇဝႃႈ
“ပႄႉၼႅတ်ႈလႃႇ ၸၢႆးမွၼ်းၶိူဝ်း မီးၵၢၼ်ႁႃႉ”
“ဢေႃႈ ... ၶႃႈလူဝ်ႇၵႂႃႇႁိူၼ်းမႄႈၼႃႉႁဝ်းၶဝ်ၵွၼ်ႇဢေႃႈ”
“ဢိူဝ်ႈ ... ဢိူဝ်ႈ လီယဝ်ႉ ပေႃးၽႅဝ်တူၼ်ႈတီးၼႆ မႃးဢႅဝ်ႇ ႁိူၼ်းလုင်းၶဝ်လႄႈၼႃႈ”
“ဢေႃႈ ... ဢေႃႈ ... ၶႃႈတေၵႂႃႇၵွၼ်ႇၶႃႈ”
မၼ်းတူင်ႉတၵ်ႉၵူၼ်းၸိူဝ်းၼၼ်ႉသေ ဢွၵ်ႇမႃးတၢင်းၼွၵ်ႈယဝ်ႉ၊ ၼၢင်းမူဝ်ၶၢဝ် လႄႈ ၼၢင်းၸၢမ်သႅင်းၵေႃႈ ၸွမ်းမႃးသူင်ႇမၼ်းယူႇ ၼၢင်းမူဝ်ၶၢဝ်ၸင်ႇထၢမ်ဝႃႈ
“ပီႈၸၢႆးၶိူဝ်း တေမိူဝ်းလွႆလႅမ်မိူဝ်ႈလႂ်”
“တေမိူဝ်းမိူဝ်ႈၽုၵ်ႈဢိူဝ်ႈ မူဝ်ၶၢဝ်”
“ဢေႃႈ ... ပီႈၸၢႆးၶိူဝ်း ၵႃႈၶႅပ်းႁၢင်ႈဢၼ် ပီႈၸၢႆးၶိူဝ်းထႆႇၼၼ်ႉလူး တေလႆႈပၼ်ဝႆႉမိူဝ်ႈလဵဝ်ႁႃႉ”
“ယႃႇၽူမ်ႈပၼ်ၵွၼ်ႇ မိူဝ်ႈလႂ်လႆႈၶႅပ်းႁၢင်ႈၵွၼ်ႇလႄႈၼႃႈ”
ၸၢႆးမွၼ်းၶိူဝ်း ၸင်ႇၽုၺ်ႇထူင်ႇမၼ်းသေ ဢဝ်ပပ်ႉဢွၼ်ႇဢွၵ်ႇမႃးသေပပ်ႉၼိုင်ႈယဝ်ႉ၊ မၼ်းၸင်ႇဢဝ်ပပ်ႉလႄႈ ၵမ်တႅမ်ႈပၼ်ၼၢင်းမူဝ်ၶၢဝ်သေ
“ယေႃႈ ... မူဝ်ၶၢဝ် ... ၶႅၼ်းတေႃႈတႅမ်ႈပၼ်ႁဵင်းလိၵ်ႈ မူဝ်ၶၢဝ်ၽွင်ႈလႄႈ ... ၸၢမ်သႅင်းၵေႃႈ တႅမ်ႈပၼ်ၽွင်ႈၼႃႈ”
ၼၢင်းမူဝ်ၶၢဝ်ၵေႃႈ တႅမ်ႈပၼ်ယဝ်ႉသေ မၼ်းၶိုၼ်းဢဝ် ပပ်ႉပၼ်ၼၢင်းၸၢမ်သႅင်းယဝ်ႉ ... ၽွင်းမိူဝ်ႈၼၢင်းၸၢမ်သႅင်း တိုၵ်ႉတႅမ်ႈယူႇၼၼ်ႉ ၼၢင်းမူဝ်ၶၢဝ်ၸင်ႇဝႃႈ
“ဢေႃႈ ... ပီႈၸၢႆးၶိူဝ်း ပႂ်ႉၵမ်းၼိုင်ႈၼႃႈ ... မူဝ်တေၵႂႃႇ ဢဝ်ပပ်ႉမၢႆတွင်း မူဝ်မႃးၵွၼ်ႇၼႃႈ”
“လႆႈယူႇ”
ၼၢင်းမူဝ်ၶၢဝ်ၵေႃႈ ဢႅၼ်ႇၶဝ်ႈမိူဝ်ႈၼႂ်းႁိူၼ်းသေ မိူဝ်းဢဝ် ပပ်ႉမၢႆတွင်း ဢၼ်ၵေႃႉႁူႉၸၵ်းၵၼ် တႅမ်ႈႁဵင်းလိၵ်ႈ တႅမ်ႈၶေႃႈသင်ႇ ၸိူဝ်းၼၼ်ႉ ပၼ်ၵၼ်ၼၼ်ႉယဝ်ႉ၊ မၼ်းၼၢင်းၸင်ႇဢဝ်ပပ်ႉမၼ်းပၼ် ၸၢႆးမွၼ်းၶိူဝ်းသေ
“ယေႃႈ ... ပီႈၸၢႆးၶိူဝ်း ၸဵမ်ႁဵင်းလိၵ်ႈလႄႈ ၶေႃႈၵႂၢမ်းသင်ႇ ပီႈၸၢႆးၶိူဝ်းၼၼ်ႉ ၶႅၼ်းတေႃႈ တႅမ်ႈပၼ်ၼႂ်းပပ်ႉၼႆႉလႄႈ”
ၸၢႆးမွၼ်းၶိူဝ်းၵေႃႈ ဢဝ်ပပ်ႉၼၢင်းမူဝ်ၶၢဝ်သေ ပိုတ်ႇၽုၺ်ႇတူၺ်း တီႈတေတႅမ်ႈၼၼ်ႉယူႇ ဢၼ်ပိူၼ်ႈတႅမ်ႈဝႆႉပၼ် မၼ်းၼၢင်းၵေႃႈ မီးၼမ်မီးၸေးၵူႈမဵဝ်းယဝ်ႉ ... ၸၢႆးမွၼ်းၶိူဝ်းၵေႃႈ ၸင်ႇတႅမ်ႈ-
✽ မူဝ် ✽
သင်ၶုၵ်းၸႂ်လႆႈ - သင်ၶႆႈၸႂ်ထိုင်
ၼႆၸိုင်ၶႅၼ်းတေႃႈ - ပွင်တႅမ်ႈၶေႃႈၵႂၢမ်း
ၶၢဝ်းယၢမ်းၽၢတ်ႇၵၼ် - မွင်းႁၼ်လိၵ်ႈသူ
ပႂ်ႉလူၵူႈၶၢဝ်း - တႅမ်ႈမႃးယၢဝ်းၵေႃႈ
တေႃႈဢမ်ႇၽိတ်းၸႂ် - မႂ်ႁဵင်းလိၵ်ႈႁဝ်း
မီးသဝ်းတႂ်ႈၼႆႉ - တႅမ်ႈယူႇဝႆႉပၼ်
ၵေႃႉဢၼ်တေဢမ်ႇလိုမ်း
ၵေႃႉဢၼ်တေတွင်းၵိုမ်း
ၸၢႆးမွၼ်းၶိူဝ်း
မၢႆႁိူၼ်း(---)
ပွၵ်ႉမၢႆသီႇ - ဝဵင်းလွႆလႅမ်
ၸၢႆးမွၼ်းၶိူဝ်း ဝူၼ်ႉဢွၵ်ႇတႅမ်ႈပၼ်ၼင်ႇၼႆသေ ၶိုၼ်းဢဝ်ပပ်ႉယိုၼ်ႈပၼ် ၼၢင်းမူဝ်ၶၢဝ်ယဝ်ႉ။
“ယေႃႈ ... မူဝ်ၶၢဝ် တႅမ်ႈယဝ်ႉယဝ်ႈ”
ၼၢင်းမူဝ်ၶၢဝ်ၵေႃႈ ႁပ်ႉဢဝ်သေ ၶိုၼ်းၽုၺ်ႇလူတူၺ်း ၵမ်းလဵဝ်ယဝ်ႉ၊ လႆႈႁၼ် ၸၢႆးမွၼ်းၶိူဝ်း တႅမ်ႈပၼ်ၵႂၢမ်းၵပ်းထုၵ်ႇ ပုၵ်ႈၼိုင်ႈလႄႈ မၼ်းၼၢင်းလူတူၺ်းယဝ်ႉၵႂႃႇသေ ပဵၼ်ဢၼ်ထုၵ်ႇၸႂ်မၼ်းတႄႉတႄႉ ... ပပ်ႉဢၼ်ၼၢင်းၸၢမ်သႅင်းဢဝ် တႅမ်ႈႁဵင်းလိၵ်ႈ ယူႇၼၼ်ႉၵေႃႈ မၼ်းၼၢင်းၶိုၼ်းဢဝ်ပၼ် ၸၢႆးမွၼ်းၶိူဝ်းယဝ်ႉ၊ ၽွင်းၼၼ်ႉ ၸၢႆးမွၼ်းၶိူဝ်း ၸင်ႇဢဝ်ၶူဝ်း ဢၼ်မီးၼႂ်းထူင်မၼ်းၼၼ်ႉ ဢွၵ်ႇမႃးယဝ်ႉ၊ ယွၼ်ႉပိူဝ်ႈ မၼ်းဢဝ်ၽႃႈၸဵတ်ႉၼႃႈ ပူၵ်ႉႁေႃႇဝႆႉလႄႈ ပဵၼ်ဢီႈသင်ၵေႃႈ ဢမ်ႇႁူႉ မၼ်းၸင်ႇဝႃႈ
“မူဝ်ၶၢဝ်လႄႈ ၸၢမ်သႅင်း”
“ဢီႈသင် ... ပီႈၸၢႆးၶိူဝ်း”
“ဢေႃႈ ... ဢၼ်ၼႆႉ ၸဵမ်မိူဝ်ႈၵႂႃႇၼႂ်ႈၼွင်ၼၼ်ႉ ပီႈၸၢႆးၶိူဝ်း တိုၼ်းဢဵၼ်းဢၢၼ်းသိုဝ်ႉမႃး တႃႇပဵၼ်ၶွင်ၽၢၵ်ႇ ပုၼ်ႈတႃႇမူဝ်ၶၢဝ်လႄႈ ၸၢမ်သႅင်းၼႆယဝ်ႉ”
ၶႃသွင်ၵေႃႉ ၸူမ်းသိူဝ်းသေ ဝႃႈဢွၵ်ႇႁူမ်ႈၵၼ်
“တႄႉႁႃႉ ... ပီႈၸၢႆးၶိူဝ်း ပဵၼ်ဢီႈသင်ၼၼ်ႉ”
ၸၢႆးမွၼ်းၶိူဝ်းၵေႃႈ ၸင်ႇၽုၺ်ႇၽႃႈၸဵတ်ႉၼႃႈၼၼ်ႉသေ လႆႈႁၼ်ပဵၼ်ႁၢင်ႈၵူၼ်းၼႂ်းၼွင် ဢၼ်တိုၵ်ႉၸုၵ်းသေ ဢဝ်တိၼ် ၽၢႆးႁိူဝ်း ဢၼ်ဢဝ်မႆႉသေ သိဝ်ႇႁဵတ်းဝႆႉၼၼ်ႉယဝ်ႉ ထႅင်ႈဢၼ် ၼိုင်ႈတႄႉ ပဵၼ်ႁၢင်ႈၵူၼ်းၸၢႆးၵေႃႉၼိုင်ႈ တိုၵ်ႉဢဝ်တိၼ်ၽၢႆးႁိူဝ်းသေ သမ်ႉမီးဝႆႉ ၼၢင်းယိင်းၵေႃႉၼိုင်ႈတိုဝ်းၵုပ်းသေ ၼင်ႈဝႆႉယူႇ တီႈၼိူဝ်ႁိူဝ်းၼၼ်ႉယဝ်ႉ။
မၼ်းၸၢႆးဢဝ် ဢၼ်မီးၵူၼ်းသွင်ၵေႃႉၼၼ်ႉ ပၼ်ၼၢင်းမူဝ်ၶၢဝ် ဢဝ်ဢၼ်မီးၵူၼ်းၸၢႆးၵေႃႉလဵဝ်ၼၼ်ႉ ပၼ်ၼၢင်းၸၢမ်သႅင်းယဝ်ႉ။
“ယေႃႈ ... မူဝ်ၶၢဝ် လႄႈၸၢမ်သႅင်း ဢမ်ႇမီးၵႃႈၶၼ်သေတႃႉၵေႃႈ ၶႅၼ်းတေႃႈဝႆႉပဵၼ်တီႈမၢႆတွင်း မိူဝ်ႈၽွင်းၵႂႃႇၼႂ်းၼွင်သေ ႁပ်ႉဢဝ်ဝႆႉလႄႈၼႃႈ”
ၶႃသွင်ၵေႃႉ လွမ်လွမ်ယုမ်ႉတူၺ်းၼႃႈၵၼ်သေ ႁပ်ႉဢဝ် ၼင်ႇၵၼ်ယဝ်ႉ
“ၸူမ်းယဝ်ႉ ... ပီႈၸၢႆးၶိူဝ်း”
“ပီႈၸၢႆးၶိူဝ်းၵႂႃႇသိုဝ်ႉတီႈလႂ်ၼႆႉ မူဝ်ၶၢဝ်ယင်းဢမ်ႇႁၼ် တီႈပိူၼ်ႈၶၢႆ”
“ပိူၼ်ႈၶၢႆယူႇတီႈတႂ်ႈၵျွင်းၽြႃးၼၼ်ႉၼႃႇ မူဝ်ၶၢဝ် မိူဝ်ႈႁဝ်း ၵႂႃဢႅဝ်တူၺ်းၼၼ်ႉ မူဝ်ၶၢဝ်ဢမ်ႇႁၼ်ၺႃးႁႃႉ”
“ၵူၼ်းၼမ်ၼႃႇလႄႈ မူဝ်တေဢမ်ႇတၼ်းတူၺ်းႁၼ်ၺႃးယူဝ်ႉၼေႃ”
“တေၸႂ်ႈယူႇပေႃးၼႆ ပီႈၸၢႆးၶိူဝ်းတေၵႂႃႇၵွၼ်ႇၼႃႈ မူဝ်ၶၢဝ် ၸၢမ်သႅင်း”
“ဢေႃႈ ... လီယဝ်ႉ ပီႈၸၢႆးၶိူဝ်း ၸၢမ်သႅင်းၶဝ်ၵေႃႈ မုင်ႈမွင်းၶိုၼ်းထူပ်းႁၼ်ၵၼ်ယူႇ”
“မွၼ်း ... မွၼ်း ... ၵႂႃႇၵွၼ်ႇ”
ၸၢႆးမွၼ်းၶိူဝ်းၵေႃႈ တူင်ႉတၵ်ႉၶႃသွင်ၵေႃႉသေ ပႆဢွၵ်ႇဝၢင်းႁိူၼ်း ၼၢင်းမူဝ်ၶၢဝ်ၶဝ် သိုပ်ႇပႆမႃးၼိူဝ်တၢင်းၵႃးယူႇ ... ၽွင်းၼၼ်ႉ ၵႃးတႅၵ်ႉၸီႇလိူင်လမ်းၼိုင်ႈ ၽႅဝ်မႃးႁိမ်းမၼ်းလႄႈ မၼ်းၸင်ႇႁႄႉၵိုတ်းသေ ၶိုၼ်ႈၶီႇၼိူဝ်ၵႃးၼၼ်ႉယဝ်ႉ၊ ၽွင်းၵႃးဢွၵ်ႇၵႂႃႇၼၼ်ႉ မၼ်းယုမ်ႉတူၺ်း ၶႃသွင်ၵေႃႉသေ ၶိုၵ်းၵၵ်းမိုဝ်းဝႆမိုဝ်းၼႄၶႃသွင်ၵေႃႉယဝ်ႉ။
ၶႃသွင်ၵေႃႉၵေႃႈ ၶိုၼ်းၵၵ်းၵႆဝႆမိုဝ်းၼႄမၼ်းၸၢႆးသေ တူၺ်းၸွမ်းလင်ၵႃး ဢၼ်ၸၢႆးမွၼ်းၶိူဝ်းၶီႇၵႂႃႇၼၼ်ႉ တေႃႇပေႃး လပ်ႉသၢႆတႃၵႂႃႇယဝ်ႉ ၶႃသွင်ၵေႃႉ ၶိုၼ်းပႆၶဝ်ႈမႃးၼႂ်းဝၢင်းႁိူၼ်းသေ ၼၢင်းၸၢမ်သႅင်း ၸင်ႇဝႃႈ
“မူဝ် ... ပီႈၸၢႆးၶိူဝ်း တႅမ်ႈဝႆႉဝႃႈႁိုဝ် ပၼ်ၸၢမ်သႅင်းတူၺ်း ၽွင်ႈလူး”
ၶႃသွင်ၵေႃႉ မႃးၼင်ႈၼႂ်းသူၼ်မွၵ်ႇၶဝ်ၼၼ်ႉသေ လွမ်တူၺ်း လိၵ်ႈဢၼ်ၸၢႆးမွၼ်းၶိူဝ်း တႅမ်ႈပၼ်ဝႆႉၼၼ်ႉယူႇ ၼၢင်းၸၢမ်သႅင်း တူၺ်းသေ ၸင်ႇလူဢွၵ်ႇသဵင်ယဝ်ႉ။
“မူဝ် ... သင်ၶုၵ်းၸႂ်လႆႈ သင်ၶႆႈၸႂ်ထိုင် ၼႆၸိုင်ၶႅၼ်းတေႃႈ ပွင်တႅမ်ႈၶေႃႈၵႂၢမ်း ၶၢဝ်းယၢမ်းၽၢတ်ႇၵၼ် မွင်းႁၼ်လိၵ်ႈသူ ပႂ်ႉလူၵူႈၶၢဝ်း တႅမ်ႈမႃးယၢဝ်းၵေႃႈ တေႃႈဢမ်ႇၽိတ်းၸႂ် မႂ်ႁဵင်းလိၵ်ႈႁဝ်း မီးသဝ်းတႂ်ႈၼႆႉ တႅမ်ႈယူႇဝႆႉပၼ် ၵေႃႉဢၼ်တေဢမ်ႇလိုမ်း ၵေႃႉဢၼ်တေတွင်းၵိုမ်း ၵေႃႉဢၼ်တေႁၵ်ႉၵိုမ်း ဝႃႇ”
ၼၢင်းၸၢမ်သႅင်းလၢတ်ႈလိူဝ်ၶေႃႈၼိုင်ႈလႄႈ ၼၢင်းမူဝ်ၶၢဝ် ၸင်ႇတူၵ်းၸႂ်ၵႂႃႇသေ
“ႁႆး ... ၸၢမ်သႅင်းၼႆႉၼေႃ ၵမ်းလိုၼ်းၼၼ်ႉၵေႃႈ ဢမ်ႇပႃးႁေလႄႈ လႃႈလီႈဝႃႈ”
“ၶိၵ်း ... ၶိၵ်း ဢမ်ႇဢဝ်မိုၵ်ႉသေ တႅမ်ႈဝႆႉၵေႃႈ ယူဝ်ၶႄး ဢဝ်ၸႂ်တႅမ်ႈဝႆႉယူႇယူဝ်ႉ ... မူဝ်”
“ဢမ်ႇသႅင်ႇသင်”
“မိူဝ်ႈလဵဝ် ဢမ်ႇသႅင်ႇသေတႃႉ ဝၢႆးၼႆႉတေသႅင်ႇမႃးယူႇ ယူဝ်ႉ တူၺ်းၶွင်ၽၢၵ်ႇ ဢၼ်ပီႈၸၢႆးၶိူဝ်းၽၢၵ်ႇပၼ်ၼၼ်ႉလေႃႇ”
“ၸၢမ်သႅင်း ၶႂ်ႈဝႃႈပွင်ႇၸိူင်ႉႁိုဝ်လၢတ်ႈလူး”
“ဢေႃ ... ၶွင်ၽၢၵ်ႇဢၼ်ပီႈၸၢႆးၶိူဝ်းပၼ်မူဝ်ၼၼ်ႉၼႆ မီးၵူၼ်းၸၢႆးမၢဝ်ၵေႃႉၼိုင်ႈ ဢိၵ်ႇလူၺ်ႈ ၼၢင်းယိင်းသၢဝ်ၵေႃႉၼိုင်ႈ ၶီႇႁိူဝ်းဝႆႉ ဢမ်ႇၸႂ်ႈႁႃႉ”
“ၸႂ်ႈဢိူဝ်ႈ”
“ၵေႃႉၵူၼ်းၸၢႆးၼၼ်ႉ မၵ်းမၢႆပဵၼ် ပီႈၸၢႆးၶိူဝ်း ၵေႃႉၵူၼ်းယိင်းၼၼ်ႉ တႄႉပဵၼ်ၼၢင်းမူဝ်ၶၢဝ်ဝႃႇ... ၶိၵ်းၶိၵ်း”
ၼၢင်းမူဝ်ၶၢဝ် လီဢၢႆၵႂႃႇသေ ဢဝ်တႃမိုဝ်းမၼ်းထုပ်ႉပၼ် ႁူဝ်မႃႇၼၢင်းၸၢမ်သႅင်းယူႇ
“ဢူဝ် ... ၸၢမ်သႅင်းၼႆႉ လႃႈလီဝႃႈ ဢမ်ႇၸႂ်ႈၵူၺ်း”
“ၸႂ်ႈဢိူဝ်ႈ”
“ဢမ်ႇၸႂ်ႈ”
“ပေႃးၼႆ ၵွပ်ႈသင် မူဝ်သမ်ႉဝႃႈ ဢမ်ႇၸႂ်ႈၼႆလႃႇ”
“ၵေႃႉၵူၼ်းၸၢႆးၼႆႉ ပဵၼ်ပီႈၸၢႆးၶိူဝ်း ၵေႃႉၵူၼ်းယိင်းၼႆႉ ပဵၼ်သၢဝ်ပၢင်လွင်းဝႃႇ”
“သၢဝ်တူၼ်ႈတီးယူဝ်ႉ”
“ဢမ်ႇၸႂ်ႈ”
“ၸႂ်ႈဢိူဝ်ႈ”
“ဢမ်ႇၸႂ်ႈ”
ၼၢင်းၸၢမ်သႅင်း ၶိုၼ်းဝႃႈ
“ဝွၵ်းဢၼ် ပီႈၸၢႆးၶိူဝ်းတႅမ်ႈဝႆႉၼၼ်ႉ ၸၢပ်ႈလႅပ်ႈဝႆႉၼင်ႇၵဝ်ႇၼေႃ မူဝ်”
“တႄႉဢိူဝ်ႈၼေႃ ... မၼ်းတႃႉၵိုင်ႉၵၢင်ႉဝူၼ်ႉလႆႈသေ တႅမ်ႈလႆႈၵမ်းလဵဝ်ၼႆ မူဝ်ၵေႃႈယွင်ႈယေႃးယူႇတႄႉတႄႉ လႆႈၸႂ်တႄႉတႄႉယဝ်ႉ”
“လႆႈၸႂ်တႄႉတႄႉႁႃႉ”
“လႆႈၸႂ်သင် ၸၢမ်သႅင်းၶႂ်ႈဝႃႈပွင်ႇသင်”
“ဢေႃ ... လႆႈၸႂ်ၵူၼ်းတႅမ်ႈမၼ်းႁႃႉ”
“ႁႆး ... မူဝ်ဝႃႈ လႆႈၸႂ်ဝွၵ်းမၼ်းၼႆဢိူဝ်ႈ”
“ပိူၼ်ႈဝႃႈ လႃႇၼမ်ႉတွင်ႈၸႂ်ပႃ လႃႇမႃတိူဝ်ႉၸႂ်ၸဝ်ႈမၼ်း ၼႆဝႃႇ ၵွပ်ႈၼႆ ပေႃးလႆႈၸႂ်ဝွၵ်းၵေႃႈ ႁူႉတေႃႈ လႆႈၸႂ်ပႃးၵေႃႉတႅမ်ႈမၼ်းယဝ်ႉ ဢမ်ႇၸႂ်ႈႁႃႉ”
“ဢမ်ႇၵပ်းၵၢႆႇၵၼ်သင်”
“ၵပ်းၵၢႆႇဢိူဝ်ႈ ... ဢမ်ႇယုမ်ႇႁႃႉ”
“ဢမ်ႇယုမ်ႇ”
“ပေႃးဢမ်ႇယုမ်ႇၵေႃႈ ဝၢႆးၼႆႉ တေလႆႈႁူႉယူႇ ပႂ်ႉတူၺ်းၵွၼ်ႇၵႂႃႈ ၸၢမ်သႅင်းတေမိူဝ်းၵွၼ်ႇၼႃႈ မူဝ်”
“တေမိူဝ်းယဝ်ႉႁႃႉ ၸၢမ်သႅင်း”
“ဢိူဝ်ႈ ... မိူဝ်ႈၽုၵ်ႈၸၢမ်သႅင်း တေမႃးၸူးမူဝ်လႆၼႃႈ”
“ဢိူဝ်ႈ ... ဢိူဝ်ႈ မိူဝ်းလွႆးလွႆး”
ၼၢင်းၸၢမ်သႅင်းၵေႃႈ ဢဝ်ထူင်ၶူဝ်းမၼ်းသေ ပူၼ်ႉမိူဝ်ႈယဝ်ႉ၊ ဝၢႆးသေ ၼၢင်းၸၢမ်သႅင်း ပူၼ်ႉမိူဝ်း ၼၢင်းမူဝ်ၶၢဝ်ၵေႃႈ ၶဝ်ႈမႃးၼႂ်းႁိူၼ်းၶဝ်သေ ၽႅဝ်မႃးၼႂ်းလုၵ်းၼွၼ်းမၼ်းယဝ်ႉ၊ ၶွင်ၽၢၵ်ႇ ဢၼ်ၸၢႆးမွၼ်းၶိူဝ်း ပၼ်မၼ်းၼၢင်းၼၼ်ႉ မၼ်းၼၢင်းမႃးၼင်ႈ ၼိူဝ်ၵူႇၼွၼ်းမၼ်းသေ မႃးယဵမ်ႈတူၺ်းလီလီယူႇ မၼ်းၼၢင်းပဵၼ် ဢၼ်ၸူမ်းသိူဝ်းတႄႉတႄႉသေ လွမ်လွမ်ဢဝ်ၶွင်ၽၢၵ်ႇၼၼ်ႉ တၢင်ႇတႃႈ ၼႃႈဢူၵ်းမၼ်းၼၢင်းဝႆႉယဝ်ႉ၊ ၼႂ်းသူပ်းမၼ်းၼၢင်းၵေႃႈ လွမ်လွမ် လၢတ်ႈဢွၵ်ႇမွၵ်ႇဝႃႈ
“ပီႈၸၢႆးၶိူဝ်း ... ဢေႃႈ ... ပီႈၸၢႆးမွၼ်းၶိူဝ်း” ၼႆလွႆးလွႆးယူႇ။
မၼ်းၼၢင်းၸင်ႇ ၶိုၼ်းလုၵ်ႉသေ မႃးၸူးတီႈၶူင်ႇမၢၼ်ႇၸမ်ႈမၼ်းယဝ်ႉ ၶွင်ၽၢၵ်ႇဢွၼ်ႇၼၼ်ႉၵေႃႈ မၼ်းၼၢင်းဢဝ်မႃး မႄးတမ်းဝၢင်းဝႆႉ တီႈၼိူဝ်ၶူင်ႇမၢၼ်ႇၸမ်ႈမၼ်းၼၼ်ႉလီလီယူႇ။
✽ ✽ ✽ ✽ ✽