မွၵ်ႇလူင်ႇလဵဝ်/တွၼ်ႈသၢဝ်းၵဝ်ႈ
ၸၢႆးမွၼ်းၶိူဝ်းၵေႃႈ မီးဝႆႉယူႇတီႈလွႆလႅမ် ဝၢႆးသေႁႅၼ်းသွမ်း တၢင်တူဝ်မႄႈၶဝ်ယဝ်ႉ၊ မၼ်းၸၢႆးၶုၵ်ႈၸႂ်လႆႈ ၼၢင်းမူဝ်ၶၢဝ်လႄႈ မၼ်းတိုၵ်ႉတႅမ်ႈလိၵ်ႈသေ ဢၢင်ႈပၼ်ၵႂႃႇ တီႈၼၢင်းမူဝ်ၶၢဝ်ၼႆယဝ်ႉ၊ ၽွင်းၼၼ်ႉ တႆးၵေႃႉမၼ်း ၸၢႆးၼႃထိုဝ်(ၸၢႆးယွတ်ႈ)ႁွတ်ႈၽႅဝ်မႃး တီႈမၼ်းသေ
“ၸၢႆးၶိူဝ်း ၵဝ်လႆႈလိၵ်ႈမႃး တႃႇမႂ်းၽိုၼ်ၼိုင်ႈဢိူဝ်ႈ”
“တႄႉႁႃႈ ပဵၼ်လိၵ်ႈၽႂ်ပၼ်မႃး”
“ပဵၼ်ၼၢင်းၸၢမ်သႅင်းတူၼ်ႈတီး မႃးပၼ်ၵဝ်တီႈတႃႈၵႃးဢိူဝ်ႈ၊ မၼ်းဝႃႈ ႁႂ်ႈမႃးပၼ်မႂ်းၽႂ်းၽႂ်း ၼႆယဝ်ႉ ႁိူဝ်ႈဢဝ်လႄႈ ၵဝ်တေ ၵႂႃႇၵွၼ်ႇၼႃႈ”
“ဢိူဝ်ႈ ... ဢိူဝ်ႈ ... ၸူမ်းယဝ်ႉ”
ၸၢႆးမွၼ်းၶိူဝ်းၵေႃႈ ၶဝ်ႈမႃးၼႂ်းၶၢၼ်းၼွၼ်းမၼ်းသေ မႃးၽုၺ်ႇတူၺ်း လိၵ်ႈၼၢင်းၸၢမ်သႅင်း ၵမ်းလဵဝ်ယဝ်ႉ။
ထိုင်
ပီႈၸၢႆးၶိူဝ်း
ၸၢမ်သႅင်းမီးလိၵ်ႈသေ တႅမ်ႈပွင်ႇၶၢဝ်ႇမႃး တီႈပီႈၸၢႆးၶိူဝ်း ၽႂ်းၽႂ်းဢိူဝ်ႈ၊ လွင်ႈတၢင်းမၼ်းတႄႉ မိူဝ်ႈဝႃး မူဝ်ၶၢဝ်မႃးၽိတ်ႈမွၵ်ႇ ၸၢမ်သႅင်းသေ ၸႂ်ႉႁႂ်ႈမိူဝ်းၸွႆႈမၼ်း လွင်ႈတႃႇတေလဵင်ႉၶဝ်ႈၶမ်ႈ ၵူၼ်းလူင်ၶဝ်ၼႆယဝ်ႉ၊ မိူဝ်ႈမူဝ်မႃးလၢတ်ႈတႄႉ မၼ်းဝႃႈမၵ်းမၢႆ ပီယဝ်ႉႁူင်းႁဵၼ်းၸၼ်ႉၸွမ်သေ လဵင်ႉၶဝ်ႈၼႆယဝ်ႉ၊ ၸၢမ်သႅင်းၵေႃႈ ထၢင်ႇၸႂ်ႈတႄႉသေ မိူဝ်းၸွႆႈမၼ်းၵူႈပိူင်ပိူင်ယဝ်ႉ။
ထိုင်မႃးၵၢင်ၶမ်ႈ ဝၢႆးသေလဵင်ႉၶဝ်ႈၵူၼ်းလူင်ယဝ်ႉ ၸၢမ်သႅင်း ၸင်ႇတေႁူႉထိုင် ဢၼ်တႄႉမၼ်းယဝ်ႉ ပီႈၸၢႆးၶိူဝ်း လွင်ႈဢၼ်လဵင်ႉၶဝ်ႈၼၼ်ႉတႄႉ မၵ်းမၢႆ လွင်ႈဢၼ် ၸၢႆးသႅင်မိူင်းမႃး ယွၼ်းထၢမ်မူဝ်ၶၢဝ်ၼၼ်ႉယဝ်ႉ။
ၵွပ်ႈၼႆ ၶမ်ႈၼၼ်ႉ ပေႃးဝႃႈ ၸၢမ်သႅင်းႁူႉလွင်ႈဝႃႈပဵၼ်ပွႆး တွင်ႈထၢမ်လုၵ်ႈယိင်းလုၵ်ႈၸၢႆးၵၼ်ၼႆ ၸၢမ်သႅင်း ပဵၼ်ဢၼ်ဢၢမ်း ၵႂႃႇတႄႉတႄႉ ပိူင်ၼိုင်ႈ ႁႃးသွင်ၵေႃႉမူဝ်ၼႆႉ ပဵၼ်တႆးၵေႃႉၵၼ်မႃးၸဵမ် မိူဝ်ႈလဵၵ်ႉလဵၵ်ႉ ဢမ်ႇတွၼ်ႉယၢမ်ႈလႅၼ်ၵၼ်ႁဵတ်းၼႆမႃးသေပွၵ်ႈ တေႁဵတ်းသင်ၵေႃႈ တိုၼ်းဢုပ်ႇၵုမ်လၢတ်ႈထိုင်ၵၼ်သေ ၸင်ႇႁဵတ်းယဝ်ႉ၊ ၼႆႉတႄႉ မူဝ်တင်ႈၸႂ်လႅၼ် ၸၢမ်သႅင်းသေ ဢမ်ႇပၼ်ၸၢမ်သႅင်းႁူႉ လွင်ႈမၼ်းသေဢိတ်းလႄႈ ၸၢမ်သႅင်းၽိတ်းၸႂ်တႄႉတႄႉသေ ပၢႆႈမိူဝ်းပႅတ်ႈၵမ်းလဵဝ်ယဝ်ႉ။
ထႅင်ပိူင်ၼိုင်ႈ မၼ်းလၢတ်ႈဝႃႈ မၼ်းႁၵ်ႉပီႈၸၢႆးၶိူဝ်း ၵေႃႉလဵဝ်ၵူၺ်းၼႆသေ သမ်ႉၵႂႃႇၽွမ်ႉ ၸၢႆးသႅင်မိူင်းၼၼ်ႉ ၸၢမ်သႅင်း ပဵၼ်ဢၼ်ၸဵပ်းၸႂ်တၢင်ပီႈၸၢႆးၶိူဝ်းတႄႉတႄႉယဝ်ႉ၊ ပီႈၸၢႆးၶိူဝ်း ၵွပ်ႈၼႆ မၼ်းႁႅင်ႉႁဵတ်းလႆႈ ၼိူဝ်ၸိူဝ်းႁဝ်းၼႃႇလႄႈ ၸၢမ်သႅင်းၵေႃႈဢမ်ႇဢၢၼ်းလၢတ်ႈတေႃႇမၼ်း ဢမ်ႇဢၢၼ်းမၵ်းမၢႆမၼ်းပဵၼ်တႆးၵေႃႉႁဝ်းၼႆယဝ်ႉ။
ၼႂ်းၶူင်းၵၢင်လေႃးၵၼႆႉ ၵူၼ်းဢၼ်ဢမ်ႇမီးၵတိသၸ်ႉ ၸႃႇၼၼ်ႉ ၸၢမ်သႅင်း ၸင်းသေပိူၼ်ႈယဝ်ႉ။
လိုဝ်ႈၵွၼ်ႇ
တႆးၵေႃႉႁၵ်ႉ
ၸၢမ်သႅင်း
ၸၢႆးမွၼ်းၶိူဝ်း လူႁၼ်လိၵ်ႈဢၼ်ၸၢမ်သႅင်းပၼ်မႃးၼၼ်ႉသေ မၼ်းတိူဝ်ႉၸႂ်ၵႂႃႇတႄႉတႄႉ၊ ပၢႆသလိူဝ်မႄႈႁၵ်ႉမၼ်းၸၢႆးၵေႃႈ တၢႆ ၸူႉႁၵ်ႉမၼ်းၸၢႆးၵေႃႈ သမ်ႉႁၢႆယဝ်ႉလႄႈ မၼ်းၸဵပ်းၸႂ်တႄႉတႄႉသေ လိၵ်ႈဢၼ်မၼ်းတႅမ်ႈ ဢၢင်ႈပၼ်ၼၢင်းမူဝ်ၶၢဝ် ၼၼ်ႉၵေႃႈ မၼ်းသိၵ်ႇယွႆႈ ၸုတ်ႇၾႆးပႅတ်ႈသဵင်ႈသဵင်ႈယဝ်ႉ၊ ၶမ်ႈၼၼ်ႉ မၼ်းၸၢႆးဢမ်ႇၸၢင်ႈႁဵတ်းႁိုဝ်ၼွၼ်းလပ်းလႆႈ။
ထိုင်မႃးၵၢင်ၼႂ် ၼႃႈမိူင်းၸိုၼ်ႈပၢင်ႇသႂ်လႅင်း လႅတ်ႇသမ်ႉပေႃးထွင်ႇႁႅင်းယဝ်ႉသေတႃႉ ပႆႇႁၼ်ၸၢႆးၶိူဝ်းလုၵ်ႉလႄႈ ပီႈၼၢင်းမၼ်းၼၢင်းသႅင်လၢဝ် ၸင်ႇမႃးပူၵ်းမၼ်းယဝ်ႉ ပီႈၼၢင်းၶဝ်ယူႇတီႈ ၼွၵ်ႈသေ
“ၸၢႆးၶိူဝ်း ... ၼွင်ႉၸၢႆး ႁဵတ်းသင်ၼွင်ႉၸၢႆးပႆႇလုၵ်ႉလႃႇ မိူဝ်ႈၼႆႉ သမ်ႉပေႃးမီးပႅတ်ႇမူင်းၶိုင်ႈယဝ်ႉလႄႈ”
ဢမ်ႇလႆႈငိၼ်းသဵင်ၸၢႆးၶိူဝ်းတွပ်ႇသင်လႄႈ ၼၢင်းသႅင်လၢဝ် ၸင်ႇဢီးတူၺ်းၽၵ်းတူၶၢၼ်းယဝ်ႉ၊ ၽၵ်းတူၶၢၼ်းၵေႃႈ ဢမ်ႇသွတ်ႇသေႃးဝႆႉ ၽုၺ်ႇလႆႈၵႂႃႇငၢႆႈငၢႆႈယဝ်ႉ၊ ၼၢင်းသႅင်လၢဝ် ၶဝ်ႈၵႂႃႇၼႂ်းလုၵ်းသေ ၵႂႃႇလွမ်တူၺ်းသေတႃႉ ဢမ်ႇလႆႈႁၼ်ၸၢႆးမွၼ်းၶိူဝ်း၊ မၼ်းလွမ်တူၺ်းတႂ်ႈၵူႇၵေႃႈ ဢမ်ႇႁၼ် လွမ်တူၺ်း တီႈၼႂ်းလုၵ်းၼၼ်ႉ တီႈလႂ်ၵေႃႈဢမ်ႇလႆႈႁၼ်ၸၢႆးမွၼ်းၶိူဝ်း တီႈၼိူဝ်ၽိူၼ်တႅမ်ႈလိၵ်ႈၼၼ်ႉ လႆႈႁၼ်မီးဝႆႉ လိၵ်ႈဢွၼ်ႇၽိုၼ်ၼိုင်ႈယဝ်ႉ၊ မၼ်းၸင်ႇဢဝ်လိၵ်ႈၼၼ်ႉသေ ၼႅတ်ႈဢွၵ်ႇမႃးၸူး ပီႈဢၢႆႈလူင်ၶဝ်ယဝ်ႉ။
“ပီႈဢၢႆႈ ... ပီႈဢၢႆႈ ၸၢႆးၶိူဝ်းၵႂႃႇလႂ်ၵေႃႈဢမ်ႇႁူႉယဝ်ႉ”
“မၼ်းပႆႇလုၵ်ႉ ဢမ်ႇၸႂ်ႈႁႃႉ”
“မၼ်းဢမ်ႇမီးၼႂ်းလုၵ်းမၼ်းလူင် ၶႃႈပေႃးၵႂႃႇႁႃတူၺ်း ယဝ်ႉယဝ်ႈ ၵူၺ်းလႆႈႁၼ် လိၵ်ႈၽိုၼ်ၼႆႉၵူၺ်းဢိူဝ်ႈ”
“ပဵၼ်လိၵ်ႈသင် ဢဝ်မႃးလူး”
“ဢမ်ႇႁူႉယဝ်ႉ မၼ်းတႅမ်ႈဝႆႉတႄႉ ထိုင်ပီႈဢၢႆႈပီႈၼၢင်း ၼႆယဝ်ႉ”
ၶႃသွင်ၵေႃႉၵေႃႈ မႃးႁူမ်ႈၵၼ်လူတူၺ်း လိၵ်ႈၼၼ်ႉယူႇ ထိုင်
ပီႈဢၢႆႈ ပီႈၼၢင်း
ၼွင်ႉၸၢႆးမီးလိၵ်ႈသေတႅမ်ႈဝႆႉပၼ်ဢေႃႈ ... ဢွၼ်တၢင်းသုတ်း ႁႂ်ႈၼွင်ႉၸၢႆး လႆႈယွၼ်းၵၼ်ႇတေႃး ပီႈဢၢႆႈလႄႈ ပီႈၼၢင်းသေၵမ်း
ယွၼ်ႉပိူဝ်ႈၼွင်ႉၸၢႆးဢမ်ႇမွၵ်ႇလၢတ်ႈထိုင် ပီႈဢၢႆႈပီႈၼၢင်းသေ ပၢႆႈဢွၵ်ႇႁိူၼ်းၵႂႃႇၼႆႉၼႆ ၶႅၼ်းတေႃႈ ဝႆႉၸႂ်ငိုၼ်းတိုၼ်းၸႂ်ၶမ်းသေ ဝၢင်းၶႂၢင်ႉပၼ်ၼွင်ႉၸၢႆးသေၵမ်း၊ လွင်ႈဝႃႈ ပီႈဢၢႆႈလႄႈပီႈၼၢင်း တေမႆႈၸႂ်ပုၼ်ႈၼွင်ႉၸၢႆးၼႆ ၼွင်ႉၸၢႆးႁူႉထိုင်ယူႇ ၵူၺ်းၵႃႈ ပုၼ်ႈတႃႇၼွင်ႉၸၢႆးၼၼ်ႉ ၼွင်ႉၸၢႆးၶႂ်ႈသင်ဝႃႈ ယႃႇပေမႆႈၸႂ်သင် ၼႆယဝ်ႉ၊ ၵွပ်ႈသင်ၼႆ ယၢမ်းလဵဝ်ၼွင်ႉၸၢႆးၵေႃႈ ဢမ်ႇၸႂ်ႈလုၵ်ႈဢွၼ်ႇယဝ်ႉ၊ ၼွင်ႉၸၢႆးပႄႉတူဝ်ပႄႉၸႂ်ၵူႈပိူင်ပိူင်ယူႇၼႆ တမ်းၸႂ်ၶႃႈလႃႈ။
လွင်ႈဢၼ်ၼွင်ႉၸၢႆး ဢွၵ်ႇႁိူၼ်းၵႂႃႇၼႆႉၵေႃႈ ၼွင်ႉၸၢႆးၶႂ်ႈၸႃႉတေႃႇ ပီႈဢၢႆႈပီႈၼၢင်းၶဝ်သေဢွၵ်ႇၵႂႃႇတႄႉ ဢမ်ႇၸႂ်ႈၶႃႈ ဝၢႆးသေ မႄႈႁဝ်းသဵင်ႈၵႂႃႇ ၼွင်ႉၸၢႆးပႆႇၸၢင်ႈယႃၸႂ်လီလီပိူင်ၼိုင်ႈ လိူဝ်သေၼၼ်ႉ တၢင်းမႆႈၼွင်ႉၸၢႆးထႅင်ႈဢၼ်ၼိုင်ႈ ဢမ်ႇမုင်ႈဢမ်ႇမွင်းသေ ၵိုင်ႉၵၢင်ႉပဵၼ်မႃးလႄႈ ၼွင်ႉၸၢႆးပဵၼ်ဢၼ်တိူဝ်ႉၸႂ်ၼႃႇသေ ၸင်ႇဝႃႈ ဢၢၼ်းၶႂ်ႈၵႂႃႇႁႃတီႈယဵၼ်ၸႂ်လႄႈ ၼွင်ႉၸၢႆးၸင်ႇလူင်းႁိူၼ်းၵႂႃႇယဝ်ႉ၊ လွင်ႈတၢင်းမႆႈၼၼ်ႉတႄႉ ၵေႃႉႁၵ်ႉၼွင်ႉၸၢႆး ဢမ်ႇမီးၵတိသၸ်ႉၸႃႇၼၼ်ႉယဝ်ႉ၊ ၵွပ်ႈၼႆ ဢၼ်ၼွင်ႉၸၢႆးဢွၵ်ႇႁိူၼ်းၵႂႃႇၼႆႉတႄႉ ၼွင်ႉၸၢႆးဢဝ်ပဵၼ်တီႈယႃၸႂ်သေ ၸင်ႇဢွၵ်ႇႁိူၼ်းယဝ်ႉ၊ ၵူၺ်းၵႃႈ တေၵႂႃႇတီႈလႂ် ၼွင်ႉၸၢႆးဢမ်ႇၸၢင်ႈလၢတ်ႈ
ပေႃးဝႃႈႁွတ်ႈထိုင်မႃး ဝၼ်းၼွင်ႉၸၢႆးၶိုၼ်းယႃၸႂ်လႆႈ ၶိုၼ်းယဵၼ်ၸႂ်ယဝ်ႉၼႆ ၼွင်ႉၸၢႆးတေၶိုၼ်းပွၵ်ႈမႃးယူႇ...
ၼပ်ႉယမ်ယႂ်ႇၼမ်သေလႄႈ
ၼွင်ႉၸၢႆး - ၸၢႆးၶိူဝ်း
ၼၢင်းသႅင်လၢဝ်တႄႉ လႆႈႁၼ်လိၵ်ႈ ၼွင်ႉၸၢႆးမၼ်းၼင်ႇၼၼ်သေ မၼ်းၼၢင်းႁႆႈယူႇယဝ်ႉ၊ ၸၢႆးမွၼ်းၶမ်းၸင်ႇဝႃႈ
“ယႃႇပေႁႆႈ ၼွင်ႉယိင်း ၼွင်ႉၸၢႆးတေၵႂႃႇတႄႉတႄႉ ၵေႃႈဢမ်ႇၸႂ်ႈ မၼ်းတေၶိုၼ်းမႃးယူႇၼႆၼႃႇ မၼ်းၵေႃႈ ပဵၼ်ၵူၼ်းလႅတ်းၵေႃႉၼိုင်ႈယူႇ ၼင်ႇႁိုုဝ်ၸႂ်မၼ်းတေယဵၼ်ၼၼ်ႉ ဢဝ်မၼ်းဝႃႈလႃႈ မၼ်းပႄႉတူဝ်မၼ်းယူႇ။