မွၵ်ႇလူင်ႇလဵဝ်/တွၼ်ႈသၢဝ်းသွင်
ႁွတ်ႈၽႅဝ်မႃး လိူၼ်သိပ်းသွင် ၸၢႆးမွၼ်းၶိူဝ်း ၶႂ်ႈမႃးၶဝ်ႈပွႆး လိူၼ်သိပ်းသွင်မူၼ်း တူၼ်ႈတီးလႄႈ မၼ်းၽႅဝ်မႃးတူၼ်ႈတီးယဝ်ႉ။
မၼ်းၽႅဝ်မႃးတီႈႁိူၼ်းမႄႈၼႃႉၶဝ် မႃးဝႆႉၶူဝ်းဝႆႉလဵင်းမၼ်းသေ တၢမ်းၶမ်ႈ ၵၢင်ၸႂ်မၼ်းၶႂ်ႈသိုဝ်ႉပပ်ႉလႄႈ မၼ်းၵေႃႉလဵဝ် မႃးႁႃသိုဝ်ႉပပ်ႉသေ ၽွင်းမိူဝ်ႈ မၼ်းတိုၵ်ႉပႆၸွမ်းၼိူဝ်ၶႅပ်ႇတၢင်း(ပလႅတ်ႉၽွင်း)တီႈသဵၼ်ႈတၢင်းလူင် ၽၢႆႇၼႃႈႁူင်းသဝ်းၼၼ်ႉ ၵႃႈဢွၼ်ႇ လမ်းၼိုင်ႈ မႃႈၵိုတ်းတီႈႁိမ်းမၼ်းသေ “တိတ်း တိတ်း”
“ပီႈၸၢႆးၶိူဝ်းတေၵႂႃႇလႂ်ၼႆႉ”
ၸၢႆးမွၼ်းၶိူဝ်းၵေႃႈ ၼႅတ်ႈဝၢႆႇတူၺ်းၼႆ လႆႈႁၼ်ပဵၼ် ၼၢင်းမူဝ်ၶၢဝ်ၵေႃႉလဵဝ် ႁေႃႈၵႃးမႃးလႄႈ မၼ်းၸင်ႇတွပ်ႇဝႃႈ
“ဢေႃႈ ... မူဝ်ၶၢဝ် ... မႃးႁႃသိုဝ်ႉပပ်ႉယဝ်ႉသေ ဢၢင်ႈမိူဝ်းၼႆဢိူဝ်ႈ မူဝ်ၶၢဝ်လူးတေၵႂႃႇလႂ်”
“မူဝ်ၵေႃႈ ဢၢင်ႈမိူဝ်းၼင်ႇၵဝ်ႇယဝ်ႉ၊ ပီႈၸၢႆးၶိူဝ်း မႃးၶီႇၵႃး လႄႈ မူဝ်တေမိူဝ်းသူင်ႇပၼ်လႆ”
ၸၢႆးမွၼ်းၶိူဝ်းၵေႃႈ မႃးၶီႇၵႃးၸွမ်းၼၢင်းမူဝ်ၶၢဝ်သေ ၼၢင်းမူဝ်ၶၢဝ် ႁေႃးၶိုၼ်းမႃးပွၵ်ႉပႃႇမႆႉယဝ်ႉ။ ၸၢႆးၶိူဝ်းၸင်ႇထၢမ်ဝႃႈ
“မူဝ်ၶၢဝ် တၼ်းယူႇႁႃႉ မိူဝ်ႈလဵဝ်”
“တၼ်းယူႇ ပီႈၸၢႆးၶိူဝ်း”
“ပေႃးတၼ်းၼႆ ၵိုတ်းၵႃးၵမ်းလူး”
“ၵိုတ်းႁဵတ်းသင်လႃႇ ပီႈၸၢႆးၶိူဝ်း”
“ပီႈၸၢႆးၶိူဝ်း ထွမ်ႇတူၺ်းသဵင်ၵႃးၼႆႉ ဢမ်ႇပေႃးၶႂ်ႈလီဢိူဝ်ႈ ၵွပ်ႈၼႆ မူဝ်ၶၢဝ် မႃးၼင်ႈတၢင်းၼႆႉလႄႈ ပီႈၸၢႆးၶိူဝ်းတေႁေႃႈၸၢမ်းတူၺ်း”
ၼၢင်းမူဝ်ၶၢဝ်ၵေႃႈ သုတ်ႉမႃးၼင်ႈၽၢႆႇၼႆႉသေ ၸၢႆးမွၼ်းၶိူဝ်းလူင်းၵႃးသေ ၶိုၼ်ႈၶီႇ ၽၢႆႇဢၼ်ပိူၼ်ႈႁေႃႈၼၼ်ႉယဝ်ႉ မၼ်းၸၢႆးၸင်ႇယဵပ်ႇတူၺ်းလီႇပႃႇမၼ်းသေ ႁေႃႈၵႃးဢွၵ်ႇၵႂႃႇယဝ်ႉ ၼၢင်းမူဝ်ၶၢဝ် ၸင်ႇထၢမ်ဝႃႈ
“ပီႈၸၢႆးၶိူဝ်း ၶိုၼ်းၽႅဝ်မႃးတူၼ်ႈတီးမိူဝ်ႈလႂ်”
“ၸင်ႇႁႃၽႅဝ်မိူဝ်ႈၵႆႈၼႆႉၵူၺ်း ... ဢၢင်ႈမႃးၶဝ်ႈပွႆးလိူၼ်သိပ်းသွင်မူၼ်းၼႆဢိူဝ်ႈ”
“ပီႈၸၢႆးၶိူဝ်း ပႆႇယၢမ်ႈၶဝ်ႈသေပွၵ်ႈႁႃႉ”
“ယၢမ်ႈၶဝ်ႈယူႇ”
“ၸွင်ႇၵျေႃႇႁိုဝ်”
“ၵျေႃႇယူႇ ၵူၺ်းၵႃႈ ဢမ်ႇပေႃးပဵင်းၸႂ်မူဝ်ၶၢဝ်”
“ပွၵ်ႈၼႆႉလူး ၸွင်ႇတေပဵင်းၸႂ်ႁိုဝ် ပီႈၸၢႆးၶိူဝ်း”
“ၼႂ်းၸႂ်တႄႉ မုင်ႈမွင်းဢၼ်တေပဵင်းၸႂ်သေ ၸင်ႇမႃးယဝ်ႉ မူဝ်ၶၢဝ်”
“ပီႈၸၢႆးၶိူဝ်း တေမႃးၼႆ ႁဵတ်းသင်သမ်ႉဢမ်ႇတႅမ်ႈလိၵ်ႈ မွၵ်ႇလၢတ်ႈမႃးတီႈမူဝ်ၶၢဝ်လႃႇ ... လိၵ်ႈဢၼ်မူဝ်ၶၢဝ်ပၼ်ၵႂႃႇၼၼ်ႉ ၸွင်ႇပီႈၸၢႆးၶိူဝ်းႁပ်ႉလႆႈ”
“ႁပ်ႉလႆႈယူႇ”
“ႁဵတ်းသင် ပီႈၸၢႆးၶိူဝ်း သမ်ႉဢမ်ႇတွပ်ႇလိၵ်ႈမႃးလႃႇ”
“မိူဝ်ႈလိၵ်ႈ မူဝ်ၶၢဝ်ပႆႇၽႅဝ်မႃးၼၼ်ႉ ပီႈၸၢႆးၶိူဝ်းသႂ်ႇမႃး သွင်ၽိုၼ်ၵွၼ်ႇဢိူဝ်ႈ ဢမ်ႇၽႅဝ်တီႈမူဝ်ၶၢဝ်ႁႃႉ”
ၼၢင်းမူဝ်ၶၢဝ် လႅၼ်ဝႃႈ
“ဢမ်ႇၽႅဝ်လူင် ... ပီႈၸၢႆးၶိူဝ်းတႅမ်ႈမႃးတႄႉတႄႉယူႇႁႃႉ”
“တႅမ်ႈမႃးတႄႉဢိူဝ်ႈ မူဝ်ၶၢဝ်”
ၸၢႆးမွၼ်းၶိူဝ်းသိုပ်ႇႁေႃႈၵႃးသေ ၽႅဝ်မႃးၼိူဝ်သဵၼ်ႈတၢင်း တေဢွၵ်ႇၵႂႃႇဝဵင်းလွႆလႅမ်ၼၼ်ႉယဝ်ႉ မၼ်းသိုပ်ႇႁေႃႈဢွၵ်ႇဝဵင်းမႃးယူႇ ၼၢင်းမူဝ်ၶၢဝ်ၸင်ႇထၢမ်ဝႃႈ
“ပီႈၸၢႆးၶိူဝ်း တေႁေႃႈၵႂႃႇတၢင်းလႂ်ၼႆႉ”
“ဢၢင်ႈမိူဝ်းလွႆလႅမ်ၼႆဢိူဝ်ႈ ဢမ်ႇၶႂ်ႈၸွမ်းႁႃႉ”
ၼၢင်းမူဝ်ၶၢဝ် ယုမ်ႉၵမ်းၼိုင်ႈသေ
“ဢမ်ႇၶႂ်ႈၸွမ်း”
“ပေႃးဢမ်ႇၸွမ်းၵေႃႈ ဝႅၼ်လူင်းၵႃးလႄႈ”
“တႄႉႁႃႉ ပီႈၸၢႆးၶိူဝ်း”
“တႄႉဢိူဝ်ႈ”
ၼၢင်းမူဝ်ၶၢဝ်ၵေႃႈ ၽုၺ်ႇၽၵ်းတူၵႃးသေ ႁဵတ်းၵဵင်ႈဢၢင်ႈဝႅၼ်တူၵ်းၵႃးယဝ်ႉ၊ ၸၢႆးမွၼ်းၶိူဝ်းထၢင်ႇတႄႉလႄႈ မၼ်းၼႅတ်ႈ ၵိုတ်းၵႃးသေ ၸၼ်ဢဝ်မိုဝ်းၼၢင်းမူဝ်ၶၢဝ်ယဝ်ႉ
“ႁေႉ မူဝ် ယႃႇပေဝႅၼ် ပီႈၸၢႆးၶိူဝ်းလႃႈလီဝႃႈၵူၺ်းဢိူဝ်ႈ”
“ယူဝ်ဝႃႈ ပီႈၸၢႆးၶိူဝ်းၸႂ်ႉဝႅၼ်တႄႉတႄႉၼႆ ဢမ်ႇၸႂ်ႈႁႃႉ”
“ဢမ်ႇၸႂ်ႈၵူၺ်း ပီႈၸၢႆးၶိူဝ်းလၢတ်ႈယွၵ်ႇလဵၼ်ႈၵူၺ်း ဢိူဝ်ႈ”
“ၸၢၵ်ႈၵႃး လီယဝ်ႉႁႃႉ ပီႈၸၢႆးၶိူဝ်း”
“လီယဝ်ႉ ... တိုၼ်းဢမ်ႇပဵၼ်သင်လူင်”
ၼၢင်းမူဝ်ၶၢဝ် လႆႈႁူႉဝႃႈ ၸၢႆးမွၼ်းၶိူဝ်းလႅၼ်မၼ်းလႄႈ မၼ်းလႄႈ မၼ်းၸင်ႇၸၼ်မိုဝ်းမၼ်းသေ ထုပ်ႉႁူဝ်မႃႇ ၸၢႆးမွၼ်းၶိူဝ်းယူႇယဝ်ႉ။
“ပီႈၸၢႆးၶိူဝ်းမေႃလႅၼ်”
ၸၢႆးမွၼ်းၶိူဝ်း ၶိုၼ်းၺွပ်းမိုဝ်းၼၢင်းမူဝ်ၶၢဝ်ဝႆႉသေ
“မူဝ်ၶၢဝ်ၵေႃႈ မေႃလႅၼ်ၼင်ႇၵဝ်ႇယဝ်ႉ”
“လႅၼ်ၸိူင်ႉႁိုဝ်”
“ဢၼ်ပီႈၸၢႆးၶိူဝ်းတႅမ်ႈလိၵ်ႈမႃးၼၼ်ႉ မူဝ်ႁပ်ႉလႆႈယူႇ ဢမ်ႇၸႂ်ႈႁႃႉ”
“ဢမ်ႇႁပ်ႉလႆႈ ပဵၼ်လိၵ်ႈသင် ပီႈၸၢႆးၶိူဝ်း”
“ပဵၼ်လိၵ်ႈသင်ၼႆၵေႃႈ မူဝ်ပေႃးလႆႈတူၺ်းယဝ်ႉယဝ်ႈ ဢမ်ႇၸႂ်ႈႁႃႉ”
“ဢူဝ် ... မူဝ်ဢမ်ႇႁူႉ ပွႆႇမိုဝ်းမူဝ်လႄႈ ပီႈၸၢႆးၶိူဝ်း”
“ဢမ်ႇပွႆႇလႆႈ”
ၸၢႆးမွၼ်းၶိူဝ်း ၸၼ်ဢဝ်မိုဝ်းၼၢင်းမူဝ်ၶၢဝ်မႃးၸူးမၼ်းသေ
“ဢူဝ် ... ပီႈၸၢႆးၶိူဝ်း ... ပွႆႇလႄႈ”
“မူဝ် ... ႁူႉယူႇႁႃႉ ဢမ်ႇႁူႉၼႆ လၢတ်ႈသိုဝ်ႈသိုဝ်ႈလႄႈ ယႃႇပေလႅၼ် ပေႃးလႅၼ်တႄႉ ဢမ်ႇပွႆႇပၼ်ၵူၺ်း”
“ဢူဝ် ... ပီႈၸၢႆးၶိူဝ်း မူဝ်ဢမ်ႇလႅၼ်”
“ဢမ်ႇလႅၼ်ၸိူင်ႉႁိုဝ်မူဝ် မူဝ်ႁပ်ႉလႆႈ လိၵ်ႈသွင်ၽိုၼ်ၼၼ်ႉယူႇဢမ်ႇၸႂ်ႈႁႃႉ”
ၼၢင်းမူဝ်ၶၢဝ် ဢမ်ႇတၵ်းသဵင် မၼ်းၼၢင်းလီဢၢႆသေ ၵူမ်ႈၼႃႈယူႇ ၸၢႆးမွၼ်းၶိူဝ်းယိပ်း ႁူဝ်မႃႇမၼ်းၼၢင်း တင်းသွင်ၽၢႆႇသေ
“မူဝ် ... လၢတ်ႈလူး ... မူဝ်ႁပ်ႉလႆႈယူႇ ဢမ်ႇၸႂ်ႈႁႃႉ”
ၼၢင်းမူဝ်ၶၢဝ်ၵေႃႈ ႁႅၼ်တူၺ်းၼႃႈ ၸၢႆးၶိူဝ်းသေ ငွၵ်းႁူဝ်ၼႄၵမ်းၼိုင်ႈယဝ်ႉ ၸၢႆးမွၼ်းၶိူဝ်း ၸင်ႇၶိုၼ်းထၢမ်ဝႃႈ
“မူဝ် ... ၽၵ်းတူတၢင်းႁၵ်ႉမၢၵ်ႇႁူဝ်ၸႂ်မူဝ်ၼၼ်ႉ ၸွင်ႇတေၽုၺ်ႇပၼ် ပီႈၸၢႆးၶိူဝ်းလႆႈႁိုဝ်”
မၼ်းၼၢင်းတေႁဵတ်းႁိုဝ်တွပ်ႇၵေႃႈ မၼ်းၼၢင်းဢမ်ႇ ၸၢင်ႈလၢတ်ႈဢွၵ်ႇသူပ်းမၼ်းလႆႈငၢႆႈငၢႆႈ၊ မၼ်းၼၢင်းၵူမ်ႈၼႃႈသေ တေလၢတ်ႈသင်တႄႉၵေႃႈဢမ်ႇႁူႉ။ သီႇသူပ်းဢွၼ်ႇမၼ်းၼၢင်း တူင်ႉၼိုင်ယူႇသေတႃႉ ဢမ်ႇပဵၼ်ၶေႃႈၵႂၢမ်းသင်ဢွၵ်ႇမႃး ၸၢႆးမွၼ်းၶိူဝ်းၵေႃႈ ႁူဝ်ၸႂ်တွတ်ႇသေ ထၢမ်ဝႃႈ
“မူဝ် ... ၶေႃႈၵႂၢမ်းဢၼ် ပီႈၸၢႆးၶိူဝ်း တေလႆႈသိူဝ်းၸႂ်ၼၼ်ႉ မူဝ်ဢမ်ႇလၢတ်ႈလႆႈယဝ်ႉႁႃႉ ... မူဝ်”
ၼၢင်းမူဝ်ၶၢဝ် ႁူဝ်ၸႂ်တွတ်ႇလင်ႁႅင်းတႄႉတႄႉသေ ၵူမ်ႈၼႃႈ ဝႆႉယူႇ
“မူဝ် ... မူဝ်ဢမ်ႇႁၵ်ႉပီႈၸၢႆးၶိူဝ်းႁႃႉ”
ၼၢင်းမူဝ်ၶၢဝ် ဢမ်ႇတွပ်ႇဢမ်ႇထဵင် ဢမ်ႇတၵ်းသဵင်
“မူဝ် ... မူဝ် ႁၵ်ႉပီႈၸၢႆးၶိူဝ်းယူႇႁႃႉ”
ၼၢင်းမူဝ်ၶၢဝ် ဢမ်ႇတွပ်ႇဢမ်ႇထဵင် ဢမ်ႇတၵ်းသဵင်
“မူဝ် ... ၵွပ်ႈသင်မူဝ်ဢမ်ႇတၵ်းသဵင်လႃႇ”
ၼၢင်းမူဝ်ၶၢဝ် ၸင်ႇႁႅၼ်တူၺ်းၼႃႈ ၸၢႆးမွၼ်းၶိူဝ်းသေ လၢတ်ႈဝႃႈ
“မူဝ် ... ဢမ်ႇမေႃလၢတ်ႈသင်ယဝ်ႉ ပီႈၸၢႆးၶိူဝ်း”
“ပေႃးမူဝ်ဢမ်ႇမေႃလၢတ်ႈၼႆ ပီႈၸၢႆးၶိူဝ်းတေသွၼ်ပၼ်ၼႃႈ”
“တေသွၼ်ပၼ်ၸိူင်ႉႁိုဝ် ပီႈၸၢႆးၶိူဝ်း”
“ပႂ်ႉဝႃႈၸွမ်းလႄႈၼႃႈ”
ၶႃသွင်ၵေႃႉ ယၵ်ႉတူၺ်းၼႃႈၵၼ်သေ ၸၢႆးၶိူဝ်းၸင်ႇဝႃႈ
“မူဝ် ... ဝႃႈၸွမ်းလႄႈ”
ၼၢင်းမူဝ်ၶၢဝ်ၵေႃႈ ယုမ်ႉသေဝႃႈၸွမ်းၵမ်းလဵဝ်
“မူဝ်ဝႃႈၸွမ်းလႄႈ”
“ဢူဝ် ... မူဝ်ၵမ်ႉၵွၼ်ႇလေႃႇ”
“ဢူဝ် ... မူဝ်ၵမ်ႉၵွၼ်ႇလေႃႇ”
“မူဝ်ၵေႃႈ”
“မူဝ်ၵေႃႈ”
“ႁၵ်ႉယူႇ”
“ႁၵ်ႉ ... ဢူဝ် ... မူဝ်ဢမ်ႇမေႃလၢတ်ႈ”
ၸၢႆးမွၼ်းၶိူဝ်းၵေႃႈ ၸၼ်ဢဝ်တူဝ်ႁၢင်ႈလီဢွၼ်ႇ ၼၢင်းမူဝ်ၶၢဝ် ၶဝ်ႈမႃးၼႂ်းၵႄႈဢူၵ်းမၼ်းသေ ၵွတ်ႇဝႆႉႁႅင်းႁႅင်း ၼၢင်းမူဝ်ၶၢဝ်ၵေႃႈ ဢမ်ႇၽိုတ်ႉဢွၵ်ႇ ၸၢႆးမွၼ်းၶိူဝ်းၸင်ႇဝႃႈ
“မူဝ်လၢတ်ႈလႄႈ ပီႈၸၢႆးၶိူဝ်းၶႂ်ႈငိၼ်းၼႅၼ်ႇယဝ်ႉ”
“လၢတ်ႈၸိူင်ႉႁိုဝ် ပီႈၸၢႆးၶိူဝ်း”
“ႁၵ်ႉယူႇ ၼႆၼၼ်ႉဢိူဝ်ႈ”
“တိုၵ်ႉလူဝ်ႇလႆႈလၢတ်ႈယူႇႁႃႉ ... ပီႈၸၢႆးၶိူဝ်း”
“လူဝ်ႇလႆႈလၢတ်ႈဢိူဝ်ႈမူဝ် ... ႁူပီႈၸၢႆးၶိူဝ်း ၶႂ်ႈငိၼ်းၼႅၼ်ႇယဝ်ႉ”
ၸၢႆးမွၼ်းၶိူဝ်း ဢဝ်ႁူမၼ်းၵိူင်းၸူးႁိမ်းသူပ်း ၼၢင်းမူဝ်ၶၢဝ်သေ ပႂ်ႉထွမ်ႇယူႇ
“မူဝ်ဢမ်ႇမေႃလၢတ်ႈယူဝ်ႉ ပီႈၸၢႆးၶိူဝ်း တႃႉလီဢၢႆလႃႈ”
“မေႃၼႅၼ်ႇယဝ်ႉ ... လီဢၢႆသင် ... လၢတ်ႈလႄႈမူဝ်”
ၼၢင်းမူဝ်ၶၢဝ်ၵေႃႈ ဢဝ်သူပ်းမၼ်းသုတ်ႉၸူးၸမ်ႁူ ၸၢႆးမွၼ်းၶိူဝ်းသေ လၢတ်ႈဢွၵ်ႇသဵင်လွႆးလွႆး ၼင်ႇၼႆယဝ်ႉ
“မူဝ်ၵေႃႈ ႁၵ်ႉႁၵ်ႉပီႈၸၢႆးၶိူဝ်းတႄႉတႄႉယဝ်ႉ ပီႈၸၢႆးၶိူဝ်း”
လႆႈငိၼ်းသဵင်လၢတ်ႈလွႆးၼင်ႇၼၼ် ၸၢႆးမွၼ်းၶိူဝ်း ပဵၼ်ဢၼ်ၸူမ်းသိူဝ်းၵႂႃႇတႄႉတႄႉ မၼ်းလွမ်တူၺ်းၼႃႈၵေႃႉႁၵ်ႉမႂ်ႇမႂ်ႇမၼ်း ၼၢင်းမူဝ်ၶၢဝ်သေ လၢတ်ႈဝႃႈ
“မူဝ် ... ပီႈၸၢႆးၶိူဝ်းသိူဝ်းၸႂ် ပေႃးဢမ်ႇမီးတီႈတႅၵ်ႈယဝ်ႉ သူပ်းႁၢင်ႈလီဢွၼ်ႇမူဝ်ၼၼ်ႉ မေႃလၢတ်ႈၵႂၢမ်းဝၢၼ်ႁူၵျႃႉ”
ၸၢႆးမွၼ်းၶိူဝ်း လၢတ်ႈၼင်ႇၼႆသေ ၶိုၼ်းၵွတ်ႇဢဝ်ၼၢင်းမူဝ်ၶၢဝ်သေ ၸုပ်ႇၼူမ်သီႇသူပ်းလႅင်ၶွင်ႇဢွၼ်ႇ ၼၢင်းမူဝ်ၶၢဝ်ယူႇ၊ သူပ်းဢွၼ်ႇၶႃသွင်ၵေႃႉ တေႃႉသိုပ်ႇၵပ်းၵၼ်ၵႂႃႇ ၼင်ႇၼၼ် ၵႅမ်ႈၶႃ သွင်ၵေႃႉၵေႃႈ လွၵ်းၵႂႃႇၼင်ႇၵၼ် တႃၶႃသွင်ၵေႃႉၵေႃႈလပ်းမွႆႈၵႂႃႇ ၼင်ႇၵၼ် သဵင်ႁူဝ်ၸႂ်ၶႃသွင်ၵေႃႉၼၼ်ႉၵေႃႈ တွတ်ႇလင်ယွၼ်ႈ ထိုင်ၵၼ်ယူႇ
“မူဝ် ... ၸွင်ႇသိူဝ်းၸႂ်ႁိုဝ်”
ၼၢင်းမူဝ်ၶၢဝ်ယုမ်ႉႁၢင်ႈလီသေ မၼ်းၼၢင်းဝႆႁူဝ်ၼႄယူႇ
“ဢမ်ႇသိူဝ်းၸႂ်ပီႈၸၢႆးၶိူဝ်း”
“ပဵၼ်သင်လႃႇ”
“ပဵၼ်ႁူဝ်ၸႂ်တွတ်ႇဢိူဝ်ႈ”
“ပေႃးႁူဝ်ၸႂ်တွတ်ႇၼႆ ယႃႇပေၵွတ်ႇပီႈၸၢႆးၶိူဝ်းယဝ်ႉလေႃႇ”
ၼၢင်းမူဝ်ၶၢဝ် လီဢၢႆၵႂႃႇသေ မၼ်းၼၢင်းတင်ႈၸႂ်ဢီးတူဝ် ၸၢႆးမွၼ်းၶိူဝ်းဝူင်ၵႂႃႇတီႈ ၸီႇယႃႇတၢႆႇၵႃးၼၼ်ႉယဝ်ႉ၊ ၸၢႆးမွၼ်းၶိူဝ်း ၵေႃႈသိူဝ်းၼူဝ်ယုမ်ႉၶူဝ်သေ ၽုၺ်ႇၸၢၵ်ႈၵႃးႁေႃးၵႃးၵႂႃႇယူႇ မၼ်းၼၢင်းၶုၵ်းၸႂ်လႆႈ ၵႅတ်ႉသႅတ်ႉၼႂ်းၵႃးၼၼ်ႉလႄႈ မၼ်းၽုၺ်ႇၵႂၢမ်းသေ ႁေႃႈၵႃးၵႂႃႇယူႇ ၼၢင်းမူဝ်ၶၢဝ်ၵေႃႈ သုတ်ႉမႃးၸူးၸၢႆးမွၼ်းၶိူဝ်း ဢဝ်ႁူဝ်မၼ်းဢိင်ၸၢႆးၶိူဝ်းသေ ၶႃသွင်ၵေႃႉ မေႃၵႂၢမ်းၸွမ်းၵၼ်ယူႇ မွၵ်ႇတၢင်းႁၵ်ႉၶႃ ပိုတ်ႇၵီႈပၼ်ၵၼ် ပဵၼ်ဢၼ်ႁၢင်ႈလီတႄႉတႄႉလႄႈ ၵေႃႉၼိုင်ႈတင်းၵေႃႉၼိုင်ႈ ယၵ်ႉတူၺ်းၼႃႈၵၼ် ပေႃးဢမ်ႇၸၢင်ႈ ဢိမ်ႇယဝ်ႉ
“ပီႈၸၢႆးၶိူဝ်း တေသိုပ်ႇႁေႃႈၵႂႃႇလွႆလႅမ်ႁႃႉ”
“ၸႂ်ႈဢိူဝ်ႈ ... မူဝ်တေၸွမ်းႁႃႉ”
“ဢမ်ႇၸွမ်း”
“ပေႃးဢမ်ႇၸွမ်းၵေႃႈ ဝႅၼ်လူင်းၵႃႈလႄႈ”
“ဢမ်ႇဝႅၼ်”
“ၵွပ်ႈသင်လႃႇ”
“ၵွပ်ႈပီႈၸၢႆးၶိူဝ်း ၵွတ်ႇမူဝ်ဝႆႉလႄႈ မူဝ်ဢမ်ႇၸၢင်ႈဝႅၼ် လႄႇဢိူဝ်ႈ... ပေႃးၶႂ်ႈႁႂ်ႈဝႅၼ်ၵေႃႈ ပွႆႇပၼ်လႄႈ”
“ဢမ်ႇပွႆႇလႆႈဝႃႇ ... လူဝ်ႇလႆႈမိူဝ်းၼႄမႄႈႁဝ်း တီႈလွႆလႅမ် ဢိူဝ်ႈ”
“တေႁဵတ်းႁိုဝ်ၼႄ”
“ဢေႃႈ ... မႄႈ ... ၼႆႉပဵၼ်လုၵ်ႈပႂ်ႉႁၢင်ႈလီမႄႈႁဝ်းဢိူဝ်ႈ ၼႆဝႃႇ”
“ၶိၵ််း ၶိၵ်း ... တႃႇလၢႆဢီလီဢၢႆပိူၼ်ႈ မူဝ်ဢမ်ႇပႆႇၶႂ်ႈပဵၼ်ၵွၼ်ႇ”
“ၶႂ်ႈပဵၼ်သင်လႃႇပေႃးၼႆ”
“တိုၵ်ႉၶႂ်ႈပဵၼ် သၢဝ်ႁၵ်ႉပီႈၸၢႆးၶိူဝ်းၵူၺ်းၵွၼ်ႇ ၵွပ်ႈၼႆဝၢႆႇ ႁူဝ်ၵႃးလႄႈ မူဝ်ၶႂ်ႈမိူဝ်းယဝ်ႉ”
ၸၢႆးမွၼ်းၶိူဝ်းၵေႃႈ ဝၢႆႇႁူဝ်ၵႃးသေ ၵိုတ်းၵႃးဝႆႉယဝ်ႉ
“ပီႈၸၢႆးၶိူဝ်း ... ၵိုတ်းၵႃးႁဵတ်းသင်လႃႇ”
“ဢေႃ ... မူဝ်ၵေႃႉႁေႃႈၵႃးမိူဝ်းလႄႈ ပီႈၸၢႆးၶိူဝ်း တေၶီႇ မိူဝ်းၸွမ်းမူဝ်ဢိူဝ်ႈ”
ၶႃၽုၺ်ႇၽၵ်းတူၵႃးဢွၵ်ႇမႃးၺႃးၵၼ် တီႈႁူဝ်ၵႃးယဝ်ႉ။ ၽွင်းၶႃသွင်ၵေႃႉဢွၵ်ႇမႃးၼၼ်ႉ ယူႇၽၢႆႇၼႆႉယုမ်ႉတေႃႇၵၼ်သေ ဢႅၼ်ႇမႃးၵွတ်ႇၵၼ် ပၼ်တီႈမၵ်းမၢႆတွၵ်ႇၸုမ်ႈတၢင်းႁၵ်ႉၵၼ်ယူႇ ၸွမ်းႁိမ်းႁွမ်းၸိူဝ်းၼၼ်ႉ ပဵၼ်ဢၼ်ႁၢင်ႈလီဝႆႉၵူႈဢၼ်ယဝ်ႉ။ ၽွင်းၼၼ်ႉ သဵင်ၵႃးမႃးလမ်းၼိုင်ႈလႄႈ ၼၢင်းမူဝ်ၶၢဝ်ၸင်ႇဝႃႈ
“ပီႈၸၢႆးၶိူဝ်း ၸွင်ႇငိၼ်းသဵင်ၵႃးႁိုဝ်”
“ငိၼ်းဢိူဝ်ႈ”
ၶႃသွင်ၵေႃႉၽၢတ်ႇၵၼ်သေ ၶိုၼ်ႈမႃးၶိုၼ်ႈၵႃးယဝ်ႉ ၽွင်းၶႃၽႅဝ်ၼိူဝ်ၵႃးၼႆ ၵႃးလမ်းၼၼ်ႉ တႆးၵေႃႉၶႃ ၸၢႆးၶမ်းၵုၼ်ႁိင်းၵေႃႈ ၸွမ်းမႃးယဝ်ႉ ၸၢႆးၶမ်းတွင်းၵႃးၼၢင်းမူဝ်ၶၢဝ်ၶဝ်လႄႈ ၽိူဝ်ႇမၼ်းဝၢႆႇ တူၺ်းလီလီ လႆႈႁၼ်ၶႃသွင်ၵေႃႉလႄႈ မၼ်းၸင်ႇယုၵ်ႉမိုဝ်းမၼ်း ၶွၼ်ၼိုင်ႈ ပူၵ်းသွင်ၼိဝ်ႉ
“ႁေႉ ... ၸၢႆးၶိူဝ်း ... မူဝ်ၶၢဝ် ... ပိတ်ႉ(ၸ်)ၽူး”
ၶႃသွင်ၵေႃႉလႆႈငိၼ်းၼင်ႇၼၼ် ၶႃၼႅတ်ႈတူၺ်းၵေႃႉ ဢၼ်တၵ်ႉၶႃၼၼ်ႉယူႇ လႆႈႁူႉဝႃႈ ပဵၼ်ၸၢႆးၶမ်းလႄႈ ၸၢႆးၶိူဝ်း ၸင်ႇယုၵ်ႉမိုဝ်းၼႄၸၢႆးၶမ်း ဢၼ်ၶီႇၵႃးပူၼ်ႉၶႃၵႂႃႇၵႆၵႆၼၼ်ႉယဝ်ႉ၊ ၼၢင်း မူဝ်ၶၢဝ်ၸင်ႇဝႃႈ
“ပီႈၸၢႆးၶိူဝ်း ... ပဵၼ်ပီႈၸၢႆးၶမ်း ဢမ်ႇၸႂ်ႈႁႃႈၼၼ်ႉ”
“ၸႂ်ႈဢိူဝ်ႈ မူဝ်”
“မၼ်းႁၼ်မူဝ်ၶဝ်ၵႂႃႇယဝ်ႉယူဝ်ႉၼေႃ”
“ႁၼ်ၵေႃႈ ၸၢင်ႈပဵၼ်သင်လႃႇ”
“မူဝ် ... လီဢၢႆဢိူဝ်ႈ”
“လီဢၢႆႁဵတ်းသင် တၢင်းႁၵ်ႉဢၼ်ဝႃႈၼႆႉ ဢမ်ႇၸႂ်ႈတၢင်းဢၢႆၵူၺ်း”
“တၢင်းႁၵ်ႉဢၼ်ဝႃႈၼၼ်ႉ ပဵၼ်သင်လႃႇပီႈၸၢႆးၶိူဝ်း”
“တၢင်းႁၵ်ႉဢၼ်ဝႃႈၼၼ်ႉ မီးလၢႆမဵဝ်းသေတႃႉ ယၢမ်းလဵဝ်ဢၼ်ပီႈၸၢႆးၶိူဝ်းႁူႉတႄႉ ပဵၼ်မဵဝ်းၼိုင်ႈဢိူဝ်ႈ မူဝ်”
“မဵဝ်းႁိုဝ် ပီႈၸၢႆးၶိူဝ်း”
“ထွမ်ႇလႄႈမူဝ် ပီႈၸၢႆးၶိူဝ်းတေၼႄ”
ၸၢႆးၶိူဝ်း သုတ်ႉမႃးယူႇႁိမ်းႁူ ၼၢင်းမူဝ်ၶၢဝ် ဢဝ်မိုဝ်းမၼ်း ၶွၼ်ၼိုင်ႈၵွတ်ႇပၢႆႉၶေႃးၼၢင်းမူဝ်ၶၢဝ်ယူႇ။ ၼၢင်းမူဝ်ၶၢဝ်ၵေႃႈထၢင်ႇ ဝႃႈၸၢႆးမွၼ်းၶိူဝ်း တေလွမ်သွပ်ႉသႅပ်ႉ တီႈႁူမၼ်းၼၢင်းၼႆယူႇ ၵူၺ်းၵႃႈ ၸၢႆးမွၼ်းၶိူဝ်းဢမ်ႇတၵ်းသဵင်သင် မၼ်းၸၢႆးလၵ်ႉလွမ်ၸုပ်ႇ ၼူမ်ႁွမ်ႁွမ် ပၼ်ၵႅမ်ႈလွၵ်း ဢွၼ်ၼၢင်းမူဝ်ၶၢဝ် ၵမ်းၼိုင်ႈၽႂ်းၽႂ်းယဝ်ႉ။
“ပျူတ်ႉ”
“ဢူဝ် ... ပီႈၸၢႆးၶိူဝ်းၼႆႉ ယူဝ်ဝႃႈတေလၢတ်ႈသင်ၼႆၼႃး ၵႂႃႇလူး”
မၼ်းၼၢင်း ဢဝ်တႃမိုဝ်းၼုမ်ႇၼုမ်ႇဢွၼ်ႇမၼ်းၼၢင်း ဢီးၼႃႈ ၽၢၵ်ႇ ၸၢႆးၶိူဝ်းပႅတ်ႈသေ ႁေႃႈၵႃးမႃးမိူဝ်း မူၼ်ႈမူၼ်ႈသိူဝ်းသိူဝ်းယဝ်ႉ ၼၢင်း မူဝ်ၶၢဝ် မႃးသူင်ႇၸၢႆးၶိူဝ်းသေ ပွၵ်ႈမႃးမိူဝ်ႈႁိူၼ်းမၼ်းယဝ်ႉ။
မၼ်းၼၢင်းႁေႃႈၵႃး ၶဝ်ႈမႃးၼႂ်းဝၢင်းႁိူၼ်းၶဝ်သေ ၽွင်းမိူဝ်ႈမၼ်းလူင်းၵႃးမႃးၼၼ်ႉ မၼ်းၼၢင်းလႆႈႁၼ် ဢူႈၶဝ်တိုၵ်ႉႁူတ်း သူၼ်မွၵ်ႇယူႇလႄႈ ဢူႈၶဝ်ၸင်ႇထၢမ်မၼ်းၼၢင်းယဝ်ႉ။
“လုၵ်ႈယိင်း”
“ဢေႃႈ”
“မႃးၼႆႈၵမ်းလူး ... လုၵ်ႈယိင်းၵႂႃႇလႂ်မႃးၼႆႉ”
“ၵႂႃႇတီႈတႆးၵေႃႉလုၵ်ႈယိင်းဢေႃႈ”
“ပႄႉၵႂႃႇႁိုင်လႃႇ”
“ဢေႃႈ ... မူဝ်ၵေႃႈ ... ဢၢင်ႈမႃးမိူဝ်ႈၸဵမ်ၸဝ်ႉၼင်ႇၵဝ်ႇ ဢေႃႈ ... ၵူၺ်းၵႃး မူဝ်လႄႈ တႆးၵေႃႉမူဝ်ၶဝ် ဢုပ်ႇၵၼ်ပႆႇယဝ်ႉလႄႈ ၸင်ႇႁိုင်ၵႂႃႇဢေႃႈ”
“ဢိူဝ်ႈ ... ဢိူဝ်ႈ ၵႂႃႇၵိၼ်ၶဝ်ႈလုၵ်ႈယိင်းလႄႈ ႁဝ်းတႄႉ ၵိၼ်ယဝ်ႉယဝ်ႈ”
“ဢေႃႈ ... ဢေႃႈ ”
ၼၢင်းမူဝ်ၶၢဝ်တႄႉ မၼ်းၼၢင်းဢမ်ႇတွင်ႉမႆႈၶဝ်ႈသင်ယဝ်ႉ။ မိူဝ်ႈၼႆႉ မၼ်းၼၢင်းႁဵတ်းႁိုဝ်လွမ်လွမ် သိူဝ်းၸႂ်ဝႆႉၼႆၵေႃႈမၼ်း ၼၢင်းဢမ်ႇမေႃလၢတ်ႈ ဢမ်ႇၸၢင်ႈလၢတ်ႈ၊ မၼ်းၼၢင်းၵူၺ်းတေႃႉတႄႉ ၵိၼ်ၶဝ်ႈလႆႈဢိတ်းၼိုင်ႈၵူၺ်း၊ ဝၢႆးသေၵိၼ်ၶဝ်ႈယဝ်ႉ မၼ်းၼၢင်း ၶဝ်ႈမႃးၼႂ်းလုၵ်းၼွၼ်းမၼ်းသေ မႃးဝူၼ်ႉၶိုၼ်း ဢၼ်ပဵၼ်ပူၼ်ႉမႃးၸိူဝ်းၼႆႉၼၼ်ႉယူႇ။