မွၵ်ႇလူင်ႇလဵဝ်/တွၼ်ႈၼိုင်ႈ
ငဝ်ႈၸိုင်ႈ ဝဵင်းမိူင်းတႆး
ဝဵင်းဢၼ်ၼႆႉ သုင်သေၼမ်ႉပၢင်ႇလၢႆႇ (4712)သီႇႁဵင် ၸဵတ်းပၢၵ်ႇသိပ်းသွင်ပေႇသေ ဝဵင်းဢၼ်မီးဝႆႉ ၼိူဝ်လွႆလူင်လႄႈ မၢင်ၸိူဝ်းသမ်ႉဝႃႈ မိူဝ်ႈၵွၼ်ႇၼၼ်ႉ မီးဝႆႉတူၼ်ႈမႆႉတီးတူၼ်ႈၼိုင်ႈ ၵိုၵ်းၸိုဝ်ႈတူၼ်ႈမႆႉၼၼ်ႉသေ ႁွင်ႉဝႃႈဝဵင်းတူၼ်ႈတီးၼႆယဝ်ႉ။
ပေႃးဝႃႈယူႇၼိူဝ်လွႆၽြႃးၽၢႆႇတၢင်းဢွၵ်ႇသေ မုင်ႈတူၺ်း လူင်မႃးၼႆၸိုင် လႆႈႁၼ်လင်ႁိူၼ်းၶပ်ႉယႆၵၼ် ပဵၼ်ဢၼ်ယီယဵမ်ႈ လီတူၺ်းတႄႉတႄႉ။ ပဵၼ်ငဝ်ႈၸိုင်ႈဝဵင်းမိူင်းတႆးသေၵူၺ်းဢမ်ႇၵႃး သဵၼ်ႈတၢင်းတႃႇတေၽႄၵႂႃႇ တၢင်ႇဝဵင်းၵေႃႈမီးဝႆႉလႄႈ ပဵၼ်ဝဵင်း ၵူၼ်းၼမ်ၵူၼ်းၵိုၼ်း ပဵၼ်ဝဵင်းလီႁႃငိုၼ်းဝဵင်းၼိုင်ႈယူႇ။
ယၢမ်းလဵဝ် ၸၢႆးမွၼ်းၶိူဝ်း လွႆလႅမ်ၵေႃႈၽႅဝ်မႃးဢႅဝ်ႇတီႈ ဝဵင်းတူၼ်ႈတီးသေ ၼႂ်ၼႆႉမၼ်းဢၢၼ်းတေပွၵ်ႈမိူဝ်းၶိုၼ်းလွႆလႅမ် ၼႆလႄႈ မၼ်းသိမ်းၶူဝ်းသႂ်ႇၼႂ်း ထူင်ၼင်မၼ်း ဢဝ်ထူင်မၼ်း ပႃးၵွပ်ႈလင်မၼ်းသေ ပႆမႃးၸူးၵၢတ်ႇလူင်ယူႇ၊ ၼႂ်းၵၢင်ၸႂ်မၼ်း တႄႉဢဵၼ်းဢၢၼ်းၶႂ်ႈမႃးႁႃတၢင်းၵိၼ် တႃႇထႅမ်တွင်ႉထႅမ်သႆႈမၼ်းသေ တႃႇတေသိုဝ်ႉတၢင်ႇၸိူဝ်ႉတၢင်ႇမဵဝ်းၼႆႉယဝ်ႉ။ ၽိူဝ်ႇမၼ်းၽႅဝ် မႃးႁိမ်းၽၵ်းတူၵၢတ်ႇၼၼ်ႉ လႆႈငိၼ်းသဵင်ႁွင်ႉၸိုဝ်ႈမၼ်း-
“ႁေႉ ၸၢႆးမွၼ်းၶိူဝ်း မႂ်ႇသုင်”
ၸၢႆးမွၼ်းၶိူဝ်းၵေႃႈ ဝၢႆႇတူၺ်းၵေႃႉဢၼ်ႁွင်ႉၸိုဝ်ႈမၼ်းသေ ၶိုၼ်းတၵ်ႉဝႃႈ “ဢေႃး မႂ်ႇသုင် ၸၢႆးၶမ်း ႁဵတ်းသင်”
“ဢမ်ႇႁဵတ်းသင်ၼင်ႇၵဝ်ႇ မႂ်းဢၢင်ႈၵႂႃႇတၢင်းလႂ်ၼႆႉ”
“ၵဝ်ဢၢၼ်းၵႂႃႇႁႃၵိၼ် ၶဝ်ႈသွႆးသေ ဢၢၼ်းပူၼ်ႉမိူဝ်းလွႆ လႅမ်ၼႆဢိူဝ်ႈ”
“မႂ်းမႃးႁႃသိုဝ်ႉသင်လႃႇ ပွၵ်ႈၼႆႉ”
“မႃးႁႃသိုဝ်ႉ ပပ်ႉလိၵ်ႈတႃႇၸၼ်ႉသိပ်းဢိူဝ်ႈ”
“လႆႈယဝ်ႉႁႃႉ?”
“ပႆႇၵွၼ်ႇ”
“ပေႃးပႆႇလႆႈၼႆႉႁႃႁႂ်ႈလႆႈၵေႃႉ ဢၼ်ႁၢင်ႈလီလီမၼ်းဢိူဝ်ႈ ၼႃႈ”
“လူဝ်ႇမိူဝ်းႁႃတၢင်းၵုၼ်ႁိင်းသူၵူၺ်းယူဝ်ႉ ဢၼ်ႁၢင်ႈလီလီၼၼ်ႉ ဢမ်ႇၸႂ်ႈႁႃႉ?”
“တီႈတူၼ်ႈတီးၼႆႉ ၶႅၼ်းမီးၼမ်သေ ၵုၼ်ႁိင်းႁဝ်းၵွၼ်ႇ ဢိူဝ်ႈ”
ၸၢႆးမွၼ်းၶိူဝ်းယုမ်ႉသေ ၶိုၼ်းလၢတ်ႈဝႃႈ
“ပေႃးၼႆၵေႃႈ ႁဝ်းၵႂႃႇႁႃတူၺ်းၼႂ်းၵၢတ်ႇၼႆႉၼႃႈ”
“ၵႂႃႇလႄႈ မႂ်းတေလဵင်ႉၵဝ်ၶဝ်ႈသွႆးႁႃႉ?”
“လႆႈယူႇ”
ၶႃသွင်ၵေႃႉ ၶဝ်ႈမႃးၼႂ်းၵၢတ်ႇသေ သိုပ်ႇပူၼ်ႉၵႂႃႇၸူးသႅင်ႇ ၶဝ်ႈသွႆးတႆးတီႈၼိုင်ႈယဝ်ႉ၊ ၵူၼ်းဢၼ်မႃးၼင်ႈၵိၼ်ၵေႃႈ မီးၼမ် ဝႆႉတၢၼ်ႇတၢၼ်ႇ ၊ ၶႃသွင်ၵေႃႉၵေႃႈ မႃးၼင်ႈ တီႈၸိင်ႇၽိူၼ်ၶဝ်ႈသွႆးသေ ၸၢႆးမွၼ်းၶိူဝ်း ၸင်ႇသင်ဝႃႈ
“သႂ်ႇပၼ်ၶဝ်ႈသွႆးသွင်ဝၢၼ်ႇ”
“ၶဝ်ႈသွႆးတႆးႁႃႉ ၶဝ်ႈသွႆးၸေႈႁႃႉ?”
“ၶဝ်ႈသွႆးတႆးဢေႃႈ”
ပႃႈဢၼ်ၶၢႆၶဝ်ႈသွႆးၼၼ်ႉၵေႃႈ သႂ်ႇၶဝ်ႈသွႆးသွင်ဝၢၼ်ႇသေ တမ်းပၼ်ၶႃသွင်ၵေႃႉယဝ်ႉ။ ၸၢႆးမွၼ်းၶိူဝ်း ၶိုၼ်းသိုဝ်ႉဢဝ် ၼင်ပွင်းသွင်ထူင်သေ ၵိၼ်ၵပ်းၶဝ်ႈသွႆးယူႇ၊ ပႃႈဢၼ်ၶၢႆၶဝ်ႈသွႆးၼၼ်ႉ ႁၼ်ၵူၼ်း တႃႇတေမႃးသိုဝ်ႉၵိၼ်ၶဝ်ႈသွႆးမၼ်းထႅင်ႈလႄႈ မၼ်းၸင်ႇၸူမ်းသိူဝ်းသေ ႁွင်ႉဝႃႈ
“ဢေႃႈ ... မႃးလႄႈ ၼၢင်းမူဝ်ၶၢဝ် မႃးၼင်ႈလႄႈ”
ၸၢႆးမွၼ်းၶိူဝ်းၶႃသွင်ၵေႃႉၵေႃႈ ဝၢႆႇတူၺ်းၼၢင်းမူဝ်ၶၢဝ်ၼၼ်ႉ ၵႅပ်ႉၼိုင်ႈသေ ၶိုၼ်းသိုပ်ႇၵိၼ်ၶဝ်ႈသွႆးယူႇ။ ၼၢင်းမူဝ်ၶၢဝ် လႄႈ တႆးၵေႃႉမၼ်း ၼၢင်းၸၢမ်သႅင်းၵေႃႈ မႃးၼင်ႈႁိမ်းၸဵင်ႇၽိူၼ် ၸၢႆးမွၼ်းၶိူဝ်းၶဝ်ၼၼ်ႉသေ ၼၢင်းမူဝ်ၶၢဝ်ၸင်ႇဝႃႈ-
“သႂ်ႇပၼ် ၶဝ်ႈသွႆႈတႆးသွင်ဝၢၼ်ႇၶႃႈ ယႃႇပေသႂ်ႇ မၢၵ်ႇၽိတ်ႉၶႃႈၼႃႈ”
ၽွင်းၼၼ်ႉ ၸၢႆးၶမ်းၵေႃႈ ဢွၵ်ႇၸႂ်သင်ဢမ်ႇႁူႉ မၼ်းသမ်ႉဝႃႈ-
“ပႃႈ သႂ်ႇပၼ်မၢၵ်ႇၽိတ်ႉဢိတ်းၼိုင်ႈၶႃႈလူး”
ပႃႈဢၼ်ၶၢႆၶဝ်ႈသွႆးၼၼ်ႉၵေႃႈ ၵွၼ်ႉဢဝ်မၢၵ်ႇၽိတ်ႉသႂ်ႇ ပၼ်ၼႂ်းဝၢၼ်ႇၸၢႆးၶမ်းသေ ၶိုၼ်းထၢမ်မႃးတၢင်းၸၢႆးမွၼ်းၶိူဝ်းယဝ်ႉ၊
“ၸၢႆးၼႆႉၼႃႇ ... ဢမ်ႇသႂ်ႇႁႃႉမၢၵ်ႇၽိတ်ႉ” ၸၢႆးမွၼ်းၶိူဝ်း ၸင်ႇယုမ်ႉသေတွပ်ႇဝႃႈ
“ဢေႃႈ ... ဢမ်ႇသႂ်ႇၶႃႈ”
ၼၢင်းမူဝ်ၶၢဝ်ၶႃသွင်ၵေႃႉ လွမ်မိတ်းတႃတူၺ်း ၸၢႆးမွၼ်းၶိူဝ်းၶႃသွင်ၵေႃႉသေ ၵိၼ်ၶဝ်ႈသွႆးၶႃယူႇ၊ ၸၢႆးမွၼ်းၶိူဝ်းၵိၼ် ၸမ်တေသဵင်ႈယဝ်ႉလႄႈ မၼ်းၶိုၼ်းသင်ႇထႅင်ႈ
“ပႃႈ သႂ်ႇပၼ်ထႅင်ႈသွင်ဝၢၼ်ႇလႄႈ”
“ဢိူဝ်ႈ ... ဢိူဝ်ႈ”
ၶဝ်ႈသွႆးၸၢႆးၶမ်းၽဵတ်းၼႃႇယဝ်ႉလႄႈ သဵင်ထူၺ်ႈၸႂ် မၼ်းမေႃးဝႃႈ “သူႁႃႉ သူႁႃႉ”ၼႆယူႇ၊ ၵွႆႈယူႇၵွႆႈၽဵတ်းမႃးတိၵ်းတိၵ်းလႄႈ မၼ်းၸင်ႇဝႃႈ
“ပႃႈ ၼမ်ႉၵတ်းဢမ်ႇမီးႁႃႉ သူႁႃႉ သူႁႃႉ”
ပႃႈဢၼ်ၶၢႆၶဝ်ႈသွႆးၼၼ်ႉ ၸင်ႇၵွၼ်ႉၼမ်ႉပၼ်မၼ်း သေဝႃႈ
“ၽဵတ်းၼႃႇႁႃႉ ... ၸၢႆး”
ၸၢႆးၶမ်းပႆႇတၼ်ႈတွပ်ႇသင် မၼ်းၼႅတ်ႈယိုၼ်းဢဝ်ၵွၵ်းၼမ်ႉသေ ၵိၼ်ၽႂ်းၽႂ်းယူႇ၊ ပေႃႈဝႃႈမၼ်းၵိၼ်ႉယဝ်ႉယဝ်ႈၼႆ မၼ်း ၸင်ႇတွပ်ႇဝႃႈ
“ဢႃႉ ... မၢၵ်ႇၽိတ်ႉပႃႈႁဝ်းၼႆႉ ၽဵတ်းၶႅၼ်ႇၼႃႇမေႃႉ ပၼ်ၼမ်ႉထႅင်ႈၵွၵ်းၼိုင်ႈၶႃႈလႄႈ”
ၸၢႆးမွၼ်းၶိူဝ်း ၸင်ႇယုမ်ႉသေဝႃႈ
“မႂ်းပႄႉၵိၼ်ၼမ်ႉၼမ်လႃႇ”
ၸၢႆးၶမ်း ဝၢႆႇတူၺ်း ၸၢႆးမွၼ်းၶိူဝ်းသေထၢမ်
“ပဵၼ်သင်လႃႇ”
“ဢမ်ႇပဵၼ်သင်ၼင်ႇၵဝ်ႇ ၵူဝ်မႂ်းလႆႈလွႆးၽႃႈမႂ်းဢိူဝ်ႈ”
ၸၢႆးမွၼ်းၶိူဝ်းလၢတ်ႈဝႃႈ ၵူဝ်ယဵဝ်ႈသႂ်ႇၽႃႈသေလႆႈ လွႆးၽႃႈ ၼႆလႄႈ ၸၢႆးၶမ်းၸင်ႇၼႃႈမႆႈသေဝႃႈ
“မႄႈမႂ်းလႃႈ”
ပႃႈၶၢႆၶဝ်ႈသွႆးလႄႈ ၸၢႆႈမွၼ်းၶိူဝ်းယုမ်ႉၶူဝ်ဝႆႉယူႇ ၼၢင်း မူဝ်ၶၢဝ်ၶႃသွင်ၵေႃႉၵေႃႈ လၵ်ႉလွမ်ယုမ်ႉၶူဝ်ဝႆႉသေ ၶဝ်သိုပ်ႇၵိၼ် ၶဝ်ႈသွႆးၶဝ်ၼၼ်ႉယူႇ၊ ၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ်ၶႃသွင်ၵေႃႉ ၼင်ႈၺႃးၸဵင်ႇၽိူၼ်လဵဝ်ၵၼ်လႄႈ ၶႃလႆႈၼင်ႈၸမ်ၵၼ်ဝႆႉတႄႉတႄႉ ၸၢႆးၶမ်းသမ်ႉ ၼင်ႈၽၢႆႇၶၢင်ႈ ၸၢႆးမွၼ်းၶိူဝ်းဝႆႉသေ ယိပ်းဢဝ်ၼင်ပွင်းယၢဝ်းဢွၼ်ႇ ဢၼ်ၼိုင်ႈသေ ဢၢင်ႈမိတ်းႁၵ်းသႂ်ႇၼႂ်းဝၢၼ်ႇ ၶဝ်ႈသွႆးမၼ်းၼႆယဝ်ႉ၊ ၽွင်းမိူဝ်ႈမၼ်းႁၵ်းၼင်ပွင်းမၼ်းၼၼ်ႉ ႁဵတ်းႁိုဝ်ၵေႃႈဢမ်ႇႁူႉယဝ်ႉ ၼင်ပွင်းမၼ်းပွတ်းၼိုင်ႈ ဝူင်ၶၢမ်ႈ ဝၢၼ်ႇၶဝ်ႈသွႆးၸၢႆးမွၼ်းၶိူဝ်းသေ ၵႂႃႇတူၵ်းသႂ်ႇ ၼႂ်းဝၢၼ်ႇ ၼၢင်းမူဝ်ၶၢဝ်ယဝ်ႉ။ ၼၢင်းမူဝ်ၶၢဝ် တူၵ်းၸႂ်ၵႂႃႇသေ
“ဢူဝ် ... ”
ၶဝ်ဢွၼ်ၵၼ်ဝၢႆႇတူၺ်းၼႃႈၵၼ်သေ ၸၢႆးမွၼ်းၶိူဝ်းပဵၼ် ဢၼ်ၵဵင်ၸႂ်(ဢႃးၼႃႇ) တၢင် ၸၢႆးၶမ်းတႄႉတႄႉ၊ မၼ်းၸင်ႇၼႅတ်ႈ ဢဝ်ထူႇမၼ်းငိပ်ႈဢဝ်ၼင်ပွင်း ၼႂ်းဝၢၼ်ႇ ၼၢင်းမူဝ်ၶၢဝ်ၽႂ်းၽႂ်းသေ မၼ်းၸင်ႇ တွင်းပၢၼ်ႇဝႃႈ-
“ဢေႃႈ ၼၢင်း ၼၢင်းမူဝ် ... ယႃႇပေဝႆႉၸႂ်ၸိူင်ႉၼင်ႇႁိုဝ်ၼႃႈ ... တႆးၵေႃႉႁဝ်းတင်ႈၸႂ်ႁဵတ်းတႄႉ ဢမ်ႇၸႂ်ႈၼင်ႇၵဝ်ႇ”
ၸၢႆးၶမ်းၵေႃႈ ၸင်ႇၶိုၼ်းၼႅတ်ႈဝႃႈ
“တႄႉဢိူဝ်ႈ ... ႁဝ်းဢမ်ႇတင်ႈၸႂ်ႁဵတ်းလူင် သၢင်ႇဢမ်ႇ တေႃႇသေ ပဵၼ်ၵႂႃႇသေတႃႉ ယႃႇပေၶႂ်ႈၸႃႉၼႃႈ”
ၼၢင်းမူဝ်ၵေႃႈ ဢမ်ႇၸၢင်ႈၼႄးသင်လႄႈ မၼ်းၼၢင်း ၸင်ႇၶိုၼ်းဝႃႈ-
“ဢေႃႈ ... ဢမ်ႇ ... ဢမ်ႇပဵၼ်သင် လႆႈယူႇ”
ၸၢႆးမွၼ်းၶိူဝ်း ၸင်ႇဝႃႈ
“ပေႃးဝႃႈ ၼၢင်းမူဝ် ဢမ်ႇၶႂ်ႈၵိၼ်ၶဝ်ႈသွႆးဝၢၼ်ႇၼႆႉၼႆ ၵေႃႈ ႁဝ်းတေၶိုၼ်းသိုဝ်ႉတႅၼ်းပၼ် ဝၢၼ်ႇမႂ်ႇလႆ ... သႂ်ႇဝၢၼ်ႇမႂ်ႇ ထႅင်ႈၼေႃႈ”
“လႆႈၶႃႈယဝ်ႉ ... ဢမ်ႇလူဝ်ႇသင်ႇပၼ်ထႅင်ႈၶႃႈယဝ်ႉ”
ၶဝ်သိုပ်ႇၵိၼ်ၶဝ်ႈသွႆးၽႂ်မၼ်းသေ မူတ်းၵႂႃႇၼႆၵေႃႈ ၶႂ်ႈ မႅၼ်ႈယၢမ်းလဵဝ်ၵၼ်ယူႇယဝ်ႉ၊ ၸၢႆးမွၼ်းၶိူဝ်းၸၼ်ဢဝ်မၢင်သိပ်းႁႃႈ ၼႂ်းထွင်းမၼ်း မၢင်ၼိုင်ႈသေ ပၼ်ၵႃႈၶဝ်ႈသွႆးၶႃသွင်ၵေႃႉယဝ်ႉ၊ ၼၢင်းမူဝ်ၶၢဝ်ၵေႃႈ ၽုၺ်ႇထူင်ငိုၼ်းႁၢင်ႈလီလီဢွၼ်ႇမၼ်းၼၢင်းသေ ဢဝ်မၢင်သၢဝ်းႁႃႈယိုၼ်ႈပၼ်ၵႂႃႇယဝ်ႉ၊ ၸဝ်ႈၶဝ်ႈသွႆးၼၼ်ႉ ႁပ်ႉဢဝ်ငိုၼ်းၶႃသွင်ၵေႃႉသေ ၶိုၼ်းဢၢၼ်ႇငိုၼ်းတုမ်ႉပၼ် တင်းသွင်ၵေႃႉယဝ်ႉ။ ၸၢႆးမွၼ်းၶိူဝ်း လႄႈၼၢင်းမူဝ်ၶၢဝ်ၵေႃႈ ႁပ်ႉဢဝ်ငိုၼ်း တုမ်ႉမႃးၼၼ်ႉ ႁင်းၽႂ်မၼ်းယူႇ။ ၶႃသွင်ၵေႃႉ ႁူႇၼင်တႃၽႂ်မၼ်းသေ ဢၢၼ်ႇတူၺ်းငိုၼ်းၶႃယူႇ။ ၸၢႆးမွၼ်းၶိူဝ်းၶႃ ၸၢႆးၶမ်းသီႇဝၢၼ်ႇ ၼိုင်ႈဝၢၼ်ႇသွင်ပျႃးပၢႆႁႃႈပႅၵ်ႉ(ၼိုင်ႈႁွင်ႈ) သီႇဝၢၼ်ႇၼႆႉ သမ်ႉမႅၼ်ႈၼိုင်ႈၶၼ်၊ မၼ်းသမ်ႉပၼ်ၵႂႃႇ မၢင်သိပ်းႁႃႈ၊ ပႃႈၶဝ်ႈသွႆးၼၼ်ႉ သမ်ႉတုမ်ႉမၼ်းမႃး မၢင်ၶၼ်သွင်မၢင် သၢဝ်းၼိုင်ႈယဝ်ႉ။
ၼိုင်ႈႁွႆႉ - ပႅတ်ႇပျႃး ၊ ၼိုင်ႈတွင်ႇ - သီႇပျႃး၊
ႁႃႈတွင်ႇ - ၼိုင်ႈသၢဝ်း ၊ ၼိုင်ႈႁွင်ႈ - သွင်ပျႃးၶႂၢႆး၊
ၼိုင်ႈၸိတ်ႉ - သၢဝ်းႁႃႈ ၊ ၼိုင်ႈပၼ်း - ပႅတ်ႇၶၼ်၊
ၼိုင်ႈၸွႆႉ - ၼိုင်ႈပၢၵ်ႇ ၊ ၼိုင်းၵူမ်း - သွင်ၸွႆႉ၊
ၼိုင်ႈသွႆး - သွင်ပၢၵ်ႇႁႃႈၶၼ် - ၵူမ်းႁႃႈၶၼ်
တုမ်ႉငိုၼ်း - ဢၢၼ်းငိုၼ်း/ၸီးငိုၼ်း
တမ်ႈတီႈၼၢင်းမူဝ်ၶၢဝ်ၼၼ်ႉ မၼ်းပၼ်ၵႂႃႇ မၢင်သၢဝ်းႁႃႈ ၶႃသွင်ၵေႃႉ ၵိၼ်ၵေႃႉဝၢၼ်ႇဝၢၼ်ႇၼႆ မႅၼ်ႈငိုၼ်းႁႃႈပျႃး လူဝ်ႇတုမ်ႉမၼ်း ၼၢင်းသၢဝ်းၼိုင်ႈ၊ ယၢမ်းလဵဝ်သမ်ႉ တုမ်ႉမၼ်းၼၢင်းႁႃႈပျႃးၵူၺ်း၊ ၸၢႆႈမွၼ်းၶိူဝ်း ၸင်ႇဝႃႈ
“ဢေႃႈ ပႃႈ၊ ပႃႈတုမ်ႉငိုၼ်းလိူဝ်မႃးဢေႃႈ”
ၼၢင်းမူဝ်ၶၢဝ်ၵေႃႈ ၶိုၼ်းဝႃႈ
“တီႈမူဝ်ၼႆႉ တုမ်ႉယွမ်းဢေႃႈ”
ပႃႈဢၼ်ၶၢႆၶဝ်ႈသွႆးၼၼ်ႉ ၸင်ႇၵႂင်ၵႂႃႇသေ
“ၸႂ်ႈတႄႉႁႃႉ ... တီႈၸၢႆးၼႆႉ လိူဝ်ၵႃႈႁိုဝ်?”
“ၶႃႈပၼ်ၵႂႃႇ မၢင်သၢဝ်းလႄႈ လူဝ်ႇတုမ်ႉႁႃႈပျႃးၵူၺ်း ဢမ်ႇ ၸႂ်ႈၶႃႈႁႃႉ ... ပႃႈသမ်ႉတုမ်ႉမႃးသၢဝ်းၼိုင်ႈၵမ်းလဵဝ်ဢေႃႈ”
ပႃႈဢၼ်ၶၢႆၶဝ်ႈသွႆးၼၼ်ႉ ၶိုၼ်းထၢမ်ၼၢင်းမူဝ်ၶၢဝ်ယဝ်ႉ
“တီႈ ၼၢင်းမူဝ်လူး ယွမ်းၵႃႈႁိုဝ်?”
“မူဝ်ၶဝ်ၵိၼ်သွင်ဝၢၼ်ႇလႄႈ မႅၼ်ႈႁႃႈပျႃးဢမ်ႇၸႂ်ႈၶႃႈႁႃႉ’
“ဢိူဝ်ႈ ဢိူဝ်ႈ ၊ ၸႂ်ႈဢိူဝ်ႈ”
“မူဝ်သမ်ႉ ပၼ်ၵႂႃႇသၢဝ်းႁႃႈ ၊ ပႃႈသမ်ႉတုမ်ႉမႃးႁႃႈပျႃးၵူၺ်း ဢေႃႈ”
ပႃႈဢၼ်ၶၢႆၶဝ်ႈသွႆးၼၼ်ႉ ၸင်ႇပွင်ႇၸႂ်ၵႂႃႇသေ မၼ်း ၸင်ႇဝႃႈ-
“ဢေႃႈ ... ဢိူဝ်ႈ ဢိူဝ်ႈ ... ပႃႈပၼ်ၽိတ်းၵႂႃႇတႄႉဢိူဝ်ႈ” ပေႃးၼႆ ငိုၼ်းၼၢင်းမူဝ် ႁႃႈပျႃးၼၼ်ႉ ဢဝ်ပၼ်ၸၢႆးၼၼ်ႉႁေလႄႈ ငိုၼ်းၸၢႆးၼႆႉ သၢဝ်းၼိုင်ႈၼၼ်ႉ ၶိုၼ်းဢဝ်ပၼ် ၼၢင်းမူဝ်ႁေလႄႈ ဢမ်ႇၸႂ်ႈယဝ်ႉႁိုဝ်ၵမ်းၼႆႉ”
ၼၢင်းမူဝ်လႄႈၸၢႆးမွၼ်းၶိူဝ်းၵေႃႈ လၢတ်ႈဢွၵ်ႇႁူမ်ႈၶေႃႈ လဵဝ်ၵၼ်ဝႃႈ“ၸႂ်ႈဢေႃႈ”ၼႆတင်းသွင်ၵေႃႉယဝ်ႉ၊ ၶႃလွမ်တူၺ်းၼႃႈ ၵၼ်ၵႅပ်ႉၼိုင်ႈသေ ၼၢင်းမူဝ်ၶၢဝ်ၶိုၼ်းၼႅတ်ႈဝႄႈ သၢႆတႃပႅတ်ႈ ယဝ်ႉ၊ ၸၢႆးမွၼ်းၶိူဝ်း ၸင်ႇဢဝ်ငိုၼ်းသၢဝ်းၼိုင်ႈၼၼ်ႉ ယိုၼ်ႈ ပၼ်ၼၢင်မူဝ်သေလၢတ်ႈဝႃႈ-
“ယေႃႈ ... ၼၢင်းမူဝ်”
ၼၢင်းမူဝ်ၶၢဝ်ၵေႃႈ ႁပ်ႉဢဝ်ငိုၼ်းသၢဝ်းၼၼ်ႉသေ ၶိုၼ်းဢဝ်မၢင်ႁႃႈပျႃးပၼ် ၸၢႆးမွၼ်းၶိူဝ်းယဝ်ႉ၊ ၸၢႆးမွၼ်းၶိူဝ်းၵေႃႈ ႁပ်ႉဢဝ်ယဝ်ႉ မၼ်းၶိုၼ်းဝၢႆႇၼႃႈၸူး ပႃႈဢၼ်ၶၢႆၶဝ်ႈသွႆးၼၼ်ႉသေ လၢတ်ႈဝႃႈ
“တေၵႂႃႇၵွၼ်ႇၶႃႈၼႃႈ ပႃႈ”
“ဢိူဝ်ႈ ဢိူဝ်ႈ လီယဝ်ႉ တၢင်ႇပွၵ်ႈမႃး မႃးၵိၼ်ထႅင်ႈၼႃႈ”
ၸၢႆးမွၼ်းၶိူဝ်း ၸင်ႇယုမ်ႉသေတွပ်ႇလၢတ်ႈဝႃႈ
“တၢင်ႇပွၵ်ႈပေႃးဝႃႈၶႃႈၶဝ်ၶိုၼ်း ၽႅဝ်မႃးတူၼ်ႈတီးသေ ၶိုၼ်းမႃးၵိၼ်ၼႆ ပႃႈႁဝ်း ယႃႇပေတုမ်ႉငိုၼ်းၽိတ်းထႅင်ႈၼႃႈ”
ၶဝ်ဢွၼ်ၵၼ်ယုမ်ႉၶူဝ်ၵူႈၵေႃႉယဝ်ႉ၊ ပႃႈၼၼ်ႉၸင်ႇဝႃႈ
“ၼႆႉတႄႉ ၸၢင်ႉသီႇတိၼ်ယင်ႈၸၢင်ႈပလၢတ်ႈ၊ ၸဝ်ႈသီႇထၢတ်ႈ ယင်းၸၢင်ႈလိုမ်းၼႆၼႃႇ၊ မၢင်ပွၵ်ႈၵေႃႈလိုမ်းၼင်ႇၵဝ်ႇဢိူဝ်ႈ ဢေႃႈ ... ၸၢႆးဢမ်ႇၸႂ်ႈၵူၼ်းတူၼ်ႈတီးႁႃႉၼႆႉ”
“ဢမ်ႇၸႂ်ႈၶႃႈ ၊ ၶႃႈယူႇလွႆလႅမ်ဢေႃး ၊ ၵႂႃႇၵွၼ်ႇၼႃႈ”
“လီယဝ်ႉ လီယဝ်ႉ”
ၸၢႆးမွၼ်းၶိူဝ်းလႄႈ ၸၢႆးၶမ်း ပႆၽၢတ်ႇသႅင်ႇၶဝ်ႈသွႆးမႃးယဝ်ႉ ၼၢင်းမူဝ်ၶၢဝ်ၶႃသွင်ၵေႃႉ ဢွၵ်ႇမႃးဝၢႆးလင်ၶဝ်သွင်ၵေႃႉယဝ်ႉ၊ ၸၢႆးမွၼ်းၶိူဝ်းၶႃသွင်ၵေႃႉ သိုပ်ႇပႆမႃးၼႂ်းၵႄႈၵူၼ်း ၼႂ်းၵၢတ်ႇသေ ၸၢႆးၶမ်းၸင်ႇဝႃႈ-
“မွၼ်းၶိူဝ်း မႂ်းၼႆႉငိူဝ်ႈၵျႃႉ”
“ငိူဝ်ႈၸိူင်ႉႁိုဝ်?”
“ငိုၼ်းဢၼ်တုမ်ႉလိူဝ်မႃးၼၼ်ႉဢိူဝ်ႈ၊ သင်ၸိူဝ်ႉဝႃႈ မႂ်းဢဝ်ဝႆႉၼႆ ၸွင်ႇဢမ်ႇလႆႈသႆႉလၢႆလၢႆယဝ်ႉႁိုဝ်၊ သင်ဢမ်ႇၼၼ်ပႄႇ ၵဝ်လႆႈၵိၼ်ၼမ်ႉၼဵင်ႈဝၢၼ်လႄႈ ၶဝ်ႈမုၼ်း ၸွမ်းမႂ်းထႅင်ႈယဝ်ႉ ဢိူဝ်ႈၼႆႉ ဢမ်ႇၸႂ်ႈႁႃႉ?”
“ႁီး မႂ်းၵူၺ်းၶႂ်ႈလႆႈ လၢႆလၢႆၵူၺ်းယဝ်ႉ၊ ၼႄႈမႂ်းတွင်းဝႆႉ တေႃႇၸူဝ်ႈလႃႈ၊ ပေႃးၶႂ်ႈလႆႈၶွင်လၢႆ ၸၢင်ႈလႆႈတၢင်းဢၢႆတေႃႇၸူဝ်ႈဝႃႈ”
ၸၢႆးၶမ်းၵေႃႈ ၸင်ႇယုမ်ႉၶူဝ်သေ
“ႁႄး ႁႄး ၵဝ်လႃႈလီဝႃႈယွၵ်ႇမႂ်းၵူၺ်း၊ မႂ်းတေသိုပ်ႇၵႂႃႇလႂ်ၵွၼ်ႇၼႆႉ”
“ၵႂႃႇႁႃသိုဝ်ႉပပ်ႉဢိူဝ်ႈ”
“ၵႂႃႇပေႃးၼႆၵေႃႈ”
ၶႃသွင်ၵေႃႉသိုပ်ႇပူၼ်ႉၵႂႃႇႁႃသိုဝ်ႉပပ်ႉလိၵ်ႈယူႇ၊ ဝၢႆးသေၶႃ သွင်ၵေႃႉသိုဝ်ႉလႆႈပပ်ႉယဝ်ႉ ၸၢႆးမွၼ်းၶိူဝ်းၸင်ႇဝႃႈ
“ၵႂႃႇ ႁႃးၵႂႃႇဢႅဝ်ႇတူၺ်းတီႈလၢၼ်ႉၶၢႆတူၼ်ႈတီး”
“တီႈလႂ်ၼႆႉ”
“ဢႃ တွင်ႇၵျီးၵူင်ႇတႅၵ်ႉဢိူဝ်ႈ”
“ဢေႃႈ ၵႂၢမ်းတႆးဝႃႈ လၢၼ်ႉၶၢႆတူၼ်ႈတီးၼႆႁႃႉ?”
“ၸႂ်ႈဢိူဝ်ႈ”
ၶႃသွင်ၵေႃႉၶိုၼ်းၵႂႃႇဢႅဝ်ႇတူၺ်း ၸၼ်ႉၼိူဝ်ၼၼ်ႉသေ ႁႃသိုဝ်ႉဢၼ်ထုၵ်ႇၸႂ်ၼၼ်ႉယူႇ။ ၽွင်းၶႃသွင်ၵေႃႉ ၶိုၼ်းလူင်းၶူဝ်လႆမႃးသေ ၽႅဝ်မႃးၸၼ်ႉတႂ်ႈၼၼ်ႉ ၶႃသွင်ၵေႃႉၶိုၼ်းမႃးႁၼ်ၼၢင်း မူဝ်ၶၢဝ် ၶႃသွင်ၵေႃႉယဝ်ႉ။ ၽွင်းၶႃသွင်ၵေႃႉ တိုၵ်ႉလွမ်တူၺ်းၼၢင်းမူဝ်ၶၢဝ်ၶႃယူႇၼၼ်ႉ ၵူၼ်းၸၢႆးမၢဝ်ႇပၢၼ်ၶဝ် သၢမ်ၵေႃႉ မႃးၽႃႇ ၸၢႆးမွၼ်းၶိူဝ်းၶႃသွင်ၵေႃႉယဝ်ႉ။ ၶဝ်သၢမ်ၵေႃႉၼၼ်ႉတႄႉ ပဵၼ် ၸၢႆးသႅင်မိူင်း ၸၢႆးငူဝ်ႉ လႄႈ ၸၢႆးဢၢႆႈယဝ်ႉ။ ၸၢႆးသႅင်မိူင်းတင်ႈၸႂ် မႃးၽႃႇၶႃသွင်ၵေႃႉသေလၢတ်ႈဝႃႈ-
“ၶိူဝ်သွင်ၵေႃႉဢမ်ႇမီးတႃႁႃႉ”
ၸၢႆးၶမ်းၵိုင်ႉၵၢင်ႉ ၸႂ်လမ်ၵႂႃႇၵမ်းလဵဝ်သေ
“ဢေႃ ... ႁႃးဢမ်ႇမီးတႃႁႃ ... မႂ်းဢမ်ႇမီးတႃႁႃႉ ... မႂ်းမႃး ၽႃႇႁႃႈဢွၼ်တၢင်းဢမ်ႇၸႂ်ႈႁႃႉ မႂ်းၵူၺ်းဢိူဝ်ႈ ဢမ်ႇမီးတႃ”
လႆႈငိၼ်းၼင်ႇၼင်ႇၼၼ် ၼၢင်းမူဝ်ၶၢဝ် ဝၢႆႇတူၺ်းမႃးၼႆ လႆႈႁၼ်ပဵၼ်တႆးၵေႃႉမၼ်း ၸၢႆးသႅင်မိူင်းလႄႈ ၸၢႆးမွၼ်းၶိူဝ်း လွႆလႅမ်ၶဝ် ၵႂၢမ်းၼမ်ၵၼ်ဝႆႉယူႇ ၵူၼ်းႁိမ်းၼၼ်ႉၵေႃႈ ဢွၼ်ၵၼ်ဝၢႆႇ တူၺ်းၶဝ်ယူႇ ... ၸၢႆးသႅင်မိူင်းဝႃႈ
“ႁိုဝ်ႉ ... မႂ်းတေဝႃႈ မႂ်းပဵၼ်ၵူၼ်းႁတ်းႁၢၼ်ၵေႃႉၼိုင်ႈ ၼႆႁႃႉ?”
ၸၢႆးသႅင်မိူင်းလၢတ်ႈၼင်ႇၼႆသေ ဢဝ်တႃမိုဝ်းမၼ်း ထုပ်ႉ ပွႆႇသႂ်ႇၸူးသိုဝ်ႈၼႃႈ ၸၢႆးၶမ်းၽႂ်းၽႂ်းယဝ်ႉ ... ၸၢႆးၶမ်း ဢမ်ႇတၼ်း ၽၢင်ႉဢမ်ႇထိူမ်လႄႈ မၼ်းဢမ်ႇၸၢင်ႈႁဵတ်းႁိုဝ်တၼ်းဝႄႈ ... ၵူၺ်းၵႃႈ ၸၢႆးမွၼ်းၶိူဝ်းတၼ်းလႅတ်းလႄႈ မၼ်းၸင်ႇၼႅတ်ႈမႃးႁေႉပႅတ်ႈ မိုဝ်းၸၢႆးသႅင်မိူင်းၽႂ်းၽႂ်းယဝ်ႉ၊ မၼ်းယိပ်းဝႆႉၶွပ်ႈမိုဝ်း ၸၢႆးသႅင်မိူင်း သေလၢတ်ႈဝႃႈ
“တႆးၵေႃႉ ... ယႃႇပေႁဵတ်းၼႆလေႃႇ ... ၵွပ်ႈပိူဝ်ႈႁဝ်းၽႃႇ ၺႃးသူလႄႈ ... ႁဝ်းယွၼ်းတွင်းပၢၼ်ႇယူႇ ... ယႃႇပေဝႆႉၸႂ်သင် ၼႃႈ
ၸၢႆးသႅင်မိူင်း ၸႂ်လမ်ပႆႇပေႇလႆႈသေ ဢမ်ႇၵႃးၼႅတ်ႈၸၼ် ဢဝ်မိုဝ်းမၼ်းၽႂ်းၽႂ်း ၼႅတ်ႈလိမ်ႇတူဝ်မၼ်းၽႂ်းၽႂ်းသေ ဢဝ်တႃမိုဝ်း မၼ်းထုပ်ႉဝၢႆႈၸူး ၸၢႆးမွၼ်းၶိူဝ်းယဝ်ႉ ... ၸၢႆးမွၼ်းၶိူဝ်းၵေႃႈ ပဵၼ် ၵူၼ်းလႅတ်းၵူၼ်းၵတ်ႉၶႅၼ်ႇလၢႆးၵေႃႉၼိုင်ႈလႄႈ မၼ်းၼႅတ်ႈႁပ်ႉ ဢဝ်မိုဝ်းၸၢႆးသႅင်မိူင်းသေ လိမ်ႇမိုဝ်းၸၢႆးသႅင်မိူင်းပေႈ ပိၵ်ႉဝႆႉယဝ်ႉ ... ၸၢႆးသႅင်မိူင်းၵေႃႈ ၸဵပ်းၼႃႇလႄႈ ၼႃႈမၼ်းမီႇဝႆႉယူႇ ... ၸၢႆးငူဝ်ႉ လႄႈ ၸၢႆးဢၢႆႈၵေႃႈ ဢၢင်ႈၶဝ်ႈၸူးၸၢႆးမွၼ်းၶိူဝ်းယဝ်ႉ ၸၢႆးၶမ်းၵေႃႈ ႁၢင်ႈႁႅၼ်း ပႂ်ႉတွၼ်းတၢင်းၸၢႆးငူဝ်ႉၶႃသွင်ၵေႃႉယူႇ။ ၽွင်းၼၼ်ႉ ၵူၼ်းလူင်ၵေႃႉၼိုင်ႈ ၸင်ႇၽႅဝ်မႃးသေ ၸင်ႇမႃးဝႃႈ
“ႁေႉႁေႉ ယႃႇပေမႃးၽိတ်းၵၼ်ၼႂ်းၼႆႉၼႃႈ ၵမ်ႉမႃးယူဝ်သူ လႆႈၶဝ်ႈၶွၵ်ႈတင်းမူတ်းၼႃႈ ... ၵႂႃႇလႄႈ”
ၸၢႆးမွၼ်းၶိူဝ်းၵေႃႈ ဢီးယဝ်ႈၸၢႆးသႅင်မိူင်းၵႂႃႇၸူးၸၢႆးငူဝ်ႉ ၶႃယဝ်ႉ ... ၸၢႆးငူဝ်ႉၶႃသွင်ၵေႃႉၵေႃႈ ၼႅတ်ႈႁပ်ႉဢဝ် ၸၢႆးသႅင်မိူင်း ၽႂ်းၽႂ်းယူႇ ၵူၼ်ႈလူင်ၵေႃႉၼၼ်ႉၵေႃႈ ၸင်ႇဝႃႈထႅင်ႈ-
“ႁေႉ... ၵႂႃႇလႄႈ ၵႂႃႇလႄႈ”
ၸၢႆးမွၼ်းၶိူဝ်းလႆႈငိၼ်းၼင်ႇၼၼ်သေ မၼ်းလွမ်ယုမ်ႉ ဝႆႉယူႇ ၵူၼ်းလူင်ၵေႃႉၼၼ်ႉၸင်ႇဝႃႈတီႈ ၸၢႆးသႅင်မိူင်းယဝ်ႉ
“ႁေႉ ... ဢၢႆႈၼႆႉ ... မႂ်းၵေႃႉၽႃႇပိူၼ်ႈဢွၼ်တၢင်းသေ မႂ်းၼႆႉ တိုၵ်ႉၶႂ်ႈႁႃၽိတ်းပိူၼ်ႈယူႇၼေႃ ... ၵႂႃႇလႄႈမႂ်းဢွၵ်ႇၵႂႃႇလႄႈ”
ၸၢႆးငူဝ်ႉၶႃသွင်ၵေႃႉၵေႃႈ ၸၼ်ဢဝ်ၸၢႆးသႅင်မိူင်းဢွၵ်ႇၵႂႃႇယဝ်ႉ ၸၢႆးၶမ်းၸင်ႇဝႃႈတီႈ ၸၢႆးမွၼ်းၶိူဝ်းၼင်ႇၼႆယဝ်ႉ
“ဢၢႆႈသႅင်မိူင်းၼႆႉ မၼ်းဝႃႈမၼ်းပဵၼ်လုၵ်ႈၸၢႆးသထေး ၵေႃႉၼိုင်ႈၼႆသေ ၶႃႇၵႄႇဝႃႈၶႃႇၵႄႇယဝ်ႉ။ ဢွၼ်တၢင်းၵေႃႈမၼ်း ၽႃႇၵဝ်ပွၵ်ႈၼိုင်ႈၼင်ႇၵဝ်ႇယဝ်ႉ”
“ၸၢႆးမွၼ်းၶိူဝ်း ထူၺ်ႈၸႂ်လူင် ၵမ်းၼိုင်ႈသေ
“ၵႂႃႇ ... ၵူၼ်းမဵဝ်းၼႆႉ ဢမ်ႇလူဝ်ႇၵႂႃႇႁႃၽိတ်းၶဝ် ဝႄႈလႆႈ တၢၼ်ႇႁိုဝ် လီတၢၼ်ႇၼၼ်ႉယဝ်ႉ”
ၶႃသွင်ၵေႃႉ ပႆဢွၵ်ႇလၢၼ်ႉၶၢႆတူၼ်ႈတီးၵႂႃႇၼင်ႇၼၼ် ၼၢင်းမူဝ်ၶၢဝ်လွမ်တူၺ်းၶႃယူႇၼႆ ၶႃဢမ်ႇႁူႉထိုင် ... ၸၢႆးၶမ်းၵေႃႈ ၵႂႃႇၸွမ်းသူင်ႇၸၢႆးမွၼ်းၶိူဝ်း တီႈတႃႈၵႃးလွႆလႅမ်သေ ၸၢႆးမွၼ်းၶိူဝ်း ၵေႃႈပူၼ်ႉမိူဝ်းလွႆလႅမ်ယဝ်ႉ။