မွၵ်ႇလူင်ႇလဵဝ်/တွၼ်ႈသၢဝ်းႁူၵ်း
ဝၼ်းဢၼ်ၸၢႆးၶိူဝ်းၵႂႃႇၶီႇႁိူဝ်းမိၼ်ၼၼ်ႉၵေႃႈ ၶဝ်သၢမ်ၵေႃႉ ၸွမ်းသူင်ႇၸၢႆးမွၼ်းၶိူဝ်း တီႈတႃႈႁိူဝ်းမိၼ်ယဝ်ႉ၊ လႆႈႁၼ်ၸၢႆးၶိူဝ်း ၶီႇႁိူဝ်းမိၼ်ၵႂႃႇၼႆ ၼႂ်းၸႂ်ၶဝ်သၢမ်ၵေႃႉ ပဵၼ်ဢၼ်မွင်ဝႆႉယူႇ၊ ၸၢႆးမွၼ်းၶိူဝ်းၵေႃႈ လႆႈၽၢတ်ႇၵေႃႉႁၵ်ႉမၼ်းလႄႈ တႆးၵေႃႉ မၼ်းၵေႃႈဢမ်ႇသိူဝ်း ၶၢဝ်းတၢင်းဢၼ်မၼ်းတေမိူဝ်းၼႆၵေႃႈ မၼ်းဢမ်ႇသိူဝ်းလႆႈလႄႈ ပဵၼ်တၢင်းမႆႈၼႃႈမႆႈလင်ယူႇ။
ဝၼ်းၼၼ်ႉ မၼ်းၽႅဝ်မႃးႁၢႆးဝူဝ်း ၶိုၼ်ႈမိူဝ်းတူၼ်ႈတီးသေ မိူဝ်းၺႃးၵႃးတႆႉၵေႃႉမၼ်း ၸၢႆးၼႃထိုဝ် ဢၼ်တေမိူဝ်းလွႆလႅမ် လႄႈ မၼ်းပူၼ်ႉမိူဝ်းလွႆလႅမ်ၵမ်းလဵဝ်ယဝ်ႉ၊ ထိုင်မႃး တၢမ်းၶမ်ႈလပ်း သိင်ႇဢိတ်းဢိတ်း မၼ်းၸၢႆးၽႅဝ်မိူဝ်းလွႆလႅမ်သေ မၼ်းၸၢႆးၼႅတ်ႈပွၵ်ႈမိူဝ်းႁိူၼ်းၶဝ်ၽႂ်းၽႂ်းယဝ်ႉ။
ၽွင်းမိူဝ်ႈ မၼ်းၸၢႆးၽႅဝ်မိူဝ်းတီႈႁိူၼ်းၶဝ်ၼၼ်ႉ မၼ်းတူၺ်းႁၼ်ၵႂႃၼႂ်းႁိူၼ်းၶဝ် ၽႆးလႅင်းႁိူဝ်ႈဝႆႉသေ ၵူၼ်းၵေႃႈၼမ်ဝႆႉလႄႈ ႁူဝ်ၸႂ်မၼ်းၸၢႆး တွတ်ႇလင်ပိုၵ်ႉပိုၵ်ႉယူႇ ၵွပ်ႈၼၼ် မၼ်းၸၢႆး ၸင်ႇၼႅတ်ႈဢႅၼ်ႇၶဝ်ႈမိူဝ်း ၼႂ်းဝၢင်းႁိူၼ်းၶဝ်ယဝ်ႉ၊ မၼ်းမႃးႁူပ်ႉၺႃးပီႈဢၢႆႈလူင်ၶဝ် ၸၢႆးမွၼ်းၶမ်းသေ မၼ်းၸင်ႇၼႅတ်ႈထၢမ်ဝႃႈ
“ပီႈဢၢႆႈ မႄႈႁဝ်းလူး”
ၸၢႆးမွၼ်းၶမ်း တဵမ်ဢူၵ်းတဵမ်ၸႂ်ၶွၼ်းဝႆႁူဝ်သေ လၢတ်ႈဝႃႈ
“ဢၢႆႈၼွင်ႉ ... ဢၢႆႈၼွင်ႉမႃးတူၵ်းလိုၼ်းၵႂႃႇဢိတ်းၼိုင်ႈယဝ်ႉ”
လႆႈငိၼ်းၶေႃႈၵႂၢမ်း ၸၢႆးမွၼ်းၶမ်းလၢတ်ႈၼင်ႇၼၼ် သဵင်ၶေႃႈၵႂၢမ်းၼၼ်ႉ လင်ႁႅင်းသေသဵင်ၾႃႉၽႃႇလင်သေ ၸီးၶဝ်ႈၼႂ်းႁူၸၢႆးမွၼ်းၶိူဝ်း ပၵ်းသပ်းၼဵပ်းသႂ်ႇ ႁူဝ်ၸႂ် ၸၢႆးမွၼ်းၶိူဝ်းႁႅင်းႁႅင်းယဝ်ႉ၊ မၼ်းၸင်ႇဝႃႈ
“မႄႈႁဝ်းသဵင်ႈယဝ်ႉႁႃႉ ပီႈဢၢႆႈ”
ၸၢႆးမွၼ်းၶမ်း ဢဝ်မိုဝ်းမၼ်း လုပ်ႈၵမ်းၼႃႈၽၢၵ်ႇမၼ်း သေႁႆႈတေႃႇၼွင်ႉၸၢႆးမၼ်းယူႇ
“မႄႈႁဝ်း ၸင်ႇႁႃသဵင်ႈၵႂႃႇ မိူဝ်ႈတၢမ်းၶမ်ႈသီႇမူင်းၼႆႉ ၵူၺ်းဢိူဝ်ႈ”
လႆႈငိၼ်းၼင်ႇၼၼ် ၸၢႆးၶိူဝ်းၵေႃႈ ၼမ်ႉတႃၸိုမ်းဢွၵ်ႇသေ ဢႅၼ်ႇၶဝ်ႈမိူဝ်းၸူးတူဝ်တၢႆမႄႈၶဝ် ၼွၼ်းယဵၼ်ယူႇ တီႈၵၢင်ႁိူၼ်းၼၼ်ႉယဝ်ႉ၊ မၼ်းၸၢႆးႁႆႈသေ ဢဝ်ၼႃႈမၼ်းငူပ်ႉသႂ်ႇၼိူဝ် ဢူၵ်းမႄႈၶဝ်ၼၼ်ႉ မၼ်းႁွင်ႉဝႃႈ“မႄႈ မႄႈ” ၼႆသေတႃႉ မႄႈၶဝ်တႄႉ ဢမ်ႇတၵ်းသဵင်တေႃႇမၼ်းၸၢႆးလႆႈယဝ်ႉ။
ပီႈၼၢင်းမၼ်း ၼၢင်းသႅင်လၢဝ် လႆႈငိၼ်းၶၢဝ်ႇဝႃႈ ၼွင်ႉၸၢႆးမၼ်း ၽႅဝ်မႃးၼႆလႄႈ မၼ်းၼၢင်းၵေႃႈ ၼႅတ်ႈမႃးၸူး ၼွင်ႉၸၢႆးမၼ်းသေ ၶဝ်ပီႈၼွင်ႉဢွၼ်ၵၼ်ႁႆႈထိုင်ၸႂ်ထိုင်ၶေႃႈယူႇယဝ်ႉ၊ ၸၢႆးမွၼ်းၶိူဝ်းတႄႉ ယွၼ်ႉပိူဝ်ႈ မၼ်းဢမ်ႇတၼ်းလႆႈႁၼ် မိူဝ်ႈမႄႈၶဝ်သဵင်ႈ လႄႈ မၼ်းပဵၼ်ဢၼ်ၶေႃးၶူမ်ႁႅင်းတႄႉတႄႉသေ ႁႆႈႁႆႈလၢတ်ႈလၢတ်ႈယူႇ၊ မၼ်းၸၢႆးဢဝ်ၼႃႈမၼ်း ငူပ်ႉသႂ်ႇတီႈၵူႇမႄႈၶဝ်သေ ႁႆႈယူႇ၊ ပီႈပီႈ ၼွင်ႉၼွင်ႉၶဝ် ၸိူဝ်းဢၼ်မီးႁိမ်းႁွမ်းၸိူဝ်းၼၼ်ႉၵေႃႈ လႆႈႁၼ်ၶဝ်ပီႈၼွင်ႉ ႁႆႈတေႃႇၵၼ်ၼင်ႇၼၼ် ဢွၼ်ၵၼ်ၶေႃးၶူမ်ၸွမ်းၶဝ်ယူႇ၊ ၶဝ်ဢွၼ်ၵၼ်ၶျေႃးဝွၼ်း ၶဝ်ပီႈၼွင်ႉၵူႈပိူင်ပိူင်ယူႇယဝ်ႉ၊ ၼၢင်းသႅင်လၢဝ် ၵေႃႈၸင်ႇဝႃႈ
“ၼွင်ႉၸၢႆး ... ယႃႇပေႁႆႈယူႇတိၵ်းတိၵ်းယဝ်ႉ ယိူၼ်ႉဢဝ် လႄႈ ပီႈဝႃႈ”
ၸၢႆးမွၼ်းၶိူဝ်းတႄႉ တိုၵ်ႉႁႆႈယူႇသိုတ်ႉသိုတ်ႉ
“ႁႆႈဢိူဝ်ႈ ... သိုတ်ႉ ... လွင်ႈဝႃႈမႄႈႁဝ်းပဵၼ်ၵိၼ်းဝႆႉၼႆ ႁဵတ်းသင်ပီႈၼၢင်းၶဝ် ဢမ်ႇပွင်ႇၶၢဝ်ႇမႃးတီႈၼွင်ႉၸၢႆးလႃႇ”
ၼၢင်းသႅင်လၢဝ်ၵေႃႈ ၼႅတ်ႈၸဵတ်ႉၼမ်ႉတႃမၼ်းၼၢင်းသေ
“ယွၼ်ႉပိူဝ်ႈ ပွႆးထၢမ်လိၵ်ႈၼွင်ႉၸၢႆႈလႄႈ ၵူဝ်ၼႃႈၵၢၼ် ပၢႆးလိၵ်ႈလၢႆး ၼွင်ႉၸၢႆးလူႉလႄႈ ပီႈၶဝ်ၸင်ႇတင်ႈၸႂ် ပေႃႉသၢႆလူမ်းၵႂႃႇ ႁႂ်ႈထိုင် ဝၼ်းပွႆးထၢမ်လိၵ်ႈၼွင်ႉၸၢႆးယဝ်ႉၼၼ်ႉယဝ်ႉ၊ ၼွင်ႉၸၢႆး တွပ်ႇလႆႈယူႇႁႃႉပီၼႆႉ”
ၸၢႆးမွၼ်းၶိူဝ်း တိုၵ်ႉပႆႇတဵတ်ႇလႆႈငၢႆႈငၢႆႈ
“လႆႈယူႇ ... သိုတ်ႉ! သိုတ်ႉ! ပေႃးဝႃႈႁူႉ သၢႆငၢႆႈမႄႈႁဝ်း ဢမ်ႇလီၼႆ ပီႈဢၢႆႈပီႈၼၢင်းၶဝ် ထုၵ်ႇလီပွင်ႇၶၢဝ်ႇမႃး တီႈၼွင်ႉၸၢႆး ၸဵမ်ၸဝ်ႉဢိူဝ်ႈ ဢၼ်လိၵ်ႈလၢႆးၼၼ်ႉ ၶိုၼ်းၵႂႃႇႁဵတ်းမိူဝ်ႈလႂ်ၵေႃႈ လႆႈယူႇၵူၺ်း၊ ဢၼ်ၼွင်ႉၸၢႆး ဢမ်ႇလႆႈမႃးၶိုတ်းမႄႈႁဝ်း ဢမ်ႇလႆႈ မႃးလုမ်းလုမ်းမႄႈႁဝ်းၼၼ်ႉ ဢမ်ႇၸၢင်ႈမီးထႅင်ႈသေပွၵ်ႈလႄႈ ၼွင်ႉၸၢႆးၼႅင်ၸႂ်ၶေႃးၶူမ်တႄႉတႄႉယဝ်ႉ ... သိုတ်ႉ”
ၸၢႆးမွၼ်းၶမ်းၸင်ႇၶိုၼ်းဝႃႈ
“ပီႈဢၢႆးၶဝ်ၵေႃႈ ဢၢင်ႈပေႃႉသၢႆလူမ်းၵႂႃႇၸူးၼွင်ႉၸၢႆးၸဵမ်ၸဝ်ႉ ၼင်ႇၵဝ်ႇဢိူဝ်ႈၼွင်ႉၸၢႆး”
ၸၢႆးမွၼ်းၶိူဝ်း ၸင်ႇႁွင်ႉႁႆႈသေထၢမ် သဵင်ႁႅင်းႁႅင်းယဝ်ႉ
“ႁဵတ်းသင် သမ်ႉဢမ်ႇပေႃႉလႃႇ”
“ဢိူဝ်ႈ ... မႄႈႁဝ်းသမ်ႉဢမ်ႇပၼ်ပေႃႉဢိူဝ်ႈ ၼွင်ႉၸၢႆး မႄႈဝႃႈ ၵူဝ်ပဵၼ်တၢင်းယႃႉၵဝ်းလိၵ်ႈၼွင်ႉၸၢႆး ၼႆလႄႈ ပီႈၸၢႆးၶဝ် ၸင်ႇလႆႈပေႃႉတူၵ်းလိုၼ်းယဝ်ႉ”
“မႄႈႁဝ်း သင်ႇလၢတ်ႈသင်ဝႆႉလၢႆလၢႆ ပီႈဢၢႆႈ”
“သင်ႇဢိူဝ်ႈ ... ပိူင်လူင်မၼ်းတႄႉ ႁႂ်ႈႁဝ်းပီႈၼွင်ႉမေႃ ႁၵ်ႉႁွမ်ၵၼ်ၼႆယဝ်ႉ”
ၸၢႆးမွၼ်းၶိူဝ်းၵေႃႈ ၶေႃးၶူမ်မွင်ၸႂ်သေ မၼ်းၸၢႆးလွမ်တူၺ်းမႄႈၶဝ် ဢၼ်ၼွၼ်းယဵၼ်ဝႆႉယူႇၼၼ်ႉယဝ်ႉ၊ မၼ်းၸၢႆး ၵေႃႈၸင်ႇႁွမ်းမိုဝ်းၶုပ်ႉဝႆႈမႄႈၶဝ်သေ ယွၼ်းပူတ်းဝၢင်းၶႂၢင်းပွႆႇၵူႈ လွင်ႈလွင်ႈယူႇ။
ၶဝ်ပီႈၼွင်ႉသၢမ်ၵေႃႉ ဢိၵ်ႇလူၺ်ႈ ပီႈၼွင်ႉၶဝ်တီႈၸမ် တီႈၵႆၵေႃႈ ဢွၼ်ၵၼ်ၶတ်းၸႂ် လူႁၼ်လုမ်းလႃး တေႃႇပေႃးၽင်ယဝ်ႉ၊ တေႃႇပေႃးႁႅၼ်းသွမ်းယဝ်ႉတူဝ်ႈ ၵူႈၸိူဝ်ႉၵူႈပိူင်ယဝ်ႉ။