မွၵ်ႇလူင်ႇလဵဝ်/တွၼ်ႈၸဵတ်း
မိူဝ်ႈၼႆႉ ၸၢႆးမွၼ်းၶိူဝ်း မၼ်းတေပူၼ်ႉမိူဝ်းလွႆလႅမ်လႄႈ မၼ်းၽႅဝ်မႃး တီႈၵၢတ်ႇလူင်သေ မႃးၸူးတီႈသႅင်ၶဝ်ႈသွႆး ဢၼ်မၼ်းမႃးၵိၼ် မိူဝ်ႈဝၼ်းပူၼ်ႉၼၼ်ႉယဝ်ႉ ... မၼ်းၸင်ႇဝႃႈ
“ပႃႈ ... သႂ်ႇပၼ်ၶဝ်ႈသွႆးဝၢၼ်ႇၼိုင်ႈ”
“ဢိူဝ်ႈ ... ဢိူဝ်ႈ”
ပႃႈဢၼ်ၶၢႆၶဝ်ႈသွႆးၼၼ်ႉၵေႃႈ သႂ်ႇပၼ်ၶဝ်ႈသွႆးမၼ်းသေ လွမ်တူၺ်းမၼ်းၸၢႆးဝႆႉယူႇ
“ၸၢႆးပဵၼ်ၸၢႆးဢွၼ်ယူႇ လွႆလႅမ်ၼၼ်ႉ ဢမ်ႇၸႂ်ႈႁႃႉၼႆႉ”
“ၸႂ်ႈဢေႃႈ ပႃႈႁဝ်းတွင်းၶႃႈယူႇၼေႃ”
“တွင်းၵႂႃႈ ပႃႈၼႆႉတႄႉ ပေႃးယၢမ်ႈႁၼ်ပွၵ်ႈၼိုင်ႈၼႆ တိုၼ်းလၢမ်းလႆႈယူႇ ... ၸၢႆႈဢၢင်ႈမိူဝ်းလွႆလႅမ်ၼင်ႇၵဝ်ႇႁႃႉ”
“ၸႂ်ႈဢေႃႈ”
“ၵႂႃႇလႂ်မႃးဝႃႈ”
“ဢေႃႈ ... ၵႂႃႇပွႆးၽြႃးၼႂ်းၼွင်မႃးဢေႃႈ”
“ၸွင်ႇၵိုၼ်းႁိုဝ်”
“ၵိုၼ်းၶႃႈဢေႃႈ”
ပိူၼ်ႈတၢင်ႇၸိူဝ်းမႃးသင်ႇၵိၼ်ၶဝ်ႈသွႆးလႄႈ ပႃႈၶဝ်ႈသွႆးၼၼ်ႉ ဢမ်ႇတၼ်းဢုပ်ႇၸၢႆးၶိူဝ်းသေ ၵုမ်ႇလႆႈမိုင်ႉသႂ်ႇၶဝ်ႈသွႆးပၼ် ပိူၼ်ႈယူႇ ၸၢႆးမွၼ်းၶိူဝ်းၵေႃႈ ၶိုၼ်းသင်ႇၵိၼ်ထႅင်ႈဝၢၼ်ႇၼိုင်ႈယူႇယဝ်ႉ၊ ဝၢႆးသေ မၼ်းၵိၼ်ယဝ်ႉ မၼ်းၸင်ႇဢဝ်မၢင်ႁႃႈပျႃး ပၼ်ၵႃႈၶဝ်ႈသွႆးမၼ်းယဝ်ႉ မၼ်းၸင်ႇယုမ်ႉသေဝႃႈ
“ယေႃႈ ပႃႈ ၵႃႈၶဝ်ႈသွႆးဢေႃႈ ... ပွၵ်ႈၼႆႉတႄႉ ဢမ်ႇလူဝ်ႇ တုမ်ႉၽိတ်းသင်ယဝ်ႉၼႃႈ”
ပႃႈၶဝ်ႈသွႆးၼၼ်ႉၵေႃႈ ၸင်ႇယုမ်ႉႁၢၼ်ႉၸႂ်သေ
“ဢမ်ႇၽိတ်းယဝ်ႉ ... မႅၼ်ႈႁႃႈပျႃးလီလီယဝ်ႉ”
“ၶႃႈတေၵႂႃႇၵွၼ်ႇၶႃႈ ပႃႈ”
“ဢိူဝ်ႈ ... ဢိူဝ်ႈ”
ဝၢႆးသေ ၸၢႆးမွၼ်းၶိူဝ်း ၽၢတ်ႇယၢၼ်သႅင်ႇၶဝ်ႈသွႆးၼၼ်ႉၵႂႃႇယဝ်ႉ ဢမ်ႇႁိုင်ဢမ်ႇၼၢၼ်း ၼၢင်းမူဝ်ၶၢဝ်လႄႈၼၢင်းၸၢမ်သႅင်း ၵေႃႈ ၽႅဝ်မႃး သင်ႇၵိၼ်ၶဝ်ႈသွႆး တီႈသႅင်ႇၼၼ်ႉၼင်ႇၵဝ်ႇ ၼၢင်းမူဝ်ၶၢဝ် ၸင်ႇဝႃႈ
“ပႃႈ ... သႂ်ႇပၼ်ၶဝ်ႈသွႆးသွင်ဝၢၼ်ႇ”
“ဢေႃႈ ... ၼၢင်းမူဝ် ၶဝ်သွင်ၵေႃႉႁႃႉ ၼင်ႈလႄႈ ၼင်ႈလႄႈ”
ပႃႈႈၶဝ်ႈသွႆးၼၼ်ႉၵေႃႈ သႂ်ႇပၼ်ၶႃသွင်ၵေႃႉ ၵေႃႉဝၢၼ်ႇဝၢၼ်ႇယဝ်ႉ ၶႃသွင်ၵေႃႉၵေႃႈ သိုပ်ႇၵိၼ်ၶဝ်ႈသွႆးၶႃ တေႃႇပေႃးမူတ်းယဝ်ႉ ၼၢင်းမူဝ်ၶၢဝ် ၸင်ႇထၢမ်ဝႃႈ
“ၸၢမ်သႅင်း တေသႂ်ႇထႅင်ႈႁႃႉ”
“မူဝ်လူး ... ၸွင်ႇတေသႂ်ႇထႅင်ႈ”
“မူဝ်တႄႉ ၶႂ်ႈသႂ်ႇထႅင်ႈ ထူဝ်ႇၽူးလၢႆလၢႆဢိူဝ်ႈ”
“သႂ်ႇလႄႈ ပေႃးၼႆ ... ၸၢမ်သႅင်းၵေႃႈ တေသႂ်ႇထူဝ်ႇၽူး ၼင်ႇၵဝ်ႇယဝ်ႉ”
“ပႃႈ ... သႂ်ႇပၼ်မူဝ်ၶဝ်ထႅင်ႈ ထူဝ်ႇၽူးၵေႃႉပျႃးပျႃးလႄႈ”
“ဢိူဝ်ႈ ... ဢိူဝ်ႈ”
ပႃႈၶဝ်ႈသွႆးၼၼ်ႉၵေႃႈ ၵွၼ်ႉထူဝ်ႇၽူးသေ သႂ်ႇပၼ်ၶႃသွင်ၵေႃႉယဝ်ႉ ဝၢႆးသေၵိၼ်ယဝ်ႉ ၼၢင်းမူဝ်ၶၢဝ် ၸင်ႇဢဝ် မၢင်ၶၼ် ပၼ်ၵႂႃႇသေ
“ယေႃႈ ပႃႈ ၵႃႈၶဝ်ႈသွႆးဢေႃႈ ယႃႇပေတုမ်ႉၽိတ်းၼႃႈ”
“ဢေႃႈ ... ဢမ်ႇၽိတ်းၵူၺ်း လူဝ်ႇတုမ်ႇသၢမ်ပျႃး ဢမ်ႇၸႂ်ႈႁႃႉ”
“ၸႂ်ႈဢေႃႈ”
“မိူဝ်ႈၵႆႈၵေႃႈ ၸၢႆးဢၼ်ယူႇလွႆလႅမ်ၼၼ်ႉ မႃးၵိၼ်ၶဝ်ႈသွႆးတီႈၼႆႈသေ ယင်းယွၵ်ႇပႃႈၵႂႃႇၼင်ႇၵဝ်ႇဢိူဝ်ႈ မၼ်းၵေႃႈဝႃႈ ယႃႇပေတုမ်ႉၽိတ်းၼႃႈ ၼႆၼင်ႇၵဝ်ႇယဝ်ႉ”
လႆႈငိၼ်းပႃႈၶဝ်ႈသွႆးၼၼ်ႉဝႃႈ“ၸၢႆးလွႆလႅမ်” ၼႆလႄႈ ၶႃသွင်ၵေႃႉ ႁူႉပွင်ႇဝႃႈ ပဵၼ်ၸၢႆးမွၼ်းၶိူဝ်းၼႆလႄႈ ၼၢင်းမူဝ်ၶၢဝ် ၸင်ႇထၢမ်ဝႃႈ
“မၼ်းမႃးၵိၼ်ၵႂႃႇႁိုင်ယဝ်ႉႁႃႉ ပႃႈ”
“ဢမ်ႇပႆႇပေႃးႁိုင် မၼ်းဢွၵ်ႇၵႂႃႇဢွၼ်တၢင်းမိူဝ်ႈ ၼၢင်းမူဝ်ၶၢဝ် တေမႃးၵိၼ်ၼၼ်ႉၵူၺ်း”
“ဢေႃ ... ပေႃးၼႆၵေႃႈ မူဝ်ၶဝ်တေၵႂႃႇၵွၼ်ႇၼႃႈပႃႈ”
“ဢိူဝ်ႈ ... ဢိူဝ်ႈ ... လီယဝ်ႉ”
ၶႃသွင်ၵေႃႉၵေႃႈ ဢွၵ်ႇၽၢတ်ႇယၢၼ်သႅင်ၶဝ်ႈသွႆးမႃးသေ ၼၢင်းၸၢမ်သႅင်း ၸင်ႇဝႃႈ
“မူဝ်”
“ဢီႈသင် ၸၢမ်သႅင်း”
“ႁဝ်းလႃႈလီၵႂႃႇဢႅဝ်ႇတူၺ်း တီႈလၢၼ်ႉၶၢႆတွင်ႇၵျီးႁိုဝ်ႉ ယူဝ်ၸၢင်ႈၶိုၼ်းၺႃး ပီႈၸၢႆးၶိူဝ်း”
“ၵႂႃႇလႄႈ ပေႃးၼႆၵေႃႈ”
ၶႃသွင်ၵေႃႉ ၵေႃႈၽႅဝ်မႃးလၢၼ်ႉၶၢႆတွင်ႇၵျီး ဢႅဝ်ႇတူၺ်း ၼႂ်းလၢၼ်ႉၶၢႆၼႆၵေႃႈ ဢမ်ႇႁၼ်ၺႃး ၸၢႆးမွၼ်းၶိူဝ်း ၸၢႆးမွၼ်းၶိူဝ်းတႄႉ ၶီႇၵႃးပူၼ်ႉမိူဝ်း လွႆလႅမ်ယဝ်ႉ၊ ၶႃၵႂႃႇတူၺ်း တီႈၵႃးတႃႈၵႃး လွႆလႅမ်ၵေႃႈ ဢမ်ႇၶိုတ်းယဝ်ႉ။