မွၵ်ႇလူင်ႇလဵဝ်/တွၼ်ႈသၢဝ်းႁႃႈ
ၶၢဝ်းယၢမ်းဢၼ်သွၼ်လိၵ်ႈမႃးတၢင်းပီၼၼ်ႉ တီႈၶွတ်ႇယွတ်ႈတႅပ်းတတ်းပၼ်ၼႆႉတႄႉ ပဵၼ်ပွႆးထၢမ်လိၵ်ႈယဝ်ႉ၊ ၵွပ်ႈၼႆ ၼင်ႇႁိုဝ်တေတွပ်ႇလႆႈၼၼ်ႉ လုၵ်ႈႁဵၼ်းၶဝ် ၽူႈလႂ်ၽႂ်ၵေႃႈ ဢွၼ်ၵၼ်ၶတ်းၸႂ်ၵူႈၽႂ်မၼ်းယူႇ၊ ၸၢႆးမွၼ်းၶိူဝ်း ၸၢႆးၶမ်း ၼၢင်းမူဝ်ၶၢဝ် ၼၢင်းၸၢမ်သႅင်းၶဝ်ၵေႃႈ ၶတ်ႈၸႂ်သေ တွပ်ႇလိၵ်ႈယူႇၵူႈဝၼ်း ၶဝ်တွပ်ႇလႆႈမႃးၵူႈဝၼ်းသေ ဝၼ်းမိူဝ်ႈၼႆႉ ပဵၼ်ဝၼ်းလိုၼ်းသုတ်း လႄႈ ဝၢႆးသေၶၢဝ်းယၢမ်းတွပ်ႇလိၵ်ႈယဝ်ႉတူဝ်ႈၵႂႃႇ ၶဝ်ဢွၵ်ႇႁူင်းႁဵၼ်းမႃးႁင်းၽႂ်ႁင်းမၼ်းယဝ်ႉ။
ၸၢႆးမွၼ်းၶိူဝ်း ၸင်ႇထၢမ်ဝႃႈ
“ၸၢႆးၶမ်း ... မိူဝ်ႈၼႆႉၵေႃႈလႆႈယူႇ ဢမ်ႇၸႂ်ႈႁႃႉ”
“လႆႈလီဝႃႈလႆႈလီယဝ်ႉမိူဝ်ႈၼႆႉတႄႉ ပူၼ်ႉယဝ်ႉပီၼႆႉ မႂ်းလူးၸွင်ႇလႆႈႁိုဝ်”
“လႆႈယူႇ”
ၽွင်းၼၼ်ႉ ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းၵေႃႈ မႃးတီႈၶႃသွင်ၵေႃႉယဝ်ႉ ၸၢႆးမွၼ်းၶိူဝ်းၸင်ႇႁပ်ႉထၢမ်ဝႃႈ
“ႁေႉ ... မူဝ်လႄႈ ၸၢမ်သႅင်းၸွင်ႇတွပ်ႇလႆႈႁိုဝ်”
“လႆႈဢေႃႈ ... ပီႈၸၢႆးၶိူဝ်း ၶဝ်လူး”
“လႆႈယူႇ”
“ပေႃးၼႆတႄႉ ႁဝ်းတင်းသီႇၵေႃႉ ႁဵတ်းႁိုဝ်ၵေႃႈပူၼ်ႉယူႇ ဢမ်ႇႁၢင်ႉယဝ်ႉ မူဝ်တႄႉ သိူဝ်းၸႂ်မဝ်ၸႂ်တႄႉတႄႉယဝ်ႉ”
“ယွၼ်ႉလႆႈႁူႉဝႃႈ ႁဝ်းတင်းသီႇၵေႃႉတွပ်ႇလႆႈသဵင်ႈသဵင်ႈ ၸၢမ်သႅင်းၵေႃႈ ၸူမ်းတႄႉတႄႉယဝ်ႉ”
လုၵ်ႈႁဵၼ်းၼႂ်းဝၢင်းၸၼ်ႉၸွမ်ၸိူဝ်းၼၼ်ႉ ဢွၼ်ၵၼ် သိူဝ်းၸႂ်မေႃးပၼ်းႁင်းၽႂ်မၼ်း မၢင်ၵေႃႉၵေႃႈ ပေႃးၵျွၵ်းလဵတ်းၵျွၵ်းႁွင် ဢွင်ဢွင်တဵၼ်ႈတဵၼ်ႈ ၸူမ်းသိူဝ်းသေ ဢွၵ်ႇမိူဝ်းၼွၵ်ႈဝၢင်းၸၼ်ႉၸွမ်ယူႇ။ ၸၢႆးၶိူဝ်းၸင်ႇၶိုၼ်းဝႃႈ
“မိူဝ်ႈၼႆႉတႄႉ မၵ်းမၢႆပဵၼ်ဝၼ်းယဝ်ႉပွႆးထၢမ်လိၵ်ႈလႄႈ ပီႈၸၢႆးၶိူဝ်း ၶႂ်ႈလၢတ်ႈမဵဝ်းၼိုင်ႈဢိူဝ်ႈ”
“ၸိူင်ႉႁိုဝ် ပီႈၸၢႆးၶိူဝ်း”
“ဢေႃ ... ႁဝ်းၵႂႃႇၵိၼ်တၢင်းၵိၼ်ၼႂ်းသႅင်ႇၸွမ်းၵၼ်ၼႆယဝ်ႉ”
“လီဢိူဝ်ႈ ... ပီႈၸၢႆးၶိူဝ်းတေၵႂႃႇၵိၼ်တီႈလႂ်လႃႇ”
ၸၢႆးၶမ်း ၸင်ႇဝႃႈ
“ၵႂႃႇၵိၼ်တီႈ သႅင်ႇၶမ်းမၢဝ်းႁိုဝ်ႉ”
“လီဢိူဝ်ႈ ... တီႈသႅင်ႇၶဝ်ႈတႆးတီႈၼၼ်ႉ လီၵိၼ်တႄႉဢိူဝ်ႈ ပေႃးၼႆ ပီႈၸၢႆးၶိူဝ်းၶဝ် တေမႃးႁွင်ႉမူဝ်လႄႈ ၸၢမ်သႅင်း တီႈႁူင်းသဝ်းၼႃႈ”
ၼၢင်းမူဝ်ၶၢဝ်ၸင်ႇထၢမ်ဝႃႈ
“တေၵႂႃႇတီႈလဵဝ်ယဝ်ႉႁႃႉ ... ပီႈၸၢႆးၶိူဝ်း”
“ၸႂ်ႈဢိူဝ်ႈ ... ပေႃးမူဝ်ၶဝ် ၽႅဝ်မိူဝ်းတီႈႁူင်းသဝ်းၼႆ သမ်ႉလူဝ်ႇမိူဝ်းႁၢင်ႈၶိူင်ႈသေ တေႁိုင်ၵွၼ်ႇယူဝ်ႉ”
“ဢီႉ ... ပီႈၸၢႆးၶိူဝ်းၼႆႉ မူဝ်ၶဝ်ပဵၼ်ၼၢင်းယိင်းလႄႇ ဢိူဝ်ႈ တေၵႂႃႇတၢင်းလႂ်ၼႆၵေႃႈ ၵိုင်ႉၵၢင်ႉၵႂႃႇၸိူင်ႉၼင်ႇၵူၼ်းၸၢႆးၼၼ်ႉ ၸွင်ႇလႆႈၵေႃႈဢမ်ႇၸႂ်ႈ ဢမ်ႇၼမ်ၵေႃႈၵႄႇ ႁူႉတေလႆႈမူၼ်ႉ မႄးယူႇယဝ်ႉ ပီႈၸၢႆးၶိူဝ်းၶဝ် ဢမ်ႇပႂ်ႉလႆႈယဝ်ႉႁႃႉတေႃႈဝႃႈ”
“ပႂ်ႉလႆႈယူႇ ... ၸႂ်ႉပႂ်ႉတေႃႇထိုင်ပၢၼ်ပူႇ တေႃႇၼႃႈပေႃးႁူႇ တႃပေႃးမူဝ်းၼႆၵေႃႈ တေပႂ်ႉလႆႈယူႇဝႃႇ”
ၼၢင်းမူဝ်ၶၢဝ် မိတ်းတႃႁၵ်ႉဢွၼ်ႇမၼ်းၼၢင်း ပၵ်းသႂ်ႇ ၸၢႆးၶိူဝ်းသေ
“ႁိုဝ်ႉပီႈၸၢႆးၶိူဝ်းၼႆႉ ပေႃးလႆႈလၢတ်ႈၵေႃႈ ႁၢင်ႈပူၼ်ႉလိူဝ်ၼႅၼ်ႇ”
ၸၢႆးၶမ်းလႄႈ ၼၢင်းၸၢမ်သႅင်း လွမ်လွမ်ၶူဝ် ၶႃသွင်ၵေႃႉယူႇ ၸၢႆးၶမ်းၸင်ႇဝႃႈ
“ႁႄး ႁႄး ၸၢႆးၶိူဝ်းလႄႈမူဝ်ၶၢဝ် ၶိူဝ်သွင်ၵေႃႉၼႆႉ ပေႃးယူႇၸွမ်းၵၼ်ၼႆတႄႉ တေၵုမ်ႇထဵင်ၵၼ်ယူႇၵူၺ်းယဝ်ႉယူဝ်ႉ”
“ၸၢႆးၶမ်း ပိူၼ်ႈဝႃႈဝႆႉ ၵူၼ်းယူႇၸွမ်းၵၼ်ၼႆႉ‘ပေႃးၵႆႉထဵင် ၵႆႉတၵ်ႉ ၸင်ႇႁၵ်ႉၵၼ်ထိုင်တီႈ”ၼႆဝႃႇ”
ၼၢင်းၸၢမ်သႅင်း ၸင်ႇဝႃႈ
“ပီႈၸၢႆးၶမ်း ပေႃးတေၶႄႉၵၼ်လၢတ်ႈၵႂၢမ်းၼႆတႄႉ ႁဝ်းဢမ်ႇပႄႉလႆႈ ၶႃသွင်ၵေႃႉၵူၺ်း၊ ၶႃသွင်ၵေႃႉ ပဵၼ်ၵူၼ်းမေႃတႅမ်ႈဝွၵ်း လႄႈ ၼမ်ႉၵႂၢမ်းၶႃၵေႃႈ ပဵၼ်ၼမ်ႉၵႂၢမ်း ၸိၵ်းၶိၵ်းၸွၵ်းၶွၵ်းသေႇသေႇယဝ်ႉ”
ၶဝ်ဢုပ်ႇၵၼ်သေယဝ်ႉ ပွၵ်ႈမိူဝ်းႁူင်းသဝ်းၽႂ်မၼ်းယဝ်ႉ ဝၢႆးသေၼၼ်ႉ ၸၢႆးမွၼ်းၶိူဝ်းလႄႈ ၸၢႆႈၶမ်း ၶီႇလႅင်ၵေႃႉလမ်းလမ်းသေ မႃးႁွင်ႉ ၼၢင်းမူဝ်ၶၢဝ်လႄႈၼၢင်းၸၢမ်သႅင်းယဝ်ႉ၊ ၸွမ်းၼင်ႇဢၼ် ၶဝ်လၢတ်ႈၵၼ်ဝႆႉၼၼ်ႉ ၶဝ်ၵႂႃႇၵိၼ်ၶဝ်ႈ တီႈသႅင်ႇၶဝ်ႈတႆးသႅင်ႇၶမ်းမၢဝ်း ႁူမ်ႈၵၼ်ဝၢၼ်ဝၢၼ် မၼ်းမၼ်း ၵျေႃႇၵျေႃႇ သိူဝ်းသိူဝ်းယူႇ။ ၽွင်းမိူဝ်ႈၸၢႆးၶိူဝ်းလႄႈ ၸၢႆးၶမ်းၵျေႃႇသိူဝ်းသေ ၽႅဝ်မႃး တီႈႁူင်းသဝ်းၶႃၼၼ်ႉ တႆးၵေႃႉ ၸၢႆးၶိူဝ်းၵေႃႉၼိုင်ႈၸင်ႇဝႃႈ
“ၸၢႆးၶိူဝ်းၵဝ်မႃးႁႃမႂ်း ၸဵမ်မိူဝ်ႈၵႆႈဢိူဝ်ႈၼႆႉ မႂ်းၵုမ်ႇၵႂႃႇလႂ်ယူႇ”
“ၵဝ်ၵႂႃႇဢႅဝ်ႇ ၼႂ်းဝဵင်းဢိူဝ်ႈ တေႁဵတ်းသင်ဝႃႈ”
“မိူဝ်ႈၸဝ်ႉၼၼ်ႉ ဝၢႆးသေၶိူဝ်သွင်ၵေႃႉ ဢွၵ်ႇၵႂႃႇ သၢႆလူမ်း (Telegram - ၵျေးၼၢၼ်း) မႂ်း ၽႅဝ်မႃး ၽိုၼ်ၼိုင်ႈဢိူဝ်ႈ ပေႃးပွႆးထၢမ်လိၵ်ႈယဝ်ႉ ႁႂ်ႈမႂ်းမိူဝ်းၽႂ်းၽႂ်းဝႃႇ မႄႈသူပဵၼ်ၵိၼ်းဝႆႉၼႆယဝ်ႉ ႁိူဝ်ႈ တူၺ်းလႄႈ”
ၸၢႆးမွၼ်းၶိူဝ်းၵေႃႈ ဢဝ်တူၺ်းလိၵ်ႈသၢႆလူမ်းၼၼ်ႉၽႂ်းၽႂ်းသေ မၼ်းၸၢႆးဝူၼ်ႉႁၼ်ထိုင်ၼႃႈမႄႈ ၶဝ်ၵမ်းလဵဝ်ယဝ်ႉ၊ ၸဵမ်မိူဝ်ႈ မၼ်းမႃးၶိုၼ်ႈၸၼ်ႉၸွမ် ပီလိုၼ်းသုတ်းၼႆႉ မႄႈမၼ်းၸၢႆးတိုၵ်ႉ ဢမ်ႇပေႃးယူႇလီ ၵွပ်ႈၼႆ ယၢမ်းလဵဝ် လႆႈႁၼ်လိၵ်ႈသၢႆလူမ်းၼင်ႇၼႆ မၼ်းၸၢႆးမႆႈၸႂ်တၢင်မႄႈၶဝ်သေ ႁူဝ်ၸႂ်မၼ်းၸၢႆႈၵေႃႈ ၵပ်ႉႁိပ်ႇတိပ်ႇသတ်ႉမႃးၵမ်းလဵဝ်ယဝ်ႉ၊ မၼ်းၸၢႆး ၸင်ႇၼႅတ်ႈသိမ်းၶူဝ်းသိမ်း တိူၵ်ႈမၼ်းၽႂ်းၽႂ်းသေ ဢၢၼ်းတေမိူဝ်းလွႆလႅမ် မိူဝ်ႈၽုၵ်ႈၼႆယဝ်ႉ၊ ၸၢႆးၶမ်းၸင်ႇထၢမ်ဝႃႈ
“ၸၢႆးၶိူဝ်းမႂ်းတေမိူဝ်းၵေႃႉလဵဝ်ၵူၺ်းႁႃႉ”
“မိူဝ်ႈၽုၵ်ႈၼႆႉတႄႉ ဢမ်ႇမိူဝ်းၵေႃႈဢမ်ႇပဵၼ်ယဝ်ႉ ၸၢႆးၶမ်း ၵွပ်ႈၼႆၵဝ်တေမိူဝ်းယဝ်ႉ၊ သူသၢမ်ၵေႃႉတႄႉ ပေႃးပႆႇပဵၼ်မိူဝ်းၼႆၵေႃႈ ယူႇဝႆႉၵွၼ်ႇလႄႈ ... မူဝ်လႄႈၸၢမ်သႅင်း ၶႂ်ႈသိုဝ်ႉၶူဝ်းၼႆၵေႃႈ မႂ်းၸွမ်းသူင်ႇပၼ်ၶဝ်လႄႈၼႃႈ ၸၢႆးၶမ်း၊ ထႅင်ႈလွင်ႈၼိုင်ႈ ၶူဝ်းၵဝ်ၸိူဝ်းၼႆႉၵေႃႈ မႂ်းၸွႆႈဢဝ်မိူဝ်းပၼ် တီႈႁိူၼ်းမႄႈၼႃႉႁဝ်း တူၼ်ႈတီးလႄႈၼႃႈ ၵဝ်တေဢၢၼ်းမိူဝ်းၸွမ်းႁိူဝ်းမိၼ်ဢိူဝ်ႈ။
“လႆႈယူႇ ၸၢႆးၶိူဝ်း ... တမ်းၸႂ်လႃႈ ၵဝ်တေၸွႆႈပၼ်လႆ”
ဝၼ်းၼၼ်ႉ ၸၢႆးၶိူဝ်းၵေႃႈၵႂႃႇယွၼ်းတၢင်းၸွႆႈထႅမ် တီႈၶူး မေႃသွၼ်ၶဝ် တႃႇတေဢဝ်လႆႈမႂ်တိုတ်းႁိူဝ်းမိၼ် တႃႇမိူဝ်ႈၽုၵ်ႈ ငၢႆႈငၢႆႈလူမ်လူမ်ယူႇ၊ ၶူးမေႃသွၼ်ၶဝ်ၵေႃႈ ၶပ်းၶိုင်ႁဵတ်းလိၵ်ႈပၼ်မၼ်းၸၢႆး တဵမ်တဵမ်ထူၼ်ႈထူၼ်ႈယဝ်ႉ။
ထိုင်မႃးတၢမ်းၶမ်ႈ မၼ်းၸၢႆးမႃးထူပ်းၼၢင်းမူဝ်ၶၢဝ်သေ ၶႃသွင်ၵေႃႉ မႃးၼင်ႈဢုပ်ႇၵၼ် တီႈၼိုင်ႈယဝ်ႉ။
“ပီႈၸၢႆးၶိူဝ်း မီးလွင်ႈလၢၵ်ႇလၢႆးၸိူင်ႉႁိုဝ်”
“မီးဢိူဝ်ႈမူဝ်”
“မူဝ်တူၺ်းၼႃႈပီႈၸၢႆးၶိူဝ်း ဢၢပ်ႈဢမ်ႇသိူဝ်းၸႂ် မိူၼ်ၸိူင်ႉၼင်ႇမိူဝ်ႈၸဝ်ႉၼၼ်ႉလႃႇ”
“မိူဝ်ႈၽုၵ်ႈၼႆႉ မူဝ်တေဢၢၼ်းၵႂႃႇဢႅဝ်ႇတီႈလႂ်မူဝ်”
“မူဝ်ၶႂ်ႈၵႂႃႇၶိုၼ်ႈလွႆမၼ်းတလေး ၸိူင်ႉၼင်ႇဝၼ်းပုၼ်ႉဢိူဝ်ႈ ပီႈၸၢႆးၶိူဝ်း ယွၼ်ႉပိူဝ်ႈ တေလႆႈမိူဝ်းယဝ်ႉလႄႈ ၶႂ်ႈၵႂႃႇဝႆႈၽြႃး ၼိူဝ်လွႆၸွမ်းၵၼ်မူၼ်ႈမူၼ်ႈသိူဝ်းသိူဝ်း ထႅင်ႈဢိူဝ်ႈ ပီႈၸၢႆးၶိူဝ်း”
လႆႈငိၼ်းၼင်ႇၼၼ် မၼ်းတေဢမ်ႇပဵၼ်လႆႈလႄႈ ၸၢႆးမွၼ်းၶိူဝ်း ဢမ်ႇသိူဝ်းၸႂ်လႆႈ ၼၢင်းမူဝ်ၶၢဝ်တႄႉ ဢမ်ႇပႆႇႁၼ်ထိုင် လွင်ႈၼႆႉ
“ထႅင်ႈဝၼ်းၼိုင်ႈ သမ်ႉတေၵႂႃႇလႂ်လႃႇ”
“မိူဝ်ႈႁိုဝ်းၵၢင်ၼႂ် ၶႂ်ႈၵႂႃႇဝႆႈၽြႃးလူင်သေ ၵၢင်ဝၼ်းၶႂ်ႈၵႂႃႇႁႃ သိုဝ်ႉၶူဝ်းၼႂ်းၵၢတ်ႇၸေးၶျူဝ်ႇလႄႈ ၵၢတ်ႇၶႄႇဢိူဝ်ႈ ပီႈၸၢႆးၶိူဝ်း”
“မူဝ် ... ဝူၼ်ႉလႆႈလီၵျႃႉၼေႃ”
“မူဝ်တႄႉ ဝူၼ်ႉၼင်ႇၼႆယဝ်ႉ ပီႈၸၢႆးၶိူဝ်း ... ပီႈၸၢႆးၶိူဝ်း ဢမ်ႇၶႂ်ႈၵႂႃႇသူင်ႇမူဝ်ႁႃႉတေႃႈဝႃႈ”
“ၶႂ်ႈၵႂႃႇသူင်ႇယူႇမူဝ် ... ၵူၺ်းၵႃႈ”
“ၵူၺ်းၵႃႈ ၸိူင်ႉႁိုဝ်လႃႇ”
“ယွၼ်ႉပိူဝ်ႈဢမ်ႇမိူဝ်းဢမ်ႇပဵၼ်လႄႈ မိူဝ်ႈၽုၵ်ႈၼႆႉ ပီႈၸၢႆးၶိူဝ်း တေလႆႈမိူဝ်းဢိူဝ်ႈမူဝ်”
လႆႈငိၼ်းၼင်ႇၼၼ် ၼၢင်းမူဝ်ၶၢဝ် ပဵၼ်ဢၼ်ဢၢမ်းၵႂႃႇသေ
“တႄႉႁႃႉ ... ပီႈၸၢႆးၶိူဝ်း ယူဝ်ၶႄးပီႈၸၢႆးၶိူဝ်းလႅၼ်မူဝ်ယူဝ်ႉ ပေႃးပီႈၸၢႆးၶိူဝ်းလႅၼ်မူဝ်တႄႉ မူဝ်တေၸႂ်လမ်ယူႇၼႃႈ”
“ဢမ်ႇလႅၼ်မူဝ် ... ပီႈၸၢႆးၶိူဝ်းတေလႆႈမိူဝ်းတႄႉဢိူဝ်ႈ”
“ယွၼ်ႉပိူဝ်ႈသင်လႃႇ ပီႈၸၢႆးၶိူဝ်း”
“လိၵ်ႈသၢႆလူမ်း ၶဝ်ႈမႃးဝႃႈ မႄႈပီႈၸၢႆးၶိူဝ်းၶဝ် ပဵၼ်ၵိၼ်းဝႆႉၼႆလႄႈ ပီႈၸၢႆးၶိူဝ်း ၸင်ႇဢၢင်ႈမိူဝ်းမိူဝ်ႈၽုၵ်ႈယဝ်ႉ။ မူဝ် ၼႆႉၼႃႇ တူၺ်းလႄႈ”
ၸၢႆးၶိူဝ်းၵေႃႈ ဢဝ်လိၵ်ႈၼႄပၼ် ၼၢင်းမူဝ်ၶၢဝ်ယဝ်ႉ၊ လႆႈႁူႉႁၼ်ၼင်ႇၼၼ် ၼၢင်းမူဝ်ၶၢဝ် ပဵၼ်ဢၼ်ၸႂ်လဵၵ်ႉၵႂႃႇတႄႉတႄႉ
“မူဝ် ... ၵၢင်ၸႂ်ပီႈၸၢႆးၶိူဝ်းတႄႉ ၶႂ်ႈၵႂႃႇၸွမ်းသူင်ႇမူဝ် ပႅင်ႈၼင်ႇဢၼ်မူဝ်ၶႂ်ႈၵႂႃႇၼၼ်ႉယူႇသေတႃႉ ယွၼ်ႉပိူဝ်ႈ လိၵ်ႈသၢႆလူမ်းၼႆႉလႄႈ ပီႈၸၢႆးၶိူဝ်းဢမ်ႇၸၢင်ႈသူင်ႇယဝ်ႉ ပီႈၸၢႆးၶိူဝ်း ၶႂ်ႈမႃးလၢတ်ႈၼႄမူဝ် လွင်ႈၼႆႉၵူၺ်ႈၼင်ႇၵဝ်ႇ”
ၼၢင်းမူဝ်ၶၢဝ် ဢမ်ႇတၵ်းသဵင်သင်လႆႈယဝ်ႉ မၼ်းၼၢင်း ၵူမ်ႈတူၺ်းတီႈတႂ်ႈသေ ထွမ်ႇၵႂၢမ်း ဢၼ်ၸၢႆးမွၼ်းၶိူဝ်း လၢတ်ႈၼၼ်ႉယူႇ။
“ပေႃႈဝႃႈ မူဝ်ၶႂ်ႈၵႂႃႇႁႃသိုဝ်ႉၶူဝ်း ဢၼ်လူဝ်ႇယိပ်းတိုဝ်းၼႆၵေႃႈ ပီႈၸၢႆးၶိူဝ်း လၢတ်ႈဝႆႉတီႈ ၸၢႆးၶမ်းၵူႈပိူင်ပိူင်ယူႇ မူဝ်ၶဝ်သၢမ်ၵေႃႉ ၸူဝ်းၵၼ်ၵႂႃႇလႄႈၼႃႈ”
ၼၢင်းမူဝ်ၶၢဝ် ႁႅၼ်တူၺ်းၼႃႈၸၢႆး ၶိူဝ်းသေ ၼမ်ႉတႃမၼ်းၼၢင်းၵေႃႈ ဢိူမ်ႈတဵမ်ႁူၺ်ႇဝႆႉယဝ်ႉ ... မၼ်းၼၢင်းၵေႃႈ ၸင်ႇဝႃႈ
“ပီႈၸၢႆးၶိူဝ်း ... မူဝ်ဢမ်ႇၶႂ်ႈၵႂႃႇလႂ်ယဝ်ႉ”
“ႁဵတ်းသင်လႃႇ ... မူဝ်”
“ပေႃးဢမ်ႇပႃးပီႈၸၢႆးၶိူဝ်းၼႆ မူဝ်ဢမ်ႇၶႂ်ႈၵႂႃႇတၢင်းလႂ်ယဝ်ႉ ၵွပ်ႈၼႆ မိူဝ်ႈၽုၵ်ႈၼႆႉ မူဝ်ၵေႃႈ တေမိူဝ်းၸွမ်း ပီႈၸၢႆးၶိူဝ်းဢိူဝ်ႈ”
“ဢမ်ႇပဵၼ်လႆႈယူဝ်ႉမူဝ် ... ပီႈၸၢႆးၶိူဝ်း ဢၢၼ်းမိူဝ်းၸွမ်း ႁိူဝ်းမိၼ် ဢၢင်ႈမိူဝ်းလူင်းႁၢႆးဝူဝ်းသေ ၶိုၼ်းပူၼ်ႉမိူဝ်းလွႆလႅမ်ၽႂ်းၽႂ်းၼႆယဝ်ႉ”
“မႂ်တိုတ်းႁိူဝ်းမိၼ်လႆႈယဝ်ႉႁႃႉ ... ပီႈၸၢႆးၶိူဝ်း”
“ပီႈၸၢႆးၶိူဝ်း ၵႂႃႇယွၼ်းလိၵ်ႈၵမ်ႉထႅမ် တီႈၶူးမေႃသွၼ်လူင်သေၵႂႃႇသိုဝ်ႉလႄႈ လႆႈဝႆႉယဝ်ႉမူဝ်”
ၼၢင်းမူဝ်ၶၢဝ်ဝူၼ်ႉၵႂႃႇဝူၼ်ႉၶိုၼ်း ဢဵၼ်းဢၢၼ်းၼႂ်းၸႂ် မၼ်းၼၢင်း ဢမ်ႇတဵမ်ထူၼ်ႈၵေႃႈ ပိူင်ၼိုင်ႈ ၸၢႆးၶိူဝ်းသမ်ႉ တေပၢႆႈမိူဝ်းပႅတ်ႈမၼ်းၵေႃႈပိူင်ၼိုင်ႈလႄႈ မၼ်းၼၢင်းၸႂ်လဵၵ်ႉၶေႃးၶူမ်သေ ၼမ်ႉတႃသႂ်ဢွၼ်ႇမၼ်းၼၢင်း လႆယွၼ်ႇ ပဵၼ်သဵၼ်ႈတၢင်းသေ ယွႆႉလူင်းမႃးၸွမ်းၵႅမ်ႈၶွင်ႇဢွၼ်ႇ မၼ်းၼၢင်းယဝ်ႉ၊ လႆႈငိၼ်းသဵင်ႁႆႈမၼ်းၼၢင်းလႄႈ ၸၢႆးၶိူဝ်း ၸင်ႇဝၢႆႇတူၺ်းၼႃႈမၼ်းၼၢင်းသေ
“မူဝ် ... မူဝ်ႁႆႈႁဵတ်းသင်လႃႇ”
ၼၢင်းမူဝ်ၶၢဝ် ဢမ်ႇၸၢင်ႈတွပ်ႇသင် မၼ်းၼၢင်းသိုပ်ႇႁႆႈ သိုတ်ႉသိုတ်ႉသေ ဢဝ်ၼႃႈမၼ်းၼၢင်း ငူပ်ႉဝၢင်းသႂ်ႇဢူၵ်း ၸၢႆးမွၼ်းၶိူဝ်းယဝ်ႉ၊ ၸၢႆးမွၼ်းၶိူဝ်းၵေႃႈ ၶိုၼ်းမႄးလုပ်ႈပၢၵ်ႈၶူၼ်ႁူဝ်မၼ်းၼၢင်းသေ
“မူဝ် ... မူဝ်ႁႆႈၵွပ်ႈပိူဝ်ႈသင် လၢတ်ႈပီႈၸၢႆးၶိူဝ်းလူး”
“မူဝ် ... မူဝ်ၸႂ်လဵၵ်ႉၶေႃးၶူမ်ဢိူဝ်ႈ ပီႈၸၢႆးၶိူဝ်း”
မၼ်းၼၢင်းႁႆႈလၢတ်ႈၼင်ႇၼႆသေ ဢဝ်ၽႃႇမိုဝ်းမၼ်း တူမ်းၼႃႈမၼ်းဝႆႉယူႇ ၸၢႆးၶိူဝ်း ၸင်ႇမႄးပၢၵ်ႈၶူၼ်ႁူဝ်ၼၢင်းမူဝ်ၶၢဝ်သေ ဢဝ်မိုဝ်းမၼ်း ယိပ်းယုၵ်ႉၵၢင်းၼၢင်းမူဝ်ၶၢဝ်ယဝ်ႉ
“မူဝ် ... ႁႅၼ်ၼႃႈဢိတ်းၼိုင်ႈလူး”
ၼၢင်းမူဝ်ၶၢဝ်ၵေႃႈ ႁႅၼ်တူၺ်းၼႃႈၸၢႆးၶိူဝ်းယဝ်ႉ ၼႃႈႁၢင်ႈ လီဢွၼ်ႇမၼ်းၼၢင်း ၵိုၵ်းတင်းၼမ်ႉတႃသေ မၼ်းၼၢင်းတိုၵ်ႉႁႆႈဝႆႉယူႇ
“မူဝ် ... ယႃႇပေႁႆႈလေႃႇ ... ပေႃးႁၼ်မူဝ်ႁႆႈၼႆ ပီႈၸၢႆးၶိူဝ်း ဢမ်ႇၸၢင်ႈသိူဝ်းၸႂ်ယဝ်ႉ၊ ပၢႆသလိူဝ် လိၵ်ႈသၢႆလူမ်းၶဝ်ႈမႃး လႆႈမႆႈၸႂ်ႁူႉဝႃႈ မႄႈပီႈၸၢႆးၶိူဝ်းၶဝ် ပဵၼ်ၵိၼ်းဝႆႉ ၽွင်းတေၽၢတ်ႇၵၼ်ၼႆႉ ၵေႃႉႁၵ်ႉပီႈၸၢႆးၶိူဝ်းသမ်ႉ ပဵၼ်လိၼ်းယွႆႉၼမ်တႃယူႇၼႆ ပီႈၸၢႆးၶိူဝ်း တေႁဵတ်းႁိုဝ် သိူဝ်းၸႂ်လႆႈယဝ်ႉလႃႇမူဝ် ... ၵွပ်ႈၼႆ မူဝ်ယႃႇပေႁႆႈလႄႈ သင်ပဵၼ်လႆႈတႄႉ ပီႈၸၢႆးၶိူဝ်း ၶႂ်ႈႁၼ်ၼႃႈယုမ်ႉဢွၼ်ႇ မူဝ် ၼၼ်ႉတႃႇသေယဝ်ႉ”
ၸၢႆးၶိူဝ်းလၢတ်ႈၼင်ႇၼႆသေ ဢဝ်မိုဝ်းမၼ်းၸဵတ်ႉပၼ် ၼမ်ႉတႃၼၢင်းမူဝ်ၶၢဝ်ယူႇ၊ မၼ်းၼၢင်းၵေႃႈ ၵူဝ်ၸၢႆးၶိူဝ်းဢမ်ႇသိူဝ်း လႄႈ မၼ်းၼၢင်း ၼႅတ်ႈၵိုတ်းယိုတ်းပႅတ်ႈ တၢင်းႁႆႈမၼ်းၼၢင်းသေ
“ပီႈၸၢႆးၶိူဝ်း ... ပေႃးပီႈၸၢႆးၶိူဝ်းဝႃႈ ယႃႇပေႁႆႈၼႆၵေႃႈ မူဝ် ဢမ်ႇႁႆႈယဝ်ႉ ယွၼ်ႉပိူဝ်ႈ ပီႈၸၢႆးၶိူဝ်း ၶႂ်ႈႁၼ်ၼႃႈယုမ်ႉမူဝ်ၼႆလႄႈ မူဝ်တေၶတ်းၸႂ်ယုမ်ႉၼႄလႆ”
ၼၢင်းမူဝ်ၶၢဝ် ၶတ်းၸႂ်မႄးဝႆႉၼႃႈယုမ်ႉတေႃႇ ၸၢႆးၶိူဝ်းယူႇ မၼ်းၼၢင်းၸင်ႇထၢမ်ဝႃႈ
“ပီႈၸၢႆးၶိူဝ်း တေမိူဝ်းၸွမ်းႁိူဝ်းမိၼ်ၼႆ ၶူဝ်းပီႈၸၢႆးၶိူဝ်း ၸိူဝ်းၼၼ်ႉလူး ၸွင်ႇတေၸၢင်ႈဢဝ်မိူဝ်းၸွမ်းႁိုဝ်”
“ပီႈၸၢႆးၶိူဝ်းလၢတ်ႈဝႆႉတီႈပီႈၸၢႆးၶမ်းယဝ်ႉ မၼ်းတေဢဝ် သူင်ႇပၼ်တီႈႁိူၼ်းမႄႈၼႃႉႁဝ်း တူၼ်ႈတီးၼႆယဝ်ႉ၊ ပီႈၸၢႆးၶိူဝ်းတႄႉ ဢၢၼ်းဢဝ်ထူင်ၶူဝ်းလုၵ်ႈလဵဝ်ၵူၺ်း”
ၼၢင်းမူဝ်ၶၢဝ်တႄႉ မၼ်းၼၢင်းတိုၵ်ႉၶႂ်ႈႁႆႈယူႇလႄႈ တေႁႆႈ ၽၢႆႇၼႃႈၸၢႆးၶိူဝ်းၼႆၵေႃႈ မၼ်းၵူဝ်ၸၢႆးၶိူဝ်းဢမ်ႇသိူဝ်းၸႂ် ၵွပ်ႈၼႆ မၼ်းၼၢင်းတေသိုပ်ႇယိူၼ်ႉဝႆႉယူႇၼႆၵေႃႈ ပဵၼ်ဢၼ်ယၢပ်ႇၸႂ် လႄႈ မၼ်းၼၢင်းၸင်ႇဝႃႈ
“ပီႈၸၢႆးၶိူဝ်း ... မူဝ်တေမိူဝ်းတီႈႁူင်းသဝ်းယဝ်ႉၼႃႈ”
ၸၢႆးမွၼ်းၶိူဝ်း ဢမ်ႇတၵ်းသဵင် မၼ်းၸၢႆးတေလႆႈၽၢတ်ႇ ၸူႉႁၵ်ႉမၼ်းယဝ်ႉလႄႈ မၼ်းဢမ်ႇသိူဝ်းၸႂ် ... ၼၢင်းမူဝ်ၶၢဝ်လုၵ်ႉၸုၵ်းယဝ်ႉသေတႃႉ မၼ်းၸၢႆးတႄႉတိုၵ်ႉၼင်ႈဝႆႉယူႇ ... ၼၢင်းမူဝ်ၶၢဝ် ၸင်ႇၸၼ်မိုဝ်းမၼ်းလုၵ်ႉယူႇယဝ်ႉ။
“လုၵ်ႉလႄႈ ... ပီႈၸၢႆးၶိူဝ်း”
ၸၢႆးၶိူဝ်းၵေႃႈ လုၵ်ႉမႃးသေ မၼ်းလွမ်တူၺ်းၼႃႈၼၢင်း မူဝ်ၶၢဝ်ယူႇ ၶႃသွင်ၵေႃႉႁူႉထိုင်ဝႃႈ မိူဝ်ႈၽုၵ်ႈ တေလႆႈၽၢတ်ႇၵၼ်ယဝ်ႉၼႆလႄႈ ၽွင်းမိူဝ်ႈပႆႇၽၢတ်ႇၵၼ်ၼၼ်ႉ ၶႃသွင်ၵေႃႉပၼ် တၢင်းမၵ်းမၢႆလွင်ႈတၢင်းႁၵ်ႉ ၽွင်းၸမ်တေၽၢတ်ႇၵၼ်ၼၼ်ႉယူႇ။ ၶႃသွင်ၵေႃႉ ၵွတ်ႇသုတ်ႇၸုပ်ႇၼူမ်ပၼ် တၢင်းႁၵ်ႉဢိမ်ႇဢိမ်ႇသေတႃႉၵေႃႈ ဢမ်ႇပႆႇဢိမ်ႇလႆႈၵူၺ်းၵႃႈ ... ၶၢဝ်းယၢမ်းတႅပ်းတတ်းပၼ်ဝႃႈ လူဝ်ႇလႆႈမိူဝ်း တီႈႁူင်းသဝ်းယဝ်ႉၼႆလႄႈ ၶႃသွင်ၵေႃႉ လႆႈၽၢတ်ႇၵၼ်သေမႃးမိူဝ်းယဝ်ႉ။
ၼၢင်းမူဝ်ၶၢဝ်တႄႉ မၼ်းၼၢင်း ပဵၼ်ဢၼ်ၸႂ်လဵၵ်ႉၶေႃး ၶူမ်တႄႉတႄႉ ၵွပ်ႈၼႆ ၽွင်းမိူဝ်ႈၽႅဝ်မႃး တီႈၼႃႈႁူင်းသဝ်းၼၼ်ႉ မၼ်းၼၢင်းၶႂ်ႈႁႆႈယူႇသေတႃႉ ၽၢႆႇၼႃႈပိူၼ်ႈၸိူဝ်ႈၼၼ်ႉ မၼ်းၼၢင်း ဢမ်ႇႁတ်းႁႆႈ ပေႃးဝႃႈ မၼ်းၼၢင်းၽႅဝ်မႃး ၼႂ်းလုၵ်း ၶႃသွင်ၵေႃႉ ၸၢမ်သႅင်းသေ မႃးႁၼ်ၸၢမ်သႅင်းၼႆ မၼ်းၼၢင်းႁႆႈသေ မႃးၵွတ်ႇၸၢမ်သႅင်းဝႆႉႁႅင်းႁႅင်းယဝ်ႉ၊ ၼၢင်းၸၢမ်သႅင်း တူၵ်းၸႂ်ၵႂႃႇသေ ၸင်ႇထၢမ် တူၺ်းၼၢင်းမူဝ်ၶၢဝ်ယဝ်ႉ။
“မူဝ် ... မူဝ် ... ဢူဝ်မူဝ်ႁႆႈႁဵတ်းသင်ၼႆႉ လၢတ်ႈလူး”
ၼၢင်းမူဝ်ၶၢဝ် ပႆႇၸၢင်ႈလၢတ်ႈသင် မၼ်းၼၢင်းၶွၼ်းဝႆႁူဝ်ၼႄ ၸၢမ်သႅင်းသေ သိုပ်ႇႁႆႈယူႇ
“မူဝ် ... ပဵၼ်သင်မႃး ... လၢတ်ႈၼႄၸၢမ်သႅင်းလူး”
“ပီႈၸၢႆးၶိူဝ်း တေမိူဝ်းပႅတ်ႈမူဝ်မိူဝ်ႈၽုၵ်ႈယဝ်ႉဝႃႈ”
“ႁဵတ်းသင်လႃႇ ... မၼ်းၸႃႉတေႃႇမူဝ်ႁႃႉ”
ၼၢင်းမူဝ်ၶၢဝ် ၸင်ႇၶိုၼ်းသပ်းလႅင်းၼႄ ၸၢမ်သႅင်းၵူႈ လွင်ႈလွင်ႈယဝ်ႉ၊ လႆႈငိၼ်းၼင်ႇၼၼ် ၼၢင်းၸၢမ်သႅင်းၵေႃႈ ၸႂ်ဢမ်ႇလီၸွမ်းၸၢႆးၶိူဝ်းယူႇ မၼ်းၼၢင်းၸင်ႇဝႃႈ
“မူဝ် ... ယႃႇပေႁႆႈယဝ်ႉ လႆႈငိၼ်းၼင်ၼႆ ၸၢမ်သႅင်း ၵေႃႈၸႂ်ဢမ်ႇလီလႆႈၼင်ႇၵဝ်ႇ ပိၵ်ႉသမ်ႉဝႃႈ ပီႈၸၢႆးၶိူဝ်း မိူဝ်းၵႂႃႇၼႆၵေႃႈ မူဝ်ၶႂ်ႈသိုဝ်ႉသင်ၼႆၵေႃႈ ၸၢမ်သႅင်းလႄႈ ပီႈၸၢႆးၶမ်းတေၵႂႃႇ ၸွမ်းသူင်ႇပၼ်ယူႇ”
ၼၢင်းၸၢမ်သႅင်းၵေႃႈ ၶိုၼ်းမႄးၶျေႃးဝွၼ်းၼၢင်းမူဝ်ၶၢဝ် ၵူႈမဵဝ်းမဵဝ်းယဝ်ႉ။