မွၵ်ႇလူင်ႇလဵဝ်/တွၼ်ႈၵဝ်ႈ
တိတ်း တိတ်း ... တိတ်းတိတ်း
လႆႈငိၼ်းသဵင် ႁွၼ်းၵႃးမႃးမေႃး တီႈၽၵ်းတူဝၢင်းႁိူၼ်းၶဝ် လႄႈ ၼၢင်းမူဝ်ၶၢဝ် ၼႅတ်ႈဢွၵ်ႇမႃးတူၺ်းယဝ်ႉ၊ ပဵၼ်ၵႃးၽႂ်ၵေႃႈ မၼ်းၼၢင်းဢမ်ႇႁူႉၸၵ်း ယၢမ်ႈၵေႃႈပႆႇယၢမ်ႈႁၼ်လႄႈ မၼ်းၼၢင်း ၸင်ႇထၢမ်ၸဝ်ႈၵႃး ၵူၼ်းၸၢႆးမၢဝ်ႇၼၼ်ႉယဝ်ႉ။
“မီးလွင်ႈတၢင်း ၸိူင်ႉႁိုဝ်ၶႃႈ ပီႈၸၢႆး”
မၼ်းၼၢင်းထၢမ်ၵႂႃႇၼႆသေတႃႉ ၵူၼ်းႁေႃႈၵႃးၼၼ်ႉ ဢမ်ႇတွပ်ႇၶေႃႈၵႂၢမ်း ဢၼ်မၼ်းၼၢင်းထၢမ်ၼၼ်ႉ ၵူၼ်းႁေႃႈၵႃးၼၼ်ႉ ၶိုၼ်းထၢမ်ဝႃႈ
“ၼႆႉၸွင်ႇၸႂ်ႈႁိူၼ်းလုင်းၸိုၼ်ႈၶဝ်ႁိုဝ်”
“ၸႂ်ႈဢေႃႈ”
“ၼၢင်းၼႆႉ ပဵၼ်ၼၢင်းမူဝ်ၶၢဝ်”
ၵူၼ်းႁေႃႈၵႃးၼၼ်ႉ ႁဵတ်းႁိုဝ်ႁူႉၸၵ်းၸိုဝ်ႈမၼ်းၼႆမၼ်း ၼၢင်းလွမ်ဢၢမ်းယူႇ
“ၸႂ်ႈဢေႃႈ”
ၽွင်းၼၼ် ၼၢင်းၸၢမ်သႅင်း ၽႅဝ်မႃးတီႈၼၢင်းမူဝ်ၶၢဝ်သေ မၼ်းၼၢင်းၸင်ႇထၢမ်
“ႁဵတ်းသင် မူဝ်”
ၼၢင်းမူဝ်ၶၢဝ် ပႆႇတၼ်းတွပ်ႇ ၵူၼ်းႁေႃႈၵႃးၼၼ်ႉ ၸင်ႇၶိုၼ်းထၢမ်မႃးထႅင်ႈၶေႃႈၼိုင်ႈယဝ်ႉ
“ၼၢင်းမူဝ်ၶၢဝ် ... ၼႆႉ ပဵၼ်ၼၢင်းၸၢမ်သႅင်း ဢၼ်ဝႃၼၼ်ႉႁႃႉ”
ၼၢင်းမူဝ်ၶၢဝ် ၶိုၼ်းလႆႈဢၢမ်းၵႂႃႇထႅင်ႈသေ မၼ်းၼၢင်း ၵေႃႈတွပ်ႇဝႃႈ
“မူဝ် ... ပဵၼ်ၵူၼ်းႁူႉၸၵ်းမူဝ်ႁႃႉ ၵေႃႉၼႆႉ”
ၽွင်းၶႃထၢမ်တွပ်ႇၵၼ်ယူႇၼၼ်ႉ ၵူၼ်းၸၢႆးၵေႃႉၼၼ်ႉ ထူၵ်းဢဝ်လႅၼ်းယႃႈၶၢဝ်သေ ၸပ်းၾႆးလုတ်ႇဝႆႉယူႇ
“ယူဝ်ဝႃႈ မူဝ်ၶဝ်ႁူႉၸၵ်းၵၼ်ၼႆၼႃး ဢမ်ႇၸႂ်ႈႁႃႉ”
“ဢမ်ႇၸႂ်ႈ ... ယင်းဢမ်ႇယၢမ်ႈႁၼ်သေပွၵ်ႈလႃႈ”
ၵူၼ်းႁေႃႈၵႃးၼၼ်ႉ ယူႇၼိူဝ်ၵႃး ဢူမ်ၽူႇၵႂၼ်းၾႆးလႅၼ်းယႃႈသေ လၢတ်ႈ
“တီႈလဵဝ်တႄႉ ယၢမ်ႈႁၼ်ယဝ်ႉ ဢမ်ႇၸႂ်ႈႁႃႉ” ၼၢင်းမူဝ်ၶၢဝ်ၵေႃႈၸင်ႇ ၶိုၼ်းထၢမ်ဝႃႈ
“ပီႈၸၢႆး မီးလွင်ႈ ၶႂ်ႈထူပ်းႁၼ်ၽႂ်ၶႃႈ”
“ၶႂ်ႈထူပ်းၼၢင်းမူဝ်ၶၢဝ်လႄႈ ၼၢင်းၸၢမ်သႅင်းဢၼ်ဝႃႈၼၼ်ႉယဝ်ႉ”
ၶႃသွင်ၵေႃႉ တူၵ်းၸႂ်ၵႂႃႇသေ ၼၢင်းၸၢမ်သႅင်းၸင်ႇထၢမ်ဝႃႈ
“ၶႂ်ႈထူပ်း လွင်ႈၸိူင်ႉႁိုဝ်ပီႈၸၢႆး ... လွင်ႈလီႁႃႉ လွင်ႈၸႃႉႁႃႉ”
ၵူၼ်းၸၢႆးၵေႃႉၼၼ်ႉၵေႃႈ ၶိုၼ်းမႄးလုတ်ႇလႅၼ်းယႃႈၶၢဝ် မၼ်းၵမ်းၼိုင်ႈသေ
“လွင်ႈလီႁႃႉ လွင်ႈၸႃႉႁႃႉၼႆတႄႉ ပီႈၸၢႆးၵေႃႈဢမ်ႇပႆႇ ၸၢင်ႈဝႃႈ”
“ၸိုဝ်ႈပီႈၸၢႆးဝႃႈႁိုဝ်”
“ဢိူဝ်ႈ ... ၸၢႆးၼႃထိုဝ် ...ဝႃႈ”
“ၵွပ်ႈသင်လႄႈ သမ်ႉၶႂ်ႈမႃးထူပ်းၸၢမ်သႅင်းၶဝ်လႃႇ”
“ၵွပ်ႈပိူဝ်ႈၵူၼ်းၵေႃႉၼိုင်ႈ ၸႂ်ႉမႃးထူပ်းယဝ်ႉ”
“ၵူၼ်းၵေႃႉဢၼ်ၸႂ်ႉမႃးထူပ်းမူဝ်ၶဝ်ၼၼ်ႉ ပဵၼ်ၽႂ် ပီႈၸၢႆးၼႃထိုဝ်”
“ပဵၼ်တႆးၵေႃႉ ပီႈၸၢႆးၼႃထိုဝ်ဢိူဝ်ႈ”
ၶႃသွင်ၵေႃႉ ပဵၼ်ဢၼ်ၶမ်ၸႂ်ၵႂႃႇတႄႉတႄႉသေ ၼၢင်းၸၢမ်သႅင်း ၸႂ်ဢမ်ႇယၢဝ်းလႆႈလႄႈ မၼ်းၼၢင်းၸင်ႇၼႅတ်ႈဝႃႈ
“ၸၢမ်သႅင်းၶဝ်ႁူႉယဝ်ႉ လွင်ႈဝႃႈမၼ်းပဵၼ်တႆးၵေႃႉ ပီႈၸၢႆးၼႃထိုဝ်ၼၼ်ႉ မၼ်းယူႇလႂ်လႃႇ”
“ယူႇၼႂ်းသိူဝ်ႈၼႂ်းၵူၼ်ဢိူဝ်ႈ”
လႆႈငိၼ်းၼင်ႇၼၼ် ၶႃသွင်ၵေႃႉပဵၼ်ဢၼ်ၸႂ်လမ်ၵႂႃႇယဝ်ႉ၊ ၼၢင်းၸၢမ်သႅင်ႈ ၸင်ႇဝႆႉၼႃႈၶဵင်ႈသေ လၢတ်ႈသဵင်ၶႅင်ၶႅင်ၶၢတ်ႇၶၢတ်ႇယဝ်ႉ။
“ႁိုဝ်ႉ! ၵူၼ်းၸိူင်ႉႁိုဝ်ၵေႃႈဢမ်ႇႁူႉယဝ်ႉ”
“ၸိုဝ်ႈပီႈၸၢႆးဝႃႈ ၸၢႆးၼႃထိုဝ်ၼႆၼႃႇ ၵူၼ်းၵေႃႈၼႃထိုဝ် ဢိူဝ်ႈ”
“ၼၢင်းၸၢမ်သႅင်းထၢမ်ဝႃႈ မၼ်းယူႇတီႈလႂ်ၼႆ ဢၼ်ပီႈၸၢႆႈတွပ်ႇၼၼ်ႉ ဢမ်ႇၽိတ်းသေဢိတ်းၵူၺ်း မၼ်းယူႇၼႂ်းသိူဝ်ႈ ၼႂ်းၵူၼ်ယဝ်ႉ၊ ယွၼ်ႉပိူဝ်ႈမၼ်းသင်ႇလၢတ်ႈမႃးဝႃႈ ပေႃးၶဝ်ထၢမ် ႁႂ်ႈမွၵ်ႇလၢတ်ႈပၼ်သိုဝ်ႈသိုဝ်ႈ၊ ႁႂ်ႈမွၵ်ႇပၼ်ၸိုဝ်ႈၸိုဝ်ႈၼႆၼႃႇ ၵွပ်ႈၼႆ ဢၼ်ပီႈၸၢႆးၼႃထိုဝ် တွပ်ႇဝႃႈ မၼ်းယူႇၼႂ်းသိူဝ်ႈၼႂ်းၵူၼ်ၼႆၼၼ်ႉ ဢမ်ႇၽိတ်းဢမ်ႇၸႂ်ႈႁႃႉ ၼၢင်းမူဝ်ၶၢဝ်”
“ဢမ်ႇၽိတ်းၼင်ႇၵဝ်ႇ ပီႈၸၢႆးၼႃထိုဝ် ၸိုဝ်ႈပီႈၸၢႆႈၼႃ ထိုဝ်လႄႈ တင်းပီႈၸၢႆးၼႃထိုဝ်ၼႆႉ လႅပ်ႈၵၼ်ဝႃႈလႅပ်ႈၵၼ်ယဝ်ႉ”
“လႅပ်ႈယူႇႁႃႉ ၸိုဝ်ႈပီႈၸၢႆးၼႃထိုဝ်ၼႆႉ မၼ်းၵေႃႉတၢင်ႇ ပၼ်ဝႆႉၼင်ႇၵဝ်ႇယဝ်ႉ”
“မၼ်းဢၼ်ဝႃႈၼၼ်ႉ ပဵၼ်မၼ်းလႅင်ႁႃႉ မၼ်းၽိူၵ်ႇႁႃႉ မၼ်းၼိဝ်ႉႁႃႉ မၼ်းႁိင်ႇႁႃႉ တွင်ၸိင်ႁႃႉ ပီႈၸၢႆးၼႃထိုဝ်”
လႆႈငိၼ်းၼၢင်းမူဝ်ၶၢဝ် လၢတ်ႈၵႂႃႇၼင်ႇၼႆ ၸၢႆးၼႃထိုဝ် ပဵၼ်ဢၼ်ၸူမ်းၶူဝ်ၵႂႃႇတႄႉတႄႉ
“ႁႃး ႁႃး ႁႃး ႁႃး
ၸၢႆးၼႃထိုဝ် တိုၵ်ႉပဵၼ်ဢၼ်ၶႂ်ႈၶူဝ်ယူႇလႄႈ မၼ်ႈပႆႇၵိုင်ႉၵၢင်ႉၸၢင်ႈတွပ်ႇ ၼၢင်းမူဝ်ၶၢဝ်ၸင်ႇၶိုၼ်းဝႃႈ
“ဝႃႈတႄႉၵေႃႈ မၼ်းယူႇဝဵင်းလႂ် ၸိုဝ်ႈဝႃႈၸိူင်ႉႁိုဝ် ၸႂ်ႉပီႈၸၢႆးၼႃထိုဝ်မႃး လွင်ႈၸိူင်ႉႁိုဝ်ၼႆၵေႃႈ ၶႅၼ်းတေႃႈလၢတ်ႈပၼ်လီလီလႄႈ ပီႈၸၢႆးၼႃထိုဝ် မူဝ်ၶဝ်မီးၵၢၼ်ဢေႃႈ”
“ဢေႃ ... ၸႂ်ႈတႄႉႁႃႉ မၼ်းယူႇဝဵင်းဢမ်ႇၶူင်ႈဢမ်ႉပဵင်း ဢမ်ႇပုၵ်းဢေႃႈ ... ဢေႃႈ ယူႇဝဵင်းလွႆလႅမ်၊ ၸိုဝ်ႈတႄႉ ပဵၼ်ၸၢႆးမွၼ်းၶိူဝ်း ဢၼ်ၸႂ်ႉမႃးတႄႉ ၸႂ်ႉမႃးသူင်ႇပၼ်ၶႅပ်းႁၢင်ႈ ၼၢင်းမူဝ်ၶၢဝ် ၼၢင်းၸၢမ်သႅင်းၼႆဝႃႇ”
လႆႈငိၼ်းၼင်ႇၼၼ် ၶႃသွင်ၵေႃႉပဵၼ်ဢၼ်ၸူမ်းသူဝ်းၵႂႃႇ ၵမ်းလဵဝ်ယဝ်ႉ
“တႄႉႁႃႉ ပီႈၸၢႆးၼႃထိုဝ် မီးလႂ်”
“မီးၼႆႈဢိူဝ်ႈ မိူဝ်ႈၸဝ်ႉၼၼ်ႉ ယွၼ်ႉပိူဝ်ႈ ပီႈၸၢႆးၼႃထိုဝ် တင်ႈၸႂ်ၼႃထိုဝ်လႄႈ ၼၢင်းမူဝ်ၶၢဝ် ၼၢင်းၸၢမ်သႅင်း တိုၵ်ႉၽိတ်း ၸႂ်ယူႇယူဝ်ႉ၊ ပေႃးၽိတ်းၸႂ်ၼႆတႄႉ ဢမ်ႇပႆႇၸၢင်ႈပၼ်ၶႅပ်းႁၢင်ႈၵူၺ်း”
“ဢမ်ႇၽိတ်းၸႂ် ဢဝ်မႃးလႄႈ”
“ၼၢင်းၸၢမ်သႅင်းလူး တိုၵ်ႉလွမ်ၽိတ်းၸႂ်ယူႇယူဝ်ႉ ၼႃႈတိုၵ်ႉတူႇဝႆႉယူႇလႃႇ”
“ပီႈၸၢႆးၼႃထိုဝ် ႁဵတ်းႁိုဝ်ႁူႉ”
“ႁူႉဢိူဝ်ႈ ... တီႈႁိမ်းၼႃႈ ၼၢင်းၸၢမ်သႅင်းၼၼ်ႉ မႅင်းမူၼ်းမိၼ်ၵႂႃႇမိၼ်ၶိုၼ်းယူႇလူး”
“ဢူဝ် ... လႃႈလီဝႃႈ ဢမ်ႇၸႂ်ႈသင် တူႇၵေႃႈဢမ်ႇတူႇ မဵၼ်ၵေႃႈဢမ်ႇမဵၼ် ပဵၼ်ၸႂ်လီယဝ်ႉယဝ်ႈ ဢဝ်မႃးၼႄလႄႈ ၶႅပ်းႁၢင်ႈၸိူဝ်းၼၼ်ႉ”
ၸၢႆးၼႃထိုဝ်ၵေႃႈ ဢဝ်ယိုၼ်ႈ ပၼ်ၼၢင်းမူဝ်ၶၢဝ်ယဝ်ႉ
“ႁိူဝ်ႈ ... ၼၢင်းမူဝ်ၶၢဝ်”
“ၸူမ်းၶွပ်ႈၸႂ်ယဝ်ႉ ပီႈၸၢႆးၼႃထိုဝ် ဢေႃႈ ပီႈၸၢႆးၶိူဝ်း သင်ႇမႃးဢီႈသင်ထႅင်ႈ”
“ဢမ်ႇသင်ႇသင် မၼ်းတႅမ်ႈလိၵ်ႈမႃးယူႇၼႆၼႃႇ လိၵ်ႈတႄႉ မီးၼႂ်းႁေႃႇၼႆႉၼႆယဝ်ႉ ... ပေႃးၼႆ ပီႈၸၢႆးၼႃထိုဝ်တေၵႂႃႇ ၵွၼ်ႇၼႃႈ”
“ဢေႃႈ ... ဢေႃႈ လွႆးလွႆး”
ဝၢႆးသေ ၸၢႆးၼႃထိုဝ်ႁေႃႈၵႃးပူၼ်ႉၵႂႃႇယဝ်ႉ ၶႃသွင်ၵေႃႉမႃး ၼင်ႈၼိူဝ်တင်ႇၼႂ်းသူၼ်ၶဝ်သေ ၼၢင်းမူဝ်ၶၢဝ် ၸင်ႇဝႃႈ
“ၸၢမ်သႅင်း ... ႁဝ်းတူၺ်းလိၵ်ႈဢွၼ်တၢင်းၼေႃႈ”
“ယူဝ်ၶႄး ပဵၼ်လိၵ်ႈၶဵဝ်ယူဝ်ႉ မူဝ်”
“ဢူဝ် ... ၸၢမ်သႅင်းၼႆႉ လႃႈလီဝႃႈ ... ဢမ်ႇၸႂ်ႈသႄႈ”
ၼၢင်းမူဝ်ၶၢဝ် ၸင်ႇသိၵ်ႇထူင်လိၵ်ႈသေ ၸၼ်ဢဝ်လိၵ်ႈ ၼႂ်းမၼ်းဢွၵ်ႇမႃးၽုၺ်ႇတူၺ်းယဝ်ႉ
ယိုၼ်ႈထိုင်
မူဝ်ၶၢဝ် - တူၼ်ႈတီး
ပီႈၸၢႆးၶိူဝ်း မီးလိၵ်ႈၶိုင်ပွင် ထိုင်ထွင်တႅမ်ႈပၼ် ယၼ် ႁွတ်ႈတွပ်ႇၶိုၼ်းပၼ် လိၵ်ႈဢၼ်မူဝ်ၶၢဝ် တႅမ်ႈမႃးၼၼ်ႉယဝ်ႉ။
ပီႈၸၢႆးၶိူဝ်းႁွတ်ႈၽႅဝ်မိူဝ်းလွႆလႅမ်သေ ၽွင်းတိုၵ်ႉမုင်ႈမွင်း ပႂ်ႉငိၼ်းၶၢဝ်ႇ မူဝ်ၶၢဝ်ယူႇၼၼ်ႉ လႆႈႁပ်ႉႁၼ်လိၵ်ႈဢၼ်မူဝ်ၶၢဝ် ပၼ်မႃးၼၼ်ႉလႄႈ ၵႄႈၵၢင်ၸႂ် ပဵၼ်ဢၼ်ၸူမ်းသိူဝ်းပေႃးဢမ်ႇမီး တီႈတႅၵ်ႈယဝ်ႉ ဝၼ်းဢၼ်ပီႈၸၢႆးၶိူဝ်း လုၵ်ႉတူၼ်ႈတီး ပွၵ်ႈမႃးလွႆလႅမ်ၼၼ်ႉ ၽွင်းမိူဝ်ႈၵႂႃႇၵိၼ်ၶဝ်ႈသွႆး ၼႂ်းၵၢတ်ႇၼၼ်ႉ ပီႈၸၢႆးၶိူဝ်းၵေႃႈ လွမ်လွမ်မုင်ႈမွင်းယူဝ်ဝႃႈ မူဝ်ၶၢဝ်ၶဝ် တေမႃးယူႇၼႆယဝ်ႉ ... ဝၼ်းၼၼ်ႉ ပီႈၸၢႆးၶိူဝ်း ၼင်ႈၵိၼ်သွင်ဝၢၼ်ႇၵူၺ်းလႄႈ သင်ၸိူဝ်ႉဝႃႈ ၼင်ႈၵိၼ်သၢမ်ဝၢၼ်ႇၼႆတႄႉ ယူဝ်ၶႄး တေၸၢင်ႈၺႃးမူဝ်ၶၢဝ် လႄႈ ၸၢမ်သႅင်းယူႇယူဝ်ႉ၊ ၵူၺ်းၵႃႈ ... ပွၵ်ႈၼႆႉတႄႉ သၢႆငၢႆၽၢၼ်ႇ ပဵၼ်ၵႂႃႇ ဢမ်ႇပၼ်ႁဝ်းႁႃးထူပ်းၺႃးၵၼ်လႄႈ ၼႂ်းၸႂ်ပဵၼ်ဝႆႉ မဵဝ်းၼိုင်ႈယဝ်ႉ။
မိူဝ်းၼႃႈမႃးတႄႉ ပီႈၸၢႆးၶိူဝ်း မုင်ႈမွင်းယွၼ်းသူး ယႃႇပေ ႁႂ်ႈလႆႈၵၢတ်ႈၵၼ်ထႅင်ႈ ၸိူင်ႉၼႆသေၵမ်းၼႆယူႇ”
ၶႅပ်းႁၢင်ႈမူဝ်ၶၢဝ်ၶဝ်ၵေႃႈ ၸင်ႇႁႃလႆႈ ဝၼ်းဢၼ်လိၵ်ႈမူဝ်ၶၢဝ် ၽႅဝ်မႃးၼၼ်ႉယဝ်ႉ၊ လႆႈႁူႉဝႃႈ မူဝ်ၶႂ်ႈႁၼ်ၼႃႇသေ သမ်ႉပေႃးၼွၼ်းၾၼ်ၼႆလႄႈ ၼင်ႇႁိုဝ်ၵၢင်ၸႂ်မူဝ်ၶၢဝ် တေၸဵဝ်းတဵမ်ထူၼ်ႈၼၼ်ႉ ပီႈၸၢႆးၶိူဝ်း ၸင်ႇဢဝ်ၶႅပ်းႁၢင်ႈသူင်ႇမႃးၸွမ်း ၸၢႆးၼႃထိုဝ်(ၸၢႆးယွတ်ႈ)ယဝ်ႉ၊ ၶႅပ်းႁၢင်ႈ ဢၼ်ပီႈၸၢႆးၶိူဝ်းထႆႇပၼ်ၼၼ်ႉတႄႉ ၶႅမ်ႉၵူႈၶႅပ်းယဝ်ႉ ဢမ်ႇလူႉဢမ်ႇလႅဝ်သေ ၶႅပ်းႁၢင်ႈၵေႃႈႁၢင်ႈ လီၵူႈၶႅပ်းယဝ်ႉ ... ယွၼ်ႉပိူဝ်ႈသင်ၼႆ ယွၼ်ႉပိူဝ်ႈၸဝ်ႈမၼ်း တိုၼ်းႁၢင်ႈလီဝႆႉ ၸဵမ်ပိုင်းလူးဢမ်ႇၸႂ်ႈႁႃႉ? ၶႅပ်းႁၢင်ႈၸိူဝ်းၼႆႉ တင်းသဵင်ႈ ႁႂ်ႈပဵၼ်ၶွင်ၽၢၵ်ႇ ပီႈၸၢႆးၶိူဝ်း တွၼ်ႈပၼ်ပုၼ်ႈတႃႇမူဝ်ၶၢဝ်သေၵမ်း၊ ၵူၺ်းၵႃႈ ၼႂ်းၶႅပ်းႁၢင်ႈၸိူဝ်းၼႆႉတင်းသဵင်ႈၼၼ်ႉတႄႉ ၶႅပ်းႁၢင်ႈ ဢၼ်မူဝ်ၶၢဝ်ၵေႃႉလဵဝ် ထႆႇဝႆႉတီႈၼမ်ႉဢုၼ်ႇ ဢၼ်ၼင်ႈတင်ႇသေ ထႆႇဝႆႉတႂ်ႈၸွင်ႈလၢႆးၼၼ်ႉ ၶႅပ်းၼိုင်ႈ ဢၼ်မူဝ်ၶၢဝ်လႄႈၸၢမ်သႅင်းထႆႇ ႁူမ်ႈၵၼ် တီႈၼိူဝ်လွႆၼူၵ်ႉယုင်းၶမ်းၼၼ်ႉ ၶႅပ်းၼိုင်ႈ သွင်ၶႅပ်းၼႆႉတႄႉ ပီႈၸၢႆးၶိူဝ်း ယွၼ်းဢဝ်ဝႆႉယဝ်ႉၼႃႈ...
ဢေႃႈ ... ယွၼ်းဢဝ်တႄႉဢမ်ႇၸႂ်ႈ ၽိတ်းၵႂႃႇဢိတ်ႈၼိုင်ႈယဝ်ႉ ယွၼ်ႉပိူဝ်ႈဢဝ်ယဝ်ႉသေ ၸင်ႇယွၼ်းလႄႈ “သွင်ၶႅပ်း ၼၼ်ႉတႄႉ ပီႈၸၢႆးၶိူဝ်း ဢဝ်ယွၼ်းဝႆႉယဝ်ႉ” ပီးၸၢႆးၶိူဝ်း ဢဝ် ယွၼ်းဢဝ်လၢႆလၢႆတႄႉ ဢမ်ႇၸႂ်ႈၵူၺ်း ၶႅပ်းႁၢင်ႈပီႈၸၢႆးၶိူဝ်းၶႅပ်းၼိုင်ႈ ဢၼ်မူဝ်ထႆႇပၼ် တီႈၼမ်ႉဢုၼ်ႇၼၼ်ႉၵေႃႈ ပီႈၸၢႆးၶိူဝ်းသူင်ႇပၼ်မႃးၸွမ်းယူႇ၊
ဢၼ်မူဝ်ၶၢဝ်ထႆႇပၼ် ပီႈၸၢႆးၶိူဝ်းၼၼ်ႉၵေႃႈ ၶႅမ်ႉၵူႈၶႅပ်းယဝ်ႉ၊ ၵူၺ်းၵႃႈ ၸဝ်ႈမၼ်းတႄႉ ဢမ်ႇႁၢင်ႈလီၵူၺ်း...
ယွၼ်းသူးမႅင်ႇပၼ် - ႁႂ်ႈဢၼ်ၵတ်းယဵၼ်
ၽေးၶဵၼ်ယၢၼ်ၵၢင်း - ႁႂ်ႈမီးတၢင်းသိူဝ်းၸႂ်သေၵမ်း
တေၶုၵ်းၸႂ်လႆႈယူႇတႃႇသေႇ
ၸၢႆးမွၼ်းၶိူဝ်း - လွႆလႅမ်
ဝၢႆးသေၶႃသွင်ၵေႃႉ လူလိၵ်ႈယဝ်ႉ ၶႃဢဝ်တူၺ်းၶႅပ်းႁၢင်ႈ ၸိူဝ်းၼၼ်ႉ ဢၼ်ၼိုင်ႈယဝ်ႉ ဢၼ်ၼိုင်ႈယူႇ ၶႅပ်းႁၢင်ႈၸၢႆးမွၼ်းၶိူဝ်းၼၼ်ႉတႄႉ ၼၢင်းၸၢမ်သႅင်း တင်ႈၸႂ် ၶႂ်ႈယွၵ်ႇမူဝ်ၶၢဝ်လႄႈ မၼ်းၼၢင်းလွမ်လွမ် ဢဝ်လၵ်ႉသိူင်ႇဝႆႉယဝ်ႉ၊ ဝၢႆးသေ တူၺ်းၵႂႃႇယဝ်ႉမူတ်း ၼၢင်းမူဝ်ၶၢဝ် ၸင်ႇထၢမ်ဝႃႈ
“ၸၢမ်သႅင်း ... ၶႅပ်းႁၢင်ႈ ဢၼ်ပီႈၸၢႆးၶိူဝ်းၼၼ်ႉ ယင်း ဢမ်ႇႁၼ်လႃႇ”
“တႄႉဢိူဝ်ႈၼေႃ ယူဝ်ၶႄး ... ပႃးၵႂႃႇၼႂ်းဢၼ်တူၺ်းယဝ်ႉၼၼ်ႉယူဝ်ႉ ၶိုၼ်းႁႃတူၺ်းလီလီလႄႈ မူဝ်”
ၼၢင်းမူဝ်ၶၢဝ်ၵေႃႈ ၼႅတ်ႈၶိုၼ်းႁႃတူၺ်းမူတ်းမူတ်းယူႇ၊ ၼၢင်းၸၢမ်သႅင်း လွမ်လွမ်ယုမ်ႉဝႆႉယူႇယဝ်ႉ၊
“ဢမ်ႇႁၼ်လူင် ၸၢမ်သႅင်း ၼႂ်းလိၵ်ႈတႄႉ တႅမ်ႈမႃး တႅတ်ႈၼႅတ်ႈယူႇလူင် ႁဵတ်းသင်ၵေႃႈ ဢမ်ႇႁူႉယဝ်ႉ”
“ယူဝ်ၶႄး ... ပီႈၸၢႆးၶိူဝ်းလႅၼ်ယူဝ်ႉၼေႃ ... မူဝ်”
“ဢမ်ႇႁူႉယဝ်ႉ”
ၼၢင်းမူဝ်ၶၢဝ် ၶိုၼ်းမႄးႁႃတူၺ်းထႅင်ႈလီလီယူႇ ၼၢင်းၸၢမ်သႅင်း သမ်ႉလွမ်လွမ် ယုမ်ႉၶူဝ်ဝႆႉယူႇၼၼ်ႉ ၼၢင်းမူဝ်ၶၢဝ်ႁၼ်ၵႂႃႇလႄႈ မၼ်းၼၢင်းၸင်ႇထၢမ်ဝႃႈ
“ၸၢမ်သႅင်း ၶူဝ်သင်”
“ဢမ်ႇၶူဝ်သင်”
“ၸၢမ်သႅင်း ... ဢဝ်သင်လၵ်ႉသိူင်ႇဝႆႉ ၽၢႆႇပုၼ်ႉၼၼ်ႉ ၼႄလူး”
“ဢမ်ႇၸႂ်ႈသင်”
ၼၢင်းမူဝ်ၶၢဝ် ၸင်ႇၼႅတ်ႈၸၼ်ၼၢင်းၸၢမ်သႅင်းလုၵ်ႉသေ မၼ်းၼၢင်းလႆႈႁၼ်ၶႅပ်းႁၢင်ႈ ၸၢႆးမွၼ်းၶိူဝ်းယဝ်ႉ
“ၸၢမ်သႅင်းၼႆႉ ဢမ်ႇလီၵူၺ်း ... လႃႈလီယွၵ်ႈမူဝ်ၵျႃႉလႆ”
“ၶိၵ်း ၶိၵ်း မူဝ်ဢမ်ႇလႆႈႁၼ်ၶႅပ်းႁၢင်ႈ ပီႈၸၢႆးၶိူဝ်းလႄႈ မိူဝ်ႈၵႆႈၼၼ်ႉ မူဝ်ၸႂ်ပေႃးဢမ်ႇလီၵႂႃႇဢမ်ႇၸႂ်ႈႁႃႉ”
“ႁိုဝ်တေၵႂႃႇလီလႆႈလႃႇ ... ၸၢမ်သႅင်းၼႆႉ လႃႈလီႁဵတ်းၵျႃႉ”
ၶႃသွင်ၵေႃႉ ၼင်ႈလွမ်တူၺ်း ၶႅပ်းႁၢင်ႈၸၢႆးမွၼ်းၶိူဝ်းယူႇ ၼၢင်းၸၢမ်သႅင်း ၸင်ႇၵွတ်ႇၶေႃး ၼၢင်းမူဝ်ၶၢဝ်သေ
“ပဵၼ်ဢၼ် မူဝ်ထႆႇပၼ်ၼၼ်ႉႁႃႉၼႆႉ”
“ၸႂ်ႈဢိူဝ်ႈ”
“ပီႈၸၢႆးၶိူဝ်းလႅတ်းၵျႃႉၼေႃ မူဝ်”
“လႅတ်းၸိူင်ႉႁိုဝ်”
“ႁၢင်ႈလီၵျႃႉ ၼႆဢိူဝ်ႈ ဢမ်ႇႁၢင်ႈလီႁႃႉ မူဝ်ၶၢဝ်”
“ဢမ်ႇႁူႉ”
“ယႃႇပေလႅၼ်လႄႈ ႁဵတ်းၵဵင်ႈဢမ်ႇႁူႉ ဢမ်ႇၸႂ်ႈႁႃႉ ပေႃးဢဝ်ၸၢမ်သႅင်းဝႃႈတႄႉ ၼႂ်းတႃမူဝ်ၼၼ်ႉ ပီႈၸၢႆးၶိူဝ်း ႁၢင်ႈလီသေပိူၼ်ႈဝႆႉ ဢမ်ႇၸႂ်ႈႁႃႉ”
ၼၢင်းမူဝ်ၶၢဝ် ပဵၼ်ၼႃႈလီလၢႆၵႂႃႇသေ ၸင်ႇထဵင်ဝႃႈ
“ဢမ်ႇၸႂ်ႈ”
“ယႃႇပေဢၢႆလႄႈ ၸၢမ်သႅင်းပဵၼ်ၵူၼ်းယူႇၼႂ်းၵႄႈၵၢင် ၼ်းလႄႈ ၸၢမ်သႅင်းႁူႉယူႇၵူၺ်း”
“ႁူႉၸိူင်ႉႁိုဝ်”
“မူဝ်ၵေႃႁူႉယူႇလူး ... ဢမ်ႇလူဝ်ႇထၢမ်ၸၢမ်သႅင်းယဝ်ႉ”
“ႁဝ်းမိုတ်ႈၵၼ်လၢႆလၢႆၵူၺ်းဢိူဝ်ႈ ၸၢမ်သႅင်း”
“ဢၼ်မိုတ်ႈၵၼ်ၼၼ်ႉ ပိူၼ်ႈဝႃႈၸၢင်ႈမေႃယိုတ်ႈဝႃႇ”
“မေႃယိုတ်ႈၸိူင်ႉႁိုဝ် ၸၢမ်သႅင်း”
“မၼ်းၸၢင်ႈမေႃယိုတ်ႈသေ ၵႂႃႇၶိုတ်ႈသႂ်ႇတၢင်းႁၵ်ႉဝႃႇ”
“ဢူဝ် ... ဢမ်ႇၸႂ်ႈ”
“တီႈလဵဝ်တႄႉ ပႆႇၸႂ်ႈၼႃႈ မၼ်းတိုၵ်ႉယိုတ်ႈယူႇလႄႈ လွႆး လွႆးမႃးတႄႉ တေၶိုတ်ႈယူႇဢမ်ႇႁၢင်ႉယဝ်ႉ ၸၢမ်းသႅင်းႁၼ်ဝႆႉၼင်ႇၼႆယူႇ”
“ဢမ်ႇပဵၼ်လႆႈၵူၺ်း”
“ပေႃးမူဝ်ဝႃႈ ဢမ်ႇပဵၼ်လႆႈၼႆၵေႃႈ ၸၢမ်သႅင်းတေပႂ်ႉတူၺ်းတေႃႇ သဵၼ်ႈတၢင်းမိုတ်ႈၵၼ်ၼႆႉ သုတ်းၼၼ်ႉယဝ်ႉ”
“ပႂ်ႉတူၺ်းလႄႈ ပေႃးပႂ်ႉလႆႈၵေႃႈ”
ဝၢႆးသေ ၶႃတူၺ်းၶႅပ်းႁၢင်ႈယဝ်ႉ ၶႃၶိုၼ်းဢဝ်မိူဝ်းၼႄ လုင်းၸိုၼ်ႈ ဢူႈၼၢင်းမူဝ်ၶၢဝ်ယဝ်ႉ
“ဢူႈ ... ၶႅပ်းႁၢင်ႈ ဢၼ်ပီႈၸၢႆးၶိူဝ်းထႆႇပၼ်ၼၼ်ႉ လႆႈမႃး ယဝ်ႉ”
“တႄႉႁႃႉ ဢဝ်မႃးလူး ဢူႈတူၺ်း”
မႄႈၼၢင်းမူဝ်ၶၢဝ်ၶဝ် ပႃႈယွတ်ႈၵေႃႈ တိုဝ်းမၢၼ်ႇတႃ(ဝႅၼ်ႉတႃ)သေ မႃးၼင်ႈလွမ်တူၺ်းႁိမ်း လုင်းၸိုၼ်ႈယဝ်ႉ၊ ၼၢင်းမူဝ်ၶၢဝ် ၸင်ႇဢဝ်ၶႅပ်းႁၢင်ႈ ဢၼ်ဢူႈၶဝ် တိုၵ်ႉယူႇၼိူဝ်ႁိူဝ်းသေ ဢွႆႇၼူၵ်ႉ ၼၼ်ႉ ၼႄဢူႈၶဝ်ယဝ်ႉ
“ဢူႈ ... တူၺ်းၶႅပ်းႁၢင်ႈ ဢၼ်ၼႆႉၽွင်ႈလူး ပဵၼ်ၶႅပ်းႁၢင်ႈၽႂ်”
လုင်းၸိုၼ်ႈၵေႃႈ ၸင်ႇဢဝ်တူၺ်းလီလီ လႆႈႁၼ်ၶႅပ်းႁၢင်ႈမၼ်းလႄႈ မၼ်းၸင်ႇယုမ်ႉသေၶူဝ်ဝႃႈ
“ႁႃး ႁႃး ပဵၼ်ၶႅပ်းႁၢင်ႈ မိူဝ်ႈဢူႈဢွႆႇၶဝ်ႈမုၼ်းၼူၵ်ႉၼၼ်ႉ ဢမ်ႇၸႂ်ႈႁႃႉၼႆႉ ၸၢႆးမွၼ်းၶိူဝ်း တၼ်းထႆႇဝႆႉယူႇၼေႃ”
“မူဝ် ၸႂ်ႉထႆႇဢိူဝ်ႈၼၼ်ႉ ဢူႈ ၸွင်ႇၶႅမ်ႉႁိုဝ်”
“ၶႅမ်ႉယူႇ ၶႅပ်းၼႆႉတူၵ်းသၽႃႇဝမၼ်း(တိုၼ်းမၼ်း)သေ ပိူၼ်ႈယဝ်ႉ”
မႄႈၼၢင်းမူဝ်ၶၢဝ် ၸင်ႇယွၼ်းတူၺ်းသေ
“မီးလႂ် ပၼ်ႁဝ်းတူၺ်းၽွင်ႈလူး ၸိူင်ႉၼင်ႇၼႆၵေႃႈ လႃႈလီထႆႇထီႇၵႂႃႇဝႃႇ ၺႃးၵၼ်ယဝ်ႉ ၶိူဝ်ပေႃႈလုၵ်ႈသွင်ၵေႃႉၼႆႉတႄႉ တူၺ်းလူး ထႆႇႁၢင်ႈၼႆၵေႃႈ ထႆႇမႃးၼမ်ပေႃးပဵၼ်တၢၼ်ႇၼႆႉဝႃႇ သဵင်ႈငိုၼ်းၵူၺ်းယဝ်ႉ”
“ၼၢင်းမူဝ်ၶၢဝ် လႆႈငိၼ်း မႄႈၶဝ်ပွင်ႉၼင်ႇၼၼ် မၼ်ပဵၼ်ဢၼ်ၸႂ်ဢမ်ႇလီၵႂႃႇယဝ်ႉ မၼ်းၼၢင်းၸင်ႇလၢတ်ႈဝႃႈ
“ဢမ်ႇလႆႈသဵင်ႈၵူၺ်းမႄႈ ပဵၼ်ပီႈၸၢႆးၶိူဝ်း တွၼ်ႈပၼ် လုၵ်ႈယိင်းၶဝ်လၢႆလၢႆၼႆယဝ်ႉ”
“ဢေႃႈ ... ဝႃႈၼၼ်ႁႃႉ မၼ်းပဵၼ်ၽႂ် ယူႇလႂ်”
“ၼၢင်းမူဝ်ၶၢဝ် ၸင်ႇဢဝ်ၶႅပ်းႁၢင်ႈ ၸၢႆးမွၼ်းၶိူဝ်းၼႄမႄႈ ၶဝ်သေ
“ပဵၼ်ၵေႃႉၼႆႉဢေႃႈမႄႈ ... မၼ်းယူႇလွႆလႅမ်ဝႃႇ”
ပႃႈယွၼ်ႈၵေႃႈ လႃႈလီႈလွမ်တူၺ်းၶႅပ်းႁၢင်ႈ ၸၢႆးၶိူဝ်းၵႅပ်ႉၼိုင်ႈသေ
“ဢေႃႈ ပဵၼ်ၵေႃႉၼႆႉႁႃႉ ဢိူဝ်ႈ ဢိူဝ်ႈ လီယဝ်ႉ”
ပႃႈယွတ်ႈ ပိူၼ်းၵၢင်းမၼ်း ဢမ်ႇပေႃးႁၢၼ်ႉၸႂ် ဢဝ်ၶႅပ်း ႁၢင်ႈၸိူဝ်းၼၼ်ႉ ဝၢင်းဝႆႉၼိူဝ်ၽိူၼ်သေ ပၢႆႈၵႂႃႇၼႂ်းသွင်ႇၾႆးယဝ်ႉ၊ ၼၢင်းမူဝ်ၶၢဝ်လႆႈႁၼ် မႄႈၶဝ် ဢမ်ႇၸွမ်းၸႂ် မၼ်းၼၢင်းလႄႈ မၼ်းၼၢင်း ပဵၼ်ၸႂ်လဵၵ်ႉၶေႃးၶူမ်ဢွႆႇႁွႆႈၸႂ်လဵၵ်ႉသေ ၼမ်ႉတႃမၼ်းၼၢင်းၵေႃႈ လေႃႈတူၵ်းလူင်း မၼ်းၼၢင်း လွမ်ႁႆႈယူႇသိုတ်ႉသိုဝ်ႉယဝ်ႉ၊ လုင်းၸိုၼ်ႈလႆႈႁၼ်လုၵ်ႈယိင်းမၼ်းႁႆႈလႄႈ မၼ်းၸင်ႇထၢမ်ဝႃႈ
“ဢူဝ် ... လုၵ်ႈယိင်း ႁႆႈႁဵတ်းသင်လႃႇၼႆႉ”
“ႁႆႈဢိူဝ်ႈ ... မူဝ်တႃႉလၢတ်ႈလီလီ မႄႈသမ်ႉဢမ်ႇၶႂ်ႈထွမ်ႇသေ ပၢႆႈၵႂႃႇဝႃႇ မူဝ်ႁဵတ်းသင်မႃးၵေႃႈ ဢမ်ႇတွၼ်ႉပၼ်ၼႃႈလီသေပွၵ်ႈ”
ၼၢင်းမူဝ်လၢတ်ႈၼင်ႇၼႆသေ ႁႆႈယူႇယဝ်ႉ ၼၢင်းၸၢမ်သႅင်းတႄႉ တေႁဵတ်းႁိုဝ်ၵေႃႈ ဢမ်ႇႁူႉယဝ်ႉ လုင်းၸိုၼ်ႈၸင်ႇဝႃႈ
“တဵတ်ႇလႄႈ လုၵ်ႈယိင်း မႄႈသူၼႆႉမၼ်းတိုၼ်း ပဵၼ် ၵူၼ်းမဵဝ်းၼိုင်ႈဢိူဝ်ႈ ၵၢင်ၸႂ်မၼ်းတႄႉ ဢမ်ႇၶႂ်ႈႁႂ်ႈသဵင်ႈငိုၼ်းၼမ်ၵႂႃႈ”
မၼ်းၼၢင်းၵေႃႈ မႄးၸဵတ်ႉၼမ်ႉတႃမၼ်းၼၢင်းယူႇယဝ်ႉ လုင်းၸိုၼ်းၸင်ႇထၢမ်ဝႃႈ
“ၶႅပ်းႁၢင်ႈၸိူဝ်းၼႆႉ ၸၢႆးမွၼ်းၶိူဝ်းဝႃႈ မၼ်းတွၼ်ႈပၼ် ၼႆႁႃႉ”
“ၸႂ်ႈဢေႃႈ ၼႆႉၼႃႇ မၼ်းတႅမ်ႈမႃးၼႂ်းလိၵ်ႈၼႆႉယူႇလူး ၶႅပ်းႁၢင်ႈၸိူဝ်းၼႆႉတင်းသဵင်ႈၵေႃႈ ႁႂ်ႈလႆႈပဵၼ်ၶွင်ၽၢၵ်ႇပီႈၸၢႆးၶိူဝ်း တွၼ်ႈပၼ်ပုၼ်ႈတႃႇ မူဝ်ၶၢဝ်ၶဝ်သေၵမ်း ၼႆၼႃႇ”
“ဢေႃႈ ... ဝႃႈၼၼ်ႁႃႉ ၶႅပ်းႁၢင်ႈဢၼ်ၵႂႃႇထႆႇၸိူဝ်းၼႆႉ ပႃးၸဵမ်ၵူၼ်းသၢဝ်းပၢႆၵမ်းလဵဝ် ၼိုင်ႈၵေႃႉထႆႇ ၼိုင်ႈၶႅပ်းသွင်ၶႅပ်းၵေႃႈ ၶႅပ်းႁၢင်ႈတင်းမူတ်း ဢမ်ႇတႅမ်ႇသီႇႁႃႈသိပ်းပၢႆသႄႈ ၵွပ်ႈၼႆ ဢၼ်ၸၢႆးမွၼ်းၶိူဝ်း ထႆႇမႃးသုၵ်ႈမႃးၼႆႉ မၼ်းလႆႈဢဝ်ငိုၼ်းသေ ႁဵတ်းမႃးမူတ်းမူတ်းယဝ်ႉ ၸွင်ႇၸႂ်ႈႁိုဝ် လုၵ်ႈယိင်း”
“ၸႂ်ႈဢေႃႈ”
“ၵွပ်ႈၼႆ ၵၢင်ၸႂ်ၸၢႆးမွၼ်းၶိူဝ်းၼၼ်ႉ မၼ်းမီးၸေႇတၼႃႇသေ ၽၢၵ်ႇတွၼ်ႈပၼ်မႃး ဝႃႈၼႆသေတႃႉ မိူဝ်ႈႁဝ်းဢၢပ်ႇၼမ်ႉဢုၼ်ႇၼၼ်ႉ ဢူႈထၢမ်တူၺ်းမၼ်း လွင်ႈထႆႇႁၢင်ႈၼႆႉ ၶႃသွင်ၵေႃႉ ပီႈဢၢႆႈၶဝ် ႁူမ်ႈၵၼ်ၼႆယဝ်ႉ၊ လွင်ႈဢၼ်မၼ်းၽၢၵ်ႇတွၼ်ႈမႃးၼႆႉ ႁဵတ်းႁိုဝ်ၵေႃႈ မၼ်းတေလွမ်ၶၢမ်ႇသဵင်ႈငိုၼ်းၼႂ်းထွင်းမၼ်း ၵေႃႉလဵဝ်သေ ပၼ်မႃးယဝ်ႉ၊ ဢမ်ႇပဵၼ်ၼၼ်ႁႃႉလုၵ်ႈယိင်း”
“ဢေႃႈ ... ပဵၼ်လႆႈဢေႃႈ”
“တႃႇတေ ၶိုၼ်းတွပ်ႇတႅၼ်းပၼ် ၸေႇတၼႃႇမၼ်းၼၼ်ႉ လုၵ်ႈယိင်းၶႂ်ႈႁႂ်ႈပဵၼ်ႁိုဝ် လၢတ်ႈလူး”
“ပေႃးဢဝ်လုၵ်ႈယိင်းဝႃႈတႄႉ ပေႃးႁဝ်းဢဝ်ငိုၼ်းသေ ပၼ်မၼ်းၼႆၵေႃႈ တေဢမ်ႇလီၵူၺ်း ၵူဝ်မၼ်းဝႃႈ ဢဝ်ငိုၼ်းတႅပ်းတတ်း ၸေႇတၼႃႇမၼ်းၼႆယဝ်ႉ”
“ၸႂ်ႈဢိူဝ်ႈ လုၵ်ႈယိင်းဝႃႈၼႆႉ တေသိုပ်ႇလႆႈႁဵတ်းႁိုဝ်လႃႇ ဝူၼ်ႉတူၺ်းလႄႈ”
“ၸၢမ်သႅင်းၵေႃႈ ဝူၼ်ႉၸွႆႈၽွင်ႈလႄႈ မူဝ်ၶဝ်တေလႆႈ ႁဵတ်းႁိုဝ်”
ၶဝ်သၢမ်ၵေႃႉ ဢွၼ်ၵၼ်ဝူၼ်ႉၵႅပ်ႉၼိုင်ႈသေ ၼၢင်းၸၢမ်သႅင်းၸင်ႇဝႃႈ
“ၶိုၼ်းသိုဝ်ႉၶိူင်ႈၶူဝ်း ဢၼ်မၼ်းလူဝ်ႇယိပ်းၼၼ်ႉသေ တွၼ်ႈပၼ်မၼ်း ဢမ်ႇလီႁႃႉမူဝ်”
“လီဢိူဝ်ႈ”
“ပေႃးၼႆ ... ၶိူင်ႈၶူဝ်းၸိူင်ႉႁိုဝ် လုၵ်ႈယိင်း”
“သိုဝ်ႉ ၵဵၼ်ၽလိမ်ႇ(ၾိမ်း)တွၼ်ႈပၼ်မၼ်းဢိူဝ်ႈ ဢမ်ႇလီႁႃႉ”
“လီယူႇ လီယူႇ လုၵ်ႈယိင်းတေဢဝ်ငိုၼ်းတီႈလႂ်သိုဝ်ႉ”
“ငိုၼ်းဢၼ် လုၵ်ႈယိင်းႁွမ်ဝႆႉၼၼ်ႉ မီးယူႇၼႃႇ လုၵ်ႈယိင်းတေဢဝ်ငိုၼ်းၼၼ်ႉသိုဝ်ႉလႆ”
လုင်းၸိုၼ်ႈ တင်ႈၸႂ်ၶႂ်ႈယွၵ်ႇၸႂ်လုၵ်ႈယိင်းမၼ်းလႄႈ မၼ်းၸၢင်ႇလၢတ်ႈၼင်ႇၼၼ်ယဝ်ႉ၊ လႆႈၶိုၼ်းငိၼ်းလုၵ်ႈယိင်းမၼ်း တွပ်ႇလၢတ်ႈၵႂႃႇၼင်ႇၼႆ မၼ်းပဵၼ်ဢၼ်လႆႈၸႂ်ၵႂႃႇတႄႉတႄႉသေ
“ႁေး ... ႁေး လုၵ်ႈယိင်းဢမ်ႇလူဝ်ႇဢဝ်ငိုၼ်းလုၵ်ႈယိင်းသိုဝ်ႉ ဢူႈတေပၼ်လႆ လုၵ်ႈယိင်းတေၶႂ်ႈသိုဝ်ႉလၢႆၵဵၼ်”
“သၢမ်ၵဵၼ်ဢေႃႈ”
“ဢိူဝ်ႈ ... ၵႂႃႇႁႃသိုဝ်ႉသေ သူင်ႇပၼ်လႄႈၼႃႈ”
“ဢေႃႈ”