မွၵ်ႇလူင်ႇလဵဝ်/တွၼ်ႈသၢဝ်းသီႇ
လူမ်းၽတ်ႉထွင်းပဝ်ႇ - မႂ်ႇၵဝ်ႇမႂ်ႁႅင်ႈ
ႁူင်ႈလႅင်ႈတူၵ်းလိၼ် - ပိဝ်မိၼ်ၸွမ်းပၢင်ႇ
မႂ်ႁၢင်ႇတူၼ်ႈမႆႉ - ႁႅင်ႈဝႆႉၽေႃးၽေႃး
တွင်ႉလေႃးႁွင်ႉၶၼ် - ပၼ်သဵင်မွၵ်ႇၸႅင်ႈ
ၶၢဝ်းႁႅင်ႈထိုင်မႃးၼၼ်ႉယူႇ။
မွၵ်ႇၵုမ်ႈမုင်းသုမ်ႇ - ၽူၼ်ဢုမ်ႇတူၵ်းႁူဝ်ႈ
ၸွတ်ႇတူဝ်ႈၸေႈတိူင်း - ၼႃႈမိူင်းမိုတ်းၽႅၵ်ႇ
ၾႃႉတႅၵ်ႇသဵင်မေႃး - ပေႃးလင်ၸွတ်ႇၼၼ်ႈ
မၵ်းမၼ်ႈၼႄပၼ် - လွင်ႈဢၼ်ၽႅဝ်တိုဝ်ႉ
ၶၢဝ်းႁိုဝ်ႉၶၢဝ်းၾူၼ်ၼၼ်ႉယူႇ။
မူၺ်ၼၢႆးတူၵ်းႁူင်ႈ - ၸွမ်းၵႄႈဝူင်ႈလွႆ
လူမ်းၵွႆထွင်းပဝ်ႇ - မၢင်ၽဝ်ႇၵတ်းလိူဝ်
တီႈၼိူဝ်သၼ်လွႆ - မွၵ်ႇၵွၼ်ၵွႆၵီႈ
ပဵၼ်တီႈသိူဝ်းၸႂ် - ၽႂ်ၵေႃႈပဵၼ်ဝတ်း
ႁူႉထိုင်ႁွတ်ႈၶၢဝ်းၵတ်းၼၼ်ႉယူႇ။
ၶၢဝ်းယၢမ်းသၢမ်ဢၼ် လႅၵ်ႈလၢႆႈပၼ်ႇပုတ်ႈၵၼ်မႃးၼင်ႇၼႆ ယၢမ်းလဵဝ် ၸၢႆးမွၼ်းၶိူဝ်း ၸၢႆးၶမ်း ၼၢင်းမူဝ်ၶၢဝ် ၼၢင်းၸၢမ်သႅင်း ၶဝ်သီႇၵေႃႉ သမ်ႉပေႃးပဵၼ် လုၵ်ႈႁဵၼ်းၸၼ်ႉၸွမ်ပီလိုၼ်းသုတ်းသေ တႄႇၸဵမ်မိူဝ်ႈပီသၢမ်ၼၼ်ႉ ၶဝ်လႆႈမႃးၶိုၼ်ႈတီႈဝဵင်းလိူဝ်ႇယဝ်ႉ။
ၸွမ်းၼင်ႇယူႇလူၺ်ႈ လွင်ႈလႅၵ်ႈလၢႆႈလႄႈ ၸၢႆးၶမ်းလႄႈ ၼၢင်းၸၢမ်သႅင်းၵေႃႈ လႅၵ်ႈလၢႆႈပဵၼ်ၸူႉႁၵ်ႉၵၼ်ၵႂႃႇ မိူဝ်ႈပီသၢမ်ၼၼ်ႉယဝ်ႉ။ ၵွပ်ႈၼႆ ၶဝ်သီႇၵေႃႉၼႆႉ ၵႂႃႇလႂ်ၵေႃႈၸွမ်းၵၼ် ဢမ်ႇႁၼ် ဝၼ်းယၢၼ်၊ လွင်ႈတၢင်းႁၵ်ႉၶဝ်ၵေႃႈ ပဵၼ်ဢၼ်မၼ်ႈၵိုမ်းဝႆႉယူႇ တႄႉတႄႉ၊ မွၵ်ႇတၢင်းႁၵ်ႉၶဝ်ၵေႃႈ မႃးသိုပ်ႇဢဝ်ႁႅင်းပိုတ်ႇၵီႈႁၢင်ႈလီ တီႈၼႂ်းဝၢင်းၸၼ်ႉၸွမ်ဝဵင်းလိူဝ်ႇယူႇ။
ၸဵမ်မိူဝ်ႈပီသၢမ်ၼၼ်ႉ ၽွင်းမိူဝ်ႈဢိုတ်းႁဵၼ်းၼႆၵေႃႈ ၶဝ်သီႇၵေႃႉၵျေႃႇၵျေႃႇသိူဝ်းသိူဝ်း မႃးမိူဝ်းၸွမ်းၵၼ် မႃးၶိုၼ်ႈႁဵၼ်းၸၼ်ႉၸွမ် ၼႆၵေႃႈ မႃးၸွမ်းၵၼ် လူဝ်ႇတၢင်းၸွႆႈထႅမ်ၸိူင်ႉႁိုဝ်ၼႆၵေႃႈ ၸွႆႈထႅမ်ၵၼ် တေႃႇပေႃးၽႅဝ်ပီသီႇၼႆယဝ်ႉ။
ဝၼ်းၼိုင်ႈ
ၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ်ဢမ်ႇၶိုၼ်ႈႁူင်းႁဵၼ်း ၶႃသွင်ၵေႃႉ မႃးၼင်ႈဢုပ်ႇၵၼ် တီႈၼႂ်းဝၢင်းၸၼ်ႉၸွမ် ၼိူဝ်တင်ႇတႂ်ႈ တူၼ်ႈမႆႉတီႈၼိုင်ႈယူႇ။
“မူဝ်”
“ဢီႈသင် ပီႈၸၢႆးၶိူဝ်း”
“ဢေႃႈ ... ပေႃးပီၼႆႉသုတ်းၼႆ ႁဝ်းတေလႆႈၽၢတ်ႇယၢၼ် ၸၼ်ႉၸွမ်ၼႆႉယဝ်ႉၼေႃႈ”
“ၸႂ်ႈဢိူဝ်ႈ ... ပီႈၸၢႆးၶိူဝ်း မူဝ်ၶဝ် ပေႃးတေလႆႈပွၵ်ႈမိူဝ်း မိူင်းတႆးယဝ်ႉၼေႃ၊ ပီႈၸၢႆးၶိူဝ်း ဢမ်ႇၶႂ်ႈမိူဝ်းမိူင်းတႆးယဝ်ႉႁႃႉ တေႃႈဝႃႈ”
“ၶႂ်ႈမိူဝ်ႈဢိူဝ်ႈမူဝ် ... ၵူၺ်းၵႃႈ ၸမ်တေလႆႈၽၢတ်ႇယၢၼ် ၸၼ်ႉၸွမ်လႄႈ ၼႂ်းၸႂ်ပဵၼ်ဝႆႉမဵဝ်းၼိုင်ႈဢိူဝ်ႈ”
“ပဵၼ်ၸိူင်ႉႁိုဝ် ပီႈၸၢႆးၶိူဝ်း”
“ၸိူဝ်းႁဝ်းပဵၼ်တႆးၵေႃႉၵၼ် ယူႇသဝ်းၵေႃႉတီႈတီႈ လႆႈမႃးႁူႉႁၼ်မိုတ်ႈၵိုဝ်းၵၼ်သေ ဢမ်ႇႁိုင်ဢမ်ႇၼၢၼ်း တေလႆႈပွၵ်ႈသၢႆႇဝၢႆႇမိူဝ်းၶိုၼ်း ဝၢၼ်ႈၽႂ်ႇမိူင်းမၼ်းၼႆလႄႈ ဝူၼ်ႉထိုင်ၼင်ႇၼႆသေ မွင်ၸႂ်ဝႆႉဢိူဝ်ႈ မူဝ်”
“မူဝ်ၵေႃႈပဵၼ်ၸိူင်ႉၼၼ် ၼင်ႇၵဝ်ႇယဝ်ႉ ပီႈၸၢႆးၶိူဝ်း ပိူင်ၼိုင်ႈ ပီႈၸၢႆးၶိူဝ်းၵေႃႈ သမ်ႉတေပူၼ်ႉမိူဝ်းလွႆလႅမ်ပႅတ်ႈမူဝ်လႄႈ မူဝ်ၶႅၼ်းၸႂ်လဵၵ်ႉၶႅၼ်းမွင်ၸႂ်ဝႆႉထႃႈယဝ်ႉ ပီႈၸၢႆးၶိူဝ်း”
“ပီႈၸၢႆးၶိူဝ်းၵေႃႈ ဢမ်ႇၶႂ်ႈၽၢတ်ႇမူဝ်ၼင်ႇၵဝ်ႇ သင်ပဵၼ် လႆႈတႄႉ ၶႂ်ႈယူႇလူၺ်ႈမူဝ်ၼႅၼ်ႇယဝ်ႉမူဝ် ... ဝၢႆးသေယဝ်ႉၸၼ်ႉၸွမ်ၼႆ မူဝ်လႄႈ ပီႈၸၢႆးၶိူဝ်းမိူဝ်းယူႇၸွမ်းၵၼ်ၼေႃႈမူဝ်”
“တိုၵ်ႉၸဝ်ႉဢိတ်ႉၼိုင်ႈယူဝ်ႉ ပီႈၸၢႆးၶိူဝ်း”
“ဢမ်ႇၸဝ်ႉယူဝ်ႉမူဝ် ပီႈၸၢႆးၶိူဝ်းယင်းၵူဝ်တူၵ်းလိုၼ်းၵႂႃႇ ၵွၼ်ႇဢိူဝ်ႈ၊ ဝၢႆးသေၽၢတ်ႇၵၼ် ၵူဝ်မူဝ်ႁၵ်ႉထႅင်ႈၵေႃႉမႂ်ႇဢိူဝ်ႈ၊ ၵွပ်ႈၼႆ ပီႈၸၢႆးၶိူဝ်းဢမ်ႇတမ်းၸႂ်ဢိူဝ်ႈမူဝ်”
“ဢူဝ် ... ပီႈၸၢႆးၶိူဝ်း လိူဝ်သေပီႈၸၢႆးၶိူဝ်း ... မွၵ်ႇတၢင်းႁၵ်ႉ ၼႂ်းၸႂ်မူဝ်ၼႆႉ ပဵၼ်မွၵ်ႇလူင်ႇလဵဝ် ပဵၼ်တႃႇပီႈၸၢႆးၶိူဝ်းၵေႃႉလဵဝ်ၵူၺ်းၼႆ တမ်းၸႂ်သေ ယုမ်ႇလႃႈ ၵပ်းၵၢႆႇလူၺ်ႈ လွင်ႈၼႆႉ မူဝ်ယင်း တႅမ်ႈဝႆႉဝွၵ်းဢွၼ်ႇပုၵ်ႈၼိုင်ႈဢိူဝ်ႈ”
“တႄႉႁႃႉမူဝ် ... ၼႄလူး”
ၼၢင်းမူဝ်ၶၢဝ်ၵေႃႈ ဢဝ်ပပ်ႉဢၼ်မၼ်းတႅမ်ႈဝႆႉၼၼ်ႉ ဢွၵ်ႇမႃးၼႄ ၸၢႆးမွၼ်းၶိူဝ်းယဝ်ႉ ၶႃသွင်ၵေႃႉ ၼင်ႈဢိင်ၵၼ်သေ ၽုၺ်ႇတူၺ်းပပ်ႉဝွၵ်း ၼၢင်းမူဝ်ၶၢဝ်ယူႇ ဝွၵ်းဢွၼ်ႇၼၼ်ႉတႄႉ တႅမ်ႈဝႆႉၼင်ႇၼႆ
“လူင်ႇလဵဝ်ၼႂ်းၸႂ်
ၸိုၼ်ႈသႂ်ၵီႈဢွၵ်ႇ
ႁွင်ႉမွၵ်ႇသီၶၢဝ်
ၼွင်ႉသၢဝ်ဝႆႉပၼ်
တႃႇဢၼ်ႁၵ်ႉ ... ၵေႃႉလဵဝ်ၵူၺ်း”
“ၸွင်ႇၶႅမ်ႉလႅပ်ႈႁိုဝ်ပီႈၸၢႆးၶိူဝ်း”
“ၶႅမ်ႉလႅပ်ႈဢိူဝ်ႈမူဝ် ... မူဝ်သႂ်ႇၸိုဝ်ႈမၼ်းဝႃႈႁိုဝ်လႃႇ”
“မူဝ်ပႆႇလႆႈသႂ်ႇလူင် ... ပီႈၸၢႆးၶိူဝ်းသႂ်ႇပၼ်လႄႈ”
“သႂ်ႇၸိုဝ်ႈဝႃႈ “မွၵ်ႇလူင်လဵဝ်”ၼႆဢမ်ႇလီႁႃႉမူဝ်”
“လီဢိူဝ်ႈ ပီႈၸၢႆးၶိူဝ်း လႅပ်ႈၵၼ်ၵျႃႉ”
“မူဝ်”
“ဢီႈသင် ပီႈၸၢႆးၶိူဝ်း”
“ဢေႃႈ ... မွၵ်ႇတၢင်းႁၵ်ႉမူဝ်ၼၼ်ႉ လိူဝ်သေပီႈၸၢႆးၶိူဝ်း ယႃႇပေပၼ်ၽႂ်ပိတ်းၼႃႈ”
“လိူဝ်သေပီႈၸၢႆးၶိူဝ်းၵေႃႉလဵဝ် ... ဢမ်ႇပၼ်ၽႂ်ပိတ်းၼႆ ယုမ်ႇလႃႈ ... ပီႈၸၢႆးၶိူဝ်းၵေႃႈ ... ယႃႇပေၵႂႃႇႁႃပိတ်းမွၵ်ႇတၢင်ႇလူင်ႇၼႃႈ”
“ဢမ်ႇပိတ်း ... တမ်းၸႂ်လႃႈ”
ၽွင်းၼၼ် ၸၢႆးၶမ်းလႄႈ ၼၢင်းၸၢမ်သႅင်း ၽႅဝ်မႃးတီႈၶႃသေ ၸၢႆးၶမ်းၸင်ႇဝႃႈ
“ယူဝ်ဝႃႈၶိူဝ်သွင်ၵေႃႉ ၵႂႃႇလႂ်ၼႆၼႃး ... ႁႃးၸၢမ်သႅင်း ၵႂႃႇႁႃၶိူဝ် ၶႃသမ်ႉပေႃးၵူၼ်ႉယဝ်ႉ ... ႁွႆးဝႃႈ ၶိူဝ်သွင်ၵေႃႉ မႃးမီးယူႇတီႈၼႆႈ ပႄႉမႃးဢုပ်ႇသင်ၵၼ်လၢႆလၢႆ”
ၼၢင်းမူဝ်ၶၢဝ် ၸင်ႇတွပ်ႇဝႃႈ
“ဢုပ်ႇၵၼ် ၶိူဝ်းတေလႆႈၽၢတ်ႇယၢၼ် ၸၼ်ႉၸွမ်ၼၼ်ႉ ဢိူဝ်ႈ”
“ဢမ်ႇၵႃးၼႆႉၵူၺ်းယူဝ်ႉ”
“ဢမ်ႇၵႃးၼႃး”
“ပႃးလွင်ႈသင်ၵူၺ်းၵူၺ်းဝႃႈ”
ၸၢႆးၶိူဝ်းၸင်ႇတွပ်ႇဝႃႈ
“ၸၢႆးၶမ်းၶိူဝ်သွင်ၵေႃႉၸၢမ်သႅင်း မႃးတီႈၼႆႈၼႆႉ တႃႇမႃး တွင်ႈထၢမ်ႁႃးသွင်ၵေႃႉမူဝ်ႁႃႉ ... ၽႂ်ၸႂ်ႉမႃးထၢမ်”
“ၽႂ်ဢမ်ႇၸႂ်ႉၼင်ႇၵဝ်ႇ ထၢမ်တူၺ်း ဢမ်ႇလႆႈႁႃႈတေႃႈဝႃႈ”
ၼၢင်းမူဝ်ၶၢဝ် ၸင်ႇဝႃႈ
“ပီႈၸၢႆးၶမ်း ၶႂ်ႈထၢမ်ႁႂ်ႈလႆႈၼႆႁႃႉ”
“ဢိူဝ်ႈ ... ၶႂ်ႈထၢမ်ႁႂ်ႈလႆႈၼၼ်ႉယဝ်ႉ”
“ပေႃးၶႂ်ႈထၢမ်ႁႂ်ႈပေႃးလႆႈၼႆတႄႉ ယႃႇပေမႃးထၢမ်မူဝ်လႄႈ ပီႈၸၢႆးၶိူဝ်း ၵႂႃႇထၢမ်တၢင်ႇတီႈလႄႈ”
“ၵႂႃႇထၢမ်တီႈလႂ်လႃႇ”
“ၵႂႃႇထၢမ်တီႈဢူႈမႄႈၸၢမ်သႅင်းၶဝ်လေႃႇ ... ထၢမ်သေ ယွၼ်းဢဝ် ႁႂ်ႈလႆႈပႃးလုၵ်ႈယိင်းၶဝ်ၵမ်းလဵဝ်လႄႈ ၶိၵ်း ၶိၵ်း”
ၼၢင်းၸၢမ်သႅင်း ၸင်ႇလီဢၢႆသေ မၼ်းၼၢင်းယၵ်းလိမ်ႇပၼ် ၶႅၼ်ၼၢင်းမူဝ်ၶၢဝ် ၵမ်းၼိုင်ႈသေယဝ်ႉ၊ ၸၢႆးၶမ်းၸင်ႇၶိုၼ်းဝႃႈ
“ၸၢႆးၶိူဝ်း ... မႂ်းလူးပေႃးယဝ်ႉၸၼ်ႉၸွမ်ၼႆ ဢမ်ႇပႆႇ ထၢမ်ႁႃႉ”
ၼၢင်းမူဝ်ၶၢဝ် ၶိုၼ်းဢဝ်တႃမိုဝ်းမၼ်း ထုပ်ႉႁႅမ်ပၼ် ၸၢႆးၶမ်းၵမ်းလဵဝ်ယဝ်ႉ ၸၢႆးၶမ်းၸင်ႇၶိုၼ်းဝႃႈ
“ႁႄး ႁႄး ... မူဝ်ၶၢဝ်သမ်ႉမႃးႁႅမ် ပီႈၸၢႆးၶမ်းႁဵတ်းသင်လႃႇ”
“ႁႅမ်ႈဢိူဝ်ႈ ... ပီႈၸၢႆးၶမ်း ဝႃႈတီႈမူဝ်ဢမ်ႇၸႂ်ႈႁႃႉ ” “ဢမ်ႇၸႂ်ႈၵူၺ်း”
“ဝႃႈတီႈၽႂ်လႃႇ ပေႃးၼႆ”
“ဝႃႈတီႈ ၸၢႆးၶိူဝ်း ႁႂ်ႈမၼ်းမိူဝ်ႈထၢမ်ၼွင်ႉယိင်း ပီႈၸၢႆးၶမ်း တီႈၵုၼ်ႁိင်းၼႆဢိူဝ်ႈ”
ၼၢင်းမူဝ်ၶၢဝ် ၸင်ႇလွမ်တူၺ်း ၸၢႆးၶိူဝ်းသေထၢမ်ဝႃႈ
“ပီႈၸၢႆးၶိူဝ်း တေမိူဝ်းထၢမ်တႄႉႁႃႉ”
“ဢမ်ႇၸႂ်ႈသင်ၵူၺ်း ... ၸၢႆးၶမ်းလႃႈလီဝႃႈဢိူဝ်ႈ ၼွင်ႉယိင်းမၼ်းၵေႃႈဢမ်ႇမီး”
ၸၢႆးၶမ်းၸင်ႇၶိုၼ်းဝႃႈ
“မီးဢိူဝ်ႈ ... ပဵၼ်ၼၢင်းမူဝ်ၶၢဝ်ၼႆႉၼႃႇ”
ၼၢင်းမူဝ်ၶၢဝ်လီဢၢႆၵႂႃႇသေ မၼ်းဢၢင်ႈႁႅမ်ၸၢႆးၶမ်းထႅင်ႈ ၵူၺ်းၵႃႈ ၸၢႆးၶမ်းၼႅတ်ႈဢႅၼ်ႇပၢႆႈလႄႈ မၼ်းဢမ်ႇတၼ်းႁႅမ် ၼၢင်းမူဝ်ၶၢဝ် ၸင်ႇဝႃႈ
“ဢေႃႈ ... ၸၢမ်သႅင်း ႁဵတ်းသင်မိူဝ်ႈၼႆႉၸၢမ်သႅင်း ယင်းဢမ်ႇတၵ်းသဵင်သင်သေၶေႃႈလႃႇ”
“ဢၢင်ႈလၢတ်ႈၼင်ႇၵဝ်ႇဢိူဝ်ႈ ၵူၺ်းၵႃႈ မူဝ်လၢတ်ႈယင်းပႆႇသုတ်းလႄႈ ၸၢမ်သႅင်း ၸင်ႇဢမ်ႇၸၢင်ႈလၢတ်ႈယဝ်ႉ”
“ဢေႃႈ ... ပွႆးထၢမ်လိၵ်ႈၸမ်ယဝ်ႉ၊ ၶတ်ႈၸႂ် လိၵ်ႈၽႂ်လိၵ်ႈမၼ်းႁႂ်ႈလႆႈလႄႈ ဢၼ်ၸၢမ်သႅင်းၶႂ်ႈလၢတ်ႈတႄႉ ပဵၼ်ဢၼ်ၼႆႉ ၵူၺ်းၼင်ႇၵဝ်ႇ”
ၸၢႆးမွၼ်းၶိူဝ်းၸင်ႇၶိုၼ်းဝႃႈ
“ပီၼႆႉ ပေႃးပွႆးထၢမ်လိၵ်ႈယဝ်ႉၼႆ ႁဝ်းတေမိူဝ်းႁူမ်ႈၵၼ် ဝၼ်းလႂ်”
“ပေႃးဢဝ်မူဝ်ဝႃႈတႄႉ ဝၢႆးပွႆးထၢမ်လိၵ်ႈယဝ်ႉထႅင်ႈသီႇဝၼ်း ၸင်ႇမိူဝ်းဢမ်ႇလီႁႃႉ မူဝ်ၶဝ် ၶႂ်ႈသိုဝ်ႉၶူဝ်းၵမ်ႈၽွင်ႈဢိူဝ်ႈ”
ၸၢႆးၶမ်းၵေႃႈၸင်ႇဝႃႈ
“လီယူႇၼႃႇ ၵွပ်ႈသင်ၼႆ ပီၼႆႉႁဝ်းပဵၼ်ပီလိုၼ်းသုတ်းယဝ်ႉလူး၊ တၢင်ႇပွၵ်ႈ တႃႇႁဝ်းသီႇၵေႃႉ တေၶိုၼ်းၺႃးၵၼ်ၸိူင်ႉၼႆၵေႃႈ တေၼၢၼ်းမီးယူႇ ၵွပ်ႈၼႆ ၽွင်းမိူဝ်ႈပႆႇမိူဝ်းၼႆႉ ၶႂ်ႈဢႅဝ်ႇတီႈလႂ်ၵေႃႈ လူဝ်ႇဢႅဝ်ႇဝႆႉထႃႇယဝ်ႉ”
ၼၢင်းၸၢမ်သႅင်း ၸူးဝႃႈ
“လွင်ႈတႃႇတေဢႅဝ်ႇၸိူဝ်းၼၼ်ႉ ဝႆႉဝႆႉၵမ်းၼိုင်ႈၵွၼ်ႇလႃႈ ယၢမ်းလဵဝ်ၼႆႉတႄႉ ၵႂႃႇႁဝ်းၵႂႃႇၵိၼ်တၢင်းၵိၼ် တီႈၵႅၼ်ႇတိင်း(သႅင်ႇတၢင်းၵိၼ်)”
“ၸၢမ်သႅင်းတေလဵင်ႉ မူဝ်ၶဝ်ႁႃႉ”
“ၸႂ်ႈဢိူဝ်ႈ ... ၸၢမ်သႅင်းတေလဵင်ႉလႆ”
“တႄႉႁႃႉ ... ၸၢမ်သႅင်း ပေႃးၼႆၵေႃႈ မူဝ်ယွၼ်းသူးပၼ် ႁႂ်ႈၵၢင်ၸႂ်ၸၢမ်သႅင်း ၸဵဝ်းတဵမ်ထူၼ်ႈသေၵမ်းၼႆယူႇ”
“ပီႈၸၢႆးၶိူဝ်းၵေႃႈ ယွၼ်းသူးပၼ်ယူႇ ဢၼ်ၶႂ်ႈလႆႈၼၼ်ႉ ႁႂ်ႈၸဵဝ်းလႆႈသေၵမ်းဝႃႇ ... ႁေး ႁေး”
ၶဝ်ဢွၼ်ၵၼ်ၸူမ်းၶူဝ်သိူဝ်းၼူဝ်သေ ၵႂႃႇၵိၼ်တၢင်းၵိၼ် တီႈၵႅၼ်ႇတိင်းယဝ်ႉ။
ထိုင်မႃး တၢမ်းၶမ်ႈၽွင်းၶဝ်လူင်းႁူင်းႁဵၼ်းသေ ၽႅဝ်မႃး တီႈႁူင်းသဝ်းၼၼ်ႉ ၼၢင်းမူဝ်ၶၢဝ် ႁပ်ႉလႆႈလိၵ်ႈၽိုၼ်ၼိုင်ႈသေ မၼ်းၼၢင်းမႃးလူတူၺ်း ၼႂ်းလုၵ်းမၼ်း ၽွင်းၼၢင်းၸၢမ်သႅင်းၵႂႃႇ ဢၢပ်ႇၼမ်ႉၼၼ်ႉယူႇ။
ထိုင်
မူဝ်
ဢမ်ႇမုင်ႈမွင်းသေ လႆႈႁၼ်လိၵ်ႈၽိုၼ်ၼႆႉၼႆ မူဝ်တေ ပဵၼ်ဢၼ်ဢၢမ်းၵႂႃႇတႄႉတႄႉယူဝ်ႉၼေႃ။ ၵွပ်ႈသင်ၼႆ ၵွပ်ႈပိူဝ်ႈ ဢမ်ႇတွၼ်ႉယၢမ်ႈတႅမ်ႈမႃးတီႈၵၼ် သေပွၵ်ႈၼၼ်ႉယဝ်ႉ၊ လွင်ႈတၢင်းဢၼ်လၢၵ်ႇလၢႆးသင်တႄႉၵေႃႈ ဢမ်ႇမီးသင်ၼင်ႇၵဝ်ႇ၊ ၵူၺ်းၵႃႈ ဢမ်ႇလႆႈႁၼ်ၼႃႈၵၼ်ၵေႃႈႁိုင် ၸႂ်ထိုင်ၼႃႇသေလႄႈ ၸင်ႇတႅမ်ႈလိၵ်ႈမႃး တီႈမူဝ်ယဝ်ႉ၊ မူဝ်တႄႉ ႁွတ်ႈၽႅဝ်ၸၼ်ႉၸွမ်သေ သမ်ႉပေႃး ဢမ်ႇၶုၵ်းၸႂ်လႆႈႁဝ်း သမ်ႉပေႃး ဢမ်ႇၶႆႈလွမ်တူၺ်းႁဝ်းသေဢိတ်းၵေႃႈ ႁဝ်းတေႃႈဢမ်ႇၽိတ်း ၸႂ်ၼင်ႇၵဝ်ႇ ၵွပ်ႈသင်လႄႈ ဢမ်ႇၽိတ်းၸႂ်ၼႆ ၵွပ်ႈပိူဝ်ႈႁဝ်းလႆႈ ႁၵ်ႉ မူဝ်မႃးၸဵမ်မိူဝ်ႈလဵၵ်ႉမိူဝ်ႈဢွၼ်ႇၼၼ်ႉယဝ်ႉ၊ တၢင်းႁၵ်ႉႁဝ်းၼႆႉ တႄႉ ႁၵ်ႉယဝ်ႉႁၵ်ႉထႅင်ႈ ႁၵ်ႉဢမ်ႇႁႅင်ႈဢမ်ႇဝၢႆးသေပွၵ်ႈၼႆယုမ်ႇလႃႈ။
ပီၼႆႉ မူဝ်တေယဝ်ႉ ၸၼ်ၸွမ်ယဝ်ႉၼေႃ မုင်ႈမွင်းမူဝ် ယဝ်ႉၸွၼ်ႉၸွမ်သေ ၶိုၼ်းၽႅဝ်မႃးတူၼ်ႈတီးၽႂ်းၽႂ်းယူႇ။
ၵေႃႉဢၼ်ၶႂ်ႈႁၼ်ၼႃႈမူဝ်ယူႇၵူႈၶၢဝ်းယၢမ်း
ၸၢႆးသႅင်မိူင်း
ၵေႃႉႁၵ်ႉမိူဝ်ႈဢွၼ်ႇ
ၼၢင်းမူဝ်ၶၢဝ် လူတူၺ်းလိၵ်ႈၽိုၼ်ၼႆႉယဝ်ႉသေ ပဵၼ်ဢၼ်ၼၵ်းၸႂ်ၵႂႃႇတႄႉတႄႉ၊ ၵပ်းၵၢႆႇလူၺ်ႈ ၸၢႆးသႅင်မိူင်းၼႆႉ ပီၵၢႆၽွင်း မိူဝ်ႈမၼ်းၼၢင်း ၽႅဝ်ၵႂႃႇတူၼ်ႈတီးၼၼ်ႉၵေႃႈ ၸၢႆးသႅင်မိူင်းၵႆႉၵႆႉ မႃး ဢႅဝ်ႇတီႈႁိူၼ်းၶဝ်သေလႄႈ မႃးႁႃလၢတ်ႈၵႂၢမ်း သဵင်ၼဵဝ်သဵင်ယၢင် တေႃႇမၼ်းၼၢင်းၼင်ႇၼၼ် မၼ်းၼၢင်းပဵၼ်တၢင်းၶမ်ၸႂ်တႄႉတႄႉ မိူဝ်ႈၼႆႉၵေႃႈ မၼ်းၼၢင်းၶမ်ၸႂ်ၼင်ႇၵဝ်ႇလႄႈ ၸင်ႇသိၵ်ႇလိၵ်ႈ ၼၼ်ႉသေ ၸုတ်ႇၾႆးပႅတ်ႈယဝ်ႉ။
ယူႇၵႅပ်ႉၼိုင်ႈ ၼၢင်းၸၢမ်သႅင်း ဢၢပ်ႇၼမ်ႉသေ ၽႅဝ်မႃး ၼႂ်းတီႈၼွၼ်းၶႃယဝ်ႉ မၼ်းၼၢင်းၸင်ႇတၵ်ႉဝႃႈ
“မူဝ်ပႆႇဢၢပ်ႇၼမ်ႉၵွၼ်ႇႁႃႉၼႆႉ ... ႁိုဝ်ႉ ... မဵၼ်ဢၢႆသႅဝ် သင်ၼႆႉ ဢၢႆၾႆးမႆႈၽႅၼ်ႇႁႃႉ မူဝ်ၸုတ်ႇသင် ပႅတ်ႈမိူဝ်ႈၵႆႈၼႆႉ”
“ဢေႃႈ ... မူဝ်ၸုတ်ႇပႅတ်ႈ ၸေႈယွၵ်းၸေႈယႅၵ်းဢၼ် ဢမ်ႇလူဝ်ႇၸႂ်ႉၼၼ်ႉဢိူဝ်ႈ”
“ၸုတ်ႇလိၵ်ႈၶဵဝ်တႄႉ ဢမ်ႇၸႂ်ႈၼေႃႈ”
“ဢမ်ႇၸႂ်ႈဝႃႈဢမ်ႇၸႂ်ႈ”
ၼၢင်းၸၢမ်သႅင်းၵေႃႈ ၵႂႃႇႁၢင်ႈၶိူင်ႈတႃးမုၼ်ႈမၼ်းယူႇ ဝၢႆးသေၼၼ်ႉ ၼၢင်းမူဝ်ၶၢဝ်ၵေႃႈ ဢဝ်ၵွၵ်းဢၢပ်ႇၼမ်ႉသေ မၼ်းၵႂႃႇဢၢပ်ႇၼမ်ႉမၼ်းယဝ်ႉ။