မွၵ်ႇလူင်ႇလဵဝ်/တွၼ်ႈသၢဝ်းၸဵတ်း
တီႈဝဵင်းတူၼ်ႈတီး
တီႈႁိူၼ်းၼၢင်းမူဝ်ၶၢဝ် တီႈၼႂ်းၶၢၼ်းၶႅၵ်ႇၼၼ်ႉ မႄႈၸၢႆးသႅင်မိူင်းၶဝ် မႃးဢႅဝ်ႇ မႄႈၼၢင်းမူဝ်ၶၢဝ်သေ ၶဝ်ဢုပ်ႇၵၼ်ယူႇ မႄႈ ၸၢႆးသႅင်မိူင်းၶဝ်ၸင်ႇထၢမ်ဝႃႈ
“လုၵ်ႈယိင်းသူ မူဝ်ၶၢဝ်ၵႂႃႇလႂ်ၼႆႉ ၸိုင်ဝႃႈမၼ်းပွၵ်ႈၸၼ်ႉၸွမ်မႃးယဝ်ႉၼႆ ဢမ်ႇၸႂ်ႈႁႃႉ”
“ၸႂ်ႈဢိူဝ်ႈ ... မၼ်းတိုၵ်ႉၵႂႃႇႁိူၼ်းတႆးၵေႃႉမၼ်းၼႆယူဝ်ႉ ႁဵတ်းသင်ဝႃႈ”
“ဢေႃႈ ... တေလၢတ်ႈၼႆၵေႃႈဢႃးၼႃႇ ပေႃးဢမ်ႇလၢတ်ႈၵေႃႈ သမ်ႉဢမ်ႇသႃႇၸႂ်လႄႈ တေလႆႈၼႃႈမႆႈသေလႄႈ လၢတ်ႈယဝ်ႉ မႄႈမူဝ်ၶၢဝ်ၶႂ်ႈႁူႉၵေႃႈ”
“လွင်ႈၸိူင်ႉႁိုဝ် လၢတ်ႈလႄႈ ယႃႇပေၵဵင်ၸႂ် ပဵၼ်ႁဝ်းၼင်ႇၵၼ်ၵူၺ်း ၸွင်ႇပဵၼ်ပိူၼ်ႈတၢင်ႇၵေႃႉ ၵေႃႈ တေႃႈဢမ်ႇၸႂ်ႈ လၢတ်ႈလႄႈ”
“ဢေႃႈ ... ဢၢႆႈၸၢႆးႁိူၼ်းႁဝ်းၼၼ်ႉ မၼ်းတဵၵ်းမႆႈႁႃႈဢူႈၶဝ် ႁႂ်ႈမႃးထၢမ်ပၼ်လုၵ်ႈယိင်းသူၼႆဝႃႇ”
“ဢေႃႈ ... လွင်ႈၼႆႉႁႃႉ”
“ၸႂ်ႈဢိူဝ်ႈ ... ၸႂ်ႈဢိူဝ်ႈ လုၵ်ႈၸၢႆးႁဝ်းၸၢႆးသႅင်မိူင်းတႄႉ မၼ်းဝႃႈ မၼ်းႁၵ်ႉလုၵ်ႈယိင်းသူဝႆႉ ၸဵမ်မိူဝ်ႈလဵၵ်ႉၼႆယဝ်ႉ၊ ၵွပ်ႈၼႆ ၸဵမ်မိူဝ်ႈပီၵၢႆယဝ်ႉ မၼ်းတဵၵ်းၸႂ်ႉႁႃးဢူႈၶဝ်မႃးယွၼ်းဝႆႉၵွၼ်ႇဢိူဝ်ႈ သူႁူႉ၊ ၵူၺ်းၵႃႈ ႁႃးၵေႃႈဝႃႈ ပႂ်ႉႁႂ်ႈမူဝ်ၶၢဝ်ယဝ်ႉၸၼ်ႉၸွမ်ၵွၼ်ႇၼႆ သေ လႆႈၶျေႃးဝွၼ်းမၼ်းဝႆႉႁဵတ်းတႄႉယဝ်ႉ၊ ၵွပ်ႈၼႆ မၼ်ႈယင်း တိုၵ်ႉၶႂ်ႈဝႃႈယၢပ်ႇတေႃႇႁႃးယူႇဢိူဝ်ႈၼႆႉ”
“ဢေႃႈ ... ဝႃႈၼၼ်ႁႃႉ ... ၸႂ်ႈဢိူဝ်ႈၼေႃႈ၊ ၶႃၵေႃႈပဵၼ် တႆးၵေႃႉၵၼ်မႃး ၸဵမ်မိူဝ်ႈလဵၵ်ႉယူႇလူး ၸွင်ႇလုၵ်ႈယိင်းႁဝ်းႁၵ်ႉ လုၵ်ႈၸၢႆးသူယူႇႁိုဝ်”
“လုၵ်ႈၸၢႆးႁဝ်းတႄႉ ႁၵ်ႉလုၵ်ႈယိင်းသူဝႆႉ ၸဵမ်လဵၵ်ႉၼႆ မၼ်းၵႆႉၵႆႉ လၢတ်ႈယူႇလူး ... လုၵ်ႈယိင်းသူၵေႃႈ တေၽွမ်ႉယူႇၵႂႃႈ”
မႄႈၼၢင်းမူဝ်ၶၢဝ်ၶဝ် ဝူၼ်ႉႁၼ်ထိုင်ၸၢႆးသႅင်မိူင်းၶဝ် ပဵၼ်ၵူၼ်းမၢၵ်ႈမီးၵေႃႈပိူင်ၼိုင်ႈ တၢင်းဢူႈမႄႈၶဝ်ၵေႃႈ ပဵၼ်ၵူၼ်းမိုတ်ႈၵၼ်ၵေႃႈပိူင်ၼိုင်ႈ ပုၼ်ႈတႃႇလုၵ်ႈယိင်းမၼ်း မၼ်းႁၼ်ထိုင်ဝႆႉ တေဢမ်ႇလႆႈမႆႈၸႂ် လွင်ႈယူႇလွင်ႈသဝ်းၼႆလႄႈ မၼ်းၸင်ႇဝႃႈ
“ပေႃးၼႆ တေလႆႈႁဵတ်းႁိုဝ်လႃႇ တေလီ”
မႄႈၸၢႆးသႅင်မိူင်းၶဝ် လွမ်လွမ်မႃးသွပ်ႉသႅပ်ႉ တီႈႁူမႄႈၼၢင်းမူဝ်ၶၢဝ်ၶဝ်သေ ၶႃသွင်ၵေႃႉ လွမ်ယုမ်ႉငွၵ်းႁူဝ်တေႃႇၵၼ်ယူႇ ဝၢႆးသေၶႃဢုပ်ႇၵၼ်ယဝ်ႉ မႄႈၸၢႆးသႅင်မိူင်းၶဝ် ၸင်ႇလွမ်တူၺ်းယၢမ်း မူင်းတီႈမိုဝ်းမၼ်းသေ
“ႁဝ်းပေႃးလူဝ်ႇမိူဝ်းယဝ်ႉၼႆႉ ... ႁဵတ်းသင် လုၵ်ႈၸၢႆးႁဝ်းး ပႆႇၽႅဝ်မႃးလႃႇ”
“လွႆးလွႆးလေႃႇဢိူဝ်ႈ ... ၵမ်ႉတေမႃးယူႇၵႂႃႈ”
ယွၼ်ႉပိူဝ်ႈ မႄႈၶဝ်သင်ႇလၢတ်ႈမၼ်းဝႆႉ ၶၢဝ်းယၢမ်းတႃႇတေၵႂႃႇႁပ်ႉမႄႈၶဝ်ၼၼ်ႉ ၸမ်မႃးယဝ်ႉလႄႈ ၸၢႆးသႅင်မိူင်းႁေႃႈၵႃး ဢွၵ်ႇႁိူၼ်းၶဝ်မႃးယဝ်ႉ၊ ၸွမ်းတၢင်းသမ်ႉလိူၵ်ႈလိူၵ်ႈ မႃးႁၼ်ၼၢင်းမူဝ်ၶၢဝ်လႄႈ မၼ်းၸင်ႇႁေႃႈၵႃးမၼ်း မႃးၵိုတ်းႁိမ်း ၼၢင်းမူဝ်ၶၢဝ်သေ
“ႁေႉ ... မူဝ် တေဢၢင်ႈမိူဝ်းႁႃႉၼႆႉ”
ၼၢင်းမူဝ်ၶၢဝ် ဢမ်ႇၶႂ်ႈလၢတ်ႈတေႃႇသေတႃႉ သမ်ႉတေဢမ်ႇလီလႄႈ မၼ်းၼၢင်းၵေႃႈဝႃႈ
“ၸႂ်ႈဢိူဝ်ႈ ၸၢႆးသႅင်မိူင်း”
“ပေႃးၼႆသၢင်ႇထုၵ်ႇယဝ်ႉၼႃႇ ... ႁဝ်းၵေႃႈ ဢၢင်ႈမိူဝ်း ႁိူၼ်းမူဝ်ၶၢဝ်ဢိူဝ်ႈၼႆႉ မႃးၶိုၼ်ႈၵႃးလႄႈ”
“တေမိူဝ်းႁဵတ်းသင်ဝႃႈ”
“ဢေႃႈ ... မႄႈႁဝ်းၵႂႃႇလႄႇ ႁိူၼ်းမူဝ်ၶဝ်လႄႈ ႁဝ်း ဢၢင်ႈၵႂႃႇႁပ်ႉၼႆယဝ်ႉ ၵွပ်ႈၼႆ မႃးၶိုၼ်ႈၵႃးလႄႈမူဝ်”
ၼၢင်းမူဝ်ၶၢဝ်ၵေႃႈ ဢမ်ႇၸၢင်ႈႁဵတ်းႁိုဝ်လႄႈ ပိူင်ၼိုင်ႈ ၵဵင်ၸႂ်ၵေႃႉႁွင်ႉၶီႇလႄႈပိူင်ၼိုင်ႈ မၼ်းၼၢင်းၵေႃႈ ၸင်ႇၶိုၼ်ႈၶီႇၵႃးယဝ်ႉ ၸွမ်းတၢင်း ၸၢႆးသႅင်မိူင်းၸင်ႇထၢမ်ဝႃႈ
“မူဝ် ... လႆႈၵႂႃႇၶိုၼ်ႈၸၼ်ႉၸွမ်မႃးၼႆ ၵျေႃႇၼႃႇယူဝ်ႉၼေႃ”
“ၸၼ်ႉၸွမ်ဢၼ်ဝႃႈၼၼ်ႉ ပဵၼ်တီႈသွၼ်လိၵ်ႈတၢင်းမေႃဢိူဝ်ႈ ၸၢႆးသႅင်မိူင်း ပဵၼ်တီႈၵျေႃႇဢမ်ႇၸႂ်ႈသႄႈ”
“ဢေႃႈ ... ဢမ်ႇႁူႉလႄႇ ႁဝ်းဢမ်ႇယၢမ်ႈၶိုၼ်ႈၸိူင်ႉၼင်ႇ မူဝ်ၶဝ်လူး ယူဝ်ဝႃႈ မၼ်းၵျေႃႇဝႃႈၵျေႃႇၼႆသေ သမ်ႉပေႃးလိုမ်းပီႈ လိုမ်းၼွင်ႉၵႂႃႇၼႆၵႂႃႈ”
“ႁိုဝ်ႉ ... ဢမ်ႇၸႂ်ႈသႄႈ မဵဝ်းလိုမ်းၵေႃႈဢမ်ႇၸႂ်ႈ”
“ပေႃးၼႆ မူဝ်ဢမ်ႇလိုမ်းႁဝ်းၼင်ႇၵဝ်ႇၼေႃ”
ၸၢႆးသႅင်မိူင်းလၢတ်ႈၵႂၢမ်း ၶႂ်ႈဢဝ်ၼမ်ႉတွၼ်းၽွၼ်းလီ ၽၢႆႇမၼ်းမႃးတိၵ်းတိၵ်းလႄႈ ၼၢင်းမူဝ်ၶၢဝ်ၵေႃႈၸင်ႇဝႃႈ
“လိုမ်းတႄႉဢမ်ႇလိုမ်းၼင်ႇၵဝ်ႇ ႁႂ်ႈပေႃးၶုၵ်းၸႂ်လႆႈတႄႉတႄႉဝႃႈဝႃႈၵေႃႈ ဢမ်ႇမီးၼင်ႇၵဝ်ႇ”
လႆႈငိၼ်းၼင်ႇၼၼ် ၸၢႆးသႅင်မိူင်း ဢမ်ႇၸၢင်ႈသိုပ်ႇဝႃႈႁိုဝ်သေ ယၢႆးႁူဝ်မၼ်ႈယူႇယဝ်ႉ၊ ၵႃးၶဝ်ႁေႃႈၽႅဝ်မႃး တီႈၼႂ်းႁိူၼ်း ၼၢင်းမူဝ်ၶၢဝ်ၶဝ်ယဝ်ႉ။
မႄႈၸၢႆးသႅင်မိူင်းလႄႈ မႄႈၼၢင်းမူဝ်ၶၢဝ်ၶဝ် လႆႈႁၼ်လုၵ်ႈၸၢႆးလုၵ်ႈယိင်းၶဝ် ၸမ်ၸႂ်ၵၼ်ၼင်ႇၼၼ်ၼႆ ၶႃလွမ်ၶၢတ်ႈဢၵႄးတူၺ်းသေ ပိူၼ်းၵၢင်းယုမ်ႉတေႃႇၵၼ်ယူႇ ၼၢင်းမူဝ်ၶၢဝ် ၸင်ႇၶိုၼ်း ထၢမ် မႄႈၸၢႆးသႅင်မိူင်းၶဝ်
“ဢေႃႈ ... ပႃႈ ပေႃးတေမိူဝ်းယဝ်ႉၶႃႈႁႃႉၼႆႉ”
“ဝႃႈၼၼ်ဢိူဝ်ႈ လုၵ်ႈယိင်း ... လုၵ်ႈယိင်းၵႂႃႇလႂ်မႃးၼႆႉ”
“ဢေႃႈ ... ၵႂႃႇဢႅဝ်ႇႁိူၼ်းတႆးၵေႃႉသေ ၽွင်းမိူဝ်ႈမႃးမိူဝ်းၼၼ်ႉ သမ်ႉမႃးၺႃး ၵႃးလုၵ်ႈၸၢႆးပႃႈလႄႈ လုၵ်ႈၸၢႆးပႃး မႃးၸွမ်းသူင်ႇ မူဝ်ဢေႃႈ”
ၼင်ႇႁိုဝ်မႄႈၸၢႆးသႅင်မိူင်းၶဝ် တေသိူဝ်းၸႂ်ၼၼ်ႉ မၼ်းၼၢင်း ၶတ်းၸႂ်လၢတ်ႈၵႂႃႇၼင်ႇၼႆလႄႈ မႄႈၸၢႆးသႅင်မိူင်းၶဝ် ၸူမ်းသိူဝ်းတႄႉတႄႉသေ
“လီဢိူဝ်ႈၼၼ်ႉ ၶႂ်ႈၵႂႃႇလႂ်ၼႆၵေႃႈ ၸႂ်ႉႁႂ်ႈလုၵ်ႈၸၢႆးပႃႈ ၵႂႃႇသူင်ႇပၼ်ၵေႃႈ လႆႈယူႇလူး၊ ပေႃးၼႆ ပႃႈတေမိူဝ်းၵွၼ်ႇၼႃႈ”
“ဢေႃႈ ... လီယဝ်ႉၶႃႈ”
ဝၢႆးသေၵႃးၸၢႆးသႅင်မိူင်းၶဝ် မိူဝ်းၵႂႃႇ ၼၢင်းမူဝ်ၶၢဝ်ၶႃသွင်ၵေႃႉမႄႈလုၵ်ႈ ပႆမႃးၸူး ၼႂ်းႁိူၼ်းၶဝ်ယဝ်ႉ မႄႈၶဝ်ၸင်ႇလၵ်ႉလွမ်ထၢမ်ဝႃႈ
“လုၵ်ႈယိင်း ... လုၵ်ႈယိင်းလႄႈ ၸၢႆးသႅင်မိူင်းၼႆႉ ၸမ်ၸႂ်ၵၼ်ၵျႃႉၼေႃ”
“ဢူဝ် ... ဢမ်ႇၸမ်သင် တင်းမၼ်းလႄႈမူဝ် ၵူၺ်းပဵၼ် တႆးၵေႃႉၵၼ်မိူဝ်ႈလဵၵ်ႉၵူၺ်း”
ၼၢင်းမူဝ်ၶၢဝ်ဝႃႈၼႆသေ ပၢႆႈၶဝ်ႈမိူဝ်း ၼႂ်းလုၵ်းၼွၼ်းမၼ်းယဝ်ႉ၊
မႄႈၶဝ်တႄႉ ထၢင်ႇဝႃႈလုၵ်ႈယိင်းမၼ်းလီဢၢႆသေ ပၢႆႈၶဝ်ႈမိူဝ်း ၼႆလႄႈ မၼ်းလွမ်ယုမ်ႉ တုမ်ႉၸႂ်ဝႆႉယူႇ ႁင်းၵူၺ်းမၼ်းယဝ်ႉ။